𑁮. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁭𑁧. 𑀅𑀝𑁆𑀞𑀫𑀲𑁆𑀲 𑀧𑀞𑀫𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺 𑀓𑀮𑁆𑀬𑀸𑀡𑀸 𑀫𑀺𑀢𑁆𑀢𑀸 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁭𑁨-𑁭𑁩. 𑀤𑀼𑀢𑀺𑀬𑁂 𑀅𑀦𑀼𑀬𑁄𑀕𑁄𑀢𑀺 𑀬𑁄𑀕𑁄 𑀧𑀬𑁄𑀕𑁄. 𑀅𑀦𑀦𑀼𑀬𑁄𑀕𑁄𑀢𑀺 𑀅𑀬𑁄𑀕𑁄 𑀅𑀧𑁆𑀧𑀬𑁄𑀕𑁄. 𑀅𑀦𑀼𑀬𑁄𑀕𑀸𑀢𑀺 𑀅𑀦𑀼𑀬𑁄𑀕𑁂𑀦. 𑀅𑀦𑀦𑀼𑀬𑁄𑀕𑀸𑀢𑀺 𑀅𑀦𑀦𑀼𑀬𑁄𑀕𑁂𑀦. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀥𑀫𑁆𑀫𑀸𑀦𑀁. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁭𑁪. 𑀘𑀢𑀼𑀢𑁆𑀣𑁂 𑀩𑁄𑀚𑁆𑀛𑀗𑁆𑀕𑀸𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲 𑀅𑀗𑁆𑀕𑀪𑀽𑀢𑀸 𑀲𑀢𑁆𑀢 𑀥𑀫𑁆𑀫𑀸. 𑀬𑀸𑀬 𑀯𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀲𑁄 𑀩𑀼𑀚𑁆𑀛𑀢𑀺, 𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀢𑁄 𑀯𑀸 𑀯𑀼𑀝𑁆𑀞𑀸𑀢𑀺, 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸 𑀲𑀘𑁆𑀙𑀺𑀓𑀭𑁄𑀢𑀺. 𑀢𑀲𑁆𑀲𑀸 𑀩𑁄𑀥𑀺𑀬𑀸 𑀅𑀗𑁆𑀕𑀪𑀽𑀢𑀸𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑀸. ‘‘𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑁂𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸? 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 (𑀧𑀝𑀺. 𑀫. 𑁨.𑁧𑁭). 𑀏𑀯𑀁 𑀧𑀦𑁂𑀢𑀁 𑀧𑀤𑀁 𑀯𑀺𑀪𑀢𑁆𑀢𑀫𑁂𑀯.

𑁭𑁫. 𑀧𑀜𑁆𑀘𑀫𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀩𑁄𑀚𑁆𑀛𑀗𑁆𑀕𑀸𑀦𑀁 𑀬𑀸𑀣𑀸𑀯𑀲𑀭𑀲𑀪𑀽𑀫𑀺 𑀦𑀸𑀫 𑀓𑀣𑀺𑀢𑀸. 𑀲𑀸 𑀧𑀦𑁂𑀲𑀸 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑁋 𑀯𑀺𑀧𑀲𑁆𑀲𑀦𑀸, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁, 𑀫𑀕𑁆𑀕𑁄, 𑀨𑀮𑀦𑁆𑀢𑀺. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀩𑁄𑀚𑁆𑀛𑀗𑁆𑀕𑀸 𑀓𑀸𑀫𑀸𑀯𑀘𑀭𑀸 𑀳𑁄𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀫𑁆𑀳𑀺 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀸, 𑀫𑀕𑁆𑀕𑀨𑀮𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑀸. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀩𑁄𑀚𑁆𑀛𑀗𑁆𑀕𑀸 𑀘𑀢𑀼𑀪𑀽𑀫𑀓𑀸 𑀓𑀣𑀺𑀢𑀸.

𑁭𑁬. 𑀙𑀝𑁆𑀞𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀳𑁂𑀢𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀲𑀫𑁆𑀩𑀳𑀼𑀮𑀸 𑀓𑀺𑀭 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸. 𑀢𑁂𑀲𑀁 𑀅𑀦𑁆𑀢𑀭𑁂 𑀩𑀦𑁆𑀥𑀼𑀮𑀫𑀮𑁆𑀮𑀲𑁂𑀦𑀸𑀧𑀢𑀺𑀁 𑀆𑀭𑀩𑁆𑀪 𑀅𑀬𑀁 𑀓𑀣𑀸 𑀉𑀤𑀧𑀸𑀤𑀺, ‘‘𑀆𑀯𑀼𑀲𑁄, 𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀧𑀼𑀩𑁆𑀩𑁂 𑀩𑀳𑀼𑀜𑀸𑀢𑀺𑀓𑀁 𑀅𑀳𑁄𑀲𑀺 𑀩𑀳𑀼𑀧𑀓𑁆𑀔𑀁, 𑀇𑀤𑀸𑀦𑀺 𑀅𑀧𑁆𑀧𑀜𑀸𑀢𑀺𑀓𑀁 𑀅𑀧𑁆𑀧𑀧𑀓𑁆𑀔𑀁 𑀚𑀸𑀢’’𑀦𑁆𑀢𑀺. 𑀅𑀣 𑀪𑀕𑀯𑀸 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 ‘‘𑀫𑀬𑀺 𑀕𑀢𑁂 𑀫𑀳𑀢𑀻 𑀤𑁂𑀲𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀥𑀫𑁆𑀫𑀲𑀪𑀸𑀬𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀆𑀳. 𑀪𑀕𑀯𑀸 𑀅𑀜𑁆𑀜𑀸 𑀕𑀸𑀫𑀦𑀺𑀕𑀫𑀸𑀤𑀺𑀓𑀣𑀸 𑀦𑀢𑁆𑀣𑀺, 𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀧𑀼𑀩𑁆𑀩𑁂 𑀩𑀳𑀼𑀜𑀸𑀢𑀺𑀓𑀁 𑀅𑀳𑁄𑀲𑀺 𑀩𑀳𑀼𑀧𑀓𑁆𑀔𑀁, 𑀇𑀤𑀸𑀦𑀺 𑀅𑀧𑁆𑀧𑀜𑀸𑀢𑀺𑀓𑀁 𑀅𑀧𑁆𑀧𑀧𑀓𑁆𑀔𑀁 𑀚𑀸𑀢𑀦𑁆𑀢𑀺 𑀯𑀤𑀦𑁆𑀢𑀸 𑀦𑀺𑀲𑀺𑀦𑁆𑀦𑀫𑁆𑀳𑀸𑀢𑀺. 𑀲𑀢𑁆𑀣𑀸 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀫𑀢𑁆𑀢𑀺𑀓𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀧𑀭𑀺𑀳𑀸𑀦𑀻𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀆𑀭𑀪𑀺.

𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑀺𑀓𑀸𑀢𑀺 𑀧𑀭𑀺𑀢𑁆𑀢𑀸 𑀧𑀭𑀺𑀢𑁆𑀢𑀧𑁆𑀧𑀫𑀸𑀡𑀸. 𑀏𑀢𑀸𑀬 𑀳𑀺 𑀧𑀭𑀺𑀳𑀸𑀦𑀺𑀬𑀸 𑀲𑀕𑁆𑀕𑀢𑁄 𑀯𑀸 𑀫𑀕𑁆𑀕𑀢𑁄 𑀯𑀸 𑀧𑀭𑀺𑀳𑀸𑀦𑀺 𑀦𑀸𑀫 𑀦𑀢𑁆𑀣𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑀧𑀭𑀺𑀳𑀸𑀦𑀺𑀫𑀢𑁆𑀢𑀫𑁂𑀯 𑀏𑀢𑀦𑁆𑀢𑀺 𑀆𑀳. 𑀏𑀢𑀁 𑀧𑀢𑀺𑀓𑀺𑀝𑁆𑀞𑀦𑁆𑀢𑀺 𑀏𑀢𑀁 𑀧𑀘𑁆𑀙𑀺𑀫𑀁 𑀏𑀢𑀁 𑀮𑀸𑀫𑀓𑀁. 𑀬𑀤𑀺𑀤𑀁 𑀧𑀜𑁆𑀜𑀸𑀧𑀭𑀺𑀳𑀸𑀦𑀻𑀢𑀺 𑀬𑀸 𑀏𑀲𑀸 𑀫𑀫 𑀲𑀸𑀲𑀦𑁂 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀬 𑀛𑀸𑀦𑀧𑀜𑁆𑀜𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀨𑀮𑀧𑀜𑁆𑀜𑀸𑀬 𑀘 𑀧𑀭𑀺𑀳𑀸𑀦𑀺, 𑀏𑀲𑀸 𑀧𑀘𑁆𑀙𑀺𑀫𑀸, 𑀏𑀲𑀸 𑀮𑀸𑀫𑀓𑀸, 𑀏𑀲𑀸 𑀙𑀟𑁆𑀟𑀦𑀻𑀬𑀸𑀢𑀺 𑀅𑀢𑁆𑀣𑁄.

𑁭𑁭. 𑀲𑀢𑁆𑀢𑀫𑀫𑁆𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀫𑁂𑀯 𑀓𑀣𑀺𑀢𑀁. 𑀥𑀫𑁆𑀫𑀲𑀪𑀸𑀬𑀁 𑀓𑀺𑀭 𑀦𑀺𑀲𑀺𑀦𑁆𑀦𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀘𑁆𑀘𑁂 𑀏𑀯𑀁 𑀆𑀳𑀁𑀲𑀼 𑁋 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀧𑀼𑀩𑁆𑀩𑁂 𑀅𑀧𑁆𑀧𑀜𑀸𑀢𑀺𑀓𑀁 𑀅𑀧𑁆𑀧𑀧𑀓𑁆𑀔𑀁 𑀅𑀳𑁄𑀲𑀺, 𑀇𑀤𑀸𑀦𑀺 𑀢𑀁 𑀩𑀳𑀼𑀜𑀸𑀢𑀺𑀓𑀁 𑀩𑀳𑀼𑀧𑀓𑁆𑀔𑀁 𑀚𑀸𑀢’’𑀦𑁆𑀢𑀺. 𑀓𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳𑀁𑀲𑀽𑀢𑀺? 𑀯𑀺𑀲𑀸𑀔𑀁 𑀉𑀧𑀸𑀲𑀺𑀓𑀁 𑀯𑁂𑀲𑀸𑀮𑀺𑀓𑁂 𑀘 𑀮𑀺𑀘𑁆𑀙𑀯𑀻. 𑀲𑀢𑁆𑀣𑀸 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀬𑀣𑀸𑀪𑀽𑀢𑀁 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀫𑀁 𑀲𑀼𑀢𑁆𑀢𑀁 𑀆𑀭𑀪𑀺. 𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑀺𑀓𑀸𑀢𑀺 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀲𑀕𑁆𑀕𑀁 𑀯𑀸 𑀫𑀕𑁆𑀕𑀁 𑀯𑀸 𑀲𑀫𑁆𑀧𑀢𑁆𑀢𑀸𑀦𑀁 𑀅𑀪𑀸𑀯𑀢𑁄 𑀧𑀭𑀺𑀢𑁆𑀢𑀸. 𑀬𑀤𑀺𑀤𑀁 𑀧𑀜𑁆𑀜𑀸𑀯𑀼𑀤𑁆𑀥𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀤𑀻𑀦𑀁 𑀯𑀼𑀤𑁆𑀥𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀜𑀸𑀢𑀻𑀦𑀁 𑀯𑀼𑀤𑁆𑀥𑀺 𑀦𑀸𑀫 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑀢𑁆𑀢𑀸 𑀅𑀧𑁆𑀧𑀸 𑀧𑀭𑀺𑀢𑁆𑀢𑀸, 𑀲𑀸 𑀲𑀕𑁆𑀕𑀁 𑀯𑀸 𑀫𑀕𑁆𑀕𑀁 𑀯𑀸 𑀧𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀸, 𑀢𑀲𑁆𑀫𑀸. 𑀧𑀜𑁆𑀜𑀸𑀯𑀼𑀤𑁆𑀥𑀺𑀬𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀧𑀜𑁆𑀜𑀸𑀬 𑀯𑀼𑀤𑁆𑀥𑀺𑀬𑀸.

𑁭𑁮. 𑀅𑀝𑁆𑀞𑀫𑀫𑁆𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀫𑁂𑀯 𑀓𑀣𑀺𑀢𑀁. 𑀲𑀫𑁆𑀩𑀳𑀼𑀮𑀸 𑀓𑀺𑀭 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀫𑀳𑀸𑀥𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀧𑀼𑀩𑁆𑀩𑁂 𑀫𑀳𑀸𑀪𑁄𑀕𑀁 𑀫𑀳𑀸𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀅𑀳𑁄𑀲𑀺, 𑀢𑀁 𑀇𑀤𑀸𑀦𑀺 𑀅𑀧𑁆𑀧𑀪𑁄𑀕𑀁 𑀚𑀸𑀢’’𑀦𑁆𑀢𑀺 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀆𑀭𑀪𑀺.

𑁭𑁯. 𑀦𑀯𑀫𑀫𑁆𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀫𑁂𑀯 𑀯𑀼𑀢𑁆𑀢𑀁. 𑀥𑀫𑁆𑀫𑀲𑀪𑀸𑀬𑀁 𑀓𑀺𑀭 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 𑀓𑀸𑀓𑀯𑀮𑀺𑀬𑀲𑁂𑀝𑁆𑀞𑀺𑀜𑁆𑀘 𑀧𑀼𑀡𑁆𑀡𑀲𑁂𑀝𑁆𑀞𑀺𑀜𑁆𑀘 𑀆𑀭𑀩𑁆𑀪 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀧𑀼𑀩𑁆𑀩𑁂 𑀅𑀧𑁆𑀧𑀪𑁄𑀕𑀁 𑀅𑀳𑁄𑀲𑀺, 𑀢𑀁 𑀇𑀤𑀸𑀦𑀺 𑀫𑀳𑀸𑀪𑁄𑀕𑀁 𑀚𑀸𑀢’’𑀦𑁆𑀢𑀺 𑀓𑀣𑀬𑀺𑀁𑀲𑀼. 𑀲𑀢𑁆𑀣𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀆𑀭𑀪𑀺. 𑀲𑁂𑀲𑀁 𑀇𑀫𑁂𑀲𑀼 𑀤𑁆𑀯𑀻𑀲𑀼𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁮𑁦. 𑀤𑀲𑀫𑀫𑁆𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀥𑀫𑁆𑀫𑀲𑀪𑀸𑀬𑀁 𑀓𑀺𑀭 𑀪𑀺𑀓𑁆𑀔𑀽 𑀓𑁄𑀲𑀮𑀫𑀳𑀸𑀭𑀸𑀚𑀸𑀦𑀁 𑀆𑀭𑀩𑁆𑀪 ‘‘𑀅𑀲𑀼𑀓𑀁 𑀦𑀸𑀫 𑀓𑀼𑀮𑀁 𑀧𑀼𑀩𑁆𑀩𑁂 𑀫𑀳𑀸𑀬𑀲𑀁 𑀫𑀳𑀸𑀧𑀭𑀺𑀯𑀸𑀭𑀁 𑀅𑀳𑁄𑀲𑀺, 𑀇𑀤𑀸𑀦𑀺 𑀅𑀧𑁆𑀧𑀬𑀲𑀁 𑀅𑀧𑁆𑀧𑀧𑀭𑀺𑀯𑀸𑀭𑀁 𑀚𑀸𑀢’’𑀦𑁆𑀢𑀺 𑀓𑀣𑀬𑀺𑀁𑀲𑀼. 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸.