𑁮. 𑀚𑀫𑁆𑀩𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁮. 𑀅𑀝𑁆𑀞𑀫𑁂 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀲𑀫𑀸𑀧𑀢𑁆𑀢𑀺𑀁. 𑀲𑀓𑁆𑀓𑀸𑀬𑀦𑀺𑀭𑁄𑀥𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀲𑁆𑀲 𑀲𑀓𑁆𑀓𑀸𑀬𑀲𑁆𑀲 𑀦𑀺𑀭𑁄𑀥𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀦 𑀧𑀓𑁆𑀔𑀦𑁆𑀤𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀧𑀸𑀝𑀺𑀓𑀗𑁆𑀔𑁄𑀢𑀺 𑀦 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑁄. 𑀮𑁂𑀧𑀕𑀢𑁂𑀦𑀸𑀢𑀺 𑀮𑁂𑀧𑀫𑀓𑁆𑀔𑀺𑀢𑁂𑀦.

𑀇𑀫𑀲𑁆𑀫𑀺𑀜𑁆𑀘 𑀧𑀦𑀢𑁆𑀣𑁂 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀧𑀼𑀭𑀺𑀲𑁄𑀧𑀫𑁆𑀫𑀁 𑀆𑀳𑀭𑀺𑀢𑀩𑁆𑀩𑀁 𑁋 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀘𑀡𑁆𑀟𑀲𑁄𑀢𑀸𑀬 𑀯𑀸𑀴𑀫𑀘𑁆𑀙𑀸𑀓𑀼𑀮𑀸𑀬 𑀦𑀤𑀺𑀬𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀑𑀭𑀺𑀫𑀁 𑀢𑀻𑀭𑀁 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁, 𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀧𑀸𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂 𑀅𑀝𑁆𑀞 𑀓𑀓𑀼𑀥𑀭𑀼𑀓𑁆𑀔𑁂 𑀤𑀺𑀲𑁆𑀯𑀸 ‘‘𑀲𑀓𑁆𑀓𑀸 𑀇𑀫𑀸𑀬 𑀭𑀼𑀓𑁆𑀔𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑀼’’𑀦𑁆𑀢𑀺 𑀫𑀦𑀲𑀺𑀓𑀢𑁆𑀯𑀸 ‘‘𑀓𑀓𑀼𑀥𑀭𑀼𑀓𑁆𑀔𑀸 𑀦𑀸𑀫 𑀫𑀝𑁆𑀞𑀲𑀸𑀔𑀸 𑀳𑁄𑀦𑁆𑀢𑀺, 𑀲𑀸𑀔𑀸𑀬 𑀳𑀢𑁆𑀣𑀸 𑀦 𑀲𑀡𑁆𑀞𑀳𑁂𑀬𑁆𑀬𑀼’’𑀦𑁆𑀢𑀺 𑀦𑀺𑀕𑁆𑀭𑁄𑀥𑀧𑀺𑀮𑀓𑁆𑀔𑀭𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀲 𑀮𑀸𑀔𑀸𑀬 𑀳𑀢𑁆𑀣𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀏𑀓𑀁 𑀲𑀸𑀔𑀁 𑀕𑀡𑁆𑀳𑀺. 𑀳𑀢𑁆𑀣𑁄 𑀢𑀢𑁆𑀣𑁂𑀯 𑀮𑀕𑀺. 𑀧𑀼𑀦 𑀯𑀸𑀫𑀳𑀢𑁆𑀣𑁂𑀦 𑀤𑀓𑁆𑀔𑀺𑀡𑀧𑀸𑀤𑁂𑀦 𑀯𑀸𑀫𑀧𑀸𑀤𑁂𑀦𑀸𑀢𑀺 𑀘𑀢𑁆𑀢𑀸𑀭𑁄𑀧𑀺 𑀳𑀢𑁆𑀣𑀧𑀸𑀤𑀸 𑀢𑀢𑁆𑀣𑁂𑀯 𑀮𑀕𑀺𑀁𑀲𑀼. 𑀲𑁄 𑀅𑀥𑁄𑀲𑀺𑀭𑁄 𑀮𑀫𑁆𑀩𑀫𑀸𑀦𑁄 𑀉𑀧𑀭𑀺𑀦𑀤𑀺𑀬𑀁 𑀤𑁂𑀯𑁂 𑀯𑀼𑀝𑁆𑀞𑁂 𑀧𑀼𑀡𑁆𑀡𑀸𑀬 𑀦𑀤𑀺𑀬𑀸 𑀲𑁄𑀢𑁂 𑀦𑀺𑀫𑀼𑀕𑁆𑀕𑁄 𑀓𑀼𑀫𑁆𑀪𑀻𑀮𑀸𑀤𑀻𑀦𑀁 𑀪𑀓𑁆𑀔𑁄 𑀅𑀳𑁄𑀲𑀺.

