𑁭. 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀸𑀭𑁄

𑁧𑁦𑁩𑁦. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀸, 𑀓𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀓𑀢𑀺 𑀧𑀳𑀸𑀢𑀩𑁆𑀩𑀸, 𑀓𑀢𑀺 𑀪𑀸𑀯𑁂𑀢𑀩𑁆𑀩𑀸, 𑀓𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀓𑀢𑀺 𑀦 𑀧𑀳𑀸𑀢𑀩𑁆𑀩𑀸, 𑀦 𑀪𑀸𑀯𑁂𑀢𑀩𑁆𑀩𑀸, 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸…𑀧𑁂… 𑀲𑀢𑁆𑀢𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀓𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀸, 𑀓𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀓𑀢𑀺 𑀧𑀳𑀸𑀢𑀩𑁆𑀩𑀸, 𑀓𑀢𑀺 𑀪𑀸𑀯𑁂𑀢𑀩𑁆𑀩𑀸, 𑀓𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀓𑀢𑀺 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸?

𑁧𑁦𑁩𑁧. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀪𑀺𑀜𑁆𑀜𑁂𑀬𑁆𑀬𑁄 𑀧𑀭𑀺𑀜𑁆𑀜𑁂𑀬𑁆𑀬𑁄 𑀦 𑀧𑀳𑀸𑀢𑀩𑁆𑀩𑁄 𑀦 𑀪𑀸𑀯𑁂𑀢𑀩𑁆𑀩𑁄 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

𑀤𑀲𑀸𑀬𑀢𑀦𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀤𑁆𑀯𑁂 𑀆𑀬𑀢𑀦𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

𑀲𑁄𑀴𑀲 𑀥𑀸𑀢𑀼𑀬𑁄 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀤𑁆𑀯𑁂 𑀥𑀸𑀢𑀼𑀬𑁄 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

𑀲𑀫𑀼𑀤𑀬𑀲𑀘𑁆𑀘𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀳𑀸𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀫𑀕𑁆𑀕𑀲𑀘𑁆𑀘𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀦 𑀧𑀳𑀸𑀢𑀩𑁆𑀩𑀁 𑀪𑀸𑀯𑁂𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀦 𑀧𑀳𑀸𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀁, 𑀦 𑀪𑀸𑀯𑁂𑀢𑀩𑁆𑀩𑀁, 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀁.

𑀦𑀯𑀺𑀦𑁆𑀤𑁆𑀭𑀺𑀬𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀳𑀸𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀦 𑀧𑀳𑀸𑀢𑀩𑁆𑀩𑀁 𑀪𑀸𑀯𑁂𑀢𑀩𑁆𑀩𑀁 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀦 𑀧𑀳𑀸𑀢𑀩𑁆𑀩𑀁, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀁, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀪𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀦 𑀧𑀳𑀸𑀢𑀩𑁆𑀩𑀁 𑀦 𑀪𑀸𑀯𑁂𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁. 𑀢𑀻𑀡𑀺𑀦𑁆𑀤𑁆𑀭𑀺𑀬𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀪𑀸𑀯𑁂𑀢𑀩𑁆𑀩𑀸, 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀙 𑀇𑀦𑁆𑀤𑁆𑀭𑀺𑀬𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

𑀢𑀬𑁄 𑀅𑀓𑀼𑀲𑀮𑀳𑁂𑀢𑀽 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀢𑀬𑁄 𑀓𑀼𑀲𑀮𑀳𑁂𑀢𑀽 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀪𑀸𑀯𑁂𑀢𑀩𑁆𑀩𑀸. 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀅𑀪𑀺𑀜𑁆𑀜𑁂𑀬𑁆𑀬𑁄 𑀧𑀭𑀺𑀜𑁆𑀜𑁂𑀬𑁆𑀬𑁄 𑀦 𑀧𑀳𑀸𑀢𑀩𑁆𑀩𑁄 𑀦 𑀪𑀸𑀯𑁂𑀢𑀩𑁆𑀩𑁄 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄. 𑀢𑀬𑁄 𑀆𑀳𑀸𑀭𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.

𑀙 𑀨𑀲𑁆𑀲𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑁄 𑀅𑀪𑀺𑀜𑁆𑀜𑁂𑀬𑁆𑀬𑁄 𑀧𑀭𑀺𑀜𑁆𑀜𑁂𑀬𑁆𑀬𑁄, 𑀲𑀺𑀬𑀸 𑀧𑀳𑀸𑀢𑀩𑁆𑀩𑁄, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑁄, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑁄, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑁄 𑀦 𑀪𑀸𑀯𑁂𑀢𑀩𑁆𑀩𑁄 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑁄.

𑀙 𑀯𑁂𑀤𑀦𑀸…𑀧𑁂… 𑀙 𑀲𑀜𑁆𑀜𑀸… 𑀙 𑀘𑁂𑀢𑀦𑀸… 𑀙 𑀘𑀺𑀢𑁆𑀢𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀪𑀺𑀜𑁆𑀜𑁂𑀬𑁆𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀲𑀺𑀬𑀸 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑁂𑀢𑀩𑁆𑀩𑀸, 𑀲𑀺𑀬𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀧𑀳𑀸𑀢𑀩𑁆𑀩𑀸 𑀦 𑀪𑀸𑀯𑁂𑀢𑀩𑁆𑀩𑀸 𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀸.