(𑁭) 𑁨. 𑀫𑀳𑀸𑀯𑀕𑁆𑀕𑁄

𑁧. 𑀢𑀺𑀢𑁆𑀣𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀢𑀺𑀢𑁆𑀣𑀸𑀬𑀢𑀦𑀸𑀦𑀻𑀢𑀺 𑀢𑀺𑀢𑁆𑀣𑀪𑀽𑀢𑀸𑀦𑀺 𑀆𑀬𑀢𑀦𑀸𑀦𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸 𑀆𑀬𑀢𑀦𑀸𑀦𑀺. 𑀢𑀢𑁆𑀣 𑀢𑀺𑀢𑁆𑀣𑀁 𑀚𑀸𑀦𑀺𑀢𑀩𑁆𑀩𑀁, 𑀢𑀺𑀢𑁆𑀣𑀓𑀭𑀸 𑀚𑀸𑀦𑀺𑀢𑀩𑁆𑀩𑀸, 𑀢𑀺𑀢𑁆𑀣𑀺𑀬𑀸 𑀚𑀸𑀦𑀺𑀢𑀩𑁆𑀩𑀸, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀚𑀸𑀦𑀺𑀢𑀩𑁆𑀩𑀸. 𑀢𑀺𑀢𑁆𑀣𑀁 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄. 𑀢𑀺𑀢𑁆𑀣𑀺𑀓𑀭𑀸 𑀦𑀸𑀫 𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀉𑀧𑁆𑀧𑀸𑀤𑀓𑀸. 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀬𑁂𑀲𑀁 𑀢𑀸 𑀤𑀺𑀝𑁆𑀞𑀺𑀬𑁄 𑀭𑀼𑀘𑁆𑀘𑀦𑁆𑀢𑀺 𑀔𑀫𑀦𑁆𑀢𑀺. 𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀦𑀸𑀫 𑀢𑁂𑀲𑀁 𑀧𑀘𑁆𑀘𑀬𑀤𑀸𑀬𑀓𑀸. 𑀆𑀬𑀢𑀦𑀦𑁆𑀢𑀺 ‘‘𑀓𑀫𑁆𑀩𑁄𑀚𑁄 𑀅𑀲𑁆𑀲𑀸𑀦𑀁 𑀆𑀬𑀢𑀦𑀁, 𑀕𑀼𑀦𑁆𑀦𑀁 𑀤𑀓𑁆𑀔𑀺𑀡𑀸𑀧𑀣𑁄 𑀆𑀬𑀢𑀦’’𑀦𑁆𑀢𑀺 𑀏𑀢𑁆𑀣 𑀲𑀜𑁆𑀚𑀸𑀢𑀺𑀝𑁆𑀞𑀸𑀦𑀁 𑀆𑀬𑀢𑀦𑀁 𑀦𑀸𑀫.

‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸;

𑀙𑀸𑀬𑀁 𑀙𑀸𑀬𑀢𑁆𑀣𑀺𑀦𑁄 𑀬𑀦𑁆𑀢𑀺, 𑀨𑀮𑀢𑁆𑀣𑀁 𑀨𑀮𑀪𑁄𑀚𑀺𑀦𑁄’’𑀢𑀺. (𑀅. 𑀦𑀺. 𑁫.𑁩𑁮) 𑁋

𑀏𑀢𑁆𑀣 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀻’’𑀢𑀺 (𑀅. 𑀦𑀺. 𑁫.𑁨𑁬) 𑀏𑀢𑁆𑀣 𑀓𑀸𑀭𑀡𑀁. 𑀢𑀁 𑀇𑀥 𑀲𑀩𑁆𑀩𑀫𑁆𑀧𑀺 𑀮𑀩𑁆𑀪𑀢𑀺. 𑀲𑀩𑁆𑀩𑁂𑀧𑀺 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀲𑀜𑁆𑀚𑀸𑀬𑀫𑀸𑀦𑀸 𑀇𑀫𑁂𑀲𑀼𑀬𑁂𑀯 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀜𑁆𑀚𑀸𑀬𑀦𑁆𑀢𑀺, 𑀲𑀫𑁄𑀲𑀭𑀡𑀫𑀸𑀦𑀸𑀧𑀺 𑀏𑀢𑁂𑀲𑀼𑀬𑁂𑀯 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀫𑁄𑀲𑀭𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀤𑀺𑀝𑁆𑀞𑀺𑀕𑀢𑀺𑀓𑀪𑀸𑀯𑁂 𑀘 𑀦𑁂𑀲𑀁 𑀏𑀢𑀸𑀦𑁂𑀯 𑀢𑀻𑀡𑀺 𑀓𑀸𑀭𑀡𑀸𑀦𑀻𑀢𑀺 𑀢𑀺𑀢𑁆𑀣𑀪𑀽𑀢𑀸𑀦𑀺 𑀲𑀜𑁆𑀚𑀸𑀢𑀺𑀆𑀤𑀺𑀦𑀸 𑀅𑀢𑁆𑀣𑁂𑀦 𑀆𑀬𑀢𑀦𑀸𑀦𑀻𑀢𑀺𑀧𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺. 𑀢𑁂𑀦𑁂𑀯𑀢𑁆𑀣𑁂𑀦 𑀢𑀺𑀢𑁆𑀣𑀺𑀬𑀸𑀦𑀁 𑀆𑀬𑀢𑀦𑀸𑀦𑀻𑀢𑀺𑀧𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺. 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸𑀦𑀻𑀢𑀺 𑀓𑀸 𑀦𑀸𑀫𑁂𑀢𑀸 𑀤𑀺𑀝𑁆𑀞𑀺𑀬𑁄𑀢𑀺 𑀏𑀯𑀁 𑀧𑀼𑀘𑁆𑀙𑀺𑀬𑀫𑀸𑀦𑀸𑀦𑀺. 𑀲𑀫𑀦𑀼𑀕𑀸𑀳𑀺𑀬𑀫𑀸𑀦𑀸𑀦𑀻𑀢𑀺 𑀓𑀺𑀁𑀓𑀸𑀭𑀡𑀸 𑀏𑀢𑀸 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀦𑁆𑀦𑀸𑀢𑀺 𑀏𑀯𑀁 𑀲𑀫𑁆𑀫𑀸 𑀅𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑀸𑀦𑀺. 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀸𑀦𑀻𑀢𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀣 𑀏𑀢𑀸𑀦𑀺 𑀧𑀸𑀧𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀻𑀢𑀺 𑀏𑀯𑀁 𑀲𑀫𑁆𑀫𑀸 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀺. 𑀅𑀧𑀺𑀘 𑀢𑀻𑀡𑀺𑀧𑀺 𑀏𑀢𑀸𑀦𑀺 𑀅𑀦𑀼𑀬𑁄𑀕𑀧𑀼𑀘𑁆𑀙𑀸𑀯𑁂𑀯𑀘𑀦𑀸𑀦𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀲𑀫𑀦𑀼𑀬𑀼𑀜𑁆𑀚𑀢𑀻𑀢𑀺 𑀯𑀸 𑀲𑀫𑀦𑀼𑀕𑁆𑀕𑀸𑀳𑀢𑀻𑀢𑀺 𑀯𑀸 𑀲𑀫𑀦𑀼𑀪𑀸𑀲𑀢𑀻𑀢𑀺 𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂 𑀢𑀜𑁆𑀜𑁂𑀯𑀸’’𑀢𑀺.

𑀧𑀭𑀫𑁆𑀧𑀺 𑀕𑀦𑁆𑀢𑁆𑀯𑀸𑀢𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀮𑀤𑁆𑀥𑀺𑀧𑀭𑀫𑁆𑀧𑀭𑀸 𑀅𑀢𑁆𑀢𑀪𑀸𑀯𑀧𑀭𑀫𑁆𑀧𑀭𑀸𑀢𑀺 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀧𑀭𑀫𑁆𑀧𑀭𑀁 𑀕𑀦𑁆𑀢𑁆𑀯𑀸𑀧𑀺. 𑀅𑀓𑀺𑀭𑀺𑀬𑀸𑀬 𑀲𑀡𑁆𑀞𑀳𑀦𑁆𑀢𑀻𑀢𑀺 𑀅𑀓𑀺𑀭𑀺𑀬𑀫𑀢𑁆𑀢𑁂 𑀲𑀁𑀢𑀺𑀝𑁆𑀞𑀦𑁆𑀢𑀺. ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀧𑀼𑀩𑁆𑀩𑁂𑀓𑀢𑀯𑀸𑀤𑀻, 𑀅𑀫𑁆𑀳𑀸𑀓𑀁 𑀧𑀸𑀘𑀭𑀺𑀬𑁄 𑀧𑀼𑀩𑁆𑀩𑁂𑀓𑀢𑀯𑀸𑀤𑀻, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄 𑀧𑀼𑀩𑁆𑀩𑁂𑀓𑀢𑀯𑀸𑀤𑀻. 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀻, 𑀅𑀫𑁆𑀳𑀸𑀓𑀁 𑀧𑀸𑀘𑀭𑀺𑀬𑁄 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀻, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀻. 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀅𑀳𑁂𑀢𑀼𑀅𑀧𑀘𑁆𑀘𑀬𑀯𑀸𑀤𑀻, 𑀅𑀫𑁆𑀳𑀸𑀓𑀁 𑀧𑀸𑀘𑀭𑀺𑀬𑁄 𑀅𑀳𑁂𑀢𑀼𑀅𑀧𑀘𑁆𑀘𑀬𑀯𑀸𑀤𑀻, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄 𑀅𑀳𑁂𑀢𑀼𑀅𑀧𑀘𑁆𑀘𑀬𑀯𑀸𑀤𑀻’’𑀢𑀺 𑀏𑀯𑀁 𑀕𑀘𑁆𑀙𑀦𑁆𑀢𑀸𑀦𑀺 𑀳𑀺 𑀏𑀢𑀸𑀦𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫. ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀧𑀼𑀩𑁆𑀩𑁂𑀓𑀢𑀮𑀤𑁆𑀥𑀺𑀓𑁄, 𑀅𑀫𑁆𑀳𑀸𑀓𑀁 𑀧𑀸𑀘𑀭𑀺𑀬𑁄…𑀧𑁂… 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄 𑀅𑀳𑁂𑀢𑀼𑀅𑀧𑀘𑁆𑀘𑀬𑀮𑀤𑁆𑀥𑀺𑀓𑁄’’𑀢𑀺 𑀏𑀯𑀁 𑀕𑀘𑁆𑀙𑀦𑁆𑀢𑀸𑀦𑀺 𑀮𑀤𑁆𑀥𑀺𑀧𑀭𑀫𑁆𑀧𑀭𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫. ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀅𑀢𑁆𑀢𑀪𑀸𑀯𑁄 𑀧𑀼𑀩𑁆𑀩𑁂𑀓𑀢𑀳𑁂𑀢𑀼, 𑀅𑀫𑁆𑀳𑀸𑀓𑀁 𑀧𑀸𑀘𑀭𑀺𑀬𑀲𑁆𑀲…𑀧𑁂… 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀲𑁆𑀲 𑀅𑀢𑁆𑀢𑀪𑀸𑀯𑁄 𑀅𑀳𑁂𑀢𑀼 𑀅𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀕𑀘𑁆𑀙𑀦𑁆𑀢𑀸𑀦𑀺 𑀅𑀢𑁆𑀢𑀪𑀸𑀯𑀧𑀭𑀫𑁆𑀧𑀭𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫. 𑀏𑀯𑀁 𑀧𑀦 𑀲𑀼𑀯𑀺𑀤𑀽𑀭𑀫𑁆𑀧𑀺 𑀕𑀘𑁆𑀙𑀦𑁆𑀢𑀸𑀦𑀺 𑀅𑀓𑀺𑀭𑀺𑀬𑀫𑀢𑁆𑀢𑁂𑀬𑁂𑀯 𑀲𑀡𑁆𑀞𑀳𑀦𑁆𑀢𑀺, 𑀏𑀓𑁄𑀧𑀺 𑀏𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸 𑀦 𑀧𑀜𑁆𑀜𑀸𑀬𑀢𑀺.

𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺 𑀲𑀢𑁆𑀢𑁄. 𑀓𑀸𑀫𑀜𑁆𑀘 𑀧𑀼𑀭𑀺𑀲𑁄𑀢𑀺𑀧𑀺 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑁄𑀢𑀺𑀧𑀺 𑀯𑀼𑀢𑁆𑀢𑁂 𑀲𑀢𑁆𑀢𑁄𑀬𑁂𑀯 𑀯𑀼𑀢𑁆𑀢𑁄 𑀳𑁄𑀢𑀺, 𑀅𑀬𑀁 𑀧𑀦 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫 𑀬𑁄 𑀬𑀣𑀸 𑀚𑀸𑀦𑀸𑀢𑀺, 𑀢𑀲𑁆𑀲 𑀢𑀣𑀸 𑀯𑀼𑀘𑁆𑀘𑀢𑀺. 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀁 𑀚𑀸𑀦𑀸𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺, 𑀅𑀦𑀼𑀪𑀯𑀢𑀺 𑀯𑀸. 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀧𑀼𑀩𑁆𑀩𑁂𑀓𑀢𑀓𑀸𑀭𑀡𑀸, 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀧𑀘𑁆𑀘𑀬𑁂𑀦𑁂𑀯 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀫𑁆𑀫𑀯𑁂𑀤𑀦𑀜𑁆𑀘 𑀓𑀺𑀭𑀺𑀬𑀯𑁂𑀤𑀦𑀜𑁆𑀘 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁 𑀯𑀺𑀧𑀸𑀓𑀯𑁂𑀤𑀦𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀬𑁂 𑀯𑀸 𑀇𑀫𑁂 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸𑀢𑀺 𑀅𑀝𑁆𑀞 𑀭𑁄𑀕𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀲𑀢𑁆𑀢 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁 𑀯𑀺𑀧𑀸𑀓𑀯𑁂𑀤𑀦𑀁𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀬𑁂𑀧𑀺𑀫𑁂 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀦𑁆𑀢𑀺 𑀢𑀬𑁄 𑀓𑀫𑁆𑀫𑀭𑀸𑀲𑀬𑁄 𑀯𑀼𑀢𑁆𑀢𑀸, 𑀢𑁂𑀲𑀼𑀧𑀺 𑀤𑁆𑀯𑁂 𑀧𑀝𑀺𑀩𑀸𑀳𑀺𑀢𑁆𑀯𑀸 𑀏𑀓𑀁 𑀅𑀧𑀭𑀧𑀭𑀺𑀬𑀸𑀬𑀓𑀫𑁆𑀫𑀁𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀬𑁂𑀧𑀺𑀫𑁂 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑁄 𑀯𑀺𑀧𑀸𑀓𑁄 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑁄 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑁄𑀢𑀺 𑀢𑀬𑁄 𑀯𑀺𑀧𑀸𑀓𑀭𑀸𑀲𑀬𑁄 𑀯𑀼𑀢𑁆𑀢𑀸, 𑀢𑁂𑀲𑀼𑀧𑀺 𑀤𑁆𑀯𑁂 𑀧𑀝𑀺𑀩𑀸𑀳𑀺𑀢𑁆𑀯𑀸 𑀏𑀓𑀁 𑀅𑀧𑀭𑀧𑀭𑀺𑀬𑀸𑀬𑀯𑀺𑀧𑀸𑀓𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀬𑁂𑀧𑀺𑀫𑁂 𑀓𑀼𑀲𑀮𑀘𑁂𑀢𑀦𑀸 𑀅𑀓𑀼𑀲𑀮𑀘𑁂𑀢𑀦𑀸 𑀯𑀺𑀧𑀸𑀓𑀘𑁂𑀢𑀦𑀸 𑀓𑀺𑀭𑀺𑀬𑀘𑁂𑀢𑀦𑀸𑀢𑀺 𑀘𑀢𑁆𑀢𑀸𑀭𑁄 𑀘𑁂𑀢𑀦𑀸𑀭𑀸𑀲𑀬𑁄 𑀯𑀼𑀢𑁆𑀢𑀸, 𑀢𑁂𑀲𑀼𑀧𑀺 𑀢𑀬𑁄 𑀧𑀝𑀺𑀩𑀸𑀳𑀺𑀢𑁆𑀯𑀸 𑀏𑀓𑀁 𑀯𑀺𑀧𑀸𑀓𑀘𑁂𑀢𑀦𑀁𑀬𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺.

𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀽𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀓𑀸𑀭𑀡𑀸, 𑀇𑀲𑁆𑀲𑀭𑁂𑀦 𑀦𑀺𑀫𑁆𑀫𑀺𑀢𑀢𑁆𑀢𑀸 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀳𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑀸 𑀓𑀢𑀫𑀽𑀮𑀓𑁂𑀦 𑀯𑀸 𑀆𑀡𑀢𑁆𑀢𑀺𑀫𑀽𑀮𑀓𑁂𑀦 𑀯𑀸 𑀧𑀼𑀩𑁆𑀩𑁂𑀓𑀢𑁂𑀦 𑀯𑀸 𑀅𑀳𑁂𑀢𑀼𑀅𑀧𑀘𑁆𑀘𑀬𑀸 𑀯𑀸 𑀧𑀝𑀺𑀲𑀁𑀯𑁂𑀤𑀺𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸, 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀓𑀸𑀭𑀡𑀸𑀬𑁂𑀯 𑀧𑀦 𑀇𑀫𑀸 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺. 𑀏𑀯𑀁𑀯𑀸𑀤𑀺𑀦𑁄 𑀧𑀦𑁂𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀭𑁄𑀕𑁂𑀲𑀼 𑀏𑀓𑀫𑁆𑀧𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑁂 𑀧𑀝𑀺𑀩𑀸𑀳𑀦𑁆𑀢𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀘 𑀢𑀻𑀲𑀼 𑀓𑀫𑁆𑀫𑀭𑀸𑀲𑀻𑀲𑀼 𑀢𑀻𑀲𑀼 𑀯𑀺𑀧𑀸𑀓𑀭𑀸𑀲𑀻𑀲𑀼 𑀘𑀢𑀽𑀲𑀼 𑀘𑁂𑀢𑀦𑀸𑀭𑀸𑀲𑀻𑀲𑀼 𑀏𑀓𑀫𑁆𑀧𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀧𑀝𑀺𑀩𑀸𑀳𑀦𑁆𑀢𑀺.

𑀅𑀳𑁂𑀢𑀼𑀅𑀧𑀘𑁆𑀘𑀬𑀸𑀢𑀺 𑀳𑁂𑀢𑀼𑀜𑁆𑀘 𑀧𑀘𑁆𑀘𑀬𑀜𑁆𑀘 𑀯𑀺𑀦𑀸, 𑀅𑀓𑀸𑀭𑀡𑁂𑀦𑁂𑀯 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀦𑁂𑀲𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀫𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑀸 𑀓𑀢𑀫𑀽𑀮𑀓𑁂𑀦 𑀯𑀸 𑀆𑀡𑀢𑁆𑀢𑀺𑀫𑀽𑀮𑀓𑁂𑀦 𑀯𑀸 𑀧𑀼𑀩𑁆𑀩𑁂𑀓𑀢𑁂𑀦 𑀯𑀸 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼𑀦𑀸 𑀯𑀸 𑀧𑀝𑀺𑀲𑀁𑀯𑁂𑀤𑀺𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸, 𑀅𑀳𑁂𑀢𑀼𑀅𑀧𑀘𑁆𑀘𑀬𑀸𑀬𑁂𑀯 𑀧𑀦 𑀇𑀫𑀸 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺. 𑀏𑀯𑀁𑀯𑀸𑀤𑀺𑀦𑁄 𑀧𑀦𑁂𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀭𑁄𑀕𑀸𑀤𑀻𑀲𑀼 𑀏𑀓𑀫𑁆𑀧𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀩𑀸𑀳𑀦𑁆𑀢𑀺.

𑀏𑀯𑀁 𑀲𑀢𑁆𑀣𑀸 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀯𑀤𑀸𑀫𑀻𑀢𑀺 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀏𑀯𑀁 𑀯𑀤𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀮𑀤𑁆𑀥𑀺𑀜𑁆𑀳𑀺 𑀅𑀧𑁆𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀕𑁆𑀕𑀬𑁆𑀳𑀫𑀸𑀦𑀸 𑀮𑀤𑁆𑀥𑀺𑀢𑁄 𑀮𑀤𑁆𑀥𑀺𑀁 𑀲𑀗𑁆𑀓𑀫𑀦𑁆𑀢𑀺, 𑀪𑁄 𑀕𑁄𑀢𑀫, 𑀦 𑀫𑀬𑀁 𑀧𑀼𑀩𑁆𑀩𑁂𑀓𑀢𑀯𑀸𑀤𑀁 𑀯𑀤𑀸𑀫𑀸𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺. 𑀮𑀤𑁆𑀥𑀺𑀬𑀸 𑀧𑀦 𑀧𑀢𑀺𑀝𑁆𑀞𑀸𑀧𑀺𑀢𑀸𑀬 𑀲𑀗𑁆𑀓𑀫𑀺𑀢𑀼𑀁 𑀅𑀮𑀪𑀦𑁆𑀢𑀸 𑀲𑀼𑀦𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀇𑀢𑀺 𑀦𑁂𑀲𑀁 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀏𑀯𑀁 𑀯𑀤𑀸𑀫𑀻𑀢𑀺 𑀆𑀳. 𑀢𑁂𑀦𑀳𑀸𑀬𑀲𑁆𑀫𑀦𑁆𑀢𑁄𑀢𑀺 𑀢𑁂𑀦 𑀳𑀺 𑀆𑀬𑀲𑁆𑀫𑀦𑁆𑀢𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀏𑀢𑀁 𑀲𑀘𑁆𑀘𑀁, 𑀏𑀯𑀁 𑀲𑀦𑁆𑀢𑁂 𑀢𑁂𑀦 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂𑀦. 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀬𑁂 𑀓𑁂𑀘𑀺 𑀮𑁄𑀓𑁂 𑀧𑀸𑀡𑀁 𑀅𑀢𑀺𑀧𑀸𑀢𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀼𑀩𑁆𑀩𑁂𑀓𑀢𑀳𑁂𑀢𑀼 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺. 𑀓𑀺𑀁𑀓𑀸𑀭𑀡𑀸? 𑀦 𑀳𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀅𑀢𑁆𑀢𑀦𑀸 𑀓𑀢𑀫𑀽𑀮𑀓𑁂𑀦 𑀦 𑀆𑀡𑀢𑁆𑀢𑀺𑀫𑀽𑀮𑀓𑁂𑀦 𑀦 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀳𑁂𑀢𑀼𑀦𑀸 𑀦 𑀅𑀳𑁂𑀢𑀼𑀅𑀧𑀘𑁆𑀘𑀬𑀸 𑀲𑀓𑁆𑀓𑀸 𑀧𑀝𑀺𑀲𑀁𑀯𑁂𑀤𑁂𑀢𑀼𑀁, 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀬𑁂𑀯 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀬𑀁 𑀯𑁄 𑀮𑀤𑁆𑀥𑀺. 𑀬𑀣𑀸 𑀘 𑀧𑀸𑀡𑀸𑀢𑀺𑀧𑀸𑀢𑀺𑀦𑁄, 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀦𑁆𑀢𑀸𑀧𑀺 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀬𑁂𑀯 𑀯𑀺𑀭𑀫𑀺𑀲𑁆𑀲𑀦𑁆𑀢𑀻𑀢𑀺. 𑀇𑀢𑀺 𑀪𑀕𑀯𑀸 𑀢𑁂𑀲𑀁𑀬𑁂𑀯 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀦𑀺𑀕𑁆𑀕𑀳𑀁 𑀆𑀭𑁄𑀧𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀢𑀦𑁆𑀢𑀺 𑀲𑀸𑀭𑀪𑀸𑀯𑁂𑀦 𑀕𑀡𑁆𑀳𑀦𑁆𑀢𑀸𑀦𑀁. 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄. 𑀇𑀤𑀁 𑀯𑀸 𑀓𑀭𑀡𑀻𑀬𑀁 𑀇𑀤𑀁 𑀯𑀸 𑀅𑀓𑀭𑀡𑀻𑀬𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀤𑀁 𑀯𑀸 𑀓𑀭𑀡𑀻𑀬𑀦𑁆𑀢𑀺 𑀓𑀢𑁆𑀢𑀩𑁆𑀩𑀲𑁆𑀲 𑀓𑀭𑀡𑀢𑁆𑀣𑀸𑀬, 𑀇𑀤𑀁 𑀯𑀸 𑀅𑀓𑀭𑀡𑀻𑀬𑀦𑁆𑀢𑀺 𑀅𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑀢𑁆𑀣𑀸𑀬 𑀓𑀢𑁆𑀢𑀼𑀓𑀫𑁆𑀬𑀢𑀸 𑀯𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄 𑀯𑀸 𑀦 𑀳𑁄𑀢𑀺. 𑀙𑀦𑁆𑀤𑀯𑀸𑀬𑀸𑀫𑁂𑀲𑀼 𑀯𑀸 𑀅𑀲𑀦𑁆𑀢𑁂𑀲𑀼 ‘‘𑀇𑀤𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺𑀧𑀺 ‘‘𑀇𑀤𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺𑀧𑀺 𑀦 𑀳𑁄𑀢𑀺. 𑀇𑀢𑀺 𑀓𑀭𑀡𑀻𑀬𑀸𑀓𑀭𑀡𑀻𑀬𑁂 𑀔𑁄 𑀧𑀦 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂𑀢𑀺 𑀏𑀯𑀁 𑀓𑀢𑁆𑀢𑀩𑁆𑀩𑁂 𑀘 𑀅𑀓𑀢𑁆𑀢𑀩𑁆𑀩𑁂 𑀘 𑀪𑀽𑀢𑀢𑁄 𑀣𑀺𑀭𑀢𑁄 𑀅𑀧𑀜𑁆𑀜𑀸𑀬𑀫𑀸𑀦𑁂 𑀅𑀮𑀩𑁆𑀪𑀫𑀸𑀦𑁂. 𑀬𑀤𑀺 𑀳𑀺 𑀓𑀢𑁆𑀢𑀩𑁆𑀩𑀁 𑀓𑀸𑀢𑀼𑀁 𑀅𑀓𑀢𑁆𑀢𑀩𑁆𑀩𑀢𑁄 𑀘 𑀯𑀺𑀭𑀫𑀺𑀢𑀼𑀁 𑀮𑀪𑁂𑀬𑁆𑀬, 𑀓𑀭𑀡𑀻𑀬𑀸𑀓𑀭𑀡𑀻𑀬𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀉𑀧𑀮𑀩𑁆𑀪𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀉𑀪𑀬𑀫𑁆𑀧𑀺 𑀢𑀁 𑀏𑀲 𑀦𑀼𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀁 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀦 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀢𑀲𑁆𑀫𑀺𑀁 𑀘 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀫𑀼𑀝𑁆𑀞𑀲𑁆𑀲𑀢𑀻𑀦𑀦𑁆𑀢𑀺 𑀦𑀝𑁆𑀞𑀲𑁆𑀲𑀢𑀻𑀦𑀁 𑀯𑀺𑀲𑁆𑀲𑀝𑁆𑀞𑀲𑁆𑀲𑀢𑀻𑀦𑀁. 𑀅𑀦𑀸𑀭𑀓𑁆𑀔𑀸𑀦𑀁 𑀯𑀺𑀳𑀭𑀢𑀦𑁆𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀦𑀺𑀭𑀸𑀭𑀓𑁆𑀔𑀸𑀦𑀁 𑀯𑀺𑀳𑀭𑀦𑁆𑀢𑀸𑀦𑀁. 𑀦 𑀳𑁄𑀢𑀺 𑀧𑀘𑁆𑀘𑀢𑁆𑀢𑀁 𑀲𑀳𑀥𑀫𑁆𑀫𑀺𑀓𑁄 𑀲𑀫𑀡𑀯𑀸𑀤𑁄𑀢𑀺 𑀏𑀯𑀁 𑀪𑀽𑀢𑀸𑀦𑀁 𑀢𑀼𑀫𑁆𑀳𑀸𑀓𑀁 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀫𑀬𑀁 𑀲𑀫𑀡𑀸𑀢𑀺 𑀧𑀘𑁆𑀘𑀢𑁆𑀢𑀁 𑀲𑀓𑀸𑀭𑀡𑁄 𑀲𑀫𑀡𑀯𑀸𑀤𑁄 𑀦 𑀳𑁄𑀢𑀺 𑀦 𑀇𑀚𑁆𑀛𑀢𑀺. 𑀲𑀫𑀡𑀸𑀧𑀺 𑀳𑀺 𑀧𑀼𑀩𑁆𑀩𑁂𑀓𑀢𑀓𑀸𑀭𑀡𑀸𑀬𑁂𑀯 𑀳𑁄𑀦𑁆𑀢𑀺, 𑀅𑀲𑁆𑀲𑀫𑀡𑀸𑀧𑀺 𑀧𑀼𑀩𑁆𑀩𑁂𑀓𑀢𑀓𑀸𑀭𑀡𑀸𑀬𑁂𑀯𑀸𑀢𑀺. 𑀲𑀳𑀥𑀫𑁆𑀫𑀺𑀓𑁄𑀢𑀺 𑀲𑀓𑀸𑀭𑀡𑁄. 𑀦𑀺𑀕𑁆𑀕𑀳𑁄 𑀳𑁄𑀢𑀻𑀢𑀺 𑀫𑀫 𑀦𑀺𑀕𑁆𑀕𑀳𑁄 𑀳𑁄𑀢𑀺, 𑀢𑁂 𑀧𑀦 𑀦𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺.

𑀏𑀯𑀁 𑀧𑀼𑀩𑁆𑀩𑁂𑀓𑀢𑀯𑀸𑀤𑀺𑀦𑁄 𑀦𑀺𑀕𑁆𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀺𑀦𑁄 𑀦𑀺𑀕𑁆𑀕𑀳𑁂𑀢𑀼𑀁 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀧𑀼𑀩𑁆𑀩𑁂𑀓𑀢𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸 𑀅𑀳𑁂𑀢𑀼𑀓𑀯𑀸𑀤𑁂𑀧𑀺.

𑀏𑀯𑀁 𑀇𑀫𑁂𑀲𑀁 𑀢𑀺𑀢𑁆𑀣𑀸𑀬𑀢𑀦𑀸𑀦𑀁 𑀧𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀅𑀓𑀺𑀭𑀺𑀬𑀸𑀬 𑀲𑀡𑁆𑀞𑀳𑀦𑀪𑀸𑀯𑁂𑀦 𑀢𑀼𑀘𑁆𑀙𑀪𑀸𑀯𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁, 𑀅𑀲𑀸𑀭𑀪𑀸𑀯𑁂𑀦 𑀣𑀼𑀲𑀓𑁄𑀝𑁆𑀝𑀦𑀲𑀤𑀺𑀲𑀢𑀁 𑀆𑀧𑀚𑁆𑀚𑀦𑀪𑀸𑀯𑁂𑀦 𑀅𑀕𑁆𑀕𑀺𑀲𑀜𑁆𑀜𑀸𑀬 𑀥𑀫𑀫𑀸𑀦𑀔𑀚𑁆𑀚𑀼𑀧𑀦𑀓𑀲𑀭𑀺𑀓𑁆𑀔𑀢𑀁 𑀢𑀁𑀤𑀺𑀝𑁆𑀞𑀺𑀓𑀸𑀦𑀁 𑀧𑀼𑀭𑀺𑀫𑀲𑁆𑀲𑀧𑀺 𑀫𑀚𑁆𑀛𑀺𑀫𑀲𑁆𑀲𑀧𑀺 𑀧𑀘𑁆𑀙𑀺𑀫𑀲𑁆𑀲𑀧𑀺 𑀅𑀢𑁆𑀣𑀤𑀲𑁆𑀲𑀦𑀢𑀸𑀬 𑀅𑀪𑀸𑀯𑁂𑀦 𑀅𑀦𑁆𑀥𑀯𑁂𑀡𑀽𑀧𑀫𑀢𑀁 𑀲𑀤𑁆𑀤𑀫𑀢𑁆𑀢𑁂𑀦𑁂𑀯 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀲𑀸𑀭𑀤𑀺𑀝𑁆𑀞𑀺𑀓𑀸𑀦𑀁 𑀧𑀣𑀯𑀺𑀬𑀁 𑀧𑀢𑀺𑀢𑀲𑁆𑀲 𑀩𑁂𑀮𑀼𑀯𑀧𑀓𑁆𑀓𑀲𑁆𑀲 𑀤𑀤𑁆𑀤𑀪𑀸𑀬𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀧𑀣𑀯𑀻 𑀲𑀁𑀯𑀝𑁆𑀝𑀫𑀸𑀦𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀜𑁆𑀜𑀸𑀬 𑀧𑀮𑀸𑀬𑀦𑁆𑀢𑁂𑀦 𑀲𑀲𑀓𑁂𑀦 𑀲𑀭𑀺𑀓𑁆𑀔𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀤𑁂𑀲𑀺𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀸𑀭𑀪𑀸𑀯𑀜𑁆𑀘𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀺𑀕𑁆𑀕𑀳𑀺𑀢𑁄𑀢𑀺 𑀅𑀜𑁆𑀜𑁂𑀳𑀺 𑀅𑀦𑀺𑀕𑁆𑀕𑀳𑀺𑀢𑁄 𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀅𑀲𑀁𑀓𑀺𑀮𑀺𑀝𑁆𑀞𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑁄 𑀧𑀭𑀺𑀲𑀼𑀤𑁆𑀥𑁄, ‘‘𑀲𑀁𑀓𑀺𑀮𑀺𑀝𑁆𑀞𑀁 𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀯𑀢𑁆𑀢𑁂𑀳𑀺𑀧𑀺 𑀢𑀣𑀸 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀅𑀦𑀼𑀧𑀯𑀚𑁆𑀚𑁄𑀢𑀺 𑀉𑀧𑀯𑀸𑀤𑀯𑀺𑀦𑀺𑀫𑀼𑀢𑁆𑀢𑁄. 𑀅𑀧𑁆𑀧𑀝𑀺𑀓𑀼𑀝𑁆𑀞𑁄𑀢𑀺 ‘‘𑀓𑀺𑀁 𑀇𑀫𑀺𑀦𑀸 𑀳𑀭𑀣 𑀦’’𑀦𑁆𑀢𑀺 𑀏𑀯𑀁 𑀅𑀧𑁆𑀧𑀝𑀺𑀩𑀸𑀳𑀺𑀢𑁄, 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀯𑀸. 𑀯𑀺𑀜𑁆𑀜𑀽𑀳𑀻𑀢𑀺 𑀧𑀡𑁆𑀟𑀺𑀢𑁂𑀳𑀺. 𑀅𑀧𑀡𑁆𑀟𑀺𑀢𑀸𑀦𑀜𑁆𑀳𑀺 𑀅𑀚𑀸𑀦𑀺𑀢𑁆𑀯𑀸 𑀓𑀣𑁂𑀦𑁆𑀢𑀸𑀦𑀁 𑀯𑀘𑀦𑀁 𑀅𑀧𑁆𑀧𑀫𑀸𑀡𑀁. 𑀢𑀲𑁆𑀫𑀸 𑀯𑀺𑀜𑁆𑀜𑀽𑀳𑀻𑀢𑀺 𑀆𑀳.

𑀇𑀤𑀸𑀦𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂’’𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸 𑀙 𑀥𑀸𑀢𑀼𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀇𑀫𑀸 𑀙 𑀥𑀸𑀢𑀼𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀸𑀢𑀼𑀬𑁄𑀢𑀺 𑀲𑀪𑀸𑀯𑀸. 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀧𑁆𑀧𑀓𑀸𑀲𑀓𑁄 𑀳𑀺 𑀲𑀪𑀸𑀯𑀝𑁆𑀞𑁄 𑀥𑀸𑀢𑁆𑀯𑀝𑁆𑀞𑁄 𑀦𑀸𑀫. 𑀨𑀲𑁆𑀲𑀸𑀬𑀢𑀦𑀸𑀦𑀻𑀢𑀺 𑀯𑀺𑀧𑀸𑀓𑀨𑀲𑁆𑀲𑀸𑀦𑀁 𑀆𑀓𑀭𑀝𑁆𑀞𑁂𑀦 𑀆𑀬𑀢𑀦𑀸𑀦𑀺. 𑀫𑀦𑁄𑀧𑀯𑀺𑀘𑀸𑀭𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀸𑀤𑁂𑀳𑀺 𑀅𑀝𑁆𑀞𑀸𑀭𑀲𑀲𑀼 𑀞𑀸𑀦𑁂𑀲𑀼 𑀫𑀦𑀲𑁆𑀲 𑀉𑀧𑀯𑀺𑀘𑀸𑀭𑀸.

𑀧𑀣𑀯𑀻𑀥𑀸𑀢𑀽𑀢𑀺 𑀧𑀢𑀺𑀝𑁆𑀞𑀸𑀥𑀸𑀢𑀼. 𑀆𑀧𑁄𑀥𑀸𑀢𑀽𑀢𑀺 𑀆𑀩𑀦𑁆𑀥𑀦𑀥𑀸𑀢𑀼. 𑀢𑁂𑀚𑁄𑀥𑀸𑀢𑀽𑀢𑀺 𑀧𑀭𑀺𑀧𑀸𑀘𑀦𑀥𑀸𑀢𑀼. 𑀯𑀸𑀬𑁄𑀥𑀸𑀢𑀽𑀢𑀺 𑀯𑀺𑀢𑁆𑀣𑀫𑁆𑀪𑀦𑀥𑀸𑀢𑀼. 𑀆𑀓𑀸𑀲𑀥𑀸𑀢𑀽𑀢𑀺 𑀅𑀲𑀫𑁆𑀨𑀼𑀝𑁆𑀞𑀥𑀸𑀢𑀼. 𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀯𑀺𑀚𑀸𑀦𑀦𑀥𑀸𑀢𑀼. 𑀏𑀯𑀫𑀺𑀤𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀆𑀕𑀢𑀁. 𑀢𑀁 𑀔𑁄 𑀧𑀦𑁂𑀢𑀁 𑀲𑀗𑁆𑀔𑁂𑀧𑀢𑁄 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑁂𑀧𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑁂𑀧𑀢𑁄 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀺𑀢𑁆𑀣𑀸𑀭𑀢𑁄𑀯 𑀯𑀝𑁆𑀝𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀢𑀺𑀢𑁆𑀣𑀸𑀬𑀢𑀦𑀲𑀼𑀢𑁆𑀢𑁂 𑀇𑀤𑀁 𑀲𑀗𑁆𑀔𑁂𑀧𑀢𑁄 𑀙𑀥𑀸𑀢𑀼𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀕𑀢𑀁. 𑀢𑀁 𑀉𑀪𑀬𑀣𑀸𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀲𑀗𑁆𑀔𑁂𑀧𑀢𑁄 𑀙𑀥𑀸𑀢𑀼𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀧𑀺 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀆𑀓𑀸𑀲𑀥𑀸𑀢𑀼 𑀉𑀧𑀸𑀤𑀸𑀭𑀽𑀧𑀁. 𑀏𑀓𑀲𑁆𑀫𑀺𑀁 𑀘 𑀉𑀧𑀸𑀤𑀸𑀭𑀽𑀧𑁂 𑀤𑀺𑀝𑁆𑀞𑁂 𑀲𑁂𑀲𑀸𑀦𑀺 𑀢𑁂𑀯𑀻𑀲𑀢𑀺 𑀤𑀺𑀝𑁆𑀞𑀸𑀦𑁂𑀯𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀦𑀺. 𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀳𑁄𑀢𑀺, 𑀢𑁂𑀦 𑀲𑀳𑀚𑀸𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀦𑀸𑀫. 𑀘𑀢𑁆𑀢𑀸𑀭𑀺 𑀧𑀦 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀦𑀸𑀫𑀁, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑁂𑀬𑁂𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀢𑁄 𑀉𑀤𑁆𑀥𑀁 𑀲𑀢𑁆𑀢𑁄 𑀯𑀸 𑀚𑀻𑀯𑁄 𑀯𑀸 𑀦𑀢𑁆𑀣𑀻𑀢𑀺 𑀏𑀯𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀔𑁂𑀧𑀢𑁄 𑀙𑀥𑀸𑀢𑀼𑀯𑀲𑁂𑀦 𑀅𑀭𑀳𑀢𑁆𑀢𑀲𑀫𑁆𑀧𑀸𑀧𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀢𑁆𑀣𑀸𑀭𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀦 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀓𑀸𑀲𑀥𑀸𑀢𑀼𑀧𑀭𑀺𑀕𑁆𑀕𑀳𑀸𑀦𑀼𑀲𑀸𑀭𑁂𑀦 𑀢𑁂𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀅𑀣 𑀦𑁂𑀲𑀁 𑀧𑀘𑁆𑀘𑀬𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀧𑀼𑀦 𑀘𑀢𑁆𑀢𑀸𑀭𑁂𑀯 𑀫𑀳𑀸𑀪𑀽𑀢𑀸𑀦𑀺 𑀤𑀺𑀲𑁆𑀯𑀸 𑀢𑁂𑀲𑀼 𑀧𑀣𑀯𑀻𑀥𑀸𑀢𑀼 𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑀸, 𑀆𑀧𑁄𑀥𑀸𑀢𑀼 𑀤𑁆𑀯𑀸𑀤𑀲, 𑀢𑁂𑀚𑁄𑀥𑀸𑀢𑀼 𑀘𑀢𑁆𑀢𑀸𑀭𑁄, 𑀯𑀸𑀬𑁄𑀥𑀸𑀢𑀼 𑀙𑀓𑁄𑀝𑁆𑀞𑀸𑀲𑀸𑀢𑀺 𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀫𑀳𑀸𑀪𑀽𑀢𑀸𑀦𑀺 𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑁂𑀲𑀼 𑀢𑁂𑀯𑀻𑀲𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀜𑁆𑀘𑀲𑀝𑁆𑀞𑀺 𑀭𑀽𑀧𑀸𑀦𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀸𑀦𑀺 𑀘 𑀯𑀢𑁆𑀣𑀼𑀭𑀽𑀧𑁂𑀦 𑀲𑀤𑁆𑀥𑀺𑀁 𑀙𑀲𑀝𑁆𑀞𑀺 𑀳𑁄𑀦𑁆𑀢𑀻𑀢𑀺 𑀙𑀲𑀝𑁆𑀞𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺. 𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀦 𑀮𑁄𑀓𑀺𑀬𑀘𑀺𑀢𑁆𑀢𑀯𑀲𑁂𑀦 𑀏𑀓𑀸𑀲𑀻𑀢𑀺 𑀘𑀺𑀢𑁆𑀢𑀸𑀦𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫 𑀳𑁄𑀢𑀺. 𑀢𑁂𑀳𑀺 𑀲𑀳𑀚𑀸𑀢𑀸 𑀯𑁂𑀤𑀦𑀸𑀤𑀬𑁄𑀧𑀺 𑀢𑀢𑁆𑀢𑀓𑀸𑀬𑁂𑀯𑀸𑀢𑀺 𑀏𑀓𑀸𑀲𑀻𑀢𑀺 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀏𑀓𑀸𑀲𑀻𑀢𑀺 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀏𑀓𑀸𑀲𑀻𑀢𑀺 𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀢𑁂𑀪𑀽𑀫𑀓𑀯𑀲𑁂𑀦 𑀕𑀬𑁆𑀳𑀫𑀸𑀦𑀸 𑀘𑀢𑀼𑀯𑀻𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀥𑀫𑁆𑀫𑀲𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀇𑀢𑀺 𑀇𑀫𑁂 𑀘 𑀅𑀭𑀽𑀧𑀥𑀫𑁆𑀫𑀸 𑀙𑀲𑀝𑁆𑀞𑀺 𑀘 𑀭𑀽𑀧𑀥𑀫𑁆𑀫𑀸𑀢𑀺 𑀲𑀩𑁆𑀩𑁂𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑁂𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀢𑀢𑁄 𑀉𑀤𑁆𑀥𑀁 𑀲𑀢𑁆𑀢𑁄 𑀯𑀸 𑀚𑀻𑀯𑁄 𑀯𑀸 𑀦𑀢𑁆𑀣𑀻𑀢𑀺 𑀦𑀸𑀫𑀭𑀽𑀧𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀧𑀘𑁆𑀘𑀬𑀸 𑀓𑀫𑁆𑀫𑀧𑀘𑁆𑀘𑀬𑀸 𑀆𑀳𑀸𑀭𑀧𑀘𑁆𑀘𑀬𑀸𑀢𑀺 𑀏𑀯𑀁 𑀧𑀘𑁆𑀘𑀬𑀁 𑀤𑀺𑀲𑁆𑀯𑀸 ‘‘𑀅𑀢𑀻𑀢𑁂𑀧𑀺 𑀇𑀫𑁂𑀳𑀺 𑀧𑀘𑁆𑀘𑀬𑁂𑀳𑀺 𑀇𑀤𑀁 𑀯𑀝𑁆𑀝𑀁 𑀧𑀯𑀢𑁆𑀢𑀺𑀢𑁆𑀣, 𑀅𑀦𑀸𑀕𑀢𑁂𑀧𑀺 𑀏𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀏𑀢𑀭𑀳𑀺𑀧𑀺 𑀏𑀢𑁂𑀳𑀺𑀬𑁂𑀯 𑀧𑀯𑀢𑁆𑀢𑀢𑀻’’𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀓𑀗𑁆𑀔𑀁 𑀯𑀺𑀢𑀭𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄𑀧𑀺 𑀙𑀥𑀸𑀢𑀼𑀯𑀲𑁂𑀦 𑀅𑀭𑀳𑀢𑁆𑀢𑀲𑀫𑁆𑀧𑀸𑀧𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀓𑁆𑀔𑀼 𑀨𑀲𑁆𑀲𑀸𑀬𑀢𑀦𑀦𑁆𑀢𑀺 𑀲𑀼𑀯𑀡𑁆𑀡𑀸𑀤𑀻𑀦𑀁 𑀲𑀼𑀯𑀡𑁆𑀡𑀸𑀤𑀺𑀆𑀓𑀭𑁄 𑀯𑀺𑀬 𑀤𑁆𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀺 𑀤𑁆𑀯𑁂 𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀺 𑀢𑀻𑀡𑀺 𑀲𑀦𑁆𑀢𑀻𑀭𑀡𑀸𑀦𑀻𑀢𑀺 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀲𑀳𑀚𑀸𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀨𑀲𑁆𑀲𑀸𑀦𑀁 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑁄𑀢𑀺 𑀆𑀬𑀢𑀦𑀁. 𑀲𑁄𑀢𑀁 𑀨𑀲𑁆𑀲𑀸𑀬𑀢𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄 𑀨𑀲𑁆𑀲𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀤𑁆𑀯𑀸𑀯𑀻𑀲𑀢𑀺 𑀯𑀺𑀧𑀸𑀓𑀨𑀲𑁆𑀲𑀸 𑀬𑁄𑀚𑁂𑀢𑀩𑁆𑀩𑀸. 𑀇𑀢𑀺 𑀳𑀺𑀤𑀁 𑀙𑀨𑀲𑁆𑀲𑀸𑀬𑀢𑀦𑀸𑀦𑀁 𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀕𑀢𑀁. 𑀢𑀁 𑀲𑀗𑁆𑀔𑁂𑀧𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀓𑀣𑁂𑀢𑀩𑁆𑀩𑀁. 𑀲𑀗𑁆𑀔𑁂𑀧𑀢𑁄 𑀢𑀸𑀯 𑁋 𑀏𑀢𑁆𑀣 𑀳𑀺 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀆𑀬𑀢𑀦𑀸𑀦𑀺 𑀉𑀧𑀸𑀤𑀸𑀭𑀽𑀧𑀁, 𑀢𑁂𑀲𑀼 𑀤𑀺𑀝𑁆𑀞𑁂𑀲𑀼 𑀅𑀯𑀲𑁂𑀲𑀁 𑀉𑀧𑀸𑀤𑀸𑀭𑀽𑀧𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀙𑀝𑁆𑀞𑀁 𑀆𑀬𑀢𑀦𑀁 𑀘𑀺𑀢𑁆𑀢𑀁, 𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀳𑁄𑀢𑀺, 𑀢𑁂𑀦 𑀲𑀳𑀚𑀸𑀢𑀸 𑀯𑁂𑀤𑀦𑀸𑀤𑀬𑁄 𑀲𑁂𑀲𑀸 𑀢𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀭𑀳𑀢𑁆𑀢𑀲𑀫𑁆𑀧𑀸𑀧𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑁆𑀲 𑀓𑀸𑀭𑀡𑀪𑀽𑀢𑀁. 𑀉𑀧𑀯𑀺𑀘𑀭𑀢𑀻𑀢𑀺 𑀢𑀢𑁆𑀣 𑀫𑀦𑀁 𑀘𑀸𑀭𑁂𑀦𑁆𑀢𑁄 𑀉𑀧𑀯𑀺𑀘𑀭𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀇𑀝𑁆𑀞𑀁 𑀯𑀸 𑀳𑁄𑀢𑀼 𑀅𑀦𑀺𑀝𑁆𑀞𑀁 𑀯𑀸, 𑀬𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀦𑀸𑀫. 𑀬𑀁 𑀤𑀺𑀲𑁆𑀯𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀦𑀸𑀫. 𑀬𑀁 𑀤𑀺𑀲𑁆𑀯𑀸 𑀉𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀇𑀤𑀁 𑀲𑀗𑁆𑀔𑁂𑀧𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀆𑀕𑀢𑀁. 𑀢𑀁 𑀔𑁄 𑀧𑀦𑁂𑀢𑀁 𑀲𑀗𑁆𑀔𑁂𑀧𑀢𑁄 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑁂𑀧𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑁂𑀧𑀢𑁄 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀢𑀺𑀢𑁆𑀣𑀸𑀬𑀢𑀦𑀲𑀼𑀢𑁆𑀢𑁂 𑀇𑀤𑀁 𑀲𑀗𑁆𑀔𑁂𑀧𑀢𑁄 𑀅𑀝𑁆𑀞𑀸𑀭𑀲𑀫𑀦𑁄𑀧𑀯𑀺𑀘𑀸𑀭𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀕𑀢𑀁. 𑀢𑀁 𑀲𑀗𑁆𑀔𑁂𑀧𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀢𑀸𑀯 𑁋 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄, 𑀭𑀽𑀧𑀁 𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄𑀢𑀺 𑀇𑀫𑀸𑀦𑀺 𑀦𑀯 𑀉𑀧𑀸𑀤𑀸𑀭𑀽𑀧𑀸𑀦𑀺, 𑀢𑁂𑀲𑀼 𑀤𑀺𑀝𑁆𑀞𑁂𑀲𑀼 𑀲𑁂𑀲𑀁 𑀉𑀧𑀸𑀤𑀸𑀭𑀽𑀧𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀨𑁄𑀝𑁆𑀞𑀩𑁆𑀩𑀁 𑀢𑀻𑀡𑀺 𑀫𑀳𑀸𑀪𑀽𑀢𑀸𑀦𑀺, 𑀢𑁂𑀳𑀺 𑀤𑀺𑀝𑁆𑀞𑁂𑀳𑀺 𑀘𑀢𑀼𑀢𑁆𑀣𑀁 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀫𑀦𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑁂𑀦 𑀲𑀳𑀚𑀸𑀢𑀸 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀭𑀳𑀢𑁆𑀢𑀲𑀫𑁆𑀧𑀸𑀧𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀅𑀭𑀺𑀬𑀪𑀸𑀯𑀓𑀭𑀸𑀦𑀺, 𑀅𑀭𑀺𑀬𑀧𑀝𑀺𑀯𑀺𑀤𑁆𑀥𑀸𑀦𑀺 𑀯𑀸 𑀲𑀘𑁆𑀘𑀸𑀦𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 𑀧𑀤𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁨𑁯) 𑀧𑀓𑀸𑀲𑀺𑀢𑀁. 𑀙𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀥𑀸𑀢𑀽𑀦𑀦𑁆𑀢𑀺 𑀇𑀤𑀁 𑀓𑀺𑀫𑀢𑁆𑀣𑀁 𑀆𑀭𑀤𑁆𑀥𑀁? 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁. 𑀬𑀲𑁆𑀲 𑀳𑀺 𑀢𑀣𑀸𑀕𑀢𑁄 𑀤𑁆𑀯𑀸𑀤𑀲𑀧𑀤𑀁 𑀧𑀘𑁆𑀘𑀬𑀸𑀯𑀝𑁆𑀝𑀁 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀯𑀝𑁆𑀝𑀁 𑀤𑀲𑁆𑀲𑁂𑀢𑀺. 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺 𑀯𑀝𑁆𑀝𑀲𑁆𑀫𑀺𑀁 𑀳𑀺 𑀤𑀲𑁆𑀲𑀺𑀢𑁂 𑀓𑀣𑁂𑀢𑀼𑀫𑁆𑀧𑀺 𑀲𑀼𑀔𑀁 𑀳𑁄𑀢𑀺 𑀧𑀭𑀁 𑀅𑀯𑀩𑁄𑀥𑁂 𑀉𑀢𑀼𑀫𑁆𑀧𑀻𑀢𑀺 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁 𑀇𑀤𑀫𑀸𑀭𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀙𑀦𑁆𑀦𑀁 𑀥𑀸𑀢𑀽𑀦𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁𑀬𑁂𑀯 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁. 𑀉𑀧𑀸𑀤𑀸𑀬𑀸𑀢𑀺 𑀧𑀝𑀺𑀘𑁆𑀘. 𑀏𑀢𑁂𑀦 𑀧𑀘𑁆𑀘𑀬𑀫𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀙𑀥𑀸𑀢𑀼𑀧𑀘𑁆𑀘𑀬𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺. 𑀓𑀲𑁆𑀲 𑀙𑀦𑁆𑀦𑀁 𑀥𑀸𑀢𑀽𑀦𑀁 𑀧𑀘𑁆𑀘𑀬𑁂𑀦, 𑀓𑀺𑀁 𑀫𑀸𑀢𑀼, 𑀉𑀤𑀸𑀳𑀼 𑀧𑀺𑀢𑀽𑀢𑀺? 𑀦 𑀫𑀸𑀢𑀼 𑀦 𑀧𑀺𑀢𑀼, 𑀧𑀝𑀺𑀲𑀦𑁆𑀥𑀺𑀕𑁆𑀕𑀡𑁆𑀳𑀦𑀓𑀲𑀢𑁆𑀢𑀲𑁆𑀲𑁂𑀯 𑀧𑀦 𑀙𑀦𑁆𑀦𑀁 𑀥𑀸𑀢𑀽𑀦𑀁 𑀧𑀘𑁆𑀘𑀬𑁂𑀦 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀦𑀸𑀫 𑀳𑁄𑀢𑀺. 𑀕𑀩𑁆𑀪𑁄 𑀘 𑀦𑀸𑀫𑁂𑀲 𑀦𑀺𑀭𑀬𑀕𑀩𑁆𑀪𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀩𑁆𑀪𑁄 𑀧𑁂𑀢𑁆𑀢𑀺𑀯𑀺𑀲𑀬𑀕𑀩𑁆𑀪𑁄 𑀫𑀦𑀼𑀲𑁆𑀲𑀕𑀩𑁆𑀪𑁄 𑀤𑁂𑀯𑀕𑀩𑁆𑀪𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀫𑀦𑀼𑀲𑁆𑀲𑀕𑀩𑁆𑀪𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀑𑀓𑁆𑀓𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀓𑀣𑀁 𑀳𑁄𑀢𑀻𑀢𑀺? 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀺𑀡𑁆𑀡𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁? 𑀇𑀥 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀦 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺. 𑀦𑁂𑀯 𑀢𑀸𑀯 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀇𑀥 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦𑁂𑀯 𑀢𑀸𑀯 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺. 𑀏𑀯𑀁 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁮).

𑀑𑀓𑁆𑀓𑀦𑁆𑀢𑀺𑀬𑀸 𑀲𑀢𑀺 𑀦𑀸𑀫𑀭𑀽𑀧𑀦𑁆𑀢𑀺 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀢𑁆𑀣𑀼𑀤𑀲𑀓𑀁 𑀓𑀸𑀬𑀤𑀲𑀓𑀁 𑀪𑀸𑀯𑀤𑀲𑀓𑀁 𑀢𑀬𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀢𑁂𑀢𑁆𑀢𑀺𑀁𑀲 𑀥𑀫𑁆𑀫𑀸 𑀕𑀳𑀺𑀢𑀸, 𑀇𑀫𑀲𑁆𑀫𑀺𑀁 𑀧𑀦 ‘‘𑀑𑀓𑁆𑀓𑀦𑁆𑀢𑀺𑀬𑀸 𑀲𑀢𑀺 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀫𑁆𑀧𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀢𑀼𑀢𑁆𑀢𑀺𑀁𑀲 𑀥𑀫𑁆𑀫𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺𑀆𑀤𑀻𑀳𑀺 𑀬𑀣𑁂𑀯 𑀑𑀓𑁆𑀓𑀦𑁆𑀢𑀺𑀬𑀸 𑀲𑀢𑀺 𑀦𑀸𑀫𑀭𑀽𑀧𑀧𑀸𑀢𑀼𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀏𑀯𑀁 𑀦𑀸𑀫𑀭𑀽𑀧𑁂 𑀲𑀢𑀺 𑀲𑀴𑀸𑀬𑀢𑀦𑀧𑀸𑀢𑀼𑀪𑀸𑀯𑁄, 𑀲𑀴𑀸𑀬𑀢𑀦𑁂 𑀲𑀢𑀺 𑀨𑀲𑁆𑀲𑀧𑀸𑀢𑀼𑀪𑀸𑀯𑁄, 𑀨𑀲𑁆𑀲𑁂 𑀲𑀢𑀺 𑀯𑁂𑀤𑀦𑀸𑀧𑀸𑀢𑀼𑀪𑀸𑀯𑁄 𑀤𑀲𑁆𑀲𑀺𑀢𑁄.

𑀯𑁂𑀤𑀺𑀬𑀫𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀯𑁂𑀤𑀦𑀁 𑀅𑀦𑀼𑀪𑀯𑀦𑁆𑀢𑁄𑀧𑀺 𑀯𑁂𑀤𑀺𑀬𑀫𑀸𑀦𑁄𑀢𑀺 𑀯𑀼𑀘𑁆𑀘𑀢𑀺 𑀚𑀸𑀦𑀦𑁆𑀢𑁄𑀧𑀺. ‘‘𑀯𑁂𑀤𑀺𑀬𑀸𑀫𑀳𑀁, 𑀪𑀦𑁆𑀢𑁂, 𑀯𑁂𑀤𑀺𑀬𑀢𑀻𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀏𑀢𑁆𑀣 𑀳𑀺 𑀅𑀦𑀼𑀪𑀯𑀦𑁆𑀢𑁄 𑀯𑁂𑀤𑀺𑀬𑀫𑀸𑀦𑁄 𑀦𑀸𑀫, ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁧.𑁧𑁧𑁩; 𑀤𑀻. 𑀦𑀺. 𑁨.𑁩𑁮𑁦; 𑀯𑀺𑀪. 𑁩𑁬𑁩) 𑀏𑀢𑁆𑀣 𑀚𑀸𑀦𑀦𑁆𑀢𑁄. 𑀇𑀥𑀸𑀧𑀺 𑀚𑀸𑀦𑀦𑁆𑀢𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀜𑀧𑁂𑀫𑀻𑀢𑀺 𑀏𑀯𑀁 𑀚𑀸𑀦𑀦𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 ‘‘𑀇𑀤𑀁 𑀤𑀼𑀓𑁆𑀔𑀁 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦𑀢𑁆𑀣𑀺 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀜𑁆𑀜𑀧𑁂𑀫𑀺 𑀩𑁄𑀥𑁂𑀫𑀺 𑀚𑀸𑀦𑀸𑀧𑁂𑀫𑀺. 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀤𑀼𑀓𑁆𑀔𑀸𑀤𑀻𑀲𑀼 𑀅𑀬𑀁 𑀲𑀦𑁆𑀦𑀺𑀝𑁆𑀞𑀸𑀦𑀓𑀣𑀸 𑁋 𑀞𑀧𑁂𑀢𑁆𑀯𑀸 𑀳𑀺 𑀢𑀡𑁆𑀳𑀁 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁 𑀦𑀸𑀫, 𑀢𑀲𑁆𑀲𑁂𑀯 𑀧𑀪𑀸𑀯𑀺𑀓𑀸 𑀧𑀼𑀩𑁆𑀩𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄 𑀦𑀸𑀫, 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀘𑁆𑀘𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑁄 𑀦𑀸𑀫, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀦𑀸𑀫. 𑀇𑀢𑀺 𑀪𑀕𑀯𑀸 𑀑𑀓𑁆𑀓𑀦𑁆𑀢𑀺𑀬𑀸 𑀲𑀢𑀺 𑀦𑀸𑀫𑀭𑀽𑀧𑀦𑁆𑀢𑀺 𑀓𑀣𑁂𑀦𑁆𑀢𑁄𑀧𑀺 𑀯𑁂𑀤𑀺𑀬𑀫𑀸𑀦𑀲𑁆𑀲 𑀚𑀸𑀦𑀫𑀸𑀦𑀲𑁆𑀲𑁂𑀯 𑀓𑀣𑁂𑀲𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺 𑀓𑀣𑁂𑀦𑁆𑀢𑁄𑀧𑀺, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀓𑀣𑁂𑀦𑁆𑀢𑁄𑀧𑀺, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺 𑀓𑀣𑁂𑀦𑁆𑀢𑁄𑀧𑀺, 𑀯𑁂𑀤𑀺𑀬𑀫𑀸𑀦𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀜𑀧𑁂𑀫𑀻𑀢𑀺 𑀓𑀣𑁂𑀦𑁆𑀢𑁄𑀧𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀧𑀜𑁆𑀜𑀧𑁂𑀫𑀻𑀢𑀺 𑀓𑀣𑁂𑀦𑁆𑀢𑁄𑀧𑀺 𑀯𑁂𑀤𑀺𑀬𑀫𑀸𑀦𑀲𑁆𑀲 𑀚𑀸𑀦𑀫𑀸𑀦𑀲𑁆𑀲𑁂𑀯 𑀓𑀣𑁂𑀲𑀺.

𑀇𑀤𑀸𑀦𑀺 𑀢𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀺 𑀲𑀘𑁆𑀘𑀸𑀦𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁩𑁭) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 ‘‘𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸’’𑀢𑀺 (𑀫. 𑀦𑀺. 𑁧.𑁧𑁩𑁩; 𑀤𑀻. 𑀦𑀺. 𑁨.𑁪𑁦𑁦; 𑀯𑀺𑀪. 𑁨𑁦𑁩) 𑀇𑀫𑀸𑀬 𑀢𑀦𑁆𑀢𑀺𑀬𑀸 𑀆𑀕𑀢𑀁, 𑀇𑀥 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦. 𑀢𑀢𑁆𑀣 𑀘 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 ‘‘𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄’’𑀢𑀺 (𑀫. 𑀦𑀺. 𑁧.𑁧𑁩𑁪; 𑀤𑀻. 𑀦𑀺. 𑁨.𑁪𑁦𑁧; 𑀯𑀺𑀪. 𑁨𑁦𑁪) 𑀇𑀫𑀸𑀬 𑀢𑀦𑁆𑀢𑀺𑀬𑀸 𑀆𑀕𑀢𑀁, 𑀇𑀥 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺 𑀧𑀘𑁆𑀘𑀬𑀸𑀓𑀸𑀭𑀦𑀺𑀭𑁄𑀥𑀯𑀲𑁂𑀦.

𑀢𑀢𑁆𑀣 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀅𑀲𑁂𑀲𑀯𑀺𑀭𑀸𑀕𑁂𑀦 𑀘 𑀅𑀲𑁂𑀲𑀦𑀺𑀭𑁄𑀥𑁂𑀦 𑀘. 𑀉𑀪𑀬𑀫𑁆𑀧𑁂𑀢𑀁 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀫𑁂𑀯. 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁄 𑀳𑁄𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀳𑀺 𑀧𑀦 𑀧𑀤𑁂𑀳𑀺 𑀬𑀁 𑀆𑀕𑀫𑁆𑀫 𑀅𑀯𑀺𑀚𑁆𑀚𑀸𑀤𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀢𑁆𑀣𑀢𑁄 𑀢𑀁 𑀦𑀺𑀩𑁆𑀩𑀸𑀦𑀁 𑀤𑀻𑀧𑀺𑀢𑀁 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄𑀢𑀺𑀧𑀺 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺𑀧𑀺 𑀏𑀯𑀁 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀦𑀸𑀫𑁂𑀦 𑀓𑀣𑀻𑀬𑀢𑀺. 𑀓𑁂𑀯𑀮𑀲𑁆𑀲𑀸𑀢𑀺 𑀲𑀓𑀮𑀲𑁆𑀲. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀭𑀸𑀲𑀺𑀲𑁆𑀲. 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀦𑀺𑀭𑁄𑀥𑁄 𑀦𑀸𑀫 𑀔𑀻𑀡𑀸𑀓𑀸𑀭𑁄𑀧𑀺 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺, 𑀢𑀲𑁆𑀫𑀸 𑀇𑀥 𑀔𑀻𑀡𑀸𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀤𑁆𑀯𑀸𑀤𑀲𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁, 𑀤𑁆𑀯𑀸𑀤𑀲𑀲𑀼𑀬𑁂𑀯 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀯𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀇𑀤𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀦 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀦𑀸𑀫 𑀅𑀢𑁆𑀣𑀺. 𑀬𑀣𑀸 𑀧𑀦 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑁂 𑀧𑀜𑁆𑀘𑀗𑁆𑀕𑀫𑀢𑁆𑀢𑀫𑁂𑀯 𑀢𑀽𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀅𑀝𑁆𑀞𑀗𑁆𑀕𑀺𑀓𑀫𑀢𑁆𑀢𑀫𑁂𑀯 𑀫𑀕𑁆𑀕𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀺𑀕𑁆𑀕𑀳𑀺𑀢𑁄𑀢𑀺 𑀦 𑀦𑀺𑀕𑁆𑀕𑀳𑀺𑀢𑁄. 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀳𑀺 𑀳𑀸𑀧𑁂𑀢𑁆𑀯𑀸 𑀯𑀸 𑀤𑀲𑁆𑀲𑁂𑀢𑀺 𑀯𑀟𑁆𑀠𑁂𑀢𑁆𑀯𑀸 𑀯𑀸 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀸. 𑀢𑀢𑁆𑀣 𑀬𑀲𑁆𑀫𑀸 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 ‘‘𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺, 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸’’𑀢𑀺 𑀏𑀯𑀁 𑀳𑀸𑀧𑁂𑀢𑁆𑀯𑀸𑀧𑀺 ‘‘𑀧𑀜𑁆𑀘 𑀯𑀸 𑀙 𑀯𑀸’’𑀢𑀺 𑀏𑀯𑀁 𑀯𑀟𑁆𑀠𑁂𑀢𑁆𑀯𑀸𑀧𑀺 ‘‘𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀜𑁆𑀜𑀸𑀦𑁂𑀯 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸. 𑀢𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄 𑀅𑀦𑀺𑀕𑁆𑀕𑀳𑀺𑀢𑁄 𑀦𑀸𑀫. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁨. 𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀤𑀼𑀢𑀺𑀬𑁂 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀻𑀢𑀺 𑀫𑀸𑀢𑀸 𑀘 𑀧𑀼𑀢𑁆𑀢𑁄 𑀘 𑀫𑀸𑀢𑀸𑀧𑀼𑀢𑁆𑀢𑀁, 𑀧𑀭𑀺𑀢𑁆𑀢𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦 𑀦𑀢𑁆𑀣𑀺 𑀏𑀢𑁆𑀣 𑀫𑀸𑀢𑀸𑀧𑀼𑀢𑁆𑀢𑀦𑁆𑀢𑀺 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺. 𑀬𑀦𑁆𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂. 𑀢𑀢𑁆𑀣 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀦𑀧𑁆𑀧𑀝𑀺𑀮𑀪𑀢𑀻𑀢𑀺 𑀢𑀲𑁆𑀫𑀺𑀁 𑀅𑀕𑁆𑀕𑀺𑀪𑀬𑁂 𑀉𑀧𑁆𑀧𑀦𑁆𑀦𑁂 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀪𑀬𑀁 𑀳𑁄𑀢𑀻𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁 𑀳𑁄𑀢𑀺. 𑀅𑀝𑀯𑀺𑀲𑀗𑁆𑀓𑁄𑀧𑁄𑀢𑀺 𑀅𑀝𑀯𑀺𑀬𑀸 𑀲𑀗𑁆𑀓𑁄𑀧𑁄. 𑀅𑀝𑀯𑀻𑀢𑀺 𑀘𑁂𑀢𑁆𑀣 𑀅𑀝𑀯𑀺𑀯𑀸𑀲𑀺𑀦𑁄 𑀘𑁄𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀸 𑀳𑀺 𑀢𑁂 𑀅𑀝𑀯𑀺𑀢𑁄 𑀚𑀦𑀧𑀤𑀁 𑀑𑀢𑀭𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀧𑀳𑀭𑀺𑀢𑁆𑀯𑀸 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀢𑀤𑀸 𑀅𑀝𑀯𑀺𑀲𑀗𑁆𑀓𑁄𑀧𑁄 𑀦𑀸𑀫 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀘𑀓𑁆𑀓𑀲𑀫𑀸𑀭𑀽𑀴𑁆𑀳𑀸𑀢𑀺 𑀏𑀢𑁆𑀣 𑀇𑀭𑀺𑀬𑀸𑀧𑀣𑀘𑀓𑁆𑀓𑀫𑁆𑀧𑀺 𑀯𑀝𑁆𑀝𑀢𑀺 𑀬𑀸𑀦𑀘𑀓𑁆𑀓𑀫𑁆𑀧𑀺. 𑀪𑀬𑀲𑁆𑀫𑀺𑀁 𑀳𑀺 𑀲𑀫𑁆𑀧𑀢𑁆𑀢𑁂 𑀬𑁂𑀲𑀁 𑀬𑀸𑀦𑀓𑀸𑀦𑀺 𑀅𑀢𑁆𑀣𑀺, 𑀢𑁂 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀁 𑀢𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀬𑁂𑀲𑀁 𑀦𑀢𑁆𑀣𑀺, 𑀢𑁂 𑀓𑀸𑀚𑁂𑀦 𑀯𑀸 𑀆𑀤𑀸𑀬 𑀲𑀻𑀲𑁂𑀦 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺𑀬𑁂𑀯. 𑀢𑁂 𑀘𑀓𑁆𑀓𑀲𑀫𑀸𑀭𑀽𑀴𑁆𑀳𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀭𑀺𑀬𑀸𑀬𑀦𑁆𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀕𑀘𑁆𑀙𑀦𑁆𑀢𑀺. 𑀓𑀤𑀸𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀸𑀮𑁂. 𑀓𑀭𑀳𑀘𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀝𑀺𑀮𑀪𑀢𑀻𑀢𑀺 𑀆𑀕𑀘𑁆𑀙𑀦𑁆𑀢𑀁 𑀯𑀸 𑀕𑀘𑁆𑀙𑀦𑁆𑀢𑀁 𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀮𑀻𑀦𑀁 𑀯𑀸 𑀧𑀲𑁆𑀲𑀺𑀢𑀼𑀁 𑀮𑀪𑀢𑀺. 𑀉𑀤𑀓𑀯𑀸𑀳𑀓𑁄𑀢𑀺 𑀦𑀤𑀻𑀧𑀽𑀭𑁄. 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀝𑀺𑀮𑀪𑀢𑀻𑀢𑀺 𑀓𑀼𑀮𑁆𑀮𑁂 𑀯𑀸 𑀉𑀴𑀼𑀫𑁆𑀧𑁂 𑀯𑀸 𑀫𑀢𑁆𑀢𑀺𑀓𑀸𑀪𑀸𑀚𑀦𑁂 𑀯𑀸 𑀤𑀸𑀭𑀼𑀓𑁆𑀔𑀡𑁆𑀟𑁂 𑀯𑀸 𑀮𑀕𑁆𑀕𑀁 𑀯𑀼𑀬𑁆𑀳𑀫𑀸𑀦𑀁 𑀧𑀲𑁆𑀲𑀺𑀢𑀼𑀁 𑀧𑀝𑀺𑀮𑀪𑀢𑀺, 𑀲𑁄𑀢𑁆𑀣𑀺𑀦𑀸 𑀯𑀸 𑀧𑀼𑀦 𑀉𑀢𑁆𑀢𑀭𑀺𑀢𑁆𑀯𑀸 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁 𑀮𑀪𑀢𑀻𑀢𑀺.

𑀏𑀯𑀁 𑀧𑀭𑀺𑀬𑀸𑀬𑀢𑁄 𑀅𑀫𑀸𑀢𑀸𑀧𑀼𑀢𑁆𑀢𑀺𑀓𑀸𑀦𑀺 𑀪𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑁂𑀦𑁆𑀢𑁄 𑀢𑀻𑀡𑀺𑀫𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀭𑀸𑀪𑀬𑀦𑁆𑀢𑀺 𑀚𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀚𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀪𑀬𑀁 𑀪𑀬𑀸𑀦𑀓𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀘𑁂𑀢𑀲𑁄 𑀉𑀢𑁆𑀭𑀸𑀲𑁄. 𑀩𑁆𑀬𑀸𑀥𑀺𑀁 𑀧𑀝𑀺𑀘𑁆𑀘, 𑀫𑀭𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀪𑀬𑀁 𑀪𑀬𑀸𑀦𑀓𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀘𑁂𑀢𑀲𑁄 𑀉𑀢𑁆𑀭𑀸𑀲𑁄’’𑀢𑀺 (𑀯𑀺𑀪. 𑁯𑁨𑁧). 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁩. 𑀯𑁂𑀦𑀸𑀕𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀢𑀢𑀺𑀬𑁂 𑀓𑁄𑀲𑀮𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀅𑀤𑁆𑀥𑀸𑀦𑀕𑀫𑀦𑀁 𑀕𑀘𑁆𑀙𑀦𑁆𑀢𑁄. 𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀳𑁄𑀢𑀺 𑀢𑀼𑀭𑀺𑀢𑀘𑀸𑀭𑀺𑀓𑀸 𑀘 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀘𑀸𑀢𑀺. 𑀢𑀢𑁆𑀣 𑀤𑀽𑀭𑁂𑀧𑀺 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀩𑁄𑀥𑀦𑀢𑁆𑀣𑀸𑀬 𑀲𑀳𑀲𑀸 𑀕𑀫𑀦𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀲𑀸 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀸. 𑀬𑀁 𑀧𑀦 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀤𑁂𑀯𑀲𑀺𑀓𑀁 𑀬𑁄𑀚𑀦𑀅𑀤𑁆𑀥𑀬𑁄𑀚𑀦𑀯𑀲𑁂𑀦 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀤𑀻𑀳𑀺 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀕𑀫𑀦𑀁, 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀇𑀫𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀘𑀸𑀭𑀺𑀓𑀁 𑀘𑀭𑀫𑀸𑀦𑁄’’𑀢𑀺. 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀘𑀸𑀭𑀺𑀓𑀸𑀓𑀣𑀸 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁪) 𑀯𑀼𑀢𑁆𑀢𑀸. 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑁄𑀲𑀭𑀡𑀕𑀸𑀫𑁄𑀧𑀺 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀕𑀕𑀸𑀫𑁄𑀧𑀺. 𑀇𑀥 𑀲𑀫𑁄𑀲𑀭𑀡𑀕𑀸𑀫𑁄 𑀩𑁆𑀭𑀸𑀳𑁆𑀫𑀡𑀯𑀲𑀦𑀕𑀸𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀤𑀯𑀲𑀭𑀻𑀢𑀺 𑀢𑀢𑁆𑀣 𑀅𑀯𑀲𑀭𑀺, 𑀲𑀫𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑁄 𑀧𑀦𑁂𑀢𑁆𑀣 𑀅𑀦𑀺𑀬𑀸𑀫𑀺𑀢𑁄. 𑀢𑀲𑁆𑀫𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑁄 𑀏𑀓𑁄 𑀯𑀦𑀲𑀡𑁆𑀟𑁄 𑀅𑀢𑁆𑀣𑀺, 𑀲𑀢𑁆𑀣𑀸 𑀢𑀁 𑀯𑀦𑀲𑀡𑁆𑀟𑀁 𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀲𑁆𑀲𑁄𑀲𑀼𑀦𑁆𑀢𑀺 𑀲𑀼𑀡𑀺𑀁𑀲𑀼 𑀉𑀧𑀮𑀪𑀺𑀁𑀲𑀼, 𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀚𑀸𑀦𑀺𑀁𑀲𑀼. 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂, 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸 𑀦𑀺𑀧𑀸𑀢𑁄. 𑀢𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁂𑀦 ‘‘𑀅𑀲𑁆𑀲𑁄𑀲𑀼𑀁 𑀏𑀯, 𑀦 𑀢𑁂𑀲𑀁 𑀓𑁄𑀘𑀺 𑀲𑀯𑀦𑀦𑁆𑀢𑀭𑀸𑀬𑁄 𑀅𑀳𑁄𑀲𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀧𑀽𑀭𑀡𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀅𑀲𑁆𑀲𑁄𑀲𑀼𑀁, 𑀢𑀁 𑀧𑀓𑀸𑀲𑁂𑀢𑀼𑀁 𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄. 𑀪𑁄𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀆𑀮𑀧𑀦𑀫𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀪𑀕𑀯𑀢𑁄 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀤𑀻𑀧𑀦𑀁, 𑀢𑀲𑁆𑀫𑀸 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄’’𑀢𑀺 𑀏𑀢𑁆𑀣 𑀲𑀫𑀡𑁄 𑀓𑀺𑀭, 𑀪𑁄, 𑀕𑁄𑀢𑀫𑀕𑁄𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁, 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯 𑀢𑀁 𑀓𑀼𑀮𑀁 𑀧𑀳𑀸𑀬 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀔𑁄 𑀧𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑁄𑀢𑀺 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄, 𑀲𑁂𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀬𑁂𑀯, 𑀣𑀼𑀢𑀺𑀖𑁄𑀲𑁄 𑀯𑀸. 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀉𑀕𑁆𑀕𑀢𑁄. 𑀓𑀺𑀦𑁆𑀢𑀺? 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀢𑀢𑁆𑀭𑀸𑀬𑀁 𑀧𑀤𑀲𑀫𑁆𑀩𑀦𑁆𑀥𑁄 𑁋 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸𑀢𑀺. 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 ‘‘𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀲𑁄 𑀪𑀕𑀯𑀸 𑀅𑀭𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀸𑀦𑁂𑀯 𑀏𑀢𑀸𑀦𑀺 𑀧𑀤𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁫-𑁧𑁨𑁭) 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺 𑀢𑀢𑁄 𑀦𑁂𑀲𑀁 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀲𑁄 𑀇𑀫𑀁 𑀮𑁄𑀓𑀦𑁆𑀢𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀇𑀫𑀁 𑀮𑁄𑀓𑀁, 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀤𑁂𑀯𑀓𑀦𑁆𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑀁. 𑀏𑀯𑀁 𑀲𑀳 𑀫𑀸𑀭𑁂𑀦 𑀲𑀫𑀸𑀭𑀓𑀁. 𑀲𑀳 𑀩𑁆𑀭𑀳𑁆𑀫𑀼𑀦𑀸 𑀲𑀩𑁆𑀭𑀳𑁆𑀫𑀓𑀁. 𑀲𑀳 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁. 𑀧𑀚𑀸𑀢𑀢𑁆𑀢𑀸 𑀧𑀚𑀸, 𑀢𑀁 𑀧𑀚𑀁. 𑀲𑀳 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀤𑁂𑀯𑀫𑀦𑀼𑀲𑁆𑀲𑀁. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁, 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀯𑀘𑀦𑁂𑀦 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁, 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘, 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁, 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀮𑁄𑀓𑁄, 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄𑀯 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄, 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄, 𑀲𑀩𑁆𑀭𑀳𑁆𑀫𑀓𑀕𑁆𑀕𑀳𑀡𑁂𑀦 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁄, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀺𑀕𑁆𑀕𑀳𑀡𑁂𑀦 𑀘𑀢𑀼𑀧𑀭𑀺𑀲𑀯𑀲𑁂𑀦, 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄, 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 𑀲𑀤𑁂𑀯𑀓𑀦𑁆𑀢𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑀁. 𑀲𑀫𑀸𑀭𑀓𑀦𑁆𑀢𑀺 𑀫𑀸𑀭𑁂𑀦 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑀁. 𑀲𑀩𑁆𑀭𑀳𑁆𑀫𑀓𑀦𑁆𑀢𑀺 𑀩𑁆𑀭𑀳𑁆𑀫𑁂𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑀁. 𑀏𑀯𑀁 𑀲𑀩𑁆𑀩𑁂𑀧𑀺 𑀢𑀺𑀪𑀯𑀽𑀧𑀕𑁂 𑀲𑀢𑁆𑀢𑁂 𑀢𑀻𑀳𑀸𑀓𑀸𑀭𑁂𑀳𑀺 𑀢𑀻𑀲𑀼 𑀧𑀤𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀭𑀺𑀬𑀸𑀤𑀸𑀢𑀼𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺.

𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻𑀢𑀺 𑀲𑀬𑀦𑁆𑀢𑀺 𑀲𑀸𑀫𑀁, 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸. 𑀅𑀪𑀺𑀜𑁆𑀜𑀸𑀢𑀺 𑀅𑀪𑀺𑀜𑁆𑀜𑀸𑀬, 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀏𑀢𑁂𑀦 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀓𑀢𑁄. 𑀧𑀯𑁂𑀤𑁂𑀢𑀻𑀢𑀺 𑀩𑁄𑀥𑁂𑀢𑀺 𑀜𑀸𑀧𑁂𑀢𑀺 𑀧𑀓𑀸𑀲𑁂𑀢𑀺.

𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀦𑁆𑀢𑀺 𑀲𑁄 𑀪𑀕𑀯𑀸 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀳𑀺𑀢𑁆𑀯𑀸𑀧𑀺 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀜𑁆𑀘 𑀔𑁄 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀺, 𑀆𑀤𑀺𑀫𑁆𑀳𑀺𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀢𑀺, 𑀫𑀚𑁆𑀛𑁂𑀧𑀺, 𑀧𑀭𑀺𑀬𑁄𑀲𑀸𑀦𑁂𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀅𑀢𑁆𑀣𑀺 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁, 𑀅𑀢𑁆𑀣𑀺 𑀲𑀸𑀲𑀦𑀲𑁆𑀲. 𑀤𑁂𑀲𑀦𑀸𑀬 𑀢𑀸𑀯 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬 𑀧𑀞𑀫𑀧𑀸𑀤𑁄 𑀆𑀤𑀺 𑀦𑀸𑀫, 𑀢𑀢𑁄 𑀤𑁆𑀯𑁂 𑀫𑀚𑁆𑀛𑀁 𑀦𑀸𑀫, 𑀅𑀦𑁆𑀢𑁂 𑀏𑀓𑁄 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫. 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀆𑀤𑀺, 𑀇𑀤𑀫𑀯𑁄𑀘𑀸𑀢𑀺 𑀧𑀭𑀺𑀬𑁄𑀲𑀸𑀦𑀁, 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑀸 𑀫𑀚𑁆𑀛𑀁. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀞𑀫𑀸𑀦𑀼𑀲𑀦𑁆𑀥𑀺 𑀆𑀤𑀺, 𑀅𑀦𑁆𑀢𑁂 𑀅𑀦𑀼𑀲𑀦𑁆𑀥𑀺 𑀧𑀭𑀺𑀬𑁄𑀲𑀸𑀦𑀁, 𑀫𑀚𑁆𑀛𑁂 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀩𑀳𑀽 𑀯𑀸 𑀫𑀚𑁆𑀛𑀫𑁂𑀯.

𑀲𑀸𑀲𑀦𑀲𑁆𑀲 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀆𑀤𑀺 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁬𑁯). ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀧𑀦 𑀅𑀭𑀺𑀬𑀫𑀕𑁆𑀕𑁄 𑀫𑀚𑁆𑀛𑀁 𑀦𑀸𑀫. 𑀨𑀮𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀢𑀁𑀧𑀸𑀭𑀁 𑀏𑀢𑀁𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀏𑀢𑁆𑀣 𑀨𑀮𑀁 𑀧𑀭𑀺𑀬𑁄𑀲𑀦𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺, 𑀆𑀯𑀼𑀲𑁄 𑀯𑀺𑀲𑀸𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁪𑁬𑁬) 𑀏𑀢𑁆𑀣 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀤𑀺𑀫𑁆𑀳𑀺 𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸 𑀫𑀚𑁆𑀛𑁂 𑀫𑀕𑁆𑀕𑀁 𑀧𑀭𑀺𑀬𑁄𑀲𑀸𑀦𑁂 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡’’𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀥𑀫𑁆𑀫𑀓𑀣𑀺𑀓𑁄 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

‘‘𑀆𑀤𑀺𑀫𑁆𑀳𑀺 𑀲𑀻𑀮𑀁 𑀤𑀲𑁆𑀲𑁂𑀬𑁆𑀬, 𑀫𑀚𑁆𑀛𑁂 𑀫𑀕𑁆𑀕𑀁 𑀯𑀺𑀪𑀸𑀯𑀬𑁂;

𑀧𑀭𑀺𑀬𑁄𑀲𑀸𑀦𑀫𑁆𑀳𑀺 𑀦𑀺𑀩𑁆𑀩𑀸𑀦𑀁, 𑀏𑀲𑀸 𑀓𑀣𑀺𑀓𑀲𑀡𑁆𑀞𑀺𑀢𑀻’’𑀢𑀺.

𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀬𑀲𑁆𑀲 𑀳𑀺 𑀬𑀸𑀕𑀼𑀪𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑀡𑁆𑀡𑀦𑀸𑀦𑀺𑀲𑁆𑀲𑀺𑀢𑀸 𑀤𑁂𑀲𑀦𑀸 𑀳𑁄𑀢𑀺, 𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺. 𑀪𑀕𑀯𑀸 𑀧𑀦 𑀢𑀣𑀸𑀭𑀽𑀧𑀁 𑀤𑁂𑀲𑀦𑀁 𑀧𑀳𑀸𑀬 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀦𑀺𑀲𑁆𑀲𑀺𑀢𑀁 𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 ‘‘𑀲𑀸𑀢𑁆𑀣𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀧𑀦 𑀤𑁂𑀲𑀦𑀸 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸 𑀯𑀸 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀲𑀩𑁆𑀩𑀦𑀺𑀕𑁆𑀕𑀳𑀺𑀢𑀩𑁆𑀬𑀜𑁆𑀚𑀦𑀸 𑀯𑀸, 𑀢𑀲𑁆𑀲 𑀤𑀫𑀺𑀴𑀓𑀺𑀭𑀸𑀢𑀬𑀯𑀦𑀸𑀤𑀺𑀫𑀺𑀮𑀓𑁆𑀔𑀸𑀦𑀁 𑀪𑀸𑀲𑀸 𑀯𑀺𑀬 𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄 𑀅𑀩𑁆𑀬𑀜𑁆𑀚𑀦𑀸 𑀦𑀸𑀫 𑀤𑁂𑀲𑀦𑀸 𑀳𑁄𑀢𑀺. 𑀪𑀕𑀯𑀸 𑀧𑀦 𑁋

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁, 𑀮𑀳𑀼𑀓𑀁 𑀕𑀭𑀼𑀓𑀜𑁆𑀘 𑀦𑀺𑀕𑁆𑀕𑀳𑀻𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀁 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀁 𑀅𑀫𑀓𑁆𑀔𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀫𑁂𑀯 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 ‘‘𑀲𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸 𑀤𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀦𑁆𑀢𑀺 𑀲𑀓𑀮𑀸𑀥𑀺𑀯𑀘𑀦𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀦𑀽𑀦𑀸𑀥𑀺𑀓𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀓𑀮𑀧𑀭𑀺𑀧𑀼𑀡𑁆𑀡𑀫𑁂𑀯 𑀤𑁂𑀲𑁂𑀢𑀺, 𑀏𑀓𑀤𑁂𑀲𑀦𑀸𑀧𑀺 𑀅𑀧𑀭𑀺𑀧𑀼𑀡𑁆𑀡𑀸 𑀦𑀢𑁆𑀣𑀻𑀢𑀺. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀬𑁄 𑀳𑀺 ‘‘𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀦𑀺𑀲𑁆𑀲𑀸𑀬 𑀮𑀸𑀪𑀁 𑀯𑀸 𑀲𑀓𑁆𑀓𑀸𑀭𑀁 𑀯𑀸 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀤𑁂𑀲𑁂𑀢𑀺, 𑀢𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀸 𑀤𑁂𑀲𑀦𑀸 𑀦𑀸𑀫 𑀳𑁄𑀢𑀺. 𑀪𑀕𑀯𑀸 𑀧𑀦 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑁄 𑀳𑀺𑀢𑀨𑀭𑀡𑁂𑀦𑁂𑀯 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀼𑀤𑀼𑀳𑀤𑀬𑁄 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑀁 𑀤𑁂𑀲𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀓𑀮𑀁 𑀲𑀸𑀲𑀦𑀁. 𑀢𑀲𑁆𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀧𑀭𑀺𑀲𑀼𑀤𑁆𑀥𑀁, 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀓𑀮𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑀁 𑀘𑀭𑀺𑀬𑀁, 𑀩𑁆𑀭𑀳𑁆𑀫𑀪𑀽𑀢𑀸𑀦𑀁 𑀯𑀸 𑀩𑀼𑀤𑁆𑀥𑀸𑀤𑀻𑀦𑀁 𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀸𑀥𑀼 𑀔𑁄 𑀧𑀦𑀸𑀢𑀺 𑀲𑀼𑀦𑁆𑀤𑀭𑀁 𑀔𑁄 𑀧𑀦, 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀦𑁆𑀢𑀺 𑀬𑀣𑀸𑀭𑀽𑀧𑁄 𑀲𑁄 𑀪𑀯𑀁 𑀕𑁄𑀢𑀫𑁄, 𑀏𑀯𑀭𑀽𑀧𑀸𑀦𑀁 𑀅𑀦𑁂𑀓𑁂𑀳𑀺𑀧𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺 𑀤𑀼𑀮𑁆𑀮𑀪𑀤𑀲𑁆𑀲𑀦𑀸𑀦𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑁂𑀳𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀭𑁂𑀳𑀺 𑀲𑀫𑀸𑀓𑀺𑀡𑁆𑀡𑀫𑀦𑁄𑀭𑀫𑀲𑀭𑀻𑀭𑀸𑀦𑀁 𑀅𑀦𑀧𑁆𑀧𑀓𑀤𑀲𑁆𑀲𑀦𑀸𑀦𑀁 𑀅𑀢𑀺𑀫𑀥𑀼𑀭𑀥𑀫𑁆𑀫𑀦𑀺𑀕𑁆𑀖𑁄𑀲𑀸𑀦𑀁 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀫𑁂𑀦 𑀮𑁄𑀓𑁂 𑀅𑀭𑀳𑀦𑁆𑀢𑁄𑀢𑀺 𑀮𑀤𑁆𑀥𑀲𑀤𑁆𑀤𑀸𑀦𑀁 𑀅𑀭𑀳𑀢𑀁. 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀧𑀲𑀸𑀤𑀲𑁄𑀫𑁆𑀫𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀺. 𑀲𑀘𑁂 𑀧𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀏𑀓𑀧𑀤𑀫𑁆𑀧𑀺 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫, 𑀲𑀸𑀥𑀼𑀢𑀭𑀁𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀢𑀼𑀝𑁆𑀞𑀫𑀸𑀦𑀲𑀸 𑀅𑀕𑀫𑀁𑀲𑀼. 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸𑀢𑀺 𑀏𑀢𑁂 𑀉𑀪𑀢𑁄𑀧𑀓𑁆𑀔𑀺𑀓𑀸, 𑀢𑁂 𑀏𑀯𑀁 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑀘𑁂 𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺 ‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀲𑀫𑀡𑀁 𑀕𑁄𑀢𑀫𑀁 𑀯𑀦𑁆𑀤𑀺𑀢𑁆𑀣𑀸’𑀢𑀺, 𑀢𑁂𑀲𑀁 ‘𑀓𑀺𑀁 𑀅𑀜𑁆𑀚𑀮𑀺𑀓𑀭𑀡𑀫𑀢𑁆𑀢𑁂𑀦𑀸𑀧𑀺 𑀯𑀦𑁆𑀤𑀺𑀢𑀁 𑀳𑁄𑀢𑀻’𑀢𑀺 𑀯𑀓𑁆𑀔𑀸𑀫. 𑀲𑀘𑁂 𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺 ‘𑀓𑀲𑁆𑀫𑀸 𑀪𑀕𑀯𑀦𑁆𑀢𑀁 𑀦 𑀯𑀦𑁆𑀤𑀺𑀢𑁆𑀣𑀸’𑀢𑀺, ‘𑀓𑀺𑀁 𑀲𑀻𑀲𑁂𑀦 𑀪𑀽𑀫𑀺𑀁 𑀧𑀳𑀭𑀦𑁆𑀢𑁂𑀦𑁂𑀯 𑀯𑀦𑁆𑀤𑀺𑀢𑀁 𑀳𑁄𑀢𑀺. 𑀦𑀦𑀼 𑀅𑀜𑁆𑀚𑀮𑀺𑀓𑀫𑁆𑀫𑀫𑁆𑀧𑀺 𑀯𑀦𑁆𑀤𑀦𑀸 𑀏𑀯𑀸’𑀢𑀺 𑀯𑀓𑁆𑀔𑀸𑀫𑀸’’𑀢𑀺.

𑀦𑀸𑀫𑀕𑁄𑀢𑁆𑀢𑀦𑁆𑀢𑀺, ‘‘𑀪𑁄 𑀕𑁄𑀢𑀫, 𑀅𑀳𑀁 𑀅𑀲𑀼𑀓𑀲𑁆𑀲 𑀧𑀼𑀢𑁆𑀢𑁄 𑀤𑀢𑁆𑀢𑁄 𑀦𑀸𑀫 𑀫𑀺𑀢𑁆𑀢𑁄 𑀦𑀸𑀫 𑀇𑀥𑀸𑀕𑀢𑁄’’𑀢𑀺 𑀯𑀤𑀦𑁆𑀢𑀸 𑀦𑀸𑀫𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. ‘‘𑀪𑁄 𑀕𑁄𑀢𑀫, 𑀅𑀳𑀁 𑀯𑀸𑀲𑁂𑀝𑁆𑀞𑁄 𑀦𑀸𑀫 𑀓𑀘𑁆𑀘𑀸𑀦𑁄 𑀦𑀸𑀫 𑀇𑀥𑀸𑀕𑀢𑁄’’𑀢𑀺 𑀯𑀤𑀦𑁆𑀢𑀸 𑀕𑁄𑀢𑁆𑀢𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. 𑀏𑀢𑁂 𑀓𑀺𑀭 𑀤𑀮𑀺𑀤𑁆𑀤𑀸 𑀚𑀺𑀡𑁆𑀡𑀓𑀼𑀮𑀧𑀼𑀢𑁆𑀢𑀸 ‘‘𑀧𑀭𑀺𑀲𑀫𑀚𑁆𑀛𑁂 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀧𑀸𑀓𑀝𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀅𑀓𑀁𑀲𑀼. 𑀬𑁂 𑀧𑀦 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀺𑀁𑀲𑀼, 𑀢𑁂 𑀓𑁂𑀭𑀸𑀝𑀺𑀓𑀸 𑀘𑁂𑀯 𑀅𑀦𑁆𑀥𑀩𑀸𑀮𑀸 𑀘. 𑀢𑀢𑁆𑀣 𑀓𑁂𑀭𑀸𑀝𑀺𑀓𑀸 ‘‘𑀏𑀓𑀁 𑀤𑁆𑀯𑁂 𑀓𑀣𑀸𑀲𑀮𑁆𑀮𑀸𑀧𑁂 𑀓𑀭𑁄𑀦𑁆𑀢𑁂 𑀯𑀺𑀲𑁆𑀲𑀸𑀲𑀺𑀓𑁄 𑀳𑁄𑀢𑀺, 𑀅𑀣 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀏𑀓𑀁 𑀤𑁆𑀯𑁂 𑀪𑀺𑀓𑁆𑀔𑀸 𑀅𑀤𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀢𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑀸 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀦𑁆𑀢𑀺. 𑀅𑀦𑁆𑀥𑀩𑀸𑀮𑀸 𑀅𑀜𑁆𑀜𑀸𑀡𑀢𑀸𑀬𑁂𑀯 𑀅𑀯𑀓𑁆𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀸 𑀯𑀺𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀦𑁆𑀢𑀺.

𑀯𑁂𑀦𑀸𑀕𑀧𑀼𑀭𑀺𑀓𑁄𑀢𑀺 𑀯𑁂𑀦𑀸𑀕𑀧𑀼𑀭𑀯𑀸𑀲𑀻. 𑀏𑀢𑀤𑀯𑁄𑀘𑀸𑀢𑀺 𑀧𑀸𑀤𑀦𑁆𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀕𑁆𑀕𑀸 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀮𑁄𑀓𑁂𑀦𑁆𑀢𑁄 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑀼𑀚𑁆𑀚𑀮𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀲𑀭𑀻𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀤𑁂𑀲𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸𑀳𑀺 𑀙𑀩𑁆𑀩𑀡𑁆𑀡𑀸𑀳𑀺 𑀖𑀦𑀩𑀼𑀤𑁆𑀥𑀭𑀁𑀲𑀻𑀳𑀺 𑀲𑀫𑁆𑀧𑀭𑀺𑀯𑀸𑀭𑀺𑀢𑀁 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀯𑀺𑀫𑁆𑀳𑀬𑁄 𑀯𑀡𑁆𑀡𑀁 𑀪𑀡𑀦𑁆𑀢𑁄 𑀏𑀢𑀁 ‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑀢𑁆𑀣 𑀬𑀸𑀯𑀜𑁆𑀘𑀺𑀤𑀦𑁆𑀢𑀺 𑀅𑀥𑀺𑀫𑀢𑁆𑀢𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀯𑀘𑀦𑀫𑁂𑀢𑀁. 𑀢𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄. 𑀬𑀸𑀯𑀜𑁆𑀘 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀅𑀥𑀺𑀫𑀢𑁆𑀢𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀘𑀓𑁆𑀔𑀸𑀤𑀻𑀦𑀺 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑀲𑁆𑀲 𑀳𑀺 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀢𑀁 𑀤𑀺𑀲𑁆𑀯𑀸 𑀢𑁂𑀲𑀁 𑀯𑀺𑀧𑁆𑀧𑀲𑀦𑁆𑀦𑀢𑀸 𑀧𑀸𑀓𑀝𑀸 𑀅𑀳𑁄𑀲𑀺. 𑀬𑀲𑁆𑀫𑀸 𑀧𑀦 𑀲𑀸 𑀫𑀦𑁂 𑀯𑀺𑀧𑁆𑀧𑀲𑀦𑁆𑀦𑁂𑀬𑁂𑀯 𑀳𑁄𑀢𑀺, 𑀅𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑀸𑀦𑀜𑁆𑀳𑀺 𑀇𑀦𑁆𑀤𑁆𑀭𑀺𑀬𑀧𑁆𑀧𑀲𑀸𑀤𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸𑀲𑁆𑀲 𑀫𑀦𑀺𑀦𑁆𑀤𑁆𑀭𑀺𑀬𑀧𑁆𑀧𑀲𑀸𑀤𑁄𑀧𑀺 𑀧𑀸𑀓𑀝𑁄 𑀅𑀳𑁄𑀲𑀺. 𑀢𑀁 𑀏𑀲 𑀯𑀺𑀧𑁆𑀧𑀲𑀦𑁆𑀦𑀢𑀁 𑀕𑀳𑁂𑀢𑁆𑀯𑀸 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀆𑀳. 𑀧𑀭𑀺𑀲𑀼𑀤𑁆𑀥𑁄𑀢𑀺 𑀦𑀺𑀫𑁆𑀫𑀮𑁄. 𑀧𑀭𑀺𑀬𑁄𑀤𑀸𑀢𑁄𑀢𑀺 𑀧𑀪𑀲𑁆𑀲𑀭𑁄. 𑀲𑀸𑀭𑀤𑀁 𑀩𑀤𑀭𑀧𑀡𑁆𑀟𑀼𑀦𑁆𑀢𑀺 𑀲𑀭𑀤𑀓𑀸𑀮𑁂 𑀚𑀸𑀢𑀁 𑀦𑀸𑀢𑀺𑀲𑀼𑀧𑀭𑀺𑀧𑀓𑁆𑀓𑀁 𑀩𑀤𑀭𑀁. 𑀢𑀜𑁆𑀳𑀺 𑀧𑀭𑀺𑀲𑀼𑀤𑁆𑀥𑀜𑁆𑀘𑁂𑀯 𑀳𑁄𑀢𑀺 𑀧𑀭𑀺𑀬𑁄𑀤𑀸𑀢𑀜𑁆𑀘. 𑀢𑀸𑀮𑀧𑀓𑁆𑀓𑀦𑁆𑀢𑀺 𑀲𑀼𑀧𑀭𑀺𑀧𑀓𑁆𑀓𑀢𑀸𑀮𑀨𑀮𑀁. 𑀲𑀫𑁆𑀧𑀢𑀺 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑀦𑁆𑀢𑀺 𑀢𑀁𑀔𑀡𑀜𑁆𑀜𑁂𑀯 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀩𑀦𑁆𑀥𑀦𑀫𑀽𑀮𑀁 𑀅𑀧𑀦𑁂𑀢𑁆𑀯𑀸 𑀧𑀭𑀫𑀼𑀔𑀁 𑀓𑀢𑁆𑀯𑀸 𑀨𑀮𑀓𑁂 𑀞𑀧𑀺𑀢𑀲𑁆𑀲 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁 𑀳𑀼𑀢𑁆𑀯𑀸 𑀔𑀸𑀬𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀦𑁂𑀓𑁆𑀔𑀁 𑀚𑀫𑁆𑀩𑁄𑀦𑀤𑀦𑁆𑀢𑀺 𑀲𑀼𑀭𑀢𑁆𑀢𑀯𑀡𑁆𑀡𑀲𑁆𑀲 𑀚𑀫𑁆𑀩𑁄𑀦𑀤𑀲𑀼𑀯𑀡𑁆𑀡𑀲𑁆𑀲 𑀖𑀝𑀺𑀓𑀸. 𑀤𑀓𑁆𑀔𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑀼𑀧𑀭𑀺𑀓𑀫𑁆𑀫𑀓𑀢𑀦𑁆𑀢𑀺 𑀤𑀓𑁆𑀔𑁂𑀦 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑁂𑀦 𑀲𑀼𑀝𑁆𑀞𑀼 𑀓𑀢𑀧𑀭𑀺𑀓𑀫𑁆𑀫𑀁. 𑀉𑀓𑁆𑀓𑀸𑀫𑀼𑀔𑁂 𑀲𑀼𑀓𑀼𑀲𑀮𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀲𑀼𑀯𑀡𑁆𑀡𑀓𑀸𑀭𑀉𑀤𑁆𑀥𑀦𑁂 𑀧𑀘𑀺𑀢𑁆𑀯𑀸 𑀲𑀼𑀓𑀼𑀲𑀮𑁂𑀦 𑀲𑀼𑀯𑀡𑁆𑀡𑀓𑀸𑀭𑁂𑀦 𑀖𑀝𑁆𑀝𑀦𑀧𑀭𑀺𑀫𑀚𑁆𑀚𑀦𑀳𑀁𑀲𑀦𑁂𑀦 𑀲𑀼𑀝𑁆𑀞𑀼 𑀧𑀳𑀝𑁆𑀞𑀁 𑀲𑀼𑀧𑀭𑀺𑀫𑀤𑁆𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀅𑀕𑁆𑀕𑀺𑀦𑀸 𑀧𑀘𑀺𑀢𑁆𑀯𑀸 𑀤𑀻𑀧𑀺𑀤𑀸𑀞𑀸𑀬 𑀖𑀁𑀲𑀺𑀢𑁆𑀯𑀸 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑁂 𑀞𑀧𑀺𑀢𑀁. 𑀪𑀸𑀲𑀢𑁂𑀢𑀺 𑀲𑀜𑁆𑀚𑀸𑀢𑀑𑀪𑀸𑀲𑀢𑀸𑀬 𑀪𑀸𑀲𑀢𑁂. 𑀢𑀧𑀢𑁂𑀢𑀺 𑀅𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀦𑀢𑀸𑀬 𑀢𑀧𑀢𑁂. 𑀯𑀺𑀭𑁄𑀘𑀢𑀻𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑀁 𑀳𑀼𑀢𑁆𑀯𑀸 𑀯𑀺𑀭𑁄𑀘𑀢𑀺, 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄.

𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀻𑀢𑀺 𑀏𑀢𑁆𑀣 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀁 𑀉𑀘𑁆𑀘𑀸𑀲𑀬𑀦𑀁 𑀦𑀸𑀫, 𑀆𑀬𑀢𑀯𑀺𑀢𑁆𑀣𑀢𑀁 𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀫𑀳𑀸𑀲𑀬𑀦𑀁 𑀦𑀸𑀫. 𑀇𑀤𑀸𑀦𑀺 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀺𑀤𑀁, 𑀆𑀲𑀦𑁆𑀤𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀦𑁆𑀤𑀻𑀢𑀺 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀁 𑀆𑀲𑀦𑀁. 𑀧𑀮𑁆𑀮𑀗𑁆𑀓𑁄𑀢𑀺 𑀧𑀸𑀤𑁂𑀲𑀼 𑀯𑀸𑀴𑀭𑀽𑀧𑀸𑀦𑀺 𑀞𑀧𑁂𑀢𑁆𑀯𑀸 𑀓𑀢𑁄. 𑀕𑁄𑀦𑀓𑁄𑀢𑀺 𑀤𑀻𑀖𑀮𑁄𑀫𑀓𑁄 𑀫𑀳𑀸𑀓𑁄𑀚𑀯𑁄. 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀺 𑀓𑀺𑀭 𑀢𑀲𑁆𑀲 𑀮𑁄𑀫𑀸𑀦𑀺. 𑀘𑀺𑀢𑁆𑀢𑀓𑁄𑀢𑀺 𑀯𑀸𑀦𑀘𑀺𑀢𑁆𑀢𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀧𑀝𑀺𑀓𑀸𑀢𑀺 𑀉𑀡𑁆𑀡𑀸𑀫𑀬𑁄 𑀲𑁂𑀢𑀢𑁆𑀣𑀭𑀓𑁄. 𑀧𑀝𑀮𑀺𑀓𑀸𑀢𑀺 𑀖𑀦𑀧𑀼𑀧𑁆𑀨𑁄 𑀉𑀡𑁆𑀡𑀸𑀫𑀬𑀢𑁆𑀣𑀭𑀓𑁄, 𑀬𑁄 𑀆𑀫𑀮𑀓𑀧𑀝𑁆𑀝𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀽𑀮𑀺𑀓𑀸𑀢𑀺 𑀢𑀺𑀡𑁆𑀡𑀁 𑀢𑀽𑀮𑀸𑀦𑀁 𑀅𑀜𑁆𑀜𑀢𑀭𑀧𑀼𑀡𑁆𑀡𑀸 𑀢𑀽𑀮𑀺𑀓𑀸. 𑀯𑀺𑀓𑀢𑀺𑀓𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑀯𑀺𑀘𑀺𑀢𑁆𑀭𑁄 𑀉𑀡𑁆𑀡𑀸𑀫𑀬𑀢𑁆𑀣𑀭𑀓𑁄. 𑀉𑀤𑁆𑀤𑀮𑁄𑀫𑀻𑀢𑀺 𑀉𑀪𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀓𑁂𑀘𑀺 𑀏𑀓𑀢𑁄 𑀉𑀕𑁆𑀕𑀢𑀧𑀼𑀧𑁆𑀨𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀓𑀦𑁆𑀢𑀮𑁄𑀫𑀻𑀢𑀺 𑀏𑀓𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀓𑁂𑀘𑀺 𑀉𑀪𑀢𑁄 𑀉𑀕𑁆𑀕𑀢𑀧𑀼𑀧𑁆𑀨𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀝𑁆𑀝𑀺𑀲𑁆𑀲𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁. 𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀫𑁂𑀯 𑀓𑁄𑀲𑀺𑀬𑀲𑀼𑀢𑁆𑀢𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁. 𑀓𑀼𑀢𑁆𑀢𑀓𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀦𑀸𑀝𑀓𑀺𑀢𑁆𑀣𑀻𑀦𑀁 𑀞𑀢𑁆𑀯𑀸 𑀦𑀘𑁆𑀘𑀦𑀬𑁄𑀕𑁆𑀕𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀳𑀢𑁆𑀣𑀢𑁆𑀣𑀭𑀸𑀤𑀬𑁄 𑀳𑀢𑁆𑀣𑀺𑀧𑀺𑀝𑁆𑀞𑀸𑀤𑀻𑀲𑀼 𑀅𑀢𑁆𑀣𑀭𑀡𑀓𑀅𑀢𑁆𑀣𑀭𑀓𑀸 𑀘𑁂𑀯 𑀳𑀢𑁆𑀣𑀺𑀭𑀽𑀧𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀅𑀢𑁆𑀣𑀭𑀓𑀸 𑀘. 𑀅𑀚𑀺𑀦𑀧𑁆𑀧𑀯𑁂𑀡𑀻𑀢𑀺 𑀅𑀚𑀺𑀦𑀘𑀫𑁆𑀫𑁂𑀳𑀺 𑀫𑀜𑁆𑀘𑀧𑁆𑀧𑀫𑀸𑀡𑁂𑀦 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀧𑁆𑀧𑀯𑁂𑀡𑀻. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀦𑀺𑀓𑀸𑀫𑀮𑀸𑀪𑀻𑀢𑀺 𑀅𑀢𑀺𑀓𑀸𑀫𑀮𑀸𑀪𑀻 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀮𑀸𑀪𑀻. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀅𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻 𑀫𑀳𑀦𑁆𑀢𑀮𑀸𑀪𑀻, 𑀉𑀴𑀸𑀭𑀼𑀴𑀸𑀭𑀸𑀦𑁂𑀯 𑀮𑀪𑀢𑀺 𑀫𑀜𑁆𑀜𑁂𑀢𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀬𑀁 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀲𑀬𑀦𑀕𑀭𑀼𑀓𑁄, 𑀲𑁄 𑀪𑀕𑀯𑀢𑁄 𑀯𑀺𑀧𑁆𑀧𑀲𑀦𑁆𑀦𑀺𑀦𑁆𑀤𑁆𑀭𑀺𑀬𑀸𑀤𑀺𑀢𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀏𑀲 𑀏𑀯𑀭𑀽𑀧𑁂𑀲𑀼 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑁂𑀲𑀼 𑀦𑀺𑀲𑀻𑀤𑀢𑀺 𑀘𑁂𑀯 𑀦𑀺𑀧𑀚𑁆𑀚𑀢𑀺 𑀘. 𑀢𑁂𑀦𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀇𑀫𑀁 𑀲𑁂𑀦𑀸𑀲𑀦𑀯𑀡𑁆𑀡𑀁 𑀓𑀣𑁂𑀲𑀺.

𑀮𑀤𑁆𑀥𑀸 𑀘 𑀧𑀦 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀧𑁆𑀧𑀢𑀺. 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀜𑁆𑀳𑀺 𑀫𑀜𑁆𑀘𑁂𑀧𑀺 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀕𑁄𑀦𑀓𑀸𑀤𑀬𑁄 𑀘 𑀪𑀽𑀫𑀢𑁆𑀣𑀭𑀡𑀧𑀭𑀺𑀪𑁄𑀕𑁂𑀦, 𑀆𑀲𑀦𑁆𑀤𑀺𑀬𑀸 𑀧𑀸𑀤𑁂 𑀙𑀺𑀦𑁆𑀤𑀺𑀢𑁆𑀯𑀸, 𑀧𑀮𑁆𑀮𑀗𑁆𑀓𑀲𑁆𑀲 𑀯𑀸𑀴𑁂 𑀪𑀺𑀦𑁆𑀤𑀺𑀢𑁆𑀯𑀸, 𑀢𑀽𑀮𑀺𑀓𑀁 𑀯𑀺𑀚𑀝𑁂𑀢𑁆𑀯𑀸 ‘‘𑀩𑀺𑀫𑁆𑀩𑁄𑀳𑀦𑀜𑁆𑀘 𑀓𑀸𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀇𑀫𑀸𑀦𑀺𑀧𑀺 𑀏𑀓𑁂𑀦 𑀯𑀺𑀥𑀸𑀦𑁂𑀦 𑀓𑀧𑁆𑀧𑀦𑁆𑀢𑀺. 𑀅𑀓𑀧𑁆𑀧𑀺𑀬𑀁 𑀧𑀦 𑀉𑀧𑀸𑀤𑀸𑀬 𑀲𑀩𑁆𑀩𑀸𑀦𑁂𑀯 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀺.

𑀯𑀦𑀦𑁆𑀢𑀜𑁆𑀜𑁂𑀯 𑀧𑀯𑀺𑀲𑀸𑀫𑀻𑀢𑀺 𑀅𑀭𑀜𑁆𑀜𑀁𑀬𑁂𑀯 𑀧𑀯𑀺𑀲𑀸𑀫𑀺. 𑀬𑀤𑁂𑀯𑀸𑀢𑀺 𑀬𑀸𑀦𑀺𑀬𑁂𑀯. 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁 𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀦𑁆𑀢𑁄 𑀉𑀚𑀼𑀁 𑀓𑀸𑀬𑀁 𑀞𑀧𑁂𑀢𑁆𑀯𑀸. 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑁂𑀢𑁆𑀯𑀸, 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀯𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄. 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄. 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 (𑀧𑀝𑀺. 𑀫. 𑁧.𑁧𑁬𑁪). 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀯𑀺𑀳𑀭𑀸𑀫𑀺. 𑀏𑀯𑀁𑀪𑀽𑀢𑁄𑀢𑀺 𑀏𑀯𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀳𑀼𑀢𑁆𑀯𑀸. 𑀤𑀺𑀩𑁆𑀩𑁄 𑀫𑁂 𑀏𑀲𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑁄 𑀳𑁄𑀢𑀻𑀢𑀺 𑀘𑀢𑁆𑀢𑀸𑀭𑀺 𑀳𑀺 𑀭𑀽𑀧𑀚𑁆𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑀲𑁆𑀲 𑀘𑀗𑁆𑀓𑀫𑁄 𑀤𑀺𑀩𑁆𑀩𑀘𑀗𑁆𑀓𑀫𑁄 𑀦𑀸𑀫 𑀳𑁄𑀢𑀺, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀘𑀗𑁆𑀓𑀫𑀦𑁆𑀢𑀲𑁆𑀲𑀸𑀧𑀺 𑀘𑀗𑁆𑀓𑀫𑁄 𑀤𑀺𑀩𑁆𑀩𑀘𑀗𑁆𑀓𑀫𑁄𑀬𑁂𑀯. 𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀯𑀺𑀳𑀸𑀭𑁂𑀲𑀼.

𑀲𑁄 𑀏𑀯𑀁 𑀧𑀚𑀸𑀦𑀸𑀫𑀺 ‘‘𑀭𑀸𑀕𑁄 𑀫𑁂 𑀧𑀳𑀻𑀦𑁄’’𑀢𑀺 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀦𑀭𑀸𑀕𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀏𑀯𑀁 𑀧𑀚𑀸𑀦𑀸𑀫𑀺 𑀭𑀸𑀕𑁄 𑀫𑁂 𑀧𑀳𑀻𑀦𑁄’’𑀢𑀺 𑀆𑀳. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀧𑀦 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺? 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸, 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸. 𑀨𑀮𑀲𑀫𑀸𑀧𑀢𑁆𑀢𑀺𑀜𑁆𑀳𑀺 𑀲𑀫𑀸𑀧𑀦𑁆𑀦𑀲𑁆𑀲𑀧𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲𑀸𑀧𑀺 𑀘𑀗𑁆𑀓𑀫𑀸𑀤𑀬𑁄 𑀅𑀭𑀺𑀬𑀘𑀗𑁆𑀓𑀫𑀸𑀤𑀬𑁄 𑀳𑁄𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁪. 𑀲𑀭𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀘𑀢𑀼𑀢𑁆𑀣𑁂 𑀭𑀸𑀚𑀕𑀳𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂𑀢𑀺 𑀕𑀺𑀚𑁆𑀛𑀲𑀤𑀺𑀲𑀸𑀦𑀺𑀲𑁆𑀲 𑀓𑀽𑀝𑀸𑀦𑀺, 𑀕𑀺𑀚𑁆𑀛𑀸 𑀯𑀸 𑀢𑀲𑁆𑀲 𑀓𑀽𑀝𑁂𑀲𑀼 𑀯𑀲𑀦𑁆𑀢𑀻𑀢𑀺 𑀕𑀺𑀚𑁆𑀛𑀓𑀽𑀝𑁄, 𑀢𑀲𑁆𑀫𑀺𑀁 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀏𑀢𑁂𑀦𑀲𑁆𑀲 𑀭𑀸𑀚𑀕𑀳𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁. 𑀕𑀺𑀚𑁆𑀛𑀓𑀽𑀝𑀲𑁆𑀫𑀺𑀜𑁆𑀳𑀺 𑀢𑀣𑀸𑀕𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀕𑀺𑀚𑁆𑀛𑀓𑀽𑀝𑀯𑀺𑀳𑀸𑀭𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁. 𑀢𑀢𑁆𑀣𑀸𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀭𑀢𑀻𑀢𑀺. 𑀲𑀭𑀪𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺 𑀲𑀭𑀪𑁄𑀢𑀺 𑀏𑀯𑀁𑀦𑀸𑀫𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀧𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀅𑀥𑀼𑀦𑀸 𑀯𑀺𑀩𑁆𑀪𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀳𑀺 𑀮𑁄𑀓𑁂 𑀉𑀧𑁆𑀧𑀦𑁆𑀦𑁂 𑀢𑀺𑀢𑁆𑀣𑀺𑀬𑀸 𑀦𑀝𑁆𑀞𑀮𑀸𑀪𑀲𑀓𑁆𑀓𑀸𑀭𑀸 𑀅𑀳𑁂𑀲𑀼𑀁, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀬𑀣𑀸𑀳 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸 𑀅𑀲𑀓𑁆𑀓𑀢𑀸 𑀳𑁄𑀦𑁆𑀢𑀺 𑀅𑀕𑀭𑀼𑀓𑀢𑀸 𑀅𑀫𑀸𑀦𑀺𑀢𑀸 𑀅𑀧𑀽𑀚𑀺𑀢𑀸 𑀦 𑀮𑀸𑀪𑀺𑀦𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀉𑀤𑀸.𑁧𑁪; 𑀲𑀁.𑀦𑀺.𑁧.𑁨.𑁭𑁦).

𑀢𑁂 𑀏𑀯𑀁 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀧𑀜𑁆𑀘𑀲𑀢𑀫𑀢𑁆𑀢𑀸 𑀏𑀓𑀲𑁆𑀫𑀺𑀁 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀫𑁆𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀪𑁄, 𑀫𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀚𑀸𑀢𑀸, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀜𑁆𑀘𑀲𑁆𑀲 𑀏𑀓𑀁 𑀅𑀯𑀡𑁆𑀡𑀁 𑀉𑀧𑀥𑀸𑀭𑁂𑀣, 𑀅𑀯𑀡𑁆𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀏𑀢𑀲𑁆𑀲 𑀲𑀸𑀲𑀦𑀁 𑀕𑀭𑀳𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀯𑀚𑁆𑀚𑀁 𑀑𑀮𑁄𑀓𑁂𑀦𑁆𑀢𑀸 𑁋 ‘‘𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀆𑀚𑀻𑀯𑁂 𑀘𑀸𑀢𑀺 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀚𑁆𑀚𑀁 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑀸, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀑𑀮𑁄𑀓𑁂𑀣𑀸’’𑀢𑀺 𑀆𑀳𑀁𑀲𑀼. 𑀅𑀣 𑀦𑁂𑀲𑀁 𑀅𑀦𑁆𑀢𑀭𑁂 𑀏𑀓𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀇𑀫𑁂 𑀅𑀦𑁆𑀯𑀟𑁆𑀠𑀫𑀸𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀧𑀺𑀥𑀸𑀬 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀧𑀯𑁂𑀲𑀦𑀁 𑀦 𑀤𑁂𑀦𑁆𑀢𑀺. 𑀚𑀻𑀯𑀺𑀢𑀲𑀤𑀺𑀲𑀸𑀧𑀺 𑀉𑀧𑀝𑁆𑀞𑀸𑀓𑀸 𑀤𑀝𑁆𑀞𑀼𑀁 𑀦 𑀮𑀪𑀦𑁆𑀢𑀺, 𑀆𑀯𑀝𑁆𑀝𑀦𑀺𑀫𑀸𑀬𑀁 𑀑𑀲𑀸𑀭𑁂𑀢𑁆𑀯𑀸 𑀑𑀲𑀸𑀭𑁂𑀢𑁆𑀯𑀸 𑀚𑀦𑀁 𑀆𑀯𑀝𑁆𑀝𑁂𑀢𑁆𑀯𑀸 𑀆𑀯𑀝𑁆𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀲𑀘𑁂 𑀢𑀁 𑀫𑀬𑀁 𑀆𑀳𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫, 𑀏𑀯𑀁 𑀦𑁄 𑀮𑀸𑀪𑀲𑀓𑁆𑀓𑀸𑀭𑀉𑀴𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀧𑀭𑁄𑀧𑀺 𑀏𑀯𑀫𑁂𑀯 𑀯𑀤𑀦𑁆𑀢𑁄 𑀉𑀝𑁆𑀞𑀸𑀲𑀺. 𑀲𑀩𑁆𑀩𑁂 𑀏𑀓𑀯𑀸𑀤𑀸 𑀅𑀳𑁂𑀲𑀼𑀁. 𑀢𑀢𑁄 𑀆𑀳𑀁𑀲𑀼 𑁋 ‘‘𑀬𑁄 𑀢𑀁 𑀆𑀳𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀢𑀁 𑀫𑀬𑀁 𑀅𑀫𑁆𑀳𑀸𑀓𑀁 𑀲𑀫𑀬𑁂 𑀚𑁂𑀝𑁆𑀞𑀓𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺.

𑀢𑀢𑁄 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 ‘‘𑀢𑁆𑀯𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀢𑁆𑀯𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀳𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀽𑀳𑀺 𑀯𑀼𑀢𑁆𑀢𑁂 𑀲𑀭𑀪𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑁆𑀯𑀁 𑀲𑀓𑁆𑀔𑀺𑀲𑁆𑀲𑀲𑀺 𑀆𑀘𑀭𑀺𑀬𑀸’’𑀢𑀺. 𑀲𑁄 𑀆𑀳 𑁋 ‘‘𑀅𑀕𑀭𑀼 𑀏𑀢𑀁 𑀆𑀳𑀭𑀺𑀢𑀼𑀁, 𑀲𑀘𑁂 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀣𑀸𑀬 𑀞𑀢𑁆𑀯𑀸 𑀫𑀁 𑀚𑁂𑀝𑁆𑀞𑀓𑀁 𑀓𑀭𑀺𑀲𑁆𑀲𑀣𑀸’’𑀢𑀺. 𑀅𑀕𑀭𑀼 𑀏𑀢𑀫𑀸𑀘𑀭𑀺𑀬 𑀆𑀳𑀭, 𑀢𑁆𑀯𑀁 𑀓𑀢𑁄𑀬𑁂𑀯𑀸𑀲𑀺 𑀅𑀫𑁆𑀳𑁂𑀳𑀺 𑀚𑁂𑀝𑁆𑀞𑀓𑁄𑀢𑀺. 𑀲𑁄 𑀆𑀳 𑁋 ‘‘𑀢𑀁 𑀆𑀳𑀭𑀦𑁆𑀢𑁂𑀦 𑀣𑁂𑀦𑁂𑀢𑁆𑀯𑀸 𑀯𑀸 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀸 𑀆𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀲𑀫𑀡𑀲𑁆𑀲 𑀧𑀦 𑀕𑁄𑀢𑀫𑀲𑁆𑀲 𑀲𑀸𑀯𑀓𑀲𑀤𑀺𑀲𑁂𑀦 𑀳𑀼𑀢𑁆𑀯𑀸 𑀢𑀲𑁆𑀲 𑀲𑀸𑀯𑀓𑁂 𑀯𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀢𑁂𑀲𑀁 𑀧𑀢𑁆𑀢𑁂 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀆𑀳𑀭𑀺𑀢𑀼𑀁 𑀲𑀓𑁆𑀓𑀸. 𑀭𑀼𑀘𑁆𑀘𑀢𑀺 𑀯𑁄 𑀏𑀢𑀲𑁆𑀲 𑀏𑀢𑁆𑀢𑀓𑀲𑁆𑀲 𑀓𑀺𑀭𑀺𑀬𑀸’’𑀢𑀺. 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀘 𑀦𑁄 𑀤𑁂𑀳𑀻𑀢𑀺. 𑀢𑁂𑀦 𑀳𑀺 𑀫𑀁 𑀤𑀺𑀲𑁆𑀯𑀸 𑀅𑀧𑀲𑁆𑀲𑀦𑁆𑀢𑀸 𑀯𑀺𑀬 𑀪𑀯𑁂𑀬𑁆𑀬𑀸𑀣𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀕𑀺𑀚𑁆𑀛𑀓𑀽𑀝𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀤𑀺𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀧𑀸𑀤𑁂 𑀯𑀦𑁆𑀤𑀺. 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀅𑀜𑁆𑀜𑁂 𑀧𑀭𑀺𑀩𑁆𑀩𑀸𑀚𑀓𑀸 𑀘𑀡𑁆𑀟𑀸 𑀨𑀭𑀼𑀲𑀸, 𑀅𑀬𑀁 𑀧𑀦 𑀲𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀧𑀲𑀦𑁆𑀦𑁄’’𑀢𑀺. 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀜𑀢𑁆𑀯𑀸 𑀬𑀼𑀢𑁆𑀢𑀝𑁆𑀞𑀸𑀦𑀲𑁆𑀫𑀺𑀁𑀬𑁂𑀯 𑀧𑀩𑁆𑀩𑀚𑀺𑀢𑀸, 𑀫𑀬𑀁 𑀧𑀦 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀅𑀢𑀺𑀢𑁆𑀣𑁂𑀦𑁂𑀯 𑀧𑀓𑁆𑀔𑀦𑁆𑀢𑀸 𑀅𑀦𑀺𑀬𑁆𑀬𑀸𑀦𑀺𑀓𑀫𑀕𑁆𑀕𑁂 𑀯𑀺𑀘𑀭𑀸𑀫𑀸𑀢𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑁂 𑀪𑀺𑀓𑁆𑀔𑀽 𑀧𑀼𑀦𑀧𑁆𑀧𑀼𑀦𑀁 𑀯𑀦𑁆𑀤𑀢𑀺, 𑀦𑁆𑀳𑀸𑀦𑁄𑀤𑀓𑀸𑀤𑀻𑀦𑀺 𑀧𑀝𑀺𑀬𑀸𑀤𑁂𑀢𑀺, 𑀤𑀦𑁆𑀢𑀓𑀝𑁆𑀞𑀁 𑀓𑀧𑁆𑀧𑀺𑀬𑀁 𑀓𑀭𑁄𑀢𑀺, 𑀧𑀸𑀤𑁂 𑀥𑁄𑀯𑀢𑀺 𑀫𑀓𑁆𑀔𑁂𑀢𑀺, 𑀅𑀢𑀺𑀭𑁂𑀓𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀪𑀼𑀜𑁆𑀚𑀢𑀺.

𑀢𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀯𑀲𑀦𑁆𑀢𑀁 𑀏𑀓𑁄 𑀫𑀳𑀸𑀣𑁂𑀭𑁄 𑀤𑀺𑀲𑁆𑀯𑀸, ‘‘𑀧𑀭𑀺𑀩𑁆𑀩𑀸𑀚𑀓, 𑀢𑁆𑀯𑀁 𑀲𑀤𑁆𑀥𑁄 𑀧𑀲𑀦𑁆𑀦𑁄, 𑀓𑀺𑀁 𑀦 𑀧𑀩𑁆𑀩𑀚𑀲𑀻’’𑀢𑀺. 𑀓𑁄 𑀫𑀁, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀲𑁆𑀲𑀢𑀺. 𑀫𑀬𑀜𑁆𑀳𑀺 𑀘𑀺𑀭𑀓𑀸𑀮𑀁 𑀪𑀤𑀦𑁆𑀢𑀸𑀦𑀁 𑀧𑀘𑁆𑀘𑀢𑁆𑀣𑀺𑀓𑀸 𑀳𑀼𑀢𑁆𑀯𑀸 𑀯𑀺𑀘𑀭𑀺𑀫𑁆𑀳𑀸𑀢𑀺. 𑀣𑁂𑀭𑁄 ‘‘𑀲𑀘𑁂 𑀢𑁆𑀯𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀅𑀳𑀁 𑀢𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀫𑀓𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑀯𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀲𑁄 𑀉𑀧𑁄𑀲𑀣𑀤𑀺𑀯𑀲𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀕𑁆𑀕𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀽 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀧𑀕𑁆𑀕𑀡𑁆𑀳𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀑𑀲𑀸𑀭𑁂𑀢𑁆𑀯𑀸 𑀑𑀲𑀸𑀭𑁂𑀢𑁆𑀯𑀸 𑀮𑁄𑀓𑀁 𑀔𑀸𑀤𑀦𑁆𑀢𑀺, 𑀓𑀢𑀺𑀧𑀸𑀳𑁂𑀦 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑁄 𑀦𑀸𑀫𑁄 𑀅𑀬𑀁 𑀥𑀫𑁆𑀫𑁄’’𑀢𑀺 𑀧𑀼𑀘𑁆𑀙𑀺. 𑀧𑀸𑀢𑀺𑀫𑁄𑀓𑁆𑀔𑁄 𑀦𑀸𑀫, 𑀆𑀯𑀼𑀲𑁄𑀢𑀺. 𑀉𑀢𑁆𑀢𑀫𑀥𑀫𑁆𑀫𑁄 𑀏𑀲, 𑀪𑀦𑁆𑀢𑁂, 𑀪𑀯𑀺𑀲𑁆𑀲𑀢𑀻𑀢𑀺. 𑀆𑀫, 𑀆𑀯𑀼𑀲𑁄, 𑀲𑀓𑀮𑀲𑀸𑀲𑀦𑀥𑀸𑀭𑀡𑀻 𑀅𑀬𑀁 𑀲𑀺𑀓𑁆𑀔𑀸𑀢𑀺. 𑀪𑀦𑁆𑀢𑁂, 𑀲𑀘𑁂 𑀏𑀲 𑀲𑀺𑀓𑁆𑀔𑀸𑀥𑀫𑁆𑀫𑁄 𑀉𑀢𑁆𑀢𑀫𑁄, 𑀇𑀫𑀫𑁂𑀯 𑀧𑀞𑀫𑀁 𑀕𑀡𑁆𑀳𑀸𑀫𑀻𑀢𑀺. 𑀕𑀡𑁆𑀳𑀸𑀯𑀼𑀲𑁄𑀢𑀺 𑀣𑁂𑀭𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀲𑁄 𑀕𑀡𑁆𑀳𑀦𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁂 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀻𑀤𑀺𑀲𑀁 𑀆𑀘𑀭𑀺𑀬𑀸’’𑀢𑀺 𑀧𑀼𑀘𑁆𑀙𑀺𑀢𑁄, ‘‘𑀆𑀯𑀼𑀲𑁄, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀓𑀢𑀺𑀧𑀸𑀳𑁂𑀦 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀆𑀳 𑁋 ‘‘𑀏𑀢𑁆𑀢𑀓𑀫𑁂𑀯, 𑀪𑀦𑁆𑀢𑁂, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻’’𑀢𑀺. 𑀏𑀢𑁆𑀢𑀓𑀫𑁂𑀯, 𑀆𑀯𑀼𑀲𑁄𑀢𑀺.

𑀲𑁄 𑀧𑀼𑀦𑀤𑀺𑀯𑀲𑁂 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑁄𑀯 𑀕𑀳𑀺𑀢𑀦𑀻𑀳𑀸𑀭𑁂𑀦𑁂𑀯 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀸 𑀦𑀺𑀓𑁆𑀔𑀫𑁆𑀫 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀧𑀭𑀺𑀩𑁆𑀩𑀸𑀚𑀓𑀸 𑀤𑀺𑀲𑁆𑀯𑀸 ‘‘𑀓𑀻𑀤𑀺𑀲𑀁, 𑀆𑀘𑀭𑀺𑀬, 𑀦𑀸𑀲𑀓𑁆𑀔𑀺𑀢𑁆𑀣 𑀫𑀜𑁆𑀜𑁂 𑀆𑀯𑀝𑁆𑀝𑀦𑀺𑀫𑀸𑀬𑀁 𑀆𑀳𑀭𑀺𑀢𑀼’’𑀦𑁆𑀢𑀺 𑀢𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀆𑀯𑀼𑀲𑁄, 𑀆𑀳𑀝𑀸 𑀫𑁂 𑀆𑀯𑀝𑁆𑀝𑀦𑀺𑀫𑀸𑀬𑀸, 𑀇𑀢𑁄 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑀸 𑀪𑀯𑀺𑀲𑁆𑀲𑀢𑀺. 𑀢𑀼𑀫𑁆𑀳𑁂 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑀸 𑀳𑁄𑀣, 𑀫𑀸 𑀯𑀺𑀯𑀸𑀤𑀁 𑀅𑀓𑀢𑁆𑀣𑀸𑀢𑀺. 𑀲𑀘𑁂 𑀢𑁂, 𑀆𑀘𑀭𑀺𑀬, 𑀲𑀼𑀕𑁆𑀕𑀳𑀺𑀢𑀸, 𑀅𑀫𑁆𑀳𑁂𑀧𑀺 𑀦𑀁 𑀯𑀸𑀘𑁂𑀳𑀻𑀢𑀺. 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀑𑀲𑀸𑀭𑁂𑀲𑀺. 𑀅𑀣 𑀢𑁂 𑀲𑀩𑁆𑀩𑁂𑀧𑀺 𑁋 ‘‘𑀏𑀣, 𑀪𑁄, 𑀦𑀕𑀭𑁂 𑀯𑀺𑀘𑀭𑀦𑁆𑀢𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀓𑀣𑁂𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀕𑁆𑀖𑀸𑀝𑀺𑀢𑁂𑀲𑀼𑀬𑁂𑀯 𑀦𑀕𑀭𑀤𑁆𑀯𑀸𑀭𑁂𑀲𑀼 𑀤𑁆𑀯𑀸𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀯𑀺𑀯𑀝𑁂𑀦 𑀤𑁆𑀯𑀸𑀭𑁂𑀦 𑀲𑀩𑁆𑀩𑀧𑀞𑀫𑀁 𑀧𑀯𑀺𑀲𑀺𑀁𑀲𑀼. 𑀏𑀯𑀁 𑀲𑀮𑀺𑀗𑁆𑀕𑁂𑀦𑁂𑀯 𑀅𑀧𑀓𑁆𑀓𑀦𑁆𑀢𑀁 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀲𑀦𑁆𑀥𑀸𑀬 𑁋 ‘‘𑀲𑀭𑀪𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀁 𑀤𑀺𑀯𑀲𑀁 𑀧𑀦 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀤𑀁 𑀅𑀤𑁆𑀤𑀲 𑁋 ‘‘𑀅𑀚𑁆𑀚 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀦𑀕𑀭𑁂 𑀯𑀺𑀘𑀭𑀺𑀢𑁆𑀯𑀸 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀅𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀯𑀺𑀲𑀁 𑀲𑀺𑀜𑁆𑀘𑀺𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀕𑀫𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀢𑀢𑁆𑀣𑁂𑀯 𑀕𑀫𑀺𑀲𑁆𑀲𑀸𑀫𑀺, 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀢𑀢𑁆𑀣𑁂𑀯 𑀑𑀲𑀭𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁄 ‘‘𑀢𑀲𑁆𑀲 𑀑𑀓𑀸𑀲𑁄 𑀳𑁄𑀢𑀼, 𑀬𑀣𑀸𑀭𑀼𑀘𑀺𑀬𑀸 𑀅𑀯𑀡𑁆𑀡𑀁 𑀧𑀢𑁆𑀣𑀭𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀆𑀭𑁄𑀘𑁂𑀳𑀻’’𑀢𑀺. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀪𑀺𑀓𑁆𑀔𑀽 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀢𑁆𑀣𑀸𑀭𑀫𑁂𑀯 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀸𑀬 𑀤𑁆𑀯𑀸𑀭𑀕𑀸𑀫𑀲𑀫𑀻𑀧𑁂𑀬𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺. 𑀲𑀭𑀪𑁄𑀧𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀦𑀕𑀭𑀁 𑀧𑀯𑀺𑀝𑁆𑀞𑁄 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀲𑀫𑀚𑁆𑀛𑁂 𑀭𑀸𑀚𑀤𑁆𑀯𑀸𑀭𑀯𑀻𑀣𑀺𑀘𑀢𑀼𑀓𑁆𑀓𑀸𑀤𑀻𑀲𑀼 𑀘 𑀕𑀦𑁆𑀢𑁆𑀯𑀸 ‘‘𑀅𑀜𑁆𑀜𑀸𑀢𑁄 𑀫𑀬𑀸 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀅𑀪𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀲𑁄 𑀭𑀸𑀚𑀕𑀳𑁂 𑀧𑀭𑀺𑀲𑀢𑀺 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀸𑀢𑁄𑀢𑀺 𑀜𑀸𑀢𑁄 𑀅𑀯𑀩𑀼𑀤𑁆𑀥𑁄, 𑀧𑀸𑀓𑀝𑀁 𑀓𑀢𑁆𑀯𑀸 𑀉𑀕𑁆𑀕𑀳𑀺𑀢𑁄𑀢𑀺 𑀤𑀻𑀧𑁂𑀢𑀺. 𑀅𑀜𑁆𑀜𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀅𑀧𑀓𑁆𑀓𑀦𑁆𑀢𑁄𑀢𑀺 𑀲𑀮𑀺𑀗𑁆𑀕𑁂𑀦𑁂𑀯 𑀅𑀧𑀓𑁆𑀓𑀦𑁆𑀢𑁄. 𑀲𑀘𑁂 𑀳𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀲𑀦𑁂 𑀓𑁄𑀘𑀺 𑀲𑀸𑀭𑁄 𑀅𑀪𑀯𑀺𑀲𑁆𑀲, 𑀦𑀸𑀳𑀁 𑀅𑀧𑀓𑁆𑀓𑀫𑀺𑀲𑁆𑀲𑀁. 𑀢𑀲𑁆𑀲 𑀧𑀦 𑀲𑀸𑀲𑀦𑀁 𑀅𑀲𑀸𑀭𑀁 𑀦𑀺𑀲𑁆𑀲𑀸𑀭𑀁, 𑀆𑀯𑀝𑁆𑀝𑀦𑀺𑀫𑀸𑀬𑀁 𑀑𑀲𑀸𑀭𑁂𑀢𑁆𑀯𑀸 𑀲𑀫𑀡𑀸 𑀮𑁄𑀓𑀁 𑀔𑀸𑀤𑀦𑁆𑀢𑀻𑀢𑀺 𑀏𑀯𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀅𑀣 𑀏𑀯𑀁 𑀢𑀲𑁆𑀫𑀺𑀁 𑀧𑀭𑀺𑀩𑁆𑀩𑀸𑀚𑀓𑁂 𑀪𑀸𑀲𑀫𑀸𑀦𑁂 𑀅𑀭𑀜𑁆𑀜𑀯𑀸𑀲𑀺𑀦𑁄 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 ‘‘𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀕𑀢𑁄’’𑀢𑀺 𑀅𑀚𑀸𑀦𑀦𑁆𑀢𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀢𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀲𑁆𑀲𑁄𑀲𑀼𑀦𑁆𑀢𑀺 𑀲𑀼𑀡𑀺𑀁𑀲𑀼. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 ‘‘𑀇𑀫𑀁 𑀓𑀸𑀭𑀡𑀁 𑀤𑀲𑀩𑀮𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑀦𑁆𑀢𑀺 𑀲𑀺𑀧𑁆𑀧𑀺𑀦𑀺𑀓𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑀁. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀢𑀺 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂 𑀔𑀦𑁆𑀢𑀺𑀁 𑀥𑀸𑀭𑁂𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀥𑀺𑀯𑀸𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀲𑀭𑀪𑀲𑁆𑀲 𑀯𑀸𑀤𑀁 𑀫𑀤𑁆𑀤𑀺𑀢𑀼𑀁 𑀕𑀘𑁆𑀙𑀦𑁆𑀢𑁂𑀦 𑀏𑀓𑀓𑁂𑀦 𑀕𑀦𑁆𑀢𑀩𑁆𑀩𑀁, 𑀉𑀤𑀸𑀳𑀼 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁂𑀦𑀸’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 𑀲𑀘𑀸𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀫𑀺𑀲𑁆𑀲𑀸𑀫𑀺, 𑀫𑀳𑀸𑀚𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑁆𑀲𑀢𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀯𑀸𑀤𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀧𑀓𑁆𑀔𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀭𑀺𑀲𑀩𑀮𑁂𑀦 𑀉𑀧𑁆𑀧𑀦𑁆𑀦𑀁 𑀯𑀸𑀤𑀁 𑀫𑀤𑁆𑀤𑀢𑀺, 𑀧𑀭𑀯𑀸𑀤𑀻𑀦𑀁 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀢𑀻’’𑀢𑀺. 𑀦 𑀔𑁄 𑀧𑀦 𑀫𑀬𑁆𑀳𑀁 𑀉𑀧𑁆𑀧𑀦𑁆𑀦𑁂 𑀯𑀸𑀤𑁂 𑀧𑀭𑀁 𑀕𑀳𑁂𑀢𑁆𑀯𑀸 𑀫𑀤𑁆𑀤𑀦𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀅𑀳𑀫𑁂𑀯 𑀕𑀦𑁆𑀢𑁆𑀯𑀸 𑀫𑀤𑁆𑀤𑀺𑀲𑁆𑀲𑀸𑀫𑀺. 𑀅𑀦𑀘𑁆𑀙𑀭𑀺𑀬𑀁 𑀘𑁂𑀢𑀁 𑀬𑁆𑀯𑀸𑀳𑀁 𑀇𑀤𑀸𑀦𑀺 𑀩𑀼𑀤𑁆𑀥𑀪𑀽𑀢𑁄 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀁 𑀯𑀸𑀤𑀁 𑀫𑀤𑁆𑀤𑁂𑀬𑁆𑀬𑀁, 𑀘𑀭𑀺𑀬𑀁 𑀘𑀭𑀡𑀓𑀸𑀮𑁂 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀦𑀸𑀧𑀺 𑀳𑀺 𑀫𑀬𑀸 𑀯𑀳𑀺𑀢𑀩𑁆𑀩𑀁 𑀥𑀼𑀭𑀁 𑀅𑀜𑁆𑀜𑁄 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀲𑀸𑀥𑀦𑀢𑁆𑀣𑀁 𑁋

‘‘𑀬𑀢𑁄 𑀬𑀢𑁄 𑀕𑀭𑀼 𑀥𑀼𑀭𑀁, 𑀬𑀢𑁄 𑀕𑀫𑁆𑀪𑀻𑀭𑀯𑀢𑁆𑀢𑀦𑀻;

𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑁂𑀦𑁆𑀢𑀺, 𑀲𑁆𑀯𑀸𑀲𑁆𑀲𑀼 𑀢𑀁 𑀯𑀳𑀢𑁂 𑀥𑀼𑀭’’𑀦𑁆𑀢𑀺. (𑀚𑀸. 𑁧.𑁧.𑁨𑁯) 𑁋

𑀇𑀤𑀁 𑀓𑀡𑁆𑀳𑀚𑀸𑀢𑀓𑀁 𑀆𑀳𑀭𑀺𑀢𑀩𑁆𑀩𑀁. 𑀅𑀢𑀻𑀢𑁂 𑀓𑀺𑀭 𑀏𑀓𑁄 𑀲𑀢𑁆𑀣𑀯𑀸𑀳𑁄 𑀏𑀓𑀺𑀲𑁆𑀲𑀸 𑀫𑀳𑀮𑁆𑀮𑀺𑀓𑀸𑀬 𑀕𑁂𑀳𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀏𑀓𑀺𑀲𑁆𑀲𑀸 𑀥𑁂𑀦𑀼𑀬𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑀸 𑀏𑀓𑀁 𑀯𑀘𑁆𑀙𑀓𑀁 𑀯𑀺𑀚𑀸𑀬𑀺. 𑀫𑀳𑀮𑁆𑀮𑀺𑀓𑀸𑀬 𑀯𑀘𑁆𑀙𑀓𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀤𑀧𑀸𑀤𑀺. 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀯𑀸𑀳𑀧𑀼𑀢𑁆𑀢𑁄 𑁋 ‘‘𑀢𑀯 𑀕𑁂𑀳𑀯𑁂𑀢𑀦𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀫𑀳𑀮𑁆𑀮𑀺𑀓𑀸 ‘‘𑀫𑀬𑁆𑀳𑀁 𑀅𑀜𑁆𑀜𑁂𑀦 𑀓𑀺𑀘𑁆𑀘𑀁 𑀦 𑀅𑀢𑁆𑀣𑀺, 𑀇𑀫𑀫𑁂𑀯 𑀯𑀘𑁆𑀙𑀓𑀁 𑀤𑁂𑀳𑀻’’𑀢𑀺 𑀆𑀳. 𑀕𑀡𑁆𑀳, 𑀅𑀫𑁆𑀫𑀸𑀢𑀺. 𑀲𑀸 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀔𑀻𑀭𑀁 𑀧𑀸𑀬𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀢𑀺𑀡𑀸𑀤𑀻𑀦𑀺 𑀤𑀤𑀫𑀸𑀦𑀸 𑀧𑁄𑀲𑁂𑀲𑀺. 𑀲𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀭𑀺𑀧𑀼𑀡𑁆𑀡𑀭𑀽𑀧𑁄 𑀩𑀮𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺 𑀲𑀫𑁆𑀧𑀦𑁆𑀦𑀸𑀘𑀸𑀭𑁄, 𑀓𑀸𑀴𑀓𑁄 𑀦𑀸𑀫 𑀦𑀸𑀫𑁂𑀦. 𑀅𑀣𑁂𑀓𑀲𑁆𑀲 𑀲𑀢𑁆𑀣𑀯𑀸𑀳𑀲𑁆𑀲 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀆𑀕𑀘𑁆𑀙𑀦𑁆𑀢𑀲𑁆𑀲 𑀉𑀤𑀓𑀪𑀺𑀦𑁆𑀦𑀝𑁆𑀞𑀸𑀦𑁂 𑀲𑀓𑀝𑀘𑀓𑁆𑀓𑀁 𑀮𑀕𑁆𑀕𑀺. 𑀲𑁄 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀬𑁄𑀚𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀴𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀢𑀯 𑀯𑁂𑀢𑀦𑀁 𑀤𑀲𑁆𑀲𑀸𑀫𑀺, 𑀲𑀓𑀝𑀁 𑀫𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀳𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀁 𑀆𑀤𑀸𑀬 𑁋 ‘‘𑀅𑀜𑁆𑀜𑁄 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀥𑀼𑀭𑀁 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀥𑀼𑀭𑀲𑀓𑀝𑁂 𑀬𑁄𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀏𑀓𑀓𑀁𑀬𑁂𑀯 𑀬𑁄𑀚𑁂𑀲𑀺. 𑀲𑁄 𑀢𑀁 𑀲𑀓𑀝𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀢𑁂𑀦𑁂𑀯 𑀦𑀺𑀳𑀸𑀭𑁂𑀦 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀦𑀻𑀳𑀭𑀺. 𑀲𑁄 𑀲𑀩𑁆𑀩𑀧𑀘𑁆𑀙𑀺𑀫𑀲𑀓𑀝𑀁 𑀦𑀻𑀳𑀭𑀺𑀢𑁆𑀯𑀸 𑀫𑁄𑀘𑀺𑀬𑀫𑀸𑀦𑁄 ‘‘𑀲𑀼’’𑀦𑁆𑀢𑀺 𑀓𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺.

𑀲𑀢𑁆𑀣𑀯𑀸𑀳𑁄 ‘‘𑀅𑀬𑀁 𑀏𑀢𑁆𑀢𑀓𑀸𑀦𑀺 𑀲𑀓𑀝𑀸𑀦𑀺 𑀉𑀓𑁆𑀔𑀺𑀧𑀦𑁆𑀢𑁄 𑀏𑀯𑀁 𑀦 𑀅𑀓𑀸𑀲𑀺, 𑀯𑁂𑀢𑀦𑀢𑁆𑀣𑀁 𑀫𑀜𑁆𑀜𑁂 𑀓𑀭𑁄𑀢𑀻’’𑀢𑀺 𑀲𑀓𑀝𑀕𑀡𑀦𑀸𑀬 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑀪𑀡𑁆𑀟𑀺𑀓𑀁 𑀢𑀲𑁆𑀲 𑀕𑀻𑀯𑀸𑀬 𑀩𑀦𑁆𑀥𑀸𑀧𑁂𑀲𑀺. 𑀲𑁄 𑀅𑀜𑁆𑀜𑁂𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀅𑀮𑁆𑀮𑀻𑀬𑀺𑀢𑀼𑀁 𑀅𑀤𑁂𑀦𑁆𑀢𑁄 𑀉𑀚𑀼𑀓𑀁 𑀕𑁂𑀳𑀫𑁂𑀯 𑀅𑀕𑀫𑀸𑀲𑀺. 𑀫𑀳𑀮𑁆𑀮𑀺𑀓𑀸 𑀤𑀺𑀲𑁆𑀯𑀸 𑀫𑁄𑀘𑁂𑀢𑁆𑀯𑀸 𑀓𑀳𑀸𑀧𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀓𑀲𑁆𑀫𑀸, 𑀧𑀼𑀢𑁆𑀢, 𑀏𑀯𑀫𑀓𑀸𑀲𑀺, 𑀫𑀸 𑀢𑁆𑀯𑀁 ‘𑀫𑀬𑀸 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀪𑀢𑁂𑀦 𑀅𑀬𑀁 𑀚𑀻𑀯𑀺𑀲𑁆𑀲𑀢𑀻’𑀢𑀺 𑀲𑀜𑁆𑀜𑀫𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀕𑁄𑀡𑀁 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀫𑀸 𑀏𑀯𑀫𑀓𑀸𑀲𑀻’’𑀢𑀺 𑀑𑀯𑀤𑀺. 𑀏𑀯𑀁 𑀲𑀢𑁆𑀣𑀸 ‘‘𑀘𑀭𑀺𑀬𑀁 𑀘𑀭𑀡𑀓𑀸𑀮𑁂 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀦𑀸𑀧𑀺 𑀳𑀺 𑀫𑀬𑀸 𑀯𑀳𑀺𑀢𑀩𑁆𑀩𑀥𑀼𑀭𑀁 𑀅𑀜𑁆𑀜𑁄 𑀯𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀓𑁄𑀯 𑀅𑀕𑀫𑀸𑀲𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂𑀳𑀺 𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀲𑀮𑁆𑀮𑀸𑀦𑀢𑁄, 𑀨𑀮𑀲𑀫𑀸𑀧𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀲𑀓𑀮𑀦𑀕𑀭𑁂 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀲𑀘𑁂, 𑀆𑀯𑀼𑀲𑁄 𑀲𑀭𑀪, 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀫𑀺𑀲𑁆𑀲𑀢𑀺, 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺. 𑀲𑀫𑀡𑁂 𑀕𑁄𑀢𑀫𑁂 𑀏𑀓𑀁 𑀓𑀭𑁄𑀦𑁆𑀢𑁂 𑀅𑀳𑀁 𑀤𑁆𑀯𑁂 𑀓𑀭𑀺𑀲𑁆𑀲𑀸𑀫𑀺, 𑀤𑁆𑀯𑁂 𑀓𑀭𑁄𑀦𑁆𑀢𑁂 𑀘𑀢𑁆𑀢𑀸𑀭𑀺, 𑀘𑀢𑁆𑀢𑀸𑀭𑀺 𑀓𑀭𑁄𑀦𑁆𑀢𑁂 𑀧𑀜𑁆𑀘, 𑀧𑀜𑁆𑀘 𑀓𑀭𑁄𑀦𑁆𑀢𑁂 𑀤𑀲, 𑀤𑀲 𑀓𑀭𑁄𑀦𑁆𑀢𑁂 𑀯𑀻𑀲𑀢𑀺, 𑀯𑀻𑀲𑀢𑀺 𑀓𑀭𑁄𑀦𑁆𑀢𑁂 𑀢𑀺𑀁𑀲𑀁, 𑀢𑀺𑀁𑀲𑀁 𑀓𑀭𑁄𑀦𑁆𑀢𑁂 𑀘𑀢𑁆𑀢𑀸𑀮𑀻𑀲𑀁, 𑀘𑀢𑁆𑀢𑀸𑀮𑀻𑀲𑀁 𑀓𑀭𑁄𑀦𑁆𑀢𑁂 𑀧𑀜𑁆𑀜𑀸𑀲𑀁, 𑀧𑀜𑁆𑀜𑀸𑀲𑀁 𑀓𑀭𑁄𑀦𑁆𑀢𑁂 𑀲𑀢𑀁, 𑀲𑀢𑀁 𑀓𑀭𑁄𑀦𑁆𑀢𑁂 𑀲𑀳𑀲𑁆𑀲𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀲𑀻𑀳𑀦𑀸𑀤𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀉𑀧𑀲𑀗𑁆𑀓𑀫𑀺.

𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀦 𑀬𑀲𑁆𑀫𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀲𑁆𑀲 𑀦𑀕𑀭𑀫𑀚𑁆𑀛𑁂𑀦𑁂𑀯 𑀫𑀕𑁆𑀕𑁄, 𑀢𑀲𑁆𑀫𑀸 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀩𑀮𑁄 𑀭𑀸𑀚𑀸 𑀯𑀺𑀬 𑀏𑀓𑀓𑁄𑀯 𑀦𑀕𑀭𑀫𑀚𑁆𑀛𑁂𑀦 𑀅𑀕𑀫𑀸𑀲𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀤𑀺𑀲𑁆𑀯𑀸 ‘‘𑀧𑀭𑀺𑀩𑁆𑀩𑀸𑀚𑀓𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀅𑀯𑀡𑁆𑀡𑀁 𑀧𑀢𑁆𑀣𑀭𑀺𑀁𑀲𑀼, 𑀲𑁄 𑀏𑀢𑁂 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀲𑀜𑁆𑀜𑀸𑀧𑁂𑀢𑀼𑀁 𑀕𑀘𑁆𑀙𑀢𑀺 𑀫𑀜𑁆𑀜𑁂’’𑀢𑀺 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀧𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀏𑀓𑀓𑁄𑀯 𑀦𑀺𑀓𑁆𑀔𑀦𑁆𑀢𑁄, 𑀅𑀚𑁆𑀚 𑀲𑀭𑀪𑁂𑀦 𑀲𑀤𑁆𑀥𑀺𑀁 𑀫𑀳𑀸𑀥𑀫𑁆𑀫𑀲𑀗𑁆𑀕𑀸𑀫𑁄 𑀪𑀯𑀺𑀲𑁆𑀲𑀢𑀺. 𑀫𑀬𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀓𑀸𑀬𑀲𑀓𑁆𑀔𑀺𑀦𑁄 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑀢𑁆𑀣𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀉𑀧𑀲𑀗𑁆𑀓𑀫𑀺.

𑀧𑀭𑀺𑀩𑁆𑀩𑀸𑀚𑀓𑀸 𑀭𑀼𑀓𑁆𑀔𑀸𑀦𑀁 𑀔𑀦𑁆𑀥𑀯𑀺𑀝𑀧𑀲𑀸𑀔𑀦𑁆𑀢𑀭𑁂𑀳𑀺 𑀲𑀫𑀼𑀕𑁆𑀕𑀘𑁆𑀙𑀦𑁆𑀢𑀸 𑀙𑀩𑁆𑀩𑀡𑁆𑀡𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀤𑀺𑀲𑁆𑀯𑀸 ‘‘𑀅𑀜𑁆𑀜𑀤𑀸 𑀏𑀯𑀭𑀽𑀧𑁄 𑀑𑀪𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀉𑀮𑁆𑀮𑁄𑀓𑁂𑀢𑁆𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀆𑀕𑀘𑁆𑀙𑀢𑀻’’𑀢𑀺 𑀆𑀳𑀁𑀲𑀼. 𑀢𑀁 𑀲𑀼𑀢𑁆𑀯𑀸𑀯 𑀲𑀭𑀪𑁄 𑀚𑀸𑀡𑀼𑀓𑀦𑁆𑀢𑀭𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀅𑀥𑁄𑀫𑀼𑀔𑁄 𑀦𑀺𑀲𑀻𑀤𑀺. 𑀏𑀯𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀢𑀁 𑀆𑀭𑀸𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑀣𑀸𑀕𑀢𑁄 𑀳𑀺 𑀚𑀫𑁆𑀩𑀼𑀤𑀻𑀧𑀢𑀮𑁂 𑀅𑀕𑁆𑀕𑀓𑀼𑀮𑁂 𑀚𑀸𑀢𑀢𑁆𑀢𑀸 𑀅𑀕𑁆𑀕𑀸𑀲𑀦𑀸𑀭𑀳𑁄𑀢𑀺𑀲𑁆𑀲 𑀲𑀩𑁆𑀩𑀢𑁆𑀣 𑀆𑀲𑀦𑀁 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀧𑀜𑁆𑀜𑀢𑁆𑀢𑁂 𑀫𑀳𑀸𑀭𑀳𑁂 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺.

𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀲𑀭𑀪𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘𑀼𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀓𑀺𑀭 𑀲𑀭𑀪𑁂𑀦 𑀲𑀤𑁆𑀥𑀺𑀁 𑀏𑀢𑁆𑀢𑀓𑀁 𑀓𑀣𑁂𑀦𑁆𑀢𑁂𑀬𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀢𑁆𑀣𑀼 𑀧𑀤𑀸𑀦𑀼𑀧𑀤𑀺𑀓𑁄 𑀳𑀼𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀲𑀫𑁆𑀧𑀸𑀧𑀼𑀡𑀺, 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂𑀬𑁂𑀯 𑀑𑀲𑀭𑀺𑀁𑀲𑀼. 𑀢𑀢𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 ‘‘𑀅𑀘𑁆𑀙𑀭𑀺𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀫𑁆𑀫𑀁, 𑀲𑀓𑀮𑀦𑀕𑀭𑀁 𑀯𑀺𑀘𑀭𑀺𑀢𑁆𑀯𑀸 𑀅𑀯𑀡𑁆𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀓𑀸𑀲𑀦𑀻𑀬𑀓𑀫𑁆𑀫𑀁 𑀓𑀢𑁆𑀯𑀸 𑀆𑀕𑀢𑀸𑀦𑀁 𑀯𑁂𑀭𑀻𑀦𑀁 𑀧𑀝𑀺𑀲𑀢𑁆𑀢𑀽𑀦𑀁 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀣𑁄𑀓𑀫𑁆𑀧𑀺 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀦 𑀓𑀣𑁂𑀲𑀺, 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀢𑀧𑀸𑀓𑀢𑁂𑀮𑁂𑀦 𑀫𑀓𑁆𑀔𑁂𑀦𑁆𑀢𑁄 𑀯𑀺𑀬 𑀅𑀫𑀢𑀧𑀸𑀦𑀁 𑀧𑀸𑀬𑁂𑀦𑁆𑀢𑁄 𑀯𑀺𑀬 𑀫𑀥𑀼𑀭𑀓𑀣𑀁 𑀓𑀣𑁂𑀢𑀻’’𑀢𑀺 𑀲𑀩𑁆𑀩𑁂𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀦𑀼𑀯𑀢𑁆𑀢𑀦𑁆𑀢𑀸 𑀏𑀢𑀤𑀯𑁄𑀘𑀼𑀁.

𑀬𑀸𑀘𑁂𑀬𑁆𑀬𑀸𑀲𑀻𑀢𑀺 𑀆𑀬𑀸𑀘𑁂𑀬𑁆𑀬𑀸𑀲𑀺 𑀧𑀢𑁆𑀣𑁂𑀬𑁆𑀬𑀸𑀲𑀺 𑀧𑀺𑀳𑁂𑀬𑁆𑀬𑀸𑀲𑀺. 𑀢𑀼𑀡𑁆𑀳𑀻𑀪𑀽𑀢𑁄𑀢𑀺 𑀢𑀼𑀡𑁆𑀳𑀻𑀪𑀸𑀯𑀁 𑀉𑀧𑀕𑀢𑁄. 𑀫𑀗𑁆𑀓𑀼𑀪𑀽𑀢𑁄𑀢𑀺 𑀦𑀺𑀢𑁆𑀢𑁂𑀚𑀢𑀁 𑀆𑀧𑀦𑁆𑀦𑁄. 𑀧𑀢𑁆𑀢𑀓𑁆𑀔𑀦𑁆𑀥𑁄𑀢𑀺 𑀑𑀦𑀢𑀕𑀻𑀯𑁄. 𑀅𑀥𑁄𑀫𑀼𑀔𑁄𑀢𑀺 𑀳𑁂𑀝𑁆𑀞𑀸𑀫𑀼𑀔𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄𑀢𑀺 ‘‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑁂 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀯𑀁 𑀧𑀝𑀺𑀚𑀸𑀦𑀢𑁄 𑀢𑀯. 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀇𑀫𑁂 𑀦𑀸𑀫 𑀥𑀫𑁆𑀫𑀸 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀯𑀁 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀼. 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀁 𑀧𑀝𑀺𑀘𑀭𑀺𑀲𑁆𑀲𑀢𑀻𑀢𑀺 𑀅𑀜𑁆𑀜𑁂𑀦 𑀯𑀸 𑀯𑀘𑀦𑁂𑀦 𑀅𑀜𑁆𑀜𑀁 𑀯𑀘𑀦𑀁 𑀧𑀝𑀺𑀘𑁆𑀙𑀸𑀤𑁂𑀲𑁆𑀲𑀢𑀺, 𑀅𑀜𑁆𑀜𑀁 𑀧𑀼𑀘𑁆𑀙𑀺𑀢𑁄 𑀅𑀜𑁆𑀜𑀁 𑀓𑀣𑁂𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁 𑀆𑀕𑀦𑁆𑀢𑀼𑀓𑀓𑀣𑀁 𑀆𑀳𑀭𑀦𑁆𑀢𑁄 𑀧𑀼𑀭𑀺𑀫𑀓𑀣𑀁 𑀅𑀧𑀦𑀸𑀫𑁂𑀲𑁆𑀲𑀢𑀺. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀦𑀪𑀺𑀭𑀤𑁆𑀥𑀺𑀁 𑀅𑀢𑀼𑀝𑁆𑀞𑀸𑀓𑀸𑀭𑀁 𑀧𑀸𑀢𑀼𑀓𑀭𑀺𑀲𑁆𑀲𑀢𑀻𑀢𑀺 𑀧𑀸𑀓𑀝𑀁 𑀓𑀭𑀺𑀲𑁆𑀲𑀢𑀺. 𑀏𑀢𑁆𑀣 𑀘 𑀅𑀧𑁆𑀧𑀘𑁆𑀘𑀬𑁂𑀦 𑀤𑁄𑀫𑀦𑀲𑁆𑀲𑀁 𑀯𑀼𑀢𑁆𑀢𑀁, 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀫𑀦𑁆𑀤𑀩𑀮𑀯𑀪𑁂𑀤𑁄 𑀓𑁄𑀥𑁄𑀬𑁂𑀯.

𑀏𑀯𑀁 𑀪𑀕𑀯𑀸 𑀧𑀞𑀫𑀯𑁂𑀲𑀸𑀭𑀚𑁆𑀚𑁂𑀦 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀧𑀼𑀦 𑀤𑀼𑀢𑀺𑀬𑀸𑀤𑀻𑀳𑀺 𑀦𑀤𑀦𑁆𑀢𑁄 𑀬𑁄 𑀔𑁄 𑀫𑀁 𑀧𑀭𑀺𑀩𑁆𑀩𑀸𑀚𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀬𑀲𑁆𑀲 𑀫𑀕𑁆𑀕𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀢𑀬𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀤𑁂𑀲𑀺𑀢𑁄. 𑀲𑁄 𑀦 𑀦𑀺𑀬𑁆𑀬𑀸𑀢𑀻𑀢𑀺 𑀲𑁄 𑀥𑀫𑁆𑀫𑁄 𑀦 𑀦𑀺𑀬𑁆𑀬𑀸𑀢𑀺 𑀦 𑀦𑀺𑀕𑁆𑀕𑀘𑁆𑀙𑀢𑀺, 𑀦 𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀓𑁆𑀓𑀭𑀲𑁆𑀲𑀸𑀢𑀺 𑀬𑁄 𑀦𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀔𑀬𑀸𑀬. 𑀅𑀣 𑀯𑀸 𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀬𑀲𑁆𑀲 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀕𑀧𑀝𑀺𑀖𑀸𑀢𑀢𑁆𑀣𑀸𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀤𑁄𑀲𑀧𑀝𑀺𑀖𑀸𑀢𑀢𑁆𑀣𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸, 𑀫𑁄𑀳𑀧𑀝𑀺𑀖𑀸𑀢𑀢𑁆𑀣𑀸𑀬 𑀧𑀜𑁆𑀘 𑀥𑀫𑁆𑀫𑀸, 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬 𑀆𑀦𑀸𑀧𑀸𑀦𑀲𑁆𑀲𑀢𑀺. 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑁄 𑀥𑀫𑁆𑀫𑁄 𑀬𑁄 𑀦𑀁 𑀬𑀣𑀸𑀤𑁂𑀲𑀺𑀢𑀁 𑀓𑀭𑁄𑀢𑀺, 𑀢𑀲𑁆𑀲 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀯𑀝𑁆𑀝𑀤𑀼𑀓𑁆𑀔𑀓𑁆𑀔𑀬𑀸𑀬 𑀦 𑀦𑀺𑀬𑁆𑀬𑀸𑀢𑀺 𑀦 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀁 𑀅𑀢𑁆𑀣𑀁 𑀦 𑀲𑀸𑀥𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑁂𑀬𑁆𑀬𑀣𑀸𑀧𑀺 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀬𑀣𑀸 𑀅𑀬𑀁 𑀲𑀭𑀪𑁄 𑀧𑀭𑀺𑀩𑁆𑀩𑀸𑀚𑀓𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀺𑀦𑁆𑀦𑁄, 𑀏𑀯𑀁 𑀦𑀺𑀲𑀻𑀤𑀺𑀲𑁆𑀲𑀢𑀻𑀢𑀺.

𑀏𑀯𑀁 𑀢𑀻𑀳𑀺 𑀧𑀤𑁂𑀳𑀺 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀤𑁂𑀲𑀦𑀁 𑀦𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀸 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀧𑀭𑀺𑀫𑀸𑀡𑀸 𑀧𑀭𑀺𑀲𑀸 𑀅𑀫𑀢𑀧𑀸𑀦𑀁 𑀧𑀺𑀯𑀺, 𑀲𑀢𑁆𑀣𑀸 𑀧𑀭𑀺𑀲𑀸𑀬 𑀅𑀫𑀢𑀧𑀸𑀦𑀲𑁆𑀲 𑀧𑀻𑀢𑀪𑀸𑀯𑀁 𑀜𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀪𑀕𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀅𑀧𑁆𑀧𑀝𑀺𑀦𑀸𑀤𑀁. 𑀯𑁂𑀳𑀸𑀲𑀁 𑀧𑀓𑁆𑀓𑀸𑀫𑀻𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀏𑀯𑀁 𑀧𑀓𑁆𑀔𑀦𑁆𑀤𑁄 𑀘 𑀧𑀦 𑀢𑀁𑀔𑀡𑀜𑁆𑀜𑁂𑀯 𑀕𑀺𑀚𑁆𑀛𑀓𑀽𑀝𑀫𑀳𑀸𑀯𑀺𑀳𑀸𑀭𑁂 𑀧𑀢𑀺𑀝𑁆𑀞𑀸𑀲𑀺.

𑀯𑀸𑀘𑀸𑀬 𑀲𑀦𑁆𑀦𑀺𑀢𑁄𑀤𑀓𑁂𑀦𑀸𑀢𑀺 𑀯𑀘𑀦𑀧𑀢𑁄𑀤𑁂𑀦. 𑀲𑀜𑁆𑀚𑀫𑁆𑀪𑀭𑀺𑀫𑀓𑀁𑀲𑀽𑀢𑀺 𑀲𑀫𑁆𑀪𑀭𑀺𑀢𑀁 𑀦𑀺𑀭𑀦𑁆𑀢𑀭𑀨𑀼𑀝𑀁 𑀅𑀓𑀁𑀲𑀼, 𑀉𑀧𑀭𑀺 𑀯𑀺𑀚𑁆𑀛𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑁆𑀭𑀳𑀸𑀭𑀜𑁆𑀜𑁂𑀢𑀺 𑀫𑀳𑀸𑀭𑀜𑁆𑀜𑁂. 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀻𑀢𑀺 𑀲𑀻𑀳𑀲𑁆𑀲 𑀦𑀤𑀢𑁄 𑀆𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀅𑀳𑀫𑁆𑀧𑀺, 𑀇𑀫𑀲𑁆𑀲 𑀘𑀢𑁆𑀢𑀸𑀭𑁄 𑀧𑀸𑀤𑀸, 𑀫𑀬𑁆𑀳𑀫𑁆𑀧𑀺, 𑀅𑀳𑀫𑁆𑀧𑀺 𑀏𑀯𑀫𑁂𑀯 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀲𑀻𑀳𑀲𑁆𑀲 𑀲𑀫𑁆𑀫𑀼𑀔𑀸 𑀦𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀫𑀺𑀁 𑀕𑁄𑀘𑀭𑀸𑀬 𑀧𑀓𑁆𑀓𑀦𑁆𑀢𑁂 𑀏𑀓𑀓𑁄 𑀦𑀤𑀺𑀢𑀼𑀁 𑀆𑀭𑀪𑀺. 𑀅𑀣𑀲𑁆𑀲 𑀲𑀺𑀗𑁆𑀕𑀸𑀮𑀲𑀤𑁆𑀤𑁄𑀬𑁂𑀯 𑀦𑀺𑀘𑁆𑀙𑀭𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀲𑀺𑀗𑁆𑀕𑀸𑀮𑀓𑀁𑀬𑁂𑀯 𑀦𑀤𑀢𑀻𑀢𑀺. 𑀪𑁂𑀭𑀡𑁆𑀟𑀓𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀧𑀺𑀘 𑀪𑀺𑀦𑁆𑀦𑀲𑁆𑀲𑀭𑀁 𑀅𑀫𑀦𑀸𑀧𑀲𑀤𑁆𑀤𑀁 𑀦𑀤𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑁂𑀯 𑀔𑁄 𑀢𑁆𑀯𑀦𑁆𑀢𑀺 𑀇𑀫𑀺𑀦𑀸 𑀑𑀧𑀫𑁆𑀫𑁂𑀦 𑀧𑀭𑀺𑀩𑁆𑀩𑀸𑀚𑀓𑀸 𑀢𑀣𑀸𑀕𑀢𑀁 𑀲𑀻𑀳𑀲𑀤𑀺𑀲𑀁 𑀓𑀢𑁆𑀯𑀸 𑀲𑀭𑀪𑀁 𑀲𑀺𑀗𑁆𑀕𑀸𑀮𑀲𑀤𑀺𑀲𑀁 𑀅𑀓𑀁𑀲𑀼. 𑀅𑀫𑁆𑀩𑀼𑀓𑀲𑀜𑁆𑀘𑀭𑀻𑀢𑀺 𑀔𑀼𑀤𑁆𑀤𑀓𑀓𑀼𑀓𑁆𑀓𑀼𑀝𑀺𑀓𑀸. 𑀧𑀼𑀭𑀺𑀲𑀓𑀭𑀯𑀺𑀢𑀁 𑀭𑀯𑀺𑀲𑁆𑀲𑀸𑀫𑀻𑀢𑀺 𑀫𑀳𑀸𑀓𑀼𑀓𑁆𑀓𑀼𑀝𑀁 𑀭𑀯𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲𑀧𑀺 𑀤𑁆𑀯𑁂 𑀧𑀸𑀤𑀸 𑀤𑁆𑀯𑁂 𑀧𑀓𑁆𑀔𑀸, 𑀫𑀬𑁆𑀳𑀫𑁆𑀧𑀺 𑀢𑀣𑁂𑀯, 𑀅𑀳𑀫𑁆𑀧𑀺 𑀏𑀯𑀭𑀽𑀧𑀁 𑀭𑀯𑀺𑀢𑀁 𑀭𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀸 𑀢𑀲𑁆𑀲 𑀲𑀫𑁆𑀫𑀼𑀔𑀸 𑀭𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑀲𑁆𑀫𑀺𑀁 𑀧𑀓𑁆𑀓𑀦𑁆𑀢𑁂 𑀭𑀯𑀫𑀸𑀦𑀸 𑀓𑀼𑀓𑁆𑀓𑀼𑀝𑀺𑀓𑀸𑀭𑀯𑀁𑀬𑁂𑀯 𑀭𑀯𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀫𑁆𑀩𑀼𑀓𑀲𑀜𑁆𑀘𑀭𑀺𑀭𑀯𑀺𑀢𑀁𑀬𑁂𑀯 𑀭𑀯𑀢𑀻𑀢𑀺. 𑀉𑀲𑀪𑁄𑀢𑀺 𑀕𑁄𑀡𑁄. 𑀲𑀼𑀜𑁆𑀜𑀸𑀬𑀸𑀢𑀺 𑀢𑀼𑀘𑁆𑀙𑀸𑀬 𑀚𑁂𑀝𑁆𑀞𑀓𑀯𑀲𑀪𑁂𑀳𑀺 𑀯𑀺𑀭𑀳𑀺𑀢𑀸𑀬. 𑀕𑀫𑁆𑀪𑀻𑀭𑀁 𑀦𑀤𑀺𑀢𑀩𑁆𑀩𑀁 𑀫𑀜𑁆𑀜𑀢𑀻𑀢𑀺 𑀚𑁂𑀝𑁆𑀞𑀓𑀯𑀲𑀪𑀲𑁆𑀲 𑀦𑀸𑀤𑀲𑀤𑀺𑀲𑀁 𑀕𑀫𑁆𑀪𑀻𑀭𑀦𑀸𑀤𑀁 𑀦𑀤𑀺𑀢𑀩𑁆𑀩𑀁 𑀫𑀜𑁆𑀜𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁫. 𑀓𑁂𑀲𑀫𑀼𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀧𑀜𑁆𑀘𑀫𑁂 𑀓𑀸𑀮𑀸𑀫𑀸𑀦𑀁 𑀦𑀺𑀕𑀫𑁄𑀢𑀺 𑀓𑀸𑀮𑀸𑀫𑀸 𑀦𑀸𑀫 𑀔𑀢𑁆𑀢𑀺𑀬𑀸, 𑀢𑁂𑀲𑀁 𑀦𑀺𑀕𑀫𑁄. 𑀓𑁂𑀲𑀫𑀼𑀢𑁆𑀢𑀺𑀬𑀸𑀢𑀺 𑀓𑁂𑀲𑀫𑀼𑀢𑁆𑀢𑀦𑀺𑀕𑀫𑀯𑀸𑀲𑀺𑀦𑁄. 𑀉𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺𑀪𑁂𑀲𑀚𑁆𑀚𑀸𑀦𑀺 𑀘𑁂𑀯 𑀅𑀝𑁆𑀞𑀯𑀺𑀥𑀧𑀸𑀦𑀓𑀸𑀦𑀺 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀲𑀓𑀁𑀬𑁂𑀯 𑀯𑀸𑀤𑀁 𑀤𑀻𑀧𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄𑀬𑁂𑀯 𑀮𑀤𑁆𑀥𑀺𑀁 𑀓𑀣𑁂𑀦𑁆𑀢𑀺. 𑀚𑁄𑀢𑁂𑀦𑁆𑀢𑀻𑀢𑀺 𑀧𑀓𑀸𑀲𑁂𑀦𑁆𑀢𑀺. 𑀔𑀼𑀁𑀲𑁂𑀦𑁆𑀢𑀻𑀢𑀺 𑀖𑀝𑁆𑀝𑁂𑀦𑁆𑀢𑀺. 𑀯𑀫𑁆𑀪𑁂𑀦𑁆𑀢𑀻𑀢𑀺 𑀅𑀯𑀚𑀸𑀦𑀦𑁆𑀢𑀺. 𑀧𑀭𑀺𑀪𑀯𑀦𑁆𑀢𑀻𑀢𑀺 𑀮𑀸𑀫𑀓𑀁 𑀓𑀭𑁄𑀦𑁆𑀢𑀺. 𑀑𑀫𑀓𑁆𑀔𑀺𑀁 𑀓𑀭𑁄𑀦𑁆𑀢𑀻𑀢𑀺 𑀉𑀓𑁆𑀔𑀺𑀢𑁆𑀢𑀓𑀁 𑀓𑀭𑁄𑀦𑁆𑀢𑀺, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀙𑀟𑁆𑀟𑁂𑀦𑁆𑀢𑀺. 𑀅𑀧𑀭𑁂𑀧𑀺, 𑀪𑀦𑁆𑀢𑁂𑀢𑀺 𑀲𑁄 𑀓𑀺𑀭 𑀅𑀝𑀯𑀺𑀫𑀼𑀔𑁂 𑀕𑀸𑀫𑁄, 𑀢𑀲𑁆𑀫𑀸 𑀢𑀢𑁆𑀣 𑀅𑀝𑀯𑀺𑀁 𑀅𑀢𑀺𑀓𑁆𑀓𑀦𑁆𑀢𑀸 𑀘 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀸 𑀘 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺. 𑀢𑁂𑀲𑀼𑀧𑀺 𑀧𑀞𑀫𑀁 𑀆𑀕𑀢𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀤𑀻𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼, 𑀧𑀘𑁆𑀙𑀸 𑀆𑀕𑀢𑀸 ‘‘𑀓𑀺𑀁 𑀢𑁂 𑀚𑀸𑀦𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀢𑁂, 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀁𑀲𑀽’’𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀤𑀻𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀓𑀸𑀮𑀸𑀫𑀸 𑀏𑀓𑀮𑀤𑁆𑀥𑀺𑀬𑀫𑁆𑀧𑀺 𑀲𑀡𑁆𑀞𑀳𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼. 𑀢𑁂 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑁆𑀯𑀸 𑀪𑀕𑀯𑀢𑁄 𑀏𑀯𑀫𑀸𑀭𑁄𑀘𑁂𑀢𑁆𑀯𑀸 𑀢𑁂𑀲𑀁 𑀦𑁄, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀳𑁄𑀢𑁂𑀯 𑀓𑀗𑁆𑀔𑀸𑀢𑀺 𑀳𑁄𑀢𑀺𑀬𑁂𑀯 𑀓𑀗𑁆𑀔𑀸. 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀁.

𑀫𑀸 𑀅𑀦𑀼𑀲𑁆𑀲𑀯𑁂𑀦𑀸𑀢𑀺 𑀅𑀦𑀼𑀲𑁆𑀲𑀯𑀓𑀣𑀸𑀬𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀧𑀭𑀫𑁆𑀧𑀭𑀸𑀬𑀸𑀢𑀺 𑀧𑀭𑀫𑁆𑀧𑀭𑀓𑀣𑀸𑀬𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀇𑀢𑀺𑀓𑀺𑀭𑀸𑀬𑀸𑀢𑀺 𑀏𑀯𑀁 𑀓𑀺𑀭 𑀏𑀢𑀦𑁆𑀢𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸𑀢𑀺 𑀅𑀫𑁆𑀳𑀸𑀓𑀁 𑀧𑀺𑀝𑀓𑀢𑀦𑁆𑀢𑀺𑀬𑀸 𑀲𑀤𑁆𑀥𑀺𑀁 𑀲𑀫𑁂𑀢𑀻𑀢𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀢𑀓𑁆𑀓𑀳𑁂𑀢𑀽𑀢𑀺 𑀢𑀓𑁆𑀓𑀕𑁆𑀕𑀸𑀳𑁂𑀦𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀦𑀬𑀳𑁂𑀢𑀽𑀢𑀺 𑀦𑀬𑀕𑁆𑀕𑀸𑀳𑁂𑀦𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦𑀸𑀢𑀺 𑀲𑀼𑀦𑁆𑀤𑀭𑀫𑀺𑀤𑀁 𑀓𑀸𑀭𑀡𑀦𑁆𑀢𑀺 𑀏𑀯𑀁 𑀓𑀸𑀭𑀡𑀧𑀭𑀺𑀯𑀺𑀢𑀓𑁆𑀓𑁂𑀦𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸𑀢𑀺 𑀅𑀫𑁆𑀳𑀸𑀓𑀁 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀔𑀫𑀺𑀢𑁆𑀯𑀸 𑀕𑀳𑀺𑀢𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀲𑀫𑁂𑀢𑀻𑀢𑀺𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬𑀸𑀢𑀺 𑀅𑀬𑀁 𑀪𑀺𑀓𑁆𑀔𑀼 𑀪𑀩𑁆𑀩𑀭𑀽𑀧𑁄, 𑀇𑀫𑀲𑁆𑀲 𑀓𑀣𑀁 𑀕𑀳𑁂𑀢𑀼𑀁 𑀬𑀼𑀢𑁆𑀢𑀦𑁆𑀢𑀺𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀫𑀸 𑀲𑀫𑀡𑁄 𑀦𑁄 𑀕𑀭𑀽𑀢𑀺 𑀅𑀬𑀁 𑀲𑀫𑀡𑁄 𑀅𑀫𑁆𑀳𑀸𑀓𑀁 𑀕𑀭𑀼, 𑀇𑀫𑀲𑁆𑀲 𑀓𑀣𑀁 𑀕𑀳𑁂𑀢𑀼𑀁 𑀬𑀼𑀢𑁆𑀢𑀦𑁆𑀢𑀺𑀧𑀺 𑀫𑀸 𑀕𑀡𑁆𑀳𑀺𑀢𑁆𑀣. 𑀲𑀫𑀢𑁆𑀢𑀸𑀢𑀺 𑀧𑀭𑀺𑀧𑀼𑀡𑁆𑀡𑀸. 𑀲𑀫𑀸𑀤𑀺𑀦𑁆𑀦𑀸𑀢𑀺 𑀕𑀳𑀺𑀢𑀸 𑀧𑀭𑀸𑀫𑀝𑁆𑀞𑀸. 𑀬𑀁𑀲 𑀳𑁄𑀢𑀻𑀢𑀺 𑀬𑀁 𑀓𑀸𑀭𑀡𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀳𑁄𑀢𑀺. 𑀅𑀮𑁄𑀪𑀸𑀤𑀬𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀕𑀢𑀸𑀪𑀺𑀚𑁆𑀛𑁄𑀢𑀺𑀆𑀤𑀻𑀳𑀺 𑀫𑁂𑀢𑁆𑀢𑀸𑀬 𑀧𑀼𑀩𑁆𑀩𑀪𑀸𑀕𑁄 𑀓𑀣𑀺𑀢𑁄.

𑀇𑀤𑀸𑀦𑀺 𑀫𑁂𑀢𑁆𑀢𑀸𑀤𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀓𑀣𑀸𑀬 𑀯𑀸 𑀪𑀸𑀯𑀦𑀸𑀦𑀬𑁂 𑀯𑀸 𑀧𑀸𑀴𑀺𑀯𑀡𑁆𑀡𑀦𑀸𑀬 𑀯𑀸 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁦) 𑀯𑀼𑀢𑁆𑀢𑀫𑁂𑀯. 𑀏𑀯𑀁 𑀅𑀯𑁂𑀭𑀘𑀺𑀢𑁆𑀢𑁄𑀢𑀺 𑀏𑀯𑀁 𑀅𑀓𑀼𑀲𑀮𑀯𑁂𑀭𑀲𑁆𑀲 𑀘 𑀧𑀼𑀕𑁆𑀕𑀮𑀯𑁂𑀭𑀺𑀦𑁄 𑀘 𑀦𑀢𑁆𑀣𑀺𑀢𑀸𑀬 𑀅𑀯𑁂𑀭𑀘𑀺𑀢𑁆𑀢𑁄. 𑀅𑀩𑁆𑀬𑀸𑀩𑀚𑁆𑀛𑀘𑀺𑀢𑁆𑀢𑁄𑀢𑀺 𑀓𑁄𑀥𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑁂𑀦 𑀦𑀺𑀤𑁆𑀤𑀼𑀓𑁆𑀔𑀘𑀺𑀢𑁆𑀢𑁄. 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄𑀢𑀺 𑀓𑀺𑀮𑁂𑀲𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄. 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑁄𑀢𑀺 𑀓𑀺𑀮𑁂𑀲𑀫𑀮𑀸𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲. 𑀅𑀲𑁆𑀲𑀸𑀲𑀸𑀢𑀺 𑀅𑀯𑀲𑁆𑀲𑀬𑀸 𑀧𑀢𑀺𑀝𑁆𑀞𑀸. 𑀲𑀘𑁂 𑀔𑁄 𑀧𑀦 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀬𑀤𑀺 𑀇𑀫𑀫𑁆𑀳𑀸 𑀮𑁄𑀓𑀸 𑀧𑀭𑀮𑁄𑀓𑁄 𑀦𑀸𑀫 𑀅𑀢𑁆𑀣𑀺. 𑀅𑀣𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀫𑁆𑀫𑀭𑀡𑀸…𑀧𑁂… 𑀉𑀧𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁂𑀢𑀁 𑀓𑀸𑀭𑀡𑀁, 𑀬𑁂𑀦𑀸𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀫𑁆𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀻𑀖𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁. 𑀲𑀼𑀔𑀺𑀦𑁆𑀢𑀺 𑀲𑀼𑀔𑀺𑀢𑀁. 𑀉𑀪𑀬𑁂𑀦𑁂𑀯 𑀯𑀺𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀬𑀜𑁆𑀘 𑀧𑀸𑀧𑀁 𑀦 𑀓𑀭𑁄𑀫𑀺, 𑀬𑀜𑁆𑀘 𑀓𑀭𑁄𑀢𑁄𑀧𑀺 𑀦 𑀓𑀭𑀻𑀬𑀢𑀺, 𑀇𑀫𑀺𑀦𑀸 𑀉𑀪𑀬𑁂𑀦𑀸𑀧𑀺 𑀯𑀺𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁬. 𑀲𑀸𑀴𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀙𑀝𑁆𑀞𑁂 𑀫𑀺𑀕𑀸𑀭𑀦𑀢𑁆𑀢𑀸𑀢𑀺 𑀫𑀺𑀕𑀸𑀭𑀲𑁂𑀝𑁆𑀞𑀺𑀦𑁄 𑀦𑀢𑁆𑀢𑀸. 𑀲𑁂𑀔𑀼𑀦𑀺𑀬𑀦𑀢𑁆𑀢𑀸𑀢𑀺 𑀲𑁂𑀔𑀼𑀦𑀺𑀬𑀲𑁂𑀝𑁆𑀞𑀺𑀦𑁄 𑀦𑀢𑁆𑀢𑀸. 𑀉𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀤𑀸𑀲𑀓𑀫𑁆𑀫𑀓𑀭𑀧𑀭𑀺𑀯𑀼𑀢𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀲𑀁 𑀓𑀺𑀭 𑀧𑀼𑀭𑁂𑀪𑀢𑁆𑀢𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀬𑁂𑀯 𑀕𑁂𑀳𑁂 𑀏𑀓𑁄 𑀧𑀜𑁆𑀳𑁄 𑀲𑀫𑀼𑀝𑁆𑀞𑀺𑀢𑁄, 𑀢𑀁 𑀧𑀦 𑀓𑀣𑁂𑀢𑀼𑀁 𑀑𑀓𑀸𑀲𑁄 𑀦𑀸𑀳𑁄𑀲𑀺. 𑀢𑁂 ‘‘𑀢𑀁 𑀧𑀜𑁆𑀳𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀺𑀁𑀲𑀼. 𑀣𑁂𑀭𑁄 ‘‘𑀕𑀸𑀫𑁂 𑀢𑀁 𑀲𑀫𑀼𑀝𑁆𑀞𑀺𑀢𑀁 𑀧𑀜𑁆𑀳𑀁 𑀲𑁄𑀢𑀼𑀁 𑀆𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀫𑀦𑀁 𑀜𑀢𑁆𑀯𑀸 𑀢𑀫𑁂𑀯 𑀧𑀜𑁆𑀳𑀁 𑀆𑀭𑀪𑀦𑁆𑀢𑁄 𑀏𑀣 𑀢𑀼𑀫𑁆𑀳𑁂 𑀲𑀸𑀴𑁆𑀳𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀺 𑀮𑁄𑀪𑁄𑀢𑀺 𑀮𑀼𑀩𑁆𑀪𑀦𑀲𑀪𑀸𑀯𑁄 𑀮𑁄𑀪𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀪𑀺𑀚𑁆𑀛𑀸𑀢𑀺 𑀔𑁄 𑀅𑀳𑀁 𑀲𑀸𑀴𑁆𑀳𑀸 𑀏𑀢𑀫𑀢𑁆𑀣𑀁 𑀯𑀤𑀸𑀫𑀻𑀢𑀺 𑀏𑀢𑀁 𑀮𑁄𑀪𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀅𑀳𑀁 ‘‘𑀅𑀪𑀺𑀚𑁆𑀛𑀸’’𑀢𑀺 𑀯𑀤𑀸𑀫𑀺, ‘‘𑀢𑀡𑁆𑀳𑀸’’𑀢𑀺 𑀯𑀤𑀸𑀫𑀻𑀢𑀺 𑀲𑀫𑀼𑀝𑁆𑀞𑀺𑀢𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀆𑀳. 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄.

𑀲𑁄 𑀏𑀯𑀁 𑀧𑀚𑀸𑀦𑀸𑀢𑀻𑀢𑀺 𑀲𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀞𑀺𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀆𑀭𑀪𑀦𑁆𑀢𑁄 𑀏𑀯𑀁 𑀧𑀚𑀸𑀦𑀸𑀢𑀺. 𑀅𑀢𑁆𑀣𑀺 𑀇𑀤𑀦𑁆𑀢𑀺 𑀅𑀢𑁆𑀣𑀺 𑀤𑀼𑀓𑁆𑀔𑀲𑀘𑁆𑀘𑀲𑀗𑁆𑀔𑀸𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀦𑀸𑀫𑀭𑀽𑀧𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀚𑀸𑀦𑀦𑁆𑀢𑁄 𑀏𑀲 ‘‘𑀏𑀯𑀁 𑀧𑀚𑀸𑀦𑀸𑀢𑀺 𑀅𑀢𑁆𑀣𑀺 𑀇𑀤’’𑀦𑁆𑀢𑀺 𑀯𑀼𑀢𑁆𑀢𑁄. 𑀳𑀻𑀦𑀦𑁆𑀢𑀺 𑀲𑀫𑀼𑀤𑀬𑀲𑀘𑁆𑀘𑀁. 𑀧𑀡𑀻𑀢𑀦𑁆𑀢𑀺 𑀫𑀕𑁆𑀕𑀲𑀘𑁆𑀘𑀁. 𑀇𑀫𑀲𑁆𑀲 𑀲𑀜𑁆𑀜𑀸𑀕𑀢𑀲𑁆𑀲 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀫𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀢𑀲𑁆𑀲 𑀲𑀜𑁆𑀜𑀸𑀕𑀢𑀲𑁆𑀲 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀫𑀢𑁆𑀣𑀻𑀢𑀺 𑀇𑀫𑀺𑀦𑀸 𑀦𑀺𑀭𑁄𑀥𑀲𑀘𑁆𑀘𑀁 𑀤𑀲𑁆𑀲𑁂𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀓𑀣𑀺𑀢𑀁. 𑀅𑀳𑀼 𑀧𑀼𑀩𑁆𑀩𑁂 𑀮𑁄𑀪𑁄𑀢𑀺 𑀧𑀼𑀩𑁆𑀩𑁂 𑀫𑁂 𑀮𑁄𑀪𑁄 𑀅𑀳𑁄𑀲𑀺. 𑀢𑀤𑀳𑀼 𑀅𑀓𑀼𑀲𑀮𑀦𑁆𑀢𑀺 𑀢𑀁 𑀅𑀓𑀼𑀲𑀮𑀁 𑀦𑀸𑀫 𑀅𑀳𑁄𑀲𑀺, 𑀢𑀤𑀸 𑀯𑀸 𑀅𑀓𑀼𑀲𑀮𑀁 𑀦𑀸𑀫 𑀅𑀳𑁄𑀲𑀺. 𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀇𑀢𑀺 𑀏𑀢𑀁 𑀓𑀼𑀲𑀮𑀁, 𑀢𑀲𑁆𑀲𑁂𑀯 𑀅𑀓𑀼𑀲𑀮𑀲𑁆𑀲 𑀦𑀢𑁆𑀣𑀺𑀪𑀸𑀯𑀁 𑀓𑀼𑀲𑀮𑀁 𑀔𑁂𑀫𑀦𑁆𑀢𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀘𑁆𑀙𑀸𑀢𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀦𑀺𑀩𑁆𑀩𑀼𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀲𑀦𑁆𑀢𑀸𑀧𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀦𑀺𑀩𑁆𑀩𑀼𑀢𑁄. 𑀲𑀻𑀢𑀺𑀪𑀽𑀢𑁄𑀢𑀺 𑀲𑀻𑀢𑀮𑀻𑀪𑀽𑀢𑁄. 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑁆𑀲 𑀲𑀼𑀔𑀲𑁆𑀲 𑀧𑀝𑀺𑀲𑀁𑀯𑁂𑀤𑀺𑀢𑀸. 𑀩𑁆𑀭𑀳𑁆𑀫𑀪𑀽𑀢𑁂𑀦𑀸𑀢𑀺 𑀲𑁂𑀝𑁆𑀞𑀪𑀽𑀢𑁂𑀦. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁭. 𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀲𑀢𑁆𑀢𑀫𑁂 𑀓𑀣𑀸𑀯𑀢𑁆𑀣𑀽𑀦𑀻𑀢𑀺 𑀓𑀣𑀸𑀓𑀸𑀭𑀡𑀸𑀦𑀺, 𑀓𑀣𑀸𑀬 𑀪𑀽𑀫𑀺𑀬𑁄 𑀧𑀢𑀺𑀝𑁆𑀞𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀢𑀻𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀦𑁆𑀢𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀦𑀸𑀫 𑀓𑀸𑀮𑁄𑀧𑀺 𑀯𑀝𑁆𑀝𑀢𑀺 𑀔𑀦𑁆𑀥𑀸𑀧𑀺. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀢𑀻𑀢𑁂 𑀓𑀲𑁆𑀲𑀧𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀳𑁄𑀲𑀺, 𑀢𑀲𑁆𑀲 𑀓𑀺𑀓𑀻 𑀦𑀸𑀫 𑀓𑀸𑀲𑀺𑀓𑀭𑀸𑀚𑀸 𑀅𑀕𑁆𑀕𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺, 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼 𑀅𑀳𑁄𑀲𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀓𑀣𑁂𑀦𑁆𑀢𑁄 𑀅𑀢𑀻𑀢𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀢𑀺 𑀦𑀸𑀫. 𑀅𑀦𑀸𑀕𑀢𑁂 𑀫𑁂𑀢𑁆𑀢𑁂𑀬𑁆𑀬𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀗𑁆𑀔𑁄 𑀦𑀸𑀫 𑀭𑀸𑀚𑀸 𑀅𑀕𑁆𑀕𑀼𑀧𑀝𑁆𑀞𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀅𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀓𑀣𑁂𑀦𑁆𑀢𑁄 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀢𑀺 𑀦𑀸𑀫. 𑀏𑀢𑀭𑀳𑀺 𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑀺𑀓𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀓𑀣𑁂𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀢𑀺 𑀦𑀸𑀫.

𑀓𑀣𑀸𑀲𑀫𑁆𑀧𑀬𑁄𑀕𑁂𑀦𑀸𑀢𑀺 𑀓𑀣𑀸𑀲𑀫𑀸𑀕𑀫𑁂𑀦. 𑀓𑀘𑁆𑀙𑁄𑀢𑀺 𑀓𑀣𑁂𑀢𑀼𑀁 𑀬𑀼𑀢𑁆𑀢𑁄. 𑀅𑀓𑀘𑁆𑀙𑁄𑀢𑀺 𑀓𑀣𑁂𑀢𑀼𑀁 𑀦 𑀬𑀼𑀢𑁆𑀢𑁄. 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀁 𑀧𑀜𑁆𑀳𑀦𑁆𑀢𑀺𑀆𑀤𑀻𑀲𑀼, ‘‘𑀘𑀓𑁆𑀔𑀼, 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀼𑀝𑁆𑀞𑁂𑀦, ‘‘𑀆𑀫, 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀓𑀁𑀲𑁂𑀦𑁂𑀯 𑀩𑁆𑀬𑀸𑀓𑀸𑀢𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀲𑁄𑀢𑀸𑀤𑀻𑀲𑀼. 𑀅𑀬𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄. ‘‘𑀅𑀦𑀺𑀘𑁆𑀘𑀁 𑀦𑀸𑀫 𑀘𑀓𑁆𑀔𑀽’’𑀢𑀺 𑀧𑀼𑀝𑁆𑀞𑁂𑀦 𑀧𑀦 ‘‘𑀦 𑀘𑀓𑁆𑀔𑀼𑀫𑁂𑀯, 𑀲𑁄𑀢𑀫𑁆𑀧𑀺 𑀅𑀦𑀺𑀘𑁆𑀘𑀁, 𑀖𑀸𑀦𑀫𑁆𑀧𑀺 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑀁. 𑀅𑀬𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄. ‘‘𑀬𑀣𑀸 𑀘𑀓𑁆𑀔𑀼, 𑀢𑀣𑀸 𑀲𑁄𑀢𑀁. 𑀬𑀣𑀸 𑀲𑁄𑀢𑀁, 𑀢𑀣𑀸 𑀘𑀓𑁆𑀔𑀽’’𑀢𑀺 𑀧𑀼𑀝𑁆𑀞𑁂𑀦 ‘‘𑀓𑁂𑀦𑀝𑁆𑀞𑁂𑀦 𑀧𑀼𑀘𑁆𑀙𑀲𑀻’’𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀲𑁆𑀲𑀦𑀝𑁆𑀞𑁂𑀦 𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀳𑀻’’𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀁. ‘‘𑀅𑀦𑀺𑀘𑁆𑀘𑀝𑁆𑀞𑁂𑀦 𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀆𑀫𑀸’’𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀁. 𑀅𑀬𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁂𑀦 𑀧𑀦 ‘‘𑀅𑀩𑁆𑀬𑀸𑀓𑀢𑀫𑁂𑀢𑀁 𑀪𑀕𑀯𑀢𑀸’’𑀢𑀺 𑀞𑀧𑁂𑀢𑀩𑁆𑀩𑁄, 𑀏𑀲 𑀧𑀜𑁆𑀳𑁄 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄. 𑀅𑀬𑀁 𑀞𑀧𑀦𑀻𑀬𑁄 𑀧𑀜𑁆𑀳𑁄.

𑀞𑀸𑀦𑀸𑀞𑀸𑀦𑁂 𑀦 𑀲𑀡𑁆𑀞𑀸𑀢𑀻𑀢𑀺 𑀓𑀸𑀭𑀡𑀸𑀓𑀸𑀭𑀡𑁂 𑀦 𑀲𑀡𑁆𑀞𑀸𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀲𑀲𑁆𑀲𑀢𑀯𑀸𑀤𑀻 𑀬𑀼𑀢𑁆𑀢𑁂𑀦 𑀓𑀸𑀭𑀡𑁂𑀦 𑀧𑀳𑁄𑀢𑀺 𑀉𑀘𑁆𑀙𑁂𑀤𑀯𑀸𑀤𑀺𑀁 𑀦𑀺𑀕𑁆𑀕𑀳𑁂𑀢𑀼𑀁, 𑀉𑀘𑁆𑀙𑁂𑀤𑀯𑀸𑀤𑀻 𑀢𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑁄 ‘‘𑀓𑀺𑀁 𑀧𑀦𑀸𑀳𑀁 𑀉𑀘𑁆𑀙𑁂𑀤𑀁 𑀯𑀤𑀸𑀫𑀻’’𑀢𑀺 𑀲𑀲𑁆𑀲𑀢𑀯𑀸𑀤𑀺𑀪𑀸𑀯𑀫𑁂𑀯 𑀤𑀻𑀧𑁂𑀢𑀺, 𑀅𑀢𑁆𑀢𑀦𑁄 𑀯𑀸𑀤𑁂 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀉𑀘𑁆𑀙𑁂𑀤𑀯𑀸𑀤𑀺𑀫𑁆𑀳𑀺 𑀧𑀳𑁄𑀦𑁆𑀢𑁂 𑀲𑀲𑁆𑀲𑀢𑀯𑀸𑀤𑀻, 𑀧𑀼𑀕𑁆𑀕𑀮𑀯𑀸𑀤𑀺𑀫𑁆𑀳𑀺 𑀧𑀳𑁄𑀦𑁆𑀢𑁂 𑀲𑀼𑀜𑁆𑀜𑀢𑀯𑀸𑀤𑀻, 𑀲𑀼𑀜𑁆𑀜𑀢𑀯𑀸𑀤𑀺𑀫𑁆𑀳𑀺 𑀧𑀳𑁄𑀦𑁆𑀢𑁂 𑀧𑀼𑀕𑁆𑀕𑀮𑀯𑀸𑀤𑀻𑀢𑀺 𑀏𑀯𑀁 𑀞𑀸𑀦𑀸𑀞𑀸𑀦𑁂 𑀦 𑀲𑀡𑁆𑀞𑀸𑀢𑀺 𑀦𑀸𑀫.

𑀧𑀭𑀺𑀓𑀧𑁆𑀧𑁂 𑀦 𑀲𑀡𑁆𑀞𑀸𑀢𑀻𑀢𑀺 𑀇𑀤𑀁 𑀧𑀜𑁆𑀳𑀧𑀼𑀘𑁆𑀙𑀦𑁂𑀧𑀺 𑀧𑀜𑁆𑀳𑀓𑀣𑀦𑁂𑀧𑀺 𑀮𑀩𑁆𑀪𑀢𑀺. 𑀓𑀣𑀁? 𑀏𑀓𑀘𑁆𑀘𑁄 𑀳𑀺 ‘‘𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀓𑀡𑁆𑀞𑀁 𑀲𑁄𑀥𑁂𑀢𑀺, 𑀲𑁄 𑀇𑀢𑀭𑁂𑀦 ‘‘𑀇𑀤𑀁 𑀦𑀸𑀫 𑀢𑁆𑀯𑀁 𑀧𑀼𑀘𑁆𑀙𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁄 𑀜𑀸𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀦 𑀏𑀢𑀁, 𑀅𑀜𑁆𑀜𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀧𑀜𑁆𑀳𑀁 𑀧𑀼𑀝𑁆𑀞𑁄𑀧𑀺 ‘‘𑀧𑀜𑁆𑀳𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀳𑀦𑀼𑀁 𑀲𑀁𑀲𑁄𑀥𑁂𑀢𑀺, 𑀲𑁄 𑀇𑀢𑀭𑁂𑀦 ‘‘𑀇𑀤𑀁 𑀦𑀸𑀫 𑀓𑀣𑁂𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁄 𑀜𑀸𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀦 𑀏𑀢𑀁, 𑀅𑀜𑁆𑀜𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀏𑀯𑀁 𑀧𑀭𑀺𑀓𑀧𑁆𑀧𑁂 𑀦 𑀲𑀡𑁆𑀞𑀸𑀢𑀺 𑀦𑀸𑀫.

𑀅𑀜𑁆𑀜𑀸𑀢𑀯𑀸𑀤𑁂 𑀦 𑀲𑀡𑁆𑀞𑀸𑀢𑀻𑀢𑀺 𑀅𑀜𑁆𑀜𑀸𑀢𑀯𑀸𑀤𑁂 𑀚𑀸𑀦𑀺𑀢𑀯𑀸𑀤𑁂 𑀦 𑀲𑀡𑁆𑀞𑀸𑀢𑀺. 𑀓𑀣𑀁? 𑀏𑀓𑀘𑁆𑀘𑁄 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑀁 𑀇𑀢𑀭𑁄 ‘‘𑀫𑀦𑀸𑀧𑁄 𑀢𑀬𑀸 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑁄, 𑀓𑀳𑀁 𑀢𑁂 𑀏𑀲 𑀉𑀕𑁆𑀕𑀳𑀺𑀢𑁄’’𑀢𑀺 𑀯𑀤𑀢𑀺. 𑀇𑀢𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑀦𑀺𑀬𑀸𑀫𑁂𑀦𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀢𑀲𑁆𑀲 𑀓𑀣𑀸𑀬 ‘‘𑀅𑀧𑀜𑁆𑀳𑀁 𑀦𑀼 𑀔𑁄 𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀯𑀺𑀫𑀢𑀺𑀁 𑀓𑀭𑁄𑀢𑀺. 𑀅𑀧𑀭𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀺, 𑀢𑀫𑀜𑁆𑀜𑁄 ‘‘𑀲𑀼𑀝𑁆𑀞𑀼 𑀢𑁂 𑀧𑀜𑁆𑀳𑁄 𑀓𑀣𑀺𑀢𑁄, 𑀓𑀢𑁆𑀣 𑀢𑁂 𑀉𑀕𑁆𑀕𑀳𑀺𑀢𑁄, 𑀧𑀜𑁆𑀳𑀁 𑀓𑀣𑁂𑀦𑁆𑀢𑁂𑀦 𑀦𑀸𑀫 𑀏𑀯𑀁 𑀓𑀣𑁂𑀢𑀩𑁆𑀩𑁄’’𑀢𑀺 𑀯𑀤𑀢𑀺. 𑀇𑀢𑀭𑁄 𑀓𑀣𑁂𑀢𑀩𑁆𑀩𑀦𑀺𑀬𑀸𑀫𑁂𑀦𑁂𑀯 𑀧𑀜𑁆𑀳𑀁 𑀓𑀣𑁂𑀢𑁆𑀯𑀸𑀧𑀺 𑀢𑀲𑁆𑀲 𑀓𑀣𑀸𑀬 ‘‘𑀅𑀧𑀜𑁆𑀳𑁄 𑀦𑀼 𑀔𑁄 𑀫𑀬𑀸 𑀓𑀣𑀺𑀢𑁄’’𑀢𑀺 𑀯𑀺𑀫𑀢𑀺𑀁 𑀓𑀭𑁄𑀢𑀺.

𑀧𑀝𑀺𑀧𑀤𑀸𑀬 𑀦 𑀲𑀡𑁆𑀞𑀸𑀢𑀻𑀢𑀺 𑀧𑀝𑀺𑀧𑀢𑁆𑀢𑀺𑀬𑀁 𑀦 𑀢𑀺𑀝𑁆𑀞𑀢𑀺, 𑀯𑀢𑁆𑀢𑀁 𑀅𑀚𑀸𑀦𑀺𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀩𑁆𑀩𑀝𑁆𑀞𑀸𑀦𑁂 𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀜𑁆𑀳𑁄 𑀦𑀸𑀫 𑀘𑁂𑀢𑀺𑀬𑀗𑁆𑀕𑀡𑁂 𑀧𑀼𑀘𑁆𑀙𑀺𑀢𑁂𑀦 𑀦 𑀓𑀣𑁂𑀢𑀩𑁆𑀩𑁄, 𑀢𑀣𑀸 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀘𑀭𑀡𑀓𑀸𑀮𑁂. 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀓𑀸𑀮𑁂 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀤𑀺𑀯𑀸𑀯𑀺𑀳𑀸𑀭𑀝𑁆𑀞𑀸𑀦𑀕𑀫𑀦𑀓𑀸𑀮𑁂𑀧𑀺. 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀦 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸𑀯 𑀧𑀼𑀘𑁆𑀙𑀦𑁆𑀢𑀲𑁆𑀲 𑀓𑀣𑁂𑀢𑀩𑁆𑀩𑁄, 𑀅𑀓𑀸𑀭𑁂𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀲𑁆𑀲 𑀦 𑀓𑀣𑁂𑀢𑀩𑁆𑀩𑁄. 𑀇𑀤𑀁 𑀯𑀢𑁆𑀢𑀁 𑀅𑀚𑀸𑀦𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀧𑀝𑀺𑀧𑀤𑀸𑀬 𑀦 𑀲𑀡𑁆𑀞𑀸𑀢𑀺 𑀦𑀸𑀫. 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀓𑀘𑁆𑀙𑁄 𑀳𑁄𑀢𑀻𑀢𑀺, 𑀪𑀺𑀓𑁆𑀔𑀯𑁂, 𑀏𑀢𑀁 𑀇𑀫𑀲𑁆𑀫𑀺𑀁 𑀘 𑀓𑀸𑀭𑀡𑁂 𑀲𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀦 𑀓𑀣𑁂𑀢𑀼𑀁 𑀬𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺.

𑀞𑀸𑀦𑀸𑀞𑀸𑀦𑁂 𑀲𑀡𑁆𑀞𑀸𑀢𑀻𑀢𑀺 𑀲𑀲𑁆𑀲𑀢𑀯𑀸𑀤𑀻 𑀬𑀼𑀢𑁆𑀢𑁂𑀦 𑀓𑀸𑀭𑀡𑁂𑀦 𑀧𑀳𑁄𑀢𑀺 𑀉𑀘𑁆𑀙𑁂𑀤𑀯𑀸𑀤𑀺𑀁 𑀦𑀺𑀕𑁆𑀕𑀳𑁂𑀢𑀼𑀁, 𑀉𑀘𑁆𑀙𑁂𑀤𑀯𑀸𑀤𑀻 𑀢𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑁄𑀧𑀺 ‘‘𑀅𑀳𑀁 𑀢𑀬𑀸 𑀲𑀢𑀓𑁆𑀔𑀢𑁆𑀢𑀼𑀁 𑀦𑀺𑀕𑁆𑀕𑀬𑁆𑀳𑀫𑀸𑀦𑁄𑀧𑀺 𑀉𑀘𑁆𑀙𑁂𑀤𑀯𑀸𑀤𑀻𑀬𑁂𑀯𑀸’’𑀢𑀺 𑀯𑀤𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀲𑁆𑀲𑀢𑀧𑀼𑀕𑁆𑀕𑀮𑀲𑀼𑀜𑁆𑀜𑀢𑀯𑀸𑀤𑀸𑀤𑀻𑀲𑀼𑀧𑀺 𑀦𑀬𑁄 𑀦𑁂𑀢𑀩𑁆𑀩𑁄. 𑀏𑀯𑀁 𑀞𑀸𑀦𑀸𑀞𑀸𑀦𑁂 𑀲𑀡𑁆𑀞𑀸𑀢𑀺 𑀦𑀸𑀫. 𑀧𑀭𑀺𑀓𑀧𑁆𑀧𑁂 𑀲𑀡𑁆𑀞𑀸𑀢𑀻𑀢𑀺 ‘‘𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀓𑀡𑁆𑀞𑀁 𑀲𑁄𑀥𑁂𑀦𑁆𑀢𑁄 ‘‘𑀢𑁆𑀯𑀁 𑀇𑀫𑀁 𑀦𑀸𑀫 𑀧𑀼𑀘𑁆𑀙𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀏𑀢𑀁𑀬𑁂𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀧𑀜𑁆𑀳𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀳𑀦𑀼𑀁 𑀲𑀁𑀲𑁄𑀥𑁂𑀦𑁆𑀢𑁄𑀧𑀺 ‘‘𑀢𑁆𑀯𑀁 𑀇𑀫𑀁 𑀦𑀸𑀫 𑀓𑀣𑁂𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀏𑀢𑀁𑀬𑁂𑀯 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀏𑀯𑀁 𑀧𑀭𑀺𑀓𑀧𑁆𑀧𑁂 𑀲𑀡𑁆𑀞𑀸𑀢𑀺 𑀦𑀸𑀫.

𑀅𑀜𑁆𑀜𑀸𑀢𑀯𑀸𑀤𑁂 𑀲𑀡𑁆𑀞𑀸𑀢𑀻𑀢𑀺 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀼𑀝𑁆𑀞𑀼 𑀢𑁂 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑁄, 𑀧𑀼𑀘𑁆𑀙𑀦𑁆𑀢𑁂𑀦 𑀦𑀸𑀫 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀯𑀺𑀫𑀢𑀺𑀁 𑀦 𑀉𑀧𑁆𑀧𑀸𑀤𑁂𑀢𑀺. 𑀧𑀜𑁆𑀳𑀁 𑀓𑀣𑁂𑀢𑁆𑀯𑀸𑀧𑀺 ‘‘𑀲𑀼𑀝𑁆𑀞𑀼 𑀢𑁂 𑀧𑀜𑁆𑀳𑁄 𑀓𑀣𑀺𑀢𑁄, 𑀓𑀣𑁂𑀦𑁆𑀢𑁂𑀦 𑀦𑀸𑀫 𑀏𑀯𑀁 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀯𑀺𑀫𑀢𑀺𑀁 𑀦 𑀉𑀧𑁆𑀧𑀸𑀤𑁂𑀢𑀺. 𑀧𑀝𑀺𑀧𑀤𑀸𑀬 𑀲𑀡𑁆𑀞𑀸𑀢𑀻𑀢𑀺 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑀢𑁆𑀯𑀸 𑀬𑀸𑀯 𑀪𑀢𑁆𑀢𑀁 𑀦𑀺𑀝𑁆𑀞𑀸𑀢𑀺, 𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀲𑀧𑁆𑀧𑀺𑀆𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀝𑁆𑀞𑀯𑀺𑀥𑀸𑀦𑀺 𑀧𑀸𑀦𑀓𑀸𑀦𑀺 𑀯𑀢𑁆𑀣𑀘𑁆𑀙𑀸𑀤𑀦𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀯𑀸 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀸𑀦𑀺 𑀤𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀏𑀯𑀜𑁆𑀳𑀺 𑀯𑀢𑁆𑀢𑀁 𑀜𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀧𑀝𑀺𑀧𑀤𑀸𑀬 𑀲𑀡𑁆𑀞𑀸𑀢𑀺 𑀦𑀸𑀫. 𑀢𑀲𑁆𑀲 𑀧𑀜𑁆𑀳𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀯𑀘𑀦𑁂𑀦 𑀅𑀜𑁆𑀜𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀅𑀜𑁆𑀜𑀁 𑀯𑀸 𑀧𑀼𑀘𑁆𑀙𑀺𑀢𑁄 𑀅𑀜𑁆𑀜𑀁 𑀓𑀣𑁂𑀢𑀺. 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀻𑀢𑀺 𑀆𑀕𑀦𑁆𑀢𑀼𑀓𑀓𑀣𑀁 𑀑𑀢𑀸𑀭𑁂𑀦𑁆𑀢𑁄 𑀧𑀼𑀭𑀺𑀫𑀓𑀣𑀁 𑀩𑀳𑀺𑀤𑁆𑀥𑀸 𑀅𑀧𑀦𑀸𑀫𑁂𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀪𑀺𑀓𑁆𑀔𑀽 𑀓𑀺𑀭 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀁 𑀤𑀳𑀭𑀁, ‘‘𑀆𑀯𑀼𑀲𑁄, 𑀢𑁆𑀯𑀁 𑀇𑀫𑀜𑁆𑀘𑀺𑀫𑀜𑁆𑀘 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀆𑀳𑀁𑀲𑀼. 𑀲𑁄 𑀆𑀳 𑁋 ‘‘𑀪𑀦𑁆𑀢𑁂, 𑀦𑀸𑀕𑀤𑀻𑀧𑀁 𑀕𑀢𑁄𑀫𑁆𑀳𑀻’’𑀢𑀺. 𑀆𑀯𑀼𑀲𑁄, 𑀦 𑀫𑀬𑀁 𑀢𑀯 𑀦𑀸𑀕𑀤𑀻𑀧𑀕𑀫𑀦𑁂𑀦 𑀅𑀢𑁆𑀣𑀺𑀓𑀸, 𑀆𑀧𑀢𑁆𑀢𑀺𑀁 𑀧𑀦 𑀆𑀧𑀦𑁆𑀦𑁄𑀢𑀺 𑀧𑀼𑀘𑁆𑀙𑀸𑀫𑀸𑀢𑀺. 𑀪𑀦𑁆𑀢𑁂, 𑀦𑀸𑀕𑀤𑀻𑀧𑀁 𑀕𑀦𑁆𑀢𑁆𑀯𑀸 𑀫𑀘𑁆𑀙𑁂 𑀔𑀸𑀤𑀺𑀦𑁆𑀢𑀺. 𑀆𑀯𑀼𑀲𑁄, 𑀢𑀯 𑀫𑀘𑁆𑀙𑀔𑀸𑀤𑀦𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀆𑀧𑀢𑁆𑀢𑀺𑀁 𑀓𑀺𑀭𑀲𑀺 𑀆𑀧𑀦𑁆𑀦𑁄𑀢𑀺. 𑀲𑁄 ‘‘𑀦𑀸𑀢𑀺𑀲𑀼𑀧𑀓𑁆𑀓𑁄 𑀫𑀘𑁆𑀙𑁄 𑀫𑀬𑁆𑀳𑀁 𑀅𑀨𑀸𑀲𑀼𑀓𑀫𑀓𑀸𑀲𑀺, 𑀪𑀦𑁆𑀢𑁂’’𑀢𑀺. 𑀆𑀯𑀼𑀲𑁄, 𑀢𑀼𑀬𑁆𑀳𑀁 𑀨𑀸𑀲𑀼𑀓𑁂𑀦 𑀯𑀸 𑀅𑀨𑀸𑀲𑀼𑀓𑁂𑀦 𑀯𑀸 𑀓𑀫𑁆𑀫𑀁 𑀦𑀢𑁆𑀣𑀺, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻𑀢𑀺. 𑀪𑀦𑁆𑀢𑁂, 𑀬𑀸𑀯 𑀢𑀢𑁆𑀣 𑀯𑀲𑀺𑀁, 𑀢𑀸𑀯 𑀫𑁂 𑀅𑀨𑀸𑀲𑀼𑀓𑀫𑁂𑀯 𑀚𑀸𑀢𑀦𑁆𑀢𑀺. 𑀏𑀯𑀁 𑀆𑀕𑀦𑁆𑀢𑀼𑀓𑀓𑀣𑀸𑀯𑀲𑁂𑀦 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀪𑀺𑀳𑀭𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀅𑀯𑀢𑁆𑀣𑀭𑀢𑀺. 𑀢𑁂𑀧𑀺𑀝𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀧𑀼𑀩𑁆𑀩𑁂 𑀓𑀺𑀭 𑀪𑀺𑀓𑁆𑀔𑀽 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀗𑁆𑀖𑀓𑀺𑀘𑁆𑀘𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀲𑀸𑀓𑀘𑁆𑀙𑀁 𑀓𑀭𑁄𑀦𑁆𑀢𑀺. 𑀢𑀢𑁆𑀣𑀸𑀬𑀁 𑀣𑁂𑀭𑁄 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀢𑀢𑁄 𑀢𑀢𑁄 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀤𑀺𑀯𑀲𑀪𑀸𑀕𑁂 𑀏𑀓𑀫𑁆𑀧𑀺 𑀧𑀜𑁆𑀳𑀁 𑀦𑀺𑀝𑁆𑀞𑀸𑀧𑁂𑀢𑀼𑀁 𑀦 𑀤𑁂𑀢𑀺. 𑀅𑀪𑀺𑀫𑀤𑁆𑀤𑀢𑀻𑀢𑀺 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀫𑀤𑁆𑀤𑀢𑀺. 𑀅𑀦𑀼𑀧𑀚𑀕𑁆𑀖𑀢𑀻𑀢𑀺 𑀧𑀭𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂𑀧𑀺 𑀓𑀣𑀺𑀢𑁂𑀧𑀺 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀫𑀳𑀸𑀳𑀲𑀺𑀢𑀁 𑀳𑀲𑀢𑀺, 𑀬𑁂𑀦 𑀧𑀭𑀲𑁆𑀲 ‘‘𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀦𑀼 𑀔𑁄 𑀧𑀼𑀘𑁆𑀙𑀺𑀁, 𑀅𑀓𑀣𑁂𑀢𑀩𑁆𑀩𑀁 𑀦𑀼 𑀔𑁄 𑀓𑀣𑁂𑀲𑀺’’𑀦𑁆𑀢𑀺 𑀯𑀺𑀫𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀔𑀮𑀺𑀢𑀁 𑀕𑀡𑁆𑀳𑀸𑀢𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀁 𑀫𑀼𑀔𑀤𑁄𑀲𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀅𑀓𑁆𑀔𑀭𑁂 𑀯𑀸 𑀧𑀤𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀤𑀼𑀭𑀼𑀢𑁆𑀢𑁂 ‘‘𑀏𑀯𑀁 𑀦𑀸𑀫𑁂𑀢𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀉𑀚𑁆𑀛𑀸𑀬𑀫𑀸𑀦𑁄 𑀯𑀺𑀘𑀭𑀢𑀺. 𑀲𑀉𑀧𑀦𑀺𑀲𑁄𑀢𑀺 𑀲𑀉𑀧𑀦𑀺𑀲𑁆𑀲𑀬𑁄 𑀲𑀧𑀘𑁆𑀘𑀬𑁄.

𑀑𑀳𑀺𑀢𑀲𑁄𑀢𑁄𑀢𑀺 𑀞𑀧𑀺𑀢𑀲𑁄𑀢𑁄. 𑀅𑀪𑀺𑀚𑀸𑀦𑀸𑀢𑀺 𑀏𑀓𑀁 𑀥𑀫𑁆𑀫𑀦𑁆𑀢𑀺 𑀏𑀓𑀁 𑀓𑀼𑀲𑀮𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀁. 𑀧𑀭𑀺𑀚𑀸𑀦𑀸𑀢𑀺 𑀏𑀓𑀁 𑀥𑀫𑁆𑀫𑀦𑁆𑀢𑀺 𑀏𑀓𑀁 𑀤𑀼𑀓𑁆𑀔𑀲𑀘𑁆𑀘𑀥𑀫𑁆𑀫𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺. 𑀧𑀚𑀳𑀢𑀺 𑀏𑀓𑀁 𑀥𑀫𑁆𑀫𑀦𑁆𑀢𑀺 𑀏𑀓𑀁 𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑀁 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺. 𑀲𑀘𑁆𑀙𑀺𑀓𑀭𑁄𑀢𑀺 𑀏𑀓𑀁 𑀥𑀫𑁆𑀫𑀦𑁆𑀢𑀺 𑀏𑀓𑀁 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀁 𑀦𑀺𑀭𑁄𑀥𑀫𑁂𑀯 𑀯𑀸 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀺. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀢𑀻𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀅𑀭𑀳𑀢𑁆𑀢𑀨𑀮𑀯𑀺𑀫𑁄𑀓𑁆𑀔𑀁 𑀜𑀸𑀡𑀨𑀲𑁆𑀲𑁂𑀦 𑀨𑀼𑀲𑀢𑀺.

𑀏𑀢𑀤𑀢𑁆𑀣𑀸, 𑀪𑀺𑀓𑁆𑀔𑀯𑁂, 𑀓𑀣𑀸𑀢𑀺, 𑀪𑀺𑀓𑁆𑀔𑀯𑁂, 𑀬𑀸 𑀏𑀲𑀸 𑀓𑀣𑀸𑀲𑀫𑁆𑀧𑀬𑁄𑀕𑁂𑀦𑀸𑀢𑀺 𑀓𑀣𑀸 𑀤𑀲𑁆𑀲𑀺𑀢𑀸, 𑀲𑀸 𑀏𑀢𑀤𑀢𑁆𑀣𑀸, 𑀅𑀬𑀁 𑀢𑀲𑁆𑀲𑀸 𑀓𑀣𑀸𑀬 𑀪𑀽𑀫𑀺 𑀧𑀢𑀺𑀝𑁆𑀞𑀸. 𑀇𑀤𑀁 𑀯𑀢𑁆𑀣𑀼 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸𑀢𑀺 𑀬𑀸 𑀅𑀬𑀁 𑀓𑀘𑁆𑀙𑀸𑀓𑀘𑁆𑀙𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀓𑀘𑁆𑀙𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀦𑀸, 𑀲𑀸𑀧𑀺 𑀏𑀢𑀤𑀢𑁆𑀣𑀸𑀬𑁂𑀯. 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸𑀢𑀺 𑀑𑀳𑀺𑀢𑀲𑁄𑀢𑁄 𑀲𑀉𑀧𑀦𑀺𑀲𑁄𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀉𑀧𑀦𑀺𑀲𑀸𑀧𑀺 𑀏𑀢𑀤𑀢𑁆𑀣𑀸𑀬𑁂𑀯. 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀦𑁆𑀢𑀺 𑀢𑀲𑁆𑀲𑀸 𑀉𑀧𑀦𑀺𑀲𑀸𑀬 𑀲𑁄𑀢𑀸𑀯𑀥𑀸𑀦𑀁, 𑀢𑀫𑁆𑀧𑀺 𑀏𑀢𑀤𑀢𑁆𑀣𑀫𑁂𑀯. 𑀅𑀦𑀼𑀧𑀸𑀤𑀸𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀕𑁆𑀕𑀳𑁂𑀢𑁆𑀯𑀸. 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑁄𑀓𑁆𑀔𑁄. 𑀅𑀭𑀳𑀢𑁆𑀢𑀨𑀮𑀢𑁆𑀣𑀸𑀬 𑀳𑀺 𑀲𑀩𑁆𑀩𑀫𑁂𑀢𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀉𑀧𑀭𑀺 𑀕𑀸𑀣𑀸𑀳𑀺 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀬𑁂 𑀯𑀺𑀭𑀼𑀤𑁆𑀥𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑀺𑀭𑀼𑀤𑁆𑀥𑀸𑀢𑀺 𑀯𑀺𑀭𑁄𑀥𑀲𑀗𑁆𑀔𑀸𑀢𑁂𑀦 𑀓𑁄𑀧𑁂𑀦 𑀯𑀺𑀭𑀼𑀤𑁆𑀥𑀸. 𑀲𑀮𑁆𑀮𑀧𑀦𑁆𑀢𑀻𑀢𑀺 𑀲𑀮𑁆𑀮𑀸𑀧𑀁 𑀓𑀭𑁄𑀦𑁆𑀢𑀺. 𑀯𑀺𑀦𑀺𑀯𑀺𑀝𑁆𑀞𑀸𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸 𑀳𑀼𑀢𑁆𑀯𑀸. 𑀲𑀫𑀼𑀲𑁆𑀲𑀺𑀢𑀸𑀢𑀺 𑀫𑀸𑀦𑀼𑀲𑁆𑀲𑀬𑁂𑀦 𑀲𑀼𑀝𑁆𑀞𑀼 𑀉𑀲𑁆𑀲𑀺𑀢𑀸. 𑀅𑀦𑀭𑀺𑀬𑀕𑀼𑀡𑀫𑀸𑀲𑀚𑁆𑀚𑀸𑀢𑀺 𑀅𑀦𑀭𑀺𑀬𑀕𑀼𑀡𑀓𑀣𑀁 𑀕𑀼𑀡𑀫𑀸𑀲𑀚𑁆𑀚 𑀓𑀣𑁂𑀦𑁆𑀢𑀺. 𑀕𑀼𑀡𑀁 𑀖𑀝𑁆𑀝𑁂𑀢𑁆𑀯𑀸 𑀓𑀣𑀸 𑀳𑀺 𑀅𑀦𑀭𑀺𑀬𑀓𑀣𑀸 𑀦𑀸𑀫, 𑀦 𑀅𑀭𑀺𑀬𑀓𑀣𑀸, 𑀢𑀁 𑀓𑀣𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁄𑀜𑁆𑀜𑀯𑀺𑀯𑀭𑁂𑀲𑀺𑀦𑁄𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀙𑀺𑀤𑁆𑀤𑀁 𑀅𑀧𑀭𑀸𑀥𑀁 𑀕𑀯𑁂𑀲𑀫𑀸𑀦𑀸. 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀤𑀼𑀓𑁆𑀓𑀣𑀺𑀢𑀁. 𑀯𑀺𑀓𑁆𑀔𑀮𑀺𑀢𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀓𑀁 𑀫𑀼𑀔𑀤𑁄𑀲𑀔𑀮𑀺𑀢𑀁. 𑀲𑀫𑁆𑀧𑀫𑁄𑀳𑀁 𑀧𑀭𑀸𑀚𑀬𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀧𑁆𑀧𑀫𑀢𑁆𑀢𑁂𑀦 𑀫𑀼𑀔𑀤𑁄𑀲𑁂𑀦 𑀲𑀫𑁆𑀧𑀫𑁄𑀳𑀜𑁆𑀘 𑀧𑀭𑀸𑀚𑀬𑀜𑁆𑀘. 𑀅𑀪𑀺𑀦𑀦𑁆𑀤𑀦𑁆𑀢𑀻𑀢𑀺 𑀢𑀼𑀲𑁆𑀲𑀦𑁆𑀢𑀺. 𑀦𑀸𑀘𑀭𑁂𑀢𑀺 𑀦 𑀘𑀭𑀢𑀺 𑀦 𑀓𑀣𑁂𑀢𑀺. 𑀥𑀫𑁆𑀫𑀝𑁆𑀞𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀬𑀸 𑀘 𑀥𑀫𑁆𑀫𑁂 𑀞𑀺𑀢𑁂𑀦 𑀓𑀣𑀺𑀢𑀓𑀣𑀸, 𑀲𑀸 𑀥𑀫𑁆𑀫𑀝𑁆𑀞𑀸 𑀘𑁂𑀯 𑀳𑁄𑀢𑀺 𑀢𑁂𑀦 𑀘 𑀥𑀫𑁆𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀥𑀫𑁆𑀫𑀝𑁆𑀞𑀧𑀝𑀺𑀲𑀁𑀬𑀼𑀢𑁆𑀢𑀸. 𑀅𑀦𑀼𑀦𑁆𑀦𑀢𑁂𑀦 𑀫𑀦𑀲𑀸𑀢𑀺 𑀅𑀦𑀼𑀤𑁆𑀥𑀢𑁂𑀦 𑀘𑁂𑀢𑀲𑀸. 𑀅𑀧𑀴𑀸𑀲𑁄𑀢𑀺 𑀬𑀼𑀕𑀕𑁆𑀕𑀸𑀳𑀧𑀴𑀸𑀲𑀯𑀲𑁂𑀦 𑀅𑀧𑀴𑀸𑀲𑁄 𑀳𑀼𑀢𑁆𑀯𑀸. 𑀅𑀲𑀸𑀳𑀲𑁄𑀢𑀺 𑀭𑀸𑀕𑀤𑁄𑀲𑀫𑁄𑀳𑀲𑀸𑀳𑀲𑀸𑀦𑀁 𑀯𑀲𑁂𑀦 𑀅𑀲𑀸𑀳𑀲𑁄 𑀳𑀼𑀢𑁆𑀯𑀸.

𑀅𑀦𑀼𑀲𑀽𑀬𑀸𑀬𑀫𑀸𑀦𑁄𑀢𑀺 𑀦 𑀉𑀲𑀽𑀬𑀫𑀸𑀦𑁄. 𑀤𑀼𑀩𑁆𑀪𑀝𑁆𑀞𑁂 𑀦𑀸𑀧𑀲𑀸𑀤𑀬𑁂𑀢𑀺 𑀤𑀼𑀓𑁆𑀓𑀣𑀺𑀢𑀲𑁆𑀫𑀺𑀁 𑀦 𑀅𑀧𑀲𑀸𑀤𑁂𑀬𑁆𑀬. 𑀉𑀧𑀸𑀭𑀫𑁆𑀪𑀁 𑀦 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀓𑀸𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑀁 𑀉𑀧𑀸𑀭𑀫𑁆𑀪𑀁 𑀦 𑀲𑀺𑀓𑁆𑀔𑁂𑀬𑁆𑀬. 𑀔𑀮𑀺𑀢𑀜𑁆𑀘 𑀦 𑀕𑀸𑀳𑀬𑁂𑀢𑀺 𑀅𑀧𑁆𑀧𑀫𑀢𑁆𑀢𑀓𑀁 𑀫𑀼𑀔𑀔𑀮𑀺𑀢𑀁 ‘‘𑀅𑀬𑀁 𑀢𑁂 𑀤𑁄𑀲𑁄’’𑀢𑀺 𑀦 𑀕𑀸𑀳𑀬𑁂𑀬𑁆𑀬. 𑀦𑀸𑀪𑀺𑀳𑀭𑁂𑀢𑀺 𑀦𑀸𑀯𑀢𑁆𑀣𑀭𑁂𑀬𑁆𑀬. 𑀦𑀸𑀪𑀺𑀫𑀤𑁆𑀤𑁂𑀢𑀺 𑀏𑀓𑀁 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀦 𑀫𑀤𑁆𑀤𑁂𑀬𑁆𑀬. 𑀦 𑀯𑀸𑀘𑀁 𑀧𑀬𑀼𑀢𑀁 𑀪𑀡𑁂𑀢𑀺 𑀲𑀘𑁆𑀘𑀸𑀮𑀺𑀓𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀸𑀘𑀁 𑀦 𑀪𑀡𑁂𑀬𑁆𑀬. 𑀅𑀜𑁆𑀜𑀸𑀢𑀢𑁆𑀣𑀦𑁆𑀢𑀺 𑀚𑀸𑀦𑀦𑀢𑁆𑀣𑀁. 𑀧𑀲𑀸𑀤𑀢𑁆𑀣𑀦𑁆𑀢𑀺 𑀧𑀲𑀸𑀤𑀚𑀦𑀦𑀢𑁆𑀣𑀁. 𑀦 𑀲𑀫𑀼𑀲𑁆𑀲𑁂𑀬𑁆𑀬 𑀫𑀦𑁆𑀢𑀬𑁂𑀢𑀺 𑀦 𑀫𑀸𑀦𑀼𑀲𑁆𑀲𑀬𑁂𑀦 𑀲𑀫𑀼𑀲𑁆𑀲𑀺𑀢𑁄 𑀪𑀯𑁂𑀬𑁆𑀬. 𑀦 𑀳𑀺 𑀫𑀸𑀦𑀼𑀲𑁆𑀲𑀺𑀢𑀸 𑀳𑀼𑀢𑁆𑀯𑀸 𑀧𑀡𑁆𑀟𑀺𑀢𑀸 𑀓𑀣𑀬𑀦𑁆𑀢𑀺, 𑀫𑀸𑀦𑁂𑀦 𑀧𑀦 𑀅𑀦𑀼𑀲𑁆𑀲𑀺𑀢𑁄𑀯 𑀳𑀼𑀢𑁆𑀯𑀸 𑀫𑀦𑁆𑀢𑀬𑁂 𑀓𑀣𑁂𑀬𑁆𑀬 𑀪𑀸𑀲𑁂𑀬𑁆𑀬𑀸𑀢𑀺.

𑁮. 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀅𑀝𑁆𑀞𑀫𑁂 𑀪𑀕𑀯𑀁𑀫𑀽𑀮𑀓𑀸𑀢𑀺 𑀪𑀕𑀯𑀸 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀫𑀽𑀮𑀓𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀥𑀫𑁆𑀫𑀸 𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀉𑀧𑁆𑀧𑀸𑀤𑀺𑀢𑀸, 𑀢𑀲𑁆𑀫𑀺𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺, 𑀪𑀕𑀯𑀢𑁄 𑀧𑀦 𑀦𑁄 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀸𑀤𑀺𑀢𑀸. 𑀪𑀕𑀯𑀦𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀫𑀬𑀁 𑀇𑀫𑁂 𑀥𑀫𑁆𑀫𑁂 𑀆𑀚𑀸𑀦𑀸𑀫 𑀧𑀝𑀺𑀯𑀺𑀚𑁆𑀛𑀸𑀫𑀸𑀢𑀺 𑀏𑀯𑀁 𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸𑀢𑀺. 𑀪𑀕𑀯𑀁𑀦𑁂𑀢𑁆𑀢𑀺𑀓𑀸𑀢𑀺 𑀪𑀕𑀯𑀸 𑀥𑀫𑁆𑀫𑀸𑀦𑀁 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀬𑀣𑀸𑀲𑀪𑀸𑀯𑀢𑁄 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸𑀯 𑀤𑀲𑁆𑀲𑁂𑀢𑀸𑀢𑀺 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀪𑀕𑀯𑀁𑀧𑀝𑀺𑀲𑀭𑀡𑀸𑀢𑀺 𑀘𑀢𑀼𑀪𑀽𑀫𑀓𑀥𑀫𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀫𑀸𑀦𑀸 𑀪𑀕𑀯𑀢𑀺 𑀧𑀝𑀺𑀲𑀭𑀦𑁆𑀢𑀺 𑀦𑀸𑀫𑀸𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀧𑀝𑀺𑀲𑀭𑀦𑁆𑀢𑀻𑀢𑀺 𑀑𑀲𑀭𑀦𑁆𑀢𑀺 𑀲𑀫𑁄𑀲𑀭𑀦𑁆𑀢𑀺. 𑀅𑀧𑀺𑀘 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀧𑀝𑀺𑀯𑁂𑀥𑀯𑀲𑁂𑀦 𑀨𑀲𑁆𑀲𑁄 𑀆𑀕𑀘𑁆𑀙𑀢𑀺 𑁋 ‘‘𑀅𑀳𑀁 𑀪𑀕𑀯𑀸 𑀓𑀺𑀦𑁆𑀦𑀸𑀫𑁄’’𑀢𑀺. 𑀢𑁆𑀯𑀁 𑀨𑀼𑀲𑀦𑀝𑁆𑀞𑁂𑀦 𑀨𑀲𑁆𑀲𑁄 𑀦𑀸𑀫. 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑀆𑀕𑀘𑁆𑀙𑀢𑀺 𑁋 ‘‘𑀅𑀳𑀁 𑀪𑀕𑀯𑀸 𑀓𑀺𑀦𑁆𑀦𑀸𑀫’’𑀦𑁆𑀢𑀺. 𑀢𑁆𑀯𑀁 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀁 𑀦𑀸𑀫𑀸𑀢𑀺. 𑀏𑀯𑀁 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀢𑁄 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄 𑀪𑀕𑀯𑀸 𑀥𑀫𑁆𑀫𑁂 𑀧𑀝𑀺𑀲𑀭𑀢𑀻𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀽𑀢𑀺 𑀪𑀕𑀯𑀢𑁄𑀯 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀼, 𑀢𑀼𑀫𑁆𑀳𑁂𑀬𑁂𑀯 𑀦𑁄 𑀓𑀣𑁂𑀢𑁆𑀯𑀸 𑀤𑁂𑀣𑀸𑀢𑀺 𑀅𑀢𑁆𑀣𑁄.

𑀭𑀸𑀕𑁄 𑀔𑁄𑀢𑀺 𑀭𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀭𑀸𑀕𑁄. 𑀅𑀧𑁆𑀧𑀲𑀸𑀯𑀚𑁆𑀚𑁄𑀢𑀺 𑀮𑁄𑀓𑀯𑀚𑁆𑀚𑀯𑀲𑁂𑀦𑀧𑀺 𑀯𑀺𑀧𑀸𑀓𑀯𑀚𑁆𑀚𑀯𑀲𑁂𑀦𑀧𑀻𑀢𑀺 𑀤𑁆𑀯𑀻𑀳𑀺𑀧𑀺 𑀯𑀚𑁆𑀚𑁂𑀳𑀺 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀧𑁆𑀧𑀤𑁄𑀲𑁄𑀢𑀺 𑀅𑀢𑁆𑀣𑁄. 𑀓𑀣𑀁? 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀪𑀸𑀢𑀺𑀪𑀕𑀺𑀦𑀺𑀆𑀤𑀬𑁄 𑀘 𑀧𑀼𑀢𑁆𑀢𑀪𑀸𑀢𑀺𑀓𑀸𑀦𑀁 𑀆𑀯𑀸𑀳𑀯𑀺𑀯𑀸𑀳𑀫𑀗𑁆𑀕𑀮𑀁 𑀦𑀸𑀫 𑀓𑀸𑀭𑁂𑀦𑁆𑀢𑀺. 𑀏𑀯𑀁 𑀢𑀸𑀯𑁂𑀲𑁄 𑀮𑁄𑀓𑀯𑀚𑁆𑀚𑀯𑀲𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑁄. 𑀲𑀤𑀸𑀭𑀲𑀦𑁆𑀢𑁄𑀲𑀫𑀽𑀮𑀺𑀓𑀸 𑀧𑀦 𑀅𑀧𑀸𑀬𑁂 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦 𑀳𑁄𑀢𑀻𑀢𑀺 𑀏𑀯𑀁 𑀯𑀺𑀧𑀸𑀓𑀯𑀚𑁆𑀚𑀯𑀲𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑁄. 𑀤𑀦𑁆𑀥𑀯𑀺𑀭𑀸𑀕𑀻𑀢𑀺 𑀯𑀺𑀭𑀚𑁆𑀚𑀫𑀸𑀦𑁄 𑀧𑀦𑁂𑀲 𑀲𑀡𑀺𑀓𑀁 𑀯𑀺𑀭𑀚𑁆𑀚𑀢𑀺, 𑀦 𑀲𑀻𑀖𑀁 𑀫𑀼𑀘𑁆𑀘𑀢𑀺. 𑀢𑁂𑀮𑀫𑀲𑀺𑀭𑀸𑀕𑁄 𑀯𑀺𑀬 𑀘𑀺𑀭𑀁 𑀅𑀦𑀼𑀩𑀦𑁆𑀥𑀢𑀺, 𑀤𑁆𑀯𑁂 𑀢𑀻𑀡𑀺 𑀪𑀯𑀦𑁆𑀢𑀭𑀸𑀦𑀺 𑀕𑀦𑁆𑀢𑁆𑀯𑀸𑀧𑀺 𑀦𑀸𑀧𑀕𑀘𑁆𑀙𑀢𑀻𑀢𑀺 𑀤𑀦𑁆𑀥𑀯𑀺𑀭𑀸𑀕𑀻.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀪𑀸𑀢𑀼 𑀚𑀸𑀬𑀸𑀬 𑀫𑀺𑀘𑁆𑀙𑀸𑀘𑀸𑀭𑀁 𑀘𑀭𑀢𑀺. 𑀢𑀲𑁆𑀲𑀸𑀧𑀺 𑀇𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀢𑁄 𑀲𑁄𑀬𑁂𑀯 𑀧𑀺𑀬𑀢𑀭𑁄 𑀅𑀳𑁄𑀲𑀺. 𑀲𑀸 𑀢𑀫𑀸𑀳 𑁋 ‘‘𑀇𑀫𑀲𑁆𑀫𑀺𑀁 𑀓𑀸𑀭𑀡𑁂 𑀧𑀸𑀓𑀝𑁂 𑀚𑀸𑀢𑁂 𑀫𑀳𑀢𑀻 𑀕𑀭𑀳𑀸 𑀪𑀯𑀺𑀲𑁆𑀲𑀢𑀺, 𑀢𑀯 𑀪𑀸𑀢𑀺𑀓𑀁 𑀖𑀸𑀢𑁂𑀳𑀻’’𑀢𑀺. 𑀲𑁄 ‘‘𑀦𑀲𑁆𑀲, 𑀯𑀲𑀮𑀺, 𑀫𑀸 𑀏𑀯𑀁 𑀧𑀼𑀦 𑀅𑀯𑀘𑀸’’𑀢𑀺 𑀅𑀧𑀲𑀸𑀤𑁂𑀲𑀺. 𑀲𑀸 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀧𑀼𑀦 𑀓𑀣𑁂𑀲𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀤𑁆𑀯𑀚𑁆𑀛𑀪𑀸𑀯𑀁 𑀅𑀕𑀫𑀸𑀲𑀺. 𑀢𑀢𑁄 𑀢𑀢𑀺𑀬𑀯𑀸𑀭𑀁 𑀓𑀣𑀺𑀢𑁄 ‘‘𑀓𑀺𑀦𑁆𑀢𑀺 𑀓𑀢𑁆𑀯𑀸 𑀑𑀓𑀸𑀲𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣𑀲𑁆𑀲 𑀲𑀸 𑀉𑀧𑀸𑀬𑀁 𑀓𑀣𑁂𑀦𑁆𑀢𑀻 ‘‘𑀢𑁆𑀯𑀁 𑀫𑀬𑀸 𑀯𑀼𑀢𑁆𑀢𑀫𑁂𑀯 𑀓𑀭𑁄𑀳𑀺, 𑀅𑀲𑀼𑀓𑀝𑁆𑀞𑀸𑀦𑁂 𑀫𑀳𑀸𑀓𑀓𑀼𑀥𑀲𑀫𑀻𑀧𑁂 𑀢𑀺𑀢𑁆𑀣𑀁 𑀅𑀢𑁆𑀣𑀺, 𑀢𑀢𑁆𑀣 𑀢𑀺𑀔𑀺𑀡𑀁 𑀤𑀡𑁆𑀟𑀓𑀯𑀸𑀲𑀺𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀸𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀚𑁂𑀝𑁆𑀞𑀪𑀸𑀢𑀸𑀧𑀺𑀲𑁆𑀲 𑀅𑀭𑀜𑁆𑀜𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀖𑀭𑀁 𑀆𑀕𑀢𑁄. 𑀲𑀸 𑀢𑀲𑁆𑀫𑀺𑀁 𑀫𑀼𑀤𑀼𑀘𑀺𑀢𑁆𑀢𑀸 𑀯𑀺𑀬 𑀳𑀼𑀢𑁆𑀯𑀸 ‘‘𑀏𑀳𑀺 𑀲𑀸𑀫𑀺, 𑀲𑀻𑀲𑁂 𑀢𑁂 𑀑𑀮𑀺𑀔𑀺𑀲𑁆𑀲𑀸𑀫𑀻’’𑀢𑀺 𑀑𑀮𑀺𑀔𑀦𑁆𑀢𑀻 ‘‘𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀢𑁂 𑀲𑀻𑀲’’𑀦𑁆𑀢𑀺 𑀆𑀫𑀮𑀓𑀧𑀺𑀡𑁆𑀟𑀁 𑀤𑀢𑁆𑀯𑀸 ‘‘𑀕𑀘𑁆𑀙 𑀅𑀲𑀼𑀓𑀝𑁆𑀞𑀸𑀦𑁂 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀆𑀕𑀘𑁆𑀙𑀸𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀢𑀸𑀬 𑀯𑀼𑀢𑁆𑀢𑀢𑀺𑀢𑁆𑀣𑀫𑁂𑀯 𑀕𑀦𑁆𑀢𑁆𑀯𑀸 𑀆𑀫𑀮𑀓𑀓𑀓𑁆𑀓𑁂𑀦 𑀲𑀻𑀲𑀁 𑀫𑀓𑁆𑀔𑁂𑀢𑁆𑀯𑀸 𑀉𑀤𑀓𑀁 𑀑𑀭𑀼𑀬𑁆𑀳 𑀑𑀦𑀫𑀺𑀢𑁆𑀯𑀸 𑀲𑀻𑀲𑀁 𑀥𑁄𑀯𑀺. 𑀅𑀣 𑀦𑀁 𑀇𑀢𑀭𑁄 𑀭𑀼𑀓𑁆𑀔𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀔𑀦𑁆𑀥𑀝𑁆𑀞𑀺𑀓𑁂 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺.

𑀇𑀢𑀭𑁄 𑀪𑀭𑀺𑀬𑀸𑀬 𑀲𑀺𑀦𑁂𑀳𑀁 𑀧𑀭𑀺𑀘𑁆𑀘𑀚𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀫𑀳𑀸𑀥𑀫𑁆𑀫𑀦𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀲𑁆𑀲𑀸 𑀞𑀺𑀢𑀸𑀬𑀧𑀺 𑀦𑀺𑀲𑀺𑀦𑁆𑀦𑀸𑀬𑀧𑀺 𑀕𑀦𑁆𑀢𑁆𑀯𑀸 𑀲𑀭𑀻𑀭𑁂 𑀧𑀢𑀢𑀺. 𑀅𑀣 𑀦𑀁 𑀲𑀸 ‘‘𑀲𑁄𑀬𑁂𑀯 𑀅𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀖𑀸𑀢𑀸𑀧𑁂𑀲𑀺. 𑀲𑁄 𑀧𑀼𑀦 𑀢𑀲𑁆𑀲𑀸 𑀲𑀺𑀦𑁂𑀳𑁂𑀦 𑀢𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀓𑀼𑀓𑁆𑀓𑀼𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀧𑀤𑀲𑀸 𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀘𑀭𑀢𑀺. 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀦𑀺𑀓𑁆𑀔𑀦𑁆𑀢𑁄 𑀲𑀼𑀦𑀔𑀮𑀼𑀤𑁆𑀤𑀓𑁄, 𑀓𑀢𑀭𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀉𑀧𑁆𑀧𑀡𑁆𑀟𑁂𑀦𑁆𑀢𑀺. 𑀲𑀸 𑀧𑀼𑀦 𑀢𑀁 𑀖𑀸𑀢𑀸𑀧𑁂𑀲𑀺.

𑀲𑁄𑀧𑀺 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀯𑀘𑁆𑀙𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀣𑁂𑀯 𑀢𑀲𑁆𑀲𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀘𑀭𑀢𑀺. 𑀢𑀤𑀸𑀧𑀺 𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀦𑀺𑀓𑁆𑀔𑀦𑁆𑀢𑁄 𑀕𑁄𑀧𑀸𑀮𑀓𑁄, 𑀓𑀢𑁆𑀣 𑀕𑀸𑀯𑀺𑀬𑁄 𑀘𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀧𑁆𑀧𑀡𑁆𑀟𑁂𑀦𑁆𑀢𑀺. 𑀲𑀸 𑀢𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀢𑀁 𑀖𑀸𑀢𑀸𑀧𑁂𑀲𑀺. 𑀲𑁄 𑀢𑀤𑀸𑀧𑀺 𑀢𑀲𑁆𑀲𑀸 𑀉𑀧𑀭𑀺 𑀲𑀺𑀦𑁂𑀳𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘𑀢𑀼𑀢𑁆𑀣𑁂 𑀯𑀸𑀭𑁂 𑀢𑀲𑁆𑀲𑀸𑀬𑁂𑀯 𑀓𑀼𑀘𑁆𑀙𑀺𑀬𑀁 𑀚𑀸𑀢𑀺𑀲𑁆𑀲𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀧𑀝𑀺𑀧𑀸𑀝𑀺𑀬𑀸 𑀘𑀢𑀽𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀢𑀸𑀬 𑀖𑀸𑀢𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀸𑀬 𑀦𑀸𑀫 𑀧𑀘𑁆𑀘𑀢𑁆𑀣𑀺𑀓𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀳𑀢𑁆𑀣𑁂𑀦 𑀅𑀢𑁆𑀢𑀸𑀦𑀁 𑀨𑀼𑀲𑀺𑀢𑀼𑀁 𑀦 𑀤𑁂𑀢𑀺. 𑀲𑀘𑁂 𑀦𑀁 𑀲𑀸 𑀨𑀼𑀲𑀢𑀺, 𑀓𑀦𑁆𑀤𑀢𑀺 𑀭𑁄𑀤𑀢𑀺. 𑀅𑀣 𑀦𑀁 𑀅𑀬𑁆𑀬𑀓𑁄𑀯 𑀧𑀝𑀺𑀚𑀕𑁆𑀕𑀢𑀺. 𑀢𑀁 𑀅𑀧𑀭𑀪𑀸𑀕𑁂 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀁 𑀅𑀬𑁆𑀬𑀓𑁄 𑀆𑀳 𑁋 ‘‘𑀢𑀸𑀢, 𑀓𑀲𑁆𑀫𑀸 𑀢𑁆𑀯𑀁 𑀫𑀸𑀢𑀼 𑀳𑀢𑁆𑀣𑁂𑀦 𑀅𑀢𑁆𑀢𑀸𑀦𑀁 𑀨𑀼𑀲𑀺𑀢𑀼𑀁 𑀦 𑀤𑁂𑀲𑀺. 𑀲𑀘𑁂𑀧𑀺 𑀢𑀁 𑀨𑀼𑀲𑀢𑀺, 𑀫𑀳𑀸𑀲𑀤𑁆𑀤𑁂𑀦 𑀭𑁄𑀤𑀲𑀺 𑀓𑀦𑁆𑀤𑀲𑀻’’𑀢𑀺. 𑀅𑀬𑁆𑀬𑀓𑁂𑀦 𑀧𑀼𑀝𑁆𑀞𑁄 ‘‘𑀦 𑀏𑀲𑀸 𑀫𑀬𑁆𑀳𑀁 𑀫𑀸𑀢𑀸, 𑀧𑀘𑁆𑀘𑀸𑀫𑀺𑀢𑁆𑀢𑀸 𑀏𑀲𑀸’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀲𑁄 𑀢𑀁 𑀆𑀮𑀺𑀗𑁆𑀕𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 ‘‘𑀏𑀳𑀺, 𑀢𑀸𑀢, 𑀓𑀺𑀁 𑀅𑀫𑁆𑀳𑀸𑀓𑀁 𑀈𑀤𑀺𑀲𑁂 𑀞𑀸𑀦𑁂 𑀦𑀺𑀯𑀸𑀲𑀓𑀺𑀘𑁆𑀘’’𑀦𑁆𑀢𑀺 𑀢𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀉𑀪𑁄𑀧𑀺 𑀢𑀢𑁆𑀣 𑀯𑀲𑀦𑁆𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀮𑁄𑀓𑀯𑀚𑁆𑀚𑀯𑀲𑁂𑀦𑀧𑀺 𑀯𑀺𑀧𑀸𑀓𑀯𑀚𑁆𑀚𑀯𑀲𑁂𑀦𑀧𑀻𑀢𑀺 𑀤𑁆𑀯𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀣𑀁? 𑀤𑁄𑀲𑁂𑀦 𑀳𑀺 𑀤𑀼𑀝𑁆𑀞𑁄 𑀳𑀼𑀢𑁆𑀯𑀸 𑀫𑀸𑀢𑀭𑀺𑀧𑀺 𑀅𑀧𑀭𑀚𑁆𑀛𑀢𑀺, 𑀧𑀺𑀢𑀭𑀺𑀧𑀺 𑀪𑀸𑀢𑀺𑀪𑀕𑀺𑀦𑀺𑀆𑀤𑀻𑀲𑀼𑀧𑀺 𑀧𑀩𑁆𑀩𑀚𑀺𑀢𑁂𑀲𑀼𑀧𑀺. 𑀲𑁄 𑀕𑀢𑀕𑀢𑀝𑁆𑀞𑀸𑀦𑁂𑀲𑀼 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀫𑀸𑀢𑀸𑀧𑀺𑀢𑀽𑀲𑀼𑀧𑀺 𑀅𑀧𑀭𑀚𑁆𑀛𑀢𑀺, 𑀪𑀸𑀢𑀺𑀪𑀕𑀺𑀦𑀺𑀆𑀤𑀻𑀲𑀼𑀧𑀺, 𑀧𑀩𑁆𑀩𑀚𑀺𑀢𑁂𑀲𑀼𑀧𑀻’’𑀢𑀺 𑀫𑀳𑀢𑀺𑀁 𑀕𑀭𑀳𑀁 𑀮𑀪𑀢𑀺. 𑀏𑀯𑀁 𑀢𑀸𑀯 𑀮𑁄𑀓𑀯𑀚𑁆𑀚𑀯𑀲𑁂𑀦 𑀫𑀳𑀸𑀲𑀸𑀯𑀚𑁆𑀚𑁄. 𑀤𑁄𑀲𑀯𑀲𑁂𑀦 𑀧𑀦 𑀓𑀢𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀦 𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀢𑀺. 𑀏𑀯𑀁 𑀯𑀺𑀧𑀸𑀓𑀯𑀚𑁆𑀚𑀯𑀲𑁂𑀦 𑀫𑀳𑀸𑀲𑀸𑀯𑀚𑁆𑀚𑁄. 𑀔𑀺𑀧𑁆𑀧𑀯𑀺𑀭𑀸𑀕𑀻𑀢𑀺 𑀔𑀺𑀧𑁆𑀧𑀁 𑀯𑀺𑀭𑀚𑁆𑀚𑀢𑀺. 𑀤𑁄𑀲𑁂𑀦 𑀳𑀺 𑀤𑀼𑀝𑁆𑀞𑁄 𑀫𑀸𑀢𑀸𑀧𑀺𑀢𑀽𑀲𑀼𑀧𑀺 𑀘𑁂𑀢𑀺𑀬𑁂𑀧𑀺 𑀩𑁄𑀥𑀺𑀫𑁆𑀳𑀺𑀧𑀺 𑀧𑀩𑁆𑀩𑀚𑀺𑀢𑁂𑀲𑀼𑀧𑀺 𑀅𑀧𑀭𑀚𑁆𑀛𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀔𑀫𑀣𑀸’’𑀢𑀺. 𑀅𑀘𑁆𑀘𑀬𑀁 𑀤𑁂𑀲𑁂𑀢𑀺. 𑀢𑀲𑁆𑀲 𑀲𑀳 𑀔𑀫𑀸𑀧𑀦𑁂𑀦 𑀢𑀁 𑀓𑀫𑁆𑀫𑀁 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺.

𑀫𑁄𑀳𑁄𑀧𑀺 𑀤𑁆𑀯𑀻𑀳𑁂𑀯 𑀓𑀸𑀭𑀡𑁂𑀳𑀺 𑀫𑀳𑀸𑀲𑀸𑀯𑀚𑁆𑀚𑁄. 𑀫𑁄𑀳𑁂𑀦 𑀳𑀺 𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀲𑀼𑀧𑀺 𑀘𑁂𑀢𑀺𑀬𑁂𑀧𑀺 𑀩𑁄𑀥𑀺𑀫𑁆𑀳𑀺𑀧𑀺 𑀧𑀩𑁆𑀩𑀚𑀺𑀢𑁂𑀲𑀼𑀧𑀺 𑀅𑀧𑀭𑀚𑁆𑀛𑀺𑀢𑁆𑀯𑀸 𑀕𑀢𑀕𑀢𑀝𑁆𑀞𑀸𑀦𑁂 𑀕𑀭𑀳𑀁 𑀮𑀪𑀢𑀺. 𑀏𑀯𑀁 𑀢𑀸𑀯 𑀮𑁄𑀓𑀯𑀚𑁆𑀚𑀯𑀲𑁂𑀦 𑀫𑀳𑀸𑀲𑀸𑀯𑀚𑁆𑀚𑁄. 𑀫𑁄𑀳𑀯𑀲𑁂𑀦 𑀧𑀦 𑀓𑀢𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀦 𑀓𑀧𑁆𑀧𑀁 𑀦𑀺𑀭𑀬𑁂 𑀧𑀘𑁆𑀘𑀢𑀺. 𑀏𑀯𑀁 𑀯𑀺𑀧𑀸𑀓𑀯𑀚𑁆𑀚𑀯𑀲𑁂𑀦𑀧𑀺 𑀫𑀳𑀸𑀲𑀸𑀯𑀚𑁆𑀚𑁄. 𑀤𑀦𑁆𑀥𑀯𑀺𑀭𑀸𑀕𑀻𑀢𑀺 𑀲𑀡𑀺𑀓𑀁 𑀯𑀺𑀭𑀚𑁆𑀚𑀢𑀺. 𑀫𑁄𑀳𑁂𑀦 𑀫𑀽𑀴𑁆𑀳𑁂𑀦 𑀳𑀺 𑀓𑀢𑀓𑀫𑁆𑀫𑀁 𑀲𑀡𑀺𑀓𑀁 𑀫𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀅𑀘𑁆𑀙𑀘𑀫𑁆𑀫𑀁 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀥𑁄𑀯𑀺𑀬𑀫𑀸𑀦𑀁 𑀦 𑀧𑀡𑁆𑀟𑀭𑀁 𑀳𑁄𑀢𑀺, 𑀏𑀯𑀫𑁂𑀯 𑀫𑁄𑀳𑁂𑀦 𑀫𑀽𑀴𑁆𑀳𑁂𑀦 𑀓𑀢𑀓𑀫𑁆𑀫𑀁 𑀲𑀻𑀖𑀁 𑀦 𑀫𑀼𑀘𑁆𑀘𑀢𑀺, 𑀲𑀡𑀺𑀓𑀫𑁂𑀯 𑀫𑀼𑀘𑁆𑀘𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑁯. 𑀅𑀓𑀼𑀲𑀮𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀦𑀯𑀫𑁂 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀅𑀓𑀼𑀲𑀮𑀸𑀦𑀁 𑀫𑀽𑀮𑀸𑀦𑀺, 𑀅𑀓𑀼𑀲𑀮𑀸𑀦𑀺 𑀘 𑀢𑀸𑀦𑀺 𑀫𑀽𑀮𑀸𑀦𑀺 𑀘𑀸𑀢𑀺 𑀯𑀸 𑀅𑀓𑀼𑀲𑀮𑀫𑀽𑀮𑀸𑀦𑀺. 𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀮𑁄𑀪𑁄𑀢𑀺 𑀬𑁄𑀧𑀺, 𑀪𑀺𑀓𑁆𑀔𑀯𑁂, 𑀮𑁄𑀪𑁄. 𑀢𑀤𑀧𑀺 𑀅𑀓𑀼𑀲𑀮𑀫𑀽𑀮𑀦𑁆𑀢𑀺 𑀲𑁄𑀧𑀺 𑀅𑀓𑀼𑀲𑀮𑀫𑀽𑀮𑀁. 𑀅𑀓𑀼𑀲𑀮𑀫𑀽𑀮𑀁 𑀯𑀸 𑀲𑀦𑁆𑀥𑀸𑀬 𑀇𑀥 𑀢𑀫𑁆𑀧𑀻𑀢𑀺 𑀅𑀢𑁆𑀣𑁄 𑀯𑀝𑁆𑀝𑀢𑀺𑀬𑁂𑀯. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀦𑀬𑁄 𑀦𑁂𑀢𑀩𑁆𑀩𑁄. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀬𑀽𑀳𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺 𑀭𑀸𑀲𑀺𑀁 𑀓𑀭𑁄𑀢𑀺. 𑀅𑀲𑀢𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑀬𑀢𑀻𑀢𑀺 𑀅𑀪𑀽𑀢𑁂𑀦 𑀅𑀯𑀺𑀚𑁆𑀚𑀫𑀸𑀦𑁂𑀦 𑀬𑀁𑀓𑀺𑀜𑁆𑀘𑀺 𑀢𑀲𑁆𑀲 𑀅𑀪𑀽𑀢𑀁 𑀤𑁄𑀲𑀁 𑀯𑀢𑁆𑀯𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺. 𑀯𑀥𑁂𑀦 𑀯𑀸𑀢𑀺𑀆𑀤𑀺 𑀬𑁂𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀚𑀸𑀦𑀺𑀬𑀸𑀢𑀺 𑀥𑀦𑀚𑀸𑀦𑀺𑀬𑀸. 𑀧𑀩𑁆𑀩𑀸𑀚𑀦𑀸𑀬𑀸𑀢𑀺 𑀕𑀸𑀫𑀢𑁄 𑀯𑀸 𑀭𑀝𑁆𑀞𑀢𑁄 𑀯𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂𑀦. 𑀩𑀮𑀯𑀫𑁆𑀳𑀻𑀢𑀺 𑀅𑀳𑀫𑀲𑁆𑀫𑀺 𑀩𑀮𑀯𑀸. 𑀩𑀮𑀢𑁆𑀣𑁄 𑀇𑀢𑀺𑀧𑀻𑀢𑀺 𑀩𑀮𑁂𑀦 𑀫𑁂 𑀅𑀢𑁆𑀣𑁄 𑀇𑀢𑀺𑀧𑀺, 𑀩𑀮𑁂 𑀯𑀸 𑀞𑀺𑀢𑁄𑀫𑁆𑀳𑀻𑀢𑀺𑀧𑀺 𑀯𑀤𑀢𑀺.

𑀅𑀓𑀸𑀮𑀯𑀸𑀤𑀻𑀢𑀺 𑀓𑀸𑀮𑀲𑁆𑀫𑀺𑀁 𑀦 𑀯𑀤𑀢𑀺, 𑀅𑀓𑀸𑀮𑀲𑁆𑀫𑀺𑀁 𑀯𑀤𑀢𑀺 𑀦𑀸𑀫. 𑀅𑀪𑀽𑀢𑀯𑀸𑀤𑀻𑀢𑀺 𑀪𑀽𑀢𑀁 𑀦 𑀯𑀤𑀢𑀺, 𑀅𑀪𑀽𑀢𑀁 𑀯𑀤𑀢𑀺 𑀦𑀸𑀫. 𑀅𑀦𑀢𑁆𑀣𑀯𑀸𑀤𑀻𑀢𑀺 𑀅𑀢𑁆𑀣𑀁 𑀦 𑀯𑀤𑀢𑀺, 𑀅𑀦𑀢𑁆𑀣𑀁 𑀯𑀤𑀢𑀺 𑀦𑀸𑀫. 𑀅𑀥𑀫𑁆𑀫𑀯𑀸𑀤𑀻𑀢𑀺 𑀥𑀫𑁆𑀫𑀁 𑀦 𑀯𑀤𑀢𑀺, 𑀅𑀥𑀫𑁆𑀫𑀁 𑀯𑀤𑀢𑀺 𑀦𑀸𑀫. 𑀅𑀯𑀺𑀦𑀬𑀯𑀸𑀤𑀻𑀢𑀺 𑀯𑀺𑀦𑀬𑀁 𑀦 𑀯𑀤𑀢𑀺, 𑀅𑀯𑀺𑀦𑀬𑀁 𑀯𑀤𑀢𑀺 𑀦𑀸𑀫.

𑀢𑀣𑀸 𑀳𑀸𑀬𑀦𑁆𑀢𑀺 𑀢𑀣𑀸 𑀳𑀺 𑀅𑀬𑀁. 𑀦 𑀆𑀢𑀧𑁆𑀧𑀁 𑀓𑀭𑁄𑀢𑀺 𑀢𑀲𑁆𑀲 𑀦𑀺𑀩𑁆𑀩𑁂𑀞𑀦𑀸𑀬𑀸𑀢𑀺 𑀢𑀲𑁆𑀲 𑀅𑀪𑀽𑀢𑀲𑁆𑀲 𑀦𑀺𑀩𑁆𑀩𑁂𑀞𑀦𑀢𑁆𑀣𑀸𑀬 𑀯𑀻𑀭𑀺𑀬𑀁 𑀦 𑀓𑀭𑁄𑀢𑀺. 𑀇𑀢𑀺𑀧𑁂𑀢𑀁 𑀅𑀢𑀘𑁆𑀙𑀦𑁆𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀏𑀢𑀁 𑀅𑀢𑀘𑁆𑀙𑀁. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸𑀢𑀺 𑀦𑀺𑀭𑀬𑀸𑀤𑀺𑀓𑀸 𑀤𑀼𑀕𑁆𑀕𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀸 𑀅𑀲𑁆𑀲 𑀅𑀯𑀲𑁆𑀲𑀪𑀸𑀯𑀺𑀦𑀻, 𑀢𑀢𑁆𑀣𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀲𑁆𑀢𑁄𑀢𑀺 𑀉𑀧𑀭𑀺 𑀥𑀁𑀲𑀺𑀢𑁄. 𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀲𑀫𑀦𑁆𑀢𑀸 𑀑𑀦𑀤𑁆𑀥𑁄. 𑀅𑀦𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀯𑀼𑀟𑁆𑀠𑀺𑀁 𑀆𑀧𑀚𑁆𑀚𑀢𑀺. 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀻𑀢𑀺 𑀯𑀺𑀦𑀸𑀲𑀁 𑀆𑀧𑀚𑁆𑀚𑀢𑀺. 𑀕𑀺𑀫𑁆𑀳𑀓𑀸𑀮𑀲𑁆𑀫𑀺𑀜𑁆𑀳𑀺 𑀫𑀸𑀮𑀼𑀯𑀸𑀲𑀺𑀧𑀸𑀝𑀺𑀓𑀸𑀬 𑀨𑀮𑀺𑀢𑀸𑀬 𑀩𑀻𑀚𑀸𑀦𑀺 𑀉𑀧𑁆𑀧𑀢𑀺𑀢𑁆𑀯𑀸 𑀯𑀝𑀭𑀼𑀓𑁆𑀔𑀸𑀤𑀻𑀦𑀁 𑀫𑀽𑀮𑁂 𑀧𑀢𑀦𑁆𑀢𑀺. 𑀢𑀢𑁆𑀣 𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀢𑀻𑀲𑀼 𑀤𑀺𑀲𑀸𑀲𑀼 𑀢𑀻𑀡𑀺 𑀩𑀻𑀚𑀸𑀦𑀺 𑀧𑀢𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀧𑀸𑀯𑀼𑀲𑁆𑀲𑀓𑁂𑀦 𑀫𑁂𑀖𑁂𑀦 𑀅𑀪𑀺𑀯𑀝𑁆𑀞𑁂 𑀢𑀻𑀳𑀺 𑀩𑀻𑀚𑁂𑀳𑀺 𑀢𑀬𑁄 𑀅𑀗𑁆𑀓𑀼𑀭𑀸 𑀉𑀝𑁆𑀞𑀳𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀅𑀮𑁆𑀮𑀻𑀬𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀭𑀼𑀓𑁆𑀔𑀤𑁂𑀯𑀢𑀸𑀬𑁄 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀧𑀺 𑀅𑀗𑁆𑀓𑀼𑀭𑀸 𑀯𑀟𑁆𑀠𑀫𑀸𑀦𑀸 𑀮𑀢𑀸𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀩𑁆𑀩𑀯𑀺𑀝𑀧𑀲𑀸𑀔𑀸𑀧𑀲𑀸𑀔𑀸 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀉𑀧𑀭𑀺 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀺. 𑀲𑁄 𑀫𑀸𑀮𑀼𑀯𑀸𑀮𑀢𑀸𑀳𑀺 𑀲𑀁𑀲𑀺𑀩𑁆𑀩𑀺𑀢𑁄 𑀖𑀦𑁂𑀳𑀺 𑀫𑀳𑀦𑁆𑀢𑁂𑀳𑀺 𑀫𑀸𑀮𑀼𑀯𑀸𑀧𑀢𑁆𑀢𑁂𑀳𑀺 𑀲𑀜𑁆𑀙𑀦𑁆𑀦𑁄 𑀤𑁂𑀯𑁂 𑀯𑀸 𑀯𑀲𑁆𑀲𑀦𑁆𑀢𑁂 𑀯𑀸𑀢𑁂 𑀯𑀸 𑀯𑀸𑀬𑀦𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀧𑀮𑀼𑀚𑁆𑀚𑀺𑀢𑁆𑀯𑀸 𑀔𑀸𑀡𑀼𑀫𑀢𑁆𑀢𑀫𑁂𑀯 𑀅𑀯𑀲𑀺𑀲𑁆𑀲𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀧𑀦 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀲𑀸𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀭𑀼𑀓𑁆𑀔𑁄 𑀯𑀺𑀬 𑀳𑀺 𑀅𑀬𑀁 𑀲𑀢𑁆𑀢𑁄 𑀤𑀝𑁆𑀞𑀩𑁆𑀩𑁄, 𑀢𑀺𑀲𑁆𑀲𑁄 𑀫𑀸𑀮𑀼𑀯𑀸𑀮𑀢𑀸 𑀯𑀺𑀬 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀬𑀸𑀯 𑀭𑀼𑀓𑁆𑀔𑀲𑀸𑀔𑀸 𑀅𑀲𑀫𑁆𑀧𑀢𑁆𑀢𑀸, 𑀢𑀸𑀯 𑀢𑀸𑀲𑀁 𑀮𑀢𑀸𑀦𑀁 𑀉𑀚𑀼𑀓𑀁 𑀭𑀼𑀓𑁆𑀔𑀸𑀭𑁄𑀳𑀦𑀁 𑀯𑀺𑀬 𑀮𑁄𑀪𑀸𑀤𑀻𑀦𑀁 𑀤𑁆𑀯𑀸𑀭𑀁 𑀅𑀲𑀫𑁆𑀧𑀢𑁆𑀢𑀓𑀸𑀮𑁄, 𑀲𑀸𑀔𑀸𑀦𑀼𑀲𑀸𑀭𑁂𑀦 𑀕𑀫𑀦𑀓𑀸𑀮𑁄 𑀯𑀺𑀬 𑀤𑁆𑀯𑀸𑀭𑀯𑀲𑁂𑀦 𑀕𑀫𑀦𑀓𑀸𑀮𑁄, 𑀧𑀭𑀺𑀬𑁄𑀦𑀤𑁆𑀥𑀓𑀸𑀮𑁄 𑀯𑀺𑀬 𑀮𑁄𑀪𑀸𑀤𑀻𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀓𑀸𑀮𑁄, 𑀔𑀼𑀤𑁆𑀤𑀓𑀲𑀸𑀔𑀸𑀦𑀁 𑀧𑀮𑀼𑀚𑁆𑀚𑀦𑀓𑀸𑀮𑁄 𑀯𑀺𑀬 𑀤𑁆𑀯𑀸𑀭𑀧𑁆𑀧𑀢𑁆𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑀓𑀸𑀮𑁄, 𑀫𑀳𑀸𑀲𑀸𑀔𑀸𑀦𑀁 𑀧𑀮𑀼𑀚𑁆𑀚𑀦𑀓𑀸𑀮𑁄 𑀯𑀺𑀬 𑀕𑀭𑀼𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑀓𑀸𑀮𑁄, 𑀮𑀢𑀸𑀦𑀼𑀲𑀸𑀭𑁂𑀦 𑀑𑀢𑀺𑀡𑁆𑀡𑁂𑀦 𑀉𑀤𑀓𑁂𑀦 𑀫𑀽𑀮𑁂𑀲𑀼 𑀢𑀺𑀦𑁆𑀢𑁂𑀲𑀼 𑀭𑀼𑀓𑁆𑀔𑀲𑁆𑀲 𑀪𑀽𑀫𑀺𑀬𑀁 𑀧𑀢𑀦𑀓𑀸𑀮𑁄 𑀯𑀺𑀬 𑀓𑀫𑁂𑀦 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀆𑀧𑀚𑁆𑀚𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀓𑀸𑀮𑁄 𑀤𑀝𑁆𑀞𑀩𑁆𑀩𑁄.

𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀧𑀦 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀲𑀸𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀭𑀼𑀓𑁆𑀔𑁄 𑀯𑀺𑀬 𑀅𑀬𑀁 𑀲𑀢𑁆𑀢𑁄 𑀤𑀝𑁆𑀞𑀩𑁆𑀩𑁄, 𑀢𑀺𑀲𑁆𑀲𑁄 𑀫𑀸𑀮𑀼𑀯𑀸𑀮𑀢𑀸 𑀯𑀺𑀬 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀢𑀸𑀲𑀁 𑀅𑀧𑁆𑀧𑀯𑀢𑁆𑀢𑀺𑀁 𑀓𑀸𑀢𑀼𑀁 𑀆𑀕𑀢𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀓𑀼𑀤𑁆𑀤𑀸𑀮𑁄 𑀯𑀺𑀬 𑀧𑀜𑁆𑀜𑀸, 𑀓𑀼𑀤𑁆𑀤𑀸𑀮𑀧𑀺𑀝𑀓𑀁 𑀯𑀺𑀬 𑀲𑀤𑁆𑀥𑀸𑀧𑀺𑀝𑀓𑀁, 𑀧𑀮𑀺𑀔𑀦𑀦𑀔𑀡𑀺𑀢𑁆𑀢𑀺 𑀯𑀺𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸, 𑀔𑀡𑀺𑀢𑁆𑀢𑀺𑀬𑀸 𑀫𑀽𑀮𑀘𑁆𑀙𑁂𑀤𑀦𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀫𑀽𑀮𑀲𑁆𑀲 𑀙𑀺𑀦𑁆𑀤𑀦𑀓𑀸𑀮𑁄, 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀦𑀓𑀸𑀮𑁄 𑀯𑀺𑀬 𑀔𑀦𑁆𑀥𑀯𑀲𑁂𑀦 𑀤𑀺𑀝𑁆𑀞𑀓𑀸𑀮𑁄, 𑀨𑀸𑀮𑀦𑀓𑀸𑀮𑁄 𑀯𑀺𑀬 𑀫𑀕𑁆𑀕𑀜𑀸𑀡𑁂𑀦 𑀓𑀺𑀮𑁂𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑀺𑀢𑀓𑀸𑀮𑁄, 𑀫𑀲𑀺𑀓𑀭𑀡𑀓𑀸𑀮𑁄 𑀯𑀺𑀬 𑀥𑀭𑀫𑀸𑀦𑀓𑀧𑀜𑁆𑀘𑀓𑁆𑀔𑀦𑁆𑀥𑀓𑀸𑀮𑁄, 𑀫𑀳𑀸𑀯𑀸𑀢𑁂 𑀑𑀧𑀼𑀡𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀦𑀓𑀸𑀮𑁄 𑀯𑀺𑀬 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀧𑀼𑀦𑀩𑁆𑀪𑀯𑁂 𑀧𑀝𑀺𑀲𑀦𑁆𑀥𑀺𑀅𑀕𑁆𑀕𑀳𑀡𑀓𑀸𑀮𑁄 𑀤𑀝𑁆𑀞𑀩𑁆𑀩𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁧𑁦. 𑀉𑀧𑁄𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀤𑀲𑀫𑁂 𑀢𑀤𑀳𑀼𑀧𑁄𑀲𑀣𑁂𑀢𑀺 𑀢𑀲𑁆𑀫𑀺𑀁 𑀅𑀳𑀼 𑀉𑀧𑁄𑀲𑀣𑁂 𑀢𑀁 𑀤𑀺𑀯𑀲𑀁 𑀉𑀧𑁄𑀲𑀣𑁂, 𑀧𑀦𑁆𑀦𑀭𑀲𑀺𑀓𑀉𑀧𑁄𑀲𑀣𑀤𑀺𑀯𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀉𑀧𑀲𑀗𑁆𑀓𑀫𑀺. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀤𑀺𑀯𑀸 𑀦𑀸𑀫 𑀫𑀚𑁆𑀛𑀦𑁆𑀳𑁄, 𑀇𑀫𑀲𑁆𑀫𑀺𑀁 𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀓𑀼𑀢𑁄 𑀦𑀼 𑀢𑁆𑀯𑀁 𑀆𑀕𑀘𑁆𑀙𑀲𑀻𑀢𑀺 𑀓𑀺𑀁 𑀓𑀭𑁄𑀦𑁆𑀢𑀻 𑀯𑀺𑀘𑀭𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀕𑁄𑀧𑀸𑀮𑀓𑀼𑀧𑁄𑀲𑀣𑁄𑀢𑀺 𑀕𑁄𑀧𑀸𑀮𑀓𑁂𑀳𑀺 𑀲𑀤𑁆𑀥𑀺𑀁 𑀉𑀧𑀯𑀲𑀦𑀉𑀧𑁄𑀲𑀣𑁄. 𑀦𑀺𑀕𑀡𑁆𑀞𑀼𑀧𑁄𑀲𑀣𑁄𑀢𑀺 𑀦𑀺𑀕𑀡𑁆𑀞𑀸𑀦𑀁 𑀉𑀧𑀯𑀲𑀦𑀉𑀧𑁄𑀲𑀣𑁄. 𑀅𑀭𑀺𑀬𑀼𑀧𑁄𑀲𑀣𑁄𑀢𑀺 𑀅𑀭𑀺𑀬𑀸𑀦𑀁 𑀉𑀧𑀯𑀲𑀦𑀉𑀧𑁄𑀲𑀣𑁄. 𑀲𑁂𑀬𑁆𑀬𑀣𑀸𑀧𑀺 𑀯𑀺𑀲𑀸𑀔𑁂𑀢𑀺 𑀬𑀣𑀸 𑀦𑀸𑀫, 𑀯𑀺𑀲𑀸𑀔𑁂. 𑀲𑀸𑀬𑀦𑁆𑀳𑀲𑀫𑀬𑁂 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄 𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀢𑀺 𑀕𑁄𑀧𑀸𑀮𑀓𑀸 𑀳𑀺 𑀤𑁂𑀯𑀲𑀺𑀓𑀯𑁂𑀢𑀦𑁂𑀦 𑀯𑀸 𑀧𑀜𑁆𑀘𑀸𑀳𑀤𑀲𑀸𑀳𑀅𑀤𑁆𑀥𑀫𑀸𑀲𑀫𑀸𑀲𑀙𑀫𑀸𑀲𑀲𑀁𑀯𑀘𑁆𑀙𑀭𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀕𑀸𑀯𑁄 𑀕𑀳𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀺. 𑀇𑀥 𑀧𑀦 𑀤𑁂𑀯𑀲𑀺𑀓𑀯𑁂𑀢𑀦𑁂𑀦 𑀭𑀓𑁆𑀔𑀦𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀢𑀺 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 ‘‘𑀏𑀢𑀸 𑀯𑁄 𑀕𑀸𑀯𑁄’’𑀢𑀺 𑀤𑀢𑁆𑀯𑀸. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦𑀸𑀢𑀺 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑁂𑀦. 𑀏𑀯𑀁 𑀔𑁄, 𑀯𑀺𑀲𑀸𑀔𑁂, 𑀕𑁄𑀧𑀸𑀮𑀓𑀼𑀧𑁄𑀲𑀣𑁄 𑀳𑁄𑀢𑀻𑀢𑀺 𑀅𑀭𑀺𑀬𑀼𑀧𑁄𑀲𑀣𑁄𑀯 𑀅𑀬𑀁, 𑀅𑀧𑀭𑀺𑀲𑀼𑀤𑁆𑀥𑀯𑀺𑀢𑀓𑁆𑀓𑀢𑀸𑀬 𑀧𑀦 𑀕𑁄𑀧𑀸𑀮𑀓𑀉𑀧𑁄𑀲𑀣𑀝𑁆𑀞𑀸𑀦𑁂 𑀞𑀺𑀢𑁄. 𑀦 𑀫𑀳𑀧𑁆𑀨𑀮𑁄𑀢𑀺 𑀯𑀺𑀧𑀸𑀓𑀨𑀮𑁂𑀦 𑀦 𑀫𑀳𑀧𑁆𑀨𑀮𑁄. 𑀦 𑀫𑀳𑀸𑀦𑀺𑀲𑀁𑀲𑁄𑀢𑀺 𑀯𑀺𑀧𑀸𑀓𑀸𑀦𑀺𑀲𑀁𑀲𑁂𑀦 𑀦 𑀫𑀳𑀸𑀦𑀺𑀲𑀁𑀲𑁄. 𑀦 𑀫𑀳𑀸𑀚𑀼𑀢𑀺𑀓𑁄𑀢𑀺 𑀯𑀺𑀧𑀸𑀓𑁄𑀪𑀸𑀲𑁂𑀦 𑀦 𑀫𑀳𑀸𑀑𑀪𑀸𑀲𑁄. 𑀦 𑀫𑀳𑀸𑀯𑀺𑀧𑁆𑀨𑀸𑀭𑁄𑀢𑀺 𑀯𑀺𑀧𑀸𑀓𑀯𑀺𑀧𑁆𑀨𑀸𑀭𑀲𑁆𑀲 𑀅𑀫𑀳𑀦𑁆𑀢𑀢𑀸𑀬 𑀦 𑀫𑀳𑀸𑀯𑀺𑀧𑁆𑀨𑀸𑀭𑁄.

𑀲𑀫𑀡𑀚𑀸𑀢𑀺𑀓𑀸𑀢𑀺 𑀲𑀫𑀡𑀸𑀬𑁂𑀯. 𑀧𑀭𑀁 𑀬𑁄𑀚𑀦𑀲𑀢𑀦𑁆𑀢𑀺 𑀬𑁄𑀚𑀦𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀢𑁄 𑀧𑀭𑀁. 𑀢𑁂𑀲𑀼 𑀤𑀡𑁆𑀟𑀁 𑀦𑀺𑀓𑁆𑀔𑀺𑀧𑀸𑀳𑀻𑀢𑀺 𑀢𑁂𑀲𑀼 𑀬𑁄𑀚𑀦𑀲𑀢𑀢𑁄 𑀧𑀭𑀪𑀸𑀕𑁂𑀲𑀼 𑀞𑀺𑀢𑁂𑀲𑀼 𑀲𑀢𑁆𑀢𑁂𑀲𑀼 𑀤𑀡𑁆𑀟𑀁 𑀦𑀺𑀓𑁆𑀔𑀺𑀧, 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀳𑁄𑀳𑀺. 𑀦𑀸𑀳𑀁 𑀓𑁆𑀯𑀘𑀦𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀦𑁆𑀢𑀺 𑀅𑀳𑀁 𑀓𑀢𑁆𑀣𑀘𑀺 𑀓𑀲𑁆𑀲𑀘𑀺 𑀧𑀭𑀲𑁆𑀲 𑀓𑀺𑀜𑁆𑀘𑀦𑀢𑀲𑁆𑀫𑀺𑀁 𑀦 𑀳𑁄𑀫𑀺. 𑀓𑀺𑀜𑁆𑀘𑀦𑀁 𑀯𑀼𑀘𑁆𑀘𑀢𑀺 𑀧𑀮𑀺𑀩𑁄𑀥𑁄, 𑀧𑀮𑀺𑀩𑁄𑀥𑁄 𑀦 𑀳𑁄𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀘 𑀫𑀫 𑀓𑁆𑀯𑀘𑀦𑀺 𑀓𑀢𑁆𑀣𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻𑀢𑀺 𑀫𑀫𑀸𑀧𑀺 𑀓𑁆𑀯𑀘𑀦𑀺 𑀅𑀦𑁆𑀢𑁄 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀓𑀢𑁆𑀣𑀘𑀺 𑀏𑀓𑀧𑀭𑀺𑀓𑁆𑀔𑀸𑀭𑁂𑀧𑀺 𑀓𑀺𑀜𑁆𑀘𑀦𑀢𑀸 𑀦𑀢𑁆𑀣𑀺, 𑀧𑀮𑀺𑀩𑁄𑀥𑁄 𑀦𑀢𑁆𑀣𑀺, 𑀙𑀺𑀦𑁆𑀦𑀧𑀮𑀺𑀩𑁄𑀥𑁄𑀳𑀫𑀲𑁆𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑁄𑀕𑁂𑀢𑀺 𑀫𑀜𑁆𑀘𑀧𑀻𑀞𑀬𑀸𑀕𑀼𑀪𑀢𑁆𑀢𑀸𑀤𑀬𑁄. 𑀅𑀤𑀺𑀦𑁆𑀦𑀁𑀬𑁂𑀯 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀧𑀼𑀦𑀤𑀺𑀯𑀲𑁂 𑀫𑀜𑁆𑀘𑁂 𑀦𑀺𑀧𑀚𑁆𑀚𑀦𑁆𑀢𑁄𑀧𑀺 𑀧𑀻𑀞𑁂 𑀦𑀺𑀲𑀻𑀤𑀦𑁆𑀢𑁄𑀧𑀺 𑀬𑀸𑀕𑀼𑀁 𑀧𑀺𑀯𑀦𑁆𑀢𑁄𑀧𑀺 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀢𑁂 𑀪𑁄𑀕𑁂 𑀅𑀤𑀺𑀦𑁆𑀦𑁂𑀬𑁂𑀯 𑀧𑀭𑀺𑀪𑀼𑀜𑁆𑀚𑀢𑀺. 𑀦 𑀫𑀳𑀧𑁆𑀨𑀮𑁄𑀢𑀺 𑀦𑀺𑀧𑁆𑀨𑀮𑁄. 𑀩𑁆𑀬𑀜𑁆𑀚𑀦𑀫𑁂𑀯 𑀳𑀺 𑀏𑀢𑁆𑀣 𑀲𑀸𑀯𑀲𑁂𑀲𑀁, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄. 𑀏𑀯𑀁 𑀉𑀧𑀯𑀼𑀢𑁆𑀣𑀲𑁆𑀲 𑀳𑀺 𑀉𑀧𑁄𑀲𑀣𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀯𑀺𑀧𑀸𑀓𑀨𑀮𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀦𑀺𑀧𑁆𑀨𑀮𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀉𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀳? 𑀲𑀁𑀓𑀺𑀮𑀺𑀝𑁆𑀞𑁂𑀦 𑀳𑀺 𑀘𑀺𑀢𑁆𑀢𑁂𑀦 𑀉𑀧𑀯𑀼𑀢𑁆𑀣𑁄 𑀉𑀧𑁄𑀲𑀣𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑀢𑁆𑀢𑀸 𑀯𑀺𑀲𑀼𑀤𑁆𑀥𑁂𑀦 𑀘𑀺𑀢𑁆𑀢𑁂𑀦 𑀉𑀧𑀯𑀼𑀢𑁆𑀣𑀲𑁆𑀲 𑀫𑀳𑀧𑁆𑀨𑀮𑀢𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀺. 𑀢𑀲𑁆𑀫𑀸 𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑁂𑀦 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀯𑀺𑀲𑁄𑀥𑀦𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀳. 𑀢𑀢𑁆𑀣 𑀉𑀧𑀓𑁆𑀓𑀫𑁂𑀦𑀸𑀢𑀺 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦, 𑀉𑀧𑀸𑀬𑁂𑀦 𑀯𑀸. 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑀺. 𑀏𑀢𑁆𑀣 𑀳𑀺 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀲𑀻𑀮𑁂𑀦, 𑀇𑀢𑀺𑀧𑀺 𑀲𑀫𑀸𑀥𑀺𑀦𑀸𑀢𑀺 𑀲𑀩𑁆𑀩𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀩𑀼𑀤𑁆𑀥𑀕𑀼𑀡𑀸 𑀲𑀗𑁆𑀕𑀳𑀺𑀢𑀸. 𑀅𑀭𑀳𑀦𑁆𑀢𑀺𑀆𑀤𑀻𑀳𑀺 𑀧𑀸𑀝𑀺𑀬𑁂𑀓𑁆𑀓𑀕𑀼𑀡𑀸𑀯 𑀦𑀺𑀤𑁆𑀤𑀺𑀝𑁆𑀞𑀸. 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀻𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀢𑀣𑀸𑀕𑀢𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀲𑀦𑁆𑀦𑁄 𑀳𑁄𑀢𑀺.

𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸. 𑀓𑀓𑁆𑀓𑀦𑁆𑀢𑀺 𑀆𑀫𑀮𑀓𑀓𑀓𑁆𑀓𑀁. 𑀢𑀚𑁆𑀚𑀁 𑀯𑀸𑀬𑀸𑀫𑀦𑁆𑀢𑀺 𑀢𑀚𑁆𑀚𑀸𑀢𑀺𑀓𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀓𑀓𑁆𑀓𑁂𑀦 𑀫𑀓𑁆𑀔𑀦𑀖𑀁𑀲𑀦𑀥𑁄𑀯𑀦𑀯𑀸𑀬𑀸𑀫𑀁. 𑀧𑀭𑀺𑀬𑁄𑀤𑀧𑀦𑀸 𑀳𑁄𑀢𑀻𑀢𑀺 𑀲𑀼𑀤𑁆𑀥𑀪𑀸𑀯𑀓𑀭𑀡𑀁 𑀳𑁄𑀢𑀺. 𑀓𑀺𑀮𑀺𑀝𑁆𑀞𑀲𑁆𑀫𑀺𑀁 𑀳𑀺 𑀲𑀻𑀲𑁂 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀫𑀸𑀦𑁄 𑀦 𑀲𑁄𑀪𑀢𑀺, 𑀧𑀭𑀺𑀲𑀼𑀤𑁆𑀥𑁂 𑀧𑀦 𑀢𑀲𑁆𑀫𑀺𑀁 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀫𑀸𑀦𑁄 𑀲𑁄𑀪𑀢𑀺, 𑀏𑀯𑀫𑁂𑀯 𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁂𑀦 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀉𑀧𑀯𑀼𑀢𑁆𑀣𑁄 𑀉𑀧𑁄𑀲𑀣𑁄 𑀫𑀳𑀧𑁆𑀨𑀮𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳. 𑀩𑁆𑀭𑀳𑁆𑀫𑀼𑀧𑁄𑀲𑀣𑀁 𑀉𑀧𑀯𑀲𑀢𑀻𑀢𑀺 𑀩𑁆𑀭𑀳𑁆𑀫𑀸 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀲 𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀅𑀬𑀁 𑀉𑀧𑁄𑀲𑀣𑁄 𑀩𑁆𑀭𑀳𑁆𑀫𑀼𑀧𑁄𑀲𑀣𑁄 𑀦𑀸𑀫, 𑀢𑀁 𑀉𑀧𑀯𑀲𑀢𑀺. 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀯𑀲𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺. 𑀩𑁆𑀭𑀳𑁆𑀫𑀜𑁆𑀘𑀲𑁆𑀲 𑀆𑀭𑀩𑁆𑀪𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀆𑀭𑀩𑁆𑀪.

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀳𑀢𑀦𑁆𑀢𑀺𑀓𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁄𑀢𑁆𑀢𑀺𑀦𑁆𑀢𑀺 𑀓𑀼𑀭𑀼𑀯𑀺𑀦𑁆𑀤𑀓𑀲𑁄𑀢𑁆𑀢𑀺𑀁. 𑀓𑀼𑀭𑀼𑀯𑀺𑀦𑁆𑀤𑀓𑀧𑀸𑀲𑀸𑀡𑀘𑀼𑀡𑁆𑀡𑁂𑀦 𑀳𑀺 𑀲𑀤𑁆𑀥𑀺𑀁 𑀮𑀸𑀔𑀁 𑀬𑁄𑀚𑁂𑀢𑁆𑀯𑀸 𑀫𑀡𑀺𑀓𑁂 𑀓𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀲𑀼𑀢𑁆𑀢𑁂𑀦 𑀆𑀯𑀼𑀡𑀺𑀢𑁆𑀯𑀸 𑀢𑀁 𑀫𑀡𑀺 𑀓𑀮𑀸𑀧𑀧𑀦𑁆𑀢𑀺𑀁 𑀉𑀪𑀢𑁄 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀁 𑀖𑀁𑀲𑁂𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑁄𑀢𑁆𑀢𑀺𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺. 𑀘𑀼𑀡𑁆𑀡𑀦𑁆𑀢𑀺 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀁. 𑀢𑀚𑁆𑀚𑀁 𑀯𑀸𑀬𑀸𑀫𑀦𑁆𑀢𑀺 𑀉𑀩𑁆𑀩𑀝𑁆𑀝𑀦𑀖𑀁𑀲𑀦𑀥𑁄𑀯𑀦𑀸𑀤𑀺𑀓𑀁 𑀢𑀤𑀦𑀼𑀭𑀽𑀧𑀯𑀸𑀬𑀸𑀫𑀁. 𑀥𑀫𑁆𑀫𑀼𑀧𑁄𑀲𑀣𑀦𑁆𑀢𑀺 𑀲𑀳𑀢𑀦𑁆𑀢𑀺𑀓𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀆𑀭𑀩𑁆𑀪 𑀉𑀧𑀯𑀼𑀢𑁆𑀣𑀢𑁆𑀢𑀸 𑀅𑀬𑀁 𑀉𑀧𑁄𑀲𑀣𑁄 ‘‘𑀥𑀫𑁆𑀫𑀼𑀧𑁄𑀲𑀣𑁄’’𑀢𑀺 𑀯𑀼𑀢𑁆𑀢𑁄. 𑀇𑀥𑀸𑀧𑀺 𑀧𑀭𑀺𑀬𑁄𑀤𑀧𑀦𑀸𑀢𑀺 𑀧𑀤𑁂 𑀞𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑀺. 𑀉𑀲𑁆𑀫𑀜𑁆𑀘 𑀧𑀝𑀺𑀘𑁆𑀘𑀸𑀢𑀺 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀕𑀸𑀳𑀸𑀧𑀺𑀢𑀁 𑀉𑀲𑀼𑀫𑀁 𑀧𑀝𑀺𑀘𑁆𑀘. 𑀉𑀲𑀜𑁆𑀘𑀸𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀔𑀸𑀭𑀦𑁆𑀢𑀺 𑀙𑀸𑀭𑀺𑀓𑀁. 𑀕𑁄𑀫𑀬𑀦𑁆𑀢𑀺 𑀕𑁄𑀫𑀼𑀢𑁆𑀢𑀁 𑀯𑀸 𑀅𑀚𑀮𑀡𑁆𑀟𑀺𑀓𑀸 𑀯𑀸. 𑀧𑀭𑀺𑀬𑁄𑀤𑀧𑀦𑀸𑀢𑀺 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀗𑁆𑀖𑀼𑀧𑁄𑀲𑀣𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀕𑀼𑀡𑁂 𑀆𑀭𑀩𑁆𑀪 𑀉𑀧𑀯𑀼𑀢𑁆𑀣𑀢𑁆𑀢𑀸 𑀅𑀬𑀁 𑀉𑀧𑁄𑀲𑀣𑁄 ‘‘𑀲𑀗𑁆𑀖𑀼𑀧𑁄𑀲𑀣𑁄’’𑀢𑀺 𑀯𑀼𑀢𑁆𑀢𑁄.

𑀲𑀻𑀮𑀸𑀦𑀻𑀢𑀺 𑀕𑀳𑀝𑁆𑀞𑁄 𑀕𑀳𑀝𑁆𑀞𑀲𑀻𑀮𑀸𑀦𑀺, 𑀧𑀩𑁆𑀩𑀚𑀺𑀢𑁄 𑀧𑀩𑁆𑀩𑀚𑀺𑀢𑀲𑀻𑀮𑀸𑀦𑀺. 𑀅𑀔𑀡𑁆𑀟𑀸𑀦𑀻𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁧) 𑀯𑀺𑀢𑁆𑀣𑀸𑀭𑀺𑀢𑁄𑀯. 𑀯𑀸𑀮𑀡𑁆𑀟𑀼𑀧𑀓𑀦𑁆𑀢𑀺 𑀅𑀲𑁆𑀲𑀯𑀸𑀮𑁂𑀳𑀺 𑀯𑀸 𑀫𑀓𑀘𑀺𑀯𑀸𑀮𑀸𑀤𑀻𑀳𑀺 𑀯𑀸 𑀓𑀢𑀁 𑀅𑀡𑁆𑀟𑀼𑀧𑀓𑀁. 𑀢𑀚𑁆𑀚𑀁 𑀯𑀸𑀬𑀸𑀫𑀦𑁆𑀢𑀺 𑀢𑁂𑀮𑁂𑀦 𑀢𑁂𑀫𑁂𑀢𑁆𑀯𑀸 𑀫𑀮𑀲𑁆𑀲 𑀢𑀺𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 𑀙𑀸𑀭𑀺𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀮𑀡𑁆𑀟𑀼𑀧𑀓𑁂𑀦 𑀖𑀁𑀲𑀦𑀯𑀸𑀬𑀸𑀫𑁄. 𑀇𑀥 𑀧𑀭𑀺𑀬𑁄𑀤𑀧𑀦𑀸𑀢𑀺 𑀧𑀤𑁂 𑀞𑀢𑁆𑀯𑀸 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑀓𑀺𑀮𑀺𑀝𑁆𑀞𑀲𑁆𑀫𑀺𑀜𑁆𑀳𑀺 𑀆𑀤𑀸𑀲𑁂 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁄𑀧𑀺 𑀅𑀢𑁆𑀢𑀪𑀸𑀯𑁄 𑀑𑀮𑁄𑀓𑀺𑀬𑀫𑀸𑀦𑁄 𑀦 𑀲𑁄𑀪𑀢𑀺, 𑀧𑀭𑀺𑀲𑀼𑀤𑁆𑀥𑁂 𑀲𑁄𑀪𑀢𑀺. 𑀏𑀯𑀫𑁂𑀯 𑀓𑀺𑀮𑀺𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀉𑀧𑀯𑀼𑀢𑁆𑀣𑁄 𑀉𑀧𑁄𑀲𑀣𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑁂𑀦 𑀧𑀦 𑀫𑀳𑀧𑁆𑀨𑀮𑁄 𑀳𑁄𑀢𑀻𑀢𑀺. 𑀲𑀻𑀮𑀼𑀧𑁄𑀲𑀣𑀦𑁆𑀢𑀺 𑀅𑀢𑁆𑀢𑀦𑁄 𑀲𑀻𑀮𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀉𑀧𑀯𑀼𑀢𑁆𑀣𑁄 𑀉𑀧𑁄𑀲𑀣𑁄 𑀲𑀻𑀮𑀼𑀧𑁄𑀲𑀣𑁄 𑀦𑀸𑀫. 𑀲𑀻𑀮𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀢𑀦𑁄 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑁂𑀦 𑀲𑀤𑁆𑀥𑀺𑀁. 𑀲𑀻𑀮𑀜𑁆𑀘𑀲𑁆𑀲 𑀆𑀭𑀩𑁆𑀪𑀸𑀢𑀺 𑀧𑀜𑁆𑀘𑀲𑀻𑀮𑀁 𑀤𑀲𑀲𑀻𑀮𑀜𑁆𑀘 𑀆𑀭𑀩𑁆𑀪.

𑀤𑁂𑀯𑀢𑀸 𑀅𑀦𑀼𑀲𑁆𑀲𑀭𑀢𑀻𑀢𑀺 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑀺. 𑀉𑀓𑁆𑀓𑀦𑁆𑀢𑀺 𑀉𑀤𑁆𑀥𑀦𑀁. 𑀮𑁄𑀡𑀦𑁆𑀢𑀺 𑀮𑁄𑀡𑀫𑀢𑁆𑀢𑀺𑀓𑀸. 𑀕𑁂𑀭𑀼𑀓𑀦𑁆𑀢𑀺 𑀕𑁂𑀭𑀼𑀓𑀘𑀼𑀡𑁆𑀡𑀁. 𑀦𑀸𑀴𑀺𑀓𑀲𑀡𑁆𑀟𑀸𑀲𑀦𑁆𑀢𑀺 𑀥𑀫𑀦𑀦𑀸𑀴𑀺𑀓𑀜𑁆𑀘𑁂𑀯 𑀧𑀭𑀺𑀯𑀢𑁆𑀢𑀦𑀲𑀡𑁆𑀟𑀸𑀲𑀜𑁆𑀘. 𑀢𑀚𑁆𑀚𑀁 𑀯𑀸𑀬𑀸𑀫𑀦𑁆𑀢𑀺 𑀉𑀤𑁆𑀥𑀦𑁂 𑀧𑀓𑁆𑀔𑀺𑀧𑀦𑀥𑀫𑀦𑀧𑀭𑀺𑀯𑀢𑁆𑀢𑀦𑀸𑀤𑀺𑀓𑀁 𑀅𑀦𑀼𑀭𑀽𑀧𑀁 𑀯𑀸𑀬𑀸𑀫𑀁. 𑀇𑀥 𑀧𑀭𑀺𑀬𑁄𑀤𑀧𑀦𑀸𑀢𑀺 𑀧𑀤𑁂 𑀞𑀢𑁆𑀯𑀸 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀁𑀓𑀺𑀮𑀺𑀝𑁆𑀞𑀲𑀼𑀯𑀡𑁆𑀡𑀫𑀬𑁂𑀦 𑀳𑀺 𑀧𑀲𑀸𑀥𑀦𑀪𑀡𑁆𑀟𑁂𑀦 𑀧𑀲𑀸𑀥𑀺𑀢𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀫𑀸𑀦𑀸 𑀦 𑀲𑁄𑀪𑀦𑁆𑀢𑀺, 𑀧𑀭𑀺𑀲𑀼𑀤𑁆𑀥𑀲𑀼𑀯𑀡𑁆𑀡𑀫𑀬𑁂𑀦 𑀲𑁄𑀪𑀦𑁆𑀢𑀺. 𑀏𑀯𑀫𑁂𑀯 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀉𑀧𑁄𑀲𑀣𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀫𑀳𑀧𑁆𑀨𑀮𑁄. 𑀤𑁂𑀯𑀢𑀼𑀧𑁄𑀲𑀣𑀦𑁆𑀢𑀺 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀉𑀧𑀯𑀼𑀢𑁆𑀣𑀉𑀧𑁄𑀲𑀣𑁄 𑀤𑁂𑀯𑀢𑀼𑀧𑁄𑀲𑀣𑁄 𑀦𑀸𑀫. 𑀲𑁂𑀲𑀁 𑀇𑀫𑁂𑀲𑀼 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩 𑀆𑀤𑀬𑁄) 𑀯𑀼𑀢𑁆𑀢𑀫𑁂𑀯.

𑀧𑀸𑀡𑀸𑀢𑀺𑀧𑀸𑀢𑀦𑁆𑀢𑀺 𑀧𑀸𑀡𑀯𑀥𑀁. 𑀧𑀳𑀸𑀬𑀸𑀢𑀺 𑀢𑀁 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀚𑀳𑀺𑀢𑁆𑀯𑀸. 𑀧𑀝𑀺𑀯𑀺𑀭𑀢𑀸𑀢𑀺 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀢𑁄 𑀤𑀼𑀲𑁆𑀲𑀻𑀮𑁆𑀬𑀢𑁄 𑀑𑀭𑀢𑀸 𑀯𑀺𑀭𑀢𑀸𑀯. 𑀦𑀺𑀳𑀺𑀢𑀤𑀡𑁆𑀟𑀸 𑀦𑀺𑀳𑀺𑀢𑀲𑀢𑁆𑀣𑀸𑀢𑀺 𑀧𑀭𑀽𑀧𑀖𑀸𑀢𑀢𑁆𑀣𑀸𑀬 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀆𑀤𑀸𑀬 𑀅𑀯𑀢𑁆𑀢𑀦𑀢𑁄 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑀸 𑀘𑁂𑀯 𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑀸 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀞𑀧𑁂𑀢𑁆𑀯𑀸 𑀤𑀡𑁆𑀟𑀁 𑀲𑀩𑁆𑀩𑀫𑁆𑀧𑀺 𑀅𑀯𑀲𑁂𑀲𑀁 𑀉𑀧𑀓𑀭𑀡𑀁 𑀲𑀢𑁆𑀢𑀸𑀦𑀁 𑀯𑀺𑀳𑀺𑀁𑀲𑀦𑀪𑀸𑀯𑀢𑁄 𑀲𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀪𑀺𑀓𑁆𑀔𑀽 𑀓𑀢𑁆𑀢𑀭𑀤𑀡𑁆𑀟𑀁 𑀯𑀸 𑀤𑀦𑁆𑀢𑀓𑀝𑁆𑀞𑀯𑀸𑀲𑀺𑀁 𑀯𑀸 𑀧𑀺𑀧𑁆𑀨𑀮𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀦 𑀢𑀁 𑀧𑀭𑀽𑀧𑀖𑀸𑀢𑀢𑁆𑀣𑀸𑀬. 𑀢𑀲𑁆𑀫𑀸 𑀦𑀺𑀳𑀺𑀢𑀤𑀡𑁆𑀟𑀸 𑀦𑀺𑀳𑀺𑀢𑀲𑀢𑁆𑀣𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀮𑀚𑁆𑀚𑀻𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀮𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀤𑀬𑀸𑀧𑀦𑁆𑀦𑀸𑀢𑀺 𑀤𑀬𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑀸. 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀲𑀩𑁆𑀩𑁂 𑀧𑀸𑀡𑀪𑀽𑀢𑁂 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀓𑀸, 𑀢𑀸𑀬 𑀏𑀯 𑀤𑀬𑀸𑀧𑀦𑁆𑀦𑀢𑀸𑀬 𑀲𑀩𑁆𑀩𑁂𑀲𑀁 𑀧𑀸𑀡𑀪𑀽𑀢𑀸𑀦𑀁 𑀳𑀺𑀢𑀘𑀺𑀢𑁆𑀢𑀓𑀸𑀢𑀺 𑀅𑀢𑁆𑀣𑁄. 𑀅𑀳𑀫𑁆𑀧𑀚𑁆𑀚𑀸𑀢𑀺 𑀅𑀳𑀫𑁆𑀧𑀺 𑀅𑀚𑁆𑀚. 𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦𑀸𑀢𑀺 𑀇𑀫𑀺𑀦𑀸𑀧𑀺 𑀕𑀼𑀡𑀗𑁆𑀕𑁂𑀦. 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀻𑀢𑀺 𑀬𑀣𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀁 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄 𑀅𑀦𑀼𑀕𑀘𑁆𑀙𑀢𑀺 𑀦𑀸𑀫, 𑀏𑀯𑀁 𑀅𑀳𑀫𑁆𑀧𑀺 𑀅𑀭𑀳𑀦𑁆𑀢𑁂𑀳𑀺 𑀧𑀞𑀫𑀁 𑀓𑀢𑀁 𑀇𑀫𑀁 𑀕𑀼𑀡𑀁 𑀧𑀘𑁆𑀙𑀸 𑀓𑀭𑁄𑀦𑁆𑀢𑁄 𑀢𑁂𑀲𑀁 𑀅𑀭𑀳𑀦𑁆𑀢𑀸𑀦𑀁 𑀅𑀦𑀼𑀓𑀭𑁄𑀫𑀺. 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀓𑀭𑁄𑀦𑁆𑀢𑁂𑀦 𑀫𑀬𑀸 𑀅𑀭𑀳𑀢𑀜𑁆𑀘 𑀅𑀦𑀼𑀓𑀢𑀁 𑀪𑀯𑀺𑀲𑁆𑀲𑀢𑀺, 𑀉𑀧𑁄𑀲𑀣𑁄 𑀘 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀺.

𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺 𑀅𑀤𑀺𑀦𑁆𑀦𑀲𑁆𑀲 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀆𑀤𑀸𑀦𑀁, 𑀣𑁂𑀬𑁆𑀬𑀁 𑀘𑁄𑀭𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀦𑁆𑀦𑀫𑁂𑀯 𑀆𑀤𑀺𑀬𑀦𑁆𑀢𑀻𑀢𑀺 𑀤𑀺𑀦𑁆𑀦𑀸𑀤𑀸𑀬𑀻. 𑀘𑀺𑀢𑁆𑀢𑁂𑀦𑀧𑀺 𑀤𑀺𑀦𑁆𑀦𑀫𑁂𑀯 𑀧𑀝𑀺𑀓𑀗𑁆𑀔𑀦𑁆𑀢𑀻𑀢𑀺 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻. 𑀣𑁂𑀦𑁂𑀢𑀻𑀢𑀺 𑀣𑁂𑀦𑁄, 𑀦 𑀣𑁂𑀦𑁂𑀦 𑀅𑀣𑁂𑀦𑁂𑀦. 𑀅𑀣𑁂𑀦𑀢𑁆𑀢𑀸𑀬𑁂𑀯 𑀲𑀼𑀘𑀺𑀪𑀽𑀢𑁂𑀦. 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀪𑀸𑀯𑁂𑀦, 𑀅𑀣𑁂𑀦𑀁 𑀲𑀼𑀘𑀺𑀪𑀽𑀢𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀁. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀆𑀘𑀸𑀭𑀁 𑀘𑀭𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀻. 𑀆𑀭𑀸𑀘𑀸𑀭𑀻𑀢𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄 𑀤𑀽𑀭𑀸𑀘𑀸𑀭𑀻. 𑀫𑁂𑀣𑀼𑀦𑀸𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀲𑀤𑀺𑀲𑀢𑁆𑀢𑀸 𑀫𑁂𑀣𑀼𑀦𑀓𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀳𑀺 𑀧𑀝𑀺𑀲𑁂𑀯𑀺𑀢𑀩𑁆𑀩𑀢𑁄 𑀫𑁂𑀣𑀼𑀦𑁄𑀢𑀺 𑀲𑀗𑁆𑀔𑀁 𑀕𑀢𑀸 𑀅𑀲𑀤𑁆𑀥𑀫𑁆𑀫𑀸. 𑀕𑀸𑀫𑀥𑀫𑁆𑀫𑀸𑀢𑀺 𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑀸.

𑀫𑀼𑀲𑀸𑀯𑀸𑀤𑀸𑀢𑀺 𑀅𑀮𑀺𑀓𑀯𑀘𑀦𑀸 𑀢𑀼𑀘𑁆𑀙𑀯𑀘𑀦𑀸. 𑀲𑀘𑁆𑀘𑀁 𑀯𑀤𑀦𑁆𑀢𑀻𑀢𑀺 𑀲𑀘𑁆𑀘𑀯𑀸𑀤𑀻. 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀁𑀤𑀳𑀦𑁆𑀢𑀺 𑀖𑀝𑁆𑀝𑁂𑀦𑁆𑀢𑀻𑀢𑀺 𑀲𑀘𑁆𑀘𑀲𑀦𑁆𑀥𑀸, 𑀦 𑀅𑀦𑁆𑀢𑀭𑀦𑁆𑀢𑀭𑀸 𑀫𑀼𑀲𑀸 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀧𑀼𑀭𑀺𑀲𑁄 𑀓𑀤𑀸𑀘𑀺 𑀫𑀼𑀲𑀸𑀯𑀸𑀤𑀁 𑀯𑀤𑀢𑀺, 𑀓𑀤𑀸𑀘𑀺 𑀲𑀘𑁆𑀘𑀁. 𑀢𑀲𑁆𑀲 𑀫𑀼𑀲𑀸𑀯𑀸𑀤𑁂𑀦 𑀅𑀦𑁆𑀢𑀭𑀺𑀢𑀢𑁆𑀢𑀸 𑀲𑀘𑁆𑀘𑀁 𑀲𑀘𑁆𑀘𑁂𑀦 𑀦 𑀖𑀝𑀻𑀬𑀢𑀺. 𑀢𑀲𑁆𑀫𑀸 𑀦 𑀲𑁄 𑀲𑀘𑁆𑀘𑀲𑀦𑁆𑀥𑁄. 𑀇𑀫𑁂 𑀧𑀦 𑀦 𑀢𑀸𑀤𑀺𑀲𑀸, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀫𑀼𑀲𑀸 𑀅𑀯𑀢𑁆𑀯𑀸 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀁𑀤𑀳𑀦𑁆𑀢𑀺𑀬𑁂𑀯𑀸𑀢𑀺 𑀲𑀘𑁆𑀘𑀲𑀦𑁆𑀥𑀸. 𑀣𑁂𑀢𑀸𑀢𑀺 𑀣𑀺𑀭𑀸, 𑀞𑀺𑀢𑀓𑀣𑀸𑀢𑀺 𑀅𑀢𑁆𑀣𑁄. 𑀏𑀓𑁄 𑀧𑀼𑀕𑁆𑀕𑀮𑁄 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼 𑀯𑀺𑀬 𑀅𑀲𑁆𑀲𑀧𑀺𑀝𑁆𑀞𑁂 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀫𑀺𑀯 𑀘 𑀦 𑀞𑀺𑀢𑀓𑀣𑁄 𑀳𑁄𑀢𑀺. 𑀏𑀓𑁄 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬 𑀇𑀦𑁆𑀤𑀔𑀻𑀮𑁄 𑀯𑀺𑀬 𑀘 𑀞𑀺𑀢𑀓𑀣𑁄 𑀳𑁄𑀢𑀺, 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑁂𑀧𑀺 𑀤𑁆𑀯𑁂 𑀓𑀣𑀸 𑀦 𑀓𑀣𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀣𑁂𑀢𑁄. 𑀧𑀘𑁆𑀘𑀬𑀺𑀓𑀸𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀓𑀸, 𑀲𑀤𑁆𑀥𑀸𑀬𑀺𑀓𑀸𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁄 𑀳𑀺 𑀧𑀼𑀕𑁆𑀕𑀮𑁄 𑀦 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀸 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀏𑀓𑁄 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀬𑀤𑀺 𑀢𑁂𑀦 𑀯𑀼𑀢𑁆𑀢𑀁, 𑀇𑀤𑀫𑁂𑀯 𑀧𑀫𑀸𑀡𑀁, 𑀇𑀤𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀯𑀫𑁂𑀯𑀁 𑀇𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀬𑀺𑀓𑁄. 𑀅𑀯𑀺𑀲𑀁𑀯𑀸𑀤𑀓𑀸 𑀮𑁄𑀓𑀲𑁆𑀲𑀸𑀢𑀺 𑀢𑀸𑀬 𑀲𑀘𑁆𑀘𑀯𑀸𑀤𑀺𑀢𑀸𑀬 𑀮𑁄𑀓𑀁 𑀦 𑀯𑀺𑀲𑀁𑀯𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀸𑀦𑀁 𑀧𑀸𑀦𑀘𑁂𑀢𑀦𑀸𑀲𑀗𑁆𑀔𑀸𑀢𑀁 𑀧𑀫𑀸𑀤𑀓𑀸𑀭𑀡𑀁. 𑀏𑀓𑀪𑀢𑁆𑀢𑀺𑀓𑀸𑀢𑀺 𑀧𑀸𑀢𑀭𑀸𑀲𑀪𑀢𑁆𑀢𑀁 𑀲𑀸𑀬𑀫𑀸𑀲𑀪𑀢𑁆𑀢𑀦𑁆𑀢𑀺 𑀤𑁆𑀯𑁂 𑀪𑀢𑁆𑀢𑀸𑀦𑀺. 𑀢𑁂𑀲𑀼 𑀧𑀸𑀢𑀭𑀸𑀲𑀪𑀢𑁆𑀢𑀁 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀇𑀢𑀭𑀁 𑀫𑀚𑁆𑀛𑀦𑁆𑀳𑀺𑀓𑀢𑁄 𑀉𑀤𑁆𑀥𑀁 𑀅𑀦𑁆𑀢𑁄𑀅𑀭𑀼𑀡𑁂𑀦. 𑀢𑀲𑁆𑀫𑀸 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁂 𑀤𑀲𑀓𑁆𑀔𑀢𑁆𑀢𑀼𑀁 𑀪𑀼𑀜𑁆𑀚𑀫𑀸𑀦𑀸𑀧𑀺 𑀏𑀓𑀪𑀢𑁆𑀢𑀺𑀓𑀸𑀯 𑀳𑁄𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀏𑀓𑀪𑀢𑁆𑀢𑀺𑀓𑀸’’𑀢𑀺. 𑀭𑀢𑁆𑀢𑀺𑀪𑁄𑀚𑀦𑀁 𑀭𑀢𑁆𑀢𑀺, 𑀢𑀢𑁄 𑀉𑀧𑀭𑀢𑀸𑀢𑀺 𑀭𑀢𑁆𑀢𑀽𑀧𑀭𑀢𑀸. 𑀅𑀢𑀺𑀓𑁆𑀓𑀦𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀪𑁄𑀚𑀦𑀁 𑀯𑀺𑀓𑀸𑀮𑀪𑁄𑀚𑀦𑀁 𑀦𑀸𑀫, 𑀢𑀢𑁄 𑀯𑀺𑀭𑀢𑀢𑁆𑀢𑀸 𑀯𑀺𑀭𑀢𑀸 𑀯𑀺𑀓𑀸𑀮𑀪𑁄𑀚𑀦𑀸.

𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸 𑀯𑀺𑀲𑀽𑀓𑀁 𑀧𑀝𑀸𑀡𑀺𑀪𑀽𑀢𑀁 𑀤𑀲𑁆𑀲𑀦𑀦𑁆𑀢𑀺 𑀯𑀺𑀲𑀽𑀓𑀤𑀲𑁆𑀲𑀦𑀁, 𑀅𑀢𑁆𑀢𑀦𑀸 𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦 𑀦𑀘𑁆𑀘𑀜𑁆𑀘 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘, 𑀅𑀦𑁆𑀢𑀫𑀲𑁄 𑀫𑀬𑀽𑀭𑀦𑀘𑁆𑀘𑀦𑀸𑀤𑀺𑀯𑀲𑁂𑀦𑀸𑀧𑀺 𑀧𑀯𑀢𑁆𑀢𑀸𑀦𑀁 𑀦𑀘𑁆𑀘𑀸𑀤𑀻𑀦𑀁 𑀯𑀺𑀲𑀽𑀓𑀪𑀽𑀢𑀁 𑀤𑀲𑁆𑀲𑀦𑀜𑁆𑀘𑀸𑀢𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀁. 𑀦𑀘𑁆𑀘𑀸𑀤𑀻𑀦𑀺 𑀳𑀺 𑀅𑀢𑁆𑀢𑀦𑀸 𑀧𑀬𑁄𑀚𑁂𑀢𑀼𑀁 𑀯𑀸 𑀧𑀭𑁂𑀳𑀺 𑀧𑀬𑁄𑀚𑀸𑀧𑁂𑀢𑀼𑀁 𑀯𑀸 𑀧𑀬𑀼𑀢𑁆𑀢𑀸𑀦𑀺 𑀧𑀲𑁆𑀲𑀺𑀢𑀼𑀁 𑀯𑀸 𑀦𑁂𑀯 𑀪𑀺𑀓𑁆𑀔𑀽𑀦𑀁, 𑀦 𑀪𑀺𑀓𑁆𑀔𑀼𑀦𑀻𑀦𑀁 𑀯𑀝𑁆𑀝𑀦𑁆𑀢𑀺.

𑀫𑀸𑀮𑀸𑀤𑀻𑀲𑀼 𑀫𑀸𑀮𑀸𑀢𑀺 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀁. 𑀕𑀦𑁆𑀥𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀙𑀯𑀺𑀭𑀸𑀕𑀓𑀭𑀡𑀁. 𑀢𑀢𑁆𑀣 𑀧𑀺𑀴𑀦𑁆𑀥𑀦𑁆𑀢𑁄 𑀥𑀸𑀭𑁂𑀢𑀺 𑀦𑀸𑀫, 𑀊𑀦𑀝𑁆𑀞𑀸𑀦𑀁 𑀧𑀽𑀭𑁂𑀦𑁆𑀢𑁄 𑀫𑀡𑁆𑀟𑁂𑀢𑀺 𑀦𑀸𑀫, 𑀕𑀦𑁆𑀥𑀯𑀲𑁂𑀦 𑀙𑀯𑀺𑀭𑀸𑀕𑀯𑀲𑁂𑀦 𑀘 𑀲𑀸𑀤𑀺𑀬𑀦𑁆𑀢𑁄 𑀯𑀺𑀪𑀽𑀲𑁂𑀢𑀺 𑀦𑀸𑀫. 𑀞𑀸𑀦𑀁 𑀯𑀼𑀘𑁆𑀘𑀢𑀺 𑀓𑀸𑀭𑀡𑀁, 𑀢𑀲𑁆𑀫𑀸 𑀬𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀢𑀸𑀦𑀺 𑀫𑀸𑀮𑀸𑀥𑀸𑀭𑀡𑀸𑀤𑀻𑀦𑀺 𑀫𑀳𑀸𑀚𑀦𑁄 𑀓𑀭𑁄𑀢𑀺, 𑀢𑀢𑁄 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄. 𑀉𑀘𑁆𑀘𑀸𑀲𑀬𑀦𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁, 𑀫𑀳𑀸𑀲𑀬𑀦𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡𑀁, 𑀢𑀢𑁄 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄.

𑀓𑀻𑀯𑀫𑀳𑀧𑁆𑀨𑀮𑁄𑀢𑀺 𑀓𑀺𑀢𑁆𑀢𑀓𑀁 𑀫𑀳𑀧𑁆𑀨𑀮𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀳𑀽𑀢𑀭𑀢𑁆𑀢𑀭𑀢𑀦𑀸𑀦𑀦𑁆𑀢𑀺 𑀧𑀳𑀽𑀢𑁂𑀦 𑀭𑀢𑁆𑀢𑀲𑀗𑁆𑀔𑀸𑀢𑁂𑀦 𑀭𑀢𑀦𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁, 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑀁 𑀪𑁂𑀭𑀺𑀢𑀮𑀲𑀤𑀺𑀲𑀁 𑀓𑀢𑁆𑀯𑀸 𑀓𑀝𑀺𑀧𑁆𑀧𑀫𑀸𑀡𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀽𑀭𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀦𑁆𑀢𑀺 𑀇𑀲𑁆𑀲𑀭𑀪𑀸𑀯𑁂𑀦 𑀯𑀸 𑀇𑀲𑁆𑀲𑀭𑀺𑀬𑀫𑁂𑀯 𑀯𑀸 𑀆𑀥𑀺𑀧𑀘𑁆𑀘𑀁, 𑀦 𑀏𑀢𑁆𑀣 𑀲𑀸𑀳𑀲𑀺𑀓𑀓𑀫𑁆𑀫𑀦𑁆𑀢𑀺𑀧𑀺 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁. 𑀭𑀚𑁆𑀚𑀁 𑀓𑀸𑀭𑁂𑀬𑁆𑀬𑀸𑀢𑀺 𑀏𑀯𑀭𑀽𑀧𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀬𑁆𑀬. 𑀅𑀗𑁆𑀕𑀸𑀦𑀦𑁆𑀢𑀺𑀆𑀤𑀻𑀦𑀺 𑀢𑁂𑀲𑀁 𑀚𑀦𑀧𑀤𑀸𑀦𑀁 𑀦𑀸𑀫𑀸𑀦𑀺. 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀦𑁆𑀢𑀺 𑀏𑀓𑀁 𑀅𑀳𑁄𑀭𑀢𑁆𑀢𑀁 𑀉𑀧𑀯𑀼𑀢𑁆𑀣𑀉𑀧𑁄𑀲𑀣𑁂 𑀧𑀼𑀜𑁆𑀜𑀁 𑀲𑁄𑀴𑀲𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀁 𑀪𑀸𑀕𑀜𑁆𑀘 𑀦 𑀅𑀕𑁆𑀖𑀢𑀺. 𑀏𑀓𑀭𑀢𑁆𑀢𑀼𑀧𑁄𑀲𑀣𑀲𑁆𑀲 𑀲𑁄𑀴𑀲𑀺𑀬𑀸 𑀓𑀮𑀸𑀬 𑀬𑀁 𑀯𑀺𑀧𑀸𑀓𑀨𑀮𑀁, 𑀢𑀁𑀬𑁂𑀯 𑀢𑀢𑁄 𑀩𑀳𑀼𑀢𑀭𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀧𑀡𑀦𑁆𑀢𑀺 𑀧𑀭𑀺𑀢𑁆𑀢𑀓𑀁.

𑀅𑀩𑁆𑀭𑀳𑁆𑀫𑀘𑀭𑀺𑀬𑀸𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀢𑁄. 𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄 𑀭𑀢𑁆𑀢𑀺𑀪𑁄𑀚𑀦𑀜𑁆𑀘 𑀤𑀺𑀯𑀸𑀯𑀺𑀓𑀸𑀮𑀪𑁄𑀚𑀦𑀜𑁆𑀘 𑀦 𑀪𑀼𑀜𑁆𑀚𑁂𑀬𑁆𑀬. 𑀫𑀜𑁆𑀘𑁂 𑀙𑀫𑀸𑀬𑀁𑀯 𑀲𑀬𑁂𑀣 𑀲𑀦𑁆𑀣𑀢𑁂𑀢𑀺 𑀫𑀼𑀝𑁆𑀞𑀺𑀳𑀢𑁆𑀣𑀧𑀸𑀤𑀓𑁂 𑀓𑀧𑁆𑀧𑀺𑀬𑀫𑀜𑁆𑀘𑁂 𑀯𑀸 𑀲𑀼𑀥𑀸𑀤𑀺𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀁 𑀯𑀸 𑀢𑀺𑀡𑀧𑀡𑁆𑀡𑀧𑀮𑀸𑀮𑀸𑀤𑀻𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑁂 𑀲𑀦𑁆𑀣𑀢𑁂 𑀯𑀸 𑀲𑀬𑁂𑀣𑀸𑀢𑀺 𑀅𑀢𑁆𑀣𑁄. 𑀏𑀢𑀁 𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀸𑀳𑀼𑀧𑁄𑀲𑀣𑀦𑁆𑀢𑀺 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀅𑀲𑀫𑀸𑀘𑀭𑀦𑁆𑀢𑁂𑀦 𑀉𑀧𑀯𑀼𑀢𑁆𑀣𑀁 𑀉𑀧𑁄𑀲𑀣𑀁 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀝𑁆𑀞𑀗𑁆𑀕𑀺𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀉𑀧𑀯𑀲𑀦𑁆𑀢𑁂𑀦 ‘‘𑀲𑁆𑀯𑁂 𑀉𑀧𑁄𑀲𑀣𑀺𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀚𑁂𑀯 ‘‘𑀇𑀤𑀜𑁆𑀘 𑀇𑀤𑀜𑁆𑀘 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀆𑀳𑀸𑀭𑀸𑀤𑀺𑀯𑀺𑀥𑀸𑀦𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑁄𑀯 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀤𑀲𑀲𑀻𑀮𑀮𑀓𑁆𑀔𑀡𑀜𑁆𑀜𑀼𑀦𑁄 𑀉𑀧𑀸𑀲𑀓𑀲𑁆𑀲 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸 𑀲𑀦𑁆𑀢𑀺𑀓𑁂 𑀯𑀸𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀢𑀩𑁆𑀩𑀸𑀦𑀺. 𑀧𑀸𑀴𑀺𑀁 𑀅𑀚𑀸𑀦𑀦𑁆𑀢𑁂𑀦 𑀧𑀦 ‘‘𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑀁 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀜𑁆𑀜𑀁 𑀅𑀮𑀪𑀦𑁆𑀢𑁂𑀦 𑀅𑀢𑁆𑀢𑀦𑀸𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀯𑀘𑀻𑀪𑁂𑀤𑁄 𑀧𑀦 𑀓𑀸𑀢𑀩𑁆𑀩𑁄𑀬𑁂𑀯. 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁂𑀦 𑀧𑀭𑀽𑀧𑀭𑁄𑀥𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀫𑁆𑀫𑀦𑁆𑀢𑀸 𑀦 𑀯𑀺𑀘𑀸𑀭𑁂𑀢𑀩𑁆𑀩𑀸, 𑀆𑀬𑀯𑀬𑀕𑀡𑀦𑀁 𑀓𑀭𑁄𑀦𑁆𑀢𑁂𑀦 𑀦 𑀯𑀻𑀢𑀺𑀦𑀸𑀫𑁂𑀢𑀩𑁆𑀩𑀁, 𑀕𑁂𑀳𑁂 𑀧𑀦 𑀆𑀳𑀸𑀭𑀁 𑀮𑀪𑀺𑀢𑁆𑀯𑀸 𑀦𑀺𑀘𑁆𑀘𑀪𑀢𑁆𑀢𑀺𑀓𑀪𑀺𑀓𑁆𑀔𑀼𑀦𑀸 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑁄 𑀯𑀸 𑀲𑁄𑀢𑀩𑁆𑀩𑁄, 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀢𑀭𑀁 𑀯𑀸 𑀫𑀦𑀲𑀺𑀓𑀸𑀢𑀩𑁆𑀩𑀁.

𑀲𑀼𑀤𑀲𑁆𑀲𑀦𑀸𑀢𑀺 𑀲𑀼𑀦𑁆𑀤𑀭𑀤𑀲𑁆𑀲𑀦𑀸. 𑀑𑀪𑀸𑀲𑀬𑀦𑁆𑀢𑀺 𑀑𑀪𑀸𑀲𑀬𑀫𑀸𑀦𑀸. 𑀅𑀦𑀼𑀧𑀭𑀺𑀬𑀦𑁆𑀢𑀻𑀢𑀺 𑀯𑀺𑀘𑀭𑀦𑁆𑀢𑀺. 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑀁 𑀞𑀸𑀦𑀁. 𑀅𑀦𑁆𑀢𑀮𑀺𑀓𑁆𑀔𑀕𑀸𑀢𑀺 𑀆𑀓𑀸𑀲𑀗𑁆𑀕𑀫𑀸. 𑀧𑀪𑀸𑀲𑀦𑁆𑀢𑀻𑀢𑀺 𑀚𑁄𑀢𑀦𑁆𑀢𑀺 𑀧𑀪𑀸 𑀫𑀼𑀜𑁆𑀘𑀦𑁆𑀢𑀺. 𑀤𑀺𑀲𑀸𑀯𑀺𑀭𑁄𑀘𑀦𑀸𑀢𑀺 𑀲𑀩𑁆𑀩𑀤𑀺𑀲𑀸𑀲𑀼 𑀯𑀺𑀭𑁄𑀘𑀫𑀸𑀦𑀸. 𑀅𑀣 𑀯𑀸 𑀧𑀪𑀸𑀲𑀦𑁆𑀢𑀻𑀢𑀺 𑀤𑀺𑀲𑀸𑀳𑀺 𑀤𑀺𑀲𑀸 𑀑𑀪𑀸𑀲𑀦𑁆𑀢𑀺. 𑀯𑀺𑀭𑁄𑀘𑀦𑀸𑀢𑀺 𑀯𑀺𑀭𑁄𑀘𑀫𑀸𑀦𑀸. 𑀯𑁂𑀴𑀼𑀭𑀺𑀬𑀦𑁆𑀢𑀺 𑀫𑀡𑀻𑀢𑀺 𑀯𑀢𑁆𑀯𑀸𑀧𑀺 𑀇𑀫𑀺𑀦𑀸 𑀚𑀸𑀢𑀺𑀫𑀡𑀺𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀓𑀯𑀲𑁆𑀲𑀺𑀓𑀯𑁂𑀴𑀼𑀯𑀡𑁆𑀡𑀜𑁆𑀳𑀺 𑀯𑁂𑀴𑀼𑀭𑀺𑀬𑀁 𑀚𑀸𑀢𑀺𑀫𑀡𑀺 𑀦𑀸𑀫. 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀪𑀤𑁆𑀤𑀓𑀦𑁆𑀢𑀺 𑀮𑀤𑁆𑀥𑀓𑀁. 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀦𑁆𑀢𑀺 𑀕𑁄𑀲𑀺𑀗𑁆𑀕𑀲𑀤𑀺𑀲𑀁 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀏𑀯𑀁 𑀦𑀸𑀫𑀓𑀁 𑀲𑀼𑀯𑀡𑁆𑀡𑀁. 𑀓𑀜𑁆𑀘𑀦𑀦𑁆𑀢𑀺 𑀧𑀩𑁆𑀩𑀢𑁂𑀬𑁆𑀬𑀁 𑀧𑀩𑁆𑀩𑀢𑁂 𑀚𑀸𑀢𑀲𑀼𑀯𑀡𑁆𑀡𑀁. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀢𑁆𑀣𑀼𑀯𑀡𑁆𑀡𑀲𑀼𑀯𑀡𑁆𑀡𑀁. 𑀳𑀝𑀓𑀦𑁆𑀢𑀺 𑀓𑀺𑀧𑀺𑀮𑁆𑀮𑀺𑀓𑀸𑀳𑀺 𑀦𑀻𑀳𑀝𑀲𑀼𑀯𑀡𑁆𑀡𑀁. 𑀦𑀸𑀦𑀼𑀪𑀯𑀦𑁆𑀢𑀻𑀢𑀺 𑀦 𑀧𑀸𑀧𑀼𑀡𑀦𑁆𑀢𑀺. 𑀘𑀦𑁆𑀤𑀧𑁆𑀧𑀪𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀁, 𑀘𑀦𑁆𑀤𑀧𑁆𑀧𑀪𑀸𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀯𑀲𑁆𑀲𑀼𑀧𑁄𑀲𑀣𑀦𑁆𑀢𑀺 𑀉𑀧𑀯𑀲𑀺𑀢𑁆𑀯𑀸 𑀉𑀧𑁄𑀲𑀣𑀁. 𑀲𑀼𑀔𑀼𑀤𑁆𑀭𑀬𑀸𑀦𑀻𑀢𑀺 𑀲𑀼𑀔𑀨𑀮𑀸𑀦𑀺 𑀲𑀼𑀔𑀯𑁂𑀤𑀦𑀻𑀬𑀸𑀦𑀺. 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀦𑁆𑀢𑀺 𑀲𑀕𑁆𑀕𑀲𑀗𑁆𑀔𑀸𑀢𑀁 𑀞𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀓𑁂𑀦𑀘𑀺 𑀅𑀦𑀺𑀦𑁆𑀤𑀺𑀢𑀸 𑀳𑀼𑀢𑁆𑀯𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀬𑀁 𑀅𑀦𑁆𑀢𑀭𑀦𑁆𑀢𑀭𑀸 𑀦 𑀯𑀼𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀫𑀳𑀸𑀯𑀕𑁆𑀕𑁄 𑀤𑀼𑀢𑀺𑀬𑁄.