𑁯. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀦𑀯𑀫𑁂 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑁄𑀬𑀁 𑀓𑁄𑀓𑀸𑀮𑀺𑀓𑁄, 𑀓𑀲𑁆𑀫𑀸 𑀘 𑀉𑀧𑀲𑀗𑁆𑀓𑀫𑀺? 𑀅𑀬𑀁 𑀓𑀺𑀭 𑀓𑁄𑀓𑀸𑀮𑀺𑀓𑀭𑀝𑁆𑀞𑁂 𑀓𑁄𑀓𑀸𑀮𑀺𑀓𑀦𑀕𑀭𑁂 𑀓𑁄𑀓𑀸𑀮𑀺𑀓𑀲𑁂𑀝𑁆𑀞𑀺𑀲𑁆𑀲 𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀧𑀺𑀢𑀭𑀸 𑀓𑀸𑀭𑀺𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺 𑀘𑀽𑀴𑀓𑁄𑀓𑀸𑀮𑀺𑀓𑁄𑀢𑀺 𑀦𑀸𑀫𑁂𑀦, 𑀦 𑀧𑀦 𑀤𑁂𑀯𑀤𑀢𑁆𑀢𑀲𑁆𑀲 𑀲𑀺𑀲𑁆𑀲𑁄. 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄 𑀫𑀳𑀸𑀓𑁄𑀓𑀸𑀮𑀺𑀓𑁄 𑀦𑀸𑀫. 𑀪𑀕𑀯𑀢𑀺 𑀧𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑀸 𑀢𑁂 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀢𑀁 𑀦𑀕𑀭𑀁 𑀧𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀺𑀁𑀲𑀼. 𑀢𑀢𑁆𑀣 𑀦𑁂𑀲𑀁 𑀓𑁄𑀓𑀸𑀮𑀺𑀓𑁄 𑀯𑀢𑁆𑀢𑀁 𑀅𑀓𑀸𑀲𑀺. 𑀢𑁂𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀫𑀬𑀁 𑀇𑀥 𑀢𑁂𑀫𑀸𑀲𑀁 𑀯𑀲𑀺𑀲𑁆𑀲𑀸𑀫, 𑀫𑀸 𑀦𑁄 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑀻’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀲𑀺𑀁𑀲𑀼. 𑀯𑀲𑀺𑀢𑁆𑀯𑀸 𑀧𑀯𑀸𑀭𑀡𑀸𑀤𑀺𑀯𑀲𑁂 𑀧𑀯𑀸𑀭𑁂𑀢𑁆𑀯𑀸 ‘‘𑀕𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄’’𑀢𑀺 𑀓𑁄𑀓𑀸𑀮𑀺𑀓𑀁 𑀆𑀧𑀼𑀘𑁆𑀙𑀺𑀁𑀲𑀼. 𑀓𑁄𑀓𑀸𑀮𑀺𑀓𑁄 ‘‘𑀅𑀚𑁆𑀚, 𑀆𑀯𑀼𑀲𑁄, 𑀏𑀓𑀤𑀺𑀯𑀲𑀁 𑀯𑀲𑀺𑀢𑁆𑀯𑀸 𑀲𑁆𑀯𑁂 𑀕𑀫𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀇𑀥 𑀆𑀕𑀦𑁆𑀢𑁆𑀯𑀸 𑀯𑀲𑀫𑀸𑀦𑁂𑀧𑀺 𑀦 𑀚𑀸𑀦𑀸𑀣, 𑀦 𑀢𑁂 𑀓𑁄𑀘𑀺 𑀧𑀘𑁆𑀘𑀬𑁂𑀦𑀧𑀺 𑀦𑀺𑀫𑀦𑁆𑀢𑁂𑀢𑀻’’𑀢𑀺. 𑀦𑀕𑀭𑀯𑀸𑀲𑀺𑀦𑁄 ‘‘𑀓𑀳𑀁, 𑀪𑀦𑁆𑀢𑁂, 𑀣𑁂𑀭𑀸, 𑀓𑀲𑁆𑀫𑀸 𑀦𑁄 𑀦𑀸𑀭𑁄𑀘𑀬𑀺𑀢𑁆𑀣𑀸’’𑀢𑀺? 𑀓𑀺𑀁, 𑀆𑀯𑀼𑀲𑁄, 𑀆𑀭𑁄𑀘𑀺𑀢𑁂𑀦, 𑀓𑀺𑀁 𑀦 𑀧𑀲𑁆𑀲𑀣 𑀤𑁆𑀯𑁂 𑀪𑀺𑀓𑁆𑀔𑀽 𑀣𑁂𑀭𑀸𑀲𑀦𑁂 𑀦𑀺𑀲𑀻𑀤𑀦𑁆𑀢𑁂, 𑀏𑀢𑁂 𑀅𑀕𑁆𑀕𑀲𑀸𑀯𑀓𑀸𑀢𑀺. 𑀢𑁂 𑀔𑀺𑀧𑁆𑀧𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀘𑁂𑀯 𑀘𑀻𑀯𑀭𑀤𑀼𑀲𑁆𑀲𑀸𑀦𑀺 𑀘 𑀲𑀁𑀳𑀭𑀺𑀁𑀲𑀼.

𑀓𑁄𑀓𑀸𑀮𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀫𑀧𑁆𑀧𑀺𑀘𑁆𑀙𑀸 𑀅𑀕𑁆𑀕𑀲𑀸𑀯𑀓𑀸 𑀧𑀬𑀼𑀢𑁆𑀢𑀯𑀸𑀘𑀸𑀬 𑀉𑀧𑁆𑀧𑀦𑁆𑀦𑀮𑀸𑀪𑀁 𑀦 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺, 𑀅𑀲𑀸𑀤𑀺𑀬𑀦𑁆𑀢𑀸 ‘𑀆𑀯𑀸𑀲𑀺𑀓𑀲𑁆𑀲 𑀤𑁂𑀣𑀸’𑀢𑀺 𑀯𑀓𑁆𑀔𑀦𑁆𑀢𑀻’’𑀢𑀺 𑀢𑀁 𑀮𑀸𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀣𑁂𑀭𑀸 𑀤𑀺𑀲𑁆𑀯𑀸𑀯 ‘‘𑀇𑀫𑁂 𑀧𑀘𑁆𑀘𑀬𑀸 𑀦𑁂𑀯 𑀅𑀫𑁆𑀳𑀸𑀓𑀁, 𑀦 𑀓𑁄𑀓𑀸𑀮𑀺𑀓𑀲𑁆𑀲 𑀓𑀧𑁆𑀧𑀦𑁆𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀓𑁄𑀓𑀸𑀮𑀺𑀓𑁄 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀬𑀁 𑀅𑀕𑁆𑀕𑀡𑁆𑀳𑀦𑁆𑀢𑀸 𑀫𑀬𑁆𑀳𑀫𑁆𑀧𑀺 𑀅𑀤𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀖𑀸𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀤𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀢𑀫𑁂𑀯 𑀦𑀕𑀭𑀁 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀦𑀸𑀕𑀭𑀸 𑀣𑁂𑀭𑁂 𑀲𑀜𑁆𑀚𑀸𑀦𑀺𑀢𑁆𑀯𑀸 𑀲𑀳 𑀧𑀭𑀺𑀓𑁆𑀔𑀸𑀭𑁂𑀳𑀺 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼, 𑀣𑁂𑀭𑀸𑀦𑀜𑁆𑀘 𑀧𑀭𑀺𑀓𑁆𑀔𑀸𑀭𑁂 𑀉𑀧𑀦𑀸𑀫𑁂𑀲𑀼𑀁. 𑀣𑁂𑀭𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑀬𑀺𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀓𑁄𑀓𑀸𑀮𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀧𑀼𑀩𑁆𑀩𑁂 𑀅𑀧𑁆𑀧𑀺𑀘𑁆𑀙𑀸 𑀅𑀳𑁂𑀲𑀼𑀁, 𑀇𑀤𑀸𑀦𑀺 𑀧𑀸𑀧𑀺𑀘𑁆𑀙𑀸 𑀚𑀸𑀢𑀸, 𑀧𑀼𑀩𑁆𑀩𑁂𑀧𑀺 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀧𑀯𑀺𑀯𑀺𑀢𑁆𑀢𑀲𑀤𑀺𑀲𑀸𑀯 𑀫𑀜𑁆𑀜𑁂’’𑀢𑀺 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀅𑀧𑁆𑀧𑀺𑀘𑁆𑀙𑀸 𑀯𑀺𑀬, 𑀇𑀤𑀸𑀦𑀺 𑀧𑀦 𑀧𑀸𑀧𑀪𑀺𑀓𑁆𑀔𑀽 𑀚𑀸𑀢𑀢𑁆𑀣𑀸’’𑀢𑀺 𑀯𑀢𑁆𑀯𑀸 ‘‘𑀫𑀽𑀮𑀝𑁆𑀞𑀸𑀦𑁂𑀬𑁂𑀯 𑀦𑁂𑀲𑀁 𑀧𑀢𑀺𑀝𑁆𑀞𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀭𑀫𑀸𑀦𑀭𑀽𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀬𑀫𑁂𑀲 𑀓𑁄𑀓𑀸𑀮𑀺𑀓𑁄, 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀕𑀯𑀸 𑀢𑀁 𑀢𑀼𑀭𑀺𑀢𑀢𑀼𑀭𑀺𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀆𑀯𑀚𑁆𑀚𑁂𑀦𑁆𑀢𑁄 𑀅𑀜𑁆𑀜𑀸𑀲𑀺 ‘‘𑀅𑀬𑀁 𑀅𑀕𑁆𑀕𑀲𑀸𑀯𑀓𑁂 𑀅𑀓𑁆𑀓𑁄𑀲𑀺𑀢𑀼𑀓𑀸𑀫𑁄 𑀆𑀕𑀢𑁄, 𑀲𑀓𑁆𑀓𑀸 𑀦𑀼 𑀔𑁄 𑀧𑀝𑀺𑀲𑁂𑀥𑁂𑀢𑀼’’𑀦𑁆𑀢𑀺. 𑀢𑀢𑁄 ‘‘𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑁂𑀢𑀼𑀁, 𑀣𑁂𑀭𑁂𑀲𑀼 𑀅𑀧𑀭𑀚𑁆𑀛𑀺𑀢𑁆𑀯𑀸 𑀆𑀕𑀢𑁄, 𑀏𑀓𑀁𑀲𑁂𑀦 𑀧𑀦 𑀧𑀤𑀼𑀫𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀧𑀺 𑀦𑀸𑀫 𑀕𑀭𑀳𑀦𑁆𑀢𑀁 𑀲𑀼𑀢𑁆𑀯𑀸 𑀦 𑀦𑀺𑀲𑁂𑀥𑁂𑀢𑀻’’𑀢𑀺 𑀯𑀸𑀤𑀫𑁄𑀘𑀦𑀢𑁆𑀣𑀁 𑀅𑀭𑀺𑀬𑀽𑀧𑀯𑀸𑀤𑀲𑁆𑀲 𑀘 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀫𑀸 𑀳𑁂𑀯𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀲𑁂𑀥𑁂𑀲𑀺. 𑀢𑀢𑁆𑀣 𑀫𑀸 𑀳𑁂𑀯𑀦𑁆𑀢𑀺 𑀫𑀸 𑀏𑀯𑀁 𑀅𑀪𑀡𑀺. 𑀲𑀤𑁆𑀥𑀸𑀬𑀺𑀓𑁄𑀢𑀺 𑀲𑀤𑁆𑀥𑀸𑀬 𑀆𑀕𑀫𑀓𑀭𑁄 𑀧𑀲𑀸𑀤𑀸𑀯𑀳𑁄, 𑀲𑀤𑁆𑀥𑀸𑀢𑀩𑁆𑀩𑀯𑀘𑀦𑁄 𑀯𑀸. 𑀧𑀘𑁆𑀘𑀬𑀺𑀓𑁄𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀯𑀘𑀦𑁄.

𑀧𑀓𑁆𑀓𑀸𑀫𑀻𑀢𑀺 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀘𑁄𑀤𑀺𑀬𑀫𑀸𑀦𑁄 𑀧𑀓𑁆𑀓𑀸𑀫𑀺. 𑀑𑀓𑀸𑀲𑀓𑀢𑀜𑁆𑀳𑀺 𑀓𑀫𑁆𑀫𑀁 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁. 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀧𑀓𑁆𑀓𑀦𑁆𑀢𑀲𑁆𑀲 𑀲𑀢𑁄 𑀦𑀘𑀺𑀭𑁂𑀦𑁂𑀯. 𑀲𑀩𑁆𑀩𑁄 𑀓𑀸𑀬𑁄 𑀨𑀼𑀝𑁄 𑀅𑀳𑁄𑀲𑀻𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀑𑀓𑀸𑀲𑀁 𑀅𑀯𑀚𑁆𑀚𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀢𑀸𑀳𑀺 𑀧𑀻𑀴𑀓𑀸𑀳𑀺 𑀅𑀚𑁆𑀛𑁄𑀢𑁆𑀣𑀝𑀁 𑀅𑀳𑁄𑀲𑀺. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑀣𑀸𑀭𑀽𑀧𑀁 𑀓𑀫𑁆𑀫𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑀲𑁆𑀲𑀦𑀽𑀧𑀘𑀸𑀭𑁂 𑀯𑀺𑀚𑀳𑀺𑀢𑀫𑀢𑁆𑀢𑁂 𑀤𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀧𑀻𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀓𑀮𑀸𑀬𑀫𑀢𑁆𑀢𑀺𑀬𑁄𑀢𑀺 𑀘𑀡𑀓𑀫𑀢𑁆𑀢𑀺𑀬𑁄. 𑀩𑁂𑀮𑀼𑀯𑀲𑀮𑀸𑀝𑀼𑀓𑀫𑀢𑁆𑀢𑀺𑀬𑁄𑀢𑀺 𑀢𑀭𑀼𑀡𑀩𑁂𑀮𑀼𑀯𑀫𑀢𑁆𑀢𑀺𑀬𑁄. 𑀧𑀪𑀺𑀚𑁆𑀚𑀺𑀁𑀲𑀽𑀢𑀺 𑀪𑀺𑀚𑁆𑀚𑀺𑀁𑀲𑀼. 𑀢𑀸𑀲𑀼 𑀪𑀺𑀦𑁆𑀦𑀸𑀲𑀼 𑀲𑀓𑀮𑀲𑀭𑀻𑀭𑀁 𑀧𑀦𑀲𑀧𑀓𑁆𑀓𑀁 𑀯𑀺𑀬 𑀅𑀳𑁄𑀲𑀺. 𑀲𑁄 𑀧𑀓𑁆𑀓𑁂𑀦 𑀕𑀢𑁆𑀢𑁂𑀦 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀯𑀺𑀲𑀕𑀺𑀮𑀺𑀢𑁄 𑀫𑀘𑁆𑀙𑁄 𑀯𑀺𑀬 𑀓𑀤𑀮𑀺𑀧𑀢𑁆𑀢𑁂𑀲𑀼 𑀦𑀺𑀧𑀚𑁆𑀚𑀺. 𑀅𑀣 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀆𑀕𑀢𑀸𑀕𑀢𑀸 𑀫𑀦𑀼𑀲𑁆𑀲𑀸 ‘‘𑀥𑀺 𑀓𑁄𑀓𑀸𑀮𑀺𑀓, 𑀥𑀺 𑀓𑁄𑀓𑀸𑀮𑀺𑀓, 𑀅𑀬𑀼𑀢𑁆𑀢𑀫𑀓𑀸𑀲𑀺, 𑀅𑀢𑁆𑀢𑀦𑁄𑀬𑁂𑀯 𑀫𑀼𑀔𑀁 𑀦𑀺𑀲𑁆𑀲𑀸𑀬 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄𑀲𑀻’’𑀢𑀺 𑀆𑀳𑀁𑀲𑀼. 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀭𑀓𑁆𑀔𑀤𑁂𑀯𑀢𑀸 𑀥𑀺𑀓𑁆𑀓𑀸𑀭𑀫𑀓𑀁𑀲𑀼, 𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀆𑀓𑀸𑀲𑀤𑁂𑀯𑀢𑀸𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀏𑀓𑀥𑀺𑀓𑁆𑀓𑀸𑀭𑁄 𑀉𑀤𑀧𑀸𑀤𑀺.

𑀢𑀼𑀭𑀽𑀢𑀺 𑀓𑁄𑀓𑀸𑀮𑀺𑀓𑀲𑁆𑀲 𑀉𑀧𑀚𑁆𑀛𑀸𑀬𑁄 𑀢𑀼𑀭𑀼𑀢𑁆𑀣𑁂𑀭𑁄 𑀦𑀸𑀫 𑀅𑀦𑀸𑀕𑀸𑀫𑀺𑀨𑀮𑀁 𑀯𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀪𑀼𑀫𑁆𑀫𑀝𑁆𑀞𑀤𑁂𑀯𑀢𑀸 𑀆𑀤𑀺𑀁 𑀓𑀢𑁆𑀯𑀸 ‘‘𑀅𑀬𑀼𑀢𑁆𑀢𑀁 𑀓𑁄𑀓𑀸𑀮𑀺𑀓𑁂𑀦 𑀓𑀢𑀁 𑀅𑀕𑁆𑀕𑀲𑀸𑀯𑀓𑁂 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦𑀸’’𑀢𑀺 𑀧𑀭𑀫𑁆𑀧𑀭𑀸𑀬 𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀁 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀫𑀸 𑀫𑀬𑁆𑀳𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀯𑀭𑀸𑀓𑁄 𑀦𑀲𑁆𑀲𑀺, 𑀑𑀯𑀤𑀺𑀲𑁆𑀲𑀸𑀫𑀺 𑀦𑀁 𑀣𑁂𑀭𑁂𑀲𑀼 𑀘𑀺𑀢𑁆𑀢𑀧𑁆𑀧𑀲𑀸𑀤𑀢𑁆𑀣𑀸𑀬𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀢𑀼𑀭𑀽 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸’’𑀢𑀺. 𑀧𑁂𑀲𑀮𑀸𑀢𑀺 𑀧𑀺𑀬𑀲𑀻𑀮𑀸. 𑀓𑁄𑀲𑀺 𑀢𑁆𑀯𑀁, 𑀆𑀯𑀼𑀲𑁄𑀢𑀺 𑀦𑀺𑀲𑀺𑀦𑁆𑀦𑀓𑁄𑀯 𑀓𑀩𑀭𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀏𑀯𑀫𑀸𑀳. 𑀧𑀲𑁆𑀲 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥𑀢𑀺 𑀬𑀢𑁆𑀢𑀓𑀁 𑀢𑀬𑀸 𑀅𑀧𑀭𑀤𑁆𑀥𑀁, 𑀅𑀢𑁆𑀢𑀦𑁄 𑀦𑀮𑀸𑀝𑁂 𑀫𑀳𑀸𑀕𑀡𑁆𑀟𑀁 𑀅𑀧𑀲𑁆𑀲𑀦𑁆𑀢𑁄 𑀲𑀸𑀲𑀧𑀫𑀢𑁆𑀢𑀸𑀬 𑀧𑀻𑀴𑀓𑀸𑀬 𑀫𑀁 𑀘𑁄𑀤𑁂𑀢𑀩𑁆𑀩𑀁 𑀫𑀜𑁆𑀜𑀲𑀻𑀢𑀺 𑀆𑀳.

𑀅𑀣 𑀦𑀁 ‘‘𑀅𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀅𑀬𑀁 𑀓𑁄𑀓𑀸𑀮𑀺𑀓𑁄, 𑀕𑀺𑀮𑀺𑀢𑀯𑀺𑀲𑁄 𑀯𑀺𑀬 𑀦 𑀓𑀲𑁆𑀲𑀘𑀺 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀼𑀭𑀺𑀲𑀲𑁆𑀲 𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀞𑀸𑀭𑀻𑀢𑀺 𑀓𑀼𑀞𑀸𑀭𑀺𑀲𑀤𑀺𑀲𑀸 𑀨𑀭𑀼𑀲𑀯𑀸𑀘𑀸. 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑁂 𑀫𑀽𑀮𑁂𑀬𑁂𑀯 𑀦𑀺𑀓𑀦𑁆𑀢𑀢𑀺. 𑀦𑀺𑀦𑁆𑀤𑀺𑀬𑀦𑁆𑀢𑀺 𑀦𑀺𑀦𑁆𑀤𑀺𑀢𑀩𑁆𑀩𑀁 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀁. 𑀧𑀲𑀁𑀲𑀢𑀻𑀢𑀺 𑀉𑀢𑁆𑀢𑀫𑀢𑁆𑀣𑁂 𑀲𑀫𑁆𑀪𑀸𑀯𑁂𑀢𑁆𑀯𑀸 𑀔𑀻𑀡𑀸𑀲𑀯𑁄𑀢𑀺 𑀯𑀤𑀢𑀺. 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄𑀢𑀺 𑀬𑁄 𑀯𑀸 𑀧𑀲𑀁𑀲𑀺𑀢𑀩𑁆𑀩𑁄 𑀔𑀻𑀡𑀸𑀲𑀯𑁄, 𑀢𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀘𑁄𑀤𑁂𑀦𑁆𑀢𑁄 ‘‘𑀤𑀼𑀲𑁆𑀲𑀻𑀮𑁄 𑀅𑀬’’𑀦𑁆𑀢𑀺 𑀯𑀤𑀢𑀺. 𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀦𑁆𑀢𑀺 𑀲𑁄 𑀢𑀁 𑀅𑀧𑀭𑀸𑀥𑀁 𑀫𑀼𑀔𑁂𑀦 𑀯𑀺𑀘𑀺𑀦𑀸𑀢𑀺 𑀦𑀸𑀫. 𑀓𑀮𑀺𑀦𑀸 𑀢𑁂𑀦𑀸𑀢𑀺 𑀢𑁂𑀦 𑀅𑀧𑀭𑀸𑀥𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺. 𑀦𑀺𑀦𑁆𑀤𑀺𑀬𑀧𑀲𑀁𑀲𑀸𑀬 𑀳𑀺 𑀧𑀲𑀁𑀲𑀺𑀬𑀦𑀺𑀦𑁆𑀤𑀸𑀬 𑀘 𑀲𑀫𑀓𑁄𑀯 𑀯𑀺𑀧𑀸𑀓𑁄.

𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸𑀢𑀺 𑀲𑀩𑁆𑀩𑁂𑀦 𑀲𑀓𑁂𑀦 𑀥𑀦𑁂𑀦𑀧𑀺 𑀅𑀢𑁆𑀢𑀦𑀸𑀧𑀺 𑀲𑀤𑁆𑀥𑀺𑀁 𑀬𑁄 𑀅𑀓𑁆𑀔𑁂𑀲𑀼 𑀥𑀦𑀧𑀭𑀸𑀚𑀬𑁄 𑀦𑀸𑀫, 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀅𑀧𑀭𑀸𑀥𑁄. 𑀬𑁄 𑀲𑀼𑀕𑀢𑁂𑀲𑀽𑀢𑀺 𑀬𑁄 𑀧𑀦 𑀲𑀫𑁆𑀫𑀕𑁆𑀕𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀘𑀺𑀢𑁆𑀢𑀁 𑀤𑀽𑀲𑁂𑀬𑁆𑀬, 𑀅𑀬𑀁 𑀘𑀺𑀢𑁆𑀢𑀧𑀤𑁄𑀲𑁄𑀯 𑀢𑀢𑁄 𑀓𑀮𑀺𑀢𑁄 𑀫𑀳𑀦𑁆𑀢𑀢𑀭𑁄 𑀓𑀮𑀺.

𑀇𑀤𑀸𑀦𑀺 𑀢𑀲𑁆𑀲 𑀫𑀳𑀦𑁆𑀢𑀢𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺 𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬 𑀲𑀢𑀲𑀳𑀲𑁆𑀲𑀜𑁆𑀘. 𑀙𑀢𑁆𑀢𑀺𑀁𑀲𑀢𑀻𑀢𑀺 𑀅𑀧𑀭𑀸𑀦𑀺 𑀙𑀢𑁆𑀢𑀺𑀁𑀲𑀢𑀺 𑀦𑀺𑀭𑀩𑁆𑀩𑀼𑀤𑀸𑀦𑀺. 𑀧𑀜𑁆𑀘 𑀘𑀸𑀢𑀺 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀜𑁆𑀘 𑀅𑀩𑁆𑀩𑀼𑀤𑀸𑀦𑀺. 𑀬𑀫𑀭𑀺𑀬𑀕𑀭𑀳𑀻𑀢𑀺 𑀬𑀁 𑀅𑀭𑀺𑀬𑁂 𑀕𑀭𑀳𑀦𑁆𑀢𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺, 𑀢𑀢𑁆𑀣 𑀏𑀢𑁆𑀢𑀓𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄.

𑀓𑀸𑀮𑀫𑀓𑀸𑀲𑀻𑀢𑀺 𑀉𑀧𑀚𑁆𑀛𑀸𑀬𑁂 𑀧𑀓𑁆𑀓𑀦𑁆𑀢𑁂 𑀓𑀸𑀮𑀁 𑀅𑀓𑀸𑀲𑀺. 𑀧𑀤𑀼𑀫𑀦𑀺𑀭𑀬𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀧𑀤𑀼𑀫𑀦𑀺𑀭𑀬𑁄 𑀦𑀸𑀫 𑀦𑀢𑁆𑀣𑀺, 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑁆𑀫𑀺𑀁𑀬𑁂𑀯 𑀧𑀦 𑀧𑀤𑀼𑀫𑀕𑀡𑀦𑀸𑀬 𑀧𑀘𑁆𑀘𑀺𑀢𑀩𑁆𑀩𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀯𑀻𑀲𑀢𑀺𑀔𑀸𑀭𑀺𑀓𑁄𑀢𑀺 𑀫𑀸𑀕𑀥𑀓𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸, 𑀓𑁄𑀲𑀮𑀭𑀝𑁆𑀞𑁂 𑀏𑀓𑁄 𑀧𑀢𑁆𑀣𑁄 𑀳𑁄𑀢𑀺. 𑀢𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀆𑀴𑁆𑀳𑀓𑀁, 𑀘𑀢𑁆𑀢𑀸𑀭𑀺 𑀆𑀴𑁆𑀳𑀓𑀸𑀦𑀺 𑀤𑁄𑀡𑀁, 𑀘𑀢𑀼𑀤𑁄𑀡𑀸 𑀫𑀸𑀦𑀺𑀓𑀸, 𑀘𑀢𑀼𑀫𑀸𑀦𑀺𑀓𑀸 𑀔𑀸𑀭𑀻, 𑀢𑀸𑀬 𑀔𑀸𑀭𑀺𑀬𑀸 𑀯𑀻𑀲𑀢𑀺𑀔𑀸𑀭𑀺𑀓𑁄. 𑀢𑀺𑀮𑀯𑀸𑀳𑁄𑀢𑀺 𑀫𑀸𑀕𑀥𑀓𑀸𑀦𑀁 𑀲𑀼𑀔𑀼𑀫𑀢𑀺𑀮𑀸𑀦𑀁 𑀢𑀺𑀮𑀲𑀓𑀝𑀁. 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄𑀢𑀺 𑀅𑀩𑁆𑀩𑀼𑀤𑁄 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀦𑀺𑀭𑀬𑁄 𑀦𑀢𑁆𑀣𑀺, 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀧𑀦 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀘𑁆𑀘𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀲𑁆𑀲𑀕𑀡𑀦𑀸𑀧𑀺 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑁂𑀯 𑀳𑀺 𑀲𑀢𑀁 𑀲𑀢𑀲𑀳𑀲𑁆𑀲𑀸𑀦𑀺 𑀓𑁄𑀝𑀺 𑀳𑁄𑀢𑀺, 𑀏𑀯𑀁 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀬𑁄 𑀧𑀓𑁄𑀝𑀺 𑀦𑀸𑀫 𑀳𑁄𑀢𑀺, 𑀲𑀢𑀁 𑀲𑀢𑀲𑀳𑀲𑁆𑀲𑀧𑀓𑁄𑀝𑀺𑀬𑁄 𑀓𑁄𑀝𑀺𑀧𑀓𑁄𑀝𑀺 𑀦𑀸𑀫, 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀧𑀓𑁄𑀝𑀺𑀬𑁄 𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀳𑀼𑀢𑀸𑀦𑀺 𑀦𑀺𑀦𑁆𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀺𑀦𑁆𑀦𑀳𑀼𑀢𑀸𑀦𑀺 𑀏𑀓𑀁 𑀅𑀩𑁆𑀩𑀼𑀤𑀁, 𑀢𑀢𑁄 𑀯𑀻𑀲𑀢𑀺𑀕𑀼𑀡𑀁 𑀦𑀺𑀭𑀩𑁆𑀩𑀼𑀤𑀁, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺. 𑀤𑀲𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀣𑁂𑀭𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁦) 𑁫. 𑀉𑀧𑀸𑀮𑀺𑀯𑀕𑁆𑀕𑁄