𑁧𑁯. 𑀓𑀸𑀬𑀕𑀢𑀸𑀲𑀢𑀺𑀯𑀕𑁆𑀕𑀯𑀡𑁆𑀡𑀦𑀸

𑁫𑁬𑁩. 𑀘𑁂𑀢𑀲𑀸 𑀨𑀼𑀝𑁄𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀨𑀭𑀡𑀁 𑀆𑀧𑁄𑀨𑀭𑀡𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑀜𑁆𑀘. 𑀢𑀢𑁆𑀣 𑀆𑀧𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀆𑀧𑁂𑀦 𑀨𑀭𑀡𑀁 𑀆𑀧𑁄𑀨𑀭𑀡𑀁 𑀦𑀸𑀫. 𑀏𑀯𑀁 𑀨𑀼𑀝𑁂𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀲𑀩𑁆𑀩𑀸 𑀲𑀫𑀼𑀤𑁆𑀤𑀗𑁆𑀕𑀫𑀸 𑀓𑀼𑀦𑁆𑀦𑀤𑀺𑀬𑁄 𑀅𑀦𑁆𑀢𑁄𑀕𑀥𑀸𑀯 𑀳𑁄𑀦𑁆𑀢𑀺. 𑀆𑀮𑁄𑀓𑀁 𑀧𑀦 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀓𑀮𑀲𑀫𑀼𑀤𑁆𑀤𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑀁 𑀦𑀸𑀫. 𑀏𑀯𑀁 𑀨𑀼𑀝𑁂𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀲𑀩𑁆𑀩𑀸 𑀫𑀳𑀸𑀲𑀫𑀼𑀤𑁆𑀤𑀗𑁆𑀕𑀫𑀸 𑀓𑀼𑀦𑁆𑀦𑀤𑀺𑀬𑁄 𑀅𑀦𑁆𑀢𑁄𑀕𑀥𑀸𑀯 𑀳𑁄𑀦𑁆𑀢𑀺. 𑀅𑀦𑁆𑀢𑁄𑀕𑀥𑀸 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀯𑀦𑀸𑀬 𑀅𑀩𑁆𑀪𑀦𑁆𑀢𑀭𑀕𑀢𑀸𑀯 𑀳𑁄𑀦𑁆𑀢𑀺. 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀚𑁆𑀚𑀁 𑀪𑀚𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸, 𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀻𑀢𑀺𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀦𑁄𑀫𑀬𑀺𑀤𑁆𑀥𑀺 𑀙 𑀅𑀪𑀺𑀜𑁆𑀜𑀸𑀢𑀺 𑀅𑀝𑁆𑀞 𑀯𑀺𑀚𑁆𑀚𑀸, 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀧𑀘𑁆𑀙𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀲𑀼 𑀬𑀸 𑀓𑀸𑀘𑀺 𑀏𑀓𑀸 𑀯𑀺𑀚𑁆𑀚𑀸 𑀯𑀺𑀚𑁆𑀚𑀸, 𑀲𑁂𑀲𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀏𑀯𑀁 𑀯𑀺𑀚𑁆𑀚𑀸𑀧𑀺 𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁫𑁬𑁪. 𑀫𑀳𑀢𑁄 𑀲𑀁𑀯𑁂𑀕𑀸𑀬𑀸𑀢𑀺 𑀫𑀳𑀦𑁆𑀢𑀲𑁆𑀲 𑀲𑀁𑀯𑁂𑀕𑀲𑁆𑀲 𑀅𑀢𑁆𑀣𑀸𑀬. 𑀉𑀧𑀭𑀺𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀫𑀳𑀸𑀲𑀁𑀯𑁂𑀕𑁄 𑀦𑀸𑀫 𑀯𑀺𑀧𑀲𑁆𑀲𑀦𑀸, 𑀫𑀳𑀸𑀅𑀢𑁆𑀣𑁄 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀫𑀳𑀸𑀬𑁄𑀕𑀓𑁆𑀔𑁂𑀫𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀅𑀣 𑀯𑀸 𑀫𑀳𑀸𑀲𑀁𑀯𑁂𑀕𑁄 𑀦𑀸𑀫 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄, 𑀫𑀳𑀸𑀅𑀢𑁆𑀣𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀫𑀳𑀸𑀬𑁄𑀕𑀓𑁆𑀔𑁂𑀫𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬𑀸𑀢𑀺 𑀲𑀢𑀺𑀬𑀸 𑀘 𑀜𑀸𑀡𑀲𑁆𑀲 𑀘 𑀅𑀢𑁆𑀣𑀸𑀬. 𑀜𑀸𑀡𑀤𑀲𑁆𑀲𑀦𑀧𑀝𑀺𑀮𑀸𑀪𑀸𑀬𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀬. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀬𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀧𑀘𑁆𑀘𑀓𑁆𑀔𑁂 𑀅𑀢𑁆𑀢𑀪𑀸𑀯𑁂 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀦𑀁 𑀨𑀮𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀓𑀭𑀡𑀢𑁆𑀣𑀸𑀬. 𑀏𑀢𑁆𑀣 𑀘 𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀧𑀜𑁆𑀜𑀸, 𑀯𑀺𑀫𑀼𑀢𑁆𑀢𑀻𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑁂𑀲𑀥𑀫𑁆𑀫𑀸. 𑀢𑁂𑀲𑀁 𑀨𑀮𑀁 𑀦𑀸𑀫 𑀅𑀭𑀳𑀢𑁆𑀢𑀨𑀮𑀁, 𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑁄.

𑁫𑁭𑁧. 𑀓𑀸𑀬𑁄𑀧𑀺 𑀧𑀲𑁆𑀲𑀫𑁆𑀪𑀢𑀻𑀢𑀺 𑀦𑀸𑀫𑀓𑀸𑀬𑁄𑀧𑀺 𑀓𑀭𑀚𑀓𑀸𑀬𑁄𑀧𑀺 𑀧𑀲𑁆𑀲𑀫𑁆𑀪𑀢𑀺, 𑀯𑀽𑀧𑀲𑀦𑁆𑀢𑀤𑀭𑀣𑁄 𑀳𑁄𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀧𑀻𑀢𑀺 𑀏𑀢𑁂 𑀥𑀫𑁆𑀫𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀯𑀽𑀧𑀲𑀫𑁆𑀫𑀦𑁆𑀢𑀺 𑀦𑀸𑀫, 𑀇𑀥 𑀧𑀦 𑀑𑀴𑀸𑀭𑀺𑀓𑀯𑀽𑀧𑀲𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑁂𑀯𑀮𑀸𑀢𑀺 𑀲𑀓𑀮𑀸, 𑀲𑀩𑁆𑀩𑁂 𑀦𑀺𑀭𑀯𑀲𑁂𑀲𑀸𑀢𑀺 𑀅𑀢𑁆𑀣𑁄. 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑀺𑀬𑀸, 𑀢𑁂 𑀳𑁂𑀝𑁆𑀞𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸𑀯.

𑁫𑁭𑁪. 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀻𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀝𑁆𑀝𑀫𑀽𑀮𑀓𑀁 𑀩𑀳𑀮𑀦𑁆𑀥𑀓𑀸𑀭𑀁 𑀫𑀳𑀸𑀢𑀫𑀁 𑀅𑀜𑁆𑀜𑀸𑀡𑀁 𑀧𑀳𑀻𑀬𑀢𑀺. 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀬𑀢𑀻𑀢𑀺 𑀅𑀲𑁆𑀫𑀻𑀢𑀺 𑀦𑀯𑀯𑀺𑀥𑁄 𑀫𑀸𑀦𑁄 𑀧𑀳𑀻𑀬𑀢𑀺. 𑀅𑀦𑀼𑀲𑀬𑀸𑀢𑀺 𑀲𑀢𑁆𑀢 𑀅𑀦𑀼𑀲𑀬𑀸. 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺.

𑁫𑁭𑁫. 𑀧𑀜𑁆𑀜𑀸𑀧𑀪𑁂𑀤𑀸𑀬𑀸𑀢𑀺 𑀧𑀜𑁆𑀜𑀸𑀬 𑀧𑀪𑁂𑀤𑀕𑀫𑀦𑀢𑁆𑀣𑀁. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀸𑀬.

𑁫𑁭𑁬. 𑀅𑀦𑁂𑀓𑀥𑀸𑀢𑀼𑀧𑀝𑀺𑀯𑁂𑀥𑁄 𑀳𑁄𑀢𑀻𑀢𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀮𑀓𑁆𑀔𑀡𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀦𑀸𑀦𑀸𑀥𑀸𑀢𑀼𑀧𑀝𑀺𑀯𑁂𑀥𑁄 𑀳𑁄𑀢𑀻𑀢𑀺 𑀢𑀸𑀲𑀁𑀬𑁂𑀯 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀦𑀸𑀦𑀸𑀪𑀸𑀯𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀅𑀦𑁂𑀓𑀥𑀸𑀢𑀼𑀧𑀝𑀺𑀲𑀫𑁆𑀪𑀺𑀤𑀸 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀥𑀸𑀢𑀼𑀪𑁂𑀤𑀜𑀸𑀡𑀁 𑀓𑀣𑀺𑀢𑀁. 𑀥𑀸𑀢𑀼𑀧𑀪𑁂𑀤𑀜𑀸𑀡𑀁 𑀦𑀸𑀫 ‘‘𑀇𑀫𑀸𑀬 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀸𑀬 𑀇𑀤𑀁 𑀦𑀸𑀫 𑀳𑁄𑀢𑀻’’𑀢𑀺 𑀚𑀸𑀦𑀦𑀧𑀜𑁆𑀜𑀸. 𑀢𑀁 𑀧𑀦𑁂𑀢𑀁 𑀥𑀸𑀢𑀼𑀪𑁂𑀤𑀜𑀸𑀡𑀁 𑀦 𑀲𑀩𑁆𑀩𑁂𑀲𑀁 𑀳𑁄𑀢𑀺, 𑀩𑀼𑀤𑁆𑀥𑀸𑀦𑀫𑁂𑀯 𑀦𑀺𑀧𑁆𑀧𑀤𑁂𑀲𑀁 𑀳𑁄𑀢𑀺. 𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀩𑁆𑀩𑀲𑁄 𑀦 𑀓𑀣𑀺𑀢𑀁. 𑀓𑀲𑁆𑀫𑀸? 𑀢𑀲𑁆𑀫𑀺𑀁 𑀓𑀣𑀺𑀢𑁂 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺.

𑁫𑁮𑁪. 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬𑀸𑀢𑀺𑀆𑀤𑀻𑀦𑀺 𑀲𑁄𑀴𑀲 𑀧𑀤𑀸𑀦𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄, 𑀲𑀤𑁆𑀥𑀫𑁆𑀫𑀲𑀯𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 …𑀧𑁂… 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀏𑀯𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 (𑀧𑀝𑀺. 𑀫. 𑁩.𑁪) 𑁋

𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑁄 𑀧𑀜𑁆𑀜𑀸𑀧𑀝𑀺𑀮𑀸𑀪𑁄? 𑀘𑀢𑀼𑀦𑁆𑀦𑀁 𑀫𑀕𑁆𑀕𑀜𑀸𑀡𑀸𑀦𑀁, 𑀘𑀢𑀼𑀦𑁆𑀦𑀁 𑀨𑀮𑀜𑀸𑀡𑀸𑀦𑀁, 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀁, 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀁, 𑀢𑁂𑀲𑀢𑁆𑀢𑀢𑀻𑀦𑀁 𑀜𑀸𑀡𑀸𑀦𑀁, 𑀲𑀢𑁆𑀢𑀲𑀢𑁆𑀢𑀢𑀻𑀦𑀁 𑀜𑀸𑀡𑀸𑀦𑀁 𑀮𑀸𑀪𑁄 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀨𑀲𑁆𑀲𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀉𑀧𑀲𑀫𑁆𑀧𑀤𑀸, 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀧𑀜𑁆𑀜𑀸𑀧𑀝𑀺𑀮𑀸𑀪𑁄.

𑀧𑀜𑁆𑀜𑀸𑀯𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀧𑀜𑁆𑀜𑀸𑀯𑀼𑀤𑁆𑀥𑀺? 𑀲𑀢𑁆𑀢𑀦𑁆𑀦𑀜𑁆𑀘 𑀲𑁂𑀓𑁆𑀔𑀸𑀦𑀁 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀘 𑀧𑀜𑁆𑀜𑀸 𑀯𑀟𑁆𑀠𑀢𑀺, 𑀅𑀭𑀳𑀢𑁄 𑀧𑀜𑁆𑀜𑀸 𑀯𑀟𑁆𑀠𑀺𑀢𑀯𑀟𑁆𑀠𑀦𑀸, 𑀧𑀜𑁆𑀜𑀸𑀯𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀧𑀜𑁆𑀜𑀸𑀯𑀼𑀤𑁆𑀥𑀺.

𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀁 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀁? 𑀲𑀢𑁆𑀢𑀦𑁆𑀦𑀜𑁆𑀘 𑀲𑁂𑀓𑁆𑀔𑀸𑀦𑀁 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀘 𑀧𑀜𑁆𑀜𑀸 𑀯𑁂𑀧𑀼𑀮𑁆𑀮𑀁 𑀕𑀘𑁆𑀙𑀢𑀺, 𑀅𑀭𑀳𑀢𑁄 𑀧𑀜𑁆𑀜𑀸 𑀯𑁂𑀧𑀼𑀮𑁆𑀮𑀁 𑀕𑀢𑀸, 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀇𑀤𑀁 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀁.

𑀫𑀳𑀸𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀫𑀳𑀸𑀧𑀜𑁆𑀜𑀸? 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸, 𑀫𑀳𑀦𑁆𑀢𑁂 𑀥𑀫𑁆𑀫𑁂…𑀧𑁂… 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄, 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺, 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂, 𑀫𑀳𑀦𑁆𑀢𑁂 𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂, 𑀫𑀳𑀦𑁆𑀢𑀸𑀦𑀺 𑀞𑀸𑀦𑀸𑀝𑁆𑀞𑀸𑀦𑀸𑀦𑀺, 𑀫𑀳𑀦𑁆𑀢𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄, 𑀫𑀳𑀦𑁆𑀢𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂, 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀇𑀤𑁆𑀥𑀺𑀧𑀸𑀤𑁂, 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀫𑀳𑀦𑁆𑀢𑀸𑀦𑀺 𑀩𑀮𑀸𑀦𑀺, 𑀫𑀳𑀦𑁆𑀢𑁂 𑀩𑁄𑀚𑁆𑀛𑀗𑁆𑀕𑁂, 𑀫𑀳𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑁂, 𑀫𑀳𑀦𑁆𑀢𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀫𑀳𑀸𑀪𑀺𑀜𑁆𑀜𑀸𑀬𑁄, 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸, 𑀫𑀳𑀸𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀫𑀳𑀸𑀧𑀜𑁆𑀜𑀸.

𑀧𑀼𑀣𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀧𑀼𑀣𑀼𑀧𑀜𑁆𑀜𑀸? 𑀧𑀼𑀣𑀼 𑀦𑀸𑀦𑀸𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼 𑀦𑀸𑀦𑀸𑀥𑀸𑀢𑀽𑀲𑀼, 𑀧𑀼𑀣𑀼 𑀦𑀸𑀦𑀸𑀆𑀬𑀢𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀢𑁆𑀣𑁂𑀲𑀼, 𑀥𑀫𑁆𑀫𑁂𑀲𑀼, 𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀼, 𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀞𑀸𑀦𑀸𑀝𑁆𑀞𑀸𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀭𑀺𑀬𑀲𑀘𑁆𑀘𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀲𑀼, 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼, 𑀇𑀤𑁆𑀥𑀺𑀧𑀸𑀤𑁂𑀲𑀼, 𑀇𑀦𑁆𑀤𑁆𑀭𑀺𑀬𑁂𑀲𑀼, 𑀩𑀮𑁂𑀲𑀼, 𑀩𑁄𑀚𑁆𑀛𑀗𑁆𑀕𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀭𑀺𑀬𑀫𑀕𑁆𑀕𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀸𑀫𑀜𑁆𑀜𑀨𑀮𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀪𑀺𑀜𑁆𑀜𑀸𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼 𑀦𑀸𑀦𑀸𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀧𑀼𑀣𑀼𑀧𑀜𑁆𑀜𑀸.

𑀯𑀺𑀧𑀼𑀮𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀯𑀺𑀧𑀼𑀮𑀧𑀜𑁆𑀜𑀸? 𑀯𑀺𑀧𑀼𑀮𑁂 𑀅𑀢𑁆𑀣𑁂 𑀧𑀭𑀺𑀕𑀡𑁆𑀳𑀸𑀢𑀻𑀢𑀺 𑀯𑀺𑀧𑀼𑀮𑀧𑀜𑁆𑀜𑀸…𑀧𑁂… 𑀯𑀺𑀧𑀼𑀮𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑀡𑁆𑀳𑀸𑀢𑀻𑀢𑀺 𑀯𑀺𑀧𑀼𑀮𑀧𑀜𑁆𑀜𑀸, 𑀯𑀺𑀧𑀼𑀮𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀯𑀺𑀧𑀼𑀮𑀧𑀜𑁆𑀜𑀸.

𑀕𑀫𑁆𑀪𑀻𑀭𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀕𑀫𑁆𑀪𑀻𑀭𑀧𑀜𑁆𑀜𑀸? 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀧𑀼𑀣𑀼𑀧𑀜𑁆𑀜𑀸𑀲𑀤𑀺𑀲𑁄 𑀯𑀺𑀢𑁆𑀣𑀸𑀭𑁄. 𑀕𑀫𑁆𑀪𑀻𑀭𑁂 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀕𑀫𑁆𑀪𑀻𑀭𑀧𑀜𑁆𑀜𑀸, 𑀕𑀫𑁆𑀪𑀻𑀭𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀕𑀫𑁆𑀪𑀻𑀭𑀧𑀜𑁆𑀜𑀸.

𑀅𑀲𑀸𑀫𑀦𑁆𑀢𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀅𑀲𑀸𑀫𑀦𑁆𑀢𑀧𑀜𑁆𑀜𑀸? 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀯𑀯𑀢𑁆𑀣𑀸𑀦𑀢𑁄 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀯𑀯𑀢𑁆𑀣𑀸𑀦𑀢𑁄 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬, 𑀢𑀲𑁆𑀲 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀦𑀺𑀭𑀼𑀢𑁆𑀢𑀺𑀬𑀸 𑀘 𑀧𑀝𑀺𑀪𑀸𑀦𑁂 𑀘 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀓𑁆𑀓𑁄𑀢𑀺 𑀅𑀪𑀺𑀲𑀫𑁆𑀪𑀯𑀺𑀢𑀼𑀁, 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄 𑀘 𑀲𑁄 𑀅𑀜𑁆𑀜𑁂𑀳𑀻𑀢𑀺 𑀅𑀲𑀸𑀫𑀦𑁆𑀢𑀧𑀜𑁆𑀜𑁄.

𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀧𑀜𑁆𑀜𑀸 𑀅𑀝𑁆𑀞𑀫𑀓𑀲𑁆𑀲 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀉𑀧𑀸𑀤𑀸𑀬 𑀅𑀝𑁆𑀞𑀫𑀓𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀅𑀝𑁆𑀞𑀫𑀓𑀲𑁆𑀲 𑀧𑀜𑁆𑀜𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀜𑁆𑀜𑀸𑀬 𑀤𑀽𑀭𑁂…𑀧𑁂… 𑀅𑀝𑁆𑀞𑀫𑀓𑀁 𑀉𑀧𑀸𑀤𑀸𑀬 𑀲𑁄𑀢𑀸𑀧𑀦𑁆𑀦𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀜𑁆𑀜𑀸 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸𑀬. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸 𑀅𑀦𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸𑀬. 𑀅𑀦𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸 𑀅𑀭𑀳𑀢𑁄 𑀧𑀜𑁆𑀜𑀸𑀬. 𑀅𑀭𑀳𑀢𑁄 𑀧𑀜𑁆𑀜𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸, 𑀅𑀭𑀳𑀦𑁆𑀢𑀁 𑀉𑀧𑀸𑀤𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑁆𑀘 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀉𑀧𑀸𑀤𑀸𑀬 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀕𑁆𑀕𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄.

𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄…𑀧𑁂… 𑀢𑁂 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘, 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸 𑀘 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸, 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘 𑀢𑁂 𑀪𑀕𑀯𑀢𑀸 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺 𑀅𑀕𑁆𑀕𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄, 𑀅𑀲𑀸𑀫𑀦𑁆𑀢𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀅𑀲𑀸𑀫𑀦𑁆𑀢𑀧𑀜𑁆𑀜𑀸.

𑀪𑀽𑀭𑀺𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀪𑀽𑀭𑀺𑀧𑀜𑁆𑀜𑀸? 𑀭𑀸𑀕𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀪𑀽𑀭𑀺𑀧𑀜𑁆𑀜𑀸, 𑀅𑀪𑀺𑀪𑀯𑀺𑀢𑀸𑀢𑀺 𑀪𑀽𑀭𑀺𑀧𑀜𑁆𑀜𑀸. 𑀤𑁄𑀲𑀁, 𑀫𑁄𑀳𑀁, 𑀓𑁄𑀥𑀁, 𑀉𑀧𑀦𑀸𑀳𑀁, 𑀫𑀓𑁆𑀔𑀁, 𑀧𑀮𑀸𑀲𑀁, 𑀇𑀲𑁆𑀲𑀁, 𑀫𑀘𑁆𑀙𑀭𑀺𑀬𑀁, 𑀫𑀸𑀬𑀁, 𑀲𑀸𑀞𑁂𑀬𑁆𑀬𑀁, 𑀣𑀫𑁆𑀪𑀁, 𑀲𑀸𑀭𑀫𑁆𑀪𑀁, 𑀫𑀸𑀦𑀁, 𑀅𑀢𑀺𑀫𑀸𑀦𑀁, 𑀫𑀤𑀁, 𑀧𑀫𑀸𑀤𑀁, 𑀲𑀩𑁆𑀩𑁂 𑀓𑀺𑀮𑁂𑀲𑁂, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂, 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂, 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀪𑀽𑀭𑀺𑀧𑀜𑁆𑀜𑀸, 𑀅𑀪𑀺𑀪𑀯𑀺𑀢𑀸𑀢𑀺 𑀪𑀽𑀭𑀺𑀧𑀜𑁆𑀜𑀸. 𑀭𑀸𑀕𑁄 𑀅𑀭𑀺, 𑀢𑀁 𑀅𑀭𑀺𑀁 𑀫𑀤𑁆𑀤𑀦𑀺𑀧𑀜𑁆𑀜𑀸𑀢𑀺 𑀪𑀽𑀭𑀺𑀧𑀜𑁆𑀜𑀸, 𑀤𑁄𑀲𑁄, 𑀫𑁄𑀳𑁄…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸 𑀅𑀭𑀺, 𑀢𑀁 𑀅𑀭𑀺𑀁 𑀫𑀤𑁆𑀤𑀦𑀺𑀧𑀜𑁆𑀜𑀸𑀢𑀺 𑀪𑀽𑀭𑀺𑀧𑀜𑁆𑀜𑀸. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀯𑀺𑀢𑁆𑀣𑀢𑀸𑀬 𑀯𑀺𑀧𑀼𑀮𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀪𑀽𑀭𑀺𑀧𑀜𑁆𑀜𑁄. 𑀅𑀧𑀺𑀘 𑀧𑀜𑁆𑀜𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁 𑀪𑀽𑀭𑀺 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸𑀢𑀺, 𑀪𑀽𑀭𑀺𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀪𑀽𑀭𑀺𑀧𑀜𑁆𑀜𑀸.

𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀁 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀁? 𑀇𑀥𑁂𑀓𑀘𑁆𑀘𑁄 𑀧𑀜𑁆𑀜𑀸𑀕𑀭𑀼𑀓𑁄 𑀳𑁄𑀢𑀺 𑀧𑀜𑁆𑀜𑀸𑀘𑀭𑀺𑀢𑁄 𑀧𑀜𑁆𑀜𑀸𑀲𑀬𑁄 𑀧𑀜𑁆𑀜𑀸𑀥𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀥𑀚𑁄 𑀧𑀜𑁆𑀜𑀸𑀓𑁂𑀢𑀼 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄 𑀯𑀺𑀘𑀬𑀩𑀳𑀼𑀮𑁄 𑀧𑀯𑀺𑀘𑀬𑀩𑀳𑀼𑀮𑁄 𑀑𑀓𑁆𑀔𑀸𑀬𑀦𑀩𑀳𑀼𑀮𑁄 𑀲𑀫𑁄𑀓𑁆𑀔𑀸𑀬𑀦𑀩𑀳𑀼𑀮𑁄 𑀲𑀫𑁆𑀧𑁂𑀓𑁆𑀔𑀸𑀬𑀦𑀥𑀫𑁆𑀫𑁄 𑀯𑀺𑀪𑀽𑀢𑀯𑀺𑀳𑀸𑀭𑀻 𑀢𑀘𑁆𑀘𑀭𑀺𑀢𑁄 𑀢𑀕𑁆𑀕𑀭𑀼𑀓𑁄 𑀢𑀩𑁆𑀩𑀳𑀼𑀮𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀸𑀥𑀺𑀧𑀢𑁂𑀬𑁆𑀬𑁄, 𑀬𑀣𑀸 𑀕𑀡𑀕𑀭𑀼𑀓𑁄 𑀯𑀼𑀘𑁆𑀘𑀢𑀺 𑀕𑀡𑀩𑀸𑀳𑀼𑀮𑀺𑀓𑁄𑀢𑀺, 𑀘𑀻𑀯𑀭𑀕𑀭𑀼𑀓𑁄 𑀧𑀢𑁆𑀢𑀕𑀭𑀼𑀓𑁄 𑀲𑁂𑀦𑀸𑀲𑀦𑀕𑀭𑀼𑀓𑁄 𑀯𑀼𑀘𑁆𑀘𑀢𑀺 𑀲𑁂𑀦𑀸𑀲𑀦𑀩𑀸𑀳𑀼𑀮𑀺𑀓𑁄𑀢𑀺, 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀧𑀜𑁆𑀜𑀸𑀕𑀭𑀼𑀓𑁄 𑀳𑁄𑀢𑀺 𑀧𑀜𑁆𑀜𑀸𑀘𑀭𑀺𑀢𑁄…𑀧𑁂… 𑀢𑀤𑀸𑀥𑀺𑀧𑀢𑁂𑀬𑁆𑀬𑁄, 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀇𑀤𑀁 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀁.

𑀲𑀻𑀖𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀲𑀻𑀖𑀧𑀜𑁆𑀜𑀸? 𑀲𑀻𑀖𑀁 𑀲𑀻𑀖𑀁 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁, 𑀲𑀻𑀮𑀓𑁆𑀔𑀦𑁆𑀥𑀁, 𑀲𑀫𑀸𑀥𑀺-𑀧𑀜𑁆𑀜𑀸-𑀯𑀺𑀫𑀼𑀢𑁆𑀢𑀺-𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀞𑀸𑀦𑀸𑀝𑁆𑀞𑀸𑀦𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀺. 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑀺. 𑀲𑀫𑁆𑀫𑀧𑁆𑀧𑀥𑀸𑀦𑁂 𑀇𑀤𑁆𑀥𑀺𑀧𑀸𑀤𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀲𑀻𑀖𑀧𑀜𑁆𑀜𑀸, 𑀲𑀻𑀖𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀲𑀻𑀖𑀧𑀜𑁆𑀜𑀸.

𑀮𑀳𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀮𑀳𑀼𑀧𑀜𑁆𑀜𑀸? 𑀮𑀳𑀼𑀁 𑀮𑀳𑀼𑀁 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀮𑀳𑀼𑀧𑀜𑁆𑀜𑀸…𑀧𑁂… 𑀮𑀳𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀮𑀳𑀼𑀧𑀜𑁆𑀜𑀸.

𑀳𑀸𑀲𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀳𑀸𑀲𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀳𑀸𑀲𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸…𑀧𑁂… 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀳𑀸𑀲𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀳𑀸𑀲𑀧𑀜𑁆𑀜𑀸.

𑀚𑀯𑀦𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀚𑀯𑀦𑀧𑀜𑁆𑀜𑀸? 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀬𑀸 𑀓𑀸𑀘𑀺 𑀯𑁂𑀤𑀦𑀸, 𑀬𑀸 𑀓𑀸𑀘𑀺 𑀲𑀜𑁆𑀜𑀸, 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸, 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸, 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸…𑀧𑁂… 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸, 𑀚𑀯𑀦𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀚𑀯𑀦𑀧𑀜𑁆𑀜𑀸.

𑀢𑀺𑀓𑁆𑀔𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀢𑀺𑀓𑁆𑀔𑀧𑀜𑁆𑀜𑀸? 𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁, 𑀯𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀭𑀸𑀕𑀁, 𑀤𑁄𑀲𑀁, 𑀫𑁄𑀳𑀁…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀙 𑀅𑀪𑀺𑀜𑁆𑀜𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬𑀸𑀢𑀺 𑀢𑀺𑀓𑁆𑀔𑀧𑀜𑁆𑀜𑀸, 𑀢𑀺𑀓𑁆𑀔𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀢𑀺𑀓𑁆𑀔𑀧𑀜𑁆𑀜𑀸.

𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺. ‘‘𑀓𑀢𑀫𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀺 𑀉𑀢𑁆𑀢𑀸𑀲𑀩𑀳𑀼𑀮𑁄 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 𑀅𑀭𑀢𑀺𑀩𑀳𑀼𑀮𑁄 𑀅𑀦𑀪𑀺𑀭𑀢𑀺𑀩𑀳𑀼𑀮𑁄 𑀩𑀳𑀺𑀫𑀼𑀔𑁄 𑀦 𑀭𑀫𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼, 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸, 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁, 𑀫𑁄𑀳𑀓𑁆𑀔𑀦𑁆𑀥𑀁, 𑀓𑁄𑀥𑀁, 𑀉𑀧𑀦𑀸𑀳𑀁…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸’’.

𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀩𑀳𑀼𑀯𑀘𑀦𑀁, 𑀇𑀥 𑀏𑀓𑀯𑀘𑀦𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀇𑀫𑀸 𑀘 𑀧𑀦 𑀲𑁄𑀴𑀲 𑀫𑀳𑀸𑀧𑀜𑁆𑀜𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸.

𑀓𑀸𑀬𑀕𑀢𑀸𑀲𑀢𑀺𑀯𑀕𑁆𑀕𑀯𑀡𑁆𑀡𑀦𑀸.