𑁭. 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁬𑁧. 𑀲𑀢𑁆𑀢𑀫𑀲𑁆𑀲 𑀧𑀞𑀫𑁂 𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺 𑀘𑀢𑀼𑀓𑀺𑀘𑁆𑀘𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲 𑀆𑀭𑀫𑁆𑀪𑁄, 𑀆𑀭𑀤𑁆𑀥𑀧𑀕𑁆𑀕𑀳𑀺𑀢𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀢𑀸𑀢𑀺 𑀅𑀢𑁆𑀣𑁄.

𑁬𑁨. 𑀤𑀼𑀢𑀺𑀬𑁂 𑀫𑀳𑀺𑀘𑁆𑀙𑀢𑀸𑀢𑀺 𑀫𑀳𑀸𑀮𑁄𑀪𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀢𑀢𑁆𑀣 𑀓𑀢𑀫𑀸 𑀫𑀳𑀺𑀘𑁆𑀙𑀢𑀸? 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺 𑀧𑀜𑁆𑀘𑀳𑀺 𑀯𑀸 𑀓𑀸𑀫𑀕𑀼𑀡𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑀲𑁆𑀲 𑀪𑀺𑀬𑁆𑀬𑁄𑀓𑀫𑁆𑀬𑀢𑀸, 𑀬𑀸 𑀏𑀯𑀭𑀽𑀧𑀸 𑀇𑀘𑁆𑀙𑀸 𑀇𑀘𑁆𑀙𑀸𑀕𑀢𑀸 𑀫𑀳𑀺𑀘𑁆𑀙𑀢𑀸 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀳𑀺𑀘𑁆𑀙𑀢𑀸’’𑀢𑀺 (𑀯𑀺𑀪. 𑁮𑁫𑁦).

𑁬𑁩. 𑀢𑀢𑀺𑀬𑁂 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀅𑀮𑁄𑀪𑁄. 𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀢𑀺 𑀅𑀦𑀺𑀘𑁆𑀙𑀲𑁆𑀲. 𑀏𑀢𑁆𑀣 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄. 𑀦 𑀳𑀺 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀇𑀘𑁆𑀙𑀸𑀬 𑀅𑀢𑁆𑀣𑀺𑀪𑀸𑀯𑁂𑀦 𑀲𑁄 𑀅𑀧𑁆𑀧𑀺𑀘𑁆𑀙𑁄𑀢𑀺 𑀯𑀼𑀢𑁆𑀢𑁄, 𑀇𑀘𑁆𑀙𑀸𑀬 𑀧𑀦 𑀅𑀪𑀸𑀯𑁂𑀦 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀺𑀢𑀲𑁆𑀲 𑀅𑀮𑁄𑀪𑀲𑁆𑀲𑁂𑀯 𑀪𑀸𑀯𑁂𑀦 𑀅𑀧𑁆𑀧𑀺𑀘𑁆𑀙𑁄𑀢𑀺 𑀯𑀼𑀢𑁆𑀢𑁄.

𑀅𑀧𑀺𑀘𑁂𑀢𑁆𑀣 𑀅𑀢𑁆𑀭𑀺𑀘𑁆𑀙𑀢𑀸, 𑀧𑀸𑀧𑀺𑀘𑁆𑀙𑀢𑀸, 𑀫𑀳𑀺𑀘𑁆𑀙𑀢𑀸 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀅𑀬𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀓𑀮𑀸𑀪𑁂 𑀅𑀢𑀺𑀢𑁆𑀢𑀲𑁆𑀲 𑀧𑀭𑀮𑀸𑀪𑁂 𑀧𑀢𑁆𑀣𑀦𑀸 𑀅𑀢𑁆𑀭𑀺𑀘𑁆𑀙𑀢𑀸 𑀦𑀸𑀫, 𑀬𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲 𑀏𑀓𑀪𑀸𑀚𑀦𑁂 𑀧𑀓𑁆𑀓𑀧𑀽𑀯𑁂𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀧𑀢𑀺𑀢𑁂 𑀦 𑀲𑀼𑀧𑀓𑁆𑀓𑁄 𑀯𑀺𑀬 𑀔𑀼𑀤𑁆𑀤𑀓𑁄 𑀘 𑀯𑀺𑀬 𑀔𑀸𑀬𑀢𑀺, 𑀲𑁆𑀯𑁂𑀯 𑀧𑀦 𑀧𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑁄 𑀲𑀼𑀧𑀓𑁆𑀓𑁄 𑀯𑀺𑀬 𑀫𑀳𑀦𑁆𑀢𑁄 𑀯𑀺𑀬 𑀘 𑀔𑀸𑀬𑀢𑀺. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀧𑀸𑀧𑀺𑀘𑁆𑀙𑀢𑀸 𑀦𑀸𑀫, 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑁄𑀳𑀜𑁆𑀜𑁂 𑀧𑀢𑀺𑀝𑁆𑀞𑀸𑀢𑀺. 𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀫𑀳𑀺𑀘𑁆𑀙𑀢𑀸 𑀦𑀸𑀫, 𑀲𑀸𑀧𑀺 ‘‘𑀇𑀥𑁂𑀓𑀘𑁆𑀘𑁄 𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀇𑀘𑁆𑀙𑀢𑀺, 𑀲𑀻𑀮𑀯𑀸 𑀲𑀫𑀸𑀦𑁄 𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸𑀬𑁂𑀯. 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀦𑁆𑀢𑀧𑁆𑀧𑀬𑁄 𑀳𑁄𑀢𑀺, 𑀯𑀺𑀚𑀸𑀢𑀫𑀸𑀢𑀸𑀧𑀺𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀼𑀤𑁆𑀤𑁄 𑀘, 𑀫𑀳𑀺𑀘𑁆𑀙𑁄 𑀘𑀸𑀧𑀺 𑀧𑀼𑀕𑁆𑀕𑀮𑁄;

𑀲𑀓𑀝𑁂𑀦 𑀧𑀘𑁆𑀘𑀬𑁂 𑀤𑁂𑀦𑁆𑀢𑀼, 𑀢𑀬𑁄𑀧𑁂𑀢𑁂 𑀅𑀢𑀧𑁆𑀧𑀬𑀸’’𑀢𑀺.

𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀫𑀢𑁆𑀢𑀜𑁆𑀜𑀼𑀢𑀸 𑀅𑀧𑁆𑀧𑀺𑀘𑁆𑀙𑀢𑀸 𑀦𑀸𑀫, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀲𑀤𑁆𑀥𑁄 𑀲𑀫𑀸𑀦𑁄 ‘‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺. 𑀲𑀻𑀮𑀯𑀸, 𑀧𑀯𑀺𑀯𑀺𑀢𑁆𑀢𑁄, 𑀩𑀳𑀼𑀲𑁆𑀲𑀼𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀯𑀸, 𑀔𑀻𑀡𑀸𑀲𑀯𑁄 𑀲𑀫𑀸𑀦𑁄 ‘‘𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄.

𑀣𑁂𑀭𑁄 𑀓𑀺𑀭 𑀫𑀳𑀸𑀔𑀻𑀡𑀸𑀲𑀯𑁄 𑀅𑀳𑁄𑀲𑀺, 𑀧𑀢𑁆𑀢𑀘𑀻𑀯𑀭𑀁 𑀧𑀦𑀲𑁆𑀲 𑀧𑀸𑀤𑀫𑀢𑁆𑀢𑀫𑁂𑀯 𑀅𑀕𑁆𑀖𑀢𑀺. 𑀲𑁄 𑀅𑀲𑁄𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀯𑀺𑀳𑀸𑀭𑀫𑀳𑀤𑀺𑀯𑀲𑁂 𑀲𑀗𑁆𑀖𑀢𑁆𑀣𑁂𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀅𑀢𑀺𑀮𑀽𑀔𑀪𑀸𑀯𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸, ‘‘𑀪𑀦𑁆𑀢𑁂, 𑀣𑁄𑀓𑀁 𑀩𑀳𑀺 𑀳𑁄𑀣𑀸’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 ‘‘𑀫𑀸𑀤𑀺𑀲𑁂 𑀔𑀻𑀡𑀸𑀲𑀯𑁂 𑀭𑀜𑁆𑀜𑁄 𑀲𑀗𑁆𑀕𑀳𑀁 𑀅𑀓𑀭𑁄𑀦𑁆𑀢𑁂 𑀅𑀜𑁆𑀜𑁄 𑀓𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀉𑀓𑁆𑀔𑀺𑀢𑁆𑀢𑀧𑀺𑀡𑁆𑀟𑀁 𑀕𑀡𑁆𑀳𑀦𑁆𑀢𑁄𑀬𑁂𑀯 𑀉𑀫𑁆𑀫𑀼𑀚𑁆𑀚𑀺. 𑀏𑀯𑀁 𑀔𑀻𑀡𑀸𑀲𑀯𑁄 𑀲𑀫𑀸𑀦𑁄 ‘‘𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺. 𑀏𑀯𑀁 𑀅𑀧𑁆𑀧𑀺𑀘𑁆𑀙𑁄 𑀘 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀣𑀸𑀯𑀭𑀁 𑀓𑀭𑁄𑀢𑀺, 𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺. 𑀬𑀣𑀸 𑀬𑀣𑀸 𑀳𑀺 𑀲𑁄 𑀅𑀢𑁆𑀢𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺, 𑀢𑀣𑀸 𑀢𑀣𑀸 𑀢𑀲𑁆𑀲 𑀯𑀢𑁆𑀢𑁂 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀩𑀳𑀽 𑀤𑁂𑀦𑁆𑀢𑀺.

𑀅𑀧𑀭𑁄𑀧𑀺 𑀘𑀢𑀼𑀩𑁆𑀩𑀺𑀥𑁄 𑀅𑀧𑁆𑀧𑀺𑀘𑁆𑀙𑁄 𑁋 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄, 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄, 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄, 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀲𑁄 𑀤𑀸𑀬𑀓𑀲𑁆𑀲 𑀯𑀲𑀁 𑀚𑀸𑀦𑀸𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑀁 𑀚𑀸𑀦𑀸𑀢𑀺, 𑀅𑀢𑁆𑀢𑀦𑁄 𑀣𑀸𑀫𑀁 𑀚𑀸𑀦𑀸𑀢𑀺. 𑀬𑀤𑀺 𑀳𑀺 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼 𑀳𑁄𑀢𑀺, 𑀤𑀸𑀬𑀓𑁄 𑀅𑀧𑁆𑀧𑀫𑀢𑁆𑀢𑀓𑀁 𑀤𑀸𑀢𑀼𑀓𑀸𑀫𑁄, 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄 𑀅𑀧𑁆𑀧𑁄, 𑀤𑀸𑀬𑀓𑁄 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀅𑀢𑁆𑀢𑀦𑁄 𑀣𑀸𑀫𑀁 𑀜𑀢𑁆𑀯𑀸 𑀧𑀫𑀸𑀡𑁂𑀦𑁂𑀯 𑀕𑀡𑁆𑀳𑀸𑀢𑀺.

𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀦𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀢𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀲𑁄𑀲𑀸𑀦𑀺𑀓𑀫𑀳𑀸𑀓𑀼𑀫𑀸𑀭𑀢𑁆𑀣𑁂𑀭𑁄 𑀓𑀺𑀭 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺 𑀲𑀼𑀲𑀸𑀦𑁂 𑀯𑀲𑀺, 𑀅𑀜𑁆𑀜𑁄 𑀏𑀓𑀪𑀺𑀓𑁆𑀔𑀼𑀧𑀺 𑀦 𑀅𑀜𑁆𑀜𑀸𑀲𑀺. 𑀢𑁂𑀦𑁂𑀯𑀸𑀳 𑁋

‘‘𑀲𑀼𑀲𑀸𑀦𑁂 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺, 𑀅𑀩𑁆𑀩𑁄𑀓𑀺𑀡𑁆𑀡𑀁 𑀯𑀲𑀸𑀫𑀳𑀁;

𑀤𑀼𑀢𑀺𑀬𑁄 𑀫𑀁 𑀦 𑀚𑀸𑀦𑁂𑀬𑁆𑀬, 𑀅𑀳𑁄 𑀲𑁄𑀲𑀸𑀦𑀺𑀓𑀼𑀢𑁆𑀢𑀫𑁄’’𑀢𑀺.

𑀘𑁂𑀢𑀺𑀬𑀧𑀩𑁆𑀩𑀢𑁂 𑀤𑁆𑀯𑁂 𑀪𑀸𑀢𑀺𑀓𑀢𑁆𑀣𑁂𑀭𑀸 𑀯𑀲𑀺𑀁𑀲𑀼. 𑀓𑀦𑀺𑀝𑁆𑀞𑁄 𑀉𑀧𑀝𑁆𑀞𑀸𑀓𑁂𑀦 𑀧𑁂𑀲𑀺𑀢𑀁 𑀉𑀘𑁆𑀙𑀼𑀔𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀚𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺 ‘‘𑀧𑀭𑀺𑀪𑁄𑀕𑀁, 𑀪𑀦𑁆𑀢𑁂, 𑀓𑀭𑁄𑀣𑀸’’𑀢𑀺. 𑀣𑁂𑀭𑀲𑁆𑀲 𑀘 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀼𑀔𑀯𑀺𑀓𑁆𑀔𑀸𑀮𑀦𑀓𑀸𑀮𑁄 𑀅𑀳𑁄𑀲𑀺. 𑀲𑁄 ‘‘𑀅𑀮𑀁, 𑀆𑀯𑀼𑀲𑁄’’𑀢𑀺 𑀆𑀳. 𑀓𑀘𑁆𑀘𑀺, 𑀪𑀦𑁆𑀢𑁂, 𑀏𑀓𑀸𑀲𑀦𑀺𑀓𑀢𑁆𑀣𑀸𑀢𑀺? 𑀆𑀳𑀭𑀸𑀯𑀼𑀲𑁄, 𑀉𑀘𑁆𑀙𑀼𑀔𑀡𑁆𑀟𑀺𑀓𑀦𑁆𑀢𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀏𑀓𑀸𑀲𑀦𑀺𑀓𑁄 𑀲𑀫𑀸𑀦𑁄𑀧𑀺 𑀥𑀼𑀢𑀗𑁆𑀕𑀁 𑀦𑀺𑀕𑀽𑀳𑀫𑀸𑀦𑁄 𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀧𑀼𑀦 𑀥𑀼𑀢𑀗𑁆𑀕𑀁 𑀅𑀥𑀺𑀝𑁆𑀞𑀸𑀬 𑀕𑀢𑁄.

𑀬𑁄 𑀧𑀦 𑀲𑀸𑀓𑁂𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀣𑁂𑀭𑁄 𑀓𑀺𑀭 ‘‘𑀔𑀡𑁄 𑀦𑀢𑁆𑀣𑀻𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀲𑀼 𑀑𑀓𑀸𑀲𑀁 𑀅𑀓𑀭𑁄𑀦𑁆𑀢𑁄 𑀓𑀤𑀸 𑀫𑀭𑀡𑀓𑁆𑀔𑀡𑀁, 𑀪𑀦𑁆𑀢𑁂, 𑀮𑀪𑀺𑀲𑁆𑀲𑀣𑀸’’𑀢𑀺 𑀘𑁄𑀤𑀺𑀢𑁄 𑀕𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀡𑀺𑀓𑀸𑀭𑀯𑀸𑀮𑀺𑀓𑀲𑀫𑀼𑀤𑁆𑀤𑀯𑀺𑀳𑀸𑀭𑀁 𑀕𑀢𑁄. 𑀢𑀢𑁆𑀣 𑀅𑀦𑁆𑀢𑁄𑀯𑀲𑁆𑀲𑀁 𑀣𑁂𑀭𑀦𑀯𑀫𑀚𑁆𑀛𑀺𑀫𑀸𑀦𑀁 𑀉𑀧𑀓𑀸𑀭𑁄 𑀳𑀼𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀉𑀧𑁄𑀲𑀣𑀤𑀺𑀯𑀲𑁂 𑀥𑀫𑁆𑀫𑀓𑀣𑀸𑀬 𑀚𑀦𑀧𑀤𑀁 𑀔𑁄𑀪𑁂𑀢𑁆𑀯𑀸 𑀕𑀢𑁄.

𑀬𑁄 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀳𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑁄 𑀦𑀸𑀫 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 (𑀫. 𑀦𑀺. 𑁧.𑁩𑁨𑁫) 𑀯𑀺𑀬 𑀖𑀝𑀻𑀓𑀸𑀭𑀓𑀼𑀫𑁆𑀪𑀓𑀸𑀭𑁄 (𑀫. 𑀦𑀺. 𑁨.𑁨𑁮𑁨 𑀆𑀤𑀬𑁄) 𑀯𑀺𑀬 𑀘. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀮𑀤𑁆𑀥𑀸𑀲𑁂𑀯𑀦𑁂𑀦 𑀩𑀮𑀯𑀅𑀮𑁄𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑁂𑀓𑁆𑀔𑁄𑀧𑀺 𑀧𑀼𑀣𑀼𑀚𑁆𑀚𑀦𑁄𑀧𑀺 𑀅𑀧𑁆𑀧𑀺𑀘𑁆𑀙𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁬𑁪. 𑀘𑀢𑀼𑀢𑁆𑀣𑁂 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀢𑀺 𑀅𑀲𑀦𑁆𑀢𑀼𑀝𑁆𑀞𑁂 𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲 𑀪𑀚𑀦𑁆𑀢𑀲𑁆𑀲 𑀧𑀬𑀺𑀭𑀼𑀧𑀸𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀅𑀲𑀦𑁆𑀢𑁄𑀲𑀲𑀗𑁆𑀔𑀸𑀢𑁄 𑀮𑁄𑀪𑁄.

𑁬𑁫. 𑀧𑀜𑁆𑀘𑀫𑁂 𑀲𑀦𑁆𑀢𑀼𑀝𑁆𑀞𑀺𑀢𑀸𑀢𑀺 𑀲𑀦𑁆𑀢𑀼𑀝𑁆𑀞𑁂 𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲 𑀪𑀚𑀦𑁆𑀢𑀲𑁆𑀲 𑀧𑀬𑀺𑀭𑀼𑀧𑀸𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀅𑀮𑁄𑀪𑀲𑀗𑁆𑀔𑀸𑀢𑁄 𑀲𑀦𑁆𑀢𑁄𑀲𑁄. 𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀢𑀺 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀲𑁄 𑀧𑀦𑁂𑀲 𑀲𑀦𑁆𑀢𑁄𑀲𑁄 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺 𑀢𑀺𑀯𑀺𑀥𑁄. 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼.

𑀢𑀲𑁆𑀲𑀸𑀬𑀁 𑀧𑀪𑁂𑀤𑀲𑀁𑀯𑀡𑁆𑀡𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸. 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀧𑀓𑀢𑀺𑀤𑀼𑀩𑁆𑀩𑀮𑁄 𑀯𑀸 𑀳𑁄𑀢𑀺 𑀆𑀩𑀸𑀥𑀚𑀭𑀸𑀪𑀺𑀪𑀽𑀢𑁄 𑀯𑀸, 𑀕𑀭𑀼𑀁 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀓𑀺𑀮𑀫𑀢𑀺. 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺. 𑀲𑁄 𑀧𑀝𑁆𑀝𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀧𑀦 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 ‘‘𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁, 𑀇𑀤𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀤𑀁 𑀕𑀺𑀮𑀸𑀦𑀸𑀦𑀁, 𑀇𑀤𑀁 𑀅𑀧𑁆𑀧𑀮𑀸𑀪𑀸𑀦𑀁 𑀳𑁄𑀢𑀽’’𑀢𑀺 𑀤𑀢𑁆𑀯𑀸 𑀢𑁂𑀲𑀁 𑀧𑀼𑀭𑀸𑀡𑀘𑀻𑀯𑀭𑀁 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑁂𑀳𑀺 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀬𑁂𑀦𑀲𑁆𑀲 𑀧𑀭𑀺𑀪𑀼𑀢𑁆𑀢𑁂𑀦 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀩𑀳𑀼𑀁 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀣𑁂𑀭𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀯𑀸 𑀲𑁂𑀲𑀓𑀁 𑀧𑀺𑀡𑁆𑀟𑀸𑀬 𑀯𑀸 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀮𑀪𑀢𑀺 𑀫𑀦𑀸𑀧𑀁 𑀯𑀸 𑀅𑀫𑀦𑀸𑀧𑀁 𑀯𑀸, 𑀲𑁄 𑀢𑁂𑀦 𑀦𑁂𑀯 𑀲𑁄𑀫𑀦𑀲𑁆𑀲𑀁 𑀦 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀦𑁆𑀢𑀫𑀲𑁄 𑀢𑀺𑀡𑀲𑀦𑁆𑀣𑀸𑀭𑀓𑁂𑀦𑀸𑀧𑀺 𑀬𑀣𑀸𑀮𑀤𑁆𑀥𑁂𑀦𑁂𑀯 𑀢𑀼𑀲𑁆𑀲𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀬𑀢𑁆𑀣𑀲𑁆𑀲 𑀯𑀲𑀢𑁄 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑁂 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄.

𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀮𑁂𑀡𑀫𑀡𑁆𑀟𑀧𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀩𑀳𑀽𑀦𑀺 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺 𑀮𑀪𑀢𑀺. 𑀲𑁄 𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀣𑁂𑀭𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀬𑁄𑀧𑀺 ‘‘𑀉𑀢𑁆𑀢𑀫𑀲𑁂𑀦𑀸𑀲𑀦𑀁 𑀦𑀸𑀫 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀦𑀺𑀤𑁆𑀤𑀸𑀪𑀺𑀪𑀽𑀢𑀲𑁆𑀲 𑀧𑀼𑀦 𑀧𑀝𑀺𑀩𑀼𑀚𑁆𑀛𑀢𑁄 𑀧𑀸𑀧𑀯𑀺𑀢𑀓𑁆𑀓𑀸 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑁆𑀧𑀺𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀬𑀁 𑀮𑀪𑀢𑀺, 𑀢𑁂𑀦𑁂𑀯 𑀢𑀼𑀲𑁆𑀲𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀢𑁂𑀮𑁂𑀦 𑀅𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀤𑁂𑀯 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄.

𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀩𑀳𑀼𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀧𑀡𑀻𑀢𑀪𑁂𑀲𑀚𑁆𑀚𑀁 𑀮𑀪𑀢𑀺. 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀣𑁂𑀭𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀪𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀫𑀼𑀢𑁆𑀢𑀳𑀭𑀻𑀢𑀓𑀁 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑀢𑀼𑀫𑀥𑀼𑀭𑀁 𑁋 ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀓’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀲𑀘𑀲𑁆𑀲 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀣 𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢’’𑀦𑁆𑀢𑀺 𑀘𑀢𑀼𑀫𑀥𑀼𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀳𑀭𑀻𑀢𑀓𑁂𑀦 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀇𑀫𑁂𑀲𑀁 𑀧𑀦 𑀧𑀘𑁆𑀘𑁂𑀓𑀧𑀘𑁆𑀘𑀬𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀲𑀦𑁆𑀢𑁄𑀲𑀸𑀦𑀁 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀯 𑀅𑀕𑁆𑀕𑁄.

𑁬𑁬-𑁬𑁭. 𑀙𑀝𑁆𑀞𑀲𑀢𑁆𑀢𑀫𑁂𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑀸𑀯. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁬𑁮. 𑀅𑀝𑁆𑀞𑀫𑁂 𑀅𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀅𑀲𑀫𑁆𑀧𑀚𑀸𑀦𑀪𑀸𑀯𑁄, 𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀲𑀫𑁆𑀧𑀚𑀸𑀦𑀲𑁆𑀲𑀸𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀲𑀫𑁆𑀫𑀼𑀴𑁆𑀳𑀲𑁆𑀲.

𑁬𑁯. 𑀦𑀯𑀫𑁂 𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀲𑀫𑁆𑀧𑀚𑀸𑀦𑀪𑀸𑀯𑁄, 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁. 𑀲𑀫𑁆𑀧𑀚𑀸𑀦𑀲𑁆𑀲𑀸𑀢𑀺 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲.

𑁭𑁦. 𑀤𑀲𑀫𑁂 𑀧𑀸𑀧𑀫𑀺𑀢𑁆𑀢𑀢𑀸𑀢𑀺 𑀬𑀲𑁆𑀲 𑀧𑀸𑀧𑀸 𑀮𑀸𑀫𑀓𑀸 𑀫𑀺𑀢𑁆𑀢𑀸, 𑀲𑁄 𑀧𑀸𑀧𑀫𑀺𑀢𑁆𑀢𑁄. 𑀧𑀸𑀧𑀫𑀺𑀢𑁆𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸, 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀯𑁂𑀢𑀁 𑀦𑀸𑀫𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀢𑁆𑀣 𑀓𑀢𑀫𑀸 𑀧𑀸𑀧𑀫𑀺𑀢𑁆𑀢𑀢𑀸? 𑀬𑁂 𑀢𑁂 𑀧𑀼𑀕𑁆𑀕𑀮𑀸 𑀅𑀲𑁆𑀲𑀤𑁆𑀥𑀸 𑀤𑀼𑀲𑁆𑀲𑀻𑀮𑀸 𑀅𑀧𑁆𑀧𑀲𑁆𑀲𑀼𑀢𑀸 𑀫𑀘𑁆𑀙𑀭𑀺𑀦𑁄 𑀤𑀼𑀧𑁆𑀧𑀜𑁆𑀜𑀸. 𑀬𑀸 𑀢𑁂𑀲𑀁 𑀲𑁂𑀯𑀦𑀸 𑀦𑀺𑀲𑁂𑀯𑀦𑀸 𑀲𑀁𑀲𑁂𑀯𑀦𑀸 𑀪𑀚𑀦𑀸 𑀲𑀫𑁆𑀪𑀚𑀦𑀸 𑀪𑀢𑁆𑀢𑀺 𑀲𑀫𑁆𑀪𑀢𑁆𑀢𑀺 𑀲𑀫𑁆𑀧𑀯𑀗𑁆𑀓𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀸𑀧𑀫𑀺𑀢𑁆𑀢𑀢𑀸’’𑀢𑀺 (𑀯𑀺𑀪. 𑁯𑁦𑁧).

𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸.