𑁮. 𑀲𑀸𑀭𑀫𑁆𑀫𑀡𑀸𑀦𑀸𑀭𑀫𑁆𑀫𑀡𑀯𑀸𑀭𑁄

𑁧𑁦𑁩𑁨. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀢𑀺 𑀲𑀸𑀭𑀫𑁆𑀫𑀡𑀸, 𑀓𑀢𑀺 𑀅𑀦𑀸𑀭𑀫𑁆𑀫𑀡𑀸…𑀧𑁂… 𑀲𑀢𑁆𑀢𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀓𑀢𑀺 𑀲𑀸𑀭𑀫𑁆𑀫𑀡𑀸, 𑀓𑀢𑀺 𑀅𑀦𑀸𑀭𑀫𑁆𑀫𑀡𑀸?

𑁧𑁦𑁩𑁩. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑀸𑀭𑀫𑁆𑀫𑀡𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀸𑀭𑀫𑁆𑀫𑀡𑀸.

𑀤𑀲𑀸𑀬𑀢𑀦𑀸 𑀅𑀦𑀸𑀭𑀫𑁆𑀫𑀡𑀸. 𑀫𑀦𑀸𑀬𑀢𑀦𑀁 𑀲𑀸𑀭𑀫𑁆𑀫𑀡𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁.

𑀤𑀲 𑀥𑀸𑀢𑀼𑀬𑁄 𑀅𑀦𑀸𑀭𑀫𑁆𑀫𑀡𑀸. 𑀲𑀢𑁆𑀢 𑀥𑀸𑀢𑀼𑀬𑁄 𑀲𑀸𑀭𑀫𑁆𑀫𑀡𑀸. 𑀥𑀫𑁆𑀫𑀥𑀸𑀢𑀼 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸.

𑀤𑁆𑀯𑁂 𑀲𑀘𑁆𑀘𑀸 𑀲𑀸𑀭𑀫𑁆𑀫𑀡𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁.

𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀦𑀸𑀭𑀫𑁆𑀫𑀡𑀸. 𑀘𑀼𑀤𑁆𑀤𑀲𑀺𑀦𑁆𑀤𑁆𑀭𑀺𑀬𑀸 𑀲𑀸𑀭𑀫𑁆𑀫𑀡𑀸. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁. 𑀦𑀯 𑀳𑁂𑀢𑀽 𑀲𑀸𑀭𑀫𑁆𑀫𑀡𑀸. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀅𑀦𑀸𑀭𑀫𑁆𑀫𑀡𑁄. 𑀢𑀬𑁄 𑀆𑀳𑀸𑀭𑀸 𑀲𑀸𑀭𑀫𑁆𑀫𑀡𑀸. 𑀲𑀢𑁆𑀢 𑀨𑀲𑁆𑀲𑀸… 𑀲𑀢𑁆𑀢 𑀯𑁂𑀤𑀦𑀸… 𑀲𑀢𑁆𑀢 𑀲𑀜𑁆𑀜𑀸… 𑀲𑀢𑁆𑀢 𑀘𑁂𑀢𑀦𑀸… 𑀲𑀢𑁆𑀢 𑀘𑀺𑀢𑁆𑀢𑀸 𑀲𑀸𑀭𑀫𑁆𑀫𑀡𑀸.

𑁧𑁦𑁩𑁪. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀢𑀺 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀓𑀢𑀺 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸…𑀧𑁂… 𑀲𑀢𑁆𑀢𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀓𑀢𑀺 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀓𑀢𑀺 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸?

𑁧𑁦𑁩𑁫. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑀸𑀭𑀫𑁆𑀫𑀡𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸.

𑀤𑀲𑀸𑀬𑀢𑀦𑀸 𑀅𑀦𑀸𑀭𑀫𑁆𑀫𑀡𑀸. 𑀫𑀦𑀸𑀬𑀢𑀦𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁.

𑀤𑀲 𑀥𑀸𑀢𑀼𑀬𑁄 𑀅𑀦𑀸𑀭𑀫𑁆𑀫𑀡𑀸. 𑀙 𑀥𑀸𑀢𑀼𑀬𑁄 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀥𑀫𑁆𑀫𑀥𑀸𑀢𑀼 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸.

𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀁. 𑀫𑀕𑁆𑀕𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁.

𑀲𑀢𑁆𑀢𑀺𑀦𑁆𑀤𑁆𑀭𑀺𑀬𑀸 𑀅𑀦𑀸𑀭𑀫𑁆𑀫𑀡𑀸. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀦𑀯𑀺𑀦𑁆𑀤𑁆𑀭𑀺𑀬𑀸 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁.

𑀦𑀯 𑀳𑁂𑀢𑀽 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀅𑀦𑀸𑀭𑀫𑁆𑀫𑀡𑁄. 𑀢𑀬𑁄 𑀆𑀳𑀸𑀭𑀸 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀙 𑀨𑀲𑁆𑀲𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑁄 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑁄 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑁄. 𑀙 𑀯𑁂𑀤𑀦𑀸… 𑀙 𑀲𑀜𑁆𑀜𑀸… 𑀙 𑀘𑁂𑀢𑀦𑀸… 𑀙 𑀘𑀺𑀢𑁆𑀢𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀺𑀬𑀸 𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸.