𑁬. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸

𑁫𑁧. 𑀙𑀝𑁆𑀞𑀲𑁆𑀲 𑀧𑀞𑀫𑁂 𑀢𑀁 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀲𑀼𑀢𑀯𑀺𑀭𑀳𑀺𑀢𑁄 𑀧𑀼𑀣𑀼𑀚𑁆𑀚𑀦𑁄. 𑀢𑀢𑁆𑀣 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀺. 𑀬𑁄 𑀳𑀺 𑀇𑀤𑀁 𑀲𑀼𑀢𑁆𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀣𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀇𑀤𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀦𑀸𑀫 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀫𑁆𑀧𑀺 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁂𑀳𑀺 𑀮𑁄𑀪𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 𑀦𑁂𑀯 𑀆𑀕𑀫𑀯𑀲𑁂𑀦 𑀦 𑀅𑀥𑀺𑀕𑀫𑀯𑀲𑁂𑀦 𑀚𑀸𑀦𑀸𑀢𑀺, 𑀬𑀲𑁆𑀲 𑀘 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀺𑀦𑀺𑀘𑁆𑀙𑀬𑀯𑀺𑀭𑀳𑀺𑀢𑀢𑁆𑀢𑀸 𑀬𑀣𑀸𑀪𑀽𑀢𑀜𑀸𑀡𑀧𑀝𑀺𑀯𑁂𑀥𑀲𑀸𑀥𑀓𑁄 𑀦𑁂𑀯 𑀆𑀕𑀫𑁄, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀦 𑀅𑀥𑀺𑀕𑀫𑁄 𑀅𑀢𑁆𑀣𑀺. 𑀲𑁄 𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀺. 𑀲𑁆𑀯𑀸𑀬𑀁 𑁋

‘‘𑀧𑀼𑀣𑀽𑀦𑀁 𑀚𑀦𑀦𑀸𑀤𑀻𑀳𑀺, 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄;

𑀧𑀼𑀣𑀼𑀚𑁆𑀚𑀦𑀦𑁆𑀢𑁄𑀕𑀥𑀢𑁆𑀢𑀸, 𑀧𑀼𑀣𑀼𑀯𑀸𑀬𑀁 𑀚𑀦𑁄 𑀇𑀢𑀺’’.

𑀲𑁄 𑀳𑀺 𑀧𑀼𑀣𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀬𑀣𑀸𑀳 𑁋

‘‘𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑁆𑀧𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀧𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸’’𑀢𑀺 (𑀫𑀳𑀸𑀦𑀺. 𑁫𑁧, 𑁯𑁪).

𑀧𑀼𑀣𑀽𑀦𑀁 𑀯𑀸 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀅𑀭𑀺𑀬𑀥𑀫𑁆𑀫𑀧𑀭𑀫𑁆𑀫𑀼𑀔𑀸𑀦𑀁 𑀦𑀻𑀘𑀥𑀫𑁆𑀫𑀲𑀫𑀸𑀘𑀸𑀭𑀸𑀦𑀁 𑀚𑀦𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸𑀧𑀺 𑀧𑀼𑀣𑀼𑀚𑁆𑀚𑀦𑁄, 𑀧𑀼𑀣𑀼 𑀯𑀸 𑀅𑀬𑀁 𑀯𑀺𑀲𑀼𑀁𑀬𑁂𑀯 𑀲𑀗𑁆𑀔𑀁 𑀕𑀢𑁄, 𑀯𑀺𑀲𑀁𑀲𑀝𑁆𑀞𑁄 𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺 𑀚𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑁄. 𑀏𑀯𑀫𑁂𑀢𑁂𑀳𑀺 ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀬𑁂 𑀢𑁂 𑁋

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺. 𑁋

𑀤𑁆𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 ‘‘𑀇𑀤𑀜𑁆𑀘 𑀪𑀯𑀗𑁆𑀕𑀘𑀺𑀢𑁆𑀢𑀁 𑀏𑀯𑀁 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀸𑀫𑀸’’𑀢𑀺 𑀬𑀣𑀸𑀲𑀪𑀸𑀯𑀢𑁄 𑀦 𑀚𑀸𑀦𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸. 𑀘𑀺𑀢𑁆𑀢𑀪𑀸𑀯𑀦𑀸 𑀦𑀢𑁆𑀣𑀻𑀢𑀺 𑀘𑀺𑀢𑁆𑀢𑀝𑁆𑀞𑀺𑀢𑀺 𑀘𑀺𑀢𑁆𑀢𑀧𑀭𑀺𑀕𑁆𑀕𑀳𑁄 𑀦𑀢𑁆𑀣𑀺, 𑀦𑀢𑁆𑀣𑀺𑀪𑀸𑀯𑁂𑀦𑁂𑀯 ‘‘𑀦𑀢𑁆𑀣𑀻’’𑀢𑀺 𑀯𑀤𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑁫𑁨. 𑀤𑀼𑀢𑀺𑀬𑁂 𑀲𑀼𑀢𑀯𑀸𑀢𑀺 𑀲𑀼𑀢𑀲𑀫𑁆𑀧𑀦𑁆𑀦𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣 𑀅𑀲𑁆𑀲𑀼𑀢𑀯𑀸𑀢𑀺 𑀧𑀤𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀅𑀢𑁆𑀣𑀺 𑀅𑀭𑀺𑀬𑁄 𑀦 𑀲𑀸𑀯𑀓𑁄, 𑀲𑁂𑀬𑁆𑀬𑀣𑀸𑀧𑀺 𑀩𑀼𑀤𑁆𑀥𑀸 𑀘𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘; 𑀅𑀢𑁆𑀣𑀺 𑀲𑀸𑀯𑀓𑁄 𑀦 𑀅𑀭𑀺𑀬𑁄, 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀅𑀦𑀸𑀕𑀢𑀨𑀮𑁄; 𑀅𑀢𑁆𑀣𑀺 𑀦𑁂𑀯 𑀅𑀭𑀺𑀬𑁄 𑀦 𑀲𑀸𑀯𑀓𑁄 𑀲𑁂𑀬𑁆𑀬𑀣𑀸𑀧𑀺 𑀧𑀼𑀣𑀼𑀢𑀺𑀢𑁆𑀣𑀺𑀬𑀸. 𑀅𑀢𑁆𑀣𑀺 𑀅𑀭𑀺𑀬𑁄𑀘𑁂𑀯 𑀲𑀸𑀯𑀓𑁄 𑀘, 𑀲𑁂𑀬𑁆𑀬𑀣𑀸𑀧𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀆𑀕𑀢𑀨𑀮𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸. 𑀇𑀥 𑀧𑀦 𑀕𑀺𑀳𑀻 𑀯𑀸 𑀳𑁄𑀢𑀼 𑀧𑀩𑁆𑀩𑀚𑀺𑀢𑁄 𑀯𑀸, 𑀬𑁄 𑀓𑁄𑀘𑀺 𑀲𑀼𑀢𑀯𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀲𑀼𑀢𑀲𑀫𑁆𑀧𑀦𑁆𑀦𑁄, 𑀅𑀬𑀁 𑀅𑀭𑀺𑀬𑀲𑀸𑀯𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 ‘‘𑀏𑀯𑀫𑀺𑀤𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀸𑀢𑀺. 𑀘𑀺𑀢𑁆𑀢𑀪𑀸𑀯𑀦𑀸 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑀝𑁆𑀞𑀺𑀢𑀺 𑀘𑀺𑀢𑁆𑀢𑀧𑀭𑀺𑀕𑁆𑀕𑀳𑁄 𑀅𑀢𑁆𑀣𑀺, 𑀅𑀢𑁆𑀣𑀺𑀪𑀸𑀯𑁂𑀦𑁂𑀯 ‘‘𑀅𑀢𑁆𑀣𑀻’’𑀢𑀺 𑀯𑀤𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀩𑀮𑀯𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀓𑁂𑀘𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀢𑀺 𑀯𑀤𑀦𑁆𑀢𑀺.

𑁫𑁩. 𑀢𑀢𑀺𑀬𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀓𑀣𑀺𑀢𑀁. 𑀓𑀢𑀭𑀸𑀬𑀁 𑀧𑀦 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁? 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀦𑁆𑀢𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁. 𑀪𑀕𑀯𑀸 𑀓𑀺𑀭 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀝𑀺𑀯𑀲𑀦𑁆𑀢𑀸𑀦𑀁 𑀧𑀜𑁆𑀘𑀯𑀺𑀥𑀁 𑀓𑀺𑀘𑁆𑀘𑀁 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀧𑀜𑁆𑀘 𑀳𑀺 𑀩𑀼𑀤𑁆𑀥𑀓𑀺𑀘𑁆𑀘𑀸𑀦𑀺 𑁋 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁, 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀁, 𑀧𑀼𑀭𑀺𑀫𑀬𑀸𑀫𑀓𑀺𑀘𑁆𑀘𑀁, 𑀫𑀚𑁆𑀛𑀺𑀫𑀬𑀸𑀫𑀓𑀺𑀘𑁆𑀘𑀁, 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀦𑁆𑀢𑀺.

𑀢𑀢𑁆𑀭𑀺𑀤𑀁 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑁋 𑀪𑀕𑀯𑀸 𑀳𑀺 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀉𑀧𑀝𑁆𑀞𑀸𑀓𑀸𑀦𑀼𑀕𑁆𑀕𑀳𑀢𑁆𑀣𑀁 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀜𑁆𑀘 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀢𑀸𑀯 𑀯𑀺𑀯𑀺𑀢𑁆𑀢𑀸𑀲𑀦𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀓𑀤𑀸𑀘𑀺 𑀏𑀓𑀓𑁄𑀯, 𑀓𑀤𑀸𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀓𑀤𑀸𑀘𑀺 𑀧𑀓𑀢𑀺𑀬𑀸, 𑀓𑀤𑀸𑀘𑀺 𑀅𑀦𑁂𑀓𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀢𑁆𑀢𑀫𑀸𑀦𑁂𑀳𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑁄 𑀮𑁄𑀓𑀦𑀸𑀣𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀼𑀤𑀼𑀕𑀢𑀯𑀸𑀢𑀸 𑀧𑀣𑀯𑀺𑀁 𑀲𑁄𑀥𑁂𑀦𑁆𑀢𑀺, 𑀯𑀮𑀸𑀳𑀓𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀫𑀼𑀜𑁆𑀘𑀦𑁆𑀢𑀸 𑀫𑀕𑁆𑀕𑁂 𑀭𑁂𑀡𑀼𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀅𑀧𑀭𑁂 𑀯𑀸𑀢𑀸 𑀧𑀼𑀧𑁆𑀨𑀸𑀦𑀺 𑀉𑀧𑀲𑀁𑀳𑀭𑀺𑀢𑁆𑀯𑀸 𑀫𑀕𑁆𑀕𑁂 𑀑𑀓𑀺𑀭𑀦𑁆𑀢𑀺, 𑀉𑀦𑁆𑀦𑀢𑀸 𑀪𑀽𑀫𑀺𑀧𑁆𑀧𑀤𑁂𑀲𑀸 𑀑𑀦𑀫𑀦𑁆𑀢𑀺, 𑀑𑀦𑀢𑀸 𑀉𑀦𑁆𑀦𑀫𑀦𑁆𑀢𑀺, 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀲𑀫𑀸𑀯 𑀪𑀽𑀫𑀺 𑀳𑁄𑀢𑀺, 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀯𑀸 𑀧𑀸𑀤𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀇𑀦𑁆𑀤𑀔𑀻𑀮𑀲𑁆𑀲 𑀅𑀦𑁆𑀢𑁄 𑀞𑀧𑀺𑀢𑀫𑀢𑁆𑀢𑁂 𑀤𑀓𑁆𑀔𑀺𑀡𑀧𑀸𑀤𑁂 𑀲𑀭𑀻𑀭𑀢𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀦𑀺 𑀯𑀺𑀬 𑀘𑀺𑀢𑁆𑀭𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀯𑀺𑀬 𑀘 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀅𑀮𑀗𑁆𑀓𑀭𑁄𑀦𑁆𑀢𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀦𑁆𑀢𑀺, 𑀳𑀢𑁆𑀣𑀺𑀅𑀲𑁆𑀲𑀯𑀺𑀳𑀗𑁆𑀕𑀸𑀤𑀬𑁄 𑀲𑀓𑀲𑀓𑀝𑁆𑀞𑀸𑀦𑁂𑀲𑀼 𑀞𑀺𑀢𑀸𑀬𑁂𑀯 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀢𑀣𑀸 𑀪𑁂𑀭𑀺𑀯𑀻𑀡𑀸𑀤𑀻𑀦𑀺 𑀢𑀽𑀭𑀺𑀬𑀸𑀦𑀺 𑀫𑀦𑀼𑀲𑁆𑀲𑀸𑀦𑀜𑁆𑀘 𑀓𑀸𑀬𑀽𑀧𑀕𑀸𑀦𑀺 𑀆𑀪𑀭𑀡𑀸𑀦𑀺. 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀫𑀦𑀼𑀲𑁆𑀲𑀸 𑀚𑀸𑀦𑀦𑁆𑀢𑀺 ‘‘𑀅𑀚𑁆𑀚 𑀪𑀕𑀯𑀸 𑀇𑀥 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺. 𑀢𑁂 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀲𑀓𑁆𑀓𑀘𑁆𑀘𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀤𑀲 𑀪𑀺𑀓𑁆𑀔𑀽, 𑀅𑀫𑁆𑀳𑀸𑀓𑀁 𑀯𑀻𑀲𑀢𑀺, 𑀧𑀜𑁆𑀜𑀸𑀲𑀁…𑀧𑁂… 𑀲𑀢𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀪𑀕𑀯𑀢𑁄𑀧𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀫𑀸𑀦𑁂𑀦𑁆𑀢𑀺. 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀣𑀸 𑀓𑁂𑀘𑀺 𑀲𑀭𑀡𑀕𑀫𑀦𑁂𑀲𑀼 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁, 𑀓𑁂𑀘𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂𑀢𑀺. 𑀏𑀯𑀁 𑀫𑀳𑀸𑀚𑀦𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀢𑀺 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄. 𑀢𑀢𑁄 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀝𑁆𑀞𑀸𑀓𑁄 𑀪𑀕𑀯𑀢𑁄 𑀦𑀺𑀯𑁂𑀤𑁂𑀢𑀺. 𑀅𑀣 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺. 𑀇𑀤𑀁 𑀢𑀸𑀯 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁.

𑀅𑀣 𑀪𑀕𑀯𑀸 𑀏𑀯𑀁 𑀓𑀢𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑁄 𑀕𑀦𑁆𑀥𑀓𑀼𑀝𑀺𑀬𑀸 𑀉𑀧𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀧𑀸𑀤𑀧𑀻𑀞𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀢𑀺 𑁋 ‘‘𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣, 𑀤𑀼𑀮𑁆𑀮𑀪𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀮𑁄𑀓𑀲𑁆𑀫𑀺𑀁, 𑀤𑀼𑀮𑁆𑀮𑀪𑁄 𑀫𑀦𑀼𑀲𑁆𑀲𑀢𑁆𑀢𑀧𑀝𑀺𑀮𑀸𑀪𑁄, 𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀺, 𑀤𑀼𑀮𑁆𑀮𑀪𑀸 𑀧𑀩𑁆𑀩𑀚𑁆𑀚𑀸, 𑀤𑀼𑀮𑁆𑀮𑀪𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦’’𑀦𑁆𑀢𑀺. 𑀢𑀢𑁆𑀣 𑀓𑁂𑀘𑀺 𑀪𑀕𑀯𑀦𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀘𑀭𑀺𑀬𑀸𑀦𑀼𑀭𑀽𑀧𑀁 𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺. 𑀢𑀢𑁄 𑀲𑀩𑁆𑀩𑁂𑀧𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀺. 𑀓𑁂𑀘𑀺 𑀅𑀭𑀜𑁆𑀜𑀁, 𑀓𑁂𑀘𑀺 𑀭𑀼𑀓𑁆𑀔𑀫𑀽𑀮𑀁, 𑀓𑁂𑀘𑀺 𑀧𑀩𑁆𑀩𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀓𑁂𑀘𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀁…𑀧𑁂… 𑀓𑁂𑀘𑀺 𑀯𑀲𑀯𑀢𑁆𑀢𑀺𑀪𑀯𑀦𑀦𑁆𑀢𑀺. 𑀢𑀢𑁄 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀆𑀓𑀗𑁆𑀔𑀢𑀺, 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀼𑀳𑀼𑀢𑁆𑀢𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀅𑀣 𑀲𑀫𑀲𑁆𑀲𑀸𑀲𑀺𑀢𑀓𑀸𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀪𑀸𑀕𑁂 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺. 𑀢𑀢𑀺𑀬𑀪𑀸𑀕𑁂 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀢𑀢𑁆𑀣 𑀫𑀳𑀸𑀚𑀦𑁄 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀢𑀺. 𑀢𑀢𑁄 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀚𑁆𑀚 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀸𑀮𑀬𑀼𑀢𑁆𑀢𑀁 𑀲𑀫𑀬𑀬𑀼𑀢𑁆𑀢𑀁, 𑀅𑀣 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑀺, 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀇𑀤𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀁.

𑀲𑁄 𑀏𑀯𑀁 𑀦𑀺𑀝𑁆𑀞𑀺𑀢𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑁄 𑀲𑀘𑁂 𑀕𑀢𑁆𑀢𑀸𑀦𑀺 𑀑𑀲𑀺𑀜𑁆𑀘𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀩𑀼𑀤𑁆𑀥𑀸𑀲𑀦𑀸 𑀉𑀝𑁆𑀞𑀸𑀬 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀧𑀯𑀺𑀲𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑁂𑀦 𑀧𑀝𑀺𑀬𑀸𑀤𑀺𑀢𑀉𑀤𑀓𑁂𑀦 𑀕𑀢𑁆𑀢𑀸𑀦𑀺 𑀉𑀢𑀼𑀁 𑀕𑀡𑁆𑀳𑀸𑀧𑁂𑀢𑀺. 𑀉𑀧𑀝𑁆𑀞𑀸𑀓𑁄𑀧𑀺 𑀩𑀼𑀤𑁆𑀥𑀸𑀲𑀦𑀁 𑀆𑀦𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀧𑁂𑀢𑀺. 𑀪𑀕𑀯𑀸 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺 𑀏𑀓𑀓𑁄𑀯 𑀫𑀼𑀳𑀼𑀢𑁆𑀢𑀁 𑀧𑀝𑀺𑀲𑀮𑁆𑀮𑀻𑀦𑁄, 𑀅𑀣 𑀪𑀺𑀓𑁆𑀔𑀽 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀏𑀓𑀘𑁆𑀘𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀓𑀫𑁆𑀫𑀝𑁆𑀞𑀸𑀦𑀁, 𑀏𑀓𑀘𑁆𑀘𑁂 𑀥𑀫𑁆𑀫𑀲𑁆𑀲𑀯𑀦𑀁 𑀬𑀸𑀘𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀧𑀼𑀭𑀺𑀫𑀬𑀸𑀫𑀁 𑀯𑀺𑀢𑀺𑀦𑀸𑀫𑁂𑀢𑀺. 𑀇𑀤𑀁 𑀧𑀼𑀭𑀺𑀫𑀬𑀸𑀫𑀓𑀺𑀘𑁆𑀘𑀁.

𑀧𑀼𑀭𑀺𑀫𑀬𑀸𑀫𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀦 𑀪𑀺𑀓𑁆𑀔𑀽𑀲𑀼 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁂𑀲𑀼 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀤𑁂𑀯𑀢𑀸𑀬𑁄 𑀑𑀓𑀸𑀲𑀁 𑀮𑀪𑀫𑀸𑀦𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺 𑀬𑀣𑀸𑀪𑀺𑀲𑀗𑁆𑀔𑀢𑀁 𑀅𑀦𑁆𑀢𑀫𑀲𑁄 𑀘𑀢𑀼𑀭𑀓𑁆𑀔𑀭𑀫𑁆𑀧𑀺. 𑀪𑀕𑀯𑀸 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀇𑀤𑀁 𑀫𑀚𑁆𑀛𑀺𑀫𑀬𑀸𑀫𑀓𑀺𑀘𑁆𑀘𑀁.

𑀧𑀘𑁆𑀙𑀺𑀫𑀬𑀸𑀫𑀁 𑀧𑀦 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀲𑀚𑁆𑀚𑀸𑀧𑀻𑀴𑀺𑀢𑀲𑁆𑀲 𑀲𑀭𑀻𑀭𑀲𑁆𑀲 𑀓𑀺𑀮𑀸𑀲𑀼𑀪𑀸𑀯𑀫𑁄𑀘𑀦𑀢𑁆𑀣𑀁 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀘𑀗𑁆𑀓𑀫𑁂𑀦 𑀯𑀻𑀢𑀺𑀦𑀸𑀫𑁂𑀢𑀺, 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀧𑀘𑁆𑀘𑀼𑀝𑁆𑀞𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀤𑀸𑀦𑀲𑀻𑀮𑀸𑀤𑀺𑀯𑀲𑁂𑀦 𑀓𑀢𑀸𑀥𑀺𑀓𑀸𑀭𑀧𑀼𑀕𑁆𑀕𑀮𑀤𑀲𑁆𑀲𑀦𑀢𑁆𑀣𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺. 𑀇𑀤𑀁 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀁.

𑀢𑀫𑁆𑀧𑀺 𑀤𑀺𑀯𑀲𑀁 𑀪𑀕𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀓𑀺𑀘𑁆𑀘𑁂 𑀞𑀺𑀢𑁄 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀤𑀁 𑀅𑀤𑁆𑀤𑀲 𑁋 𑀫𑀬𑀸 𑀓𑁄𑀲𑀮𑀭𑀝𑁆𑀞𑁂 𑀘𑀸𑀭𑀺𑀓𑀁 𑀘𑀭𑀦𑁆𑀢𑁂𑀦 𑀅𑀕𑁆𑀕𑀺𑀓𑁆𑀔𑀦𑁆𑀥𑁂𑀦 𑀉𑀧𑀫𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑁂𑀲𑀺𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺, 𑀲𑀝𑁆𑀞𑀺𑀫𑀢𑁆𑀢𑀸 𑀕𑀺𑀳𑀺𑀪𑀸𑀯𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀬𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀢𑁂 𑀬𑀁𑀓𑀺𑀜𑁆𑀘𑀺 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑁂𑀯. 𑀇𑀢𑀭𑁂𑀲𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀲𑀗𑁆𑀕𑀳𑀢𑁆𑀣𑀸𑀬 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸, ‘‘𑀆𑀦𑀦𑁆𑀤, 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀳𑀻’’𑀢𑀺 𑀆𑀳.

𑀣𑁂𑀭𑁄 𑀅𑀦𑀼𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸, ‘‘𑀆𑀯𑀼𑀲𑁄, 𑀲𑀢𑁆𑀣𑀸 𑀫𑀳𑀸𑀚𑀦𑀲𑁆𑀲 𑀲𑀗𑁆𑀕𑀳𑀢𑁆𑀣𑀸𑀬 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄, 𑀕𑀦𑁆𑀢𑀼𑀓𑀸𑀫𑀸 𑀆𑀕𑀘𑁆𑀙𑀣𑀸’’𑀢𑀺 𑀆𑀳. 𑀪𑀺𑀓𑁆𑀔𑀽 𑀫𑀳𑀸𑀮𑀸𑀪𑀁 𑀮𑀪𑀺𑀢𑁆𑀯𑀸 𑀯𑀺𑀬 𑀢𑀼𑀝𑁆𑀞𑀫𑀸𑀦𑀲𑀸 ‘‘𑀮𑀪𑀺𑀲𑁆𑀲𑀸𑀫 𑀯𑀢 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀑𑀮𑁄𑀓𑁂𑀢𑀼𑀁 𑀫𑀥𑀼𑀭𑀜𑁆𑀘 𑀥𑀫𑁆𑀫𑀓𑀣𑀁 𑀲𑁄𑀢𑀼’’𑀦𑁆𑀢𑀺 𑀧𑀭𑀼𑀴𑁆𑀳𑀓𑁂𑀲𑀸 𑀓𑁂𑀲𑁂 𑀑𑀳𑀸𑀭𑁂𑀢𑁆𑀯𑀸 𑀫𑀮𑀕𑁆𑀕𑀳𑀺𑀢𑀧𑀢𑁆𑀢𑀸 𑀧𑀢𑁆𑀢𑁂 𑀧𑀘𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑀘𑀻𑀯𑀭𑀸 𑀘𑀻𑀯𑀭𑀸𑀦𑀺 𑀥𑁄𑀯𑀺𑀢𑁆𑀯𑀸 𑀕𑀫𑀦𑀲𑀚𑁆𑀚𑀸 𑀅𑀳𑁂𑀲𑀼𑀁. 𑀲𑀢𑁆𑀣𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄 𑀓𑁄𑀲𑀮𑀭𑀝𑁆𑀞𑀁 𑀘𑀸𑀭𑀺𑀓𑀸𑀬 𑀦𑀺𑀓𑁆𑀔𑀦𑁆𑀢𑁄 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀏𑀓𑀤𑀺𑀯𑀲𑀁 𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀢𑀺𑀕𑀸𑀯𑀼𑀢𑀬𑁄𑀚𑀦𑀧𑀭𑀫𑀁 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑀦𑁆𑀢𑀁 𑀲𑀼𑀲𑀺𑀭𑀭𑀼𑀓𑁆𑀔𑀁 𑀅𑀕𑁆𑀕𑀺𑀦𑀸 𑀲𑀫𑁆𑀧𑀚𑁆𑀚𑀮𑀺𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀫𑁂𑀯 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀲𑀢𑁆𑀢𑀳𑀺 𑀅𑀗𑁆𑀕𑁂𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀕𑀫𑀦𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀚𑁆𑀚𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀼 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 ‘‘𑀅𑀤𑁆𑀥𑀸 𑀓𑀸𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀦 𑀅𑀓𑀸𑀭𑀡𑁂𑀦 𑀢𑀣𑀸𑀕𑀢𑀸 𑀕𑀫𑀦𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀻’’𑀢𑀺 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀲𑀺. 𑀲𑀢𑁆𑀣𑀸 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀫𑀼𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥’’𑀦𑁆𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀦𑁆𑀢𑀁 (𑀅. 𑀦𑀺. 𑁭.𑁭𑁨) 𑀤𑁂𑀲𑁂𑀢𑀺.

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑁂 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺, 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀁𑀲𑀼, 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑀜𑁆𑀳𑀺 𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀸𑀫𑀓𑀸𑀬𑁄 𑀲𑀦𑁆𑀢𑀢𑁆𑀢𑁄, 𑀦𑀸𑀫𑀓𑀸𑀬𑁂 𑀲𑀦𑁆𑀢𑀢𑁆𑀢𑁂 𑀓𑀭𑀚𑀓𑀸𑀬𑁄 𑀲𑀦𑁆𑀢𑀢𑁆𑀢𑁄, 𑀓𑀭𑀚𑀓𑀸𑀬𑁂 𑀲𑀦𑁆𑀢𑀢𑁆𑀢𑁂 𑀦𑀺𑀥𑀸𑀦𑀕𑀢𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺. 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 ‘‘𑀤𑀼𑀓𑁆𑀓𑀭𑀁 𑀯𑀢 𑀩𑀼𑀤𑁆𑀥𑀲𑀸𑀲𑀦𑁂 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’’𑀦𑁆𑀢𑀺 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀸, 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀤𑁂𑀲𑀦𑀸𑀪𑀺𑀫𑀼𑀔𑀁 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸.

𑀢𑀢𑁆𑀣 𑀬𑁂𑀲𑀁 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺, 𑀢𑁂 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀁𑀲𑀼. 𑀬𑁂 𑀕𑀺𑀳𑀺𑀪𑀸𑀯𑀁 𑀧𑀢𑁆𑀢𑀸, 𑀢𑁂 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀤𑁆𑀤𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀬𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀢𑁂 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀯 𑀅𑀳𑁂𑀲𑀼𑀁. 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸 𑀇𑀫𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀲𑀨𑀮𑀸𑀯 𑀚𑀸𑀢𑀸𑀢𑀺. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀢𑀸𑀯 𑀲𑀨𑀮𑀸 𑀳𑁄𑀢𑀼, 𑀇𑀢𑀭𑁂𑀲𑀁 𑀓𑀣𑀁 𑀲𑀨𑀮𑀸 𑀚𑀸𑀢𑀸𑀢𑀺? 𑀢𑁂𑀧𑀺 𑀳𑀺 𑀲𑀘𑁂 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀦 𑀲𑀼𑀡𑁂𑀬𑁆𑀬𑀼𑀁, 𑀧𑀫𑀢𑁆𑀢𑀸𑀯 𑀳𑀼𑀢𑁆𑀯𑀸 𑀞𑀸𑀦𑀁 𑀚𑀳𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀁. 𑀢𑀢𑁄 𑀦𑁂𑀲𑀁 𑀢𑀁 𑀧𑀸𑀧𑀁 𑀯𑀟𑁆𑀠𑀫𑀸𑀦𑀁 𑀅𑀧𑀸𑀬𑁂𑀲𑀼𑀬𑁂𑀯 𑀲𑀁𑀲𑀻𑀤𑀸𑀧𑁂𑀬𑁆𑀬. 𑀇𑀫𑀁 𑀧𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀚𑀸𑀢𑀲𑀁𑀯𑁂𑀕𑀸 𑀞𑀸𑀦𑀁 𑀚𑀳𑀺𑀢𑁆𑀯𑀸 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀸 𑀤𑀲 𑀲𑀻𑀮𑀸𑀦𑀺 𑀧𑀽𑀭𑁂𑀢𑁆𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄 𑀅𑀳𑁂𑀲𑀼𑀁, 𑀓𑁂𑀘𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀏𑀯𑀁 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀸𑀦𑀫𑁆𑀧𑀺 𑀲𑀨𑀮𑀸 𑀅𑀳𑁄𑀲𑀺. 𑀇𑀢𑀭𑁂 𑀧𑀦 𑀲𑀘𑁂 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀦 𑀲𑀼𑀡𑁂𑀬𑁆𑀬𑀼𑀁, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀅𑀦𑀼𑀧𑀼𑀩𑁆𑀩𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀫𑁆𑀧𑀺 𑀧𑀸𑀭𑀸𑀚𑀺𑀓𑀫𑁆𑀧𑀺 𑀧𑀸𑀧𑀼𑀡𑀺𑀢𑁆𑀯𑀸 𑀅𑀧𑀸𑀬𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑁂𑀬𑁆𑀬𑀼𑀁. 𑀇𑀫𑀁 𑀧𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀅𑀳𑁄 𑀲𑀮𑁆𑀮𑁂𑀔𑀺𑀢𑀁 𑀩𑀼𑀤𑁆𑀥𑀲𑀸𑀲𑀦𑀁, 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀬𑀸𑀯𑀚𑀻𑀯𑀁 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀉𑀧𑀸𑀲𑀓𑀥𑀫𑁆𑀫𑀁 𑀧𑀽𑀭𑁂𑀢𑁆𑀯𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀕𑀺𑀳𑀺𑀪𑀸𑀯𑀁 𑀉𑀧𑀕𑀫𑀺𑀁𑀲𑀼. 𑀢𑁂 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑁆𑀯𑀸 𑀉𑀧𑀸𑀲𑀓𑀥𑀫𑁆𑀫𑀁 𑀧𑀽𑀭𑁂𑀢𑁆𑀯𑀸 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄 𑀚𑀸𑀢𑀸, 𑀓𑁂𑀘𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸𑀢𑀺. 𑀏𑀯𑀁 𑀢𑁂𑀲𑀫𑁆𑀧𑀺 𑀲𑀨𑀮𑀸𑀯 𑀅𑀳𑁄𑀲𑀺.

𑀇𑀫𑀁 𑀧𑀦 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀤𑁂𑀯𑀲𑀗𑁆𑀖𑀸 𑀬𑁂𑀳𑀺𑀧𑀺 𑀲𑀼𑀢𑀸, 𑀬𑁂𑀳𑀺𑀧𑀺 𑀦 𑀲𑀼𑀢𑀸, 𑀲𑀩𑁆𑀩𑁂𑀲𑀁𑀬𑁂𑀯 𑀆𑀭𑁄𑀘𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀪𑀺𑀓𑁆𑀔𑀽 𑀲𑀼𑀢𑁆𑀯𑀸 𑀲𑀼𑀢𑁆𑀯𑀸 ‘‘𑀤𑀼𑀓𑁆𑀓𑀭𑀁, 𑀪𑁄, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’’𑀦𑁆𑀢𑀺 𑀏𑀓𑀓𑁆𑀔𑀡𑁂𑀦𑁂𑀯 𑀤𑀲𑀧𑀺 𑀪𑀺𑀓𑁆𑀔𑀽 𑀯𑀻𑀲𑀢𑀺𑀧𑀺 𑀲𑀝𑁆𑀞𑀺𑀧𑀺 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀪𑀺𑀓𑁆𑀔𑀽 𑀕𑀺𑀳𑀻 𑀳𑁄𑀦𑁆𑀢𑀺. 𑀲𑀢𑁆𑀣𑀸 𑀬𑀣𑀸𑀭𑀼𑀘𑀺𑀬𑀸 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀚𑁂𑀢𑀯𑀦𑀫𑁂𑀯 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀘𑀺𑀭𑀁 𑀆𑀓𑀺𑀡𑁆𑀡𑁄 𑀯𑀺𑀳𑀸𑀲𑀺, 𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀦𑀸𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸’’𑀢𑀺. 𑀅𑀟𑁆𑀠𑀫𑀸𑀲𑀁 𑀏𑀓𑀻𑀪𑀸𑀯𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑁂 𑀢𑀦𑀼𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 𑀚𑀸𑀦𑀦𑁆𑀢𑁄𑀬𑁂𑀯 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀆𑀦𑀦𑁆𑀤, 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀢𑀣𑀸𑀕𑀢𑁂 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀚𑁂𑀢𑀯𑀦𑀁 𑀆𑀕𑀢𑁂 𑀲𑀓𑀮𑀯𑀺𑀳𑀸𑀭𑁄 𑀓𑀸𑀲𑀸𑀯𑀧𑀚𑁆𑀚𑁄𑀢𑁄 𑀇𑀲𑀺𑀯𑀸𑀢𑀧𑁆𑀧𑀝𑀺𑀯𑀸𑀢𑁄 𑀳𑁄𑀢𑀺, 𑀇𑀤𑀸𑀦𑀺 𑀧𑀦 𑀢𑀦𑀼𑀪𑀽𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀤𑀺𑀲𑁆𑀲𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀘 𑀉𑀧𑁆𑀧𑀡𑁆𑀟𑀼𑀧𑀡𑁆𑀟𑀼𑀓𑀚𑀸𑀢𑀸 𑀪𑀺𑀓𑁆𑀔𑀽, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺? 𑀏𑀢𑀭𑀳𑀺 𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀥𑀫𑁆𑀫𑀤𑁂𑀲𑀦𑀁 𑀓𑀣𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀫𑀬𑀁 𑀏𑀢𑀁 𑀥𑀫𑁆𑀫𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀧𑀭𑀺𑀧𑀽𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀸𑀦𑀜𑁆𑀘 𑀚𑀦𑀲𑁆𑀲 𑀲𑀤𑁆𑀥𑀸𑀤𑁂𑀬𑁆𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀕𑀺𑀳𑀺𑀪𑀸𑀯𑀁 𑀲𑀗𑁆𑀓𑀫𑀦𑁆𑀢𑀻𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀪𑀕𑀯𑀢𑁄 𑀥𑀫𑁆𑀫𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀣𑁂𑀭𑀁 𑀆𑀳 𑁋 ‘‘𑀫𑀬𑀺 𑀧𑀝𑀺𑀲𑀮𑁆𑀮𑀸𑀦𑁂 𑀯𑀻𑀢𑀺𑀦𑀸𑀫𑁂𑀦𑁆𑀢𑁂 𑀦 𑀓𑁄𑀘𑀺 𑀫𑀫 𑀧𑀼𑀢𑁆𑀢𑀸𑀦𑀁 𑀏𑀓𑀁 𑀅𑀲𑁆𑀲𑀸𑀲𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀲𑀸𑀕𑀭𑀲𑁆𑀲 𑀳𑀺 𑀑𑀢𑀭𑀡𑀢𑀺𑀢𑁆𑀣𑀸𑀦𑀺 𑀯𑀺𑀬 𑀩𑀳𑀽𑀦𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀲𑁆𑀲𑀸𑀲𑀓𑀸𑀭𑀡𑀸𑀦𑀺. 𑀕𑀘𑁆𑀙𑀸𑀦𑀦𑁆𑀤, 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀣𑀸 𑀩𑀼𑀤𑁆𑀥𑀸𑀲𑀦𑀯𑀭𑀕𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀬 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁄 𑀦𑀸𑀫 𑀦𑁂𑀯 𑀅𑀧𑁆𑀧𑀦𑀸, 𑀦 𑀉𑀧𑀘𑀸𑀭𑁄, 𑀲𑀢𑁆𑀢𑀸𑀦𑀁 𑀳𑀺𑀢𑀨𑀭𑀡𑀫𑀢𑁆𑀢𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀫𑀁 𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢𑀁 𑀤𑁂𑀲𑁂𑀲𑀺.

𑀢𑀢𑁆𑀣 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀦𑁆𑀢𑀺 𑀅𑀘𑁆𑀙𑀭𑀸𑀧𑀳𑀭𑀡𑀫𑀢𑁆𑀢𑀁, 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀧𑀳𑀭𑀺𑀢𑁆𑀯𑀸 𑀲𑀤𑁆𑀤𑀓𑀭𑀡𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀸𑀘𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀨𑀭𑀡𑀘𑀺𑀢𑁆𑀢𑀁. 𑀆𑀲𑁂𑀯𑀢𑀻𑀢𑀺 𑀓𑀣𑀁 𑀆𑀲𑁂𑀯𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄 𑀆𑀲𑁂𑀯𑀢𑀺, 𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀲𑁆𑀲𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀆𑀲𑁂𑀯𑀢𑀺, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀆𑀲𑁂𑀯𑀢𑀺, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀆𑀲𑁂𑀯𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀆𑀲𑁂𑀯𑀢𑀺, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀆𑀲𑁂𑀯𑀢𑀻𑀢𑀺 (𑀧𑀝𑀺. 𑀫. 𑁨.𑁨). 𑀇𑀥 𑀧𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁂𑀦 𑀳𑀺𑀢𑀨𑀭𑀡𑀧𑁆𑀧𑀯𑀢𑁆𑀢𑀦𑀫𑀢𑁆𑀢𑁂𑀦𑁂𑀯 𑀆𑀲𑁂𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀢𑁆𑀢𑀚𑁆𑀛𑀸𑀦𑁄𑀢𑀺 𑀅𑀢𑀼𑀘𑁆𑀙𑀚𑁆𑀛𑀸𑀦𑁄 𑀅𑀧𑀭𑀺𑀘𑁆𑀘𑀢𑁆𑀢𑀚𑁆𑀛𑀸𑀦𑁄 𑀯𑀸. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀧𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀳𑀭𑀢𑀻𑀢𑀺. 𑀇𑀫𑀺𑀦𑀸 𑀧𑀤𑁂𑀦 𑀫𑁂𑀢𑁆𑀢𑀁 𑀆𑀲𑁂𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀓𑀣𑀺𑀢𑁄. 𑀲𑀢𑁆𑀣𑀼𑀲𑀸𑀲𑀦𑀓𑀭𑁄𑀢𑀺 𑀲𑀢𑁆𑀣𑀼 𑀅𑀦𑀼𑀲𑀸𑀲𑀦𑀺𑀓𑀭𑁄. 𑀑𑀯𑀸𑀤𑀧𑀢𑀺𑀓𑀭𑁄𑀢𑀺 𑀑𑀯𑀸𑀤𑀓𑀸𑀭𑀓𑁄. 𑀏𑀢𑁆𑀣 𑀘 𑀲𑀓𑀺𑀁𑀯𑀘𑀦𑀁 𑀑𑀯𑀸𑀤𑁄, 𑀧𑀼𑀦𑀧𑁆𑀧𑀼𑀦𑀯𑀘𑀦𑀁 𑀅𑀦𑀼𑀲𑀸𑀲𑀦𑀻. 𑀲𑀫𑁆𑀫𑀼𑀔𑀸𑀯𑀘𑀦𑀫𑁆𑀧𑀺 𑀑𑀯𑀸𑀤𑁄, 𑀧𑁂𑀲𑁂𑀢𑁆𑀯𑀸 𑀧𑀭𑀫𑁆𑀫𑀼𑀔𑀸𑀯𑀘𑀦𑀁, 𑀅𑀦𑀼𑀲𑀸𑀲𑀦𑀻. 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑀘𑀦𑀁 𑀑𑀯𑀸𑀤𑁄, 𑀑𑀢𑀺𑀡𑁆𑀡𑁂 𑀯𑀸 𑀅𑀦𑁄𑀢𑀺𑀡𑁆𑀡𑁂 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀢𑀦𑁆𑀢𑀺𑀞𑀧𑀦𑀯𑀲𑁂𑀦 𑀯𑀘𑀦𑀁 𑀅𑀦𑀼𑀲𑀸𑀲𑀦𑀻. 𑀏𑀯𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀫𑀢𑁆𑀣𑀢𑁄 𑀧𑀦 𑀑𑀯𑀸𑀤𑁄𑀢𑀺 𑀯𑀸 𑀅𑀦𑀼𑀲𑀸𑀲𑀦𑀻𑀢𑀺 𑀯𑀸 𑀏𑀲𑁂 𑀏𑀓𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂 𑀢𑀜𑁆𑀜𑁂𑀯𑀸𑀢𑀺. 𑀏𑀢𑁆𑀣 𑀘 ‘‘𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀘𑀺𑀢𑁆𑀢𑀁 𑀆𑀲𑁂𑀯𑀢𑀻’’𑀢𑀺 𑀇𑀤𑀫𑁂𑀯 𑀲𑀢𑁆𑀣𑀼𑀲𑀸𑀲𑀦𑀜𑁆𑀘𑁂𑀯 𑀑𑀯𑀸𑀤𑁄 𑀘, 𑀢𑀲𑁆𑀲 𑀓𑀭𑀡𑀢𑁄 𑀏𑀲 𑀲𑀸𑀲𑀦𑀓𑀭𑁄 𑀑𑀯𑀸𑀤𑀧𑀢𑀺𑀓𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀫𑁄𑀖𑀦𑁆𑀢𑀺 𑀅𑀢𑀼𑀘𑁆𑀙𑀁. 𑀭𑀝𑁆𑀞𑀧𑀺𑀡𑁆𑀟𑀦𑁆𑀢𑀺 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀭𑀝𑁆𑀞𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑀺𑀢𑁂𑀦 𑀧𑀭𑁂𑀲𑀁 𑀕𑁂𑀳𑀢𑁄 𑀧𑀝𑀺𑀮𑀤𑁆𑀥𑀢𑁆𑀢𑀸 𑀧𑀺𑀡𑁆𑀟𑀧𑀸𑀢𑁄 𑀭𑀝𑁆𑀞𑀧𑀺𑀡𑁆𑀟𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀘𑀢𑁆𑀢𑀸𑀭𑁄 𑀧𑀭𑀺𑀪𑁄𑀕𑀸 𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀲𑀸𑀫𑀺𑀧𑀭𑀺𑀪𑁄𑀕𑁄𑀢𑀺. 𑀢𑀢𑁆𑀣 𑀤𑀼𑀲𑁆𑀲𑀻𑀮𑀲𑁆𑀲 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀦𑀸𑀫. 𑀲𑀻𑀮𑀯𑀢𑁄 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄 𑀦𑀸𑀫. 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑀸 𑀦𑀸𑀫. 𑀔𑀻𑀡𑀸𑀲𑀯𑀲𑁆𑀲 𑀧𑀭𑀺𑀪𑁄𑀕𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀦𑀸𑀫. 𑀢𑀢𑁆𑀣 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀬𑀁 𑀭𑀝𑁆𑀞𑀧𑀺𑀡𑁆𑀟𑀧𑀭𑀺𑀪𑁄𑀕𑁄 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀫𑁄𑀖𑁄 𑀳𑁄𑀢𑀺. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀫𑁂𑀢𑁆𑀢𑀸𑀘𑀺𑀢𑁆𑀢𑀁 𑀆𑀲𑁂𑀯𑀦𑁆𑀢𑁄 𑀪𑀺𑀓𑁆𑀔𑀼 𑀭𑀝𑁆𑀞𑀧𑀺𑀡𑁆𑀟𑀲𑁆𑀲 𑀲𑀸𑀫𑀺𑀓𑁄 𑀳𑀼𑀢𑁆𑀯𑀸, 𑀅𑀡𑀡𑁄 𑀳𑀼𑀢𑁆𑀯𑀸, 𑀤𑀸𑀬𑀸𑀤𑁄 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻𑀢𑀺𑀧𑀺𑀲𑁆𑀲 𑀅𑀫𑁄𑀖𑁄 𑀭𑀝𑁆𑀞𑀧𑀺𑀡𑁆𑀟𑀧𑀭𑀺𑀪𑁄𑀕𑁄. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀫𑁂𑀢𑁆𑀢𑀁 𑀆𑀲𑁂𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀦𑁆𑀦𑀤𑀸𑀦𑀁 𑀫𑀳𑀝𑁆𑀞𑀺𑀬𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁 𑀫𑀳𑀸𑀦𑀺𑀲𑀁𑀲𑀁 𑀫𑀳𑀸𑀚𑀼𑀢𑀺𑀓𑀁 𑀫𑀳𑀸𑀯𑀺𑀧𑁆𑀨𑀸𑀭𑀦𑁆𑀢𑀺𑀧𑀺𑀲𑁆𑀲 𑀅𑀫𑁄𑀖𑁄 𑀭𑀝𑁆𑀞𑀧𑀺𑀡𑁆𑀟𑀧𑀭𑀺𑀪𑁄𑀕𑁄. 𑀓𑁄 𑀧𑀦 𑀯𑀸𑀤𑁄 𑀬𑁂 𑀦𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑀻𑀢𑀺 𑀬𑁂 𑀧𑀦 𑀇𑀫𑀁 𑀫𑁂𑀢𑁆𑀢𑀸𑀘𑀺𑀢𑁆𑀢𑀁 𑀩𑀳𑀼𑀮𑀁 𑀆𑀲𑁂𑀯𑀦𑁆𑀢𑀺 𑀪𑀸𑀯𑁂𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀺, 𑀢𑁂 𑀅𑀫𑁄𑀖𑀁 𑀭𑀝𑁆𑀞𑀧𑀺𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀓𑀺𑀁? 𑀏𑀯𑀭𑀽𑀧𑀸 𑀳𑀺 𑀪𑀺𑀓𑁆𑀔𑀽 𑀭𑀝𑁆𑀞𑀧𑀺𑀡𑁆𑀟𑀲𑁆𑀲 𑀲𑀸𑀫𑀺𑀦𑁄 𑀅𑀡𑀡𑀸 𑀤𑀸𑀬𑀸𑀤𑀸 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺.

𑁫𑁪-𑁫𑁫. 𑀘𑀢𑀼𑀢𑁆𑀣𑁂 𑀪𑀸𑀯𑁂𑀢𑀻𑀢𑀺 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀺. 𑀧𑀜𑁆𑀘𑀫𑁂 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀫𑀦𑀲𑁆𑀫𑀺𑀁 𑀓𑀭𑁄𑀢𑀺. 𑀲𑁂𑀲𑀁 𑀇𑀫𑁂𑀲𑀼 𑀤𑁆𑀯𑀻𑀲𑀼𑀧𑀺 𑀢𑀢𑀺𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀳𑀺 𑀆𑀲𑁂𑀯𑀢𑀺, 𑀅𑀬𑀫𑁂𑀯 𑀪𑀸𑀯𑁂𑀢𑀺, 𑀅𑀬𑀁 𑀫𑀦𑀲𑀺 𑀓𑀭𑁄𑀢𑀺. 𑀬𑁂𑀦 𑀘𑀺𑀢𑁆𑀢𑁂𑀦 𑀆𑀲𑁂𑀯𑀢𑀺, 𑀢𑁂𑀦𑁂𑀯 𑀪𑀸𑀯𑁂𑀢𑀺, 𑀢𑁂𑀦 𑀫𑀦𑀲𑀺 𑀓𑀭𑁄𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀬𑀸𑀬 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀲𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑀁 𑀥𑀫𑁆𑀫𑀺𑀲𑁆𑀲𑀭𑀺𑀬𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀓𑀼𑀲𑀮𑀢𑀁 𑀅𑀧𑁆𑀧𑀝𑀺𑀳𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀦𑀺𑀲𑁆𑀲𑀸𑀬 𑀏𑀓𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀏𑀓𑀘𑀺𑀢𑁆𑀢𑀫𑁂𑀯 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀲𑀻𑀢𑀺.

𑁫𑁬. 𑀙𑀝𑁆𑀞𑁂 𑀬𑁂 𑀓𑁂𑀘𑀻𑀢𑀺 𑀅𑀦𑀺𑀬𑀸𑀫𑀺𑀢𑀯𑀘𑀦𑀁. 𑀅𑀓𑀼𑀲𑀮𑀸𑀢𑀺 𑀢𑁂𑀲𑀁 𑀦𑀺𑀬𑀸𑀫𑀺𑀢𑀯𑀘𑀦𑀁. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀸𑀓𑀼𑀲𑀮𑀸 𑀅𑀲𑁂𑀲𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸𑀢𑀺 𑀅𑀓𑀼𑀲𑀮𑀸𑀦𑀫𑁂𑀯𑁂𑀢𑀁 𑀦𑀸𑀫𑀁. 𑀅𑀓𑀼𑀲𑀮𑀸𑀬𑁂𑀯 𑀳𑀺 𑀏𑀓𑀘𑁆𑀘𑁂 𑀅𑀓𑀼𑀲𑀮𑀁 𑀲𑀳𑀚𑀸𑀢𑀯𑀲𑁂𑀦, 𑀏𑀓𑀘𑁆𑀘𑁂 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀪𑀚𑀦𑁆𑀢𑀺 𑀘𑁂𑀯, 𑀢𑁂𑀲𑀜𑁆𑀘 𑀧𑀓𑁆𑀔𑀸 𑀪𑀯𑀦𑁆𑀢𑀻𑀢𑀺 ‘‘𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀩𑁆𑀩𑁂𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀫𑀦𑁄 𑀧𑀼𑀩𑁆𑀩𑀁 𑀧𑀞𑀫𑀢𑀭𑀁 𑀕𑀘𑁆𑀙𑀢𑀺 𑀏𑀢𑁂𑀲𑀦𑁆𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸. 𑀏𑀢𑁂 𑀳𑀺 𑀓𑀺𑀜𑁆𑀘𑀸𑀧𑀺 𑀫𑀦𑁂𑀦 𑀲𑀤𑁆𑀥𑀺𑀁 𑀏𑀓𑀼𑀧𑁆𑀧𑀸𑀤𑀸 𑀏𑀓𑀯𑀢𑁆𑀣𑀼𑀓𑀸 𑀏𑀓𑀦𑀺𑀭𑁄𑀥𑀸 𑀏𑀓𑀸𑀭𑀫𑁆𑀫𑀡𑀸 𑀘 𑀳𑁄𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀫𑀦𑁄 𑀉𑀧𑁆𑀧𑀸𑀤𑀓𑁄 𑀓𑀸𑀭𑀓𑁄 𑀚𑀦𑀓𑁄 𑀲𑀫𑀼𑀝𑁆𑀞𑀸𑀧𑀓𑁄 𑀦𑀺𑀩𑁆𑀩𑀢𑁆𑀢𑀓𑁄, 𑀢𑀲𑁆𑀫𑀸 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀦𑀸𑀫 𑀳𑁄𑀦𑁆𑀢𑀺.

𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀣𑀸 𑀦𑀸𑀫 ‘‘𑀭𑀸𑀚𑀸 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀸𑀬𑁂𑀯 𑀦𑀺𑀓𑁆𑀔𑀦𑁆𑀢𑁄, 𑀲𑁂𑀲𑀸 𑀭𑀸𑀚𑀲𑁂𑀦𑀸 𑀦𑀺𑀓𑁆𑀔𑀦𑁆𑀢𑀸 𑀅𑀦𑀺𑀓𑁆𑀔𑀦𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀓𑀸𑀭𑀡𑀁 𑀦𑀢𑁆𑀣𑀺, 𑀲𑀩𑁆𑀩𑀸 𑀦𑀺𑀓𑁆𑀔𑀦𑁆𑀢𑀸𑀢𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀫𑁂𑀯 𑀫𑀦𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀯𑀲𑁂𑀲𑀸 𑀲𑀳𑀚𑀸𑀢𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀸 𑀉𑀧𑁆𑀧𑀦𑁆𑀦𑀸 𑀦 𑀉𑀧𑁆𑀧𑀦𑁆𑀦𑀸𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀓𑀸𑀭𑀡𑀁 𑀦𑀢𑁆𑀣𑀺, 𑀲𑀩𑁆𑀩𑁂 𑀢𑁂 𑀉𑀧𑁆𑀧𑀦𑁆𑀦𑀸 𑀢𑁆𑀯𑁂𑀯 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀢𑀫𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀢𑁂𑀳𑀺 𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑁄 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑁄𑀧𑀺 𑀲𑀫𑀸𑀦𑁄 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑁄. 𑀅𑀦𑁆𑀯𑀤𑁂𑀯𑀸𑀢𑀺 𑀅𑀦𑀼𑀤𑁂𑀯, 𑀲𑀳𑁂𑀯 𑀏𑀓𑀢𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀁 𑀧𑀦 𑀕𑀳𑁂𑀢𑁆𑀯𑀸 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀘𑁂𑀢𑀲𑀺𑀓𑀸𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀣𑁄 𑀳𑀺 𑀧𑀝𑀺𑀲𑀭𑀡𑀁, 𑀦 𑀩𑁆𑀬𑀜𑁆𑀚𑀦𑀁. ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸’’𑀢𑀺 𑀕𑀸𑀣𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑁫𑁭. 𑀲𑀢𑁆𑀢𑀫𑁂 𑀓𑀼𑀲𑀮𑀸𑀢𑀺 𑀘𑀢𑀼𑀪𑀽𑀫𑀓𑀸𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀣𑀺𑀢𑀸. 𑀲𑁂𑀲𑀁 𑀙𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁫𑁮. 𑀅𑀝𑁆𑀞𑀫𑁂 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀧𑀫𑀸𑀤𑁄𑀢𑀺 𑀏𑀢𑁆𑀣, 𑀪𑀺𑀓𑁆𑀔𑀯𑁂𑀢𑀺 𑀆𑀮𑀧𑀦𑀁, 𑀬𑀣𑀸 𑀅𑀬𑀁 𑀧𑀫𑀸𑀤𑁄𑀢𑀺 𑀅𑀢𑁆𑀣𑁄. 𑀧𑀫𑀸𑀤𑁄𑀢𑀺 𑀧𑀫𑀚𑁆𑀚𑀦𑀸𑀓𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀢𑁆𑀣 𑀓𑀢𑀫𑁄 𑀧𑀫𑀸𑀤𑁄? 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀯𑀸 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁. 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀫𑀸𑀤𑁄’’𑀢𑀺 (𑀯𑀺𑀪. 𑁮𑁪𑁬).

𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀇𑀤𑀁 𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀕𑁆𑀕𑀨𑀮𑀸𑀦𑀁 𑀧𑀦 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸𑀦𑀁 𑀧𑀼𑀦 𑀧𑀭𑀺𑀳𑀸𑀦𑀁 𑀦𑀸𑀫 𑀦𑀢𑁆𑀣𑀺.

𑁫𑁯. 𑀦𑀯𑀫𑁂 𑀅𑀧𑁆𑀧𑀫𑀸𑀤𑁄 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁦. 𑀤𑀲𑀫𑁂 𑀓𑁄𑀲𑀚𑁆𑀚𑀦𑁆𑀢𑀺 𑀓𑀼𑀲𑀻𑀢𑀪𑀸𑀯𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸.