(𑁧𑁪) 𑁫. 𑀧𑀜𑁆𑀘𑀫𑀏𑀢𑀤𑀕𑁆𑀕𑀯𑀕𑁆𑀕𑁄

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻𑀯𑀢𑁆𑀣𑀼

𑁨𑁩𑁫. 𑀣𑁂𑀭𑀺𑀧𑀸𑀴𑀺𑀬𑀸 𑀧𑀞𑀫𑁂 𑀬𑀤𑀺𑀤𑀁 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀢𑀺 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀣𑁂𑀭𑀻 𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀲𑁆𑀲𑀸 𑀧𑀜𑁆𑀳𑀓𑀫𑁆𑀫𑁂 𑀧𑀦 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀦 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀦𑁆𑀢𑀭𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀧𑀜𑁆𑀘𑀦𑁆𑀦𑀁 𑀤𑀸𑀲𑀺𑀲𑀢𑀸𑀦𑀁 𑀚𑁂𑀝𑁆𑀞𑀓𑀤𑀸𑀲𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀫𑀬𑁂 𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀢𑁄 𑀇𑀲𑀺𑀧𑀢𑀦𑁂 𑀑𑀢𑀭𑀺𑀢𑁆𑀯𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀇𑀲𑀺𑀧𑀢𑀦𑀫𑁂𑀯 𑀕𑀦𑁆𑀢𑁆𑀯𑀸 ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀼𑀝𑀺𑀬𑀸 𑀅𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁. 𑀓𑀲𑁆𑀫𑀸? 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀳𑀺 𑀦𑀸𑀮𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀸𑀧𑀺 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀙𑀤𑀦𑁂𑀦 𑀙𑀦𑁆𑀦𑁂 𑀲𑀤𑁆𑀯𑀸𑀭𑀩𑀤𑁆𑀥𑁂 𑀲𑁂𑀦𑀸𑀲𑀦𑁂 𑀉𑀧𑀕𑀦𑁆𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁, 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁪). 𑀢𑀲𑁆𑀫𑀸 𑀯𑀲𑁆𑀲𑀓𑀸𑀮𑁂 𑀉𑀧𑀓𑀝𑁆𑀞𑁂 𑀲𑀘𑁂 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑀢𑀺, 𑀳𑀢𑁆𑀣𑀓𑀫𑁆𑀫𑀁 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁. 𑀳𑀢𑁆𑀣𑀓𑀫𑁆𑀫𑀁 𑀅𑀮𑀪𑀦𑁆𑀢𑁂𑀦 𑀲𑀸𑀫𑀫𑁆𑀧𑀺 𑀓𑀸𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀅𑀬𑀫𑀦𑀼𑀥𑀫𑁆𑀫𑀢𑀸. 𑀢𑀲𑁆𑀫𑀸 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ‘‘𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀲𑁆𑀲𑀸𑀫𑀸’’𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀚𑁂𑀝𑁆𑀞𑀓𑀤𑀸𑀲𑀻 𑀓𑀼𑀝𑀁 𑀕𑀳𑁂𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑁂 𑀅𑀤𑁆𑀤𑀲. 𑀲𑁂𑀝𑁆𑀞𑀺 𑀢𑁂𑀲𑀁 𑀆𑀕𑀢𑀓𑀸𑀭𑀡𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀑𑀓𑀸𑀲𑁄 𑀦𑀢𑁆𑀣𑀺, 𑀕𑀘𑁆𑀙𑀦𑁆𑀢𑀽’’𑀢𑀺 𑀆𑀳.

𑀅𑀣 𑀢𑁂 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑁂 𑀚𑁂𑀝𑁆𑀞𑀓𑀤𑀸𑀲𑀻 𑀓𑀼𑀝𑀁 𑀕𑀳𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀻 𑀤𑀺𑀲𑁆𑀯𑀸 𑀓𑀼𑀝𑀁 𑀑𑀢𑀸𑀭𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀑𑀦𑀫𑀺𑀢𑁆𑀯𑀸 𑀫𑀼𑀔𑀁 𑀉𑀓𑁆𑀔𑀺𑀧𑀺𑀢𑁆𑀯𑀸, ‘‘𑀅𑀬𑁆𑀬𑀸, 𑀦𑀕𑀭𑀁 𑀧𑀯𑀺𑀝𑁆𑀞𑀫𑀢𑁆𑀢𑀸𑀯 𑀦𑀺𑀓𑁆𑀔𑀦𑁆𑀢𑀸, 𑀓𑀺𑀁 𑀦𑀼 𑀔𑁄’’𑀢𑀺 𑀧𑀼𑀘𑁆𑀙𑀺. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀼𑀝𑀺𑀬𑀸 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀆𑀕𑀢𑀫𑁆𑀳𑀸𑀢𑀺. 𑀮𑀤𑁆𑀥𑀁, 𑀪𑀦𑁆𑀢𑁂𑀢𑀺? 𑀦 𑀮𑀤𑁆𑀥𑀁 𑀉𑀧𑀸𑀲𑀺𑀓𑁂𑀢𑀺. 𑀓𑀺𑀁 𑀧𑀦𑁂𑀲𑀸 𑀓𑀼𑀝𑀺 𑀇𑀲𑁆𑀲𑀭𑁂𑀳𑁂𑀯 𑀓𑀸𑀢𑀩𑁆𑀩𑀸, 𑀉𑀤𑀸𑀳𑀼 𑀤𑀼𑀕𑁆𑀕𑀢𑁂𑀳𑀺𑀧𑀺 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺? 𑀬𑁂𑀦 𑀓𑁂𑀦𑀘𑀺 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀫𑀬𑀁 𑀓𑀭𑀺𑀲𑁆𑀲𑀸𑀫, 𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦 𑀓𑀼𑀝𑀁 𑀕𑀳𑁂𑀢𑁆𑀯𑀸 𑀆𑀕𑀫𑀦𑀢𑀺𑀢𑁆𑀣𑀫𑀕𑁆𑀕𑁂 𑀞𑀢𑁆𑀯𑀸 𑀆𑀕𑀢𑀸𑀕𑀢𑀸 𑀅𑀯𑀲𑁂𑀲𑀤𑀸𑀲𑀺𑀬𑁄 ‘‘𑀏𑀢𑁆𑀣𑁂𑀯 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀸𑀲𑀁 𑀆𑀕𑀢𑀓𑀸𑀮𑁂 𑀆𑀳 𑁋 ‘‘𑀅𑀫𑁆𑀫𑀸, 𑀓𑀺𑀁 𑀦𑀺𑀘𑁆𑀘𑀫𑁂𑀯 𑀧𑀭𑀲𑁆𑀲 𑀤𑀸𑀲𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀣, 𑀉𑀤𑀸𑀳𑀼 𑀤𑀸𑀲𑀺𑀪𑀸𑀯𑀢𑁄 𑀫𑀼𑀘𑁆𑀘𑀺𑀢𑀼𑀁 𑀇𑀘𑁆𑀙𑀣𑀸’’𑀢𑀺. 𑀅𑀚𑁆𑀚𑁂𑀯 𑀫𑀼𑀘𑁆𑀘𑀺𑀢𑀼𑀁 𑀇𑀘𑁆𑀙𑀸𑀫, 𑀅𑀬𑁆𑀬𑁂𑀢𑀺. 𑀬𑀤𑀺 𑀏𑀯𑀁, 𑀫𑀬𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀢𑁆𑀣𑀓𑀫𑁆𑀫𑀁 𑀅𑀮𑀪𑀦𑁆𑀢𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑀸, 𑀢𑀼𑀫𑁆𑀳𑀸𑀓𑀁 𑀲𑀸𑀫𑀺𑀓𑁂𑀳𑀺 𑀏𑀓𑀤𑀺𑀯𑀲𑀁 𑀳𑀢𑁆𑀣𑀓𑀫𑁆𑀫𑀁 𑀤𑀸𑀧𑁂𑀣𑀸𑀢𑀺. 𑀢𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀸𑀬𑀁 𑀅𑀝𑀯𑀺𑀢𑁄 𑀆𑀕𑀢𑀓𑀸𑀮𑁂 𑀲𑀸𑀫𑀺𑀓𑀸𑀦𑀁 𑀆𑀭𑁄𑀘𑁂𑀲𑀼𑀁. 𑀢𑁂 ‘‘𑀲𑀸𑀥𑀽’’𑀢𑀺 𑀚𑁂𑀝𑁆𑀞𑀓𑀤𑀸𑀲𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀁𑀲𑀼.

𑀅𑀣 𑀦𑁂 𑀚𑁂𑀝𑁆𑀞𑀓𑀤𑀸𑀲𑀻 ‘‘𑀲𑁆𑀯𑁂, 𑀢𑀸𑀢𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸’’𑀢𑀺 𑀆𑀦𑀺𑀲𑀁𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀬𑁂𑀧𑀺 𑀦 𑀓𑀸𑀢𑀼𑀓𑀸𑀫𑀸, 𑀢𑁂 𑀕𑀸𑀴𑁆𑀳𑁂𑀦 𑀑𑀯𑀸𑀤𑁂𑀦 𑀢𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀪𑀢𑁆𑀢𑀁 𑀤𑀢𑁆𑀯𑀸 𑀲𑀩𑁆𑀩𑁂𑀲𑀁 𑀤𑀸𑀲𑀧𑀼𑀢𑁆𑀢𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑁂 𑀢𑀸𑀯𑀤𑁂𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀢𑀁 𑀲𑀢𑀁 𑀳𑀼𑀢𑁆𑀯𑀸 𑀏𑀓𑁂𑀓𑀁 𑀓𑀼𑀝𑀺𑀁 𑀘𑀗𑁆𑀓𑀫𑀦𑀸𑀤𑀺𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀫𑀜𑁆𑀘𑀧𑀻𑀞𑀧𑀸𑀦𑀻𑀬-𑀧𑀭𑀺𑀪𑁄𑀚𑀦𑀻𑀬𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀢𑁂𑀫𑀸𑀲𑀁 𑀢𑀢𑁆𑀣𑁂𑀯 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀯𑀸𑀭𑀪𑀺𑀓𑁆𑀔𑀁 𑀧𑀝𑁆𑀞𑀧𑁂𑀲𑀼𑀁. 𑀬𑀸 𑀅𑀢𑁆𑀢𑀦𑁄 𑀯𑀸𑀭𑀤𑀺𑀯𑀲𑁂 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲𑀸 𑀚𑁂𑀝𑁆𑀞𑀓𑀤𑀸𑀲𑀻 𑀲𑀓𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑁂𑀢𑀺. 𑀏𑀯𑀁 𑀢𑁂𑀫𑀸𑀲𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀚𑁂𑀝𑁆𑀞𑀓𑀤𑀸𑀲𑀻 𑀏𑀓𑁂𑀓𑀁 𑀤𑀸𑀲𑀺𑀁 𑀏𑀓𑁂𑀓𑀁 𑀲𑀸𑀝𑀓𑀁 𑀲𑀚𑁆𑀚𑀸𑀧𑁂𑀲𑀺, 𑀧𑀜𑁆𑀘 𑀣𑀽𑀮𑀲𑀸𑀝𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀦𑀺 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀢𑀺𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 𑀅𑀤𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀸𑀲𑀁 𑀧𑀲𑁆𑀲𑀦𑁆𑀢𑀻𑀦𑀁𑀬𑁂𑀯 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀁 𑀅𑀕𑀫𑀁𑀲𑀼.

𑀢𑀸𑀧𑀺 𑀲𑀩𑁆𑀩𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀸𑀲𑀼 𑀚𑁂𑀝𑁆𑀞𑀺𑀓𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑁂 𑀧𑁂𑀲𑀓𑀸𑀭𑀕𑀸𑀫𑁂 𑀧𑁂𑀲𑀓𑀸𑀭𑀚𑁂𑀝𑁆𑀞𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑀸 𑀧𑀜𑁆𑀘𑀲𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑀸 𑀦𑀺𑀫𑀦𑁆𑀢𑀺𑀢𑀸 𑀭𑀸𑀚𑀤𑁆𑀯𑀸𑀭𑀁 𑀆𑀕𑀦𑁆𑀢𑁆𑀯𑀸 𑀓𑀜𑁆𑀘𑀺 𑀑𑀮𑁄𑀓𑁂𑀦𑁆𑀢𑀫𑁆𑀧𑀺 𑀅𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀧𑁂𑀲𑀓𑀸𑀭𑀕𑀸𑀫𑀁 𑀅𑀕𑀫𑀁𑀲𑀼. 𑀲𑀸 𑀇𑀢𑁆𑀣𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀲𑀩𑁆𑀩𑁂 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀅𑀤𑀸𑀲𑀺. 𑀢𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀫𑁂𑀯 𑀅𑀕𑀫𑀁𑀲𑀼.

𑀲𑀸𑀧𑀺 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀤𑁂𑀯𑀤𑀳𑀦𑀕𑀭𑁂 𑀫𑀳𑀸𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀕𑁄𑀢𑀫𑀻𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀫𑀳𑀸𑀫𑀸𑀬𑀸𑀬 𑀓𑀦𑀺𑀝𑁆𑀞𑀪𑀕𑀺𑀦𑀻 𑀳𑁄𑀢𑀺. 𑀫𑀦𑁆𑀢𑀚𑁆𑀛𑀸𑀬𑀓𑀸 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 ‘‘𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀼𑀘𑁆𑀙𑀺𑀬𑀁 𑀯𑀲𑀺𑀢𑀤𑀸𑀭𑀓𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀢𑀸 𑀤𑁆𑀯𑁂𑀧𑀺 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀆𑀦𑁂𑀲𑀺. 𑀅𑀧𑀭𑀪𑀸𑀕𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀧𑀼𑀭𑀸 𑀘𑀯𑀺𑀢𑁆𑀯𑀸 𑀫𑀳𑀸𑀫𑀸𑀬𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀫𑀳𑀸𑀫𑀸𑀬𑀸 𑀢𑀲𑁆𑀲 𑀚𑀸𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀫𑀳𑀸𑀲𑀢𑁆𑀢𑀲𑁆𑀲 𑀫𑀸𑀢𑀼𑀘𑁆𑀙𑀁 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀦𑀦𑁆𑀤𑀓𑀼𑀫𑀸𑀭𑁄 𑀚𑀸𑀢𑁄. 𑀅𑀬𑀁 𑀫𑀳𑀸𑀧𑀚𑀸𑀧𑀢𑀺 𑀦𑀦𑁆𑀤𑀓𑀼𑀫𑀸𑀭𑀁 𑀥𑀸𑀢𑀻𑀦𑀁 𑀤𑀢𑁆𑀯𑀸 𑀲𑀬𑀁 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀧𑀢𑁆𑀯𑀸 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀅𑀦𑁆𑀢𑀭𑀯𑀻𑀣𑀺𑀬𑀁𑀬𑁂𑀯 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀅𑀳𑁄𑀲𑀺. 𑀅𑀣 𑀤𑀼𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑁄 𑀧𑀩𑁆𑀩𑀚𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀳𑀼𑀮𑁄. 𑀲𑀢𑁆𑀣𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀤𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀢𑁄 𑀭𑁄𑀳𑀺𑀡𑀻𑀦𑀤𑀻𑀢𑀻𑀭𑁂 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 (𑀲𑀼. 𑀦𑀺. 𑁮𑁬𑁮 𑀆𑀤𑀬𑁄) 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀼𑀫𑀸𑀭𑀲𑀢𑀸𑀦𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀲𑀩𑁆𑀩𑀸𑀯 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀧𑀚𑀸𑀧𑀢𑀺𑀁 𑀚𑁂𑀝𑁆𑀞𑀺𑀓𑀁 𑀓𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀅𑀬𑀜𑁆𑀘 𑀫𑀳𑀸𑀧𑀚𑀸𑀧𑀢𑀺 𑀧𑀞𑀫𑀫𑁂𑀯 𑀏𑀓𑀯𑀸𑀭𑀁 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀫𑀸𑀦𑀸 𑀦𑀸𑀮𑀢𑁆𑀣, 𑀢𑀲𑁆𑀫𑀸 𑀓𑀧𑁆𑀧𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑁂𑀲𑁂 𑀙𑀺𑀦𑁆𑀦𑀸𑀧𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀲𑀩𑁆𑀩𑀸 𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀆𑀤𑀸𑀬 𑀯𑁂𑀲𑀸𑀮𑀺𑀁 𑀕𑀦𑁆𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀤𑀲𑀩𑀮𑀁 𑀬𑀸𑀘𑀸𑀧𑁂𑀢𑁆𑀯𑀸 𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀅𑀮𑀢𑁆𑀣. 𑀇𑀢𑀭𑀸 𑀧𑀦 𑀲𑀩𑁆𑀩𑀸𑀧𑀺 𑀏𑀓𑀢𑁄𑀯 𑀉𑀧𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 𑀯𑀢𑁆𑀣𑀼 𑀧𑀸𑀴𑀺𑀬𑀁 (𑀘𑀽𑀴𑀯. 𑁪𑁦𑁨 𑀆𑀤𑀬𑁄) 𑀆𑀕𑀢𑀫𑁂𑀯.

𑀏𑀯𑀁 𑀉𑀧𑀲𑀫𑁆𑀧𑀦𑁆𑀦𑀸 𑀧𑀦 𑀫𑀳𑀸𑀧𑀚𑀸𑀧𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁂𑀲𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 (𑀫. 𑀦𑀺. 𑁩.𑁩𑁯𑁮 𑀆𑀤𑀬𑁄) 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀫𑀳𑀸𑀧𑀚𑀸𑀧𑀢𑀺𑀁 𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀔𑁂𑀫𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁬. 𑀤𑀼𑀢𑀺𑀬𑁂 𑀔𑁂𑀫𑀸𑀢𑀺 𑀏𑀯𑀁𑀦𑀸𑀫𑀺𑀓𑀸 𑀪𑀺𑀓𑁆𑀔𑀼𑀦𑀻. 𑀇𑀢𑁄 𑀧𑀝𑁆𑀞𑀸𑀬 𑀘 𑀧𑀦𑀲𑁆𑀲𑀸 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀪𑀺𑀦𑀻𑀳𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀫𑁂𑀯 𑀯𑀓𑁆𑀔𑀸𑀫.

𑀅𑀢𑀻𑀢𑁂 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀅𑀬𑀁 𑀧𑀭𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀺𑀓𑀁 𑀲𑀼𑀚𑀸𑀢𑀢𑁆𑀣𑁂𑀭𑀺𑀁 𑀦𑀸𑀫 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑀬𑁄 𑀫𑁄𑀤𑀓𑁂 𑀤𑀢𑁆𑀯𑀸 𑀢𑀁𑀤𑀺𑀯𑀲𑀫𑁂𑀯 𑀅𑀢𑁆𑀢𑀦𑁄 𑀓𑁂𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀺𑀬𑀸 𑀤𑀸𑀦𑀁 𑀤𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀼𑀫𑁆𑀳𑁂 𑀯𑀺𑀬 𑀫𑀳𑀸𑀧𑀜𑁆𑀜𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑁂𑀳𑁂𑀬𑁂𑀯 𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀢𑀸𑀳𑀺 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀯𑀲𑀦𑀧𑀭𑀺𑀯𑁂𑀡𑀁 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑁂 𑀭𑀸𑀚𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀔𑁂𑀫𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀢𑀲𑁆𑀲𑀸 𑀲𑀭𑀻𑀭𑀯𑀡𑁆𑀡𑁄 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑁄 𑀯𑀺𑀬 𑀅𑀳𑁄𑀲𑀺. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀕𑁂𑀳𑀁 𑀅𑀕𑀫𑀸𑀲𑀺.

𑀲𑀸 𑀢𑀣𑀸𑀕𑀢𑁂 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁂 ‘‘𑀲𑀢𑁆𑀣𑀸 𑀓𑀺𑀭 𑀭𑀽𑀧𑁂 𑀤𑁄𑀲𑀁 𑀤𑀲𑁆𑀲𑁂𑀢𑀻’’𑀢𑀺 𑀭𑀽𑀧𑀫𑀤𑀫𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀫𑀬𑁆𑀳𑀫𑁆𑀧𑀺 𑀭𑀽𑀧𑁂 𑀤𑁄𑀲𑀁 𑀤𑀲𑁆𑀲𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀤𑀲𑀩𑀮𑀁 𑀤𑀲𑁆𑀲𑀦𑀸𑀬 𑀦 𑀕𑀘𑁆𑀙𑀢𑀺. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀢𑁆𑀣𑀼 𑀅𑀕𑁆𑀕𑀼𑀧𑀝𑁆𑀞𑀸𑀓𑁄, 𑀫𑀸𑀤𑀺𑀲𑀲𑁆𑀲 𑀘 𑀦𑀸𑀫 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀤𑀲𑀩𑀮𑀁 𑀤𑀲𑁆𑀲𑀦𑀸𑀬 𑀦 𑀕𑀘𑁆𑀙𑀢𑀺, 𑀦 𑀫𑁂 𑀏𑀢𑀁 𑀭𑀼𑀘𑁆𑀘𑀢𑀻’’𑀢𑀺. 𑀲𑁄 𑀓𑀯𑀻𑀳𑀺 𑀯𑁂𑀴𑀼𑀯𑀦𑀼𑀬𑁆𑀬𑀸𑀦𑀲𑁆𑀲 𑀯𑀡𑁆𑀡𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 ‘‘𑀔𑁂𑀫𑀸𑀬 𑀤𑁂𑀯𑀺𑀬𑀸 𑀲𑀯𑀦𑀽𑀧𑀘𑀸𑀭𑁂 𑀕𑀸𑀬𑀣𑀸’’𑀢𑀺 𑀆𑀳. 𑀲𑀸 𑀉𑀬𑁆𑀬𑀸𑀦𑀲𑁆𑀲 𑀯𑀡𑁆𑀡𑀁 𑀲𑀼𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀭𑀸𑀚𑀸𑀦𑀁 𑀧𑀝𑀺𑀧𑀼𑀘𑁆𑀙𑀺. 𑀭𑀸𑀚𑀸 ‘‘𑀉𑀬𑁆𑀬𑀸𑀦𑀁 𑀕𑀘𑁆𑀙, 𑀲𑀢𑁆𑀣𑀸𑀭𑀁 𑀧𑀦 𑀅𑀤𑀺𑀲𑁆𑀯𑀸 𑀆𑀕𑀦𑁆𑀢𑀼𑀁 𑀦 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑀸 𑀭𑀜𑁆𑀜𑁄 𑀧𑀝𑀺𑀯𑀘𑀦𑀁 𑀅𑀤𑀢𑁆𑀯𑀸𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀭𑀸𑀚𑀸 𑀢𑀸𑀬 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁂 𑀧𑀼𑀭𑀺𑀲𑁂 𑀆𑀳 𑁋 ‘‘𑀲𑀘𑁂 𑀤𑁂𑀯𑀻 𑀉𑀬𑁆𑀬𑀸𑀦𑀢𑁄 𑀦𑀺𑀯𑀢𑁆𑀢𑀫𑀸𑀦𑀸 𑀤𑀲𑀩𑀮𑀁 𑀧𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀲𑀘𑁂 𑀦 𑀧𑀲𑁆𑀲𑀢𑀺, 𑀭𑀸𑀚𑀸𑀡𑀸𑀬 𑀦𑀁 𑀤𑀲𑁆𑀲𑁂𑀣𑀸’’𑀢𑀺. 𑀅𑀣 𑀔𑁄 𑀲𑀸 𑀤𑁂𑀯𑀻 𑀤𑀺𑀯𑀲𑀪𑀸𑀕𑀁 𑀉𑀬𑁆𑀬𑀸𑀦𑁂 𑀘𑀭𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀻 𑀤𑀲𑀩𑀮𑀁 𑀅𑀤𑀺𑀲𑁆𑀯𑀸𑀯 𑀕𑀦𑁆𑀢𑀼𑀁 𑀆𑀭𑀤𑁆𑀥𑀸. 𑀅𑀣 𑀦𑀁 𑀭𑀸𑀚𑀧𑀼𑀭𑀺𑀲𑀸 𑀅𑀢𑁆𑀢𑀦𑁄 𑀅𑀭𑀼𑀘𑀺𑀬𑀸𑀯 𑀤𑁂𑀯𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼.

𑀲𑀢𑁆𑀣𑀸 𑀢𑀁 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 𑀇𑀤𑁆𑀥𑀺𑀬𑀸 𑀏𑀓𑀁 𑀤𑁂𑀯𑀘𑁆𑀙𑀭𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀩𑀻𑀚𑀫𑀸𑀦𑀁 𑀯𑀺𑀬 𑀅𑀓𑀸𑀲𑀺. 𑀔𑁂𑀫𑀸 𑀤𑁂𑀯𑀻 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀸𑀦𑀫𑁆𑀳𑀺 𑀦𑀝𑁆𑀞𑀸, 𑀏𑀯𑀭𑀽𑀧𑀸 𑀦𑀸𑀫 𑀤𑁂𑀯𑀘𑁆𑀙𑀭𑀧𑁆𑀧𑀝𑀺𑀪𑀸𑀕𑀸 𑀇𑀢𑁆𑀣𑀺𑀬𑁄 𑀤𑀲𑀩𑀮𑀲𑁆𑀲 𑀅𑀯𑀺𑀤𑀽𑀭𑁂 𑀢𑀺𑀝𑁆𑀞𑀦𑁆𑀢𑀺, 𑀅𑀳𑀁 𑀏𑀢𑀸𑀲𑀁 𑀧𑀭𑀺𑀘𑀸𑀭𑀺𑀓𑀸𑀧𑀺 𑀦𑀧𑁆𑀧𑀳𑁄𑀫𑀺, 𑀫𑀸𑀦𑀫𑀤𑀁 𑀳𑀺 𑀦𑀺𑀲𑁆𑀲𑀸𑀬 𑀧𑀸𑀧𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀦𑀝𑁆𑀞𑀸’’𑀢𑀺 𑀢𑀁 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀫𑁂𑀯 𑀇𑀢𑁆𑀣𑀺𑀁 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀧𑀲𑁆𑀲𑀦𑁆𑀢𑀺𑀬𑀸𑀯 𑀢𑀣𑀸𑀕𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀲𑀸 𑀇𑀢𑁆𑀣𑀻 𑀧𑀞𑀫𑀯𑀬𑀁 𑀅𑀢𑀺𑀓𑁆𑀓𑀫𑁆𑀫 𑀫𑀚𑁆𑀛𑀺𑀫𑀯𑀬𑁂 𑀞𑀺𑀢𑀸 𑀯𑀺𑀬 𑀫𑀚𑁆𑀛𑀺𑀫𑀯𑀬𑀁 𑀅𑀢𑀺𑀓𑁆𑀓𑀫𑁆𑀫 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑀸 𑀯𑀺𑀬 𑀘 𑀯𑀮𑀺𑀢𑁆𑀢𑀘𑀸 𑀧𑀮𑀺𑀢𑀓𑁂𑀲𑀸 𑀔𑀡𑁆𑀟𑀯𑀺𑀭𑀴𑀤𑀦𑁆𑀢𑀸 𑀅𑀳𑁄𑀲𑀺. 𑀢𑀢𑁄 𑀢𑀲𑁆𑀲𑀸 𑀧𑀲𑁆𑀲𑀦𑁆𑀢𑀺𑀬𑀸𑀯 𑀲𑀤𑁆𑀥𑀺𑀁 𑀢𑀸𑀮𑀯𑀡𑁆𑀝𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀺𑀧𑀢𑀺. 𑀢𑀢𑁄 𑀔𑁂𑀫𑀸 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑁆𑀢𑀸 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁𑀯𑀺𑀥𑀫𑁆𑀧𑀺 𑀦𑀸𑀫 𑀲𑀭𑀻𑀭𑀁 𑀏𑀯𑀭𑀽𑀧𑀁 𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺, 𑀫𑀬𑁆𑀳𑀫𑁆𑀧𑀺 𑀲𑀭𑀻𑀭𑀁 𑀏𑀯𑀁𑀕𑀢𑀺𑀓𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣𑀲𑁆𑀲𑀸 𑀏𑀯𑀁 𑀘𑀺𑀦𑁆𑀢𑀺𑀢𑀓𑁆𑀔𑀡𑁂 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀧𑀤𑁂 𑀕𑀸𑀣𑀫𑀸𑀳 𑁋

‘‘𑀬𑁂 𑀭𑀸𑀕𑀭𑀢𑁆𑀢𑀸𑀦𑀼𑀧𑀢𑀦𑁆𑀢𑀺 𑀲𑁄𑀢𑀁,

𑀲𑀬𑀁𑀓𑀢𑀁 𑀫𑀓𑁆𑀓𑀝𑀓𑁄𑀯 𑀚𑀸𑀮𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸,

𑀅𑀦𑀧𑁂𑀓𑁆𑀔𑀺𑀦𑁄 𑀲𑀩𑁆𑀩𑀤𑀼𑀓𑁆𑀔𑀁 𑀧𑀳𑀸𑀬𑀸’’𑀢𑀺.

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀞𑀺𑀢𑀧𑀤𑁂 𑀞𑀺𑀢𑀸𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀦𑀸𑀫 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀦 𑀢𑀁𑀤𑀺𑀯𑀲𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀁 𑀯𑀸 𑀧𑀩𑁆𑀩𑀚𑀺𑀢𑀩𑁆𑀩𑀁 𑀯𑀸 𑀳𑁄𑀢𑀺, 𑀲𑀸 𑀧𑀦 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀦𑀪𑀺𑀯𑀸𑀤𑁂𑀢𑁆𑀯𑀸𑀯 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀇𑀗𑁆𑀕𑀺𑀢𑁂𑀦𑁂𑀯 𑀅𑀜𑁆𑀜𑀸𑀲𑀺 𑁋 ‘‘𑀅𑀭𑀺𑀬𑀥𑀫𑁆𑀫𑀁 𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑀁 𑀆𑀳 𑁋 ‘‘𑀤𑁂𑀯𑀺 𑀕𑀢𑀸 𑀦𑀼 𑀔𑁄 𑀲𑀢𑁆𑀣𑀼𑀤𑀲𑁆𑀲𑀦𑀸𑀬𑀸’’𑀢𑀺. 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀤𑀲𑁆𑀲𑀦𑀁 𑀧𑀭𑀺𑀢𑁆𑀢𑀁, 𑀅𑀳𑀁 𑀧𑀦 𑀤𑀲𑀩𑀮𑀁 𑀲𑀼𑀤𑀺𑀝𑁆𑀞𑀫𑀓𑀸𑀲𑀺𑀁, 𑀧𑀩𑁆𑀩𑀚𑁆𑀚𑀁 𑀫𑁂 𑀅𑀦𑀼𑀚𑀸𑀦𑀸𑀣𑀸𑀢𑀺. 𑀭𑀸𑀚𑀸 ‘‘𑀲𑀸𑀥𑀼, 𑀤𑁂𑀯𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀉𑀧𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀅𑀣𑀲𑁆𑀲𑀸 ‘‘𑀔𑁂𑀫𑀸𑀣𑁂𑀭𑀻 𑀦𑀸𑀫 𑀕𑀺𑀳𑀺𑀪𑀸𑀯𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸’’𑀢𑀺 𑀫𑀳𑀸𑀧𑀜𑁆𑀜𑀪𑀸𑀯𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀇𑀤𑀫𑁂𑀢𑁆𑀣 𑀯𑀢𑁆𑀣𑀼. 𑀅𑀣 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀔𑁂𑀫𑀸𑀣𑁂𑀭𑀺𑀁 𑀫𑀳𑀸𑀧𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁭. 𑀢𑀢𑀺𑀬𑁂 𑀉𑀧𑁆𑀧𑀮𑀯𑀡𑁆𑀡𑀸𑀢𑀺 𑀦𑀻𑀮𑀼𑀧𑁆𑀧𑀮𑀕𑀩𑁆𑀪𑀲𑀤𑀺𑀲𑁂𑀦𑁂𑀯 𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀸 𑀣𑁂𑀭𑀻. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀇𑀤𑁆𑀥𑀺𑀫𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀺𑀯𑁂𑀡𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸.

𑀢𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑀻 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀲𑀳𑀢𑁆𑀣𑀸 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀦𑀓𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸. 𑀲𑀸 𑀏𑀓𑀤𑀺𑀯𑀲𑀁 𑀔𑁂𑀢𑁆𑀢𑀓𑀼𑀝𑀺𑀁 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀲𑀭𑁂 𑀧𑀸𑀢𑁄𑀯 𑀧𑀼𑀧𑁆𑀨𑀺𑀢𑀁 𑀧𑀤𑀼𑀫𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑀢𑀁 𑀲𑀭𑀁 𑀑𑀭𑀼𑀬𑁆𑀳 𑀢𑀜𑁆𑀘𑁂𑀯 𑀧𑀼𑀧𑁆𑀨𑀁 𑀮𑀸𑀚𑀧𑀓𑁆𑀔𑀺𑀧𑀦𑀢𑁆𑀣𑀸𑀬 𑀧𑀤𑀼𑀫𑀺𑀦𑀺𑀬𑀸 𑀧𑀢𑁆𑀢𑀜𑁆𑀘 𑀕𑀳𑁂𑀢𑁆𑀯𑀸 𑀓𑁂𑀤𑀸𑀭𑁂 𑀲𑀸𑀮𑀺𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀝𑀺𑀓𑀸𑀬 𑀦𑀺𑀲𑀺𑀦𑁆𑀦𑀸 𑀮𑀸𑀚𑁂 𑀪𑀚𑁆𑀚𑀺𑀢𑁆𑀯𑀸 𑀧𑀜𑁆𑀘 𑀮𑀸𑀚𑀲𑀢𑀸𑀦𑀺 𑀕𑀡𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀅𑀯𑀺𑀤𑀽𑀭𑁂 𑀅𑀝𑁆𑀞𑀸𑀲𑀺. 𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀮𑀸𑀚𑁂𑀳𑀺 𑀲𑀤𑁆𑀥𑀺𑀁 𑀧𑀤𑀼𑀫𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀓𑀼𑀝𑀺𑀢𑁄 𑀑𑀭𑀼𑀬𑁆𑀳 𑀮𑀸𑀚𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑁂𑀦 𑀧𑀢𑁆𑀢𑀁 𑀧𑀺𑀥𑀸𑀬 𑀅𑀤𑀸𑀲𑀺. 𑀅𑀣𑀲𑁆𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀣𑁄𑀓𑀁 𑀕𑀢𑁂 𑀏𑀢𑀤𑀳𑁄𑀲𑀺 𑁋 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀧𑀼𑀧𑁆𑀨𑁂𑀦 𑀅𑀦𑀢𑁆𑀣𑀺𑀓𑀸, 𑀅𑀳𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀺𑀴𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑀢𑁄 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂, 𑀅𑀬𑁆𑀬𑁄, 𑀧𑀼𑀧𑁆𑀨𑁂𑀦 𑀅𑀦𑀢𑁆𑀣𑀺𑀓𑁄 𑀅𑀪𑀯𑀺𑀲𑁆𑀲, 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑁂𑀢𑀼𑀁 𑀦 𑀅𑀤𑀲𑁆𑀲, 𑀅𑀤𑁆𑀥𑀸 𑀅𑀬𑁆𑀬𑀲𑁆𑀲 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀕𑀦𑁆𑀢𑁆𑀯𑀸 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀔𑀫𑀸𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑁂𑀲𑀁 𑀫𑁂 𑀮𑀸𑀚𑀸𑀦𑀁 𑀦𑀺𑀲𑁆𑀲𑀦𑁆𑀤𑁂𑀦 𑀮𑀸𑀚𑀕𑀡𑀦𑀸𑀬 𑀧𑀼𑀢𑁆𑀢𑀸 𑀅𑀲𑁆𑀲𑀼, 𑀧𑀤𑀼𑀫𑀧𑀼𑀧𑁆𑀨𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀧𑀤𑁂 𑀧𑀤𑁂 𑀧𑀤𑀼𑀫𑀧𑀼𑀧𑁆𑀨𑀁 𑀉𑀝𑁆𑀞𑀳𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀲𑁆𑀲𑀸 𑀧𑀲𑁆𑀲𑀦𑁆𑀢𑀺𑀬𑀸𑀯 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀤𑀼𑀫𑀁 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀅𑀓𑁆𑀓𑀫𑀦𑀲𑁄𑀧𑀸𑀦𑀲𑀫𑀻𑀧𑁂 𑀧𑀸𑀤𑀧𑀼𑀜𑁆𑀙𑀦𑀁 𑀓𑀢𑁆𑀯𑀸 𑀞𑀧𑁂𑀲𑀺.

𑀲𑀸𑀧𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀤𑁂𑀯𑀮𑁄𑀓𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲𑀸 𑀧𑀤𑁂 𑀧𑀤𑁂 𑀫𑀳𑀸𑀧𑀤𑀼𑀫𑀧𑀼𑀧𑁆𑀨𑀁 𑀉𑀝𑁆𑀞𑀸𑀲𑀺. 𑀲𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀏𑀓𑀲𑁆𑀫𑀺𑀁 𑀧𑀤𑀼𑀫𑀲𑁆𑀲𑀭𑁂 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀦𑀺𑀲𑁆𑀲𑀸𑀬 𑀏𑀓𑁄 𑀢𑀸𑀧𑀲𑁄 𑀯𑀲𑀢𑀺, 𑀲𑁄 𑀧𑀸𑀢𑁄𑀯 𑀫𑀼𑀔𑀥𑁄𑀯𑀦𑀢𑁆𑀣𑀸𑀬 𑀲𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀧𑀼𑀧𑁆𑀨𑀁 𑀲𑁂𑀲𑁂𑀳𑀺 𑀫𑀳𑀦𑁆𑀢𑀢𑀭𑀁, 𑀲𑁂𑀲𑀸𑀦𑀺 𑀘 𑀧𑀼𑀧𑁆𑀨𑀺𑀢𑀸𑀦𑀺, 𑀇𑀤𑀁 𑀫𑀓𑀼𑀴𑀺𑀢𑀫𑁂𑀯, 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑁂𑀦𑀸’’𑀢𑀺 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀢𑀁 𑀧𑀼𑀧𑁆𑀨𑀁 𑀕𑀡𑁆𑀳𑀺. 𑀢𑀁 𑀢𑁂𑀦 𑀕𑀳𑀺𑀢𑀫𑀢𑁆𑀢𑀫𑁂𑀯 𑀧𑀼𑀧𑁆𑀨𑀺𑀢𑀁. 𑀢𑀸𑀧𑀲𑁄 𑀅𑀦𑁆𑀢𑁄𑀧𑀤𑀼𑀫𑀕𑀩𑁆𑀪𑁂 𑀦𑀺𑀧𑀦𑁆𑀦𑀤𑀸𑀭𑀺𑀓𑀁 𑀅𑀤𑁆𑀤𑀲. 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘 𑀥𑀻𑀢𑀼𑀲𑀺𑀦𑁂𑀳𑀁 𑀮𑀪𑀺𑀢𑁆𑀯𑀸 𑀧𑀤𑀼𑀫𑁂𑀦𑁂𑀯 𑀲𑀤𑁆𑀥𑀺𑀁 𑀧𑀡𑁆𑀡𑀲𑀸𑀮𑀁 𑀦𑁂𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀅𑀗𑁆𑀕𑀼𑀝𑁆𑀞𑀓𑁂 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀧𑀼𑀧𑁆𑀨𑁂 𑀫𑀺𑀮𑀸𑀢𑁂 𑀅𑀜𑁆𑀜𑀁 𑀦𑀯𑀧𑀼𑀧𑁆𑀨𑀁 𑀆𑀳𑀭𑀺𑀢𑁆𑀯𑀸 𑀢𑀁 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀅𑀣𑀲𑁆𑀲𑀸 𑀆𑀥𑀸𑀯𑀦𑀯𑀺𑀥𑀸𑀯𑀦𑁂𑀦 𑀓𑀻𑀴𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀧𑀤𑀼𑀫𑀧𑀼𑀧𑁆𑀨𑀁 𑀉𑀝𑁆𑀞𑀸𑀲𑀺, 𑀓𑀼𑀗𑁆𑀓𑀼𑀫𑀭𑀸𑀲𑀺𑀲𑁆𑀲 𑀯𑀺𑀬𑀲𑁆𑀲𑀸 𑀲𑀭𑀻𑀭𑀯𑀡𑁆𑀡𑁄 𑀅𑀳𑁄𑀲𑀺. 𑀲𑀸 𑀅𑀧𑁆𑀧𑀢𑁆𑀢𑀸 𑀤𑁂𑀯𑀯𑀡𑁆𑀡𑀁, 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀯𑀡𑁆𑀡𑀁 𑀅𑀳𑁄𑀲𑀺. 𑀲𑀸 𑀧𑀺𑀢𑀭𑀺 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂 𑀧𑀡𑁆𑀡𑀲𑀸𑀮𑀸𑀬𑀁 𑀑𑀳𑀻𑀬𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀺𑀢𑀭𑀺 𑀨𑀮𑀸𑀨𑀮𑀢𑁆𑀣𑀸𑀬 𑀕𑀢𑁂 𑀏𑀓𑁄 𑀯𑀦𑀘𑀭𑀓𑁄 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀦𑀼𑀲𑁆𑀲𑀸𑀦𑀁 𑀦𑀸𑀫 𑀏𑀯𑀁𑀯𑀺𑀥𑀁 𑀭𑀽𑀧𑀁 𑀦𑀢𑁆𑀣𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀸𑀧𑀲𑀲𑁆𑀲 𑀆𑀕𑀫𑀦𑀁 𑀉𑀤𑀺𑀓𑁆𑀔𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀸 𑀧𑀺𑀢𑀭𑀺 𑀆𑀕𑀘𑁆𑀙𑀦𑁆𑀢𑁂 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀓𑀸𑀚𑀓𑀫𑀡𑁆𑀟𑀮𑀼𑀁 𑀅𑀕𑁆𑀕𑀳𑁂𑀲𑀺, 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀘𑀲𑁆𑀲 𑀅𑀢𑁆𑀢𑀦𑀸 𑀓𑀭𑀡𑀯𑀢𑁆𑀢𑀁 𑀤𑀲𑁆𑀲𑁂𑀲𑀺. 𑀢𑀤𑀸 𑀲𑁄 𑀯𑀦𑀘𑀭𑀓𑁄 𑀫𑀦𑀼𑀲𑁆𑀲𑀪𑀸𑀯𑀁 𑀜𑀢𑁆𑀯𑀸 𑀢𑀸𑀧𑀲𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀸𑀧𑀲𑁄 𑀢𑀁 𑀯𑀦𑀘𑀭𑀓𑀁 𑀯𑀦𑀫𑀽𑀮𑀨𑀮𑀸𑀨𑀮𑁂𑀳𑀺 𑀘 𑀧𑀸𑀦𑀻𑀬𑁂𑀦 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸, ‘‘𑀪𑁄 𑀧𑀼𑀭𑀺𑀲, 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀲𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀕𑀫𑀺𑀲𑀲𑁆𑀲𑀻’’𑀢𑀺 𑀧𑀼𑀘𑁆𑀙𑀺. 𑀕𑀫𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂, 𑀇𑀥 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀇𑀤𑀁 𑀢𑀬𑀸 𑀤𑀺𑀝𑁆𑀞𑀓𑀸𑀭𑀡𑀁 𑀏𑀢𑁆𑀢𑁄 𑀕𑀦𑁆𑀢𑁆𑀯𑀸 𑀅𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺. 𑀲𑀘𑁂, 𑀅𑀬𑁆𑀬𑁄, 𑀦 𑀇𑀘𑁆𑀙𑀢𑀺, 𑀓𑀺𑀁 𑀓𑀸𑀭𑀡𑀸 𑀓𑀣𑁂𑀲𑁆𑀲𑀸𑀫𑀻𑀢𑀺 𑀢𑀸𑀧𑀲𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀆𑀕𑀫𑀦𑀓𑀸𑀮𑁂 𑀫𑀕𑁆𑀕𑀲𑀜𑁆𑀚𑀸𑀦𑀦𑀢𑁆𑀣𑀁 𑀲𑀸𑀔𑀸𑀲𑀜𑁆𑀜𑀜𑁆𑀘 𑀭𑀼𑀓𑁆𑀔𑀲𑀜𑁆𑀜𑀜𑁆𑀘 𑀓𑀭𑁄𑀦𑁆𑀢𑁄 𑀧𑀓𑁆𑀓𑀸𑀫𑀺.

𑀲𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀤𑁆𑀤𑀲, 𑀭𑀸𑀚𑀸 ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀯𑀦𑀘𑀭𑀓𑁄 𑀧𑀩𑁆𑀩𑀢𑀧𑀸𑀤𑁂 𑀅𑀘𑁆𑀙𑀭𑀺𑀬𑀁 𑀇𑀢𑁆𑀣𑀺𑀭𑀢𑀦𑀁 𑀤𑀺𑀲𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀢𑁆𑀯𑀸 𑀯𑀦𑀘𑀭𑀓𑁂𑀦 𑀘𑁂𑀯 𑀅𑀜𑁆𑀜𑁂𑀳𑀺 𑀘 𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀢𑀸𑀧𑀲𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀯𑁂𑀮𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀭𑀸𑀚𑀸 𑀢𑀸𑀧𑀲𑀲𑁆𑀲 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀁 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀓𑀭𑁄𑀫, 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀕𑀘𑁆𑀙, 𑀫𑀳𑀸𑀭𑀸𑀚𑀸𑀢𑀺. 𑀆𑀫, 𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂. 𑀅𑀬𑁆𑀬𑀲𑁆𑀲 𑀧𑀦 𑀲𑀫𑀻𑀧𑁂 𑀯𑀺𑀲𑀪𑀸𑀕𑀧𑀭𑀺𑀲𑀸 𑀅𑀢𑁆𑀣𑀻𑀢𑀺 𑀅𑀲𑁆𑀲𑀼𑀫𑁆𑀳, 𑀅𑀲𑀸𑀭𑀼𑀧𑁆𑀧𑀸 𑀏𑀲𑀸 𑀧𑀩𑁆𑀩𑀚𑀺𑀢𑀸𑀦𑀁, 𑀫𑀬𑀸 𑀲𑀤𑁆𑀥𑀺𑀁 𑀕𑀘𑁆𑀙𑀢𑀼, 𑀪𑀦𑁆𑀢𑁂𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀁 𑀦𑀸𑀫 𑀤𑀼𑀢𑁆𑀢𑁄𑀲𑀬𑀁, 𑀓𑀣𑀁 𑀩𑀳𑀽𑀦𑀁 𑀫𑀚𑁆𑀛𑁂 𑀯𑀲𑀺𑀲𑁆𑀲𑀢𑀻𑀢𑀺. 𑀅𑀫𑁆𑀳𑀸𑀓𑀁 𑀭𑀼𑀘𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀲𑀸𑀦𑀁 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺.

𑀲𑁄 𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 𑀤𑀳𑀭𑀓𑀸𑀮𑁂 𑀕𑀳𑀺𑀢𑀦𑀸𑀫𑀯𑀲𑁂𑀦𑁂𑀯, ‘‘𑀅𑀫𑁆𑀫, 𑀧𑀤𑀼𑀫𑀯𑀢𑀻’’𑀢𑀺 𑀥𑀻𑀢𑀭𑀁 𑀧𑀓𑁆𑀓𑁄𑀲𑀺. 𑀲𑀸 𑀏𑀓𑀯𑀘𑀦𑁂𑀦𑁂𑀯 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀺𑀢𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀧𑀺𑀢𑀸 𑀆𑀳 𑁋 ‘‘𑀢𑁆𑀯𑀁, 𑀅𑀫𑁆𑀫, 𑀯𑀬𑀧𑁆𑀧𑀢𑁆𑀢𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀭𑀜𑁆𑀜𑀸 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀲𑀺𑀢𑀼𑀁 𑀅𑀬𑀼𑀢𑁆𑀢𑀸, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀘𑁆𑀙, 𑀅𑀫𑁆𑀫𑀸’’𑀢𑀺. 𑀲𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀧𑀺𑀢𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀭𑁄𑀤𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀇𑀫𑀺𑀲𑁆𑀲𑀸 𑀧𑀺𑀢𑀼 𑀘𑀺𑀢𑁆𑀢𑀁 𑀕𑀡𑁆𑀳𑀸𑀫𑀻’’𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀓𑀳𑀸𑀧𑀡𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀅𑀪𑀺𑀲𑁂𑀓𑀁 𑀅𑀓𑀸𑀲𑀺. 𑀅𑀣 𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀆𑀦𑁂𑀢𑁆𑀯𑀸 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁂𑀲𑀇𑀢𑁆𑀣𑀺𑀬𑁄 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁𑀬𑁂𑀯 𑀭𑀫𑀢𑀺. 𑀢𑀸 𑀇𑀢𑁆𑀣𑀺𑀬𑁄 𑀇𑀲𑁆𑀲𑀸𑀧𑀓𑀢𑀸 𑀢𑀁 𑀭𑀜𑁆𑀜𑁄 𑀅𑀦𑁆𑀢𑀭𑁂 𑀧𑀭𑀺𑀪𑀺𑀦𑁆𑀤𑀺𑀢𑀼𑀓𑀸𑀫𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀦𑀸𑀬𑀁, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀓𑀳𑀁 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀫𑀦𑀼𑀲𑁆𑀲𑀸𑀦𑀁 𑀯𑀺𑀘𑀭𑀡𑀝𑁆𑀞𑀸𑀦𑁂 𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀦𑁆𑀢𑀸𑀦𑀺 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀺, 𑀅𑀤𑁆𑀥𑀸 𑀅𑀬𑀁 𑀬𑀓𑁆𑀔𑀺𑀦𑀻, 𑀦𑀻𑀳𑀭𑀣 𑀦𑀁 𑀫𑀳𑀸𑀭𑀸𑀚𑀸’’𑀢𑀺. 𑀭𑀸𑀚𑀸 𑀢𑀸𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀅𑀣𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀲𑁄 ‘‘𑀕𑀭𑀼𑀕𑀩𑁆𑀪𑀸 𑀧𑀤𑀼𑀫𑀯𑀢𑀻’’𑀢𑀺 𑀢𑀁 𑀦𑀕𑀭𑁂 𑀞𑀧𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀅𑀕𑀫𑀸𑀲𑀺. 𑀅𑀣 𑀢𑀸 𑀇𑀢𑁆𑀣𑀺𑀬𑁄 𑀢𑀲𑁆𑀲𑀸 𑀉𑀧𑀝𑁆𑀞𑀸𑀬𑀺𑀓𑀸𑀬 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀤𑀸𑀭𑀓𑀁 𑀚𑀸𑀢𑀫𑀢𑁆𑀢𑀫𑁂𑀯 𑀅𑀧𑀦𑁂𑀢𑁆𑀯𑀸 𑀏𑀓𑀁 𑀤𑀸𑀭𑀼𑀖𑀝𑀺𑀓𑀁 𑀮𑁄𑀳𑀺𑀢𑁂𑀦 𑀫𑀓𑁆𑀔𑁂𑀢𑁆𑀯𑀸 𑀲𑀦𑁆𑀢𑀺𑀓𑁂 𑀞𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀧𑀤𑀼𑀫𑀯𑀢𑀺𑀬𑀸𑀧𑀺 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁄 𑀏𑀓𑀓𑁄𑀯 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀯𑀲𑁂𑀲𑀸 𑀏𑀓𑀽𑀦𑀧𑀜𑁆𑀘𑀲𑀢𑀸 𑀤𑀸𑀭𑀓𑀸 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀧𑀦𑁆𑀦𑀓𑀸𑀮𑁂 𑀲𑀁𑀲𑁂𑀤𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀅𑀣𑀲𑁆𑀲 ‘‘𑀦 𑀢𑀸𑀯𑀸𑀬𑀁 𑀲𑀢𑀺𑀁 𑀧𑀝𑀺𑀮𑀪𑀢𑀻’’𑀢𑀺 𑀜𑀢𑁆𑀯𑀸 𑀉𑀧𑀝𑁆𑀞𑀸𑀬𑀺𑀓𑀸 𑀏𑀓𑀁 𑀤𑀸𑀭𑀼𑀖𑀝𑀺𑀓𑀁 𑀮𑁄𑀳𑀺𑀢𑁂𑀦 𑀫𑀓𑁆𑀔𑁂𑀢𑁆𑀯𑀸 𑀲𑀫𑀻𑀧𑁂 𑀞𑀧𑁂𑀢𑁆𑀯𑀸 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑀸 𑀧𑀜𑁆𑀘𑀲𑀢𑀸𑀧𑀺 𑀇𑀢𑁆𑀣𑀺𑀬𑁄 𑀏𑀓𑁂𑀓𑀸 𑀏𑀓𑁂𑀓𑀁 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 𑀘𑀼𑀦𑁆𑀤𑀓𑀸𑀭𑀓𑀸𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀓𑀭𑀡𑁆𑀟𑀓𑁂 𑀆𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀕𑀳𑀺𑀢𑀤𑀸𑀭𑀓𑁂 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀩𑀳𑀺 𑀮𑀜𑁆𑀙𑀦𑀁 𑀓𑀢𑁆𑀯𑀸 𑀞𑀧𑀬𑀺𑀁𑀲𑀼.

𑀧𑀤𑀼𑀫𑀯𑀢𑀻𑀧𑀺 𑀔𑁄 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸 𑀢𑀁 𑀉𑀧𑀝𑁆𑀞𑀸𑀬𑀺𑀓𑀁 ‘‘𑀓𑀺𑀁 𑀯𑀺𑀚𑀸𑀢𑀫𑁆𑀳𑀺, 𑀅𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 ‘‘𑀓𑀼𑀢𑁄 𑀢𑁆𑀯𑀁 𑀤𑀸𑀭𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀅𑀬𑀁 𑀢𑁂 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀤𑀸𑀭𑀓𑁄’’𑀢𑀺 𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀤𑀸𑀭𑀼𑀖𑀝𑀺𑀓𑀁 𑀧𑀼𑀭𑀢𑁄 𑀞𑀧𑁂𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 ‘‘𑀲𑀻𑀖𑀁 𑀦𑀁 𑀨𑀸𑀮𑁂𑀢𑁆𑀯𑀸 𑀅𑀧𑀦𑁂𑀳𑀺, 𑀲𑀘𑁂 𑀓𑁄𑀘𑀺 𑀧𑀲𑁆𑀲𑁂𑀬𑁆𑀬 𑀮𑀚𑁆𑀚𑀺𑀢𑀩𑁆𑀩𑀁 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀲𑀸 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀣𑀓𑀸𑀫𑀸 𑀯𑀺𑀬 𑀤𑀸𑀭𑀼𑀖𑀝𑀺𑀓𑀁 𑀨𑀸𑀮𑁂𑀢𑁆𑀯𑀸 𑀉𑀤𑁆𑀥𑀦𑁂 𑀧𑀓𑁆𑀔𑀺𑀧𑀺.

𑀭𑀸𑀚𑀸𑀧𑀺 𑀧𑀘𑁆𑀘𑀦𑁆𑀢𑀢𑁄 𑀆𑀕𑀦𑁆𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑁄 𑀩𑀳𑀺𑀦𑀕𑀭𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀭𑀜𑁆𑀜𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀆𑀕𑀦𑁆𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀢𑁆𑀯𑀁, 𑀫𑀳𑀸𑀭𑀸𑀚, 𑀦 𑀅𑀫𑁆𑀳𑀸𑀓𑀁 𑀲𑀤𑁆𑀤𑀳𑀲𑀺, 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 𑀅𑀓𑀸𑀭𑀡𑀁 𑀯𑀺𑀬 𑀳𑁄𑀢𑀺. 𑀢𑁆𑀯𑀁 𑀫𑀳𑁂𑀲𑀺𑀬𑀸 𑀉𑀧𑀝𑁆𑀞𑀸𑀬𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀝𑀺𑀧𑀼𑀘𑁆𑀙, 𑀤𑀸𑀭𑀼𑀖𑀝𑀺𑀓𑀁 𑀢𑁂 𑀤𑁂𑀯𑀻 𑀯𑀺𑀚𑀸𑀢𑀸’’𑀢𑀺. 𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀦 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 ‘‘𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀕𑁂𑀳𑀢𑁄 𑀦𑀺𑀓𑁆𑀓𑀟𑁆𑀠𑀺. 𑀢𑀲𑁆𑀲𑀸 𑀭𑀸𑀚𑀕𑁂𑀳𑀢𑁄 𑀲𑀳 𑀦𑀺𑀓𑁆𑀔𑀫𑀦𑁂𑀦𑁂𑀯 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀅𑀦𑁆𑀢𑀭𑀥𑀸𑀬𑀺𑀁𑀲𑀼, 𑀲𑀭𑀻𑀭𑀘𑁆𑀙𑀯𑀺𑀧𑀺 𑀯𑀺𑀯𑀡𑁆𑀡𑀸 𑀅𑀳𑁄𑀲𑀺. 𑀲𑀸 𑀏𑀓𑀺𑀓𑀸𑀯 𑀅𑀦𑁆𑀢𑀭𑀯𑀻𑀣𑀺𑀬𑀸 𑀧𑀸𑀬𑀸𑀲𑀺. 𑀅𑀣 𑀦𑀁 𑀏𑀓𑀸 𑀯𑀬𑀧𑁆𑀧𑀢𑁆𑀢𑀸 𑀫𑀳𑀮𑁆𑀮𑀺𑀓𑀸 𑀇𑀢𑁆𑀣𑀻 𑀤𑀺𑀲𑁆𑀯𑀸 𑀥𑀻𑀢𑀼𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀲𑀺 𑀅𑀫𑁆𑀫𑀸’’𑀢𑀺 𑀆𑀳. 𑀆𑀕𑀦𑁆𑀢𑀼𑀓𑀫𑁆𑀳𑀺, 𑀯𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀻 𑀯𑀺𑀘𑀭𑀸𑀫𑀻𑀢𑀺. 𑀇𑀥𑀸𑀕𑀘𑁆𑀙, 𑀅𑀫𑁆𑀫𑀸𑀢𑀺 𑀯𑀲𑀦𑀝𑁆𑀞𑀸𑀦𑀁 𑀤𑀢𑁆𑀯𑀸 𑀪𑁄𑀚𑀦𑀁 𑀧𑀝𑀺𑀬𑀸𑀤𑁂𑀲𑀺.

𑀢𑀲𑁆𑀲𑀸 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀢𑀢𑁆𑀣 𑀯𑀲𑀫𑀸𑀦𑀸𑀬 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂𑀲𑀼 𑀬𑀼𑀤𑁆𑀥𑀁 𑀕𑀢𑁂𑀲𑀼 𑀅𑀫𑁆𑀳𑁂𑀳𑀺 𑀕𑀗𑁆𑀕𑀸𑀤𑁂𑀯𑀢𑀸𑀬 ‘𑀅𑀫𑁆𑀳𑀸𑀓𑀁 𑀤𑁂𑀯𑁂 𑀯𑀺𑀚𑀺𑀢𑀲𑀗𑁆𑀕𑀸𑀫𑁂 𑀆𑀕𑀢𑁂 𑀩𑀮𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀧𑀢𑁆𑀣𑀺𑀢𑀁 𑀅𑀢𑁆𑀣𑀺, 𑀏𑀢𑀫𑀢𑁆𑀣𑀁, 𑀤𑁂𑀯, 𑀚𑀸𑀦𑀸𑀧𑁂𑀫𑀸’’𑀢𑀺. 𑀭𑀸𑀚𑀸 𑀢𑀸𑀲𑀁 𑀯𑀘𑀦𑁂𑀦 𑀢𑀼𑀝𑁆𑀞𑁄 𑀕𑀗𑁆𑀕𑀸𑀬𑀁 𑀉𑀤𑀓𑀓𑀻𑀴𑀁 𑀓𑀸𑀢𑀼𑀁 𑀅𑀕𑀫𑀸𑀲𑀺. 𑀢𑀸𑀧𑀺 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀓𑀭𑀡𑁆𑀟𑀓𑀁 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀆𑀤𑀸𑀬 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀓𑀭𑀡𑁆𑀟𑀓𑀸𑀦𑀁 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀉𑀤𑀓𑁂 𑀧𑀢𑀺𑀢𑁆𑀯𑀸 𑀓𑀭𑀡𑁆𑀟𑀓𑁂 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑁂𑀧𑀺 𑀔𑁄 𑀓𑀭𑀡𑁆𑀟𑀓𑀸 𑀲𑀩𑁆𑀩𑁂 𑀲𑀳 𑀕𑀦𑁆𑀢𑁆𑀯𑀸 𑀳𑁂𑀝𑁆𑀞𑀸𑀲𑁄𑀢𑁂 𑀧𑀲𑀸𑀭𑀺𑀢𑀚𑀸𑀮𑀫𑁆𑀳𑀺 𑀮𑀕𑁆𑀕𑀺𑀁𑀲𑀼. 𑀢𑀢𑁄 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀭𑀜𑁆𑀜𑁄 𑀉𑀢𑁆𑀢𑀺𑀡𑁆𑀡𑀓𑀸𑀮𑁂 𑀚𑀸𑀮𑀁 𑀉𑀓𑁆𑀔𑀺𑀧𑀦𑁆𑀢𑀸 𑀢𑁂 𑀓𑀭𑀡𑁆𑀟𑀓𑁂 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀦𑀬𑀺𑀁𑀲𑀼. 𑀭𑀸𑀚𑀸 𑀓𑀭𑀡𑁆𑀟𑀓𑁂 𑀤𑀺𑀲𑁆𑀯𑀸 ‘‘𑀓𑀺𑀁, 𑀢𑀸𑀢𑀸, 𑀓𑀭𑀡𑁆𑀟𑀓𑁂𑀲𑀽’’𑀢𑀺 𑀆𑀳. 𑀦 𑀚𑀸𑀦𑀸𑀫, 𑀤𑁂𑀯𑀸𑀢𑀺. 𑀲𑁄 𑀢𑁂 𑀓𑀭𑀡𑁆𑀟𑀓𑁂 𑀯𑀺𑀯𑀭𑀸𑀧𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀞𑀫𑀁 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀲𑁆𑀲 𑀓𑀭𑀡𑁆𑀟𑀓𑀁 𑀯𑀺𑀯𑀭𑀸𑀧𑁂𑀲𑀺. 𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀓𑀭𑀡𑁆𑀟𑀓𑁂𑀲𑀼 𑀦𑀺𑀧𑀚𑁆𑀚𑀸𑀧𑀺𑀢𑀤𑀺𑀯𑀲𑁂𑀬𑁂𑀯 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀅𑀗𑁆𑀕𑀼𑀝𑁆𑀞𑀢𑁄 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀢𑀲𑁆𑀲 𑀭𑀜𑁆𑀜𑁄 𑀦𑀺𑀓𑁆𑀓𑀗𑁆𑀔𑀪𑀸𑀯𑀢𑁆𑀣𑀁 𑀅𑀦𑁆𑀢𑁄𑀓𑀭𑀡𑁆𑀟𑀓𑁂 𑀅𑀓𑁆𑀔𑀭𑀸𑀦𑀺 𑀮𑀺𑀔𑀸𑀧𑁂𑀲𑀺 ‘‘𑀇𑀫𑁂 𑀓𑀼𑀫𑀸𑀭𑀸 𑀧𑀤𑀼𑀫𑀯𑀢𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑀸, 𑀅𑀣 𑀦𑁂 𑀧𑀤𑀼𑀫𑀯𑀢𑀺𑀬𑀸 𑀲𑀧𑀢𑁆𑀢𑀺𑀬𑁄 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀓𑀭𑀡𑁆𑀟𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀓𑁂 𑀔𑀺𑀧𑀺𑀁𑀲𑀼, 𑀭𑀸𑀚𑀸 𑀇𑀫𑀁 𑀓𑀸𑀭𑀡𑀁 𑀚𑀸𑀦𑀸𑀢𑀽’’𑀢𑀺. 𑀓𑀭𑀡𑁆𑀟𑀓𑁂 𑀯𑀺𑀯𑀭𑀺𑀢𑀫𑀢𑁆𑀢𑁂 𑀭𑀸𑀚𑀸 𑀅𑀓𑁆𑀔𑀭𑀸𑀦𑀺 𑀯𑀸𑀘𑁂𑀢𑁆𑀯𑀸 𑀤𑀸𑀭𑀓𑁂 𑀤𑀺𑀲𑁆𑀯𑀸 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀯𑁂𑀕𑁂𑀦 𑀭𑀣𑁂 𑀬𑁄𑀚𑁂𑀣, 𑀅𑀲𑁆𑀲𑁂 𑀓𑀧𑁆𑀧𑁂𑀣, 𑀅𑀳𑀁 𑀅𑀚𑁆𑀚 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀘𑁆𑀘𑀸𑀦𑀁 𑀫𑀸𑀢𑀼𑀕𑀸𑀫𑀸𑀦𑀁 𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀳𑀢𑁆𑀣𑀺𑀕𑀻𑀯𑀸𑀬 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀞𑀧𑁂𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 ‘‘𑀬𑁄 𑀧𑀤𑀼𑀫𑀯𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀇𑀫𑀁 𑀲𑀳𑀲𑁆𑀲𑀁 𑀕𑀡𑁆𑀳𑀢𑀽’’𑀢𑀺.

𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀤𑀼𑀫𑀯𑀢𑀻 𑀫𑀸𑀢𑀼𑀬𑀸 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀳𑀢𑁆𑀣𑀺𑀕𑀻𑀯𑀢𑁄 𑀲𑀳𑀲𑁆𑀲𑀁 𑀕𑀡𑁆𑀳, 𑀅𑀫𑁆𑀫𑀸’’𑀢𑀺. 𑀅𑀳𑀁 𑀏𑀯𑀭𑀽𑀧𑀁 𑀕𑀡𑁆𑀳𑀺𑀢𑀼𑀁 𑀦 𑀯𑀺𑀲𑀳𑀸𑀫𑀻𑀢𑀺. 𑀲𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀯𑀼𑀢𑁆𑀢𑁂, ‘‘𑀓𑀺𑀁 𑀯𑀢𑁆𑀯𑀸 𑀕𑀡𑁆𑀳𑀸𑀫𑀺 𑀅𑀫𑁆𑀫𑀸’’𑀢𑀺 𑀆𑀳. ‘‘𑀫𑀫 𑀥𑀻𑀢𑀸, 𑀧𑀤𑀼𑀫𑀯𑀢𑀺𑀁 𑀤𑁂𑀯𑀺𑀁 𑀧𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀸𑀳𑀻𑀢𑀺. 𑀲𑀸 ‘‘𑀬𑀁 𑀯𑀸 𑀢𑀁 𑀯𑀸 𑀳𑁄𑀢𑀽’’𑀢𑀺 𑀕𑀦𑁆𑀢𑁆𑀯𑀸 𑀲𑀳𑀲𑁆𑀲𑀘𑀗𑁆𑀓𑁄𑀝𑀓𑀁 𑀕𑀡𑁆𑀳𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀧𑀤𑀼𑀫𑀯𑀢𑀺𑀁 𑀤𑁂𑀯𑀺𑀁 𑀧𑀲𑁆𑀲𑀲𑀺, 𑀅𑀫𑁆𑀫𑀸’’𑀢𑀺. ‘‘𑀅𑀳𑀁 𑀦 𑀧𑀲𑁆𑀲𑀸𑀫𑀺, 𑀥𑀻𑀢𑀸 𑀓𑀺𑀭 𑀫𑁂 𑀧𑀲𑁆𑀲𑀢𑀻’’𑀢𑀺 𑀆𑀳. 𑀢𑁂 ‘‘𑀓𑀳𑀁 𑀧𑀦 𑀲𑀸, 𑀅𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀤𑀼𑀫𑀯𑀢𑀺𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸 ‘‘𑀧𑀤𑀼𑀫𑀯𑀢𑀻 𑀤𑁂𑀯𑀻 𑀅𑀬’’𑀦𑁆𑀢𑀺 𑀜𑀢𑁆𑀯𑀸 ‘‘𑀪𑀸𑀭𑀺𑀬𑀁 𑀯𑀢 𑀇𑀢𑁆𑀣𑀺𑀬𑀸 𑀓𑀫𑁆𑀫𑀁 𑀓𑀢𑀁, 𑀬𑀸 𑀏𑀯𑀁𑀯𑀺𑀥𑀲𑁆𑀲 𑀭𑀜𑁆𑀜𑁄 𑀫𑀳𑁂𑀲𑀻 𑀲𑀫𑀸𑀦𑀸 𑀏𑀯𑀭𑀽𑀧𑁂 𑀞𑀸𑀦𑁂 𑀦𑀺𑀭𑀸𑀭𑀓𑁆𑀔𑀸 𑀯𑀲𑀻’’𑀢𑀺 𑀆𑀳. 𑀢𑁂𑀧𑀺 𑀭𑀸𑀚𑀧𑀼𑀭𑀺𑀲𑀸 𑀧𑀤𑀼𑀫𑀯𑀢𑀺𑀬𑀸 𑀦𑀺𑀯𑁂𑀲𑀦𑀁 𑀲𑁂𑀢𑀲𑀸𑀡𑀻𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑁂 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀼𑀯𑀡𑁆𑀡𑀲𑀺𑀯𑀺𑀓𑀁 𑀧𑁂𑀲𑁂𑀲𑀺. 𑀲𑀸 ‘‘𑀅𑀳𑀁 𑀏𑀯𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀫𑀫 𑀯𑀲𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀭𑀸𑀚𑀕𑁂𑀳𑀁 𑀏𑀢𑁆𑀣𑀦𑁆𑀢𑀭𑁂 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑁂 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀯𑀺𑀘𑀺𑀢𑁆𑀢𑀁 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀧𑀲𑀸𑀥𑀦𑀢𑁆𑀣𑀸𑀬 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀲𑀼 𑀧𑀳𑀺𑀢𑁂𑀲𑀼 𑀧𑀤𑀲𑀸𑀯 𑀕𑀫𑀺𑀲𑁆𑀲𑀸𑀫𑀺, 𑀏𑀯𑀁 𑀫𑁂 𑀦𑀸𑀕𑀭𑀸 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀭𑀸𑀚𑀸 ‘‘𑀧𑀤𑀼𑀫𑀯𑀢𑀺𑀬𑀸 𑀬𑀣𑀸𑀭𑀼𑀘𑀺𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑀢𑁄 𑀧𑀤𑀼𑀫𑀯𑀢𑀻 𑀲𑀩𑁆𑀩𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 ‘‘𑀭𑀸𑀚𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀣𑀲𑁆𑀲𑀸 𑀅𑀓𑁆𑀓𑀦𑁆𑀢𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀯𑀭𑀧𑁄𑀢𑁆𑀣𑀓𑀘𑀺𑀢𑁆𑀢𑀢𑁆𑀣𑀭𑀡𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀲𑀸 𑀫𑀳𑀸𑀚𑀦𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀁 𑀆𑀭𑀼𑀬𑁆𑀳 𑀲𑀩𑁆𑀩𑁂 𑀘𑀺𑀢𑁆𑀢𑀢𑁆𑀣𑀭𑀡𑁂 𑀢𑀲𑁆𑀲𑀸 𑀫𑀳𑀮𑁆𑀮𑀺𑀓𑀸𑀬 𑀧𑁄𑀲𑀸𑀯𑀦𑀺𑀓𑀫𑀽𑀮𑀁 𑀓𑀢𑁆𑀯𑀸 𑀤𑀸𑀧𑁂𑀲𑀺.

𑀭𑀸𑀚𑀸𑀧𑀺 𑀔𑁄 𑀢𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀸𑀬𑁄 𑀢𑁂 𑀤𑁂𑀯𑀺 𑀤𑀸𑀲𑀺𑀬𑁄 𑀓𑀢𑁆𑀯𑀸 𑀤𑁂𑀫𑀻’’𑀢𑀺 𑀆𑀳. 𑀲𑀸𑀥𑀼, 𑀫𑀳𑀸𑀭𑀸𑀚, 𑀏𑀢𑀸𑀲𑀁 𑀫𑀬𑁆𑀳𑀁 𑀤𑀺𑀦𑁆𑀦𑀪𑀸𑀯𑀁 𑀲𑀓𑀮𑀦𑀕𑀭𑁂 𑀚𑀸𑀦𑀸𑀧𑁂𑀳𑀻𑀢𑀺. 𑀭𑀸𑀚𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀧𑀤𑀼𑀫𑀯𑀢𑀺𑀬𑀸 𑀤𑀽𑀩𑁆𑀪𑀺𑀓𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀏𑀢𑀺𑀲𑁆𑀲𑀸 𑀏𑀯 𑀤𑀸𑀲𑀺𑀬𑁄 𑀓𑀢𑁆𑀯𑀸 𑀤𑀺𑀦𑁆𑀦𑀸’’𑀢𑀺. 𑀲𑀸 ‘‘𑀢𑀸𑀲𑀁 𑀲𑀓𑀮𑀦𑀕𑀭𑁂𑀦 𑀤𑀸𑀲𑀺𑀪𑀸𑀯𑁄 𑀲𑀮𑁆𑀮𑀓𑁆𑀔𑀺𑀢𑁄’’𑀢𑀺 𑀜𑀢𑁆𑀯𑀸 ‘‘𑀅𑀳𑀁 𑀫𑀫 𑀤𑀸𑀲𑀺𑀬𑁄 𑀪𑀼𑀚𑀺𑀲𑁆𑀲𑀸 𑀓𑀸𑀢𑀼𑀁 𑀮𑀪𑀸𑀫𑀺 𑀤𑁂𑀯𑀸’’𑀢𑀺 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺. 𑀢𑀯 𑀇𑀘𑁆𑀙𑀸 𑀤𑁂𑀯𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀢𑀫𑁂𑀯 𑀪𑁂𑀭𑀺𑀘𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀧𑀤𑀼𑀫𑀯𑀢𑀺𑀤𑁂𑀯𑀺𑀬𑀸 𑀅𑀢𑁆𑀢𑀦𑁄 𑀤𑀸𑀲𑀺𑀬𑁄 𑀓𑀢𑁆𑀯𑀸 𑀤𑀺𑀦𑁆𑀦𑀸 𑀧𑀜𑁆𑀘𑀲𑀢𑀸 𑀇𑀢𑁆𑀣𑀺𑀬𑁄 𑀲𑀩𑁆𑀩𑀸𑀯 𑀪𑀼𑀚𑀺𑀲𑁆𑀲𑀸 𑀓𑀢𑀸𑀢𑀺 𑀧𑀼𑀦 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸’’𑀢𑀺 𑀆𑀳. 𑀲𑀸 𑀢𑀸𑀲𑀁 𑀪𑀼𑀚𑀺𑀲𑁆𑀲𑀪𑀸𑀯𑁂 𑀓𑀢𑁂 𑀏𑀓𑀽𑀦𑀸𑀦𑀺 𑀧𑀜𑁆𑀘𑀲𑀢𑁆𑀢𑀧𑀼𑀢𑁆𑀢𑀸𑀦𑀺 𑀢𑀸𑀲𑀁𑀬𑁂𑀯 𑀳𑀢𑁆𑀣𑁂 𑀧𑁄𑀲𑀦𑀢𑁆𑀣𑀸𑀬 𑀤𑀢𑁆𑀯𑀸 𑀲𑀬𑀁 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀁𑀬𑁂𑀯 𑀕𑀡𑁆𑀳𑀺.

𑀅𑀣 𑀅𑀧𑀭𑀪𑀸𑀕𑁂 𑀢𑁂𑀲𑀁 𑀓𑀼𑀫𑀸𑀭𑀸𑀦𑀁 𑀓𑀻𑀴𑀦𑀯𑀬𑁂 𑀲𑀫𑁆𑀧𑀢𑁆𑀢𑁂 𑀭𑀸𑀚𑀸 𑀉𑀬𑁆𑀬𑀸𑀦𑁂 𑀦𑀸𑀦𑀸𑀯𑀺𑀥𑀁 𑀓𑀻𑀴𑀦𑀝𑁆𑀞𑀸𑀦𑀁 𑀓𑀸𑀭𑁂𑀲𑀺. 𑀢𑁂 𑀅𑀢𑁆𑀢𑀦𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀓𑀸𑀮𑁂 𑀲𑀩𑁆𑀩𑁂𑀯 𑀏𑀓𑀢𑁄 𑀳𑀼𑀢𑁆𑀯𑀸 𑀉𑀬𑁆𑀬𑀸𑀦𑁂 𑀧𑀤𑀼𑀫𑀲𑀜𑁆𑀙𑀦𑁆𑀦𑀸𑀬 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀬𑀸 𑀓𑀻𑀴𑀦𑁆𑀢𑀸 𑀦𑀯𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀢𑀸𑀦𑀺 𑀧𑀼𑀭𑀸𑀡𑀧𑀤𑀼𑀫𑀸𑀦𑀺 𑀘 𑀯𑀡𑁆𑀝𑀢𑁄 𑀧𑀢𑀦𑁆𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀢𑀸𑀯 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑁆𑀲 𑀏𑀯𑀭𑀽𑀧𑀸 𑀚𑀭𑀸 𑀧𑀸𑀧𑀼𑀡𑀸𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀫𑁆𑀳𑀸𑀓𑀁 𑀲𑀭𑀻𑀭𑀲𑁆𑀲. 𑀇𑀤𑀫𑁆𑀧𑀺 𑀳𑀺 𑀏𑀯𑀁𑀕𑀢𑀺𑀓𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀯 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀤𑀼𑀫𑀓𑀡𑁆𑀡𑀺𑀓𑀸𑀲𑀼 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑀸 𑀭𑀸𑀚𑀧𑀼𑀭𑀺𑀲𑀸 𑀩𑀳𑀼𑀕𑀢𑀁 𑀤𑀺𑀯𑀲𑀁 𑀜𑀢𑁆𑀯𑀸 ‘‘𑀅𑀬𑁆𑀬𑀧𑀼𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀯𑁂𑀮𑀁 𑀚𑀸𑀦𑀸𑀣𑀸’’𑀢𑀺 𑀆𑀳𑀁𑀲𑀼. 𑀢𑁂 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀢𑁂 𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀼𑀫𑀸𑀭𑀸 𑀤𑁂𑀯, 𑀧𑀤𑀼𑀫𑀓𑀡𑁆𑀡𑀺𑀓𑀸𑀲𑀼 𑀦𑀺𑀲𑀺𑀦𑁆𑀦𑀸, 𑀅𑀫𑁆𑀳𑁂𑀲𑀼 𑀓𑀣𑁂𑀦𑁆𑀢𑁂𑀲𑀼𑀧𑀺 𑀯𑀘𑀻𑀪𑁂𑀤𑀁 𑀦 𑀓𑀭𑁄𑀦𑁆𑀢𑀻’’𑀢𑀺. 𑀬𑀣𑀸𑀭𑀼𑀘𑀺𑀬𑀸 𑀢𑁂𑀲𑀁 𑀦𑀺𑀲𑀻𑀤𑀺𑀢𑀼𑀁 𑀤𑁂𑀣𑀸𑀢𑀺. 𑀢𑁂 𑀲𑀩𑁆𑀩𑀭𑀢𑁆𑀢𑀺𑀁 𑀕𑀳𑀺𑀢𑀸𑀭𑀓𑁆𑀔𑀸 𑀧𑀤𑀼𑀫𑀓𑀡𑁆𑀡𑀺𑀓𑀸𑀲𑀼 𑀦𑀺𑀲𑀺𑀦𑁆𑀦𑀦𑀺𑀬𑀸𑀫𑁂𑀦𑁂𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀲𑀼𑀁. 𑀧𑀼𑀭𑀺𑀲𑀸 𑀧𑀼𑀦𑀤𑀺𑀯𑀲𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁂𑀯𑀸 𑀯𑁂𑀮𑀁 𑀚𑀸𑀦𑀸𑀣𑀸’’𑀢𑀺 𑀆𑀳𑀁𑀲𑀼. 𑀦 𑀫𑀬𑀁 𑀤𑁂𑀯𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀫𑀬𑀦𑁆𑀢𑀺. 𑀅𑀬𑁆𑀬𑀸, 𑀢𑀼𑀫𑁆𑀳𑁂 𑀪𑀸𑀭𑀺𑀬𑀁 𑀓𑀣𑀁 𑀓𑀣𑁂𑀣, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑀸 𑀦 𑀳𑁄𑀦𑁆𑀢𑀺, 𑀤𑁆𑀯𑀗𑁆𑀕𑀼𑀮𑀓𑁂𑀲𑀫𑀲𑁆𑀲𑀼𑀥𑀭𑀸 𑀓𑀸𑀬𑁂 𑀧𑀝𑀺𑀫𑀼𑀓𑁆𑀓𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀻𑀢𑀺. 𑀢𑁂 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀲𑀻𑀲𑀁 𑀧𑀭𑀸𑀫𑀲𑀺𑀁𑀲𑀼. 𑀢𑀸𑀯𑀤𑁂𑀯 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸 𑀓𑀸𑀬𑁂 𑀧𑀝𑀺𑀫𑀼𑀓𑁆𑀓𑀸𑀯 𑀅𑀳𑁂𑀲𑀼𑀁. 𑀢𑀢𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀆𑀓𑀸𑀲𑁂𑀦 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀁 𑀅𑀕𑀫𑀁𑀲𑀼.

𑀲𑀸𑀧𑀺 𑀔𑁄, 𑀧𑀤𑀼𑀫𑀯𑀢𑀻 𑀤𑁂𑀯𑀻, ‘‘𑀅𑀳𑀁 𑀩𑀳𑀼𑀧𑀼𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀧𑀼𑀢𑁆𑀢𑀸 𑀚𑀸𑀢𑀸’’𑀢𑀺 𑀳𑀤𑀬𑀲𑁄𑀓𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀲𑁄𑀓𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀭𑀸𑀚𑀕𑀳𑀦𑀕𑀭𑀤𑁆𑀯𑀸𑀭𑀕𑀸𑀫𑀓𑁂 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀦𑀓𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀧𑀭𑀪𑀸𑀕𑁂 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀸𑀫𑀺𑀓𑀲𑁆𑀲 𑀔𑁂𑀢𑁆𑀢𑀁 𑀬𑀸𑀕𑀼𑀁 𑀳𑀭𑀫𑀸𑀦𑀸 𑀢𑁂𑀲𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀁 𑀅𑀦𑁆𑀢𑀭𑁂 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀧𑀲𑁆𑀲, 𑀅𑀬𑁆𑀬, 𑀧𑀘𑁆𑀘𑁂𑀓𑀩𑀼𑀤𑁆𑀥𑁂, 𑀏𑀢𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀲𑁆𑀲𑀸𑀫𑀸’’𑀢𑀺. 𑀲𑁄 𑀆𑀳 𑁋 ‘‘𑀲𑀫𑀡𑀲𑀓𑀼𑀡𑀸 𑀦𑀸𑀫𑁂𑀢𑁂 𑀅𑀜𑁆𑀜𑀢𑁆𑀣𑀸𑀧𑀺 𑀏𑀯𑀁 𑀘𑀭𑀦𑁆𑀢𑀺, 𑀦 𑀏𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺. 𑀢𑁂 𑀢𑁂𑀲𑀁 𑀓𑀣𑁂𑀦𑁆𑀢𑀸𑀦𑀁𑀬𑁂𑀯 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀑𑀢𑀭𑀺𑀁𑀲𑀼. 𑀲𑀸 𑀇𑀢𑁆𑀣𑀻 𑀢𑀁𑀤𑀺𑀯𑀲𑀁 𑀅𑀢𑁆𑀢𑀦𑁄 𑀪𑀢𑁆𑀢𑀔𑀚𑁆𑀚𑀪𑁄𑀚𑀦𑀁 𑀢𑁂𑀲𑀁 𑀤𑀢𑁆𑀯𑀸 ‘‘𑀲𑁆𑀯𑁂𑀧𑀺 𑀅𑀝𑁆𑀞 𑀚𑀦𑀸 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀲𑀸𑀥𑀼, 𑀉𑀧𑀸𑀲𑀺𑀓𑁂, 𑀢𑀯 𑀲𑀓𑁆𑀓𑀸𑀭𑁄 𑀏𑀢𑁆𑀢𑀓𑁄𑀯 𑀳𑁄𑀢𑀼, 𑀆𑀲𑀦𑀸𑀦𑀺 𑀘 𑀅𑀝𑁆𑀞𑁂𑀯 𑀳𑁄𑀦𑁆𑀢𑀼, 𑀅𑀜𑁆𑀜𑁂𑀧𑀺 𑀩𑀳𑀽 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀢𑀯 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀸𑀲𑀻𑀢𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀅𑀝𑁆𑀞 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀝𑁆𑀞𑀦𑁆𑀦𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀦𑀺𑀫𑀦𑁆𑀢𑀺𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑁂𑀲𑀸𑀦𑀁 𑀲𑀜𑁆𑀜𑀁 𑀅𑀤𑀁𑀲𑀼 𑁋 ‘‘𑀫𑀸𑀭𑀺𑀲𑀸, 𑀅𑀚𑁆𑀚 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀯 𑀢𑀼𑀫𑁆𑀳𑀸𑀓𑀁 𑀫𑀸𑀢𑀼 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺. 𑀢𑁂 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀯 𑀏𑀓𑀢𑁄 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀫𑀸𑀢𑀼-𑀕𑁂𑀳𑀤𑁆𑀯𑀸𑀭𑁂 𑀧𑀸𑀢𑀼𑀭𑀳𑁂𑀲𑀼𑀁. 𑀲𑀸𑀧𑀺 𑀧𑀞𑀫𑀁 𑀮𑀤𑁆𑀥𑀲𑀜𑁆𑀜𑀢𑀸𑀬 𑀩𑀳𑀽𑀧𑀺 𑀤𑀺𑀲𑁆𑀯𑀸 𑀦 𑀓𑀫𑁆𑀧𑀺𑀢𑁆𑀣, 𑀲𑀩𑁆𑀩𑁂𑀧𑀺 𑀢𑁂 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀆𑀲𑀦𑁂𑀲𑀼 𑀦𑀺𑀲𑀻𑀤𑀸𑀧𑁂𑀲𑀺. 𑀢𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀦𑁆𑀢𑁂𑀲𑀼 𑀦𑀯𑀫𑁄 𑀅𑀜𑁆𑀜𑀸𑀦𑀺 𑀅𑀝𑁆𑀞 𑀆𑀲𑀦𑀸𑀦𑀺 𑀫𑀸𑀧𑁂𑀢𑁆𑀯𑀸 𑀲𑀬𑀁 𑀥𑀼𑀭𑀸𑀲𑀦𑁂 𑀦𑀺𑀲𑀻𑀤𑀺. 𑀬𑀸𑀯 𑀆𑀲𑀦𑀸𑀦𑀺 𑀯𑀟𑁆𑀠𑀦𑁆𑀢𑀺, 𑀢𑀸𑀯 𑀕𑁂𑀳𑀁 𑀯𑀟𑁆𑀠𑀢𑀺. 𑀏𑀯𑀁 𑀢𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀦𑀺𑀲𑀺𑀦𑁆𑀦𑁂𑀲𑀼 𑀲𑀸 𑀇𑀢𑁆𑀣𑀻 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀝𑀺𑀬𑀸𑀤𑀺𑀢𑀁 𑀲𑀓𑁆𑀓𑀸𑀭𑀁 𑀧𑀜𑁆𑀘𑀲𑀢𑀸𑀦𑀫𑁆𑀧𑀺 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀅𑀝𑁆𑀞 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑁂 𑀆𑀳𑀭𑀺𑀢𑁆𑀯𑀸 𑀦𑀺𑀫𑀦𑁆𑀢𑀺𑀢𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀆𑀳 𑁋 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀭𑀻𑀭𑀯𑀡𑁆𑀡𑁄 𑀇𑀫𑁂𑀲𑀁 𑀦𑀻𑀮𑀼𑀧𑁆𑀧𑀮𑀸𑀦𑀁 𑀅𑀦𑁆𑀢𑁄𑀕𑀩𑁆𑀪𑀯𑀡𑁆𑀡𑁄 𑀯𑀺𑀬 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀫𑀸𑀢𑀼 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀁𑀬𑁂𑀯 𑀅𑀕𑀫𑀁𑀲𑀼.

𑀲𑀸𑀧𑀺 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀦𑀻𑀮𑀼𑀧𑁆𑀧𑀮𑀕𑀩𑁆𑀪𑀲𑀫𑀸𑀦𑀯𑀡𑁆𑀡𑀢𑀸𑀬 𑀘𑀲𑁆𑀲𑀸 𑀉𑀧𑁆𑀧𑀮𑀯𑀡𑁆𑀡𑀸𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀅𑀣𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀸𑀚𑀸𑀦𑁄 𑀘 𑀲𑁂𑀝𑁆𑀞𑀺𑀦𑁄 𑀘 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀥𑀻𑀢𑀭𑀁 𑀅𑀫𑁆𑀳𑀸𑀓𑀁 𑀤𑁂𑀢𑀽’’𑀢𑀺. 𑀅𑀧𑀳𑀺𑀡𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀢𑀢𑁄 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀩𑁆𑀩𑁂𑀲𑀁 𑀫𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀉𑀧𑀸𑀬𑀁 𑀧𑀦𑁂𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀻𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢𑀼𑀁 𑀅𑀫𑁆𑀫 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. 𑀢𑀲𑁆𑀲𑀸 𑀧𑀘𑁆𑀙𑀺𑀫𑀪𑀯𑀺𑀓𑀢𑁆𑀢𑀸 𑀧𑀺𑀢𑀼𑀯𑀘𑀦𑀁 𑀲𑀻𑀲𑁂 𑀆𑀲𑀺𑀢𑁆𑀢𑀲𑀢𑀧𑀸𑀓𑀢𑁂𑀮𑀁 𑀯𑀺𑀬 𑀅𑀳𑁄𑀲𑀺, 𑀢𑀲𑁆𑀫𑀸 𑀧𑀺𑀢𑀭𑀁 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸𑀬 𑀏𑀯 𑀉𑀧𑁄𑀲𑀣𑀸𑀕𑀸𑀭𑁂 𑀓𑀸𑀮𑀯𑀸𑀭𑁄 𑀧𑀸𑀧𑀼𑀡𑀺. 𑀲𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀻𑀧𑀲𑀺𑀔𑀸𑀬 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑀬𑀫𑀸𑀦𑀸 𑀢𑁂𑀚𑁄𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀨𑀮𑁂𑀦 𑀲𑀤𑁆𑀥𑀺𑀁𑀬𑁂𑀯 𑀘 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑁂 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀤𑀺𑀯𑀲𑁂 ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀺. 𑀲𑀢𑁆𑀣𑀸 𑀇𑀤𑀁 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀚𑁂𑀢𑀯𑀦𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀇𑀫𑀁 𑀣𑁂𑀭𑀺𑀁 𑀇𑀤𑁆𑀥𑀺𑀫𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀧𑀝𑀸𑀘𑀸𑀭𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁮. 𑀘𑀢𑀼𑀢𑁆𑀣𑁂 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀧𑀝𑀸𑀘𑀸𑀭𑀸𑀢𑀺 𑀧𑀝𑀸𑀘𑀸𑀭𑀸 𑀣𑁂𑀭𑀻 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀺𑀯𑁂𑀡𑀁 𑀓𑀢𑁆𑀯𑀸 𑀧𑀼𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺.

𑀲𑀸 𑀅𑀧𑀭𑀪𑀸𑀕𑁂 𑀯𑀬𑀧𑁆𑀧𑀢𑁆𑀢𑀸 𑀅𑀢𑁆𑀢𑀦𑁄 𑀕𑁂𑀳𑁂 𑀏𑀓𑁂𑀦 𑀓𑀫𑁆𑀫𑀓𑀸𑀭𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑁄 𑀲𑀫𑀸𑀦𑀚𑀸𑀢𑀺𑀓𑀁 𑀓𑀼𑀮𑀁 𑀕𑀘𑁆𑀙𑀦𑁆𑀢𑀻 𑀓𑀢𑀲𑀦𑁆𑀣𑀯𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀦 𑀢𑁆𑀯𑀁 𑀲𑁆𑀯𑁂 𑀧𑀝𑁆𑀞𑀸𑀬 𑀫𑀁 𑀧𑀝𑀺𑀳𑀸𑀭𑀲𑀢𑁂𑀦𑀧𑀺 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀲𑀺, 𑀲𑀘𑁂 𑀢𑁂 𑀓𑀫𑁆𑀫𑀁 𑀅𑀢𑁆𑀣𑀺, 𑀇𑀤𑀸𑀦𑀺 𑀫𑀁 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀲𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀘𑁆𑀙𑀯𑀺𑀓𑀁 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀦𑀕𑀭𑀢𑁄 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀬𑁄𑀚𑀦𑀸𑀦𑀺 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀅𑀣 𑀅𑀧𑀭𑀪𑀸𑀕𑁂 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀕𑀩𑁆𑀪𑁂 𑀧𑀭𑀺𑀧𑀓𑁆𑀓𑁂 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀅𑀦𑀸𑀣𑀝𑁆𑀞𑀸𑀦𑀁, 𑀓𑀼𑀮𑀕𑁂𑀳𑀁 𑀕𑀘𑁆𑀙𑀸𑀫 𑀲𑀸𑀫𑀻’’𑀢𑀺 𑀆𑀳. 𑀲𑁄 ‘‘𑀅𑀚𑁆𑀚 𑀕𑀘𑁆𑀙𑀸𑀫, 𑀲𑁆𑀯𑁂 𑀕𑀘𑁆𑀙𑀸𑀫𑀸’’𑀢𑀺 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀲𑀸 𑀢𑀲𑁆𑀲 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀦𑀸𑀬𑀁 𑀩𑀸𑀮𑁄 𑀫𑀁 𑀦𑁂𑀲𑁆𑀲𑀢𑀻’’𑀢𑀺 𑀢𑀲𑁆𑀫𑀺𑀁 𑀩𑀳𑀺 𑀕𑀢𑁂 ‘‘𑀏𑀓𑀺𑀓𑀸𑀯 𑀓𑀼𑀮𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀕𑁂𑀳𑁂 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀯𑀺𑀲𑁆𑀲𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀼𑀮𑀕𑁂𑀳𑀁 𑀕𑀢𑀸’’𑀢𑀺 𑀲𑀼𑀢𑁆𑀯𑀸 ‘‘𑀫𑀁 𑀦𑀺𑀲𑁆𑀲𑀸𑀬 𑀓𑀼𑀮𑀥𑀻𑀢𑀸 𑀅𑀦𑀸𑀣𑀸 𑀚𑀸𑀢𑀸’’𑀢𑀺 𑀧𑀤𑀸𑀦𑀼𑀧𑀤𑀺𑀓𑀁 𑀕𑀦𑁆𑀢𑁆𑀯𑀸 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀲𑀸 𑀅𑀦𑁆𑀢𑀭𑀸𑀫𑀕𑁆𑀕𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑀢𑁄 ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀕𑀘𑁆𑀙𑁂𑀬𑁆𑀬𑀸𑀫, 𑀲𑁄 𑀅𑀢𑁆𑀣𑁄 𑀅𑀦𑁆𑀢𑀭𑀸𑀫𑀕𑁆𑀕𑁂𑀯 𑀦𑀺𑀧𑁆𑀨𑀦𑁆𑀦𑁄, 𑀇𑀤𑀸𑀦𑀺 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀦𑀺𑀯𑀢𑁆𑀢𑀺𑀁𑀲𑀼. 𑀧𑀼𑀦 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀻𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀦𑀲𑁆𑀲𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑁂 𑀚𑀸𑀢𑀫𑀢𑁆𑀢𑁂𑀬𑁂𑀯 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺. 𑀲𑀸 𑀢𑀁 𑀧𑀼𑀭𑀺𑀲𑀁 𑀆𑀳 𑁋 ‘‘𑀲𑀸𑀫𑀺, 𑀅𑀯𑁂𑀮𑀸𑀬 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑁂𑀖𑁄 𑀉𑀝𑁆𑀞𑀺𑀢𑁄, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀓𑀸𑀢𑀼𑀁 𑀯𑀸𑀬𑀫𑀸𑀳𑀻’’𑀢𑀺. 𑀲𑁄 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀡𑁆𑀟𑀓𑁂𑀳𑀺 𑀓𑀼𑀝𑀺𑀓𑀁 𑀓𑀢𑁆𑀯𑀸 ‘‘𑀙𑀤𑀦𑀢𑁆𑀣𑀸𑀬 𑀢𑀺𑀡𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀫𑀳𑀸𑀯𑀫𑁆𑀫𑀺𑀓𑀧𑀸𑀤𑁂 𑀢𑀺𑀡𑀁 𑀙𑀺𑀦𑁆𑀤𑀢𑀺. 𑀅𑀣 𑀦𑀁 𑀯𑀫𑁆𑀫𑀺𑀓𑁂 𑀦𑀺𑀧𑀦𑁆𑀦𑁄 𑀓𑀡𑁆𑀳𑀲𑀧𑁆𑀧𑁄 𑀧𑀸𑀤𑁂 𑀟𑀁𑀲𑀺, 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀧𑀢𑀺𑀢𑁄. 𑀲𑀸𑀧𑀺 ‘‘𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀔𑁂𑀧𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀫𑀁 𑀲𑁄 ‘𑀅𑀦𑀸𑀣𑀸 𑀏𑀲𑀸’𑀢𑀺 𑀫𑀕𑁆𑀕𑁂 𑀙𑀟𑁆𑀟𑁂𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀮𑁄𑀓𑁂 𑀲𑀜𑁆𑀚𑀸𑀢𑁂 𑀧𑀤𑀸𑀦𑀼𑀲𑀸𑀭𑁂𑀦 𑀑𑀮𑁄𑀓𑁂𑀦𑁆𑀢𑀻 𑀯𑀫𑁆𑀫𑀺𑀓𑀧𑀸𑀤𑁂 𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀫𑀁 𑀦𑀺𑀲𑁆𑀲𑀸𑀬 𑀦𑀝𑁆𑀞𑁄 𑀧𑀼𑀭𑀺𑀲𑁄’’𑀢𑀺 𑀧𑀭𑀺𑀤𑁂𑀯𑀺𑀢𑁆𑀯𑀸 𑀤𑀳𑀭𑀤𑀸𑀭𑀓𑀁 𑀧𑀲𑁆𑀲𑁂𑀦𑀸𑀤𑀸𑀬 𑀫𑀳𑀮𑁆𑀮𑀓𑀁 𑀅𑀗𑁆𑀕𑀼𑀮𑀻𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀉𑀢𑁆𑀢𑀸𑀦𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀤𑁆𑀯𑁂𑀧𑀺 𑀤𑀸𑀭𑀓𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀤𑀸𑀬 𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀚𑁂𑀝𑁆𑀞𑀓𑀁 𑀑𑀭𑀺𑀫𑀢𑀻𑀭𑁂 𑀞𑀧𑁂𑀢𑁆𑀯𑀸 𑀤𑀳𑀭𑀁 𑀧𑀭𑀢𑀻𑀭𑀁 𑀦𑁂𑀢𑁆𑀯𑀸 𑀧𑀺𑀮𑁄𑀢𑀺𑀓𑀘𑀼𑀫𑁆𑀩𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀇𑀢𑀭𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀤𑀺𑀁 𑀑𑀢𑀭𑀺.

𑀅𑀣𑀲𑁆𑀲𑀸 𑀦𑀤𑀻𑀫𑀚𑁆𑀛𑀁 𑀧𑀢𑁆𑀢𑀓𑀸𑀮𑁂 𑀏𑀓𑁄 𑀲𑁂𑀦𑁄 ‘‘𑀫𑀁𑀲𑀧𑀺𑀡𑁆𑀟𑁄 𑀅𑀬’’𑀦𑁆𑀢𑀺 𑀲𑀜𑁆𑀜𑀸𑀬 𑀤𑀸𑀭𑀓𑀁 𑀯𑀺𑀚𑁆𑀛𑀺𑀢𑀼𑀁 𑀆𑀕𑀘𑁆𑀙𑀢𑀺. 𑀲𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀲𑁂𑀦𑀁 𑀧𑀮𑀸𑀧𑁂𑀲𑀺. 𑀢𑀲𑁆𑀲𑀸 𑀢𑀁 𑀳𑀢𑁆𑀣𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 𑀫𑀳𑀮𑁆𑀮𑀓𑀤𑀸𑀭𑀓𑁄 ‘‘𑀫𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀲𑁄𑀢𑁂 𑀧𑀢𑀺𑀢𑁄 𑀬𑀣𑀸𑀲𑁄𑀢𑀁 𑀅𑀕𑀫𑀸𑀲𑀺. 𑀲𑁄𑀧𑀺 𑀲𑁂𑀦𑁄 𑀢𑀲𑁆𑀲𑀸 𑀅𑀲𑀫𑁆𑀧𑀢𑁆𑀢𑀸𑀬 𑀏𑀯 𑀢𑀁 𑀤𑀳𑀭𑀤𑀸𑀭𑀓𑀁 𑀕𑀡𑁆𑀳𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀇𑀫𑀁 𑀯𑀺𑀮𑀸𑀧𑀕𑀻𑀢𑀁 𑀕𑀸𑀬𑀦𑁆𑀢𑀻 𑀕𑀘𑁆𑀙𑀢𑀺 𑁋

‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀗𑁆𑀓𑀢𑀸, 𑀧𑀦𑁆𑀣𑁂 𑀫𑀬𑁆𑀳𑀁 𑀧𑀢𑀻 𑀫𑀢𑁄’’𑀢𑀺.

𑀲𑀸 𑀏𑀯𑀁 𑀯𑀺𑀮𑀧𑀫𑀸𑀦𑀸𑀯 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀓𑀼𑀮𑀲𑀪𑀸𑀕𑀁 𑀕𑀦𑁆𑀢𑁆𑀯𑀸𑀧𑀺 𑀲𑁄𑀓𑀯𑀲𑁂𑀦𑁂𑀯 𑀅𑀢𑁆𑀢𑀦𑁄 𑀕𑁂𑀳𑀁 𑀯𑀯𑀢𑁆𑀣𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀯𑀁𑀯𑀺𑀥𑀁 𑀦𑀸𑀫 𑀓𑀼𑀮𑀁 𑀅𑀢𑁆𑀣𑀺, 𑀓𑀢𑀭𑀁 𑀢𑀁 𑀕𑁂𑀳’’𑀦𑁆𑀢𑀺 𑀧𑀝𑀺𑀧𑀼𑀘𑁆𑀙𑀺. 𑀢𑁆𑀯𑀁 𑀢𑀁 𑀓𑀼𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀲𑀺? 𑀢𑁂𑀲𑀁 𑀯𑀲𑀦𑀕𑁂𑀳𑀁 𑀯𑀸𑀢𑀧𑁆𑀧𑀳𑀸𑀭𑁂𑀦 𑀧𑀢𑀺𑀢𑀁, 𑀢𑀢𑁆𑀣𑁂𑀯 𑀢𑁂 𑀲𑀩𑁆𑀩𑁂𑀧𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸, 𑀅𑀣 𑀦𑁂 𑀔𑀼𑀤𑁆𑀤𑀓𑀫𑀳𑀮𑁆𑀮𑀓𑁂 𑀏𑀓𑀘𑀺𑀢𑀓𑀲𑁆𑀫𑀺𑀁𑀬𑁂𑀯 𑀛𑀸𑀧𑁂𑀦𑁆𑀢𑀺, 𑀧𑀲𑁆𑀲 𑀏𑀲𑀸 𑀥𑀽𑀫𑀯𑀝𑁆𑀝𑀺 𑀧𑀜𑁆𑀜𑀸𑀬𑀢𑀻𑀢𑀺. 𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸𑀯 𑀓𑀺𑀁 𑀢𑀼𑀫𑁆𑀳𑁂 𑀯𑀤𑀣𑀸’’𑀢𑀺 𑀅𑀢𑁆𑀢𑀦𑁄 𑀦𑀺𑀯𑀢𑁆𑀣𑀲𑀸𑀝𑀓𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀚𑀸𑀢𑀦𑀺𑀬𑀸𑀫𑁂𑀦𑁂𑀯 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀫𑀸𑀦𑀸 𑀜𑀸𑀢𑀻𑀦𑀁 𑀘𑀺𑀢𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀺𑀮𑀸𑀧𑀕𑀻𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑁋

‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀗𑁆𑀓𑀢𑀸, 𑀧𑀦𑁆𑀣𑁂 𑀫𑀬𑁆𑀳𑀁 𑀧𑀢𑀻 𑀫𑀢𑁄;

𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸 𑀘, 𑀏𑀓𑀘𑀺𑀢𑀓𑀲𑁆𑀫𑀺𑀁 𑀟𑀬𑁆𑀳𑀭𑁂’’𑀢𑀺. 𑁋

𑀆𑀳. 𑀅𑀜𑁆𑀜𑁂𑀦 𑀚𑀦𑁂𑀦 𑀲𑀸𑀝𑀓𑀁 𑀤𑀺𑀦𑁆𑀦𑀫𑁆𑀧𑀺 𑀨𑀸𑀮𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀙𑀟𑁆𑀟𑁂𑀢𑀺. 𑀅𑀣 𑀦𑀁 𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂 𑀫𑀳𑀸𑀚𑀦𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀢𑀺. 𑀅𑀣𑀲𑁆𑀲𑀸 ‘‘𑀅𑀬𑀁 𑀧𑀝𑀸𑀘𑀸𑀭𑀁 𑀧𑀝𑀧𑀭𑀺𑀳𑀭𑀡𑀁 𑀯𑀺𑀦𑀸 𑀘𑀭𑀢𑀻’’𑀢𑀺 𑀧𑀝𑀸𑀘𑀸𑀭𑀸𑀢𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀬𑀲𑁆𑀫𑀸 𑀘𑀲𑁆𑀲𑀸 𑀲𑁄 𑀦𑀕𑁆𑀕𑀪𑀸𑀯𑁂𑀦 𑀅𑀮𑀚𑁆𑀚𑀻𑀆𑀘𑀸𑀭𑁄 𑀧𑀸𑀓𑀝𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀧𑀢𑀺𑀢𑁄 𑀆𑀘𑀸𑀭𑁄 𑀅𑀲𑁆𑀲𑀸𑀢𑀺 𑀧𑀝𑀸𑀘𑀸𑀭𑀸𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼.

𑀲𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀭𑀺 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀫𑁂𑀢𑁆𑀢𑀸𑀨𑀭𑀡𑁂𑀦 𑀨𑀭𑀺𑀢𑁆𑀯𑀸 ‘‘𑀲𑀢𑀺𑀁 𑀧𑀝𑀺𑀮𑀪, 𑀪𑀕𑀺𑀦𑀺, 𑀲𑀢𑀺𑀁 𑀧𑀝𑀺𑀮𑀪, 𑀪𑀕𑀺𑀦𑀻’’𑀢𑀺 𑀆𑀳. 𑀢𑀲𑁆𑀲𑀸 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑀁 𑀆𑀕𑀢𑀁, 𑀲𑀸 𑀢𑀢𑁆𑀣𑁂𑀯 𑀪𑀽𑀫𑀺𑀬𑀁 𑀦𑀺𑀲𑀻𑀤𑀺. 𑀅𑀯𑀺𑀤𑀽𑀭𑁂 𑀞𑀺𑀢𑁄 𑀧𑀼𑀭𑀺𑀲𑁄 𑀉𑀢𑁆𑀢𑀭𑀺𑀲𑀸𑀝𑀓𑀁 𑀔𑀺𑀧𑀺𑀢𑁆𑀯𑀸 𑀅𑀤𑀸𑀲𑀺. 𑀲𑀸 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀘𑀭𑀺𑀬𑀯𑀲𑁂𑀦 𑀇𑀫𑀸 𑀥𑀫𑁆𑀫𑀧𑀤𑁂 𑀕𑀸𑀣𑀸 𑀆𑀳 𑁋

‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸.

‘‘𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀧𑀡𑁆𑀟𑀺𑀢𑁄 𑀲𑀻𑀮𑀲𑀁𑀯𑀼𑀢𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀔𑀺𑀧𑁆𑀧𑀫𑁂𑀯 𑀯𑀺𑀲𑁄𑀥𑀬𑁂’’𑀢𑀺. (𑀥. 𑀧. 𑁨𑁮𑁮-𑁨𑁮𑁯);

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀞𑀺𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 ‘‘𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀸’’𑀢𑀺 𑀧𑀩𑁆𑀩𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀕𑀡𑁆𑀳𑀦𑁆𑀢𑀻 𑀯𑀺𑀦𑀬𑀧𑀺𑀝𑀓𑁂 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀧𑀝𑀸𑀘𑀸𑀭𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁯. 𑀧𑀜𑁆𑀘𑀫𑁂 𑀥𑀫𑁆𑀫𑀓𑀣𑀺𑀓𑀸𑀦𑀦𑁆𑀢𑀺 𑀥𑀫𑁆𑀫𑀓𑀣𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀥𑀫𑁆𑀫𑀤𑀺𑀦𑁆𑀦𑀸 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀧𑀭𑀸𑀬𑀢𑁆𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑀲𑁆𑀲 𑀲𑀼𑀚𑀸𑀢𑀢𑁆𑀣𑁂𑀭𑀲𑁆𑀲 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀔𑁂𑀫𑀸𑀣𑁂𑀭𑀺𑀬𑀸 𑀅𑀪𑀺𑀦𑀻𑀳𑀸𑀭𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀨𑀼𑀲𑁆𑀲𑀩𑀼𑀤𑁆𑀥𑀓𑀸𑀮𑁂 𑀧𑀦𑁂𑀲𑀸 𑀲𑀢𑁆𑀣𑀼 𑀯𑁂𑀫𑀸𑀢𑀺𑀓𑀸𑀦𑀁 𑀢𑀺𑀡𑁆𑀡𑀁 𑀪𑀸𑀢𑀺𑀓𑀸𑀦𑀁 𑀤𑀸𑀦𑀸𑀥𑀺𑀓𑀸𑀭𑁂 𑀞𑀧𑀺𑀢𑀓𑀫𑁆𑀫𑀺𑀓𑀲𑁆𑀲 𑀕𑁂𑀳𑁂 𑀯𑀲𑀫𑀸𑀦𑀸 ‘‘𑀏𑀓𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀤𑁆𑀯𑁂 𑀅𑀤𑀸𑀲𑀺. 𑀏𑀯𑀁 𑀲𑀩𑁆𑀩𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑀻 𑀤𑀢𑁆𑀯𑀸 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑁂 𑀅𑀢𑀺𑀓𑁆𑀓𑀫𑁆𑀫 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀲𑀦𑀧𑀭𑀺𑀯𑁂𑀡𑀁 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀯𑀺𑀲𑀸𑀔𑀲𑁂𑀝𑁆𑀞𑀺𑀦𑁄 𑀕𑁂𑀳𑀁 𑀕𑀢𑀸. 𑀯𑀺𑀲𑀸𑀔𑀲𑁂𑀝𑁆𑀞𑀺 𑀦𑀸𑀫 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀳𑀸𑀬𑀓𑁄 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀧𑀞𑀫𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀅𑀧𑀭𑀪𑀸𑀕𑁂 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀸𑀓𑀸𑀲𑀺.

𑀲𑁄 𑀢𑀁𑀤𑀺𑀯𑀲𑀁 𑀖𑀭𑀁 𑀕𑀦𑁆𑀢𑁆𑀯𑀸 𑀲𑁄𑀧𑀸𑀦𑀫𑀢𑁆𑀣𑀓𑁂 𑀞𑀺𑀢𑀸𑀬 𑀥𑀫𑁆𑀫𑀤𑀺𑀦𑁆𑀦𑀸𑀬 𑀳𑀢𑁆𑀣𑁂 𑀧𑀲𑀸𑀭𑀺𑀢𑁂 𑀳𑀢𑁆𑀣𑀁 𑀅𑀦𑀸𑀮𑀫𑁆𑀩𑀺𑀢𑁆𑀯𑀸𑀯 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀪𑀼𑀜𑁆𑀚𑀫𑀸𑀦𑁄𑀧𑀺 ‘‘𑀇𑀫𑀁 𑀤𑁂𑀣, 𑀇𑀫𑀁 𑀳𑀭𑀣𑀸’’𑀢𑀺 𑀦 𑀩𑁆𑀬𑀸𑀳𑀭𑀺. 𑀥𑀫𑁆𑀫𑀤𑀺𑀦𑁆𑀦𑀸 𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀺𑀲𑀫𑀸𑀦𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑁂 𑀳𑀢𑁆𑀣𑀸𑀮𑀫𑁆𑀩𑀓𑀁 𑀤𑁂𑀦𑁆𑀢𑀺𑀬𑀸𑀧𑀺 𑀳𑀢𑁆𑀣𑀁 𑀦 𑀆𑀮𑀫𑁆𑀩𑀺, 𑀪𑀼𑀜𑁆𑀚𑀫𑀸𑀦𑁄𑀧𑀺 𑀓𑀺𑀜𑁆𑀘𑀺 𑀦 𑀓𑀣𑁂𑀢𑀺, 𑀓𑁄 𑀦𑀼 𑀔𑁄 𑀫𑀬𑁆𑀳𑀁 𑀤𑁄𑀲𑁄’’𑀢𑀺? 𑀅𑀣 𑀦𑀁 𑀪𑀼𑀢𑁆𑀢𑀸𑀯𑀺𑀁 ‘‘𑀓𑁄 𑀦𑀼 𑀔𑁄 𑀫𑁂, 𑀅𑀬𑁆𑀬, 𑀤𑁄𑀲𑁄’’𑀢𑀺 𑀧𑀼𑀘𑁆𑀙𑀺. 𑀥𑀫𑁆𑀫𑀤𑀺𑀦𑁆𑀦𑁂 𑀢𑀼𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀺, 𑀅𑀳𑀁 𑀧𑀦 𑀅𑀚𑁆𑀚 𑀧𑀝𑁆𑀞𑀸𑀬 𑀲𑀦𑁆𑀣𑀯𑀯𑀲𑁂𑀦 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀆𑀳𑀭𑀸𑀧𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀅𑀪𑀩𑁆𑀩𑁄. 𑀢𑁆𑀯𑀁 𑀲𑀘𑁂 𑀇𑀘𑁆𑀙𑀲𑀺, 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀯𑀲. 𑀦𑁄 𑀘𑁂 𑀇𑀘𑁆𑀙𑀲𑀺, 𑀬𑀢𑁆𑀢𑀓𑁂𑀦 𑀢𑁂 𑀥𑀦𑁂𑀦 𑀅𑀢𑁆𑀣𑁄, 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀓𑀼𑀮𑀖𑀭𑀁 𑀕𑀘𑁆𑀙𑀸𑀳𑀻𑀢𑀺. 𑀅𑀬𑁆𑀬𑀧𑀼𑀢𑁆𑀢, 𑀏𑀯𑀁 𑀲𑀦𑁆𑀢𑁂 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀙𑀟𑁆𑀟𑀺𑀢𑀔𑁂𑀴𑀁 𑀯𑀫𑀺𑀢𑀯𑀫𑀦𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦 𑀘𑀭𑀺𑀲𑁆𑀲𑀸𑀫𑀺, 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀣𑀸𑀢𑀺. 𑀯𑀺𑀲𑀸𑀔𑁄 ‘‘𑀲𑀸𑀥𑀼, 𑀥𑀫𑁆𑀫𑀤𑀺𑀦𑁆𑀦𑁂’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀥𑀫𑁆𑀫𑀤𑀺𑀦𑁆𑀦𑀁 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀧𑀩𑁆𑀩𑀚𑁆𑀚𑀢𑁆𑀣𑀸𑀬 𑀧𑁂𑀲𑁂𑀲𑀺.

𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀢𑀸𑀯 𑀲𑁂𑀝𑁆𑀞𑀺 𑀖𑀭𑀫𑀚𑁆𑀛𑁂 𑀞𑀺𑀢𑁄𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀅𑀓𑀸𑀲𑀺, 𑀧𑀩𑁆𑀩𑀚𑁆𑀚𑀁 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀫𑀬𑀸𑀧𑀺 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀅𑀬𑁆𑀬𑁂, 𑀫𑀬𑁆𑀳𑀁 𑀆𑀓𑀺𑀡𑁆𑀡𑀝𑁆𑀞𑀸𑀦𑁂 𑀘𑀺𑀢𑁆𑀢𑀁 𑀦 𑀭𑀫𑀢𑀺, 𑀕𑀸𑀫𑀓𑀸𑀯𑀸𑀲𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀣𑁂𑀭𑀺𑀬𑁄 𑀢𑀲𑁆𑀲𑀸 𑀫𑀳𑀸𑀓𑀼𑀮𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑀪𑀸𑀯𑁂𑀦 𑀘𑀺𑀢𑁆𑀢𑀁 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑁄 𑀢𑀁 𑀕𑀳𑁂𑀢𑁆𑀯𑀸 𑀕𑀸𑀫𑀓𑀸𑀯𑀸𑀲𑀁 𑀅𑀕𑀫𑀁𑀲𑀼. 𑀲𑀸 𑀅𑀢𑀻𑀢𑁂 𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀢𑀸𑀬 𑀦𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑁆𑀳𑀁 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀇𑀥 𑀯𑀲𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀭𑀸𑀚𑀕𑀳𑀫𑁂𑀯 𑀕𑀘𑁆𑀙𑀸𑀫𑀺, 𑀢𑀢𑁆𑀭 𑀫𑀁 𑀦𑀺𑀲𑁆𑀲𑀸𑀬 𑀩𑀳𑀼 𑀜𑀸𑀢𑀺𑀲𑀗𑁆𑀖𑁄 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀺𑀬𑁄 𑀕𑀳𑁂𑀢𑁆𑀯𑀸 𑀦𑀕𑀭𑀫𑁂𑀯 𑀧𑀘𑁆𑀘𑀸𑀕𑀢𑀸.

𑀯𑀺𑀲𑀸𑀔𑁄 𑀢𑀲𑁆𑀲𑀸 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀻𑀖𑀁 𑀆𑀕𑀢𑀸 𑀉𑀓𑁆𑀓𑀡𑁆𑀞𑀺𑀢𑀸 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀬𑀦𑁆𑀳𑀲𑀫𑀬𑁂 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀧𑀼𑀘𑁆𑀙𑀺𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺, 𑀥𑀫𑁆𑀫𑀤𑀺𑀦𑁆𑀦𑀸 𑀔𑀕𑁆𑀕𑁂𑀦 𑀉𑀧𑁆𑀧𑀮𑀦𑀸𑀮𑀁 𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀉𑀧𑀸𑀲𑀓𑁄 𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀺𑀬𑀸 𑀜𑀸𑀡𑀲𑁆𑀲 𑀲𑀽𑀭𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀕𑀢𑀝𑁆𑀞𑀸𑀦𑁂 𑀧𑀝𑀺𑀧𑀸𑀝𑀺𑀬𑀸 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀲𑀩𑁆𑀩𑀸𑀓𑀸𑀭𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸 𑀉𑀕𑁆𑀕𑀳𑀯𑀲𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀧𑀺 𑀧𑀼𑀘𑁆𑀙𑀺. 𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀻𑀧𑀺 𑀉𑀧𑀸𑀲𑀓𑀲𑁆𑀲 𑀬𑀸𑀯 𑀅𑀦𑀸𑀕𑀸𑀫𑀺𑀨𑀮𑀸𑀯 𑀯𑀺𑀲𑀬𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀥𑀸𑀯𑀢𑀻’’𑀢𑀺 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑀻 ‘‘𑀅𑀘𑁆𑀘𑀲𑀭𑀸, 𑀆𑀯𑀼𑀲𑁄 𑀯𑀺𑀲𑀸𑀔, 𑀧𑀜𑁆𑀳𑁂, 𑀦𑀸𑀲𑀓𑁆𑀔𑀺 𑀧𑀜𑁆𑀳𑀸𑀦𑀁 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀁, 𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺, 𑀆𑀯𑀼𑀲𑁄 𑀯𑀺𑀲𑀸𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁. 𑀆𑀓𑀗𑁆𑀔𑀫𑀸𑀦𑁄 𑀘 𑀢𑁆𑀯𑀁, 𑀆𑀯𑀼𑀲𑁄 𑀯𑀺𑀲𑀸𑀔, 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀺. 𑀬𑀣𑀸 𑀘 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺, 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺 (𑀫. 𑀦𑀺. 𑁧.𑁪𑁬𑁬) 𑀆𑀳.

𑀯𑀺𑀲𑀸𑀔𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑀁 𑀓𑀣𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀫𑀫 𑀥𑀻𑀢𑀸𑀬 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼 𑀢𑀡𑁆𑀳𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀲𑁆𑀲 𑀧𑀼𑀭𑁂 𑀘 𑀧𑀘𑁆𑀙𑀸 𑀘, 𑀫𑀚𑁆𑀛𑁂 𑀘 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁨𑁧);

𑀢𑀢𑁄 𑀥𑀫𑁆𑀫𑀤𑀺𑀦𑁆𑀦𑀸𑀬 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀯𑀺𑀲𑀸𑀔𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘 𑁋 ‘‘𑀧𑀡𑁆𑀟𑀺𑀢𑀸, 𑀯𑀺𑀲𑀸𑀔, 𑀥𑀫𑁆𑀫𑀤𑀺𑀦𑁆𑀦𑀸 𑀪𑀺𑀓𑁆𑀔𑀼𑀦𑀻, 𑀫𑀳𑀸𑀧𑀜𑁆𑀜𑀸 𑀯𑀺𑀲𑀸𑀔, 𑀥𑀫𑁆𑀫𑀤𑀺𑀦𑁆𑀦𑀸 𑀪𑀺𑀓𑁆𑀔𑀼𑀦𑀻. 𑀫𑀁 𑀘𑁂𑀧𑀺 𑀢𑁆𑀯𑀁, 𑀯𑀺𑀲𑀸𑀔, 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀺, 𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀬𑀣𑀸 𑀢𑀁 𑀥𑀫𑁆𑀫𑀤𑀺𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀩𑁆𑀬𑀸𑀓𑀢𑀁, 𑀏𑀲𑁄 𑀘𑁂𑀯𑁂𑀢𑀲𑁆𑀲 𑀅𑀢𑁆𑀣𑁄, 𑀏𑀯𑀜𑁆𑀘 𑀦𑀁 𑀥𑀸𑀭𑁂𑀳𑀻’’𑀢𑀺. 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀇𑀤𑀫𑁂𑀯 𑀘𑀽𑀴𑀯𑁂𑀤𑀮𑁆𑀮𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀺𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀦𑀦𑁆𑀤𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁦. 𑀙𑀝𑁆𑀞𑁂 𑀛𑀸𑀬𑀻𑀦𑀁 𑀬𑀤𑀺𑀤𑀁 𑀦𑀦𑁆𑀤𑀸𑀢𑀺 𑀛𑀸𑀦𑀸𑀪𑀺𑀭𑀢𑀸𑀦𑀁, 𑀦𑀦𑁆𑀤𑀸 𑀣𑁂𑀭𑀻, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀛𑀸𑀦𑀸𑀪𑀺𑀭𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀢𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀦𑀦𑁆𑀤𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼. 𑀭𑀽𑀧𑀦𑀦𑁆𑀤𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀸 𑀅𑀧𑀭𑀪𑀸𑀕𑁂 𑀉𑀢𑁆𑀢𑀫𑀭𑀽𑀧𑀪𑀸𑀯𑁂𑀦 𑀚𑀦𑀧𑀤𑀓𑀮𑁆𑀬𑀸𑀡𑀻 𑀦𑀸𑀫 𑀚𑀸𑀢𑀸.

𑀲𑀸 𑀅𑀫𑁆𑀳𑀸𑀓𑀁 𑀤𑀲𑀩𑀮𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀦𑁆𑀢𑁆𑀯𑀸 𑀦𑀦𑁆𑀤𑀜𑁆𑀘 𑀭𑀸𑀳𑀼𑀮𑀜𑁆𑀘 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 ‘‘𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀘 𑀭𑀸𑀳𑀼𑀮𑀫𑀸𑀢𑀸 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸’’𑀢𑀺 𑀜𑀢𑁆𑀯𑀸 ‘‘𑀇𑀫𑀸𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀇𑀥 𑀓𑀺𑀁 𑀓𑀫𑁆𑀫’’𑀦𑁆𑀢𑀺 𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 ‘‘𑀲𑀢𑁆𑀣𑀸 𑀭𑀽𑀧𑀁 𑀕𑀭𑀳𑀢𑀻’’𑀢𑀺 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺, 𑀑𑀯𑀸𑀤𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑀁 𑀧𑁂𑀲𑁂𑀢𑁆𑀯𑀸 𑀑𑀯𑀸𑀤𑀁 𑀆𑀳𑀭𑀸𑀧𑁂𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀭𑀽𑀧𑀫𑀤𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀑𑀯𑀸𑀤𑀁 𑀅𑀢𑁆𑀢𑀦𑀸𑀯 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀼, 𑀦 𑀪𑀺𑀓𑁆𑀔𑀼𑀦𑀻𑀳𑀺 𑀅𑀜𑁆𑀜𑀸 𑀧𑁂𑀲𑁂𑀢𑀩𑁆𑀩𑀸’’𑀢𑀺 𑀆𑀳. 𑀢𑀢𑁄 𑀭𑀽𑀧𑀦𑀦𑁆𑀤𑀸 𑀅𑀜𑁆𑀜𑀁 𑀫𑀕𑁆𑀕𑀁 𑀅𑀧𑀲𑁆𑀲𑀦𑁆𑀢𑀻 𑀅𑀓𑀸𑀫𑀸 𑀑𑀯𑀸𑀤𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀢𑀲𑁆𑀲𑀸 𑀘𑀭𑀺𑀢𑀯𑀲𑁂𑀦 𑀇𑀤𑁆𑀥𑀺𑀬𑀸 𑀏𑀓𑀁 𑀇𑀢𑁆𑀣𑀺𑀭𑀽𑀧𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀩𑀻𑀚𑀫𑀸𑀦𑀁 𑀯𑀺𑀬 𑀅𑀓𑀸𑀲𑀺. 𑀭𑀽𑀧𑀦𑀦𑁆𑀤𑀸 𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀅𑀓𑀸𑀭𑀡𑁂𑀦𑁂𑀯 𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀦𑀸𑀕𑀘𑁆𑀙𑀸𑀫𑀺, 𑀏𑀯𑀭𑀽𑀧𑀸𑀧𑀺 𑀇𑀢𑁆𑀣𑀺𑀬𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀺𑀲𑁆𑀲𑀢𑁆𑀣𑀸 𑀘𑀭𑀦𑁆𑀢𑀺. 𑀫𑀫 𑀭𑀽𑀧𑀁 𑀏𑀢𑀸𑀲𑀁 𑀭𑀽𑀧𑀲𑁆𑀲 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁, 𑀅𑀚𑀸𑀦𑀺𑀢𑁆𑀯𑀸𑀯 𑀏𑀢𑁆𑀢𑀓𑀁 𑀓𑀸𑀮𑀁 𑀦 𑀆𑀕𑀢𑀫𑁆𑀳𑀻’’𑀢𑀺 𑀢𑀫𑁂𑀯 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀧𑀼𑀩𑁆𑀩𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬 ‘‘𑀅𑀝𑁆𑀞𑀻𑀦𑀁 𑀦𑀕𑀭𑀁 𑀓𑀢’’𑀦𑁆𑀢𑀺 (𑀥. 𑀧. 𑁧𑁫𑁦) 𑀥𑀫𑁆𑀫𑀧𑀤𑁂 𑀕𑀸𑀣𑀁 𑀯𑀢𑁆𑀯𑀸 𑁋

‘‘𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀁, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬’’𑀦𑁆𑀢𑀺. (𑀲𑀼. 𑀦𑀺. 𑁧𑁯𑁫) 𑁋

𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀲𑀸 𑀢𑀲𑁆𑀫𑀺𑀁𑀬𑁂𑀯 𑀭𑀽𑀧𑁂 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀁 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀔𑁂𑀫𑀸𑀣𑁂𑀭𑀺𑀬𑀸 𑀯𑀢𑁆𑀣𑀼𑀦𑀸 𑀲𑀤𑀺𑀲𑀫𑁂𑀯𑀸𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀁. 𑀢𑀢𑁄 𑀧𑀝𑁆𑀞𑀸𑀬, 𑀭𑀽𑀧𑀦𑀦𑁆𑀤𑀸, 𑀛𑀸𑀦𑀸𑀪𑀺𑀭𑀢𑀸𑀦𑀁 𑀅𑀦𑁆𑀢𑀭𑁂 𑀥𑀼𑀭𑀧𑁆𑀧𑀢𑁆𑀢𑀸 𑀅𑀳𑁄𑀲𑀺. 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀦𑀦𑁆𑀤𑀸𑀣𑁂𑀭𑀺𑀁 𑀛𑀸𑀬𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀲𑁄𑀡𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁧. 𑀲𑀢𑁆𑀢𑀫𑁂 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀦𑁆𑀢𑀺 𑀧𑀕𑁆𑀕𑀳𑀺𑀢𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀸𑀦𑀁 𑀲𑁄𑀡𑀸 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀖𑀭𑀸𑀯𑀸𑀲𑁂 𑀯𑀼𑀢𑁆𑀣𑀸 𑀩𑀳𑀽 𑀧𑀼𑀢𑁆𑀢𑀥𑀻𑀢𑀭𑁄 𑀮𑀪𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 ‘‘𑀫𑀸𑀢𑀸’’𑀢𑀺 𑀲𑀜𑁆𑀜𑀫𑁆𑀧𑀺 𑀦 𑀓𑀭𑀺𑀁𑀲𑀼. 𑀩𑀳𑀼𑀧𑀼𑀢𑁆𑀢𑀺𑀓𑀲𑁄𑀡𑀸 𑀢𑁂𑀲𑀁 𑀅𑀢𑁆𑀢𑀦𑀺 𑀅𑀕𑀸𑀭𑀯𑀪𑀸𑀯𑀁 𑀜𑀢𑁆𑀯𑀸 ‘‘𑀖𑀭𑀸𑀯𑀸𑀲𑁂𑀦 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀅𑀣 𑀦𑀁 𑀪𑀺𑀓𑁆𑀔𑀼𑀦𑀺𑀬𑁄 ‘‘𑀅𑀬𑀁 𑀯𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀅𑀬𑀼𑀢𑁆𑀢𑀁 𑀓𑀭𑁄𑀢𑀻’’𑀢𑀺 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀧𑀼𑀢𑁆𑀢𑀥𑀻𑀢𑀭𑁄 𑀢𑀁 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀬𑀸𑀯𑀚𑁆𑀚𑀤𑀺𑀯𑀲𑀸 𑀲𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀻’’𑀢𑀺 𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂 𑀉𑀧𑁆𑀧𑀡𑁆𑀟𑁂𑀲𑀼𑀁. 𑀲𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀸 ‘‘𑀅𑀢𑁆𑀢𑀦𑁄 𑀕𑀢𑀺𑀯𑀺𑀲𑁄𑀥𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀧𑀺 𑀞𑀺𑀢𑀝𑁆𑀞𑀸𑀦𑁂𑀧𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀢𑀺. 𑀲𑀸 𑀬𑀣𑁂𑀯 𑀧𑀼𑀩𑁆𑀩𑁂 𑀩𑀳𑀼𑀧𑀼𑀢𑁆𑀢𑀺𑀓𑀲𑁄𑀡𑀢𑁆𑀣𑁂𑀭𑀻𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀏𑀯𑀁 𑀧𑀘𑁆𑀙𑀸 𑀆𑀭𑀤𑁆𑀥𑀯𑀻𑀭𑀺𑀬𑀲𑁄𑀡𑀢𑁆𑀣𑁂𑀭𑀻𑀢𑀺 𑀧𑀸𑀓𑀝𑀸 𑀚𑀸𑀢𑀸.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺𑀬𑁄 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀉𑀤𑀓𑀁 𑀢𑀸𑀧𑁂𑀬𑁆𑀬𑀸𑀲𑀺, 𑀲𑁄𑀡𑁂’’𑀢𑀺 𑀯𑀢𑁆𑀯𑀸 𑀅𑀕𑀫𑀁𑀲𑀼. 𑀲𑀸𑀧𑀺 𑀉𑀤𑀓𑀢𑀸𑀧𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀅𑀕𑁆𑀕𑀺𑀲𑀸𑀮𑀸𑀬 𑀘𑀗𑁆𑀓𑀫𑀺𑀢𑁆𑀯𑀸 𑀘𑀗𑁆𑀓𑀫𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑀻 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀇𑀫𑀁 𑀑𑀪𑀸𑀲𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀥𑀫𑁆𑀫𑀫𑀼𑀢𑁆𑀢𑀫’’𑀦𑁆𑀢𑀺. (𑀥. 𑀧. 𑁧𑁧𑁫);

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀆𑀕𑀦𑁆𑀢𑀼𑀓𑀚𑀦𑁄 𑀘 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀯 𑀫𑀬𑀺 𑀅𑀯𑀜𑁆𑀜𑀸𑀬 𑀓𑀺𑀜𑁆𑀘𑀺 𑀯𑀢𑁆𑀯𑀸 𑀩𑀳𑀼𑀁 𑀅𑀧𑀼𑀜𑁆𑀜𑀫𑁆𑀧𑀺 𑀧𑀲𑀯𑁂𑀬𑁆𑀬, 𑀢𑀲𑁆𑀫𑀸 𑀲𑀁𑀮𑀓𑁆𑀔𑀡𑀓𑀸𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀸 𑀉𑀤𑀓𑀪𑀸𑀚𑀦𑀁 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀅𑀕𑁆𑀕𑀺𑀁 𑀦 𑀅𑀓𑀸𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀦𑀁 𑀑𑀮𑁄𑀓𑁂𑀦𑁆𑀢𑀺𑀬𑁄 𑀅𑀕𑁆𑀕𑀺𑀁 𑀅𑀤𑀺𑀲𑁆𑀯𑀸 ‘‘𑀇𑀫𑀁 𑀫𑀳𑀮𑁆𑀮𑀺𑀓𑀁 ‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀉𑀤𑀓𑀁 𑀢𑀸𑀧𑁂𑀳𑀻’𑀢𑀺 𑀅𑀯𑁄𑀘𑀼𑀫𑁆𑀳, 𑀅𑀚𑁆𑀚𑀸𑀧𑀺 𑀉𑀤𑁆𑀥𑀦𑁂 𑀅𑀕𑁆𑀕𑀺𑀫𑁆𑀧𑀺 𑀦 𑀓𑀭𑁄𑀢𑀻’’𑀢𑀺 𑀆𑀳𑀁𑀲𑀼. 𑀅𑀬𑁆𑀬𑁂, 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀅𑀕𑁆𑀕𑀺𑀦𑀸, 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑀼𑀓𑀸𑀫𑀸 𑀪𑀸𑀚𑀦𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀦𑁆𑀳𑀸𑀬𑀣𑀸𑀢𑀺? 𑀢𑀸𑀧𑀺 ‘‘𑀪𑀯𑀺𑀲𑁆𑀲𑀢𑀺 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀉𑀤𑀓𑁂 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀉𑀡𑁆𑀳𑀪𑀸𑀯𑀁 𑀜𑀢𑁆𑀯𑀸 𑀏𑀓𑀓𑀼𑀝𑀁 𑀆𑀳𑀭𑀺𑀢𑁆𑀯𑀸 𑀉𑀤𑀓𑀁 𑀕𑀡𑁆𑀳𑀦𑁆𑀢𑀺, 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑀢𑀺. 𑀢𑀤𑀸 𑀲𑀩𑁆𑀩𑀸𑀯 𑀢𑀲𑁆𑀲𑀸 𑀅𑀭𑀳𑀢𑁆𑀢𑁂 𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀤𑀳𑀭𑀢𑀭𑀸 𑀢𑀸𑀯 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀫𑀬𑀁, 𑀅𑀬𑁆𑀬𑁂, 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀼𑀫𑁆𑀳𑁂 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀓𑀣𑀬𑀺𑀫𑁆𑀳, 𑀔𑀫𑀣 𑀦𑁄’’𑀢𑀺 𑀔𑀫𑀸𑀧𑁂𑀲𑀼𑀁. 𑀯𑀼𑀤𑁆𑀥𑀢𑀭𑀸𑀧𑀺 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀔𑀫, 𑀅𑀬𑁆𑀬𑁂’’𑀢𑀺 𑀔𑀫𑀸𑀧𑁂𑀲𑀼𑀁. 𑀢𑀢𑁄 𑀧𑀝𑁆𑀞𑀸𑀬 ‘‘𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑀪𑀸𑀯𑁂𑀦 𑀦𑀘𑀺𑀭𑀲𑁆𑀲𑁂𑀯 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺 𑀣𑁂𑀭𑀺𑀬𑀸 𑀕𑀼𑀡𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀲𑁄𑀡𑀢𑁆𑀣𑁂𑀭𑀺𑀁 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀩𑀓𑀼𑀮𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁨. 𑀅𑀝𑁆𑀞𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀬𑀤𑀺𑀤𑀁 𑀩𑀓𑀼𑀮𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁, 𑀩𑀓𑀼𑀮𑀸 𑀣𑁂𑀭𑀻, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀫𑁆𑀳𑀺 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀇𑀫𑀁 𑀣𑁂𑀭𑀺𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀼𑀡𑁆𑀟𑀮𑀓𑁂𑀲𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁩. 𑀦𑀯𑀫𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀦𑁆𑀢𑀺 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁, 𑀪𑀤𑁆𑀤𑀸 𑀓𑀼𑀡𑁆𑀟𑀮𑀓𑁂𑀲𑀸, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀓𑀺𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀕𑁂𑀳𑁂 𑀲𑀢𑁆𑀢𑀦𑁆𑀦𑀁 𑀪𑀕𑀺𑀦𑀻𑀦𑀁 𑀅𑀩𑁆𑀪𑀦𑁆𑀢𑀭𑀸 𑀳𑀼𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀸𑀬 𑀓𑁄𑀫𑀸𑀭𑀺𑀓𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻 𑀲𑀗𑁆𑀖𑀲𑁆𑀲 𑀯𑀲𑀦𑀧𑀭𑀺𑀯𑁂𑀡𑀁 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀲𑁂𑀝𑁆𑀞𑀺𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀪𑀤𑁆𑀤𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼.

𑀢𑀁𑀤𑀺𑀯𑀲𑀁𑀬𑁂𑀯 𑀘 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀚𑀸𑀢𑁄. 𑀢𑀲𑁆𑀲 𑀚𑀸𑀢𑀯𑁂𑀮𑀸𑀬 𑀭𑀸𑀚𑀦𑀺𑀯𑁂𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀓𑀮𑀦𑀕𑀭𑁂 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼. 𑀧𑀼𑀭𑁄𑀳𑀺𑀢𑁄 𑀧𑀸𑀢𑁄𑀯 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺. 𑀭𑀸𑀚𑀸 ‘‘𑀓𑀼𑀢𑁄 𑀫𑁂, 𑀆𑀘𑀭𑀺𑀬, 𑀲𑀼𑀔𑀲𑁂𑀬𑁆𑀬𑀸, 𑀅𑀚𑁆𑀚 𑀲𑀩𑁆𑀩𑀭𑀢𑁆𑀢𑀺𑀁 𑀭𑀸𑀚𑀦𑀺𑀯𑁂𑀲𑀦𑁂 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀢𑀸𑀦𑀺 𑀤𑀺𑀲𑁆𑀯𑀸 𑀪𑀬𑀧𑁆𑀧𑀢𑁆𑀢𑀸 𑀅𑀳𑀼𑀫𑁆𑀳𑀸’’𑀢𑀺 𑀆𑀳. 𑀫𑀳𑀸𑀭𑀸𑀚, 𑀢𑀧𑁆𑀧𑀘𑁆𑀘𑀬𑀸 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀦 𑀢𑀼𑀫𑁆𑀳𑀸𑀓𑀁𑀬𑁂𑀯 𑀕𑁂𑀳𑁂 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼, 𑀲𑀓𑀮𑀦𑀕𑀭𑁂 𑀏𑀯𑀁 𑀅𑀳𑁄𑀲𑀻𑀢𑀺. 𑀓𑀺𑀁 𑀓𑀸𑀭𑀡𑀸, 𑀆𑀘𑀭𑀺𑀬𑀸𑀢𑀺? 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀘𑁄𑀭𑀦𑀓𑁆𑀔𑀢𑁆𑀢𑁂𑀦 𑀤𑀸𑀭𑀓𑁄 𑀚𑀸𑀢𑁄, 𑀲𑁄 𑀲𑀓𑀮𑀦𑀕𑀭𑀲𑁆𑀲 𑀲𑀢𑁆𑀢𑀼 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀢𑀼𑀫𑁆𑀳𑀸𑀓𑀁 𑀉𑀧𑀤𑁆𑀤𑀯𑁄 𑀦𑀢𑁆𑀣𑀺, 𑀲𑀘𑁂 𑀧𑀦 𑀇𑀘𑁆𑀙𑀣, 𑀳𑀸𑀭𑁂𑀫 𑀦𑀦𑁆𑀢𑀺. 𑀅𑀫𑁆𑀳𑀸𑀓𑀁 𑀧𑀻𑀴𑀸𑀬 𑀅𑀲𑀢𑀺𑀬𑀸 𑀳𑀸𑀭𑀡𑀓𑀫𑁆𑀫𑀁 𑀦𑀢𑁆𑀣𑀻𑀢𑀺. 𑀧𑀼𑀭𑁄𑀳𑀺𑀢𑁄 ‘‘𑀫𑀫 𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀦𑀸𑀫𑀁 𑀕𑀳𑁂𑀢𑁆𑀯𑀸𑀯 𑀆𑀕𑀢𑁄’’𑀢𑀺 𑀲𑀢𑁆𑀢𑀼𑀓𑁄𑀢𑁂𑀯𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀲𑁂𑀝𑁆𑀞𑀺𑀕𑁂𑀳𑁂𑀧𑀺 𑀪𑀤𑁆𑀤𑀸 𑀯𑀟𑁆𑀠𑀢𑀺, 𑀧𑀼𑀭𑁄𑀳𑀺𑀢𑀕𑁂𑀳𑁂𑀧𑀺 𑀲𑀢𑁆𑀢𑀼𑀓𑁄 𑀯𑀟𑁆𑀠𑀢𑀺. 𑀲𑁄 𑀅𑀢𑁆𑀢𑀦𑁄 𑀆𑀥𑀸𑀯𑀦𑀯𑀺𑀥𑀸𑀯𑀦𑁂𑀦 𑀓𑀻𑀴𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀯𑀺𑀘𑀭𑀡𑀝𑁆𑀞𑀸𑀦𑁂 𑀬𑀁 𑀬𑀁 𑀧𑀲𑁆𑀲𑀢𑀺, 𑀢𑀁 𑀢𑀁 𑀲𑀩𑁆𑀩𑀁 𑀆𑀳𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀕𑁂𑀳𑀁 𑀧𑀽𑀭𑁂𑀢𑀺. 𑀧𑀺𑀢𑀸 𑀦𑀁 𑀓𑀸𑀭𑀡𑀲𑀳𑀲𑁆𑀲𑀫𑁆𑀧𑀺 𑀯𑀢𑁆𑀯𑀸 𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀅𑀧𑀭𑀪𑀸𑀕𑁂 𑀧𑀦𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦𑀸𑀧𑀺 𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀁 𑀜𑀢𑁆𑀯𑀸 𑀤𑁆𑀯𑁂 𑀦𑀻𑀮𑀲𑀸𑀝𑀓𑁂 𑀤𑀢𑁆𑀯𑀸 𑀲𑀦𑁆𑀥𑀺𑀘𑁆𑀙𑁂𑀤𑀦𑀉𑀧𑀓𑀭𑀡𑀜𑁆𑀘 𑀲𑀺𑀗𑁆𑀖𑀸𑀝𑀓𑀬𑀦𑁆𑀢𑀜𑁆𑀘 𑀳𑀢𑁆𑀣𑁂 𑀤𑀢𑁆𑀯𑀸 ‘‘𑀢𑁆𑀯𑀁 𑀇𑀫𑀺𑀦𑀸𑀯 𑀓𑀫𑁆𑀫𑁂𑀦 𑀚𑀻𑀯𑀸𑀳𑀻’’𑀢𑀺 𑀦𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀢𑀁𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀺𑀗𑁆𑀖𑀸𑀝𑀓𑀬𑀦𑁆𑀢𑀁 𑀔𑀺𑀧𑀺𑀢𑁆𑀯𑀸 𑀓𑀼𑀮𑀸𑀦𑀁 𑀧𑀸𑀲𑀸𑀤𑁂 𑀆𑀭𑀼𑀬𑁆𑀳 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀓𑀼𑀮𑁂𑀲𑀼 𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀁 𑀅𑀢𑁆𑀢𑀦𑀸 𑀞𑀧𑀺𑀢𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑀓𑀮𑀦𑀕𑀭𑁂 𑀢𑁂𑀦 𑀅𑀯𑀺𑀮𑀼𑀢𑁆𑀢𑀕𑁂𑀳𑀁 𑀦𑀸𑀫 𑀦𑀸𑀳𑁄𑀲𑀺. 𑀏𑀓𑀤𑀺𑀯𑀲𑀁 𑀭𑀸𑀚𑀸 𑀭𑀣𑁂𑀦 𑀦𑀕𑀭𑁂 𑀯𑀺𑀘𑀭𑀦𑁆𑀢𑁄 𑀲𑀸𑀭𑀣𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀖𑀭𑁂 𑀙𑀺𑀤𑁆𑀤𑀫𑁂𑀯 𑀧𑀜𑁆𑀜𑀸𑀬𑀢𑀻’’𑀢𑀺. 𑀤𑁂𑀯 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀲𑀢𑁆𑀢𑀼𑀓𑁄 𑀦𑀸𑀫 𑀘𑁄𑀭𑁄 𑀪𑀺𑀢𑁆𑀢𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀮𑀸𑀦𑀁 𑀲𑀦𑁆𑀢𑀓𑀁 𑀳𑀭𑀢𑀻𑀢𑀺. 𑀭𑀸𑀚𑀸 𑀦𑀕𑀭𑀕𑀼𑀢𑁆𑀢𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀺𑀭 𑀦𑀕𑀭𑁂 𑀏𑀯𑀭𑀽𑀧𑁄 𑀦𑀸𑀫 𑀘𑁄𑀭𑁄 𑀅𑀢𑁆𑀣𑀺, 𑀓𑀲𑁆𑀫𑀸 𑀦𑀁 𑀦 𑀕𑀡𑁆𑀳𑀲𑀻’’𑀢𑀺 𑀆𑀳. 𑀫𑀬𑀁, 𑀤𑁂𑀯, 𑀢𑀁 𑀘𑁄𑀭𑀁 𑀲𑀳𑁄𑀟𑁆𑀠𑀁 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀸𑀢𑀺. 𑀲𑀘𑁂 𑀅𑀚𑁆𑀚 𑀦𑀁 𑀘𑁄𑀭𑀁 𑀕𑀡𑁆𑀳𑀲𑀺, 𑀚𑀻𑀯𑀲𑀺. 𑀲𑀘𑁂 𑀦 𑀕𑀡𑁆𑀳𑀲𑀺, 𑀭𑀸𑀚𑀸𑀡𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀤𑁂𑀯𑀸𑀢𑀺 𑀦𑀕𑀭𑀕𑀼𑀢𑁆𑀢𑀺𑀓𑁄 𑀲𑀓𑀮𑀦𑀕𑀭𑁂 𑀫𑀦𑀼𑀲𑁆𑀲𑁂 𑀘𑀸𑀭𑁂𑀢𑁆𑀯𑀸 𑀢𑀁 𑀪𑀺𑀢𑁆𑀢𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀪𑀡𑁆𑀟𑀁 𑀅𑀯𑀳𑀭𑀦𑁆𑀢𑀁 𑀲𑀳𑁄𑀟𑁆𑀠𑀫𑁂𑀯 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺. 𑀭𑀸𑀚𑀸 ‘‘𑀇𑀫𑀁 𑀘𑁄𑀭𑀁 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀻𑀳𑀭𑀺𑀢𑁆𑀯𑀸 𑀖𑀸𑀢𑁂𑀣𑀸’’𑀢𑀺 𑀆𑀳. 𑀦𑀕𑀭𑀕𑀼𑀢𑁆𑀢𑀺𑀓𑁄 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀁 𑀘𑁄𑀭𑀁 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀧𑀳𑀸𑀭𑀲𑀳𑀲𑁆𑀲𑁂𑀦 𑀢𑀸𑀴𑁂𑀦𑁆𑀢𑁄 𑀕𑀸𑀳𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀕𑀘𑁆𑀙𑀢𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀅𑀬𑀁 𑀪𑀤𑁆𑀤𑀸 𑀦𑀸𑀫 𑀲𑁂𑀝𑁆𑀞𑀺𑀥𑀻𑀢𑀸 𑀫𑀳𑀸𑀚𑀦𑀲𑁆𑀲 𑀓𑁄𑀮𑀸𑀳𑀮𑀲𑀤𑁆𑀤𑁂𑀦 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀲𑀢𑁆𑀢𑀼𑀓𑀁 𑀘𑁄𑀭𑀁 𑀢𑀣𑀸 𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀳𑀤𑀬𑀁 𑀲𑀦𑁆𑀥𑀸𑀭𑁂𑀦𑁆𑀢𑀻 𑀕𑀦𑁆𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀅𑀥𑁄𑀫𑀼𑀔𑀸 𑀦𑀺𑀧𑀚𑁆𑀚𑀺. 𑀲𑀸 𑀘 𑀢𑀲𑁆𑀲 𑀓𑀼𑀮𑀲𑁆𑀲 𑀏𑀓𑀥𑀻𑀢𑀸, 𑀢𑁂𑀦𑀲𑁆𑀲𑀸 𑀜𑀸𑀢𑀓𑀸 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀫𑀼𑀔𑀯𑀺𑀓𑀸𑀭𑀁 𑀲𑀳𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀦𑀁 𑀫𑀸𑀢𑀸 𑀲𑀬𑀦𑁂 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀺, 𑀅𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. 𑀏𑀢𑀁 𑀯𑀚𑁆𑀛𑀁 𑀓𑀢𑁆𑀯𑀸 𑀦𑀻𑀬𑀫𑀸𑀦𑀁 𑀘𑁄𑀭𑀁 𑀅𑀤𑁆𑀤𑀲, 𑀅𑀫𑁆𑀫𑀸𑀢𑀺? 𑀆𑀫, 𑀅𑀫𑁆𑀫𑀸𑀢𑀺. 𑀏𑀢𑀁 𑀮𑀪𑀫𑀸𑀦𑀸 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀫𑀸𑀦𑀸𑀬 𑀫𑁂 𑀫𑀭𑀡𑀫𑁂𑀯𑀸𑀢𑀺. 𑀢𑁂 𑀢𑀁 𑀦𑀸𑀦𑀧𑁆𑀧𑀓𑀸𑀭𑁂𑀦𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀫𑀭𑀡𑀸 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀲𑀼𑀁. 𑀅𑀣𑀲𑁆𑀲𑀸 𑀧𑀺𑀢𑀸 𑀦𑀕𑀭𑀕𑀼𑀢𑁆𑀢𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀳𑀲𑁆𑀲𑀁 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀫𑀬𑁆𑀳𑀁 𑀥𑀻𑀢𑀸 𑀘𑁄𑀭𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀇𑀫𑀁 𑀫𑀼𑀜𑁆𑀘𑀸’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑁂𑀝𑁆𑀞𑀺𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀬𑀸𑀯 𑀲𑀽𑀭𑀺𑀬𑀲𑁆𑀲 𑀅𑀢𑁆𑀣𑀗𑁆𑀕𑀫𑀦𑀸 𑀇𑀢𑁄 𑀘𑀺𑀢𑁄 𑀘 𑀧𑀧𑀜𑁆𑀘𑀸𑀧𑁂𑀢𑁆𑀯𑀸 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀘𑀸𑀭𑀓𑀢𑁄 𑀏𑀓𑀁 𑀫𑀦𑀼𑀲𑁆𑀲𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀲𑀢𑁆𑀢𑀼𑀓𑀲𑁆𑀲 𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀲𑀢𑁆𑀢𑀼𑀓𑀁 𑀲𑁂𑀝𑁆𑀞𑀺𑀕𑁂𑀳𑀁 𑀧𑁂𑀲𑁂𑀢𑁆𑀯𑀸 𑀢𑁂𑀦 𑀩𑀦𑁆𑀥𑀦𑁂𑀦 𑀇𑀢𑀭𑀁 𑀩𑀦𑁆𑀥𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀻𑀳𑀭𑀺𑀢𑁆𑀯𑀸 𑀖𑀸𑀢𑁂𑀲𑀺. 𑀲𑁂𑀝𑁆𑀞𑀺𑀤𑀸𑀲𑀸𑀧𑀺 𑀲𑀢𑁆𑀢𑀼𑀓𑀁 𑀕𑀳𑁂𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀦𑀺𑀯𑁂𑀲𑀦𑀁 𑀆𑀕𑀫𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀲𑁂𑀝𑁆𑀞𑀺 ‘‘𑀥𑀻𑀢𑀼 𑀫𑀦𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀼𑀓𑀁 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀓𑀸𑀭𑁂𑀢𑁆𑀯𑀸 𑀧𑀸𑀲𑀸𑀤𑀁 𑀧𑁂𑀲𑁂𑀲𑀺. 𑀪𑀤𑁆𑀤𑀸𑀧𑀺 ‘‘𑀧𑀭𑀺𑀧𑀼𑀡𑁆𑀡𑁄 𑀫𑁂 𑀲𑀗𑁆𑀓𑀧𑁆𑀧𑁄’’𑀢𑀺 𑀅𑀦𑁂𑀓𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀁 𑀧𑀭𑀺𑀘𑀭𑀢𑀺.

𑀲𑀢𑁆𑀢𑀼𑀓𑁄 𑀓𑀢𑀺𑀧𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀺𑀲𑁆𑀲𑀸 𑀧𑀲𑀸𑀥𑀦𑀪𑀡𑁆𑀟𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀇𑀫𑀁 𑀆𑀪𑀭𑀡𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀫𑀻𑀧𑁂 𑀲𑀼𑀔𑁂𑀦 𑀦𑀺𑀲𑀺𑀦𑁆𑀦𑀓𑀸𑀮𑁂 𑀪𑀤𑁆𑀤𑀁 𑀆𑀳 𑁋 ‘‘𑀫𑀬𑁆𑀳𑀁 𑀏𑀓𑀁 𑀯𑀘𑀦𑀁 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀲𑀳𑀲𑁆𑀲𑀮𑀸𑀪𑀁 𑀮𑀪𑀺𑀢𑁆𑀯𑀸 𑀯𑀺𑀬 𑀢𑀼𑀝𑁆𑀞𑀫𑀸𑀦𑀲𑀸 ‘‘𑀯𑀺𑀲𑁆𑀲𑀢𑁆𑀣𑀁 𑀯𑀤𑁂𑀳𑀺, 𑀅𑀬𑁆𑀬𑀸’’𑀢𑀺 𑀆𑀳. 𑀢𑁆𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀁 𑀦𑀺𑀲𑁆𑀲𑀸𑀬 𑀇𑀫𑀺𑀦𑀸 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺, 𑀅𑀳𑀁 𑀧𑀦 𑀕𑀳𑀺𑀢𑀫𑀢𑁆𑀢𑁄𑀯 𑀘𑁄𑀭𑀧𑀧𑀸𑀢𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 ‘‘𑀲𑀘𑀸𑀳𑀁 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀩𑀮𑀺𑀓𑀫𑁆𑀫𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀆𑀬𑀸𑀘𑀺𑀁. 𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥𑀁, 𑀲𑀻𑀖𑀁 𑀩𑀮𑀺𑀓𑀫𑁆𑀫𑀁 𑀲𑀚𑁆𑀚𑀸𑀧𑁂𑀳𑀻𑀢𑀺. 𑀪𑀤𑁆𑀤𑀸, ‘‘𑀅𑀳𑀁 𑀢𑀲𑁆𑀲 𑀫𑀦𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀩𑀮𑀺𑀓𑀫𑁆𑀫𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀏𑀓𑀬𑀸𑀦𑁂 𑀆𑀭𑀼𑀬𑁆𑀳 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀘𑁄𑀭𑀧𑀧𑀸𑀢𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 ‘‘𑀧𑀩𑁆𑀩𑀢𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀭𑀼𑀳𑀺𑀢𑀼𑀁 𑀆𑀭𑀤𑁆𑀥𑀸. 𑀲𑀢𑁆𑀢𑀼𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀩𑁆𑀩𑁂𑀲𑀼 𑀅𑀪𑀺𑀭𑀼𑀳𑀦𑁆𑀢𑁂𑀲𑀼 𑀫𑀫 𑀇𑀫𑀺𑀲𑁆𑀲𑀸 𑀆𑀪𑀭𑀡𑀁 𑀕𑀳𑁂𑀢𑀼𑀁 𑀦 𑀑𑀓𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀫𑁂𑀯 𑀩𑀮𑀺𑀪𑀸𑀚𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺.

𑀲𑁄 𑀪𑀤𑁆𑀤𑀸𑀬 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀧𑀺𑀬𑀓𑀣𑀁 𑀦 𑀓𑀣𑁂𑀢𑀺. 𑀲𑀸 𑀇𑀗𑁆𑀕𑀺𑀢𑁂𑀦𑁂𑀯 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀜𑁆𑀜𑀸𑀲𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀪𑀤𑁆𑀤𑁂, 𑀢𑀯 𑀉𑀢𑁆𑀢𑀭𑀺𑀲𑀸𑀝𑀓𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀓𑀸𑀬𑀸𑀭𑀼𑀴𑁆𑀳𑀁 𑀢𑁂 𑀧𑀲𑀸𑀥𑀦𑀁 𑀏𑀢𑁆𑀣 𑀪𑀡𑁆𑀟𑀺𑀓𑀁 𑀓𑀭𑁄𑀳𑀻’’𑀢𑀺. 𑀲𑀸𑀫𑀺 𑀫𑀬𑁆𑀳𑀁 𑀓𑁄 𑀅𑀧𑀭𑀸𑀥𑁄𑀢𑀺? 𑀓𑀺𑀁 𑀧𑀦𑀸𑀳𑀁, 𑀩𑀸𑀮𑁂, 𑀩𑀮𑀺𑀓𑀫𑁆𑀫𑀢𑁆𑀣𑀁 𑀆𑀕𑀢𑁄𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺? 𑀅𑀳𑀜𑁆𑀳𑀺 𑀇𑀫𑀺𑀲𑁆𑀲𑀸 𑀤𑁂𑀯𑀢𑀸𑀬 𑀬𑀓𑀦𑀁 𑀉𑀩𑁆𑀩𑀝𑁆𑀞𑁂𑀢𑁆𑀯𑀸 𑀤𑀤𑁂𑀬𑁆𑀬𑀁, 𑀩𑀮𑀺𑀓𑀫𑁆𑀫𑀸𑀧𑀤𑁂𑀲𑁂𑀦 𑀧𑀦 𑀢𑀯 𑀆𑀪𑀭𑀡𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀆𑀕𑀢𑁄𑀫𑁆𑀳𑀻𑀢𑀺. 𑀓𑀲𑁆𑀲 𑀧𑀦, 𑀅𑀬𑁆𑀬, 𑀧𑀲𑀸𑀥𑀦𑀁, 𑀓𑀲𑁆𑀲 𑀅𑀳𑀦𑁆𑀢𑀺? 𑀫𑀬𑀁 𑀏𑀯𑀭𑀽𑀧𑀁 𑀦 𑀚𑀸𑀦𑀸𑀫, 𑀅𑀜𑁆𑀜𑀁 𑀢𑀯 𑀲𑀦𑁆𑀢𑀓𑀁, 𑀅𑀜𑁆𑀜𑀁 𑀫𑀫 𑀲𑀦𑁆𑀢𑀓𑀦𑁆𑀢𑀺. 𑀲𑀸𑀥𑀼, 𑀅𑀬𑁆𑀬, 𑀏𑀓𑀁 𑀧𑀦 𑀫𑁂 𑀅𑀥𑀺𑀧𑁆𑀧𑀸𑀬𑀁 𑀧𑀽𑀭𑁂𑀣, 𑀅𑀮𑀗𑁆𑀓𑀢𑀦𑀺𑀬𑀸𑀫𑁂𑀦𑁂𑀯 𑀫𑁂 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀆𑀮𑀺𑀗𑁆𑀕𑀺𑀢𑀼𑀁 𑀤𑁂𑀣𑀸𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁 𑀜𑀢𑁆𑀯𑀸 𑀧𑀼𑀭𑀢𑁄 𑀆𑀮𑀺𑀗𑁆𑀕𑀺𑀢𑁆𑀯𑀸 𑀧𑀘𑁆𑀙𑀢𑁄 𑀆𑀮𑀺𑀗𑁆𑀕𑀦𑁆𑀢𑀻 𑀯𑀺𑀬 𑀳𑀼𑀢𑁆𑀯𑀸 𑀧𑀩𑁆𑀩𑀢𑀧𑀧𑀸𑀢𑁂 𑀧𑀸𑀢𑁂𑀲𑀺. 𑀲𑁄 𑀧𑀢𑀦𑁆𑀢𑁄 𑀆𑀓𑀸𑀲𑁂𑀬𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑁄 𑀅𑀳𑁄𑀲𑀺. 𑀢𑀸𑀬 𑀓𑀢𑀁 𑀯𑀺𑀘𑀺𑀢𑁆𑀭𑀪𑀸𑀯𑀁 𑀤𑀺𑀲𑁆𑀯𑀸 𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀕𑀼𑀡𑀓𑀺𑀢𑁆𑀢𑀦𑀯𑀲𑁂𑀦 𑀇𑀫𑀸 𑀕𑀸𑀣𑀸 𑀆𑀳 𑁋

‘‘𑀦 𑀲𑁄 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸.

‘‘𑀦 𑀲𑁄 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀘𑀺𑀦𑁆𑀢𑀬𑁂’’𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁩𑁧-𑁩𑁨);

𑀢𑀢𑁄 𑀪𑀤𑁆𑀤𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀲𑀓𑁆𑀓𑀸 𑀫𑀬𑀸 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀧𑀼𑀦 𑀕𑁂𑀳𑀁 𑀕𑀦𑁆𑀢𑀼𑀁, 𑀇𑀢𑁄𑀯 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺, 𑀦𑀺𑀕𑀡𑁆𑀞𑀸𑀭𑀸𑀫𑀁 𑀕𑀦𑁆𑀢𑁆𑀯𑀸 𑀦𑀺𑀕𑀡𑁆𑀞𑁂 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀢𑁂 𑀆𑀳𑀁𑀲𑀼 𑁋 ‘‘𑀓𑁂𑀦 𑀦𑀺𑀬𑀸𑀫𑁂𑀦 𑀧𑀩𑁆𑀩𑀚𑁆𑀚𑀸 𑀳𑁄𑀢𑀽’’𑀢𑀺? 𑀬𑀁 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸𑀬 𑀉𑀢𑁆𑀢𑀫𑀁, 𑀢𑀤𑁂𑀯 𑀓𑀭𑁄𑀣𑀸𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀢𑀲𑁆𑀲𑀸 𑀢𑀸𑀮𑀝𑁆𑀞𑀺𑀦𑀸 𑀓𑁂𑀲𑁂 𑀮𑀼𑀜𑁆𑀘𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀼𑀁. 𑀓𑁂𑀲𑀸 𑀧𑀼𑀦 𑀯𑀟𑁆𑀠𑀦𑁆𑀢𑀸 𑀭𑀸𑀲𑀺𑀭𑀸𑀲𑀺𑀯𑀲𑁂𑀦 𑀓𑀼𑀡𑁆𑀟𑀮𑀸𑀯𑀢𑁆𑀢𑀸 𑀳𑀼𑀢𑁆𑀯𑀸 𑀯𑀟𑁆𑀠𑀺𑀁𑀲𑀼. 𑀲𑀸 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀓𑀼𑀡𑁆𑀟𑀮𑀓𑁂𑀲𑀸 𑀦𑀸𑀫 𑀚𑀸𑀢𑀸. 𑀲𑀸 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀝𑁆𑀞𑀸𑀦𑁂 𑀲𑀩𑁆𑀩𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀏𑀢𑁂𑀲𑀁 𑀇𑀢𑁄 𑀉𑀢𑁆𑀢𑀭𑀺 𑀯𑀺𑀲𑁂𑀲𑁄 𑀦𑀢𑁆𑀣𑀻’’𑀢𑀺 𑀜𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀯𑀺𑀘𑀭𑀦𑁆𑀢𑀻 𑀬𑀢𑁆𑀣 𑀬𑀢𑁆𑀣 𑀧𑀡𑁆𑀟𑀺𑀢𑀸 𑀅𑀢𑁆𑀣𑀺, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀚𑀸𑀦𑀦𑀲𑀺𑀧𑁆𑀧𑀁 𑀲𑀩𑁆𑀩𑀫𑁂𑀯 𑀉𑀕𑁆𑀕𑀡𑁆𑀳𑀸𑀢𑀺. 𑀅𑀣𑀲𑁆𑀲𑀸 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀲𑀺𑀓𑁆𑀔𑀺𑀢𑀪𑀸𑀯𑁂𑀦 𑀧𑀝𑀺𑀯𑀸𑀤𑀁 𑀤𑀸𑀢𑀼𑀁 𑀲𑀫𑀢𑁆𑀣𑀸 𑀦 𑀳𑁄𑀦𑁆𑀢𑀺. 𑀲𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀯𑀺𑀲𑀢𑀺, 𑀢𑀲𑁆𑀲 𑀤𑁆𑀯𑀸𑀭𑁂 𑀯𑀸𑀮𑀼𑀓𑀭𑀸𑀲𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀚𑀫𑁆𑀩𑀼𑀲𑀸𑀔𑀁 𑀞𑀧𑁂𑀢𑀺. ‘‘𑀬𑁄 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀇𑀫𑀁 𑀲𑀸𑀔𑀁 𑀫𑀤𑁆𑀤𑀢𑀽’’𑀢𑀺 𑀲𑀫𑀻𑀧𑁂 𑀞𑀺𑀢𑀸𑀦𑀁 𑀤𑀸𑀭𑀓𑀸𑀦𑀁 𑀲𑀜𑁆𑀜𑀁 𑀤𑁂𑀢𑀺. 𑀢𑀁 𑀲𑀢𑁆𑀢𑀸𑀳𑀫𑁆𑀧𑀺 𑀫𑀤𑁆𑀤𑀦𑁆𑀢𑀸 𑀦 𑀳𑁄𑀦𑁆𑀢𑀺. 𑀅𑀣 𑀦𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀢𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺. 𑀓𑀼𑀡𑁆𑀟𑀮𑀓𑁂𑀲𑀸𑀧𑀺 𑀔𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀫𑀸𑀦𑀸 𑀧𑁄𑀭𑀸𑀡𑀓𑀦𑀺𑀬𑀸𑀫𑁂𑀦𑁂𑀯 𑀯𑀸𑀮𑀼𑀓𑀸𑀭𑀸𑀲𑀺𑀫𑁆𑀳𑀺 𑀲𑀸𑀔𑀁 𑀞𑀧𑁂𑀢𑁆𑀯𑀸 𑀤𑀸𑀭𑀓𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀲𑁂𑀦𑀸𑀧𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀯𑀺𑀝𑁆𑀞𑁂 𑀏𑀓𑀓𑁄𑀯 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀯𑀸𑀮𑀼𑀓𑀸𑀣𑀽𑀧𑁂 𑀚𑀫𑁆𑀩𑀼𑀲𑀸𑀔𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀅𑀬𑀁 𑀞𑀧𑀺𑀢𑀸’’𑀢𑀺 𑀧𑀼𑀘𑁆𑀙𑀺. 𑀤𑀸𑀭𑀓𑀸 𑀢𑀁 𑀓𑀸𑀭𑀡𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀓𑀣𑁂𑀲𑀼𑀁. 𑀏𑀯𑀁 𑀲𑀦𑁆𑀢𑁂 𑀇𑀫𑀁 𑀕𑀳𑁂𑀢𑁆𑀯𑀸 𑀫𑀤𑁆𑀤𑀣, 𑀤𑀸𑀭𑀓𑀸𑀢𑀺. 𑀢𑁂𑀲𑀼 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀓𑀘𑁆𑀘𑁂 𑀫𑀤𑁆𑀤𑀺𑀢𑀼𑀁 𑀦 𑀯𑀺𑀲𑀳𑀺𑀁𑀲𑀼, 𑀏𑀓𑀘𑁆𑀘𑁂 𑀢𑀁𑀔𑀡𑁂𑀬𑁂𑀯 𑀫𑀤𑁆𑀤𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀅𑀓𑀁𑀲𑀼. 𑀓𑀼𑀡𑁆𑀟𑀮𑀓𑁂𑀲𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀻 𑀢𑀁 𑀲𑀸𑀔𑀁 𑀫𑀤𑁆𑀤𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲𑁂𑀢𑀁 𑀓𑀫𑁆𑀫’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀓𑀸𑀭𑀸𑀧𑀺𑀢𑀪𑀸𑀯𑀁 𑀓𑀣𑀬𑀺𑀁𑀲𑀼. 𑀲𑀸 ‘‘𑀅𑀢𑁆𑀢𑀦𑁄 𑀣𑀸𑀫𑀁 𑀅𑀚𑀸𑀦𑀦𑁆𑀢𑁄 𑀇𑀫𑀁 𑀲𑀸𑀔𑀁 𑀫𑀤𑁆𑀤𑀸𑀧𑁂𑀢𑀼𑀁 𑀦𑁄 𑀯𑀺𑀲𑀳𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀫𑀳𑀦𑁆𑀢𑁄 𑀏𑀲𑁄 𑀪𑀯𑀺𑀲𑁆𑀲𑀢𑀺. 𑀅𑀳𑀫𑁆𑀧𑀺 𑀧𑀦 𑀔𑀼𑀤𑁆𑀤𑀺𑀓𑀸 𑀪𑀯𑀦𑁆𑀢𑀻 𑀦 𑀲𑁄𑀪𑀺𑀲𑁆𑀲𑀸𑀫𑀺, 𑀅𑀦𑁆𑀢𑁄𑀕𑀸𑀫𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀧𑀭𑀺𑀲𑀸𑀬 𑀲𑀜𑁆𑀜𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀅𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀦𑀺𑀯𑀸𑀲𑁂 𑀦𑀕𑀭𑁂 𑀲𑀪𑀸𑀕𑀲𑀪𑀸𑀕𑀯𑀲𑁂𑀦 𑀲𑀩𑁆𑀩𑁂𑀯 𑀲𑀜𑁆𑀚𑀸𑀦𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀣𑁂𑀭𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣𑀸𑀬𑀁 𑀓𑀼𑀡𑁆𑀟𑀮𑀓𑁂𑀲𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀲𑀸𑀔𑀸 𑀫𑀤𑁆𑀤𑀸𑀧𑀺𑀢𑀸’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀫𑀬𑀸 𑀫𑀤𑁆𑀤𑀸𑀧𑀺𑀢𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀯𑀸𑀤𑁄 𑀳𑁄𑀢𑀼, 𑀪𑀦𑁆𑀢𑁂𑀢𑀺. 𑀳𑁄𑀢𑀼, 𑀪𑀤𑁆𑀤𑁂𑀢𑀺. 𑀓𑀲𑁆𑀲 𑀧𑀼𑀘𑁆𑀙𑀸 𑀳𑁄𑀢𑀼, 𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺? 𑀧𑀼𑀘𑁆𑀙𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀧𑀢𑁆𑀢𑀸, 𑀢𑁆𑀯𑀁 𑀧𑀦 𑀢𑀼𑀬𑁆𑀳𑀁 𑀚𑀸𑀦𑀦𑀓𑀁 𑀧𑀼𑀘𑁆𑀙𑀸𑀢𑀺. 𑀲𑀸 𑀣𑁂𑀭𑁂𑀦 𑀤𑀺𑀦𑁆𑀦𑀅𑀦𑀼𑀫𑀢𑀺𑀬𑀸 𑀲𑀩𑁆𑀩𑀫𑁂𑀯 𑀅𑀢𑁆𑀢𑀦𑁄 𑀚𑀸𑀦𑀦𑀓𑀁 𑀯𑀸𑀤𑀁 𑀧𑀼𑀘𑁆𑀙𑀺, 𑀣𑁂𑀭𑁄 𑀲𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀸 𑀲𑀩𑁆𑀩𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀢𑀬𑀸 𑀩𑀳𑀼𑀁 𑀧𑀼𑀘𑁆𑀙𑀺𑀢𑀁, 𑀫𑀬𑀫𑁆𑀧𑀺 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀸𑀫𑀸’’𑀢𑀺. 𑀧𑀼𑀘𑁆𑀙𑀣, 𑀪𑀦𑁆𑀢𑁂𑀢𑀺. 𑀏𑀓𑀁 𑀦𑀸𑀫 𑀓𑀺𑀦𑁆𑀢𑀺? 𑀓𑀼𑀡𑁆𑀟𑀮𑀓𑁂𑀲𑀸 ‘‘𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀢𑁆𑀯𑀁 𑀏𑀢𑁆𑀢𑀓𑀫𑁆𑀧𑀺 𑀦 𑀚𑀸𑀦𑀸𑀲𑀺, 𑀅𑀜𑁆𑀜𑀁 𑀓𑀺𑀁 𑀚𑀸𑀦𑀺𑀲𑁆𑀲𑀲𑀻𑀢𑀺? 𑀲𑀸 𑀣𑁂𑀭𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀫𑀫 𑀲𑀭𑀡𑀕𑀫𑀦𑀓𑀫𑁆𑀫𑀁 𑀦𑀢𑁆𑀣𑀺, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀥𑀼𑀭𑀯𑀺𑀳𑀸𑀭𑁂 𑀯𑀲𑀢𑀺, 𑀢𑀁 𑀲𑀭𑀡𑀁 𑀕𑀘𑁆𑀙𑀸𑀳𑀻𑀢𑀺. 𑀲𑀸 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀸𑀬 𑀘𑀭𑀺𑀬𑀸𑀯𑀲𑁂𑀦 𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀻’’𑀢𑀺. (𑀥. 𑀧. 𑁧𑁦𑁧);

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀞𑀺𑀢𑀸𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀧𑀩𑁆𑀩𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀅𑀧𑀭𑀪𑀸𑀕𑁂 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀫𑀳𑀦𑁆𑀢𑀸 𑀯𑀢𑀸𑀬𑀁 𑀪𑀤𑁆𑀤𑀸 𑀓𑀼𑀡𑁆𑀟𑀮𑀓𑁂𑀲𑀸, 𑀬𑀸 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸’’𑀢𑀺. 𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀺𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻𑀣𑁂𑀭𑀻𑀯𑀢𑁆𑀣𑀼

𑁨𑁪𑁪. 𑀤𑀲𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑀻𑀦𑀁 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀦𑁆𑀢𑀻 𑀢𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀤𑀺𑀦𑁆𑀦𑁂, ‘‘𑀅𑀬𑀁 𑀇𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀫𑀳𑀸𑀚𑀦𑁄 ‘‘𑀩𑀸𑀮𑀸 𑀅𑀬’’𑀦𑁆𑀢𑀺 𑀕𑀭𑀳𑀺𑀢𑁆𑀯𑀸, ‘‘𑀬𑀸𑀬 𑀢𑁂 𑀲𑀤𑁆𑀥𑀺𑀁 𑀓𑀮𑀳𑁄 𑀓𑀢𑁄, 𑀢𑀲𑁆𑀲𑀸 𑀓𑀺𑀜𑁆𑀘𑀺 𑀦 𑀓𑀭𑁄𑀲𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑁂 𑀓𑀺𑀁 𑀅𑀧𑀭𑀚𑁆𑀛𑀢𑀻’’𑀢𑀺 𑀆𑀳. 𑀲𑀸 𑀢𑁂𑀲𑀁 𑀯𑀘𑀦𑁂𑀦 𑀮𑀚𑁆𑀚𑀸𑀬𑀫𑀸𑀦𑀸 𑀧𑀼𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀮𑀮𑀁 𑀳𑀸𑀭𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑁂𑀦 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀘𑀢𑀼𑀫𑀥𑀼𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀧𑀭𑀺 𑀆𑀲𑀺𑀢𑁆𑀢𑁂𑀦 𑀧𑀤𑀼𑀫𑀕𑀩𑁆𑀪𑀯𑀡𑁆𑀡𑁂𑀦 𑀲𑀧𑁆𑀧𑀺𑀦𑀸 𑀯𑀺𑀚𑁆𑀚𑁄𑀢𑀫𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀬𑀣𑀸 𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀑𑀪𑀸𑀲𑀚𑀸𑀢𑁄, 𑀏𑀯𑀁 𑀑𑀪𑀸𑀲𑀚𑀸𑀢𑀁 𑀫𑁂 𑀲𑀭𑀻𑀭𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀻𑀢𑀺 𑀲𑀩𑁆𑀩𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀦 𑀤𑀓𑁆𑀔𑀺𑀡𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀩𑀳𑀼𑀧𑀼𑀢𑁆𑀢𑀓𑀦𑀺𑀕𑁆𑀭𑁄𑀥𑀫𑀽𑀮𑀁 𑀕𑀢𑁄, 𑀅𑀬𑀁 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀯𑀸𑀫𑀫𑀕𑁆𑀕𑀁 𑀕𑀡𑁆𑀳𑀺𑀢𑁆𑀯𑀸 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀅𑀦𑀦𑀼𑀜𑁆𑀜𑀸𑀢𑀪𑀸𑀯𑁂𑀦 𑀧𑀭𑀺𑀩𑁆𑀩𑀸𑀚𑀺𑀓𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀬𑀤𑀸 𑀧𑀦 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺, 𑀢𑀤𑀸 𑀲𑀸 𑀣𑁂𑀭𑀻 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀇𑀫𑀁 𑀣𑁂𑀭𑀺𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀪𑀤𑁆𑀤𑀸𑀓𑀘𑁆𑀘𑀸𑀦𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁫. 𑀏𑀓𑀸𑀤𑀲𑀫𑁂 𑀫𑀳𑀸𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀫𑀳𑀢𑀺𑀬𑁄 𑀅𑀪𑀺𑀜𑁆𑀜𑀸𑀬𑁄 𑀧𑀢𑁆𑀢𑀸𑀦𑀁, 𑀪𑀤𑁆𑀤𑀸 𑀓𑀘𑁆𑀘𑀸𑀦𑀸, 𑀦𑀸𑀫 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀲𑁆𑀲 𑀳𑀺 𑀩𑀼𑀤𑁆𑀥𑀲𑁆𑀲 𑀘𑀢𑁆𑀢𑀸𑀭𑁄𑀯 𑀚𑀦𑀸 𑀫𑀳𑀸𑀪𑀺𑀜𑁆𑀜𑀸 𑀳𑁄𑀦𑁆𑀢𑀺, 𑀦 𑀅𑀯𑀲𑁂𑀲𑀲𑀸𑀯𑀓𑀸. 𑀅𑀯𑀲𑁂𑀲𑀲𑀸𑀯𑀓𑀸 𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁂𑀯 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀢𑀢𑁄 𑀧𑀭𑀁. 𑀫𑀳𑀸𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀸 𑀧𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀅𑀫𑁆𑀳𑀸𑀓𑀫𑁆𑀧𑀺 𑀲𑀢𑁆𑀣𑀼 𑀲𑀸𑀲𑀦𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀩𑀸𑀓𑀼𑀮𑀢𑁆𑀣𑁂𑀭𑁄 𑀪𑀤𑁆𑀤𑀸 𑀓𑀘𑁆𑀘𑀸𑀦𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀏𑀢𑁆𑀢𑀓𑀁 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀓𑁆𑀔𑀺𑀁𑀲𑀼. 𑀢𑀲𑁆𑀫𑀸 𑀅𑀬𑀁 𑀣𑁂𑀭𑀻 𑀫𑀳𑀸𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑀸 𑀦𑀸𑀫 𑀚𑀸𑀢𑀸. 𑀪𑀤𑁆𑀤𑀸 𑀓𑀘𑁆𑀘𑀸𑀦𑀸𑀢𑀺 𑀢𑀲𑁆𑀲𑀸 𑀦𑀸𑀫𑀁. 𑀪𑀤𑁆𑀤𑀓𑀜𑁆𑀘𑀦𑀲𑁆𑀲 𑀳𑀺 𑀉𑀢𑁆𑀢𑀫𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀢𑀲𑁆𑀲𑀸 𑀲𑀭𑀻𑀭𑀯𑀡𑁆𑀡𑁄 𑀅𑀳𑁄𑀲𑀺, 𑀲𑀸 𑀢𑀲𑁆𑀫𑀸 𑀪𑀤𑁆𑀤𑀓𑀜𑁆𑀘𑀦𑀸𑀢𑀺 𑀦𑀸𑀫𑀁 𑀮𑀪𑀺, 𑀲𑀸 𑀧𑀘𑁆𑀙𑀸 𑀓𑀘𑁆𑀘𑀸𑀦𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑀸. 𑀭𑀸𑀳𑀼𑀮𑀫𑀸𑀢𑀸𑀬𑁂𑀢𑀁 𑀅𑀥𑀺𑀯𑀘𑀦𑀁.

𑀲𑀸 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀫𑀳𑀸𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀼𑀧𑁆𑀧𑀩𑀼𑀤𑁆𑀥𑀲𑀓𑁆𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀪𑀤𑁆𑀤𑀸 𑀓𑀘𑁆𑀘𑀸𑀦𑀸𑀢𑀺𑀲𑁆𑀲𑀸 𑀦𑀸𑀫𑀁 𑀅𑀓𑀁𑀲𑀼.

𑀲𑀸 𑀯𑀬𑀧𑁆𑀧𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀭𑀸𑀳𑀼𑀮𑀓𑀼𑀫𑀸𑀭𑀁 𑀦𑀸𑀫 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂𑀯 𑀩𑁄𑀥𑀺𑀲𑀢𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀫𑁆𑀫 𑀜𑀸𑀢𑀻𑀦𑀁 𑀲𑀗𑁆𑀕𑀳𑀁 𑀅𑀓𑀸𑀲𑀺. 𑀅𑀧𑀭𑀪𑀸𑀕𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀧𑀜𑁆𑀘𑀳𑀺 𑀫𑀸𑀢𑀼𑀕𑀸𑀫𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀭𑀸𑀳𑀼𑀮𑀫𑀸𑀢𑀸𑀧𑀺 𑀚𑀦𑀧𑀤𑀓𑀮𑁆𑀬𑀸𑀡𑀻𑀧𑀺 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀲𑀸 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀤𑁆𑀤𑀓𑀘𑁆𑀘𑀸𑀦𑀢𑁆𑀣𑁂𑀭𑀻𑀢𑁆𑀯𑁂𑀯 𑀧𑀸𑀓𑀝𑀸 𑀅𑀳𑁄𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀪𑀺𑀜𑁆𑀜𑀸𑀲𑀼 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺, 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀸 𑀏𑀓𑀸𑀯𑀚𑁆𑀚𑀦𑁂𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀦𑀼𑀲𑁆𑀲𑀭𑀢𑀺. 𑀢𑀲𑁆𑀲𑀸 𑀢𑀲𑁆𑀫𑀺𑀁 𑀕𑀼𑀡𑁂 𑀧𑀸𑀓𑀝𑁂 𑀚𑀸𑀢𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀇𑀫𑀁 𑀣𑁂𑀭𑀺𑀁 𑀫𑀳𑀸𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀺𑀲𑀸𑀕𑁄𑀢𑀫𑀻𑀣𑁂𑀭𑀻𑀯𑀢𑁆𑀣𑀼

𑁨𑁪𑁬. 𑀤𑁆𑀯𑀸𑀤𑀲𑀫𑁂 𑀮𑀽𑀔𑀘𑀻𑀯𑀭𑀥𑀭𑀸𑀦𑀦𑁆𑀢𑀺 𑀢𑀻𑀳𑀺 𑀮𑀽𑀔𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀁𑀲𑀼𑀓𑀽𑀮𑀁 𑀥𑀸𑀭𑁂𑀦𑁆𑀢𑀻𑀦𑀁, 𑀓𑀺𑀲𑀸𑀕𑁄𑀢𑀫𑀻, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀕𑁄𑀢𑀫𑀻𑀢𑀺 𑀢𑀲𑁆𑀲𑀸 𑀦𑀸𑀫𑀁, 𑀣𑁄𑀓𑀁 𑀓𑀺𑀲𑀥𑀸𑀢𑀼𑀓𑀢𑁆𑀢𑀸 𑀧𑀦 𑀓𑀺𑀲𑀸𑀕𑁄𑀢𑀫𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁆𑀧𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀏𑀓𑀁 𑀓𑀼𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀦𑀁 ‘‘𑀤𑀼𑀕𑁆𑀕𑀢𑀓𑀼𑀮𑀲𑁆𑀲 𑀥𑀻𑀢𑀸’’𑀢𑀺 𑀧𑀭𑀺𑀪𑀯𑀺𑀁𑀲𑀼.

𑀲𑀸 𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀅𑀣𑀲𑁆𑀲𑀸 𑀲𑀫𑁆𑀫𑀸𑀦𑀫𑀓𑀁𑀲𑀼. 𑀲𑁄 𑀧𑀦𑀲𑁆𑀲𑀸 𑀤𑀸𑀭𑀓𑁄 𑀆𑀥𑀸𑀯𑀺𑀢𑁆𑀯𑀸 𑀧𑀭𑀺𑀥𑀸𑀯𑀺𑀢𑁆𑀯𑀸 𑀓𑀻𑀴𑀦𑀯𑀬𑁂 𑀞𑀺𑀢𑁄 𑀓𑀸𑀮𑀫𑀓𑀸𑀲𑀺, 𑀢𑀲𑁆𑀲𑀸 𑀲𑁄𑀓𑁄 𑀉𑀤𑀧𑀸𑀤𑀺. 𑀲𑀸 ‘‘𑀅𑀳𑀁 𑀇𑀫𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀳𑀼𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑁆𑀓𑀸𑀭𑀁 𑀧𑀸𑀧𑀼𑀡𑀺𑀁, 𑀇𑀫𑁂 𑀫𑀬𑁆𑀳𑀁 𑀧𑀼𑀢𑁆𑀢𑀁 𑀩𑀳𑀺 𑀙𑀟𑁆𑀟𑁂𑀢𑀼𑀫𑁆𑀧𑀺 𑀯𑀸𑀬𑀫𑁂𑀬𑁆𑀬𑀼’’𑀦𑁆𑀢𑀺 𑀧𑀼𑀢𑁆𑀢𑀁 𑀅𑀗𑁆𑀓𑁂𑀦𑀸𑀤𑀸𑀬 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀪𑁂𑀲𑀚𑁆𑀚𑀁 𑀤𑁂𑀣𑀸’’𑀢𑀺 𑀕𑁂𑀳𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀯𑀺𑀘𑀭𑀢𑀺. 𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂 𑀫𑀦𑀼𑀲𑁆𑀲𑀸 ‘‘𑀓𑀢𑁆𑀣 𑀢𑁂 𑀫𑀢𑀓𑀲𑁆𑀲 𑀪𑁂𑀲𑀚𑁆𑀚𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑀺. 𑀲𑀸 𑀢𑁂𑀲𑀁 𑀓𑀣𑀸𑀬 𑀦𑁂𑀯 𑀲𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀅𑀣 𑀦𑀁 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀤𑀺𑀲𑁆𑀯𑀸, ‘‘𑀅𑀬𑀁 𑀧𑀼𑀢𑁆𑀢𑀲𑁄𑀓𑁂𑀦 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀏𑀢𑀺𑀲𑁆𑀲𑀸 𑀧𑀦 𑀪𑁂𑀲𑀚𑁆𑀚𑀁 𑀦 𑀅𑀜𑁆𑀜𑁄 𑀚𑀸𑀦𑀺𑀲𑁆𑀲𑀢𑀺, 𑀤𑀲𑀩𑀮𑁄𑀯 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀫, 𑀢𑀯 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀅𑀜𑁆𑀜𑁄 𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀤𑁂𑀯𑀓𑁂 𑀧𑀦 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀤𑀲𑀩𑀮𑁄 𑀥𑀼𑀭𑀯𑀺𑀳𑀸𑀭𑁂 𑀯𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸𑀳𑀻’’𑀢𑀺. 𑀲𑀸 ‘‘𑀲𑀘𑁆𑀘𑀁 𑀧𑀼𑀭𑀺𑀲𑁄 𑀓𑀣𑁂𑀢𑀻’’𑀢𑀺 𑀧𑀼𑀢𑁆𑀢𑀫𑀸𑀤𑀸𑀬 𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑀯𑁂𑀮𑀸𑀬 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀪𑁂𑀲𑀚𑁆𑀚𑀁 𑀤𑁂𑀣 𑀪𑀕𑀯𑀸’’𑀢𑀺 𑀆𑀳.

𑀲𑀢𑁆𑀣𑀸 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀪𑀤𑁆𑀤𑀓𑀁 𑀢𑁂 𑀕𑁄𑀢𑀫𑀺 𑀓𑀢𑀁 𑀪𑁂𑀲𑀚𑁆𑀚𑀢𑁆𑀣𑀸𑀬 𑀇𑀥𑀸𑀕𑀘𑁆𑀙𑀦𑁆𑀢𑀺𑀬𑀸, 𑀕𑀘𑁆𑀙 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀲𑀓𑀮𑀦𑀕𑀭𑀁 𑀘𑀭𑀺𑀢𑁆𑀯𑀸 𑀬𑀲𑁆𑀫𑀺𑀁 𑀕𑁂𑀳𑁂 𑀓𑁄𑀘𑀺 𑀫𑀢𑀧𑀼𑀩𑁆𑀩𑁄 𑀦𑀢𑁆𑀣𑀺, 𑀢𑀢𑁄 𑀲𑀺𑀤𑁆𑀥𑀢𑁆𑀣𑀓𑀁 𑀆𑀳𑀭𑀸’’𑀢𑀺 𑀆𑀳. 𑀲𑀸 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀼𑀝𑁆𑀞𑀫𑀸𑀦𑀲𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀞𑀫𑀕𑁂𑀳𑁂𑀬𑁂𑀯 ‘‘𑀤𑀲𑀩𑀮𑁄 𑀫𑀫 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀺𑀤𑁆𑀥𑀢𑁆𑀣𑀓𑀁 𑀆𑀳𑀭𑀸𑀧𑁂𑀢𑀺, 𑀲𑀺𑀤𑁆𑀥𑀢𑁆𑀣𑀓𑀁 𑀫𑁂 𑀤𑁂𑀣𑀸’’𑀢𑀺 𑀆𑀳. ‘‘𑀳𑀦𑁆𑀤 𑀕𑁄𑀢𑀫𑀻’’𑀢𑀺 𑀦𑀻𑀳𑀭𑀺𑀢𑁆𑀯𑀸 𑀅𑀤𑀁𑀲𑀼. 𑀅𑀳𑀁 𑀏𑀯𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑁄𑀘𑀺 𑀫𑀢𑀧𑀼𑀩𑁆𑀩𑁄 𑀦𑀸𑀫 𑀦𑀢𑁆𑀣𑀻𑀢𑀺? 𑀓𑀺𑀁 𑀯𑀤𑁂𑀲𑀺 𑀕𑁄𑀢𑀫𑀺, 𑀓𑁄 𑀇𑀥 𑀫𑀢𑀓𑁂 𑀕𑀡𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺? ‘‘𑀢𑁂𑀦 𑀳𑀺 𑀅𑀮𑀁 𑀦𑀸𑀳𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀤𑀲𑀩𑀮𑁄 𑀫𑀁 𑀬𑀢𑁆𑀣 𑀫𑀢𑀧𑀼𑀩𑁆𑀩𑁄 𑀦𑀢𑁆𑀣𑀺, 𑀢𑀢𑁄 𑀦𑀁 𑀕𑀡𑁆𑀳𑀸𑀧𑁂𑀢𑀻’’𑀢𑀺 𑀆𑀳. 𑀲𑀸 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀢𑀢𑀺𑀬𑀖𑀭𑀁 𑀕𑀦𑁆𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑀮𑀦𑀕𑀭𑁂 𑀅𑀬𑀫𑁂𑀯 𑀦𑀺𑀬𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀳𑀺𑀢𑀸𑀦𑀼𑀓𑀫𑁆𑀧𑀓𑁂𑀦 𑀩𑀼𑀤𑁆𑀥𑁂𑀦 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀁𑀯𑁂𑀕𑀁 𑀮𑀪𑀺𑀢𑁆𑀯𑀸 𑀢𑀢𑁄𑀯 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸, ‘‘𑀧𑀼𑀢𑁆𑀢𑀓, 𑀅𑀳𑀁 𑀇𑀫𑀁 𑀫𑀭𑀡𑀁 𑀢𑀯𑁂𑀯 𑀉𑀧𑁆𑀧𑀦𑁆𑀦𑀦𑁆𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀦 𑀧𑀦𑁂𑀢𑀁 𑀢𑀯𑁂𑀯, 𑀫𑀳𑀸𑀚𑀦𑀲𑀸𑀥𑀸𑀭𑀡𑁄 𑀏𑀲 𑀥𑀫𑁆𑀫𑁄’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀁 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 𑀕𑀸𑀫𑀥𑀫𑁆𑀫𑁄 𑀦𑁄 𑀦𑀺𑀕𑀫𑀲𑁆𑀲 𑀥𑀫𑁆𑀫𑁄,

𑀦 𑀘𑀸𑀧𑀺𑀬𑀁 𑀏𑀓𑀓𑀼𑀮𑀲𑁆𑀲 𑀥𑀫𑁆𑀫𑁄;

𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲,

𑀏𑀲𑁂𑀯 𑀥𑀫𑁆𑀫𑁄 𑀬𑀤𑀺𑀤𑀁 𑀅𑀦𑀺𑀘𑁆𑀘𑀢𑀸’’𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁮𑁨);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀮𑀤𑁆𑀥𑁄 𑀢𑁂, 𑀕𑁄𑀢𑀫𑀺, 𑀲𑀺𑀤𑁆𑀥𑀢𑁆𑀣𑀓𑁄’’𑀢𑀺 𑀆𑀳. 𑀦𑀺𑀝𑁆𑀞𑀺𑀢𑀁, 𑀪𑀦𑁆𑀢𑁂, 𑀲𑀺𑀤𑁆𑀥𑀢𑁆𑀣𑀓𑁂𑀦 𑀓𑀫𑁆𑀫𑀁, 𑀧𑀢𑀺𑀝𑁆𑀞𑀁 𑀧𑀦 𑀫𑁂 𑀤𑁂𑀣𑀸𑀢𑀺 𑀆𑀳. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀲𑀼𑀢𑁆𑀢𑀁 𑀕𑀸𑀫𑀁 𑀫𑀳𑁄𑀖𑁄𑀯, 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺. (𑀥. 𑀧. 𑁨𑁮𑁭);

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀞𑀺𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺, 𑀲𑀢𑁆𑀣𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺. 𑀲𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀢𑁆𑀣𑀸𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀇𑀫𑀁 𑀑𑀪𑀸𑀲𑀕𑀸𑀣𑀫𑀸𑀳 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀅𑀫𑀢𑀁 𑀧𑀤𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀅𑀫𑀢𑀁 𑀧𑀤’’𑀦𑁆𑀢𑀺. (𑀥. 𑀧. 𑁧𑁧𑁪);

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀧𑀭𑀺𑀓𑁆𑀔𑀸𑀭𑀯𑀮𑀜𑁆𑀚𑁂 𑀧𑀭𑀫𑀼𑀓𑁆𑀓𑀝𑁆𑀞𑀸 𑀳𑀼𑀢𑁆𑀯𑀸 𑀢𑀻𑀳𑀺 𑀮𑀽𑀔𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀘𑀭𑀺. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀇𑀫𑀁 𑀣𑁂𑀭𑀺𑀁 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀲𑀺𑀗𑁆𑀕𑀸𑀮𑀓𑀫𑀸𑀢𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁭. 𑀢𑁂𑀭𑀲𑀫𑁂 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀲𑀤𑁆𑀥𑀸𑀮𑀓𑁆𑀔𑀡𑁂 𑀅𑀪𑀺𑀦𑀺𑀯𑀺𑀝𑁆𑀞𑀸𑀦𑀁, 𑀲𑀺𑀗𑁆𑀕𑀸𑀮𑀓𑀫𑀸𑀢𑀸, 𑀅𑀕𑁆𑀕𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀻 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸 𑀲𑀫𑀸𑀦𑀚𑀸𑀢𑀺𑀓𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀲𑁆𑀲 𑀲𑀺𑀗𑁆𑀕𑀸𑀮𑀓𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑀸𑀧𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀲𑀺𑀗𑁆𑀕𑀸𑀮𑀓𑀫𑀸𑀢𑀸 𑀦𑀸𑀫 𑀚𑀸𑀢𑀸. 𑀲𑀸 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀧𑀝𑀺𑀮𑀪𑀺. 𑀲𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑀬𑀫𑀸𑀦𑀸𑀯 𑀢𑀺𑀝𑁆𑀞𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀲𑀤𑁆𑀥𑀸𑀮𑀓𑁆𑀔𑀡𑁂 𑀅𑀪𑀺𑀦𑀺𑀯𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀲𑀧𑁆𑀧𑀸𑀬𑀁 𑀓𑀢𑁆𑀯𑀸 𑀧𑀲𑀸𑀤𑀦𑀻𑀬𑀫𑁂𑀯 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀸𑀧𑀺 𑀣𑁂𑀭𑀻 𑀲𑀤𑁆𑀥𑀸𑀮𑀓𑁆𑀔𑀡𑀫𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀇𑀫𑀁 𑀣𑁂𑀭𑀺𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸.

𑀢𑁂𑀭𑀲𑀲𑀼𑀢𑁆𑀢𑀧𑀝𑀺𑀫𑀡𑁆𑀟𑀺𑀢𑀸𑀬 𑀣𑁂𑀭𑀺𑀧𑀸𑀴𑀺𑀬𑀸 𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.