𑁯. 𑀧𑀞𑀫𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨. 𑀦𑀯𑀫𑁂 𑀦𑀺𑀤𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸𑀢𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬. 𑀮𑁄𑀪𑀧𑀓𑀢𑀦𑁆𑀢𑀺 𑀮𑁄𑀪𑁂𑀦 𑀧𑀓𑀢𑀁. 𑀲𑀸𑀯𑀚𑁆𑀚𑀦𑁆𑀢𑀺 𑀲𑀤𑁄𑀲𑀁. 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀲𑀫𑀼𑀤𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀢𑀁 𑀓𑀫𑁆𑀫𑀁 𑀅𑀜𑁆𑀜𑁂𑀲𑀫𑁆𑀧𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀦 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀦𑀺𑀭𑁄𑀥𑀸𑀬𑀸𑀢𑀺 𑀢𑀁 𑀧𑀦 𑀓𑀫𑁆𑀫𑀁 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀦𑀺𑀭𑁄𑀥𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸𑀢𑀺 𑀯𑀺𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀢𑁆𑀣𑀸𑀬. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁.