𑁫. 𑀧𑀡𑀺𑀳𑀺𑀢𑀅𑀘𑁆𑀙𑀯𑀕𑁆𑀕𑀯𑀡𑁆𑀡𑀦𑀸

𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑁂𑀬𑁆𑀬𑀣𑀸𑀧𑀻𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀢𑁆𑀭 𑀪𑀕𑀯𑀸 𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀯𑀢𑁆𑀣𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁭𑁦 𑀆𑀤𑀬𑁄) 𑀯𑀺𑀬, 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀧𑀫- (𑀅. 𑀦𑀺. 𑁭.𑁬𑁯) 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 (𑀅. 𑀦𑀺. 𑁭.𑁭𑁨) 𑀯𑀺𑀬 𑀘, 𑀓𑀢𑁆𑀣𑀘𑀺 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀮𑁄𑀡𑀫𑁆𑀩𑀺𑀮𑀲𑀼𑀢𑁆𑀢𑁂 (𑀅. 𑀦𑀺. 𑁩.𑁧𑁦𑁧) 𑀯𑀺𑀬, 𑀲𑀼𑀯𑀡𑁆𑀡𑀓𑀸𑀭𑀲𑀼𑀢𑁆𑀢𑀲𑀽𑀭𑀺𑀬𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 (𑀅. 𑀦𑀺. 𑁭.𑁬𑁬) 𑀯𑀺𑀬 𑀘. 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀮𑀺𑀲𑀽𑀓𑁄𑀧𑀫𑁂 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀮𑀺𑀲𑀽𑀓𑀦𑁆𑀢𑀺 𑀲𑀸𑀮𑀺𑀨𑀮𑀲𑁆𑀲 𑀲𑀽𑀓𑀁. 𑀬𑀯𑀲𑀽𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀢𑁆𑀣𑁄. 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀦𑁆𑀢𑀺 𑀫𑀺𑀘𑁆𑀙𑀸𑀞𑀧𑀺𑀢𑀁. 𑀬𑀣𑀸 𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀏𑀯𑀁 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀞𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀪𑁂𑀘𑁆𑀙𑀢𑀻𑀢𑀺 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀙𑀯𑀺𑀁 𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀫𑀺𑀘𑁆𑀙𑀸𑀞𑀧𑀺𑀢𑁂𑀦 𑀘𑀺𑀢𑁆𑀢𑁂𑀦. 𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀦𑁆𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀁 𑀖𑀦𑀩𑀳𑀮𑀁 𑀫𑀳𑀸𑀅𑀯𑀺𑀚𑁆𑀚𑀁. 𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀏𑀢𑁆𑀣 𑀯𑀺𑀚𑁆𑀚𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑀡𑁆𑀳𑀸𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀪𑀸𑀯𑁂𑀦 𑀏𑀯𑀁 𑀯𑀼𑀢𑁆𑀢𑀁 𑀅𑀫𑀢𑀁. 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀧𑀘𑁆𑀘𑀓𑁆𑀔𑀁 𑀓𑀭𑀺𑀲𑁆𑀲𑀢𑀺.

𑁪𑁨. 𑀤𑀼𑀢𑀺𑀬𑁂 𑀲𑀫𑁆𑀫𑀸𑀧𑀡𑀺𑀳𑀺𑀢𑀦𑁆𑀢𑀺 𑀬𑀣𑀸 𑀪𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀁 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀲𑀼𑀝𑁆𑀞𑀼 𑀞𑀧𑀺𑀢𑀁. 𑀅𑀓𑁆𑀓𑀦𑁆𑀢𑀦𑁆𑀢𑀺 𑀏𑀢𑁆𑀣 𑀧𑀸𑀤𑁂𑀦𑁂𑀯 𑀅𑀓𑁆𑀓𑀦𑁆𑀢𑀁 𑀦𑀸𑀫 𑀳𑁄𑀢𑀺, 𑀳𑀢𑁆𑀣𑁂𑀦 𑀉𑀧𑁆𑀧𑀻𑀴𑀺𑀢𑀁. 𑀭𑀼𑀴𑁆𑀳𑀺𑀲𑀤𑁆𑀤𑀯𑀲𑁂𑀦 𑀧𑀦 𑀅𑀓𑁆𑀓𑀦𑁆𑀢𑀦𑁆𑀢𑁂𑀯 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀭𑀺𑀬𑀯𑁄𑀳𑀸𑀭𑁄. 𑀓𑀲𑁆𑀫𑀸 𑀧𑀦 𑀅𑀜𑁆𑀜𑁂 𑀲𑁂𑀧𑀡𑁆𑀡𑀺𑀓𑀡𑁆𑀝𑀓𑀫𑀤𑀦𑀓𑀡𑁆𑀝𑀓𑀸𑀤𑀬𑁄 𑀫𑀳𑀦𑁆𑀢𑁂 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀔𑀼𑀫𑀁 𑀤𑀼𑀩𑁆𑀩𑀮𑀁 𑀲𑀸𑀮𑀺𑀲𑀽𑀓𑀬𑀯𑀲𑀽𑀓𑀫𑁂𑀯 𑀕𑀳𑀺𑀢𑀦𑁆𑀢𑀺? 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀸𑀧𑀺 𑀓𑀼𑀲𑀮𑀓𑀫𑁆𑀫𑀲𑁆𑀲 𑀯𑀺𑀯𑀝𑁆𑀝𑀸𑀬 𑀲𑀫𑀢𑁆𑀣𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸 𑀳𑀺 𑀲𑀼𑀔𑀼𑀫𑀁 𑀤𑀼𑀩𑁆𑀩𑀮𑀁 𑀲𑀸𑀮𑀺𑀲𑀽𑀓𑀁 𑀯𑀸 𑀬𑀯𑀲𑀽𑀓𑀁 𑀯𑀸 𑀳𑁄𑀢𑀼, 𑀫𑀳𑀦𑁆𑀢𑀫𑀳𑀦𑁆𑀢𑀸 𑀲𑁂𑀧𑀡𑁆𑀡𑀺𑀓𑀡𑁆𑀝𑀓𑀫𑀤𑀦𑀓𑀡𑁆𑀝𑀓𑀸𑀤𑀬𑁄 𑀯𑀸, 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀫𑀺𑀘𑁆𑀙𑀸 𑀞𑀧𑀺𑀢𑀁 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀪𑀺𑀦𑁆𑀤𑀺𑀢𑀼𑀁 𑀮𑁄𑀳𑀺𑀢𑀁 𑀯𑀸 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀫𑁆𑀫𑀸 𑀞𑀧𑀺𑀢𑀁 𑀧𑀦 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯 𑀅𑀧𑁆𑀧𑀫𑀢𑁆𑀢𑀓𑀁 𑀢𑀺𑀡𑀫𑀼𑀝𑁆𑀞𑀺 𑀫𑀢𑁆𑀢𑀤𑀸𑀦𑀓𑀼𑀲𑀮𑀁 𑀯𑀸 𑀳𑁄𑀢𑀼, 𑀫𑀳𑀦𑁆𑀢𑀁 𑀯𑁂𑀮𑀸𑀫𑀤𑀸𑀦𑀸𑀤𑀺𑀓𑀼𑀲𑀮𑀁 𑀯𑀸, 𑀲𑀘𑁂 𑀯𑀝𑁆𑀝𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑁆𑀯𑀸 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀯𑀲𑁂𑀦 𑀫𑀺𑀘𑁆𑀙𑀸 𑀞𑀧𑀺𑀢𑀁 𑀳𑁄𑀢𑀺, 𑀯𑀝𑁆𑀝𑀫𑁂𑀯 𑀆𑀳𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦𑁄 𑀯𑀺𑀯𑀝𑁆𑀝𑀁. ‘‘𑀇𑀤𑀁 𑀫𑁂 𑀤𑀸𑀦𑀁 𑀆𑀲𑀯𑀓𑁆𑀔𑀬𑀸𑀯𑀳𑀁 𑀳𑁄𑀢𑀽’’𑀢𑀺 𑀏𑀯𑀁 𑀧𑀦 𑀯𑀺𑀯𑀝𑁆𑀝𑀁 𑀧𑀢𑁆𑀣𑁂𑀦𑁆𑀢𑁂𑀦 𑀯𑀺𑀯𑀝𑁆𑀝𑀯𑀲𑁂𑀦 𑀲𑀫𑁆𑀫𑀸 𑀞𑀧𑀺𑀢𑀁 𑀅𑀭𑀳𑀢𑁆𑀢𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀫𑁆𑀧𑀺 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀫𑁄𑀓𑁆𑀔𑀸 𑀘, 𑀬𑀸 𑀘 𑀲𑀸𑀯𑀓𑀧𑀸𑀭𑀫𑀻;

𑀧𑀘𑁆𑀘𑁂𑀓𑀩𑁄𑀥𑀺 𑀩𑀼𑀤𑁆𑀥𑀪𑀽𑀫𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺. (𑀔𑀼. 𑀧𑀸. 𑁮.𑁧𑁫);

𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀤𑁆𑀯𑀬𑁂 𑀘 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁪𑁩. 𑀢𑀢𑀺𑀬𑁂 𑀧𑀤𑀼𑀝𑁆𑀞𑀘𑀺𑀢𑁆𑀢𑀦𑁆𑀢𑀺 𑀤𑁄𑀲𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑀁. 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀘𑁆𑀘𑀸𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀬𑀣𑀸 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑁄. 𑀏𑀯𑀁 𑀦𑀺𑀭𑀬𑁂𑀢𑀺 𑀏𑀯𑀁 𑀦𑀺𑀭𑀬𑁂 𑀞𑀺𑀢𑁄𑀬𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀧𑀸𑀬𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀭𑀬𑀯𑁂𑀯𑀘𑀦𑀫𑁂𑀯. 𑀦𑀺𑀭𑀬𑁄 𑀳𑀺 𑀅𑀬𑀲𑀗𑁆𑀔𑀸𑀢𑀸 𑀲𑀼𑀔𑀸 𑀅𑀧𑁂𑀢𑁄𑀢𑀺 𑀅𑀧𑀸𑀬𑁄, 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺, 𑀤𑀼𑀓𑁆𑀓𑀝𑀓𑀸𑀭𑀺𑀦𑁄 𑀏𑀢𑁆𑀣 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀦𑀺𑀧𑀸𑀢𑁄, 𑀦𑀺𑀭𑀲𑁆𑀲𑀸𑀤𑀢𑁆𑀣𑁂𑀦 𑀦𑀺𑀭𑀬𑁄.

𑁪𑁪. 𑀘𑀢𑀼𑀢𑁆𑀣𑁂 𑀧𑀲𑀦𑁆𑀦𑀦𑁆𑀢𑀺 𑀲𑀤𑁆𑀥𑀸𑀧𑀲𑀸𑀤𑁂𑀦 𑀧𑀲𑀦𑁆𑀦𑀁. 𑀲𑀼𑀕𑀢𑀺𑀦𑁆𑀢𑀺 𑀲𑀼𑀔𑀲𑁆𑀲 𑀕𑀢𑀺𑀁. 𑀲𑀕𑁆𑀕𑀁 𑀮𑁄𑀓𑀦𑁆𑀢𑀺 𑀭𑀽𑀧𑀸𑀤𑀺𑀲𑀫𑁆𑀧𑀢𑁆𑀢𑀻𑀳𑀺 𑀲𑀼𑀝𑁆𑀞𑀼 𑀅𑀕𑁆𑀕𑀁 𑀮𑁄𑀓𑀁.

𑁪𑁫. 𑀧𑀜𑁆𑀘𑀫𑁂 𑀉𑀤𑀓𑀭𑀳𑀤𑁄𑀢𑀺 𑀉𑀤𑀓𑀤𑀳𑁄. 𑀆𑀯𑀺𑀮𑁄𑀢𑀺 𑀅𑀯𑀺𑀧𑁆𑀧𑀲𑀦𑁆𑀦𑁄. 𑀮𑀼𑀴𑀺𑀢𑁄𑀢𑀺 𑀅𑀧𑀭𑀺𑀲𑀡𑁆𑀞𑀺𑀢𑁄. 𑀓𑀮𑀮𑀻𑀪𑀽𑀢𑁄𑀢𑀺 𑀓𑀤𑁆𑀤𑀫𑀻𑀪𑀽𑀢𑁄. 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀦𑁆𑀢𑀺𑀆𑀤𑀻𑀲𑀼 𑀲𑀺𑀧𑁆𑀧𑀺𑀬𑁄 𑀘 𑀲𑀫𑁆𑀩𑀼𑀓𑀸 𑀘 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀁. 𑀲𑀓𑁆𑀔𑀭𑀸 𑀘 𑀓𑀞𑀮𑀸𑀦𑀺 𑀘 𑀲𑀓𑁆𑀔𑀭𑀓𑀞𑀮𑀁. 𑀫𑀘𑁆𑀙𑀸𑀦𑀁 𑀕𑀼𑀫𑁆𑀩𑀁 𑀖𑀝𑀸𑀢𑀺 𑀫𑀘𑁆𑀙𑀕𑀼𑀫𑁆𑀩𑀁. 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀲𑀓𑁆𑀔𑀭𑀓𑀞𑀮𑀁 𑀢𑀺𑀝𑁆𑀞𑀢𑀺𑀬𑁂𑀯, 𑀇𑀢𑀭𑀸𑀦𑀺 𑀘𑀭𑀦𑁆𑀢𑀺𑀧𑀺 𑀢𑀺𑀝𑁆𑀞𑀦𑁆𑀢𑀺𑀧𑀺. 𑀬𑀣𑀸 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀞𑀺𑀢𑀸𑀲𑀼𑀧𑀺 𑀦𑀺𑀲𑀺𑀦𑁆𑀦𑀸𑀲𑀼𑀧𑀺 𑀦𑀺𑀧𑀚𑁆𑀚𑀫𑀸𑀦𑀸𑀲𑀼𑀧𑀺 ‘‘𑀏𑀢𑀸 𑀕𑀸𑀯𑀺𑀬𑁄 𑀘𑀭𑀦𑁆𑀢𑀻’’𑀢𑀺 𑀘𑀭𑀦𑁆𑀢𑀺𑀬𑁄 𑀉𑀧𑀸𑀤𑀸𑀬 𑀇𑀢𑀭𑀸𑀧𑀺 ‘‘𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀢𑀺𑀝𑁆𑀞𑀦𑁆𑀢𑀫𑁂𑀯 𑀲𑀓𑁆𑀔𑀭𑀓𑀞𑀮𑀁 𑀉𑀧𑀸𑀤𑀸𑀬 𑀇𑀢𑀭𑀫𑁆𑀧𑀺 𑀤𑁆𑀯𑀬𑀁 ‘‘𑀢𑀺𑀝𑁆𑀞𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀢𑀭𑀁 𑀤𑁆𑀯𑀬𑀁 𑀘𑀭𑀦𑁆𑀢𑀁 𑀉𑀧𑀸𑀤𑀸𑀬 𑀲𑀓𑁆𑀔𑀭𑀓𑀞𑀮𑀫𑁆𑀧𑀺 ‘‘𑀘𑀭𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀆𑀯𑀺𑀮𑁂𑀦𑀸𑀢𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀧𑀭𑀺𑀬𑁄𑀦𑀤𑁆𑀥𑁂𑀦. 𑀅𑀢𑁆𑀢𑀢𑁆𑀣𑀁 𑀯𑀸𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀅𑀢𑁆𑀣𑁄 𑀅𑀢𑁆𑀢𑀢𑁆𑀣𑁄 𑀦𑀸𑀫. 𑀅𑀢𑁆𑀢𑀦𑁄𑀯 𑀲𑀫𑁆𑀧𑀭𑀸𑀬𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀅𑀢𑁆𑀣𑁄 𑀧𑀭𑀢𑁆𑀣𑁄 𑀦𑀸𑀫 𑀳𑁄𑀢𑀺. 𑀲𑁄 𑀳𑀺 𑀧𑀭𑀢𑁆𑀣 𑀅𑀢𑁆𑀣𑁄𑀢𑀺 𑀧𑀭𑀢𑁆𑀣𑁄. 𑀢𑀤𑀼𑀪𑀬𑀁 𑀉𑀪𑀬𑀢𑁆𑀣𑁄 𑀦𑀸𑀫. 𑀅𑀧𑀺𑀘 𑀅𑀢𑁆𑀢𑀦𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁄𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀅𑀢𑁆𑀣𑁄 𑀅𑀢𑁆𑀢𑀢𑁆𑀣𑁄 𑀦𑀸𑀫, 𑀧𑀭𑀲𑁆𑀲 𑀢𑀸𑀤𑀺𑀲𑁄𑀯 𑀅𑀢𑁆𑀣𑁄 𑀧𑀭𑀢𑁆𑀣𑁄 𑀦𑀸𑀫, 𑀢𑀤𑀼𑀪𑀬𑀫𑁆𑀧𑀺 𑀉𑀪𑀬𑀢𑁆𑀣𑁄 𑀦𑀸𑀫. 𑀉𑀢𑁆𑀢𑀭𑀺𑀁 𑀯𑀸 𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑀸 𑀫𑀦𑀼𑀲𑁆𑀲𑀥𑀫𑁆𑀫𑀸 𑀉𑀢𑁆𑀢𑀭𑀺𑀁. 𑀅𑀬𑀜𑁆𑀳𑀺 𑀤𑀲𑀯𑀺𑀥𑁄 𑀥𑀫𑁆𑀫𑁄 𑀯𑀺𑀦𑀸𑀧𑀺 𑀅𑀜𑁆𑀜𑀁 𑀲𑀫𑀸𑀤𑀸𑀧𑀓𑀁 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑀸𑀯𑀲𑀸𑀦𑁂 𑀚𑀸𑀢𑀲𑀁𑀯𑁂𑀕𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀬𑀫𑁂𑀯 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀉𑀢𑁆𑀢𑀭𑀺𑀁 𑀧𑀦 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀦𑁆𑀢𑀺 𑀅𑀭𑀺𑀬𑀸𑀦𑀁 𑀬𑀼𑀢𑁆𑀢𑀁, 𑀅𑀭𑀺𑀬𑀪𑀸𑀯𑀁 𑀯𑀸 𑀓𑀸𑀢𑀼𑀁 𑀲𑀫𑀢𑁆𑀣𑀁 𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑀁 𑀯𑀺𑀲𑁂𑀲𑀁. 𑀜𑀸𑀡𑀫𑁂𑀯 𑀳𑀺 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁, 𑀤𑀲𑁆𑀲𑀦𑀝𑁆𑀞𑁂𑀦 𑀤𑀲𑁆𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀕𑁆𑀕𑀜𑀸𑀡𑀨𑀮𑀜𑀸𑀡𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁.

𑁪𑁬. 𑀙𑀝𑁆𑀞𑁂 𑀅𑀘𑁆𑀙𑁄𑀢𑀺 𑀅𑀩𑀳𑀮𑁄, 𑀧𑀲𑀦𑁆𑀦𑁄𑀢𑀺𑀧𑀺 𑀯𑀝𑁆𑀝𑀢𑀺. 𑀯𑀺𑀧𑁆𑀧𑀲𑀦𑁆𑀦𑁄𑀢𑀺 𑀲𑀼𑀝𑁆𑀞𑀼 𑀧𑀲𑀦𑁆𑀦𑁄. 𑀅𑀦𑀸𑀯𑀺𑀮𑁄𑀢𑀺 𑀦 𑀆𑀯𑀺𑀮𑁄, 𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑁄, 𑀨𑁂𑀡𑀧𑀼𑀩𑁆𑀩𑀼𑀴𑀲𑀗𑁆𑀔𑀲𑁂𑀯𑀸𑀮𑀧𑀡𑀓𑀯𑀺𑀭𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀸𑀯𑀺𑀮𑁂𑀦𑀸𑀢𑀺 𑀧𑀜𑁆𑀘𑀦𑀻𑀯𑀭𑀡𑀯𑀺𑀫𑀼𑀢𑁆𑀢𑁂𑀦. 𑀲𑁂𑀲𑀁 𑀘𑀢𑀼𑀢𑁆𑀣𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑀤𑁆𑀯𑀬𑁂 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁪𑁭. 𑀲𑀢𑁆𑀢𑀫𑁂 𑀭𑀼𑀓𑁆𑀔𑀚𑀸𑀢𑀸𑀦𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦𑀁, 𑀭𑀼𑀓𑁆𑀔𑀚𑀸𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀭𑀼𑀓𑁆𑀔𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀫𑀼𑀤𑀼𑀢𑀸𑀬𑀸𑀢𑀺 𑀫𑀼𑀤𑀼𑀪𑀸𑀯𑁂𑀦. 𑀓𑁄𑀘𑀺 𑀳𑀺 𑀭𑀼𑀓𑁆𑀔𑁄 𑀯𑀡𑁆𑀡𑁂𑀦 𑀅𑀕𑁆𑀕𑁄 𑀳𑁄𑀢𑀺, 𑀓𑁄𑀘𑀺 𑀕𑀦𑁆𑀥𑁂𑀦, 𑀓𑁄𑀘𑀺 𑀭𑀲𑁂𑀦, 𑀓𑁄𑀘𑀺 𑀣𑀤𑁆𑀥𑀢𑀸𑀬. 𑀨𑀦𑁆𑀤𑀦𑁄 𑀧𑀦 𑀫𑀼𑀤𑀼𑀢𑀸𑀬 𑀘𑁂𑀯 𑀓𑀫𑁆𑀫𑀜𑁆𑀜𑀢𑀸𑀬 𑀘 𑀅𑀕𑁆𑀕𑁄 𑀲𑁂𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀦𑁆𑀢𑀺 𑀏𑀢𑁆𑀣 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀪𑀸𑀯𑀺𑀢𑀜𑁆𑀘𑁂𑀯 𑀧𑀼𑀦𑀧𑁆𑀧𑀼𑀦𑀓𑀢𑀜𑁆𑀘 𑀘𑀺𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀓𑀼𑀭𑀼𑀦𑁆𑀤𑀓𑀯𑀸𑀲𑀺 𑀨𑀼𑀲𑁆𑀲𑀫𑀺𑀢𑁆𑀢𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀏𑀓𑀦𑁆𑀢𑀁 𑀫𑀼𑀤𑀼 𑀘𑁂𑀯 𑀓𑀫𑁆𑀫𑀦𑀺𑀬𑀜𑁆𑀘 𑀘𑀺𑀢𑁆𑀢𑀁 𑀦𑀸𑀫 𑀅𑀪𑀺𑀜𑁆𑀜𑀸𑀧𑀸𑀤𑀓𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀫𑁂𑀯, 𑀆𑀯𑀼𑀲𑁄’’𑀢𑀺.

𑁪𑁮. 𑀅𑀝𑁆𑀞𑀫𑁂 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀦𑁆𑀢𑀺 𑀏𑀯𑀁 𑀮𑀳𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀮𑀳𑀼𑀁 𑀦𑀺𑀭𑀼𑀚𑁆𑀛𑀦𑀓𑀁. 𑀬𑀸𑀯𑀜𑁆𑀘𑀸𑀢𑀺 𑀅𑀥𑀺𑀫𑀢𑁆𑀢𑀧𑀫𑀸𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀅𑀢𑀺𑀯𑀺𑀬 𑀦 𑀲𑀼𑀓𑀭𑀸𑀢𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀘𑀺𑀢𑁆𑀢𑀦𑁆𑀢𑀺 𑀏𑀓𑀘𑁆𑀘𑁂 𑀢𑀸𑀯 𑀆𑀘𑀭𑀺𑀬𑀸 ‘‘𑀪𑀯𑀗𑁆𑀕𑀘𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀇𑀥 𑀘𑀺𑀢𑁆𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀅𑀦𑁆𑀢𑀫𑀲𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀥𑀺𑀧𑁆𑀧𑁂𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀫𑀺𑀮𑀺𑀦𑁆𑀤𑀭𑀸𑀚𑀸 𑀥𑀫𑁆𑀫𑀓𑀣𑀺𑀓𑀁 𑀦𑀸𑀕𑀲𑁂𑀦𑀢𑁆𑀣𑁂𑀭𑀁 𑀧𑀼𑀘𑁆𑀙𑀺, ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀓𑀲𑁆𑀫𑀺𑀁 𑀅𑀘𑁆𑀙𑀭𑀸𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀲𑀘𑁂 𑀭𑀽𑀧𑀺𑀦𑁄 𑀅𑀲𑁆𑀲𑀼, 𑀓𑀻𑀯 𑀫𑀳𑀸𑀭𑀸𑀲𑀺 𑀪𑀯𑁂𑀬𑁆𑀬𑀸’’𑀢𑀺? ‘‘𑀯𑀸𑀳𑀲𑀢𑀸𑀦𑀁 𑀔𑁄, 𑀫𑀳𑀸𑀭𑀸𑀚, 𑀯𑀻𑀳𑀻𑀦𑀁 𑀅𑀟𑁆𑀠𑀘𑀽𑀴𑀜𑁆𑀘 𑀯𑀸𑀳𑀸 𑀯𑀻𑀳𑀺𑀲𑀢𑁆𑀢𑀫𑁆𑀩𑀡𑀸𑀦𑀺 𑀤𑁆𑀯𑁂 𑀘 𑀢𑀼𑀫𑁆𑀩𑀸 𑀏𑀓𑀘𑁆𑀙𑀭𑀸𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺, 𑀓𑀮𑀫𑁆𑀧𑀺 𑀦 𑀉𑀧𑁂𑀦𑁆𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀦𑁆𑀢𑀻’’𑀢𑀺 (𑀫𑀺. 𑀧. 𑁪.𑁧.𑁨). 𑀅𑀣 𑀓𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 ‘‘𑀉𑀧𑀫𑀸𑀧𑀺 𑀦 𑀲𑀼𑀓𑀭𑀸’’𑀢𑀺 𑀯𑀼𑀢𑁆𑀢𑀁? 