𑁯. 𑀤𑀺𑀝𑁆𑀞𑀲𑀼𑀢𑀸𑀤𑀺𑀤𑀲𑁆𑀲𑀦𑀯𑀸𑀭𑁄

𑁧𑁦𑁩𑁬. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀢𑀺 𑀤𑀺𑀝𑁆𑀞𑀸, 𑀓𑀢𑀺 𑀲𑀼𑀢𑀸, 𑀓𑀢𑀺 𑀫𑀼𑀢𑀸, 𑀓𑀢𑀺 𑀯𑀺𑀜𑁆𑀜𑀸𑀢𑀸, 𑀓𑀢𑀺 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸 𑀦 𑀯𑀺𑀜𑁆𑀜𑀸𑀢𑀸…𑀧𑁂… 𑀲𑀢𑁆𑀢𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀓𑀢𑀺 𑀤𑀺𑀝𑁆𑀞𑀸, 𑀓𑀢𑀺 𑀲𑀼𑀢𑀸, 𑀓𑀢𑀺 𑀫𑀼𑀢𑀸, 𑀓𑀢𑀺 𑀯𑀺𑀜𑁆𑀜𑀸𑀢𑀸, 𑀓𑀢𑀺 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸 𑀦 𑀯𑀺𑀜𑁆𑀜𑀸𑀢𑀸?

𑁧𑁦𑁩𑁭. 𑀭𑀽𑀧𑀓𑁆𑀔𑀦𑁆𑀥𑁄 𑀲𑀺𑀬𑀸 𑀤𑀺𑀝𑁆𑀞𑁄, 𑀲𑀺𑀬𑀸 𑀲𑀼𑀢𑁄, 𑀲𑀺𑀬𑀸 𑀫𑀼𑀢𑁄, 𑀲𑀺𑀬𑀸 𑀯𑀺𑀜𑁆𑀜𑀸𑀢𑁄, 𑀲𑀺𑀬𑀸 𑀦 𑀤𑀺𑀝𑁆𑀞𑁄 𑀦 𑀲𑀼𑀢𑁄 𑀦 𑀫𑀼𑀢𑁄, 𑀯𑀺𑀜𑁆𑀜𑀸𑀢𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸.

𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁, 𑀦 𑀲𑀼𑀢𑀁 𑀦 𑀫𑀼𑀢𑀁, 𑀯𑀺𑀜𑁆𑀜𑀸𑀢𑀁. 𑀲𑀤𑁆𑀤𑀸𑀬𑀢𑀦𑀁 𑀦 𑀤𑀺𑀝𑁆𑀞𑀁, 𑀲𑀼𑀢𑀁, 𑀦 𑀫𑀼𑀢𑀁, 𑀯𑀺𑀜𑁆𑀜𑀸𑀢𑀁. 𑀕𑀦𑁆𑀥𑀸𑀬𑀢𑀦𑀁… 𑀭𑀲𑀸𑀬𑀢𑀦𑀁… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀦 𑀤𑀺𑀝𑁆𑀞𑀁 𑀦 𑀲𑀼𑀢𑀁, 𑀫𑀼𑀢𑀁, 𑀯𑀺𑀜𑁆𑀜𑀸𑀢𑀁. 𑀲𑀢𑁆𑀢𑀸𑀬𑀢𑀦𑀸 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸.

𑀭𑀽𑀧𑀥𑀸𑀢𑀼 𑀤𑀺𑀝𑁆𑀞𑀸, 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀲𑀤𑁆𑀤𑀥𑀸𑀢𑀼 𑀦 𑀤𑀺𑀝𑁆𑀞𑀸, 𑀲𑀼𑀢𑀸, 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀕𑀦𑁆𑀥𑀥𑀸𑀢𑀼… 𑀭𑀲𑀥𑀸𑀢𑀼… 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸, 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀢𑁂𑀭𑀲 𑀥𑀸𑀢𑀼𑀬𑁄 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸.

𑀢𑀻𑀡𑀺 𑀲𑀘𑁆𑀘𑀸𑀦𑀺 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀤𑀺𑀝𑁆𑀞𑀁, 𑀲𑀺𑀬𑀸 𑀲𑀼𑀢𑀁, 𑀲𑀺𑀬𑀸 𑀫𑀼𑀢𑀁, 𑀲𑀺𑀬𑀸 𑀯𑀺𑀜𑁆𑀜𑀸𑀢𑀁, 𑀲𑀺𑀬𑀸 𑀦 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑀦 𑀫𑀼𑀢𑀁, 𑀯𑀺𑀜𑁆𑀜𑀸𑀢𑀁.

𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀦𑀯 𑀳𑁂𑀢𑀽 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀲𑀢𑁆𑀢 𑀨𑀲𑁆𑀲𑀸 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸. 𑀲𑀢𑁆𑀢 𑀯𑁂𑀤𑀦𑀸… 𑀲𑀢𑁆𑀢 𑀲𑀜𑁆𑀜𑀸… 𑀲𑀢𑁆𑀢 𑀘𑁂𑀢𑀦𑀸… 𑀲𑀢𑁆𑀢 𑀘𑀺𑀢𑁆𑀢𑀸 𑀦 𑀤𑀺𑀝𑁆𑀞𑀸 𑀦 𑀲𑀼𑀢𑀸 𑀦 𑀫𑀼𑀢𑀸, 𑀯𑀺𑀜𑁆𑀜𑀸𑀢𑀸.