𑁨. 𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀕𑁆𑀕𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀏𑀓𑀥𑀫𑁆𑀫𑀫𑁆𑀧𑀻𑀢𑀺 𑀏𑀢𑁆𑀣 ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁨𑁧) 𑀯𑀺𑀬 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸 𑀏𑀓𑀥𑀫𑁆𑀫𑀫𑁆𑀧𑀻𑀢𑀺 𑀦𑀺𑀲𑁆𑀲𑀢𑁆𑀢𑀁 𑀏𑀓𑀲𑀪𑀸𑀯𑀫𑁆𑀧𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀦𑀼𑀧𑁆𑀧𑀦𑁆𑀦𑁄𑀯𑀸𑀢𑀺 𑀏𑀢𑁆𑀣 𑀧𑀦 ‘‘𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬 (𑀫. 𑀦𑀺. 𑁧.𑁪𑁦𑁨; 𑀲𑀁. 𑀦𑀺. 𑁨.𑁧𑁧) 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸’’𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀲𑀫𑀼𑀘𑁆𑀘𑀬𑀢𑁆𑀣𑁄 𑀯𑀸𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄, 𑀦 𑀯𑀺𑀓𑀧𑁆𑀧𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑁂𑀦 𑀥𑀫𑁆𑀫𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀫𑀳𑀁 𑀬𑀣𑀸 𑀲𑀼𑀪𑀦𑀺𑀫𑀺𑀢𑁆𑀢𑀁, 𑀏𑀯𑀁 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀻𑀢𑀺. 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑁄𑀢𑀺 𑀅𑀚𑀸𑀢𑁄 𑀅𑀲𑀜𑁆𑀚𑀸𑀢𑁄 𑀅𑀧𑀸𑀢𑀼𑀪𑀽𑀢𑁄 𑀅𑀲𑀫𑀼𑀤𑀸𑀕𑀢𑁄. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 ‘‘𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁫𑁬) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀢𑀺 𑀧𑀸𑀢𑀼𑀪𑀯𑀢𑀺. 𑀲𑁄 𑀧𑀦𑁂𑀲 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑀸 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀦𑀢𑁆𑀣𑀺.

𑀢𑀢𑁆𑀣 𑀏𑀓𑀘𑁆𑀘𑀲𑁆𑀲 𑀯𑀢𑁆𑀢𑀯𑀲𑁂𑀦 𑀓𑀺𑀮𑁂𑀲𑁄 𑀦 𑀲𑀫𑀼𑀤𑀸𑀘𑀭𑀢𑀺, 𑀏𑀓𑀘𑁆𑀘𑀲𑁆𑀲 𑀕𑀦𑁆𑀣𑀥𑀼𑀢𑀗𑁆𑀕𑀲𑀫𑀸𑀥𑀺- 𑀯𑀺𑀧𑀲𑁆𑀲𑀦𑀸𑀦𑀯𑀓𑀫𑁆𑀫𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦. 𑀓𑀣𑀁? 𑀏𑀓𑀘𑁆𑀘𑁄 𑀳𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀤𑁆𑀯𑁂𑀅𑀲𑀻𑀢𑀺 𑀔𑀼𑀤𑁆𑀤𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀧𑀸𑀦𑀻𑀬𑀫𑀸𑀴𑀓𑀉𑀧𑁄𑀲𑀣𑀸𑀕𑀸𑀭𑀆𑀕𑀦𑁆𑀢𑀼𑀓𑀕𑀫𑀺𑀓𑀯𑀢𑁆𑀢𑀸𑀦𑀺 𑀘 𑀓𑀭𑁄𑀦𑁆𑀢𑀲𑁆𑀲𑁂𑀯 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀯𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑀺𑀦𑁆𑀦𑀯𑀢𑁆𑀢𑀲𑁆𑀲 𑀘𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀜𑁆𑀘𑁂𑀯 𑀲𑀢𑀺𑀯𑁄𑀲𑁆𑀲𑀕𑁆𑀕𑀜𑁆𑀘 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀕𑀦𑁆𑀣𑀬𑀼𑀢𑁆𑀢𑁄 𑀳𑁄𑀢𑀺, 𑀏𑀓𑀫𑁆𑀧𑀺 𑀦𑀺𑀓𑀸𑀬𑀁 𑀕𑀡𑁆𑀳𑀸𑀢𑀺 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀘𑀢𑁆𑀢𑀸𑀭𑁄𑀧𑀺 𑀧𑀜𑁆𑀘𑀧𑀺. 𑀢𑀲𑁆𑀲 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀅𑀢𑁆𑀣𑀯𑀲𑁂𑀦 𑀧𑀸𑀴𑀺𑀯𑀲𑁂𑀦 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀯𑀸𑀘𑁂𑀦𑁆𑀢𑀲𑁆𑀲 𑀤𑁂𑀲𑁂𑀦𑁆𑀢𑀲𑁆𑀲 𑀧𑀓𑀸𑀲𑁂𑀦𑁆𑀢𑀲𑁆𑀲 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀕𑀦𑁆𑀣𑀓𑀫𑁆𑀫𑀁 𑀧𑀳𑀸𑀬 𑀓𑀼𑀲𑀻𑀢𑀲𑁆𑀲 𑀘𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀥𑀼𑀢𑀗𑁆𑀕𑀥𑀭𑁄 𑀳𑁄𑀢𑀺, 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀢𑀲𑁆𑀲 𑀧𑀦 𑀥𑀼𑀢𑀗𑁆𑀕𑀕𑀼𑀡𑁂 𑀧𑀭𑀺𑀳𑀭𑀦𑁆𑀢𑀲𑁆𑀲 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀥𑀼𑀢𑀗𑁆𑀕𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑀲𑁆𑀲 𑀘𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀡𑁆𑀡𑀯𑀲𑀻 𑀳𑁄𑀢𑀺, 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀆𑀯𑀚𑁆𑀚𑀦𑀯𑀲𑀺𑀆𑀤𑀻𑀦𑀁 𑀯𑀲𑁂𑀦 𑀯𑀺𑀳𑀭𑀦𑁆𑀢𑀲𑁆𑀲 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀯𑀸 𑀯𑀺𑀲𑁆𑀲𑀝𑁆𑀞𑀚𑁆𑀛𑀸𑀦𑀲𑁆𑀲 𑀯𑀸 𑀪𑀲𑁆𑀲𑀸𑀤𑀻𑀲𑀼 𑀅𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀯𑀺𑀧𑀲𑁆𑀲𑀓𑁄 𑀳𑁄𑀢𑀺, 𑀲𑀢𑁆𑀢𑀲𑀼 𑀯𑀸 𑀅𑀦𑀼𑀧𑀲𑁆𑀲𑀦𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 𑀯𑀸 𑀫𑀳𑀸𑀯𑀺𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀭𑀢𑀺. 𑀢𑀲𑁆𑀲𑁂𑀯𑀁 𑀯𑀺𑀳𑀭𑀢𑁄 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀁 𑀧𑀳𑀸𑀬 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀲𑁆𑀲 𑀯𑀺𑀳𑀭𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀦𑀯𑀓𑀫𑁆𑀫𑀺𑀓𑁄 𑀳𑁄𑀢𑀺, 𑀉𑀧𑁄𑀲𑀣𑀸𑀕𑀸𑀭𑀪𑁄𑀚𑀦𑀲𑀸𑀮𑀸𑀤𑀻𑀦𑀺 𑀓𑀸𑀭𑁂𑀢𑀺. 𑀢𑀲𑁆𑀲 𑀢𑁂𑀲𑀁 𑀉𑀧𑀓𑀭𑀡𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀦𑀯𑀓𑀫𑁆𑀫𑁂 𑀦𑀺𑀝𑁆𑀞𑀺𑀢𑁂 𑀯𑀸 𑀯𑀺𑀲𑁆𑀲𑀝𑁆𑀞𑁂 𑀯𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀏𑀓𑀘𑁆𑀘𑁄 𑀧𑀦 𑀩𑁆𑀭𑀳𑁆𑀫𑀮𑁄𑀓𑀸 𑀆𑀕𑀢𑁄 𑀲𑀼𑀤𑁆𑀥𑀲𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀲 𑀅𑀦𑀸𑀲𑁂𑀯𑀦𑀢𑀸𑀬 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀮𑀤𑁆𑀥𑀸𑀲𑁂𑀯𑀦𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀏𑀯𑀁 𑀢𑀸𑀯 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀣𑀁 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦? 𑀇𑀥𑁂𑀓𑀘𑁆𑀘𑁄 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀫𑀦𑀸𑀧𑀺𑀬𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀮𑀪𑀢𑀺, 𑀢𑀲𑁆𑀲 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀢𑀺𑀯𑁄𑀲𑁆𑀲𑀕𑁆𑀕𑁂 𑀆𑀕𑀫𑁆𑀫 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀉𑀧𑁆𑀧𑀦𑁆𑀦𑁄𑀢𑀺 𑀚𑀸𑀢𑁄 𑀲𑀜𑁆𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀧𑀸𑀢𑀼𑀪𑀽𑀢𑁄. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬 𑀭𑀸𑀲𑀺𑀪𑀸𑀯𑀸𑀬. 𑀢𑀢𑁆𑀣 𑀲𑀓𑀺𑀁 𑀉𑀧𑁆𑀧𑀦𑁆𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀲𑀓𑀺𑀁 𑀦𑀺𑀭𑀼𑀤𑁆𑀥𑁄 𑀯𑀸 𑀲𑁆𑀯𑁂𑀯 𑀧𑀼𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀁. 𑀏𑀓𑀲𑁆𑀫𑀺𑀁 𑀧𑀦 𑀦𑀺𑀭𑀼𑀤𑁆𑀥𑁂 𑀢𑀲𑁆𑀫𑀺𑀁 𑀯𑀸 𑀆𑀭𑀫𑁆𑀫𑀡𑁂 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀆𑀭𑀫𑁆𑀫𑀡𑁂 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀢𑀺 𑀦𑀸𑀫.

𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀭𑀸𑀕𑀝𑁆𑀞𑀸𑀦𑀺𑀬𑀁 𑀆𑀭𑀫𑁆𑀫𑀡𑀁. ‘‘𑀲𑀦𑀺𑀫𑀺𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀦𑀺𑀫𑀺𑀢𑁆𑀢𑀸’’𑀢𑀺 𑀏𑀢𑁆𑀣 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀘𑁆𑀘𑀬𑀲𑁆𑀲 𑀦𑀸𑀫𑀁. ‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺𑀓𑀸𑀢𑀩𑁆𑀩𑀸𑀦𑀻’’𑀢𑀺 (𑀫. 𑀦𑀺. 𑁧.𑁨𑁧𑁬) 𑀏𑀢𑁆𑀣 𑀓𑀸𑀭𑀡𑀲𑁆𑀲. ‘‘𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀻’’𑀢𑀺 (𑀅. 𑀦𑀺. 𑁯.𑁩𑁫) 𑀏𑀢𑁆𑀣 𑀲𑀫𑀸𑀥𑀺𑀲𑁆𑀲. ‘‘𑀬𑀁 𑀦𑀺𑀫𑀺𑀢𑁆𑀢𑀁 𑀆𑀕𑀫𑁆𑀫 𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁬.𑁨𑁭) 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀬. 𑀇𑀥 𑀧𑀦 𑀭𑀸𑀕𑀝𑁆𑀞𑀸𑀦𑀺𑀬𑁄 𑀇𑀝𑁆𑀞𑀸𑀭𑀫𑁆𑀫𑀡𑀥𑀫𑁆𑀫𑁄 ‘‘𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄𑀢𑀺. ‘‘𑀢𑀢𑁆𑀣 𑀓𑀢𑀫𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄? 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺, 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑁄, 𑀲𑀘𑁆𑀘𑀯𑀺𑀧𑁆𑀧𑀝𑀺𑀓𑀽𑀮𑁂𑀦 𑀯𑀸 𑀘𑀺𑀢𑁆𑀢𑀲𑁆𑀲 𑀆𑀯𑀚𑁆𑀚𑀦𑀸 𑀅𑀦𑁆𑀯𑀸𑀯𑀚𑁆𑀚𑀦𑀸 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’’𑀢𑀺 (𑀯𑀺𑀪. 𑁯𑁩𑁬) 𑀇𑀫𑀲𑁆𑀲 𑀫𑀦𑀲𑀺𑀓𑀸𑀭𑀲𑁆𑀲 𑀯𑀲𑁂𑀦 𑀅𑀦𑀼𑀧𑀸𑀬𑁂𑀦 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀸𑀢𑀺.

𑁧𑁨. 𑀤𑀼𑀢𑀺𑀬𑁂 𑀩𑁆𑀬𑀸𑀧𑀸𑀤𑁄𑀢𑀺 𑀪𑀢𑁆𑀢𑀩𑁆𑀬𑀸𑀧𑀢𑁆𑀢𑀺 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀚𑁆𑀚𑀦𑀁 𑀧𑀓𑀢𑀺𑀯𑀺𑀚𑀳𑀦𑀪𑀸𑀯𑁄. ‘‘𑀢𑀢𑁆𑀣 𑀓𑀢𑀫𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁? 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀻’’𑀢𑀺 (𑀥. 𑀲. 𑁧𑁧𑁬𑁦) 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑀲𑁆𑀲 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀝𑀺𑀖𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀦𑀺𑀝𑁆𑀞𑀁 𑀦𑀺𑀫𑀺𑀢𑁆𑀢𑀁. 𑀧𑀝𑀺𑀖𑀲𑁆𑀲𑀧𑀺 𑀧𑀝𑀺𑀖𑀸𑀭𑀫𑁆𑀫𑀡𑀲𑁆𑀲𑀧𑀺 𑀏𑀢𑀁 𑀅𑀥𑀺𑀯𑀘𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀧𑀝𑀺𑀖𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁, 𑀧𑀝𑀺𑀖𑀸𑀭𑀫𑁆𑀫𑀡𑁄𑀧𑀺 𑀥𑀫𑁆𑀫𑁄 𑀧𑀝𑀺𑀖𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺. 𑀢𑀢𑁆𑀣 𑀢𑀢𑁆𑀣 𑀳𑀺 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫𑀸𑀢𑀺.

𑁧𑁩. 𑀢𑀢𑀺𑀬𑁂 𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀣𑀺𑀦𑀜𑁆𑀘𑁂𑀯 𑀫𑀺𑀤𑁆𑀥𑀜𑁆𑀘. 𑀢𑁂𑀲𑀼 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸 𑀣𑀺𑀦𑀁, 𑀆𑀮𑀲𑀺𑀬𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀅𑀓𑀫𑁆𑀫𑀜𑁆𑀜𑀢𑀸 𑀫𑀺𑀤𑁆𑀥𑀁, 𑀓𑀧𑀺𑀫𑀺𑀤𑁆𑀥𑀲𑁆𑀲 𑀧𑀘𑀮𑀸𑀬𑀺𑀓𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀪𑀺𑀦𑁆𑀦𑀫𑁆𑀧𑀺 ‘‘𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸. 𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁨-𑁧𑁧𑁬𑁩) 𑀦𑀬𑁂𑀦 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀢𑀻𑀢𑀺𑀆𑀤𑀻𑀦𑀺 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀢𑁆𑀣 𑀓𑀢𑀫𑀸 𑀅𑀭𑀢𑀺? 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀅𑀭𑀢𑀺𑀢𑀸 𑀅𑀦𑀪𑀺𑀭𑀢𑀺 𑀅𑀦𑀪𑀺𑀭𑀫𑀦𑀸 𑀉𑀓𑁆𑀓𑀡𑁆𑀞𑀺𑀢𑀸 𑀧𑀭𑀺𑀢𑀲𑁆𑀲𑀺𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀭𑀢𑀺. 𑀢𑀢𑁆𑀣 𑀓𑀢𑀫𑀸 𑀢𑀦𑁆𑀤𑀻? 𑀬𑀸 𑀢𑀦𑁆𑀤𑀻 𑀢𑀦𑁆𑀤𑀺𑀬𑀦𑀸 𑀢𑀦𑁆𑀤𑀺𑀫𑀦𑀢𑀸 𑀆𑀮𑀲𑁆𑀲𑀁 𑀆𑀮𑀲𑁆𑀲𑀸𑀬𑀦𑀸 𑀆𑀮𑀲𑁆𑀲𑀸𑀬𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀢𑀦𑁆𑀤𑀻. 𑀢𑀢𑁆𑀣 𑀓𑀢𑀫𑀸 𑀯𑀺𑀚𑀫𑁆𑀪𑀺𑀢𑀸? 𑀬𑀸 𑀓𑀸𑀬𑀲𑁆𑀲 𑀚𑀫𑁆𑀪𑀦𑀸 𑀯𑀺𑀚𑀫𑁆𑀪𑀦𑀸 𑀆𑀦𑀫𑀦𑀸 𑀯𑀺𑀦𑀫𑀦𑀸 𑀲𑀦𑁆𑀦𑀫𑀦𑀸 𑀧𑀡𑀫𑀦𑀸 𑀩𑁆𑀬𑀸𑀥𑀺𑀬𑀓𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀚𑀫𑁆𑀪𑀺𑀢𑀸. 𑀢𑀢𑁆𑀣 𑀓𑀢𑀫𑁄 𑀪𑀢𑁆𑀢𑀲𑀫𑁆𑀫𑀤𑁄? 𑀬𑀸 𑀪𑀼𑀢𑁆𑀢𑀸𑀯𑀺𑀲𑁆𑀲 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀓𑀺𑀮𑀫𑀣𑁄 𑀪𑀢𑁆𑀢𑀧𑀭𑀺𑀴𑀸𑀳𑁄 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀢𑁆𑀢𑀲𑀫𑁆𑀫𑀤𑁄. 𑀢𑀢𑁆𑀣 𑀓𑀢𑀫𑀁 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸 𑀮𑀻𑀦𑀁 𑀮𑀻𑀬𑀦𑀸 𑀮𑀻𑀬𑀺𑀢𑀢𑁆𑀢𑀁 𑀣𑀺𑀦𑀁 𑀣𑀺𑀬𑀦𑀸 𑀣𑀺𑀬𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲, 𑀇𑀤𑀁 𑀯𑀼𑀘𑁆𑀘𑀢𑀺 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢’’𑀦𑁆𑀢𑀺 (𑀯𑀺𑀪. 𑁮𑁫𑁬, 𑁮𑁫𑁭, 𑁮𑁫𑁯, 𑁮𑁬𑁦).

𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲 𑀲𑀳𑀚𑀸𑀢𑀯𑀲𑁂𑀦𑀸𑀧𑀺 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀧𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁 𑀅𑀢𑁆𑀢𑀦𑁄𑀯 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀦 𑀳𑁄𑀢𑀺, 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀦 𑀳𑁄𑀢𑀻𑀢𑀺.

𑁧𑁪. 𑀘𑀢𑀼𑀢𑁆𑀣𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀉𑀤𑁆𑀥𑀘𑁆𑀘𑀜𑁆𑀘𑁂𑀯 𑀓𑀼𑀓𑁆𑀓𑀼𑀘𑁆𑀘𑀜𑁆𑀘. 𑀢𑀢𑁆𑀣 𑀉𑀤𑁆𑀥𑀘𑁆𑀘𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀢𑀸𑀓𑀸𑀭𑁄. 𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫 𑀅𑀓𑀢𑀓𑀮𑁆𑀬𑀸𑀡𑀲𑁆𑀲 𑀓𑀢𑀧𑀸𑀧𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀛𑀸𑀦𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀅𑀯𑀽𑀧𑀲𑀫𑀺𑀢𑀘𑀺𑀢𑁆𑀢𑀲𑁆𑀲. 𑀅𑀬𑀁 𑀧𑀦 𑀅𑀯𑀽𑀧𑀲𑀫𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑁧𑁫. 𑀧𑀜𑁆𑀘𑀫𑁂 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁭) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑀮𑀓𑁆𑀔𑀡𑁄𑀬𑁂𑀯𑀸𑀢𑀺.

𑁧𑁬. 𑀙𑀝𑁆𑀞𑁂 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀘𑁆𑀙𑀦𑁆𑀤𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑀸𑀢𑀺 𑀤𑁆𑀯𑀻𑀳𑁂𑀯 𑀓𑀸𑀭𑀡𑁂𑀳𑀺 𑀅𑀦𑀼𑀧𑁆𑀧𑀦𑁆𑀦𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺, 𑀧𑀼𑀦 𑀳𑁂𑀢𑀼𑀁 𑀯𑀸 𑀧𑀘𑁆𑀘𑀬𑀁 𑀯𑀸 𑀦 𑀮𑀪𑀢𑀺. 𑀇𑀥𑀸𑀧𑀺 𑀯𑀢𑁆𑀢𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀅𑀲𑀫𑀼𑀤𑀸𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑁂 𑀬𑀼𑀢𑁆𑀢𑀲𑁆𑀲 𑀯𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺, 𑀯𑀢𑁆𑀢𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄 𑀳𑁄𑀢𑀺. 𑀲𑁄 𑀢𑀁 𑀢𑀣𑀸𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺 𑀫𑀺𑀮𑀓𑁆𑀔𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬.

𑀲𑁄 𑀓𑀺𑀭𑀸𑀬𑀲𑁆𑀫𑀸 𑀭𑁄𑀳𑀡𑀚𑀦𑀧𑀤𑁂 𑀕𑀸𑀫𑁂𑀡𑁆𑀟𑀯𑀸𑀮𑀫𑀳𑀸𑀯𑀺𑀳𑀸𑀭𑀲𑁆𑀲 𑀪𑀺𑀓𑁆𑀔𑀸𑀘𑀸𑀭𑁂 𑀦𑁂𑀲𑀸𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀯𑀬𑀁 𑀆𑀕𑀫𑁆𑀫 𑀓𑀢𑀖𑀭𑀸𑀯𑀸𑀲𑁄 ‘‘𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀅𑀤𑀽𑀳𑀮𑀲𑀢𑀁 𑀲𑀡𑁆𑀞𑀧𑁂𑀢𑁆𑀯𑀸 𑀧𑀸𑀲𑀲𑀢𑀁 𑀬𑁄𑀚𑁂𑀢𑁆𑀯𑀸 𑀲𑀽𑀮𑀲𑀢𑀁 𑀭𑁄𑀧𑁂𑀢𑁆𑀯𑀸 𑀩𑀳𑀼𑀁 𑀧𑀸𑀧𑀁 𑀆𑀬𑀽𑀳𑀦𑁆𑀢𑁄 𑀏𑀓𑀤𑀺𑀯𑀲𑀁 𑀕𑁂𑀳𑀢𑁄 𑀅𑀕𑁆𑀕𑀺𑀜𑁆𑀘 𑀮𑁄𑀡𑀜𑁆𑀘 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀕𑀢𑁄. 𑀧𑀸𑀲𑁂 𑀩𑀤𑁆𑀥𑀫𑀺𑀕𑀁 𑀯𑀥𑀺𑀢𑁆𑀯𑀸 𑀅𑀗𑁆𑀕𑀸𑀭𑀧𑀓𑁆𑀓𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀧𑀺𑀧𑀸𑀲𑀺𑀢𑁄 𑀳𑀼𑀢𑁆𑀯𑀸 𑀕𑀸𑀫𑁂𑀡𑁆𑀟𑀯𑀸𑀮𑀫𑀳𑀸𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑀧𑀸𑀦𑀻𑀬𑀫𑀸𑀴𑀓𑁂 𑀤𑀲𑀫𑀢𑁆𑀢𑁂𑀲𑀼 𑀧𑀸𑀦𑀻𑀬𑀖𑀝𑁂𑀲𑀼 𑀧𑀺𑀧𑀸𑀲𑀸𑀯𑀺𑀦𑁄𑀤𑀦𑀫𑀢𑁆𑀢𑀫𑁆𑀧𑀺 𑀧𑀸𑀦𑀻𑀬𑀁 𑀅𑀮𑀪𑀦𑁆𑀢𑁄, ‘‘𑀓𑀺𑀁 𑀦𑀸𑀫𑁂𑀢𑀁 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑁂 𑀧𑀺𑀧𑀸𑀲𑀸𑀬 𑀆𑀕𑀢𑀸𑀦𑀁 𑀧𑀺𑀧𑀸𑀲𑀸𑀯𑀺𑀦𑁄𑀤𑀦𑀫𑀢𑁆𑀢𑀁 𑀧𑀸𑀦𑀻𑀬𑀁 𑀦𑀢𑁆𑀣𑀻’’𑀢𑀺 𑀉𑀚𑁆𑀛𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀧𑀸𑀦𑀻𑀬𑀫𑀸𑀴𑀓𑁂 𑀤𑀲𑀫𑀢𑁆𑀢𑁂 𑀧𑀸𑀦𑀻𑀬𑀖𑀝𑁂 𑀧𑀽𑀭𑁂 𑀤𑀺𑀲𑁆𑀯𑀸 ‘‘𑀚𑀻𑀯𑀫𑀸𑀦𑀧𑁂𑀢𑀓𑀲𑀢𑁆𑀢𑁄 𑀅𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀉𑀧𑀸𑀲𑀓, 𑀲𑀘𑁂 𑀧𑀺𑀧𑀸𑀲𑀺𑀢𑁄𑀲𑀺, 𑀧𑀺𑀯 𑀧𑀸𑀦𑀻𑀬’’𑀦𑁆𑀢𑀺 𑀯𑀢𑁆𑀯𑀸 𑀓𑀼𑀝𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂𑀲𑀼 𑀆𑀲𑀺𑀜𑁆𑀘𑀺. 𑀢𑀲𑁆𑀲 𑀓𑀫𑁆𑀫𑀁 𑀧𑀝𑀺𑀘𑁆𑀘 𑀧𑀻𑀢𑀧𑀻𑀢𑀁 𑀧𑀸𑀦𑀻𑀬𑀁 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀫𑀺𑀯 𑀦𑀲𑁆𑀲𑀢𑀺, 𑀲𑀓𑀮𑁂𑀧𑀺 𑀖𑀝𑁂 𑀧𑀺𑀯𑀢𑁄 𑀧𑀺𑀧𑀸𑀲𑀸 𑀦 𑀧𑀘𑁆𑀙𑀺𑀚𑁆𑀚𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀬𑀸𑀯 𑀤𑀸𑀭𑀼𑀡𑀜𑁆𑀘 𑀢𑁂, 𑀉𑀧𑀸𑀲𑀓, 𑀓𑀫𑁆𑀫𑀁 𑀓𑀢𑀁, 𑀇𑀤𑀸𑀦𑁂𑀯 𑀧𑁂𑀢𑁄 𑀚𑀸𑀢𑁄, 𑀯𑀺𑀧𑀸𑀓𑁄 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺?

𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀮𑀤𑁆𑀥𑀲𑀁𑀯𑁂𑀕𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀸𑀦𑀺 𑀅𑀤𑀽𑀳𑀮𑀸𑀤𑀻𑀦𑀺 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑁂𑀕𑁂𑀦 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀲𑀢𑁆𑀣𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀤𑀻𑀧𑀓𑀫𑀺𑀕𑀧𑀓𑁆𑀔𑀺𑀦𑁄 𑀅𑀭𑀜𑁆𑀜𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀁 𑀧𑀘𑁆𑀘𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀤𑀼𑀓𑁆𑀓𑀭𑀸, 𑀆𑀯𑀼𑀲𑁄, 𑀧𑀩𑁆𑀩𑀚𑁆𑀚𑀸, 𑀓𑀣𑀁 𑀢𑁆𑀯𑀁 𑀧𑀩𑁆𑀩𑀚𑀺𑀲𑁆𑀲𑀲𑀻𑀢𑀺? 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀧𑀘𑁆𑀘𑀓𑁆𑀔𑀓𑀸𑀭𑀡𑀁 𑀤𑀺𑀲𑁆𑀯𑀸 𑀓𑀣𑀁 𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺? 𑀣𑁂𑀭𑁄 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀯𑀢𑁆𑀢𑀸𑀭𑀪𑀺𑀢𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀏𑀓𑀤𑀺𑀯𑀲𑀁 𑀤𑁂𑀯𑀤𑀽𑀢𑀲𑀼𑀢𑁆𑀢𑁂 ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀧𑀼𑀦 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁨𑁭𑁦; 𑀅. 𑀦𑀺. 𑁩.𑁩𑁬) 𑀇𑀫𑀁 𑀞𑀸𑀦𑀁 𑀲𑀼𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀭𑀸𑀲𑀺𑀁 𑀅𑀦𑀼𑀪𑀯𑀺𑀢𑀲𑀢𑁆𑀢𑀁 𑀧𑀼𑀦 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺, 𑀅𑀳𑁄 𑀪𑀸𑀭𑀺𑀬𑁄, 𑀪𑀦𑁆𑀢𑁂, 𑀫𑀳𑀸𑀦𑀺𑀭𑀬𑁄’’𑀢𑀺 𑀆𑀳. 𑀆𑀫𑀸𑀯𑀼𑀲𑁄, 𑀪𑀸𑀭𑀺𑀬𑁄𑀢𑀺. 𑀲𑀓𑁆𑀓𑀸, 𑀪𑀦𑁆𑀢𑁂, 𑀧𑀲𑁆𑀲𑀺𑀢𑀼𑀦𑁆𑀢𑀺? ‘‘𑀦 𑀲𑀓𑁆𑀓𑀸 𑀧𑀲𑁆𑀲𑀺𑀢𑀼𑀁, 𑀤𑀺𑀝𑁆𑀞𑀲𑀤𑀺𑀲𑀁 𑀓𑀸𑀢𑀼𑀁 𑀏𑀓𑀁 𑀓𑀸𑀭𑀡𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑁂 𑀲𑀫𑀸𑀤𑀧𑁂𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑁂 𑀅𑀮𑁆𑀮𑀤𑀸𑀭𑀼𑀭𑀸𑀲𑀺𑀁 𑀓𑀸𑀭𑁂𑀳𑀻𑀢𑀺. 𑀲𑁄 𑀢𑀣𑀸 𑀓𑀸𑀭𑁂𑀲𑀺. 𑀣𑁂𑀭𑁄 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀫𑀳𑀸𑀦𑀺𑀭𑀬𑀢𑁄 𑀔𑀚𑁆𑀚𑁄𑀧𑀦𑀓𑀫𑀢𑁆𑀢𑀁 𑀅𑀕𑁆𑀕𑀺𑀧𑀧𑀝𑀺𑀓𑀁 𑀦𑀻𑀳𑀭𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀢𑀲𑁆𑀲 𑀣𑁂𑀭𑀲𑁆𑀲 𑀤𑀸𑀭𑀼𑀭𑀸𑀲𑀺𑀫𑁆𑀳𑀺 𑀧𑀓𑁆𑀔𑀺𑀧𑀺. 𑀢𑀲𑁆𑀲 𑀢𑀢𑁆𑀣 𑀦𑀺𑀧𑀸𑀢𑁄 𑀘 𑀤𑀸𑀭𑀼𑀭𑀸𑀲𑀺𑀦𑁄 𑀛𑀸𑀬𑀺𑀢𑁆𑀯𑀸 𑀙𑀸𑀭𑀺𑀓𑀪𑀸𑀯𑀽𑀧𑀕𑀫𑀦𑀜𑁆𑀘 𑀅𑀧𑀘𑁆𑀙𑀸 𑀅𑀧𑀼𑀭𑀺𑀫𑀁 𑀅𑀳𑁄𑀲𑀺.

𑀲𑁄 𑀢𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀢𑀺 𑀥𑀼𑀭𑀸𑀦𑀺 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. 𑀆𑀯𑀼𑀲𑁄, 𑀯𑀺𑀧𑀲𑁆𑀲𑀦𑀸𑀥𑀼𑀭𑀁, 𑀕𑀦𑁆𑀣𑀥𑀼𑀭𑀦𑁆𑀢𑀺. ‘‘𑀪𑀦𑁆𑀢𑁂, 𑀕𑀦𑁆𑀣𑁄 𑀦𑀸𑀫 𑀧𑀝𑀺𑀩𑀮𑀲𑁆𑀲 𑀪𑀸𑀭𑁄, 𑀫𑀬𑁆𑀳𑀁 𑀧𑀦 𑀤𑀼𑀓𑁆𑀔𑀽𑀧𑀦𑀺𑀲𑀸 𑀲𑀤𑁆𑀥𑀸, 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀺 𑀓𑀫𑁆𑀫𑀝𑁆𑀞𑀸𑀦𑀁 𑀫𑁂 𑀤𑁂𑀣𑀸’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀣𑁂𑀭𑁄 ‘‘𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀲𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀢𑁆𑀢𑀜𑁆𑀘 𑀧𑀽𑀭𑁂𑀢𑀺. 𑀏𑀓𑀤𑀺𑀯𑀲𑀁 𑀘𑀺𑀢𑁆𑀢𑀮𑀧𑀩𑁆𑀩𑀢𑀫𑀳𑀸𑀯𑀺𑀳𑀸𑀭𑁂 𑀯𑀢𑁆𑀢𑀁 𑀓𑀭𑁄𑀢𑀺, 𑀏𑀓𑀤𑀺𑀯𑀲𑀁 𑀕𑀸𑀫𑁂𑀡𑁆𑀟𑀯𑀸𑀮𑀫𑀳𑀸𑀯𑀺𑀳𑀸𑀭𑁂, 𑀏𑀓𑀤𑀺𑀯𑀲𑀁 𑀕𑁄𑀘𑀭𑀕𑀸𑀫𑀫𑀳𑀸𑀯𑀺𑀳𑀸𑀭𑁂. 𑀣𑀺𑀦𑀫𑀺𑀤𑁆𑀥𑁂 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀯𑀢𑁆𑀢𑀧𑀭𑀺𑀳𑀸𑀦𑀺𑀪𑀬𑁂𑀦 𑀧𑀮𑀸𑀮𑀯𑀭𑀡𑀓𑀁 𑀢𑁂𑀫𑁂𑀢𑁆𑀯𑀸 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀧𑀸𑀤𑁂 𑀉𑀤𑀓𑁂 𑀑𑀢𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀘𑀺𑀢𑁆𑀢𑀮𑀧𑀩𑁆𑀩𑀢𑀫𑀳𑀸𑀯𑀺𑀳𑀸𑀭𑁂 𑀤𑁆𑀯𑁂 𑀬𑀸𑀫𑁂 𑀯𑀢𑁆𑀢𑀁 𑀓𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑀓𑀸𑀮𑁂 𑀦𑀺𑀤𑁆𑀤𑀸𑀬 𑀑𑀓𑁆𑀓𑀫𑀺𑀢𑀼𑀁 𑀆𑀭𑀤𑁆𑀥𑀸𑀬 𑀅𑀮𑁆𑀮𑀧𑀮𑀸𑀮𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀧𑀸𑀘𑀻𑀦𑀧𑀩𑁆𑀩𑀢𑀧𑀲𑁆𑀲𑁂 𑀲𑀸𑀫𑀡𑁂𑀭𑀲𑁆𑀲 𑀅𑀭𑀼𑀡𑀯𑀢𑀺𑀬𑀲𑀼𑀢𑁆𑀢𑀦𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑁋

‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

‘‘𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁮𑁫) 𑁋

𑀇𑀤𑀁 𑀞𑀸𑀦𑀁 𑀲𑀼𑀢𑁆𑀯𑀸 ‘‘𑀫𑀸𑀤𑀺𑀲𑀲𑁆𑀲 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀇𑀤𑀁 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀧𑀭𑀸𑀧𑀭𑀁 𑀯𑀸𑀬𑀫𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀘 𑀢𑀤𑁂𑀯 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳 𑁋

‘‘𑀅𑀮𑁆𑀮𑀁 𑀧𑀮𑀸𑀮𑀧𑀼𑀜𑁆𑀚𑀸𑀳𑀁, 𑀲𑀻𑀲𑁂𑀦𑀸𑀤𑀸𑀬 𑀘𑀗𑁆𑀓𑀫𑀺𑀁;

𑀧𑀢𑁆𑀢𑁄𑀲𑁆𑀫𑀺 𑀢𑀢𑀺𑀬𑀁 𑀞𑀸𑀦𑀁, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄’’𑀢𑀺.

𑀏𑀯𑀭𑀽𑀧𑀲𑁆𑀲 𑀯𑀢𑁆𑀢𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁄 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺.

𑀏𑀓𑀘𑁆𑀘𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀣𑁂 𑀬𑀼𑀢𑁆𑀢𑀲𑁆𑀲 𑀕𑀦𑁆𑀣𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀯𑀸𑀘𑁂𑀦𑁆𑀢𑀲𑁆𑀲 𑀤𑁂𑀲𑁂𑀦𑁆𑀢𑀲𑁆𑀲 𑀧𑀓𑀸𑀲𑁂𑀦𑁆𑀢𑀲𑁆𑀲 𑀘 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺, 𑀕𑀦𑁆𑀣𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺. 𑀲𑁄 𑀢𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺 𑀫𑀮𑀺𑀬𑀤𑁂𑀯𑀢𑁆𑀣𑁂𑀭𑁄 𑀯𑀺𑀬. 𑀲𑁄 𑀓𑀺𑀭𑀸𑀬𑀲𑁆𑀫𑀸 𑀢𑀺𑀯𑀲𑁆𑀲𑀪𑀺𑀓𑁆𑀔𑀼𑀓𑀸𑀮𑁂 𑀓𑀮𑁆𑀮𑀕𑀸𑀫𑀓𑁂 𑀫𑀡𑁆𑀟𑀮𑀸𑀭𑀸𑀫𑀫𑀳𑀸𑀯𑀺𑀳𑀸𑀭𑁂 𑀉𑀤𑁆𑀤𑁂𑀲𑀜𑁆𑀘 𑀕𑀡𑁆𑀳𑀸𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀘 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲𑁂𑀓𑀤𑀺𑀯𑀲𑀁 𑀓𑀮𑁆𑀮𑀕𑀸𑀫𑁂 𑀪𑀺𑀓𑁆𑀔𑀸𑀬 𑀘𑀭𑀢𑁄 𑀏𑀓𑀸 𑀉𑀧𑀸𑀲𑀺𑀓𑀸 𑀬𑀸𑀕𑀼𑀉𑀴𑀼𑀗𑁆𑀓𑀁 𑀤𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀣𑁂𑀭𑀁 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 ‘‘𑀓𑀢𑀭𑀕𑀸𑀫𑀯𑀸𑀲𑀺𑀓𑁄𑀲𑀺 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. 𑀫𑀡𑁆𑀟𑀮𑀸𑀭𑀸𑀫𑀫𑀳𑀸𑀯𑀺𑀳𑀸𑀭𑁂 𑀕𑀦𑁆𑀣𑀓𑀫𑁆𑀫𑀁 𑀓𑀭𑁄𑀫𑀺, 𑀉𑀧𑀸𑀲𑀺𑀓𑁂𑀢𑀺. 𑀢𑁂𑀦 𑀳𑀺 𑀢𑀸𑀢 𑀬𑀸𑀯 𑀕𑀦𑁆𑀣𑀓𑀫𑁆𑀫𑀁 𑀓𑀭𑁄𑀲𑀺, 𑀇𑀥𑁂𑀯 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀕𑀡𑁆𑀳𑀸𑀲𑀻𑀢𑀺. 𑀲𑁄 𑀢𑀁 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀢𑁆𑀣 𑀦𑀺𑀩𑀤𑁆𑀥𑀁 𑀪𑀺𑀓𑁆𑀔𑀁 𑀕𑀡𑁆𑀳𑀸𑀢𑀺, 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 ‘‘𑀲𑀼𑀔𑀁 𑀳𑁄𑀢𑀼, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀢𑀽’’𑀢𑀺 𑀧𑀤𑀤𑁆𑀯𑀬𑀫𑁂𑀯 𑀓𑀣𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀦𑁆𑀢𑁄𑀯𑀲𑁆𑀲𑁂 𑀢𑁂𑀫𑀸𑀲𑀁 𑀢𑀲𑁆𑀲𑀸𑀬𑁂𑀯 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀧𑀺𑀡𑁆𑀟𑀸𑀧𑀘𑀺𑀢𑀺𑀁 𑀓𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀦𑁂𑀯𑀸𑀲𑀺𑀓𑀫𑀳𑀸𑀣𑁂𑀭𑁄 𑀆𑀳 𑁋 ‘‘𑀆𑀯𑀼𑀲𑁄 𑀫𑀳𑀸𑀤𑁂𑀯, 𑀅𑀚𑁆𑀚 𑀯𑀺𑀳𑀸𑀭𑁂 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀲𑁆𑀲𑀢𑀺, 𑀢𑀲𑁆𑀲 𑀥𑀫𑁆𑀫𑀤𑀸𑀦𑀁 𑀤𑀤𑁂𑀬𑁆𑀬𑀸𑀲𑀻’’𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺.

𑀤𑀳𑀭𑀲𑀸𑀫𑀡𑁂𑀭𑀸 𑀉𑀧𑀸𑀲𑀺𑀓𑀸𑀬 𑀲𑀜𑁆𑀜𑀁 𑀅𑀤𑀁𑀲𑀼 𑁋 ‘‘𑀅𑀚𑁆𑀚 𑀢𑁂 𑀧𑀼𑀢𑁆𑀢𑁄 𑀥𑀫𑁆𑀫𑀁 𑀓𑀣𑁂𑀲𑁆𑀲𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀼𑀡𑁂𑀬𑁆𑀬𑀸𑀲𑀻’’𑀢𑀺. 𑀢𑀸𑀢𑀸, 𑀦 𑀲𑀩𑁆𑀩𑁂𑀯 𑀥𑀫𑁆𑀫𑀓𑀣𑀁 𑀚𑀸𑀦𑀦𑁆𑀢𑀺, 𑀫𑀫 𑀧𑀼𑀢𑁆𑀢𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑁆𑀳𑀁 𑀓𑀣𑁂𑀦𑁆𑀢𑁄 ‘‘𑀲𑀼𑀔𑀁 𑀳𑁄𑀢𑀼, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀢𑀽’’𑀢𑀺 𑀧𑀤𑀤𑁆𑀯𑀬𑀫𑁂𑀯 𑀓𑀣𑁂𑀲𑀺, 𑀫𑀸 𑀓𑁂𑀴𑀺𑀁 𑀓𑀭𑁄𑀣𑀸𑀢𑀺. 𑀫𑀸, 𑀢𑁆𑀯𑀁 𑀉𑀧𑀸𑀲𑀺𑀓𑁂, 𑀚𑀸𑀦𑀦𑀁 𑀯𑀸 𑀅𑀚𑀸𑀦𑀦𑀁 𑀯𑀸 𑀉𑀧𑀝𑁆𑀞𑀳𑀲𑁆𑀲𑀼, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀫𑁂𑀯 𑀲𑀼𑀡𑀸𑀳𑀻𑀢𑀺. 𑀉𑀧𑀸𑀲𑀺𑀓𑀸 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀧𑀭𑀺𑀲𑀦𑁆𑀢𑁂 𑀥𑀫𑁆𑀫𑀁 𑀲𑀼𑀡𑀫𑀸𑀦𑀸 𑀦𑀺𑀲𑀻𑀤𑀺. 𑀤𑀺𑀯𑀸𑀥𑀫𑁆𑀫𑀓𑀣𑀺𑀓𑁄 𑀘 𑀲𑀭𑀪𑀸𑀡𑀓𑁄 𑀘 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀜𑀢𑁆𑀯𑀸 𑀉𑀝𑁆𑀞𑀳𑀺𑀁𑀲𑀼. 𑀢𑀢𑁄 𑀫𑀮𑀺𑀬𑀤𑁂𑀯𑀢𑁆𑀣𑁂𑀭𑁄 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀯𑀢𑁆𑀯𑀸 𑁋 ‘‘𑀫𑀬𑀸 𑀫𑀳𑀸𑀉𑀧𑀸𑀲𑀺𑀓𑀸𑀬 𑀢𑀬𑁄 𑀫𑀸𑀲𑁂 𑀤𑁆𑀯𑀻𑀳𑁂𑀯 𑀧𑀤𑁂𑀳𑀺 𑀅𑀦𑀼𑀫𑁄𑀤𑀦𑀸 𑀓𑀢𑀸, 𑀅𑀚𑁆𑀚 𑀲𑀩𑁆𑀩𑀭𑀢𑁆𑀢𑀺𑀁 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀲𑀫𑁆𑀫𑀲𑀺𑀢𑁆𑀯𑀸 𑀢𑀲𑁆𑀲𑁂𑀯 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀓𑀣𑁂𑀲𑀺. 𑀅𑀭𑀼𑀡𑀼𑀕𑁆𑀕𑀫𑀦𑁂 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀫𑀳𑀸𑀉𑀧𑀸𑀲𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀧𑀭𑁄𑀧𑀺 𑀢𑀲𑁆𑀫𑀺𑀁𑀬𑁂𑀯 𑀫𑀳𑀸𑀯𑀺𑀳𑀸𑀭𑁂 𑀢𑀺𑀲𑁆𑀲𑀪𑀽𑀢𑀺𑀢𑁆𑀣𑁂𑀭𑁄 𑀦𑀸𑀫 𑀯𑀺𑀦𑀬𑀁 𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀝𑁆𑀞𑁄 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀮𑁄𑀪𑁄 𑀉𑀧𑁆𑀧𑀚𑁆𑀚𑀺, 𑀲𑁄 𑀧𑀢𑀺𑀝𑁆𑀞𑀺𑀢𑀧𑀸𑀤𑀁 𑀅𑀘𑀸𑀮𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀬𑀸𑀕𑀼𑀁 𑀉𑀧𑀝𑁆𑀞𑀸𑀓𑀤𑀳𑀭𑀲𑁆𑀲 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 ‘‘𑀅𑀬𑀁 𑀯𑀺𑀢𑀓𑁆𑀓𑁄 𑀯𑀟𑁆𑀠𑀫𑀸𑀦𑁄 𑀫𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀁𑀲𑀻𑀤𑀸𑀧𑁂𑀲𑁆𑀲𑀢𑀻’’𑀢𑀺 𑀢𑀢𑁄𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀆𑀳 𑁋 ‘‘𑀏𑀓𑁄 𑀫𑁂 𑀩𑁆𑀬𑀸𑀥𑀺 𑀉𑀧𑁆𑀧𑀦𑁆𑀦𑁄, 𑀅𑀳𑀁 𑀏𑀢𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀆𑀕𑀫𑀺𑀲𑁆𑀲𑀸𑀫𑀺, 𑀇𑀢𑀭𑀣𑀸 𑀦𑀸𑀕𑀫𑀺𑀲𑁆𑀲𑀸𑀫𑀺. 𑀢𑀼𑀫𑁆𑀳𑁂 𑀤𑀺𑀯𑀸 𑀉𑀤𑁆𑀤𑁂𑀲𑀜𑁆𑀘 𑀲𑀸𑀬𑀁 𑀉𑀤𑁆𑀤𑁂𑀲𑀜𑁆𑀘 𑀫𑀁 𑀑𑀮𑁄𑀓𑁂𑀢𑁆𑀯𑀸 𑀞𑀧𑁂𑀣, 𑀧𑀘𑁆𑀘𑀽𑀲𑀓𑀸𑀮𑁂 𑀉𑀤𑁆𑀤𑁂𑀲𑀁 𑀧𑀦 𑀫𑀸 𑀞𑀧𑀬𑀺𑀢𑁆𑀣𑀸’’𑀢𑀺 𑀏𑀯𑀁 𑀯𑀢𑁆𑀯𑀸 𑀫𑀮𑀬𑀯𑀸𑀲𑀺𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬 𑀧𑀭𑀺𑀪𑀡𑁆𑀟𑀁 𑀓𑀭𑁄𑀦𑁆𑀢𑁄 𑀢𑀁 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 ‘‘𑀧𑀝𑀺𑀲𑀸𑀫𑁂𑀳𑀺, 𑀆𑀯𑀼𑀲𑁄, 𑀢𑀯 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀆𑀳. 𑀪𑀦𑁆𑀢𑁂, 𑀏𑀓𑁄 𑀫𑁂 𑀩𑁆𑀬𑀸𑀥𑀺 𑀅𑀢𑁆𑀣𑀺, 𑀲𑀘𑁂 𑀢𑀼𑀫𑁆𑀳𑁂 𑀢𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑁄𑀣, 𑀧𑀝𑀺𑀲𑀸𑀫𑁂𑀲𑁆𑀲𑀸𑀫𑀻𑀢𑀺. 𑀆𑀯𑀼𑀲𑁄, 𑀉𑀧𑁆𑀧𑀦𑁆𑀦𑀁 𑀭𑁄𑀕𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀺, 𑀧𑀝𑀺𑀲𑀸𑀫𑁂𑀳𑀻𑀢𑀺. 𑀲𑀼𑀩𑁆𑀩𑀘𑁄 𑀪𑀺𑀓𑁆𑀔𑀼 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀅𑀚𑀸𑀦𑀺𑀢𑁆𑀯𑀸 𑀏𑀯𑀁 𑀦 𑀯𑀓𑁆𑀔𑀢𑀻’’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀣𑁂𑀭𑁄 ‘‘𑀭𑀸𑀕𑀘𑀭𑀺𑀢𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀲𑁄 𑀉𑀝𑁆𑀞𑀸𑀬 𑀧𑀢𑁆𑀢𑀘𑀻𑀯𑀭𑀁 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀣𑁂𑀭𑀁 𑀧𑀼𑀦𑀧𑁆𑀧𑀼𑀦𑀁 𑀯𑀦𑁆𑀤𑀺. 𑀓𑀺𑀁, 𑀆𑀯𑀼𑀲𑁄, 𑀫𑀳𑀸𑀪𑀽𑀢𑀺 𑀅𑀢𑀺𑀭𑁂𑀓𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀲𑀻𑀢𑀺? 𑀪𑀦𑁆𑀢𑁂, 𑀲𑀘𑁂 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂, 𑀇𑀤𑀁 𑀫𑁂 𑀧𑀘𑁆𑀙𑀺𑀫𑀤𑀲𑁆𑀲𑀦𑀦𑁆𑀢𑀺! 𑀕𑀘𑁆𑀙𑀸𑀯𑀼𑀲𑁄, 𑀫𑀳𑀸𑀪𑀽𑀢𑀺 𑀢𑀸𑀤𑀺𑀲𑀲𑁆𑀲 𑀬𑀼𑀢𑁆𑀢𑀬𑁄𑀕𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀦 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀸 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀤𑀼𑀮𑁆𑀮𑀪𑀦𑁆𑀢𑀺. 𑀲𑁄 𑀣𑁂𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀯𑀯𑀢𑁆𑀣𑀸𑀧𑀺𑀢𑀁 𑀙𑀦𑁆𑀦𑀁 𑀲𑁂𑀧𑀡𑁆𑀡𑀺𑀕𑀘𑁆𑀙𑀫𑀽𑀮𑀁 𑀕𑀦𑁆𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀧𑀘𑁆𑀘𑀽𑀲𑀓𑀸𑀮𑁂 𑀉𑀤𑁆𑀤𑁂𑀲𑀁 𑀲𑀫𑁆𑀧𑀸𑀧𑀼𑀡𑀺. 𑀏𑀯𑀭𑀽𑀧𑀸𑀦𑀁 𑀕𑀦𑁆𑀣𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀸𑀯 𑀳𑁄𑀦𑁆𑀢𑀺.

𑀏𑀓𑀘𑁆𑀘𑀲𑁆𑀲 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀥𑀼𑀢𑀗𑁆𑀕𑀸𑀦𑀺 𑀧𑀭𑀺𑀳𑀭𑀢𑁄 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺, 𑀥𑀼𑀢𑀗𑁆𑀕𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺. 𑀲𑁄 𑀢𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺 𑀕𑀸𑀫𑀦𑁆𑀢𑀧𑀩𑁆𑀪𑀸𑀭𑀯𑀸𑀲𑀻 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀯𑀺𑀬. 𑀣𑁂𑀭𑁄 𑀓𑀺𑀭 𑀫𑀳𑀸𑀕𑀸𑀫𑁂 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀢𑁂𑀧𑀺𑀝𑀓𑀁 𑀅𑀢𑁆𑀣𑀯𑀲𑁂𑀦 𑀘 𑀧𑀸𑀴𑀺𑀯𑀲𑁂𑀦 𑀘 𑀅𑀝𑁆𑀞𑀸𑀭𑀲 𑀫𑀳𑀸𑀕𑀡𑁂 𑀯𑀸𑀘𑁂𑀢𑀺. 𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀤𑀁 𑀲𑀼𑀔𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲𑀸’’𑀢𑀺. 𑀲𑁄 𑀆𑀯𑀚𑁆𑀚𑁂𑀦𑁆𑀢𑁄 𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀏𑀓𑁂𑀦𑀼𑀧𑀸𑀬𑁂𑀦 𑀣𑁂𑀭𑀲𑁆𑀲 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀣𑁂𑀭𑁄 ‘‘𑀓𑀺𑀁 𑀆𑀕𑀢𑁄𑀲𑀺, 𑀆𑀯𑀼𑀲𑁄, 𑀧𑀺𑀡𑁆𑀟𑀧𑀸𑀢𑀺𑀓𑀸’’𑀢𑀺 𑀆𑀳. ‘‘𑀲𑀘𑁂 𑀫𑁂 𑀑𑀓𑀸𑀲𑀁 𑀓𑀭𑀺𑀲𑁆𑀲𑀣, 𑀏𑀓𑀁 𑀥𑀫𑁆𑀫𑀧𑀤𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄𑀲𑁆𑀫𑀺, 𑀪𑀦𑁆𑀢𑁂𑀢𑀺. 𑀩𑀳𑀽, 𑀆𑀯𑀼𑀲𑁄, 𑀕𑀡𑁆𑀳𑀦𑁆𑀢𑀺, 𑀢𑀼𑀬𑁆𑀳𑀁 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺. 𑀲𑁄 𑀲𑀩𑁆𑀩𑁂𑀲𑀼 𑀭𑀢𑁆𑀢𑀺𑀤𑀺𑀯𑀲𑀪𑀸𑀕𑁂𑀲𑀼 𑀑𑀓𑀸𑀲𑀁 𑀅𑀮𑀪𑀦𑁆𑀢𑁄, ‘‘𑀪𑀦𑁆𑀢𑁂, 𑀏𑀯𑀁 𑀑𑀓𑀸𑀲𑁂 𑀅𑀲𑀢𑀺 𑀫𑀭𑀡𑀲𑁆𑀲 𑀓𑀣𑀁 𑀑𑀓𑀸𑀲𑀁 𑀮𑀪𑀺𑀲𑁆𑀲𑀣𑀸’’𑀢𑀺 𑀆𑀳. 𑀢𑀤𑀸 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀸𑀬𑀁 𑀉𑀤𑁆𑀤𑁂𑀲𑀢𑁆𑀣𑀸𑀬 𑀆𑀕𑀢𑁄, 𑀫𑀬𑁆𑀳𑀁 𑀧𑀦𑁂𑀲 𑀲𑀁𑀯𑁂𑀕𑀚𑀦𑀦𑀢𑁆𑀣𑀸𑀬 𑀆𑀕𑀢𑁄’’𑀢𑀺. 𑀲𑁄𑀧𑀺 𑀣𑁂𑀭𑁄 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫, 𑀪𑀦𑁆𑀢𑁂, 𑀫𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀫𑀡𑀺𑀯𑀡𑁆𑀡𑁂 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀕𑀫𑀸𑀲𑀺.

𑀣𑁂𑀭𑁄 𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀢𑀲𑀁𑀯𑁂𑀕𑁄 𑀤𑀺𑀯𑀸 𑀉𑀤𑁆𑀤𑁂𑀲𑀜𑁆𑀘 𑀲𑀸𑀬𑀁 𑀉𑀤𑁆𑀤𑁂𑀲𑀜𑁆𑀘 𑀯𑀸𑀘𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀳𑀢𑁆𑀣𑀧𑀸𑀲𑁂 𑀞𑀧𑁂𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀉𑀤𑁆𑀤𑁂𑀲𑀁 𑀕𑀳𑁂𑀢𑁆𑀯𑀸 𑀑𑀢𑀭𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀑𑀢𑀺𑀡𑁆𑀡𑁄 𑀢𑁂𑀭𑀲 𑀥𑀼𑀢𑀕𑀼𑀡𑁂 𑀧𑀭𑀺𑀧𑀼𑀡𑁆𑀡𑁂 𑀅𑀥𑀺𑀝𑁆𑀞𑀸𑀬 𑀕𑀸𑀫𑀦𑁆𑀢𑀧𑀩𑁆𑀪𑀸𑀭𑀲𑁂𑀦𑀸𑀲𑀦𑀁 𑀕𑀦𑁆𑀢𑁆𑀯𑀸 𑀧𑀩𑁆𑀪𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 ‘‘𑀅𑀭𑀳𑀢𑁆𑀢𑀁 𑀅𑀧𑀢𑁆𑀯𑀸 𑀫𑀜𑁆𑀘𑁂 𑀧𑀺𑀝𑁆𑀞𑀺𑀁 𑀦 𑀧𑀲𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 𑀘𑀗𑁆𑀓𑀫𑀁 𑀑𑀢𑀭𑀺. 𑀢𑀲𑁆𑀲 ‘‘𑀅𑀚𑁆𑀚 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀺 𑀅𑀚𑁆𑀚 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀖𑀝𑁂𑀦𑁆𑀢𑀲𑁆𑀲𑁂𑀯 𑀧𑀯𑀸𑀭𑀡𑀸 𑀲𑀫𑁆𑀧𑀢𑁆𑀢𑀸. 𑀲𑁄 𑀧𑀯𑀸𑀭𑀡𑀸𑀬 𑀉𑀧𑀓𑀝𑁆𑀞𑀸𑀬 ‘‘𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀧𑀳𑀸𑀬 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀢𑀺𑀯𑀺𑀬 𑀓𑀺𑀮𑀫𑀢𑀺. 𑀲𑁄 𑀢𑀸𑀬 𑀧𑀯𑀸𑀭𑀡𑀸𑀬 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀫𑀸𑀤𑀺𑀲𑁄𑀧𑀺 𑀦𑀸𑀫 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀦 𑀮𑀪𑀢𑀺, 𑀬𑀸𑀯 𑀤𑀼𑀮𑁆𑀮𑀪𑀜𑁆𑀘 𑀯𑀢𑀺𑀤𑀁 𑀅𑀭𑀳𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀞𑀸𑀦𑀘𑀗𑁆𑀓𑀫𑀩𑀳𑀼𑀮𑁄 𑀳𑀼𑀢𑁆𑀯𑀸 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀫𑀚𑁆𑀛𑁂 𑀞𑀺𑀢𑀁 𑀧𑀼𑀡𑁆𑀡𑀘𑀦𑁆𑀤𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀲𑀼𑀤𑁆𑀥𑀁, 𑀉𑀤𑀸𑀳𑀼 𑀫𑀬𑁆𑀳𑀁 𑀲𑀻𑀮’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀘𑀦𑁆𑀤𑀫𑀡𑁆𑀟𑀮𑁂 𑀲𑀲𑀮𑀓𑁆𑀔𑀡𑀁 𑀧𑀜𑁆𑀜𑀸𑀬𑀢𑀺, 𑀫𑀬𑁆𑀳𑀁 𑀧𑀦 𑀉𑀧𑀲𑀫𑁆𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑁆𑀚𑀤𑀺𑀯𑀲𑀸 𑀲𑀻𑀮𑀲𑁆𑀫𑀺𑀁 𑀓𑀸𑀴𑀓𑀁 𑀯𑀸 𑀢𑀺𑀮𑀓𑁄 𑀯𑀸 𑀦𑀢𑁆𑀣𑀻’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄 𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀏𑀯𑀭𑀽𑀧𑀲𑁆𑀲 𑀥𑀼𑀢𑀗𑁆𑀕𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄 𑀓𑀺𑀮𑁂𑀲𑁄 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺.

𑀏𑀓𑀘𑁆𑀘𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀧𑀚𑁆𑀚𑀦𑀩𑀳𑀼𑀮𑀢𑀸𑀬 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺, 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺. 𑀲𑁄 𑀢𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀣𑁂𑀭𑁄 𑀓𑀺𑀭 𑀅𑀯𑀲𑁆𑀲𑀺𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻. 𑀲𑁄 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀤𑀸𑀘𑀸𑀭𑁂𑀦 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦𑁂𑀯 𑀅𑀭𑀺𑀬𑀫𑀕𑁆𑀕𑀲𑀸𑀫𑀦𑁆𑀢𑀁 𑀓𑀣𑁂𑀢𑀺, 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂𑀧𑀺 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀦 𑀚𑀸𑀦𑀸𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀳𑀸𑀕𑀸𑀫𑁂 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀮𑀗𑁆𑀕𑀭𑀯𑀸𑀲𑀺𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺 ‘‘𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑀽’’𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀢𑁆𑀯𑀸 ‘‘𑀫𑀫 𑀲𑀦𑁆𑀢𑀺𑀓𑁂 𑀫𑀳𑀮𑁆𑀮𑀓𑀢𑀭𑁄 𑀪𑀺𑀓𑁆𑀔𑀼 𑀦𑀢𑁆𑀣𑀺, 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀔𑁄 𑀧𑀦 𑀫𑁂 𑀓𑀫𑁆𑀫𑀝𑁆𑀞𑀸𑀦𑀸𑀘𑀭𑀺𑀬𑁄, 𑀢𑀁 𑀲𑀗𑁆𑀖𑀢𑁆𑀣𑁂𑀭𑀁 𑀓𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀣𑁂𑀭𑀲𑁆𑀲 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀣𑁂𑀭𑀲𑁆𑀲 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀣𑁂𑀭𑁄 𑀆𑀳 𑁋 ‘‘𑀓𑀺𑀁, 𑀥𑀫𑁆𑀫𑀤𑀺𑀦𑁆𑀦, 𑀘𑀺𑀭𑀲𑁆𑀲𑀁 𑀆𑀕𑀢𑁄𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀢𑁄 𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺, 𑀅𑀳𑀁 𑀏𑀓𑀓𑁄 𑀦 𑀕𑀫𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀲𑀸𑀭𑀡𑀻𑀬𑀓𑀣𑀁 𑀓𑀣𑁂𑀦𑁆𑀢𑁄𑀯 𑀧𑀧𑀜𑁆𑀘𑁂𑀢𑁆𑀯𑀸 ‘‘𑀓𑀤𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀅𑀬𑀁 𑀥𑀫𑁆𑀫𑁄 𑀅𑀥𑀺𑀕𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑀝𑁆𑀞𑀺𑀫𑀢𑁆𑀢𑀸𑀦𑀺, 𑀆𑀯𑀼𑀲𑁄 𑀥𑀫𑁆𑀫𑀤𑀺𑀦𑁆𑀦, 𑀯𑀲𑁆𑀲𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀲𑀫𑀸𑀧𑀢𑁆𑀢𑀺𑀁 𑀧𑀦, 𑀪𑀦𑁆𑀢𑁂, 𑀯𑀴𑀜𑁆𑀚𑁂𑀣𑀸𑀢𑀺. 𑀆𑀫, 𑀆𑀯𑀼𑀲𑁄𑀢𑀺. 𑀏𑀓𑀁 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀣, 𑀪𑀦𑁆𑀢𑁂𑀢𑀺? ‘‘𑀦, 𑀆𑀯𑀼𑀲𑁄, 𑀏𑀢𑀁 𑀪𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀲𑀺. ‘‘𑀏𑀢𑁆𑀣, 𑀪𑀦𑁆𑀢𑁂, 𑀏𑀓𑀁 𑀧𑀤𑀼𑀫𑀕𑀘𑁆𑀙𑀁 𑀫𑀸𑀧𑁂𑀣𑀸’’𑀢𑀺 𑀘 𑀯𑀼𑀢𑁆𑀢𑁄 𑀢𑀫𑁆𑀧𑀺 𑀫𑀸𑀧𑁂𑀲𑀺. 𑀇𑀤𑀸𑀦𑁂𑀢𑁆𑀣 𑀫𑀳𑀦𑁆𑀢𑀁 𑀧𑀼𑀧𑁆𑀨𑀁 𑀤𑀲𑁆𑀲𑁂𑀣𑀸𑀢𑀺. 𑀣𑁂𑀭𑁄 𑀢𑀫𑁆𑀧𑀺 𑀤𑀲𑁆𑀲𑁂𑀲𑀺. 𑀏𑀢𑁆𑀣 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀇𑀢𑁆𑀣𑀺𑀭𑀽𑀧𑀁 𑀤𑀲𑁆𑀲𑁂𑀣𑀸𑀢𑀺. 𑀣𑁂𑀭𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀇𑀢𑁆𑀣𑀺𑀭𑀽𑀧𑀁 𑀤𑀲𑁆𑀲𑁂𑀲𑀺. 𑀢𑀢𑁄 𑀦𑀁 𑀆𑀳 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀧𑀼𑀦𑀧𑁆𑀧𑀼𑀦𑀁 𑀲𑀼𑀪𑀢𑁄 𑀫𑀦𑀲𑀺 𑀓𑀭𑁄𑀣𑀸’’𑀢𑀺. 𑀣𑁂𑀭𑁄 𑀅𑀢𑁆𑀢𑀦𑀸𑀯 𑀫𑀸𑀧𑀺𑀢𑀁 𑀇𑀢𑁆𑀣𑀺𑀭𑀽𑀧𑀁 𑀑𑀮𑁄𑀓𑁂𑀦𑁆𑀢𑁄 𑀮𑁄𑀪𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀤𑀸 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀯𑀲𑁆𑀲𑀬𑁄 𑀫𑁂 𑀲𑀧𑁆𑀧𑀼𑀭𑀺𑀲 𑀳𑁄𑀳𑀻’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺. ‘‘𑀏𑀢𑀤𑀢𑁆𑀣𑀫𑁂𑀯𑀸𑀳𑀁, 𑀪𑀦𑁆𑀢𑁂, 𑀆𑀕𑀢𑁄’’𑀢𑀺 𑀣𑁂𑀭𑀲𑁆𑀲 𑀅𑀲𑀼𑀪𑀯𑀲𑁂𑀦 𑀲𑀮𑁆𑀮𑀳𑀼𑀓𑀁 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀣𑁂𑀭𑀲𑁆𑀲 𑀑𑀓𑀸𑀲𑀁 𑀓𑀸𑀢𑀼𑀁 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄. 𑀲𑀼𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁄 𑀣𑁂𑀭𑁄 𑀢𑀲𑁆𑀫𑀺𑀁 𑀤𑀺𑀯𑀸𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀲𑀗𑁆𑀖𑀢𑁆𑀣𑁂𑀭𑀁 𑀓𑀢𑁆𑀯𑀸 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑁄 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀏𑀯𑀭𑀽𑀧𑀲𑁆𑀲 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄 𑀓𑀺𑀮𑁂𑀲𑁄 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺.

𑀏𑀓𑀘𑁆𑀘𑀲𑁆𑀲 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺. 𑀲𑁄 𑀢𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀩𑀼𑀤𑁆𑀥𑀓𑀸𑀮𑁂 𑀲𑀝𑁆𑀞𑀺𑀫𑀢𑁆𑀢𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸 𑀪𑀺𑀓𑁆𑀔𑀽 𑀯𑀺𑀬. 𑀢𑁂 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 ‘‘𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀨𑀮𑀸 𑀫𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀫𑀕𑁆𑀕𑀨𑀮𑀢𑁆𑀣𑀸𑀬 𑀯𑀸𑀬𑀸𑀫𑀁 𑀅𑀓𑀢𑁆𑀯𑀸 ‘‘𑀅𑀫𑁆𑀳𑁂𑀳𑀺 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀤𑀲𑀩𑀮𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺.

𑀲𑀢𑁆𑀣𑀸 𑀢𑁂𑀲𑀁 𑀧𑀼𑀭𑁂 𑀆𑀕𑀫𑀦𑀢𑁄𑀯 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀦𑀦𑁆𑀤, 𑀧𑀥𑀸𑀦𑀓𑀫𑁆𑀫𑀺𑀓𑀸 𑀪𑀺𑀓𑁆𑀔𑀽 𑀅𑀚𑁆𑀚 𑀫𑀁 𑀧𑀲𑁆𑀲𑀺𑀢𑀼𑀁 𑀆𑀕𑀫𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀫𑀫 𑀤𑀲𑁆𑀲𑀦𑀸𑀬 𑀑𑀓𑀸𑀲𑀁 𑀅𑀓𑀢𑁆𑀯𑀸 ‘𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀅𑀮𑁆𑀮𑀅𑀲𑀼𑀪𑀪𑀸𑀯𑀦𑀁 𑀓𑀭𑁄𑀣𑀸’𑀢𑀺 𑀧𑀳𑀺𑀡𑁂𑀬𑁆𑀬𑀸𑀲𑀻’’𑀢𑀺. 𑀣𑁂𑀭𑁄 𑀢𑁂𑀲𑀁 𑀆𑀕𑀢𑀸𑀦𑀁 𑀲𑀢𑁆𑀣𑀸𑀭𑀸 𑀓𑀣𑀺𑀢𑀲𑀸𑀲𑀦𑀁 𑀆𑀭𑁄𑀘𑁂𑀲𑀺. 𑀢𑁂 ‘‘𑀢𑀣𑀸𑀕𑀢𑁄 𑀅𑀚𑀸𑀦𑀺𑀢𑁆𑀯𑀸 𑀦 𑀓𑀣𑁂𑀲𑁆𑀲𑀢𑀺, 𑀅𑀤𑁆𑀥𑀸 𑀏𑀢𑁆𑀣 𑀓𑀸𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀅𑀮𑁆𑀮𑀅𑀲𑀼𑀪𑀁 𑀑𑀮𑁄𑀓𑁂𑀦𑁆𑀢𑀸 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀇𑀤𑀁 𑀦𑀽𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀢𑀲𑀁𑀯𑁂𑀕𑀸 𑀮𑀤𑁆𑀥𑀫𑀕𑁆𑀕𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀆𑀭𑀪𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀇𑀫𑀁 𑀑𑀪𑀸𑀲𑀕𑀸𑀣𑀫𑀸𑀳 𑁋

‘‘𑀬𑀸𑀦𑀺𑀫𑀸𑀦𑀺 𑀅𑀧𑀢𑁆𑀢𑀸𑀦𑀺, 𑀅𑀮𑀸𑀩𑀽𑀦𑁂𑀯 𑀲𑀸𑀭𑀤𑁂;

𑀓𑀸𑀧𑁄𑀢𑀓𑀸𑀦𑀺 𑀅𑀝𑁆𑀞𑀻𑀦𑀺, 𑀢𑀸𑀦𑀺 𑀤𑀺𑀲𑁆𑀯𑀸𑀦 𑀓𑀸 𑀭𑀢𑀻’’𑀢𑀺. (𑀥. 𑀧. 𑁧𑁪𑁯);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀏𑀯𑀭𑀽𑀧𑀸𑀦𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀸𑀯 𑀳𑁄𑀦𑁆𑀢𑀺.

𑀏𑀓𑀘𑁆𑀘𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺, 𑀦𑀯𑀓𑀫𑁆𑀫𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺. 𑀲𑁄 𑀢𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀢𑀲𑁆𑀲 𑀓𑀺𑀭 𑀅𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀺, 𑀲𑁄 𑀢𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀥𑁄𑀯𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀧𑀢𑁆𑀢𑀁 𑀧𑀘𑀺𑀢𑁆𑀯𑀸 𑀓𑁂𑀲𑁂 𑀑𑀳𑀸𑀭𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀓𑀺𑀁, 𑀆𑀯𑀼𑀲𑁄 𑀫𑀳𑀸𑀢𑀺𑀲𑁆𑀲, 𑀅𑀢𑀼𑀝𑁆𑀞𑀲𑁆𑀲 𑀯𑀺𑀬 𑀢𑁂 𑀆𑀓𑀸𑀭𑁄’’𑀢𑀺? 𑀆𑀫, 𑀪𑀦𑁆𑀢𑁂, 𑀅𑀦𑀪𑀺𑀭𑀢𑀺 𑀫𑁂 𑀉𑀧𑁆𑀧𑀦𑁆𑀦𑀸, 𑀢𑀁 𑀯𑀺𑀦𑁄𑀤𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺. 𑀣𑁂𑀭𑁄 𑀢𑀲𑁆𑀲𑀸𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀅𑀦𑀼𑀓𑀫𑁆𑀧𑀸𑀯𑀲𑁂𑀦 𑀆𑀳 𑁋 ‘‘𑀆𑀯𑀼𑀲𑁄 𑀢𑀺𑀲𑁆𑀲, 𑀫𑀬𑀁 𑀫𑀳𑀮𑁆𑀮𑀓𑀸, 𑀏𑀓𑀁 𑀦𑁄 𑀯𑀲𑀦𑀝𑁆𑀞𑀸𑀦𑀁 𑀓𑀭𑁄𑀳𑀻’’𑀢𑀺. 𑀤𑀼𑀢𑀺𑀬𑀓𑀣𑀁 𑀅𑀓𑀣𑀺𑀢𑀧𑀼𑀩𑁆𑀩𑁄 𑀪𑀺𑀓𑁆𑀔𑀼 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀆𑀯𑀼𑀲𑁄, 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀉𑀤𑁆𑀤𑁂𑀲𑀫𑀕𑁆𑀕𑀜𑁆𑀘 𑀫𑀸 𑀯𑀺𑀲𑁆𑀲𑀚𑁆𑀚𑀺, 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀫𑀦𑀲𑀺 𑀓𑀭𑁄𑀳𑀺, 𑀓𑀸𑀮𑁂𑀦 𑀘 𑀓𑀸𑀮𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀣𑀸𑀭𑀽𑀧𑀁 𑀲𑀧𑁆𑀧𑀸𑀬𑀝𑁆𑀞𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀏𑀢𑁆𑀣 𑀓𑀸𑀢𑀼𑀁 𑀲𑀓𑁆𑀓𑀸’’𑀢𑀺 𑀤𑀸𑀭𑀽𑀳𑀺 𑀧𑀽𑀭𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀇𑀝𑁆𑀞𑀓𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑀪𑀽𑀫𑀺𑀪𑀺𑀢𑁆𑀢𑀺𑀧𑀭𑀺𑀓𑀫𑁆𑀫𑀸𑀤𑀻𑀳𑀺 𑀮𑁂𑀡𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀲𑀦𑁆𑀣𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀮𑁂𑀡𑁂 𑀧𑀭𑀺𑀓𑀫𑁆𑀫𑀁, 𑀯𑀲𑀣𑀸’’𑀢𑀺 𑀆𑀳. 𑀆𑀯𑀼𑀲𑁄, 𑀤𑀼𑀓𑁆𑀔𑁂𑀦 𑀢𑀬𑀸 𑀏𑀢𑀁 𑀓𑀫𑁆𑀫𑀁 𑀓𑀢𑀁, 𑀅𑀚𑁆𑀚 𑀏𑀓𑀤𑀺𑀯𑀲𑀁 𑀢𑁆𑀯𑀜𑁆𑀜𑁂𑀯𑁂𑀢𑁆𑀣 𑀯𑀲𑀸𑀳𑀻𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀮𑁂𑀡𑀁 𑀧𑀯𑀺𑀲𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀯𑀚𑁆𑀚𑀺. 𑀢𑀲𑁆𑀲 ‘‘𑀫𑀦𑀸𑀧𑀁 𑀫𑀬𑀸 𑀉𑀧𑀚𑁆𑀛𑀸𑀬𑀲𑁆𑀲 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀧𑀻𑀢𑀺 𑀉𑀧𑁆𑀧𑀦𑁆𑀦𑀸. 𑀲𑁄 𑀢𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀏𑀯𑀭𑀽𑀧𑀲𑁆𑀲 𑀦𑀯𑀓𑀫𑁆𑀫𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄 𑀓𑀺𑀮𑁂𑀲𑁄 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺.

𑀏𑀓𑀘𑁆𑀘𑁄 𑀧𑀦 𑀩𑁆𑀭𑀳𑁆𑀫𑀮𑁄𑀓𑀢𑁄 𑀆𑀕𑀢𑁄 𑀲𑀼𑀤𑁆𑀥𑀲𑀢𑁆𑀢𑁄 𑀳𑁄𑀢𑀺. 𑀢𑀲𑁆𑀲 𑀅𑀦𑀸𑀲𑁂𑀯𑀦𑀢𑀸𑀬 𑀓𑀺𑀮𑁂𑀲𑁄 𑀦 𑀲𑀫𑀼𑀤𑀸𑀘𑀭𑀢𑀺, 𑀪𑀯𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄 𑀳𑁄𑀢𑀺. 𑀲𑁄 𑀢𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀅𑀕𑀸𑀭𑀫𑀚𑁆𑀛𑁂𑀧𑀺 𑀓𑀸𑀫𑁂 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀘𑁆𑀘𑀼𑀕𑁆𑀕𑀫𑀦𑀢𑁆𑀣𑀸𑀬 𑀆𑀕𑀢𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀅𑀝𑁆𑀞𑀫𑁂 𑀅𑀭𑀼𑀡𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀏𑀯𑀭𑀽𑀧𑀲𑁆𑀲 𑀪𑀯𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄 𑀓𑀺𑀮𑁂𑀲𑁄 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑁄𑀯 𑀳𑁄𑀢𑀺.

𑀬𑁄 𑀧𑀦 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀏𑀯𑀭𑀽𑀧𑀲𑁆𑀲 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀅𑀦𑀼𑀧𑁆𑀧𑀦𑁆𑀦𑁄𑀯 𑀦𑀼𑀧𑁆𑀧𑀚𑁆𑀚𑀢𑀺 𑀦𑀸𑀫.

𑀉𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀻𑀢𑀺 𑀏𑀢𑁆𑀣 𑀉𑀧𑁆𑀧𑀦𑁆𑀦𑁄𑀢𑀺 𑀚𑀸𑀢𑁄 𑀪𑀽𑀢𑁄 𑀲𑀫𑀼𑀤𑀸𑀕𑀢𑁄. 𑀧𑀳𑀻𑀬𑀢𑀻𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀧𑀝𑀺𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁, 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀳𑀸𑀦𑁂𑀳𑀺 𑀧𑀳𑀻𑀬𑀢𑀺, 𑀦 𑀧𑀼𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀓𑀺𑀮𑁂𑀲𑀸 𑀢𑀤𑀗𑁆𑀕𑀯𑀲𑁂𑀦 𑀧𑀳𑀻𑀬𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸 𑀢𑀤𑀗𑁆𑀕𑀧𑁆𑀧𑀳𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀸𑀧𑀢𑁆𑀢𑀺 𑀧𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀲𑀸 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀫𑀕𑁆𑀕𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀨𑀮𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀬𑀫𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀲𑁆𑀲𑀝𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀧𑀜𑁆𑀘𑀳𑀺 𑀧𑀳𑀸𑀦𑁂𑀳𑀺 𑀧𑀳𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀅𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀉𑀧𑁆𑀧𑀦𑁆𑀦𑀁 𑀲𑀸𑀭𑀫𑁆𑀫𑀡𑀁 𑀧𑀞𑀫𑀚𑁆𑀛𑀸𑀦𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀅𑀲𑀼𑀪𑀫𑁆𑀧𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁, 𑀅𑀲𑀼𑀪𑀸𑀭𑀫𑁆𑀫𑀡𑀸 𑀥𑀫𑁆𑀫𑀸𑀧𑀺 𑀅𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄𑀢𑀺. ‘‘𑀢𑀢𑁆𑀣 𑀓𑀢𑀫𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄? 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀉𑀧𑀸𑀬𑀫𑀦𑀲𑀺𑀓𑀸𑀭𑀲𑁆𑀲 𑀯𑀲𑁂𑀦 𑀫𑀦𑀲𑀺𑀓𑀭𑁄𑀢𑁄. 𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑀫𑀼𑀤𑀸𑀕𑀢𑁄 𑀦 𑀲𑀫𑀼𑀤𑀸𑀕𑀘𑁆𑀙𑀢𑀺. 𑀉𑀧𑁆𑀧𑀦𑁆𑀦𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀻𑀢𑀺 𑀲𑀫𑀼𑀤𑀸𑀕𑀢𑁄 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀧𑀜𑁆𑀘𑀯𑀺𑀥𑁂𑀦 𑀧𑀳𑀸𑀦𑁂𑀦 𑀧𑀳𑀻𑀬𑀢𑀺.

𑀅𑀧𑀺𑀘 𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀤𑀲𑀯𑀺𑀥𑀜𑁆𑀳𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀲𑁆𑀲𑀸𑀧𑀺, 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀆𑀮𑁄𑀧𑀸𑀦𑀁 𑀑𑀓𑀸𑀲𑁂 𑀲𑀢𑀺 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄𑀧𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑀤𑀺𑀲𑁂 𑀅𑀲𑀼𑀪𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀤𑀲𑀅𑀲𑀼𑀪𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑁧𑁭. 𑀲𑀢𑁆𑀢𑀫𑁂 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀓𑀸 𑀫𑁂𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁 𑀦𑀻𑀯𑀭𑀡𑀸𑀤𑀻𑀳𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀸 ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀲𑁂𑀲𑀢𑁄 𑀯𑀸 𑀲𑀩𑁆𑀩𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 ‘‘𑀫𑁂𑀢𑁆𑀢𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀧𑀼𑀩𑁆𑀩𑀪𑀸𑀕𑁄𑀧𑀺 𑀯𑀝𑁆𑀝𑀢𑀺, ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀇𑀥 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀅𑀧𑁆𑀧𑀦𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄𑀢𑀺 𑀢𑀁 𑀫𑁂𑀢𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲.

𑀅𑀧𑀺𑀘 𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀼𑀬𑁄𑀕𑁄, 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸, 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀫𑁂𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, 𑀑𑀥𑀺𑀲𑁄 𑀅𑀦𑁄𑀥𑀺𑀲𑁄 𑀤𑀺𑀲𑀸𑀨𑀭𑀡𑀯𑀲𑁂𑀦 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺. ‘‘𑀢𑁆𑀯𑀁 𑀏𑀢𑀲𑁆𑀲 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀓𑀺𑀫𑀲𑁆𑀲 𑀲𑀻𑀮𑀸𑀤𑀻𑀦𑀺 𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦𑀦𑀼 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀲𑀺? 𑀧𑀭𑀲𑁆𑀲 𑀓𑀼𑀚𑁆𑀛𑀦𑀁 𑀦𑀸𑀫 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀢𑀢𑁆𑀢𑀅𑀬𑀲𑀮𑀸𑀓𑀕𑀽𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀁 𑀧𑀳𑀭𑀺𑀢𑀼𑀓𑀸𑀫𑀢𑀸𑀲𑀤𑀺𑀲𑀁 𑀳𑁄𑀢𑀺. 𑀏𑀲𑁄𑀧𑀺 𑀢𑀯 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀢𑁂 𑀲𑀻𑀮𑀸𑀤𑀻𑀦𑀺 𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺? 𑀏𑀲 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀘𑁆𑀙𑀺𑀢𑀧𑀳𑁂𑀡𑀓𑀁 𑀯𑀺𑀬 𑀧𑀝𑀺𑀯𑀸𑀢𑀁 𑀔𑀺𑀢𑁆𑀢𑀭𑀚𑁄𑀫𑀼𑀝𑁆𑀞𑀺 𑀯𑀺𑀬 𑀘 𑀏𑀢𑀲𑁆𑀲𑁂𑀯𑁂𑀲 𑀓𑁄𑀥𑁄 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺, 𑀉𑀪𑀬𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀲𑁆𑀲𑀸𑀧𑀺, 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂 𑀫𑁂𑀢𑁆𑀢𑀸𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀫𑁂𑀢𑁆𑀢𑀸𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀲𑁂𑀲𑀫𑀺𑀥 𑀇𑀢𑁄 𑀧𑀭𑁂𑀲𑀼 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀧𑀦 𑀯𑀓𑁆𑀔𑀸𑀫𑀸𑀢𑀺.

𑁧𑁮. 𑀅𑀝𑁆𑀞𑀫𑁂 𑀆𑀭𑀫𑁆𑀪𑀥𑀸𑀢𑀽𑀆𑀤𑀻𑀲𑀼 𑀆𑀭𑀫𑁆𑀪𑀥𑀸𑀢𑀼 𑀦𑀸𑀫 𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬𑀁. 𑀦𑀺𑀓𑁆𑀓𑀫𑀥𑀸𑀢𑀼 𑀦𑀸𑀫 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭𑀁. 𑀧𑀭𑀓𑁆𑀓𑀫𑀥𑀸𑀢𑀼 𑀦𑀸𑀫 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀆𑀭𑀫𑁆𑀪𑁄 𑀘𑁂𑀢𑀲𑁄 𑀓𑀸𑀫𑀸𑀦𑀁 𑀧𑀦𑀽𑀤𑀦𑀸𑀬, 𑀦𑀺𑀓𑁆𑀓𑀫𑁄 𑀘𑁂𑀢𑀲𑁄 𑀧𑀮𑀺𑀖𑀼𑀕𑁆𑀖𑀸𑀝𑀦𑀸𑀬, 𑀧𑀭𑀓𑁆𑀓𑀫𑁄 𑀘𑁂𑀢𑀲𑁄 𑀩𑀦𑁆𑀥𑀦𑀘𑁆𑀙𑁂𑀤𑀦𑀸𑀬𑀸’’𑀢𑀺 𑀯𑀢𑁆𑀯𑀸 ‘‘𑀢𑀻𑀳𑀺 𑀧𑁂𑀢𑁂𑀳𑀺 𑀅𑀥𑀺𑀫𑀢𑁆𑀢𑀯𑀻𑀭𑀺𑀬𑀫𑁂𑀯 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀲𑁆𑀲 𑀘𑁂𑀯 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀲𑁆𑀲 𑀘. 𑀢𑀢𑁆𑀣 𑀘𑀢𑀼𑀤𑁄𑀲𑀸𑀧𑀕𑀢𑀁 𑀯𑀻𑀭𑀺𑀬𑀁 𑀆𑀭𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀘 𑀅𑀢𑀺𑀮𑀻𑀦𑀁 𑀳𑁄𑀢𑀺, 𑀦 𑀘 𑀅𑀢𑀺𑀧𑀕𑁆𑀕𑀳𑀺𑀢𑀁, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁. 𑀢𑀤𑁂𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀓𑀸𑀬𑀺𑀓𑀁, 𑀘𑁂𑀢𑀲𑀺𑀓𑀜𑁆𑀘. 𑀢𑀢𑁆𑀣 ‘‘𑀇𑀥 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻’’𑀢𑀺 (𑀯𑀺𑀪. 𑁫𑁧𑁯) 𑀏𑀯𑀁 𑀭𑀢𑁆𑀢𑀺𑀤𑀺𑀯𑀲𑀲𑁆𑀲 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀸𑀬𑁂𑀦 𑀖𑀝𑁂𑀦𑁆𑀢𑀲𑁆𑀲 𑀯𑀸𑀬𑀫𑀦𑁆𑀢𑀲𑁆𑀲 𑀓𑀸𑀬𑀺𑀓𑀯𑀻𑀭𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀦 𑀢𑀸𑀯𑀸𑀳𑀁 𑀇𑀢𑁄 𑀮𑁂𑀡𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀑𑀓𑀸𑀲𑀧𑀭𑀺𑀘𑁆𑀙𑁂𑀤𑁂𑀦 𑀯𑀸, ‘‘𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀦𑀺𑀲𑀚𑁆𑀚𑀸𑀤𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 𑀖𑀝𑁂𑀦𑁆𑀢𑀲𑁆𑀲 𑀯𑀸𑀬𑀫𑀦𑁆𑀢𑀲𑁆𑀲 𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀯𑀝𑁆𑀝𑀢𑀺. 𑀤𑀼𑀯𑀺𑀥𑁂𑀦𑀸𑀧𑀺 𑀳𑀺 𑀇𑀫𑀺𑀦𑀸 𑀯𑀻𑀭𑀺𑀬𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀣𑀺𑀦𑀫𑀺𑀤𑁆𑀥𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺 𑀫𑀺𑀮𑀓𑁆𑀔𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀕𑀸𑀫𑀦𑁆𑀢𑀧𑀩𑁆𑀪𑀸𑀭𑀯𑀸𑀲𑀺𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀧𑀻𑀢𑀺𑀫𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀬 𑀘. 𑀏𑀢𑁂𑀲𑀼 𑀳𑀺 𑀧𑀼𑀭𑀺𑀫𑀸 𑀢𑀬𑁄 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸 𑀓𑀸𑀬𑀺𑀓𑀯𑀻𑀭𑀺𑀬𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀸, 𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸 𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀸, 𑀉𑀘𑁆𑀘𑀸𑀯𑀸𑀮𑀼𑀓𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀧𑀦 𑀤𑁆𑀯𑀻𑀳𑀺𑀧𑀺 𑀯𑀻𑀭𑀺𑀬𑁂𑀳𑀺 𑀆𑀭𑀤𑁆𑀥𑀯𑀻𑀭𑀺𑀬𑁄𑀯. 𑀣𑁂𑀭𑁄 𑀓𑀺𑀭 𑀏𑀓𑀁 𑀲𑀢𑁆𑀢𑀸𑀳𑀁 𑀘𑀗𑁆𑀓𑀫𑀢𑀺, 𑀏𑀓𑀁 𑀢𑀺𑀝𑁆𑀞𑀢𑀺, 𑀏𑀓𑀁 𑀦𑀺𑀲𑀻𑀤𑀢𑀺, 𑀏𑀓𑀁 𑀦𑀺𑀧𑀚𑁆𑀚𑀢𑀺. 𑀫𑀳𑀸𑀣𑁂𑀭𑀲𑁆𑀲 𑀏𑀓𑀇𑀭𑀺𑀬𑀸𑀧𑀣𑁄𑀧𑀺 𑀅𑀲𑀧𑁆𑀧𑀸𑀬𑁄 𑀦𑀸𑀫 𑀦𑀢𑁆𑀣𑀺, 𑀘𑀢𑀼𑀢𑁆𑀣𑁂 𑀲𑀢𑁆𑀢𑀸𑀳𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺.

𑀅𑀧𑀺𑀘 𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀆𑀳𑀭𑀳𑀢𑁆𑀣𑀓-𑀪𑀼𑀢𑁆𑀢𑀯𑀫𑀺𑀢𑀓-𑀢𑀢𑁆𑀭𑀯𑀝𑁆𑀝𑀓-𑀅𑀮𑀁𑀲𑀸𑀝𑀓-𑀓𑀸𑀓𑀫𑀸𑀲𑀓-𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀺𑀬 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀣𑀺𑀦𑀫𑀺𑀤𑁆𑀥𑀁 𑀫𑀳𑀸𑀳𑀢𑁆𑀣𑀻 𑀯𑀺𑀬 𑀑𑀢𑁆𑀣𑀭𑀦𑁆𑀢𑀁 𑀆𑀕𑀘𑁆𑀙𑀢𑀺, 𑀘𑀢𑀼𑀧𑀜𑁆𑀘𑀆𑀮𑁄𑀧𑀑𑀓𑀸𑀲𑀁 𑀧𑀦 𑀞𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀦 𑀳𑁄𑀢𑀻𑀢𑀺 𑀏𑀯𑀁 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀢𑀢𑁄 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀸𑀧𑀺, 𑀭𑀢𑁆𑀢𑀺𑀁 𑀘𑀦𑁆𑀤𑀸𑀮𑁄𑀓𑀤𑀻𑀧𑀸𑀮𑁄𑀓𑀉𑀓𑁆𑀓𑀸𑀮𑁄𑀓𑁂 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀸𑀧𑀺, 𑀅𑀩𑁆𑀪𑁄𑀓𑀸𑀲𑁂 𑀯𑀲𑀦𑁆𑀢𑀲𑁆𑀲𑀸𑀧𑀺, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑀤𑀺𑀲𑁂 𑀧𑀳𑀻𑀦𑀣𑀺𑀦𑀫𑀺𑀤𑁆𑀥𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑁧𑁯. 𑀦𑀯𑀫𑁂 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀛𑀸𑀦𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀯𑀽𑀧𑀲𑀫𑀺𑀢𑀘𑀺𑀢𑁆𑀢𑀲𑁆𑀲.

𑀅𑀧𑀺𑀘 𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀯𑀼𑀤𑁆𑀥𑀲𑁂𑀯𑀺𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀸𑀳𑀼𑀲𑀘𑁆𑀘𑁂𑀦𑀸𑀧𑀺 𑀳𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑀢𑀸𑀬 𑀧𑀓𑀢𑀜𑁆𑀜𑀼𑀦𑁄𑀧𑀺, 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲𑀸𑀧𑀺, 𑀉𑀧𑀸𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀯𑀺𑀦𑀬𑀥𑀭𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑁨𑁦. 𑀤𑀲𑀫𑁂 𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀸𑀬𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲.

𑀅𑀧𑀺𑀘 𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀳𑀼𑀲𑀘𑁆𑀘𑁂𑀦𑀸𑀧𑀺 𑀳𑀺 𑀏𑀓𑀁 𑀯𑀸…𑀧𑁂… 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀸𑀧𑀺, 𑀢𑀻𑀲𑀼 𑀭𑀢𑀦𑁂𑀲𑀼 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀸𑀧𑀺, 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀕𑁆𑀕𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.

𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀕𑁆𑀕𑀯𑀡𑁆𑀡𑀦𑀸.