𑁧𑁩. 𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀯𑀡𑁆𑀡𑀦𑀸

𑁧𑁭𑁦. 𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀲𑁆𑀲 𑀧𑀞𑀫𑁂 𑀏𑀓𑀧𑀼𑀕𑁆𑀕𑀮𑁄𑀢𑀺 𑀏𑀓𑁄 𑀧𑀼𑀕𑁆𑀕𑀮𑁄. 𑀏𑀢𑁆𑀣 𑀏𑀓𑁄𑀢𑀺 𑀤𑀼𑀢𑀺𑀬𑀸𑀤𑀺𑀧𑀝𑀺𑀓𑁆𑀔𑁂𑀧𑀢𑁆𑀣𑁄 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀧𑀼𑀕𑁆𑀕𑀮𑁄𑀢𑀺 𑀲𑀫𑁆𑀫𑀼𑀢𑀺𑀓𑀣𑀸, 𑀦 𑀧𑀭𑀫𑀢𑁆𑀣𑀓𑀣𑀸. 𑀩𑀼𑀤𑁆𑀥𑀲𑁆𑀲 𑀳𑀺 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀤𑁂𑀲𑀦𑀸 𑁋 𑀲𑀫𑁆𑀫𑀼𑀢𑀺𑀤𑁂𑀲𑀦𑀸, 𑀧𑀭𑀫𑀢𑁆𑀣𑀤𑁂𑀲𑀦𑀸 𑀘𑀸𑀢𑀺. 𑀢𑀢𑁆𑀣 ‘‘𑀧𑀼𑀕𑁆𑀕𑀮𑁄 𑀲𑀢𑁆𑀢𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁄 𑀫𑀸𑀭𑁄’’𑀢𑀺 𑀏𑀯𑀭𑀽𑀧𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸, ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀔𑀦𑁆𑀥𑀸 𑀥𑀸𑀢𑀽 𑀆𑀬𑀢𑀦𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀏𑀯𑀭𑀽𑀧𑀸 𑀧𑀭𑀫𑀢𑁆𑀣𑀤𑁂𑀲𑀦𑀸. 𑀢𑀢𑁆𑀣 𑀪𑀕𑀯𑀸 𑀬𑁂 𑀲𑀫𑁆𑀫𑀼𑀢𑀺𑀯𑀲𑁂𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑁄𑀳𑀁 𑀧𑀳𑀸𑀬 𑀯𑀺𑀲𑁂𑀲𑀁 𑀅𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸, 𑀢𑁂𑀲𑀁 𑀲𑀫𑁆𑀫𑀼𑀢𑀺𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀬𑁂 𑀧𑀦 𑀧𑀭𑀫𑀢𑁆𑀣𑀯𑀲𑁂𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑁄𑀳𑀁 𑀧𑀳𑀸𑀬 𑀯𑀺𑀲𑁂𑀲𑀫𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀸, 𑀢𑁂𑀲𑀁 𑀧𑀭𑀫𑀢𑁆𑀣𑀤𑁂𑀲𑀦𑀁 𑀤𑁂𑀲𑁂𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 𑀤𑁂𑀲𑀪𑀸𑀲𑀸𑀓𑀼𑀲𑀮𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀓𑁄 𑀆𑀘𑀭𑀺𑀬𑁄 𑀬𑁂 𑀤𑀫𑀺𑀴𑀪𑀸𑀲𑀸𑀬 𑀯𑀼𑀢𑁆𑀢𑁂 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺, 𑀢𑁂𑀲𑀁 𑀤𑀫𑀺𑀴𑀪𑀸𑀲𑀸𑀬 𑀆𑀘𑀺𑀓𑁆𑀔𑀢𑀺. 𑀬𑁂 𑀅𑀦𑁆𑀥𑀪𑀸𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀬 𑀪𑀸𑀲𑀸𑀬, 𑀢𑁂𑀲𑀁 𑀢𑀸𑀬 𑀢𑀸𑀬 𑀪𑀸𑀲𑀸𑀬. 𑀏𑀯𑀁 𑀢𑁂 𑀫𑀸𑀡𑀯𑀓𑀸 𑀙𑁂𑀓𑀁 𑀩𑁆𑀬𑀢𑁆𑀢𑀁 𑀆𑀘𑀭𑀺𑀬𑀫𑀸𑀕𑀫𑁆𑀫 𑀔𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀢𑀢𑁆𑀣 𑀆𑀘𑀭𑀺𑀬𑁄 𑀯𑀺𑀬 𑀩𑀼𑀤𑁆𑀥𑁄 𑀪𑀕𑀯𑀸, 𑀢𑀬𑁄 𑀯𑁂𑀤𑀸 𑀯𑀺𑀬 𑀓𑀣𑁂𑀢𑀩𑁆𑀩𑀪𑀸𑀯𑁂 𑀞𑀺𑀢𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺, 𑀤𑁂𑀲𑀪𑀸𑀲𑀸𑀓𑁄𑀲𑀮𑁆𑀮𑀫𑀺𑀯 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀓𑁄𑀲𑀮𑁆𑀮𑀁, 𑀦𑀸𑀦𑀸𑀤𑁂𑀲𑀪𑀸𑀲𑀸 𑀫𑀸𑀡𑀯𑀓𑀸 𑀯𑀺𑀬 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸, 𑀆𑀘𑀭𑀺𑀬𑀲𑁆𑀲 𑀤𑀫𑀺𑀴𑀪𑀸𑀲𑀸𑀤𑀺𑀆𑀘𑀺𑀓𑁆𑀔𑀦𑀁 𑀯𑀺𑀬 𑀪𑀕𑀯𑀢𑁄 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀯𑀲𑁂𑀦 𑀤𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀳 𑀘𑁂𑀢𑁆𑀣 𑁋

‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀼𑀧𑀮𑀩𑁆𑀪𑀢𑀺.

‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀸;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀪𑀽𑀢𑀓𑀸𑀭𑀡𑀸.

‘‘𑀢𑀲𑁆𑀫𑀸 𑀯𑁄𑀳𑀸𑀭𑀓𑀼𑀲𑀮𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄;

𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑁄 𑀦 𑀚𑀸𑀬𑀢𑀻’’𑀢𑀺.

𑀅𑀧𑀺𑀘 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺 𑁋 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁, 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁, 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁, 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁, 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁, 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁, 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀜𑁆𑀘𑀸𑀢𑀺. ‘‘𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀳𑀺𑀭𑀺𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀳𑀺𑀭𑀺𑀬𑀦𑁆𑀢𑀺 𑀑𑀢𑁆𑀢𑀧𑁆𑀧𑀦𑁆𑀢𑀺 𑀦𑀸𑀫𑀸’’𑀢𑀺? ‘‘𑀇𑀢𑁆𑀣𑀻 𑀳𑀺𑀭𑀺𑀬𑀢𑀺 𑀑𑀢𑁆𑀢𑀧𑁆𑀧𑀢𑀺, 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁄 𑀫𑀸𑀭𑁄’’𑀢𑀺 𑀯𑀼𑀢𑁆𑀢𑁂 𑀧𑀦 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀓𑀫𑁆𑀫𑀲𑁆𑀲𑀓𑀸, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀯𑁂𑀴𑀼𑀯𑀦𑀸𑀤𑀬𑁄 𑀫𑀳𑀸𑀯𑀺𑀳𑀸𑀭𑀸 𑀔𑀦𑁆𑀥𑁂𑀳𑀺 𑀓𑀸𑀭𑀸𑀧𑀺𑀢𑀸, 𑀥𑀸𑀢𑀽𑀳𑀺 𑀆𑀬𑀢𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀧𑀺𑀢𑀭𑀁, 𑀅𑀭𑀳𑀦𑁆𑀢𑀁, 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁, 𑀲𑀗𑁆𑀖𑀪𑁂𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀫𑁂𑀢𑁆𑀢𑀸𑀬𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀫𑀦𑀼𑀲𑁆𑀲𑀭𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀪𑀕𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

‘‘𑀔𑀦𑁆𑀥𑀸 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀫𑀳𑀸𑀚𑀦𑁄 𑀦 𑀚𑀸𑀦𑀸𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺 ‘‘𑀓𑀺𑀫𑀺𑀤𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀦𑀸𑀫𑀸’’𑀢𑀺? ‘‘𑀧𑀼𑀕𑁆𑀕𑀮𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑁂 𑀧𑀦 𑀚𑀸𑀦𑀸𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀤𑀻𑀧𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

𑀮𑁄𑀓𑀲𑀫𑁆𑀫𑀼𑀢𑀺𑀜𑁆𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀦𑀧𑁆𑀧𑀚𑀳𑀦𑁆𑀢𑀺, 𑀮𑁄𑀓𑀲𑀫𑀜𑁆𑀜𑀸𑀬 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑀸 𑀮𑁄𑀓𑀸𑀪𑀺𑀮𑀸𑀧𑁂 𑀞𑀺𑀢𑀸𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀫𑁆𑀧𑀺 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺.

𑀇𑀢𑀺 𑀏𑀓𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀏𑀓𑀧𑀼𑀕𑁆𑀕𑀮𑁄. 𑀓𑁂𑀦𑀝𑁆𑀞𑁂𑀦 𑀏𑀓𑀧𑀼𑀕𑁆𑀕𑀮𑁄? 𑀅𑀲𑀤𑀺𑀲𑀝𑁆𑀞𑁂𑀦 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦 𑀅𑀲𑀫𑀲𑀫𑀝𑁆𑀞𑁂𑀦𑀸𑀢𑀺. 𑀲𑁄 𑀳𑀺 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀝𑀺𑀧𑀸𑀝𑀺𑀬𑀸 𑀆𑀯𑀚𑁆𑀚𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑀕𑀼𑀡𑁂𑀳𑀺 𑀘𑁂𑀯 𑀩𑀼𑀤𑁆𑀥𑀕𑀼𑀡𑁂𑀳𑀺 𑀘 𑀲𑁂𑀲𑀫𑀳𑀸𑀚𑀦𑁂𑀦 𑀅𑀲𑀤𑀺𑀲𑁄𑀢𑀺 𑀅𑀲𑀤𑀺𑀲𑀝𑁆𑀞𑁂𑀦𑀧𑀺 𑀏𑀓𑀧𑀼𑀕𑁆𑀕𑀮𑁄. 𑀬𑁂 𑀘𑀲𑁆𑀲 𑀢𑁂 𑀕𑀼𑀡𑀸, 𑀢𑁂 𑀲𑁂𑀲𑀲𑀢𑁆𑀢𑀸𑀦𑀁 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀸𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦𑀧𑀺 𑀏𑀓𑀧𑀼𑀕𑁆𑀕𑀮𑁄. 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀬𑀫𑁂𑀯 𑀏𑀓𑁄 𑀭𑀽𑀧𑀓𑀸𑀬𑀕𑀼𑀡𑁂𑀳𑀺 𑀘𑁂𑀯 𑀦𑀸𑀫𑀓𑀸𑀬𑀕𑀼𑀡𑁂𑀳𑀺 𑀘 𑀲𑀫𑁄𑀢𑀺 𑀅𑀲𑀫𑀲𑀫𑀝𑁆𑀞𑁂𑀦𑀧𑀺 𑀏𑀓𑀧𑀼𑀕𑁆𑀕𑀮𑁄.

𑀮𑁄𑀓𑁂𑀢𑀺 𑀢𑀬𑁄 𑀮𑁄𑀓𑀸 𑁋 𑀲𑀢𑁆𑀢𑀮𑁄𑀓𑁄, 𑀑𑀓𑀸𑀲𑀮𑁄𑀓𑁄, 𑀲𑀗𑁆𑀔𑀸𑀭𑀮𑁄𑀓𑁄𑀢𑀺. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁫-𑁧𑁩𑁬) 𑀯𑀼𑀢𑁆𑀢𑀸. 𑀢𑁂𑀲𑀼 𑀇𑀥 𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀢𑁆𑀢𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑁂𑀲 𑀦 𑀤𑁂𑀯𑀮𑁄𑀓𑁂, 𑀦 𑀩𑁆𑀭𑀳𑁆𑀫𑀮𑁄𑀓𑁂, 𑀫𑀦𑀼𑀲𑁆𑀲𑀮𑁄𑀓𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀦 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀭𑀸𑀧𑀺 𑀦 𑀲𑀩𑁆𑀩𑀝𑁆𑀞𑀸𑀦𑁂𑀲𑀼.

‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀧𑀭𑁂𑀦 𑀫𑀳𑀸𑀲𑀸𑀮𑀸, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀻𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂’’𑀢𑀺 (𑀫𑀳𑀸𑀯. 𑁨𑁫𑁯) 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑁂 𑀆𑀬𑀸𑀫𑀢𑁄 𑀢𑀺𑀬𑁄𑀚𑀦𑀲𑀢𑁂 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀢𑁂𑀬𑁆𑀬𑀬𑁄𑀚𑀦𑀲𑀢𑁂 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑁂 𑀫𑀚𑁆𑀛𑀺𑀫𑀤𑁂𑀲𑁂 𑀉𑀧𑁆𑀧𑀚𑁆𑀚𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀣𑀸𑀕𑀢𑁄𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀸 𑀅𑀲𑀻𑀢𑀺 𑀫𑀳𑀸𑀣𑁂𑀭𑀸 𑀩𑀼𑀤𑁆𑀥𑀫𑀸𑀢𑀸 𑀩𑀼𑀤𑁆𑀥𑀧𑀺𑀢𑀸 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀅𑀜𑁆𑀜𑁂 𑀘 𑀲𑀸𑀭𑀧𑁆𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀏𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀧𑀦 𑀉𑀪𑀬𑀫𑁆𑀧𑀺 𑀯𑀺𑀧𑁆𑀧𑀓𑀢𑀯𑀘𑀦𑀫𑁂𑀯. 𑀉𑀧𑁆𑀧𑀚𑁆𑀚𑀫𑀸𑀦𑁄 𑀩𑀳𑀼𑀚𑀦𑀳𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀭𑀽𑀧𑀜𑁆𑀘𑁂𑀢𑁆𑀣 𑀮𑀓𑁆𑀔𑀡𑀁 𑀦 𑀲𑀓𑁆𑀓𑀸 𑀏𑀢𑀁 𑀅𑀜𑁆𑀜𑁂𑀦 𑀲𑀤𑁆𑀤𑀮𑀓𑁆𑀔𑀡𑁂𑀦 𑀧𑀝𑀺𑀩𑀸𑀳𑀺𑀢𑀼𑀁.

𑀅𑀧𑀺𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫, 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀉𑀧𑁆𑀧𑀦𑁆𑀦𑁄 𑀦𑀸𑀫𑀸𑀢𑀺 𑀅𑀬𑀫𑁂𑀢𑁆𑀣 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀩𑀼𑀤𑁆𑀥𑀓𑀸𑀭𑀓𑁂 𑀥𑀫𑁆𑀫𑁂 𑀧𑀭𑀺𑀬𑁂𑀲𑀦𑁆𑀢𑁄 𑀤𑀲 𑀧𑀸𑀭𑀫𑀺𑀬𑁄 𑀤𑀺𑀲𑁆𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀫𑀬𑀸 𑀧𑀽𑀭𑁂𑀢𑀩𑁆𑀩𑀸’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀲𑀻𑀮𑀧𑀸𑀭𑀫𑀻…𑀧𑁂… 𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀇𑀫𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺, 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀦𑀸𑀫. 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀅𑀢𑁆𑀢𑀢𑁆𑀣𑀘𑀭𑀺𑀬𑀁 𑀜𑀸𑀢𑀢𑁆𑀣𑀘𑀭𑀺𑀬𑀁 𑀮𑁄𑀓𑀢𑁆𑀣𑀘𑀭𑀺𑀬𑀁 𑀧𑀽𑀭𑀬𑀫𑀸𑀦𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀩𑀼𑀤𑁆𑀥𑀓𑀸𑀭𑀓𑁂 𑀥𑀫𑁆𑀫𑁂 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀁 𑀧𑀳𑀸𑀬 𑀢𑀼𑀲𑀺𑀢𑀧𑀼𑀭𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀲𑀢𑁆𑀢𑀧𑀡𑁆𑀡𑀸𑀲𑀯𑀲𑁆𑀲𑀓𑁄𑀝𑀺𑀬𑁄 𑀢𑀺𑀝𑁆𑀞𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀤𑁂𑀯𑀢𑀸𑀳𑀺 𑀬𑀸𑀘𑀺𑀢𑁄 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀺𑀢𑀁 𑀯𑀺𑀮𑁄𑀓𑁂𑀢𑁆𑀯𑀸 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺, 𑀅𑀦𑀽𑀦𑀸𑀥𑀺𑀓𑁂 𑀤𑀲 𑀫𑀸𑀲𑁂 𑀕𑀩𑁆𑀪𑀯𑀸𑀲𑀁 𑀯𑀲𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀏𑀓𑀽𑀦𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀢𑀺𑀝𑁆𑀞𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀚𑀸𑀢𑀤𑀺𑀯𑀲𑁂 𑀙𑀦𑁆𑀦𑀲𑀳𑀸𑀬𑁄 𑀓𑀡𑁆𑀟𑀓𑀁 𑀯𑀸𑀳𑀦𑀯𑀭𑀁 𑀆𑀭𑀼𑀬𑁆𑀳 𑀦𑀺𑀓𑁆𑀔𑀫𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀦𑀸𑀫. 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑀦𑁆𑀢𑁄𑀧𑀺 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀓𑀭𑁄𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫. 𑀧𑀭𑀺𑀧𑀓𑁆𑀓𑀕𑀢𑁂 𑀜𑀸𑀡𑁂 𑀑𑀴𑀸𑀭𑀺𑀓𑀸𑀳𑀸𑀭𑀁 𑀆𑀳𑀭𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀦𑀸𑀫. 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀫𑀳𑀸𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀧𑀭𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀤𑁆𑀯𑀸𑀤𑀲𑀗𑁆𑀕𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀦𑀸𑀫. 𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂𑀧𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀓𑀤𑀸𑀕𑀸𑀫𑀺𑀨𑀮𑀓𑁆𑀔𑀡𑁂𑀧𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂𑀧𑀺 𑀅𑀦𑀸𑀕𑀸𑀫𑀺𑀨𑀮𑀓𑁆𑀔𑀡𑁂𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀦𑀸𑀫. 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀧𑀦 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀩𑀼𑀤𑁆𑀥𑀸𑀦𑀁 𑀳𑀺 𑀲𑀸𑀯𑀓𑀸𑀦𑀁 𑀯𑀺𑀬 𑀦 𑀧𑀝𑀺𑀧𑀸𑀝𑀺𑀬𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀳𑁂𑀯 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑀮𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺 𑀕𑀼𑀡𑀭𑀸𑀲𑀺 𑀆𑀕𑀢𑁄𑀯 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀢𑁂 𑀦𑀺𑀧𑁆𑀨𑀢𑁆𑀢𑀲𑀩𑁆𑀩𑀓𑀺𑀘𑁆𑀘𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄.

𑀩𑀳𑀼𑀚𑀦𑀳𑀺𑀢𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀳𑀺𑀢𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀩𑀳𑀼𑀚𑀦𑀲𑀼𑀔𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀲𑀼𑀔𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀮𑁄𑀓𑀸𑀦𑀼𑀓𑀫𑁆𑀧𑀸𑀬𑀸𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀓𑀢𑀭𑀲𑀢𑁆𑀢𑀮𑁄𑀓𑀲𑁆𑀲𑀸𑀢𑀺? 𑀬𑁄 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀫𑀢𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺, 𑀢𑀲𑁆𑀲. 𑀪𑀕𑀯𑀢𑀸 𑀳𑀺 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀸 𑀇𑀲𑀺𑀧𑀢𑀦𑀁 𑀆𑀕𑀫𑁆𑀫 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑁂 (𑀫𑀳𑀸𑀯. 𑁧𑁩; 𑀲𑀁. 𑀦𑀺. 𑁫.𑁧𑁦𑁮𑁧) 𑀤𑁂𑀲𑀺𑀢𑁂 𑀆𑀬𑀲𑁆𑀫𑀢𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑀸 𑀩𑁆𑀭𑀳𑁆𑀫𑀸𑀦𑁄 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼, 𑀏𑀢𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀉𑀧𑁆𑀧𑀦𑁆𑀦𑁄. 𑀧𑀜𑁆𑀘𑀫𑀤𑀺𑀯𑀲𑁂 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂 (𑀫𑀳𑀸𑀯. 𑁨𑁦; 𑀲𑀁. 𑀦𑀺. 𑁩.𑁫𑁯) 𑀧𑀜𑁆𑀘𑀯𑀕𑁆𑀕𑀺𑀬𑀸 𑀣𑁂𑀭𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀏𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀉𑀧𑁆𑀧𑀦𑁆𑀦𑁄. 𑀢𑀢𑁄 𑀬𑀲𑀤𑀸𑀭𑀓𑀧𑁆𑀧𑀫𑀼𑀔𑁂 𑀧𑀜𑁆𑀘𑀧𑀡𑁆𑀡𑀸𑀲 𑀧𑀼𑀭𑀺𑀲𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑀢𑁄 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀢𑀺𑀁𑀲 𑀪𑀤𑁆𑀤𑀯𑀕𑁆𑀕𑀺𑀬𑁂 𑀢𑀬𑁄 𑀫𑀕𑁆𑀕𑁂 𑀘 𑀢𑀻𑀡𑀺 𑀨𑀮𑀸𑀦𑀺 𑀘 𑀲𑀫𑁆𑀧𑀸𑀧𑁂𑀲𑀺, 𑀏𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀉𑀧𑁆𑀧𑀦𑁆𑀦𑁄. 𑀕𑀬𑀸𑀲𑀻𑀲𑁂 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 (𑀫𑀳𑀸𑀯. 𑁫𑁪) 𑀚𑀝𑀺𑀮𑀲𑀳𑀲𑁆𑀲𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀢𑀸𑀮𑀝𑁆𑀞𑀺𑀯𑀦𑁂 𑀩𑀺𑀫𑁆𑀩𑀺𑀲𑀸𑀭𑀧𑁆𑀧𑀫𑀼𑀔𑀸 𑀏𑀓𑀸𑀤𑀲 𑀦𑀳𑀼𑀢𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀏𑀓𑀁 𑀦𑀳𑀼𑀢𑀁 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀢𑀺𑀭𑁄𑀓𑀼𑀝𑁆𑀝𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑁂𑀳𑀺 𑀅𑀫𑀢𑀧𑀸𑀦𑀁 𑀧𑀻𑀢𑀁. 𑀲𑀼𑀫𑀦𑀫𑀸𑀮𑀸𑀓𑀸𑀭𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀘. 𑀥𑀦𑀧𑀸𑀮𑀓𑀲𑀫𑀸𑀕𑀫𑁂 𑀤𑀲𑀳𑀺 𑀧𑀸𑀡𑀲𑀳𑀲𑁆𑀲𑁂𑀳𑀺, 𑀔𑀤𑀺𑀭𑀗𑁆𑀕𑀸𑀭𑀚𑀸𑀢𑀓𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑁂𑀳𑀺, 𑀚𑀫𑁆𑀩𑀼𑀓𑀆𑀚𑀻𑀯𑀓𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀘. 𑀆𑀦𑀦𑁆𑀤𑀲𑁂𑀝𑁆𑀞𑀺𑀲𑀫𑀸𑀕𑀫𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀘 𑀧𑀸𑀡𑀲𑀳𑀲𑁆𑀲𑁂𑀳𑀺 𑀅𑀫𑀢𑀧𑀸𑀦𑀁 𑀧𑀻𑀢𑀁. 𑀧𑀸𑀲𑀸𑀡𑀓𑀘𑁂𑀢𑀺𑀬𑁂 𑀧𑀸𑀭𑀸𑀬𑀦𑀲𑀼𑀢𑁆𑀢𑀦𑁆𑀢𑀓𑀣𑀸𑀤𑀺𑀯𑀲𑁂 𑀘𑀼𑀤𑁆𑀤𑀲 𑀓𑁄𑀝𑀺𑀬𑁄 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑀺𑀯𑀲𑁂 𑀯𑀻𑀲𑀢𑀺 𑀧𑀸𑀡𑀓𑁄𑀝𑀺𑀬𑁄, 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀲𑀢𑁆𑀢𑀧𑁆𑀧𑀓𑀭𑀡𑀁 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀅𑀲𑀻𑀢𑀺 𑀧𑀸𑀡𑀓𑁄𑀝𑀺𑀬𑁄, 𑀤𑁂𑀯𑁄𑀭𑁄𑀳𑀦𑁂 𑀢𑀺𑀁𑀲 𑀧𑀸𑀡𑀓𑁄𑀝𑀺𑀬𑁄, 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀦𑁆𑀢𑁂 𑀅𑀲𑀻𑀢𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀫𑀳𑀸𑀲𑀫𑀬𑀲𑀼𑀢𑁆𑀢𑀦𑁆𑀢𑁂 𑀫𑀗𑁆𑀕𑀮𑀲𑀼𑀢𑁆𑀢𑀦𑁆𑀢𑁂 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑁂 𑀲𑀫𑀘𑀺𑀢𑁆𑀢𑀧𑀝𑀺𑀧𑀤𑀸𑀬𑀸𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀪𑀺𑀲𑀫𑀬𑀁 𑀧𑀢𑁆𑀢𑀲𑀢𑁆𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀏𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀉𑀧𑁆𑀧𑀦𑁆𑀦𑁄𑀢𑀺. 𑀬𑀸𑀯𑀚𑁆𑀚𑀤𑀺𑀯𑀲𑀸 𑀇𑀢𑁄 𑀧𑀭𑀁 𑀅𑀦𑀸𑀕𑀢𑁂 𑀘 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑁂 𑀧𑀢𑀺𑀝𑁆𑀞𑀳𑀦𑁆𑀢𑀸𑀦𑀁 𑀯𑀲𑁂𑀦𑀸𑀧𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁𑀬𑁂𑀯, 𑀅𑀯𑀲𑁂𑀲𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬𑁂𑀯 𑀉𑀧𑁆𑀧𑀦𑁆𑀦𑁄. 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁂 𑀧𑀦 𑀫𑀕𑁆𑀕𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀪𑀩𑁆𑀩𑁂 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑀼𑀁 𑀏𑀢𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀢𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬𑁂𑀯 𑀉𑀧𑁆𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄𑀢𑀺 𑀅𑀬𑀁 𑀧𑀼𑀘𑁆𑀙𑀸. 𑀧𑀼𑀘𑁆𑀙𑀸 𑀘 𑀦𑀸𑀫𑁂𑀲𑀸 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸, 𑀅𑀦𑀼𑀫𑀢𑀺𑀧𑀼𑀘𑁆𑀙𑀸, 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺.

𑀢𑀸𑀲𑀁 𑀇𑀤𑀁 𑀦𑀸𑀦𑀢𑁆𑀢𑀁 𑁋 𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀪𑀸𑀯𑀺𑀢𑀁. 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀽𑀢𑀢𑁆𑀣𑀸𑀬 𑀯𑀺𑀪𑀸𑀯𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁. 𑀲𑁄 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀢𑁄 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀢𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺. 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸? 𑀪𑀕𑀯𑀸 𑀳𑀺 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀔𑁄 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺, 𑀅𑀬𑀁 𑀅𑀦𑀼𑀫𑀢𑀺𑀧𑀼𑀘𑁆𑀙𑀸.

𑀓𑀢𑀫𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸? 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄’’𑀢𑀺? 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀓𑀲𑁆𑀫𑀸? 𑀩𑀼𑀤𑁆𑀥𑀸𑀦𑀁 𑀳𑀺 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀺𑀜𑁆𑀘𑀺 𑀲𑀗𑁆𑀔𑀢𑀁 𑀅𑀤𑁆𑀥𑀸𑀯𑀺𑀫𑀼𑀢𑁆𑀢𑀁 𑀯𑀸 𑀅𑀲𑀗𑁆𑀔𑀢𑀁 𑀅𑀤𑀺𑀝𑁆𑀞𑀁 𑀅𑀚𑀸𑀦𑀺𑀢𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀬𑀁 𑀧𑀦 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀝𑀺𑀯𑀺𑀤𑁆𑀥𑀁, 𑀢𑀲𑁆𑀲 𑀅𑀜𑁆𑀜𑁂𑀦 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀦𑀲𑁆𑀲 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦𑁂𑀲 𑀅𑀓𑀣𑀁𑀓𑀣𑀻 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀳𑀢𑀲𑀁𑀲𑀬𑁄, 𑀢𑁂𑀦𑀲𑁆𑀲 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀇𑀢𑀭𑀸 𑀧𑀦 𑀤𑁆𑀯𑁂 𑀧𑀼𑀘𑁆𑀙𑀸 𑀪𑀕𑀯𑀢𑁄 𑀅𑀢𑁆𑀣𑀺, 𑀢𑀸𑀲𑀼 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀢𑀸𑀬 𑀧𑀼𑀘𑁆𑀙𑀸𑀬 𑀧𑀼𑀝𑁆𑀞𑀁 𑀏𑀓𑀧𑀼𑀕𑁆𑀕𑀮𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀆𑀳. 𑀢𑀢𑁆𑀣 𑀢𑀣𑀸𑀕𑀢𑁄𑀢𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄 𑁋 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄, 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄𑀢𑀺.

𑀓𑀣𑀁 𑀪𑀕𑀯𑀸 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀆𑀕𑀢𑀸, 𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀆𑀕𑀢𑁄, 𑀬𑀣𑀸 𑀲𑀺𑀔𑀻 𑀪𑀕𑀯𑀸, 𑀬𑀣𑀸 𑀯𑁂𑀲𑁆𑀲𑀪𑀽 𑀪𑀕𑀯𑀸, 𑀬𑀣𑀸 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸, 𑀬𑀣𑀸 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸, 𑀬𑀣𑀸 𑀓𑀲𑁆𑀲𑀧𑁄 𑀪𑀕𑀯𑀸 𑀆𑀕𑀢𑁄𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦 𑀏𑀢𑁂 𑀪𑀕𑀯𑀦𑁆𑀢𑁄 𑀆𑀕𑀢𑀸, 𑀢𑁂𑀦𑁂𑀯 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄. 𑀅𑀣 𑀯𑀸 𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸…𑀧𑁂… 𑀬𑀣𑀸 𑀓𑀲𑁆𑀲𑀧𑁄 𑀪𑀕𑀯𑀸 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸, 𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸𑀯𑀻𑀭𑀺𑀬𑀔𑀦𑁆𑀢𑀺𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀫𑁂𑀢𑁆𑀢𑀸𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀇𑀫𑀸 𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀁 𑀦𑀬𑀦𑀥𑀦𑀭𑀚𑁆𑀚𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸, 𑀧𑀼𑀩𑁆𑀩𑀬𑁄𑀕𑀧𑀼𑀩𑁆𑀩𑀘𑀭𑀺𑀬𑀥𑀫𑁆𑀫𑀓𑁆𑀔𑀸𑀦𑀜𑀸𑀢𑀢𑁆𑀣𑀘𑀭𑀺𑀬𑀸𑀤𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑀺𑀘𑀭𑀺𑀬𑀸𑀬 𑀓𑁄𑀝𑀺𑀁 𑀧𑀢𑁆𑀯𑀸 𑀆𑀕𑀢𑁄, 𑀢𑀣𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄. 𑀬𑀣𑀸 𑀘 𑀯𑀺𑀧𑀲𑁆𑀲𑀻 𑀪𑀕𑀯𑀸 …𑀧𑁂… 𑀓𑀲𑁆𑀲𑀧𑁄 𑀪𑀕𑀯𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸 𑀆𑀕𑀢𑁄, 𑀢𑀣𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

‘‘𑀬𑀣𑁂𑀯 𑀮𑁄𑀓𑀫𑁆𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄,

𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀫𑀼𑀦𑀬𑁄 𑀇𑀥𑀸𑀕𑀢𑀸;

𑀢𑀣𑀸 𑀅𑀬𑀁 𑀲𑀓𑁆𑀬𑀫𑀼𑀦𑀻𑀧𑀺 𑀆𑀕𑀢𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀢𑁂𑀦 𑀘𑀓𑁆𑀔𑀼𑀫𑀸’’𑀢𑀺.

𑀏𑀯𑀁 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀬𑀣𑀸 𑀲𑀫𑁆𑀧𑀢𑀺𑀚𑀸𑀢𑁄 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀕𑀢𑁄…𑀧𑁂… 𑀓𑀲𑁆𑀲𑀧𑁄 𑀪𑀕𑀯𑀸 𑀕𑀢𑁄. 𑀓𑀣𑀜𑁆𑀘 𑀲𑁄 𑀕𑀢𑁄𑀢𑀺? 𑀲𑁄 𑀳𑀺 𑀲𑀫𑁆𑀧𑀢𑀺𑀚𑀸𑀢𑁄𑀯 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀢𑁄. 𑀬𑀣𑀸𑀳 𑁋 ‘‘𑀲𑀫𑁆𑀧𑀢𑀺𑀚𑀸𑀢𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀘𑁆𑀙𑀢𑀺 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂, 𑀲𑀩𑁆𑀩𑀸 𑀘 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀆𑀲𑀪𑀺𑀜𑁆𑀘 𑀯𑀸𑀘𑀁 𑀪𑀸𑀲𑀢𑀺 ‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’’𑀢𑀺 (𑀫. 𑀦𑀺. 𑁩.𑁨𑁦𑁭). 𑀢𑀜𑁆𑀘𑀲𑁆𑀲 𑀕𑀫𑀦𑀁 𑀢𑀣𑀁 𑀅𑀳𑁄𑀲𑀺 𑀅𑀯𑀺𑀢𑀣𑀁 𑀅𑀦𑁂𑀓𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦. 𑀬𑀜𑁆𑀳𑀺 𑀲𑁄 𑀲𑀫𑁆𑀧𑀢𑀺𑀚𑀸𑀢𑁄𑀯 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀢𑀺𑀝𑁆𑀞𑀳𑀺, 𑀇𑀤𑀫𑀲𑁆𑀲 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀉𑀢𑁆𑀢𑀭𑀸𑀪𑀺𑀫𑀼𑀔𑀪𑀸𑀯𑁄 𑀧𑀦 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁄 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀭𑀢𑀦𑀧𑀝𑀺𑀮𑀸𑀪𑀲𑁆𑀲, ‘‘𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀻𑀢𑀺𑀧𑀢𑀦𑁆𑀢𑀺 𑀘𑀸𑀫𑀭𑀸’’𑀢𑀺 (𑀲𑀼. 𑀦𑀺. 𑁬𑁯𑁩) 𑀏𑀢𑁆𑀣 𑀯𑀼𑀢𑁆𑀢𑀘𑀸𑀫𑀭𑀼𑀓𑁆𑀔𑁂𑀧𑁄 𑀧𑀦 𑀲𑀩𑁆𑀩𑀢𑀺𑀢𑁆𑀣𑀺𑀬𑀦𑀺𑀫𑁆𑀫𑀣𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑁂𑀢𑀘𑁆𑀙𑀢𑁆𑀢𑀥𑀸𑀭𑀡𑀁 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀯𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀆𑀲𑀪𑀺𑀯𑀸𑀘𑀸𑀪𑀸𑀲𑀦𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀯𑀭𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀢𑀣𑀸 𑀅𑀬𑀁 𑀪𑀕𑀯𑀸𑀧𑀺 𑀕𑀢𑁄. 𑀢𑀜𑁆𑀘𑀲𑁆𑀲 𑀕𑀫𑀦𑀁 𑀓𑀣𑀁 𑀅𑀳𑁄𑀲𑀺 𑀅𑀯𑀺𑀢𑀣𑀁 𑀢𑁂𑀲𑀁𑀬𑁂𑀯 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀫𑀼𑀳𑀼𑀢𑁆𑀢𑀚𑀸𑀢𑁄𑀯 𑀕𑀯𑀫𑁆𑀧𑀢𑀻 𑀬𑀣𑀸,

𑀲𑀫𑁂𑀳𑀺 𑀧𑀸𑀤𑁂𑀳𑀺 𑀨𑀼𑀲𑀻 𑀯𑀲𑀼𑀦𑁆𑀥𑀭𑀁;

𑀲𑁄 𑀯𑀺𑀓𑁆𑀓𑀫𑀻 𑀲𑀢𑁆𑀢 𑀧𑀤𑀸𑀦𑀺 𑀕𑁄𑀢𑀫𑁄,

𑀲𑁂𑀢𑀜𑁆𑀘 𑀙𑀢𑁆𑀢𑀁 𑀅𑀦𑀼𑀥𑀸𑀭𑀬𑀼𑀁 𑀫𑀭𑀽.

‘‘𑀕𑀦𑁆𑀢𑁆𑀯𑀸𑀦 𑀲𑁄 𑀲𑀢𑁆𑀢 𑀧𑀤𑀸𑀦𑀺 𑀕𑁄𑀢𑀫𑁄,

𑀤𑀺𑀲𑀸 𑀯𑀺𑀮𑁄𑀓𑁂𑀲𑀺 𑀲𑀫𑀸 𑀲𑀫𑀦𑁆𑀢𑀢𑁄;

𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀕𑀺𑀭𑀫𑀩𑁆𑀪𑀼𑀤𑀻𑀭𑀬𑀺,

𑀲𑀻𑀳𑁄 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄’’𑀢𑀺.

𑀏𑀯𑀁 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀅𑀣 𑀯𑀸 𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸…𑀧𑁂… 𑀬𑀣𑀸 𑀓𑀲𑁆𑀲𑀧𑁄 𑀪𑀕𑀯𑀸, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑁂𑀯 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀧𑀳𑀸𑀬 𑀕𑀢𑁄, 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁, 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀁, 𑀅𑀯𑀺𑀓𑁆𑀔𑁂𑀧𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀕𑀢𑁄, 𑀜𑀸𑀡𑁂𑀦 𑀅𑀯𑀺𑀚𑁆𑀚𑀁 𑀧𑀤𑀸𑀮𑁂𑀢𑁆𑀯𑀸 𑀕𑀢𑁄, 𑀧𑀸𑀫𑁄𑀚𑁆𑀚𑁂𑀦 𑀅𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀧𑀞𑀫𑀚𑁆𑀛𑀸𑀦𑁂𑀦 𑀦𑀻𑀯𑀭𑀡𑀓𑀯𑀸𑀝𑀁 𑀉𑀕𑁆𑀖𑀸𑀝𑁂𑀢𑁆𑀯𑀸, 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀁 𑀯𑀽𑀧𑀲𑀫𑁂𑀢𑁆𑀯𑀸, 𑀢𑀢𑀺𑀬𑀚𑁆𑀛𑀸𑀦𑁂𑀦 𑀧𑀻𑀢𑀺𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁 𑀧𑀳𑀸𑀬, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀲𑀜𑁆𑀜𑀸𑀧𑀝𑀺𑀖𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑁄 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑁄.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀧𑀳𑀸𑀬, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀔𑀲𑀜𑁆𑀜𑀁, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀢𑁆𑀢𑀲𑀜𑁆𑀜𑀁, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀁, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑀁, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑀁, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑀁, 𑀔𑀬𑀸𑀦𑀼𑀧𑀲𑁆𑀲𑀦𑀸𑀬 𑀖𑀦𑀲𑀜𑁆𑀜𑀁, 𑀯𑀬𑀸𑀦𑀼𑀧𑀲𑁆𑀲𑀦𑀸𑀬 𑀆𑀬𑀽𑀳𑀦𑀁, 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸𑀬 𑀥𑀼𑀯𑀲𑀜𑁆𑀜𑀁, 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀲𑀜𑁆𑀜𑀁, 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀡𑀺𑀥𑀺𑀁, 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀦𑀺𑀯𑁂𑀲𑀁, 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀁, 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀁, 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀬 𑀆𑀮𑀬𑀸𑀪𑀺𑀦𑀺𑀯𑁂𑀲𑀁, 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀅𑀧𑁆𑀧𑀝𑀺𑀲𑀗𑁆𑀔𑀁, 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀬 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑁂𑀓𑀝𑁆𑀞𑁂 𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑁂 𑀓𑀺𑀮𑁂𑀲𑁂 𑀧𑀳𑀸𑀬, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑁂 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀢𑁄. 𑀏𑀯𑀫𑁆𑀧𑀺 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄? 𑀧𑀣𑀯𑀻𑀥𑀸𑀢𑀼𑀬𑀸 𑀓𑀓𑁆𑀔𑀴𑀢𑁆𑀢𑀮𑀓𑁆𑀔𑀡𑀁 𑀢𑀣𑀁 𑀅𑀯𑀺𑀢𑀣𑀁, 𑀆𑀧𑁄𑀥𑀸𑀢𑀼𑀬𑀸 𑀧𑀕𑁆𑀖𑀭𑀡𑀮𑀓𑁆𑀔𑀡𑀁, 𑀢𑁂𑀚𑁄𑀥𑀸𑀢𑀼𑀬𑀸 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀁, 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁, 𑀆𑀓𑀸𑀲𑀥𑀸𑀢𑀼𑀬𑀸 𑀅𑀲𑀫𑁆𑀨𑀼𑀝𑁆𑀞𑀮𑀓𑁆𑀔𑀡𑀁, 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀯𑀺𑀚𑀸𑀦𑀦𑀮𑀓𑁆𑀔𑀡𑀁.

𑀭𑀽𑀧𑀲𑁆𑀲 𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀯𑁂𑀤𑀦𑀸𑀬 𑀯𑁂𑀤𑀬𑀺𑀢𑀮𑀓𑁆𑀔𑀡𑀁, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀁, 𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀁, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀦𑀦𑀮𑀓𑁆𑀔𑀡𑀁.

𑀯𑀺𑀢𑀓𑁆𑀓𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑀁, 𑀯𑀺𑀘𑀸𑀭𑀲𑁆𑀲 𑀅𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑀁, 𑀧𑀻𑀢𑀺𑀬𑀸 𑀨𑀭𑀡𑀮𑀓𑁆𑀔𑀡𑀁, 𑀲𑀼𑀔𑀲𑁆𑀲 𑀲𑀸𑀢𑀮𑀓𑁆𑀔𑀡𑀁, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁, 𑀨𑀲𑁆𑀲𑀲𑁆𑀲 𑀨𑀼𑀲𑀦𑀮𑀓𑁆𑀔𑀡𑀁.

𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀕𑁆𑀕𑀳𑀮𑀓𑁆𑀔𑀡𑀁, 𑀲𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀚𑀸𑀦𑀦𑀮𑀓𑁆𑀔𑀡𑀁.

𑀲𑀤𑁆𑀥𑀸𑀩𑀮𑀲𑁆𑀲 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀮𑀓𑁆𑀔𑀡𑀁, 𑀯𑀻𑀭𑀺𑀬𑀩𑀮𑀲𑁆𑀲 𑀓𑁄𑀲𑀚𑁆𑀚𑁂, 𑀲𑀢𑀺𑀩𑀮𑀲𑁆𑀲 𑀫𑀼𑀝𑁆𑀞𑀲𑁆𑀲𑀘𑁆𑀘𑁂, 𑀲𑀫𑀸𑀥𑀺𑀩𑀮𑀲𑁆𑀲 𑀉𑀤𑁆𑀥𑀘𑁆𑀘𑁂, 𑀧𑀜𑁆𑀜𑀸𑀩𑀮𑀲𑁆𑀲 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀮𑀓𑁆𑀔𑀡𑀁.

𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀯𑀺𑀘𑀬𑀮𑀓𑁆𑀔𑀡𑀁, 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀕𑁆𑀕𑀳𑀮𑀓𑁆𑀔𑀡𑀁, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀨𑀭𑀡𑀮𑀓𑁆𑀔𑀡𑀁, 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀯𑀽𑀧𑀲𑀫𑀮𑀓𑁆𑀔𑀡𑀁, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑀁.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀤𑀲𑁆𑀲𑀦𑀮𑀓𑁆𑀔𑀡𑀁, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑀁, 𑀲𑀫𑁆𑀫𑀸𑀯𑀸𑀘𑀸𑀬 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀁, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀁, 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀯𑁄𑀤𑀸𑀦𑀮𑀓𑁆𑀔𑀡𑀁, 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀧𑀕𑁆𑀕𑀳𑀮𑀓𑁆𑀔𑀡𑀁, 𑀲𑀫𑁆𑀫𑀸𑀲𑀢𑀺𑀬𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁, 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁.

𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀮𑀓𑁆𑀔𑀡𑀁, 𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀮𑀓𑁆𑀔𑀡𑀁, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀦𑀦𑀮𑀓𑁆𑀔𑀡𑀁, 𑀦𑀸𑀫𑀲𑁆𑀲 𑀦𑀫𑀦𑀮𑀓𑁆𑀔𑀡𑀁, 𑀭𑀽𑀧𑀲𑁆𑀲 𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀲𑀴𑀸𑀬𑀢𑀦𑀲𑁆𑀲 𑀆𑀬𑀢𑀦𑀮𑀓𑁆𑀔𑀡𑀁, 𑀨𑀲𑁆𑀲𑀲𑁆𑀲 𑀨𑀼𑀲𑀦𑀮𑀓𑁆𑀔𑀡𑀁, 𑀯𑁂𑀤𑀦𑀸𑀬 𑀯𑁂𑀤𑀬𑀺𑀢𑀮𑀓𑁆𑀔𑀡𑀁, 𑀢𑀡𑁆𑀳𑀸𑀬 𑀳𑁂𑀢𑀼𑀮𑀓𑁆𑀔𑀡𑀁, 𑀉𑀧𑀸𑀤𑀸𑀦𑀲𑁆𑀲 𑀕𑀳𑀡𑀮𑀓𑁆𑀔𑀡𑀁, 𑀪𑀯𑀲𑁆𑀲 𑀆𑀬𑀽𑀳𑀦𑀮𑀓𑁆𑀔𑀡𑀁, 𑀚𑀸𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁, 𑀚𑀭𑀸𑀬 𑀚𑀻𑀭𑀡𑀮𑀓𑁆𑀔𑀡𑀁, 𑀫𑀭𑀡𑀲𑁆𑀲 𑀘𑀼𑀢𑀺𑀮𑀓𑁆𑀔𑀡𑀁.

𑀥𑀸𑀢𑀽𑀦𑀁 𑀲𑀼𑀜𑁆𑀜𑀢𑀸𑀮𑀓𑁆𑀔𑀡𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀮𑀓𑁆𑀔𑀡𑀁, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁, 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀧𑀤𑀳𑀦𑀮𑀓𑁆𑀔𑀡𑀁, 𑀇𑀤𑁆𑀥𑀺𑀧𑀸𑀤𑀸𑀦𑀁 𑀇𑀚𑁆𑀛𑀦𑀮𑀓𑁆𑀔𑀡𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀮𑀓𑁆𑀔𑀡𑀁, 𑀩𑀮𑀸𑀦𑀁 𑀅𑀓𑀫𑁆𑀧𑀺𑀬𑀮𑀓𑁆𑀔𑀡𑀁, 𑀩𑁄𑀚𑁆𑀛𑀗𑁆𑀕𑀸𑀦𑀁 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀁, 𑀫𑀕𑁆𑀕𑀲𑁆𑀲 𑀳𑁂𑀢𑀼𑀮𑀓𑁆𑀔𑀡𑀁.

𑀲𑀘𑁆𑀘𑀸𑀦𑀁 𑀢𑀣𑀮𑀓𑁆𑀔𑀡𑀁, 𑀲𑀫𑀣𑀲𑁆𑀲 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁, 𑀯𑀺𑀧𑀲𑁆𑀲𑀦𑀸𑀬 𑀅𑀦𑀼𑀧𑀲𑁆𑀲𑀦𑀸𑀮𑀓𑁆𑀔𑀡𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀏𑀓𑀭𑀲𑀮𑀓𑁆𑀔𑀡𑀁, 𑀬𑀼𑀕𑀦𑀤𑁆𑀥𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀮𑀓𑁆𑀔𑀡𑀁.

𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀲𑀁𑀯𑀭𑀡𑀮𑀓𑁆𑀔𑀡𑀁, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸 𑀤𑀲𑁆𑀲𑀦𑀮𑀓𑁆𑀔𑀡𑀁.

𑀔𑀬𑁂 𑀜𑀸𑀡𑀲𑁆𑀲 𑀲𑀫𑀼𑀘𑁆𑀙𑁂𑀤𑀮𑀓𑁆𑀔𑀡𑀁, 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀲𑁆𑀲 𑀧𑀲𑁆𑀲𑀤𑁆𑀥𑀺𑀮𑀓𑁆𑀔𑀡𑀁.

𑀙𑀦𑁆𑀤𑀲𑁆𑀲 𑀫𑀽𑀮𑀮𑀓𑁆𑀔𑀡𑀁, 𑀫𑀦𑀲𑀺𑀓𑀸𑀭𑀲𑁆𑀲 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀁, 𑀨𑀲𑁆𑀲𑀲𑁆𑀲 𑀲𑀫𑁄𑀥𑀸𑀦𑀮𑀓𑁆𑀔𑀡𑀁, 𑀯𑁂𑀤𑀦𑀸𑀬 𑀲𑀫𑁄𑀲𑀭𑀡𑀮𑀓𑁆𑀔𑀡𑀁, 𑀲𑀫𑀸𑀥𑀺𑀲𑁆𑀲 𑀧𑀫𑀼𑀔𑀮𑀓𑁆𑀔𑀡𑀁, 𑀲𑀢𑀺𑀬𑀸 𑀆𑀥𑀺𑀧𑀢𑁂𑀬𑁆𑀬𑀮𑀓𑁆𑀔𑀡𑀁, 𑀧𑀜𑁆𑀜𑀸𑀬 𑀢𑀢𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑀁, 𑀯𑀺𑀫𑀼𑀢𑁆𑀢𑀺𑀬𑀸 𑀲𑀸𑀭𑀮𑀓𑁆𑀔𑀡𑀁, 𑀅𑀫𑀢𑁄𑀕𑀥𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀮𑀓𑁆𑀔𑀡𑀁 𑀢𑀣𑀁 𑀅𑀯𑀺𑀢𑀣𑀁. 𑀏𑀯𑀁 𑀢𑀣𑀮𑀓𑁆𑀔𑀡𑀁 𑀜𑀸𑀡𑀕𑀢𑀺𑀬𑀸 𑀆𑀕𑀢𑁄 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀢𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀢𑀣𑀸𑀕𑀢𑁄. 𑀏𑀯𑀁 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄? 𑀢𑀣𑀥𑀫𑁆𑀫𑀸 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁦) 𑀯𑀺𑀢𑁆𑀣𑀸𑀭𑁄. 𑀢𑀸𑀦𑀺 𑀘 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀢𑀣𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀲𑀫𑁆𑀩𑁄𑀥𑀢𑁆𑀣𑁄 𑀳𑀺 𑀏𑀢𑁆𑀣 𑀕𑀢𑀲𑀤𑁆𑀤𑁄.

𑀅𑀧𑀺𑀘 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀦𑀜𑁆𑀜𑀣𑁄…𑀧𑁂… 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀦𑀜𑁆𑀜𑀣𑁄. 𑀢𑀣𑀸 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄, 𑀲𑀗𑁆𑀔𑀸𑀭𑀸𑀦𑀁 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀝𑁆𑀞𑁄…𑀧𑁂… 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀝𑁆𑀞𑁄 𑀢𑀣𑁄 𑀅𑀯𑀺𑀢𑀣𑁄 𑀅𑀦𑀜𑁆𑀜𑀣𑁄. 𑀢𑀁 𑀲𑀩𑁆𑀩𑀁 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑀲𑁆𑀫𑀸𑀧𑀺 𑀢𑀣𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄.

𑀓𑀣𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄? 𑀪𑀕𑀯𑀸 𑀬𑀁 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀁 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀘 𑀢𑁂𑀦 𑀢𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀯𑀲𑁂𑀦 𑀯𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦 𑀯𑀸 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁬𑁧𑁬) 𑀦𑀬𑁂𑀦 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀢𑁂𑀭𑀲𑀳𑀺 𑀯𑀸𑀭𑁂𑀳𑀺 𑀤𑁆𑀯𑁂𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀺 𑀯𑀺𑀪𑀚𑁆𑀚𑀫𑀸𑀦𑀁 𑀢𑀣𑀫𑁂𑀯 𑀳𑁄𑀢𑀺, 𑀯𑀺𑀢𑀣𑀁 𑀦𑀢𑁆𑀣𑀺. 𑀏𑀲 𑀦𑀬𑁄 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑁂𑀲𑀼 𑀲𑀤𑁆𑀤𑀸𑀤𑀻𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀚𑀸𑀦𑀸𑀫𑀺, 𑀢𑀫𑀳𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀢𑀁 𑀢𑀣𑀸𑀕𑀢𑀲𑁆𑀲 𑀯𑀺𑀤𑀺𑀢𑀁, 𑀢𑀁 𑀢𑀣𑀸𑀕𑀢𑁄 𑀦 𑀉𑀧𑀝𑁆𑀞𑀸𑀲𑀻’’𑀢𑀺 (𑀅. 𑀦𑀺. 𑁪.𑁨𑁪). 𑀏𑀯𑀁 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄. 𑀢𑀢𑁆𑀣 𑀢𑀣𑀤𑀲𑁆𑀲𑀻𑀅𑀢𑁆𑀣𑁂 𑀢𑀣𑀸𑀕𑀢𑁄𑀢𑀺 𑀧𑀤𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄? 𑀬𑀁 𑀭𑀢𑁆𑀢𑀺𑀁 𑀪𑀕𑀯𑀸 𑀩𑁄𑀥𑀺𑀫𑀡𑁆𑀟𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀬𑀜𑁆𑀘 𑀭𑀢𑁆𑀢𑀺𑀁 𑀬𑀫𑀓𑀲𑀸𑀮𑀸𑀦𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀧𑀭𑀺𑀫𑀸𑀡𑁂 𑀓𑀸𑀮𑁂 𑀧𑀞𑀫𑀩𑁄𑀥𑀺𑀬𑀸𑀧𑀺 𑀫𑀚𑁆𑀛𑀺𑀫𑀩𑁄𑀥𑀺𑀬𑀸𑀧𑀺 𑀧𑀘𑁆𑀙𑀺𑀫𑀩𑁄𑀥𑀺𑀬𑀸𑀧𑀺 𑀬𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁…𑀧𑁂… 𑀯𑁂𑀤𑀮𑁆𑀮𑀁, 𑀲𑀩𑁆𑀩𑀁 𑀢𑀁 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀦𑀼𑀧𑀯𑀚𑁆𑀚𑀁 𑀅𑀦𑀽𑀦𑀁 𑀅𑀦𑀥𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁 𑀭𑀸𑀕𑀫𑀤𑀦𑀺𑀫𑁆𑀫𑀤𑀦𑀁 𑀤𑁄𑀲𑀫𑁄𑀳𑀫𑀤𑀦𑀺𑀫𑁆𑀫𑀤𑀦𑀁, 𑀦𑀢𑁆𑀣𑀺 𑀢𑀢𑁆𑀣 𑀯𑀸𑀮𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀯𑀓𑁆𑀔𑀮𑀺𑀢𑀁, 𑀲𑀩𑁆𑀩𑀁 𑀢𑀁 𑀏𑀓𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀺𑀢𑀁 𑀯𑀺𑀬 𑀏𑀓𑀦𑀸𑀴𑀺𑀓𑀸𑀬 𑀫𑀺𑀢𑀁 𑀯𑀺𑀬 𑀏𑀓𑀢𑀼𑀮𑀸𑀬 𑀢𑀼𑀮𑀺𑀢𑀁 𑀯𑀺𑀬 𑀘 𑀢𑀣𑀫𑁂𑀯 𑀳𑁄𑀢𑀺 𑀅𑀯𑀺𑀢𑀣𑀁. 𑀢𑁂𑀦𑀸𑀳 𑁋 ‘‘𑀬𑀜𑁆𑀘, 𑀘𑀼𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀸𑀲𑀢𑀺 𑀮𑀧𑀢𑀺 𑀦𑀺𑀤𑁆𑀤𑀺𑀲𑀢𑀺, 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺 𑀦𑁄 𑀅𑀜𑁆𑀜𑀣𑀸. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀤𑀻. 𑀦𑀺. 𑁩.𑁧𑁮𑁮). 𑀕𑀤𑀢𑁆𑀣𑁄 𑀳𑀺 𑀏𑀢𑁆𑀣 𑀕𑀢𑀲𑀤𑁆𑀤𑁄. 𑀏𑀯𑀁 𑀢𑀣𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄.

𑀅𑀧𑀺𑀘 𑀆𑀕𑀤𑀦𑀁 𑀆𑀕𑀤𑁄, 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀣𑁄 𑀅𑀯𑀺𑀧𑀭𑀻𑀢𑁄 𑀆𑀕𑀤𑁄 𑀅𑀲𑁆𑀲𑀸𑀢𑀺 𑀤𑀓𑀸𑀭𑀲𑁆𑀲 𑀢𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀏𑀯𑀫𑁆𑀧𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀣𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄? 𑀪𑀕𑀯𑀢𑁄 𑀳𑀺 𑀯𑀸𑀘𑀸𑀬 𑀓𑀸𑀬𑁄 𑀅𑀦𑀼𑀮𑁄𑀫𑁂𑀢𑀺 𑀓𑀸𑀬𑀲𑁆𑀲𑀧𑀺 𑀯𑀸𑀘𑀸, 𑀢𑀲𑁆𑀫𑀸 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻 𑀘 𑀳𑁄𑀢𑀺. 𑀏𑀯𑀁 𑀪𑀽𑀢𑀲𑁆𑀲 𑀘𑀲𑁆𑀲 𑀬𑀣𑀸 𑀯𑀸𑀘𑀸, 𑀓𑀸𑀬𑁄𑀧𑀺 𑀢𑀣𑀸 𑀕𑀢𑁄, 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀓𑀸𑀬𑁄, 𑀯𑀸𑀘𑀸𑀧𑀺 𑀢𑀣𑀸 𑀕𑀢𑀸𑀢𑀺 𑀢𑀣𑀸𑀕𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀬𑀣𑀸𑀯𑀸𑀤𑀻, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩). 𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄.

𑀓𑀣𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄? 𑀉𑀧𑀭𑀺 𑀪𑀯𑀕𑁆𑀕𑀁 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀲𑀻𑀮𑁂𑀦𑀧𑀺 𑀲𑀫𑀸𑀥𑀺𑀦𑀸𑀧𑀺 𑀧𑀜𑁆𑀜𑀸𑀬𑀧𑀺 𑀯𑀺𑀫𑀼𑀢𑁆𑀢𑀺𑀬𑀸𑀧𑀺, 𑀦 𑀢𑀲𑁆𑀲 𑀢𑀼𑀮𑀸 𑀯𑀸 𑀧𑀫𑀸𑀡𑀁 𑀯𑀸 𑀅𑀢𑁆𑀣𑀺, 𑀅𑀢𑀼𑀮𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀼𑀢𑁆𑀢𑀭𑁄 𑀭𑀸𑀚𑀭𑀸𑀚𑁄 𑀤𑁂𑀯𑀤𑁂𑀯𑁄 𑀲𑀓𑁆𑀓𑀸𑀦𑀫𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀫𑀢𑀺𑀩𑁆𑀭𑀳𑁆𑀫𑀸. 𑀢𑁂𑀦𑀸𑀳 𑁋 ‘‘𑀲𑀤𑁂𑀯𑀓𑁂 𑀮𑁄𑀓𑁂, 𑀪𑀺𑀓𑁆𑀔𑀯𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼 𑀤𑀲𑁄 𑀯𑀲𑀯𑀢𑁆𑀢𑀻. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩).

𑀢𑀢𑁆𑀭𑁂𑀯𑀁 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀕𑀤𑁄 𑀯𑀺𑀬 𑀅𑀕𑀤𑁄. 𑀓𑁄 𑀧𑀦𑁂𑀲? 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘. 𑀢𑁂𑀦 𑀳𑁂𑀲 𑀫𑀳𑀸𑀦𑀼𑀪𑀸𑀯𑁄 𑀪𑀺𑀲𑀓𑁆𑀓𑁄 𑀤𑀺𑀩𑁆𑀩𑀸𑀕𑀤𑁂𑀦 𑀲𑀧𑁆𑀧𑁂 𑀯𑀺𑀬 𑀲𑀩𑁆𑀩𑀧𑀭𑀧𑁆𑀧𑀯𑀸𑀤𑀺𑀦𑁄 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀅𑀪𑀺𑀪𑀯𑀢𑀺. 𑀇𑀢𑀺 𑀲𑀩𑁆𑀩𑀮𑁄𑀓𑀸𑀪𑀺𑀪𑀯𑀦𑁂 𑀢𑀣𑁄 𑀅𑀯𑀺𑀧𑀭𑀻𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁄 𑀘 𑀅𑀕𑀤𑁄 𑀅𑀲𑁆𑀲𑀸𑀢𑀺 𑀤𑀓𑀸𑀭𑀲𑁆𑀲 𑀢𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄.

𑀅𑀧𑀺𑀘 𑀢𑀣𑀸𑀬 𑀕𑀢𑁄𑀢𑀺𑀧𑀺 𑀢𑀣𑀸𑀕𑀢𑁄, 𑀢𑀣𑀁 𑀕𑀢𑁄𑀢𑀺𑀧𑀺 𑀢𑀣𑀸𑀕𑀢𑁄, 𑀕𑀢𑁄𑀢𑀺 𑀅𑀯𑀕𑀢𑁄 𑀅𑀢𑀻𑀢𑁄 𑀧𑀢𑁆𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀓𑀮𑀮𑁄𑀓𑀁 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀢𑀣𑀸𑀬 𑀕𑀢𑁄 𑀅𑀯𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀢𑀣𑀸𑀬 𑀕𑀢𑁄 𑀅𑀢𑀻𑀢𑁄𑀢𑀺 𑀢𑀣𑀸𑀕𑀢𑁄, 𑀮𑁄𑀓𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀢𑀣𑀸𑀬 𑀕𑀢𑁄 𑀧𑀢𑁆𑀢𑁄𑀢𑀺 𑀢𑀣𑀸𑀕𑀢𑁄, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀢𑀣𑀸𑀬 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄. 𑀢𑁂𑀦 𑀬𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀮𑁄𑀓𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀲𑁆𑀫𑀸 𑀢𑀣𑀸𑀕𑀢𑁄 𑀯𑀺𑀲𑀁𑀬𑀼𑀢𑁆𑀢𑁄. 𑀮𑁄𑀓𑀲𑀫𑀼𑀤𑀬𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀲𑀫𑀼𑀤𑀬𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄. 𑀮𑁄𑀓𑀦𑀺𑀭𑁄𑀥𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀦𑀺𑀭𑁄𑀥𑁄 𑀢𑀣𑀸𑀕𑀢𑀲𑁆𑀲 𑀲𑀘𑁆𑀙𑀺𑀓𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀢𑀣𑀸𑀕𑀢𑀲𑁆𑀲 𑀪𑀸𑀯𑀺𑀢𑀸. 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲…𑀧𑁂… 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩).

𑀢𑀲𑁆𑀲𑀧𑀺 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀫𑁆𑀧𑀺 𑀘 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀪𑀸𑀯𑀤𑀻𑀧𑀦𑁂 𑀫𑀼𑀔𑀫𑀢𑁆𑀢𑀫𑁂𑀯. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀢𑀣𑀸𑀕𑀢𑁄𑀯 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀪𑀸𑀯𑀁 𑀯𑀡𑁆𑀡𑁂𑀬𑁆𑀬.

𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀤𑀤𑁆𑀯𑀬𑁂 𑀧𑀦 𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀢𑀸𑀯 𑀓𑀸𑀭𑀡𑁂𑀳𑀺 𑀅𑀭𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁 𑀧𑀤𑀤𑁆𑀯𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩 𑀆𑀤𑀬𑁄) 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀡𑁆𑀡𑀦𑀸𑀬𑀁 𑀧𑀓𑀸𑀲𑀺𑀢𑀦𑁆𑀢𑀺.

𑁧𑁭𑁧. 𑀤𑀼𑀢𑀺𑀬𑁂 𑀧𑀸𑀢𑀼𑀪𑀸𑀯𑁄𑀢𑀺 𑀉𑀧𑁆𑀧𑀢𑁆𑀢𑀺 𑀦𑀺𑀧𑁆𑀨𑀢𑁆𑀢𑀺. 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀤𑀼𑀮𑁆𑀮𑀪𑁄 𑀲𑀼𑀤𑀼𑀮𑁆𑀮𑀪𑁄 𑀧𑀭𑀫𑀤𑀼𑀮𑁆𑀮𑀪𑁄. 𑀓𑀲𑁆𑀫𑀸 𑀤𑀼𑀮𑁆𑀮𑀪𑁄𑀢𑀺? 𑀏𑀓𑀯𑀸𑀭𑀁 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸, 𑀤𑁆𑀯𑁂 𑀯𑀸𑀭𑁂 𑀤𑀲 𑀯𑀸𑀭𑁂 𑀯𑀻𑀲𑀢𑀺 𑀯𑀸𑀭𑁂 𑀧𑀜𑁆𑀜𑀸𑀲 𑀯𑀸𑀭𑁂 𑀯𑀸𑀭𑀲𑀢𑀁 𑀯𑀸𑀭𑀲𑀳𑀲𑁆𑀲𑀁 𑀯𑀸𑀭𑀲𑀢𑀲𑀳𑀲𑁆𑀲𑀁 𑀯𑀸𑀭𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀣𑀸 𑀏𑀓𑀤𑀺𑀯𑀲𑀁 𑀤𑁆𑀯𑁂 𑀤𑀺𑀯𑀲𑁂 𑀤𑀲 𑀤𑀺𑀯𑀲𑁂 𑀯𑀻𑀲𑀢𑀺 𑀤𑀺𑀯𑀲𑁂 𑀧𑀜𑁆𑀜𑀸𑀲 𑀤𑀺𑀯𑀲𑁂 𑀤𑀺𑀯𑀲𑀲𑀢𑀁 𑀤𑀺𑀯𑀲𑀲𑀳𑀲𑁆𑀲𑀁 𑀤𑀺𑀯𑀲𑀲𑀢𑀲𑀳𑀲𑁆𑀲𑀁 𑀤𑀺𑀯𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀁. 𑀏𑀓𑀫𑀸𑀲𑀁 𑀤𑁆𑀯𑁂 𑀫𑀸𑀲𑁂…𑀧𑁂… 𑀫𑀸𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀁. 𑀏𑀓𑀲𑀁𑀯𑀘𑁆𑀙𑀭𑀁 𑀤𑁆𑀯𑁂 𑀲𑀁𑀯𑀘𑁆𑀙𑀭𑁂…𑀧𑁂… 𑀲𑀁𑀯𑀘𑁆𑀙𑀭𑀓𑁄𑀝𑀺𑀲𑀢𑀲𑀳𑀲𑁆𑀲𑀁. 𑀏𑀓𑀓𑀧𑁆𑀧𑀁 𑀤𑁆𑀯𑁂 𑀓𑀧𑁆𑀧𑁂…𑀧𑁂… 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀁. 𑀓𑀧𑁆𑀧𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀢𑀻𑀡𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸. 𑀲𑀻𑀮𑀧𑀸𑀭𑀫𑀻𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻…𑀧𑁂… 𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀁 𑀲𑀓𑁆𑀓𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀤𑀼𑀮𑁆𑀮𑀪𑁄.

𑁧𑁭𑁨. 𑀢𑀢𑀺𑀬𑁂 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄𑀢𑀺 𑀅𑀘𑁆𑀙𑀭𑀺𑀬𑁄 𑀫𑀦𑀼𑀲𑁆𑀲𑁄. 𑀅𑀘𑁆𑀙𑀭𑀺𑀬𑁄𑀢𑀺 𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀡𑀁 𑀯𑀺𑀬 𑀦𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀸𑀯 𑀲𑀤𑁆𑀤𑀦𑀬𑁄. 𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀦𑀬𑁄 𑁋 𑀅𑀘𑁆𑀙𑀭𑀸𑀬𑁄𑀕𑁆𑀕𑁄𑀢𑀺 𑀅𑀘𑁆𑀙𑀭𑀺𑀬𑁄, 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀧𑀺𑀘 ‘‘𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀢𑀼𑀪𑀸𑀯𑀸 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁧𑁨𑁭) 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸𑀧𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄. 𑀆𑀘𑀺𑀡𑁆𑀡𑀫𑀦𑀼𑀲𑁆𑀲𑁄𑀢𑀺𑀧𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄.

𑀅𑀪𑀺𑀦𑀻𑀳𑀸𑀭𑀲𑁆𑀲 𑀳𑀺 𑀲𑀫𑁆𑀧𑀸𑀤𑀓𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀏𑀓𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑁂 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀚𑁆𑀚𑀦𑀁 𑀦𑀸𑀫 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀆𑀘𑀺𑀡𑁆𑀡𑀁, 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀆𑀘𑀺𑀡𑁆𑀡𑀁. 𑀢𑀣𑀸 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀩𑁆𑀬𑀸𑀓𑀭𑀡𑀁 𑀮𑀪𑀺𑀢𑁆𑀯𑀸 𑀅𑀦𑀺𑀯𑀢𑁆𑀢𑀓𑁂𑀦 𑀳𑀼𑀢𑁆𑀯𑀸 𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀬 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀧𑀽𑀭𑀡𑀫𑁆𑀧𑀺 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀆𑀘𑀺𑀡𑁆𑀡𑀁, 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀆𑀘𑀺𑀡𑁆𑀡𑀁. 𑀢𑀣𑀸 𑀧𑀸𑀭𑀫𑀺𑀬𑁄 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀳𑀢𑁆𑀣𑀻𑀦𑀁 𑀲𑀢𑁆𑀢𑀲𑀢𑀸𑀦𑀺 𑀅𑀲𑁆𑀲𑀸𑀦𑀁 𑀲𑀢𑁆𑀢𑀲𑀢𑀸𑀦𑀻𑀢𑀺 𑀏𑀯𑀁 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀚𑀸𑀮𑀺𑀓𑀼𑀫𑀸𑀭𑀲𑀤𑀺𑀲𑀁 𑀧𑀼𑀢𑁆𑀢𑀁, 𑀓𑀡𑁆𑀳𑀸𑀚𑀺𑀦𑀸𑀲𑀤𑀺𑀲𑀁 𑀥𑀻𑀢𑀭𑀁, 𑀫𑀤𑁆𑀤𑀻𑀤𑁂𑀯𑀺𑀲𑀤𑀺𑀲𑀁 𑀪𑀭𑀺𑀬𑀜𑁆𑀘 𑀤𑀸𑀦𑀫𑀼𑀔𑁂 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑀼𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀢𑀼𑀲𑀺𑀢𑀪𑀯𑀦𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀫𑁆𑀧𑀺 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀆𑀘𑀺𑀡𑁆𑀡𑀁, 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀆𑀘𑀺𑀡𑁆𑀡𑀁. 𑀢𑀼𑀲𑀺𑀢𑀧𑀼𑀭𑁂 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑀢𑀸𑀦𑀁 𑀆𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀢𑀼𑀲𑀺𑀢𑀧𑀼𑀭𑀸 𑀘𑀯𑀺𑀢𑁆𑀯𑀸 𑀫𑀳𑀸𑀪𑁄𑀕𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀫𑁆𑀧𑀺 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀆𑀘𑀺𑀡𑁆𑀡𑀁, 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀆𑀘𑀺𑀡𑁆𑀡𑀁. 𑀢𑀣𑀸 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀫𑁆𑀧𑀺, 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀺𑀯𑀸𑀲𑁄𑀧𑀺, 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀫𑁆𑀧𑀺, 𑀲𑀫𑁆𑀧𑀢𑀺𑀚𑀸𑀢𑀲𑁆𑀲 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀕𑀫𑀦𑀫𑁆𑀧𑀺, 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢. 𑀥𑀸𑀭𑀡𑀫𑁆𑀧𑀺, 𑀤𑀺𑀩𑁆𑀩𑀯𑀸𑀴𑀩𑀻𑀚𑀦𑀼𑀓𑁆𑀔𑁂𑀧𑁄𑀧𑀺, 𑀲𑀩𑁆𑀩𑀤𑀺𑀲𑀸𑀲𑀼 𑀲𑀻𑀳𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑀸 𑀧𑀝𑀺𑀲𑀫𑀁 𑀓𑀜𑁆𑀘𑀺 𑀲𑀢𑁆𑀢𑀁 𑀅𑀤𑀺𑀲𑁆𑀯𑀸 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺 𑀏𑀯𑀁 𑀲𑀻𑀳𑀦𑀸𑀤𑀦𑀤𑀦𑀫𑁆𑀧𑀺, 𑀧𑀭𑀺𑀧𑀸𑀓𑀕𑀢𑁂 𑀜𑀸𑀡𑁂 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀫𑁆𑀧𑀺, 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀫𑀸𑀭𑀯𑀺𑀚𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀲𑁄𑀥𑀦𑀸𑀦𑀺 𑀓𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀼𑀡𑀭𑀸𑀲𑀺𑀧𑀝𑀺𑀯𑀺𑀤𑁆𑀥𑀓𑁆𑀔𑀡𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀫𑁆𑀧𑀺, 𑀧𑀞𑀫𑀥𑀫𑁆𑀫𑀤𑁂𑀲𑀦𑀸𑀬 𑀅𑀦𑀼𑀢𑁆𑀢𑀭𑀁 𑀢𑀺𑀧𑀭𑀺𑀯𑀝𑁆𑀝𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀫𑁆𑀧𑀻𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀆𑀘𑀺𑀡𑁆𑀡𑀁, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲𑁂𑀯 𑀆𑀘𑀺𑀡𑁆𑀡𑀁. 𑀏𑀯𑀁 𑀆𑀘𑀺𑀡𑁆𑀡𑀫𑀦𑀼𑀲𑁆𑀲𑁄𑀢𑀺𑀧𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄.

𑁧𑁭𑁩. 𑀘𑀢𑀼𑀢𑁆𑀣𑁂 𑀓𑀸𑀮𑀓𑀺𑀭𑀺𑀬𑀸𑀢𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀧𑀸𑀓𑀝𑀸 𑀓𑀺𑀭𑀺𑀬𑀸𑀢𑀺 𑀓𑀸𑀮𑀓𑀺𑀭𑀺𑀬𑀸. 𑀢𑀣𑀸𑀕𑀢𑁄 𑀳𑀺 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀞𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀧𑀜𑁆𑀘 𑀦𑀺𑀓𑀸𑀬𑁂 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀫𑀳𑀸𑀚𑀦𑀁 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀧𑁄𑀡𑀁 𑀓𑀢𑁆𑀯𑀸 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀦𑀺𑀧𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀫𑀦𑁆𑀢𑁂𑀢𑁆𑀯𑀸 𑀅𑀧𑁆𑀧𑀫𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀅𑀬𑀫𑀲𑁆𑀲 𑀓𑀺𑀭𑀺𑀬𑀸 𑀬𑀸𑀯𑀚𑁆𑀚𑀢𑀦𑀸 𑀧𑀸𑀓𑀝𑀸𑀢𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀧𑀸𑀓𑀝𑀸 𑀓𑀺𑀭𑀺𑀬𑀸𑀢𑀺 𑀓𑀸𑀮𑀓𑀺𑀭𑀺𑀬𑀸. 𑀅𑀦𑀼𑀢𑀧𑁆𑀧𑀸 𑀳𑁄𑀢𑀻𑀢𑀺 𑀅𑀦𑀼𑀢𑀸𑀧𑀓𑀭𑀸 𑀳𑁄𑀢𑀺. 𑀢𑀢𑁆𑀣 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀓𑀸𑀮𑀓𑀺𑀭𑀺𑀬𑀸 𑀏𑀓𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀢𑀸𑀧𑀓𑀭𑀸 𑀳𑁄𑀢𑀺. 𑀩𑀼𑀤𑁆𑀥𑀸𑀦𑀁 𑀓𑀸𑀮𑀓𑀺𑀭𑀺𑀬𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀢𑀸𑀧𑀓𑀭𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀼𑀢𑀧𑁆𑀧𑀸 𑀳𑁄𑀢𑀻’’𑀢𑀺.

𑁧𑁭𑁪. 𑀧𑀜𑁆𑀘𑀫𑁂 𑀅𑀤𑀼𑀢𑀺𑀬𑁄𑀢𑀺 𑀤𑀼𑀢𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑀸 𑀅𑀤𑀼𑀢𑀺𑀬𑁄. 𑀘𑀢𑁆𑀢𑀸𑀭𑁄 𑀳𑀺 𑀩𑀼𑀤𑁆𑀥𑀸 𑀲𑀼𑀢𑀩𑀼𑀤𑁆𑀥𑁄, 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄𑀢𑀺. 𑀢𑀢𑁆𑀣 𑀩𑀳𑀼𑀲𑁆𑀲𑀼𑀢𑁄 𑀪𑀺𑀓𑁆𑀔𑀼 𑀲𑀼𑀢𑀩𑀼𑀤𑁆𑀥𑁄 𑀦𑀸𑀫. 𑀔𑀻𑀡𑀸𑀲𑀯𑁄 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄 𑀦𑀸𑀫. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀸𑀫𑀁 𑀧𑀝𑀺𑀯𑀺𑀤𑁆𑀥𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀯𑀸 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀦𑀸𑀫. 𑀇𑀫𑁂𑀲𑀼 𑀘𑀢𑀽𑀲𑀼 𑀩𑀼𑀤𑁆𑀥𑁂𑀲𑀼 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄𑀯 𑀅𑀤𑀼𑀢𑀺𑀬𑁄 𑀦𑀸𑀫. 𑀦 𑀳𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺.

𑀅𑀲𑀳𑀸𑀬𑁄𑀢𑀺 𑀅𑀢𑁆𑀢𑀪𑀸𑀯𑁂𑀦 𑀯𑀸 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑁂𑀳𑀺 𑀯𑀸 𑀲𑀤𑀺𑀲𑁄 𑀲𑀳𑀸𑀬𑁄 𑀦𑀸𑀫 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀅𑀲𑀳𑀸𑀬𑁄. ‘‘𑀮𑀤𑁆𑀥𑀲𑀳𑀸𑀬𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀲𑁂𑀔𑀸𑀦𑀜𑁆𑀘𑁂𑀯 𑀧𑀝𑀺𑀧𑀤𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀧𑀭𑀺𑀬𑀸𑀬𑁂𑀦 𑀲𑁂𑀔𑀸𑀲𑁂𑀔𑀸 𑀩𑀼𑀤𑁆𑀥𑀸𑀦𑀁 𑀲𑀳𑀸𑀬𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀧𑁆𑀧𑀝𑀺𑀫𑁄𑀢𑀺 𑀧𑀝𑀺𑀫𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀪𑀸𑀯𑁄, 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑀤𑀺𑀲𑀸 𑀅𑀜𑁆𑀜𑀸 𑀧𑀝𑀺𑀫𑀸 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀫𑁄. 𑀬𑀸𑀧𑀺 𑀘 𑀫𑀦𑀼𑀲𑁆𑀲𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸 𑀧𑀝𑀺𑀫𑀸 𑀓𑀭𑁄𑀦𑁆𑀢𑀺, 𑀢𑀸𑀲𑀼 𑀯𑀸𑀮𑀕𑁆𑀕𑀫𑀢𑁆𑀢𑀫𑁆𑀧𑀺 𑀑𑀓𑀸𑀲𑀁 𑀢𑀣𑀸𑀕𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑀤𑀺𑀲𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀩𑁆𑀩𑀣𑀸𑀧𑀺 𑀅𑀧𑁆𑀧𑀝𑀺𑀫𑁄.

𑀅𑀧𑁆𑀧𑀝𑀺𑀲𑀫𑁄𑀢𑀺 𑀅𑀢𑁆𑀢𑀪𑀸𑀯𑁂𑀦𑁂𑀯𑀲𑁆𑀲 𑀧𑀝𑀺𑀲𑀫𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀲𑀫𑁄. 𑀅𑀧𑁆𑀧𑀝𑀺𑀪𑀸𑀕𑁄𑀢𑀺 𑀬𑁂 𑀢𑀣𑀸𑀕𑀢𑁂𑀦 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀸 𑀤𑁂𑀲𑀺𑀢𑀸, 𑀢𑁂𑀲𑀼 ‘‘𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀢𑀬𑁄 𑀯𑀸 𑀧𑀜𑁆𑀘 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀝𑀺𑀪𑀸𑀕𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀪𑀸𑀕𑁄. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀅𑀜𑁆𑀜𑁄 𑀓𑁄𑀘𑀺 ‘‘𑀅𑀳𑀁 𑀩𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀝𑀺𑀜𑁆𑀜𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄. 𑀅𑀲𑀫𑁄𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀢𑁆𑀢𑀸𑀯 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑁄. 𑀅𑀲𑀫𑀲𑀫𑁄𑀢𑀺 𑀅𑀲𑀫𑀸 𑀯𑀼𑀘𑁆𑀘𑀦𑁆𑀢𑀺 𑀅𑀢𑀻𑀢𑀸𑀦𑀸𑀕𑀢𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸, 𑀢𑁂𑀳𑀺 𑀅𑀲𑀫𑁂𑀳𑀺 𑀲𑀫𑁄𑀢𑀺 𑀅𑀲𑀫𑀲𑀫𑁄.

𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀧𑀤𑀸𑀦𑀁 𑀤𑁆𑀯𑀺𑀧𑀤𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀁 𑀩𑀳𑀼𑀧𑁆𑀧𑀤𑀸𑀦𑀁 𑀭𑀽𑀧𑀻𑀦𑀁 𑀅𑀭𑀽𑀧𑀻𑀦𑀁 𑀲𑀜𑁆𑀜𑀻𑀦𑀁 𑀅𑀲𑀜𑁆𑀜𑀻𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀦𑀁 𑀲𑀢𑁆𑀢𑀸𑀦𑀁 𑀅𑀕𑁆𑀕𑁄𑀯. 𑀓𑀲𑁆𑀫𑀸 𑀇𑀥 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄𑀢𑀺 𑀯𑀼𑀢𑁆𑀢𑁄? 𑀲𑁂𑀝𑁆𑀞𑀢𑀭𑀯𑀲𑁂𑀦. 𑀇𑀫𑀲𑁆𑀫𑀺𑀜𑁆𑀳𑀺 𑀮𑁄𑀓𑁂 𑀲𑁂𑀝𑁆𑀞𑁄 𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀧𑀤𑀘𑀢𑀼𑀧𑁆𑀧𑀤𑀩𑀳𑀼𑀧𑁆𑀧𑀤𑁂𑀲𑀼 𑀦 𑀉𑀧𑁆𑀧𑀚𑁆𑀚𑀢𑀺, 𑀤𑁆𑀯𑀺𑀧𑀤𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀓𑀢𑀭𑀤𑁆𑀯𑀺𑀧𑀤𑁆𑀯𑁂𑀲𑀽𑀢𑀺? 𑀫𑀦𑀼𑀲𑁆𑀲𑁂𑀲𑀼 𑀘𑁂𑀯 𑀤𑁂𑀯𑁂𑀲𑀼 𑀘. 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀲𑀯𑀢𑁆𑀢𑀻 𑀫𑀳𑀸𑀩𑁆𑀭𑀳𑁆𑀫𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀲𑁆𑀲 𑀓𑀧𑁆𑀧𑀺𑀬𑀓𑀸𑀭𑀓𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀲𑀫𑁆𑀧𑀚𑁆𑀚𑀢𑀺. 𑀇𑀢𑀺 𑀢𑀢𑁄𑀧𑀺 𑀲𑁂𑀝𑁆𑀞𑀢𑀭𑀯𑀲𑁂𑀦𑁂𑀲 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄𑀢𑀺 𑀯𑀼𑀢𑁆𑀢𑁄.

𑁧𑁭𑁫-𑁧𑁮𑁬. 𑀙𑀝𑁆𑀞𑀸𑀤𑀻𑀲𑀼 𑀏𑀓𑀧𑀼𑀕𑁆𑀕𑀮𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀢𑀼𑀪𑀸𑀯𑀸 𑀫𑀳𑀢𑁄 𑀘𑀓𑁆𑀔𑀼𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀻𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀢𑀼𑀪𑀸𑀯𑁂𑀦 𑀫𑀳𑀦𑁆𑀢𑀲𑁆𑀲 𑀘𑀓𑁆𑀔𑀼𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑀸𑀢𑀼𑀪𑀽𑀢𑁂 𑀢𑀁 𑀧𑀸𑀢𑀼𑀪𑀽𑀢𑀫𑁂𑀯 𑀳𑁄𑀢𑀺, 𑀦 𑀯𑀺𑀦𑀸 𑀢𑀲𑁆𑀲 𑀧𑀸𑀢𑀼𑀪𑀸𑀯𑁂𑀦 𑀧𑀸𑀢𑀼𑀪𑀯𑀢𑀺. 𑀧𑀸𑀢𑀼𑀪𑀸𑀯𑁄𑀢𑀺 𑀉𑀧𑁆𑀧𑀢𑁆𑀢𑀺 𑀦𑀺𑀧𑁆𑀨𑀢𑁆𑀢𑀺. 𑀓𑀢𑀫𑀲𑁆𑀲 𑀘𑀓𑁆𑀔𑀼𑀲𑁆𑀲𑀸𑀢𑀺? 𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲. 𑀓𑀻𑀯𑀭𑀽𑀧𑀲𑁆𑀲𑀸𑀢𑀺? 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀤𑀺𑀲𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀲𑀫𑀸𑀥𑀺𑀧𑀜𑁆𑀜𑀸𑀲𑀤𑀺𑀲𑀲𑁆𑀲𑀸𑀢𑀺. 𑀆𑀮𑁄𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀜𑁆𑀜𑀸𑀆𑀮𑁄𑀓𑀲𑀤𑀺𑀲𑁄𑀬𑁂𑀯 𑀳𑀺 𑀏𑀢𑁆𑀣 𑀆𑀮𑁄𑀓𑁄, 𑀧𑀜𑁆𑀜𑀸𑀑𑀪𑀸𑀲𑀲𑀤𑀺𑀲𑁄𑀬𑁂𑀯 𑀑𑀪𑀸𑀲𑁄 𑀅𑀥𑀺𑀧𑁆𑀧𑁂𑀢𑁄. ‘‘𑀫𑀳𑀢𑁄 𑀘𑀓𑁆𑀔𑀼𑀲𑁆𑀲, 𑀫𑀳𑀢𑁄 𑀆𑀮𑁄𑀓𑀲𑁆𑀲, 𑀫𑀳𑀢𑁄 𑀑𑀪𑀸𑀲𑀲𑁆𑀲𑀸’’𑀢𑀺 𑀇𑀫𑀸𑀦𑀺 𑀘 𑀧𑀦 𑀢𑀻𑀡𑀺𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀙𑀦𑁆𑀦𑀁 𑀅𑀦𑀼𑀢𑁆𑀢𑀭𑀺𑀬𑀸𑀦𑀦𑁆𑀢𑀺 𑀉𑀢𑁆𑀢𑀭𑀺𑀢𑀭𑀯𑀺𑀭𑀳𑀺𑀢𑀸𑀦𑀁 𑀙𑀦𑁆𑀦𑀁 𑀉𑀢𑁆𑀢𑀫𑀥𑀫𑁆𑀫𑀸𑀦𑀁. 𑀢𑀢𑁆𑀣 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁, 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁, 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁, 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁, 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁, 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀇𑀫𑀸𑀦𑀺 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺. 𑀇𑀫𑁂𑀲𑀁 𑀧𑀸𑀢𑀼𑀪𑀸𑀯𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀬𑀲𑁆𑀫𑀸 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀸𑀬𑀁𑀧𑀸𑀢𑀁 𑀢𑀣𑀸𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀝𑁆𑀞𑀼𑀁 𑀮𑀪𑀢𑀺, 𑀇𑀤𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁. 𑀅𑀜𑁆𑀜𑁄𑀧𑀺 𑀲𑁄𑀢𑀸𑀧𑀦𑁆𑀦𑁄 𑀯𑀸 𑀲𑀓𑀤𑀸𑀕𑀸𑀫𑀻 𑀯𑀸 𑀅𑀦𑀸𑀕𑀸𑀫𑀻 𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀮𑀪𑀢𑀺, 𑀇𑀤𑀫𑁆𑀧𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁. 𑀅𑀧𑀭𑁄 𑀧𑀦 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑀁 𑀤𑀲𑁆𑀲𑀦𑀸𑀬 𑀮𑀪𑀺𑀢𑁆𑀯𑀸 𑀢𑀁 𑀤𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑁂𑀢𑀺. 𑀇𑀤𑀁 𑀤𑀲𑁆𑀲𑀦𑀫𑁂𑀯 𑀦𑀸𑀫, 𑀫𑀽𑀮𑀤𑀲𑁆𑀲𑀦𑀁 𑀧𑀦 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫.

𑀆𑀦𑀦𑁆𑀤𑀢𑁆𑀣𑁂𑀭𑁄𑀬𑁂𑀯 𑀘 𑀅𑀪𑀺𑀓𑁆𑀔𑀡𑀁 𑀤𑀲𑀩𑀮𑀲𑁆𑀲 𑀯𑀘𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑁄𑀢𑀼𑀁 𑀮𑀪𑀢𑀺, 𑀇𑀤𑀁 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁. 𑀅𑀜𑁆𑀜𑁂𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀯𑀦𑀸𑀬 𑀮𑀪𑀦𑁆𑀢𑀺, 𑀇𑀤𑀫𑁆𑀧𑀺 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁. 𑀅𑀧𑀭𑁄 𑀧𑀦 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑁄𑀢𑀼𑀁 𑀮𑀪𑀺𑀢𑁆𑀯𑀸 𑀢𑀁 𑀲𑀯𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑁂𑀢𑀺. 𑀇𑀤𑀁 𑀲𑀯𑀦𑀫𑁂𑀯 𑀦𑀸𑀫, 𑀫𑀽𑀮𑀲𑀯𑀦𑀁 𑀧𑀦 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫.

𑀆𑀦𑀦𑁆𑀤𑀢𑁆𑀣𑁂𑀭𑁄𑀬𑁂𑀯 𑀘 𑀤𑀲𑀩𑀮𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺, 𑀇𑀤𑀁 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁. 𑀅𑀜𑁆𑀜𑁂𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑁂 𑀲𑀤𑁆𑀥𑀸𑀧𑀝𑀺𑀮𑀸𑀪𑀁 𑀮𑀪𑀦𑁆𑀢𑀺, 𑀇𑀤𑀫𑁆𑀧𑀺 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁. 𑀅𑀧𑀭𑁄 𑀧𑀦 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑁂 𑀲𑀤𑁆𑀥𑀸𑀧𑀝𑀺𑀮𑀸𑀪𑀁 𑀮𑀪𑀺𑀢𑁆𑀯𑀸 𑀢𑀁 𑀮𑀸𑀪𑀁 𑀯𑀟𑁆𑀠𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑁂𑀢𑀺, 𑀅𑀬𑀁 𑀮𑀸𑀪𑁄𑀬𑁂𑀯 𑀦𑀸𑀫, 𑀫𑀽𑀮𑀮𑀸𑀪𑁄 𑀧𑀦 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫.

𑀆𑀦𑀦𑁆𑀤𑀢𑁆𑀣𑁂𑀭𑁄𑀬𑁂𑀯 𑀘 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀢𑀺, 𑀇𑀤𑀁 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁. 𑀅𑀜𑁆𑀜𑁂𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀺, 𑀇𑀤𑀫𑁆𑀧𑀺 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁. 𑀅𑀧𑀭𑁄 𑀧𑀦 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑁆𑀯𑀸 𑀢𑀸 𑀲𑀺𑀓𑁆𑀔𑀸 𑀯𑀟𑁆𑀠𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑁂𑀢𑀺. 𑀅𑀬𑀁 𑀲𑀺𑀓𑁆𑀔𑀸𑀬𑁂𑀯 𑀦𑀸𑀫, 𑀫𑀽𑀮𑀲𑀺𑀓𑁆𑀔𑀸 𑀧𑀦 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫.

𑀆𑀦𑀦𑁆𑀤𑀢𑁆𑀣𑁂𑀭𑁄𑀬𑁂𑀯 𑀘 𑀅𑀪𑀺𑀡𑁆𑀳𑀁 𑀤𑀲𑀩𑀮𑀁 𑀧𑀭𑀺𑀘𑀭𑀢𑀺, 𑀇𑀤𑀁 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁. 𑀅𑀜𑁆𑀜𑁂𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀅𑀪𑀺𑀡𑁆𑀳𑀁 𑀤𑀲𑀩𑀮𑀁 𑀧𑀭𑀺𑀘𑀭𑀦𑁆𑀢𑀺, 𑀇𑀤𑀫𑁆𑀧𑀺 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁. 𑀅𑀧𑀭𑁄 𑀧𑀦 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑀁 𑀧𑀭𑀺𑀘𑀭𑀺𑀢𑁆𑀯𑀸 𑀢𑀁 𑀧𑀸𑀭𑀺𑀘𑀭𑀺𑀬𑀁 𑀯𑀟𑁆𑀠𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑁂𑀢𑀺, 𑀅𑀬𑀁 𑀧𑀸𑀭𑀺𑀘𑀭𑀺𑀬𑀸𑀬𑁂𑀯 𑀦𑀸𑀫, 𑀫𑀽𑀮𑀧𑀸𑀭𑀺𑀘𑀭𑀺𑀬𑀸 𑀧𑀦 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫.

𑀆𑀦𑀦𑁆𑀤𑀢𑁆𑀣𑁂𑀭𑁄𑀬𑁂𑀯 𑀘 𑀤𑀲𑀩𑀮𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑀺, 𑀇𑀤𑀁 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀁. 𑀅𑀜𑁆𑀜𑁂𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀇𑀤𑀫𑁆𑀧𑀺 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀁. 𑀅𑀧𑀭𑁄 𑀧𑀦 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀤𑀲𑀩𑀮𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀁 𑀅𑀦𑀼𑀲𑁆𑀲𑀢𑀺𑀁 𑀯𑀟𑁆𑀠𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑁂𑀢𑀺, 𑀅𑀬𑀁 𑀅𑀦𑀼𑀲𑁆𑀲𑀢𑀺𑀬𑁂𑀯 𑀦𑀸𑀫, 𑀫𑀽𑀮𑀸𑀦𑀼𑀲𑁆𑀲𑀢𑀺 𑀧𑀦 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀇𑀫𑀸𑀦𑀺 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀇𑀫𑁂𑀲𑀁 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀇𑀫𑀸𑀦𑀺 𑀘 𑀧𑀦 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸 𑀳𑁄𑀢𑀻𑀢𑀺 𑀘𑀢𑀲𑁆𑀲𑁄 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺. 𑀢𑀢𑁆𑀣 𑀅𑀢𑁆𑀣𑁂𑀲𑀼 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦𑁂𑀢𑀸𑀲𑀁 𑀅𑀪𑀺𑀥𑀫𑁆𑀫𑁂 (𑀯𑀺𑀪. 𑁭𑁧𑁮 𑀆𑀤𑀬𑁄) 𑀆𑀕𑀢𑁄𑀬𑁂𑀯. 𑀇𑀫𑀸𑀲𑀁 𑀘𑀢𑀲𑁆𑀲𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸 𑀳𑁄𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸. 𑀏𑀢𑀸𑀲𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑁂𑀓𑀥𑀸𑀢𑀼𑀧𑀝𑀺𑀯𑁂𑀥𑁄𑀢𑀺 ‘‘𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀽’’𑀢𑀺𑀆𑀤𑀻𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀦 𑀯𑀺𑀦𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀥𑀸𑀢𑀼𑀧𑀝𑀺𑀯𑁂𑀥𑁄𑀢𑀺 𑀏𑀢𑁆𑀣 𑀇𑀫𑀸𑀯 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀦𑀸𑀦𑀸𑀲𑀪𑀸𑀯𑀢𑁄 𑀦𑀸𑀦𑀸𑀥𑀸𑀢𑀼𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀧𑀦𑁂𑀢𑀸𑀲𑀁 ‘‘𑀦𑀸𑀦𑀸𑀲𑀪𑀸𑀯𑀸 𑀏𑀢𑀸’’𑀢𑀺 𑀏𑀯𑀁 𑀦𑀸𑀦𑀸𑀓𑀭𑀡𑀢𑁄 𑀧𑀝𑀺𑀯𑁂𑀥𑁄, 𑀅𑀬𑀁 𑀦𑀸𑀦𑀸𑀥𑀸𑀢𑀼𑀧𑀝𑀺𑀯𑁂𑀥𑁄 𑀦𑀸𑀫. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀏𑀢𑁆𑀣 𑀯𑀺𑀚𑁆𑀚𑀸𑀢𑀺 𑀨𑀮𑁂 𑀜𑀸𑀡𑀁, 𑀯𑀺𑀫𑀼𑀢𑁆𑀢𑀻𑀢𑀺 𑀢𑀤𑀯𑀲𑁂𑀲𑀸 𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀲𑁄𑀢𑁄𑀢𑀺 𑀧𑀞𑀫𑀫𑀕𑁆𑀕𑁄, 𑀢𑁂𑀦 𑀲𑁄𑀢𑁂𑀦 𑀧𑀢𑁆𑀢𑀩𑁆𑀩𑀁 𑀨𑀮𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁. 𑀲𑀓𑀤𑀸𑀕𑀸𑀫𑀺𑀨𑀮𑀸𑀤𑀻𑀦𑀺 𑀧𑀸𑀓𑀝𑀸𑀦𑁂𑀯.

𑁧𑁮𑁭. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀦𑀺𑀭𑀼𑀢𑁆𑀢𑀭𑀁. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀲𑁂𑀝𑁆𑀞𑀘𑀓𑁆𑀓𑀁. 𑀘𑀓𑁆𑀓𑀲𑀤𑁆𑀤𑁄 𑀳𑁂𑀲 𑁋

‘‘𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺. (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑁋

𑀏𑀢𑁆𑀣 𑀉𑀭𑀘𑀓𑁆𑀓𑁂 𑀆𑀕𑀢𑁄. ‘‘𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸 𑀚𑀸𑀦𑀧𑀤𑀸 𑀧𑀭𑀺𑀬𑀸𑀬𑀦𑁆𑀢𑀻’’𑀢𑀺 (𑀅. 𑀦𑀺. 𑁩.𑁬𑁩; 𑁫.𑁫𑁪) 𑀏𑀢𑁆𑀣 𑀇𑀭𑀺𑀬𑀸𑀧𑀣𑀘𑀓𑁆𑀓𑁂. ‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀭𑀣𑀓𑀸𑀭𑁄 𑀬𑀁 𑀢𑀁 𑀘𑀓𑁆𑀓𑀁 𑀙𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀁, 𑀢𑀁 𑀧𑀯𑀢𑁆𑀢𑁂𑀲𑀻’’𑀢𑀺 (𑀅. 𑀦𑀺. 𑁩.𑁧𑁫) 𑀏𑀢𑁆𑀣 𑀤𑀸𑀭𑀼𑀘𑀓𑁆𑀓𑁂. ‘‘𑀅𑀤𑁆𑀤𑀲𑀸 𑀔𑁄 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀘𑀓𑁆𑀓𑀸𑀦𑀺 𑀲𑀳𑀲𑁆𑀲𑀸𑀭𑀸𑀦𑀻’’𑀢𑀺 (𑀅. 𑀦𑀺. 𑁪.𑁩𑁬) 𑀏𑀢𑁆𑀣 𑀮𑀓𑁆𑀔𑀡𑀘𑀓𑁆𑀓𑁂. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀏𑀢𑁆𑀣 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀻’’𑀢𑀺 (𑀤𑀻. 𑀦𑀺. 𑁨.𑁨𑁪𑁩; 𑀫. 𑀦𑀺. 𑁩.𑁨𑁫𑁬) 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. 𑀇𑀥 𑀧𑀦 𑀥𑀫𑁆𑀫𑀘𑀓𑁆𑀓𑁂 𑀆𑀕𑀢𑁄.

𑀧𑀯𑀢𑁆𑀢𑀺𑀢𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑀁 𑀅𑀪𑀺𑀦𑀻𑀳𑀭𑀢𑀺 𑀦𑀸𑀫, 𑀅𑀪𑀺𑀦𑀻𑀳𑀝𑀁 𑀦𑀸𑀫, 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫, 𑀉𑀧𑁆𑀧𑀸𑀤𑀺𑀢𑀁 𑀦𑀸𑀫, 𑀧𑀯𑀢𑁆𑀢𑁂𑀢𑀺 𑀦𑀸𑀫, 𑀧𑀯𑀢𑁆𑀢𑀺𑀢𑀁 𑀦𑀸𑀫𑀸𑀢𑀺 𑀅𑀬𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀘𑀓𑁆𑀓𑀁 𑀅𑀪𑀺𑀦𑀻𑀳𑀭𑀢𑀺 𑀦𑀸𑀫𑀸𑀢𑀺? 𑀬𑀤𑀸 𑀲𑀼𑀫𑁂𑀥𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀘𑀓𑁆𑀓𑀁 𑀅𑀪𑀺𑀦𑀻𑀳𑀭𑀢𑀺 𑀦𑀸𑀫.

𑀓𑀼𑀢𑁄 𑀧𑀝𑁆𑀞𑀸𑀬 𑀅𑀪𑀺𑀦𑀻𑀳𑀝𑀁 𑀦𑀸𑀫𑀸𑀢𑀺? 𑀬𑀤𑀸 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀫𑀳𑀸𑀩𑁄𑀥𑀺𑀫𑀡𑁆𑀟𑀢𑁆𑀣𑀸𑀬 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀩𑁆𑀬𑀸𑀓𑀭𑀡𑀁 𑀅𑀮𑀤𑁆𑀥𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀬 𑀦𑀺𑀧𑀦𑁆𑀦𑁄 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀸 𑀩𑁆𑀬𑀸𑀓𑀭𑀡𑀁 𑀮𑀪𑀺, 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀘𑀓𑁆𑀓𑀁 𑀅𑀪𑀺𑀦𑀻𑀳𑀝𑀁 𑀦𑀸𑀫.

𑀓𑀼𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫𑀸𑀢𑀺? 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀦𑁆𑀢𑁄𑀧𑀺 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫. 𑀲𑀻𑀮𑀧𑀸𑀭𑀫𑀺𑀁 𑀧𑀽𑀭𑁂𑀦𑁆𑀢𑁄𑀧𑀺…𑀧𑁂… 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀁 𑀧𑀽𑀭𑁂𑀦𑁆𑀢𑁄𑀧𑀺 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫. 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺, 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑁄𑀧𑀺, 𑀜𑀸𑀢𑀢𑁆𑀣𑀘𑀭𑀺𑀬𑀁 𑀧𑀽𑀭𑁂𑀦𑁆𑀢𑁄𑀧𑀺 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀤𑀸𑀦𑀫𑀼𑀔𑁂 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀸𑀭𑀫𑀺𑀓𑀽𑀝𑀁 𑀕𑀳𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑀢𑀸𑀳𑀺 𑀆𑀬𑀸𑀘𑀺𑀢𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀦𑁆𑀢𑁄𑀧𑀺 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑀺𑀬𑁂𑀯 𑀦𑀸𑀫. 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺, 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀓𑀫𑁆𑀧𑁂𑀦𑁆𑀢𑁄𑀧𑀺, 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂 𑀢𑀣𑁂𑀯 𑀮𑁄𑀓𑀁 𑀓𑀫𑁆𑀧𑁂𑀦𑁆𑀢𑁄𑀧𑀺, 𑀲𑀫𑁆𑀧𑀢𑀺𑀚𑀸𑀢𑁄 𑀲𑀢𑁆𑀢 𑀧𑀤𑀸𑀦𑀺 𑀕𑀦𑁆𑀢𑁆𑀯𑀸 ‘‘𑀅𑀕𑁆𑀕𑁄𑀫𑀳𑀲𑁆𑀫𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄𑀧𑀺, 𑀏𑀓𑀽𑀦𑀢𑀺𑀁𑀲 𑀲𑀁𑀯𑀘𑁆𑀙𑀭𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄𑀧𑀺, 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀦𑁆𑀢𑁄𑀧𑀺, 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀦𑁆𑀢𑁄𑀧𑀺, 𑀫𑀳𑀸𑀧𑀥𑀸𑀦𑁂 𑀙𑀩𑁆𑀩𑀲𑁆𑀲𑀸𑀦𑀺 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄𑀧𑀺, 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀫𑀥𑀼𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀤𑀺𑀬𑀸 𑀧𑀯𑀸𑀳𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀩𑁄𑀥𑀺𑀫𑀡𑁆𑀟𑀯𑀭𑀕𑀢𑁄 𑀧𑀼𑀭𑀢𑁆𑀣𑀺𑀫𑀁 𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀽𑀭𑀺𑀬𑁂 𑀥𑀭𑀫𑀸𑀦𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀦𑁆𑀢𑁄𑀧𑀺, 𑀧𑀘𑁆𑀘𑀽𑀲𑀓𑀸𑀮𑀲𑀫𑀦𑀦𑁆𑀢𑀭𑁂 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄𑀧𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀲𑀓𑀤𑀸𑀕𑀸𑀫𑀺𑀨𑀮𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄𑀧𑀺, 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑀺𑀬𑁂𑀯 𑀦𑀸𑀫.

𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀧𑀦 𑀢𑁂𑀦 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑀺𑀢𑀁 𑀦𑀸𑀫. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀭𑀸𑀲𑀺 𑀅𑀭𑀳𑀢𑁆𑀢𑀨𑀮𑁂𑀦𑁂𑀯 𑀲𑀤𑁆𑀥𑀺𑀁 𑀇𑀚𑁆𑀛𑀢𑀺. 𑀢𑀲𑁆𑀫𑀸 𑀢𑁂𑀦 𑀢𑀲𑁆𑀫𑀺𑀁 𑀔𑀡𑁂 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑀺𑀢𑀁 𑀦𑀸𑀫 𑀳𑁄𑀢𑀺.

𑀓𑀤𑀸 𑀧𑀯𑀢𑁆𑀢𑁂𑀢𑀺 𑀦𑀸𑀫? 𑀩𑁄𑀥𑀺𑀫𑀡𑁆𑀟𑁂 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀜𑁆𑀜𑀸𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀦𑁆𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺 𑀦𑀸𑀫.

𑀬𑀤𑀸 𑀧𑀦 𑀅𑀜𑁆𑀜𑀸𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁂𑀦 𑀤𑀲𑀩𑀮𑀲𑁆𑀲 𑀤𑁂𑀲𑀦𑀸𑀜𑀸𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀁 𑀲𑀯𑀦𑀁 𑀮𑀪𑀺𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀥𑀫𑁆𑀫𑁄 𑀅𑀥𑀺𑀕𑀢𑁄, 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀘𑁂𑀢𑀁 𑀤𑁂𑀲𑀦𑀸𑀜𑀸𑀡𑀲𑁆𑀲𑀧𑀺 𑀦𑀸𑀫𑀁 𑀧𑀝𑀺𑀯𑁂𑀥𑀜𑀸𑀡𑀲𑁆𑀲𑀧𑀺. 𑀢𑁂𑀲𑀼 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁, 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁. 𑀓𑀲𑁆𑀲 𑀤𑁂𑀲𑀦𑀸𑀧𑀝𑀺𑀯𑁂𑀥𑀜𑀸𑀡𑀦𑁆𑀢𑀺? 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀤𑁂𑀲𑀦𑀸𑀜𑀸𑀡𑀜𑁆𑀘 𑀧𑀝𑀺𑀯𑁂𑀥𑀜𑀸𑀡𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀫𑁆𑀫𑀤𑁂𑀯𑀸𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦𑁂𑀯. 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀻𑀢𑀺 𑀬𑀣𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄 𑀢𑀁 𑀅𑀦𑀼𑀕𑀘𑁆𑀙𑀢𑀺 𑀦𑀸𑀫, 𑀏𑀯𑀁 𑀧𑀞𑀫𑀢𑀭𑀁 𑀲𑀢𑁆𑀣𑀸𑀭𑀸 𑀧𑀯𑀢𑁆𑀢𑀺𑀢𑀁 𑀣𑁂𑀭𑁄 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺 𑀦𑀸𑀫. 𑀓𑀣𑀁? 𑀲𑀢𑁆𑀣𑀸 𑀳𑀺 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄’’𑀢𑀺 𑀓𑀣𑁂𑀦𑁆𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺 𑀦𑀸𑀫, 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 ‘‘𑀘𑀢𑁆𑀢𑀸𑀭𑁄𑀫𑁂, 𑀆𑀯𑀼𑀲𑁄, 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀓𑀣𑁂𑀦𑁆𑀢𑁄 𑀥𑀫𑁆𑀫𑀘𑀓𑁆𑀓𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺 𑀦𑀸𑀫. 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀓𑁂𑀯𑀮𑀜𑁆𑀘 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼, ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀯𑀁𑀲𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀦𑁂𑀢𑀩𑁆𑀩𑁄𑀯. 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺 𑀦𑀸𑀫, 𑀣𑁂𑀭𑁄 𑀤𑀲𑀩𑀮𑁂𑀦 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺 𑀦𑀸𑀫.

𑀏𑀯𑀁 𑀥𑀫𑁆𑀫𑀘𑀓𑁆𑀓𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀦𑁆𑀢𑁂𑀦 𑀧𑀦 𑀣𑁂𑀭𑁂𑀦 𑀥𑀫𑁆𑀫𑁄 𑀤𑁂𑀲𑀺𑀢𑁄𑀧𑀺 𑀧𑀓𑀸𑀲𑀺𑀢𑁄𑀧𑀺 𑀲𑀢𑁆𑀣𑀸𑀭𑀸𑀯 𑀤𑁂𑀲𑀺𑀢𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺. 𑀬𑁄 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀤𑁂𑀯𑁄 𑀯𑀸 𑀲𑀓𑁆𑀓𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀧𑀓𑀸𑀲𑁂𑀢𑀼, 𑀲𑀩𑁆𑀩𑁄 𑀲𑁄 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑁄 𑀧𑀓𑀸𑀲𑀺𑀢𑁄𑀯 𑀦𑀸𑀫 𑀳𑁄𑀢𑀺, 𑀲𑁂𑀲𑀚𑀦𑁄 𑀧𑀦 𑀮𑁂𑀔𑀳𑀸𑀭𑀓𑀧𑀓𑁆𑀔𑁂 𑀞𑀺𑀢𑁄𑀯 𑀦𑀸𑀫 𑀳𑁄𑀢𑀺. 𑀓𑀣𑀁? 𑀬𑀣𑀸 𑀳𑀺 𑀭𑀜𑁆𑀜𑀸 𑀤𑀺𑀦𑁆𑀦𑀁 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀬𑀁 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀁 𑀢𑀁 𑀓𑀫𑁆𑀫𑀁 𑀬𑁂𑀦 𑀓𑁂𑀦𑀘𑀺 𑀓𑀢𑀫𑁆𑀧𑀺 𑀓𑀸𑀭𑀺𑀢𑀫𑁆𑀧𑀺 𑀭𑀜𑁆𑀜𑀸 𑀓𑀸𑀭𑀺𑀢𑀦𑁆𑀢𑁂𑀯 𑀯𑀼𑀘𑁆𑀘𑀢𑀺. 𑀫𑀳𑀸𑀭𑀸𑀚𑀸 𑀯𑀺𑀬 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀭𑀸𑀚𑀧𑀡𑁆𑀡𑀁 𑀯𑀺𑀬 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁. 𑀧𑀡𑁆𑀡𑀤𑀸𑀦𑀁 𑀯𑀺𑀬 𑀢𑁂𑀧𑀺𑀝𑀓𑁂 𑀦𑀬𑀫𑀼𑀔𑀤𑀸𑀦𑀁 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀢𑀁𑀢𑀁𑀓𑀫𑁆𑀫𑀸𑀦𑀁 𑀓𑀭𑀡𑀁 𑀯𑀺𑀬 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑁂𑀲𑀁 𑀤𑁂𑀲𑀦𑀸 𑀧𑀓𑀸𑀲𑀦𑀸. 𑀢𑀢𑁆𑀣 𑀬𑀣𑀸 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀓𑀢𑀫𑁆𑀧𑀺 𑀓𑀸𑀭𑀺𑀢𑀫𑁆𑀧𑀺 𑀢𑀁 𑀓𑀫𑁆𑀫𑀁 𑀭𑀜𑁆𑀜𑀸 𑀓𑀸𑀭𑀺𑀢𑀫𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀬𑁂𑀦 𑀓𑁂𑀦𑀘𑀺 𑀤𑁂𑀲𑀺𑀢𑁄𑀧𑀺 𑀧𑀓𑀸𑀲𑀺𑀢𑁄𑀧𑀺 𑀥𑀫𑁆𑀫𑁄 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑁄 𑀧𑀓𑀸𑀲𑀺𑀢𑁄𑀯 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀯𑀡𑁆𑀡𑀦𑀸.