𑀬𑀣𑁂𑀯 𑀳𑀺 𑀉𑀧𑀫𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀓𑀧𑁆𑀧𑀤𑀻𑀖𑀪𑀸𑀯𑀲𑁆𑀲 𑀬𑁄𑀚𑀦𑀺𑀓𑀧𑀩𑁆𑀩𑀢𑁂𑀦 𑀬𑁄𑀚𑀦𑀺𑀓𑀲𑀸𑀲𑀧𑀧𑀼𑀡𑁆𑀡𑀦𑀕𑀭𑁂𑀦, 𑀦𑀺𑀭𑀬𑀤𑀼𑀓𑁆𑀔𑀲𑁆𑀲 𑀲𑀢𑁆𑀢𑀺𑀲𑀢𑀸𑀳𑀢𑁄𑀧𑀫𑁂𑀦, 𑀲𑀕𑁆𑀕𑀲𑀼𑀔𑀲𑁆𑀲 𑀘 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀫𑀸 𑀓𑀢𑀸, 𑀏𑀯𑀫𑀺𑀥𑀸𑀧𑀺 𑀓𑀸𑀢𑀩𑁆𑀩𑀸𑀢𑀺? 𑀢𑀢𑁆𑀣 ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀸 𑀓𑀸𑀢𑀼’’𑀦𑁆𑀢𑀺 𑀏𑀯𑀁 𑀧𑀼𑀘𑁆𑀙𑀸𑀯𑀲𑁂𑀦 𑀉𑀧𑀫𑀸 𑀓𑀢𑀸, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀘𑁆𑀙𑀸𑀬 𑀅𑀪𑀸𑀯𑁂𑀦 𑀦 𑀓𑀢𑀸. 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀺𑀢𑁆𑀢𑀭𑀸𑀲𑀺 𑀦𑀸𑀫 𑀓𑀣𑀺𑀢𑁄𑀢𑀺.

𑁪𑁯. 𑀦𑀯𑀫𑁂 𑀧𑀪𑀲𑁆𑀲𑀭𑀦𑁆𑀢𑀺 𑀧𑀡𑁆𑀟𑀭𑀁 𑀧𑀭𑀺𑀲𑀼𑀤𑁆𑀥𑀁. 𑀘𑀺𑀢𑁆𑀢𑀦𑁆𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀓𑀺𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀯𑀡𑁆𑀡𑁄 𑀦𑀸𑀫 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀦𑀻𑀮𑀸𑀤𑀻𑀦𑀜𑁆𑀳𑀺 𑀅𑀜𑁆𑀜𑀢𑀭𑀯𑀡𑁆𑀡𑀁 𑀯𑀸 𑀳𑁄𑀢𑀼 𑀅𑀯𑀡𑁆𑀡𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀧𑀭𑀺𑀲𑀼𑀤𑁆𑀥𑀢𑀸𑀬 ‘‘𑀧𑀪𑀲𑁆𑀲𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑁆𑀧𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀧𑀪𑀲𑁆𑀲𑀭𑀁. 𑀢𑀜𑁆𑀘 𑀔𑁄𑀢𑀺 𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀆𑀕𑀦𑁆𑀢𑀼𑀓𑁂𑀳𑀻𑀢𑀺 𑀅𑀲𑀳𑀚𑀸𑀢𑁂𑀳𑀺 𑀧𑀘𑁆𑀙𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑀓𑁂𑀳𑀺. 𑀉𑀧𑀓𑁆𑀓𑀺𑀮𑁂𑀲𑁂𑀳𑀻𑀢𑀺 𑀭𑀸𑀕𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀁? 𑀬𑀣𑀸 𑀳𑀺 𑀲𑀻𑀮𑀯𑀦𑁆𑀢𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀫𑀸𑀢𑀸𑀧𑀺𑀢𑀭𑁄 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀯𑀸 𑀤𑀼𑀲𑁆𑀲𑀻𑀮𑀸𑀦𑀁 𑀤𑀼𑀭𑀸𑀘𑀸𑀭𑀸𑀦𑀁 𑀅𑀯𑀢𑁆𑀢𑀲𑀫𑁆𑀧𑀦𑁆𑀦𑀸𑀦𑀁 𑀧𑀼𑀢𑁆𑀢𑀸𑀦𑀜𑁆𑀘𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀜𑁆𑀘 𑀯𑀲𑁂𑀦 ‘‘𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀯𑀸 𑀦 𑀢𑀚𑁆𑀚𑁂𑀦𑁆𑀢𑀺 𑀦 𑀲𑀺𑀓𑁆𑀔𑀸𑀧𑁂𑀦𑁆𑀢𑀺 𑀦 𑀑𑀯𑀤𑀦𑁆𑀢𑀺 𑀦𑀸𑀦𑀼𑀲𑀸𑀲𑀦𑁆𑀢𑀻’’𑀢𑀺 𑀅𑀯𑀡𑁆𑀡𑀁 𑀅𑀓𑀺𑀢𑁆𑀢𑀺𑀁 𑀮𑀪𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀫𑀸𑀢𑀸𑀧𑀺𑀢𑀭𑁄 𑀯𑀺𑀬 𑀘 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀯𑀺𑀬 𑀘 𑀪𑀯𑀗𑁆𑀕𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀧𑀼𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀢𑁂𑀲𑀁 𑀅𑀓𑀺𑀢𑁆𑀢𑀺𑀮𑀸𑀪𑁄 𑀯𑀺𑀬 𑀚𑀯𑀦𑀓𑁆𑀔𑀡𑁂 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀲𑀪𑀸𑀯𑀸𑀦𑀁 𑀮𑁄𑀪𑀲𑀳𑀕𑀢𑀸𑀤𑀻𑀦𑀁 𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀉𑀧𑁆𑀧𑀦𑁆𑀦𑁂𑀳𑀺 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀫𑁆𑀧𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺.

𑁫𑁦. 𑀤𑀲𑀫𑁂𑀧𑀺 𑀪𑀯𑀗𑁆𑀕𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀁. 𑀯𑀺𑀧𑁆𑀧𑀫𑀼𑀢𑁆𑀢𑀦𑁆𑀢𑀺 𑀚𑀯𑀦𑀓𑁆𑀔𑀡𑁂 𑀅𑀭𑀚𑁆𑀚𑀫𑀸𑀦𑀁 𑀅𑀤𑀼𑀲𑁆𑀲𑀫𑀸𑀦𑀁 𑀅𑀫𑀼𑀬𑁆𑀳𑀫𑀸𑀦𑀁 𑀢𑀺𑀳𑁂𑀢𑀼𑀓𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀓𑀼𑀲𑀮𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀇𑀥𑀸𑀧𑀺 𑀬𑀣𑀸 𑀲𑀻𑀮𑀯𑀦𑁆𑀢𑀸𑀦𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑀸𑀦𑀁 𑀧𑀼𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀫𑀸𑀢𑀸𑀤𑀬𑁄 ‘‘𑀲𑁄𑀪𑀦𑀸 𑀏𑀢𑁂𑀬𑁂𑀯 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑀸𑀤𑀬𑁄 𑀲𑀺𑀓𑁆𑀔𑀸𑀧𑁂𑀦𑁆𑀢𑀺 𑀑𑀯𑀤𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑀻’’𑀢𑀺 𑀯𑀡𑁆𑀡𑀓𑀺𑀢𑁆𑀢𑀺𑀮𑀸𑀪𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀁 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀓𑀼𑀲𑀮𑀘𑀺𑀢𑁆𑀢𑀯𑀲𑁂𑀦 𑀇𑀤𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀧𑀡𑀺𑀳𑀺𑀢𑀅𑀘𑁆𑀙𑀯𑀕𑁆𑀕𑀯𑀡𑁆𑀡𑀦𑀸.