𑁧𑁮. 𑀅𑀧𑀭𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸

𑁩𑁮𑁨. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀻𑀢𑀺 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁𑀬𑁂𑀯 (𑀅. 𑀦𑀺. 𑁭.𑁭𑁨) 𑀯𑀼𑀢𑁆𑀢𑀁. 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀳𑀺 𑀫𑁂𑀢𑁆𑀢𑀸𑀬 𑀯𑀺𑀧𑀸𑀓𑁂 𑀓𑀣𑀸𑀬𑁂𑀯 𑀦𑀢𑁆𑀣𑀺. 𑀢𑀲𑁆𑀲𑀸𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀞𑀫𑀦𑁆𑀢𑀺 ‘‘𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀧𑀞𑀫𑀁, 𑀇𑀤𑀁 𑀧𑀞𑀫𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀧𑀞𑀫’’𑀦𑁆𑀢𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁬𑁮) 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀛𑀸𑀦𑀦𑁆𑀢𑀺 𑀛𑀸𑀦𑀁 𑀦𑀸𑀫 𑀤𑀼𑀯𑀺𑀥𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀜𑁆𑀘 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀜𑁆𑀘𑀸𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀦𑀸𑀫 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀢𑀸 𑀳𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀦𑁄 𑀆𑀭𑀫𑁆𑀫𑀡𑀲𑁆𑀲 𑀉𑀧𑀦𑀺𑀚𑁆𑀛𑀸𑀦𑀢𑁄 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺. 𑀯𑀺𑀧𑀲𑁆𑀲𑀦𑀸 𑀳𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀮𑀓𑁆𑀔𑀡𑀲𑁆𑀲 𑀉𑀧𑀦𑀺𑀚𑁆𑀛𑀸𑀦𑀢𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀦𑀸𑀫, 𑀯𑀺𑀧𑀲𑁆𑀲𑀦𑀸𑀬 𑀧𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀁 𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀻𑀢𑀺 𑀫𑀕𑁆𑀕𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁, 𑀨𑀮𑀁 𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢-𑀮𑀓𑁆𑀔𑀡𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀉𑀧𑀦𑀺𑀚𑁆𑀛𑀸𑀦𑀢𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀓𑁄 𑀧𑀦 𑀯𑀸𑀤𑁄 𑀬𑁂 𑀦𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑀻𑀢𑀺 𑀬𑁂 𑀦𑀁 𑀧𑀞𑀫𑀚𑁆𑀛𑀸𑀦𑀁 𑀩𑀳𑀼𑀮𑀻 𑀓𑀭𑁄𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁮𑁩. 𑀤𑀼𑀢𑀺𑀬𑀦𑁆𑀢𑀺𑀆𑀤𑀻𑀲𑀼𑀧𑀺 ‘‘𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸 𑀤𑀼𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁭𑁯) 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁮𑁬-𑁩𑁮𑁭. 𑀫𑁂𑀢𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀺𑀁. 𑀇𑀥 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀯 𑀫𑁂𑀢𑁆𑀢𑀸 𑀅𑀥𑀺𑀧𑁆𑀧𑁂𑀢𑀸. 𑀓𑀭𑀼𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀯𑀝𑁆𑀝𑀁 𑀳𑁄𑀦𑁆𑀢𑀺, 𑀯𑀝𑁆𑀝𑀧𑀸𑀤𑀸 𑀳𑁄𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀧𑀸𑀤𑀸 𑀳𑁄𑀦𑁆𑀢𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸 𑀳𑁄𑀦𑁆𑀢𑀺, 𑀅𑀪𑀺𑀜𑁆𑀜𑀸𑀧𑀸𑀤𑀸 𑀯𑀸 𑀦𑀺𑀭𑁄𑀥𑀧𑀸𑀤𑀸 𑀯𑀸 𑀳𑁄𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀦 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀲𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸𑀢𑀺.

𑁩𑁯𑁦. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀆𑀦𑀸𑀧𑀸𑀦𑀧𑀩𑁆𑀩𑀁, 𑀇𑀭𑀺𑀬𑀸𑀧𑀣𑀧𑀩𑁆𑀩𑀁, 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁, 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁, 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁, 𑀦𑀯𑀲𑀺𑀯𑀣𑀺𑀓𑀸𑀧𑀩𑁆𑀩𑀸𑀦𑀺, 𑀅𑀚𑁆𑀛𑀢𑁆𑀢𑀧𑀭𑀺𑀓𑀫𑁆𑀫𑀯𑀲𑁂𑀦 𑀘𑀢𑁆𑀢𑀸𑀭𑀺 𑀦𑀻𑀮𑀸𑀤𑀺𑀓𑀲𑀺𑀡𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀅𑀝𑁆𑀞𑀸𑀭𑀲𑀯𑀺𑀥𑁂 𑀓𑀸𑀬𑁂 𑀢𑀫𑁂𑀯 𑀓𑀸𑀬𑀁 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺. 𑀇𑀫𑀺𑀦𑀸 𑀇𑀫𑀲𑁆𑀲 𑀅𑀝𑁆𑀞𑀸𑀭𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀭𑀺𑀬𑀸𑀧𑀣𑁄 𑀓𑀣𑀺𑀢𑁄 𑀳𑁄𑀢𑀺. 𑀆𑀢𑀸𑀧𑀻𑀢𑀺 𑀢𑀲𑁆𑀲𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀪𑀸𑀯𑀦𑀓𑀯𑀻𑀭𑀺𑀬𑁂𑀦 𑀯𑀻𑀭𑀺𑀬𑀯𑀸. 𑀲𑀫𑁆𑀧𑀚𑀸𑀦𑁄𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀧𑀭𑀺𑀕𑁆𑀕𑀸𑀳𑀺𑀓𑀧𑀜𑁆𑀜𑀸𑀬 𑀲𑀫𑁆𑀫𑀸 𑀧𑀚𑀸𑀦𑀦𑁆𑀢𑁄. 𑀲𑀢𑀺𑀫𑀸𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀓𑀸𑀬𑀲𑀗𑁆𑀔𑀸𑀢𑁂 𑀮𑁄𑀓𑁂 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀢𑀡𑁆𑀳𑀜𑁆𑀘 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀤𑁄𑀫𑀦𑀲𑁆𑀲𑀜𑁆𑀘 𑀯𑀺𑀦𑁂𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀲𑀼𑀤𑁆𑀥𑀭𑀽𑀧𑀲𑀫𑁆𑀫𑀲𑀦𑀫𑁂𑀯 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀢𑀺 𑀲𑀼𑀔𑀸𑀤𑀺𑀪𑁂𑀤𑀸𑀲𑀼 𑀯𑁂𑀤𑀦𑀸𑀲𑀼 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀁, 𑀅𑀤𑀼𑀓𑁆𑀔𑀫𑀲𑀼𑀔𑀁, 𑀲𑀸𑀫𑀺𑀲𑀁 𑀯𑀸 𑀲𑀼𑀔𑀁, 𑀦𑀺𑀭𑀸𑀫𑀺𑀲𑀁 𑀯𑀸 𑀲𑀼𑀔𑀁, 𑀲𑀸𑀫𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀦𑀺𑀭𑀸𑀫𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀲𑀸𑀫𑀺𑀲𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁, 𑀦𑀺𑀭𑀸𑀫𑀺𑀲𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁮𑁦; 𑀯𑀺𑀪. 𑁩𑁬𑁩; 𑀫. 𑀦𑀺. 𑁧.𑁧𑁧𑁩) 𑀏𑀯𑀁 𑀯𑀼𑀢𑁆𑀢𑀁 𑀦𑀯𑀯𑀺𑀥𑀁 𑀯𑁂𑀤𑀦𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀆𑀢𑀸𑀧𑀻𑀢𑀺𑀆𑀤𑀺𑀦𑀸 𑀧𑀦𑁂𑀢𑁆𑀣 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀪𑀸𑀯𑀦𑀸𑀧𑀭𑀺𑀕𑁆𑀕𑀸𑀳𑀺𑀓𑀸𑀦𑀁 𑀯𑀻𑀭𑀺𑀬𑀧𑀜𑁆𑀜𑀸𑀲𑀢𑀻𑀦𑀁 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻𑀢𑀺 ‘‘𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁮𑁧; 𑀯𑀺𑀪. 𑁩𑁬𑁫; 𑀫. 𑀦𑀺. 𑁧.𑁧𑁧𑁪) 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑁂 𑀲𑁄𑀴𑀲𑀧𑁆𑀧𑀪𑁂𑀤𑁂 𑀘𑀺𑀢𑁆𑀢𑁂 𑀢𑀫𑁂𑀯 𑀘𑀺𑀢𑁆𑀢𑀁 𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 ‘‘𑀧𑀜𑁆𑀘 𑀦𑀻𑀯𑀭𑀡𑀸𑀦𑀺, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁮𑁨-𑁪𑁦𑁩; 𑀯𑀺𑀪. 𑁩𑁬𑁭-𑁩𑁭𑁩; 𑀫. 𑀦𑀺. 𑁧.𑁧𑁧𑁫-𑁧𑁩𑁬) 𑀏𑀯𑀁 𑀓𑁄𑀝𑁆𑀞𑀸𑀲𑀯𑀲𑁂𑀦 𑀧𑀜𑁆𑀘𑀥𑀸 𑀯𑀼𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂 𑀘 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂 𑀘 𑀲𑀼𑀤𑁆𑀥𑀅𑀭𑀽𑀧𑀲𑀫𑁆𑀫𑀲𑀦𑀫𑁂𑀯 𑀓𑀣𑀺𑀢𑀁, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑁂 𑀭𑀽𑀧𑀸𑀭𑀽𑀧𑀲𑀫𑁆𑀫𑀲𑀦𑀁. 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁩𑁯𑁪. 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀁. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀮𑁄𑀪𑀸𑀤𑀺𑀥𑀫𑁆𑀫𑀸𑀦𑀁. 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺 𑀅𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬. 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀧𑀬𑁄𑀕𑀁 𑀧𑀭𑀓𑁆𑀓𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑁂𑀦𑁂𑀯 𑀲𑀳𑀚𑀸𑀢𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑀢𑀺. 𑀧𑀤𑀳𑀢𑀻𑀢𑀺 𑀧𑀥𑀸𑀦𑀯𑀻𑀭𑀺𑀬𑀁 𑀓𑀭𑁄𑀢𑀺.

𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀚𑀸𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁 𑀅𑀮𑁄𑀪𑀸𑀤𑀺𑀥𑀫𑁆𑀫𑀸𑀦𑀁. 𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀁. 𑀅𑀲𑀫𑁆𑀫𑁄𑀲𑀸𑀬𑀸𑀢𑀺 𑀅𑀦𑀲𑁆𑀲𑀦𑀢𑁆𑀣𑀁. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬. 𑀪𑀸𑀯𑀦𑀸𑀬𑀸𑀢𑀺 𑀯𑀟𑁆𑀠𑀺𑀬𑀸. 𑀧𑀭𑀺𑀧𑀽𑀭𑀺𑀬𑀸𑀢𑀺 𑀧𑀭𑀺𑀧𑀽𑀭𑀡𑀢𑁆𑀣𑀸𑀬. 𑀅𑀬𑀁 𑀢𑀸𑀯 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀏𑀓𑀧𑀤𑀺𑀓𑁄 𑀅𑀢𑁆𑀣𑀼𑀤𑁆𑀥𑀸𑀭𑁄.

𑀅𑀬𑀁 𑀧𑀦 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸 𑀦𑀸𑀫 𑀤𑀼𑀯𑀺𑀥𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘. 𑀢𑀢𑁆𑀣 𑀮𑁄𑀓𑀺𑀬𑀸 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁂 𑀳𑁄𑀢𑀺, 𑀲𑀸 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀮𑁄𑀓𑀺𑀬𑀫𑀕𑁆𑀕𑀓𑁆𑀔𑀡𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀆𑀯𑀼𑀲𑁄, 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺, ‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺, ‘𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁪𑁫).

𑀏𑀢𑁆𑀣 𑀘 𑀧𑀸𑀧𑀓𑀸 𑀅𑀓𑀼𑀲𑀮𑀸𑀢𑀺 𑀮𑁄𑀪𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘𑁂𑀯 𑀫𑀕𑁆𑀕𑁄 𑀘. 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀯. 𑀫𑀕𑁆𑀕𑁄 𑀧𑀦 𑀲𑀓𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀫𑀸𑀦𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀓𑁄 𑀦𑀸𑀫 𑀦𑀢𑁆𑀣𑀺. 𑀲𑁄 𑀳𑀺 𑀨𑀮𑀲𑁆𑀲 𑀧𑀘𑁆𑀘𑀬𑀁 𑀤𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀢𑀺. 𑀧𑀼𑀭𑀺𑀫𑀲𑁆𑀫𑀺𑀫𑁆𑀧𑀺 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀕𑀳𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀦 𑀬𑀼𑀢𑁆𑀢𑀁. 𑀏𑀯𑀁 𑀮𑁄𑀓𑀺𑀬𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁂 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦𑁂𑀢𑀁 𑀏𑀓𑀫𑁂𑀯 𑀯𑀻𑀭𑀺𑀬𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺.

𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀅𑀦𑀼𑀧𑁆𑀧𑀦𑁆𑀦𑁄 𑀘𑁂𑀯 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀦𑁆𑀢𑀺 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁, 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁, 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁, 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀢𑁆𑀣 𑀬𑁂 𑀓𑀺𑀮𑁂𑀲𑀸 𑀯𑀺𑀚𑁆𑀚𑀫𑀸𑀦𑀸 𑀉𑀧𑁆𑀧𑀸𑀤𑀸𑀤𑀺𑀲𑀫𑀗𑁆𑀕𑀺𑀦𑁄, 𑀇𑀤𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀓𑀫𑁆𑀫𑁂 𑀧𑀦 𑀚𑀯𑀺𑀢𑁂 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀯𑀺𑀧𑀸𑀓𑁄 𑀪𑀼𑀢𑁆𑀯𑀸 𑀯𑀺𑀕𑀢𑀁 𑀦𑀸𑀫, 𑀓𑀫𑁆𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀼𑀢𑁆𑀯𑀸 𑀯𑀺𑀕𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀅𑀜𑁆𑀜𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺, 𑀏𑀯𑀁 𑀓𑀢𑁂 𑀑𑀓𑀸𑀲𑁂 𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀑𑀓𑀸𑀲𑀓𑀭𑀡𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺 𑀦𑀸𑀫, 𑀢𑁂 𑀅𑀢𑀻𑀢𑀸𑀤𑀺𑀪𑁂𑀤𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀅𑀦𑀼𑀲𑀬𑀺𑀢𑀓𑀺𑀮𑁂𑀲𑀸 𑀧𑀦 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀅𑀢𑀻𑀢𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀧𑀺 𑀳𑀺 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺, 𑀅𑀦𑀸𑀕𑀢𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀧𑀺 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀧𑀺 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺, 𑀇𑀤𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀢𑀸𑀲𑀼 𑀢𑀸𑀲𑀼 𑀪𑀽𑀫𑀺𑀲𑀼 𑀅𑀲𑀫𑀼𑀕𑁆𑀖𑀸𑀢𑀕𑀢𑀸 𑀓𑀺𑀮𑁂𑀲𑀸 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀻’’𑀢𑀺.

𑀅𑀧𑀭𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁, 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀁, 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁, 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀢𑁆𑀣 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀁𑀬𑁂𑀯 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀲𑀓𑀺𑀁 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀆𑀭𑀫𑁆𑀫𑀡𑁂 𑀦𑀺𑀫𑀺𑀢𑁆𑀢𑁂 𑀕𑀳𑀺𑀢𑁂 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀓𑀺𑀮𑁂𑀲𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀕𑁆𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 𑀔𑀻𑀭𑀼𑀓𑁆𑀔𑀲𑁆𑀲 𑀓𑀼𑀞𑀸𑀭𑀺𑀬𑀸 𑀆𑀳𑀢𑀸𑀳𑀢𑀝𑁆𑀞𑀸𑀦𑁂 𑀔𑀻𑀭𑀁 𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀏𑀯𑀁. 𑀇𑀤𑀁 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀲𑀫𑀸𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸 𑀧𑀦 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 𑀔𑀻𑀭𑀭𑀼𑀓𑁆𑀔𑀁 𑀓𑀼𑀞𑀸𑀭𑀺𑀬𑀸 𑀆𑀳𑀦𑁂𑀬𑁆𑀬𑀼𑀁, 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀔𑀻𑀭𑀁 𑀦 𑀦𑀺𑀓𑁆𑀔𑀫𑁂𑀬𑁆𑀬𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁. 𑀇𑀤𑀁 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑀺𑀢𑀓𑀺𑀮𑁂𑀲𑀸 𑀧𑀦 𑀪𑀯𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀤𑀁 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫.

𑀇𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁, 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁, 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁, 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀦 𑀫𑀕𑁆𑀕𑀯𑀚𑁆𑀛𑀁, 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁, 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀁, 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁, 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀫𑀕𑁆𑀕𑀯𑀚𑁆𑀛𑀁. 𑀫𑀕𑁆𑀕𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀏𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺. 𑀲𑁄 𑀬𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀳𑀜𑁆𑀘𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺? 𑀢𑁂𑀦 𑀳𑀺 𑀔𑀻𑀡𑀁𑀬𑁂𑀯 𑀔𑁂𑀧𑁂𑀢𑀺, 𑀦𑀺𑀭𑀼𑀤𑁆𑀥𑀁 𑀦𑀺𑀭𑁄𑀥𑁂𑀢𑀺, 𑀅𑀢𑁆𑀣𑀗𑁆𑀕𑀢𑀁 𑀅𑀢𑁆𑀣𑀗𑁆𑀕𑀫𑁂𑀢𑀺, 𑀅𑀢𑀻𑀢𑀁 𑀬𑀁 𑀦𑀢𑁆𑀣𑀺, 𑀢𑀁 𑀧𑀚𑀳𑀢𑀺. 𑀳𑀜𑁆𑀘𑀺 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺? 𑀢𑁂𑀦 𑀳𑀺 𑀅𑀚𑀸𑀢𑀁 𑀧𑀚𑀳𑀢𑀺, 𑀅𑀦𑀺𑀩𑁆𑀩𑀢𑁆𑀢𑀁 𑀅𑀦𑀼𑀧𑁆𑀧𑀦𑁆𑀦𑀁 𑀅𑀧𑀸𑀢𑀼𑀪𑀽𑀢𑀁 𑀧𑀚𑀳𑀢𑀺, 𑀅𑀦𑀸𑀕𑀢𑀁 𑀬𑀁 𑀦𑀢𑁆𑀣𑀺, 𑀢𑀁 𑀧𑀚𑀳𑀢𑀺. 𑀳𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺? 𑀢𑁂𑀦 𑀳𑀺 𑀭𑀢𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀁, 𑀫𑀽𑀴𑁆𑀳𑁄 𑀫𑁄𑀳𑀁, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀁, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀁, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀁, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀁 𑀧𑀚𑀳𑀢𑀺, 𑀓𑀡𑁆𑀳𑀲𑀼𑀓𑁆𑀓𑀸 𑀥𑀫𑁆𑀫𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀦𑁆𑀢𑀺, 𑀲𑀁𑀓𑀺𑀮𑁂𑀲𑀺𑀬𑀸 𑀫𑀕𑁆𑀕𑀪𑀸𑀯𑀦𑀸 𑀳𑁄𑀢𑀻𑀢𑀺…𑀧𑁂… 𑀢𑁂𑀦 𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀦𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀦𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀦𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺. 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸…𑀧𑁂… 𑀅𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺. 𑀬𑀣𑀸 𑀓𑀣𑀁 𑀯𑀺𑀬? 𑀲𑁂𑀬𑁆𑀬𑀣𑀸𑀧𑀺 𑀢𑀭𑀼𑀡𑁄 𑀭𑀼𑀓𑁆𑀔𑁄…𑀧𑁂… 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁩.𑁨𑁧).

𑀇𑀢𑀺 𑀧𑀸𑀴𑀺𑀬𑀁 𑀅𑀚𑀸𑀢𑀨𑀮𑀭𑀼𑀓𑁆𑀔𑁄 𑀆𑀕𑀢𑁄, 𑀚𑀸𑀢𑀨𑀮𑀭𑀼𑀓𑁆𑀔𑁄 𑀧𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀳𑀺 𑀲𑀨𑀮𑁄 𑀢𑀭𑀼𑀡𑀫𑁆𑀩𑀭𑀼𑀓𑁆𑀔𑁄, 𑀢𑀲𑁆𑀲 𑀨𑀮𑀸𑀦𑀺 𑀫𑀦𑀼𑀲𑁆𑀲𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀁, 𑀲𑁂𑀲𑀸𑀦𑀺 𑀧𑀸𑀢𑁂𑀢𑁆𑀯𑀸 𑀧𑀘𑁆𑀙𑀺𑀬𑁄 𑀧𑀽𑀭𑁂𑀬𑁆𑀬𑀼𑀁, 𑀅𑀣𑀜𑁆𑀜𑁄 𑀧𑀼𑀭𑀺𑀲𑁄 𑀢𑀁 𑀨𑀭𑀲𑀼𑀦𑀸 𑀙𑀺𑀦𑁆𑀤𑁂𑀬𑁆𑀬. 𑀢𑁂𑀦𑀲𑁆𑀲 𑀦𑁂𑀯 𑀅𑀢𑀻𑀢𑀸𑀦𑀺 𑀨𑀮𑀸𑀦𑀺 𑀦𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀘 𑀦𑀸𑀲𑀺𑀢𑀸𑀦𑀺. 𑀅𑀢𑀻𑀢𑀸𑀦𑀺 𑀳𑀺 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀪𑀼𑀢𑁆𑀢𑀸𑀦𑀺, 𑀅𑀦𑀸𑀕𑀢𑀸𑀦𑀺 𑀅𑀦𑀺𑀩𑁆𑀩𑀢𑁆𑀢𑀸𑀦𑀺, 𑀦 𑀲𑀓𑁆𑀓𑀸 𑀦𑀸𑀲𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀲𑁄 𑀙𑀺𑀦𑁆𑀦𑁄, 𑀢𑀤𑀸 𑀨𑀮𑀸𑀦𑀺𑀬𑁂𑀯 𑀦𑀢𑁆𑀣𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺𑀧𑀺 𑀅𑀦𑀸𑀲𑀺𑀢𑀸𑀦𑀺. 𑀲𑀘𑁂 𑀧𑀦 𑀭𑀼𑀓𑁆𑀔𑁄 𑀅𑀘𑁆𑀙𑀺𑀦𑁆𑀦𑁄 𑀅𑀲𑁆𑀲, 𑀅𑀣𑀲𑁆𑀲 𑀧𑀣𑀯𑀻𑀭𑀲𑀜𑁆𑀘 𑀆𑀧𑁄𑀭𑀲𑀜𑁆𑀘 𑀆𑀕𑀫𑁆𑀫 𑀬𑀸𑀦𑀺 𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀢𑀸𑀦𑀺 𑀦𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀳𑀺 𑀅𑀚𑀸𑀢𑀸𑀦𑁂𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀦𑁂𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀦𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀫𑀕𑁆𑀕𑁄 𑀦𑀸𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦𑀸𑀧𑀺 𑀦 𑀧𑀚𑀳𑀢𑀺. 𑀬𑁂𑀲𑀜𑁆𑀳𑀺 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀔𑀦𑁆𑀥𑁂𑀲𑀼 𑀅𑀧𑀭𑀺𑀜𑁆𑀜𑀸𑀢𑁂𑀲𑀼 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀫𑀕𑁆𑀕𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀢𑁂 𑀓𑀺𑀮𑁂𑀲𑀸 𑀅𑀚𑀸𑀢𑀸𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀭𑀼𑀡𑀧𑀼𑀢𑁆𑀢𑀸𑀬 𑀇𑀢𑁆𑀣𑀺𑀬𑀸 𑀧𑀼𑀦 𑀅𑀯𑀺𑀚𑀸𑀬𑀦𑀢𑁆𑀣𑀁 𑀩𑁆𑀬𑀸𑀥𑀺𑀢𑀸𑀦𑀁 𑀭𑁄𑀕𑀯𑀽𑀧𑀲𑀫𑀦𑀢𑁆𑀣𑀁 𑀧𑀻𑀢𑀪𑁂𑀲𑀚𑁆𑀚𑁂𑀳𑀺 𑀯𑀸𑀧𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀏𑀯𑀁 𑀫𑀕𑁆𑀕𑁄 𑀬𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸 𑀯𑀸 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀦 𑀘 𑀫𑀕𑁆𑀕𑁄 𑀓𑀺𑀮𑁂𑀲𑁂 𑀦 𑀧𑀚𑀳𑀢𑀺. 𑀬𑁂 𑀧𑀦 𑀫𑀕𑁆𑀕𑁄 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦 𑀓𑁂𑀯𑀮𑀜𑁆𑀘 𑀫𑀕𑁆𑀕𑁄 𑀓𑀺𑀮𑁂𑀲𑁂𑀬𑁂𑀯 𑀧𑀚𑀳𑀢𑀺, 𑀓𑀺𑀮𑁂𑀲𑀸𑀦𑀁 𑀧𑀦 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸, 𑀢𑁂𑀧𑀺 𑀧𑀚𑀳𑀢𑀺𑀬𑁂𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 (𑀘𑀽𑀴𑀯. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁬) 𑀯𑀺𑀢𑁆𑀣𑀸𑀭𑁄. 𑀇𑀢𑀺 𑀫𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀢𑁄 𑀅𑀦𑀼𑀧𑀸𑀤𑀺𑀦𑁆𑀦𑀢𑁄 𑀘 𑀯𑀼𑀝𑁆𑀞𑀸𑀢𑀺. 𑀪𑀯𑀯𑀲𑁂𑀦 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀧𑀸𑀬𑀪𑀯𑀢𑁄 𑀯𑀼𑀝𑁆𑀞𑀸𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀪𑀯𑁂𑀓𑀤𑁂𑀲𑀢𑁄, 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀲𑀼𑀕𑀢𑀺𑀓𑀸𑀫𑀪𑀯𑀢𑁄, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀭𑀽𑀧𑀸𑀭𑀽𑀧𑀪𑀯𑀢𑁄 𑀯𑀼𑀝𑁆𑀞𑀸𑀢𑀺. 𑀲𑀩𑁆𑀩𑀪𑀯𑁂𑀳𑀺 𑀯𑀼𑀝𑁆𑀞𑀸𑀢𑀺𑀬𑁂𑀯𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀅𑀣 𑀫𑀕𑁆𑀕𑀓𑁆𑀔𑀡𑁂 𑀓𑀣𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬 𑀪𑀸𑀯𑀦𑀸 𑀳𑁄𑀢𑀺, 𑀓𑀣𑀁 𑀯𑀸 𑀉𑀧𑁆𑀧𑀦𑁆𑀦𑀸𑀦𑀁 𑀞𑀺𑀢𑀺𑀬𑀸𑀢𑀺? 𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀏𑀯. 𑀫𑀕𑁆𑀕𑁄 𑀳𑀺 𑀧𑀯𑀢𑁆𑀢𑀫𑀸𑀦𑁄 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀯𑀼𑀘𑁆𑀘𑀢𑀺. 𑀅𑀦𑀸𑀕𑀢𑀧𑀼𑀩𑁆𑀩𑀜𑁆𑀳𑀺 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀯𑀸 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀺𑀢𑁆𑀯𑀸 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺; ‘‘𑀅𑀦𑀸𑀕𑀢𑀝𑁆𑀞𑀸𑀦𑀁 𑀆𑀕𑀢𑀫𑁆𑀳, 𑀅𑀦𑀦𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀸𑀫𑀸’’𑀢𑀺. 𑀬𑀸 𑀘𑀲𑁆𑀲 𑀧𑀯𑀢𑁆𑀢𑀺, 𑀅𑀬𑀫𑁂𑀯 𑀞𑀺𑀢𑀺 𑀦𑀸𑀫𑀸𑀢𑀺 ‘‘𑀞𑀺𑀢𑀺𑀬𑀸 𑀪𑀸𑀯𑁂𑀢𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑁂𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀤𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀯𑀻𑀭𑀺𑀬𑀁 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀅𑀬𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑁂𑀯 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀓𑀣𑀺𑀢𑀸𑀦𑀺.

𑁩𑁯𑁮-𑁪𑁦𑁧. 𑀇𑀤𑁆𑀥𑀺𑀧𑀸𑀤𑁂𑀲𑀼 𑀙𑀦𑁆𑀤𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺, 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑀁. 𑀇𑀤𑁆𑀥𑀺𑀬𑀸 𑀧𑀸𑀤𑀁, 𑀇𑀤𑁆𑀥𑀺𑀪𑀽𑀢𑀁 𑀯𑀸 𑀧𑀸𑀤𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁪𑁩𑁧 𑀆𑀤𑀬𑁄) 𑀆𑀕𑀢𑁄 𑀏𑀯. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁮𑁨) 𑀧𑀦𑀲𑁆𑀲 𑀅𑀢𑁆𑀣𑁄 𑀤𑀻𑀧𑀺𑀢𑁄. 𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀬𑀤𑀸 𑀙𑀦𑁆𑀤𑀸𑀤𑀻𑀲𑀼 𑀏𑀓𑀁 𑀥𑀼𑀭𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀤𑀸𑀲𑁆𑀲 𑀧𑀞𑀫𑀺𑀤𑁆𑀥𑀺𑀧𑀸𑀤𑁄 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑁄, 𑀅𑀧𑀭𑀪𑀸𑀕𑁂 𑀮𑁄𑀓𑀼𑀢𑁆𑀢𑀭𑁄. 𑀏𑀯𑀁 𑀲𑁂𑀲𑀸𑀧𑀻𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸.

𑁪𑁦𑁨-𑁪𑁦𑁬. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀻𑀢𑀺𑀆𑀤𑀻𑀲𑀼 𑀲𑀤𑁆𑀥𑀸𑀯 𑀅𑀢𑁆𑀢𑀦𑁄 𑀲𑀤𑁆𑀥𑀸𑀥𑀼𑀭𑁂 𑀇𑀦𑁆𑀤𑀝𑁆𑀞𑀁 𑀓𑀭𑁄𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀸𑀯𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀆𑀤𑀺𑀓𑀫𑁆𑀫𑀺𑀓𑁄 𑀬𑁄𑀕𑀸𑀯𑀘𑀭𑁄 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑁄𑀥𑁂𑀦𑁆𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀦𑀸𑀫. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀧𑀲𑀸𑀤𑀦𑀻𑀬𑁂 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀓𑀼𑀲𑀻𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀫𑀼𑀝𑁆𑀞𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀢𑀺𑀧𑀝𑁆𑀞𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀅𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺.

‘‘𑀤𑀼𑀧𑁆𑀧𑀜𑁆𑀜𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀧𑀜𑁆𑀜𑀯𑀦𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁮𑁪-𑁧𑁮𑁫).

𑀏𑀢𑁆𑀣 𑀘 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 𑀲𑀡𑁆𑀳𑀲𑀼𑀔𑀼𑀫𑀁 𑀔𑀦𑁆𑀥𑀦𑁆𑀢𑀭𑀁, 𑀆𑀬𑀢𑀦𑀦𑁆𑀢𑀭𑀁, 𑀥𑀸𑀢𑀦𑁆𑀢𑀭𑀁, 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀦𑁆𑀢𑀭𑀁, 𑀫𑀕𑁆𑀕𑀦𑁆𑀢𑀭𑀁, 𑀨𑀮𑀦𑁆𑀢𑀭𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀫𑁂𑀲𑀜𑁆𑀳𑀺 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀓𑀸𑀭𑀡𑀸𑀦𑀁 𑀯𑀲𑁂𑀦 𑀅𑀓𑀢𑀸𑀪𑀺𑀦𑀺𑀯𑁂𑀲𑁄 𑀆𑀤𑀺𑀓𑀫𑁆𑀫𑀺𑀓𑁄 𑀬𑁄𑀕𑀸𑀯𑀘𑀭𑁄 𑀲𑀤𑁆𑀥𑀸𑀥𑀼𑀭𑀸𑀤𑀻𑀲𑀼 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑁄 𑀅𑀯𑀲𑀸𑀦𑁂 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀇𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀦𑀸𑀫 𑀳𑁄𑀢𑀻𑀢𑀺. 𑀏𑀯𑀁 𑀇𑀫𑀸𑀦𑀺𑀧𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺.

𑀲𑀤𑁆𑀥𑀸𑀩𑀮𑀸𑀤𑀻𑀲𑀼 𑀲𑀤𑁆𑀥𑀸𑀬𑁂𑀯 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀦𑁆𑀢𑀺 𑀲𑀤𑁆𑀥𑀸𑀩𑀮𑀁. 𑀯𑀻𑀭𑀺𑀬𑀩𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀳𑀺 𑀲𑀤𑁆𑀥𑀸 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀺, 𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑁂𑀦 𑀦 𑀓𑀫𑁆𑀧𑀢𑀺, 𑀲𑀢𑀺 𑀫𑀼𑀝𑁆𑀞𑀲𑁆𑀲𑀘𑁆𑀘𑁂𑀦 𑀦 𑀓𑀫𑁆𑀧𑀢𑀺, 𑀲𑀫𑀸𑀥𑀺 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀺, 𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀪𑀸𑀯𑀦𑀸𑀦𑀬𑁄 𑀧𑀦𑁂𑀢𑁆𑀣 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀫𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺.

