(𑁮) 𑁩. 𑀆𑀦𑀦𑁆𑀤𑀯𑀕𑁆𑀕𑁄

𑁧. 𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀙𑀦𑁆𑀦𑁄𑀢𑀺 𑀏𑀯𑀁𑀦𑀸𑀫𑀓𑁄 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀢𑀼𑀫𑁆𑀳𑁂𑀧𑀺, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀬𑀣𑀸 𑀫𑀬𑀁 𑀭𑀸𑀕𑀸𑀤𑀻𑀦𑀁 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀫, 𑀓𑀺𑀁 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀧𑀜𑁆𑀜𑀸𑀧𑁂𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁄 𑀣𑁂𑀭𑁄 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀅𑀫𑁆𑀳𑁂 𑀭𑀸𑀕𑀸𑀤𑀻𑀦𑀁 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀫𑀸𑀢𑀺 𑀯𑀤𑀢𑀺, 𑀦𑀢𑁆𑀣𑀺 𑀧𑀦𑁂𑀢𑀁 𑀩𑀸𑀳𑀺𑀭𑀲𑀫𑀬𑁂’’𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀫𑀬𑀁 𑀔𑁄, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀫𑀬𑀫𑁂𑀯 𑀧𑀜𑁆𑀜𑀸𑀧𑁂𑀫𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀣𑁂𑀭𑁄 𑀩𑀸𑀳𑀺𑀭𑀲𑀫𑀬𑀁 𑀮𑀼𑀜𑁆𑀘𑀺𑀢𑁆𑀯𑀸 𑀳𑀭𑀦𑁆𑀢𑁄 ‘𑀫𑀬𑀫𑁂𑀯𑀸’𑀢𑀺 𑀆𑀳. 𑀓𑀺𑀁 𑀦𑀼 𑀔𑁄 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀢𑁂 𑀏𑀢𑁂𑀲𑀁 𑀧𑀳𑀸𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺. 𑀅𑀣 𑀣𑁂𑀭𑀁 𑀧𑀼𑀘𑁆𑀙𑀦𑁆𑀢𑁄 𑀓𑀺𑀁 𑀧𑀦 𑀢𑀼𑀫𑁆𑀳𑁂𑀢𑀺𑀆𑀤𑀺𑀫𑀸𑀳. 𑀣𑁂𑀭𑁄 𑀢𑀲𑁆𑀲 𑀩𑁆𑀬𑀸𑀓𑀭𑁄𑀦𑁆𑀢𑁄 𑀭𑀢𑁆𑀢𑁄 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀅𑀢𑁆𑀢𑀦𑁄 𑀅𑀢𑁆𑀣𑀁. 𑀧𑀭𑀢𑁆𑀣𑀉𑀪𑀬𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀦𑁆𑀥𑀓𑀭𑀡𑁄𑀢𑀺𑀆𑀤𑀻𑀲𑀼 𑀬𑀲𑁆𑀲 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀬𑀣𑀸𑀪𑀽𑀢𑀤𑀲𑁆𑀲𑀦𑀦𑀺𑀯𑀸𑀭𑀡𑁂𑀦 𑀅𑀦𑁆𑀥𑀁 𑀓𑀭𑁄𑀢𑀻𑀢𑀺 𑀅𑀦𑁆𑀥𑀓𑀭𑀡𑁄. 𑀧𑀜𑁆𑀜𑀸𑀘𑀓𑁆𑀔𑀼𑀁 𑀦 𑀓𑀭𑁄𑀢𑀻𑀢𑀺 𑀅𑀘𑀓𑁆𑀔𑀼𑀓𑀭𑀡𑁄. 𑀜𑀸𑀡𑀁 𑀦 𑀓𑀭𑁄𑀢𑀻𑀢𑀺 𑀅𑀜𑁆𑀜𑀸𑀡𑀓𑀭𑀡𑁄. 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸 𑀛𑀸𑀦𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀧𑀜𑁆𑀜𑀸 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀦𑀺𑀭𑁄𑀥𑁂𑀢𑀻𑀢𑀺 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄. 𑀅𑀦𑀺𑀝𑁆𑀞𑀨𑀮𑀤𑀸𑀬𑀓𑀢𑁆𑀢𑀸 𑀤𑀼𑀓𑁆𑀔𑀲𑀗𑁆𑀔𑀸𑀢𑀲𑁆𑀲 𑀯𑀺𑀖𑀸𑀢𑀲𑁆𑀲𑁂𑀯 𑀧𑀓𑁆𑀔𑁂 𑀯𑀢𑁆𑀢𑀢𑀻𑀢𑀺 𑀯𑀺𑀖𑀸𑀢𑀧𑀓𑁆𑀔𑀺𑀓𑁄. 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀦 𑀲𑀁𑀯𑀢𑁆𑀢𑁂𑀢𑀻𑀢𑀺 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄. 𑀅𑀮𑀜𑁆𑀘 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀅𑀧𑁆𑀧𑀫𑀸𑀤𑀸𑀬𑀸𑀢𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀘𑁂 𑀏𑀯𑀭𑀽𑀧𑀸 𑀧𑀝𑀺𑀧𑀤𑀸 𑀅𑀢𑁆𑀣𑀺, 𑀅𑀮𑀁 𑀢𑀼𑀫𑁆𑀳𑀸𑀓𑀁 𑀅𑀧𑁆𑀧𑀫𑀸𑀤𑀸𑀬 𑀬𑀼𑀢𑁆𑀢𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀅𑀧𑁆𑀧𑀫𑀸𑀤𑀁 𑀓𑀭𑁄𑀣, 𑀆𑀯𑀼𑀲𑁄𑀢𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀭𑀺𑀬𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀓𑀣𑀺𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁨. 𑀆𑀚𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀤𑀼𑀢𑀺𑀬𑁂 𑀢𑁂𑀦 𑀳𑀺 𑀕𑀳𑀧𑀢𑀻𑀢𑀺 𑀣𑁂𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀇𑀥 𑀆𑀕𑀘𑁆𑀙𑀦𑁆𑀢𑁄 𑀦 𑀅𑀜𑁆𑀜𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀆𑀕𑀫𑀺, 𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀧𑀦 𑀆𑀕𑀢𑁄. 𑀇𑀫𑀺𑀦𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀇𑀫𑀺𑀦𑀸𑀯 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀇𑀢𑀺 𑀢𑀁𑀬𑁂𑀯 𑀓𑀣𑀁 𑀓𑀣𑀸𑀧𑁂𑀢𑀼𑀓𑀸𑀫𑁄 𑀢𑁂𑀦 𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦 𑀳𑀻𑀢𑀺 𑀓𑀸𑀭𑀡𑀸𑀧𑀤𑁂𑀲𑁄. 𑀬𑀲𑁆𑀫𑀸 𑀢𑁆𑀯𑀁 𑀏𑀯𑀁 𑀧𑀼𑀘𑁆𑀙𑀲𑀺, 𑀢𑀲𑁆𑀫𑀸 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀸𑀫𑀻𑀢𑀺. 𑀓𑁂𑀲𑀁 𑀦𑁄𑀢𑀺 𑀓𑀢𑀫𑁂𑀲𑀁 𑀦𑀼. 𑀲𑀥𑀫𑁆𑀫𑀼𑀓𑁆𑀓𑀁𑀲𑀦𑀸𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀦𑀸. 𑀧𑀭𑀥𑀫𑁆𑀫𑀸𑀧𑀲𑀸𑀤𑀦𑀸𑀢𑀺 𑀧𑀭𑁂𑀲𑀁 𑀮𑀤𑁆𑀥𑀺𑀬𑀸 𑀖𑀝𑁆𑀝𑀦𑀸 𑀯𑀫𑁆𑀪𑀦𑀸 𑀅𑀯𑀓𑁆𑀔𑀺𑀧𑀦𑀸. 𑀆𑀬𑀢𑀦𑁂𑀯 𑀥𑀫𑁆𑀫𑀤𑁂𑀲𑀦𑀸𑀢𑀺 𑀓𑀸𑀭𑀡𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑀤𑁂𑀲𑀦𑀸. 𑀅𑀢𑁆𑀣𑁄 𑀘 𑀯𑀼𑀢𑁆𑀢𑁄𑀢𑀺 𑀫𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀸𑀬 𑀅𑀢𑁆𑀣𑁄 𑀘 𑀧𑀓𑀸𑀲𑀺𑀢𑁄. 𑀅𑀢𑁆𑀢𑀸 𑀘 𑀅𑀦𑀼𑀧𑀦𑀻𑀢𑁄𑀢𑀺 𑀅𑀫𑁆𑀳𑁂 𑀏𑀯𑀭𑀽𑀧𑀸𑀢𑀺 𑀏𑀯𑀁 𑀅𑀢𑁆𑀢𑀸 𑀘 𑀦 𑀉𑀧𑀦𑀻𑀢𑁄. 𑀦𑀼𑀧𑀦𑀻𑀢𑁄𑀢𑀺𑀧𑀺 𑀧𑀸𑀞𑁄.

𑁩. 𑀫𑀳𑀸𑀦𑀸𑀫𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀢𑀢𑀺𑀬𑁂 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀯𑀼𑀝𑁆𑀞𑀺𑀢𑁄. 𑀕𑁂𑀮𑀜𑁆𑀜𑀸𑀢𑀺 𑀕𑀺𑀮𑀸𑀦𑀪𑀸𑀯𑀢𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀆𑀤𑀸𑀬 𑀫𑀳𑀸𑀧𑀭𑀺𑀯𑀸𑀭𑀧𑀭𑀺𑀯𑀼𑀢𑁄 𑀉𑀧𑀲𑀗𑁆𑀓𑀫𑀺. 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸𑀢𑀺 𑀦 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺, 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀯𑀼𑀝𑁆𑀞𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀩𑀸𑀳𑀸𑀬𑀁 𑀅𑀗𑁆𑀕𑀼𑀝𑁆𑀞𑀓𑁂𑀦 𑀲𑀜𑁆𑀜𑀁 𑀤𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀧𑀦𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣𑀲𑁆𑀲 ‘‘𑀲𑁂𑀔𑀫𑁆𑀧𑀺 𑀔𑁄, 𑀫𑀳𑀸𑀦𑀸𑀫, 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀢𑁆𑀢𑀦𑁆𑀦𑀁 𑀲𑁂𑀔𑀸𑀦𑀁 𑀲𑀻𑀮𑀜𑁆𑀘 𑀲𑀫𑀸𑀥𑀺𑀜𑁆𑀘 𑀧𑀜𑁆𑀜𑀜𑁆𑀘 𑀓𑀣𑁂𑀢𑁆𑀯𑀸 𑀉𑀧𑀭𑀺 𑀅𑀭𑀳𑀢𑁆𑀢𑀨𑀮𑀯𑀲𑁂𑀦 𑀅𑀲𑁂𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀓𑀣𑁂𑀦𑁆𑀢𑁄 𑁋 ‘‘𑀲𑁂𑀔𑀲𑀫𑀸𑀥𑀺𑀢𑁄 𑀲𑁂𑀔𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀲𑁂𑀔𑀜𑁆𑀘 𑀨𑀮𑀜𑀸𑀡𑀁 𑀧𑀘𑁆𑀙𑀸, 𑀲𑁂𑀔𑀯𑀺𑀧𑀲𑁆𑀲𑀦𑀸𑀜𑀸𑀡𑀢𑁄 𑀘 𑀅𑀲𑁂𑀔𑀨𑀮𑀲𑀫𑀸𑀥𑀺 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀤𑀻𑀧𑁂𑀲𑀺. 𑀬𑀸𑀦𑀺 𑀧𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀲𑀫𑀸𑀥𑀺𑀜𑀸𑀡𑀸𑀦𑀺, 𑀢𑁂𑀲𑀁 𑀅𑀧𑀘𑁆𑀙𑀸 𑀅𑀧𑀼𑀭𑁂 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑁪. 𑀦𑀺𑀕𑀡𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀘𑀢𑀼𑀢𑁆𑀣𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀤𑁆𑀯𑁂 𑀓𑀡𑁆𑀡𑀺𑀓𑀸 𑀕𑀳𑁂𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀢𑀸𑀬 𑀕𑀦𑁆𑀥𑀓𑀼𑀝𑀺𑀬𑀸. 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺. 𑀲𑀢𑀢𑀁 𑀲𑀫𑀺𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭𑀁. 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀫𑀬𑁆𑀳𑀁 𑀉𑀧𑀝𑁆𑀞𑀺𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀸𑀡𑀸𑀦𑀁 𑀓𑀫𑁆𑀫𑀸𑀦𑀦𑁆𑀢𑀺 𑀆𑀬𑀽𑀳𑀺𑀢𑀓𑀫𑁆𑀫𑀸𑀦𑀁. 𑀢𑀧𑀲𑀸 𑀩𑁆𑀬𑀦𑁆𑀢𑀻𑀪𑀸𑀯𑀦𑁆𑀢𑀺 𑀤𑀼𑀓𑁆𑀓𑀭𑀢𑀧𑁂𑀦 𑀯𑀺𑀕𑀢𑀦𑁆𑀢𑀓𑀭𑀡𑀁. 𑀦𑀯𑀸𑀦𑀁 𑀓𑀫𑁆𑀫𑀸𑀦𑀦𑁆𑀢𑀺 𑀇𑀤𑀸𑀦𑀺 𑀆𑀬𑀽𑀳𑀺𑀢𑀩𑁆𑀩𑀓𑀫𑁆𑀫𑀸𑀦𑀁. 𑀅𑀓𑀭𑀡𑀸𑀢𑀺 𑀅𑀦𑀸𑀬𑀽𑀳𑀦𑁂𑀦. 𑀲𑁂𑀢𑀼𑀖𑀸𑀢𑀦𑁆𑀢𑀺 𑀧𑀤𑀖𑀸𑀢𑀁 𑀧𑀘𑁆𑀘𑀬𑀖𑀸𑀢𑀁 𑀓𑀣𑁂𑀢𑀺. 𑀓𑀫𑁆𑀫𑀓𑁆𑀔𑀬𑀸 𑀤𑀼𑀓𑁆𑀔𑀓𑁆𑀔𑀬𑁄𑀢𑀺 𑀓𑀫𑁆𑀫𑀯𑀝𑁆𑀝𑀓𑁆𑀔𑀬𑁂𑀦 𑀤𑀼𑀓𑁆𑀔𑀓𑁆𑀔𑀬𑁄. 𑀤𑀼𑀓𑁆𑀔𑀓𑁆𑀔𑀬𑀸 𑀯𑁂𑀤𑀦𑀸𑀓𑁆𑀔𑀬𑁄𑀢𑀺 𑀤𑀼𑀓𑁆𑀔𑀯𑀝𑁆𑀝𑀓𑁆𑀔𑀬𑁂𑀦 𑀯𑁂𑀤𑀦𑀸𑀓𑁆𑀔𑀬𑁄. 𑀤𑀼𑀓𑁆𑀔𑀯𑀝𑁆𑀝𑀲𑁆𑀫𑀺𑀜𑁆𑀳𑀺 𑀔𑀻𑀡𑁂 𑀯𑁂𑀤𑀦𑀸𑀯𑀝𑁆𑀝𑀫𑁆𑀧𑀺 𑀔𑀻𑀡𑀫𑁂𑀯 𑀳𑁄𑀢𑀺. 𑀯𑁂𑀤𑀦𑀸𑀓𑁆𑀔𑀬𑀸 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀦𑀺𑀚𑁆𑀚𑀺𑀡𑁆𑀡𑀁 𑀪𑀯𑀺𑀲𑁆𑀲𑀢𑀻𑀢𑀺 𑀯𑁂𑀤𑀦𑀸𑀓𑁆𑀔𑀬𑁂𑀦 𑀧𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀁 𑀦𑀺𑀚𑁆𑀚𑀺𑀡𑁆𑀡𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸𑀬𑀸𑀢𑀺 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑀸𑀬 𑀧𑀘𑁆𑀘𑀓𑁆𑀔𑀸𑀬. 𑀦𑀺𑀚𑁆𑀚𑀭𑀸𑀬 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀓𑀺𑀮𑁂𑀲𑀚𑀻𑀭𑀡𑀓𑀧𑀝𑀺𑀧𑀤𑀸𑀬 𑀓𑀺𑀮𑁂𑀲𑁂 𑀯𑀸 𑀦𑀺𑀚𑁆𑀚𑀻𑀭𑀡𑀢𑁄 𑀦𑀺𑀚𑁆𑀚𑀭𑀸𑀬 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸. 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀓𑀺𑀫𑀸𑀳𑀸𑀢𑀺, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀓𑀺𑀫𑀸𑀳, 𑀓𑀺𑀁 𑀏𑀢𑀁𑀬𑁂𑀯 𑀓𑀺𑀮𑁂𑀲𑀦𑀺𑀚𑁆𑀚𑀻𑀭𑀡𑀓𑀧𑀝𑀺𑀧𑀤𑀁 𑀧𑀜𑁆𑀜𑀧𑁂𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀚𑀸𑀦𑀢𑀸𑀢𑀺 𑀅𑀦𑀸𑀯𑀭𑀡𑀜𑀸𑀡𑁂𑀦 𑀚𑀸𑀦𑀦𑁆𑀢𑁂𑀦. 𑀧𑀲𑁆𑀲𑀢𑀸𑀢𑀺 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁂𑀦. 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀦𑀢𑁆𑀣𑀸𑀬. 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀬. 𑀅𑀢𑁆𑀣𑀗𑁆𑀕𑀫𑀸𑀬𑀸𑀢𑀺 𑀅𑀢𑁆𑀣𑀁 𑀕𑀫𑀦𑀢𑁆𑀣𑀸𑀬. 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬𑀸𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀅𑀧𑀘𑁆𑀘𑀬𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬. 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀻𑀢𑀺 𑀦𑀯𑀁 𑀓𑀫𑁆𑀫𑀁 𑀦𑀸𑀬𑀽𑀳𑀢𑀺. 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑁂 𑀆𑀬𑀽𑀳𑀺𑀢𑀓𑀫𑁆𑀫𑀁. 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻 𑀓𑀭𑁄𑀢𑀻𑀢𑀺 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺, 𑀯𑀺𑀧𑀸𑀓𑀨𑀲𑁆𑀲𑀁 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀢𑀁 𑀓𑀫𑁆𑀫𑀁 𑀔𑁂𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀺𑀓𑀸𑀢𑀺 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑀸. 𑀅𑀓𑀸𑀮𑀺𑀓𑀸𑀢𑀺 𑀦 𑀓𑀸𑀮𑀦𑁆𑀢𑀭𑁂 𑀓𑀺𑀘𑁆𑀘𑀓𑀸𑀭𑀺𑀓𑀸. 𑀏𑀳𑀺𑀧𑀲𑁆𑀲𑀺𑀓𑀸𑀢𑀺 ‘‘𑀏𑀳𑀺 𑀧𑀲𑁆𑀲𑀸’’𑀢𑀺 𑀏𑀯𑀁 𑀤𑀲𑁆𑀲𑁂𑀢𑀼𑀁 𑀬𑀼𑀢𑁆𑀢𑀸. 𑀑𑀧𑀦𑁂𑀬𑁆𑀬𑀺𑀓𑀸𑀢𑀺 𑀉𑀧𑀦𑀬𑁂 𑀬𑀼𑀢𑁆𑀢𑀸 𑀅𑀮𑁆𑀮𑀻𑀬𑀺𑀢𑀩𑁆𑀩𑀬𑀼𑀢𑁆𑀢𑀸. 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀻𑀢𑀺 𑀧𑀡𑁆𑀟𑀺𑀢𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂𑀬𑁂𑀯 𑀚𑀸𑀦𑀺𑀢𑀩𑁆𑀩𑀸, 𑀩𑀸𑀮𑁂𑀳𑀺 𑀧𑀦 𑀤𑀼𑀚𑁆𑀚𑀸𑀦𑀸. 𑀇𑀢𑀺 𑀲𑀻𑀮𑀯𑀲𑁂𑀦 𑀤𑁆𑀯𑁂 𑀫𑀕𑁆𑀕𑀸, 𑀤𑁆𑀯𑁂 𑀘 𑀨𑀮𑀸𑀦𑀺 𑀓𑀣𑀺𑀢𑀸𑀦𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀳𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄𑀢𑀺. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀺𑀓𑀸𑀬 𑀧𑀦 𑀲𑀫𑀸𑀥𑀺𑀲𑀫𑁆𑀧𑀤𑀸𑀬 𑀢𑀬𑁄 𑀫𑀕𑁆𑀕𑀸, 𑀢𑀻𑀡𑀺 𑀘 𑀨𑀮𑀸𑀦𑀺 𑀓𑀣𑀺𑀢𑀸𑀦𑀺. 𑀅𑀦𑀸𑀕𑀸𑀫𑀻 𑀅𑀭𑀺𑀬𑀲𑀸𑀯𑀓𑁄 𑀳𑀺 𑀲𑀫𑀸𑀥𑀺𑀫𑁆𑀳𑀺 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀯𑀼𑀢𑁆𑀢𑁄. 𑀆𑀲𑀯𑀸𑀦𑀁 𑀔𑀬𑀸𑀢𑀺𑀆𑀤𑀻𑀳𑀺 𑀅𑀭𑀳𑀢𑁆𑀢𑀨𑀮𑀁 𑀓𑀣𑀺𑀢𑀁. 𑀓𑁂𑀘𑀺 𑀧𑀦 𑀲𑀻𑀮𑀲𑀫𑀸𑀥𑀬𑁄𑀧𑀺 𑀅𑀭𑀳𑀢𑁆𑀢𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀏𑀓𑁂𑀓𑀲𑁆𑀲 𑀧𑀦 𑀯𑀲𑁂𑀦 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀦𑁆𑀢𑀺 𑀆𑀭𑁄𑀧𑀺𑀢𑀸𑀢𑀺.

𑁫. 𑀦𑀺𑀯𑁂𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀧𑀜𑁆𑀘𑀫𑁂 𑀅𑀫𑀘𑁆𑀘𑀸𑀢𑀺 𑀲𑀼𑀳𑀚𑁆𑀚𑀸. 𑀜𑀸𑀢𑀻𑀢𑀺 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸. 𑀲𑀸𑀮𑁄𑀳𑀺𑀢𑀸𑀢𑀺 𑀲𑀫𑀸𑀦𑀮𑁄𑀳𑀺𑀢𑀸 𑀪𑀸𑀢𑀺𑀪𑀕𑀺𑀦𑀺𑀆𑀤𑀬𑁄. 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀢𑀺 𑀕𑀼𑀡𑁂 𑀅𑀯𑁂𑀘𑁆𑀘 𑀚𑀸𑀦𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑁂 𑀅𑀘𑀮𑀧𑁆𑀧𑀲𑀸𑀤𑁂. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀪𑀸𑀯𑀜𑁆𑀜𑀣𑀢𑁆𑀢𑀁. 𑀧𑀣𑀯𑀻𑀥𑀸𑀢𑀼𑀬𑀸𑀢𑀺𑀆𑀤𑀻𑀲𑀼 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀣𑀤𑁆𑀥𑀸𑀓𑀸𑀭𑀪𑀽𑀢𑀸𑀬 𑀧𑀣𑀯𑀻𑀥𑀸𑀢𑀼𑀬𑀸, 𑀤𑁆𑀯𑀸𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀬𑀽𑀲𑀕𑀢𑀸𑀬 𑀆𑀩𑀦𑁆𑀥𑀦𑀪𑀽𑀢𑀸𑀬 𑀆𑀧𑁄𑀥𑀸𑀢𑀼𑀬𑀸, 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀭𑀺𑀧𑀸𑀘𑀦𑀪𑀽𑀢𑀸𑀬 𑀢𑁂𑀚𑁄𑀥𑀸𑀢𑀼𑀬𑀸, 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀢𑁆𑀣𑀫𑁆𑀪𑀦𑀪𑀽𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁. 𑀦 𑀢𑁆𑀯𑁂𑀯𑀸𑀢𑀺 𑀇𑀫𑁂𑀲𑀁 𑀳𑀺 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀪𑀸𑀯𑀽𑀧𑀕𑀫𑀦𑁂𑀦 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀁, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀦 𑀦 𑀢𑁆𑀯𑁂𑀯 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀧𑀲𑀸𑀤𑀜𑁆𑀜𑀣𑀢𑁆𑀢𑀜𑁆𑀘 𑀕𑀢𑀺𑀅𑀜𑁆𑀜𑀣𑀢𑁆𑀢𑀜𑁆𑀘. 𑀢𑀜𑁆𑀳𑀺 𑀢𑀲𑁆𑀲 𑀦 𑀳𑁄𑀢𑀺, 𑀪𑀸𑀯𑀜𑁆𑀜𑀣𑀢𑁆𑀢𑀁 𑀧𑀦 𑀳𑁄𑀢𑀺. 𑀅𑀭𑀺𑀬𑀲𑀸𑀯𑀓𑁄 𑀳𑀺 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀤𑁂𑀯𑁄𑀧𑀺 𑀳𑁄𑀢𑀺 𑀩𑁆𑀭𑀳𑁆𑀫𑀸𑀧𑀺. 𑀧𑀲𑀸𑀤𑁄 𑀧𑀦𑀲𑁆𑀲 𑀪𑀯𑀦𑁆𑀢𑀭𑁂𑀧𑀺 𑀦 𑀯𑀺𑀕𑀘𑁆𑀙𑀢𑀺, 𑀦 𑀘 𑀅𑀧𑀸𑀬𑀕𑀢𑀺𑀲𑀗𑁆𑀔𑀸𑀢𑀁 𑀕𑀢𑀺𑀅𑀜𑁆𑀜𑀣𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀲𑀢𑁆𑀣𑀸𑀧𑀺 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀭𑀺𑀤𑀁 𑀅𑀜𑁆𑀜𑀣𑀢𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁬. 𑀧𑀞𑀫𑀪𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀙𑀝𑁆𑀞𑁂 𑀓𑀸𑀫𑀥𑀸𑀢𑀼𑀯𑁂𑀧𑀓𑁆𑀓𑀦𑁆𑀢𑀺 𑀓𑀸𑀫𑀥𑀸𑀢𑀼𑀬𑀸 𑀯𑀺𑀧𑀘𑁆𑀘𑀦𑀓𑀁. 𑀓𑀸𑀫𑀪𑀯𑁄𑀢𑀺 𑀓𑀸𑀫𑀥𑀸𑀢𑀼𑀬𑀁 𑀉𑀧𑀧𑀢𑁆𑀢𑀺𑀪𑀯𑁄. 𑀓𑀫𑁆𑀫𑀁 𑀔𑁂𑀢𑁆𑀢𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀯𑀺𑀭𑀼𑀳𑀦𑀝𑁆𑀞𑀸𑀦𑀝𑁆𑀞𑁂𑀦 𑀔𑁂𑀢𑁆𑀢𑀁. 𑀯𑀺𑀜𑁆𑀜𑀸𑀡𑀁 𑀩𑀻𑀚𑀦𑁆𑀢𑀺 𑀲𑀳𑀚𑀸𑀢𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀯𑀺𑀭𑀼𑀳𑀦𑀝𑁆𑀞𑁂𑀦 𑀩𑀻𑀚𑀁. 𑀢𑀡𑁆𑀳𑀸 𑀲𑁆𑀦𑁂𑀳𑁄𑀢𑀺 𑀧𑀕𑁆𑀕𑀡𑁆𑀳𑀦𑀸𑀦𑀼𑀩𑁆𑀭𑀽𑀳𑀦𑀯𑀲𑁂𑀦 𑀢𑀡𑁆𑀳𑀸 𑀉𑀤𑀓𑀁 𑀦𑀸𑀫. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀆𑀯𑀭𑀺𑀢𑀸𑀦𑀁. 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀢𑀡𑁆𑀳𑀸𑀩𑀦𑁆𑀥𑀦𑁂𑀦 𑀩𑀤𑁆𑀥𑀸𑀦𑀁. 𑀳𑀻𑀦𑀸𑀬 𑀥𑀸𑀢𑀼𑀬𑀸𑀢𑀺 𑀓𑀸𑀫𑀥𑀸𑀢𑀼𑀬𑀸. 𑀯𑀺𑀜𑁆𑀜𑀸𑀡𑀁 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀧𑀢𑀺𑀝𑁆𑀞𑀺𑀢𑀁. 𑀫𑀚𑁆𑀛𑀺𑀫𑀸𑀬 𑀥𑀸𑀢𑀼𑀬𑀸𑀢𑀺 𑀭𑀽𑀧𑀥𑀸𑀢𑀼𑀬𑀸. 𑀧𑀡𑀻𑀢𑀸𑀬 𑀥𑀸𑀢𑀼𑀬𑀸𑀢𑀺 𑀅𑀭𑀽𑀧𑀥𑀸𑀢𑀼𑀬𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁭. 𑀤𑀼𑀢𑀺𑀬𑀪𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀲𑀢𑁆𑀢𑀫𑁂 𑀘𑁂𑀢𑀦𑀸𑀢𑀺 𑀓𑀫𑁆𑀫𑀘𑁂𑀢𑀦𑀸. 𑀧𑀢𑁆𑀣𑀦𑀸𑀧𑀺 𑀓𑀫𑁆𑀫𑀧𑀢𑁆𑀣𑀦𑀸𑀯. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑁮. 𑀲𑀻𑀮𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀅𑀝𑁆𑀞𑀫𑁂 𑀲𑀻𑀮𑀩𑁆𑀩𑀢𑀦𑁆𑀢𑀺 𑀲𑀻𑀮𑀜𑁆𑀘𑁂𑀯 𑀯𑀢𑀜𑁆𑀘. 𑀚𑀻𑀯𑀺𑀢𑀦𑁆𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀦𑀼𑀬𑁄𑀕𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀉𑀧𑀝𑁆𑀞𑀸𑀦𑀲𑀸𑀭𑀦𑁆𑀢𑀺 𑀉𑀧𑀝𑁆𑀞𑀸𑀦𑁂𑀦 𑀲𑀸𑀭𑀁, ‘‘𑀇𑀤𑀁 𑀯𑀭𑀁 𑀇𑀤𑀁 𑀦𑀺𑀝𑁆𑀞𑀸’’𑀢𑀺 𑀏𑀯𑀁 𑀉𑀧𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀨𑀮𑀦𑁆𑀢𑀺 𑀲𑀉𑀤𑁆𑀭𑀬𑀁 𑀲𑀯𑀟𑁆𑀠𑀺𑀓𑀁 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀦 𑀔𑁆𑀯𑁂𑀢𑁆𑀣, 𑀪𑀦𑁆𑀢𑁂, 𑀏𑀓𑀁𑀲𑁂𑀦𑀸𑀢𑀺, 𑀪𑀦𑁆𑀢𑁂, 𑀦 𑀔𑁄 𑀏𑀢𑁆𑀣 𑀏𑀓𑀁𑀲𑁂𑀦 𑀩𑁆𑀬𑀸𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀝𑁆𑀞𑀸𑀦𑀲𑀸𑀭𑀁 𑀲𑁂𑀯𑀢𑁄𑀢𑀺 𑀇𑀤𑀁 𑀲𑀸𑀭𑀁 𑀯𑀭𑀁 𑀦𑀺𑀝𑁆𑀞𑀸𑀢𑀺 𑀏𑀯𑀁 𑀉𑀧𑀝𑁆𑀞𑀺𑀢𑀁 𑀲𑁂𑀯𑀫𑀸𑀦𑀲𑁆𑀲. 𑀅𑀨𑀮𑀦𑁆𑀢𑀺 𑀇𑀝𑁆𑀞𑀨𑀮𑁂𑀦 𑀅𑀨𑀮𑀁. 𑀏𑀢𑁆𑀢𑀸𑀯𑀢𑀸 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀯𑀸𑀤𑀻𑀦𑀁 𑀧𑀩𑁆𑀩𑀚𑁆𑀚𑀁 𑀞𑀧𑁂𑀢𑁆𑀯𑀸 𑀲𑁂𑀲𑁄 𑀲𑀩𑁆𑀩𑁄𑀧𑀺 𑀩𑀸𑀳𑀺𑀭𑀓𑀲𑀫𑀬𑁄 𑀕𑀳𑀺𑀢𑁄 𑀳𑁄𑀢𑀺. 𑀲𑀨𑀮𑀦𑁆𑀢𑀺 𑀇𑀝𑁆𑀞𑀨𑀮𑁂𑀦 𑀲𑀨𑀮𑀁 𑀲𑀉𑀤𑁆𑀭𑀬𑀁. 𑀏𑀢𑁆𑀢𑀸𑀯𑀢𑀸 𑀇𑀫𑀁 𑀲𑀸𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀸𑀧𑀺 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀯𑀸𑀤𑀻𑀦𑀁 𑀧𑀩𑁆𑀩𑀚𑁆𑀚𑀸 𑀕𑀳𑀺𑀢𑀸. 𑀦 𑀘 𑀧𑀦𑀲𑁆𑀲 𑀲𑀼𑀮𑀪𑀭𑀽𑀧𑁄 𑀲𑀫𑀲𑀫𑁄 𑀧𑀜𑁆𑀜𑀸𑀬𑀸𑀢𑀺 𑀏𑀯𑀁 𑀲𑁂𑀓𑁆𑀔𑀪𑀽𑀫𑀺𑀬𑀁 𑀞𑀢𑁆𑀯𑀸 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀅𑀲𑁆𑀲 𑀆𑀦𑀦𑁆𑀤𑀲𑁆𑀲 𑀧𑀜𑁆𑀜𑀸𑀬 𑀲𑀫𑀲𑀫𑁄 𑀦 𑀲𑀼𑀮𑀪𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁂𑀓𑁆𑀔𑀪𑀽𑀫𑀺 𑀦𑀸𑀫 𑀓𑀣𑀺𑀢𑀸𑀢𑀺.

𑁯. 𑀕𑀦𑁆𑀥𑀚𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀦𑀯𑀫𑁂 𑀏𑀢𑀤𑀯𑁄𑀘𑀸𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀤𑀲𑀩𑀮𑀲𑁆𑀲 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀯𑀺𑀳𑀸𑀭𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀫𑀽𑀮𑀕𑀦𑁆𑀥𑁄 𑀦𑀸𑀫 𑀅𑀢𑁆𑀣𑀺, 𑀲𑀸𑀭𑀕𑀦𑁆𑀥𑁄 𑀦𑀸𑀫 𑀅𑀢𑁆𑀣𑀺, 𑀧𑀼𑀧𑁆𑀨𑀕𑀦𑁆𑀥𑁄 𑀦𑀸𑀫 𑀅𑀢𑁆𑀣𑀺. 𑀇𑀫𑁂 𑀧𑀦 𑀢𑀬𑁄𑀧𑀺 𑀕𑀦𑁆𑀥𑀸 𑀅𑀦𑀼𑀯𑀸𑀢𑀁𑀬𑁂𑀯 𑀕𑀘𑁆𑀙𑀦𑁆𑀢𑀺, 𑀦 𑀧𑀝𑀺𑀯𑀸𑀢𑀁. 𑀅𑀢𑁆𑀣𑀺 𑀦𑀼 𑀔𑁄 𑀓𑀺𑀜𑁆𑀘𑀺, 𑀬𑀲𑁆𑀲 𑀧𑀝𑀺𑀯𑀸𑀢𑀫𑁆𑀧𑀺 𑀕𑀦𑁆𑀥𑁄 𑀕𑀘𑁆𑀙𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀝𑁆𑀞𑀦𑁆𑀦𑀁 𑀯𑀭𑀸𑀦𑀁 𑀕𑀳𑀡𑀓𑀸𑀮𑁂𑀬𑁂𑀯 𑀓𑀗𑁆𑀔𑀼𑀧𑁆𑀧𑀢𑁆𑀢𑀺𑀲𑀫𑀬𑁂 𑀉𑀧𑀲𑀗𑁆𑀓𑀫𑀦𑀯𑀭𑀲𑁆𑀲 𑀕𑀳𑀺𑀢𑀢𑁆𑀢𑀸 𑀢𑀓𑁆𑀔𑀡𑀁𑀬𑁂𑀯 𑀤𑀺𑀯𑀸𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀉𑀧𑁆𑀧𑀦𑁆𑀦𑀸𑀬 𑀓𑀗𑁆𑀔𑀸𑀬 𑀯𑀺𑀦𑁄𑀤𑀦𑀢𑁆𑀣𑀁 𑀏𑀢𑀁 ‘‘𑀢𑀻𑀡𑀺𑀫𑀸𑀦𑀺, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀕𑀦𑁆𑀥𑀚𑀸𑀢𑀸𑀦𑀻𑀢𑀺 𑀕𑀦𑁆𑀥𑀚𑀸𑀢𑀺𑀬𑁄. 𑀫𑀽𑀮𑀕𑀦𑁆𑀥𑁄𑀢𑀺 𑀫𑀽𑀮𑀯𑀢𑁆𑀣𑀼𑀓𑁄 𑀕𑀦𑁆𑀥𑁄, 𑀕𑀦𑁆𑀥𑀲𑀫𑁆𑀧𑀦𑁆𑀦𑀁 𑀯𑀸 𑀫𑀽𑀮𑀫𑁂𑀯 𑀫𑀽𑀮𑀕𑀦𑁆𑀥𑁄. 𑀢𑀲𑁆𑀲 𑀳𑀺 𑀕𑀦𑁆𑀥𑁄 𑀅𑀦𑀼𑀯𑀸𑀢𑀁 𑀕𑀘𑁆𑀙𑀢𑀺. 𑀕𑀦𑁆𑀥𑀲𑁆𑀲 𑀧𑀦 𑀕𑀦𑁆𑀥𑁄 𑀦𑀸𑀫 𑀦𑀢𑁆𑀣𑀺. 𑀲𑀸𑀭𑀕𑀦𑁆𑀥𑀧𑀼𑀧𑁆𑀨𑀕𑀦𑁆𑀥𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀣𑀸𑀦𑀦𑁆𑀤, 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀦𑁆𑀢𑀺 𑀏𑀢𑁆𑀣 𑀲𑀭𑀡𑀕𑀫𑀦𑀸𑀤𑀬𑁄 𑀕𑀼𑀡𑀯𑀡𑁆𑀡𑀪𑀸𑀲𑀦𑀯𑀲𑁂𑀦 𑀤𑀺𑀲𑀸𑀕𑀸𑀫𑀺𑀢𑀸𑀬 𑀕𑀦𑁆𑀥𑀲𑀤𑀺𑀲𑀢𑁆𑀢𑀸 𑀕𑀦𑁆𑀥𑀸, 𑀢𑁂𑀲𑀁 𑀯𑀢𑁆𑀣𑀼𑀪𑀽𑀢𑁄 𑀧𑀼𑀕𑁆𑀕𑀮𑁄 𑀕𑀦𑁆𑀥𑀚𑀸𑀢𑀁 𑀦𑀸𑀫. 𑀕𑀦𑁆𑀥𑁄 𑀕𑀘𑁆𑀙𑀢𑀻𑀢𑀺 𑀯𑀡𑁆𑀡𑀪𑀸𑀲𑀦𑀯𑀲𑁂𑀦 𑀕𑀘𑁆𑀙𑀢𑀺. 𑀲𑀻𑀮𑀯𑀸𑀢𑀺 𑀧𑀜𑁆𑀘𑀲𑀻𑀮𑁂𑀦 𑀯𑀸 𑀤𑀲𑀲𑀻𑀮𑁂𑀦 𑀯𑀸 𑀲𑀻𑀮𑀯𑀸. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀢𑁂𑀦𑁂𑀯 𑀲𑀻𑀮𑀥𑀫𑁆𑀫𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑁄 𑀲𑀼𑀦𑁆𑀤𑀭𑀥𑀫𑁆𑀫𑁄. 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦𑀸𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁬𑁦) 𑀯𑀺𑀢𑁆𑀣𑀸𑀭𑀺𑀢𑁄𑀯. 𑀤𑀺𑀲𑀸𑀲𑀽𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀽𑀲𑀼 𑀅𑀦𑀼𑀤𑀺𑀲𑀸𑀲𑀼. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸.

𑀦 𑀧𑀼𑀧𑁆𑀨𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀻𑀢𑀺 𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀤𑀻𑀦𑀁 𑀕𑀦𑁆𑀥𑁄 𑀧𑀝𑀺𑀯𑀸𑀢𑀁 𑀦 𑀕𑀘𑁆𑀙𑀢𑀺. 𑀦 𑀘𑀦𑁆𑀤𑀦𑀁 𑀢𑀕𑀭𑀫𑀮𑁆𑀮𑀺𑀓𑀸 𑀯𑀸𑀢𑀺 𑀘𑀦𑁆𑀤𑀦𑀢𑀕𑀭𑀫𑀮𑁆𑀮𑀺𑀓𑀸𑀦𑀫𑁆𑀧𑀺 𑀕𑀦𑁆𑀥𑁄 𑀧𑀝𑀺𑀯𑀸𑀢𑀁 𑀦 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀯𑀮𑁄𑀓𑁂𑀧𑀺 𑀨𑀼𑀝𑀲𑀼𑀫𑀦𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀲𑀸 𑀧𑀼𑀧𑁆𑀨𑀺𑀢𑀤𑀺𑀯𑀲𑁂 𑀕𑀦𑁆𑀥𑁄 𑀬𑁄𑀚𑀦𑀲𑀢𑀁 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀲𑁄𑀧𑀺 𑀧𑀝𑀺𑀯𑀸𑀢𑀁 𑀯𑀺𑀤𑀢𑁆𑀣𑀺𑀫𑀢𑁆𑀢𑀫𑁆𑀧𑀺 𑀭𑀢𑀦𑀫𑀢𑁆𑀢𑀫𑁆𑀧𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀢𑀜𑁆𑀘 𑀕𑀦𑁆𑀥𑁄 𑀧𑀝𑀺𑀯𑀸𑀢𑀫𑁂𑀢𑀻𑀢𑀺 𑀲𑀢𑀜𑁆𑀘 𑀧𑀡𑁆𑀟𑀺𑀢𑀸𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀕𑀦𑁆𑀥𑁄 𑀧𑀝𑀺𑀯𑀸𑀢𑀁 𑀕𑀘𑁆𑀙𑀢𑀺. 𑀲𑀩𑁆𑀩𑀸 𑀤𑀺𑀲𑀸 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀻𑀢𑀺 𑀲𑀧𑁆𑀧𑀼𑀭𑀺𑀲𑁄 𑀧𑀡𑁆𑀟𑀺𑀢𑁄 𑀲𑀻𑀮𑀸𑀤𑀺𑀕𑀼𑀡𑀕𑀦𑁆𑀥𑁂𑀦 𑀲𑀩𑁆𑀩𑀸 𑀤𑀺𑀲𑀸 𑀧𑀯𑀸𑀬𑀢𑀺, 𑀲𑀩𑁆𑀩𑀸 𑀤𑀺𑀲𑀸 𑀕𑀦𑁆𑀥𑁂𑀦 𑀅𑀯𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄.

𑁧𑁦. 𑀘𑀽𑀴𑀦𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀤𑀲𑀫𑀲𑁆𑀲 𑀤𑀼𑀯𑀺𑀥𑁄 𑀦𑀺𑀓𑁆𑀔𑁂𑀧𑁄 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑁄𑀧𑀺 𑀧𑀼𑀘𑁆𑀙𑀸𑀯𑀲𑀺𑀓𑁄𑀧𑀺. 𑀓𑀢𑀭𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀓𑀲𑁆𑀲 𑀧𑀼𑀘𑁆𑀙𑀸𑀬 𑀓𑀣𑀺𑀢𑀦𑁆𑀢𑀺 𑀘𑁂? 𑀅𑀭𑀼𑀡𑀯𑀢𑀺𑀲𑀼𑀢𑁆𑀢𑀦𑁆𑀢𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 (𑀲𑀁. 𑀦𑀺. 𑁧.𑁧𑁮𑁫 𑀆𑀤𑀬𑁄) 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀼𑀘𑁆𑀙𑀸𑀬 𑀓𑀣𑀺𑀢𑀁. 𑀅𑀭𑀼𑀡𑀯𑀢𑀺𑀲𑀼𑀢𑁆𑀢𑀦𑁆𑀢𑁄 𑀓𑁂𑀦 𑀓𑀣𑀺𑀢𑁄𑀢𑀺? 𑀤𑁆𑀯𑀻𑀳𑀺 𑀩𑀼𑀤𑁆𑀥𑁂𑀳𑀺 𑀓𑀣𑀺𑀢𑁄 𑀲𑀺𑀔𑀺𑀦𑀸 𑀘 𑀪𑀕𑀯𑀢𑀸 𑀅𑀫𑁆𑀳𑀸𑀓𑀜𑁆𑀘 𑀲𑀢𑁆𑀣𑀸𑀭𑀸. 𑀇𑀫𑀲𑁆𑀫𑀸 𑀳𑀺 𑀓𑀧𑁆𑀧𑀸 𑀏𑀓𑀢𑀺𑀁𑀲𑀓𑀧𑁆𑀧𑀫𑀢𑁆𑀣𑀓𑁂 𑀅𑀭𑀼𑀡𑀯𑀢𑀺𑀦𑀕𑀭𑁂 𑀅𑀭𑀼𑀡𑀯𑀢𑁄 𑀭𑀜𑁆𑀜𑁄 𑀧𑀪𑀸𑀯𑀢𑀺𑀬𑀸 𑀦𑀸𑀫 𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀺𑀔𑀻 𑀪𑀕𑀯𑀸 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀭𑀼𑀡𑀯𑀢𑀺𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 ‘‘𑀅𑀭𑀼𑀡𑀯𑀢𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑁂 𑀞𑀺𑀢𑁄 𑀅𑀪𑀺𑀪𑀼𑀁 𑀦𑀸𑀫 𑀅𑀕𑁆𑀕𑀲𑀸𑀯𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄, 𑀪𑀺𑀓𑁆𑀔𑀼, 𑀅𑀭𑀼𑀡𑀯𑀢𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀁, 𑀬𑁂𑀦 𑀅𑀜𑁆𑀜𑀢𑀭𑁄 𑀩𑁆𑀭𑀳𑁆𑀫𑀮𑁄𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. 𑀬𑀣𑀸𑀳 𑁋

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘𑀆𑀬𑀸𑀫, 𑀩𑁆𑀭𑀸𑀳𑁆𑀫𑀡, 𑀬𑁂𑀦 𑀅𑀜𑁆𑀜𑀢𑀭𑁄 𑀩𑁆𑀭𑀳𑁆𑀫𑀮𑁄𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫, 𑀦 𑀢𑀸𑀯 𑀪𑀢𑁆𑀢𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽 𑀪𑀺𑀓𑁆𑀔𑀼 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀪𑀺𑀪𑀽 𑀘 𑀪𑀺𑀓𑁆𑀔𑀼 𑀬𑁂𑀦 𑀅𑀜𑁆𑀜𑀢𑀭𑁄 𑀩𑁆𑀭𑀳𑁆𑀫𑀮𑁄𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽’’𑀢𑀺 (𑀲𑀁. 𑀦𑀺. 𑁧.𑁧𑁮𑁫).

𑀢𑀢𑁆𑀣 𑀫𑀳𑀸𑀩𑁆𑀭𑀳𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀅𑀢𑁆𑀢𑀫𑀦𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺, 𑀣𑁂𑀭𑀲𑁆𑀲𑀸𑀧𑀺 𑀅𑀦𑀼𑀘𑁆𑀙𑀯𑀺𑀓𑀁 𑀆𑀲𑀦𑀁 𑀧𑀜𑁆𑀜𑀸𑀧𑀬𑀺𑀁𑀲𑀼. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀣𑁂𑀭𑁄𑀧𑀺 𑀅𑀢𑁆𑀢𑀦𑁄 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀫𑀳𑀸𑀩𑁆𑀭𑀳𑁆𑀫𑀸𑀧𑀺 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀺𑀔𑀻 𑀪𑀕𑀯𑀸 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀝𑀺𑀪𑀸𑀢𑀼 𑀢𑀁, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀼𑀦𑁄 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸𑀬 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀜𑁆𑀘 𑀥𑀫𑁆𑀫𑀻𑀓𑀣𑀸𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽 𑀪𑀺𑀓𑁆𑀔𑀼 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸𑀬 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀜𑁆𑀘 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀲𑀺. 𑀣𑁂𑀭𑁂 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂 𑀩𑁆𑀭𑀳𑁆𑀫𑀕𑀡𑀸 𑀉𑀚𑁆𑀛𑀸𑀬𑀺𑀁𑀲𑀼 𑁋 ‘‘𑀘𑀺𑀭𑀲𑁆𑀲𑀜𑁆𑀘 𑀫𑀬𑀁 𑀲𑀢𑁆𑀣𑀼 𑀩𑁆𑀭𑀳𑁆𑀫𑀮𑁄𑀓𑀸𑀕𑀫𑀦𑀁 𑀮𑀪𑀺𑀫𑁆𑀳, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀲𑀬𑀁 𑀥𑀫𑁆𑀫𑀓𑀣𑀁 𑀆𑀭𑀪𑀻’’𑀢𑀺.

𑀲𑀢𑁆𑀣𑀸 𑀢𑁂𑀲𑀁 𑀅𑀦𑀢𑁆𑀢𑀫𑀦𑀪𑀸𑀯𑀁 𑀜𑀢𑁆𑀯𑀸 𑀅𑀪𑀺𑀪𑀼𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀉𑀚𑁆𑀛𑀸𑀬𑀦𑁆𑀢𑀺 𑀔𑁄 𑀢𑁂, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀸 𑀘 𑀩𑁆𑀭𑀳𑁆𑀫𑀧𑀭𑀺𑀲𑀸 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀘. 𑀢𑁂𑀦 𑀳𑀺 𑀢𑁆𑀯𑀁 𑁋 𑀩𑁆𑀭𑀸𑀳𑁆𑀫𑀡, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀁𑀯𑁂𑀚𑁂𑀳𑀻’’𑀢𑀺. 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺 (𑀲𑀁. 𑀦𑀺. 𑁧.𑁧𑁮𑁫) 𑀕𑀸𑀣𑀸𑀤𑁆𑀯𑀬𑀁 𑀅𑀪𑀸𑀲𑀺. 𑀓𑀺𑀁 𑀧𑀦 𑀓𑀢𑁆𑀯𑀸 𑀣𑁂𑀭𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀺𑀜𑁆𑀜𑀸𑀧𑁂𑀲𑀻𑀢𑀺? 𑀦𑀻𑀮𑀓𑀲𑀺𑀡𑀁 𑀢𑀸𑀯 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑁆𑀥𑀓𑀸𑀭𑀁 𑀨𑀭𑀺, 𑀢𑀢𑁄 ‘‘𑀓𑀺𑀫𑀺𑀤𑀁 𑀅𑀦𑁆𑀥𑀓𑀸𑀭’’𑀦𑁆𑀢𑀺 𑀲𑀢𑁆𑀢𑀸𑀦𑀁 𑀆𑀪𑁄𑀕𑁂 𑀉𑀧𑁆𑀧𑀦𑁆𑀦𑁂 𑀆𑀮𑁄𑀓𑀁 𑀤𑀲𑁆𑀲𑁂𑀲𑀺. ‘‘𑀓𑀺𑀁 𑀆𑀮𑁄𑀓𑁄 𑀅𑀬’’𑀦𑁆𑀢𑀺 𑀯𑀺𑀘𑀺𑀦𑀦𑁆𑀢𑀸𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺, 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀣𑁂𑀭𑀁𑀬𑁂𑀯 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀣𑁂𑀭𑁄 ‘‘𑀫𑀳𑀸𑀚𑀦𑁄 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀲𑀭𑀁 𑀲𑀼𑀡𑀸𑀢𑀽’’𑀢𑀺 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀲𑀩𑁆𑀩𑁂 𑀑𑀲𑀝𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀯𑀺𑀬 𑀲𑀤𑁆𑀤𑀁 𑀅𑀲𑁆𑀲𑁄𑀲𑀼𑀁. 𑀅𑀢𑁆𑀣𑁄𑀧𑀺 𑀦𑁂𑀲𑀁 𑀧𑀸𑀓𑀝𑁄 𑀅𑀳𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀲𑀤𑁆𑀥𑀺𑀁 𑀣𑁂𑀭𑁂𑀦 𑀅𑀭𑀼𑀡𑀯𑀢𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀅𑀲𑁆𑀲𑀼𑀢𑁆𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀼𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀲𑁆𑀲 𑀕𑀸𑀣𑀸𑀬𑁄 𑀪𑀸𑀲𑀫𑀸𑀦𑀲𑁆𑀲𑀸’’𑀢𑀺. 𑀢𑁂 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀲𑀼𑀢𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑀸 𑀢𑀤𑁂𑀯 𑀕𑀸𑀣𑀸𑀤𑁆𑀯𑀬𑀁 𑀉𑀤𑀸𑀳𑀭𑀺𑀁𑀲𑀼. 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺. 𑀏𑀯𑀁 𑀢𑀸𑀯 𑀇𑀤𑀁 𑀲𑀼𑀢𑁆𑀢𑀁 𑀇𑀢𑁄 𑀏𑀓𑀢𑀺𑀁𑀲𑀓𑀧𑁆𑀧𑀫𑀢𑁆𑀣𑀓𑁂 𑀲𑀺𑀔𑀺𑀦𑀸 𑀪𑀕𑀯𑀢𑀸 𑀓𑀣𑀺𑀢𑀁.

𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀚𑁂𑀝𑁆𑀞𑀫𑀽𑀮𑀫𑀸𑀲𑀧𑀼𑀡𑁆𑀡𑀫𑀤𑀺𑀯𑀲𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀇𑀫𑀁 𑀅𑀭𑀼𑀡𑀯𑀢𑀺𑀲𑀼𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀩𑀻𑀚𑀬𑀫𑀸𑀦𑁄 𑀞𑀺𑀢𑀓𑁄𑀯 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀏𑀓𑀩𑁆𑀬𑀜𑁆𑀚𑀦𑀫𑁆𑀧𑀺 𑀅𑀳𑀸𑀧𑁂𑀢𑁆𑀯𑀸 𑀲𑀓𑀮𑀲𑀼𑀢𑁆𑀢𑀁 𑀉𑀕𑁆𑀕𑀡𑁆𑀳𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀤𑀲𑀩𑀮𑀲𑁆𑀲 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀯𑀺𑀳𑀸𑀭𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁂𑀲𑀼 𑀳𑀺𑀬𑁆𑀬𑁄 𑀓𑀣𑀺𑀢𑀁 𑀅𑀭𑀼𑀡𑀯𑀢𑀺𑀲𑀼𑀢𑁆𑀢𑀁 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀯𑀺𑀪𑀽𑀢𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀢𑁆𑀯𑀸 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀲𑀭𑀻𑀭𑁄𑀪𑀸𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀤𑀁 𑀲𑀸𑀯𑁂𑀦𑁆𑀢𑁄 𑀥𑀫𑁆𑀫𑀓𑀣𑀁 𑀓𑀣𑁂𑀲𑀻𑀢𑀺 𑀳𑀺𑀬𑁆𑀬𑁄 𑀲𑀢𑁆𑀣𑀸𑀭𑀸 𑀓𑀣𑀺𑀢𑀁, 𑀲𑀸𑀯𑀓𑀲𑁆𑀲 𑀢𑀸𑀯 𑀯𑀺𑀲𑀬𑁄 𑀏𑀯𑀭𑀽𑀧𑁄, 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀺𑀢𑁆𑀢𑀓𑀁 𑀞𑀸𑀦𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺. 𑀲𑁄 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀯𑀺𑀫𑀢𑀺𑀬𑀸 𑀯𑀺𑀦𑁄𑀤𑀦𑀢𑁆𑀣𑀁 𑀢𑀗𑁆𑀔𑀡𑁂𑀬𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀫𑁆𑀫𑀼𑀔𑀸𑀢𑀺 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀫𑀬𑀸 𑀏𑀢𑀁 𑀲𑀼𑀢𑀁, 𑀦 𑀅𑀦𑀼𑀲𑁆𑀲𑀯𑁂𑀦, 𑀦 𑀤𑀽𑀢𑀧𑀭𑀫𑁆𑀧𑀭𑀸𑀬𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳. 𑀓𑀻𑀯𑀢𑀓𑀁 𑀧𑀳𑁄𑀢𑀺 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀓𑀺𑀢𑁆𑀢𑀓𑀁 𑀞𑀸𑀦𑀁 𑀲𑀭𑀻𑀭𑁄𑀪𑀸𑀲𑁂𑀦 𑀯𑀺𑀳𑀢𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀸𑀯𑀓𑁄 𑀲𑁄, 𑀆𑀦𑀦𑁆𑀤, 𑀅𑀧𑁆𑀧𑀫𑁂𑀬𑁆𑀬𑀸 𑀢𑀣𑀸𑀕𑀢𑀸𑀢𑀺 𑀇𑀤𑀁 𑀪𑀕𑀯𑀸 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 𑁋 𑀆𑀦𑀦𑁆𑀤, 𑀢𑁆𑀯𑀁 𑀓𑀺𑀁 𑀯𑀤𑁂𑀲𑀺, 𑀲𑁄 𑀧𑀤𑁂𑀲𑀜𑀸𑀡𑁂 𑀞𑀺𑀢𑁄 𑀲𑀸𑀯𑀓𑁄. 𑀢𑀣𑀸𑀕𑀢𑀸 𑀧𑀦 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀢𑀸 𑀅𑀧𑁆𑀧𑀫𑁂𑀬𑁆𑀬𑀸. 𑀲𑁄 𑀢𑁆𑀯𑀁 𑀦𑀔𑀲𑀺𑀔𑀸𑀬 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸 𑀫𑀳𑀸𑀧𑀣𑀯𑀺𑀧𑀁𑀲𑀼𑀦𑀸 𑀲𑀤𑁆𑀥𑀺𑀁 𑀉𑀧𑀫𑁂𑀦𑁆𑀢𑁄 𑀯𑀺𑀬 𑀓𑀺𑀁 𑀦𑀸𑀫𑁂𑀢𑀁 𑀯𑀤𑁂𑀲𑀺. 𑀅𑀜𑁆𑀜𑁄 𑀳𑀺 𑀲𑀸𑀯𑀓𑀸𑀦𑀁 𑀯𑀺𑀲𑀬𑁄, 𑀅𑀜𑁆𑀜𑁄 𑀩𑀼𑀤𑁆𑀥𑀸𑀦𑀁. 𑀅𑀜𑁆𑀜𑁄 𑀲𑀸𑀯𑀓𑀸𑀦𑀁 𑀕𑁄𑀘𑀭𑁄, 𑀅𑀜𑁆𑀜𑁄 𑀩𑀼𑀤𑁆𑀥𑀸𑀦𑀁. 𑀅𑀜𑁆𑀜𑀁 𑀲𑀸𑀯𑀓𑀸𑀦𑀁 𑀩𑀮𑀁, 𑀅𑀜𑁆𑀜𑀁 𑀩𑀼𑀤𑁆𑀥𑀸𑀦𑀦𑁆𑀢𑀺. 𑀇𑀢𑀺 𑀪𑀕𑀯𑀸 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀧𑁆𑀧𑀫𑁂𑀬𑁆𑀬𑀪𑀸𑀯𑀁 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀣𑁂𑀭𑁄 𑀤𑀼𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀺. 𑀲𑀢𑁆𑀣𑀸, ‘‘𑀆𑀦𑀦𑁆𑀤, 𑀢𑁆𑀯𑀁 𑀢𑀸𑀴𑀘𑁆𑀙𑀺𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀦𑀦𑁆𑀢𑀸𑀓𑀸𑀲𑁂𑀦 𑀉𑀧𑀫𑁂𑀦𑁆𑀢𑁄 𑀯𑀺𑀬, 𑀘𑀸𑀢𑀓𑀲𑀓𑀼𑀡𑀁 𑀕𑀳𑁂𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁂𑀦 𑀲𑀼𑀧𑀡𑁆𑀡𑀭𑀸𑀚𑁂𑀦 𑀉𑀧𑀫𑁂𑀦𑁆𑀢𑁄 𑀯𑀺𑀬, 𑀳𑀢𑁆𑀣𑀺𑀲𑁄𑀡𑁆𑀟𑀸𑀬 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀕𑀗𑁆𑀕𑀸𑀬 𑀉𑀧𑀫𑁂𑀦𑁆𑀢𑁄 𑀯𑀺𑀬, 𑀘𑀢𑀼𑀭𑀢𑀦𑀺𑀓𑁂 𑀆𑀯𑀸𑀝𑁂 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀳𑀺 𑀲𑀭𑁂𑀳𑀺 𑀉𑀧𑀫𑁂𑀦𑁆𑀢𑁄 𑀯𑀺𑀬, 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀮𑀸𑀪𑀺𑀁 𑀫𑀦𑀼𑀲𑁆𑀲𑀁 𑀕𑀳𑁂𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑀸 𑀉𑀧𑀫𑁂𑀦𑁆𑀢𑁄 𑀯𑀺𑀬, 𑀧𑀁𑀲𑀼𑀧𑀺𑀲𑀸𑀘𑀓𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑁂𑀦 𑀤𑁂𑀯𑀭𑀜𑁆𑀜𑀸 𑀉𑀧𑀫𑁂𑀦𑁆𑀢𑁄 𑀯𑀺𑀬, 𑀔𑀚𑁆𑀚𑁄𑀧𑀦𑀓𑀧𑁆𑀧𑀪𑀁 𑀕𑀳𑁂𑀢𑁆𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀬 𑀉𑀧𑀫𑁂𑀦𑁆𑀢𑁄 𑀯𑀺𑀬 𑀓𑀺𑀁 𑀦𑀸𑀫𑁂𑀢𑀁 𑀯𑀤𑁂𑀲𑀻𑀢𑀺 𑀤𑀻𑀧𑁂𑀦𑁆𑀢𑁄 𑀤𑀼𑀢𑀺𑀬𑀫𑁆𑀧𑀺 𑀅𑀧𑁆𑀧𑀫𑁂𑀬𑁆𑀬𑀪𑀸𑀯𑀫𑁂𑀯 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀫𑀬𑀸 𑀧𑀼𑀘𑁆𑀙𑀺𑀢𑁄 𑀦 𑀢𑀸𑀯 𑀓𑀣𑁂𑀲𑀺, 𑀳𑀦𑁆𑀤 𑀦𑀁 𑀬𑀸𑀯𑀢𑀢𑀺𑀬𑀁 𑀬𑀸𑀘𑀺𑀢𑁆𑀯𑀸 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀢𑀢𑀺𑀬𑀫𑁆𑀧𑀺 𑀔𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣𑀲𑁆𑀲 𑀪𑀕𑀯𑀸 𑀩𑁆𑀬𑀸𑀓𑀭𑁄𑀦𑁆𑀢𑁄 𑀲𑀼𑀢𑀸 𑀢𑁂 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀫𑁂 ‘𑀲𑀼𑀢𑀸 𑀢𑁂, 𑀆𑀦𑀦𑁆𑀤, 𑀲𑀳𑀲𑁆𑀲𑀻 𑀘𑀽𑀴𑀦𑀺𑀓𑀸 𑀮𑁄𑀓𑀥𑀸𑀢𑀽’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀚𑀸𑀢𑁄, 𑀇𑀤𑀸𑀦𑀺 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀻’’𑀢𑀺 𑀲𑁄 𑀲𑀢𑁆𑀣𑀸𑀭𑀁 𑀬𑀸𑀘𑀦𑁆𑀢𑁄 𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄𑀢𑀺𑀆𑀤𑀺𑀫𑀸𑀳.

𑀪𑀕𑀯𑀸𑀧𑀺𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀁 𑀓𑀣𑁂𑀢𑀼𑀁 𑀢𑁂𑀦 𑀳𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀁 𑀞𑀸𑀦𑀁. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀢𑀺 𑀘𑀦𑁆𑀤𑀺𑀫𑀸 𑀘 𑀲𑀽𑀭𑀺𑀬𑁄 𑀘. 𑀧𑀭𑀺𑀳𑀭𑀦𑁆𑀢𑀻𑀢𑀺 𑀯𑀺𑀘𑀭𑀦𑁆𑀢𑀺. 𑀤𑀺𑀲𑀸 𑀪𑀦𑁆𑀢𑀻𑀢𑀺 𑀲𑀩𑁆𑀩𑀤𑀺𑀲𑀸 𑀑𑀪𑀸𑀲𑀦𑁆𑀢𑀺. 𑀯𑀺𑀭𑁄𑀘𑀦𑀸𑀢𑀺 𑀯𑀺𑀭𑁄𑀘𑀫𑀸𑀦𑀸. 𑀏𑀢𑁆𑀢𑀸𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀢𑀁 𑀲𑀳𑀲𑁆𑀲𑀕𑀼𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄𑀢𑀺 𑀆𑀳. 𑀢𑀲𑁆𑀫𑀺𑀁 𑀲𑀳𑀲𑁆𑀲𑀥𑀸 𑀮𑁄𑀓𑁂𑀢𑀺 𑀢𑀲𑁆𑀫𑀺𑀁 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂. 𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀦𑁆𑀢𑀺 𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀮𑁄𑀓𑀸𑀦𑀁. 𑀬𑀲𑁆𑀫𑀸 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄, 𑀢𑀲𑁆𑀫𑀸 𑀘𑀢𑁆𑀢𑀸𑀭𑀺 𑀫𑀳𑀸𑀭𑀸𑀚𑀲𑀳𑀲𑁆𑀲𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀽𑀴𑀦𑀺𑀓𑀸𑀢𑀺 𑀔𑀼𑀤𑁆𑀤𑀺𑀓𑀸. 𑀅𑀬𑀁 𑀲𑀸𑀯𑀓𑀸𑀦𑀁 𑀯𑀺𑀲𑀬𑁄. 𑀓𑀲𑁆𑀫𑀸 𑀧𑀦𑁂𑀲𑀸 𑀆𑀦𑀻𑀢𑀸𑀢𑀺? 𑀫𑀚𑁆𑀛𑀺𑀫𑀺𑀓𑀸𑀬 𑀮𑁄𑀓𑀥𑀸𑀢𑀼𑀬𑀸 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁.

𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀸. 𑀢𑀸𑀯 𑀲𑀳𑀲𑁆𑀲𑀥𑀸𑀢𑀺 𑀢𑀸𑀯 𑀲𑀳𑀲𑁆𑀲𑀪𑀸𑀕𑁂𑀦. 𑀤𑁆𑀯𑀺𑀲𑀳𑀲𑁆𑀲𑀻 𑀫𑀚𑁆𑀛𑀺𑀫𑀺𑀓𑀸 𑀮𑁄𑀓𑀥𑀸𑀢𑀽𑀢𑀺 𑀅𑀬𑀁 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀲𑀳𑀲𑁆𑀲𑀪𑀸𑀕𑁂𑀦 𑀕𑀡𑁂𑀢𑁆𑀯𑀸 𑀤𑀲𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀫𑀸𑀡𑀸 𑀤𑁆𑀯𑀺𑀲𑀳𑀲𑁆𑀲𑀻 𑀫𑀚𑁆𑀛𑀺𑀫𑀺𑀓𑀸 𑀦𑀸𑀫 𑀮𑁄𑀓𑀥𑀸𑀢𑀼. 𑀅𑀬𑀁 𑀲𑀸𑀯𑀓𑀸𑀦𑀁 𑀅𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀫𑁂𑀯 𑀯𑀺𑀲𑀬𑁄. 𑀏𑀢𑁆𑀢𑀓𑁂𑀧𑀺 𑀳𑀺 𑀞𑀸𑀦𑁂 𑀢𑀣𑀸𑀕𑀢𑀸 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀲𑀭𑀻𑀭𑁄𑀪𑀸𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀢𑁆𑀢𑀓𑁂𑀦 𑀩𑀼𑀤𑁆𑀥𑀸𑀦𑀁 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀧𑀘𑁆𑀙𑀺𑀫𑀪𑀯𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀘 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀘 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀘 𑀲𑀫𑁆𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀲𑀼 𑀘 𑀏𑀢𑁆𑀢𑀓𑀁 𑀞𑀸𑀦𑀁 𑀓𑀫𑁆𑀧𑀢𑀺.

