(𑁯) 𑁪. 𑀲𑀫𑀡𑀯𑀕𑁆𑀕𑁄

𑁧. 𑀲𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑀫𑀡𑀺𑀬𑀸𑀦𑀻𑀢𑀺 𑀲𑀫𑀡𑀲𑀦𑁆𑀢𑀓𑀸𑀦𑀺. 𑀲𑀫𑀡𑀓𑀭𑀡𑀻𑀬𑀸𑀦𑀻𑀢𑀺 𑀲𑀫𑀡𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀦𑁆𑀢𑀺𑀆𑀤𑀻𑀲𑀼 𑀲𑀫𑀸𑀤𑀸𑀦𑀁 𑀯𑀼𑀘𑁆𑀘𑀢𑀺 𑀕𑀳𑀡𑀁, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀫𑀸𑀤𑀸𑀦𑀁 𑀕𑀳𑀡𑀁 𑀧𑀽𑀭𑀡𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑀻𑀮𑀁 𑀅𑀥𑀺𑀲𑀻𑀮𑀁, 𑀘𑀺𑀢𑁆𑀢𑀁 𑀅𑀥𑀺𑀘𑀺𑀢𑁆𑀢𑀁, 𑀧𑀜𑁆𑀜𑀸 𑀅𑀥𑀺𑀧𑀜𑁆𑀜𑀸𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀜𑁆𑀘𑀲𑀻𑀮𑀁 𑀲𑀻𑀮𑀁 𑀦𑀸𑀫, 𑀢𑀁 𑀉𑀧𑀸𑀤𑀸𑀬 𑀤𑀲𑀲𑀻𑀮𑀁 𑀅𑀥𑀺𑀲𑀻𑀮𑀁 𑀦𑀸𑀫, 𑀢𑀫𑁆𑀧𑀺 𑀉𑀧𑀸𑀤𑀸𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀅𑀥𑀺𑀲𑀻𑀮𑀁 𑀦𑀸𑀫. 𑀅𑀧𑀺𑀘 𑀲𑀩𑁆𑀩𑀫𑁆𑀧𑀺 𑀮𑁄𑀓𑀺𑀬𑀲𑀻𑀮𑀁 𑀲𑀻𑀮𑀁 𑀦𑀸𑀫, 𑀮𑁄𑀓𑀼𑀢𑁆𑀢𑀭𑀲𑀻𑀮𑀁 𑀅𑀥𑀺𑀲𑀻𑀮𑀁, 𑀢𑀤𑁂𑀯 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁 𑀧𑀦 𑀘𑀺𑀢𑁆𑀢𑀁 𑀦𑀸𑀫, 𑀢𑀁 𑀉𑀧𑀸𑀤𑀸𑀬 𑀭𑀽𑀧𑀸𑀯𑀘𑀭𑀁 𑀅𑀥𑀺𑀘𑀺𑀢𑁆𑀢𑀁 𑀦𑀸𑀫, 𑀢𑀫𑁆𑀧𑀺 𑀉𑀧𑀸𑀤𑀸𑀬 𑀅𑀭𑀽𑀧𑀸𑀯𑀘𑀭𑀁 𑀅𑀥𑀺𑀘𑀺𑀢𑁆𑀢𑀁 𑀦𑀸𑀫. 𑀅𑀧𑀺𑀘 𑀲𑀩𑁆𑀩𑀫𑁆𑀧𑀺 𑀮𑁄𑀓𑀺𑀬𑀘𑀺𑀢𑁆𑀢𑀁 𑀘𑀺𑀢𑁆𑀢𑀫𑁂𑀯, 𑀮𑁄𑀓𑀼𑀢𑁆𑀢𑀭𑀁 𑀅𑀥𑀺𑀘𑀺𑀢𑁆𑀢𑀁. 𑀧𑀜𑁆𑀜𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀫𑀸𑀦𑀺 𑀢𑀻𑀡𑀺 𑀲𑀫𑀡𑀓𑀭𑀡𑀻𑀬𑀸𑀦𑀺, 𑀢𑀲𑁆𑀫𑀸. 𑀢𑀺𑀩𑁆𑀩𑁄𑀢𑀺 𑀩𑀳𑀮𑁄. 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑁂 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀓𑀣𑀺𑀢𑀸𑀢𑀺.

𑁨. 𑀕𑀤𑁆𑀭𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀤𑀼𑀢𑀺𑀬𑁂 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄𑀢𑀺 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄. 𑀅𑀳𑀫𑁆𑀧𑀺 𑀤𑀫𑁆𑀫𑁄 𑀅𑀳𑀫𑁆𑀧𑀺 𑀤𑀫𑁆𑀫𑁄𑀢𑀺 𑀅𑀳𑀫𑁆𑀧𑀺 ‘‘𑀤𑀫𑁆𑀫𑁄 𑀤𑀫𑁆𑀫𑀫𑀸𑀦𑁄’’𑀢𑀺 𑀯𑀤𑀫𑀸𑀦𑁄 𑀕𑀸𑀯𑀻𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀕𑀼𑀦𑁆𑀦𑀦𑁆𑀢𑀺 𑀬𑀣𑀸 𑀕𑀸𑀯𑀻𑀦𑀁. 𑀕𑀸𑀯𑁄 𑀳𑀺 𑀓𑀸𑀴𑀸𑀧𑀺 𑀭𑀢𑁆𑀢𑀸𑀧𑀺 𑀲𑁂𑀢𑀸𑀤𑀺𑀯𑀡𑁆𑀡𑀸𑀧𑀺 𑀳𑁄𑀦𑁆𑀢𑀺, 𑀕𑀤𑁆𑀭𑀪𑀲𑁆𑀲 𑀧𑀦 𑀢𑀸𑀤𑀺𑀲𑁄 𑀯𑀡𑁆𑀡𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀘 𑀯𑀡𑁆𑀡𑁄, 𑀏𑀯𑀁 𑀲𑀭𑁄𑀧𑀺 𑀧𑀤𑀫𑁆𑀧𑀺 𑀅𑀜𑁆𑀜𑀸𑀤𑀺𑀲𑀫𑁂𑀯. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀫𑀺𑀲𑁆𑀲𑀺𑀓𑀸𑀯 𑀓𑀣𑀺𑀢𑀸𑀢𑀺.

𑁩. 𑀔𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀢𑀢𑀺𑀬𑁂 𑀧𑀝𑀺𑀓𑀘𑁆𑀘𑁂𑀯𑀸𑀢𑀺 𑀧𑀞𑀫𑀫𑁂𑀯. 𑀲𑀼𑀓𑀝𑁆𑀞𑀁 𑀓𑀭𑁄𑀢𑀻𑀢𑀺 𑀦𑀗𑁆𑀕𑀮𑁂𑀦 𑀲𑀼𑀓𑀝𑁆𑀞𑀁 𑀓𑀭𑁄𑀢𑀺. 𑀲𑀼𑀫𑀢𑀺𑀓𑀢𑀦𑁆𑀢𑀺 𑀫𑀢𑀺𑀬𑀸 𑀲𑀼𑀝𑁆𑀞𑀼 𑀲𑀫𑀻𑀓𑀢𑀁. 𑀓𑀸𑀮𑁂𑀦𑀸𑀢𑀺 𑀯𑀧𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑁂𑀦. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀥𑀸𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀫𑀺𑀲𑁆𑀲𑀺𑀓𑀸𑀯 𑀓𑀣𑀺𑀢𑀸.

𑁪. 𑀯𑀚𑁆𑀚𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀘𑀢𑀼𑀢𑁆𑀣𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑁄𑀢𑀺 𑀯𑀚𑁆𑀚𑀺𑀭𑀸𑀚𑀓𑀼𑀮𑀲𑁆𑀲 𑀧𑀼𑀢𑁆𑀢𑁄. 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀦𑁆𑀢𑀺 𑀧𑀡𑁆𑀡𑀸𑀲𑀸𑀥𑀺𑀓𑀁 𑀲𑀺𑀓𑁆𑀔𑀸𑀧𑀤𑀲𑀢𑀁. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀜𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑁂𑀯 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀅𑀚𑁆𑀚𑀯𑀲𑀫𑁆𑀧𑀦𑁆𑀦𑁄 𑀉𑀚𑀼𑀚𑀸𑀢𑀺𑀓𑁄 𑀅𑀯𑀗𑁆𑀓𑁄 𑀅𑀓𑀼𑀝𑀺𑀮𑁄, 𑀢𑀲𑁆𑀫𑀸 ‘‘𑀅𑀳𑀁 𑀏𑀢𑁆𑀢𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁 𑀯𑀸 𑀦 𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀺. 𑀲𑀓𑁆𑀓𑁄𑀫𑀳𑀦𑁆𑀢𑀺 𑀲𑀓𑁆𑀓𑁄𑀫𑀺 𑀅𑀳𑀁. 𑀲𑁄 𑀓𑀺𑀭 ‘‘𑀏𑀢𑁆𑀢𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀦𑁆𑀢𑀲𑁆𑀲 𑀅𑀕𑀭𑀼 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳. 𑀅𑀣 𑀪𑀕𑀯𑀸 𑀬𑀣𑀸 𑀦𑀸𑀫 𑀧𑀜𑁆𑀜𑀸𑀲 𑀢𑀺𑀡𑀓𑀮𑀸𑀧𑀺𑀬𑁄 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀓𑀮𑀸𑀧𑀺𑀬𑀲𑀢𑀁 𑀩𑀦𑁆𑀥𑀺𑀢𑁆𑀯𑀸 𑀲𑀻𑀲𑁂 𑀞𑀧𑁂𑀬𑁆𑀬, 𑀏𑀯𑀫𑁂𑀯 𑀏𑀓𑀺𑀲𑁆𑀲𑀸𑀧𑀺 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀅𑀧𑀭𑀸 𑀤𑁆𑀯𑁂𑀧𑀺 𑀲𑀺𑀓𑁆𑀔𑀸 𑀉𑀧𑀭𑀺 𑀧𑀓𑁆𑀔𑀺𑀧𑀦𑁆𑀢𑁄 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀲𑀼𑀔𑀼𑀫𑀸𑀮𑁄 𑀓𑀺𑀭 𑀉𑀢𑁆𑀢𑀭𑁄 𑀦𑀸𑀫 𑀚𑀸𑀦𑀧𑀤𑀫𑀦𑀼𑀲𑁆𑀲𑁄 𑀮𑁄𑀳𑀧𑀸𑀲𑀸𑀤𑀯𑀺𑀳𑀸𑀭𑁂 𑀯𑀲𑀢𑀺. 𑀅𑀣 𑀦𑀁 𑀤𑀳𑀭𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀉𑀢𑁆𑀢𑀭, 𑀅𑀕𑁆𑀕𑀺𑀲𑀸𑀮𑀸 𑀑𑀯𑀲𑁆𑀲𑀢𑀺, 𑀢𑀺𑀡𑀁 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀤𑁂𑀳𑀻’’𑀢𑀺. 𑀢𑀁 𑀆𑀤𑀸𑀬 𑀅𑀝𑀯𑀺𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀮𑀸𑀬𑀺𑀢𑀁 𑀢𑀺𑀡𑀁𑀬𑁂𑀯 𑀓𑀭𑀴𑁂 𑀩𑀦𑁆𑀥𑀺𑀢𑁆𑀯𑀸 ‘‘𑀧𑀜𑁆𑀜𑀸𑀲 𑀓𑀭𑀴𑁂 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺 𑀉𑀢𑁆𑀢𑀭𑀸’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀲𑀻𑀢𑀺𑀁 𑀧𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺? 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺. 𑀏𑀓𑀁 𑀓𑀭𑀴𑀲𑀢𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺? 𑀆𑀫, 𑀪𑀦𑁆𑀢𑁂, 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺. 𑀤𑀳𑀭𑀪𑀺𑀓𑁆𑀔𑀽 𑀓𑀭𑀴𑀲𑀢𑀁 𑀩𑀦𑁆𑀥𑀺𑀢𑁆𑀯𑀸 𑀢𑀲𑁆𑀲 𑀲𑀻𑀲𑁂 𑀞𑀧𑀬𑀺𑀁𑀲𑀼. 𑀲𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀢𑁆𑀣𑀼𑀦𑀦𑁆𑀢𑁄 𑀕𑀦𑁆𑀢𑁆𑀯𑀸 𑀅𑀕𑁆𑀕𑀺𑀲𑀸𑀮𑀸𑀬 𑀲𑀫𑀻𑀧𑁂 𑀧𑀸𑀢𑁂𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀓𑀺𑀮𑀦𑁆𑀢𑀭𑀽𑀧𑁄𑀲𑀺 𑀉𑀢𑁆𑀢𑀭𑀸’’𑀢𑀺 𑀆𑀳𑀁𑀲𑀼. 𑀆𑀫, 𑀪𑀦𑁆𑀢𑁂, 𑀤𑀳𑀭𑀸 𑀪𑀺𑀓𑁆𑀔𑀽 𑀫𑀁 𑀯𑀜𑁆𑀘𑁂𑀲𑀼𑀁, 𑀇𑀫𑀁 𑀏𑀓𑀫𑁆𑀧𑀺 𑀓𑀭𑀴𑀲𑀢𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀫𑀁 ‘‘𑀧𑀡𑁆𑀡𑀸𑀲 𑀓𑀭𑀴𑁂 𑀉𑀓𑁆𑀔𑀺𑀧𑀸𑀳𑀻’’𑀢𑀺 𑀯𑀤𑀺𑀁𑀲𑀼. 𑀆𑀫, 𑀉𑀢𑁆𑀢𑀭, 𑀯𑀜𑁆𑀘𑀬𑀺𑀁𑀲𑀼 𑀢𑀦𑁆𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀫𑀺𑀲𑁆𑀲𑀺𑀓𑀸𑀯 𑀓𑀣𑀺𑀢𑀸.

𑁫. 𑀲𑁂𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀧𑀜𑁆𑀘𑀫𑁂 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄𑀢𑀺 𑀉𑀚𑀼𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀧𑀝𑀺𑀧𑀦𑁆𑀦𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀔𑀬𑀲𑁆𑀫𑀺𑀁 𑀧𑀞𑀫𑀁 𑀜𑀸𑀡𑀦𑁆𑀢𑀺 𑀧𑀞𑀫𑀫𑁂𑀯 𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀫𑀕𑁆𑀕𑁄 𑀳𑀺 𑀓𑀺𑀮𑁂𑀲𑀸𑀦𑀁 𑀔𑁂𑀧𑀦𑀢𑁄 𑀔𑀬𑁄 𑀦𑀸𑀫, 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀔𑀬𑀲𑁆𑀫𑀺𑀁 𑀜𑀸𑀡𑀁 𑀦𑀸𑀫. 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸𑀢𑀺 𑀢𑀢𑁄 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀢𑁄 𑀅𑀦𑀦𑁆𑀢𑀭𑀸 𑀅𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀭𑀳𑀢𑁆𑀢𑀨𑀮𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀲𑁆𑀲. 𑀜𑀸𑀡𑀁 𑀯𑁂 𑀳𑁄𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀳𑁄𑀢𑀺. 𑀇𑀢𑀺 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀲𑀼𑀧𑀺 𑀲𑀢𑁆𑀢 𑀲𑁂𑀔𑀸 𑀓𑀣𑀺𑀢𑀸. 𑀅𑀯𑀲𑀸𑀦𑁂 𑀧𑀦 𑀔𑀻𑀡𑀸𑀲𑀯𑁄 𑀤𑀲𑁆𑀲𑀺𑀢𑁄𑀢𑀺.

𑁬. 𑀧𑀞𑀫𑀲𑀺𑀓𑁆𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀙𑀝𑁆𑀞𑁂 𑀅𑀢𑁆𑀢𑀓𑀸𑀫𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀓𑀸𑀫𑀸. 𑀬𑀢𑁆𑀣𑁂𑀢𑀁 𑀲𑀩𑁆𑀩𑀁 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀻𑀢𑀺 𑀬𑀸𑀲𑀼 𑀲𑀺𑀓𑁆𑀔𑀸𑀲𑀼 𑀲𑀩𑁆𑀩𑀫𑁂𑀢𑀁 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀁 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀻𑀢𑀺 𑀲𑀫𑀢𑁆𑀢𑀓𑀸𑀭𑀻 𑀳𑁄𑀢𑀺. 𑀫𑀢𑁆𑀢𑀲𑁄 𑀓𑀸𑀭𑀻𑀢𑀺 𑀧𑀫𑀸𑀡𑁂𑀦 𑀓𑀸𑀭𑀓𑁄, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀲𑀺𑀓𑁆𑀔𑀸𑀧𑀤𑀸𑀦𑀺. 𑀢𑀢𑁆𑀭𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀔𑀼𑀤𑁆𑀤𑀓𑀁, 𑀣𑀼𑀮𑁆𑀮𑀘𑁆𑀘𑀬𑀁 𑀅𑀦𑀼𑀔𑀼𑀤𑁆𑀤𑀓𑀁 𑀦𑀸𑀫. 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀔𑀼𑀤𑁆𑀤𑀓𑀁, 𑀧𑀸𑀘𑀺𑀢𑁆𑀢𑀺𑀬𑀁 𑀅𑀦𑀼𑀔𑀼𑀤𑁆𑀤𑀓𑀁 𑀦𑀸𑀫, 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀔𑀼𑀤𑁆𑀤𑀓𑀁, 𑀧𑀸𑀝𑀺𑀤𑁂𑀲𑀦𑀺𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀸𑀦𑀺 𑀅𑀦𑀼𑀔𑀼𑀤𑁆𑀤𑀓𑀸𑀦𑀺 𑀦𑀸𑀫. 𑀇𑀫𑁂 𑀧𑀦 𑀅𑀗𑁆𑀕𑀼𑀢𑁆𑀢𑀭𑀫𑀳𑀸𑀦𑀺𑀓𑀸𑀬𑀯𑀴𑀜𑁆𑀚𑀦𑀓𑀆𑀘𑀭𑀺𑀬𑀸 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀢𑀸𑀦𑀺 𑀆𑀧𑀚𑁆𑀚𑀢𑀺𑀧𑀺 𑀯𑀼𑀝𑁆𑀞𑀸𑀢𑀺𑀧𑀻𑀢𑀺 𑀏𑀢𑁆𑀣 𑀧𑀦 𑀔𑀻𑀡𑀸𑀲𑀯𑁄 𑀢𑀸𑀯 𑀮𑁄𑀓𑀯𑀚𑁆𑀚𑀁 𑀦𑀸𑀧𑀚𑁆𑀚𑀢𑀺, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀫𑁂𑀯 𑀆𑀧𑀚𑁆𑀚𑀢𑀺. 𑀆𑀧𑀚𑁆𑀚𑀦𑁆𑀢𑁄 𑀘 𑀓𑀸𑀬𑁂𑀦𑀧𑀺 𑀯𑀸𑀘𑀸𑀬𑀧𑀺 𑀘𑀺𑀢𑁆𑀢𑁂𑀦𑀧𑀺 𑀆𑀧𑀚𑁆𑀚𑀢𑀺. 𑀓𑀸𑀬𑁂𑀦 𑀆𑀧𑀚𑁆𑀚𑀦𑁆𑀢𑁄 𑀓𑀼𑀝𑀺𑀓𑀸𑀭𑀲𑀳𑀲𑁂𑀬𑁆𑀬𑀸𑀤𑀻𑀦𑀺 𑀆𑀧𑀚𑁆𑀚𑀢𑀺, 𑀯𑀸𑀘𑀸𑀬 𑀆𑀧𑀚𑁆𑀚𑀦𑁆𑀢𑁄 𑀲𑀜𑁆𑀘𑀭𑀺𑀢𑁆𑀢𑀧𑀤𑀲𑁄𑀥𑀫𑁆𑀫𑀸𑀤𑀻𑀦𑀺, 𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀦𑁆𑀢𑁄 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀁 𑀆𑀧𑀚𑁆𑀚𑀢𑀺. 𑀲𑁂𑀓𑁆𑀔𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀳𑀺 𑀫𑁂𑀢𑁆𑀣, 𑀪𑀺𑀓𑁆𑀔𑀯𑁂, 𑀅𑀪𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺, 𑀪𑀺𑀓𑁆𑀔𑀯𑁂, 𑀦 𑀳𑀺 𑀫𑀬𑀸 𑀏𑀢𑁆𑀣 𑀏𑀯𑀭𑀽𑀧𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁂 𑀘 𑀯𑀼𑀝𑁆𑀞𑀸𑀦𑁂 𑀘 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀅𑀪𑀩𑁆𑀩𑀢𑀸 𑀓𑀣𑀺𑀢𑀸. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀦𑀻𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀲𑀻𑀮𑀲𑀺𑀓𑁆𑀔𑀸𑀧𑀤𑀸𑀦𑀺. 𑀩𑁆𑀭𑀳𑁆𑀫𑀘𑀭𑀺𑀬𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀢𑀸𑀦𑀺𑀬𑁂𑀯 𑀘𑀢𑀼𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀲𑀸𑀭𑀼𑀧𑁆𑀧𑀸𑀦𑀺 𑀅𑀦𑀼𑀘𑁆𑀙𑀯𑀺𑀓𑀸𑀦𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀥𑀼𑀯𑀲𑀻𑀮𑁄𑀢𑀺 𑀦𑀺𑀩𑀤𑁆𑀥𑀲𑀻𑀮𑁄. 𑀞𑀺𑀢𑀲𑀻𑀮𑁄𑀢𑀺 𑀧𑀢𑀺𑀝𑁆𑀞𑀺𑀢𑀲𑀻𑀮𑁄. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀲𑁄𑀢𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀨𑀮𑀁 𑀆𑀧𑀦𑁆𑀦𑁄. 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄𑀢𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀧𑀢𑀦𑀲𑀪𑀸𑀯𑁄. 𑀦𑀺𑀬𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

𑀢𑀦𑀼𑀢𑁆𑀢𑀸𑀢𑀺 𑀢𑀦𑀼𑀪𑀸𑀯𑁄. 𑀲𑀓𑀤𑀸𑀕𑀸𑀫𑀺𑀦𑁄 𑀳𑀺 𑀭𑀸𑀕𑀸𑀤𑀬𑁄 𑀅𑀩𑁆𑀪𑀧𑀝𑀮𑀁 𑀯𑀺𑀬 𑀫𑀘𑁆𑀙𑀺𑀓𑀸𑀧𑀢𑁆𑀢𑀁 𑀯𑀺𑀬 𑀘 𑀢𑀦𑀼𑀓𑀸 𑀳𑁄𑀦𑁆𑀢𑀺, 𑀦 𑀩𑀳𑀮𑀸. 𑀑𑀭𑀫𑁆𑀪𑀸𑀕𑀺𑀬𑀸𑀦𑀦𑁆𑀢𑀺 𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦𑀁. 𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀩𑀦𑁆𑀥𑀦𑀸𑀦𑀁. 𑀧𑀭𑀺𑀓𑁆𑀔𑀬𑀸𑀢𑀺 𑀧𑀭𑀺𑀓𑁆𑀔𑀬𑁂𑀦. 𑀑𑀧𑀧𑀸𑀢𑀺𑀓𑁄 𑀳𑁄𑀢𑀻𑀢𑀺 𑀉𑀧𑁆𑀧𑀦𑁆𑀦𑀓𑁄 𑀳𑁄𑀢𑀺. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀳𑁂𑀝𑁆𑀞𑀸 𑀅𑀦𑁄𑀢𑀭𑀺𑀢𑁆𑀯𑀸 𑀉𑀧𑀭𑀺𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀥𑀫𑁆𑀫𑁄. 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄𑀢𑀺 𑀬𑁄𑀦𑀺𑀕𑀢𑀺𑀯𑀲𑁂𑀦 𑀅𑀦𑀸𑀕𑀫𑀦𑀥𑀫𑁆𑀫𑁄.

𑀧𑀤𑁂𑀲𑀁 𑀧𑀤𑁂𑀲𑀓𑀸𑀭𑀻𑀢𑀺𑀆𑀤𑀻𑀲𑀼 𑀧𑀤𑁂𑀲𑀓𑀸𑀭𑀻 𑀧𑀼𑀕𑁆𑀕𑀮𑁄 𑀦𑀸𑀫 𑀲𑁄𑀢𑀸𑀧𑀦𑁆𑀦𑁄 𑀘 𑀲𑀓𑀤𑀸𑀕𑀸𑀫𑀻 𑀘 𑀅𑀦𑀸𑀕𑀸𑀫𑀻 𑀘, 𑀲𑁄 𑀧𑀤𑁂𑀲𑀫𑁂𑀯 𑀲𑀫𑁆𑀧𑀸𑀤𑁂𑀢𑀺. 𑀧𑀭𑀺𑀧𑀽𑀭𑀓𑀸𑀭𑀻 𑀦𑀸𑀫 𑀅𑀭𑀳𑀸, 𑀲𑁄 𑀧𑀭𑀺𑀧𑀽𑀭𑀫𑁂𑀯 𑀲𑀫𑁆𑀧𑀸𑀤𑁂𑀢𑀺. 𑀅𑀯𑀜𑁆𑀛𑀸𑀦𑀻𑀢𑀺 𑀅𑀢𑀼𑀘𑁆𑀙𑀸𑀦𑀺 𑀲𑀨𑀮𑀸𑀦𑀺 𑀲𑀉𑀤𑁆𑀭𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸.

𑁭. 𑀤𑀼𑀢𑀺𑀬𑀲𑀺𑀓𑁆𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀲𑀢𑁆𑀢𑀫𑁂 𑀓𑁄𑀮𑀁𑀓𑁄𑀮𑁄𑀢𑀺 𑀓𑀼𑀮𑀸 𑀓𑀼𑀮𑀁 𑀕𑀫𑀦𑀓𑁄. 𑀓𑀼𑀮𑀦𑁆𑀢𑀺 𑀘𑁂𑀢𑁆𑀣 𑀪𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 ‘‘𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀻’’𑀢𑀺 𑀏𑀢𑁆𑀣𑀧𑀺 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀪𑀯𑁂𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀤𑁆𑀯𑁂 𑀯𑀸 𑀪𑀯𑁂 𑀲𑀦𑁆𑀥𑀸𑀯𑀢𑀺 𑀢𑀬𑁄 𑀯𑀸, 𑀉𑀢𑁆𑀢𑀫𑀓𑁄𑀝𑀺𑀬𑀸 𑀙 𑀯𑀸. 𑀢𑀲𑁆𑀫𑀸 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀘𑀢𑁆𑀢𑀸𑀭𑀺 𑀯𑀸 𑀧𑀜𑁆𑀘 𑀯𑀸 𑀙 𑀯𑀸𑀢𑀺 𑀏𑀯𑀫𑁂𑀢𑁆𑀣 𑀯𑀺𑀓𑀧𑁆𑀧𑁄 𑀤𑀝𑁆𑀞𑀩𑁆𑀩𑁄. 𑀏𑀓𑀩𑀻𑀚𑀻𑀢𑀺 𑀏𑀓𑀲𑁆𑀲𑁂𑀯 𑀪𑀯𑀲𑁆𑀲 𑀩𑀻𑀚𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀩𑀻𑀚𑀻. 𑀉𑀤𑁆𑀥𑀁𑀲𑁄𑀢𑁄𑀢𑀺𑀆𑀤𑀻𑀲𑀼 𑀅𑀢𑁆𑀣𑀺 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀅𑀢𑁆𑀣𑀺 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀅𑀢𑁆𑀣𑀺 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻, 𑀅𑀢𑁆𑀣𑀺 𑀦 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀢𑀢𑁆𑀣 𑀬𑁄 𑀇𑀥 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀅𑀯𑀺𑀳𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀉𑀧𑀭𑀽𑀧𑀭𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀅𑀯𑀺𑀳𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣𑁂𑀯 𑀅𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑀫𑁆𑀧𑀺 𑀅𑀧𑁆𑀧𑀢𑁆𑀯𑀸 𑀉𑀧𑀭𑀺𑀫𑀩𑁆𑀭𑀳𑁆𑀫𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀇𑀢𑁄 𑀘𑀯𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫. 𑀬𑁄 𑀧𑀦 𑀅𑀯𑀺𑀳𑀸𑀤𑀻𑀲𑀼 𑀘𑀢𑀽𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀦 𑀉𑀤𑁆𑀥𑀁𑀲𑁄𑀢𑁄 𑀦 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫.

𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀦𑁆𑀦𑁄 𑀧𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫. 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀧𑀢𑁆𑀢𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫. 𑀬𑁄 𑀧𑀦 𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀜𑁆𑀘𑀫𑀁 𑀓𑀧𑁆𑀧𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀅𑀬𑀁 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫. 𑀅𑀢𑀧𑁆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑁄 𑀆𑀬𑀼𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀲𑁄 𑀢𑀺𑀯𑀺𑀥𑁄 𑀳𑁄𑀢𑀺. 𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀢𑀸𑀯 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑁄 𑀦𑀺𑀩𑁆𑀩𑀢𑁆𑀢𑀤𑀺𑀯𑀲𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀦𑀺𑀩𑁆𑀩𑀢𑁆𑀢𑀤𑀺𑀯𑀲𑁂 𑀧𑀸𑀧𑀼𑀡𑀸𑀢𑀺, 𑀧𑀞𑀫𑀲𑁆𑀲 𑀧𑀦 𑀓𑀧𑁆𑀧𑀲𑀢𑀲𑁆𑀲 𑀫𑀢𑁆𑀣𑀓𑁂 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀧𑀞𑀫𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻. 𑀅𑀧𑀭𑁄 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑁆𑀯𑀺𑀦𑁆𑀦𑀁 𑀓𑀧𑁆𑀧𑀲𑀢𑀸𑀦𑀁 𑀫𑀢𑁆𑀣𑀓𑁂 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀤𑀼𑀢𑀺𑀬𑁄. 𑀅𑀧𑀭𑁄 𑀏𑀯𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀘𑀢𑀼𑀦𑁆𑀦𑀁 𑀓𑀧𑁆𑀧𑀲𑀢𑀸𑀦𑀁 𑀫𑀢𑁆𑀣𑀓𑁂 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀢𑀢𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸, 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀺𑀦𑁄, 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄, 𑀤𑁆𑀯𑀸𑀤𑀲 𑀘 𑀅𑀭𑀳𑀦𑁆𑀢𑁄 𑀓𑀣𑁂𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀳𑀺 𑀲𑀸𑀲𑀦𑁂 𑀲𑀤𑁆𑀥𑀸𑀥𑀼𑀭𑀁 𑀧𑀜𑁆𑀜𑀸𑀥𑀼𑀭𑀦𑁆𑀢𑀺 𑀤𑁆𑀯𑁂 𑀥𑀼𑀭𑀸𑀦𑀺, 𑀤𑀼𑀓𑁆𑀔𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀬𑁄 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸. 𑀢𑀢𑁆𑀣𑁂𑀓𑁄 𑀲𑀤𑁆𑀥𑀸𑀥𑀼𑀭𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀏𑀓𑀫𑁂𑀯 𑀪𑀯𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀫𑁂𑀓𑁄 𑀏𑀓𑀩𑀻𑀚𑀻. 𑀲𑁄 𑀧𑀝𑀺𑀧𑀤𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀬𑀣𑀸 𑀘𑁂𑀲, 𑀏𑀯𑀁 𑀧𑀜𑁆𑀜𑀸𑀥𑀼𑀭𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄𑀧𑀻𑀢𑀺 𑀅𑀝𑁆𑀞 𑀏𑀓𑀩𑀻𑀚𑀺𑀦𑁄. 𑀢𑀣𑀸 𑀓𑁄𑀮𑀁𑀓𑁄𑀮𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸 𑀘𑀸𑀢𑀺 𑀇𑀫𑁂 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸 𑀦𑀸𑀫. 𑀢𑀻𑀲𑀼 𑀧𑀦 𑀯𑀺𑀫𑁄𑀓𑁆𑀔𑁂𑀲𑀼 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀲𑀓𑀤𑀸𑀕𑀸𑀫𑀺𑀪𑀽𑀫𑀺𑀁 𑀧𑀢𑁆𑀢𑀸 𑀘𑀢𑀼𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀲𑀓𑀤𑀸𑀕𑀸𑀫𑀺𑀦𑁄, 𑀢𑀣𑀸 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦 𑀧𑀢𑁆𑀢𑀸 𑀘𑀢𑁆𑀢𑀸𑀭𑁄, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀧𑀢𑁆𑀢𑀸 𑀘𑀢𑁆𑀢𑀸𑀭𑁄𑀢𑀺 𑀇𑀫𑁂 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀺𑀦𑁄. 𑀅𑀯𑀺𑀳𑁂𑀲𑀼 𑀧𑀦 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀧𑀜𑁆𑀘 𑀅𑀦𑀸𑀕𑀸𑀫𑀺𑀦𑁄, 𑀢𑁂 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀜𑁆𑀘, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀜𑁆𑀘𑀸𑀢𑀺 𑀤𑀲 𑀳𑁄𑀦𑁆𑀢𑀺, 𑀢𑀣𑀸 𑀅𑀢𑀧𑁆𑀧𑀸𑀤𑀻𑀲𑀼. 𑀅𑀓𑀦𑀺𑀝𑁆𑀞𑁂𑀲𑀼 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀝𑁆𑀞, 𑀇𑀫𑁂 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄. 𑀬𑀣𑀸 𑀧𑀦 𑀲𑀓𑀤𑀸𑀕𑀸𑀫𑀺𑀦𑁄, 𑀢𑀣𑁂𑀯 𑀅𑀭𑀳𑀦𑁆𑀢𑁄𑀧𑀺 𑀤𑁆𑀯𑀸𑀤𑀲 𑀯𑁂𑀤𑀺𑀢𑀩𑁆𑀩𑀸. 𑀇𑀥𑀸𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀫𑀺𑀲𑁆𑀲𑀺𑀓𑀸𑀯 𑀓𑀣𑀺𑀢𑀸.

𑁮. 𑀢𑀢𑀺𑀬𑀲𑀺𑀓𑁆𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀅𑀝𑁆𑀞𑀫𑁂 𑀢𑀁 𑀯𑀸 𑀧𑀦 𑀅𑀦𑀪𑀺𑀲𑀫𑁆𑀪𑀯𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀢𑀁 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀦𑁆𑀢𑁄 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥𑀸𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀫𑀺𑀲𑁆𑀲𑀺𑀓𑀸𑀯 𑀓𑀣𑀺𑀢𑀸. 𑀦𑀯𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀥𑀸𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀫𑀺𑀲𑁆𑀲𑀺𑀓𑀸𑀯 𑀓𑀣𑀺𑀢𑀸.

𑁧𑁦. 𑀤𑀼𑀢𑀺𑀬𑀲𑀺𑀓𑁆𑀔𑀢𑁆𑀢𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁧. 𑀤𑀲𑀫𑁂 𑀆𑀲𑀯𑀸𑀦𑀁 𑀔𑀬𑀸𑀢𑀺 𑀏𑀢𑁆𑀣 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀦𑀸𑀫. 𑀨𑀮𑀁 𑀧𑀦 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀲𑀺𑀓𑁆𑀔𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁.

𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸𑀢𑀺 𑀬𑀣𑀸 𑀧𑀞𑀫𑀁 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀢𑀺, 𑀧𑀘𑁆𑀙𑀸 𑀢𑀣𑁂𑀯 𑀲𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀦𑁆𑀢𑀺 𑀬𑀣𑀸 𑀳𑁂𑀝𑁆𑀞𑀺𑀫𑀓𑀸𑀬𑀁 𑀅𑀲𑀼𑀪𑀯𑀲𑁂𑀦 𑀧𑀲𑁆𑀲𑀢𑀺, 𑀉𑀧𑀭𑀺𑀫𑀓𑀸𑀬𑀫𑁆𑀧𑀺 𑀢𑀣𑁂𑀯 𑀨𑀭𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀦𑁆𑀢𑀺 𑀬𑀣𑀸 𑀤𑀺𑀯𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀢𑀺, 𑀭𑀢𑁆𑀢𑀺𑀫𑁆𑀧𑀺 𑀢𑀣𑁂𑀯 𑀲𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀼𑀬𑁆𑀬 𑀤𑀺𑀲𑀸 𑀲𑀩𑁆𑀩𑀸𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀆𑀭𑀫𑁆𑀫𑀡𑀯𑀲𑁂𑀦 𑀅𑀪𑀺𑀪𑀯𑀺𑀢𑁆𑀯𑀸. 𑀅𑀧𑁆𑀧𑀫𑀸𑀡𑀲𑀫𑀸𑀥𑀺𑀦𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑀸𑀥𑀺𑀦𑀸.

𑀲𑁂𑀓𑁆𑀔𑀦𑁆𑀢𑀺 𑀲𑀺𑀓𑁆𑀔𑀫𑀸𑀦𑀁 𑀲𑀓𑀭𑀡𑀻𑀬𑀁. 𑀧𑀝𑀺𑀧𑀤𑀦𑁆𑀢𑀺 𑀧𑀝𑀺𑀧𑀦𑁆𑀦𑀓𑀁. 𑀲𑀁𑀲𑀼𑀤𑁆𑀥𑀘𑀸𑀭𑀺𑀬𑀦𑁆𑀢𑀺 𑀲𑀁𑀲𑀼𑀤𑁆𑀥𑀘𑀭𑀡𑀁 𑀧𑀭𑀺𑀲𑀼𑀤𑁆𑀥𑀲𑀻𑀮𑀁. 𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑀁. 𑀥𑀻𑀭𑀁 𑀧𑀝𑀺𑀧𑀤𑀦𑁆𑀢𑀕𑀼𑀦𑁆𑀢𑀺 𑀔𑀦𑁆𑀥𑀥𑀻𑀭𑀆𑀬𑀢𑀦𑀥𑀻𑀭𑀯𑀲𑁂𑀦 𑀥𑀻𑀭𑀁 𑀥𑀺𑀢𑀺𑀲𑀫𑁆𑀧𑀦𑁆𑀦𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀁 𑀕𑀢𑀁. 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀲𑁆𑀲. 𑀢𑀡𑁆𑀳𑀸𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀦𑁄𑀢𑀺 𑀢𑀡𑁆𑀳𑀸𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀧𑀚𑁆𑀚𑁄𑀢𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀤𑀻𑀧𑀦𑀺𑀩𑁆𑀩𑀸𑀦𑀁 𑀯𑀺𑀬. 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀘𑁂𑀢𑀲𑁄𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀘𑁆𑀘𑀦𑀸 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁄 𑀳𑁄𑀢𑀺. 𑀢𑀡𑁆𑀳𑀸𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀦𑁄 𑀳𑀺 𑀔𑀻𑀡𑀸𑀲𑀯𑀲𑁆𑀲 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀁 𑀯𑀺𑀬 𑀘𑁂𑀢𑀲𑁄 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺, 𑀦 𑀕𑀢𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑁄𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁧. 𑀲𑀗𑁆𑀓𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨. 𑀏𑀓𑀸𑀤𑀲𑀫𑁂 𑀲𑀗𑁆𑀓𑀯𑀸 𑀦𑀸𑀫 𑀓𑁄𑀲𑀮𑀸𑀦𑀁 𑀦𑀺𑀕𑀫𑁄𑀢𑀺 𑀲𑀗𑁆𑀓𑀯𑀸𑀢𑀺 𑀏𑀯𑀁𑀦𑀸𑀫𑀓𑁄 𑀓𑁄𑀲𑀮𑀭𑀝𑁆𑀞𑁂 𑀦𑀺𑀕𑀫𑁄. 𑀆𑀯𑀸𑀲𑀺𑀓𑁄𑀢𑀺 𑀪𑀸𑀭𑀳𑀸𑀭𑁄 𑀦𑀯𑁂 𑀆𑀯𑀸𑀲𑁂 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀧𑀼𑀭𑀸𑀡𑁂 𑀧𑀝𑀺𑀚𑀕𑁆𑀕𑀢𑀺. 𑀲𑀺𑀓𑁆𑀔𑀸𑀧𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑁂𑀳𑀺 𑀧𑀤𑁂𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑀸𑀬, 𑀢𑀻𑀳𑀺 𑀲𑀺𑀓𑁆𑀔𑀸𑀳𑀺 𑀲𑀫𑀦𑁆𑀦𑀸𑀕𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀫𑀼𑀔𑁂 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 𑀕𑀡𑁆𑀳𑀸𑀧𑁂𑀢𑀺. 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀲𑀫𑀼𑀲𑁆𑀲𑀸𑀳𑁂𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀧𑀝𑀺𑀮𑀤𑁆𑀥𑀕𑀼𑀡𑁂𑀳𑀺 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀯𑁄𑀤𑀸𑀧𑁂𑀢𑀺. 𑀅𑀥𑀺𑀲𑀮𑁆𑀮𑀺𑀔𑀢𑁂𑀢𑀺 𑀅𑀢𑀺𑀯𑀺𑀬 𑀲𑀮𑁆𑀮𑀺𑀔𑀢𑀺, 𑀅𑀢𑀺𑀯𑀺𑀬 𑀲𑀮𑁆𑀮𑀺𑀔𑀺𑀢𑀁 𑀓𑀢𑁆𑀯𑀸 𑀲𑀡𑁆𑀳𑀁 𑀲𑀡𑁆𑀳𑀁 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀘𑁆𑀘𑀬𑁄𑀢𑀺 𑀅𑀧𑀭𑀸𑀥𑁄. 𑀫𑀁 𑀅𑀘𑁆𑀘𑀕𑀫𑀸𑀢𑀺 𑀫𑀁 𑀅𑀢𑀺𑀓𑁆𑀓𑀫𑁆𑀫 𑀅𑀥𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄. 𑀅𑀳𑀼𑀤𑁂𑀯 𑀅𑀓𑁆𑀔𑀦𑁆𑀢𑀻𑀢𑀺 𑀅𑀳𑁄𑀲𑀺𑀬𑁂𑀯 𑀅𑀦𑀥𑀺𑀯𑀸𑀲𑀦𑀸. 𑀅𑀳𑀼 𑀅𑀧𑁆𑀧𑀘𑁆𑀘𑀬𑁄𑀢𑀺 𑀅𑀳𑁄𑀲𑀺 𑀅𑀢𑀼𑀝𑁆𑀞𑀸𑀓𑀸𑀭𑁄. 𑀧𑀝𑀺𑀕𑁆𑀕𑀡𑁆𑀳𑀸𑀢𑀽𑀢𑀺 𑀔𑀫𑀢𑀼. 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸𑀢𑀺 𑀅𑀦𑀸𑀕𑀢𑁂 𑀲𑀁𑀯𑀭𑀢𑁆𑀣𑀸𑀬, 𑀧𑀼𑀦 𑀏𑀯𑀭𑀽𑀧𑀲𑁆𑀲 𑀅𑀧𑀭𑀸𑀥𑀲𑁆𑀲 𑀤𑁄𑀲𑀲𑁆𑀲 𑀔𑀮𑀺𑀢𑀲𑁆𑀲 𑀯𑀸 𑀅𑀓𑀭𑀡𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀕𑁆𑀖𑀸𑀢𑀺 𑀏𑀓𑀁𑀲𑁂𑀦. 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀻𑀢𑀺 𑀬𑀣𑀸 𑀥𑀫𑁆𑀫𑁄 𑀞𑀺𑀢𑁄, 𑀢𑀣𑀸 𑀓𑀭𑁄𑀲𑀺, 𑀔𑀫𑀸𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀢𑀁 𑀢𑀯 𑀅𑀧𑀭𑀸𑀥𑀁 𑀫𑀬𑀁 𑀔𑀫𑀸𑀫. 𑀯𑀼𑀤𑁆𑀥𑀺𑀳𑁂𑀲𑀸, 𑀓𑀲𑁆𑀲𑀧, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂𑀢𑀺 𑀏𑀲𑀸 𑀓𑀲𑁆𑀲𑀧 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀼𑀤𑁆𑀥𑀺 𑀦𑀸𑀫. 𑀓𑀢𑀫𑀸? 𑀬𑀸𑀬𑀁 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑀸𑀧𑀚𑁆𑀚𑀦𑀸. 𑀤𑁂𑀲𑀦𑀁 𑀧𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 ‘‘𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 𑀆𑀳. 𑀦 𑀲𑀺𑀓𑁆𑀔𑀸𑀓𑀸𑀫𑁄𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀦 𑀓𑀸𑀫𑁂𑀢𑀺 𑀦 𑀧𑀢𑁆𑀣𑁂𑀢𑀺 𑀦 𑀧𑀺𑀳𑁂𑀢𑀺. 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀲𑁆𑀲𑀸𑀢𑀺 𑀲𑀺𑀓𑁆𑀔𑀸𑀧𑀭𑀺𑀧𑀽𑀭𑀡𑀲𑁆𑀲. 𑀦 𑀯𑀡𑁆𑀡𑀯𑀸𑀤𑀻𑀢𑀺 𑀕𑀼𑀡𑀁 𑀦 𑀓𑀣𑁂𑀢𑀺. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂𑀦. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀫𑀡𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.