𑁬. 𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀲𑁄𑀓𑀲𑀪𑀬𑁂𑀢𑀺 𑀲𑁄𑀓𑁂𑀦 𑀲𑀪𑀬𑁂. 𑀲𑁄𑀓𑀪𑀬𑁂𑀢𑀺 𑀯𑀸 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀓𑁂𑀦𑀘𑀺 𑀓𑀫𑁆𑀫𑀝𑁆𑀞𑀸𑀦𑁂𑀦𑀸𑀢𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀓𑀫𑁆𑀫𑁂𑀦. 𑀅𑀦𑀸𑀧𑀚𑁆𑀚 𑀅𑀓𑀼𑀲𑀮𑀦𑁆𑀢𑀺 𑀓𑀺𑀜𑁆𑀘𑀺 𑀅𑀓𑀼𑀲𑀮𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸. 𑀦𑀺𑀩𑁆𑀩𑀺𑀲𑁂𑀬𑁆𑀬𑀸𑀢𑀺 𑀉𑀧𑁆𑀧𑀸𑀤𑁂𑀬𑁆𑀬 𑀆𑀘𑀺𑀦𑁂𑀬𑁆𑀬. 𑀤𑀓𑁆𑀔𑁄𑀢𑀺 𑀙𑁂𑀓𑁄. 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀮𑀁 𑀯𑀘𑀦𑀸𑀬𑀸𑀢𑀺 𑀬𑀼𑀢𑁆𑀢𑁄 𑀯𑀘𑀦𑀸𑀬. 𑀏𑀓𑀦𑁆𑀢𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀯𑀺𑀳𑀭𑁂𑀬𑁆𑀬𑀸𑀢𑀺 𑀏𑀓𑀦𑁆𑀢𑀫𑁂𑀯 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀜𑀸𑀡𑁂𑀦 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀯𑀺𑀳𑀭𑁂𑀬𑁆𑀬. 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄. 𑀢𑀼𑀘𑁆𑀙𑀸𑀢𑀺 𑀲𑀸𑀭𑀭𑀳𑀺𑀢𑀸. 𑀫𑀼𑀲𑀸𑀢𑀺 𑀦𑀺𑀘𑁆𑀘𑀲𑀼𑀪𑀲𑀼𑀔𑀸 𑀯𑀺𑀬 𑀔𑀸𑀬𑀫𑀸𑀦𑀸𑀧𑀺 𑀢𑀣𑀸 𑀦 𑀳𑁄𑀦𑁆𑀢𑀻𑀢𑀺 𑀫𑀼𑀲𑀸. 𑀫𑁄𑀲𑀥𑀫𑁆𑀫𑀸𑀢𑀺 𑀦𑀲𑁆𑀲𑀦𑀲𑀪𑀸𑀯𑀸. 𑀢𑀲𑁆𑀫𑀸 𑀢𑁂 𑀧𑀝𑀺𑀘𑁆𑀘 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀦𑁆𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀯𑁄𑀢𑀺 𑀏𑀢𑁆𑀣 𑀯𑁄 𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑀡𑁆𑀡𑀓𑀁 𑀯𑀸 𑀲𑁄𑀢𑀸𑀧𑀦𑁆𑀦𑁄𑀢𑀺 𑀅𑀯𑀺𑀭𑀸𑀥𑀺𑀢𑀁 𑀏𑀓𑀁𑀲𑁂𑀦 𑀲𑁄𑀢𑀸𑀧𑀦𑁆𑀦𑁄 𑀯𑀸 𑀳𑁄𑀢𑀺. 𑀲𑁄𑀧𑀺 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀩𑁆𑀭𑀳𑁆𑀫𑀮𑁄𑀓𑀁 𑀯𑀸 𑀕𑀦𑁆𑀢𑁆𑀯𑀸 𑀙𑀲𑀼 𑀯𑀸 𑀓𑀸𑀫𑀲𑀕𑁆𑀕𑁂𑀲𑀼 𑀏𑀓𑀦𑁆𑀢𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑀼𑀢𑁆𑀯𑀸 𑀯𑀺𑀳𑀭𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀢𑁆𑀣𑀸 𑀅𑀝𑁆𑀞𑀗𑁆𑀕𑀼𑀧𑁄𑀲𑀣𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺.