𑁩. 𑀅𑀓𑀫𑁆𑀫𑀦𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁨𑁧-𑁨𑁨. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀪𑀸𑀯𑀺𑀢𑀦𑁆𑀢𑀺 𑀅𑀯𑀟𑁆𑀠𑀺𑀢𑀁 𑀪𑀸𑀯𑀦𑀸𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑀁. 𑀅𑀓𑀫𑁆𑀫𑀦𑀺𑀬𑀁 𑀳𑁄𑀢𑀻𑀢𑀺 𑀓𑀫𑁆𑀫𑀓𑁆𑀔𑀫𑀁 𑀓𑀫𑁆𑀫𑀬𑁄𑀕𑁆𑀕𑀁 𑀦 𑀳𑁄𑀢𑀺. 𑀤𑀼𑀢𑀺𑀬𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀧𑀞𑀫𑁂 𑀘𑀺𑀢𑁆𑀢𑀦𑁆𑀢𑀺 𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁, 𑀤𑀼𑀢𑀺𑀬𑁂 𑀯𑀺𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁. 𑀢𑀢𑁆𑀣 𑀘 𑀯𑀝𑁆𑀝𑀁 𑀯𑀝𑁆𑀝𑀧𑀸𑀤𑀁, 𑀯𑀺𑀯𑀝𑁆𑀝𑀁 𑀯𑀺𑀯𑀝𑁆𑀝𑀧𑀸𑀤𑀦𑁆𑀢𑀺 𑀅𑀬𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀝𑁆𑀝𑀁 𑀦𑀸𑀫 𑀢𑁂𑀪𑀽𑀫𑀓𑀯𑀝𑁆𑀝𑀁, 𑀯𑀝𑁆𑀝𑀧𑀸𑀤𑀁 𑀦𑀸𑀫 𑀯𑀝𑁆𑀝𑀧𑀝𑀺𑀮𑀸𑀪𑀸𑀬 𑀓𑀫𑁆𑀫𑀁, 𑀯𑀺𑀯𑀝𑁆𑀝𑀁 𑀦𑀸𑀫 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸, 𑀯𑀺𑀯𑀝𑁆𑀝𑀧𑀸𑀤𑀁 𑀦𑀸𑀫 𑀯𑀺𑀯𑀝𑁆𑀝𑀧𑀝𑀺𑀮𑀸𑀪𑀸𑀬 𑀓𑀫𑁆𑀫𑀁. 𑀇𑀢𑀺 𑀇𑀫𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺.

𑁨𑁩-𑁨𑁪. 𑀢𑀢𑀺𑀬𑁂 𑀯𑀝𑁆𑀝𑀯𑀲𑁂𑀦𑁂𑀯 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀫𑀸𑀭𑀩𑁆𑀭𑀳𑁆𑀫𑀇𑀲𑁆𑀲𑀭𑀺𑀬𑀸𑀦𑀺 𑀘 𑀤𑀤𑀫𑀸𑀦𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀝𑁆𑀝𑀸𑀦𑀺 𑀘 𑀤𑀤𑀫𑀸𑀦𑀁 𑀓𑁂𑀯𑀮𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀫𑁂𑀯 𑀤𑁂𑀢𑀻𑀢𑀺 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺 𑀦𑀸𑀫𑀸𑀢𑀺. 𑀘𑀢𑀼𑀢𑁆𑀣𑁂 𑀘𑀺𑀢𑁆𑀢𑀦𑁆𑀢𑀺 𑀯𑀺𑀯𑀝𑁆𑀝𑀯𑀲𑁂𑀦𑁂𑀯 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁.

𑁨𑁫-𑁨𑁬. 𑀧𑀜𑁆𑀘𑀫𑀙𑀝𑁆𑀞𑁂𑀲𑀼 𑀅𑀪𑀸𑀯𑀺𑀢𑀁 𑀅𑀧𑀸𑀢𑀼𑀪𑀽𑀢𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀢𑀢𑁆𑀭𑀸𑀫𑀬𑀥𑀺𑀧𑁆𑀧𑀸𑀬𑁄 𑁋 𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀦𑀸𑀫 𑀉𑀧𑁆𑀧𑀦𑁆𑀦𑀫𑁆𑀧𑀺 𑀅𑀪𑀸𑀯𑀺𑀢𑀁 𑀅𑀧𑀸𑀢𑀼𑀪𑀽𑀢𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑁂𑀲𑀼 𑀧𑀓𑁆𑀔𑀦𑁆𑀤𑀺𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸. 𑀯𑀺𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀧𑀦 𑀪𑀸𑀯𑀺𑀢𑀁 𑀧𑀸𑀢𑀼𑀪𑀽𑀢𑀁 𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸? 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀧𑀓𑁆𑀔𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑀢𑁆𑀢𑀸. 𑀓𑀼𑀭𑀼𑀦𑁆𑀤𑀓𑀯𑀸𑀲𑀻 𑀨𑀼𑀲𑁆𑀲𑀫𑀺𑀢𑁆𑀢𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀫𑀕𑁆𑀕𑀘𑀺𑀢𑁆𑀢𑀫𑁂𑀯, 𑀆𑀯𑀼𑀲𑁄, 𑀪𑀸𑀯𑀺𑀢𑀁 𑀧𑀸𑀢𑀼𑀪𑀽𑀢𑀁 𑀦𑀸𑀫 𑀳𑁄𑀢𑀻’’𑀢𑀺.

𑁨𑁭-𑁨𑁮. 𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀅𑀩𑀳𑀼𑀮𑀻𑀓𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀓𑀢𑀁. 𑀇𑀫𑀸𑀦𑀺𑀧𑀺 𑀤𑁆𑀯𑁂 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑁨𑁯. 𑀦𑀯𑀫𑁂 ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀤𑀼𑀓𑁆𑀔𑀁 𑀅𑀥𑀺𑀯𑀳𑀢𑀺 𑀆𑀳𑀭𑀢𑀻𑀢𑀺 𑀤𑀼𑀓𑁆𑀔𑀸𑀥𑀺𑀯𑀳𑀁. 𑀤𑀼𑀓𑁆𑀔𑀸𑀥𑀺𑀯𑀸𑀳𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀚𑁆𑀛𑀸𑀦𑀸𑀤𑀺 𑀅𑀭𑀺𑀬𑀥𑀫𑁆𑀫𑀸𑀪𑀺𑀫𑀼𑀔𑀁 𑀤𑀼𑀓𑁆𑀔𑁂𑀦 𑀅𑀥𑀺𑀯𑀸𑀳𑀻𑀬𑀢𑀺 𑀧𑁂𑀲𑀻𑀬𑀢𑀻𑀢𑀺 𑀤𑀼𑀓𑁆𑀔𑀸𑀥𑀺𑀯𑀸𑀳𑀁. 𑀇𑀤𑀫𑁆𑀧𑀺 𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀫𑁂𑀯. 𑀢𑀜𑁆𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀤𑀤𑀫𑀸𑀦𑀫𑁆𑀧𑀺 𑀚𑀸𑀢𑀺𑀆𑀤𑀻𑀦𑀁 𑀅𑀥𑀺𑀯𑀳𑀦𑀢𑁄 𑀤𑀼𑀓𑁆𑀔𑀸𑀥𑀺𑀯𑀳𑀁, 𑀅𑀭𑀺𑀬𑀥𑀫𑁆𑀫𑀸𑀥𑀺𑀕𑀫𑀸𑀬 𑀤𑀼𑀧𑁆𑀧𑁂𑀲𑀦𑀢𑁄 𑀤𑀼𑀓𑁆𑀔𑀸𑀥𑀺𑀯𑀸𑀳𑀜𑁆𑀘 𑀦𑀸𑀫 𑀳𑁄𑀢𑀻𑀢𑀺.

𑁩𑁦. 𑀤𑀲𑀫𑁂 𑀯𑀺𑀯𑀝𑁆𑀝𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀫𑀸𑀦𑀼𑀲𑀓𑀲𑀼𑀔𑀢𑁄 𑀤𑀺𑀩𑁆𑀩𑀲𑀼𑀔𑀁, 𑀤𑀺𑀩𑁆𑀩𑀲𑀼𑀔𑀢𑁄 𑀛𑀸𑀦𑀲𑀼𑀔𑀁, 𑀛𑀸𑀦𑀲𑀼𑀔𑀢𑁄 𑀯𑀺𑀧𑀲𑁆𑀲𑀦𑀸𑀲𑀼𑀔𑀁, 𑀯𑀺𑀧𑀲𑁆𑀲𑀦𑀸𑀲𑀼𑀔𑀢𑁄 𑀫𑀕𑁆𑀕𑀲𑀼𑀔𑀁, 𑀫𑀕𑁆𑀕𑀲𑀼𑀔𑀢𑁄 𑀨𑀮𑀲𑀼𑀔𑀁, 𑀨𑀮𑀲𑀼𑀔𑀢𑁄 𑀦𑀺𑀩𑁆𑀩𑀸𑀦𑀲𑀼𑀔𑀁 𑀅𑀥𑀺𑀯𑀳𑀢𑀺 𑀆𑀳𑀭𑀢𑀻𑀢𑀺 𑀲𑀼𑀔𑀸𑀥𑀺𑀯𑀳𑀁 𑀦𑀸𑀫 𑀳𑁄𑀢𑀺, 𑀲𑀼𑀔𑀸𑀥𑀺𑀯𑀸𑀳𑀁 𑀯𑀸. 𑀢𑀜𑁆𑀳𑀺 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀅𑀭𑀺𑀬𑀥𑀫𑁆𑀫𑀸𑀪𑀺𑀫𑀼𑀔𑀁 𑀲𑀼𑀧𑁂𑀲𑀬𑀁 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀲𑀤𑀺𑀲𑀁 𑀳𑁄𑀢𑀻𑀢𑀺 𑀲𑀼𑀔𑀸𑀥𑀺𑀯𑀸𑀳𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀯𑀕𑁆𑀕𑁂 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺.

𑀅𑀓𑀫𑁆𑀫𑀦𑀺𑀬𑀯𑀕𑁆𑀕𑀯𑀡𑁆𑀡𑀦𑀸.