𑁫. 𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀧𑀜𑁆𑀘𑀫𑀲𑁆𑀲 𑀆𑀤𑀺𑀫𑁆𑀳𑀺 𑀢𑀸𑀯 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀙𑀓𑁆𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑀫𑁂𑀯. 𑀤𑀼𑀲𑁆𑀲𑀻𑀮𑁄 𑀳𑁄𑀢𑀻𑀢𑀺𑀆𑀤𑀻𑀲𑀼 𑀧𑀦 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀜𑀸𑀡𑀁. 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀦 𑀚𑀸𑀦𑀸𑀢𑀺. 𑀤𑀼𑀲𑁆𑀲𑀻𑀮𑁆𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀧𑀜𑁆𑀘 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀤𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀨𑀮𑀓𑁆𑀔𑀡𑁂 𑀢𑀸𑀦𑀺 𑀧𑀳𑀻𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀨𑀮𑀓𑁆𑀔𑀡𑀁 𑀲𑀦𑁆𑀥𑀸𑀬 𑀇𑀥 ‘‘𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀻𑀮𑀁 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀪𑀺𑀚𑁆𑀚𑀢𑀺 𑀧𑀸𑀭𑀸𑀚𑀺𑀓𑀸𑀧𑀚𑁆𑀚𑀦𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀢𑀺𑀢𑁆𑀣𑀺𑀬𑀧𑀓𑁆𑀔𑀦𑁆𑀤𑀦𑁂𑀦 𑀅𑀭𑀳𑀢𑁆𑀢𑁂𑀦 𑀫𑀭𑀡𑁂𑀦𑀸𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸 𑀢𑀬𑁄 𑀪𑀸𑀯𑀦𑀸𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀘𑀢𑀼𑀢𑁆𑀣𑁄 𑀯𑀟𑁆𑀠𑀺𑀬𑀸, 𑀧𑀜𑁆𑀘𑀫𑁄 𑀦𑁂𑀯 𑀳𑀸𑀦𑀸𑀬 𑀦 𑀯𑀟𑁆𑀠𑀺𑀬𑀸. 𑀓𑀣𑀁 𑀧𑀦𑁂𑀢𑀁 𑀅𑀭𑀳𑀢𑁆𑀢𑁂𑀦 𑀲𑀻𑀮𑀁 𑀪𑀺𑀚𑁆𑀚𑀢𑀻𑀢𑀺? 𑀧𑀼𑀣𑀼𑀚𑁆𑀚𑀦𑀲𑁆𑀲 𑀳𑀺 𑀲𑀻𑀮𑀁 𑀅𑀘𑁆𑀘𑀦𑁆𑀢𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀘 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀁 𑀢𑁂𑀦 𑀢𑀁 𑀪𑀺𑀚𑁆𑀚𑀢𑀺. 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀻𑀢𑀺 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀲𑁆𑀲𑀼𑀢𑀁 𑀳𑁄𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀩𑀸𑀳𑀼𑀲𑀘𑁆𑀘𑀦𑁆𑀢𑀺 𑀯𑀻𑀭𑀺𑀬𑀁. 𑀯𑀻𑀭𑀺𑀬𑁂𑀦 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀓𑀢𑀁 𑀳𑁄𑀢𑀺, 𑀢𑀲𑁆𑀲 𑀅𑀓𑀢𑀢𑁆𑀢𑀸 𑀲𑀕𑁆𑀕𑀢𑁄𑀧𑀺 𑀫𑀕𑁆𑀕𑀢𑁄𑀧𑀺 𑀧𑀭𑀺𑀳𑀸𑀬𑀢𑀺. 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀻𑀢𑀺 𑀤𑀺𑀝𑁆𑀞𑀺𑀬𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺 𑀅𑀧𑀘𑁆𑀘𑀓𑁆𑀔𑀓𑀢𑀁. 𑀲𑀸𑀫𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀻𑀢𑀺 𑀓𑀸𑀮𑀸𑀦𑀼𑀓𑀸𑀮𑀁 𑀥𑀫𑁆𑀫𑀲𑁆𑀲𑀯𑀦𑀁 𑀦𑀺𑀲𑁆𑀲𑀸𑀬 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦 𑀮𑀪𑀢𑀺. 𑀳𑀸𑀦𑀸𑀬 𑀧𑀭𑁂𑀢𑀻𑀢𑀺 𑀳𑀸𑀦𑀸𑀬 𑀧𑀯𑀢𑁆𑀢𑀢𑀺.

𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀧𑀜𑁆𑀘𑀯𑀺𑀥𑀁 𑀤𑀼𑀲𑁆𑀲𑀻𑀮𑁆𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀚𑀸𑀦𑀸𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀻𑀢𑀺 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀼𑀢𑀁 𑀳𑁄𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀻𑀢𑀺 𑀯𑀻𑀭𑀺𑀬𑁂𑀦 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀅𑀦𑁆𑀢𑀫𑀲𑁄 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀓𑀫𑁆𑀧𑀺 𑀓𑀢𑀁 𑀳𑁄𑀢𑀺. 𑀤𑀺𑀝𑁆𑀞𑀺𑀬𑀸𑀧𑀺 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀻𑀢𑀺 𑀅𑀦𑁆𑀢𑀫𑀲𑁄 𑀮𑁄𑀓𑀺𑀬𑀧𑀜𑁆𑀜𑀸𑀬𑀧𑀺 𑀧𑀘𑁆𑀘𑀬𑀧𑀝𑀺𑀯𑁂𑀥𑁄 𑀓𑀢𑁄 𑀳𑁄𑀢𑀺. 𑀇𑀫𑀲𑁆𑀲 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀸 𑀲𑀻𑀮𑀁 𑀧𑀭𑀺𑀥𑁄𑀯𑀢𑀺, 𑀲𑁄 𑀧𑀜𑁆𑀜𑀸𑀧𑀭𑀺𑀥𑁄𑀢𑁂𑀦 𑀯𑀺𑀲𑁂𑀲𑀁 𑀧𑀸𑀧𑀼𑀡𑀸𑀢𑀺.

𑀧𑀫𑀸𑀡𑀺𑀓𑀸𑀢𑀺 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀕𑁆𑀕𑀸𑀳𑀓𑀸. 𑀧𑀫𑀺𑀡𑀦𑁆𑀢𑀻𑀢𑀺 𑀧𑀫𑁂𑀢𑀼𑀁 𑀢𑀼𑀮𑁂𑀢𑀼𑀁 𑀅𑀭𑀳𑀦𑁆𑀢𑀺. 𑀏𑀓𑁄 𑀳𑀻𑀦𑁄𑀢𑀺 𑀏𑀓𑁄 𑀕𑀼𑀡𑁂𑀳𑀺 𑀳𑀻𑀦𑁄. 𑀧𑀡𑀻𑀢𑁄𑀢𑀺 𑀏𑀓𑁄 𑀕𑀼𑀡𑁂𑀳𑀺 𑀧𑀡𑀻𑀢𑁄 𑀉𑀢𑁆𑀢𑀫𑁄. 𑀢𑀁 𑀳𑀻𑀢𑀺 𑀢𑀁 𑀧𑀫𑀸𑀡𑀓𑀭𑀡𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀲𑀼𑀦𑁆𑀤𑀭𑀢𑀭𑁄. 𑀧𑀡𑀻𑀢𑀢𑀭𑁄𑀢𑀺 𑀉𑀢𑁆𑀢𑀫𑀢𑀭𑁄. 𑀥𑀫𑁆𑀫𑀲𑁄𑀢𑁄 𑀦𑀺𑀩𑁆𑀩𑀳𑀢𑀻𑀢𑀺 𑀲𑀽𑀭𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀩𑁆𑀩𑀳𑀢𑀺, 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑁂𑀢𑀺. 𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬𑀸𑀢𑀺 𑀢𑀁 𑀏𑀯𑀁 𑀓𑀸𑀭𑀡𑀁 𑀓𑁄 𑀚𑀸𑀦𑁂𑀬𑁆𑀬. 𑀲𑀻𑀮𑀯𑀸 𑀳𑁄𑀢𑀻𑀢𑀺 𑀮𑁄𑀓𑀺𑀬𑀲𑀻𑀮𑁂𑀦 𑀲𑀻𑀮𑀯𑀸 𑀳𑁄𑀢𑀺. 𑀬𑀢𑁆𑀣𑀲𑁆𑀲 𑀢𑀁 𑀲𑀻𑀮𑀦𑁆𑀢𑀺 𑀅𑀭𑀳𑀢𑁆𑀢𑀯𑀺𑀫𑀼𑀢𑁆𑀢𑀺𑀁 𑀧𑀢𑁆𑀯𑀸 𑀲𑀻𑀮𑀁 𑀅𑀧𑀭𑀺𑀲𑁂𑀲𑀫𑁆𑀧𑀺 𑀦𑀺𑀭𑀼𑀚𑁆𑀛𑀢𑀺 𑀦𑀸𑀫, 𑀢𑀢𑁆𑀣 𑀬𑀼𑀢𑁆𑀢𑀺 𑀯𑀼𑀢𑁆𑀢𑀸𑀬𑁂𑀯. 𑀇𑀢𑁄 𑀧𑀭𑁂𑀲𑀼 𑀤𑁆𑀯𑀻𑀲𑀼 𑀅𑀗𑁆𑀕𑁂𑀲𑀼 𑀅𑀦𑀸𑀕𑀸𑀫𑀺𑀨𑀮𑀁 𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀧𑀜𑁆𑀘𑀫𑁂 𑀅𑀭𑀳𑀢𑁆𑀢𑀫𑁂𑀯. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.