𑀢𑀺𑀲𑀳𑀲𑁆𑀲𑀻 𑀫𑀳𑀸𑀲𑀳𑀲𑁆𑀲𑀻𑀢𑀺 𑀲𑀳𑀲𑁆𑀲𑀺𑀢𑁄 𑀧𑀝𑁆𑀞𑀸𑀬 𑀢𑀢𑀺𑀬𑀸𑀢𑀺 𑀢𑀺𑀲𑀳𑀲𑁆𑀲𑀻, 𑀲𑀳𑀲𑁆𑀲𑀁 𑀲𑀳𑀲𑁆𑀲𑀥𑀸 𑀓𑀢𑁆𑀯𑀸 𑀕𑀡𑀺𑀢𑀁 𑀫𑀚𑁆𑀛𑀺𑀫𑀺𑀓𑀁 𑀲𑀳𑀲𑁆𑀲𑀥𑀸 𑀓𑀢𑁆𑀯𑀸 𑀕𑀡𑀺𑀢𑀢𑁆𑀢𑀸 𑀫𑀳𑀦𑁆𑀢𑁂𑀳𑀺 𑀲𑀳𑀲𑁆𑀲𑁂𑀳𑀺 𑀕𑀡𑀺𑀢𑀸𑀢𑀺 𑀫𑀳𑀸𑀲𑀳𑀲𑁆𑀲𑀻. 𑀏𑀢𑁆𑀢𑀸𑀯𑀢𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀫𑀸𑀡𑁄 𑀮𑁄𑀓𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀪𑀕𑀯𑀸 𑀆𑀓𑀗𑁆𑀔𑀫𑀸𑀦𑁄 𑀏𑀢𑁆𑀢𑀓𑁂 𑀞𑀸𑀦𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑁆𑀯𑀸 𑀲𑀭𑀻𑀭𑁄𑀪𑀸𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬𑀸𑀢𑀺. 𑀕𑀡𑀓𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 𑀏𑀯𑀫𑀸𑀳 𑁋 ‘‘𑀦 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀏𑀯𑀁 𑀧𑀭𑀺𑀫𑀸𑀡𑀁. 𑀇𑀤𑀜𑁆𑀳𑀺 𑀆𑀘𑀭𑀺𑀬𑀸𑀦𑀁 𑀲𑀚𑁆𑀛𑀸𑀬𑀫𑀼𑀴𑁆𑀳𑀓𑀁 𑀯𑀸𑀘𑀸𑀬 𑀧𑀭𑀺𑀳𑀻𑀦𑀝𑁆𑀞𑀸𑀦𑀁, 𑀤𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀫𑀸𑀡𑀁 𑀧𑀦 𑀞𑀸𑀦𑀁 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀦𑀸𑀫𑀸’’𑀢𑀺. 𑀏𑀢𑁆𑀢𑀸𑀯𑀢𑀸 𑀳𑀺 𑀪𑀕𑀯𑀢𑀸 𑀆𑀡𑀸𑀓𑁆𑀔𑁂𑀢𑁆𑀢𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀇𑀲𑀺𑀕𑀺𑀮𑀺𑀧𑀭𑀺𑀢𑁆𑀢𑀥𑀚𑀕𑁆𑀕𑀧𑀭𑀺𑀢𑁆𑀢𑀩𑁄𑀚𑁆𑀛𑀗𑁆𑀕𑀧𑀭𑀺𑀢𑁆𑀢𑀔𑀦𑁆𑀥𑀧𑀭𑀺𑀢𑁆𑀢- 𑀫𑁄𑀭𑀧𑀭𑀺𑀢𑁆𑀢𑀫𑁂𑀢𑁆𑀢𑀧𑀭𑀺𑀢𑁆𑀢𑀭𑀢𑀦𑀧𑀭𑀺𑀢𑁆𑀢𑀸𑀦𑀁 𑀆𑀡𑀸 𑀨𑀭𑀢𑀺. 𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸𑀢𑀺 𑀬𑀢𑁆𑀢𑀓𑀁 𑀞𑀸𑀦𑀁 𑀇𑀘𑁆𑀙𑁂𑀬𑁆𑀬, 𑀇𑀫𑀺𑀦𑀸 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀯𑀺𑀲𑀬𑀓𑁆𑀔𑁂𑀢𑁆𑀢𑀲𑁆𑀲 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀦𑀢𑁆𑀣𑀺𑀓𑀪𑀸𑀯𑁂 𑀘𑀲𑁆𑀲 𑀇𑀫𑀁 𑀑𑀧𑀫𑁆𑀫𑀁 𑀆𑀳𑀭𑀦𑁆𑀢𑀺 𑁋 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀫𑁆𑀳𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀸𑀲𑀧𑁂𑀳𑀺 𑀧𑀽𑀭𑁂𑀢𑁆𑀯𑀸 𑀲𑀘𑁂 𑀓𑁄𑀘𑀺 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀘𑀓𑁆𑀓𑀯𑀸𑀴𑁂 𑀏𑀓𑀁 𑀲𑀸𑀲𑀧𑀁 𑀧𑀓𑁆𑀔𑀺𑀧𑀦𑁆𑀢𑁄 𑀆𑀕𑀘𑁆𑀙𑁂𑀬𑁆𑀬, 𑀲𑀩𑁆𑀩𑁂𑀧𑀺 𑀢𑁂 𑀲𑀸𑀲𑀧𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀘𑀓𑁆𑀓𑀯𑀸𑀴𑀸𑀦𑀺. 𑀤𑀓𑁆𑀔𑀺𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺.

𑀏𑀯𑀁 𑀯𑀼𑀢𑁆𑀢𑁂 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀏𑀯𑀫𑀸𑀳 𑁋 ‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’𑀢𑀺. 𑀯𑀺𑀲𑀫𑁄 𑀔𑁄 𑀧𑀦𑀸𑀬𑀁 𑀮𑁄𑀓𑁄, 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀽𑀭𑀺𑀬𑁄 𑀉𑀕𑁆𑀕𑀢𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀫𑀚𑁆𑀛𑁂 𑀞𑀺𑀢𑁄, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑀗𑁆𑀕𑀢𑁄. 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀞𑀫𑀬𑀸𑀫𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀫𑀚𑁆𑀛𑀺𑀫𑀬𑀸𑀫𑁄, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀘𑁆𑀙𑀺𑀫𑀬𑀸𑀫𑁄. 𑀲𑀢𑁆𑀢𑀸𑀧𑀺 𑀓𑀫𑁆𑀫𑀧𑁆𑀧𑀲𑀼𑀢𑀸, 𑀔𑀺𑀟𑁆𑀟𑀸𑀧𑀲𑀼𑀢𑀸, 𑀆𑀳𑀸𑀭𑀧𑁆𑀧𑀲𑀼𑀢𑀸𑀢𑀺 𑀏𑀯𑀁 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀯𑀺𑀓𑁆𑀔𑀺𑀢𑁆𑀢𑀸 𑀘 𑀧𑀫𑀢𑁆𑀢𑀸 𑀘 𑀳𑁄𑀦𑁆𑀢𑀺. 𑀓𑀣𑀁 𑀦𑀼 𑀔𑁄 𑀢𑁂 𑀲𑀢𑁆𑀣𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺. 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀁 𑀢𑀣𑀸𑀕𑀢𑀁 𑀧𑀼𑀘𑁆𑀙𑀦𑁆𑀢𑁄 𑀬𑀣𑀸 𑀓𑀣𑀁 𑀧𑀦𑀸𑀢𑀺𑀆𑀤𑀺𑀫𑀸𑀳.

𑀅𑀣𑀲𑁆𑀲 𑀲𑀢𑁆𑀣𑀸 𑀩𑁆𑀬𑀸𑀓𑀭𑁄𑀦𑁆𑀢𑁄 𑀇𑀥𑀸𑀦𑀦𑁆𑀤, 𑀢𑀣𑀸𑀕𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀑𑀪𑀸𑀲𑁂𑀦 𑀨𑀭𑁂𑀬𑁆𑀬𑀸𑀢𑀺 𑀲𑀭𑀻𑀭𑁄𑀪𑀸𑀲𑁂𑀦 𑀨𑀭𑁂𑀬𑁆𑀬. 𑀨𑀭𑀫𑀸𑀦𑁄 𑀧𑀦𑁂𑀲 𑀓𑀺𑀁 𑀓𑀭𑁂𑀬𑁆𑀬𑀸𑀢𑀺? 𑀬𑀲𑁆𑀫𑀺𑀁 𑀞𑀸𑀦𑁂 𑀲𑀽𑀭𑀺𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣 𑀦𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀢𑁆𑀣𑀁 𑀕𑀫𑁂𑀬𑁆𑀬. 𑀬𑀢𑁆𑀣 𑀧𑀦 𑀦 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣 𑀦𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀫𑀚𑁆𑀛𑁂 𑀞𑀧𑁂𑀬𑁆𑀬. 𑀢𑀢𑁄 𑀬𑀢𑁆𑀣 𑀲𑀽𑀭𑀺𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 ‘‘𑀅𑀥𑀼𑀦𑀸𑀯 𑀲𑀽𑀭𑀺𑀬𑁄 𑀧𑀜𑁆𑀜𑀸𑀬𑀺𑀢𑁆𑀣, 𑀲𑁄 𑀇𑀤𑀸𑀦𑁂𑀯 𑀅𑀢𑁆𑀣𑀗𑁆𑀕𑀫𑀺𑀢𑁄, 𑀦𑀸𑀕𑀸𑀯𑀝𑁆𑀝𑁄 𑀦𑀼 𑀔𑁄 𑀅𑀬𑀁, 𑀪𑀽𑀢𑀸𑀯𑀝𑁆𑀝𑀬𑀓𑁆𑀔𑀸𑀯𑀝𑁆𑀝𑀤𑁂𑀯𑀢𑀸𑀯𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑁄’’𑀢𑀺 𑀯𑀺𑀢𑁆𑀢𑀓𑁆𑀓𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁. 𑀬𑀢𑁆𑀣 𑀧𑀦 𑀦 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 ‘‘𑀅𑀥𑀼𑀦𑀸𑀯 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀫𑀺𑀢𑁄, 𑀲𑁆𑀯𑀸𑀬𑀁 𑀇𑀤𑀸𑀦𑁂𑀯 𑀉𑀝𑁆𑀞𑀺𑀢𑁄, 𑀓𑀺𑀁 𑀦𑀼 𑀔𑁄 𑀅𑀬𑀁 𑀦𑀸𑀕𑀸𑀯𑀝𑁆𑀝𑀪𑀽𑀢𑀸𑀯𑀝𑁆𑀝𑀬𑀓𑁆𑀔𑀸𑀯𑀝𑁆𑀝𑀤𑁂𑀯𑀢𑀸𑀯𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑁄’’𑀢𑀺 𑀯𑀺𑀢𑀓𑁆𑀓𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁. 𑀢𑀢𑁄 𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀆𑀮𑁄𑀓𑀜𑁆𑀘 𑀅𑀦𑁆𑀥𑀓𑀸𑀭𑀜𑁆𑀘 𑀆𑀯𑀚𑁆𑀚𑀺𑀢𑁆𑀯𑀸 ‘‘𑀓𑀺𑀁 𑀧𑀘𑁆𑀘𑀬𑀸 𑀦𑀼 𑀔𑁄 𑀇𑀤’’𑀦𑁆𑀢𑀺 𑀧𑀭𑀺𑀬𑁂𑀲𑀫𑀸𑀦𑁂𑀲𑀼 𑀲𑀢𑁆𑀣𑀸 𑀦𑀻𑀮𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀩𑀳𑀮𑀦𑁆𑀥𑀓𑀸𑀭𑀁 𑀧𑀢𑁆𑀣𑀭𑁂𑀬𑁆𑀬. 𑀓𑀲𑁆𑀫𑀸? 𑀢𑁂𑀲𑀁 𑀓𑀫𑁆𑀫𑀸𑀤𑀺𑀧𑁆𑀧𑀲𑀼𑀢𑀸𑀦𑀁 𑀲𑀢𑁆𑀢𑀸𑀦𑀁 𑀲𑀦𑁆𑀢𑀸𑀲𑀚𑀦𑀦𑀢𑁆𑀣𑀁. 𑀅𑀣 𑀦𑁂𑀲𑀁 𑀲𑀦𑁆𑀢𑀸𑀲𑀁 𑀆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀑𑀤𑀸𑀢𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀡𑁆𑀟𑀭𑀁 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀘𑀦𑁆𑀤𑀲𑀳𑀲𑁆𑀲𑀲𑀽𑀭𑀺𑀬𑀲𑀳𑀲𑁆𑀲𑀉𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀩𑁆𑀩𑀁 𑀏𑀓𑀸𑀮𑁄𑀓𑀁 𑀓𑀭𑁂𑀬𑁆𑀬. 𑀢𑀜𑁆𑀘 𑀔𑁄 𑀢𑀺𑀮𑀩𑀻𑀚𑀫𑀢𑁆𑀢𑁂𑀦 𑀓𑀸𑀬𑀧𑁆𑀧𑀤𑁂𑀲𑁂𑀦 𑀑𑀪𑀸𑀲𑀁 𑀫𑀼𑀜𑁆𑀘𑀦𑁆𑀢𑁄. 𑀬𑁄 𑀳𑀺 𑀘𑀓𑁆𑀓𑀯𑀸𑀴𑀧𑀣𑀯𑀺𑀁 𑀤𑀻𑀧𑀓𑀧𑀮𑁆𑀮𑀓𑀁 𑀓𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀢𑁂𑀮𑀁 𑀓𑀢𑁆𑀯𑀸 𑀲𑀺𑀦𑁂𑀭𑀼𑀁 𑀯𑀝𑁆𑀝𑀺𑀁 𑀓𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀞𑀧𑁂𑀢𑁆𑀯𑀸 𑀚𑀸𑀮𑁂𑀬𑁆𑀬, 𑀲𑁄 𑀏𑀓𑀘𑀓𑁆𑀓𑀯𑀸𑀴𑁂𑀬𑁂𑀯 𑀆𑀮𑁄𑀓𑀁 𑀓𑀭𑁂𑀬𑁆𑀬. 𑀢𑀢𑁄 𑀧𑀭𑀁 𑀯𑀺𑀤𑀢𑁆𑀣𑀺𑀫𑁆𑀧𑀺 𑀑𑀪𑀸𑀲𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀢𑀣𑀸𑀕𑀢𑁄 𑀧𑀦 𑀢𑀺𑀮𑀨𑀮𑀧𑁆𑀧𑀫𑀸𑀡𑁂𑀦 𑀲𑀭𑀻𑀭𑀧𑁆𑀧𑀤𑁂𑀲𑁂𑀦 𑀑𑀪𑀸𑀲𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀏𑀓𑁄𑀪𑀸𑀲𑀁 𑀓𑀭𑁂𑀬𑁆𑀬 𑀢𑀢𑁄 𑀯𑀸 𑀧𑀦 𑀪𑀺𑀬𑁆𑀬𑁄. 𑀏𑀯𑀁 𑀫𑀳𑀦𑁆𑀢𑀸 𑀳𑀺 𑀩𑀼𑀤𑁆𑀥𑀕𑀼𑀡𑀸𑀢𑀺.

𑀢𑀁 𑀆𑀮𑁄𑀓𑀁 𑀲𑀜𑁆𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀢𑀁 𑀆𑀮𑁄𑀓𑀁 𑀤𑀺𑀲𑁆𑀯𑀸 ‘‘𑀬𑁂𑀦 𑀲𑀽𑀭𑀺𑀬𑁄 𑀅𑀢𑁆𑀣𑀜𑁆𑀘𑁂𑀯 𑀕𑀫𑀺𑀢𑁄 𑀉𑀝𑁆𑀞𑀸𑀧𑀺𑀢𑁄 𑀘, 𑀩𑀳𑀮𑀦𑁆𑀥𑀓𑀸𑀭𑀜𑁆𑀘 𑀯𑀺𑀲𑁆𑀲𑀝𑁆𑀞𑀁, 𑀏𑀲 𑀲𑁄 𑀧𑀼𑀭𑀺𑀲𑁄 𑀇𑀤𑀸𑀦𑀺 𑀆𑀮𑁄𑀓𑀁 𑀓𑀢𑁆𑀯𑀸 𑀞𑀺𑀢𑁄, 𑀅𑀳𑁄 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑀸 𑀦𑀺𑀲𑀻𑀤𑁂𑀬𑁆𑀬𑀼𑀁. 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀬𑁆𑀬𑀸𑀢𑀺 𑀥𑀫𑁆𑀫𑀓𑀣𑀸𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀬𑁆𑀬. 𑀬𑁄 𑀳𑀺 𑀏𑀓𑀁 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀪𑁂𑀭𑀺𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀺𑀁 𑀪𑁂𑀭𑀺𑀘𑀫𑁆𑀫𑀁 𑀓𑀢𑁆𑀯𑀸 𑀲𑀺𑀦𑁂𑀭𑀼𑀁 𑀤𑀡𑁆𑀟𑀁 𑀓𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀆𑀓𑁄𑀝𑁂𑀬𑁆𑀬, 𑀲𑁄 𑀏𑀓𑀘𑀓𑁆𑀓𑀯𑀸𑀴𑁂𑀬𑁂𑀯 𑀢𑀁 𑀲𑀤𑁆𑀤𑀁 𑀲𑀸𑀯𑁂𑀬𑁆𑀬, 𑀧𑀭𑀢𑁄 𑀯𑀺𑀤𑀢𑁆𑀣𑀺𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀢𑀣𑀸𑀕𑀢𑁄 𑀧𑀦 𑀧𑀮𑁆𑀮𑀗𑁆𑀓𑁂 𑀯𑀸 𑀧𑀻𑀞𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀢𑀢𑁄 𑀯𑀸 𑀧𑀦 𑀪𑀺𑀬𑁆𑀬𑁄, 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸 𑀢𑀣𑀸𑀕𑀢𑀸𑀢𑀺. 𑀇𑀢𑀺 𑀪𑀕𑀯𑀸 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀯𑀺𑀲𑀬𑀓𑁆𑀔𑁂𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺.

𑀇𑀫𑀜𑁆𑀘 𑀧𑀦 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀩𑀮𑀯𑀧𑀻𑀢𑀺 𑀉𑀧𑁆𑀧𑀦𑁆𑀦𑀸, 𑀲𑁄 𑀧𑀻𑀢𑀺𑀯𑀲𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀮𑀸𑀪𑀸 𑀯𑀢 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀲 𑀫𑁂 𑀲𑀢𑁆𑀣𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑁄𑀢𑀺 𑀬𑀲𑁆𑀲 𑀫𑀬𑁆𑀳𑀁 𑀲𑀢𑁆𑀣𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑁄, 𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁𑀫𑀳𑀺𑀤𑁆𑀥𑀺𑀓𑀲𑁆𑀲 𑀲𑀢𑁆𑀣𑀼 𑀧𑀝𑀺𑀮𑀸𑀪𑁄 𑀮𑀸𑀪𑀸 𑀘𑁂𑀯 𑀲𑀼𑀮𑀤𑁆𑀥𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑁆𑀯𑀸𑀳𑀁 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀼𑀁, 𑀧𑀸𑀤𑀧𑀭𑀺𑀓𑀫𑁆𑀫𑀁 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁, 𑀫𑀼𑀔𑀥𑁄𑀯𑀦𑀉𑀤𑀓𑀦𑁆𑀳𑀸𑀦𑁄𑀤𑀓𑀸𑀦𑀺 𑀤𑀸𑀢𑀼𑀁, 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀼𑀁, 𑀉𑀧𑁆𑀧𑀦𑁆𑀦𑀸𑀬 𑀓𑀗𑁆𑀔𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁, 𑀫𑀥𑀼𑀭𑀥𑀫𑁆𑀫𑀓𑀣𑀜𑁆𑀘 𑀲𑁄𑀢𑀼𑀁 𑀮𑀪𑀸𑀫𑀺, 𑀏𑀢𑁂 𑀲𑀩𑁆𑀩𑁂𑀧𑀺 𑀫𑀬𑁆𑀳𑀁 𑀮𑀸𑀪𑀸 𑀘𑁂𑀯 𑀲𑀼𑀮𑀤𑁆𑀥𑀜𑁆𑀘𑀸𑀢𑀺𑀧𑀺 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀏𑀢𑁆𑀣 𑀘 𑀪𑀕𑀯𑀢𑁄 𑀅𑀦𑁆𑀥𑀓𑀸𑀭𑀸𑀮𑁄𑀓𑀲𑀤𑁆𑀤𑀲𑀯𑀦𑀲𑀗𑁆𑀔𑀸𑀢𑀸𑀦𑀁 𑀇𑀤𑁆𑀥𑀻𑀦𑀁 𑀫𑀳𑀦𑁆𑀢𑀢𑀸𑀬 𑀫𑀳𑀺𑀤𑁆𑀥𑀺𑀓𑀢𑀸, 𑀢𑀸𑀲𑀁𑀬𑁂𑀯 𑀅𑀦𑀼𑀨𑀭𑀡𑁂𑀦 𑀫𑀳𑀸𑀦𑀼𑀪𑀸𑀯𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀤𑀸𑀬𑀻𑀢𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀉𑀧𑀝𑁆𑀞𑀸𑀓𑀢𑁆𑀣𑁂𑀭𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀘𑀭𑀢𑀺. 𑀢𑀲𑁆𑀫𑀸 𑀇𑀤𑀸𑀦𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀲𑀻𑀳𑀦𑀸𑀤𑀧𑀭𑀺𑀬𑁄𑀲𑀸𑀦𑁂 𑀚𑀮𑀫𑀸𑀦𑀁 𑀤𑀻𑀧𑀲𑀺𑀔𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀯𑀺𑀬 𑀘𑀭𑀦𑁆𑀢𑀲𑁆𑀲 𑀕𑁄𑀡𑀲𑁆𑀲 𑀢𑀼𑀡𑁆𑀟𑁂 𑀧𑀳𑀸𑀭𑀁 𑀤𑁂𑀦𑁆𑀢𑁄 𑀯𑀺𑀬 𑀪𑀢𑁆𑀢𑀪𑀭𑀺𑀢𑀁 𑀧𑀸𑀢𑀺𑀁 𑀅𑀯𑀓𑀼𑀚𑁆𑀚𑀦𑁆𑀢𑁄 𑀯𑀺𑀬 𑀣𑁂𑀭𑀲𑁆𑀲 𑀧𑀲𑀸𑀤𑀪𑀗𑁆𑀕𑀁 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳.

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸𑀢𑀺 𑀏𑀯𑀁 𑀉𑀤𑀸𑀬𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑁂 𑀪𑀕𑀯𑀸 𑀬𑀣𑀸 𑀦𑀸𑀫 𑀧𑀧𑀸𑀢𑀢𑀝𑁂 𑀞𑀢𑁆𑀯𑀸 𑀧𑀯𑁂𑀥𑀫𑀸𑀦𑀁 𑀧𑀼𑀭𑀺𑀲𑀁 𑀏𑀓𑀫𑀦𑁆𑀢𑁂 𑀞𑀺𑀢𑁄 𑀳𑀺𑀢𑁂𑀲𑀻 𑀧𑀼𑀭𑀺𑀲𑁄 ‘‘𑀇𑀢𑁄 𑀏𑀳𑀺 𑀇𑀢𑁄 𑀏𑀳𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀤𑁂𑀬𑁆𑀬, 𑀏𑀯𑀫𑁂𑀯𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀢𑀲𑁆𑀫𑀸 𑀯𑀘𑀦𑀸 𑀦𑀺𑀯𑀸𑀭𑁂𑀦𑁆𑀢𑁄 𑀫𑀸 𑀳𑁂𑀯𑀁 𑀉𑀤𑀸𑀬𑀺, 𑀫𑀸 𑀳𑁂𑀯𑀁 𑀉𑀤𑀸𑀬𑀻𑀢𑀺 𑀆𑀳. 𑀢𑀢𑁆𑀣 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀸 𑀏𑀯𑀁 𑀅𑀯𑀘𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀭𑀚𑁆𑀚𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁. 𑀦𑀦𑀼 𑀘 𑀲𑀢𑁆𑀣𑀸 𑀏𑀓𑀲𑁆𑀲 𑀲𑀸𑀯𑀓𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀉𑀧𑁆𑀧𑀦𑁆𑀦𑀧𑀲𑀸𑀤𑀲𑁆𑀲 𑀫𑀳𑀸𑀦𑀺𑀲𑀁𑀲𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀓𑀸𑀲𑀺, 𑀲𑁄 𑀓𑀲𑁆𑀫𑀸 𑀇𑀫𑀲𑁆𑀲 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑁆𑀲 𑀧𑀲𑀸𑀤𑀲𑁆𑀲 𑀆𑀦𑀺𑀲𑀁𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺? 𑀅𑀭𑀺𑀬𑀲𑀸𑀯𑀓𑀲𑁆𑀲 𑀏𑀢𑁆𑀢𑀓𑀅𑀢𑁆𑀢𑀪𑀸𑀯𑀧𑀭𑀺𑀫𑀸𑀡𑀢𑁆𑀢𑀸. 𑀤𑀦𑁆𑀥𑀧𑀜𑁆𑀜𑁄𑀧𑀺 𑀳𑀺 𑀲𑁄𑀢𑀸𑀧𑀦𑁆𑀦𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀅𑀢𑁆𑀢𑀪𑀸𑀯𑀁 𑀧𑀝𑀺𑀮𑀪𑀢𑀺, 𑀢𑁂𑀦𑀲𑁆𑀲 𑀕𑀢𑀺𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀏𑀯𑀫𑀸𑀳. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸. 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀇𑀢𑀺 𑀦𑀺𑀩𑁆𑀩𑀸𑀦𑁂𑀦 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀇𑀫𑀁 𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀆𑀦𑀦𑁆𑀤𑀯𑀕𑁆𑀕𑁄 𑀢𑀢𑀺𑀬𑁄.