𑀢𑀢𑁆𑀣 𑀦𑀤𑀻𑀲𑁄𑀢𑀁 𑀯𑀺𑀬 𑀲𑀁𑀲𑀸𑀭𑀲𑁄𑀢𑀁 𑀤𑀝𑁆𑀞𑀩𑁆𑀩𑀁, 𑀲𑁄𑀢𑀲𑁆𑀲 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀑𑀭𑀺𑀫𑀢𑀻𑀭𑀁 𑀯𑀺𑀬 𑀲𑀓𑁆𑀓𑀸𑀬𑁄, 𑀧𑀸𑀭𑀺𑀫𑀢𑀻𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸 𑀅𑀝𑁆𑀞 𑀓𑀓𑀼𑀥𑀭𑀼𑀓𑁆𑀔𑀸 𑀯𑀺𑀬 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀮𑁂𑀧𑀫𑀓𑁆𑀔𑀺𑀢𑁂𑀦 𑀳𑀢𑁆𑀣𑁂𑀦 𑀲𑀸𑀔𑀸𑀕𑀳𑀡𑀁 𑀯𑀺𑀬 𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀁 𑀧𑀸𑀭𑀺𑀧𑀦𑁆𑀣𑀺𑀓𑁂 𑀅𑀲𑁄𑀥𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀘𑀢𑀽𑀳𑀺 𑀳𑀢𑁆𑀣𑀧𑀸𑀤𑁂𑀳𑀺 𑀲𑀸𑀔𑀸𑀬 𑀩𑀤𑁆𑀥𑀲𑁆𑀲 𑀑𑀮𑀫𑁆𑀩𑀦𑀁 𑀯𑀺𑀬 𑀧𑀞𑀫𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀬𑀸 𑀮𑀕𑁆𑀕𑀓𑀸𑀮𑁄, 𑀉𑀧𑀭𑀺𑀲𑁄𑀢𑁂 𑀯𑀼𑀝𑁆𑀞𑀺 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀦𑁆𑀦𑀓𑀸𑀮𑁄, 𑀦𑀤𑀺𑀬𑀸 𑀧𑀼𑀡𑁆𑀡𑀸𑀬 𑀲𑁄𑀢𑁂 𑀦𑀺𑀫𑀼𑀕𑁆𑀕𑀲𑁆𑀲 𑀓𑀼𑀫𑁆𑀪𑀻𑀮𑀸𑀤𑀻𑀦𑀁 𑀪𑀓𑁆𑀔𑀪𑀽𑀢𑀓𑀸𑀮𑁄 𑀯𑀺𑀬 𑀲𑀁𑀲𑀸𑀭𑀲𑁄𑀢𑁂 𑀦𑀺𑀫𑀼𑀕𑁆𑀕𑀲𑁆𑀲 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀤𑁆𑀥𑁂𑀦 𑀳𑀢𑁆𑀣𑁂𑀦𑀸𑀢𑀺 𑀲𑀼𑀥𑁄𑀢𑁂𑀦 𑀧𑀭𑀺𑀲𑀼𑀤𑁆𑀥𑀳𑀢𑁆𑀣𑁂𑀦. 𑀇𑀫𑀲𑁆𑀫𑀺𑀫𑁆𑀧𑀺 𑀅𑀢𑁆𑀣𑁂 𑀢𑀸𑀤𑀺𑀲𑀫𑁂𑀯 𑀑𑀧𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀢𑀣𑁂𑀯 𑀳𑀺 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 ‘‘𑀓𑀓𑀼𑀥𑀭𑀼𑀓𑁆𑀔𑀸 𑀦𑀸𑀫 𑀫𑀝𑁆𑀞𑀲𑀸𑀔𑀸, 𑀓𑀺𑀮𑀺𑀝𑁆𑀞𑀳𑀢𑁆𑀣𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀳𑀢𑁆𑀣𑁄 𑀧𑀭𑀺𑀕𑀮𑁂𑀬𑁆𑀬𑀸’’𑀢𑀺 𑀳𑀢𑁆𑀣𑀧𑀸𑀤𑁂 𑀲𑀼𑀥𑁄𑀢𑁂 𑀓𑀢𑁆𑀯𑀸 𑀏𑀓𑀁 𑀲𑀸𑀔𑀁 𑀕𑀡𑁆𑀳𑀺𑀢𑁆𑀯𑀸 𑀧𑀞𑀫𑀁 𑀭𑀼𑀓𑁆𑀔𑀁 𑀆𑀭𑀼𑀴𑁆𑀳𑁄. 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀤𑀼𑀢𑀺𑀬𑀁…𑀧𑁂… 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀅𑀝𑁆𑀞𑀫𑀁, 𑀅𑀝𑁆𑀞𑀫𑀭𑀼𑀓𑁆𑀔𑀢𑁄 𑀑𑀢𑀭𑀺𑀢𑁆𑀯𑀸 𑀧𑀸𑀭𑀺𑀫𑀢𑀻𑀭𑁂 𑀔𑁂𑀫𑀦𑁆𑀢𑀪𑀽𑀫𑀺𑀁 𑀕𑀢𑁄.

𑀢𑀢𑁆𑀣 ‘‘𑀇𑀫𑁂𑀳𑀺 𑀭𑀼𑀓𑁆𑀔𑁂𑀳𑀺 𑀧𑀸𑀭𑀺𑀫𑀢𑀻𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀺𑀦𑁆𑀢𑀺𑀢𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 ‘‘𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀺𑀢𑀓𑀸𑀮𑁄, 𑀲𑀼𑀤𑁆𑀥𑁂𑀦 𑀳𑀢𑁆𑀣𑁂𑀦 𑀲𑀸𑀔𑀸𑀕𑀳𑀡𑀁 𑀯𑀺𑀬 𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀁 𑀧𑀸𑀭𑀺𑀧𑀦𑁆𑀣𑀺𑀓𑀥𑀫𑁆𑀫𑁂 𑀲𑁄𑀥𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁. 𑀢𑀢𑁆𑀣 𑀧𑀞𑀫𑀭𑀼𑀓𑁆𑀔𑀸𑀭𑁄𑀳𑀡𑀓𑀸𑀮𑁄 𑀯𑀺𑀬 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀓𑀸𑀮𑁄, 𑀧𑀞𑀫𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀤𑀼𑀢𑀺𑀬𑀁 𑀆𑀭𑀼𑀴𑁆𑀳𑀓𑀸𑀮𑁄 𑀯𑀺𑀬 𑀧𑀞𑀫𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀬𑀸 𑀅𑀩𑀤𑁆𑀥𑀲𑁆𑀲 𑀢𑀢𑁄 𑀯𑀼𑀝𑁆𑀞𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀓𑀸𑀮𑁄…𑀧𑁂… 𑀲𑀢𑁆𑀢𑀫𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀅𑀝𑁆𑀞𑀫𑀁 𑀆𑀭𑀼𑀴𑁆𑀳𑀓𑀸𑀮𑁄 𑀯𑀺𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀁 𑀦𑀺𑀓𑀦𑁆𑀢𑀺𑀬𑀸 𑀅𑀩𑀤𑁆𑀥𑀲𑁆𑀲 𑀢𑀢𑁄 𑀯𑀼𑀝𑁆𑀞𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀦𑁆𑀦𑀓𑀸𑀮𑁄. 𑀅𑀝𑁆𑀞𑀫𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀧𑀸𑀭𑀺𑀫𑀢𑀻𑀭𑀁 𑀔𑁂𑀫𑀦𑁆𑀢𑀪𑀽𑀫𑀺𑀁 𑀕𑀢𑀓𑀸𑀮𑁄 𑀯𑀺𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑀺𑀓𑀦𑁆𑀢𑀺𑀬𑀸 𑀅𑀩𑀤𑁆𑀥𑀲𑁆𑀲 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀸𑀬 𑀕𑀡𑀩𑀳𑀮𑀫𑀳𑀸𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺. 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀦 𑀧𑀓𑁆𑀔𑀦𑁆𑀤𑀢𑀺. 𑀚𑀫𑁆𑀩𑀸𑀮𑀻𑀢𑀺 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀫𑀳𑀸𑀉𑀤𑀓𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑁄 𑀫𑀳𑀸𑀆𑀯𑀸𑀝𑁄. 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑀸𑀢𑀺 𑀕𑀸𑀫𑀲𑁆𑀲 𑀯𑀸 𑀦𑀕𑀭𑀲𑁆𑀲 𑀯𑀸 𑀉𑀧𑁆𑀧𑀦𑁆𑀦𑀓𑀸𑀮𑁂𑀬𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑁂𑀓𑀸𑀦𑀺 𑀯𑀲𑁆𑀲𑀕𑀡𑀸𑀦𑀺 𑀉𑀧𑁆𑀧𑀦𑁆𑀦𑀸𑀬 𑀏𑀢𑀺𑀲𑁆𑀲𑀸𑀢𑀺 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑀸. 𑀆𑀬𑀫𑀼𑀔𑀸𑀦𑀻𑀢𑀺 𑀘𑀢𑀲𑁆𑀲𑁄 𑀧𑀯𑀺𑀲𑀦𑀓𑀦𑁆𑀤𑀭𑀸. 𑀅𑀧𑀸𑀬𑀫𑀼𑀔𑀸𑀦𑀻𑀢𑀺 𑀅𑀧𑀯𑀸𑀳𑀦𑀘𑁆𑀙𑀺𑀤𑁆𑀤𑀸𑀦𑀺. 𑀦 𑀆𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄𑀢𑀺 𑀦 𑀧𑀸𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑁄. 𑀦 𑀳𑀺 𑀢𑀢𑁄 𑀉𑀤𑀓𑀁 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀸𑀢𑀺.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀉𑀬𑁆𑀬𑀸𑀦𑀕𑀯𑁂𑀲𑀓𑀑𑀧𑀫𑁆𑀫𑀁 𑀆𑀳𑀭𑀺𑀢𑀩𑁆𑀩𑀁. 𑀏𑀓𑁄 𑀓𑀺𑀭 𑀦𑀕𑀭𑀯𑀸𑀲𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀉𑀬𑁆𑀬𑀸𑀦𑀁 𑀕𑀯𑁂𑀲𑀦𑁆𑀢𑁄 𑀦𑀕𑀭𑀢𑁄 𑀦𑀸𑀢𑀺𑀤𑀽𑀭𑁂 𑀦𑀘𑁆𑀘𑀸𑀲𑀦𑁆𑀦𑁂 𑀫𑀳𑀦𑁆𑀢𑀁 𑀚𑀫𑁆𑀩𑀸𑀮𑀺𑀁 𑀅𑀤𑁆𑀤𑀲. 𑀲𑁄 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀭𑀫𑀡𑀻𑀬𑀁 𑀉𑀬𑁆𑀬𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀼𑀤𑁆𑀤𑀸𑀮𑀁 𑀆𑀤𑀸𑀬 𑀘𑀢𑁆𑀢𑀸𑀭𑀺𑀧𑀺 𑀓𑀦𑁆𑀤𑀭𑀸𑀦𑀺 𑀧𑀺𑀥𑀸𑀬 𑀅𑀧𑀯𑀸𑀳𑀦𑀘𑁆𑀙𑀺𑀤𑁆𑀤𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑁂𑀯𑁄 𑀦 𑀲𑀫𑁆𑀫𑀸 𑀯𑀲𑁆𑀲𑀺, 𑀅𑀯𑀲𑁂𑀲𑀉𑀤𑀓𑀁 𑀅𑀧𑀯𑀸𑀳𑀦𑀘𑁆𑀙𑀺𑀤𑁆𑀤𑁂𑀦 𑀧𑀭𑀺𑀲𑁆𑀲𑀯𑀺𑀢𑁆𑀯𑀸 𑀕𑀢𑀁. 𑀘𑀫𑁆𑀫𑀔𑀡𑁆𑀟𑀧𑀺𑀮𑁄𑀢𑀺𑀓𑀸𑀤𑀻𑀦𑀺 𑀢𑀢𑁆𑀣𑁂𑀯 𑀧𑀽𑀢𑀺𑀓𑀸𑀦𑀺 𑀚𑀸𑀢𑀸𑀦𑀺, 𑀧𑀸𑀡𑀓𑀸 𑀲𑀡𑁆𑀞𑀺𑀢𑀸, 𑀲𑀫𑀦𑁆𑀢𑀸 𑀅𑀦𑀼𑀧𑀕𑀫𑀦𑀻𑀬𑀸 𑀚𑀸𑀢𑀸. 𑀉𑀧𑀕𑀢𑀸𑀦𑀫𑁆𑀧𑀺 𑀦𑀸𑀲𑀸𑀧𑀼𑀝𑁂 𑀧𑀺𑀥𑀸𑀬 𑀧𑀓𑁆𑀓𑀫𑀺𑀢𑀩𑁆𑀩𑀁 𑀳𑁄𑀢𑀺. 𑀲𑁄 𑀓𑀢𑀺𑀧𑀸𑀳𑁂𑀦 𑀆𑀕𑀦𑁆𑀢𑁆𑀯𑀸 𑀧𑀝𑀺𑀓𑁆𑀓𑀫𑁆𑀫 𑀞𑀺𑀢𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀉𑀧𑀕𑀦𑁆𑀢𑀼’’𑀦𑁆𑀢𑀺 𑀧𑀓𑁆𑀓𑀸𑀫𑀺.

𑀢𑀢𑁆𑀣 𑀦𑀕𑀭𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄, 𑀉𑀬𑁆𑀬𑀸𑀦𑀁 𑀕𑀯𑁂𑀲𑀦𑁆𑀢𑁂𑀦 𑀕𑀸𑀫𑀤𑁆𑀯𑀸𑀭𑁂 𑀚𑀫𑁆𑀩𑀸𑀮𑀺𑀬𑀸 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑁄, 𑀆𑀬𑀫𑀼𑀔𑀸𑀦𑀁 𑀧𑀺𑀳𑀺𑀢𑀓𑀸𑀮𑁄 𑀯𑀺𑀬 𑀥𑀫𑁆𑀫𑀲𑁆𑀲𑀯𑀦𑁄𑀤𑀓𑀲𑁆𑀲 𑀅𑀮𑀤𑁆𑀥𑀓𑀸𑀮𑁄, 𑀅𑀧𑀸𑀬𑀫𑀼𑀔𑀸𑀦𑀁 𑀯𑀺𑀯𑀝𑀓𑀸𑀮𑁄 𑀯𑀺𑀬 𑀙𑀤𑁆𑀯𑀸𑀭𑀺𑀓𑀲𑀁𑀯𑀭𑀲𑁆𑀲 𑀯𑀺𑀲𑁆𑀲𑀝𑁆𑀞𑀓𑀸𑀮𑁄, 𑀤𑁂𑀯𑀲𑁆𑀲 𑀲𑀫𑁆𑀫𑀸 𑀅𑀯𑀼𑀝𑁆𑀞𑀓𑀸𑀮𑁄 𑀯𑀺𑀬 𑀲𑀧𑁆𑀧𑀸𑀬𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀮𑀤𑁆𑀥𑀓𑀸𑀮𑁄, 𑀅𑀯𑀲𑁂𑀲𑀉𑀤𑀓𑀲𑁆𑀲 𑀅𑀧𑀸𑀬𑀫𑀼𑀔𑁂𑀳𑀺 𑀧𑀭𑀺𑀲𑁆𑀲𑀯𑀺𑀢𑁆𑀯𑀸 𑀕𑀢𑀓𑀸𑀮𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀕𑀼𑀡𑀸𑀦𑀁 𑀧𑀭𑀺𑀳𑀻𑀦𑀓𑀸𑀮𑁄, 𑀉𑀤𑀓𑀲𑁆𑀲 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀆𑀤𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀸𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀺𑀮𑁂𑀲𑀭𑀸𑀲𑀺𑀁 𑀯𑀺𑀥𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀸𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄, 𑀘𑀫𑁆𑀫𑀔𑀡𑁆𑀟𑀧𑀺𑀮𑁄𑀢𑀺𑀓𑀸𑀤𑀻𑀦𑀁 𑀢𑀢𑁆𑀣𑁂𑀯 𑀧𑀽𑀢𑀺𑀪𑀸𑀯𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀭𑀸𑀕𑀸𑀤𑀺𑀓𑀺𑀮𑁂𑀲𑁂𑀳𑀺 𑀧𑀭𑀺𑀧𑀽𑀭𑀺𑀢𑀓𑀸𑀮𑁄, 𑀢𑀲𑁆𑀲 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀕𑀢𑀓𑀸𑀮𑁄 𑀯𑀺𑀬 𑀯𑀝𑁆𑀝𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀲𑁆𑀲 𑀯𑀝𑁆𑀝𑁂 𑀅𑀪𑀺𑀭𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄𑀢𑀺 𑀧𑀸𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑁄. 𑀢𑀢𑁄 𑀳𑀺 𑀉𑀤𑀓𑀁 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀆𑀤𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀇𑀥𑀸𑀧𑀺 𑀢𑀤𑁂𑀯 𑀑𑀧𑀫𑁆𑀫𑀁 𑀆𑀳𑀭𑀺𑀢𑀩𑁆𑀩𑀁. 𑀢𑀢𑁆𑀣 𑀆𑀬𑀫𑀼𑀔𑀸𑀦𑀁 𑀯𑀺𑀯𑀝𑀓𑀸𑀮𑁄 𑀯𑀺𑀬 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀮𑀤𑁆𑀥𑀓𑀸𑀮𑁄, 𑀅𑀧𑀸𑀬𑀫𑀼𑀔𑀸𑀦𑀁 𑀧𑀺𑀳𑀺𑀢𑀓𑀸𑀮𑁄 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑀓𑀸𑀮𑁄, 𑀤𑁂𑀯𑀲𑁆𑀲 𑀲𑀫𑁆𑀫𑀸 𑀯𑀼𑀝𑁆𑀞𑀓𑀸𑀮𑁄 𑀯𑀺𑀬 𑀲𑀧𑁆𑀧𑀸𑀬𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀮𑀤𑁆𑀥𑀓𑀸𑀮𑁄, 𑀉𑀤𑀓𑀲𑁆𑀲 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀆𑀤𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀢𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀓𑀼𑀲𑀮𑀭𑀸𑀲𑀺𑀁 𑀯𑀺𑀥𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀓𑀸𑀮𑁄, 𑀆𑀬𑀫𑀼𑀔𑁂𑀳𑀺 𑀧𑀯𑀺𑀝𑁆𑀞𑁂𑀦 𑀉𑀤𑀓𑁂𑀦 𑀲𑀭𑀲𑁆𑀲 𑀧𑀭𑀺𑀧𑀼𑀡𑁆𑀡𑀓𑀸𑀮𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀧𑀭𑀺𑀧𑀼𑀡𑁆𑀡𑀓𑀸𑀮𑁄, 𑀲𑀫𑀦𑁆𑀢𑀢𑁄 𑀯𑀢𑀺𑀁 𑀓𑀢𑁆𑀯𑀸 𑀭𑀼𑀓𑁆𑀔𑁂 𑀭𑁄𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀫𑀚𑁆𑀛𑁂 𑀧𑀸𑀲𑀸𑀤𑀁 𑀫𑀸𑀧𑁂𑀢𑁆𑀯𑀸 𑀦𑀸𑀝𑀓𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀥𑀫𑁆𑀫𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑁂𑀲𑀦𑀸 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸𑀢𑀺.