𑁭. 𑀅𑀳𑀺𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀻𑀢𑀺 𑀇𑀤𑀁 𑀤𑀝𑁆𑀞𑀯𑀺𑀲𑀸𑀦𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂 𑀳𑀺 𑀓𑁂𑀘𑀺 𑀤𑀝𑁆𑀞𑀯𑀺𑀲𑀸, 𑀲𑀩𑁆𑀩𑁂𑀢𑁂 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀳𑀺𑀭𑀸𑀚𑀓𑀼𑀮𑀸𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀸𑀯 𑀳𑁄𑀦𑁆𑀢𑀺. 𑀅𑀢𑁆𑀢𑀕𑀼𑀢𑁆𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀕𑀼𑀢𑁆𑀢𑀢𑁆𑀣𑀸𑀬. 𑀅𑀢𑁆𑀢𑀭𑀓𑁆𑀔𑀸𑀬𑀸𑀢𑀺 𑀅𑀢𑁆𑀢𑀦𑁄 𑀭𑀓𑁆𑀔𑀡𑀢𑁆𑀣𑀸𑀬. 𑀅𑀢𑁆𑀢𑀧𑀭𑀺𑀢𑁆𑀢𑀸𑀬𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀸𑀡𑀢𑁆𑀣𑀸𑀬. 𑀧𑀭𑀺𑀢𑁆𑀢𑀁 𑀦𑀸𑀫 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸 𑀢𑀁 𑀧𑀭𑀺𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀭𑀽𑀧𑀓𑁆𑀔𑁂𑀳𑀻𑀢𑀺 𑀯𑀺𑀭𑀽𑀧𑀓𑁆𑀔𑀦𑀸𑀕𑀓𑀼𑀮𑁂𑀳𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀸𑀤𑀓𑁂𑀳𑀻𑀢𑀺 𑀅𑀧𑀸𑀤𑀓𑀲𑀢𑁆𑀢𑁂𑀳𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀑𑀤𑀺𑀲𑁆𑀲𑀓𑀫𑁂𑀢𑁆𑀢𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁄𑀤𑀺𑀲𑁆𑀲𑀓𑀫𑁂𑀢𑁆𑀢𑀁 𑀓𑀣𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀲𑀢𑁆𑀢𑀸 𑀧𑀸𑀡𑀸 𑀪𑀽𑀢𑀸𑀢𑀺 𑀲𑀩𑁆𑀩𑀸𑀦𑁂𑀢𑀸𑀦𑀺 𑀧𑀼𑀕𑁆𑀕𑀮𑀯𑁂𑀯𑀘𑀦𑀸𑀦𑁂𑀯. 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀽𑀢𑀺 𑀪𑀤𑁆𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀦𑁆𑀢𑀼. 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸𑀢𑀺 𑀓𑀜𑁆𑀘𑀺 𑀲𑀢𑁆𑀢𑀁 𑀧𑀸𑀧𑀓𑀁 𑀮𑀸𑀫𑀓𑀁 𑀫𑀸 𑀆𑀕𑀘𑁆𑀙𑀢𑀼. 𑀅𑀧𑁆𑀧𑀫𑀸𑀡𑁄 𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀕𑀼𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀅𑀧𑁆𑀧𑀫𑀸𑀡𑀸 𑀦𑀸𑀫. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀫𑀸𑀡𑀯𑀦𑁆𑀢𑀸𑀦𑀻𑀢𑀺 𑀕𑀼𑀡𑀧𑁆𑀧𑀫𑀸𑀡𑁂𑀦 𑀬𑀼𑀢𑁆𑀢𑀸𑀦𑀺. 𑀉𑀡𑁆𑀡𑀦𑀸𑀪𑀻𑀢𑀺 𑀮𑁄𑀫𑀲𑀦𑀸𑀪𑀺𑀓𑁄 𑀫𑀓𑁆𑀓𑀝𑀓𑁄. 𑀲𑀭𑀩𑀽𑀢𑀺 𑀖𑀭𑀕𑁄𑀮𑀺𑀓𑀸. 𑀓𑀢𑀸 𑀫𑁂 𑀭𑀓𑁆𑀔𑀸, 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸𑀢𑀺 𑀫𑀬𑀸 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀭𑀓𑁆𑀔𑀸 𑀘 𑀧𑀭𑀺𑀢𑁆𑀢𑀸𑀡𑀜𑁆𑀘 𑀓𑀢𑀁. 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀻𑀢𑀺 𑀲𑀩𑁆𑀩𑁂𑀧𑀺 𑀫𑁂 𑀓𑀢𑀧𑀭𑀺𑀢𑁆𑀢𑀸𑀡𑀸 𑀲𑀢𑁆𑀢𑀸 𑀅𑀧𑀕𑀘𑁆𑀙𑀦𑁆𑀢𑀼, 𑀫𑀸 𑀫𑀁 𑀯𑀺𑀳𑁂𑀞𑀬𑀺𑀁𑀲𑀽𑀢𑀺 𑀅𑀢𑁆𑀣𑁄.