𑁪𑁧𑁮. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻𑀢𑀺 𑀏𑀢𑁆𑀣 𑀅𑀬𑀁 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀯𑀲𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀯𑀡𑁆𑀡𑀦𑀸𑀬 𑀪𑀸𑀯𑀦𑀸𑀦𑀬𑁄. 𑀢𑀢𑁆𑀣 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀆𑀤𑀺𑀧𑀤𑀸𑀦𑀁 𑀢𑀸𑀯 𑀅𑀬𑀫𑀢𑁆𑀣𑀯𑀡𑁆𑀡𑀦𑀸 𑁋 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀢𑀸𑀯 𑀲𑀭𑀡𑀝𑁆𑀞𑁂𑀦 𑀲𑀢𑀺, 𑀲𑀸 𑀧𑀦𑁂𑀲𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸, 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀯𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀭𑀜𑁆𑀜𑁄 𑀲𑀸𑀧𑀢𑁂𑀬𑁆𑀬𑀁 𑀅𑀧𑀺𑀮𑀸𑀧𑁂𑀢𑀺 ‘𑀏𑀢𑁆𑀢𑀓𑀁, 𑀫𑀳𑀸𑀭𑀸𑀚, 𑀳𑀺𑀭𑀜𑁆𑀜𑀁, 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡𑀁, 𑀏𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬’𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀳𑀻𑀦𑀧𑁆𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀅𑀧𑀺𑀮𑀸𑀧𑁂𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 (𑀫𑀺. 𑀧. 𑁨.𑁧.𑁧𑁩) 𑀯𑀺𑀢𑁆𑀣𑀸𑀭𑁄. 𑀅𑀧𑀺𑀮𑀸𑀧𑀦𑀭𑀲𑀸, 𑀓𑀺𑀘𑁆𑀘𑀯𑀲𑁂𑀦𑁂𑀯 𑀳𑀺𑀲𑁆𑀲𑀸 𑀏𑀢𑀁 𑀮𑀓𑁆𑀔𑀡𑀁 𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀅𑀲𑀫𑁆𑀫𑁄𑀲𑀭𑀲𑀸 𑀯𑀸, 𑀕𑁄𑀘𑀭𑀸𑀪𑀺𑀫𑀼𑀔𑀻𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀢𑀺 𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄.

𑀢𑀢𑁆𑀣 𑀩𑁄𑀥𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑁄𑀢𑀺 𑀩𑁄𑀚𑁆𑀛𑀗𑁆𑀕𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀸 𑀳𑀺 𑀅𑀬𑀁 𑀥𑀫𑁆𑀫𑀲𑀸𑀫𑀕𑁆𑀕𑀻𑀬𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀩𑀼𑀚𑁆𑀛𑀢𑀻𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀲𑀁. 𑀦𑀺. 𑁫.𑁩𑁭𑁮; 𑀤𑀻. 𑀦𑀺. 𑁩.𑁧𑁪𑁩). 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑁄𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑁄 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀬𑁄 𑀯𑀺𑀬. 𑀬𑁄𑀧𑁂𑀲 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀏𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀅𑀗𑁆𑀕𑁄𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑁄 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋 ‘‘𑀩𑀼𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀯𑀸 𑀩𑁄𑀚𑁆𑀛𑀗𑁆𑀕𑀸’’𑀢𑀺.

𑀅𑀧𑀺𑀘 ‘‘𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑁂𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸? 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦𑀸𑀧𑀺 (𑀧𑀝𑀺. 𑀫. 𑁨.𑁧𑁭) 𑀩𑁄𑀚𑁆𑀛𑀗𑁆𑀕𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀘 𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀢𑀺 𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁.

𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀦𑁆𑀢𑀺𑀆𑀤𑀻𑀲𑀼𑀧𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀯𑀺𑀘𑀺𑀦𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄. 𑀲𑁄 𑀧𑀯𑀺𑀘𑀬𑀮𑀓𑁆𑀔𑀡𑁄, 𑀑𑀪𑀸𑀲𑀦𑀭𑀲𑁄, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑀻𑀭𑀪𑀸𑀯𑀢𑁄, 𑀯𑀺𑀥𑀺𑀦𑀸 𑀈𑀭𑀬𑀺𑀢𑀩𑁆𑀩𑀢𑁄 𑀘 𑀯𑀻𑀭𑀺𑀬𑀁. 𑀢𑀁 𑀧𑀕𑁆𑀕𑀳𑀮𑀓𑁆𑀔𑀡𑀁, 𑀉𑀧𑀣𑀫𑁆𑀪𑀦𑀭𑀲𑀁, 𑀅𑀦𑁄𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀻𑀡𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀨𑀭𑀡𑀮𑀓𑁆𑀔𑀡𑀸, 𑀢𑀼𑀝𑁆𑀞𑀺𑀮𑀓𑁆𑀔𑀡𑀸 𑀯𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀧𑀻𑀡𑀦𑀭𑀲𑀸, 𑀦𑁂𑀲𑀁𑀬𑁂𑀯 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀓𑀸𑀬𑀘𑀺𑀢𑁆𑀢𑀤𑀭𑀣𑀧𑁆𑀧𑀲𑁆𑀲𑀫𑁆𑀪𑀦𑀢𑁄 𑀧𑀲𑁆𑀲𑀤𑁆𑀥𑀺. 𑀲𑀸 𑀉𑀧𑀲𑀫𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀤𑀭𑀣𑀫𑀤𑁆𑀤𑀦𑀭𑀲𑀸, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀅𑀧𑀭𑀺𑀧𑁆𑀨𑀦𑁆𑀤𑀲𑀻𑀢𑀺𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀫𑀸𑀥𑀸𑀦𑀢𑁄 𑀲𑀫𑀸𑀥𑀺. 𑀲𑁄 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄, 𑀅𑀯𑀺𑀲𑀸𑀭𑀮𑀓𑁆𑀔𑀡𑁄 𑀯𑀸, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀭𑀲𑁄, 𑀘𑀺𑀢𑁆𑀢𑀝𑁆𑀞𑀺𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄 𑀉𑀧𑁂𑀓𑁆𑀔𑀸. 𑀲𑀸 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑀸, 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸 𑀯𑀸, 𑀊𑀦𑀸𑀥𑀺𑀓𑀦𑀺𑀯𑀸𑀭𑀡𑀭𑀲𑀸, 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸 𑀯𑀸, 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀪𑀸𑀯𑁂𑀢𑀻𑀢𑀺 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀺, 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀳𑀺 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦, 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑀲𑀤𑀺𑀲𑁂 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁂𑀦, 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑀅𑀪𑀬𑀢𑁆𑀣𑁂𑀭𑀸𑀤𑀺𑀲𑀤𑀺𑀲𑁂 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀲𑁂𑀯𑀦𑁂𑀦, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀢𑀺𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸𑀬 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑁄 𑀦𑀸𑀫 𑀳𑁄𑀢𑀺.

𑀲𑀢𑁆𑀢 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀢𑀸.

𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀬𑀤𑀸 𑀳𑀺𑀲𑁆𑀲 𑀓𑁂𑀲𑀦𑀔𑀮𑁄𑀫𑀸 𑀤𑀻𑀖𑀸 𑀳𑁄𑀦𑁆𑀢𑀺, 𑀲𑀭𑀻𑀭𑀁 𑀯𑀸 𑀉𑀧𑁆𑀧𑀦𑁆𑀦𑀤𑁄𑀲𑀜𑁆𑀘𑁂𑀯 𑀲𑁂𑀤𑀫𑀮𑀫𑀓𑁆𑀔𑀺𑀢𑀜𑁆𑀘, 𑀢𑀤𑀸 𑀅𑀚𑁆𑀛𑀢𑁆𑀢𑀺𑀓𑀁 𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀬𑀤𑀸 𑀧𑀦 𑀘𑀻𑀯𑀭𑀁 𑀚𑀺𑀡𑁆𑀡𑀁 𑀓𑀺𑀮𑀺𑀝𑁆𑀞𑀁 𑀤𑀼𑀕𑁆𑀕𑀦𑁆𑀥𑀁 𑀯𑀸 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀯𑀸 𑀉𑀓𑁆𑀮𑀸𑀧𑀁, 𑀢𑀤𑀸 𑀩𑀸𑀳𑀺𑀭𑀁 𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀢𑀲𑁆𑀫𑀸 𑀓𑁂𑀲𑀸𑀤𑀺𑀘𑁆𑀙𑁂𑀤𑀦𑁂𑀦 𑀉𑀤𑁆𑀥𑀁𑀯𑀺𑀭𑁂𑀘𑀦𑀅𑀥𑁄𑀯𑀺𑀭𑁂𑀘𑀦𑀸𑀤𑀻𑀳𑀺 𑀲𑀭𑀻𑀭𑀲𑀮𑁆𑀮𑀳𑀼𑀓𑀪𑀸𑀯𑀓𑀭𑀡𑁂𑀦 𑀉𑀘𑁆𑀙𑀸𑀤𑀦𑀦𑀳𑀸𑀧𑀦𑁂𑀦 𑀘 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀲𑀽𑀘𑀺𑀓𑀫𑁆𑀫𑀥𑁄𑀯𑀦𑀭𑀚𑀦𑀧𑀭𑀺𑀪𑀡𑁆𑀟𑀓𑀭𑀡𑀸𑀤𑀻𑀳𑀺 𑀩𑀸𑀳𑀺𑀭𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀅𑀯𑀺𑀲𑀤𑁂 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀯𑀝𑁆𑀝𑀺𑀢𑁂𑀮𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀯𑀺𑀲𑀤𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀯𑀺𑀲𑀤𑀁 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀯𑀝𑁆𑀝𑀺𑀢𑁂𑀮𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀦𑀸𑀫 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑀓𑀭𑀡𑀁. 𑀲𑀘𑁂 𑀳𑀺𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀺, 𑀢𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀕𑁆𑀕𑀳𑀓𑀺𑀘𑁆𑀘𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀝𑁆𑀞𑀸𑀦𑀓𑀺𑀘𑁆𑀘𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀯𑀺𑀓𑁆𑀔𑁂𑀧𑀓𑀺𑀘𑁆𑀘𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸, 𑀬𑀣𑀸 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀲𑀘𑁂 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀅𑀣 𑀦𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀸𑀦𑀺 𑀇𑀢𑀭𑀓𑀺𑀘𑁆𑀘𑀪𑁂𑀤𑀁. 𑀢𑀲𑁆𑀫𑀸 𑀢𑀁 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀏𑀓𑀲𑁆𑀲 𑀩𑀮𑀯𑀪𑀸𑀯𑁂 𑀲𑀢𑀺 𑀇𑀢𑀭𑁂𑀲𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀅𑀲𑀫𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀲𑀁𑀲𑀦𑁆𑀢𑀺. 𑀩𑀮𑀯𑀲𑀤𑁆𑀥𑁄 𑀳𑀺 𑀫𑀦𑁆𑀤𑀧𑀜𑁆𑀜𑁄 𑀫𑀼𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀅𑀯𑀢𑁆𑀣𑀼𑀫𑁆𑀳𑀺 𑀧𑀲𑀻𑀤𑀢𑀺. 𑀩𑀮𑀯𑀧𑀜𑁆𑀜𑁄 𑀫𑀦𑁆𑀤𑀲𑀤𑁆𑀥𑁄 𑀓𑁂𑀭𑀸𑀝𑀺𑀓𑀧𑀓𑁆𑀔𑀁 𑀪𑀚𑀢𑀺, 𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀓𑀼𑀲𑀮𑀁 𑀳𑁄𑀢𑀻𑀢𑀺 𑀅𑀢𑀺𑀥𑀸𑀯𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁄 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀢𑀺. 𑀉𑀪𑀺𑀦𑁆𑀦𑀁 𑀲𑀫𑀢𑀸𑀬 𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀢𑀺. 𑀩𑀮𑀯𑀲𑀫𑀸𑀥𑀺𑀁 𑀧𑀦 𑀫𑀦𑁆𑀤𑀯𑀻𑀭𑀺𑀬𑀁 𑀲𑀫𑀸𑀥𑀺𑀲𑁆𑀲 𑀓𑁄𑀲𑀚𑁆𑀚𑀧𑀓𑁆𑀔𑀢𑁆𑀢𑀸 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺. 𑀩𑀮𑀯𑀯𑀻𑀭𑀺𑀬𑀁 𑀫𑀦𑁆𑀤𑀲𑀫𑀸𑀥𑀺𑀁 𑀯𑀻𑀭𑀺𑀬𑀲𑁆𑀲 𑀉𑀤𑁆𑀥𑀘𑁆𑀘𑀧𑀓𑁆𑀔𑀢𑁆𑀢𑀸 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀺. 𑀲𑀫𑀸𑀥𑀺 𑀧𑀦 𑀯𑀻𑀭𑀺𑀬𑁂𑀦 𑀲𑀁𑀬𑁄𑀚𑀺𑀢𑁄 𑀓𑁄𑀲𑀚𑁆𑀚𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺, 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑀸 𑀲𑀁𑀬𑁄𑀚𑀺𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺. 𑀢𑀲𑁆𑀫𑀸 𑀢𑀁 𑀉𑀪𑀬𑀁 𑀲𑀫𑀁 𑀓𑀢𑁆𑀢𑀩𑁆𑀩𑀁. 𑀉𑀪𑀬𑀲𑀫𑀢𑀸𑀬 𑀳𑀺 𑀅𑀧𑁆𑀧𑀦𑀸 𑀳𑁄𑀢𑀺.

𑀅𑀧𑀺𑀘 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀩𑀮𑀯𑀢𑀻𑀧𑀺 𑀲𑀤𑁆𑀥𑀸 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑀤𑁆𑀤𑀳𑀦𑁆𑀢𑁄 𑀑𑀓𑀧𑁆𑀧𑁂𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀧𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀧𑀜𑁆𑀜𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀸𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀲𑀫𑀢𑀸𑀬𑀧𑀺 𑀅𑀧𑁆𑀧𑀦𑀸 𑀳𑁄𑀢𑀺𑀬𑁂𑀯. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀲𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦𑀁 𑀯𑀲𑁂𑀦 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑁂𑀦 𑀘 𑀲𑀫𑀸𑀥𑀺𑀦𑀸 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀢𑀺. 𑀢𑀲𑁆𑀫𑀸 𑀲𑀸 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼, 𑀲𑀩𑁆𑀩𑀓𑀫𑁆𑀫𑀺𑀓𑁄 𑀅𑀫𑀘𑁆𑀘𑁄 𑀯𑀺𑀬 𑀘 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼, 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀲𑀢𑀺 𑀘 𑀧𑀦 𑀲𑀩𑁆𑀩𑀢𑁆𑀣𑀺𑀓𑀸 𑀯𑀼𑀢𑁆𑀢𑀸 (𑀲𑀁. 𑀦𑀺. 𑁫.𑁨𑁩𑁪) 𑀪𑀕𑀯𑀢𑀸. 𑀓𑀺𑀁 𑀓𑀸𑀭𑀡𑀸? 𑀘𑀺𑀢𑁆𑀢𑀜𑁆𑀳𑀺 𑀲𑀢𑀺𑀧𑀝𑀺𑀲𑀭𑀡𑀁, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘 𑀲𑀢𑀺, 𑀦 𑀯𑀺𑀦𑀸 𑀲𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑁄 𑀳𑁄𑀢𑀻’’𑀢𑀺.

𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀦𑀸𑀫 𑀔𑀦𑁆𑀥𑀸𑀤𑀺𑀪𑁂𑀤𑁂𑀲𑀼 𑀅𑀦𑁄𑀕𑀸𑀴𑁆𑀳𑀧𑀜𑁆𑀜𑀸𑀦𑀁 𑀤𑀼𑀫𑁆𑀫𑁂𑀥𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀦𑀸𑀫 𑀲𑀫𑀧𑀜𑁆𑀜𑀸𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀉𑀤𑀬𑀩𑁆𑀩𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀧𑀼𑀕𑁆𑀕𑀮𑀲𑁂𑀯𑀦𑀸. 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀕𑀫𑁆𑀪𑀻𑀭𑀧𑀜𑁆𑀜𑀸𑀬 𑀧𑀪𑁂𑀤𑀧𑀘𑁆𑀘𑀯𑁂𑀓𑁆𑀔𑀡𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑁄 𑀦𑀸𑀫 𑀳𑁄𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸, 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀢𑀸, 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀲𑀢𑁆𑀣𑀼𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀢𑀢𑁆𑀣 ‘‘𑀦𑀺𑀭𑀬𑁂𑀲𑀼 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀭𑀡𑀢𑁄 𑀧𑀝𑁆𑀞𑀸𑀬 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑀓𑀸𑀮𑁂𑀧𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀚𑀸𑀮𑀓𑁆𑀔𑀺𑀧𑀓𑀼𑀫𑀺𑀦𑀸𑀤𑀻𑀳𑀺 𑀕𑀳𑀺𑀢𑀓𑀸𑀮𑁂𑀧𑀺, 𑀧𑀸𑀚𑀦𑀓𑀡𑁆𑀝𑀓𑀸𑀤𑀺𑀧𑁆𑀧𑀳𑀸𑀭𑀢𑀼𑀦𑁆𑀦𑀲𑁆𑀲 𑀧𑀦 𑀲𑀓𑀝𑀯𑀳𑀦𑀸𑀤𑀺𑀓𑀸𑀮𑁂𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀫𑁆𑀧𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀆𑀢𑀼𑀭𑀻𑀪𑀽𑀢𑀓𑀸𑀮𑁂𑀧𑀺, 𑀓𑀸𑀮𑀓𑀜𑁆𑀚𑀺𑀓𑀅𑀲𑀼𑀭𑁂𑀲𑀼 𑀲𑀝𑁆𑀞𑀺𑀳𑀢𑁆𑀣𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀦 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀯𑀸𑀢𑀸𑀢𑀧𑀸𑀤𑀺𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀮𑁂𑀧𑀺 𑀦 𑀲𑀓𑁆𑀓𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀉𑀧𑁆𑀧𑀸𑀤𑁂𑀢𑀼𑀁. 𑀅𑀬𑀫𑁂𑀯 𑀢𑁂 𑀪𑀺𑀓𑁆𑀔𑀼 𑀓𑀸𑀮𑁄’’𑀢𑀺 𑀏𑀯𑀁 𑀅𑀧𑀸𑀬𑀪𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺.

‘‘𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀮𑀤𑁆𑀥𑀼𑀁, 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑁂𑀯 𑀲𑀓𑁆𑀓𑀸, 𑀅𑀬𑀫𑀸𑀦𑀺𑀲𑀁𑀲𑁄 𑀯𑀻𑀭𑀺𑀬𑀲𑁆𑀲𑀸’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. ‘‘𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀳𑀸𑀲𑀸𑀯𑀓𑁂𑀳𑀺 𑀕𑀢𑀫𑀕𑁆𑀕𑁄𑀯 𑀕𑀦𑁆𑀢𑀩𑁆𑀩𑁄, 𑀲𑁄 𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 𑀏𑀯𑀁 𑀕𑀫𑀦𑀯𑀻𑀣𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀬𑁂 𑀢𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀇𑀫𑁂 𑀢𑁂 𑀫𑀦𑀼𑀲𑁆𑀲𑀸 𑀦𑁂𑀯 𑀜𑀸𑀢𑀓𑀸, 𑀦 𑀤𑀸𑀲𑀓𑀫𑁆𑀫𑀓𑀭𑀸, 𑀦𑀸𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀸𑀢𑀺 𑀢𑁂 𑀧𑀡𑀻𑀢𑀸𑀦𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀺 𑀤𑁂𑀦𑁆𑀢𑀺. 𑀅𑀣 𑀔𑁄 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀢𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀤𑁂𑀦𑁆𑀢𑀺. 𑀲𑀢𑁆𑀣𑀸𑀭𑀸𑀧𑀺 ‘𑀅𑀬𑀁 𑀇𑀫𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀢𑀻’𑀢𑀺 𑀦 𑀏𑀯𑀁 𑀲𑀫𑁆𑀧𑀲𑁆𑀲𑀢𑀸 𑀢𑀼𑀬𑁆𑀳𑀁 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀅𑀣 𑀔𑁄 ‘𑀅𑀬𑀁 𑀇𑀫𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻’𑀢𑀺 𑀢𑁂 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸. 𑀲𑁄 𑀤𑀸𑀦𑀺 𑀢𑁆𑀯𑀁 𑀓𑀼𑀲𑀻𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀧𑀘𑀸𑀬𑀺𑀲𑁆𑀲𑀲𑀺. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑁂𑀯 𑀳𑀺 𑀧𑀺𑀡𑁆𑀟𑀸𑀧𑀘𑀸𑀬𑀦𑀁 𑀦𑀸𑀫 𑀳𑁄𑀢𑀻’’𑀢𑀺 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀫𑀳𑀸𑀫𑀺𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀬 𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀬 𑀘.

𑀫𑀳𑀸𑀫𑀺𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀓𑀲𑁆𑀲𑀓𑀮𑁂𑀡𑁂 𑀦𑀸𑀫 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀘 𑀕𑁄𑀘𑀭𑀕𑀸𑀫𑁂 𑀏𑀓𑀸 𑀫𑀳𑀸𑀉𑀧𑀸𑀲𑀺𑀓𑀸 𑀣𑁂𑀭𑀁 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀻 𑀥𑀻𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀧𑀼𑀭𑀸𑀡𑀢𑀡𑁆𑀟𑀼𑀮𑀸, 𑀅𑀲𑀼𑀓𑀲𑁆𑀫𑀺𑀁 𑀔𑀻𑀭𑀁, 𑀅𑀲𑀼𑀓𑀲𑁆𑀫𑀺𑀁 𑀲𑀧𑁆𑀧𑀺, 𑀅𑀲𑀼𑀓𑀲𑁆𑀫𑀺𑀁 𑀨𑀸𑀡𑀺𑀢𑀁, 𑀢𑀯 𑀪𑀸𑀢𑀺𑀓𑀲𑁆𑀲 𑀅𑀬𑁆𑀬𑀫𑀺𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑁂 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀔𑀻𑀭𑀲𑀧𑁆𑀧𑀺𑀨𑀸𑀡𑀺𑀢𑁂𑀳𑀺 𑀲𑀤𑁆𑀥𑀺𑀁 𑀤𑁂𑀳𑀺, 𑀤𑀢𑁆𑀯𑀸 𑀢𑁆𑀯𑀜𑁆𑀘 𑀪𑀼𑀜𑁆𑀚𑁂𑀬𑁆𑀬𑀸𑀲𑀺. 𑀅𑀳𑀁 𑀧𑀦 𑀳𑀺𑀬𑁆𑀬𑁄 𑀧𑀓𑁆𑀓𑀁 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀓𑀜𑁆𑀚𑀺𑀬𑁂𑀦 𑀪𑀼𑀢𑁆𑀢𑀫𑁆𑀳𑀻’’𑀢𑀺. 𑀤𑀺𑀯𑀸 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀅𑀫𑁆𑀫𑀸𑀢𑀺? 𑀲𑀸𑀓𑀧𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀡𑀢𑀡𑁆𑀟𑀼𑀮𑁂𑀳𑀺 𑀅𑀫𑁆𑀩𑀺𑀮𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀞𑀧𑁂𑀳𑀺, 𑀅𑀫𑁆𑀫𑀸𑀢𑀺.

𑀣𑁂𑀭𑁄 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀦𑁆𑀢𑁄𑀯 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀑𑀯𑀤𑀺 𑁋 ‘‘𑀫𑀳𑀸𑀉𑀧𑀸𑀲𑀺𑀓𑀸 𑀓𑀺𑀭 𑀓𑀜𑁆𑀚𑀺𑀬𑁂𑀦 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀪𑀼𑀜𑁆𑀚𑀺, 𑀤𑀺𑀯𑀸𑀧𑀺 𑀓𑀡𑀧𑀡𑁆𑀡𑀫𑁆𑀩𑀺𑀮𑀬𑀸𑀕𑀼𑀁 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀢𑀼𑀬𑁆𑀳𑀁 𑀅𑀢𑁆𑀣𑀸𑀬 𑀧𑀦 𑀧𑀼𑀭𑀸𑀡𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀘𑀺𑀓𑁆𑀔𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀔𑁄 𑀧𑀦𑁂𑀲𑀸 𑀦𑁂𑀯 𑀔𑁂𑀢𑁆𑀢𑀁 𑀦 𑀯𑀢𑁆𑀣𑀼𑀁 𑀦 𑀪𑀢𑁆𑀢𑀁 𑀦 𑀯𑀢𑁆𑀣𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀢𑀺𑀲𑁆𑀲𑁄 𑀧𑀦 𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑀬𑀫𑀸𑀦𑀸 𑀤𑁂𑀢𑀺. 𑀢𑁆𑀯𑀁 𑀏𑀢𑀺𑀲𑁆𑀲𑀸 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺, 𑀅𑀬𑀁 𑀔𑁄 𑀧𑀦 𑀧𑀺𑀡𑁆𑀟𑀧𑀸𑀢𑁄 𑀢𑀬𑀸 𑀲𑀭𑀸𑀕𑁂𑀦 𑀲𑀤𑁄𑀲𑁂𑀦 𑀲𑀫𑁄𑀳𑁂𑀦 𑀦 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀲𑁆𑀲𑀓𑀮𑁂𑀡𑀫𑁂𑀯 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀳𑁂𑀝𑁆𑀞𑀸𑀫𑀜𑁆𑀘𑁂, 𑀘𑀻𑀯𑀭𑀜𑁆𑀘 𑀘𑀻𑀯𑀭𑀯𑀁𑀲𑁂 𑀞𑀧𑁂𑀢𑁆𑀯𑀸, ‘‘𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀯𑀼𑀢𑁆𑀣𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀓𑀲𑀫𑀸𑀦𑀫𑀺𑀯 𑀧𑀤𑀼𑀫𑀁 𑀫𑀳𑀸𑀔𑀻𑀡𑀸𑀲𑀯𑁄 𑀲𑀺𑀢𑀁 𑀓𑀭𑁄𑀦𑁆𑀢𑁄𑀯 𑀦𑀺𑀓𑁆𑀔𑀫𑀺. 𑀮𑁂𑀡𑀤𑁆𑀯𑀸𑀭𑁂 𑀭𑀼𑀓𑁆𑀔𑀫𑁆𑀳𑀺 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲𑀸’’𑀢𑀺. 𑁋

𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀓𑀸𑀮𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀧𑀸𑀢𑁄𑀬𑁂𑀯𑀸’’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀕𑀸𑀫𑀁 𑀧𑀸𑀯𑀺𑀲𑀺.

𑀤𑀸𑀭𑀺𑀓𑀸𑀧𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀫𑁂 𑀪𑀸𑀢𑀸 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀫𑁂 𑀪𑀸𑀢𑀸 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀸𑀭𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺. 𑀲𑀸 𑀣𑁂𑀭𑁂 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑀬𑁄𑀚𑀺𑀢𑀲𑁆𑀲 𑀔𑀻𑀭𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀳𑀢𑁆𑀣𑁂 𑀞𑀧𑁂𑀲𑀺. 𑀣𑁂𑀭𑁄 ‘‘𑀲𑀼𑀔𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸𑀧𑀺 𑀢𑀁 𑀑𑀮𑁄𑀓𑀬𑀫𑀸𑀦𑀸𑀯 𑀅𑀝𑁆𑀞𑀸𑀲𑀺. 𑀣𑁂𑀭𑀲𑁆𑀲 𑀳𑀺 𑀢𑀤𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀅𑀳𑁄𑀲𑀺, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀫𑀼𑀔𑀁 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣.

𑀫𑀳𑀸𑀉𑀧𑀸𑀲𑀺𑀓𑀸 𑀅𑀭𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀅𑀫𑁆𑀫, 𑀪𑀸𑀢𑀺𑀓𑁄 𑀢𑁂 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀉𑀧𑀸𑀲𑀺𑀓𑀸 ‘‘𑀅𑀚𑁆𑀚 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 ‘‘𑀅𑀪𑀺𑀭𑀫𑀢𑀺 𑀢𑁂, 𑀅𑀫𑁆𑀫, 𑀪𑀸𑀢𑀸 𑀩𑀼𑀤𑁆𑀥𑀲𑀸𑀲𑀦𑁂, 𑀦 𑀉𑀓𑁆𑀓𑀡𑁆𑀞𑀢𑀻’’𑀢𑀺 𑀆𑀳.

𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀫𑀳𑀸𑀕𑀸𑀫𑁂 𑀓𑀺𑀭 𑀏𑀓𑁄 𑀤𑀮𑀺𑀤𑁆𑀤𑀧𑀼𑀭𑀺𑀲𑁄 𑀤𑀸𑀭𑀼𑀯𑀺𑀓𑁆𑀓𑀬𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑁄 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀦𑀸𑀫𑀁 𑀮𑀪𑀺𑀢𑁆𑀯𑀸 𑀤𑀸𑀭𑀼𑀪𑀡𑁆𑀟𑀓𑀫𑀳𑀸𑀢𑀺𑀲𑁆𑀲𑁄 𑀦𑀸𑀫 𑀚𑀸𑀢𑁄. 𑀲𑁄 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀆𑀳 𑁋 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀦𑀸𑀫, 𑀲𑀢𑁆𑀣𑀸𑀭𑀸 𑀤𑀴𑀺𑀤𑁆𑀤𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑁄 𑀓𑀣𑀺𑀢𑁄, 𑀫𑀬𑀜𑁆𑀘 𑀦𑀺𑀩𑀤𑁆𑀥𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫, 𑀧𑀓𑁆𑀔𑀺𑀓𑀪𑀢𑁆𑀢𑀫𑀢𑁆𑀢𑀁 𑀤𑀢𑁆𑀯𑀸 𑀧𑀼𑀦 𑀉𑀧𑁆𑀧𑀦𑁆𑀦𑀁 𑀲𑀮𑀸𑀓𑀪𑀢𑁆𑀢𑀫𑁆𑀧𑀺 𑀤𑀲𑁆𑀲𑀸𑀫𑀸’’𑀢𑀺. 𑀲𑀸 ‘‘𑀲𑀸𑀥𑀼 𑀲𑀸𑀫𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀬𑀣𑀸𑀮𑀸𑀪𑁂𑀦 𑀧𑀓𑁆𑀔𑀺𑀓𑀪𑀢𑁆𑀢𑀁 𑀅𑀤𑀸𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀧𑀭𑀺𑀲𑁆𑀲𑀬𑀓𑀸𑀮𑁄 𑀳𑁄𑀢𑀺, 𑀤𑀳𑀭𑀲𑀸𑀫𑀡𑁂𑀭𑀸 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 ‘‘𑀅𑀬𑀁 𑀮𑀽𑀔𑀸𑀳𑀸𑀭𑁄’’𑀢𑀺 𑀢𑁂𑀲𑀁 𑀧𑀓𑁆𑀔𑀺𑀓𑀪𑀢𑁆𑀢𑀁 𑀕𑀳𑀺𑀢𑀫𑀢𑁆𑀢𑀓𑀫𑁂𑀯 𑀓𑀢𑁆𑀯𑀸 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀲𑀸 𑀇𑀢𑁆𑀣𑀻 𑀢𑀁 𑀤𑀺𑀲𑁆𑀯𑀸 𑀲𑀸𑀫𑀺𑀓𑀲𑁆𑀲 𑀓𑀣𑁂𑀲𑀺, ‘‘𑀫𑀬𑀸 𑀤𑀺𑀦𑁆𑀦𑀁 𑀙𑀟𑁆𑀟𑁂𑀦𑁆𑀢𑀻’’𑀢𑀺 𑀦 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀅𑀳𑁄𑀲𑀺. 𑀢𑀲𑁆𑀲𑀸 𑀲𑀸𑀫𑀺𑀓𑁄 𑀆𑀳 𑁋 ‘‘𑀫𑀬𑀁 𑀤𑀼𑀕𑁆𑀕𑀢𑀪𑀸𑀯𑁂𑀦 𑀅𑀬𑁆𑀬𑀸𑀦𑀁 𑀲𑀼𑀔𑁂𑀦 𑀧𑀭𑀺𑀪𑀼𑀜𑁆𑀚𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀫𑁆𑀳. 𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀅𑀬𑁆𑀬𑀸𑀦𑀁 𑀫𑀦𑀁 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺? 𑀅𑀣𑀲𑁆𑀲 𑀪𑀭𑀺𑀬𑀸 𑀆𑀳 𑁋 ‘‘𑀓𑀺𑀁 𑀯𑀤𑁂𑀲𑀺, 𑀲𑀸𑀫𑀺, 𑀲𑀧𑀼𑀢𑁆𑀢𑀓𑀸 𑀤𑀼𑀕𑁆𑀕𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀬𑀁 𑀢𑁂 𑀥𑀻𑀢𑀸, 𑀇𑀫𑀁 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀞𑀧𑁂𑀢𑁆𑀯𑀸 𑀤𑁆𑀯𑀸𑀤𑀲 𑀓𑀳𑀸𑀧𑀡𑁂 𑀕𑀡𑁆𑀳𑀺𑀢𑁆𑀯𑀸 𑀏𑀓𑀁 𑀔𑀻𑀭𑀥𑁂𑀦𑀼𑀁 𑀆𑀳𑀭, 𑀅𑀬𑁆𑀬𑀸𑀦𑀁 𑀔𑀻𑀭𑀲𑀮𑀸𑀓𑀪𑀢𑁆𑀢𑀁 𑀤𑀲𑁆𑀲𑀸𑀫, 𑀏𑀯𑀁 𑀢𑁂𑀲𑀁 𑀘𑀺𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀢𑁂𑀲𑀁 𑀧𑀼𑀜𑁆𑀜𑁂𑀦 𑀲𑀸 𑀥𑁂𑀦𑀼 𑀲𑀸𑀬𑀁 𑀢𑀻𑀡𑀺 𑀫𑀸𑀡𑀺𑀓𑀸𑀦𑀺, 𑀧𑀸𑀢𑁄 𑀢𑀻𑀡𑀺 𑀫𑀸𑀡𑀺𑀓𑀸𑀦𑀺 𑀔𑀻𑀭𑀁 𑀤𑁂𑀢𑀺. 𑀲𑀸𑀬𑀁 𑀮𑀤𑁆𑀥𑀁 𑀤𑀥𑀺𑀁 𑀓𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀢𑁄 𑀕𑀳𑀺𑀢𑀦𑀯𑀦𑀻𑀢𑁂𑀦 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀲𑀲𑀧𑁆𑀧𑀺𑀧𑀭𑀺𑀲𑁂𑀓𑀁 𑀔𑀻𑀭𑀲𑀮𑀸𑀓𑀪𑀢𑁆𑀢𑀁 𑀤𑁂𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀕𑁂𑀳𑁂 𑀲𑀮𑀸𑀓𑀪𑀢𑁆𑀢𑀁 𑀧𑀼𑀜𑁆𑀜𑀯𑀦𑁆𑀢𑀸𑀯 𑀮𑀪𑀦𑁆𑀢𑀺.

𑀲𑁄 𑀏𑀓𑀤𑀺𑀯𑀲𑀁 𑀪𑀭𑀺𑀬𑀁 𑀆𑀳 𑁋 ‘‘𑀫𑀬𑀁 𑀥𑀻𑀢𑀼 𑀅𑀢𑁆𑀣𑀺𑀢𑀸𑀬 𑀮𑀚𑁆𑀚𑀺𑀢𑀩𑁆𑀩𑀢𑁄 𑀘 𑀫𑀼𑀢𑁆𑀢𑀸, 𑀕𑁂𑀳𑁂 𑀘 𑀦𑁄 𑀪𑀢𑁆𑀢𑀁 𑀅𑀬𑁆𑀬𑀸𑀦𑀁 𑀧𑀭𑀺𑀪𑁄𑀕𑀸𑀭𑀳𑀁 𑀚𑀸𑀢𑀁. 𑀢𑁆𑀯𑀁 𑀬𑀸𑀯 𑀅𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀫𑀲𑁆𑀫𑀺𑀁 𑀓𑀮𑁆𑀬𑀸𑀡𑀯𑀢𑁆𑀢𑁂 𑀫𑀸 𑀧𑀫𑀚𑁆𑀚𑀺. 𑀅𑀳𑀁 𑀓𑀺𑀜𑁆𑀘𑀺𑀤𑁂𑀯 𑀓𑀢𑁆𑀯𑀸 𑀥𑀻𑀢𑀭𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀓𑀁 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀉𑀘𑁆𑀙𑀼𑀬𑀦𑁆𑀢𑀓𑀫𑁆𑀫𑀁 𑀓𑀢𑁆𑀯𑀸 𑀙𑀳𑀺 𑀫𑀸𑀲𑁂𑀳𑀺 𑀤𑁆𑀯𑀸𑀤𑀲 𑀓𑀳𑀸𑀧𑀡𑁂 𑀮𑀪𑀺𑀢𑁆𑀯𑀸 ‘‘𑀅𑀮𑀁 𑀏𑀢𑁆𑀢𑀓𑀁 𑀫𑀫 𑀥𑀻𑀢𑀼 𑀫𑁄𑀘𑀦𑀢𑁆𑀣𑀸𑀬𑀸’’𑀢𑀺 𑀢𑁂 𑀓𑀳𑀸𑀧𑀡𑁂 𑀤𑀼𑀲𑁆𑀲𑀦𑁆𑀢𑁂 𑀩𑀦𑁆𑀥𑀺𑀢𑁆𑀯𑀸 ‘‘𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀅𑀫𑁆𑀩𑀭𑀺𑀬𑀫𑀳𑀸𑀯𑀺𑀳𑀸𑀭𑀯𑀸𑀲𑀻 𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀫𑀳𑀸𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑁄 𑀉𑀧𑀸𑀲𑀓𑁄 𑀣𑁂𑀭𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 ‘‘𑀏𑀓𑀓𑁄𑀯 𑀅𑀕𑀦𑁆𑀢𑁆𑀯𑀸 𑀇𑀫𑀺𑀦𑀸 𑀅𑀬𑁆𑀬𑁂𑀦 𑀲𑀤𑁆𑀥𑀺𑀁 𑀏𑀓𑀁 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀕𑀫𑀺𑀲𑁆𑀲𑀸𑀫𑀺. 𑀲𑀻𑀮𑀯𑀦𑁆𑀢𑁄 𑀳𑀺 𑀲𑀩𑁆𑀩𑀓𑀸𑀮𑀁 𑀤𑀼𑀮𑁆𑀮𑀪𑀸’’𑀢𑀺 𑀯𑁂𑀕𑁂𑀦 𑀣𑁂𑀭𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀯𑁂𑀮𑀸𑀬 𑀉𑀧𑀓𑀝𑁆𑀞𑀸𑀬 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀳𑀢𑁆𑀣𑁂 𑀧𑀼𑀝𑀓𑀪𑀢𑁆𑀢𑀁 𑀦𑀢𑁆𑀣𑀺, 𑀅𑀬𑁆𑀬𑀲𑁆𑀲 𑀘 𑀪𑀺𑀓𑁆𑀔𑀸𑀓𑀸𑀮𑁄 𑀲𑀫𑁆𑀧𑀢𑁆𑀢𑁄, 𑀅𑀬𑀜𑁆𑀘 𑀫𑁂 𑀧𑀭𑀺𑀩𑁆𑀩𑀬𑁄 𑀳𑀢𑁆𑀣𑁂 𑀅𑀢𑁆𑀣𑀺, 𑀏𑀓𑀁 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀢𑀓𑀸𑀮𑁂 𑀅𑀬𑁆𑀬𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀻’’𑀢𑀺.

𑀢𑀲𑁆𑀲𑁂𑀯𑀁 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂𑀬𑁂𑀯 𑀏𑀓𑁄 𑀧𑀼𑀝𑀓𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑁄. 𑀉𑀧𑀸𑀲𑀓𑁄 𑀢𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀣𑁄𑀓𑀁 𑀆𑀕𑀫𑁂𑀣𑀸’’𑀢𑀺 𑀯𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀓𑀳𑀸𑀧𑀡𑀁 𑀢𑁂, 𑀪𑁄 𑀧𑀼𑀭𑀺𑀲, 𑀤𑀫𑁆𑀫𑀺, 𑀢𑀁 𑀫𑁂 𑀧𑀼𑀝𑀓𑀪𑀢𑁆𑀢𑀁 𑀤𑁂𑀳𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀪𑀢𑁆𑀢𑀁 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀸𑀲𑀓𑀫𑁆𑀧𑀺 𑀦 𑀅𑀕𑁆𑀖𑀢𑀺, 𑀅𑀬𑀜𑁆𑀘 𑀫𑀬𑁆𑀳𑀁 𑀏𑀓𑀯𑀸𑀭𑁂𑀦𑁂𑀯 𑀓𑀳𑀸𑀧𑀡𑀁 𑀤𑁂𑀢𑀺, 𑀪𑀯𑀺𑀲𑁆𑀲𑀢𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦𑀸𑀳𑀁 𑀓𑀳𑀸𑀧𑀡𑁂𑀦 𑀤𑁂𑀫𑀻’’𑀢𑀺 𑀆𑀳. 𑀏𑀯𑀁 𑀲𑀦𑁆𑀢𑁂 𑀤𑁆𑀯𑁂 𑀕𑀡𑁆𑀳, 𑀢𑀻𑀡𑀺 𑀕𑀡𑁆𑀳𑀸𑀢𑀺 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀲𑀩𑁆𑀩𑁂𑀧𑀺 𑀢𑁂 𑀓𑀳𑀸𑀧𑀡𑁂 𑀤𑀸𑀢𑀼𑀓𑀸𑀫𑁄 𑀚𑀸𑀢𑁄. 𑀇𑀢𑀭𑁄 ‘‘𑀅𑀜𑁆𑀜𑁂𑀧𑀺𑀲𑁆𑀲 𑀅𑀢𑁆𑀣𑀻’’𑀢𑀺 𑀲𑀜𑁆𑀜𑀸𑀬 ‘‘𑀦 𑀤𑁂𑀫𑀺’’𑀘𑁆𑀘𑁂𑀯 𑀆𑀳. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀲𑀘𑁂 𑀫𑁂, 𑀪𑁄, 𑀅𑀜𑁆𑀜𑁂𑀧𑀺 𑀅𑀲𑁆𑀲𑀼, 𑀢𑁂𑀧𑀺 𑀤𑀤𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀡𑁆𑀳𑀸𑀫𑀺, 𑀏𑀢𑀲𑁆𑀫𑀺𑀁 𑀫𑁂 𑀭𑀼𑀓𑁆𑀔𑀫𑀽𑀮𑁂 𑀏𑀓𑁄 𑀅𑀬𑁆𑀬𑁄 𑀦𑀺𑀲𑀻𑀤𑀸𑀧𑀺𑀢𑁄, 𑀢𑀼𑀬𑁆𑀳𑀫𑁆𑀧𑀺 𑀓𑀼𑀲𑀮𑀁 𑀪𑀯𑀺𑀲𑁆𑀲𑀢𑀺, 𑀤𑁂𑀳𑀺 𑀫𑁂 𑀪𑀢𑁆𑀢’’𑀦𑁆𑀢𑀺. 𑀢𑁂𑀦 𑀳𑀺, 𑀪𑁄, 𑀕𑀡𑁆𑀳, 𑀆𑀳𑀭 𑀢𑁂 𑀓𑀳𑀸𑀧𑀡𑁂𑀢𑀺 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀧𑀼𑀝𑀓𑀪𑀢𑁆𑀢𑀁 𑀅𑀤𑀸𑀲𑀺. 𑀉𑀧𑀸𑀲𑀓𑁄 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀢𑁆𑀢𑀁 𑀦𑀻𑀳𑀭𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀉𑀧𑀟𑁆𑀠𑀪𑀢𑁆𑀢𑁂 𑀤𑀺𑀦𑁆𑀦𑁂 𑀧𑀢𑁆𑀢𑀁 𑀧𑀺𑀤𑀳𑀺. 𑀉𑀧𑀸𑀲𑀓𑁄 𑀆𑀳 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀏𑀓𑀲𑁆𑀲𑁂𑀯 𑀧𑀝𑀺𑀯𑀺𑀲𑁄, 𑀦 𑀲𑀓𑁆𑀓𑀸 𑀫𑀬𑀸 𑀇𑀢𑁄 𑀪𑀼𑀜𑁆𑀚𑀺𑀢𑀼𑀁. 𑀢𑀼𑀫𑁆𑀳𑀸𑀓𑀁𑀬𑁂𑀯 𑀫𑁂 𑀅𑀢𑁆𑀣𑀸𑀬 𑀇𑀫𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀤𑁆𑀥𑀁, 𑀕𑀡𑁆𑀳𑀣 𑀦𑀁 𑀫𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀣𑁂𑀭𑁄 ‘‘𑀅𑀢𑁆𑀣𑀺 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀺. 𑀉𑀧𑀸𑀲𑀓𑁄 𑀥𑀫𑀓𑀭𑀡𑁂𑀦 𑀧𑀸𑀦𑀻𑀬𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀦𑀺𑀝𑁆𑀞𑀺𑀢𑀪𑀢𑁆𑀢𑀓𑀺𑀘𑁆𑀘𑁂 𑀣𑁂𑀭𑁂 𑀉𑀪𑁄𑀧𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼.

𑀣𑁂𑀭𑁄 𑀉𑀧𑀸𑀲𑀓𑀁 𑀧𑀼𑀘𑁆𑀙𑀺 𑁋 ‘‘𑀓𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀦 𑀪𑀼𑀜𑁆𑀚𑀲𑀻’’𑀢𑀺. 𑀲𑁄 𑀅𑀢𑁆𑀢𑀦𑁄 𑀕𑀫𑀦𑀸𑀕𑀫𑀦𑀯𑀺𑀥𑀸𑀦𑀁 𑀲𑀩𑁆𑀩𑀁 𑀓𑀣𑁂𑀲𑀺. 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀤𑀼𑀓𑁆𑀓𑀭𑀁 𑀉𑀧𑀸𑀲𑀓𑁂𑀦 𑀓𑀢𑀁, 𑀫𑀬𑀸 𑀧𑀦 𑀏𑀯𑀭𑀽𑀧𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀏𑀢𑀲𑁆𑀲 𑀓𑀢𑀜𑁆𑀜𑀼𑀦𑀸 𑀪𑀯𑀺𑀢𑀩𑁆𑀩𑀁. 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀙𑀯𑀺𑀫𑀁𑀲𑀮𑁄𑀳𑀺𑀢𑁂𑀲𑀼 𑀲𑀼𑀓𑁆𑀔𑀦𑁆𑀢𑁂𑀲𑀼𑀧𑀺 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑁂𑀦𑁂𑀯 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀘𑀢𑁆𑀣𑀭𑀡𑀁 𑀅𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀕𑀡𑁆𑀳𑀺. 𑀲𑁄 𑀢𑀸𑀬 𑀭𑀢𑁆𑀢𑀺𑀬𑀸 𑀑𑀪𑀸𑀲𑀫𑀢𑁆𑀢𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀼𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀸𑀘𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀯𑀺𑀧𑀲𑁆𑀲𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀯𑀺𑀧𑀲𑁆𑀲𑀦𑁆𑀢𑁄 𑀲𑀢𑁆𑀢𑀫𑁂 𑀅𑀭𑀼𑀡𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀯𑀺𑀬 𑀫𑁂 𑀓𑀺𑀮𑀦𑁆𑀢𑀁 𑀲𑀭𑀻𑀭𑀁, 𑀓𑀺𑀁 𑀦𑀼 𑀔𑁄 𑀫𑁂 𑀚𑀻𑀯𑀺𑀢𑀁 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀦 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺. 𑀅𑀣𑀲𑁆𑀲 𑀅𑀧𑁆𑀧𑀯𑀢𑁆𑀢𑀦𑀪𑀸𑀯𑀁 𑀤𑀺𑀲𑁆𑀯𑀸 𑀲𑁂𑀦𑀸𑀲𑀦𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀺𑀳𑀸𑀭𑀫𑀚𑁆𑀛𑀁 𑀕𑀦𑁆𑀢𑁆𑀯𑀸 𑀪𑁂𑀭𑀺𑀁 𑀧𑀳𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀲𑀺.

𑀲𑀗𑁆𑀖𑀢𑁆𑀣𑁂𑀭𑁄 ‘‘𑀓𑁂𑀦 𑀪𑀺𑀓𑁆𑀔𑀼𑀦𑀸𑀲𑀗𑁆𑀖𑁄 𑀲𑀦𑁆𑀦𑀺𑀧𑀸𑀢𑀺𑀢𑁄’’𑀢𑀺 𑀧𑀼𑀘𑁆𑀙𑀺. 𑀫𑀬𑀸, 𑀪𑀦𑁆𑀢𑁂𑀢𑀺. 𑀓𑀺𑀫𑀢𑁆𑀣𑀁 𑀲𑀧𑁆𑀧𑀼𑀭𑀺𑀲𑀸𑀢𑀺. 𑀪𑀦𑁆𑀢𑁂, 𑀅𑀜𑁆𑀜𑀁 𑀓𑀫𑁆𑀫𑀁 𑀦𑀢𑁆𑀣𑀺, 𑀬𑁂𑀲𑀁 𑀧𑀦 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀓𑀗𑁆𑀔𑀸 𑀅𑀢𑁆𑀣𑀺, 𑀢𑁂 𑀫𑀁 𑀧𑀼𑀘𑁆𑀙𑀦𑁆𑀢𑀽𑀢𑀺. 𑀲𑀧𑁆𑀧𑀼𑀭𑀺𑀲 𑀢𑀸𑀤𑀺𑀲𑀸 𑀦𑀸𑀫 𑀪𑀺𑀓𑁆𑀔𑀽 𑀅𑀲𑀦𑁆𑀢𑀁 𑀕𑀼𑀡𑀁 𑀦 𑀓𑀣𑁂𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀏𑀢𑁆𑀣 𑀓𑀗𑁆𑀔𑀸 𑀦𑀢𑁆𑀣𑀺. 𑀓𑀺𑀁 𑀧𑀦 𑀢𑁂 𑀲𑀁𑀯𑁂𑀕𑀓𑀸𑀭𑀡𑀁 𑀅𑀳𑁄𑀲𑀺, 𑀓𑀺𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀫𑀳𑀸𑀕𑀸𑀫𑁂 𑀯𑀮𑁆𑀮𑀺𑀬𑀯𑀻𑀣𑀺𑀬𑀁 𑀤𑀸𑀭𑀼𑀪𑀡𑁆𑀟𑀓𑀫𑀳𑀸𑀢𑀺𑀲𑁆𑀲𑁄 𑀦𑀸𑀫 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀩𑀳𑀺 𑀞𑀧𑁂𑀢𑁆𑀯𑀸 𑀤𑁆𑀯𑀸𑀤𑀲 𑀓𑀳𑀸𑀧𑀡𑁂 𑀕𑀡𑁆𑀳𑀺𑀢𑁆𑀯𑀸 𑀢𑁂𑀳𑀺 𑀏𑀓𑀁 𑀔𑀻𑀭𑀥𑁂𑀦𑀼𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀔𑀻𑀭𑀪𑀢𑁆𑀢𑀲𑀮𑀸𑀓𑀁 𑀧𑀝𑁆𑀞𑀧𑁂𑀲𑀺, 𑀲𑁄 ‘‘𑀥𑀻𑀢𑀭𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀙 𑀫𑀸𑀲𑁂 𑀬𑀦𑁆𑀢𑀲𑀸𑀮𑀸𑀬 𑀪𑀢𑀺𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲 𑀓𑀳𑀸𑀧𑀡𑁂 𑀮𑀪𑀺𑀢𑁆𑀯𑀸 ‘‘𑀥𑀻𑀢𑀭𑀁 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀲𑀩𑁆𑀩𑁂𑀧𑀺 𑀢𑁂 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀼𑀝𑀓𑀪𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀲𑀩𑁆𑀩𑀁 𑀫𑀬𑁆𑀳𑀁 𑀅𑀤𑀸𑀲𑀺. 𑀅𑀳𑀁 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀇𑀥𑀸𑀕𑀦𑁆𑀢𑁆𑀯𑀸 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀮𑀪𑀺𑀢𑁆𑀯𑀸 ‘‘𑀧𑀺𑀡𑁆𑀟𑀸𑀧𑀘𑀸𑀬𑀦𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑀺𑀁, 𑀪𑀦𑁆𑀢𑁂𑀢𑀺. 𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀸 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼. 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀣𑁂𑀭𑁄 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁄 𑀓𑀣𑁂𑀦𑁆𑀢𑁄𑀯 ‘‘𑀫𑀬𑁆𑀳𑀁 𑀓𑀽𑀝𑀸𑀕𑀸𑀭𑀁 𑀤𑀸𑀭𑀼𑀪𑀡𑁆𑀟𑀓𑀫𑀳𑀸𑀢𑀺𑀲𑁆𑀲𑀲𑁆𑀲 𑀳𑀢𑁆𑀣𑁂𑀦 𑀨𑀼𑀝𑁆𑀞𑀓𑀸𑀮𑁂𑀬𑁂𑀯 𑀘𑀮𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚𑀸 ‘‘𑀏𑀓𑁄 𑀓𑀺𑀭 𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀲𑀼𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀓𑀽𑀝𑀸𑀕𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀁 𑀢𑀢𑁆𑀣 𑀆𑀭𑁄𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀘𑀺𑀢𑀓𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀉𑀓𑁆𑀔𑀺𑀧𑀦𑁆𑀢𑁄 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀭𑀸𑀚𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀣𑁂𑀭𑁂𑀦 𑀓𑀺𑀜𑁆𑀘𑀺 𑀓𑀣𑀺𑀢’’𑀦𑁆𑀢𑀺. 𑀪𑀺𑀓𑁆𑀔𑀽 𑀣𑁂𑀭𑁂𑀦 𑀓𑀣𑀺𑀢𑀯𑀺𑀥𑀸𑀦𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀭𑀸𑀚𑀸 𑀢𑀁 𑀉𑀧𑀸𑀲𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀬𑀸 𑀇𑀢𑁄 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 𑀓𑀲𑁆𑀲𑀘𑀺 𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀝𑀓𑀪𑀢𑁆𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀆𑀫, 𑀤𑁂𑀯𑀸𑀢𑀺. 𑀓𑁂𑀦 𑀢𑁂 𑀦𑀺𑀬𑀸𑀫𑁂𑀦 𑀤𑀺𑀦𑁆𑀦𑀦𑁆𑀢𑀺? 𑀲𑁄 𑀢𑀁 𑀓𑀸𑀭𑀡𑀁 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀣𑁂𑀭𑀲𑁆𑀲 𑀓𑀽𑀝𑀸𑀕𑀸𑀭𑀝𑁆𑀞𑀸𑀦𑀁 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙 𑀢𑀁 𑀣𑁂𑀭𑀁 𑀲𑀜𑁆𑀚𑀸𑀦, 𑀲𑁄 𑀯𑀸 𑀅𑀜𑁆𑀜𑁄 𑀯𑀸’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀲𑀸𑀡𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑁂𑀭𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀳𑀤𑀬𑀁 𑀲𑀦𑁆𑀥𑀸𑀭𑁂𑀦𑁆𑀢𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀫𑀬𑁆𑀳𑀁 𑀅𑀬𑁆𑀬𑁄’’𑀢𑀺 𑀆𑀳. 𑀅𑀣𑀲𑁆𑀲 𑀭𑀸𑀚𑀸 𑀫𑀳𑀸𑀧𑀲𑀸𑀥𑀦𑀁 𑀤𑀸𑀧𑁂𑀲𑀺. 𑀢𑀁 𑀧𑀲𑀸𑀥𑁂𑀢𑁆𑀯𑀸 𑀆𑀕𑀢𑀁 ‘‘𑀕𑀘𑁆𑀙 𑀪𑀸𑀢𑀺𑀓 𑀫𑀳𑀸𑀢𑀺𑀲𑁆𑀲 𑀫𑀬𑁆𑀳𑀁, 𑀅𑀬𑁆𑀬𑀸𑀢𑀺 𑀯𑀢𑁆𑀯𑀸 𑀓𑀽𑀝𑀸𑀕𑀸𑀭𑀁 𑀉𑀓𑁆𑀔𑀺𑀧𑀸’’𑀢𑀺 𑀆𑀳. 𑀉𑀧𑀸𑀲𑀓𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀫𑀢𑁆𑀣𑀓𑁂 𑀅𑀓𑀸𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀓𑀽𑀝𑀸𑀕𑀸𑀭𑀁 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀘𑀺𑀢𑀓𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀘𑀺𑀢𑀓𑀲𑁆𑀲 𑀘𑀢𑀽𑀳𑀺𑀧𑀺 𑀓𑀡𑁆𑀡𑁂𑀳𑀺 𑀲𑀬𑀫𑁂𑀯 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀁𑀲𑀽𑀢𑀺.

‘‘𑀫𑀳𑀦𑁆𑀢𑀁 𑀔𑁄 𑀧𑀦𑁂𑀢𑀁 𑀲𑀢𑁆𑀣𑀼 𑀤𑀸𑀬𑀚𑁆𑀚𑀁, 𑀬𑀤𑀺𑀤𑀁 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺 𑀦𑀸𑀫, 𑀢𑀁 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀳𑁂𑀢𑀼𑀁. 𑀬𑀣𑀸 𑀳𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀧𑀼𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 ‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀧𑀼𑀢𑁆𑀢𑁄’𑀢𑀺 𑀧𑀭𑀺𑀩𑀸𑀳𑀺𑀭𑀁 𑀓𑀭𑁄𑀦𑁆𑀢𑀺, 𑀲𑁄 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺, 𑀏𑀯𑀁 𑀓𑀼𑀲𑀻𑀢𑁄𑀧𑀺 𑀇𑀤𑀁 𑀅𑀭𑀺𑀬𑀥𑀦𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄𑀯 𑀮𑀪𑀢𑀻’’𑀢𑀺 𑀤𑀸𑀬𑀚𑁆𑀚𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀫𑀳𑀸 𑀔𑁄 𑀧𑀦 𑀢𑁂 𑀲𑀢𑁆𑀣𑀸. 𑀲𑀢𑁆𑀣𑀼𑀦𑁄 𑀳𑀺 𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀳𑀡𑀓𑀸𑀮𑁂𑀧𑀺, 𑀅𑀪𑀺𑀦𑀺𑀓𑁆𑀔𑀫𑀦𑁂𑀧𑀺, 𑀅𑀪𑀺𑀲𑀫𑁆𑀩𑁄𑀥𑀺𑀬𑀫𑁆𑀧𑀺, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑁂𑀯𑁄𑀭𑁄𑀳𑀦𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂𑀲𑀼𑀧𑀺, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀬𑀼𑀢𑁆𑀢𑀁 𑀦𑀼 𑀢𑁂 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀲𑀻𑀢𑁂𑀦 𑀪𑀯𑀺𑀢𑀼’’𑀦𑁆𑀢𑀺 𑀏𑀯𑀁 𑀲𑀢𑁆𑀣𑀼𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀚𑀸𑀢𑀺𑀬𑀸𑀧𑀺 𑀢𑁆𑀯𑀁 𑀇𑀤𑀸𑀦𑀺 𑀦 𑀮𑀸𑀫𑀓𑀚𑀸𑀢𑀺𑀓𑁄, 𑀅𑀲𑀫𑁆𑀪𑀺𑀦𑁆𑀦𑀸𑀬 𑀫𑀳𑀸𑀲𑀫𑁆𑀫𑀢𑀧𑀯𑁂𑀡𑀺𑀬𑀸 𑀆𑀕𑀢𑀑𑀓𑁆𑀓𑀸𑀓𑀭𑀸𑀚𑀯𑀁𑀲𑁂 𑀚𑀸𑀢𑁄𑀲𑀺, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀘 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀘 𑀦𑀢𑁆𑀢𑀸, 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀓𑀦𑀺𑀝𑁆𑀞𑁄, 𑀢𑀬𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀚𑀺𑀦𑀧𑀼𑀢𑁆𑀢𑁂𑀦 𑀳𑀼𑀢𑁆𑀯𑀸 𑀦 𑀬𑀼𑀢𑁆𑀢𑀁 𑀓𑀼𑀲𑀻𑀢𑁂𑀦 𑀯𑀺𑀳𑀭𑀺𑀢𑀼’’𑀦𑁆𑀢𑀺 𑀏𑀯𑀁 𑀚𑀸𑀢𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀘𑁂𑀯 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀘 𑀯𑀻𑀭𑀺𑀬𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀼, 𑀢𑁆𑀯𑀁 𑀏𑀢𑁂𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀲𑀺, 𑀦 𑀧𑀝𑀺𑀧𑀚𑁆𑀚𑀲𑀻’’𑀢𑀺 𑀏𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀅𑀚𑀕𑀭𑀲𑀤𑀺𑀲𑁂 𑀯𑀺𑀲𑁆𑀲𑀝𑁆𑀞𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂 𑀓𑀼𑀲𑀻𑀢𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀯𑀺𑀭𑀺𑀬𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀓𑀸𑀭𑀡𑁂𑀳𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑁄 𑀦𑀸𑀫 𑀳𑁄𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫𑀲𑀗𑁆𑀖𑀲𑀻𑀮^ 𑀘𑀸𑀕𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀳𑀺 𑀬𑀸𑀯 𑀉𑀧𑀘𑀸𑀭𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺, 𑀤𑀻𑀖𑀭𑀢𑁆𑀢𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀭𑀓𑁆𑀔𑀺𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄 𑀤𑀲𑀲𑀻𑀮𑀁 𑀧𑀜𑁆𑀘𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀤𑀼𑀩𑁆𑀪𑀺𑀓𑁆𑀔𑀪𑀬𑀸𑀤𑀻𑀲𑀼 𑀧𑀡𑀻𑀢𑀪𑁄𑀚𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀢𑁆𑀯𑀸 ‘‘𑀏𑀯𑀁𑀦𑀸𑀫 𑀅𑀤𑀫𑁆𑀳𑀸’’𑀢𑀺 𑀘𑀸𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄𑀧𑀺 𑀏𑀯𑀭𑀽𑀧𑁂 𑀓𑀸𑀮𑁂 𑀲𑀻𑀮𑀯𑀦𑁆𑀢𑀸𑀦𑀁 𑀤𑀺𑀦𑁆𑀦𑀤𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀬𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑁂𑀯𑀢𑁆𑀢𑀁 𑀧𑀢𑁆𑀢𑀸, 𑀢𑀣𑀸𑀭𑀽𑀧𑀸𑀦𑀁 𑀕𑀼𑀡𑀸𑀦𑀁 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑁂 𑀓𑀺𑀮𑁂𑀲𑀸 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀯𑀲𑁆𑀲𑀸𑀦𑀺 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀘𑁂𑀢𑀺𑀬𑀤𑀲𑁆𑀲𑀦𑀩𑁄𑀥𑀺𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑁂𑀲𑀼 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀽𑀘𑀺𑀢𑀮𑀽𑀔𑀪𑀸𑀯𑁂 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀕𑀤𑁆𑀭𑀪𑀧𑀺𑀝𑁆𑀞𑁂 𑀭𑀚𑀲𑀤𑀺𑀲𑁂 𑀮𑀽𑀔𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀩𑀳𑀼𑀮𑁂 𑀫𑀼𑀤𑀼𑀘𑀺𑀢𑁆𑀢𑁂 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀓𑁂 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀻𑀢𑀺𑀉𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀓𑀸𑀭𑀡𑁂𑀳𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑁄 𑀦𑀸𑀫 𑀳𑁄𑀢𑀺.

𑀲𑀢𑁆𑀢 𑀥𑀫𑁆𑀫𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸, 𑀉𑀢𑀼𑀲𑀼𑀔𑀲𑁂𑀯𑀦𑀢𑀸, 𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸, 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸, 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀧𑀡𑀻𑀢𑀜𑁆𑀳𑀺 𑀲𑀺𑀦𑀺𑀤𑁆𑀥𑀁 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺, 𑀲𑀻𑀢𑀼𑀡𑁆𑀳𑁂𑀲𑀼 𑀘 𑀉𑀢𑀽𑀲𑀼 𑀞𑀸𑀦𑀸𑀤𑀻𑀲𑀼 𑀘 𑀇𑀭𑀺𑀬𑀸𑀧𑀣𑁂𑀲𑀼 𑀲𑀧𑁆𑀧𑀸𑀬𑀉𑀢𑀼𑀜𑁆𑀘 𑀇𑀭𑀺𑀬𑀸𑀧𑀣𑀜𑁆𑀘 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀧𑀦 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑁄 𑀲𑀩𑁆𑀩𑀉𑀢𑀼𑀇𑀭𑀺𑀬𑀸𑀧𑀣𑀓𑁆𑀔𑀫𑁄 𑀳𑁄𑀢𑀺, 𑀦 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀯𑀺𑀲𑀪𑀸𑀕𑁂 𑀉𑀢𑀼𑀇𑀭𑀺𑀬𑀸𑀧𑀣𑁂 𑀯𑀚𑁆𑀚𑁂𑀢𑁆𑀯𑀸 𑀲𑀪𑀸𑀕𑁂 𑀲𑁂𑀯𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀫𑀚𑁆𑀛𑀢𑁆𑀢𑀧𑀬𑁄𑀕𑁄 𑀯𑀼𑀘𑁆𑀘𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀧𑀘𑁆𑀘𑀯𑁂𑀓𑁆𑀔𑀡𑀸. 𑀇𑀫𑀺𑀦𑀸 𑀫𑀚𑁆𑀛𑀢𑁆𑀢𑀧𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀭𑀁 𑀯𑀺𑀳𑁂𑀞𑀬𑀫𑀸𑀦𑁄 𑀯𑀺𑀘𑀭𑀢𑀺, 𑀏𑀯𑀭𑀽𑀧𑀁 𑀲𑀸𑀭𑀤𑁆𑀥𑀓𑀸𑀬𑀁 𑀧𑀼𑀕𑁆𑀕𑀮𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀲𑀁𑀬𑀢𑀧𑀸𑀤𑀧𑀸𑀡𑀺𑀁 𑀧𑀲𑁆𑀲𑀤𑁆𑀥𑀓𑀸𑀬𑀁 𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀲𑁆𑀲𑀤𑁆𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑁄 𑀦𑀸𑀫 𑀳𑁄𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀢𑀸, 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸, 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸 𑀘 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀓𑀼𑀲𑀮𑀢𑀸. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬 𑀯𑀸 𑀉𑀧𑀲𑀫𑀲𑀼𑀔𑀸𑀦𑀥𑀺𑀕𑀫𑁂𑀦 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀝𑁆𑀞𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀁𑀯𑁂𑀚𑁂𑀢𑀺. 𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑁋 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺. 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘 𑀧𑀲𑀸𑀤𑀁 𑀚𑀦𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸’’𑀢𑀺.

𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀦𑀸𑀫 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺 𑀲𑀸𑀭𑀣𑀺 𑀯𑀺𑀬 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸’’𑀢𑀺. 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀦𑀸𑀫 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀅𑀧𑁆𑀧𑀢𑁆𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀦𑀸𑀫 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀸𑀦𑀁 𑀲𑁂𑀯𑀦𑀸 𑀪𑀚𑀦𑀸 𑀧𑀬𑀺𑀭𑀼𑀧𑀸𑀲𑀦𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀫𑀸𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀁𑀬𑁂𑀯 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄 𑀏𑀲 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀓𑀸𑀭𑀡𑁂𑀳𑀺 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑁄 𑀦𑀸𑀫 𑀳𑁄𑀢𑀺.

𑀧𑀜𑁆𑀘 𑀥𑀫𑁆𑀫𑀸 𑀉𑀧𑁂𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸, 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 ‘‘𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀲𑀺, 𑀏𑀲𑁄𑀧𑀺 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀢𑀺, 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’’𑀢𑀺 𑀏𑀯𑀁 𑀓𑀫𑁆𑀫𑀲𑁆𑀲𑀓𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘, ‘‘𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄𑀬𑁂𑀯 𑀦𑀢𑁆𑀣𑀺, 𑀲𑁄 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’’𑀢𑀺 𑀏𑀯𑀁 𑀦𑀺𑀲𑁆𑀲𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘𑀸𑀢𑀺. 𑀤𑁆𑀯𑀻𑀳𑁂𑀯𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 ‘‘𑀇𑀤𑀁 𑀘𑀻𑀯𑀭𑀁 𑀅𑀦𑀼𑀧𑀼𑀩𑁆𑀩𑁂𑀦 𑀯𑀡𑁆𑀡𑀯𑀺𑀓𑀸𑀭𑀜𑁆𑀘𑁂𑀯 𑀚𑀺𑀡𑁆𑀡𑀪𑀸𑀯𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑀁 𑀳𑀼𑀢𑁆𑀯𑀸 𑀬𑀝𑁆𑀞𑀺𑀓𑁄𑀝𑀺𑀬𑀸 𑀙𑀟𑁆𑀟𑀦𑀻𑀬𑀁 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀧𑀦𑀲𑁆𑀲 𑀲𑀸𑀫𑀺𑀓𑁄 𑀪𑀯𑁂𑀬𑁆𑀬, 𑀦𑀸𑀲𑁆𑀲 𑀏𑀯𑀁 𑀯𑀺𑀦𑀲𑁆𑀲𑀺𑀢𑀼𑀁 𑀤𑀤𑁂𑀬𑁆𑀬𑀸’’𑀢𑀺 𑀏𑀯𑀁 𑀅𑀲𑁆𑀲𑀸𑀫𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘, ‘‘𑀅𑀦𑀤𑁆𑀥𑀦𑀺𑀬𑀁 𑀇𑀤𑀁 𑀢𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀏𑀯𑀁 𑀢𑀸𑀯𑀓𑀸𑀮𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘𑀸𑀢𑀺. 𑀬𑀣𑀸 𑀘 𑀘𑀻𑀯𑀭𑁂, 𑀏𑀯𑀁 𑀧𑀢𑁆𑀢𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸𑀢𑀺 𑀏𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀕𑀺𑀳𑀻 𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀸𑀤𑀺𑀓𑁂, 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀓𑁂 𑀫𑀫𑀸𑀬𑀢𑀺, 𑀲𑀳𑀢𑁆𑀣𑁂𑀦𑁂𑀯 𑀦𑁂𑀲𑀁 𑀓𑁂𑀲𑀘𑁆𑀙𑁂𑀤𑀦𑀲𑀽𑀘𑀺𑀓𑀫𑁆𑀫𑀘𑀻𑀯𑀭𑀥𑁄𑀯𑀦𑀭𑀚𑀦𑀧𑀢𑁆𑀢𑀧𑀘𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀫𑀼𑀳𑀼𑀢𑁆𑀢𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀲𑀸𑀫𑀡𑁂𑀭𑁄 𑀓𑀼𑀳𑀺𑀁, 𑀅𑀲𑀼𑀓𑁄 𑀤𑀳𑀭𑁄 𑀓𑀼𑀳𑀺’’𑀦𑁆𑀢𑀺 𑀪𑀦𑁆𑀢𑀫𑀺𑀕𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀢𑀺, 𑀅𑀜𑁆𑀜𑁂𑀦 𑀓𑁂𑀲𑀘𑁆𑀙𑁂𑀤𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 ‘‘𑀫𑀼𑀳𑀼𑀢𑁆𑀢𑀁 𑀢𑀸𑀯 𑀅𑀲𑀼𑀓𑀁 𑀧𑁂𑀲𑁂𑀣𑀸’’𑀢𑀺 𑀬𑀸𑀘𑀺𑀬𑀫𑀸𑀦𑁄𑀧𑀺 ‘‘𑀅𑀫𑁆𑀳𑁂𑀧𑀺 𑀢𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦 𑀓𑀸𑀭𑁂𑀫, 𑀢𑀼𑀫𑁆𑀳𑁂 𑀦𑀁 𑀕𑀳𑁂𑀢𑁆𑀯𑀸 𑀓𑀺𑀮𑀫𑀺𑀲𑁆𑀲𑀣𑀸’’𑀢𑀺 𑀦 𑀤𑁂𑀢𑀺, 𑀅𑀬𑀁 𑀲𑀢𑁆𑀢𑀓𑁂𑀮𑀸𑀬𑀦𑁄 𑀦𑀸𑀫. 𑀬𑁄 𑀧𑀦 𑀘𑀻𑀯𑀭𑀧𑀢𑁆𑀢𑀣𑀸𑀮𑀓𑀓𑀢𑁆𑀢𑀭𑀬𑀝𑁆𑀞𑀺𑀆𑀤𑀻𑀦𑀺 𑀫𑀫𑀸𑀬𑀢𑀺, 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑀼𑀫𑁆𑀧𑀺 𑀦 𑀤𑁂𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀬𑀸𑀘𑀺𑀢𑁄 ‘‘𑀫𑀬𑀫𑁆𑀧𑀺 𑀇𑀫𑀁 𑀥𑀦𑀸𑀬𑀦𑁆𑀢𑀸 𑀦 𑀧𑀭𑀺𑀪𑀼𑀜𑁆𑀚𑀸𑀫, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀢𑀺, 𑀅𑀬𑀁 𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑁄 𑀦𑀸𑀫.

𑀬𑁄 𑀧𑀦 𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀯𑀢𑁆𑀣𑀽𑀲𑀼 𑀫𑀚𑁆𑀛𑀢𑁆𑀢𑁄 𑀉𑀤𑀸𑀲𑀺𑀦𑁄, 𑀅𑀬𑀁 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑁄 𑀦𑀸𑀫. 𑀇𑀢𑀺 𑀅𑀬𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀯𑀭𑀽𑀧𑀁 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀤𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀤𑀺𑀓𑀫𑁆𑀫𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑁂𑀲𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀲𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀦𑀸𑀫, 𑀨𑀮𑁂 𑀧𑀢𑁆𑀢𑁂 𑀪𑀸𑀯𑀺𑀢𑁄 𑀦𑀸𑀫 𑀳𑁄𑀢𑀺. 𑀇𑀢𑀺 𑀇𑀫𑁂𑀧𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸.

𑁪𑁧𑁯. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀆𑀤𑀺𑀪𑀽𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀲𑀫𑁆𑀫𑀸𑀤𑀲𑁆𑀲𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑀫𑁆𑀫𑀸𑀧𑀭𑀺𑀕𑁆𑀕𑀸𑀳𑀮𑀓𑁆𑀔𑀡𑀸 𑀲𑀫𑁆𑀫𑀸𑀯𑀸𑀘𑀸. 𑀲𑀫𑁆𑀫𑀸𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀲𑀫𑁆𑀫𑀸𑀯𑁄𑀤𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀲𑀫𑁆𑀫𑀸𑀧𑀕𑁆𑀕𑀳𑀮𑀓𑁆𑀔𑀡𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀸𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀲𑀢𑀺. 𑀲𑀫𑁆𑀫𑀸𑀲𑀫𑀸𑀥𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀫𑀸𑀥𑀺.

𑀢𑁂𑀲𑀼 𑀏𑀓𑁂𑀓𑀲𑁆𑀲 𑀢𑀻𑀡𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀸𑀯 𑀅𑀜𑁆𑀜𑁂𑀳𑀺𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀧𑀲𑁆𑀲𑀢𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀯𑀺𑀥𑀫𑀦𑀯𑀲𑁂𑀦 𑀅𑀲𑀫𑁆𑀫𑁄𑀳𑀢𑁄. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀢𑀣𑁂𑀯 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀺 𑀘 𑀧𑀚𑀳𑀦𑁆𑀢𑀺, 𑀦𑀺𑀭𑁄𑀥𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀳𑀚𑀸𑀢𑀥𑀫𑁆𑀫𑁂 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸 𑀯𑁄𑀤𑀸𑀧𑁂𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸 𑀧𑀕𑁆𑀕𑀡𑁆𑀳𑀸𑀢𑀺, 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸 𑀉𑀧𑀝𑁆𑀞𑀸𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑁆𑀫𑀸 𑀧𑀤𑀳𑀢𑀺.

𑀅𑀧𑀺 𑀘𑁂𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀳𑁄𑀢𑀺, 𑀫𑀕𑁆𑀕𑀓𑀸𑀮𑁂 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸. 𑀓𑀺𑀘𑁆𑀘𑀢𑁄 𑀧𑀦 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀓𑁆𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀫𑀕𑁆𑀕𑀓𑀸𑀮𑁂 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸. 𑀢𑁂𑀲𑀼 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀓𑀺𑀘𑁆𑀘𑀢𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄𑀢𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀧𑀼𑀩𑁆𑀩𑀪𑀸𑀕𑁂 𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀺, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀯𑀺𑀭𑀢𑀺𑀬𑁄𑀯. 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀻𑀢𑀺 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀓𑀺𑀘𑁆𑀘𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺 𑀧𑀦 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀯.

𑀇𑀢𑀺 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀪𑀕𑀯𑀢𑀸 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄 𑀩𑀳𑀼𑀓𑀸𑀭𑀢𑁆𑀢𑀸 𑀧𑀞𑀫𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑁂𑀲𑀺𑀢𑀸. 𑀅𑀬𑀜𑁆𑀳𑀺 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀲𑀢𑁆𑀣’’𑀦𑁆𑀢𑀺 (𑀥. 𑀲. 𑁧𑁬, 𑁨𑁦, 𑁨𑁯, 𑁩𑁪) 𑀘 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀏𑀢𑀸𑀬 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀗𑁆𑀔𑀸𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀓𑀺𑀮𑁂𑀲𑀘𑁄𑀭𑁂 𑀖𑀸𑀢𑁂𑀦𑁆𑀢𑁄 𑀔𑁂𑀫𑁂𑀦 𑀬𑁄𑀕𑀸𑀯𑀘𑀭𑁄 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄 𑀩𑀳𑀼𑀓𑀸𑀭𑀢𑁆𑀢𑀸 𑀧𑀞𑀫𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑁂𑀲𑀺𑀢𑀸’’𑀢𑀺.

𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀢𑀲𑁆𑀲𑀸 𑀩𑀳𑀼𑀓𑀸𑀭𑁄, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑁄 𑀳𑀢𑁆𑀣𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑀓𑁆𑀔𑀼𑀦𑀸 𑀓𑀳𑀸𑀧𑀡𑀁 𑀑𑀮𑁄𑀓𑁂𑀦𑁆𑀢𑁄 ‘𑀅𑀬𑀁 𑀓𑀽𑀝𑁄, 𑀅𑀬𑀁 𑀙𑁂𑀓𑁄’’𑀢𑀺 𑀚𑀸𑀦𑀸𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄𑀧𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀑𑀮𑁄𑀓𑀬𑀫𑀸𑀦𑁄 ‘‘𑀇𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸𑀤𑀬𑁄’’𑀢𑀺 𑀚𑀸𑀦𑀸𑀢𑀺. 𑀬𑀣𑀸 𑀯𑀸 𑀧𑀦 𑀧𑀼𑀭𑀺𑀲𑁂𑀦 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀺𑀦𑁆𑀦𑀁 𑀫𑀳𑀸𑀭𑀼𑀓𑁆𑀔𑀁 𑀢𑀘𑁆𑀙𑀓𑁄 𑀯𑀸𑀲𑀺𑀬𑀸 𑀢𑀘𑁆𑀙𑁂𑀢𑁆𑀯𑀸 𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑁆𑀯𑀸 𑀤𑀺𑀦𑁆𑀦𑀥𑀫𑁆𑀫𑁂 𑀬𑁄𑀕𑀸𑀯𑀘𑀭𑁄 𑀧𑀜𑁆𑀜𑀸𑀬 ‘‘𑀇𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑁂 𑀉𑀧𑀦𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀢𑀲𑁆𑀲𑀸 𑀩𑀳𑀼𑀓𑀸𑀭𑁄, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀯𑀼𑀢𑁆𑀢𑁄’’𑀢𑀺.

𑀲𑁆𑀯𑀸𑀬𑀁 𑀬𑀣𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀏𑀯𑀁 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄. 𑀬𑀣𑀸𑀳 𑁋 ‘‘𑀧𑀼𑀩𑁆𑀩𑁂 𑀔𑁄, 𑀕𑀳𑀧𑀢𑀺, 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁩). 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀯𑀸𑀘𑀸 𑀯𑀼𑀢𑁆𑀢𑀸.

𑀬𑀲𑁆𑀫𑀸 𑀧𑀦 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑀺𑀲𑁆𑀲𑀸𑀫𑀸𑀢𑀺 𑀧𑀞𑀫𑀁 𑀯𑀸𑀘𑀸𑀬 𑀲𑀁𑀯𑀺𑀤𑀳𑀺𑀢𑁆𑀯𑀸 𑀮𑁄𑀓𑁂 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀸𑀘𑀸 𑀓𑀸𑀬𑀓𑀫𑁆𑀫𑀲𑁆𑀲 𑀉𑀧𑀓𑀸𑀭𑀺𑀓𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀬 𑀅𑀦𑀦𑁆𑀢𑀭𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀯𑀼𑀢𑁆𑀢𑁄.

𑀘𑀢𑀼𑀩𑁆𑀩𑀺𑀥𑀁 𑀧𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀉𑀪𑀬𑀲𑀼𑀘𑀭𑀺𑀢𑀁 𑀧𑀽𑀭𑁂𑀦𑁆𑀢𑀲𑁆𑀲𑁂𑀯 𑀬𑀲𑁆𑀫𑀸 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀽𑀭𑁂𑀢𑀺, 𑀦 𑀇𑀢𑀭𑀲𑁆𑀲. 𑀢𑀲𑁆𑀫𑀸 𑀢𑀤𑀼𑀪𑀬𑀸𑀦𑀦𑁆𑀢𑀭𑀁 𑀲𑀫𑁆𑀫𑀸𑀆𑀚𑀻𑀯𑁄 𑀯𑀼𑀢𑁆𑀢𑁄.

𑀏𑀯𑀁 𑀲𑀼𑀤𑁆𑀥𑀸𑀚𑀻𑀯𑁂𑀦 ‘‘𑀧𑀭𑀺𑀲𑀼𑀤𑁆𑀥𑁄 𑀫𑁂 𑀆𑀚𑀻𑀯𑁄’’𑀢𑀺 𑀏𑀢𑁆𑀢𑀸𑀯𑀢𑀸 𑀧𑀭𑀺𑀢𑁄𑀲𑀁 𑀓𑀢𑁆𑀯𑀸 𑀲𑀼𑀢𑁆𑀢𑀧𑁆𑀧𑀫𑀢𑁆𑀢𑁂𑀦 𑀯𑀺𑀳𑀭𑀺𑀢𑀼𑀁 𑀦 𑀬𑀼𑀢𑁆𑀢𑀁, 𑀅𑀣 𑀔𑁄 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀇𑀤𑀁 𑀯𑀻𑀭𑀺𑀬𑀫𑀸𑀭𑀪𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀯𑀸𑀬𑀸𑀫𑁄 𑀯𑀼𑀢𑁆𑀢𑁄.

𑀢𑀢𑁄 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑀸𑀧𑀺 𑀓𑀸𑀬𑀸𑀤𑀻𑀲𑀼 𑀘𑀢𑀽𑀲𑀼 𑀯𑀢𑁆𑀣𑀽𑀲𑀼 𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀫𑁆𑀫𑀸𑀲𑀢𑀺 𑀤𑁂𑀲𑀺𑀢𑀸.

𑀬𑀲𑁆𑀫𑀸 𑀧𑀦 𑀏𑀯𑀁 𑀲𑀽𑀧𑀝𑁆𑀞𑀺𑀢𑀸 𑀲𑀢𑀺 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀺𑀢𑁆𑀯𑀸 𑀧𑀳𑁄𑀢𑀺 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀲𑀫𑀸𑀥𑁂𑀢𑀼𑀁, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀢𑀺𑀬𑀸 𑀅𑀦𑀦𑁆𑀢𑀭𑀁 𑀲𑀫𑁆𑀫𑀸𑀲𑀫𑀸𑀥𑀺 𑀤𑁂𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀅𑀬𑀫𑁆𑀧𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄𑀯 𑀓𑀣𑀺𑀢𑁄.

𑁪𑁨𑁭. 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀦𑀸𑀫 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀜𑁆𑀳𑀺 𑀦𑀻𑀮𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑁂𑀲𑁂 𑀯𑀸 𑀧𑀺𑀢𑁆𑀢𑁂 𑀯𑀸 𑀅𑀓𑁆𑀔𑀺𑀢𑀸𑀭𑀓𑀸𑀬 𑀯𑀸 𑀓𑀭𑁄𑀢𑀺, 𑀧𑀻𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑁂𑀤𑁂 𑀯𑀸 𑀙𑀯𑀺𑀬𑀸 𑀯𑀸 𑀳𑀢𑁆𑀣𑀧𑀸𑀤𑀢𑀮𑁂𑀲𑀼 𑀯𑀸 𑀅𑀓𑁆𑀔𑀻𑀦𑀁 𑀧𑀻𑀢𑀓𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺, 𑀮𑁄𑀳𑀺𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀁𑀲𑁂 𑀯𑀸 𑀮𑁄𑀳𑀺𑀢𑁂 𑀯𑀸 𑀚𑀺𑀯𑁆𑀳𑀸𑀬 𑀯𑀸 𑀅𑀓𑁆𑀔𑀻𑀦𑀁 𑀭𑀢𑁆𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺, 𑀑𑀤𑀸𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀫𑁆𑀳𑀺 𑀯𑀸 𑀤𑀦𑁆𑀢𑁂 𑀯𑀸 𑀦𑀔𑁂 𑀯𑀸 𑀅𑀓𑁆𑀔𑀻𑀦𑀁 𑀲𑁂𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀢𑀁 𑀧𑀦 𑀲𑀼𑀦𑀻𑀮𑀁 𑀲𑀼𑀧𑀻𑀢𑀁 𑀲𑀼𑀮𑁄𑀳𑀺𑀢𑀓𑀁 𑀲𑀼𑀑𑀤𑀸𑀢𑀓𑀁 𑀦 𑀳𑁄𑀢𑀺, 𑀅𑀯𑀺𑀲𑀼𑀤𑁆𑀥𑀫𑁂𑀯 𑀳𑁄𑀢𑀺.

𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲𑁂𑀯𑀁 𑀧𑀭𑀺𑀓𑀫𑁆𑀫𑀁 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀁 𑀧𑀦 𑀩𑀳𑀺𑀤𑁆𑀥𑀸. 𑀲𑁄 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀧𑀭𑀺𑀓𑀫𑁆𑀫𑀲𑁆𑀲 𑀩𑀳𑀺𑀤𑁆𑀥𑀸 𑀘 𑀅𑀧𑁆𑀧𑀦𑀸𑀬 𑀯𑀲𑁂𑀦 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀅𑀯𑀟𑁆𑀠𑀺𑀢𑀸𑀦𑀺. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀲𑀼𑀯𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀺 𑀤𑀼𑀩𑁆𑀩𑀡𑁆𑀡𑀸𑀦𑀺 𑀯𑀸, 𑀧𑀭𑀺𑀢𑁆𑀢𑀯𑀲𑁂𑀦𑁂𑀯 𑀇𑀤𑀁 𑀅𑀪𑀺𑀪𑀸𑀬𑀢𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺 𑀬𑀣𑀸 𑀦𑀸𑀫 𑀲𑀫𑁆𑀧𑀦𑁆𑀦𑀕𑀳𑀡𑀺𑀓𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀏𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀏𑀓𑀓𑀩𑀮𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑀺𑀓𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ‘‘𑀓𑀺𑀁 𑀏𑀢𑁆𑀣 𑀧𑀭𑀺𑀢𑁆𑀢𑀓𑁂 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀦𑀸𑀬𑀁 𑀫𑀫 𑀪𑀸𑀭𑁄’’𑀢𑀺 𑀢𑀸𑀦𑀺 𑀭𑀽𑀧𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀧𑀦𑀲𑁆𑀲 𑀆𑀪𑁄𑀕𑁄 𑀓𑀣𑀺𑀢𑁄. 𑀲𑁄 𑀘 𑀔𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲, 𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁. 𑀏𑀯𑀁𑀲𑀜𑁆𑀜𑀻 𑀳𑁄𑀢𑀻𑀢𑀺 𑀆𑀪𑁄𑀕𑀲𑀜𑁆𑀜𑀸𑀬𑀧𑀺 𑀛𑀸𑀦𑀲𑀜𑁆𑀜𑀸𑀬𑀧𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀅𑀪𑀺𑀪𑀯𑀲𑀜𑁆𑀜𑀸 𑀳𑀺𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀫𑁆𑀧𑀺 𑀅𑀢𑁆𑀣𑀺, 𑀆𑀪𑁄𑀕𑀲𑀜𑁆𑀜𑀸 𑀧𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲𑁂𑀯.

𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑀸𑀦𑀺, 𑀫𑀳𑀦𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀬𑀣𑀸 𑀫𑀳𑀕𑁆𑀖𑀲𑁄 𑀧𑀼𑀭𑀺𑀲𑁄 𑀏𑀓𑀁 𑀪𑀢𑁆𑀢𑀯𑀟𑁆𑀠𑀺𑀢𑀓𑀁 𑀮𑀪𑀺𑀢𑁆𑀯𑀸 ‘‘𑀅𑀜𑁆𑀜𑀫𑁆𑀧𑀺 𑀳𑁄𑀢𑀼, 𑀓𑀺𑀁 𑀏𑀢𑀁 𑀫𑀬𑁆𑀳𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀁 𑀦 𑀫𑀳𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ‘‘𑀓𑀺𑀁 𑀏𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀦𑀬𑀺𑀤𑀁 𑀅𑀧𑁆𑀧𑀫𑀸𑀡𑀁, 𑀦 𑀫𑀬𑁆𑀳𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀓𑀭𑀡𑁂 𑀪𑀸𑀭𑁄 𑀅𑀢𑁆𑀣𑀻’’𑀢𑀺 𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀮𑀸𑀪𑀺𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀺𑀭𑀳𑀺𑀢𑁄.

𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲 𑀧𑀭𑀺𑀓𑀫𑁆𑀫𑀫𑁆𑀧𑀺 𑀦𑀺𑀫𑀺𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀦𑁆𑀦𑀁, 𑀲𑁄 𑀏𑀯𑀁 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀲𑁆𑀲 𑀘𑁂𑀯 𑀅𑀧𑁆𑀧𑀦𑀸𑀬 𑀘 𑀯𑀲𑁂𑀦 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄𑀯 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀢𑁆𑀣𑀅𑀪𑀺𑀪𑀸𑀬𑀢𑀦𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀧𑀭𑀺𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀯𑀲𑁂𑀦 𑀆𑀕𑀢𑀁, 𑀅𑀧𑁆𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀯𑀲𑁂𑀦, 𑀲𑀼𑀯𑀡𑁆𑀡𑀁 𑀤𑁄𑀲𑀘𑀭𑀺𑀢𑀯𑀲𑁂𑀦, 𑀤𑀼𑀩𑁆𑀩𑀡𑁆𑀡𑀁 𑀭𑀸𑀕𑀘𑀭𑀺𑀢𑀯𑀲𑁂𑀦. 𑀏𑀢𑁂𑀲𑀜𑁆𑀳𑀺 𑀏𑀢𑀸𑀦𑀺 𑀲𑀧𑁆𑀧𑀸𑀬𑀸𑀦𑀺, 𑀲𑀸 𑀘 𑀦𑁂𑀲𑀁 𑀲𑀧𑁆𑀧𑀸𑀬𑀢𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘𑀭𑀺𑀬𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸.

𑀧𑀜𑁆𑀘𑀫𑀅𑀪𑀺𑀪𑀸𑀬𑀢𑀦𑀸𑀤𑀻𑀲𑀼 𑀦𑀻𑀮𑀸𑀦𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀻𑀮𑀯𑀡𑁆𑀡𑀸𑀦𑀻𑀢𑀺 𑀯𑀡𑁆𑀡𑀯𑀲𑁂𑀦. 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀻𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦, 𑀅𑀧𑀜𑁆𑀜𑀸𑀬𑀫𑀸𑀦𑀯𑀺𑀯𑀭𑀸𑀦𑀺 𑀅𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀸𑀦𑀺 𑀏𑀓𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀻𑀮𑀦𑀺𑀪𑀸𑀲𑀸𑀦𑀻𑀢𑀺 𑀇𑀤𑀁 𑀧𑀦 𑀑𑀪𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀻𑀮𑁄𑀪𑀸𑀲𑀸𑀦𑀺 𑀦𑀻𑀮𑀧𑁆𑀧𑀪𑀸𑀬𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑁂𑀲𑀁 𑀲𑀼𑀯𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀤𑁆𑀥𑀯𑀡𑁆𑀡𑀯𑀲𑁂𑀦𑁂𑀯 𑀳𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. ‘‘𑀦𑀻𑀮𑀓𑀲𑀺𑀡𑀁 𑀕𑀡𑁆𑀳𑀦𑁆𑀢𑁄 𑀦𑀻𑀮𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸’’𑀢𑀺𑀆𑀤𑀺𑀓𑀁 𑀧𑀦𑁂𑀢𑁆𑀣 𑀓𑀲𑀺𑀡𑀓𑀭𑀡𑀜𑁆𑀘 𑀧𑀭𑀺𑀓𑀫𑁆𑀫𑀜𑁆𑀘 𑀅𑀧𑁆𑀧𑀦𑀸𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯. 𑀇𑀫𑀸𑀦𑀺 𑀧𑀦 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀚𑁆𑀛𑀸𑀦𑀸𑀦𑀺 𑀯𑀝𑁆𑀝𑀸𑀦𑀺𑀧𑀺 𑀳𑁄𑀦𑁆𑀢𑀺 𑀯𑀝𑁆𑀝𑀧𑀸𑀤𑀓𑀸𑀦𑀺𑀧𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺𑀧𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀺𑀧𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺𑀧𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺𑀧𑀺, 𑀮𑁄𑀓𑀺𑀬𑀸𑀦𑁂𑀯 𑀧𑀦 𑀦 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁩𑁫. 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀼 𑀦𑀻𑀮𑀓𑀲𑀺𑀡𑀸𑀤𑀻𑀲𑀼 𑀦𑀻𑀮𑀓𑀲𑀺𑀡𑀸𑀤𑀺𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀁 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻. 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀧𑀺 𑀦𑀻𑀮𑀓𑀲𑀺𑀡𑀸𑀤𑀻𑀦𑀺 𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺. 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀢𑁆𑀣𑀼𑀓𑁂𑀲𑀼 𑀓𑀲𑀺𑀡𑁂𑀲𑀼 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀢𑁆𑀢𑀸𑀭𑀺𑀧𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀚𑁆𑀛𑀢𑁆𑀢𑀁 𑀦 𑀭𑀽𑀧𑀲𑀜𑁆𑀜𑀻, 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀅𑀦𑀼𑀧𑁆𑀧𑀸𑀤𑀺𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀩𑀳𑀺𑀤𑁆𑀥𑀸𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀲𑀼𑀪𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀬𑁄 𑀧𑀦 𑀯𑀺𑀲𑀼𑀤𑁆𑀥𑀁 𑀲𑀼𑀪𑀁 𑀓𑀲𑀺𑀡𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀳𑀭𑀢𑀺, 𑀲𑁄 𑀬𑀲𑁆𑀫𑀸 ‘‘𑀲𑀼𑀪𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀯𑀁 𑀤𑁂𑀲𑀦𑀸 𑀓𑀢𑀸. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀦 ‘‘𑀓𑀣𑀁 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄 𑁋 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑁆𑀓𑀽𑀮𑀸 𑀳𑁄𑀦𑁆𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑁆𑀓𑀽𑀮𑀸 𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁧𑁨) 𑀯𑀼𑀢𑁆𑀢𑀁. 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯.

𑁪𑁪𑁩. 𑀧𑀣𑀯𑀺𑀓𑀲𑀺𑀡𑀁 𑀪𑀸𑀯𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀓𑀮𑀝𑁆𑀞𑁂𑀦 𑀓𑀲𑀺𑀡𑀁, 𑀧𑀣𑀯𑀺 𑀏𑀯 𑀓𑀲𑀺𑀡𑀁 𑀧𑀣𑀯𑀺𑀓𑀲𑀺𑀡𑀁. 𑀧𑀭𑀺𑀓𑀫𑁆𑀫𑀧𑀣𑀯𑀺𑀬𑀸𑀧𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑁆𑀲𑀸𑀧𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲𑀸𑀧𑀺 𑀢𑀁 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀚𑁆𑀛𑀸𑀦𑀲𑁆𑀲𑀸𑀧𑀺 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀧𑀣𑀯𑀺𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀳𑁂𑀲 𑀪𑀸𑀯𑁂𑀢𑀺. 𑀆𑀧𑁄𑀓𑀲𑀺𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑀸𑀦𑀺 𑀧𑀦 𑀓𑀲𑀺𑀡𑀸𑀦𑀺 𑀪𑀸𑀯𑁂𑀦𑁆𑀢𑁂𑀦 𑀲𑀻𑀮𑀸𑀦𑀺 𑀲𑁄𑀥𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀬𑁆𑀯𑀸𑀲𑁆𑀲 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺, 𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀓𑀽𑀮𑀯𑀲𑁂𑀦 𑀬𑀁 𑀬𑀲𑁆𑀲 𑀲𑀧𑁆𑀧𑀸𑀬𑀁, 𑀢𑀁 𑀢𑁂𑀦 𑀕𑀳𑁂𑀢𑁆𑀯𑀸 𑀓𑀲𑀺𑀡𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁 𑀯𑀺𑀳𑀸𑀭𑀁 𑀧𑀳𑀸𑀬 𑀅𑀦𑀼𑀭𑀽𑀧𑁂 𑀯𑀺𑀳𑀭𑀦𑁆𑀢𑁂𑀦 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀪𑀸𑀯𑀦𑀸𑀯𑀺𑀥𑀸𑀦𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀸𑀦𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁮 𑀆𑀤𑀬𑁄) 𑀯𑀼𑀢𑁆𑀢𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀯𑀺𑀜𑁆𑀜𑀸𑀡𑀓𑀲𑀺𑀡𑀁 𑀦𑀸𑀕𑀢𑀁, 𑀢𑀁 𑀅𑀢𑁆𑀣𑀢𑁄 𑀆𑀓𑀸𑀲𑀓𑀲𑀺𑀡𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀁. 𑀢𑀜𑁆𑀘 𑀔𑁄 𑀆𑀭𑀫𑁆𑀫𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀲𑀫𑀸𑀧𑀢𑁆𑀢𑀺𑀯𑀲𑁂𑀦. 𑀢𑀜𑁆𑀳𑀺 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄 𑀯𑀺𑀜𑁆𑀜𑀸𑀡𑀓𑀲𑀺𑀡𑀁 𑀪𑀸𑀯𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺𑀧𑀺 𑀤𑀲 𑀓𑀲𑀺𑀡𑀸𑀦𑀺 𑀯𑀝𑁆𑀝𑀸𑀦𑀺𑀧𑀺 𑀳𑁄𑀦𑁆𑀢𑀺 𑀯𑀝𑁆𑀝𑀧𑀸𑀤𑀓𑀸𑀦𑀺𑀧𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺𑀧𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀦𑀺𑀧𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺𑀧𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺𑀧𑀺, 𑀮𑁄𑀓𑀺𑀬𑀸𑀦𑁂𑀯 𑀧𑀦 𑀦 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺.

𑁪𑁫𑁩. 𑀅𑀲𑀼𑀪𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀅𑀲𑀼𑀪𑀲𑀜𑁆𑀜𑀸 𑀯𑀼𑀘𑁆𑀘𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀤𑀲𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀦𑁆𑀦𑀸 𑀧𑀞𑀫𑀚𑁆𑀛𑀸𑀦𑀲𑀳𑀕𑀢𑀸 𑀲𑀜𑁆𑀜𑀸, 𑀢𑀁 𑀪𑀸𑀯𑁂𑀢𑀺 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀅𑀦𑀼𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀤𑀲𑀦𑁆𑀦𑀁 𑀧𑀦 𑀅𑀲𑀼𑀪𑀸𑀦𑀁 𑀪𑀸𑀯𑀦𑀸𑀦𑀬𑁄 𑀲𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁦𑁨 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀫𑀭𑀡𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀲𑀫𑁆𑀫𑀼𑀢𑀺𑀫𑀭𑀡𑀁, 𑀔𑀡𑀺𑀓𑀫𑀭𑀡𑀁, 𑀲𑀫𑀼𑀘𑁆𑀙𑁂𑀤𑀫𑀭𑀡𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑀺 𑀫𑀭𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀅𑀦𑀼𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑀸 𑀯𑀸 𑀫𑀭𑀡𑀲𑁆𑀲𑀢𑀺𑀬𑁂𑀯 𑀇𑀥 𑀫𑀭𑀡𑀲𑀜𑁆𑀜𑀸𑀢𑀺 𑀯𑀼𑀢𑁆𑀢𑀸, 𑀢𑀁 𑀪𑀸𑀯𑁂𑀢𑀺 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀪𑀸𑀯𑀦𑀸𑀦𑀬𑁄 𑀧𑀦𑀲𑁆𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁬𑁭 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀅𑀲𑀺𑀢𑀧𑀻𑀢𑀸𑀤𑀺𑀪𑁂𑀤𑁂 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀕𑀫𑀦𑀧𑀝𑀺𑀓𑀽𑀮𑀸𑀤𑀻𑀦𑀺 𑀦𑀯 𑀧𑀝𑀺𑀓𑀽𑀮𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺, 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀧𑀺 𑀪𑀸𑀯𑀦𑀸𑀦𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀢𑁂𑀥𑀸𑀢𑀼𑀓𑁂 𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀁 𑀉𑀓𑁆𑀓𑀡𑁆𑀞𑀺𑀢𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀜𑁆𑀜𑀣𑀢𑁆𑀢𑀧𑀭𑀺𑀕𑁆𑀕𑀸𑀳𑀺𑀓𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺. 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀅𑀦𑀺𑀘𑁆𑀘𑁂 𑀔𑀦𑁆𑀥𑀧𑀜𑁆𑀘𑀓𑁂 𑀧𑀝𑀺𑀧𑀻𑀴𑀦𑀲𑀗𑁆𑀔𑀸𑀢𑀤𑀼𑀓𑁆𑀔𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀁 𑀤𑀼𑀓𑁆𑀔𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺. 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑁂 𑀔𑀦𑁆𑀥𑀧𑀜𑁆𑀘𑀓𑁂 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀲𑀗𑁆𑀔𑀸𑀢𑀅𑀦𑀢𑁆𑀢𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀁 𑀅𑀦𑀢𑁆𑀢𑀸𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺. 𑀧𑀳𑀸𑀦𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀧𑀜𑁆𑀘𑀯𑀺𑀥𑀁 𑀧𑀳𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺. 𑀯𑀺𑀭𑀸𑀕𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀧𑀜𑁆𑀘𑀯𑀺𑀥𑀫𑁂𑀯 𑀯𑀺𑀭𑀸𑀕𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺. 𑀦𑀺𑀭𑁄𑀥𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁 𑀪𑀸𑀯𑁂𑀢𑀺. 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀲𑀜𑁆𑀜𑀸𑀳𑀺 𑀩𑀮𑀯𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀧𑀼𑀦 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺𑀆𑀤𑀺𑀓𑀸𑀳𑀺 𑀤𑀲𑀳𑀺 𑀲𑀜𑁆𑀜𑀸𑀳𑀺 𑀯𑀺𑀧𑀲𑁆𑀲𑀦𑀸𑀲𑀫𑀸𑀭𑀫𑁆𑀪𑁄𑀯 𑀓𑀣𑀺𑀢𑁄.

𑁪𑁭𑁩. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁪𑁮𑁩. 𑀧𑀞𑀫𑀚𑁆𑀛𑀸𑀦𑀲𑀳𑀕𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀕𑀢𑀁 𑀧𑀯𑀢𑁆𑀢𑀁, 𑀧𑀞𑀫𑀚𑁆𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀻𑀢𑀺 𑀧𑀞𑀫𑀚𑁆𑀛𑀸𑀦𑀲𑀳𑀕𑀢𑀁 𑀓𑀢𑁆𑀯𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀧𑀭𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸.