𑁧. 𑀭𑀽𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑀢𑀢𑁆𑀣 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁄 𑀦𑀸𑀫 𑀏𑀓𑀓𑀦𑀺𑀧𑀸𑀢𑁄 𑀤𑀼𑀓𑀦𑀺𑀧𑀸𑀢𑁄 𑀢𑀺𑀓𑀦𑀺𑀧𑀸𑀢𑁄 𑀘𑀢𑀼𑀓𑁆𑀓𑀦𑀺𑀧𑀸𑀢𑁄 𑀧𑀜𑁆𑀘𑀓𑀦𑀺𑀧𑀸𑀢𑁄 𑀙𑀓𑁆𑀓𑀦𑀺𑀧𑀸𑀢𑁄 𑀲𑀢𑁆𑀢𑀓𑀦𑀺𑀧𑀸𑀢𑁄 𑀅𑀝𑁆𑀞𑀓𑀦𑀺𑀧𑀸𑀢𑁄 𑀦𑀯𑀓𑀦𑀺𑀧𑀸𑀢𑁄 𑀤𑀲𑀓𑀦𑀺𑀧𑀸𑀢𑁄 𑀏𑀓𑀸𑀤𑀲𑀓𑀦𑀺𑀧𑀸𑀢𑁄𑀢𑀺 𑀏𑀓𑀸𑀤𑀲 𑀦𑀺𑀧𑀸𑀢𑀸 𑀳𑁄𑀦𑁆𑀢𑀺. 𑀲𑀼𑀢𑁆𑀢𑀢𑁄 𑁋

‘‘𑀦𑀯 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀲𑀢𑁆𑀢𑀧𑀜𑁆𑀜𑀸𑀲 𑀲𑀼𑀢𑁆𑀢𑀸𑀦𑀺, 𑀳𑁄𑀦𑁆𑀢𑀺 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂’’.

𑀢𑀲𑁆𑀲 𑀦𑀺𑀧𑀸𑀢𑁂𑀲𑀼 𑀏𑀓𑀓𑀦𑀺𑀧𑀸𑀢𑁄 𑀆𑀤𑀺, 𑀲𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁 𑀦𑀺𑀤𑀸𑀦𑀫𑀸𑀤𑀺. 𑀲𑀸 𑀧𑀦𑁂𑀲𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀆𑀤𑀺𑀫𑁆𑀳𑀺 𑀯𑀺𑀢𑁆𑀣𑀸𑀭𑀺𑀢𑀸, 𑀢𑀲𑁆𑀫𑀸 𑀲𑀸 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀤𑀸𑀦𑀯𑀡𑁆𑀡𑀦𑀸

𑁧. 𑀬𑀁 𑀧𑀦𑁂𑀢𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑀁 𑀦𑀺𑀤𑀸𑀦𑀁, 𑀢𑀢𑁆𑀣 𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤𑀁, 𑀫𑁂𑀢𑀺𑀆𑀤𑀻𑀦𑀺 𑀦𑀸𑀫𑀧𑀤𑀸𑀦𑀺. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀻𑀢𑀺 𑀉𑀧𑀲𑀕𑁆𑀕𑀧𑀤𑀁, 𑀳𑀭𑀢𑀻𑀢𑀺 𑀆𑀔𑁆𑀬𑀸𑀢𑀧𑀤𑀦𑁆𑀢𑀺 𑀇𑀫𑀺𑀦𑀸 𑀢𑀸𑀯 𑀦𑀬𑁂𑀦 𑀧𑀤𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀢𑁄 𑀧𑀦 𑀏𑀯𑀁𑀲𑀤𑁆𑀤𑁄 𑀢𑀸𑀯 𑀉𑀧𑀫𑀽𑀧𑀤𑁂𑀲-𑀲𑀫𑁆𑀧𑀳𑀁𑀲𑀦-𑀕𑀭𑀳𑀡𑀯𑀘𑀦-𑀲𑀫𑁆𑀧𑀝𑀺𑀕𑁆𑀕𑀳𑀸𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀸𑀤𑀺-𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀧. 𑁫𑁩) 𑀉𑀧𑀫𑀸𑀬𑀁 𑀆𑀕𑀢𑁄. ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁨𑁨) 𑀉𑀧𑀤𑁂𑀲𑁂. ‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀲𑀫𑁆𑀧𑀳𑀁𑀲𑀦𑁂. ‘‘𑀏𑀯𑀫𑁂𑀯𑀁 𑀧𑀦𑀸𑀬𑀁 𑀯𑀲𑀮𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁮𑁭) 𑀕𑀭𑀳𑀡𑁂. ‘‘𑀏𑀯𑀁, 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧) 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂. ‘‘𑀏𑀯𑀁 𑀩𑁆𑀬𑀸𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁯𑁮) 𑀆𑀓𑀸𑀭𑁂. ‘‘𑀏𑀳𑀺 𑀢𑁆𑀯𑀁, 𑀫𑀸𑀡𑀯𑀓, 𑀬𑁂𑀦 𑀲𑀫𑀡𑁄 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀲𑀫𑀡𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁…𑀧𑁂… 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺, 𑀏𑀯𑀜𑁆𑀘 𑀯𑀤𑁂𑀳𑀺 ‘‘𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁫) 𑀦𑀺𑀤𑀲𑁆𑀲𑀦𑁂. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀓𑀸𑀮𑀸𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸𑀢𑀺? 𑀅𑀓𑀼𑀲𑀮𑀸, 𑀪𑀦𑁆𑀢𑁂. 𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸𑀢𑀺? 𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂. 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸𑀢𑀺? 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀪𑀦𑁆𑀢𑁂. 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻𑀢𑀺? 𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀅𑀯𑀥𑀸𑀭𑀡𑁂. 𑀲𑁆𑀯𑀸𑀬𑀫𑀺𑀥 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁𑀲𑀤𑁆𑀤𑁂𑀦 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦𑀸𑀦𑀸𑀦𑀬𑀦𑀺𑀧𑀼𑀡𑀁 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀢𑁄 𑀲𑁄𑀢𑀧𑀣𑀫𑀸𑀕𑀘𑁆𑀙𑀦𑁆𑀢𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀲𑀩𑁆𑀩𑀣𑀸𑀫𑁂𑀦 𑀧𑀦 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑁆𑀯𑀸𑀧𑀺 𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀦𑀺𑀤𑀲𑁆𑀲𑀦𑀢𑁆𑀣𑁂𑀦 ‘‘𑀦𑀸𑀳𑀁 𑀲𑀬𑀫𑁆𑀪𑀽, 𑀦 𑀫𑀬𑀸 𑀇𑀤𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀯𑀁 𑀲𑀼𑀢’’𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺.

𑀅𑀯𑀥𑀸𑀭𑀡𑀢𑁆𑀣𑁂𑀦 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀲𑀢𑀺𑀫𑀦𑁆𑀢𑀸𑀦𑀁, 𑀕𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁩) 𑀏𑀯𑀁 𑀪𑀕𑀯𑀢𑀸, ‘‘𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀢𑁆𑀣𑀓𑀼𑀲𑀮𑁄 𑀥𑀫𑁆𑀫𑀓𑀼𑀲𑀮𑁄 𑀩𑁆𑀬𑀜𑁆𑀚𑀦𑀓𑀼𑀲𑀮𑁄 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄’’𑀢𑀺 (𑀅. 𑀦𑀺. 𑁫.𑁧𑁬𑁯) 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀥𑀸𑀭𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑀺 ‘‘𑀏𑀯𑀁 𑀫𑁂 𑀲𑀼𑀢𑀁, 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀁, 𑀏𑀯𑀫𑁂𑀯, 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩’’𑀦𑁆𑀢𑀺.

𑀫𑁂𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺𑀲𑁆𑀲 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁧; 𑀲𑀁. 𑀦𑀺. 𑁧.𑁧𑁯𑁪) 𑀫𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁮) 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀫𑀫𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀫𑀬𑀸 𑀲𑀼𑀢’’𑀦𑁆𑀢𑀺 𑀘, ‘‘𑀫𑀫 𑀲𑀼𑀢’’𑀦𑁆𑀢𑀺 𑀘 𑀅𑀢𑁆𑀣𑀤𑁆𑀯𑀬𑁂 𑀬𑀼𑀚𑁆𑀚𑀢𑀺.

𑀲𑀼𑀢𑀦𑁆𑀢𑀺 𑀅𑀬𑀁 𑀲𑀼𑀢𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀘 𑀅𑀦𑀼𑀧𑀲𑀕𑁆𑀕𑁄 𑀘 𑀕𑀫𑀦-𑀯𑀺𑀲𑁆𑀲𑀼𑀢-𑀓𑀺𑀮𑀺𑀦𑁆𑀦𑀉𑀧𑀘𑀺𑀢𑀸𑀦𑀼𑀬𑁄𑀕-𑀲𑁄𑀢𑀯𑀺𑀜𑁆𑀜𑁂𑀬𑁆𑀬-𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑀺𑀲𑁆𑀲 𑁋 ‘‘𑀲𑁂𑀦𑀸𑀬 𑀧𑀲𑀼𑀢𑁄’’𑀢𑀺𑀆𑀤𑀻𑀲𑀼 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁧𑁧) 𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁫𑁭) 𑀓𑀺𑀮𑀺𑀦𑁆𑀦𑀸𑀓𑀺𑀮𑀺𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁭-𑁧𑁨) 𑀉𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 𑀥𑀻𑀭𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁮𑁧) 𑀛𑀸𑀦𑀸𑀦𑀼𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁪𑁧) 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁩𑁯) 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀭𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀸 𑀉𑀧𑀥𑀸𑀭𑀡𑀦𑁆𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀫𑁂-𑀲𑀤𑁆𑀤𑀲𑁆𑀲 𑀳𑀺 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀺 ‘‘𑀏𑀯𑀁 𑀫𑀬𑀸 𑀲𑀼𑀢𑀁 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢’’𑀦𑁆𑀢𑀺 𑀬𑀼𑀚𑁆𑀚𑀢𑀺. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀺 ‘‘𑀏𑀯𑀁 𑀫𑀫 𑀲𑀼𑀢𑀁 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀡’’𑀦𑁆𑀢𑀺 𑀬𑀼𑀚𑁆𑀚𑀢𑀺.

𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦𑀁. 𑀫𑁂𑀢𑀺 𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀲𑀼𑀢𑀦𑁆𑀢𑀺 𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀏𑀯𑀦𑁆𑀢𑀺 𑀢𑀲𑁆𑀲𑀸 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀪𑀸𑀯𑀧𑁆𑀧𑀓𑀸𑀲𑀦𑀁. 𑀫𑁂𑀢𑀺 𑀅𑀢𑁆𑀢𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 ‘‘𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀫𑀬𑀸 𑀦 𑀅𑀜𑁆𑀜𑀁 𑀓𑀢𑀁, 𑀇𑀤𑀁 𑀧𑀦 𑀓𑀢𑀁, 𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄’’𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑀁. 𑀫𑁂𑀢𑀺 𑀧𑀼𑀕𑁆𑀕𑀮𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀢𑀁 𑀫𑀬𑀸 𑀏𑀯𑀁 𑀲𑀼𑀢𑀦𑁆𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄. 𑀏𑀯𑀦𑁆𑀢𑀺 𑀳𑀺 𑀅𑀬𑀁 𑀆𑀓𑀸𑀭𑀧𑀜𑁆𑀜𑀢𑁆𑀢𑀺. 𑀫𑁂𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀺𑀦𑁄 𑀓𑀢𑁆𑀢𑀼 𑀯𑀺𑀲𑀬𑁂 𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁 𑀳𑁄𑀢𑀺.

𑀅𑀣 𑀯𑀸 𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀫𑀬𑀸 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸 𑀧𑀼𑀕𑁆𑀕𑀮𑁂𑀦 𑀯𑀺𑀜𑁆𑀜𑀸𑀡𑀯𑀲𑁂𑀦 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀓𑀺𑀜𑁆𑀳𑁂𑀢𑁆𑀣 𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀬𑀁 𑀏𑀯𑀦𑁆𑀢𑀺 𑀯𑀸 𑀫𑁂𑀢𑀺 𑀯𑀸 𑀦𑀺𑀤𑁆𑀤𑁂𑀲𑀁 𑀮𑀪𑁂𑀣. 𑀲𑀼𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀬𑀜𑁆𑀳𑀺 𑀢𑀁 𑀏𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥𑀁, 𑀢𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀦𑁆𑀢𑀺. 𑀢𑀣𑀸 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺. 𑀲𑀼𑀢𑀦𑁆𑀢𑀺 𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺.

𑀏𑀢𑁆𑀣 𑀘 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀺. 𑀦 𑀳𑀺 𑀲𑀫𑁆𑀫𑀽𑀴𑁆𑀳𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀺. 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀺. 𑀬𑀲𑁆𑀲 𑀳𑀺 𑀲𑀼𑀢𑀁 𑀲𑀫𑁆𑀫𑀼𑀝𑁆𑀞𑀁 𑀳𑁄𑀢𑀺, 𑀦 𑀲𑁄 𑀓𑀸𑀮𑀦𑁆𑀢𑀭𑁂𑀦 𑀫𑀬𑀸 𑀲𑀼𑀢𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀇𑀘𑁆𑀘𑀲𑁆𑀲 𑀅𑀲𑀫𑁆𑀫𑁄𑀳𑁂𑀦 𑀧𑀜𑁆𑀜𑀸𑀲𑀺𑀤𑁆𑀥𑀺, 𑀅𑀲𑀫𑁆𑀫𑁄𑀲𑁂𑀦 𑀧𑀦 𑀲𑀢𑀺𑀲𑀺𑀤𑁆𑀥𑀺. 𑀢𑀢𑁆𑀣 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀲𑀢𑀺𑀬𑀸 𑀩𑁆𑀬𑀜𑁆𑀚𑀦𑀸𑀯𑀥𑀸𑀭𑀡𑀲𑀫𑀢𑁆𑀣𑀢𑀸, 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀅𑀢𑁆𑀣𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀸. 𑀢𑀤𑀼𑀪𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀓𑁄𑀲𑀲𑁆𑀲 𑀅𑀦𑀼𑀧𑀸𑀮𑀦𑀲𑀫𑀢𑁆𑀣𑀢𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀲𑀺𑀤𑁆𑀥𑀺.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀺, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀳𑀺 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀸𑀪𑀸𑀯𑀢𑁄. 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀺, 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀲𑀯𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑀬𑀸 𑀲𑀼𑀢𑀁, 𑀧𑀼𑀦 𑀪𑀡𑀣𑀸’’𑀢𑀺 𑀪𑀡𑀢𑀺. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀘𑁂𑀢𑁆𑀣 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀁 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀁 𑀲𑀸𑀥𑁂𑀢𑀺 𑀲𑀫𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀢𑀤𑀪𑀸𑀯𑀢𑁄. 𑀢𑀣𑀸 𑀅𑀯𑀺𑀓𑁆𑀔𑁂𑀧𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀜𑁆𑀘 𑀲𑀸𑀥𑁂𑀢𑀺. 𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑁄𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀘 𑀲𑀧𑁆𑀧𑀼𑀭𑀺𑀲𑁂 𑀅𑀦𑀼𑀧𑀲𑁆𑀲𑀬𑀫𑀸𑀦𑀲𑁆𑀲 𑀲𑀯𑀦𑀁 𑀅𑀢𑁆𑀣𑀻𑀢𑀺.

𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀫𑀸 ‘‘𑀏𑀯𑀦𑁆𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀲𑁄 𑀘 𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄 𑀦 𑀲𑀫𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀢𑁆𑀢𑀦𑁄 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀪𑀤𑁆𑀤𑀓𑁂𑀦𑀸𑀓𑀸𑀭𑁂𑀦 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀫𑀢𑁆𑀢𑀦𑁄 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀲𑀯𑀦𑀬𑁄𑀕𑁂𑀦 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀦 𑀳𑀺 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁂 𑀯𑀲𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀲𑁆𑀲 𑀯𑀸 𑀲𑀯𑀦𑀁 𑀅𑀢𑁆𑀣𑀺. 𑀇𑀘𑁆𑀘𑀲𑁆𑀲 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀺, 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀧𑀬𑁄𑀕𑀲𑀼𑀤𑁆𑀥𑀺. 𑀢𑀸𑀬 𑀘 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺, 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺. 𑀇𑀢𑀺 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀲𑁆𑀲 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀲𑁆𑀲 𑀯𑀘𑀦𑀁 𑀅𑀭𑀼𑀡𑀼𑀕𑁆𑀕𑀁 𑀯𑀺𑀬 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀯𑀺𑀬 𑀘 𑀓𑀼𑀲𑀮𑀓𑀫𑁆𑀫𑀲𑁆𑀲, 𑀅𑀭𑀳𑀢𑀺 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀪𑀯𑀺𑀢𑀼𑀦𑁆𑀢𑀺 𑀞𑀸𑀦𑁂 𑀦𑀺𑀤𑀸𑀦𑀁 𑀞𑀧𑁂𑀦𑁆𑀢𑁄 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺𑀫𑀸𑀳.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀲𑁄𑀢𑀩𑁆𑀩𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀯𑀘𑀦𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁. 𑀏𑀯𑀦𑁆𑀢𑀺 𑀘 𑀇𑀤𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀤𑀻𑀧𑀓𑀯𑀘𑀦𑀁 𑀪𑀸𑀲𑀫𑀸𑀦𑁄 ‘‘𑀏𑀢𑁂 𑀫𑀬𑀸 𑀥𑀫𑁆𑀫𑀸 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸’’𑀢𑀺 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀤𑀁 𑀲𑀯𑀦𑀬𑁄𑀕𑀤𑀻𑀧𑀓𑀯𑀘𑀦𑀁 𑀪𑀸𑀲𑀫𑀸𑀦𑁄 ‘‘𑀩𑀳𑀽 𑀫𑀬𑀸 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸’’𑀢𑀺 𑀤𑀻𑀧𑁂𑀢𑀺. 𑀢𑀤𑀼𑀪𑀬𑁂𑀦𑀧𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀁 𑀤𑀻𑀧𑁂𑀦𑁆𑀢𑁄 𑀲𑀯𑀦𑁂 𑀆𑀤𑀭𑀁 𑀚𑀦𑁂𑀢𑀺. 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀁 𑀳𑀺 𑀥𑀫𑁆𑀫𑀁 𑀆𑀤𑀭𑁂𑀦 𑀅𑀲𑁆𑀲𑀼𑀡𑀦𑁆𑀢𑁄 𑀫𑀳𑀢𑀸 𑀳𑀺𑀢𑀸 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺 𑀆𑀤𑀭𑀁 𑀚𑀦𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑁄 𑀲𑁄𑀢𑀩𑁆𑀩𑁄𑀢𑀺.

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦 𑀯𑀘𑀦𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀁 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀅𑀢𑀺𑀓𑁆𑀓𑀫𑀢𑀺, 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀤𑁆𑀥𑀫𑁆𑀫𑀸 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀓𑁂𑀯𑀮𑀁 𑀲𑀼𑀢𑀫𑁂𑀯𑁂𑀢𑀁 𑀫𑀬𑀸, 𑀢𑀲𑁆𑀲𑁂𑀯 𑀧𑀦 𑀪𑀕𑀯𑀢𑁄 𑀯𑀘𑀦’’𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀺, 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀺, 𑀚𑀺𑀦𑀯𑀘𑀦𑀁 𑀅𑀧𑁆𑀧𑁂𑀢𑀺, 𑀥𑀫𑁆𑀫𑀦𑁂𑀢𑁆𑀢𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀺.

𑀅𑀧𑀺𑀘 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀧𑀼𑀭𑀺𑀫𑀯𑀘𑀦𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀫𑀺𑀤𑀁 𑀫𑀬𑀸 𑀢𑀲𑁆𑀲 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀲𑁆𑀲 𑀤𑀲𑀩𑀮𑀥𑀭𑀲𑁆𑀲 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀺𑀦𑁄 𑀲𑀻𑀳𑀦𑀸𑀤𑀦𑀸𑀤𑀺𑀦𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀥𑀫𑁆𑀫𑀺𑀲𑁆𑀲𑀭𑀲𑁆𑀲 𑀥𑀫𑁆𑀫𑀭𑀸𑀚𑀲𑁆𑀲 𑀥𑀫𑁆𑀫𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀤𑀻𑀧𑀲𑁆𑀲 𑀥𑀫𑁆𑀫𑀲𑀭𑀡𑀲𑁆𑀲 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑀦𑀁, 𑀦 𑀏𑀢𑁆𑀣 𑀅𑀢𑁆𑀣𑁂 𑀯𑀸 𑀥𑀫𑁆𑀫𑁂 𑀯𑀸 𑀧𑀤𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀓𑀢𑁆𑀢𑀩𑁆𑀩𑀸’’𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺, 𑀲𑀤𑁆𑀥𑀸𑀲𑀫𑁆𑀧𑀤𑀁 𑀉𑀧𑁆𑀧𑀸𑀤𑁂𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀯𑀺𑀦𑀸𑀲𑀬𑀢𑀺 𑀅𑀲𑁆𑀲𑀤𑁆𑀥𑀁, 𑀲𑀤𑁆𑀥𑀁 𑀯𑀟𑁆𑀠𑁂𑀢𑀺 𑀲𑀸𑀲𑀦𑁂;

𑀏𑀯𑀁 𑀫𑁂 𑀲𑀼𑀢𑀫𑀺𑀘𑁆𑀘𑁂𑀯𑀁, 𑀯𑀤𑀁 𑀕𑁄𑀢𑀫𑀲𑀸𑀯𑀓𑁄’’𑀢𑀺.

𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀲𑀫𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄. 𑀏𑀓𑀁 𑀲𑀫𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀧𑀭𑀺𑀤𑀻𑀧𑀦𑀁. 𑀢𑀢𑁆𑀣 𑀲𑀫𑀬𑀲𑀤𑁆𑀤𑁄 𑁋

‘‘𑀲𑀫𑀯𑀸𑀬𑁂 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺’’.

𑀢𑀣𑀸 𑀳𑀺𑀲𑁆𑀲 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁭) 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁩𑁫𑁮) 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁩𑁨) 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺, 𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀪𑀕𑀯𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺 ‘𑀪𑀤𑁆𑀤𑀸𑀮𑀺 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻’𑀢𑀺, 𑀅𑀬𑀫𑁆𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀳𑁂𑀢𑀼. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀸𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁬𑁦) 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. 𑁋

𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁯) 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮) 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁨.𑁮) 𑀧𑀝𑀺𑀯𑁂𑀥𑁄. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄. 𑀢𑁂𑀦 𑀲𑀁𑀯𑀘𑁆𑀙𑀭-𑀉𑀢𑀼-𑀫𑀸𑀲-𑀅𑀟𑁆𑀠𑀫𑀸𑀲-𑀭𑀢𑁆𑀢𑀺-𑀤𑀺𑀯-𑀧𑀼𑀩𑁆𑀩𑀡𑁆𑀳-𑀫𑀚𑁆𑀛𑀦𑁆𑀳𑀺𑀓-𑀲𑀸𑀬𑀦𑁆𑀳-𑀧𑀞𑀫-𑀫𑀚𑁆𑀛𑀺𑀫- 𑀧𑀘𑁆𑀙𑀺𑀫𑀬𑀸𑀫-𑀫𑀼𑀳𑀼𑀢𑁆𑀢𑀸𑀤𑀻𑀲𑀼 𑀓𑀸𑀮𑀧𑁆𑀧𑀪𑁂𑀤𑀪𑀽𑀢𑁂𑀲𑀼 𑀲𑀫𑀬𑁂𑀲𑀼 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀏𑀢𑁂𑀲𑀼 𑀲𑀁𑀯𑀘𑁆𑀙𑀭𑀸𑀤𑀻𑀲𑀼 𑀬𑀁 𑀬𑀁 𑀲𑀼𑀢𑁆𑀢𑀁 𑀬𑀫𑁆𑀳𑀺 𑀬𑀫𑁆𑀳𑀺 𑀲𑀁𑀯𑀘𑁆𑀙𑀭𑁂 𑀉𑀢𑀼𑀫𑁆𑀳𑀺 𑀫𑀸𑀲𑁂 𑀧𑀓𑁆𑀔𑁂 𑀭𑀢𑁆𑀢𑀺𑀪𑀸𑀕𑁂 𑀤𑀺𑀯𑀲𑀪𑀸𑀕𑁂 𑀯𑀸 𑀯𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀣𑁂𑀭𑀲𑁆𑀲 𑀲𑀼𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀁 𑀧𑀜𑁆𑀜𑀸𑀬. 𑀬𑀲𑁆𑀫𑀸 𑀧𑀦 ‘‘𑀏𑀯𑀁 𑀫𑁂 𑀲𑀼𑀢𑀁 𑀅𑀲𑀼𑀓𑀲𑀁𑀯𑀘𑁆𑀙𑀭𑁂 𑀅𑀲𑀼𑀓𑀉𑀢𑀼𑀫𑁆𑀳𑀺 𑀅𑀲𑀼𑀓𑀫𑀸𑀲𑁂 𑀅𑀲𑀼𑀓𑀧𑀓𑁆𑀔𑁂 𑀅𑀲𑀼𑀓𑀭𑀢𑁆𑀢𑀺𑀪𑀸𑀕𑁂 𑀅𑀲𑀼𑀓𑀤𑀺𑀯𑀲𑀪𑀸𑀕𑁂 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀥𑀸𑀭𑁂𑀢𑀼𑀁 𑀯𑀸 𑀉𑀤𑁆𑀤𑀺𑀲𑀺𑀢𑀼𑀁 𑀯𑀸 𑀉𑀤𑁆𑀤𑀺𑀲𑀸𑀧𑁂𑀢𑀼𑀁 𑀯𑀸, 𑀩𑀳𑀼 𑀘 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑁂𑀦𑁂𑀯 𑀧𑀤𑁂𑀦 𑀢𑀫𑀢𑁆𑀣𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀬𑁂 𑀯𑀸 𑀇𑀫𑁂 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄 𑀚𑀸𑀢𑀺𑀲𑀫𑀬𑁄 𑀲𑀁𑀯𑁂𑀕𑀲𑀫𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑀲𑀫𑀬𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄 𑀫𑀸𑀭𑀯𑀺𑀚𑀬𑀲𑀫𑀬𑁄 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁄𑀢𑀺 𑀏𑀯𑀫𑀸𑀤𑀬𑁄 𑀪𑀕𑀯𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀢𑀺𑀯𑀺𑀬 𑀲𑀼𑀧𑁆𑀧𑀓𑀸𑀲𑀸 𑀅𑀦𑁂𑀓𑀓𑀸𑀮𑀧𑁆𑀧𑀪𑁂𑀤𑀸 𑀏𑀯 𑀲𑀫𑀬𑀸, 𑀢𑁂𑀲𑀼 𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑀲𑀗𑁆𑀔𑀸𑀢𑀁 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺. 𑀬𑁄 𑀘𑀸𑀬𑀁 𑀜𑀸𑀡𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁂𑀲𑀼 𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢-𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀧𑀭𑀳𑀺𑀢-𑀧𑀝𑀺𑀧𑀢𑁆𑀢𑀺𑀲𑀫𑀬𑁄, 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀭𑀡𑀻𑀬𑀤𑁆𑀯𑀬𑀲𑀫𑀬𑁂𑀲𑀼 𑀥𑀫𑁆𑀫𑀺𑀓𑀣𑀸𑀲𑀫𑀬𑁄, 𑀤𑁂𑀲𑀦𑀸𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑁄, 𑀢𑁂𑀲𑀼𑀧𑀺 𑀲𑀫𑀬𑁂𑀲𑀼 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 𑀅𑀪𑀺𑀥𑀫𑁆𑀫𑁂 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀘, 𑀇𑀢𑁄 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑀧𑀤𑁂𑀲𑀼 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀘 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀯𑀺𑀦𑀬𑁂 𑀘 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀢𑀣𑀸 𑀅𑀓𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀢𑀢𑁆𑀣 𑀢𑀣𑀸, 𑀇𑀥 𑀘 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀳𑀺 𑀅𑀪𑀺𑀥𑀫𑁆𑀫𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀘 𑀅𑀥𑀺𑀓𑀭𑀡𑀢𑁆𑀣𑁄 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀅𑀥𑀺𑀓𑀭𑀡𑀁 𑀳𑀺 𑀓𑀸𑀮𑀢𑁆𑀣𑁄 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄, 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑁂𑀲𑀁 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀯𑀺𑀦𑀬𑁂 𑀘 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 𑀳𑀺 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀇𑀥 𑀧𑀦 𑀅𑀜𑁆𑀜𑀲𑁆𑀫𑀺𑀜𑁆𑀘 𑀏𑀯𑀁𑀚𑀸𑀢𑀺𑀓𑁂 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀇𑀫𑀁 𑀅𑀜𑁆𑀜𑀁 𑀯𑀸 𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀲𑀺, 𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀁 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀇𑀥 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀁 𑀢𑀁 𑀅𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸, 𑀪𑀼𑀫𑁆𑀫𑁂𑀦 𑀓𑀭𑀡𑁂𑀦 𑀘;

𑀅𑀜𑁆𑀜𑀢𑁆𑀭 𑀲𑀫𑀬𑁄 𑀯𑀼𑀢𑁆𑀢𑁄, 𑀉𑀧𑀬𑁄𑀕𑁂𑀦 𑀲𑁄 𑀇𑀥𑀸’’𑀢𑀺.

𑀧𑁄𑀭𑀸𑀡𑀸 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀸 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀸 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄 𑀏𑀲, 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯𑀢𑁆𑀣𑁄𑀢𑀺. 𑀢𑀲𑁆𑀫𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀏𑀓𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀕𑀯𑀸𑀢𑀺 𑀕𑀭𑀼. 𑀕𑀭𑀼𑀜𑁆𑀳𑀺 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀘 𑀲𑀩𑁆𑀩𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀕𑀭𑀼, 𑀢𑀲𑁆𑀫𑀸 ‘‘𑀪𑀕𑀯𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑁄𑀭𑀸𑀡𑁂𑀳𑀺𑀧𑀺 𑀯𑀼𑀢𑁆𑀢𑀁 𑁋

‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼 𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀅𑀧𑀺𑀘 𑁋

‘‘𑀪𑀸𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺. 𑁋

𑀇𑀫𑀺𑀲𑁆𑀲𑀸𑀧𑀺 𑀕𑀸𑀣𑀸𑀬 𑀯𑀲𑁂𑀦𑀲𑁆𑀲 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨, 𑁧𑁪𑁪) 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄𑀬𑁂𑀯.

𑀏𑀢𑁆𑀢𑀸𑀯𑀢𑀸 𑀘𑁂𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀢𑁄 𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀺. 𑀢𑁂𑀦 ‘‘𑀦 𑀇𑀤𑀁 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁, 𑀅𑀬𑀁 𑀯𑁄 𑀲𑀢𑁆𑀣𑀸’’𑀢𑀺 𑀲𑀢𑁆𑀣𑀼 𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀺𑀢𑀁 𑀚𑀦𑀁 𑀲𑀫𑀲𑁆𑀲𑀸𑀲𑁂𑀢𑀺. 𑀏𑀓𑀁 𑀲𑀫𑀬𑀁 𑀪𑀕𑀯𑀸𑀢𑀺 𑀯𑀘𑀦𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀽𑀧𑀓𑀸𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀸𑀥𑁂𑀢𑀺. 𑀢𑁂𑀦 ‘‘𑀏𑀯𑀁𑀯𑀺𑀥𑀲𑁆𑀲 𑀦𑀸𑀫 𑀅𑀭𑀺𑀬𑀥𑀫𑁆𑀫𑀲𑁆𑀲 𑀤𑁂𑀲𑀓𑁄 𑀤𑀲𑀩𑀮𑀥𑀭𑁄 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄 𑀲𑁄𑀧𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑁂𑀦 𑀅𑀜𑁆𑀜𑁂𑀦 𑀚𑀻𑀯𑀺𑀢𑁂 𑀆𑀲𑀸 𑀚𑀦𑁂𑀢𑀩𑁆𑀩𑀸’’𑀢𑀺 𑀚𑀻𑀯𑀺𑀢𑀫𑀤𑀫𑀢𑁆𑀢𑀁 𑀚𑀦𑀁 𑀲𑀁𑀯𑁂𑀚𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀏𑀯𑀦𑁆𑀢𑀺 𑀘 𑀪𑀡𑀦𑁆𑀢𑁄 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺. 𑀫𑁂 𑀲𑀼𑀢𑀦𑁆𑀢𑀺 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁. 𑀏𑀓𑀁 𑀲𑀫𑀬𑀦𑁆𑀢𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀁. 𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁.

𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀯𑀺𑀳𑀭𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀺𑀧𑀭𑀺𑀤𑀻𑀧𑀦𑀫𑁂𑀢𑀁. 𑀇𑀥 𑀧𑀦 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀲𑀬𑀦𑀧𑁆𑀧𑀪𑁂𑀤𑁂𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁, 𑀢𑁂𑀦 𑀞𑀺𑀢𑁄𑀧𑀺 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀲𑀬𑀸𑀦𑁄𑀧𑀺 𑀪𑀕𑀯𑀸 𑀯𑀺𑀳𑀭𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀚𑁂𑀢𑀯𑀦𑁂𑀢𑀺 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀯𑀦𑁂. 𑀢𑀜𑁆𑀳𑀺 𑀢𑁂𑀦 𑀭𑁄𑀧𑀺𑀢𑀁 𑀲𑀁𑀯𑀟𑁆𑀠𑀺𑀢𑀁 𑀧𑀭𑀺𑀧𑀸𑀮𑀺𑀢𑀁, 𑀲𑁄 𑀘𑀲𑁆𑀲 𑀲𑀸𑀫𑀻 𑀅𑀳𑁄𑀲𑀺, 𑀢𑀲𑁆𑀫𑀸 𑀚𑁂𑀢𑀯𑀦𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁, 𑀢𑀲𑁆𑀫𑀺𑀁 𑀚𑁂𑀢𑀯𑀦𑁂. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀘𑀢𑀼𑀧𑀜𑁆𑀜𑀸𑀲𑀳𑀺𑀭𑀜𑁆𑀜𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑀢𑁆𑀢𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲𑀸𑀢𑀺 𑀲𑀗𑁆𑀔𑀁 𑀕𑀢𑁂 𑀆𑀭𑀸𑀫𑁂. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁧𑁪 𑀆𑀤𑀬𑁄) 𑀯𑀼𑀢𑁆𑀢𑁄.

𑀢𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀢𑀸𑀯 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, ‘‘𑀚𑁂𑀢𑀯𑀦𑁂’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀺, ‘‘𑀲𑀸𑀯𑀢𑁆𑀣𑀺𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀏𑀓𑀁 𑀲𑀫𑀬𑀁 𑀯𑀺𑀳𑀭𑀺𑀢𑀼𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀦𑀁 𑀲𑀫𑀻𑀧𑁂 𑀕𑁄𑀬𑀽𑀣𑀸𑀦𑀺 𑀘𑀭𑀦𑁆𑀢𑀸𑀦𑀺 ‘‘𑀕𑀗𑁆𑀕𑀸𑀬 𑀘𑀭𑀦𑁆𑀢𑀺, 𑀬𑀫𑀼𑀦𑀸𑀬 𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀬𑀤𑀺𑀤𑀁 𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂 𑀚𑁂𑀢𑀯𑀦𑀁, 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 ‘‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂’’𑀢𑀺. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀳𑀺𑀲𑁆𑀲 𑀲𑀸𑀯𑀢𑁆𑀣𑀺𑀯𑀘𑀦𑀁, 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑀦𑀝𑁆𑀞𑀸𑀦𑀦𑀺𑀤𑀲𑁆𑀲𑀦𑀢𑁆𑀣𑀁 𑀲𑁂𑀲𑀯𑀘𑀦𑀁.

𑀢𑀢𑁆𑀣 𑀲𑀸𑀯𑀢𑁆𑀣𑀺𑀯𑀘𑀦𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀁 𑀤𑀲𑁆𑀲𑁂𑀢𑀺, 𑀚𑁂𑀢𑀯𑀦𑀸𑀤𑀺𑀓𑀺𑀢𑁆𑀢𑀦𑁂𑀦 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀁. 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀘𑁆𑀘𑀬𑀕𑁆𑀕𑀳𑀡𑀢𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀁, 𑀧𑀘𑁆𑀙𑀺𑀫𑁂𑀦 𑀯𑀢𑁆𑀣𑀼𑀓𑀸𑀫𑀧𑁆𑀧𑀳𑀸𑀦𑀢𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀺𑀯𑀚𑁆𑀚𑀦𑀽𑀧𑀸𑀬𑀤𑀲𑁆𑀲𑀦𑀁. 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀤𑁂𑀲𑀦𑀸𑀪𑀺𑀬𑁄𑀕𑀁, 𑀧𑀘𑁆𑀙𑀺𑀫𑁂𑀦 𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑀺𑀁. 𑀧𑀼𑀭𑀺𑀫𑁂𑀦 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁, 𑀧𑀘𑁆𑀙𑀺𑀫𑁂𑀦 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁. 𑀧𑀼𑀭𑀺𑀫𑁂𑀦 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀸𑀥𑀺𑀫𑀼𑀢𑁆𑀢𑀺𑀢𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀳𑀺𑀢𑀲𑀼𑀔𑀓𑀭𑀡𑁂 𑀦𑀺𑀭𑀼𑀧𑀮𑁂𑀧𑀢𑀁. 𑀧𑀼𑀭𑀺𑀫𑁂𑀦 𑀥𑀫𑁆𑀫𑀺𑀓𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀦𑀺𑀫𑀺𑀢𑁆𑀢𑀨𑀸𑀲𑀼𑀯𑀺𑀳𑀸𑀭𑀁, 𑀧𑀘𑁆𑀙𑀺𑀫𑁂𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀼𑀬𑁄𑀕𑀦𑀺𑀫𑀺𑀢𑁆𑀢𑀁. 𑀧𑀼𑀭𑀺𑀫𑁂𑀦 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀁, 𑀧𑀘𑁆𑀙𑀺𑀫𑁂𑀦 𑀤𑁂𑀯𑀢𑀸𑀦𑀁. 𑀧𑀼𑀭𑀺𑀫𑁂𑀦 𑀮𑁄𑀓𑁂 𑀚𑀸𑀢𑀲𑁆𑀲 𑀮𑁄𑀓𑁂 𑀲𑀁𑀯𑀟𑁆𑀠𑀪𑀸𑀯𑀁, 𑀧𑀘𑁆𑀙𑀺𑀫𑁂𑀦 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑀢𑀁. 𑀧𑀼𑀭𑀺𑀫𑁂𑀦 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁦) 𑀯𑀘𑀦𑀢𑁄 𑀬𑀤𑀢𑁆𑀣𑀁 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄, 𑀢𑀤𑀢𑁆𑀣𑀧𑀭𑀺𑀦𑀺𑀧𑁆𑀨𑀸𑀤𑀦𑀁, 𑀧𑀘𑁆𑀙𑀺𑀫𑁂𑀦 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀤𑀦𑀼𑀭𑀽𑀧𑀯𑀺𑀳𑀸𑀭𑀁. 𑀪𑀕𑀯𑀸 𑀳𑀺 𑀧𑀞𑀫𑀁 𑀮𑀼𑀫𑁆𑀩𑀺𑀦𑀺𑀯𑀦𑁂, 𑀤𑀼𑀢𑀺𑀬𑀁 𑀩𑁄𑀥𑀺𑀫𑀡𑁆𑀟𑁂𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀯𑀦𑁂𑀬𑁂𑀯 𑀉𑀧𑁆𑀧𑀦𑁆𑀦𑁄. 𑀢𑁂𑀦𑀲𑁆𑀲 𑀯𑀦𑁂𑀬𑁂𑀯 𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀢𑀺 𑀤𑁂𑀲𑀓𑀸𑀮𑀧𑀭𑀺𑀤𑀻𑀧𑀦𑀁. 𑀢𑀜𑁆𑀳𑀺 𑀬𑀁 𑀲𑀫𑀬𑀁 𑀯𑀺𑀳𑀭𑀢𑀺, 𑀢𑀢𑁆𑀭 𑀲𑀫𑀬𑁂. 𑀬𑀲𑁆𑀫𑀺𑀜𑁆𑀘 𑀆𑀭𑀸𑀫𑁂 𑀯𑀺𑀳𑀭𑀢𑀺, 𑀢𑀢𑁆𑀭 𑀆𑀭𑀸𑀫𑁂𑀢𑀺 𑀤𑀻𑀧𑁂𑀢𑀺. 𑀪𑀸𑀲𑀺𑀢𑀩𑁆𑀩𑀬𑀼𑀢𑁆𑀢𑁂 𑀯𑀸 𑀤𑁂𑀲𑀓𑀸𑀮𑁂 𑀤𑀻𑀧𑁂𑀢𑀺. 𑀦 𑀳𑀺 𑀪𑀕𑀯𑀸 𑀅𑀬𑀼𑀢𑁆𑀢𑁂 𑀤𑁂𑀲𑁂 𑀯𑀸 𑀓𑀸𑀮𑁂 𑀯𑀸 𑀥𑀫𑁆𑀫𑀁 𑀪𑀸𑀲𑀢𑀺. ‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀩𑀸𑀳𑀺𑀬𑀸’’𑀢𑀺𑀆𑀤𑀺 (𑀉𑀤𑀸. 𑁧𑁦) 𑀘𑁂𑀢𑁆𑀣 𑀲𑀸𑀥𑀓𑀁. 𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑁂 𑀆𑀤𑀺𑀓𑀸𑀮𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦𑀁. 𑀪𑀺𑀓𑁆𑀔𑀽𑀢𑀺 𑀓𑀣𑀸𑀲𑀯𑀦𑀬𑀼𑀢𑁆𑀢𑀧𑀼𑀕𑁆𑀕𑀮𑀯𑀘𑀦𑀁. 𑀅𑀧𑀺 𑀘𑁂𑀢𑁆𑀣 ‘‘𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁫; 𑀯𑀺𑀪. 𑁫𑁧𑁧) 𑀦𑀬𑁂𑀦 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀮𑀧𑀺 𑀅𑀪𑀸𑀲𑀺 𑀲𑀫𑁆𑀩𑁄𑀥𑁂𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀧𑀦 𑀜𑀸𑀧𑀦𑁂𑀧𑀺 𑀳𑁄𑀢𑀺. 𑀬𑀣𑀸𑀳 𑁋 ‘‘𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂’’𑀢𑀺. 𑀧𑀓𑁆𑀓𑁄𑀲𑀦𑁂𑀧𑀺. 𑀬𑀣𑀸𑀳 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀻’’𑀢𑀺 (𑀅. 𑀦𑀺. 𑁯.𑁧𑁧; 𑀲𑀁. 𑀦𑀺. 𑁨.𑁩𑁨).

𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑀦𑀸𑀓𑀸𑀭𑀧𑀭𑀺𑀤𑀻𑀧𑀦𑀁. 𑀢𑀜𑁆𑀘 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀦𑀲𑀻𑀮𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀺 𑀳𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀦𑁂 𑀲𑀸𑀥𑀼𑀓𑀸𑀭𑀺𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀻𑀢𑀺 𑀲𑀤𑁆𑀤𑀯𑀺𑀤𑀽 𑀫𑀜𑁆𑀜𑀦𑁆𑀢𑀺. 𑀢𑁂𑀦 𑀘 𑀦𑁂𑀲𑀁 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀲𑀺𑀤𑁆𑀥𑁂𑀦 𑀯𑀘𑀦𑁂𑀦 𑀳𑀻𑀦𑀸𑀥𑀺𑀓𑀚𑀦𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀤𑀻𑀦𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀺. 𑀪𑀺𑀓𑁆𑀔𑀯𑁄𑀢𑀺 𑀇𑀫𑀺𑀦𑀸 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑁄𑀫𑁆𑀫𑀳𑀤𑀬𑀦𑀬𑀦𑀦𑀺𑀧𑀸𑀢𑀧𑀼𑀩𑁆𑀩𑀗𑁆𑀕𑀫𑁂𑀦 𑀯𑀘𑀦𑁂𑀦 𑀢𑁂 𑀅𑀢𑁆𑀢𑀦𑁄 𑀫𑀼𑀔𑀸𑀪𑀺𑀫𑀼𑀔𑁂 𑀓𑀭𑁄𑀢𑀺. 𑀢𑁂𑀦𑁂𑀯 𑀘 𑀓𑀣𑁂𑀢𑀼𑀓𑀫𑁆𑀬𑀢𑀸𑀤𑀻𑀧𑀓𑁂𑀦 𑀯𑀘𑀦𑁂𑀦 𑀢𑁂𑀲𑀁 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺. 𑀢𑁂𑀦𑁂𑀯 𑀘 𑀲𑀫𑁆𑀩𑁄𑀥𑀦𑀢𑁆𑀣𑁂𑀦 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂𑀧𑀺 𑀢𑁂 𑀦𑀺𑀬𑁄𑀚𑁂𑀢𑀺. 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀺.

𑀅𑀧𑀭𑁂𑀲𑀼𑀧𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀲𑁆𑀫𑀸 𑀪𑀺𑀓𑁆𑀔𑀽𑀬𑁂𑀯 𑀆𑀫𑀦𑁆𑀢𑁂𑀲𑀻𑀢𑀺 𑀘𑁂? 𑀚𑁂𑀝𑁆𑀞𑀲𑁂𑀝𑁆𑀞𑀸𑀲𑀦𑁆𑀦𑀲𑀤𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄. 𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀸 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸. 𑀧𑀭𑀺𑀲𑀸𑀬 𑀘 𑀚𑁂𑀝𑁆𑀞𑀸 𑀪𑀺𑀓𑁆𑀔𑀽 𑀧𑀞𑀫𑀼𑀧𑁆𑀧𑀦𑁆𑀦𑀢𑁆𑀢𑀸, 𑀲𑁂𑀝𑁆𑀞𑀸 𑀅𑀦𑀕𑀸𑀭𑀺𑀬𑀪𑀸𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀢𑁆𑀣𑀼𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀲𑀓𑀮𑀲𑀸𑀲𑀦𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸 𑀘. 𑀆𑀲𑀦𑁆𑀦𑀸 𑀢𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀲𑀼 𑀲𑀢𑁆𑀣𑀼𑀲𑀦𑁆𑀢𑀺𑀓𑀢𑁆𑀢𑀸. 𑀲𑀤𑀸𑀲𑀦𑁆𑀦𑀺𑀳𑀺𑀢𑀸 𑀲𑀢𑁆𑀣𑀼𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸𑀢𑀺. 𑀅𑀧𑀺𑀘 𑀢𑁂 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀢𑀺𑀧𑀺 𑀢𑁂 𑀏𑀯 𑀆𑀫𑀦𑁆𑀢𑁂𑀲𑀺.

𑀓𑀺𑀫𑀢𑁆𑀣𑀁 𑀧𑀦 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀞𑀫𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀦 𑀥𑀫𑁆𑀫𑀫𑁂𑀯 𑀤𑁂𑀲𑁂𑀲𑀻𑀢𑀺? 𑀲𑀢𑀺𑀚𑀦𑀦𑀢𑁆𑀣𑀁. 𑀪𑀺𑀓𑁆𑀔𑀽 𑀳𑀺 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀸𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀧𑀺 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀧𑀺 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 ‘‘𑀅𑀬𑀁 𑀤𑁂𑀲𑀦𑀸 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀧𑀘𑁆𑀘𑀬𑀸 𑀓𑀢𑀫𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀤𑁂𑀲𑀺𑀢𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑀼𑀕𑁆𑀕𑀳𑀺𑀢𑀁 𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀦 𑀯𑀸 𑀕𑀡𑁆𑀳𑁂𑀬𑁆𑀬𑀼𑀁. 𑀢𑁂𑀦 𑀦𑁂𑀲𑀁 𑀲𑀢𑀺𑀚𑀦𑀦𑀢𑁆𑀣𑀁 𑀪𑀕𑀯𑀸 𑀧𑀞𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀪𑀤𑀦𑁆𑀢𑁂𑀢𑀺 𑀕𑀸𑀭𑀯𑀯𑀘𑀦𑀫𑁂𑀢𑀁, 𑀲𑀢𑁆𑀣𑀼 𑀧𑀝𑀺𑀯𑀘𑀦𑀤𑀸𑀦𑀁 𑀯𑀸. 𑀅𑀧𑀺 𑀘𑁂𑀢𑁆𑀣 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀤𑀫𑀸𑀦𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀮𑀧𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀯𑀤𑀫𑀸𑀦𑀸 𑀢𑁂 𑀪𑀕𑀯𑀦𑁆𑀢𑀁 𑀧𑀘𑁆𑀘𑀸𑀮𑀧𑀦𑁆𑀢𑀺. 𑀢𑀣𑀸 ‘‘𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀆𑀤𑀺𑀫𑁆𑀳𑀺 𑀪𑀸𑀲𑀢𑀺, ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀧𑀘𑁆𑀘𑀸𑀪𑀸𑀲𑀦𑁆𑀢𑀺. ‘‘𑀪𑀺𑀓𑁆𑀔𑀯𑁄’’𑀢𑀺 𑀧𑀝𑀺𑀯𑀘𑀦𑀁 𑀤𑀸𑀧𑁂𑀢𑀺, ‘‘𑀪𑀤𑀦𑁆𑀢𑁂’’𑀢𑀺 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀢𑀺 𑀬𑁂 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺, 𑀢𑁂. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀪𑀕𑀯𑀢𑁄 𑀆𑀫𑀦𑁆𑀢𑀦𑀁 𑀧𑀝𑀺𑀅𑀲𑁆𑀲𑁄𑀲𑀼𑀁, 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀲𑀼𑀡𑀺𑀁𑀲𑀼 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀧𑀝𑀺𑀕𑁆𑀕𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺 𑀪𑀕𑀯𑀸 𑀏𑀢𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀅𑀯𑁄𑀘. 𑀏𑀢𑁆𑀢𑀸𑀯𑀢𑀸 𑀘 𑀬𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀼𑀔𑀸𑀯𑀕𑀸𑀳𑀡𑀢𑁆𑀣𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀤𑀸𑀦𑀁 𑀪𑀸𑀲𑀺𑀢𑀁, 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀲𑀫𑀢𑁆𑀢𑀸𑀢𑀺.

𑀭𑀽𑀧𑀸𑀤𑀺𑀯𑀡𑁆𑀡𑀦𑀸

𑀇𑀤𑀸𑀦𑀺 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀦𑀸𑀬 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀸 𑀧𑀦𑁂𑀲𑀸 𑀲𑀼𑀢𑁆𑀢𑀯𑀡𑁆𑀡𑀦𑀸 𑀬𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸𑀯 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀺𑀘𑀸𑀭𑀡𑀸 𑀢𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄 𑀧𑀼𑀘𑁆𑀙𑀸𑀯𑀲𑀺𑀓𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺. 𑀢𑀢𑁆𑀣 𑀬𑀸𑀦𑀺 𑀲𑀼𑀢𑁆𑀢𑀸𑀦𑀺 𑀪𑀕𑀯𑀸 𑀧𑀭𑁂𑀳𑀺 𑀅𑀦𑀚𑁆𑀛𑀺𑀝𑁆𑀞𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀁 𑀯𑀢𑁆𑀣𑀲𑀼𑀢𑁆𑀢𑀦𑁆𑀢𑀺 𑀏𑀯𑀫𑀸𑀤𑀻𑀦𑀺, 𑀢𑁂𑀲𑀁 𑀅𑀢𑁆𑀢𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄. 𑀬𑀸𑀦𑀺 𑀧𑀦 ‘‘𑀧𑀭𑀺𑀧𑀓𑁆𑀓𑀸 𑀔𑁄 𑀭𑀸𑀳𑀼𑀮𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀬𑀁𑀦𑀽𑀦𑀸𑀳𑀁 𑀭𑀸𑀳𑀼𑀮𑀁 𑀉𑀢𑁆𑀢𑀭𑀺 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁨𑁧; 𑀫. 𑀦𑀺. 𑁩.𑁪𑁧𑁬) 𑀏𑀯𑀁 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀁 𑀔𑀦𑁆𑀢𑀺𑀁 𑀫𑀦𑀁 𑀅𑀪𑀺𑀦𑀻𑀳𑀸𑀭𑀁 𑀩𑀼𑀚𑁆𑀛𑀦𑀪𑀸𑀯𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀧𑀭𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺, 𑀢𑁂𑀲𑀁 𑀧𑀭𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄. 𑀪𑀕𑀯𑀦𑁆𑀢𑀁 𑀧𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀢𑁂 𑀤𑁂𑀯𑀫𑀦𑀼𑀲𑁆𑀲𑀸 𑀢𑀣𑀸 𑀢𑀣𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀬𑀸𑀦𑀺 𑀓𑀣𑀺𑀢𑀸𑀦𑀺 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀸𑀤𑀻𑀦𑀺, 𑀢𑁂𑀲𑀁 𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀬𑀸𑀦𑀺 𑀧𑀦 𑀉𑀧𑁆𑀧𑀦𑁆𑀦𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀓𑀣𑀺𑀢𑀸𑀦𑀺 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀤𑀻𑀦𑀺, 𑀢𑁂𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀏𑀯𑀫𑀺𑀫𑁂𑀲𑀼 𑀘𑀢𑀽𑀲𑀼 𑀦𑀺𑀓𑁆𑀔𑁂𑀧𑁂𑀲𑀼 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀭𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄. 𑀧𑀭𑀚𑁆𑀛𑀸𑀲𑀬𑀯𑀲𑁂𑀦 𑀳𑁂𑀢𑀁 𑀦𑀺𑀓𑁆𑀔𑀺𑀢𑁆𑀢𑀁. 𑀓𑁂𑀲𑀁 𑀅𑀚𑁆𑀛𑀸𑀲𑀬𑁂𑀦𑀸𑀢𑀺? 𑀭𑀽𑀧𑀕𑀭𑀼𑀓𑀸𑀦𑀁 𑀧𑀼𑀭𑀺𑀲𑀸𑀦𑀁.

𑀢𑀢𑁆𑀣 𑀦𑀸𑀳𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀻𑀲𑀼 𑀦𑀓𑀸𑀭𑁄 𑀧𑀝𑀺𑀲𑁂𑀥𑀢𑁆𑀣𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀪𑀺𑀓𑁆𑀔𑀯𑁂𑀢𑀺 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀅𑀜𑁆𑀜𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸 𑀇𑀢𑁆𑀣𑀺𑀭𑀽𑀧𑀢𑁄 𑀅𑀜𑁆𑀜𑀁. 𑀏𑀓𑀭𑀽𑀧𑀫𑁆𑀧𑀻𑀢𑀺 𑀏𑀓𑀫𑁆𑀧𑀺 𑀭𑀽𑀧𑀁. 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀤𑁆𑀯𑁂 𑀲𑀫𑀦𑀼𑀧𑀲𑁆𑀲𑀦𑀸 𑀜𑀸𑀡𑀲𑀫𑀦𑀼𑀧𑀲𑁆𑀲𑀦𑀸 𑀘 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸 𑀘. 𑀢𑀢𑁆𑀣 ‘‘𑀅𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄’’𑀢𑀺 (𑀧𑀝𑀺. 𑀫. 𑁩.𑁩𑁫) 𑀅𑀬𑀁 𑀜𑀸𑀡𑀲𑀫𑀦𑀼𑀧𑀲𑁆𑀲𑀦𑀸 𑀦𑀸𑀫. ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑀸 (𑀧𑀝𑀺. 𑀫. 𑁧.𑁧𑁩𑁦) 𑀧𑀦 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸 𑀦𑀸𑀫. 𑀢𑀸𑀲𑀼 𑀇𑀥 𑀜𑀸𑀡𑀲𑀫𑀦𑀼𑀧𑀲𑁆𑀲𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲 𑀦𑀓𑀸𑀭𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀑𑀮𑁄𑀓𑁂𑀦𑁆𑀢𑁄𑀧𑀺 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺. 𑀬𑀁 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀬𑀁 𑀭𑀽𑀧𑀁 𑀭𑀽𑀧𑀕𑀭𑀼𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀼𑀪𑀽𑀫𑀓𑀓𑀼𑀲𑀮𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. ‘‘𑀲𑀩𑁆𑀩𑀁 𑀳𑀢𑁆𑀣𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁬) 𑀳𑀺 𑀕𑀳𑀡𑀁 𑀧𑀭𑀺𑀬𑀸𑀤𑀸𑀦𑀁 𑀦𑀸𑀫. ‘‘𑀅𑀦𑀺𑀘𑁆𑀘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀩𑁆𑀩𑀁 𑀓𑀸𑀫𑀭𑀸𑀕𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁦𑁨) 𑀔𑁂𑀧𑀦𑀁. 𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀢𑀢𑁆𑀣 𑀇𑀤𑀁 𑀭𑀽𑀧𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀘𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀁 𑀦 𑀦𑀻𑀮𑀼𑀧𑁆𑀧𑀮𑀓𑀮𑀸𑀧𑀁 𑀧𑀼𑀭𑀺𑀲𑁄 𑀯𑀺𑀬 𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺, 𑀦𑀸𑀧𑀺 𑀔𑁂𑀧𑀬𑀫𑀸𑀦𑀁 𑀅𑀕𑁆𑀕𑀺 𑀯𑀺𑀬 𑀉𑀤𑁆𑀥𑀦𑁂 𑀉𑀤𑀓𑀁 𑀲𑀦𑁆𑀢𑀸𑀧𑁂𑀢𑁆𑀯𑀸 𑀔𑁂𑀧𑁂𑀢𑀺. 𑀉𑀧𑁆𑀧𑀢𑁆𑀢𑀺𑀜𑁆𑀘𑀲𑁆𑀲 𑀦𑀺𑀯𑀸𑀭𑀬𑀫𑀸𑀦𑀫𑁂𑀯 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀘𑁂𑀯 𑀔𑁂𑀧𑁂𑀢𑀺 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺.

𑀬𑀣𑀬𑀺𑀤𑀦𑁆𑀢𑀺 𑀬𑀣𑀸 𑀇𑀤𑀁. 𑀇𑀢𑁆𑀣𑀺𑀭𑀽𑀧𑀦𑁆𑀢𑀺 𑀇𑀢𑁆𑀣𑀺𑀬𑀸 𑀭𑀽𑀧𑀁. 𑀢𑀢𑁆𑀣 ‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣? 𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁯) 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀭𑀽𑀧𑀲𑁆𑀲 𑀯𑀘𑀦𑀢𑁆𑀣𑁄 𑀘𑁂𑀯 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀭𑀽𑀧𑀲𑀤𑁆𑀤𑁄 𑀔𑀦𑁆𑀥𑀪𑀯𑀦𑀺𑀫𑀺𑀢𑁆𑀢𑀧𑀘𑁆𑀘𑀬𑀲𑀭𑀻𑀭𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. 𑀅𑀬𑀜𑁆𑀳𑀺 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 (𑀯𑀺𑀪. 𑁨; 𑀫𑀳𑀸𑀯. 𑁨𑁨) 𑀏𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁂 𑀯𑀢𑁆𑀢𑀢𑀺. ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁧𑁬𑁧; 𑀯𑀺𑀪. 𑁬𑁨𑁪) 𑀏𑀢𑁆𑀣 𑀭𑀽𑀧𑀪𑀯𑁂. ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 (𑀥. 𑀲. 𑁨𑁦𑁪-𑁨𑁩𑁨 𑀆𑀤𑀬𑁄) 𑀏𑀢𑁆𑀣 𑀓𑀲𑀺𑀡𑀦𑀺𑀫𑀺𑀢𑁆𑀢𑁂. ‘‘𑀲𑀭𑀽𑀧𑀸, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑁄 𑀅𑀭𑀽𑀧𑀸’’𑀢𑀺 (𑀅. 𑀦𑀺. 𑁨.𑁮𑁩) 𑀏𑀢𑁆𑀣 𑀧𑀘𑁆𑀘𑀬𑁂. ‘‘𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁬) 𑀏𑀢𑁆𑀣 𑀲𑀭𑀻𑀭𑁂. ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁧.𑁪𑁦𑁦; 𑁩.𑁪𑁨𑁧) 𑀏𑀢𑁆𑀣 𑀯𑀡𑁆𑀡𑁂. ‘‘𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄’’𑀢𑀺 (𑀅. 𑀦𑀺. 𑁪.𑁬𑁫) 𑀏𑀢𑁆𑀣 𑀲𑀡𑁆𑀞𑀸𑀦𑁂. 𑀆𑀤𑀺𑀲𑀤𑁆𑀤𑁂𑀦 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀅𑀭𑀲𑀭𑀽𑀧𑁄’’𑀢𑀺𑀆𑀤𑀻𑀦𑀺𑀧𑀺 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑀸𑀦𑀺. 𑀇𑀥 𑀧𑀦𑁂𑀲 𑀇𑀢𑁆𑀣𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑁂 𑀭𑀽𑀧𑀸𑀬𑀢𑀦𑀲𑀗𑁆𑀔𑀸𑀢𑁂 𑀯𑀡𑁆𑀡𑁂 𑀯𑀢𑁆𑀢𑀢𑀺. 𑀅𑀧𑀺𑀘 𑀬𑁄 𑀓𑁄𑀘𑀺 𑀇𑀢𑁆𑀣𑀺𑀬𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑀲𑁆𑀲 𑀯𑀸 𑀅𑀮𑀗𑁆𑀓𑀸𑀭𑀲𑁆𑀲 𑀯𑀸 𑀕𑀦𑁆𑀥𑀯𑀡𑁆𑀡𑀓𑀸𑀤𑀻𑀦𑀁 𑀯𑀸 𑀧𑀺𑀴𑀦𑁆𑀥𑀦𑀫𑀸𑀮𑀸𑀤𑀻𑀦𑀁 𑀯𑀸𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁄 𑀘 𑀯𑀡𑁆𑀡𑁄 𑀧𑀼𑀭𑀺𑀲𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀉𑀧𑀓𑀧𑁆𑀧𑀢𑀺, 𑀲𑀩𑁆𑀩𑀫𑁂𑀢𑀁 𑀇𑀢𑁆𑀣𑀺𑀭𑀽𑀧𑀦𑁆𑀢𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁆𑀣𑀺𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀁 𑀯𑀸 ‘‘𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀽𑀧’’𑀦𑁆𑀢𑀺 𑀏𑀯𑀁 𑀑𑀧𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀤𑀁 𑀧𑀭𑀺𑀬𑀸𑀤𑀸𑀦𑀸𑀦𑀼𑀪𑀸𑀯𑀤𑀲𑁆𑀲𑀦𑀯𑀲𑁂𑀦.

𑀢𑀢𑁆𑀭𑀺𑀤𑀁 𑀇𑀢𑁆𑀣𑀺𑀭𑀽𑀧𑀲𑁆𑀲 𑀧𑀭𑀺𑀬𑀸𑀤𑀸𑀦𑀸𑀦𑀼𑀪𑀸𑀯𑁂 𑀯𑀢𑁆𑀣𑀼 𑁋 𑀫𑀳𑀸𑀤𑀸𑀞𑀺𑀓𑀦𑀸𑀕𑀭𑀸𑀚𑀸 𑀓𑀺𑀭 𑀘𑁂𑀢𑀺𑀬𑀕𑀺𑀭𑀺𑀫𑁆𑀳𑀺 𑀅𑀫𑁆𑀩𑀢𑁆𑀣𑀮𑁂 𑀫𑀳𑀸𑀣𑀽𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀺𑀭𑀺𑀪𑀡𑁆𑀟𑀧𑀽𑀚𑀁 𑀦𑀸𑀫 𑀓𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀑𑀭𑁄𑀥𑀕𑀡𑀧𑀭𑀺𑀯𑀼𑀢𑁄 𑀘𑁂𑀢𑀺𑀬𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑁂𑀢𑀺. 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀦𑀸𑀫 𑀦 𑀲𑀩𑁆𑀩𑁂𑀲𑀁 𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀭𑀜𑁆𑀜𑁄 𑀘 𑀤𑀫𑀺𑀴𑀤𑁂𑀯𑀻 𑀦𑀸𑀫 𑀫𑀳𑁂𑀲𑀻 𑀧𑀞𑀫𑀯𑀬𑁂 𑀞𑀺𑀢𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀅𑀣𑁂𑀓𑁄 𑀘𑀺𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀅𑀲𑀁𑀯𑀭𑀦𑀺𑀬𑀸𑀫𑁂𑀦 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲𑀸 𑀭𑀽𑀧𑀸𑀭𑀫𑁆𑀫𑀡𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀫𑁆𑀫𑀸𑀤𑀧𑁆𑀧𑀢𑁆𑀢𑁄 𑀯𑀺𑀬 𑀞𑀺𑀢𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀲𑀼 ‘‘𑀳𑀦𑁆𑀤 𑀤𑀫𑀺𑀴𑀤𑁂𑀯𑀻, 𑀳𑀦𑁆𑀤 𑀤𑀫𑀺𑀴𑀤𑁂𑀯𑀻’’𑀢𑀺 𑀯𑀤𑀦𑁆𑀢𑁄 𑀯𑀺𑀘𑀭𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀘𑀲𑁆𑀲 𑀤𑀳𑀭𑀲𑀸𑀫𑀡𑁂𑀭𑀸 𑀉𑀫𑁆𑀫𑀢𑁆𑀢𑀓𑀘𑀺𑀢𑁆𑀢𑀢𑁆𑀣𑁂𑀭𑁄𑀢𑁆𑀯𑁂𑀯 𑀦𑀸𑀫𑀁 𑀓𑀢𑁆𑀯𑀸 𑀯𑁄𑀳𑀭𑀺𑀁𑀲𑀼. 𑀅𑀣 𑀲𑀸 𑀤𑁂𑀯𑀻 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀫𑀓𑀸𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀺𑀯𑀣𑀺𑀓𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸 𑀆𑀕𑀢𑁂 𑀤𑀳𑀭𑀲𑀸𑀫𑀡𑁂𑀭𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀦𑁆𑀢𑁂 𑀘𑀺𑀢𑁆𑀢𑀢𑁆𑀣𑁂𑀭, 𑀬𑀲𑁆𑀲𑀢𑁆𑀣𑀸𑀬 𑀢𑁆𑀯𑀁 𑀯𑀺𑀮𑀧𑀲𑀺, 𑀫𑀬𑀁 𑀢𑀲𑁆𑀲𑀸 𑀤𑁂𑀯𑀺𑀬𑀸 𑀲𑀺𑀯𑀣𑀺𑀓𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸 𑀆𑀕𑀢𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀅𑀲𑁆𑀲𑀤𑁆𑀤𑀳𑀦𑁆𑀢𑁄 ‘‘𑀬𑀲𑁆𑀲𑀸 𑀯𑀸 𑀢𑀲𑁆𑀲𑀸 𑀯𑀸 𑀢𑀼𑀫𑁆𑀳𑁂 𑀲𑀺𑀯𑀣𑀺𑀓𑀤𑀲𑁆𑀲𑀦𑀢𑁆𑀣𑀸𑀬 𑀕𑀢𑀸, 𑀫𑀼𑀔𑀁 𑀢𑀼𑀫𑁆𑀳𑀸𑀓𑀁 𑀥𑀽𑀫𑀡𑁆𑀡’’𑀦𑁆𑀢𑀺. 𑀉𑀫𑁆𑀫𑀢𑁆𑀢𑀓𑀯𑀘𑀦𑀫𑁂𑀯 𑀅𑀯𑁄𑀘. 𑀏𑀯𑀁 𑀉𑀫𑁆𑀫𑀢𑁆𑀢𑀓𑀘𑀺𑀢𑁆𑀢𑀢𑁆𑀣𑁂𑀭𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀅𑀝𑁆𑀞𑀸𑀲𑀺 𑀇𑀤𑀁 𑀇𑀢𑁆𑀣𑀺𑀭𑀽𑀧𑀁.

𑀅𑀧𑀭𑀫𑁆𑀧𑀺 𑀯𑀢𑁆𑀣𑀼 𑁋 𑀲𑀤𑁆𑀥𑀸𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀑𑀭𑁄𑀥𑀕𑀡𑀧𑀭𑀺𑀯𑀼𑀢𑁄 𑀯𑀺𑀳𑀸𑀭𑀁 𑀆𑀕𑀢𑁄. 𑀏𑀓𑁄 𑀤𑀳𑀭𑁄 𑀮𑁄𑀳𑀧𑀸𑀲𑀸𑀤𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀅𑀲𑀁𑀯𑀭𑁂 𑀞𑀺𑀢𑁄 𑀏𑀓𑀁 𑀇𑀢𑁆𑀣𑀺𑀁 𑀑𑀮𑁄𑀓𑁂𑀲𑀺. 𑀲𑀸𑀧𑀺 𑀕𑀫𑀦𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀑𑀮𑁄𑀓𑁂𑀲𑀺. 𑀉𑀪𑁄𑀧𑀺 𑀅𑀩𑁆𑀪𑀦𑁆𑀢𑀭𑁂 𑀉𑀝𑁆𑀞𑀺𑀢𑁂𑀦 𑀭𑀸𑀕𑀕𑁆𑀕𑀺𑀦𑀸 𑀟𑀬𑁆𑀳𑀺𑀢𑁆𑀯𑀸 𑀓𑀸𑀮𑀫𑀓𑀁𑀲𑀼. 𑀏𑀯𑀁 𑀇𑀢𑁆𑀣𑀺𑀭𑀽𑀧𑀁 𑀤𑀳𑀭𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑀅𑀧𑀭𑀫𑁆𑀧𑀺 𑀯𑀢𑁆𑀣𑀼 𑁋 𑀓𑀮𑁆𑀬𑀸𑀡𑀺𑀬𑀫𑀳𑀸𑀯𑀺𑀳𑀸𑀭𑀢𑁄 𑀓𑀺𑀭𑁂𑀓𑁄 𑀤𑀳𑀭𑁄 𑀉𑀤𑁆𑀤𑁂𑀲𑀢𑁆𑀣𑀸𑀬 𑀓𑀸𑀴𑀤𑀻𑀖𑀯𑀸𑀧𑀺𑀕𑀸𑀫𑀤𑁆𑀯𑀸𑀭𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀝𑁆𑀞𑀺𑀢𑀼𑀤𑁆𑀤𑁂𑀲𑀓𑀺𑀘𑁆𑀘𑁄 𑀅𑀢𑁆𑀣𑀓𑀸𑀫𑀸𑀦𑀁 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀕𑀢𑀝𑁆𑀞𑀸𑀦𑁂 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀧𑀼𑀝𑁆𑀞𑁂𑀦 𑀕𑀸𑀫𑀲𑁆𑀲 𑀦𑀺𑀯𑀺𑀝𑁆𑀞𑀸𑀓𑀸𑀭𑁄 𑀓𑀣𑁂𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀢𑁄 𑀢𑀸𑀬 𑀦𑀺𑀯𑀢𑁆𑀣𑀯𑀢𑁆𑀣𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀓𑀳𑀁, 𑀪𑀦𑁆𑀢𑁂, 𑀇𑀤𑀁 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀢𑀲𑁆𑀲𑀸 𑀫𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀏𑀯𑀭𑀽𑀧𑀸 𑀦𑀸𑀫 𑀇𑀢𑁆𑀣𑀻 𑀫𑀁 𑀦𑀺𑀲𑁆𑀲𑀸𑀬 𑀫𑀢𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀦𑁆𑀢𑁄𑀉𑀝𑁆𑀞𑀺𑀢𑁂𑀦 𑀭𑀸𑀕𑀕𑁆𑀕𑀺𑀦𑀸 𑀟𑀬𑁆𑀳𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀏𑀯𑀫𑁆𑀧𑀺 𑀇𑀤𑀁 𑀇𑀢𑁆𑀣𑀺𑀭𑀽𑀧𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨. 𑀤𑀼𑀢𑀺𑀬𑀸𑀤𑀻𑀦𑀺 𑀲𑀤𑁆𑀤𑀕𑀭𑀼𑀓𑀸𑀤𑀻𑀦𑀁 𑀆𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀇𑀢𑁆𑀣𑀺𑀲𑀤𑁆𑀤𑁄𑀢𑀺 𑀇𑀢𑁆𑀣𑀺𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀓𑀣𑀺𑀢𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁄. 𑀅𑀧𑀺𑀘 𑀇𑀢𑁆𑀣𑀺𑀬𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑀲𑁆𑀲𑀸𑀧𑀺 𑀅𑀮𑀗𑁆𑀓𑀢𑀸𑀮𑀗𑁆𑀓𑀸𑀭𑀲𑁆𑀲𑀸𑀧𑀺 𑀇𑀢𑁆𑀣𑀺𑀧𑀬𑁄𑀕𑀦𑀺𑀧𑁆𑀨𑀸𑀤𑀺𑀢𑁄 𑀯𑀻𑀡𑀸𑀲𑀗𑁆𑀔𑀧𑀡𑀯𑀸𑀤𑀺𑀲𑀤𑁆𑀤𑁄𑀧𑀺 𑀇𑀢𑁆𑀣𑀺𑀲𑀤𑁆𑀤𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁄𑀧𑀺 𑀳𑁂𑀲𑁄 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺.

𑀢𑀢𑁆𑀣 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑀲𑀼𑀯𑀡𑁆𑀡𑀫𑁄𑀭𑀤𑀳𑀭𑀪𑀺𑀓𑁆𑀔𑀼𑀆𑀤𑀻𑀦𑀁 𑀯𑀢𑁆𑀣𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀩𑁆𑀩𑀢𑀦𑁆𑀢𑀭𑀁 𑀓𑀺𑀭 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀳𑀢𑁆𑀣𑀺𑀦𑀸𑀕𑀓𑀼𑀮𑀁 𑀯𑀲𑀢𑀺. 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀘𑀲𑁆𑀲 𑀫𑀳𑀸𑀧𑀭𑀺𑀪𑁄𑀕𑀲𑀭𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀓𑀸𑀬𑀽𑀧𑀧𑀦𑁆𑀦𑁄 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑁄 𑀅𑀢𑁆𑀣𑀺. 𑀲𑁄 𑀢𑀁 𑀲𑀭𑀁 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀲𑀡𑁆𑀟𑀸𑀲𑁂𑀦 𑀯𑀺𑀬 𑀅𑀴𑁂𑀳𑀺 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀁 𑀦𑁂𑀢𑁆𑀯𑀸 𑀫𑀸𑀭𑁂𑀢𑀺. 𑀢𑀲𑁆𑀲 𑀑𑀢𑀸𑀭𑀸𑀧𑁂𑀓𑁆𑀔𑀸 𑀳𑀢𑁆𑀣𑀺𑀦𑀸𑀕𑀸 𑀏𑀓𑀁 𑀫𑀳𑀸𑀳𑀢𑁆𑀣𑀺𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑀁 𑀳𑀢𑁆𑀣𑀺𑀦𑀸𑀕𑀁 𑀕𑀡𑁆𑀳𑀺. 𑀣𑀸𑀫𑀲𑀢𑀺𑀲𑀫𑁆𑀧𑀦𑁆𑀦𑁄 𑀳𑀢𑁆𑀣𑀺𑀦𑀸𑀕𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀪𑀻𑀢𑀭𑀯𑀁 𑀭𑀯𑀺𑀲𑁆𑀲𑀸𑀫𑀺, 𑀲𑀩𑁆𑀩𑁂 𑀬𑀣𑀸𑀭𑀼𑀘𑀺𑀬𑀸 𑀅𑀓𑀻𑀴𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀦𑀺𑀘𑁆𑀘𑀮𑁄𑀯 𑀅𑀝𑁆𑀞𑀸𑀲𑀺. 𑀅𑀣 𑀲𑀩𑁆𑀩𑁂𑀲𑀁 𑀉𑀢𑁆𑀢𑀺𑀡𑁆𑀡𑀪𑀸𑀯𑀁 𑀜𑀢𑁆𑀯𑀸 𑀢𑁂𑀦 𑀕𑀳𑀺𑀢𑀪𑀸𑀯𑀁 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀚𑀸𑀦𑀸𑀧𑁂𑀢𑀼𑀁 𑀯𑀺𑀭𑀯𑀺𑀢𑁆𑀯𑀸 𑀏𑀯𑀫𑀸𑀳 𑁋

‘‘𑀲𑀺𑀗𑁆𑀕𑀻𑀫𑀺𑀕𑁄 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄,

𑀅𑀝𑁆𑀞𑀺𑀢𑁆𑀢𑀘𑁄 𑀯𑀸𑀭𑀺𑀲𑀬𑁄 𑀅𑀮𑁄𑀫𑁄;

𑀢𑁂𑀦𑀸𑀪𑀺𑀪𑀽𑀢𑁄 𑀓𑀧𑀡𑀁 𑀭𑀼𑀤𑀸𑀫𑀺,

𑀫𑀸 𑀳𑁂𑀯 𑀫𑀁 𑀧𑀸𑀡𑀲𑀫𑀁 𑀚𑀳𑁂𑀬𑁆𑀬𑀸’’𑀢𑀺. (𑀚𑀸. 𑁧.𑁩.𑁪𑁯);

𑀲𑀸 𑀢𑀁 𑀲𑀼𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀢𑀫𑁆𑀳𑀸 𑀪𑀬𑀸 𑀫𑁄𑀘𑁂𑀢𑀼𑀁 𑀳𑀢𑁆𑀣𑀺𑀦𑀸 𑀘 𑀓𑀼𑀴𑀻𑀭𑁂𑀦 𑀘 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀏𑀯𑀫𑀸𑀳 𑁋

‘‘𑀅𑀬𑁆𑀬 𑀦 𑀢𑀁 𑀚𑀳𑀺𑀲𑁆𑀲𑀸𑀫𑀺, 𑀓𑀼𑀜𑁆𑀚𑀭𑀁 𑀲𑀝𑁆𑀞𑀺𑀳𑀸𑀬𑀦𑀁;

𑀧𑀣𑀩𑁆𑀬𑀸 𑀘𑀸𑀢𑀼𑀭𑀦𑁆𑀢𑀸𑀬, 𑀲𑀼𑀧𑁆𑀧𑀺𑀬𑁄 𑀳𑁄𑀲𑀺 𑀫𑁂 𑀢𑀼𑀯𑀁.

‘‘𑀬𑁂 𑀓𑀼𑀴𑀻𑀭𑀸 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀕𑀗𑁆𑀕𑀸𑀬 𑀬𑀫𑀼𑀦𑀸𑀬 𑀘;

𑀢𑁂𑀲𑀁 𑀢𑁆𑀯𑀁 𑀯𑀸𑀭𑀺𑀚𑁄 𑀲𑁂𑀝𑁆𑀞𑁄, 𑀫𑀼𑀜𑁆𑀘 𑀭𑁄𑀤𑀦𑁆𑀢𑀺𑀬𑀸 𑀧𑀢𑀺’’𑀦𑁆𑀢𑀺. (𑀚𑀸. 𑁧.𑁩.𑁫𑁦-𑁫𑁧);

𑀓𑀼𑀴𑀻𑀭𑁄 𑀲𑀳 𑀇𑀢𑁆𑀣𑀺𑀲𑀤𑁆𑀤𑀲𑁆𑀲𑀯𑀦𑁂𑀦 𑀕𑀳𑀡𑀁 𑀲𑀺𑀣𑀺𑀮𑀫𑀓𑀸𑀲𑀺. 𑀅𑀣 𑀳𑀢𑁆𑀣𑀺𑀦𑀸𑀕𑁄 ‘‘𑀅𑀬𑀫𑁂𑀯𑁂𑀢𑀲𑁆𑀲 𑀑𑀓𑀸𑀲𑁄’’𑀢𑀺 𑀏𑀓𑀁 𑀧𑀸𑀤𑀁 𑀕𑀳𑀺𑀢𑀸𑀓𑀸𑀭𑁂𑀦𑁂𑀯 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀧𑀺𑀝𑁆𑀞𑀺𑀓𑀧𑀸𑀮𑁂 𑀅𑀓𑁆𑀓𑀫𑀺𑀢𑁆𑀯𑀸 𑀯𑀺𑀘𑀼𑀡𑁆𑀡𑀺𑀓𑀁 𑀓𑀢𑁆𑀯𑀸 𑀣𑁄𑀓𑀁 𑀆𑀓𑀟𑁆𑀠𑀺𑀢𑁆𑀯𑀸 𑀢𑀻𑀭𑁂 𑀔𑀺𑀧𑀺. 𑀅𑀣 𑀦𑀁 𑀲𑀩𑁆𑀩𑀳𑀢𑁆𑀣𑀺𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀯𑁂𑀭𑀻’’𑀢𑀺 𑀯𑀺𑀘𑀼𑀡𑁆𑀡𑀬𑀺𑀁𑀲𑀼. 𑀏𑀯𑀁 𑀢𑀸𑀯 𑀇𑀢𑁆𑀣𑀺𑀲𑀤𑁆𑀤𑁄 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀲𑀼𑀯𑀡𑁆𑀡𑀫𑁄𑀭𑁄𑀧𑀺 𑀳𑀺𑀫𑀯𑀦𑁆𑀢𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀫𑀳𑀦𑁆𑀢𑀁 𑀧𑀩𑁆𑀩𑀢𑀕𑀳𑀦𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀦𑀺𑀘𑁆𑀘𑀓𑀸𑀮𑀁 𑀲𑀽𑀭𑀺𑀬𑀲𑁆𑀲 𑀉𑀤𑀬𑀓𑀸𑀮𑁂 𑀲𑀽𑀭𑀺𑀬𑀫𑀡𑁆𑀟𑀮𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀓𑁆𑀔𑀁 𑀓𑀭𑁄𑀦𑁆𑀢𑁄 𑀏𑀯𑀁 𑀯𑀤𑀢𑀺 𑁋

‘‘𑀉𑀤𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸,

𑀳𑀭𑀺𑀲𑁆𑀲𑀯𑀡𑁆𑀡𑁄 𑀧𑀣𑀯𑀺𑀧𑁆𑀧𑀪𑀸𑀲𑁄;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀳𑀭𑀺𑀲𑁆𑀲𑀯𑀡𑁆𑀡𑀁 𑀧𑀣𑀯𑀺𑀧𑁆𑀧𑀪𑀸𑀲𑀁,

𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑀼 𑀤𑀺𑀯𑀲𑀁.

‘‘𑀬𑁂 𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀕𑀽 𑀲𑀩𑁆𑀩𑀥𑀫𑁆𑀫𑁂,

𑀢𑁂 𑀫𑁂 𑀦𑀫𑁄 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀼;

𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸,

𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸;

𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸,

𑀫𑁄𑀭𑁄 𑀘𑀭𑀢𑀺 𑀏𑀲𑀦𑀸’’𑀢𑀺. (𑀚𑀸. 𑁧.𑁨.𑁧𑁭);

𑀲𑁄 𑀤𑀺𑀯𑀲𑀁 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀦𑁆𑀢𑁄 𑀅𑀢𑁆𑀣𑀗𑁆𑀕𑀢𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀑𑀮𑁄𑀓𑁂𑀢𑁆𑀯𑀸𑀧𑀺 𑀇𑀫𑀁 𑀕𑀸𑀣𑀁 𑀯𑀤𑀢𑀺 𑁋

‘‘𑀅𑀧𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸,

𑀳𑀭𑀺𑀲𑁆𑀲𑀯𑀡𑁆𑀡𑁄 𑀧𑀣𑀯𑀺𑀧𑁆𑀧𑀪𑀸𑀲𑁄;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀳𑀭𑀺𑀲𑁆𑀲𑀯𑀡𑁆𑀡𑀁 𑀧𑀣𑀯𑀺𑀧𑁆𑀧𑀪𑀸𑀲𑀁,

𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑀼 𑀭𑀢𑁆𑀢𑀺𑀁.

‘‘𑀬𑁂 𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀕𑀽 𑀲𑀩𑁆𑀩𑀥𑀫𑁆𑀫𑁂,

𑀢𑁂 𑀫𑁂 𑀦𑀫𑁄 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀼;

𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸,

𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸;

𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸,

𑀫𑁄𑀭𑁄 𑀯𑀸𑀲𑀫𑀓𑀧𑁆𑀧𑀬𑀻’’𑀢𑀺. (𑀚𑀸. 𑁧.𑁨.𑁧𑁮);

𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀧𑀭𑀺𑀢𑁆𑀢𑀓𑀫𑁆𑀫𑀢𑁄 𑀧𑀼𑀭𑁂𑀢𑀭𑀫𑁂𑀯 𑀫𑁄𑀭𑀓𑀼𑀓𑁆𑀓𑀼𑀝𑀺𑀓𑀸𑀬 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀭𑀺𑀢𑁆𑀢𑀓𑀫𑁆𑀫𑀁 𑀅𑀲𑀭𑀺𑀢𑁆𑀯𑀸 𑀭𑀜𑁆𑀜𑀸 𑀧𑁂𑀲𑀺𑀢𑀲𑁆𑀲 𑀮𑀼𑀤𑁆𑀤𑀓𑀲𑁆𑀲 𑀯𑀲𑀁 𑀉𑀧𑀕𑀢𑁄. 𑀏𑀯𑀁 𑀇𑀢𑁆𑀣𑀺𑀲𑀤𑁆𑀤𑁄 𑀲𑀼𑀯𑀡𑁆𑀡𑀫𑁄𑀭𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺. 𑀙𑀸𑀢𑀧𑀩𑁆𑀩𑀢𑀯𑀸𑀲𑀻 𑀤𑀳𑀭𑁄 𑀧𑀦 𑀲𑀼𑀥𑀸𑀫𑀼𑀡𑁆𑀟𑀓𑀯𑀸𑀲𑀻 𑀤𑀳𑀭𑁄 𑀘 𑀇𑀢𑁆𑀣𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑀸𑀢𑀺.

𑁩. 𑀢𑀢𑀺𑀬𑁂 𑀇𑀢𑁆𑀣𑀺𑀕𑀦𑁆𑀥𑁄𑀢𑀺 𑀇𑀢𑁆𑀣𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀕𑀦𑁆𑀥𑀸𑀬𑀢𑀦𑀁. 𑀲𑁆𑀯𑀸𑀬𑀁 𑀇𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺, 𑀓𑀸𑀬𑀸𑀭𑀼𑀴𑁆𑀳𑁄 𑀧𑀦 𑀆𑀕𑀦𑁆𑀢𑀼𑀓𑀅𑀦𑀼𑀮𑁂𑀧𑀦𑀸𑀤𑀺𑀕𑀦𑁆𑀥𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀏𑀓𑀘𑁆𑀘𑀸 𑀳𑀺 𑀇𑀢𑁆𑀣𑀻 𑀅𑀲𑁆𑀲𑀕𑀦𑁆𑀥𑀺𑀦𑀻 𑀳𑁄𑀢𑀺, 𑀏𑀓𑀘𑁆𑀘𑀸 𑀫𑁂𑀡𑁆𑀟𑀓𑀕𑀦𑁆𑀥𑀺𑀦𑀻, 𑀏𑀓𑀘𑁆𑀘𑀸 𑀲𑁂𑀤𑀕𑀦𑁆𑀥𑀺𑀦𑀻, 𑀏𑀓𑀘𑁆𑀘𑀸 𑀲𑁄𑀡𑀺𑀢𑀕𑀦𑁆𑀥𑀺𑀦𑀻. 𑀏𑀓𑀘𑁆𑀘𑁄 𑀅𑀦𑁆𑀥𑀩𑀸𑀮𑁄 𑀏𑀯𑀭𑀽𑀧𑀸𑀬𑀧𑀺 𑀇𑀢𑁆𑀣𑀺𑀬𑀸 𑀭𑀚𑁆𑀚𑀢𑁂𑀯. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀦 𑀇𑀢𑁆𑀣𑀺𑀭𑀢𑀦𑀲𑁆𑀲 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀘 𑀉𑀧𑁆𑀧𑀮𑀕𑀦𑁆𑀥𑁄. 𑀅𑀬𑀁 𑀦 𑀲𑀩𑁆𑀩𑀸𑀲𑀁 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀅𑀦𑀼𑀮𑁂𑀧𑀦𑀸𑀤𑀺𑀕𑀦𑁆𑀥𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀦 𑀳𑀢𑁆𑀣𑀺𑀅𑀲𑁆𑀲𑀕𑁄𑀡𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀲𑀚𑀸𑀢𑀺𑀇𑀢𑁆𑀣𑀻𑀦𑀁 𑀉𑀢𑀼𑀕𑀦𑁆𑀥𑁂𑀦 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀘𑀢𑀼𑀬𑁄𑀚𑀦𑀫𑁆𑀧𑀺 𑀕𑀘𑁆𑀙𑀦𑁆𑀢𑀺. 𑀇𑀢𑁆𑀣𑀺𑀓𑀸𑀬𑁂 𑀕𑀦𑁆𑀥𑁄 𑀯𑀸 𑀳𑁄𑀢𑀼 𑀇𑀢𑁆𑀣𑀺𑀬𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑀅𑀦𑀼𑀮𑀺𑀢𑁆𑀢𑀸𑀮𑁂𑀧𑀦𑀧𑀺𑀴𑀦𑁆𑀥𑀫𑀸𑀮𑀸𑀤𑀺𑀕𑀦𑁆𑀥𑁄 𑀯𑀸, 𑀲𑀩𑁆𑀩𑁄𑀧𑀺 𑀇𑀢𑁆𑀣𑀺𑀕𑀦𑁆𑀥𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁪. 𑀘𑀢𑀼𑀢𑁆𑀣𑁂 𑀇𑀢𑁆𑀣𑀺𑀭𑀲𑁄𑀢𑀺 𑀇𑀢𑁆𑀣𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀭𑀲𑀸𑀬𑀢𑀦𑀁. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀘𑀽𑀴𑀸𑀪𑀬𑀢𑁆𑀣𑁂𑀭𑀸 𑀧𑀦 ‘‘𑀲𑁆𑀯𑀸𑀬𑀁 𑀇𑀢𑁆𑀣𑀺𑀬𑀸 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀢𑀸𑀤𑀺𑀯𑀲𑁂𑀦 𑀲𑀯𑀦𑀭𑀲𑁄 𑀘𑁂𑀯 𑀧𑀭𑀺𑀪𑁄𑀕𑀭𑀲𑁄 𑀘, 𑀅𑀬𑀁 𑀇𑀢𑁆𑀣𑀺𑀭𑀲𑁄’’𑀢𑀺 𑀯𑀤𑀦𑁆𑀢𑀺. 𑀓𑀺𑀁 𑀢𑁂𑀦? 𑀬𑁄 𑀧𑀦𑀸𑀬𑀁 𑀇𑀢𑁆𑀣𑀺𑀬𑀸 𑀑𑀝𑁆𑀞𑀫𑀁𑀲𑀲𑀫𑁆𑀫𑀓𑁆𑀔𑀦𑀔𑁂𑀴𑀸𑀤𑀺𑀭𑀲𑁄𑀧𑀺, 𑀲𑀸𑀫𑀺𑀓𑀲𑁆𑀲 𑀤𑀺𑀦𑁆𑀦𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀁 𑀭𑀲𑁄𑀧𑀺, 𑀲𑀩𑁆𑀩𑁄 𑀲𑁄 𑀇𑀢𑁆𑀣𑀺𑀭𑀲𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁂𑀓𑁂 𑀳𑀺 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀫𑀸𑀢𑀼𑀕𑀸𑀫𑁂𑀦 𑀬𑀁𑀓𑀺𑀜𑁆𑀘𑀺 𑀲𑀳𑀢𑁆𑀣𑀸 𑀤𑀺𑀦𑁆𑀦𑀫𑁂𑀯 𑀫𑀥𑀼𑀭𑀦𑁆𑀢𑀺 𑀕𑀳𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑀸𑀢𑀺.

𑁫. 𑀧𑀜𑁆𑀘𑀫𑁂 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑁄𑀢𑀺 𑀇𑀢𑁆𑀣𑀺𑀬𑀸 𑀓𑀸𑀬𑀲𑀫𑁆𑀨𑀲𑁆𑀲𑁄, 𑀇𑀢𑁆𑀣𑀺𑀲𑀭𑀻𑀭𑀸𑀭𑀼𑀴𑁆𑀳𑀸𑀦𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀫𑀸𑀮𑀸𑀤𑀻𑀦𑀫𑁆𑀧𑀺 𑀨𑀲𑁆𑀲𑁄 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁄𑀧𑁂𑀲 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂 𑀕𑀡𑀲𑀚𑁆𑀛𑀸𑀬𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀳𑀭𑀪𑀺𑀓𑁆𑀔𑀼𑀦𑁄 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀨𑀲𑁆𑀲𑁄 𑀯𑀺𑀬𑀸𑀢𑀺.

𑀇𑀢𑀺 𑀲𑀢𑁆𑀣𑀸 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀯𑀲𑁂𑀦 𑀭𑀽𑀧𑀸𑀤𑀻𑀲𑀼 𑀏𑀓𑁂𑀓𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀈𑀤𑀺𑀲𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀆𑀳. 𑀬𑀣𑀸 𑀳𑀺 𑀭𑀽𑀧𑀕𑀭𑀼𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀭𑀽𑀧𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀕𑀫𑁂𑀢𑀺 𑀧𑀮𑀺𑀩𑀼𑀦𑁆𑀥𑀢𑀺 𑀩𑀚𑁆𑀛𑀸𑀧𑁂𑀢𑀺 𑀩𑀤𑁆𑀥𑀸𑀧𑁂𑀢𑀺 𑀫𑁄𑀳𑁂𑀢𑀺 𑀲𑀁𑀫𑁄𑀳𑁂𑀢𑀺, 𑀦 𑀢𑀣𑀸 𑀲𑁂𑀲𑀸 𑀲𑀤𑁆𑀤𑀸𑀤𑀬𑁄. 𑀬𑀣𑀸 𑀘 𑀲𑀤𑁆𑀤𑀸𑀤𑀺𑀕𑀭𑀼𑀓𑀸𑀦𑀁 𑀲𑀤𑁆𑀤𑀸𑀤𑀬𑁄, 𑀦 𑀢𑀣𑀸 𑀭𑀽𑀧𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺. 𑀏𑀓𑀘𑁆𑀘𑀲𑁆𑀲 𑀘 𑀭𑀽𑀧𑀸𑀤𑀻𑀲𑀼 𑀏𑀓𑀫𑁂𑀯𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀏𑀓𑀘𑁆𑀘𑀲𑁆𑀲 𑀤𑁆𑀯𑁂𑀧𑀺 𑀢𑀻𑀡𑀺𑀧𑀺 𑀘𑀢𑁆𑀢𑀸𑀭𑀺𑀧𑀺 𑀧𑀜𑁆𑀘𑀧𑀺. 𑀇𑀢𑀺 𑀇𑀫𑁂 𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑀸 𑀧𑀜𑁆𑀘𑀕𑀭𑀼𑀓𑀯𑀲𑁂𑀦 𑀓𑀣𑀺𑀢𑀸, 𑀦 𑀧𑀜𑁆𑀘𑀕𑀭𑀼𑀓𑀚𑀸𑀢𑀓𑀯𑀲𑁂𑀦. 𑀧𑀜𑁆𑀘𑀕𑀭𑀼𑀓𑀚𑀸𑀢𑀓𑀁 𑀧𑀦 𑀲𑀓𑁆𑀔𑀺𑀪𑀸𑀯𑀢𑁆𑀣𑀸𑀬 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀢𑀢𑁆𑀭 𑀳𑀺 𑀅𑀫𑀦𑀼𑀲𑁆𑀲𑁂𑀳𑀺 𑀓𑀦𑁆𑀢𑀸𑀭𑀫𑀚𑁆𑀛𑁂 𑀓𑀢𑀸𑀬 𑀆𑀧𑀡𑀸𑀤𑀺𑀯𑀺𑀘𑀸𑀭𑀡𑀸𑀬 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀜𑁆𑀘𑀲𑀼 𑀲𑀳𑀸𑀬𑁂𑀲𑀼 𑀭𑀽𑀧𑀕𑀭𑀼𑀓𑁄 𑀭𑀽𑀧𑀸𑀭𑀫𑁆𑀫𑀡𑁂 𑀩𑀚𑁆𑀛𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀲𑀤𑁆𑀤𑀸𑀤𑀺𑀕𑀭𑀼𑀓𑀸 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼. 𑀇𑀢𑀺 𑀢𑀁 𑀲𑀓𑁆𑀔𑀺𑀪𑀸𑀯𑀢𑁆𑀣𑀸𑀬 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀇𑀫𑁂 𑀧𑀦 𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑀸 𑀧𑀜𑁆𑀘𑀕𑀭𑀼𑀓𑀯𑀲𑁂𑀦𑁂𑀯 𑀓𑀣𑀺𑀢𑀸.

𑁬. 𑀬𑀲𑁆𑀫𑀸 𑀘 𑀦 𑀓𑁂𑀯𑀮𑀁 𑀧𑀼𑀭𑀺𑀲𑀸𑀬𑁂𑀯 𑀧𑀜𑁆𑀘𑀕𑀭𑀼𑀓𑀸 𑀳𑁄𑀦𑁆𑀢𑀺, 𑀇𑀢𑁆𑀣𑀺𑀬𑁄𑀧𑀺 𑀳𑁄𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀢𑀸𑀲𑀫𑁆𑀧𑀺 𑀯𑀲𑁂𑀦 𑀧𑀼𑀦 𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑁂 𑀓𑀣𑁂𑀲𑀺. 𑀢𑁂𑀲𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀯𑀢𑁆𑀣𑀽𑀲𑀼𑀧𑀺 𑀧𑀞𑀫𑀲𑀼𑀢𑁆𑀢𑁂 𑀮𑁄𑀳𑀧𑀸𑀲𑀸𑀤𑀤𑁆𑀯𑀸𑀭𑁂 𑀞𑀺𑀢𑀁 𑀤𑀳𑀭𑀁 𑀑𑀮𑁄𑀓𑁂𑀢𑁆𑀯𑀸 𑀫𑀢𑀸𑀬 𑀭𑀸𑀚𑁄𑀭𑁄𑀥𑀸𑀬 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑁭. 𑀤𑀼𑀢𑀺𑀬𑀲𑀼𑀢𑁆𑀢𑁂 𑀩𑀸𑀭𑀸𑀡𑀲𑀺𑀬𑀁 𑀭𑀽𑀧𑀽𑀧𑀚𑀻𑀯𑀺𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁. 𑀕𑀼𑀢𑁆𑀢𑀺𑀮𑀯𑀻𑀡𑀸𑀯𑀸𑀤𑀓𑁄 𑀓𑀺𑀭𑁂𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀳𑀲𑁆𑀲𑀁 𑀧𑀳𑀺𑀡𑀺, 𑀲𑀸 𑀢𑀁 𑀉𑀧𑁆𑀧𑀡𑁆𑀟𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀇𑀘𑁆𑀙𑀺. 𑀲𑁄 ‘‘𑀓𑀭𑀺𑀲𑁆𑀲𑀸𑀫𑁂𑀢𑁆𑀣 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀲𑀸𑀬𑀦𑁆𑀳𑀓𑀸𑀮𑀲𑀫𑀦𑀦𑁆𑀢𑀭𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀢𑀲𑁆𑀲𑀸 𑀕𑁂𑀳𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀅𑀜𑁆𑀜𑀲𑁆𑀫𑀺𑀁 𑀕𑁂𑀳𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀲𑀫𑁂 𑀕𑀼𑀡𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀦𑁆𑀢𑀺𑀲𑁆𑀲𑀭𑁂𑀦 𑀕𑀻𑀢𑀲𑁆𑀲𑀭𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁄 𑀕𑀸𑀬𑀺. 𑀲𑀸 𑀇𑀢𑁆𑀣𑀻 𑀢𑀲𑁆𑀲 𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀤𑁆𑀯𑀸𑀭𑀦𑁆𑀢𑀺 𑀲𑀜𑁆𑀜𑀸𑀬 ‘‘𑀯𑀺𑀯𑀝𑀯𑀸𑀢𑀧𑀸𑀦𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀬𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑀸.

𑁮. 𑀢𑀢𑀺𑀬𑀲𑀼𑀢𑁆𑀢𑁂 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀘 𑀉𑀧𑁆𑀧𑀮𑀕𑀦𑁆𑀥𑁄𑀢𑀺 𑀇𑀤𑀁 𑀆𑀳𑀭𑀺𑀢𑀩𑁆𑀩𑀁. 𑀇𑀤𑀁 𑀘𑁂𑀢𑁆𑀣 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀺𑀲𑁆𑀲𑀸 𑀓𑀼𑀝𑀼𑀫𑁆𑀩𑀺𑀓𑀥𑀻𑀢𑀸𑀬 𑀲𑀸𑀫𑀺𑀓𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸, ‘‘𑀦 𑀲𑀓𑁆𑀓𑀸 𑀫𑀬𑀸 𑀅𑀬𑀁 𑀥𑀫𑁆𑀫𑁄 𑀕𑀺𑀳𑀺𑀪𑀽𑀢𑁂𑀦 𑀧𑀽𑀭𑁂𑀢𑀼’’𑀦𑁆𑀢𑀺 𑀅𑀜𑁆𑀜𑀢𑀭𑀲𑁆𑀲 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀅𑀣𑀲𑁆𑀲 𑀪𑀭𑀺𑀬𑀁 ‘‘𑀅𑀲𑁆𑀲𑀸𑀫𑀺𑀓𑀸 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀭𑀸𑀚𑀸 𑀧𑀲𑁂𑀦𑀤𑀺𑀓𑁄𑀲𑀮𑁄 𑀅𑀦𑁆𑀢𑁂𑀧𑀼𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀏𑀓𑀁 𑀦𑀻𑀮𑀼𑀧𑁆𑀧𑀮𑀓𑀮𑀸𑀧𑀁 𑀆𑀤𑀸𑀬 𑀅𑀦𑁆𑀢𑁂𑀧𑀼𑀭𑀁 𑀧𑀯𑀺𑀝𑁆𑀞𑁄 𑀏𑀓𑁂𑀓𑀺𑀲𑁆𑀲𑀸 𑀏𑀓𑁂𑀓𑀁 𑀦𑀻𑀮𑀼𑀧𑁆𑀧𑀮𑀁 𑀤𑀸𑀧𑁂𑀲𑀺. 𑀧𑀼𑀧𑁆𑀨𑁂𑀲𑀼 𑀪𑀸𑀚𑀺𑀬𑀫𑀸𑀦𑁂𑀲𑀼 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀤𑁆𑀯𑁂 𑀳𑀢𑁆𑀣𑀁 𑀧𑀢𑁆𑀢𑀸𑀦𑀺. 𑀲𑀸 𑀧𑀳𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀲𑀺𑀗𑁆𑀖𑀺𑀢𑁆𑀯𑀸 𑀧𑀭𑁄𑀤𑀺. 𑀭𑀸𑀚𑀸 𑀢𑀲𑁆𑀲𑀸 𑀉𑀪𑀬𑀸𑀓𑀸𑀭𑀁 𑀤𑀺𑀲𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀲𑀸 𑀅𑀢𑁆𑀢𑀦𑁄 𑀧𑀳𑀝𑁆𑀞𑀓𑀸𑀭𑀡𑀜𑁆𑀘 𑀭𑁄𑀤𑀦𑀓𑀸𑀭𑀡𑀜𑁆𑀘 𑀓𑀣𑁂𑀲𑀺. 𑀬𑀸𑀯𑀢𑀢𑀺𑀬𑀁 𑀓𑀣𑀺𑀢𑁂𑀧𑀺 𑀭𑀸𑀚𑀸 𑀅𑀲𑁆𑀲𑀤𑁆𑀤𑀳𑀦𑁆𑀢𑁄 𑀧𑀼𑀦𑀤𑀺𑀯𑀲𑁂 𑀲𑀓𑀮𑀭𑀸𑀚𑀦𑀺𑀯𑁂𑀲𑀦𑁂 𑀲𑀩𑁆𑀩𑀫𑀸𑀮𑀸𑀯𑀺𑀮𑁂𑀧𑀦𑀸𑀤𑀺𑀲𑀼𑀕𑀦𑁆𑀥𑀕𑀦𑁆𑀥𑀁 𑀳𑀭𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑀁 𑀇𑀢𑁆𑀣𑀺𑀁 ‘‘𑀓𑀢𑀭𑁄 𑀢𑁂 𑀣𑁂𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀅𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀜𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀕𑀘𑁆𑀙𑀢𑀼, 𑀅𑀫𑁆𑀳𑀸𑀓𑀁 𑀅𑀲𑀼𑀓𑀢𑁆𑀣𑁂𑀭𑁄 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄. 𑀣𑁂𑀭𑁂 𑀅𑀦𑀼𑀫𑁄𑀤𑀦𑀁 𑀯𑀢𑁆𑀢𑀼𑀁 𑀆𑀭𑀤𑁆𑀥𑀫𑀢𑁆𑀢𑁂 𑀲𑀓𑀮𑀁 𑀭𑀸𑀚𑀦𑀺𑀯𑁂𑀲𑀦𑀁 𑀕𑀦𑁆𑀥𑀧𑀽𑀭𑀁 𑀯𑀺𑀬 𑀚𑀸𑀢𑀁. 𑀭𑀸𑀚𑀸 ‘‘𑀲𑀘𑁆𑀘𑀫𑁂𑀯𑁂𑀲𑀸 𑀆𑀳𑀸’’𑀢𑀺 𑀧𑀲𑀻𑀤𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀅𑀬𑀁 𑀅𑀢𑀻𑀢𑁂 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 ‘𑀲𑀸𑀥𑀼 𑀲𑀸𑀥𑀽’𑀢𑀺 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀅𑀲𑁆𑀲𑁄𑀲𑀺, 𑀢𑀫𑁆𑀫𑀽𑀮𑀓𑁄 𑀢𑁂𑀦 𑀫𑀳𑀸𑀭𑀸𑀚 𑀅𑀬𑀫𑀸𑀦𑀺𑀲𑀁𑀲𑁄 𑀮𑀤𑁆𑀥𑁄’’𑀢𑀺 𑀆𑀘𑀺𑀓𑁆𑀔𑀺.

‘‘𑀲𑀤𑁆𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂, 𑀲𑀸𑀥𑀼 𑀲𑀸𑀥𑀽𑀢𑀺 𑀪𑀸𑀲𑀢𑁄;

𑀫𑀼𑀔𑀢𑁄 𑀚𑀸𑀬𑀢𑁂 𑀕𑀦𑁆𑀥𑁄, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂’’𑀢𑀺.

𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑀭𑀽𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸.