𑁧. 𑀲𑁂𑀦𑀸𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀜𑁆𑀘𑀳𑀺 𑀕𑀼𑀡𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀸𑀘𑁆𑀘𑀸𑀲𑀦𑁆𑀦𑀦𑁆𑀢𑀺 𑀬𑀜𑁆𑀳𑀺 𑀅𑀢𑀺𑀤𑀽𑀭𑁂 𑀳𑁄𑀢𑀺, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀢𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀓𑀸𑀬𑀘𑀺𑀢𑁆𑀢𑀤𑀭𑀣𑀸 𑀳𑁄𑀢𑀺, 𑀢𑀢𑁄 𑀅𑀦𑀼𑀧𑁆𑀧𑀦𑁆𑀦𑀁 𑀯𑀸 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀉𑀧𑁆𑀧𑀦𑁆𑀦𑀁 𑀯𑀸 𑀣𑀺𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑀁 𑀩𑀳𑀼𑀚𑀦𑀸𑀓𑀺𑀡𑁆𑀡𑀁 𑀳𑁄𑀢𑀺. 𑀘𑀢𑁆𑀢𑀸𑀮𑀻𑀲𑀉𑀲𑀪𑀫𑀢𑁆𑀢𑁂 𑀧𑀦 𑀧𑀤𑁂𑀲𑁂 𑀯𑀲𑀢𑀁 𑀤𑀽𑀭𑀸𑀲𑀦𑁆𑀦𑀤𑁄𑀲𑀯𑀺𑀫𑀼𑀢𑁆𑀢𑀜𑁆𑀘 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀤𑀺𑀯𑀸𑀅𑀧𑁆𑀧𑀸𑀓𑀺𑀡𑁆𑀡𑀦𑁆𑀢𑀺 𑀤𑀺𑀯𑀲𑀪𑀸𑀕𑁂 𑀫𑀳𑀸𑀚𑀦𑁂𑀦 𑀅𑀦𑀸𑀓𑀺𑀡𑁆𑀡𑀁.