𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀲𑀫𑁆𑀩𑁄𑀥𑀯𑀕𑁆𑀕𑁄

𑁧. 𑀧𑀼𑀩𑁆𑀩𑁂𑀯𑀲𑀫𑁆𑀩𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸𑀢𑀺 𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂𑀯, 𑀅𑀭𑀺𑀬𑀫𑀕𑁆𑀕𑀧𑁆𑀧𑀢𑁆𑀢𑀺𑀢𑁄 𑀅𑀧𑀭𑀪𑀸𑀕𑁂𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲𑀸𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀲𑁆𑀲. 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑁂𑀯 𑀲𑀢𑁄, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀦𑁆𑀢𑀼𑀁 𑀆𑀭𑀪𑀦𑁆𑀢𑀲𑁆𑀲𑁂𑀯 𑀲𑀢𑁄, 𑀲𑀫𑁆𑀩𑁄𑀥𑀺𑀬𑀸 𑀯𑀸 𑀲𑀢𑁆𑀢𑀲𑁆𑀲𑁂𑀯 𑀮𑀕𑁆𑀕𑀲𑁆𑀲𑁂𑀯 𑀲𑀢𑁄. 𑀤𑀻𑀧𑀗𑁆𑀓𑀭𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑀺𑀤𑁆𑀥𑀺𑀢𑁄 𑀧𑀪𑀼𑀢𑀺 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀲𑀢𑁆𑀢𑁄 𑀮𑀕𑁆𑀕𑁄 ‘‘𑀧𑀢𑁆𑀢𑀩𑁆𑀩𑀸 𑀫𑀬𑀸 𑀏𑀲𑀸’’𑀢𑀺 𑀢𑀤𑀥𑀺𑀕𑀫𑀸𑀬 𑀧𑀭𑀓𑁆𑀓𑀫𑀁 𑀅𑀫𑀼𑀜𑁆𑀘𑀦𑁆𑀢𑁄𑀬𑁂𑀯 𑀆𑀕𑀢𑁄, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀓𑁄 𑀦𑀼 𑀔𑁄𑀢𑀺 𑀓𑀢𑀫𑁄 𑀦𑀼 𑀔𑁄. 𑀮𑁄𑀓𑁄𑀢𑀺 𑀲𑀗𑁆𑀔𑀸𑀭𑀮𑁄𑀓𑁄. 𑀅𑀲𑁆𑀲𑀸𑀤𑁄𑀢𑀺 𑀫𑀥𑀼𑀭𑀸𑀓𑀸𑀭𑁄. 𑀆𑀤𑀻𑀦𑀯𑁄𑀢𑀺 𑀅𑀦𑀪𑀺𑀦𑀦𑁆𑀤𑀺𑀢𑀩𑁆𑀩𑀸𑀓𑀸𑀭𑁄. 𑀢𑀲𑁆𑀲 𑀫𑀬𑁆𑀳𑀦𑁆𑀢𑀺 𑀢𑀲𑁆𑀲 𑀏𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀫𑀬𑁆𑀳𑀁. 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄 𑀯𑀺𑀦𑀬𑀁 𑀕𑀘𑁆𑀙𑀢𑀺 𑀧𑀳𑀻𑀬𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 ‘‘𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀮𑁄𑀓𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀤𑀁 𑀦𑀺𑀩𑁆𑀩𑀸𑀦𑀁 𑀮𑁄𑀓𑀢𑁄 𑀦𑀺𑀲𑁆𑀲𑀝𑀢𑁆𑀢𑀸 𑀮𑁄𑀓𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀸𑀯𑀓𑀻𑀯𑀦𑁆𑀢𑀺 𑀬𑀢𑁆𑀢𑀓𑀁 𑀧𑀫𑀸𑀡𑀁 𑀓𑀸𑀮𑀁. 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀅𑀜𑁆𑀜𑀸𑀲𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁨. 𑀧𑀞𑀫𑀅𑀲𑁆𑀲𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀤𑀼𑀢𑀺𑀬𑁂 𑀅𑀲𑁆𑀲𑀸𑀤𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀦𑁆𑀢𑀺 𑀅𑀲𑁆𑀲𑀸𑀤𑀧𑀭𑀺𑀬𑁂𑀲𑀦𑀢𑁆𑀣𑀸𑀬 𑀅𑀘𑀭𑀺𑀁. 𑀓𑀼𑀢𑁄 𑀧𑀝𑁆𑀞𑀸𑀬𑀸𑀢𑀺? 𑀲𑀼𑀫𑁂𑀥𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀧𑀜𑁆𑀜𑀸𑀬𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬. 𑀲𑀼𑀤𑀺𑀝𑁆𑀞𑁄𑀢𑀺 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑀺𑀬𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁪. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀘𑀢𑀼𑀢𑁆𑀣𑁂 𑀲𑀸𑀫𑀜𑁆𑀜𑀢𑁆𑀣𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀭𑀺𑀬𑀨𑀮𑀁. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀸𑀫𑀜𑁆𑀜𑀢𑁆𑀣𑁂𑀦 𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑁂𑀦 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀔𑀦𑁆𑀥𑀮𑁄𑀓𑁄𑀯 𑀓𑀣𑀺𑀢𑁄.

𑁫. 𑀭𑀼𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮. 𑀧𑀜𑁆𑀘𑀫𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀁. 𑀓𑀢𑀭𑀸𑀬 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸? 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀅𑀦𑀸𑀘𑀸𑀭𑁂. 𑀢𑁂 𑀓𑀺𑀭 𑀕𑀸𑀬𑀦𑁆𑀢𑀸 𑀦𑀘𑁆𑀘𑀦𑁆𑀢𑀸 𑀳𑀲𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀪𑀺𑀓𑁆𑀔𑀽 𑀤𑀲𑀩𑀮𑀲𑁆𑀲 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀑𑀯𑀸𑀤𑀢𑁆𑀣𑀸𑀬 𑀇𑀤𑀁 𑀲𑀼𑀢𑁆𑀢𑀁 𑀆𑀭𑀪𑀺. 𑀢𑀢𑁆𑀣 𑀭𑀼𑀡𑁆𑀡𑀦𑁆𑀢𑀺 𑀭𑁄𑀤𑀺𑀢𑀁. 𑀉𑀫𑁆𑀫𑀢𑁆𑀢𑀓𑀦𑁆𑀢𑀺 𑀉𑀫𑁆𑀫𑀢𑁆𑀢𑀓𑀓𑀺𑀭𑀺𑀬𑀸. 𑀓𑁄𑀫𑀸𑀭𑀓𑀦𑁆𑀢𑀺 𑀓𑀼𑀫𑀸𑀭𑀓𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁. 𑀤𑀦𑁆𑀢𑀯𑀺𑀤𑀁𑀲𑀓𑀳𑀲𑀺𑀢𑀦𑁆𑀢𑀺 𑀤𑀦𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀧𑀸𑀡𑀺𑀁 𑀧𑀳𑀭𑀦𑁆𑀢𑀸𑀦𑀁 𑀫𑀳𑀸𑀲𑀤𑁆𑀤𑁂𑀦 𑀳𑀲𑀺𑀢𑀁. 𑀲𑁂𑀢𑀼𑀖𑀸𑀢𑁄 𑀕𑀻𑀢𑁂𑀢𑀺 𑀕𑀻𑀢𑁂 𑀯𑁄 𑀧𑀘𑁆𑀘𑀬𑀖𑀸𑀢𑁄 𑀳𑁄𑀢𑀼, 𑀲𑀳𑁂𑀢𑀼𑀓𑀁 𑀕𑀻𑀢𑀁 𑀧𑀚𑀳𑀣𑀸𑀢𑀺 𑀤𑀻𑀧𑁂𑀢𑀺. 𑀦𑀘𑁆𑀘𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀁. 𑀥𑀫𑁆𑀫𑀧𑁆𑀧𑀫𑁄𑀤𑀺𑀢𑀸𑀦𑀁 𑀲𑀢𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀓𑀸𑀭𑀡𑀁, 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀧𑀫𑀼𑀤𑀺𑀢𑀸𑀦𑀁 𑀲𑀦𑁆𑀢𑀸𑀦𑀁. 𑀲𑀺𑀢𑀁 𑀲𑀺𑀢𑀫𑀢𑁆𑀢𑀸𑀬𑀸𑀢𑀺 𑀢𑀲𑁆𑀫𑀺𑀁 𑀲𑀺𑀢𑀓𑀸𑀭𑀡𑁂 𑀲𑀢𑀺 𑀬𑀁 𑀲𑀺𑀢𑀁 𑀓𑀭𑁄𑀣, 𑀢𑀁 𑀯𑁄 𑀲𑀺𑀢𑀫𑀢𑁆𑀢𑀸𑀬 𑀅𑀕𑁆𑀕𑀤𑀦𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀤𑀲𑁆𑀲𑀦𑀸𑀬𑀬𑁂𑀯 𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬. 𑀅𑀢𑀺𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯. 𑀙𑀝𑁆𑀞𑁂 𑀲𑁄𑀧𑁆𑀧𑀲𑁆𑀲𑀸𑀢𑀺 𑀦𑀺𑀤𑁆𑀤𑀸𑀬. 𑀧𑀝𑀺𑀲𑁂𑀯𑀦𑀸𑀬 𑀦𑀢𑁆𑀣𑀺 𑀢𑀺𑀢𑁆𑀢𑀻𑀢𑀺 𑀬𑀣𑀸 𑀬𑀣𑀸 𑀧𑀝𑀺𑀲𑁂𑀯𑀢𑀺, 𑀢𑀣𑀸 𑀢𑀣𑀸 𑀭𑀼𑀘𑁆𑀘𑀢𑀺𑀬𑁂𑀯𑀸𑀢𑀺 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀳𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀲𑀼𑀭𑀸 𑀪𑀯𑁂𑀬𑁆𑀬, 𑀲𑀼𑀭𑀸𑀲𑁄𑀡𑁆𑀟𑁄 𑀘 𑀫𑀘𑁆𑀙𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑀲𑁆𑀲 𑀢𑀢𑁆𑀣 𑀘𑀭𑀦𑁆𑀢𑀲𑁆𑀲𑀧𑀺 𑀲𑀬𑀦𑁆𑀢𑀲𑁆𑀲𑀧𑀺 𑀢𑀺𑀢𑁆𑀢𑀺 𑀦𑀸𑀫 𑀦 𑀪𑀯𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁭. 𑀅𑀭𑀓𑁆𑀔𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦. 𑀲𑀢𑁆𑀢𑀫𑁂 𑀅𑀯𑀲𑁆𑀲𑀼𑀢𑀁 𑀳𑁄𑀢𑀻𑀢𑀺 𑀢𑀺𑀦𑁆𑀢𑀁 𑀳𑁄𑀢𑀺. 𑀦 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀻𑀢𑀺 𑀅𑀧𑀸𑀬𑁂 𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀬𑀢𑀸𑀬 𑀦 𑀮𑀤𑁆𑀥𑀓𑀁 𑀳𑁄𑀢𑀺. 𑀓𑀸𑀮𑀓𑀺𑀭𑀺𑀬𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀼𑀓𑁆𑀓𑀧𑀓𑁆𑀔𑁂 𑀲𑀕𑁆𑀕𑁂 𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀬𑀢𑀸𑀬 𑀪𑀤𑁆𑀤𑀓𑀁 𑀳𑁄𑀢𑀺 𑀮𑀤𑁆𑀥𑀓𑀁. 𑀢𑀁 𑀧𑀦 𑀏𑀓𑀦𑁆𑀢𑁂𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀅𑀭𑀺𑀬𑀲𑀸𑀯𑀓𑀸𑀦𑀁𑀬𑁂𑀯 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁮. 𑀩𑁆𑀬𑀸𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧. 𑀅𑀝𑁆𑀞𑀫𑁂 𑀩𑁆𑀬𑀸𑀧𑀦𑁆𑀦𑀦𑁆𑀢𑀺 𑀧𑀓𑀢𑀺𑀪𑀸𑀯𑀁 𑀚𑀳𑀺𑀢𑁆𑀯𑀸 𑀞𑀺𑀢𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁯. 𑀧𑀞𑀫𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨. 𑀦𑀯𑀫𑁂 𑀦𑀺𑀤𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸𑀢𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬. 𑀮𑁄𑀪𑀧𑀓𑀢𑀦𑁆𑀢𑀺 𑀮𑁄𑀪𑁂𑀦 𑀧𑀓𑀢𑀁. 𑀲𑀸𑀯𑀚𑁆𑀚𑀦𑁆𑀢𑀺 𑀲𑀤𑁄𑀲𑀁. 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀲𑀫𑀼𑀤𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀢𑀁 𑀓𑀫𑁆𑀫𑀁 𑀅𑀜𑁆𑀜𑁂𑀲𑀫𑁆𑀧𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬 𑀧𑀺𑀡𑁆𑀟𑀓𑀭𑀡𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺. 𑀦 𑀢𑀁 𑀓𑀫𑁆𑀫𑀁 𑀓𑀫𑁆𑀫𑀦𑀺𑀭𑁄𑀥𑀸𑀬𑀸𑀢𑀺 𑀢𑀁 𑀧𑀦 𑀓𑀫𑁆𑀫𑀁 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀦𑀺𑀭𑁄𑀥𑀢𑁆𑀣𑀸𑀬 𑀦 𑀲𑀁𑀯𑀢𑁆𑀢𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸𑀢𑀺 𑀯𑀺𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀢𑁆𑀣𑀸𑀬. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁.

𑁧𑁦. 𑀤𑀼𑀢𑀺𑀬𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀤𑀲𑀫𑁂 𑀓𑀫𑁆𑀫𑀸𑀦𑀦𑁆𑀢𑀺 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀫𑁂𑀯. 𑀙𑀦𑁆𑀤𑀭𑀸𑀕𑀝𑁆𑀞𑀸𑀦𑀺𑀬𑁂𑀢𑀺 𑀙𑀦𑁆𑀤𑀭𑀸𑀕𑀲𑁆𑀲 𑀓𑀸𑀭𑀡𑀪𑀽𑀢𑁂. 𑀆𑀭𑀩𑁆𑀪𑀸𑀢𑀺 𑀆𑀕𑀫𑁆𑀫 𑀲𑀦𑁆𑀥𑀸𑀬 𑀧𑀝𑀺𑀘𑁆𑀘. 𑀙𑀦𑁆𑀤𑁄𑀢𑀺 𑀢𑀡𑁆𑀳𑀸𑀙𑀦𑁆𑀤𑁄. 𑀬𑁄 𑀘𑁂𑀢𑀲𑁄 𑀲𑀸𑀭𑀸𑀕𑁄𑀢𑀺 𑀬𑁄 𑀘𑀺𑀢𑁆𑀢𑀲𑁆𑀲 𑀭𑀸𑀕𑁄 𑀭𑀚𑁆𑀚𑀦𑀸 𑀭𑀚𑁆𑀚𑀺𑀢𑀢𑁆𑀢𑀁, 𑀏𑀢𑀫𑀳𑀁 𑀲𑀁𑀬𑁄𑀚𑀦𑀁 𑀯𑀤𑀸𑀫𑀺, 𑀩𑀦𑁆𑀥𑀦𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀧𑀓𑁆𑀔𑁂 𑀓𑀫𑁆𑀫𑀸𑀦𑀦𑁆𑀢𑀺 𑀯𑀺𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀸𑀦𑀁. 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑀻𑀢𑀺 𑀢𑀁 𑀅𑀪𑀺𑀦𑀺𑀯𑀢𑁆𑀢𑁂𑀢𑀺. 𑀬𑀤𑀸 𑀯𑀸 𑀢𑁂𑀦 𑀯𑀺𑀧𑀸𑀓𑁄 𑀜𑀸𑀢𑁄 𑀳𑁄𑀢𑀺 𑀯𑀺𑀤𑀺𑀢𑁄, 𑀢𑀤𑀸 𑀢𑁂 𑀘𑁂𑀯 𑀥𑀫𑁆𑀫𑁂 𑀢𑀜𑁆𑀘 𑀯𑀺𑀧𑀸𑀓𑀁 𑀅𑀪𑀺𑀦𑀺𑀯𑀢𑁆𑀢𑁂𑀢𑀺. 𑀇𑀫𑀺𑀦𑀸 𑀘 𑀧𑀤𑁂𑀦 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀢𑀤𑀪𑀺𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 𑀫𑀕𑁆𑀕𑁄. 𑀘𑁂𑀢𑀲𑀸 𑀅𑀪𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀇𑀫𑀺𑀦𑀸 𑀘 𑀫𑀕𑁆𑀕𑁄𑀯. 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀧𑀲𑁆𑀲𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.

𑀲𑀫𑁆𑀩𑁄𑀥𑀯𑀕𑁆𑀕𑁄 𑀧𑀞𑀫𑁄.

(𑁧𑁨) 𑁨. 𑀆𑀧𑀸𑀬𑀺𑀓𑀯𑀕𑁆𑀕𑁄

𑁧. 𑀆𑀧𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀧𑀸𑀬𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀆𑀧𑀸𑀬𑀺𑀓𑀸. 𑀦𑀺𑀭𑀬𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀭𑀬𑀺𑀓𑀸. 𑀇𑀤𑀫𑀧𑁆𑀧𑀳𑀸𑀬𑀸𑀢𑀺 𑀇𑀤𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀢𑀸𑀤𑀺𑀁 𑀧𑀸𑀧𑀥𑀫𑁆𑀫𑀢𑁆𑀢𑀬𑀁 𑀅𑀯𑀺𑀚𑀳𑀺𑀢𑁆𑀯𑀸. 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄𑀢𑀺 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀭𑀽𑀧𑀓𑁄, 𑀢𑁂𑀲𑀁 𑀯𑀸 𑀆𑀓𑀧𑁆𑀧𑀁 𑀅𑀯𑀺𑀚𑀳𑀦𑁂𑀦 ‘‘𑀅𑀳𑀫𑁆𑀧𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀏𑀯𑀁𑀧𑀝𑀺𑀜𑁆𑀜𑁄. 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺 𑀘𑁄𑀤𑁂𑀢𑀺. 𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑁂 𑀲𑁂𑀯𑀦𑁆𑀢𑀲𑁆𑀲 𑀦𑀢𑁆𑀣𑀺 𑀤𑁄𑀲𑁄. 𑀧𑀸𑀢𑀩𑁆𑀬𑀢𑀦𑁆𑀢𑀺 𑀧𑀺𑀯𑀺𑀢𑀩𑁆𑀩𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀁 𑀦𑀺𑀭𑀸𑀲𑀗𑁆𑀓𑁂𑀦 𑀘𑀺𑀢𑁆𑀢𑁂𑀦 𑀧𑀺𑀧𑀸𑀲𑀺𑀢𑀲𑁆𑀲 𑀧𑀸𑀦𑀻𑀬𑀧𑀺𑀯𑀦𑀲𑀤𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁨. 𑀤𑀼𑀮𑁆𑀮𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀤𑀼𑀢𑀺𑀬𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻𑀢𑀺 ‘‘𑀇𑀫𑀺𑀦𑀸 𑀫𑀬𑁆𑀳𑀁 𑀓𑀢’’𑀦𑁆𑀢𑀺 𑀢𑁂𑀦 𑀓𑀢𑀓𑀫𑁆𑀫𑀁 𑀜𑀢𑁆𑀯𑀸 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀧𑀝𑀺𑀓𑀭𑀡𑀓𑀧𑀼𑀕𑁆𑀕𑀮𑁄.

𑁩. 𑀅𑀧𑁆𑀧𑀫𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀢𑀢𑀺𑀬𑁂 𑀲𑀼𑀔𑁂𑀦 𑀫𑁂𑀢𑀩𑁆𑀩𑁄𑀢𑀺 𑀲𑀼𑀧𑁆𑀧𑀫𑁂𑀬𑁆𑀬𑁄. 𑀤𑀼𑀓𑁆𑀔𑁂𑀦 𑀫𑁂𑀢𑀩𑁆𑀩𑁄𑀢𑀺 𑀤𑀼𑀧𑁆𑀧𑀫𑁂𑀬𑁆𑀬𑁄. 𑀧𑀫𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀧𑁆𑀧𑀫𑁂𑀬𑁆𑀬𑁄. 𑀉𑀦𑁆𑀦𑀴𑁄𑀢𑀺 𑀉𑀕𑁆𑀕𑀢𑀦𑀴𑁄, 𑀢𑀼𑀘𑁆𑀙𑀫𑀸𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀘𑀧𑀮𑁄𑀢𑀺 𑀧𑀢𑁆𑀢𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀼𑀔𑀭𑁄𑀢𑀺 𑀫𑀼𑀔𑀔𑀭𑁄. 𑀯𑀺𑀓𑀺𑀡𑁆𑀡𑀯𑀸𑀘𑁄𑀢𑀺 𑀅𑀲𑀜𑁆𑀜𑀢𑀯𑀘𑀦𑁄. 𑀅𑀲𑀫𑀸𑀳𑀺𑀢𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀭𑀳𑀺𑀢𑁄. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄𑀢𑀺 𑀪𑀦𑁆𑀢𑀘𑀺𑀢𑁆𑀢𑁄 𑀪𑀦𑁆𑀢𑀕𑀸𑀯𑀺𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑁄. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀯𑀺𑀯𑀝𑀺𑀦𑁆𑀤𑁆𑀭𑀺𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁪. 𑀆𑀦𑁂𑀜𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀘𑀢𑀼𑀢𑁆𑀣𑁂 𑀢𑀤𑀲𑁆𑀲𑀸𑀤𑁂𑀢𑀻𑀢𑀺 𑀢𑀁 𑀛𑀸𑀦𑀁 𑀅𑀲𑁆𑀲𑀸𑀤𑁂𑀢𑀺. 𑀢𑀁 𑀦𑀺𑀓𑀸𑀫𑁂𑀢𑀻𑀢𑀺 𑀢𑀤𑁂𑀯 𑀧𑀢𑁆𑀣𑁂𑀢𑀺. 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀢𑁂𑀦 𑀛𑀸𑀦𑁂𑀦 𑀢𑀼𑀝𑁆𑀞𑀺𑀁 𑀆𑀧𑀚𑁆𑀚𑀢𑀺. 𑀢𑀢𑁆𑀭 𑀞𑀺𑀢𑁄𑀢𑀺 𑀢𑀲𑁆𑀫𑀺𑀁 𑀛𑀸𑀦𑁂 𑀞𑀺𑀢𑁄. 𑀢𑀤𑀥𑀺𑀫𑀼𑀢𑁆𑀢𑁄𑀢𑀺 𑀢𑀢𑁆𑀣𑁂𑀯 𑀅𑀥𑀺𑀫𑀼𑀢𑁆𑀢𑁄. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀻𑀢𑀺 𑀢𑁂𑀦 𑀩𑀳𑀼𑀮𑀁 𑀯𑀺𑀳𑀭𑀦𑁆𑀢𑁄. 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻𑀢𑀺 𑀲𑀳𑀪𑀸𑀯𑀁 𑀉𑀧𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀭𑀬𑀫𑁆𑀧𑀺 𑀕𑀘𑁆𑀙𑀢𑀻𑀢𑀺𑀆𑀤𑀺 𑀦𑀺𑀭𑀬𑀸𑀤𑀻𑀳𑀺 𑀅𑀯𑀺𑀧𑁆𑀧𑀫𑀼𑀢𑁆𑀢𑀢𑁆𑀢𑀸 𑀅𑀧𑀭𑀧𑀭𑀺𑀬𑀸𑀬𑀯𑀲𑁂𑀦 𑀢𑀢𑁆𑀣 𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀢𑀲𑁆𑀲 𑀉𑀧𑀘𑀸𑀭𑀚𑁆𑀛𑀸𑀦𑀢𑁄 𑀩𑀮𑀯𑀢𑀭𑀁 𑀅𑀓𑀼𑀲𑀮𑀁 𑀅𑀢𑁆𑀣𑀺, 𑀬𑁂𑀦 𑀅𑀦𑀦𑁆𑀢𑀭𑀁 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀪𑀕𑀯𑀢𑁄 𑀧𑀦 𑀲𑀸𑀯𑀓𑁄𑀢𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀻𑀦𑀁 𑀅𑀜𑁆𑀜𑀢𑀭𑁄. 𑀢𑀲𑁆𑀫𑀺𑀁𑀬𑁂𑀯 𑀪𑀯𑁂𑀢𑀺 𑀢𑀢𑁆𑀣𑁂𑀯 𑀅𑀭𑀽𑀧𑀪𑀯𑁂. 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀅𑀥𑀺𑀓𑀧𑁆𑀧𑀬𑁄𑀕𑁄. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑀧𑀢𑁆𑀢𑀺𑀚𑁆𑀛𑀸𑀦𑀁 𑀓𑀣𑀺𑀢𑀁, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀤𑁂𑀯 𑀉𑀧𑀧𑀢𑁆𑀢𑀺𑀚𑁆𑀛𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀜𑁆𑀘 𑀓𑀣𑀺𑀢𑀁.

𑁫. 𑀯𑀺𑀧𑀢𑁆𑀢𑀺𑀲𑀫𑁆𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁮. 𑀧𑀜𑁆𑀘𑀫𑁂 𑀲𑀻𑀮𑀯𑀺𑀧𑀢𑁆𑀢𑀻𑀢𑀺 𑀲𑀻𑀮𑀲𑁆𑀲 𑀯𑀺𑀧𑀦𑁆𑀦𑀸𑀓𑀸𑀭𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺 𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀫𑀳𑀸𑀬𑁄𑀕𑁄. 𑀳𑀼𑀢𑀦𑁆𑀢𑀺 𑀧𑀳𑁂𑀡𑀓𑀲𑀓𑁆𑀓𑀸𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀫𑁆𑀧𑀺 𑀉𑀪𑀬𑀁 𑀨𑀮𑀸𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀦𑁆𑀢𑀺 𑀲𑀼𑀓𑀢𑀤𑀼𑀓𑁆𑀓𑀢𑀸𑀦𑀁, 𑀓𑀼𑀲𑀮𑀸𑀓𑀼𑀲𑀮𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀨𑀮𑀁 𑀯𑀺𑀧𑀸𑀓𑁄𑀢𑀺 𑀬𑀁 𑀨𑀮𑀦𑁆𑀢𑀺 𑀯𑀸 𑀯𑀺𑀧𑀸𑀓𑁄𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀢𑀁 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄𑀢𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀺, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀥 𑀮𑁄𑀓𑁂 𑀞𑀺𑀢𑀲𑁆𑀲𑀸𑀧𑀺 𑀧𑀭𑀮𑁄𑀓𑁄 𑀦𑀢𑁆𑀣𑀺, 𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀢𑁆𑀣𑀺 𑀫𑀸𑀢𑀸 𑀦𑀢𑁆𑀣𑀺 𑀧𑀺𑀢𑀸𑀢𑀺 𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀸𑀪𑀸𑀯𑀯𑀲𑁂𑀦 𑀯𑀤𑀢𑀺. 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸𑀢𑀺 𑀘𑀯𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀲𑀫𑁆𑀧𑀤𑀸𑀢𑀺 𑀧𑀸𑀭𑀺𑀧𑀽𑀭𑀺𑀬𑁄. 𑀲𑀻𑀮𑀲𑀫𑁆𑀧𑀤𑀸𑀢𑀺 𑀲𑀻𑀮𑀲𑁆𑀲 𑀧𑀭𑀺𑀧𑀼𑀡𑁆𑀡𑀅𑀯𑁂𑀓𑀮𑁆𑀮𑀪𑀸𑀯𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀕𑀳𑁂𑀢𑀩𑁆𑀩𑀁.

𑁬. 𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁯. 𑀙𑀝𑁆𑀞𑁂 𑀅𑀧𑀡𑁆𑀡𑀓𑁄 𑀫𑀡𑀻𑀢𑀺 𑀙𑀳𑀺 𑀢𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀸𑀲𑀓𑁄. 𑀲𑀼𑀕𑀢𑀺𑀁 𑀲𑀕𑁆𑀕𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀲𑀕𑁆𑀕𑀁 𑀮𑁄𑀓𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀻𑀮𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑀸𑀢𑀺 𑀉𑀪𑀬𑀫𑁆𑀧𑀺 𑀫𑀺𑀲𑁆𑀲𑀓𑀁 𑀓𑀣𑀺𑀢𑀁. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁮. 𑀧𑀞𑀫𑀲𑁄𑀘𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁧. 𑀅𑀝𑁆𑀞𑀫𑁂 𑀲𑁄𑀘𑁂𑀬𑁆𑀬𑀸𑀦𑀻𑀢𑀺 𑀲𑀼𑀘𑀺𑀪𑀸𑀯𑀸. 𑀓𑀸𑀬𑀲𑁄𑀘𑁂𑀬𑁆𑀬𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂 𑀲𑀼𑀘𑀺𑀪𑀸𑀯𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀲𑀼 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀅𑀕𑀸𑀭𑀺𑀓𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺 𑀯𑀝𑁆𑀝𑀢𑀺.

𑁯. 𑀤𑀼𑀢𑀺𑀬𑀲𑁄𑀘𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀦𑀯𑀫𑁂 𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁. 𑀓𑀸𑀫𑀘𑁆𑀙𑀦𑁆𑀤𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀩𑁆𑀬𑀸𑀧𑀸𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀕𑀸𑀣𑀸𑀬 𑀧𑀦 𑀓𑀸𑀬𑀲𑀼𑀘𑀺𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂 𑀲𑀼𑀘𑀺𑀁, 𑀓𑀸𑀬𑁂𑀦 𑀯𑀸 𑀲𑀼𑀘𑀺𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀦𑁆𑀳𑀸𑀢𑀧𑀸𑀧𑀓𑀦𑁆𑀢𑀺 𑀲𑀩𑁆𑀩𑁂 𑀧𑀸𑀧𑁂 𑀦𑀺𑀦𑁆𑀳𑀸𑀧𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀞𑀺𑀢𑀁. 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦𑀧𑀺 𑀕𑀸𑀣𑀸𑀬𑀧𑀺 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄𑀢𑀺.

𑁧𑁦. 𑀫𑁄𑀦𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁩. 𑀤𑀲𑀫𑁂 𑀫𑁄𑀦𑁂𑀬𑁆𑀬𑀸𑀦𑀻𑀢𑀺 𑀫𑀼𑀦𑀺𑀪𑀸𑀯𑀸. 𑀓𑀸𑀬𑀫𑁄𑀦𑁂𑀬𑁆𑀬𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂 𑀫𑀼𑀦𑀺𑀪𑀸𑀯𑁄 𑀲𑀸𑀥𑀼𑀪𑀸𑀯𑁄 𑀧𑀡𑁆𑀟𑀺𑀢𑀪𑀸𑀯𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀫𑁄𑀦𑁂𑀬𑁆𑀬𑀦𑁆𑀢𑀺 𑀇𑀤𑀁 𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑀧𑁆𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁 𑀦𑀸𑀫. 𑀅𑀧𑀺𑀘 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀫𑁆𑀧𑀺 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀢𑀣𑀸 𑀓𑀸𑀬𑀸𑀭𑀫𑁆𑀫𑀡𑀁 𑀜𑀸𑀡𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀧𑀭𑀺𑀜𑁆𑀜𑀸 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀧𑀭𑀺𑀜𑁆𑀜𑀸𑀲𑀳𑀕𑀢𑁄 𑀫𑀕𑁆𑀕𑁄 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑁂 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀓𑀸𑀬𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀓𑀸𑀬𑀫𑁄𑀦𑁂𑀬𑁆𑀬𑀁. 𑀯𑀘𑀻𑀫𑁄𑀦𑁂𑀬𑁆𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀬𑀣𑀸 𑀇𑀥 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺, 𑀏𑀯𑀁 𑀢𑀢𑁆𑀣 𑀯𑀘𑀻𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀯𑀘𑀻𑀫𑁄𑀦𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀦𑁄𑀫𑁄𑀦𑁂𑀬𑁆𑀬𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑀁 𑀜𑀢𑁆𑀯𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀫𑀦𑁄𑀫𑁄𑀦𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀬𑀫𑀼𑀦𑀺𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑁂 𑀫𑀼𑀦𑀺𑀁 𑀉𑀢𑁆𑀢𑀫𑀁 𑀧𑀭𑀺𑀲𑀼𑀤𑁆𑀥𑀁, 𑀓𑀸𑀬𑁂𑀦 𑀯𑀸 𑀫𑀼𑀦𑀺𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀧𑁆𑀧𑀳𑀸𑀬𑀺𑀦𑀦𑁆𑀢𑀺 𑀔𑀻𑀡𑀸𑀲𑀯𑀁. 𑀔𑀻𑀡𑀸𑀲𑀯𑁄 𑀳𑀺 𑀲𑀩𑁆𑀩𑀧𑁆𑀧𑀳𑀸𑀬𑀻 𑀦𑀸𑀫𑀸𑀢𑀺.

𑀆𑀧𑀸𑀬𑀺𑀓𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁧𑁩) 𑁩. 𑀓𑀼𑀲𑀺𑀦𑀸𑀭𑀯𑀕𑁆𑀕𑁄

𑁧. 𑀓𑀼𑀲𑀺𑀦𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀓𑀼𑀲𑀺𑀦𑀸𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀩𑀮𑀺𑀳𑀭𑀡𑁂 𑀯𑀦𑀲𑀡𑁆𑀟𑁂𑀢𑀺 𑀏𑀯𑀁𑀦𑀸𑀫𑀓𑁂 𑀯𑀦𑀲𑀡𑁆𑀟𑁂. 𑀢𑀢𑁆𑀣 𑀓𑀺𑀭 𑀪𑀽𑀢𑀩𑀮𑀺𑀓𑀭𑀡𑀢𑁆𑀣𑀁 𑀩𑀮𑀺𑀁 𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀩𑀮𑀺𑀳𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀓𑀗𑁆𑀔𑀫𑀸𑀦𑁄𑀢𑀺 𑀇𑀘𑁆𑀙𑀫𑀸𑀦𑁄. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀲𑀫𑁆𑀧𑀯𑀸𑀭𑁂𑀢𑀻𑀢𑀺 𑀅𑀮𑀁 𑀅𑀮𑀦𑁆𑀢𑀺 𑀯𑀸𑀘𑀸𑀬 𑀘𑁂𑀯 𑀳𑀢𑁆𑀣𑀯𑀺𑀓𑀸𑀭𑁂𑀦 𑀘 𑀧𑀝𑀺𑀓𑁆𑀔𑀺𑀧𑀸𑀧𑁂𑀢𑀺. 𑀲𑀸𑀥𑀼 𑀯𑀢 𑀫𑀸𑀬𑀦𑁆𑀢𑀺 𑀲𑀸𑀥𑀼 𑀯𑀢 𑀫𑀁 𑀅𑀬𑀁. 𑀕𑀣𑀺𑀢𑁄𑀢𑀺 𑀢𑀡𑁆𑀳𑀸𑀕𑁂𑀥𑁂𑀦 𑀕𑀣𑀺𑀢𑁄. 𑀫𑀼𑀘𑁆𑀙𑀺𑀢𑁄𑀢𑀺 𑀢𑀡𑁆𑀳𑀸𑀫𑀼𑀘𑁆𑀙𑀦𑀸𑀬𑀬𑁂𑀯 𑀫𑀼𑀘𑁆𑀙𑀺𑀢𑁄. 𑀅𑀚𑁆𑀛𑁄𑀧𑀦𑁆𑀦𑁄𑀢𑀺 𑀢𑀡𑁆𑀳𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀧𑀯𑀢𑁆𑀢𑁄. 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄𑀢𑀺 𑀙𑀦𑁆𑀤𑀭𑀸𑀕𑀁 𑀧𑀳𑀸𑀬 𑀲𑀁𑀓𑀟𑁆𑀠𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀦𑀸𑀫 𑀳𑁄𑀢𑀺, 𑀅𑀬𑀁 𑀦 𑀢𑀸𑀤𑀺𑀲𑁄, 𑀲𑀘𑁆𑀙𑀦𑁆𑀤𑀭𑀸𑀕𑁄 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀧𑀦𑁂𑀢𑁆𑀣 𑀫𑀺𑀲𑁆𑀲𑀓𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨. 𑀪𑀡𑁆𑀟𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁫. 𑀤𑀼𑀢𑀺𑀬𑁂 𑀧𑀚𑀳𑀺𑀁𑀲𑀽𑀢𑀺 𑀧𑀚𑀳𑀦𑁆𑀢𑀺. 𑀩𑀳𑀼𑀮𑀫𑀓𑀁𑀲𑀽𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀺. 𑀇𑀥𑀸𑀧𑀺 𑀢𑀬𑁄 𑀯𑀺𑀢𑀓𑁆𑀓𑀸 𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸.

𑁩. 𑀕𑁄𑀢𑀫𑀓𑀘𑁂𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁬. 𑀢𑀢𑀺𑀬𑁂 𑀕𑁄𑀢𑀫𑀓𑁂 𑀘𑁂𑀢𑀺𑀬𑁂𑀢𑀺 𑀕𑁄𑀢𑀫𑀓𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀢𑀣𑀸𑀕𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀓𑀤𑀸𑀘𑀺 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂, 𑀓𑀤𑀸𑀘𑀺 𑀲𑀸𑀭𑀦𑁆𑀤𑀤𑁂, 𑀓𑀤𑀸𑀘𑀺 𑀩𑀳𑀼𑀧𑀼𑀢𑁆𑀢𑁂, 𑀓𑀤𑀸𑀘𑀺 𑀕𑁄𑀢𑀫𑀓𑁂𑀢𑀺 𑀏𑀯𑀁 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀓𑀼𑀮𑁂𑀲𑀼𑀬𑁂𑀯 𑀯𑀺𑀳𑀸𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀕𑁄𑀢𑀫𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑀝𑁆𑀞𑀸𑀦𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀕𑁄𑀢𑀫𑀓𑁂 𑀘𑁂𑀢𑀺𑀬𑁂’’𑀢𑀺. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀅𑀪𑀺𑀜𑁆𑀜𑀸𑀬𑀸𑀳’’𑀦𑁆𑀢𑀺𑀆𑀤𑀺𑀓𑀁 𑀲𑀼𑀢𑁆𑀢𑀁 𑀅𑀯𑁄𑀘.

𑀇𑀤𑀜𑁆𑀘 𑀪𑀕𑀯𑀢𑀸 𑀲𑀼𑀢𑁆𑀢𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀢𑀭𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺? 𑀫𑀽𑀮𑀧𑀭𑀺𑀬𑀸𑀬𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 (𑀫. 𑀦𑀺. 𑁧.𑁧 𑀆𑀤𑀬𑁄). 𑀲𑀫𑁆𑀩𑀳𑀼𑀮𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀩𑀼𑀤𑁆𑀥𑀯𑀘𑀦𑀁 𑀦𑀺𑀲𑁆𑀲𑀸𑀬 𑀚𑀸𑀦𑀦𑀫𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀦 𑀕𑀘𑁆𑀙𑀦𑁆𑀢𑀺 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀣𑁂𑀦𑁆𑀢𑁄 𑀅𑀫𑁆𑀳𑁂𑀳𑀺 𑀜𑀸𑀢𑀫𑁂𑀯 𑀓𑀣𑁂𑀲𑁆𑀲𑀢𑀺, 𑀦𑁄 𑀅𑀜𑁆𑀜𑀸𑀢’’𑀦𑁆𑀢𑀺. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑁂 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀼𑀔𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀫𑀽𑀮𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑀺. 𑀢𑁂 𑀪𑀺𑀓𑁆𑀔𑀽 𑀤𑁂𑀲𑀦𑀸𑀬 𑀦𑁂𑀯 𑀆𑀕𑀢𑀝𑁆𑀞𑀸𑀦𑀁, 𑀦 𑀕𑀢𑀝𑁆𑀞𑀸𑀦𑀁 𑀅𑀤𑁆𑀤𑀲𑀁𑀲𑀼. 𑀅𑀧𑀲𑁆𑀲𑀦𑁆𑀢𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ‘𑀫𑀬𑁆𑀳𑀁 𑀓𑀣𑀸 𑀦𑀺𑀬𑁆𑀬𑀸𑀢𑀻’𑀢𑀺 𑀫𑀼𑀔𑀲𑀫𑁆𑀧𑀢𑁆𑀢𑀫𑁂𑀯 𑀓𑀣𑁂𑀢𑀻’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀫𑀦𑀁 𑀚𑀸𑀦𑀺𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀦𑁆𑀢𑀁 𑀆𑀭𑀪𑀺.

𑀢𑀢𑁆𑀣 𑀅𑀪𑀺𑀜𑁆𑀜𑀸𑀬𑀸𑀢𑀺 ‘‘𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀦𑀯 𑀳𑁂𑀢𑀽, 𑀲𑀢𑁆𑀢 𑀨𑀲𑁆𑀲𑀸, 𑀲𑀢𑁆𑀢 𑀯𑁂𑀤𑀦𑀸, 𑀲𑀢𑁆𑀢 𑀘𑁂𑀢𑀦𑀸, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢 𑀘𑀺𑀢𑁆𑀢𑀸𑀦𑀻’’𑀢𑀺 𑀚𑀸𑀦𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀢𑀣𑀸 𑁋 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂 𑀢𑁂 𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀫𑁂𑀯 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀦𑀺𑀤𑀸𑀦𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀫𑁂𑀯 𑀓𑀢𑁆𑀯𑀸 𑀓𑀣𑁂𑀫𑀺, 𑀦𑁄 𑀅𑀧𑁆𑀧𑀘𑁆𑀘𑀬𑀁. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀧𑀘𑁆𑀘𑀦𑀻𑀓𑀧𑀝𑀺𑀳𑀭𑀡𑁂𑀦 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀫𑁂𑀯 𑀓𑀢𑁆𑀯𑀸 𑀓𑀣𑁂𑀫𑀺, 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀁. 𑀅𑀮𑀜𑁆𑀘 𑀧𑀦 𑀯𑁄𑀢𑀺 𑀬𑀼𑀢𑁆𑀢𑀜𑁆𑀘 𑀧𑀦 𑀢𑀼𑀫𑁆𑀳𑀸𑀓𑀁. 𑀢𑀼𑀝𑁆𑀞𑀺𑀬𑀸𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀕𑀼𑀡𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀢𑀼𑀫𑁆𑀳𑀸𑀓𑀁 𑀬𑀼𑀢𑁆𑀢𑀫𑁂𑀯 𑀢𑀼𑀝𑁆𑀞𑀺𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀓𑀫𑁆𑀧𑀺𑀢𑁆𑀣𑀸𑀢𑀺 𑀙𑀳𑀺 𑀆𑀓𑀸𑀭𑁂𑀳𑀺 𑀅𑀓𑀫𑁆𑀧𑀺𑀢𑁆𑀣. 𑀏𑀯𑀭𑀽𑀧𑁄 𑀳𑀺 𑀧𑀣𑀯𑀺𑀓𑀫𑁆𑀧𑁄 𑀩𑁄𑀥𑀺𑀫𑀡𑁆𑀟𑁂𑀧𑀺 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁂 𑀓𑀺𑀭 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂𑀦 𑀩𑁄𑀥𑀺𑀫𑀡𑁆𑀟𑀁 𑀅𑀪𑀺𑀭𑀼𑀴𑁆𑀳𑁂 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀸𑀧𑀼𑀡𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀉𑀢𑁆𑀢𑀭𑀪𑀸𑀕𑁄 𑀉𑀕𑁆𑀕𑀦𑁆𑀢𑁆𑀯𑀸 𑀪𑀯𑀕𑁆𑀕𑀁 𑀅𑀪𑀺𑀳𑀦𑀦𑁆𑀢𑁄 𑀯𑀺𑀬. 𑀧𑀘𑁆𑀙𑀺𑀫𑀤𑀺𑀲𑀁 𑀕𑀢𑁂 𑀧𑀘𑁆𑀙𑀺𑀫𑀪𑀸𑀕𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀸𑀧𑀼𑀡𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀧𑀸𑀘𑀻𑀦𑀪𑀸𑀕𑁄 𑀉𑀕𑁆𑀕𑀦𑁆𑀢𑁆𑀯𑀸 𑀪𑀯𑀕𑁆𑀕𑀁 𑀅𑀪𑀺𑀳𑀦𑀦𑁆𑀢𑁄 𑀯𑀺𑀬. 𑀉𑀢𑁆𑀢𑀭𑀤𑀺𑀲𑀁 𑀕𑀢𑁂 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀸𑀧𑀼𑀡𑀦𑁆𑀢𑁄 𑀯𑀺𑀬, 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁄 𑀉𑀕𑁆𑀕𑀦𑁆𑀢𑁆𑀯𑀸 𑀪𑀯𑀕𑁆𑀕𑀁 𑀅𑀪𑀺𑀳𑀦𑀦𑁆𑀢𑁄 𑀯𑀺𑀬. 𑀧𑀸𑀘𑀻𑀦𑀤𑀺𑀲𑀁 𑀕𑀢𑁂 𑀧𑀸𑀘𑀻𑀦𑀤𑀺𑀲𑀸𑀪𑀸𑀕𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀸𑀧𑀼𑀡𑀦𑁆𑀢𑁄 𑀯𑀺𑀬, 𑀧𑀘𑁆𑀙𑀺𑀫𑀪𑀸𑀕𑁄 𑀉𑀕𑁆𑀕𑀦𑁆𑀢𑁆𑀯𑀸 𑀪𑀯𑀕𑁆𑀕𑀁 𑀅𑀪𑀺𑀳𑀦𑀦𑁆𑀢𑁄 𑀯𑀺𑀬. 𑀩𑁄𑀥𑀺𑀭𑀼𑀓𑁆𑀔𑁄𑀧𑀺 𑀲𑀓𑀺𑀁 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀸𑀧𑀼𑀡𑀦𑁆𑀢𑁄 𑀯𑀺𑀬, 𑀲𑀓𑀺𑀁 𑀉𑀕𑁆𑀕𑀦𑁆𑀢𑁆𑀯𑀸 𑀪𑀯𑀕𑁆𑀕𑀁 𑀅𑀪𑀺𑀳𑀦𑀦𑁆𑀢𑁄 𑀯𑀺𑀬. 𑀢𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀏𑀯𑀁 𑀙𑀳𑀺 𑀆𑀓𑀸𑀭𑁂𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀻 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣.

𑁪. 𑀪𑀭𑀡𑁆𑀟𑀼𑀓𑀸𑀮𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀘𑀢𑀼𑀢𑁆𑀣𑁂 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀲𑀓𑀮𑀓𑀧𑁆𑀧𑀁. 𑀅𑀦𑁆𑀯𑀸𑀳𑀺𑀡𑁆𑀟𑀦𑁆𑀢𑁄𑀢𑀺 𑀯𑀺𑀘𑀭𑀦𑁆𑀢𑁄. 𑀦𑀸𑀤𑁆𑀤𑀲𑀸𑀢𑀺 𑀓𑀺𑀁 𑀓𑀸𑀭𑀡𑀸 𑀦 𑀅𑀤𑁆𑀤𑀲? 𑀅𑀬𑀁 𑀓𑀺𑀭 𑀪𑀭𑀡𑁆𑀟𑀼 𑀓𑀸𑀮𑀸𑀫𑁄 𑀲𑀓𑁆𑀬𑀸𑀦𑀁 𑀅𑀕𑁆𑀕𑀧𑀺𑀡𑁆𑀟𑀁 𑀔𑀸𑀤𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀏𑀓𑀸 𑀥𑀫𑁆𑀫𑀤𑁂𑀲𑀦𑀸 𑀲𑀫𑀼𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀪𑀕𑀯𑀸 𑀏𑀯𑀁 𑀅𑀥𑀺𑀝𑁆𑀞𑀸𑀲𑀺, 𑀬𑀣𑀸 𑀅𑀜𑁆𑀜𑁄 𑀆𑀯𑀲𑀣𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀫𑀸 𑀦 𑀅𑀤𑁆𑀤𑀲. 𑀧𑀼𑀭𑀸𑀡𑀲𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀧𑁄𑀭𑀸𑀡𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻. 𑀲𑁄 𑀓𑀺𑀭 𑀆𑀴𑀸𑀭𑀓𑀸𑀮𑀸𑀫𑀓𑀸𑀮𑁂 𑀢𑀲𑁆𑀫𑀺𑀁𑀬𑁂𑀯 𑀅𑀲𑁆𑀲𑀫𑁂 𑀅𑀳𑁄𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀲𑀦𑁆𑀣𑀭𑀁 𑀧𑀜𑁆𑀜𑀸𑀧𑁂𑀳𑀻𑀢𑀺 𑀲𑀦𑁆𑀣𑀭𑀺𑀢𑀩𑁆𑀩𑀁 𑀲𑀦𑁆𑀣𑀭𑀸𑀳𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀣𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀓𑀧𑁆𑀧𑀺𑀬𑀫𑀜𑁆𑀘𑀓𑁂 𑀧𑀘𑁆𑀘𑀢𑁆𑀣𑀭𑀡𑀁 𑀧𑀜𑁆𑀜𑀸𑀧𑁂𑀢𑁆𑀯𑀸. 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀻𑀢𑀺 𑀏𑀢𑁆𑀣 𑀧𑀭𑀺𑀜𑁆𑀜𑀸 𑀦𑀸𑀫 𑀲𑀫𑀢𑀺𑀓𑁆𑀓𑀫𑁄, 𑀢𑀲𑁆𑀫𑀸 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀧𑀞𑀫𑀚𑁆𑀛𑀸𑀦𑀁 𑀧𑀜𑁆𑀜𑀸𑀧𑁂𑀢𑀺. 𑀦 𑀭𑀽𑀧𑀸𑀦𑀁 𑀧𑀭𑀺𑀜𑁆𑀜𑀦𑁆𑀢𑀺 𑀭𑀽𑀧𑀸𑀦𑀁 𑀲𑀫𑀢𑀺𑀓𑁆𑀓𑀫𑀪𑀽𑀢𑀁 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀦 𑀧𑀜𑁆𑀜𑀸𑀧𑁂𑀢𑀺. 𑀦 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀦𑁆𑀢𑀺 𑀯𑁂𑀤𑀦𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀦𑀺𑀩𑁆𑀩𑀸𑀦𑀁 𑀦 𑀧𑀜𑁆𑀜𑀸𑀧𑁂𑀢𑀺. 𑀦𑀺𑀝𑁆𑀞𑀸𑀢𑀺 𑀕𑀢𑀺 𑀦𑀺𑀧𑁆𑀨𑀢𑁆𑀢𑀺. 𑀉𑀤𑀸𑀳𑀼 𑀧𑀼𑀣𑀽𑀢𑀺 𑀉𑀤𑀸𑀳𑀼 𑀦𑀸𑀦𑀸.

𑁫. 𑀳𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁮. 𑀧𑀜𑁆𑀘𑀫𑁂 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. (𑀯𑀺. 𑀯. 𑁮𑁫𑁭) 𑁋

𑀏𑀯𑀫𑀸𑀤𑀻𑀲𑀼 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥 𑀧𑀦 𑀲𑀼𑀦𑁆𑀤𑀭𑁂. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀭𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀇𑀥 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀅𑀪𑀺𑀭𑀽𑀧𑁂, 𑀯𑀡𑁆𑀡𑀲𑀤𑁆𑀤𑁄 𑀧𑀦 𑀙𑀯𑀺𑀣𑀼𑀢𑀺𑀓𑀼𑀮𑀯𑀕𑁆𑀕𑀓𑀸𑀭𑀡𑀲𑀡𑁆𑀞𑀸𑀦𑀧𑀫𑀸𑀡𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁩) 𑀙𑀯𑀺𑀬𑀁. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂 𑀕𑀳𑀧𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁭𑁭) 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁧𑁫) 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀢𑁆𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪) 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁬𑁦𑁨) 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂. 𑀲𑁄 𑀇𑀥 𑀙𑀯𑀺𑀬𑀸 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀅𑀪𑀺𑀭𑀽𑀧𑀘𑁆𑀙𑀯𑀺, 𑀇𑀝𑁆𑀞𑀯𑀡𑁆𑀡𑀸 𑀫𑀦𑀸𑀧𑀯𑀡𑁆𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀬𑁂𑀪𑀼𑀬𑁆𑀬𑀸𑀩𑁆𑀬𑀸𑀫𑀺𑀲𑁆𑀲𑀸𑀦𑀢𑀺𑀭𑁂𑀓𑀤𑀴𑁆𑀳𑀢𑁆𑀣𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧) 𑀅𑀦𑀯𑀲𑁂𑀲𑀢𑀸 𑀅𑀢𑁆𑀣𑁄. ‘‘𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁪𑁩) 𑀬𑁂𑀪𑀼𑀬𑁆𑀬𑀢𑀸. ‘‘𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀯𑀺𑀪. 𑁨𑁨𑁫) 𑀅𑀩𑁆𑀬𑀸𑀫𑀺𑀲𑁆𑀲𑀢𑀸. ‘‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁨𑁪𑁪) 𑀅𑀦𑀢𑀺𑀭𑁂𑀓𑀢𑀸. ‘‘𑀆𑀬𑀲𑁆𑀫𑀢𑁄, 𑀪𑀦𑁆𑀢𑁂, 𑀅𑀦𑀼𑀭𑀼𑀤𑁆𑀥𑀲𑁆𑀲 𑀩𑀸𑀳𑀺𑀬𑁄 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀓𑁂𑀯𑀮𑀓𑀧𑁆𑀧𑀁 𑀲𑀗𑁆𑀖𑀪𑁂𑀤𑀸𑀬 𑀞𑀺𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁨𑁪𑁩) 𑀤𑀴𑁆𑀳𑀢𑁆𑀣𑀢𑀸. ‘‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁩.𑁫𑁭) 𑀯𑀺𑀲𑀁𑀬𑁄𑀕𑁄. 𑀇𑀥 𑀧𑀦 𑀅𑀦𑀯𑀲𑁂𑀲𑀢𑀸 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀓𑀧𑁆𑀧𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦𑀯𑁄𑀳𑀸𑀭𑀓𑀸𑀮𑀧𑀜𑁆𑀜𑀢𑁆𑀢𑀺𑀙𑁂𑀤𑀦𑀯𑀺𑀓𑀧𑁆𑀧𑀮𑁂𑀲𑀲𑀫𑀦𑁆𑀢𑀪𑀸𑀯𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀑𑀓𑀧𑁆𑀧𑀦𑀺𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁨𑁫𑁦) 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁧𑁦𑁯𑁮; 𑀘𑀽𑀴𑀦𑀺. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸 𑁧𑁧𑁭, 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁬𑁧) 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀚𑀸. 𑁨.𑁨𑁨.𑁧𑁩𑁬𑁮; 𑀯𑀺. 𑀯. 𑁧𑁦𑁯𑁪) 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁪𑁪𑁬) 𑀯𑀺𑀓𑀧𑁆𑀧𑁄. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁮𑁦) 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁪) 𑀲𑀫𑀦𑁆𑀢𑀪𑀸𑀯𑁄. 𑀇𑀥 𑀧𑀦𑀲𑁆𑀲 𑀲𑀫𑀦𑁆𑀢𑀪𑀸𑀯𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀦𑁆𑀢𑀺 𑀏𑀢𑁆𑀣 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀚𑁂𑀢𑀯𑀦𑀦𑁆𑀢𑀺 𑀅𑀢𑁆𑀣𑁄.

𑀑𑀪𑀸𑀲𑁂𑀢𑁆𑀯𑀸𑀢𑀺 𑀆𑀪𑀸𑀬 𑀨𑀭𑀺𑀢𑁆𑀯𑀸. 𑀯𑀸𑀮𑀼𑀓𑀸𑀬𑀸𑀢𑀺 𑀲𑀡𑁆𑀳𑀸𑀬 𑀯𑀸𑀮𑀼𑀓𑀸𑀬. 𑀦 𑀲𑀡𑁆𑀞𑀸𑀢𑀻𑀢𑀺 𑀦 𑀧𑀢𑀺𑀝𑁆𑀞𑀸𑀢𑀺. 𑀑𑀴𑀸𑀭𑀺𑀓𑀦𑁆𑀢𑀺 𑀩𑁆𑀭𑀳𑁆𑀫𑀤𑁂𑀯𑀢𑀸𑀬 𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀦𑀓𑀸𑀮𑁂 𑀅𑀢𑁆𑀢𑀪𑀸𑀯𑁄 𑀑𑀴𑀸𑀭𑀺𑀓𑁄 𑀫𑀸𑀧𑁂𑀢𑀼𑀁 𑀯𑀝𑁆𑀝𑀢𑀺 𑀧𑀣𑀯𑀻 𑀯𑀸, 𑀢𑀲𑁆𑀫𑀸 𑀏𑀯𑀫𑀸𑀳. 𑀥𑀫𑁆𑀫𑀸𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀉𑀕𑁆𑀕𑀳𑀺𑀢𑀩𑀼𑀤𑁆𑀥𑀯𑀘𑀦𑀁 𑀤𑀲𑁆𑀲𑁂𑀢𑀺. 𑀦𑀧𑁆𑀧𑀯𑀢𑁆𑀢𑀺𑀦𑁄 𑀅𑀳𑁂𑀲𑀼𑀦𑁆𑀢𑀺 𑀲𑀚𑁆𑀛𑀸𑀬𑀫𑀽𑀴𑁆𑀳𑀓𑀸 𑀯𑀸𑀘𑀸 𑀧𑀭𑀺𑀳𑀻𑀦𑀸𑀬𑁂𑀯 𑀅𑀳𑁂𑀲𑀼𑀁. 𑀅𑀧𑁆𑀧𑀝𑀺𑀯𑀸𑀦𑁄𑀢𑀺 𑀅𑀦𑀺𑀯𑀢𑁆𑀢𑁄 𑀅𑀦𑀼𑀓𑁆𑀓𑀡𑁆𑀞𑀺𑀢𑁄.

𑀤𑀲𑁆𑀲𑀦𑀲𑁆𑀲𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀲𑁆𑀲𑀦𑀲𑁆𑀲. 𑀉𑀧𑀝𑁆𑀞𑀸𑀦𑀲𑁆𑀲𑀸𑀢𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀦𑀲𑁆𑀲. 𑀅𑀥𑀺𑀲𑀻𑀮𑀦𑁆𑀢𑀺 𑀤𑀲𑀯𑀺𑀥𑀁 𑀲𑀻𑀮𑀁. 𑀢𑀜𑁆𑀳𑀺 𑀧𑀜𑁆𑀘𑀲𑀻𑀮𑀁 𑀉𑀧𑀸𑀤𑀸𑀬 𑀅𑀥𑀺𑀲𑀻𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀺𑀳𑀁 𑀕𑀢𑁄𑀢𑀺 𑀅𑀯𑀺𑀳𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻𑀢𑀺 𑀤𑀲𑁆𑀲𑁂𑀢𑀺.

𑁬. 𑀓𑀝𑀼𑀯𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀙𑀝𑁆𑀞𑁂 𑀕𑁄𑀬𑁄𑀕𑀧𑀺𑀮𑀓𑁆𑀔𑀲𑁆𑀫𑀺𑀦𑁆𑀢𑀺 𑀕𑀸𑀯𑀻𑀦𑀁 𑀯𑀺𑀓𑁆𑀓𑀬𑀝𑁆𑀞𑀸𑀦𑁂 𑀉𑀝𑁆𑀞𑀺𑀢𑀧𑀺𑀮𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂. 𑀭𑀺𑀢𑁆𑀢𑀲𑁆𑀲𑀸𑀤𑀦𑁆𑀢𑀺 𑀛𑀸𑀦𑀲𑀼𑀔𑀸𑀪𑀸𑀯𑁂𑀦 𑀭𑀺𑀢𑁆𑀢𑀲𑁆𑀲𑀸𑀤𑀁. 𑀩𑀸𑀳𑀺𑀭𑀲𑁆𑀲𑀸𑀤𑀦𑁆𑀢𑀺 𑀓𑀸𑀫𑀕𑀼𑀡𑀲𑀼𑀔𑀯𑀲𑁂𑀦 𑀩𑀸𑀳𑀺𑀭𑀲𑁆𑀲𑀸𑀤𑀁. 𑀓𑀝𑀼𑀯𑀺𑀬𑀦𑁆𑀢𑀺 𑀉𑀘𑁆𑀙𑀺𑀝𑁆𑀞𑀁. 𑀆𑀫𑀕𑀦𑁆𑀥𑁂𑀦𑀸𑀢𑀺 𑀓𑁄𑀥𑀲𑀗𑁆𑀔𑀸𑀢𑁂𑀦 𑀯𑀺𑀲𑁆𑀲𑀕𑀦𑁆𑀥𑁂𑀦. 𑀅𑀯𑀲𑁆𑀲𑀼𑀢𑀦𑁆𑀢𑀺 𑀢𑀺𑀦𑁆𑀢𑀁. 𑀫𑀓𑁆𑀔𑀺𑀓𑀸𑀢𑀺 𑀓𑀺𑀮𑁂𑀲𑀫𑀓𑁆𑀔𑀺𑀓𑀸. 𑀦𑀸𑀦𑀼𑀧𑀢𑀺𑀲𑁆𑀲𑀦𑁆𑀢𑀻𑀢𑀺 𑀉𑀝𑁆𑀞𑀸𑀬 𑀦 𑀅𑀦𑀼𑀩𑀦𑁆𑀥𑀺𑀲𑁆𑀲𑀦𑁆𑀢𑀺. 𑀦𑀸𑀦𑁆𑀯𑀸𑀲𑁆𑀲𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀦 𑀔𑀸𑀤𑀺𑀲𑁆𑀲𑀦𑁆𑀢𑀺. 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺 𑀲𑁄𑀢𑀸𑀧𑀦𑁆𑀦𑁄 𑀚𑀸𑀢𑁄.

𑀓𑀝𑀼𑀯𑀺𑀬𑀓𑀢𑁄𑀢𑀺 𑀉𑀘𑁆𑀙𑀺𑀝𑁆𑀞𑀓𑀢𑁄. 𑀆𑀭𑀓𑀸 𑀳𑁄𑀢𑀻𑀢𑀺 𑀤𑀽𑀭𑁂 𑀳𑁄𑀢𑀺. 𑀯𑀺𑀖𑀸𑀢𑀲𑁆𑀲𑁂𑀯 𑀪𑀸𑀕𑀯𑀸𑀢𑀺 𑀤𑀼𑀓𑁆𑀔𑀲𑁆𑀲𑁂𑀯 𑀪𑀸𑀕𑀻. 𑀘𑀭𑁂𑀢𑀻𑀢𑀺 𑀘𑀭𑀢𑀺 𑀕𑀘𑁆𑀙𑀢𑀺. 𑀤𑀼𑀫𑁆𑀫𑁂𑀥𑁄𑀢𑀺 𑀤𑀼𑀧𑁆𑀧𑀜𑁆𑀜𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁, 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺. 𑀲𑀢𑁆𑀢𑀫𑁂 𑀯𑀝𑁆𑀝𑀫𑁂𑀯 𑀪𑀸𑀲𑀺𑀢𑀁.

𑁮. 𑀤𑀼𑀢𑀺𑀬𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀅𑀝𑁆𑀞𑀫𑁂 𑀇𑀤𑀁 𑀢𑁂 𑀫𑀸𑀦𑀲𑁆𑀫𑀺𑀦𑁆𑀢𑀺 𑀅𑀬𑀁 𑀢𑁂 𑀦𑀯𑀯𑀺𑀥𑁂𑀦 𑀯𑀟𑁆𑀠𑀺𑀢𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑁂 𑀉𑀤𑁆𑀥𑀘𑁆𑀘𑀲𑁆𑀫𑀺𑀦𑁆𑀢𑀺 𑀇𑀤𑀁 𑀢𑀯 𑀉𑀤𑁆𑀥𑀘𑁆𑀘𑀁 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀢𑀪𑀸𑀯𑁄. 𑀇𑀤𑀁 𑀢𑁂 𑀓𑀼𑀓𑁆𑀓𑀼𑀘𑁆𑀘𑀲𑁆𑀫𑀺𑀦𑁆𑀢𑀺 𑀇𑀤𑀁 𑀢𑀯 𑀓𑀼𑀓𑁆𑀓𑀼𑀘𑁆𑀘𑀁.

𑁯. 𑀧𑀝𑀺𑀘𑁆𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀦𑀯𑀫𑁂 𑀆𑀯𑀳𑀦𑁆𑀢𑀻𑀢𑀺 𑀦𑀺𑀬𑁆𑀬𑀦𑁆𑀢𑀺. 𑀧𑀝𑀺𑀘𑁆𑀙𑀦𑁆𑀦𑁄 𑀆𑀯𑀳𑀢𑀻𑀢𑀺 𑀧𑀝𑀺𑀘𑁆𑀙𑀦𑁆𑀦𑁄𑀯 𑀳𑀼𑀢𑁆𑀯𑀸 𑀦𑀺𑀬𑁆𑀬𑀸𑀢𑀺. 𑀯𑀺𑀯𑀝𑁄 𑀯𑀺𑀭𑁄𑀘𑀢𑀻𑀢𑀺 𑀏𑀢𑁆𑀣 𑀏𑀓𑀢𑁄 𑀉𑀪𑀢𑁄 𑀅𑀢𑁆𑀢𑀢𑁄 𑀲𑀩𑁆𑀩𑀢𑁆𑀣𑀓𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑀸 𑀯𑀺𑀯𑀝𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀏𑀓𑀢𑁄 𑀯𑀺𑀯𑀝𑀁 𑀦𑀸𑀫 𑀅𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀁. 𑀉𑀪𑀢𑁄 𑀯𑀺𑀯𑀝𑀁 𑀦𑀸𑀫 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀁. 𑀅𑀢𑁆𑀢𑀢𑁄 𑀯𑀺𑀯𑀝𑀁 𑀦𑀸𑀫 𑀧𑀝𑀺𑀮𑀤𑁆𑀥𑀥𑀫𑁆𑀫𑀕𑀼𑀡𑁄. 𑀲𑀩𑁆𑀩𑀢𑁆𑀣𑀓𑀯𑀺𑀯𑀝𑀁 𑀦𑀸𑀫 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁.

𑁧𑁦. 𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀤𑀲𑀫𑁂 𑀅𑀪𑀺𑀡𑁆𑀳𑀦𑁆𑀢𑀺 𑀅𑀪𑀺𑀓𑁆𑀔𑀡𑀁 𑀦𑀺𑀭𑀦𑁆𑀢𑀭𑀁. 𑀆𑀕𑀸𑀴𑁆𑀳𑁂𑀦𑀸𑀢𑀺 𑀕𑀸𑀴𑁆𑀳𑁂𑀦 𑀓𑀓𑁆𑀔𑀴𑁂𑀦. 𑀨𑀭𑀼𑀲𑁂𑀦𑀸𑀢𑀺 𑀨𑀭𑀼𑀲𑀯𑀘𑀦𑁂𑀦. 𑀕𑀸𑀴𑁆𑀳𑀁 𑀓𑀢𑁆𑀯𑀸 𑀨𑀭𑀼𑀲𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁄𑀧𑀻𑀢𑀺 𑀅𑀢𑁆𑀣𑁄. 𑀅𑀫𑀦𑀸𑀧𑁂𑀦𑀸𑀢𑀺 𑀫𑀦𑀁 𑀅𑀦𑀮𑁆𑀮𑀻𑀬𑀦𑁆𑀢𑁂𑀦 𑀅𑀯𑀟𑁆𑀠𑀦𑁆𑀢𑁂𑀦. 𑀲𑀦𑁆𑀥𑀺𑀬𑀢𑀺𑀫𑁂𑀯𑀸𑀢𑀺 𑀖𑀝𑀺𑀬𑀢𑀺𑀬𑁂𑀯. 𑀲𑀁𑀲𑀦𑁆𑀤𑀢𑀺𑀫𑁂𑀯𑀸𑀢𑀺 𑀦𑀺𑀭𑀦𑁆𑀢𑀭𑁄𑀯 𑀳𑁄𑀢𑀺. 𑀲𑀫𑁆𑀫𑁄𑀤𑀢𑀺𑀫𑁂𑀯𑀸𑀢𑀺 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀼𑀲𑀺𑀦𑀸𑀭𑀯𑀕𑁆𑀕𑁄 𑀢𑀢𑀺𑀬𑁄.

(𑁧𑁪) 𑁪. 𑀬𑁄𑀥𑀸𑀚𑀻𑀯𑀯𑀕𑁆𑀕𑁄

𑁧. 𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀬𑀼𑀤𑁆𑀥𑀁 𑀉𑀧𑀚𑀻𑀯𑀢𑀻𑀢𑀺 𑀬𑁄𑀥𑀸𑀚𑀻𑀯𑁄. 𑀭𑀸𑀚𑀸𑀭𑀳𑁄𑀢𑀺 𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑁄. 𑀭𑀸𑀚𑀪𑁄𑀕𑁆𑀕𑁄𑀢𑀺 𑀭𑀜𑁆𑀜𑁄 𑀉𑀧𑀪𑁄𑀕𑀧𑀭𑀺𑀪𑁄𑀕𑁄. 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀳𑀢𑁆𑀣𑁄 𑀯𑀺𑀬 𑀧𑀸𑀤𑁄 𑀯𑀺𑀬 𑀘 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀅𑀗𑁆𑀕𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀤𑀽𑀭𑁂 𑀧𑀸𑀢𑀻 𑀳𑁄𑀢𑀻𑀢𑀺 𑀉𑀤𑀓𑁂 𑀉𑀲𑀪𑀫𑀢𑁆𑀢𑀁, 𑀣𑀮𑁂 𑀅𑀝𑁆𑀞𑀼𑀲𑀪𑀫𑀢𑁆𑀢𑀁, 𑀢𑀢𑁄 𑀯𑀸 𑀉𑀢𑁆𑀢𑀭𑀺𑀦𑁆𑀢𑀺 𑀤𑀽𑀭𑁂 𑀓𑀡𑁆𑀟𑀁 𑀧𑀸𑀢𑁂𑀢𑀺. 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀲𑁆𑀲 𑀳𑀺 𑀬𑁄𑀥𑀸𑀚𑀻𑀯𑁄 𑀦𑀯𑀉𑀲𑀪𑀫𑀢𑁆𑀢𑀁 𑀓𑀡𑁆𑀟𑀁 𑀧𑀸𑀢𑁂𑀲𑀺, 𑀧𑀘𑁆𑀙𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑁄 𑀬𑁄𑀚𑀦𑀧𑁆𑀧𑀫𑀸𑀡𑀁. 𑀅𑀓𑁆𑀔𑀡𑀯𑁂𑀥𑀻𑀢𑀺 𑀅𑀯𑀺𑀭𑀸𑀥𑀺𑀢𑀯𑁂𑀥𑀻, 𑀅𑀓𑁆𑀔𑀡𑀁 𑀯𑀸 𑀯𑀺𑀚𑁆𑀚𑀼 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀫𑀳𑀢𑁄 𑀓𑀸𑀬𑀲𑁆𑀲 𑀧𑀤𑀸𑀮𑁂𑀢𑀸𑀢𑀺 𑀏𑀓𑀢𑁄𑀩𑀤𑁆𑀥𑀁 𑀨𑀮𑀓𑀲𑀢𑀫𑁆𑀧𑀺 𑀫𑀳𑀺𑀁𑀲𑀘𑀫𑁆𑀫𑀲𑀢𑀫𑁆𑀧𑀺 𑀅𑀗𑁆𑀕𑀼𑀝𑁆𑀞𑀧𑀫𑀸𑀡𑀩𑀳𑀮𑀁 𑀮𑁄𑀳𑀧𑀝𑁆𑀝𑀫𑁆𑀧𑀺 𑀘𑀢𑀼𑀭𑀗𑁆𑀕𑀼𑀮𑀩𑀳𑀮𑀁 𑀅𑀲𑀦𑀧𑀤𑀭𑀫𑁆𑀧𑀺 𑀯𑀺𑀤𑀢𑁆𑀣𑀺𑀩𑀳𑀮𑀁 𑀉𑀤𑀼𑀫𑁆𑀩𑀭𑀧𑀤𑀭𑀫𑁆𑀧𑀺 𑀤𑀻𑀖𑀦𑁆𑀢𑁂𑀦 𑀯𑀸𑀮𑀺𑀓𑀲𑀓𑀝𑀫𑁆𑀧𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀬𑀁𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺𑀆𑀤𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀦𑁂𑀢𑀁 𑀫𑀫𑀸𑀢𑀺𑀆𑀤𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀧𑀤𑀸𑀮𑁂𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀤𑀸𑀮𑁂𑀢𑀺.

𑁨. 𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀤𑀼𑀢𑀺𑀬𑁂 𑀉𑀓𑁆𑀓𑀸𑀘𑀺𑀢𑀯𑀺𑀦𑀻𑀢𑀸𑀢𑀺 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀻𑀢𑀸 𑀤𑀼𑀩𑁆𑀩𑀺𑀦𑀻𑀢𑀧𑀭𑀺𑀲𑀸. 𑀧𑀝𑀺𑀧𑀼𑀘𑁆𑀙𑀸𑀯𑀺𑀦𑀻𑀢𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀻𑀢𑀸 𑀲𑀼𑀯𑀺𑀦𑀻𑀢𑀧𑀭𑀺𑀲𑀸. 𑀬𑀸𑀯𑀢𑀸𑀯𑀺𑀦𑀻𑀢𑀸𑀢𑀺 𑀧𑀫𑀸𑀡𑀯𑀲𑁂𑀦 𑀯𑀺𑀦𑀻𑀢𑀸, 𑀧𑀫𑀸𑀡𑀁 𑀜𑀢𑁆𑀯𑀸 𑀯𑀺𑀦𑀻𑀢𑀧𑀭𑀺𑀲𑀸𑀢𑀺 𑀅𑀢𑁆𑀣𑁄. ‘‘𑀬𑀸𑀯𑀢𑀚𑁆𑀛𑀸’’𑀢𑀺 𑀧𑀸𑀴𑀺𑀬𑀸 𑀧𑀦 𑀬𑀸𑀯 𑀅𑀚𑁆𑀛𑀸𑀲𑀬𑀸𑀢𑀺 𑀅𑀢𑁆𑀣𑁄, 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀯𑀺𑀦𑀻𑀢𑀧𑀭𑀺𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁪. 𑀉𑀧𑁆𑀧𑀸𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁭. 𑀘𑀢𑀼𑀢𑁆𑀣𑁂 𑀥𑀫𑁆𑀫𑀝𑁆𑀞𑀺𑀢𑀢𑀸𑀢𑀺 𑀲𑀪𑀸𑀯𑀝𑁆𑀞𑀺𑀢𑀢𑀸. 𑀥𑀫𑁆𑀫𑀦𑀺𑀬𑀸𑀫𑀢𑀸𑀢𑀺 𑀲𑀪𑀸𑀯𑀦𑀺𑀬𑀸𑀫𑀢𑀸. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀘𑀢𑀼𑀪𑀽𑀫𑀓𑀲𑀗𑁆𑀔𑀸𑀭𑀸. 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀤𑀼𑀓𑁆𑀔𑀸𑀢𑀺 𑀲𑀫𑁆𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸. 𑀅𑀦𑀢𑁆𑀢𑀸𑀢𑀺 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀺.

𑁫. 𑀓𑁂𑀲𑀓𑀫𑁆𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁮. 𑀧𑀜𑁆𑀘𑀫𑁂 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦𑀁, 𑀢𑀦𑁆𑀢𑁂𑀳𑀺 𑀯𑀸𑀬𑀺𑀢𑀯𑀢𑁆𑀣𑀸𑀦𑀻𑀢𑀺 𑀅𑀢𑁆𑀣𑁄. 𑀓𑁂𑀲𑀓𑀫𑁆𑀩𑀮𑁄𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀯𑀸𑀬𑀺𑀢𑀓𑀫𑁆𑀩𑀮𑁄. 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀸𑀤𑀸𑀦𑀦𑁆𑀢𑀺 𑀇𑀤𑀫𑁆𑀧𑀺 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦𑀁. 𑀧𑀝𑀺𑀓𑀺𑀝𑁆𑀞𑁄𑀢𑀺 𑀧𑀘𑁆𑀙𑀺𑀫𑀓𑁄 𑀮𑀸𑀫𑀓𑁄. 𑀫𑁄𑀖𑀧𑀼𑀭𑀺𑀲𑁄𑀢𑀺 𑀢𑀼𑀘𑁆𑀙𑀧𑀼𑀭𑀺𑀲𑁄. 𑀧𑀝𑀺𑀩𑀸𑀳𑀢𑀻𑀢𑀺 𑀧𑀝𑀺𑀲𑁂𑀥𑁂𑀢𑀺. 𑀔𑀺𑀧𑁆𑀧𑀁 𑀉𑀟𑁆𑀟𑁂𑀬𑁆𑀬𑀸𑀢𑀺 𑀓𑀼𑀫𑀺𑀦𑀁 𑀑𑀟𑁆𑀟𑁂𑀬𑁆𑀬. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁮. 𑀅𑀲𑁆𑀲𑀔𑀴𑀼𑀗𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀅𑀝𑁆𑀞𑀫𑁂 𑀅𑀲𑁆𑀲𑀔𑀴𑀼𑀗𑁆𑀓𑁄𑀢𑀺 𑀅𑀲𑁆𑀲𑀧𑁄𑀢𑁄. 𑀇𑀤𑀫𑀲𑁆𑀲 𑀚𑀯𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 𑀅𑀬𑀫𑀲𑁆𑀲 𑀜𑀸𑀡𑀚𑀯𑁄𑀢𑀺 𑀯𑀤𑀸𑀫𑀺. 𑀇𑀤𑀫𑀲𑁆𑀲 𑀯𑀡𑁆𑀡𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 𑀅𑀬𑀫𑀲𑁆𑀲 𑀕𑀼𑀡𑀯𑀡𑁆𑀡𑁄𑀢𑀺 𑀯𑀤𑀸𑀫𑀺. 𑀇𑀤𑀫𑀲𑁆𑀲 𑀆𑀭𑁄𑀳𑀧𑀭𑀺𑀡𑀸𑀳𑀲𑁆𑀫𑀺𑀦𑁆𑀢𑀺 𑀅𑀬𑀫𑀲𑁆𑀲 𑀉𑀘𑁆𑀘𑀪𑀸𑀯𑁄 𑀧𑀭𑀺𑀫𑀡𑁆𑀟𑀮𑀪𑀸𑀯𑁄𑀢𑀺 𑀯𑀤𑀸𑀫𑀻𑀢𑀺.

𑁯. 𑀅𑀲𑁆𑀲𑀧𑀭𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁨. 𑀦𑀯𑀫𑁂 𑀅𑀲𑁆𑀲𑀧𑀭𑀲𑁆𑀲𑁂𑀢𑀺 𑀅𑀲𑁆𑀲𑁂𑀲𑀼 𑀧𑀭𑀲𑁆𑀲𑁂. 𑀧𑀼𑀭𑀺𑀲𑀧𑀭𑀲𑁆𑀲𑁂𑀢𑀺 𑀧𑀼𑀭𑀺𑀲𑁂𑀲𑀼 𑀧𑀭𑀲𑁆𑀲𑁂, 𑀧𑀼𑀭𑀺𑀲𑀧𑀼𑀭𑀺𑀲𑁂𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀓𑀣𑀺𑀢𑀸𑀦𑀺. 𑀢𑀢𑁆𑀣 𑀅𑀬𑀁 𑀢𑀻𑀳𑀺 𑀫𑀕𑁆𑀕𑁂𑀳𑀺 𑀜𑀸𑀡𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀅𑀲𑁆𑀲𑀸𑀚𑀸𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁩. 𑀤𑀲𑀫𑁂 𑀪𑀤𑁆𑀭𑁂𑀢𑀺 𑀪𑀤𑁆𑀤𑀓𑁂. 𑀅𑀲𑁆𑀲𑀸𑀚𑀸𑀦𑀻𑀬𑁂𑀢𑀺 𑀓𑀸𑀭𑀡𑀸𑀓𑀸𑀭𑀡𑀁 𑀚𑀸𑀦𑀦𑀓𑁂 𑀅𑀲𑁆𑀲𑁂. 𑀧𑀼𑀭𑀺𑀲𑀸𑀚𑀸𑀦𑀻𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀁 𑀓𑀣𑀺𑀢𑀁. 𑀢𑀢𑁆𑀭𑀸𑀬𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀜𑀸𑀡𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁧. 𑀧𑀞𑀫𑀫𑁄𑀭𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀏𑀓𑀸𑀤𑀲𑀫𑁂 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄𑀢𑀺 𑀅𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀦𑀺𑀝𑁆𑀞𑁄, 𑀅𑀓𑀼𑀧𑁆𑀧𑀦𑀺𑀝𑁆𑀞𑁄 𑀥𑀼𑀯𑀦𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀤𑀺𑀲𑀫𑁂𑀯.

𑁧𑁨. 𑀤𑀼𑀢𑀺𑀬𑀫𑁄𑀭𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁫. 𑀤𑁆𑀯𑀸𑀤𑀲𑀫𑁂 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦𑀸𑀢𑀺 𑀇𑀚𑁆𑀛𑀦𑀓𑀧𑀸𑀝𑀺𑀳𑀸𑀭𑀺𑀬𑁂𑀦. 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂𑀦𑀸𑀢𑀺 𑀆𑀤𑀺𑀲𑀺𑀢𑁆𑀯𑀸 𑀅𑀧𑀤𑀺𑀲𑀺𑀢𑁆𑀯𑀸 𑀓𑀣𑀦𑀅𑀦𑀼𑀓𑀣𑀦𑀓𑀣𑀸𑀧𑀸𑀝𑀺𑀳𑀸𑀭𑀺𑀬𑁂𑀦.

𑁧𑁩. 𑀢𑀢𑀺𑀬𑀫𑁄𑀭𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀢𑁂𑀭𑀲𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. 𑀲𑀫𑁆𑀫𑀸𑀜𑀸𑀡𑁂𑀦𑀸𑀢𑀺 𑀨𑀮𑀜𑀸𑀡𑁂𑀦. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀲𑁂𑀲𑁂𑀳𑀺 𑀨𑀮𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁂𑀳𑀺. 𑀇𑀫𑁂𑀲𑀼 𑀢𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄𑀢𑀺.

𑀬𑁄𑀥𑀸𑀚𑀻𑀯𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁫) 𑁫. 𑀫𑀗𑁆𑀕𑀮𑀯𑀕𑁆𑀕𑁄

𑁧-𑁯. 𑀅𑀓𑀼𑀲𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁭-𑁧𑁫𑁫. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀬𑀣𑀸 𑀆𑀦𑁂𑀢𑁆𑀯𑀸 𑀞𑀧𑀺𑀢𑁄. 𑀤𑀼𑀢𑀺𑀬𑁂 𑀲𑀸𑀯𑀚𑁆𑀚𑁂𑀦𑀸𑀢𑀺 𑀲𑀤𑁄𑀲𑁂𑀦. 𑀢𑀢𑀺𑀬𑁂 𑀯𑀺𑀲𑀫𑁂𑀦𑀸𑀢𑀺 𑀲𑀧𑀓𑁆𑀔𑀮𑀦𑁂𑀦. 𑀲𑀫𑁂𑀦𑀸𑀢𑀺 𑀅𑀧𑀓𑁆𑀔𑀮𑀦𑁂𑀦. 𑀘𑀢𑀼𑀢𑁆𑀣𑁂 𑀅𑀲𑀼𑀘𑀺𑀦𑀸𑀢𑀺 𑀕𑀽𑀣𑀲𑀤𑀺𑀲𑁂𑀦 𑀅𑀧𑀭𑀺𑀲𑀼𑀤𑁆𑀥𑁂𑀦 𑀅𑀫𑁂𑀚𑁆𑀛𑁂𑀦. 𑀲𑀼𑀘𑀺𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑁂𑀦 𑀫𑁂𑀚𑁆𑀛𑁂𑀦. 𑀧𑀜𑁆𑀘𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.

𑁧𑁦. 𑀧𑀼𑀩𑁆𑀩𑀡𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁬. 𑀤𑀲𑀫𑁂 𑀲𑀼𑀦𑀓𑁆𑀔𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀺𑀁 𑀤𑀺𑀯𑀲𑁂 𑀢𑀬𑁄 𑀲𑀼𑀘𑀭𑀺𑀢𑀥𑀫𑁆𑀫𑀸 𑀧𑀽𑀭𑀺𑀢𑀸 𑀳𑁄𑀦𑁆𑀢𑀺, 𑀲𑁄 𑀤𑀺𑀯𑀲𑁄 𑀮𑀤𑁆𑀥𑀦𑀓𑁆𑀔𑀢𑁆𑀢𑀬𑁄𑀕𑁄 𑀦𑀸𑀫, 𑀢𑁂𑀦𑀲𑁆𑀲 𑀲𑀤𑀸 𑀲𑀼𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑁂𑀯 𑀤𑀺𑀯𑀲𑁄 𑀓𑀢𑀫𑀗𑁆𑀕𑀮𑁄 𑀦𑀸𑀫 𑀳𑁄𑀢𑀺, 𑀢𑁂𑀦𑀲𑁆𑀲 𑀲𑀤𑀸 𑀲𑀼𑀫𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀪𑀸𑀢𑀫𑁆𑀧𑀺𑀲𑁆𑀲 𑀲𑀤𑀸 𑀲𑀼𑀧𑁆𑀧𑀪𑀸𑀢𑀫𑁂𑀯, 𑀲𑀬𑀦𑀢𑁄 𑀉𑀝𑁆𑀞𑀸𑀦𑀫𑁆𑀧𑀺 𑀲𑀼𑀳𑀼𑀝𑁆𑀞𑀺𑀢𑀫𑁂𑀯, 𑀔𑀡𑁄𑀧𑀺 𑀲𑀼𑀓𑁆𑀔𑀡𑁄𑀯, 𑀫𑀼𑀳𑀼𑀢𑁆𑀢𑁄𑀧𑀺 𑀲𑀼𑀫𑀼𑀳𑀼𑀢𑁆𑀢𑁄𑀯. 𑀏𑀢𑁆𑀣 𑀘 𑀤𑀲𑀘𑁆𑀙𑀭𑀧𑀫𑀸𑀡𑁄 𑀓𑀸𑀮𑁄 𑀔𑀡𑁄 𑀦𑀸𑀫, 𑀢𑁂𑀦 𑀔𑀡𑁂𑀦 𑀤𑀲𑀓𑁆𑀔𑀡𑁄 𑀓𑀸𑀮𑁄 𑀮𑀬𑁄 𑀦𑀸𑀫, 𑀢𑁂𑀦 𑀮𑀬𑁂𑀦 𑀘 𑀤𑀲𑀮𑀬𑁄 𑀓𑀸𑀮𑁄 𑀔𑀡𑀮𑀬𑁄 𑀦𑀸𑀫, 𑀢𑁂𑀦 𑀤𑀲𑀕𑀼𑀡𑁄 𑀫𑀼𑀳𑀼𑀢𑁆𑀢𑁄 𑀦𑀸𑀫, 𑀢𑁂𑀦 𑀤𑀲𑀕𑀼𑀡𑁄 𑀔𑀡𑀫𑀼𑀳𑀼𑀢𑁆𑀢𑁄 𑀦𑀸𑀫𑀸𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀬𑀺𑀝𑁆𑀞𑀁 𑀩𑁆𑀭𑀳𑁆𑀫𑀘𑀸𑀭𑀺𑀲𑀽𑀢𑀺 𑀬𑀲𑁆𑀫𑀺𑀁 𑀤𑀺𑀯𑀲𑁂 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑀺𑀢𑀸𑀦𑀺, 𑀢𑀤𑀸𑀲𑁆𑀲 𑀲𑁂𑀝𑁆𑀞𑀘𑀸𑀭𑀻𑀲𑀼 𑀤𑀺𑀦𑁆𑀦𑀤𑀸𑀦𑀁 𑀲𑀼𑀬𑀺𑀝𑁆𑀞𑀁 𑀦𑀸𑀫 𑀳𑁄𑀢𑀺. 𑀧𑀤𑀓𑁆𑀔𑀺𑀡𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀢𑀁 𑀤𑀺𑀯𑀲𑀁 𑀢𑁂𑀦 𑀓𑀢𑀁 𑀓𑀸𑀬𑀓𑀫𑁆𑀫𑀁 𑀯𑀟𑁆𑀠𑀺𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀤𑀓𑁆𑀔𑀺𑀡𑀸𑀦𑀺 𑀓𑀢𑁆𑀯𑀸𑀦𑀸𑀢𑀺 𑀯𑀟𑁆𑀠𑀺𑀬𑀼𑀢𑁆𑀢𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀓𑀢𑁆𑀯𑀸. 𑀮𑀪𑀦𑁆𑀢𑀢𑁆𑀣𑁂 𑀧𑀤𑀓𑁆𑀔𑀺𑀡𑁂𑀢𑀺 𑀧𑀤𑀓𑁆𑀔𑀺𑀡𑁂 𑀯𑀟𑁆𑀠𑀺𑀅𑀢𑁆𑀣𑁂𑀬𑁂𑀯 𑀮𑀪𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀗𑁆𑀕𑀮𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.