(𑁧𑁦) 𑁫. 𑀮𑁄𑀡𑀓𑀧𑀮𑁆𑀮𑀯𑀕𑁆𑀕𑁄

𑁧. 𑀅𑀘𑁆𑀘𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀅𑀘𑁆𑀘𑀸𑀬𑀺𑀓𑀸𑀦𑀻𑀢𑀺 𑀅𑀢𑀺𑀧𑀸𑀢𑀺𑀓𑀸𑀦𑀺. 𑀓𑀭𑀡𑀻𑀬𑀸𑀦𑀻𑀢𑀺 𑀅𑀯𑀲𑁆𑀲𑀓𑀺𑀘𑁆𑀘𑀸𑀦𑀺. 𑀬𑀜𑁆𑀳𑀺 𑀦 𑀅𑀯𑀲𑁆𑀲𑀁 𑀓𑀸𑀢𑀩𑁆𑀩𑀁, 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀲𑁆𑀲𑀁 𑀓𑀸𑀢𑀩𑁆𑀩𑀁 𑀓𑀭𑀡𑀻𑀬𑀁 𑀦𑀸𑀫. 𑀲𑀻𑀖𑀁 𑀲𑀻𑀖𑀦𑁆𑀢𑀺 𑀯𑁂𑀕𑁂𑀦 𑀯𑁂𑀕𑁂𑀦. 𑀢𑀲𑁆𑀲 𑀔𑁄 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀦𑀢𑁆𑀣𑀺 𑀲𑀸 𑀇𑀤𑁆𑀥𑀺 𑀯𑀸 𑀆𑀦𑀼𑀪𑀸𑀯𑁄 𑀯𑀸𑀢𑀺 𑀲𑀸 𑀯𑀸 𑀇𑀤𑁆𑀥𑀺 𑀲𑁄 𑀯𑀸 𑀆𑀦𑀼𑀪𑀸𑀯𑁄 𑀦𑀢𑁆𑀣𑀺. 𑀉𑀢𑁆𑀢𑀭𑀲𑁆𑀯𑁂𑀢𑀺 𑀢𑀢𑀺𑀬𑀤𑀺𑀯𑀲𑁂. 𑀉𑀢𑀼𑀧𑀭𑀺𑀡𑀸𑀫𑀺𑀦𑀻𑀢𑀺 𑀮𑀤𑁆𑀥𑀉𑀢𑀼𑀧𑀭𑀺𑀡𑀸𑀫𑀸𑀦𑀺 𑀳𑀼𑀢𑁆𑀯𑀸. 𑀚𑀸𑀬𑀦𑁆𑀢𑀺𑀧𑀻𑀢𑀺 𑀢𑀢𑀺𑀬𑀤𑀺𑀯𑀲𑁂 𑀦𑀺𑀓𑁆𑀔𑀦𑁆𑀢𑀲𑁂𑀢𑀗𑁆𑀓𑀼𑀭𑀸𑀦𑀺 𑀳𑁄𑀦𑁆𑀢𑀺, 𑀲𑀢𑁆𑀢𑀸𑀳𑁂 𑀧𑀢𑁆𑀢𑁂 𑀦𑀻𑀮𑀗𑁆𑀓𑀼𑀭𑀸𑀦𑀺 𑀳𑁄𑀦𑁆𑀢𑀺. 𑀕𑀩𑁆𑀪𑀻𑀦𑀺𑀧𑀺 𑀳𑁄𑀦𑁆𑀢𑀻𑀢𑀺 𑀤𑀺𑀬𑀟𑁆𑀠𑀫𑀸𑀲𑀁 𑀧𑀢𑁆𑀯𑀸 𑀕𑀳𑀺𑀢𑀕𑀩𑁆𑀪𑀸𑀦𑀺 𑀳𑁄𑀦𑁆𑀢𑀺. 𑀧𑀘𑁆𑀘𑀦𑁆𑀢𑀺𑀧𑀻𑀢𑀺 𑀢𑀬𑁄 𑀫𑀸𑀲𑁂 𑀧𑀢𑁆𑀯𑀸 𑀧𑀘𑁆𑀘𑀦𑁆𑀢𑀺. 𑀇𑀤𑀸𑀦𑀺 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀕𑀳𑀧𑀢𑀺𑀓𑁂𑀦 𑀯𑀸 𑀲𑀲𑁆𑀲𑁂𑀳𑀺 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺, 𑀲𑀸𑀲𑀦𑁂 𑀧𑀦 𑀢𑀧𑁆𑀧𑀝𑀺𑀭𑀽𑀧𑀓𑀁 𑀧𑀼𑀕𑁆𑀕𑀮𑀁 𑀯𑀸 𑀅𑀢𑁆𑀣𑀁 𑀯𑀸 𑀤𑀲𑁆𑀲𑁂𑀢𑀼𑀁 𑀢𑀁 𑀢𑀁 𑀑𑀧𑀫𑁆𑀫𑀁 𑀆𑀳𑀭𑀦𑁆𑀢𑀺. 𑀢𑀲𑁆𑀫𑀸 𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 𑀏𑀢𑀁 𑀆𑀪𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑁂𑀯 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀅𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀲𑀺𑀓𑁆𑀔𑀸 𑀧𑀦 𑀇𑀥𑀸𑀧𑀺 𑀫𑀺𑀲𑁆𑀲𑀺𑀓𑀸 𑀏𑀯 𑀓𑀣𑀺𑀢𑀸.

𑁨. 𑀧𑀯𑀺𑀯𑁂𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀤𑀼𑀢𑀺𑀬𑁂 𑀘𑀻𑀯𑀭𑀧𑀯𑀺𑀯𑁂𑀓𑀦𑁆𑀢𑀺 𑀘𑀻𑀯𑀭𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀓𑀺𑀮𑁂𑀲𑁂𑀳𑀺 𑀯𑀺𑀯𑀺𑀢𑁆𑀢𑀪𑀸𑀯𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀡𑀸𑀦𑀻𑀢𑀺 𑀲𑀸𑀡𑀯𑀸𑀓𑀘𑁂𑀮𑀸𑀦𑀺. 𑀫𑀲𑀸𑀡𑀸𑀦𑀻𑀢𑀺 𑀫𑀺𑀲𑁆𑀲𑀓𑀘𑁂𑀮𑀸𑀦𑀺. 𑀙𑀯𑀤𑀼𑀲𑁆𑀲𑀸𑀦𑀻𑀢𑀺 𑀫𑀢𑀲𑀭𑀻𑀭𑀢𑁄 𑀙𑀟𑁆𑀟𑀺𑀢𑀯𑀢𑁆𑀣𑀸𑀦𑀺, 𑀏𑀭𑀓𑀢𑀺𑀡𑀸𑀤𑀻𑀦𑀺 𑀯𑀸 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀸𑀦𑀺. 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀧𑀣𑀯𑀺𑀬𑀁 𑀙𑀟𑁆𑀟𑀺𑀢𑀦𑀦𑁆𑀢𑀓𑀸𑀦𑀺. 𑀢𑀺𑀭𑀻𑀝𑀸𑀦𑀻𑀢𑀺 𑀭𑀼𑀓𑁆𑀔𑀢𑀘𑀯𑀢𑁆𑀣𑀸𑀦𑀺. 𑀅𑀚𑀺𑀦𑀸𑀦𑀻𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑀸𑀦𑀺. 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀢𑀤𑁂𑀯 𑀫𑀚𑁆𑀛𑁂 𑀨𑀸𑀮𑀺𑀢𑀁, 𑀲𑀳𑀔𑀼𑀭𑀓𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀼𑀲𑀘𑀻𑀭𑀦𑁆𑀢𑀺 𑀓𑀼𑀲𑀢𑀺𑀡𑀸𑀦𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀭𑀁. 𑀯𑀸𑀓𑀘𑀻𑀭𑀨𑀮𑀓𑀘𑀻𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀲𑀓𑀫𑁆𑀩𑀮𑀦𑁆𑀢𑀺 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀓𑀢𑀓𑀫𑁆𑀩𑀮𑀁. 𑀯𑀸𑀮𑀓𑀫𑁆𑀩𑀮𑀦𑁆𑀢𑀺 𑀅𑀲𑁆𑀲𑀯𑀸𑀮𑀸𑀤𑀻𑀳𑀺 𑀓𑀢𑀓𑀫𑁆𑀩𑀮𑀁. 𑀉𑀮𑀽𑀓𑀧𑀓𑁆𑀔𑀺𑀓𑀦𑁆𑀢𑀺 𑀉𑀮𑀽𑀓𑀧𑀢𑁆𑀢𑀸𑀦𑀺 𑀕𑀦𑁆𑀣𑁂𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀁.

𑀲𑀸𑀓𑀪𑀓𑁆𑀔𑀸𑀢𑀺 𑀅𑀮𑁆𑀮𑀲𑀸𑀓𑀪𑀓𑁆𑀔𑀸. 𑀲𑀸𑀫𑀸𑀓𑀪𑀓𑁆𑀔𑀸𑀢𑀺 𑀲𑀸𑀫𑀸𑀓𑀢𑀡𑁆𑀟𑀼𑀮𑀪𑀓𑁆𑀔𑀸. 𑀦𑀻𑀯𑀸𑀭𑀸𑀤𑀻𑀲𑀼 𑀦𑀻𑀯𑀸𑀭𑀸 𑀦𑀸𑀫 𑀅𑀭𑀜𑁆𑀜𑁂 𑀲𑀬𑀁 𑀚𑀸𑀢𑀯𑀻𑀳𑀺𑀚𑀸𑀢𑀺. 𑀤𑀤𑁆𑀤𑀼𑀮𑀦𑁆𑀢𑀺 𑀘𑀫𑁆𑀫𑀓𑀸𑀭𑁂𑀳𑀺 𑀘𑀫𑁆𑀫𑀁 𑀮𑀺𑀔𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁. 𑀳𑀝𑀁 𑀯𑀼𑀘𑁆𑀘𑀢𑀺 𑀲𑀺𑀮𑁂𑀲𑁄𑀧𑀺 𑀲𑁂𑀯𑀸𑀮𑁄𑀧𑀺 𑀓𑀡𑀺𑀓𑀸𑀭𑀸𑀤𑀺𑀭𑀼𑀓𑁆𑀔𑀦𑀺𑀬𑁆𑀬𑀸𑀲𑁄𑀧𑀺. 𑀓𑀡𑀦𑁆𑀢𑀺 𑀓𑀼𑀡𑁆𑀟𑀓𑀁. 𑀆𑀘𑀸𑀫𑁄𑀢𑀺 𑀪𑀢𑁆𑀢𑀉𑀓𑁆𑀔𑀮𑀺𑀓𑀸𑀬 𑀮𑀕𑁆𑀕𑁄 𑀛𑀸𑀫𑀑𑀤𑀦𑁄. 𑀢𑀁 𑀙𑀟𑁆𑀟𑀺𑀢𑀝𑁆𑀞𑀸𑀦𑁂 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀑𑀤𑀦𑀓𑀜𑁆𑀚𑀺𑀬𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀺𑀜𑁆𑀜𑀸𑀓𑀸𑀤𑀬𑁄 𑀧𑀸𑀓𑀝𑀸𑀯. 𑀧𑀯𑀢𑁆𑀢𑀨𑀮𑀪𑁄𑀚𑀻𑀢𑀺 𑀧𑀢𑀺𑀢𑀨𑀮𑀪𑁄𑀚𑀻. 𑀪𑀼𑀲𑀸𑀕𑀸𑀭𑀦𑁆𑀢𑀺 𑀔𑀮𑀲𑀸𑀮𑀁.

𑀲𑀻𑀮𑀯𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀼𑀲𑁆𑀲𑀻𑀮𑁆𑀬𑀜𑁆𑀘𑀲𑁆𑀲 𑀧𑀳𑀻𑀦𑀁 𑀳𑁄𑀢𑀻𑀢𑀺 𑀧𑀜𑁆𑀘 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄𑀢𑀺 𑀬𑀸𑀣𑀸𑀯𑀤𑀺𑀝𑁆𑀞𑀺𑀓𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀅𑀬𑀸𑀣𑀸𑀯𑀤𑀺𑀝𑁆𑀞𑀺. 𑀆𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸. 𑀅𑀕𑁆𑀕𑀧𑁆𑀧𑀢𑁆𑀢𑁄𑀢𑀺 𑀲𑀻𑀮𑀕𑁆𑀕𑀧𑁆𑀧𑀢𑁆𑀢𑁄. 𑀲𑀸𑀭𑀧𑁆𑀧𑀢𑁆𑀢𑁄𑀢𑀺 𑀲𑀻𑀮𑀲𑀸𑀭𑀁 𑀧𑀢𑁆𑀢𑁄. 𑀲𑀼𑀤𑁆𑀥𑁄𑀢𑀺 𑀧𑀭𑀺𑀲𑀼𑀤𑁆𑀥𑁄. 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄.

𑀲𑁂𑀬𑁆𑀬𑀣𑀸𑀧𑀻𑀢𑀺 𑀬𑀣𑀸 𑀦𑀸𑀫. 𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀧𑀓𑁆𑀓𑀲𑀸𑀮𑀺𑀪𑀭𑀺𑀢𑀁. 𑀲𑀗𑁆𑀖𑀭𑀸𑀧𑁂𑀬𑁆𑀬𑀸𑀢𑀺 𑀲𑀗𑁆𑀓𑀟𑁆𑀠𑀸𑀧𑁂𑀬𑁆𑀬. 𑀉𑀩𑁆𑀩𑀳𑀸𑀧𑁂𑀬𑁆𑀬𑀸𑀢𑀺 𑀔𑀮𑀝𑁆𑀞𑀸𑀦𑀁 𑀆𑀳𑀭𑀸𑀧𑁂𑀬𑁆𑀬. 𑀪𑀼𑀲𑀺𑀓𑀦𑁆𑀢𑀺 𑀪𑀼𑀲𑀁. 𑀓𑁄𑀝𑁆𑀝𑀸𑀧𑁂𑀬𑁆𑀬𑀸𑀢𑀺 𑀉𑀤𑀼𑀓𑁆𑀔𑀮𑁂 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀫𑀼𑀲𑀮𑁂𑀳𑀺 𑀧𑀳𑀭𑀸𑀧𑁂𑀬𑁆𑀬. 𑀅𑀕𑁆𑀕𑀧𑁆𑀧𑀢𑁆𑀢𑀸𑀦𑀻𑀢𑀺 𑀢𑀡𑁆𑀟𑀼𑀮𑀕𑁆𑀕𑀁 𑀧𑀢𑁆𑀢𑀸𑀦𑀺. 𑀲𑀸𑀭𑀧𑁆𑀧𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀬𑀁 𑀧𑀦𑁂𑀢𑁆𑀣 ‘‘𑀤𑀼𑀲𑁆𑀲𑀻𑀮𑁆𑀬𑀜𑁆𑀘𑀲𑁆𑀲 𑀧𑀳𑀻𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀲𑁆𑀲 𑀧𑀳𑀻𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀦𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩. 𑀲𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀢𑀢𑀺𑀬𑁂 𑀯𑀺𑀤𑁆𑀥𑁂𑀢𑀺 𑀯𑀮𑀸𑀳𑀓𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢𑁂. 𑀤𑁂𑀯𑁂𑀢𑀺 𑀆𑀓𑀸𑀲𑁂. 𑀅𑀪𑀺𑀯𑀺𑀳𑀘𑁆𑀘𑀸𑀢𑀺 𑀅𑀪𑀺𑀯𑀺𑀳𑀦𑀺𑀢𑁆𑀯𑀸. 𑀬𑀢𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀯𑀺𑀭𑀚𑀦𑁆𑀢𑀺 𑀭𑀸𑀕𑀭𑀚𑀸𑀤𑀺𑀭𑀳𑀺𑀢𑀁. 𑀢𑁂𑀲𑀁𑀬𑁂𑀯 𑀫𑀮𑀸𑀦𑀁 𑀯𑀺𑀕𑀢𑀢𑁆𑀢𑀸 𑀯𑀻𑀢𑀫𑀮𑀁. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀓𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀓𑁆𑀔𑀼𑀁. 𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀦𑁆𑀢𑀺 𑀤𑀼𑀯𑀺𑀥𑀫𑁂𑀯𑀲𑁆𑀲 𑀲𑀁𑀬𑁄𑀚𑀦𑀁 𑀦𑀢𑁆𑀣𑀺, 𑀇𑀢𑀭𑀫𑁆𑀧𑀺 𑀧𑀦 𑀧𑀼𑀦 𑀇𑀫𑀁 𑀮𑁄𑀓𑀁 𑀆𑀦𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀛𑀸𑀦𑀸𑀦𑀸𑀕𑀸𑀫𑀻 𑀦𑀸𑀫 𑀓𑀣𑀺𑀢𑁄𑀢𑀺.

𑁪. 𑀧𑀭𑀺𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀘𑀢𑀼𑀢𑁆𑀣𑁂 𑀦 𑀩𑀸𑀳𑀼𑀮𑀺𑀓𑀸 𑀳𑁄𑀦𑁆𑀢𑀻𑀢𑀺 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑀸 𑀦 𑀳𑁄𑀦𑁆𑀢𑀺. 𑀦 𑀲𑀸𑀣𑀮𑀺𑀓𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀦 𑀕𑀡𑁆𑀳𑀦𑁆𑀢𑀺. 𑀑𑀓𑁆𑀓𑀫𑀦𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸𑀢𑀺 𑀑𑀓𑁆𑀓𑀫𑀦𑀁 𑀯𑀼𑀘𑁆𑀘𑀢𑀺 𑀅𑀯𑀕𑀫𑀦𑀝𑁆𑀞𑁂𑀦 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺, 𑀢𑁂𑀲𑀼 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸. 𑀧𑀯𑀺𑀯𑁂𑀓𑁂 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀲𑀗𑁆𑀔𑀸𑀢𑁂 𑀢𑀺𑀯𑀺𑀥𑁂𑀧𑀺 𑀯𑀺𑀯𑁂𑀓𑁂 𑀧𑀼𑀩𑁆𑀩𑀗𑁆𑀕𑀫𑀸. 𑀯𑀻𑀭𑀺𑀬𑀁 𑀆𑀭𑀪𑀦𑁆𑀢𑀻𑀢𑀺 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑀺. 𑀅𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀲𑁆𑀲 𑀅𑀧𑁆𑀧𑀢𑁆𑀢𑀯𑀺𑀲𑁂𑀲𑀲𑁆𑀲. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀙𑀺𑀫𑀸 𑀚𑀦𑀢𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀬𑁄. 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀓𑀢𑀁 𑀅𑀦𑀼𑀓𑀭𑁄𑀢𑀺. 𑀬𑀁 𑀢𑀸𑀬 𑀚𑀦𑀢𑀸𑀬 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀤𑀺𑀝𑁆𑀞𑀁, 𑀢𑀲𑁆𑀲 𑀅𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺 𑀦𑀸𑀫. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀯𑀢𑀻 𑀧𑀭𑀺𑀲𑀸𑀢𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀧𑀭𑀺𑀲𑀸 𑀅𑀕𑁆𑀕𑀧𑀼𑀕𑁆𑀕𑀮𑀯𑀢𑀻 𑀦𑀸𑀫 𑀯𑀼𑀘𑁆𑀘𑀢𑀺.

𑀪𑀡𑁆𑀟𑀦𑀚𑀸𑀢𑀸𑀢𑀺 𑀚𑀸𑀢𑀪𑀡𑁆𑀟𑀦𑀸. 𑀓𑀮𑀳𑀚𑀸𑀢𑀸𑀢𑀺 𑀚𑀸𑀢𑀓𑀮𑀳𑀸. 𑀪𑀡𑁆𑀟𑀦𑀦𑁆𑀢𑀺 𑀘𑁂𑀢𑁆𑀣 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄, 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀯𑀻𑀢𑀺𑀓𑁆𑀓𑀫𑁄 𑀓𑀮𑀳𑁄 𑀦𑀸𑀫. 𑀯𑀺𑀯𑀸𑀤𑀸𑀧𑀦𑁆𑀦𑀸𑀢𑀺 𑀯𑀺𑀭𑀼𑀤𑁆𑀥𑀯𑀸𑀤𑀁 𑀆𑀧𑀦𑁆𑀦𑀸. 𑀫𑀼𑀔𑀲𑀢𑁆𑀢𑀻𑀳𑀻𑀢𑀺 𑀕𑀼𑀡𑀯𑀺𑀚𑁆𑀛𑀦𑀝𑁆𑀞𑁂𑀦 𑀨𑀭𑀼𑀲𑀸 𑀯𑀸𑀘𑀸 ‘‘𑀫𑀼𑀔𑀲𑀢𑁆𑀢𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀳𑀺 𑀫𑀼𑀔𑀲𑀢𑁆𑀢𑀻𑀳𑀺. 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀯𑀺𑀚𑁆𑀛𑀦𑁆𑀢𑀸 𑀯𑀺𑀘𑀭𑀦𑁆𑀢𑀺.

𑀲𑀫𑀕𑁆𑀕𑀸𑀢𑀺 𑀲𑀳𑀺𑀢𑀸. 𑀲𑀫𑁆𑀫𑁄𑀤𑀫𑀸𑀦𑀸𑀢𑀺 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀸. 𑀔𑀻𑀭𑁄𑀤𑀓𑀻𑀪𑀽𑀢𑀸𑀢𑀺 𑀔𑀻𑀭𑁄𑀤𑀓𑀁 𑀯𑀺𑀬 𑀪𑀽𑀢𑀸. 𑀧𑀺𑀬𑀘𑀓𑁆𑀔𑀽𑀳𑀻𑀢𑀺 𑀉𑀧𑀲𑀦𑁆𑀢𑁂𑀳𑀺 𑀫𑁂𑀢𑁆𑀢𑀘𑀓𑁆𑀔𑀽𑀳𑀺. 𑀧𑀻𑀢𑀺 𑀚𑀸𑀬𑀢𑀻𑀢𑀺 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻𑀢𑀺 𑀦𑀸𑀫𑀓𑀸𑀬𑁄𑀧𑀺 𑀭𑀽𑀧𑀓𑀸𑀬𑁄𑀧𑀺 𑀯𑀺𑀕𑀢𑀤𑀭𑀣𑁄 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀓𑀸𑀬𑁄𑀢𑀺 𑀅𑀲𑀸𑀭𑀤𑁆𑀥𑀓𑀸𑀬𑁄. 𑀲𑀼𑀔𑀁 𑀯𑁂𑀤𑀺𑀬𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀯𑁂𑀤𑀺𑀬𑀢𑀺. 𑀲𑀫𑀸𑀥𑀺𑀬𑀢𑀻𑀢𑀺 𑀆𑀭𑀫𑁆𑀫𑀡𑁂 𑀲𑀫𑁆𑀫𑀸 𑀞𑀧𑀻𑀬𑀢𑀺.

𑀣𑀼𑀮𑁆𑀮𑀨𑀼𑀲𑀺𑀢𑀓𑁂𑀢𑀺 𑀫𑀳𑀸𑀨𑀼𑀲𑀺𑀢𑀓𑁂. 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸𑀢𑀺 𑀏𑀢𑁆𑀣 𑀓𑀦𑁆𑀤𑀭𑁄 𑀦𑀸𑀫 ‘‘𑀓’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀉𑀤𑀓𑁂𑀦 𑀤𑀸𑀭𑀺𑀢𑁄 𑀉𑀤𑀓𑀪𑀺𑀦𑁆𑀦𑁄 𑀧𑀩𑁆𑀩𑀢𑀧𑁆𑀧𑀤𑁂𑀲𑁄, 𑀬𑁄 ‘‘𑀦𑀺𑀢𑀫𑁆𑀪𑁄’’𑀢𑀺𑀧𑀺 ‘‘𑀦𑀤𑀺𑀓𑀼𑀜𑁆𑀚𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀤𑀭𑀁 𑀦𑀸𑀫 𑀅𑀝𑁆𑀞 𑀫𑀸𑀲𑁂 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀨𑀮𑀺𑀢𑁄 𑀪𑀽𑀫𑀺𑀧𑁆𑀧𑀤𑁂𑀲𑁄. 𑀲𑀸𑀔𑀸𑀢𑀺 𑀓𑀼𑀲𑁄𑀩𑁆𑀪𑀕𑀸𑀫𑀺𑀦𑀺𑀬𑁄 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀬𑁄. 𑀓𑀼𑀲𑁄𑀩𑁆𑀪𑀸𑀢𑀺 𑀔𑀼𑀤𑁆𑀤𑀓𑀆𑀯𑀸𑀝𑀸. 𑀫𑀳𑀸𑀲𑁄𑀩𑁆𑀪𑀸𑀢𑀺 𑀫𑀳𑀸𑀆𑀯𑀸𑀝𑀸. 𑀓𑀼𑀦𑁆𑀦𑀤𑀺𑀬𑁄𑀢𑀺 𑀔𑀼𑀤𑁆𑀤𑀓𑀦𑀤𑀺𑀬𑁄. 𑀫𑀳𑀸𑀦𑀤𑀺𑀬𑁄𑀢𑀺 𑀕𑀗𑁆𑀕𑀸𑀬𑀫𑀼𑀦𑀸𑀤𑀺𑀓𑀸 𑀫𑀳𑀸𑀲𑀭𑀺𑀢𑀸.

𑁫-𑁭. 𑀧𑀞𑀫𑀆𑀚𑀸𑀦𑀻𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁭-𑁯𑁯. 𑀧𑀜𑁆𑀘𑀫𑁂 𑀅𑀗𑁆𑀕𑁂𑀳𑀻𑀢𑀺 𑀕𑀼𑀡𑀗𑁆𑀕𑁂𑀳𑀺. 𑀭𑀸𑀚𑀸𑀭𑀳𑁄𑀢𑀺 𑀭𑀜𑁆𑀜𑁄 𑀅𑀭𑀳𑁄 𑀅𑀦𑀼𑀘𑁆𑀙𑀯𑀺𑀓𑁄. 𑀭𑀸𑀚𑀪𑁄𑀕𑁆𑀕𑁄𑀢𑀺 𑀭𑀜𑁆𑀜𑁄 𑀉𑀧𑀪𑁄𑀕𑀪𑀽𑀢𑁄. 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑀺 𑀭𑀜𑁆𑀜𑁄 𑀳𑀢𑁆𑀣𑀧𑀸𑀤𑀸𑀤𑀺𑀅𑀗𑁆𑀕𑀲𑀫𑀢𑀸𑀬 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑁄. 𑀩𑀮𑀲𑀫𑁆𑀧𑀦𑁆𑀦𑁄𑀢𑀺 𑀓𑀸𑀬𑀩𑀮𑁂𑀦 𑀲𑀫𑁆𑀧𑀦𑁆𑀦𑁄. 𑀆𑀳𑀼𑀦𑁂𑀬𑁆𑀬𑁄𑀢𑀺 𑀆𑀳𑀼𑀢𑀺𑀲𑀗𑁆𑀔𑀸𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄. 𑀧𑀸𑀳𑀼𑀦𑁂𑀬𑁆𑀬𑁄𑀢𑀺 𑀧𑀸𑀳𑀼𑀦𑀓𑀪𑀢𑁆𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄. 𑀤𑀓𑁆𑀔𑀺𑀡𑁂𑀬𑁆𑀬𑁄𑀢𑀺 𑀤𑀲𑀯𑀺𑀥𑀤𑀸𑀦𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀲𑀤𑁆𑀥𑀸𑀤𑀸𑀦𑀲𑀗𑁆𑀔𑀸𑀢𑀸𑀬 𑀤𑀓𑁆𑀔𑀺𑀡𑀸𑀬 𑀅𑀦𑀼𑀘𑁆𑀙𑀯𑀺𑀓𑁄. 𑀅𑀜𑁆𑀚𑀮𑀺𑀓𑀭𑀡𑀻𑀬𑁄𑀢𑀺 𑀅𑀜𑁆𑀚𑀮𑀺𑀧𑀕𑁆𑀕𑀳𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄. 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺 𑀲𑀩𑁆𑀩𑀮𑁄𑀓𑀲𑁆𑀲 𑀅𑀲𑀤𑀺𑀲𑀁 𑀧𑀼𑀜𑁆𑀜𑀯𑀺𑀭𑀼𑀳𑀦𑀝𑁆𑀞𑀸𑀦𑀁.

𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀕𑀼𑀡𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑁄. 𑀩𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀻𑀭𑀺𑀬𑀩𑀮𑁂𑀦 𑀲𑀫𑁆𑀧𑀦𑁆𑀦𑁄. 𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀜𑀸𑀡𑀚𑀯𑁂𑀦 𑀲𑀫𑁆𑀧𑀦𑁆𑀦𑁄. 𑀣𑀸𑀫𑀯𑀸𑀢𑀺 𑀜𑀸𑀡𑀣𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀣𑀺𑀭𑀧𑀭𑀓𑁆𑀓𑀫𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄𑀢𑀺 𑀅𑀝𑁆𑀞𑀧𑀺𑀢𑀥𑀼𑀭𑁄 𑀧𑀕𑁆𑀕𑀳𑀺𑀢𑀥𑀼𑀭𑁄, 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀯𑀻𑀭𑀺𑀬𑀥𑀼𑀭𑀁 𑀦 𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀼𑀲𑀘𑁆𑀘𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀘 𑀜𑀸𑀡𑀚𑀯𑀲𑀫𑁆𑀧𑀦𑁆𑀦𑀢𑀸 𑀓𑀣𑀺𑀢𑀸𑀢𑀺. 𑀙𑀝𑁆𑀞𑁂 𑀢𑀻𑀡𑀺 𑀘 𑀫𑀕𑁆𑀕𑀸𑀦𑀺 𑀢𑀻𑀡𑀺 𑀘 𑀨𑀮𑀸𑀦𑀺, 𑀢𑀻𑀳𑀺 𑀫𑀕𑁆𑀕𑀨𑀮𑁂𑀳𑀺 𑀘 𑀜𑀸𑀡𑀚𑀯𑀲𑀫𑁆𑀧𑀦𑁆𑀦𑀢𑀸 𑀓𑀣𑀺𑀢𑀸. 𑀲𑀢𑁆𑀢𑀫𑁂 𑀅𑀭𑀳𑀢𑁆𑀢𑀨𑀮𑀁, 𑀅𑀭𑀳𑀢𑁆𑀢𑀨𑀮𑁂𑀦𑁂𑀯 𑀘 𑀫𑀕𑁆𑀕𑀓𑀺𑀘𑁆𑀘𑀁 𑀓𑀣𑀺𑀢𑀁. 𑀨𑀮𑀁 𑀧𑀦 𑀚𑀯𑀺𑀢𑀚𑀯𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀚𑀯𑁄𑀢𑀺 𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁮. 𑀧𑁄𑀢𑁆𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀅𑀝𑁆𑀞𑀫𑁂 𑀦𑀯𑁄𑀢𑀺 𑀓𑀭𑀡𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀧𑁄𑀢𑁆𑀣𑀓𑁄𑀢𑀺 𑀯𑀸𑀓𑀫𑀬𑀯𑀢𑁆𑀣𑀁. 𑀫𑀚𑁆𑀛𑀺𑀫𑁄𑀢𑀺 𑀧𑀭𑀺𑀪𑁄𑀕𑀫𑀚𑁆𑀛𑀺𑀫𑁄. 𑀚𑀺𑀡𑁆𑀡𑁄𑀢𑀺 𑀧𑀭𑀺𑀪𑁄𑀕𑀚𑀺𑀡𑁆𑀡𑁄. 𑀉𑀓𑁆𑀔𑀮𑀺𑀧𑀭𑀺𑀫𑀚𑁆𑀚𑀦𑀦𑁆𑀢𑀺 𑀉𑀓𑁆𑀔𑀮𑀺𑀧𑀭𑀺𑀧𑀼𑀜𑁆𑀙𑀦𑀁 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀤𑀼𑀩𑁆𑀩𑀡𑁆𑀡𑀢𑀸𑀬𑀸𑀢𑀺 𑀕𑀼𑀡𑀯𑀡𑁆𑀡𑀸𑀪𑀸𑀯𑁂𑀦 𑀤𑀼𑀩𑁆𑀩𑀡𑁆𑀡𑀢𑀸𑀬. 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂𑀦 𑀓𑀢𑀁 𑀅𑀦𑀼𑀓𑀭𑁄𑀦𑁆𑀢𑀺. 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀻𑀢𑀺 𑀯𑀺𑀧𑀸𑀓𑀨𑀮𑁂𑀦 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺. 𑀦 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀯𑀺𑀧𑀸𑀓𑀸𑀦𑀺𑀲𑀁𑀲𑁂𑀦𑁂𑀯 𑀦 𑀫𑀳𑀸𑀦𑀺𑀲𑀁𑀲𑀁. 𑀅𑀧𑁆𑀧𑀕𑁆𑀖𑀢𑀸𑀬𑀸𑀢𑀺 𑀯𑀺𑀧𑀸𑀓𑀕𑁆𑀖𑁂𑀦 𑀅𑀧𑁆𑀧𑀕𑁆𑀖𑀢𑀸𑀬. 𑀓𑀸𑀲𑀺𑀓𑀁 𑀯𑀢𑁆𑀣𑀦𑁆𑀢𑀺 𑀢𑀻𑀳𑀺 𑀓𑀧𑁆𑀧𑀸𑀲𑀅𑀁𑀲𑀽𑀳𑀺 𑀲𑀼𑀢𑁆𑀢𑀁 𑀓𑀦𑁆𑀢𑀺𑀢𑁆𑀯𑀸 𑀓𑀢𑀯𑀢𑁆𑀣𑀁, 𑀢𑀜𑁆𑀘 𑀔𑁄 𑀓𑀸𑀲𑀺𑀭𑀝𑁆𑀞𑁂𑀬𑁂𑀯 𑀉𑀝𑁆𑀞𑀺𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀻𑀮𑀁 𑀧𑀦𑁂𑀢𑁆𑀣 𑀫𑀺𑀲𑁆𑀲𑀓𑀁 𑀓𑀣𑀺𑀢𑀦𑁆𑀢𑀺.

𑁯. 𑀮𑁄𑀡𑀓𑀧𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀦𑀯𑀫𑁂 𑀬𑀣𑀸 𑀬𑀣𑀸𑀬𑀦𑁆𑀢𑀺 𑀬𑀣𑀸 𑀬𑀣𑀸 𑀅𑀬𑀁. 𑀢𑀣𑀸 𑀢𑀣𑀸 𑀢𑀦𑁆𑀢𑀺 𑀢𑀣𑀸 𑀢𑀣𑀸 𑀢𑀁 𑀓𑀫𑁆𑀫𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀬𑀣𑀸 𑀬𑀣𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀣𑀸 𑀢𑀣𑀸𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀬𑀢𑁂𑀯. 𑀦 𑀳𑀺 𑀲𑀓𑁆𑀓𑀸 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑁂𑀥𑁂𑀢𑀼𑀁. 𑀢𑀲𑁆𑀫𑀸 𑀬𑀢𑁆𑀢𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀢𑁆𑀢𑀓𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀬𑀢𑁂𑀯𑀸’’𑀢𑀺. 𑀏𑀯𑀁 𑀲𑀦𑁆𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂. 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀻𑀢𑀺 𑀬𑀁 𑀫𑀕𑁆𑀕𑀪𑀸𑀯𑀦𑀢𑁄 𑀧𑀼𑀩𑁆𑀩𑁂 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲 𑀅𑀯𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀦𑀻𑀬𑀢𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀢𑁆𑀣𑀫𑁆𑀧𑀺 𑀅𑀯𑀼𑀢𑁆𑀣𑀫𑁂𑀯 𑀳𑁄𑀢𑀺. 𑀑𑀓𑀸𑀲𑁄 𑀦 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀬𑀲𑁆𑀫𑀸 𑀘 𑀏𑀯𑀁 𑀲𑀦𑁆𑀢𑁂 𑀢𑁂𑀦 𑀓𑀫𑁆𑀫𑀸𑀬𑀽𑀳𑀦𑀜𑁆𑀘𑁂𑀯 𑀯𑀺𑀧𑀸𑀓𑀸𑀦𑀼𑀪𑀯𑀦𑀸 𑀘 𑀳𑁄𑀢𑀺, 𑀢𑀲𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬 𑀑𑀓𑀸𑀲𑁄 𑀦 𑀧𑀜𑁆𑀜𑀸𑀬𑀢𑀺 𑀦𑀸𑀫.

𑀬𑀣𑀸 𑀬𑀣𑀸 𑀯𑁂𑀤𑀦𑀻𑀬𑀦𑁆𑀢𑀺 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀢𑀣𑀸𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀬𑀢𑀻𑀢𑀺 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀅𑀲𑁆𑀲 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑁂𑀢𑀁 𑀲𑀢𑁆𑀢𑀲𑀼 𑀚𑀯𑀦𑁂𑀲𑀼 𑀧𑀞𑀫𑀚𑀯𑀦𑀓𑀫𑁆𑀫𑀁 𑀲𑀢𑀺 𑀧𑀘𑁆𑀘𑀬𑁂 𑀯𑀺𑀧𑀸𑀓𑀯𑀸𑀭𑀁 𑀮𑀪𑀦𑁆𑀢𑀫𑁂𑀯 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀅𑀲𑀢𑀺 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫. 𑀬𑀜𑁆𑀘 𑀲𑀢𑁆𑀢𑀫𑀚𑀯𑀦𑀓𑀫𑁆𑀫𑀁 𑀲𑀢𑀺 𑀧𑀘𑁆𑀘𑀬𑁂 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀅𑀲𑀢𑀺 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫. 𑀬𑀜𑁆𑀘 𑀫𑀚𑁆𑀛𑁂 𑀧𑀜𑁆𑀘𑀚𑀯𑀦𑀓𑀫𑁆𑀫𑀁 𑀬𑀸𑀯 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺, 𑀢𑀸𑀯 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 𑀦𑀸𑀫 𑀳𑁄𑀢𑀺. 𑀏𑀢𑁂𑀲𑀼 𑀆𑀓𑀸𑀭𑁂𑀲𑀼 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁 𑀓𑀫𑁆𑀫𑀁 𑀅𑀬𑀁 𑀧𑀼𑀭𑀺𑀲𑁄 𑀓𑀭𑁄𑀢𑀺, 𑀢𑁂𑀦 𑀢𑁂𑀦𑁂𑀯𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀬𑀢𑀺 𑀦𑀸𑀫. 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀫𑁂𑀯 𑀓𑀫𑁆𑀫𑀁 𑀬𑀣𑀸𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀳𑁄𑀢𑀻𑀢𑀺 𑀓𑀫𑁆𑀫𑀓𑁆𑀔𑀬𑀓𑀭𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑁂𑀧𑁂𑀢𑀩𑁆𑀩𑀓𑀫𑁆𑀫𑀲𑀫𑁆𑀪𑀯𑀢𑁄 𑀯𑀸𑀲𑁄 𑀦𑀸𑀫 𑀳𑁄𑀢𑀺, 𑀯𑀼𑀢𑁆𑀣𑀁 𑀲𑀼𑀯𑀼𑀢𑁆𑀣𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀑𑀓𑀸𑀲𑁄 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀲𑀦𑁆𑀢𑁂 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀢𑁂𑀲𑀼 𑀢𑁂𑀲𑀼 𑀪𑀯𑁂𑀲𑀼 𑀆𑀬𑀢𑀺𑀁 𑀯𑀝𑁆𑀝𑀤𑀼𑀓𑁆𑀔𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀑𑀓𑀸𑀲𑁄 𑀧𑀜𑁆𑀜𑀸𑀬𑀢𑀺 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬.

𑀇𑀤𑀸𑀦𑀺 𑀢𑀁 𑀬𑀣𑀸𑀯𑁂𑀤𑀦𑀻𑀬𑀓𑀫𑁆𑀫𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑀓𑀦𑁆𑀢𑀺 𑀧𑀭𑀺𑀢𑁆𑀢𑀁 𑀣𑁄𑀓𑀁 𑀫𑀦𑁆𑀤𑀁 𑀮𑀸𑀫𑀓𑀁. 𑀢𑀸𑀤𑀺𑀲𑀁𑀬𑁂𑀯𑀸𑀢𑀺 𑀢𑀁𑀲𑀭𑀺𑀓𑁆𑀔𑀓𑀫𑁂𑀯. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀦𑁆𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑁂𑀬𑁂𑀯 𑀤𑀺𑀝𑁆𑀞𑀥𑀫𑁆𑀫𑁂 𑀯𑀺𑀧𑀘𑁆𑀘𑀺𑀢𑀩𑁆𑀩𑀁 𑀯𑀺𑀧𑀸𑀓𑀯𑀸𑀭𑀁 𑀮𑀪𑀦𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺. 𑀦𑀸𑀡𑀼𑀧𑀺 𑀔𑀸𑀬𑀢𑀻𑀢𑀺 𑀤𑀼𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀅𑀡𑀼𑀧𑀺 𑀦 𑀔𑀸𑀬𑀢𑀺, 𑀅𑀡𑀼𑀫𑀢𑁆𑀢𑀫𑁆𑀧𑀺 𑀤𑀼𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀦 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀩𑀳𑀼𑀤𑁂𑀯𑀸𑀢𑀺 𑀩𑀳𑀼𑀓𑀁 𑀧𑀦 𑀯𑀺𑀧𑀸𑀓𑀁 𑀓𑀺𑀫𑁂𑀯 𑀤𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀸𑀯𑀺𑀢𑀓𑀸𑀬𑁄𑀢𑀺𑀆𑀤𑀻𑀳𑀺 𑀓𑀸𑀬𑀪𑀸𑀯𑀦𑀸𑀭𑀳𑀺𑀢𑁄 𑀯𑀝𑁆𑀝𑀕𑀸𑀫𑀻 𑀧𑀼𑀣𑀼𑀚𑁆𑀚𑀦𑁄 𑀤𑀲𑁆𑀲𑀺𑀢𑁄. 𑀧𑀭𑀺𑀢𑁆𑀢𑁄𑀢𑀺 𑀧𑀭𑀺𑀢𑁆𑀢𑀕𑀼𑀡𑁄. 𑀅𑀧𑁆𑀧𑀸𑀢𑀼𑀫𑁄𑀢𑀺 𑀆𑀢𑀼𑀫𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀪𑀸𑀯𑁄, 𑀢𑀲𑁆𑀫𑀺𑀁 𑀫𑀳𑀦𑁆𑀢𑁂𑀧𑀺 𑀕𑀼𑀡𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀸𑀢𑀼𑀫𑁄𑀬𑁂𑀯. 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀻𑀢𑀺 𑀅𑀧𑁆𑀧𑀓𑁂𑀦𑀧𑀺 𑀧𑀸𑀧𑁂𑀦 𑀤𑀼𑀓𑁆𑀔𑀯𑀺𑀳𑀸𑀭𑀻. 𑀪𑀸𑀯𑀺𑀢𑀓𑀸𑀬𑁄𑀢𑀺𑀆𑀤𑀻𑀳𑀺 𑀔𑀻𑀡𑀸𑀲𑀯𑁄 𑀤𑀲𑁆𑀲𑀺𑀢𑁄. 𑀲𑁄 𑀳𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀬 𑀓𑀸𑀬𑀪𑀸𑀯𑀦𑀸𑀬 𑀪𑀸𑀯𑀺𑀢𑀓𑀸𑀬𑁄 𑀦𑀸𑀫. 𑀓𑀸𑀬𑀲𑁆𑀲 𑀯𑀸 𑀯𑀟𑁆𑀠𑀺𑀢𑀢𑁆𑀢𑀸 𑀪𑀸𑀯𑀺𑀢𑀓𑀸𑀬𑁄. 𑀪𑀸𑀯𑀺𑀢𑀲𑀻𑀮𑁄𑀢𑀺 𑀯𑀟𑁆𑀠𑀺𑀢𑀲𑀻𑀮𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀤𑁆𑀯𑀸𑀭𑀪𑀸𑀯𑀦𑀸𑀬 𑀯𑀸 𑀪𑀸𑀯𑀺𑀢𑀓𑀸𑀬𑁄. 𑀏𑀢𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀁, 𑀪𑀸𑀯𑀺𑀢𑀲𑀻𑀮𑁄𑀢𑀺 𑀇𑀫𑀺𑀦𑀸 𑀲𑁂𑀲𑀸𑀦𑀺 𑀢𑀻𑀡𑀺 𑀲𑀻𑀮𑀸𑀦𑀺. 𑀅𑀧𑀭𑀺𑀢𑁆𑀢𑁄𑀢𑀺 𑀦 𑀧𑀭𑀺𑀢𑁆𑀢𑀕𑀼𑀡𑁄. 𑀫𑀳𑀢𑁆𑀢𑁄𑀢𑀺 𑀅𑀢𑁆𑀢𑀪𑀸𑀯𑁂 𑀧𑀭𑀺𑀢𑁆𑀢𑁂𑀧𑀺 𑀕𑀼𑀡𑀫𑀳𑀦𑁆𑀢𑀢𑀸𑀬 𑀫𑀳𑀢𑁆𑀢𑁄. 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀻𑀢𑀺 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀦𑀸𑀫𑀫𑁂𑀯. 𑀲𑁄 𑀳𑀺 𑀧𑀫𑀸𑀡𑀓𑀭𑀸𑀦𑀁 𑀭𑀸𑀕𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀻 𑀦𑀸𑀫.

𑀧𑀭𑀺𑀢𑁆𑀢𑁂𑀢𑀺 𑀔𑀼𑀤𑁆𑀤𑀓𑁂. 𑀉𑀤𑀓𑀫𑀮𑁆𑀮𑀓𑁂𑀢𑀺 𑀉𑀤𑀓𑀲𑀭𑀸𑀯𑁂. 𑀑𑀭𑀩𑁆𑀪𑀺𑀓𑁄𑀢𑀺 𑀉𑀭𑀩𑁆𑀪𑀲𑀸𑀫𑀺𑀓𑁄. 𑀉𑀭𑀩𑁆𑀪𑀖𑀸𑀢𑀓𑁄𑀢𑀺 𑀲𑀽𑀦𑀓𑀸𑀭𑁄. 𑀚𑀸𑀧𑁂𑀢𑀼𑀁 𑀯𑀸𑀢𑀺 𑀥𑀦𑀚𑀸𑀦𑀺𑀬𑀸 𑀚𑀸𑀧𑁂𑀢𑀼𑀁. 𑀛𑀸𑀧𑁂𑀢𑀼𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀸𑀢𑀼𑀦𑁆𑀢𑀺 𑀬𑀣𑀸 𑀇𑀘𑁆𑀙𑀢𑀺, 𑀢𑀣𑀸 𑀓𑀸𑀢𑀼𑀁. 𑀉𑀭𑀩𑁆𑀪𑀥𑀦𑀦𑁆𑀢𑀺 𑀏𑀴𑀓𑀅𑀕𑁆𑀖𑀦𑀓𑀫𑀽𑀮𑀁. 𑀲𑁄 𑀧𑀦𑀲𑁆𑀲 𑀲𑀘𑁂 𑀇𑀘𑁆𑀙𑀢𑀺, 𑀤𑁂𑀢𑀺. 𑀦𑁄 𑀘𑁂 𑀇𑀘𑁆𑀙𑀢𑀺, 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.

𑁧𑁦. 𑀧𑀁𑀲𑀼𑀥𑁄𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀤𑀲𑀫𑁂 𑀥𑁄𑀯𑀢𑀻𑀢𑀺 𑀯𑀺𑀓𑁆𑀔𑀸𑀮𑁂𑀢𑀺. 𑀲𑀦𑁆𑀥𑁄𑀯𑀢𑀻𑀢𑀺 𑀲𑀼𑀝𑁆𑀞𑀼 𑀥𑁄𑀯𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀥𑁄𑀯𑀢𑀺. 𑀦𑀺𑀤𑁆𑀥𑁄𑀯𑀢𑀻𑀢𑀺 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀥𑁄𑀯𑀢𑀺. 𑀅𑀦𑀺𑀤𑁆𑀥𑀦𑁆𑀢𑀓𑀲𑀸𑀯𑀦𑁆𑀢𑀺 𑀅𑀦𑀻𑀳𑀢𑀤𑁄𑀲𑀁 𑀅𑀦𑀧𑀦𑀻𑀢𑀓𑀲𑀸𑀯𑀁. 𑀧𑀪𑀗𑁆𑀕𑀽𑀢𑀺 𑀧𑀪𑀺𑀚𑁆𑀚𑀦𑀲𑀪𑀸𑀯𑀁, 𑀅𑀥𑀺𑀓𑀭𑀡𑀻𑀬𑀁 𑀞𑀧𑁂𑀢𑁆𑀯𑀸 𑀫𑀼𑀝𑁆𑀞𑀺𑀓𑀸𑀬 𑀧𑀳𑀝𑀫𑀢𑁆𑀢𑀁 𑀪𑀺𑀚𑁆𑀚𑀢𑀺. 𑀧𑀝𑁆𑀝𑀺𑀓𑀸𑀬𑀸𑀢𑀺 𑀲𑀼𑀯𑀡𑁆𑀡𑀧𑀝𑁆𑀝𑀓𑀸𑀬. 𑀕𑀻𑀯𑁂𑀬𑁆𑀬𑀓𑁂𑀢𑀺 𑀕𑀻𑀯𑀸𑀮𑀗𑁆𑀓𑀸𑀭𑁂.

𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁. 𑀅𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺 𑀪𑀸𑀯𑁂𑀦𑁆𑀢𑀲𑁆𑀲. 𑀲𑀘𑁂𑀢𑀲𑁄𑀢𑀺 𑀘𑀺𑀢𑁆𑀢𑀲𑀫𑁆𑀧𑀦𑁆𑀦𑁄. 𑀤𑀩𑁆𑀩𑀚𑀸𑀢𑀺𑀓𑁄𑀢𑀺 𑀧𑀡𑁆𑀟𑀺𑀢𑀚𑀸𑀢𑀺𑀓𑁄. 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀲𑀼 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄. 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀢𑀓𑁆𑀓𑀸 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀯𑀺𑀢𑀓𑁆𑀓𑀸 𑀦𑀸𑀫. 𑀜𑀸𑀢𑀺𑀯𑀺𑀢𑀓𑁆𑀓𑀸𑀤𑀻𑀲𑀼 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀓𑀸 𑀩𑀳𑀽 𑀧𑀼𑀜𑁆𑀜𑀯𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀜𑀸𑀢𑀓𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄 𑀜𑀸𑀢𑀺𑀯𑀺𑀢𑀓𑁆𑀓𑁄. ‘‘𑀅𑀲𑀼𑀓𑁄 𑀚𑀦𑀧𑀤𑁄 𑀔𑁂𑀫𑁄 𑀲𑀼𑀪𑀺𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀚𑀦𑀧𑀤𑀫𑀸𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄 𑀚𑀦𑀧𑀤𑀯𑀺𑀢𑀓𑁆𑀓𑁄. ‘‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑀸𑀫. 𑀥𑀫𑁆𑀫𑀯𑀺𑀢𑀓𑁆𑀓𑀸𑀯𑀲𑀺𑀲𑁆𑀲𑀦𑁆𑀢𑀻𑀢𑀺 𑀥𑀫𑁆𑀫𑀯𑀺𑀢𑀓𑁆𑀓𑀸 𑀦𑀸𑀫 𑀤𑀲𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀯𑀺𑀢𑀓𑁆𑀓𑀸. 𑀲𑁄 𑀳𑁄𑀢𑀺 𑀲𑀫𑀸𑀥𑀺 𑀦 𑀘𑁂𑀯 𑀲𑀦𑁆𑀢𑁄𑀢𑀺 𑀲𑁄 𑀅𑀯𑀲𑀺𑀝𑁆𑀞𑀥𑀫𑁆𑀫𑀯𑀺𑀢𑀓𑁆𑀓𑁄 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺 𑀅𑀯𑀽𑀧𑀲𑀦𑁆𑀢𑀓𑀺𑀮𑁂𑀲𑀢𑁆𑀢𑀸 𑀲𑀦𑁆𑀢𑁄 𑀦 𑀳𑁄𑀢𑀺. 𑀦 𑀧𑀡𑀻𑀢𑁄𑀢𑀺 𑀦 𑀅𑀢𑀧𑁆𑀧𑀓𑁄. 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄𑀢𑀺 𑀦 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑁄. 𑀦 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄𑀢𑀺 𑀦 𑀏𑀓𑀕𑁆𑀕𑀪𑀸𑀯𑀧𑁆𑀧𑀢𑁆𑀢𑁄. 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄𑀢𑀺 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸𑀭𑁂𑀢𑁆𑀯𑀸 𑀯𑀸𑀭𑀺𑀢𑁄, 𑀦 𑀓𑀺𑀮𑁂𑀲𑀸𑀦𑀁 𑀙𑀺𑀦𑁆𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑁄, 𑀓𑀺𑀮𑁂𑀲𑁂 𑀧𑀦 𑀯𑀸𑀭𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑁄.

𑀳𑁄𑀢𑀺 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄𑀢𑀺 𑀏𑀢𑁆𑀣 𑀲𑀫𑀬𑁄 𑀦𑀸𑀫 𑀉𑀢𑀼𑀲𑀧𑁆𑀧𑀸𑀬𑀁 𑀆𑀳𑀸𑀭𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀁 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀦𑁆𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀲𑀧𑁆𑀧𑀸𑀬𑀸𑀦𑀁 𑀧𑀝𑀺𑀮𑀸𑀪𑀓𑀸𑀮𑁄. 𑀬𑀁 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀢𑀁 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁. 𑀅𑀚𑁆𑀛𑀢𑁆𑀢𑀁𑀬𑁂𑀯 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀢𑀦𑀺𑀬𑁂𑀯 𑀢𑀺𑀝𑁆𑀞𑀢𑀺. 𑀦𑀺𑀬𑀓𑀚𑁆𑀛𑀢𑁆𑀢𑀜𑁆𑀳𑀺 𑀇𑀥 𑀅𑀚𑁆𑀛𑀢𑁆𑀢𑀁 𑀦𑀸𑀫. 𑀕𑁄𑀘𑀭𑀚𑁆𑀛𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀁 𑀧𑀳𑀸𑀬 𑀏𑀓𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑀕𑁄𑀘𑀭𑁂𑀬𑁂𑀯 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀦𑀺𑀲𑀻𑀤𑀢𑀻𑀢𑀺 𑀲𑀼𑀝𑁆𑀞𑀼 𑀦𑀺𑀲𑀻𑀤𑀢𑀺. 𑀏𑀓𑁄𑀤𑀺 𑀳𑁄𑀢𑀻𑀢𑀺 𑀏𑀓𑀕𑁆𑀕𑀁 𑀳𑁄𑀢𑀺. 𑀲𑀫𑀸𑀥𑀺𑀬𑀢𑀻𑀢𑀺 𑀲𑀫𑁆𑀫𑀸 𑀆𑀥𑀺𑀬𑀢𑀺. 𑀲𑀦𑁆𑀢𑁄𑀢𑀺𑀆𑀤𑀻𑀲𑀼 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀅𑀢𑀧𑁆𑀧𑀓𑀝𑁆𑀞𑁂𑀦 𑀧𑀡𑀻𑀢𑁄. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀮𑀤𑁆𑀥𑁄. 𑀏𑀓𑀕𑁆𑀕𑀪𑀸𑀯𑀁 𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄. 𑀓𑀺𑀮𑁂𑀲𑀸𑀦𑀁 𑀙𑀺𑀦𑁆𑀦𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸𑀭𑁂𑀢𑁆𑀯𑀸 𑀯𑀸𑀭𑀺𑀢𑁄𑀢𑀺 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀏𑀢𑁆𑀢𑀸𑀯𑀢𑀸 𑀅𑀬𑀁 𑀪𑀺𑀓𑁆𑀔𑀼 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺.

𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀲𑀢𑁄 𑀅𑀪𑀺𑀜𑁆𑀜𑀸𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀲 𑀬𑀲𑁆𑀲 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲𑀸𑀢𑀺 𑀅𑀪𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀸𑀢𑀩𑁆𑀩𑀲𑁆𑀲. 𑀲𑀢𑀺 𑀲𑀢𑀺𑀆𑀬𑀢𑀦𑁂𑀢𑀺 𑀧𑀼𑀩𑁆𑀩𑀳𑁂𑀢𑀼𑀲𑀗𑁆𑀔𑀸𑀢𑁂 𑀘𑁂𑀯 𑀇𑀤𑀸𑀦𑀺 𑀘 𑀧𑀝𑀺𑀮𑀤𑁆𑀥𑀩𑁆𑀩𑁂 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀪𑁂𑀤𑁂 𑀘 𑀲𑀢𑀺 𑀲𑀢𑀺𑀓𑀸𑀭𑀡𑁂. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀬𑀁 𑀅𑀪𑀺𑀜𑁆𑀜𑀸𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁫 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀆𑀲𑀯𑀸𑀦𑀁 𑀔𑀬𑀸𑀢𑀺𑀆𑀤𑀺 𑀘𑁂𑀢𑁆𑀣 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧. 𑀦𑀺𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀏𑀓𑀸𑀤𑀲𑀫𑁂𑀧𑀺 𑀅𑀥𑀺𑀘𑀺𑀢𑁆𑀢𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀫𑁂𑀯. 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀢𑀻𑀡𑀺 𑀓𑀸𑀭𑀡𑀸𑀦𑀺. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂, 𑀬𑀼𑀢𑁆𑀢𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀢𑀁 𑀢𑀁 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀓𑀕𑁆𑀕𑀢𑀸𑀬 𑀬𑀼𑀢𑁆𑀢𑀓𑀸𑀮𑁂 𑀏𑀓𑀕𑁆𑀕𑀢𑀸 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀏𑀓𑀕𑁆𑀕𑀢𑀸 𑀳𑀺 𑀇𑀥 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀭 𑀯𑀘𑀦𑀢𑁆𑀣𑁄 𑁋 𑀲𑀫𑀸𑀥𑀺𑀬𑁂𑀯 𑀦𑀺𑀫𑀺𑀢𑁆𑀢𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀕𑁆𑀕𑀳𑁄𑀢𑀺 𑀧𑀦 𑀯𑀻𑀭𑀺𑀬𑀲𑁆𑀲 𑀦𑀸𑀫𑀁, 𑀉𑀧𑁂𑀓𑁆𑀔𑀸𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑀲𑁆𑀲. 𑀢𑀲𑁆𑀫𑀸 𑀯𑀻𑀭𑀺𑀬𑀲𑁆𑀲 𑀬𑀼𑀢𑁆𑀢𑀓𑀸𑀮𑁂 𑀯𑀻𑀭𑀺𑀬𑀁 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀫𑀚𑁆𑀛𑀢𑁆𑀢𑀪𑀸𑀯𑀲𑁆𑀲 𑀬𑀼𑀢𑁆𑀢𑀓𑀸𑀮𑁂 𑀫𑀚𑁆𑀛𑀢𑁆𑀢𑀪𑀸𑀯𑁂 𑀞𑀸𑀢𑀩𑁆𑀩𑀦𑁆𑀢𑀺. 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺 𑀬𑁂𑀦 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀪𑀸𑀯𑁂 𑀢𑀺𑀝𑁆𑀞𑁂𑀬𑁆𑀬. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬𑀸𑀢𑀺 𑀏𑀢𑁆𑀣 𑀘 𑀜𑀸𑀡𑀚𑀯𑀁 𑀉𑀧𑁂𑀓𑁆𑀔𑁂𑀬𑁆𑀬𑀸𑀢𑀺 𑀅𑀬𑀫𑀢𑁆𑀣𑁄. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀢𑁆𑀣𑀸𑀬.

𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬𑀸𑀢𑀺 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀲𑀚𑁆𑀚𑁂𑀬𑁆𑀬. 𑀆𑀮𑀺𑀫𑁆𑀧𑁂𑀬𑁆𑀬𑀸𑀢𑀺 𑀢𑀢𑁆𑀣 𑀅𑀗𑁆𑀕𑀸𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀦𑀸𑀴𑀺𑀓𑀸𑀬 𑀥𑀫𑀦𑁆𑀢𑁄 𑀅𑀕𑁆𑀕𑀺𑀁 𑀕𑀸𑀳𑀸𑀧𑁂𑀬𑁆𑀬. 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀅𑀗𑁆𑀕𑀸𑀭𑁂 𑀯𑀺𑀬𑀽𑀳𑀺𑀢𑁆𑀯𑀸 𑀅𑀗𑁆𑀕𑀸𑀭𑀫𑀢𑁆𑀣𑀓𑁂 𑀯𑀸 𑀞𑀧𑁂𑀬𑁆𑀬, 𑀫𑀽𑀲𑀸𑀬 𑀯𑀸 𑀧𑀓𑁆𑀔𑀺𑀧𑁂𑀬𑁆𑀬. 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀧𑀓𑁆𑀓𑀸𑀧𑀓𑁆𑀓𑀪𑀸𑀯𑀁 𑀉𑀧𑀥𑀸𑀭𑁂𑀢𑀺.

𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀢𑁆𑀣𑀸𑀬 𑀲𑀫𑁆𑀫𑀸 𑀞𑀧𑀻𑀬𑀢𑀺. 𑀏𑀢𑁆𑀢𑀸𑀯𑀢𑀸 𑀳𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀪𑀺𑀓𑁆𑀔𑀼 𑀤𑀲𑁆𑀲𑀺𑀢𑁄. 𑀇𑀤𑀸𑀦𑀺 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀅𑀪𑀺𑀜𑁆𑀜𑀸𑀬 𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀲 𑀬𑀲𑁆𑀲 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀮𑁄𑀡𑀓𑀧𑀮𑁆𑀮𑀯𑀕𑁆𑀕𑁄 𑀧𑀜𑁆𑀘𑀫𑁄.