𑁩. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀻𑀢𑀺 𑀲𑀼𑀦𑁆𑀤𑀭𑀧𑀥𑀸𑀦𑀸𑀦𑀺 𑀉𑀢𑁆𑀢𑀫𑀯𑀻𑀭𑀺𑀬𑀸𑀦𑀺. 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀸. 𑀫𑀸𑀭𑀥𑁂𑀬𑁆𑀬𑀸𑀪𑀺𑀪𑀽𑀢𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀁 𑀫𑀸𑀭𑀥𑁂𑀬𑁆𑀬𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸. 𑀢𑁂 𑀅𑀲𑀺𑀢𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀅𑀦𑀺𑀲𑁆𑀲𑀺𑀢𑀸 𑀦𑀸𑀫. 𑀚𑀸𑀢𑀺𑀫𑀭𑀡𑀪𑀬𑀲𑁆𑀲𑀸𑀢𑀺 𑀚𑀸𑀢𑀺𑀜𑁆𑀘 𑀫𑀭𑀡𑀜𑁆𑀘 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀲𑁆𑀲, 𑀚𑀸𑀢𑀺𑀫𑀭𑀡𑀲𑀗𑁆𑀔𑀸𑀢𑀲𑁆𑀲𑁂𑀯 𑀯𑀸 𑀪𑀬𑀲𑁆𑀲. 𑀧𑀸𑀭𑀕𑀽𑀢𑀺 𑀧𑀸𑀭𑀗𑁆𑀕𑀢𑀸. 𑀢𑁂 𑀢𑀼𑀲𑀺𑀢𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀢𑀼𑀝𑁆𑀞𑀸 𑀦𑀸𑀫. 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺𑀦𑁆𑀢𑀺 𑀲𑀲𑁂𑀦𑀓𑀁 𑀫𑀸𑀭𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑀸. 𑀢𑁂 𑀅𑀦𑁂𑀚𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀏𑀚𑀸𑀬 𑀅𑀦𑁂𑀚𑀸 𑀦𑀺𑀘𑁆𑀘𑀮𑀸 𑀦𑀸𑀫. 𑀦𑀫𑀼𑀘𑀺𑀩𑀮𑀦𑁆𑀢𑀺 𑀫𑀸𑀭𑀩𑀮𑀁. 𑀉𑀧𑀸𑀢𑀺𑀯𑀢𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸. 𑀢𑁂 𑀲𑀼𑀔𑀺𑀢𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀦 𑀲𑀼𑀔𑀺𑀢𑀸 𑀦𑀸𑀫. 𑀢𑁂𑀦𑁂𑀯𑀸𑀳 𑁋

‘‘𑀲𑀼𑀔𑀺𑀢𑀸 𑀯𑀢 𑀅𑀭𑀳𑀦𑁆𑀢𑁄, 𑀢𑀡𑁆𑀳𑀸 𑀦𑁂𑀲𑀁 𑀦 𑀯𑀺𑀚𑁆𑀚𑀢𑀺;

𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀫𑁄𑀳𑀚𑀸𑀮𑀁 𑀧𑀤𑀸𑀮𑀺𑀢’’𑀦𑁆𑀢𑀺. (𑀲𑀁. 𑀦𑀺. 𑁩.𑁭𑁬);