𑁪. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑁄

(𑁧) 𑀘𑀢𑁆𑀢𑀸𑀭𑁄 𑀆𑀲𑀯𑀸

𑁯𑁩𑁭. 𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸? 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄.

(𑀓) 𑀓𑀸𑀫𑀸𑀲𑀯𑁄

𑀢𑀢𑁆𑀣 𑀓𑀢𑀫𑁄 𑀓𑀸𑀫𑀸𑀲𑀯𑁄? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀸𑀫𑀸𑀲𑀯𑁄’’.

(𑀔) 𑀪𑀯𑀸𑀲𑀯𑁄

𑀢𑀢𑁆𑀣 𑀓𑀢𑀫𑁄 𑀪𑀯𑀸𑀲𑀯𑁄? 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄…𑀧𑁂… 𑀪𑀯𑀚𑁆𑀛𑁄𑀲𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀪𑀯𑀸𑀲𑀯𑁄’’.

(𑀕) 𑀤𑀺𑀝𑁆𑀞𑀸𑀲𑀯𑁄

𑀢𑀢𑁆𑀣 𑀓𑀢𑀫𑁄 𑀤𑀺𑀝𑁆𑀞𑀸𑀲𑀯𑁄? ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸, ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸, ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀯𑀸, ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀯𑀸, ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀸, ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀯𑀸, ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸, ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸, ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸, ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀺𑀝𑁆𑀞𑀸𑀲𑀯𑁄’’. 𑀲𑀩𑁆𑀩𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀸𑀲𑀯𑁄.

(𑀖) 𑀅𑀯𑀺𑀚𑁆𑀚𑀸𑀲𑀯𑁄

𑀢𑀢𑁆𑀣 𑀓𑀢𑀫𑁄 𑀅𑀯𑀺𑀚𑁆𑀚𑀸𑀲𑀯𑁄? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁. 𑀬𑀁 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀯𑀺𑀚𑁆𑀚𑀸𑀲𑀯𑁄’’. 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀲𑀯𑀸.

(𑁨-𑁫) 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸𑀤𑀻

𑁯𑁩𑁮. 𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 …𑀧𑁂… 𑀘𑀢𑁆𑀢𑀸𑀭𑁄 𑀑𑀖𑀸…𑀧𑁂… 𑀘𑀢𑁆𑀢𑀸𑀭𑁄 𑀬𑁄𑀕𑀸…𑀧𑁂… 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺? 𑀓𑀸𑀫𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁.

(𑀓) 𑀓𑀸𑀫𑀼𑀧𑀸𑀤𑀸𑀦𑀁

𑀢𑀢𑁆𑀣 𑀓𑀢𑀫𑀁 𑀓𑀸𑀫𑀼𑀧𑀸𑀤𑀸𑀦𑀁? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄…𑀧𑁂… 𑀓𑀸𑀫𑀚𑁆𑀛𑁄𑀲𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀓𑀸𑀫𑀼𑀧𑀸𑀤𑀸𑀦𑀁’’.

(𑀔) 𑀤𑀺𑀝𑁆𑀞𑀼𑀧𑀸𑀤𑀸𑀦𑀁

𑀢𑀢𑁆𑀣 𑀓𑀢𑀫𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁? ‘‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁…𑀧𑁂… 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’’𑀢𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀺𑀝𑁆𑀞𑀼𑀧𑀸𑀤𑀸𑀦𑀁’’. 𑀞𑀧𑁂𑀢𑁆𑀯𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀜𑁆𑀘 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀜𑁆𑀘 𑀲𑀩𑁆𑀩𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁.

(𑀕) 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁

𑀢𑀢𑁆𑀣 𑀓𑀢𑀫𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁? 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀺 𑀲𑀻𑀮𑀩𑁆𑀩𑀢𑁂𑀦 𑀲𑀼𑀤𑁆𑀥𑀻𑀢𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁’’.

(𑀖) 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁

𑀢𑀢𑁆𑀣 𑀓𑀢𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑁋 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁’’. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺.

(𑁬) 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸

𑁯𑁩𑁯. 𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸? 𑀘𑀻𑀯𑀭𑀳𑁂𑀢𑀼 𑀯𑀸 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀳𑁂𑀢𑀼 𑀯𑀸 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁂𑀦𑀸𑀲𑀦𑀳𑁂𑀢𑀼 𑀯𑀸 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀯𑀸 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸.

(𑁭) 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀬𑀸 𑀏𑀯𑀭𑀽𑀧𑀸 𑀅𑀕𑀢𑀺 𑀅𑀕𑀢𑀺𑀕𑀫𑀦𑀁 𑀙𑀦𑁆𑀤𑀕𑀫𑀦𑀁 𑀯𑀕𑁆𑀕𑀕𑀫𑀦𑀁 𑀯𑀸𑀭𑀺𑀕𑀫𑀦𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺.

(𑁮) 𑀘𑀢𑁆𑀢𑀸𑀭𑁄 𑀯𑀺𑀧𑀭𑀺𑀬𑀸𑀲𑀸

𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀭𑀺𑀬𑀸𑀲𑀸? 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑀸𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑀸𑀲𑁄, 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑀸𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑀸𑀲𑁄, 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑀸𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑀸𑀲𑁄, 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀭𑀺𑀬𑀸𑀲𑁄 𑀘𑀺𑀢𑁆𑀢𑀯𑀺𑀧𑀭𑀺𑀬𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀭𑀺𑀬𑀸𑀲𑁄 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀭𑀺𑀬𑀸𑀲𑀸.

(𑁯) 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸

𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸? 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀺𑀢𑀸, 𑀅𑀲𑁆𑀲𑀼𑀢𑁂 𑀲𑀼𑀢𑀯𑀸𑀤𑀺𑀢𑀸, 𑀅𑀫𑀼𑀢𑁂 𑀫𑀼𑀢𑀯𑀸𑀤𑀺𑀢𑀸, 𑀅𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀯𑀸𑀤𑀺𑀢𑀸 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸.

(𑁧𑁦) 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸

𑀢𑀢𑁆𑀣 𑀓𑀢𑀫𑁂 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸? 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀺𑀢𑀸, 𑀲𑀼𑀢𑁂 𑀅𑀲𑁆𑀲𑀼𑀢𑀯𑀸𑀤𑀺𑀢𑀸, 𑀫𑀼𑀢𑁂 𑀅𑀫𑀼𑀢𑀯𑀸𑀤𑀺𑀢𑀸, 𑀯𑀺𑀜𑁆𑀜𑀸𑀢𑁂 𑀅𑀯𑀺𑀜𑁆𑀜𑀸𑀢𑀯𑀸𑀤𑀺𑀢𑀸 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸.

(𑁧𑁧) 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺? 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀫𑀼𑀲𑀸𑀯𑀸𑀤𑁄 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺.

(𑁧𑁨) 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺? 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀸 𑀯𑀸𑀘𑀸, 𑀨𑀭𑀼𑀲𑀸 𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺.

(𑁧𑁩) 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺? 𑀚𑀸𑀢𑀺𑀪𑀬𑀁, 𑀚𑀭𑀸𑀪𑀬𑀁, 𑀩𑁆𑀬𑀸𑀥𑀺𑀪𑀬𑀁, 𑀫𑀭𑀡𑀪𑀬𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺.

(𑁧𑁪) 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺? 𑀭𑀸𑀚𑀪𑀬𑀁, 𑀘𑁄𑀭𑀪𑀬𑀁, 𑀅𑀕𑁆𑀕𑀺𑀪𑀬𑀁, 𑀉𑀤𑀓𑀪𑀬𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺.

𑀢𑀢𑁆𑀣 𑀓𑀢𑀫𑀸𑀦𑀺 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺? 𑀊𑀫𑀺𑀪𑀬𑀁, 𑀓𑀼𑀫𑁆𑀪𑀻𑀮𑀪𑀬𑀁 [𑀓𑀼𑀫𑁆𑀪𑀻𑀭𑀪𑀬𑀁, 𑀓𑀼𑀫𑁆𑀪𑀻𑀴𑀪𑀬𑀁 (?) (𑀓𑀼𑀫𑁆𑀪 + 𑀈𑀭 + 𑀅 = 𑀪𑀬)], 𑀆𑀯𑀝𑁆𑀝𑀪𑀬𑀁, 𑀲𑀼𑀲𑀼𑀓𑀸𑀪𑀬𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺.

𑀢𑀢𑁆𑀣 𑀓𑀢𑀫𑀸𑀦𑀺 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺? 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁, 𑀧𑀭𑀸𑀦𑀼𑀯𑀸𑀤𑀪𑀬𑀁, 𑀤𑀡𑁆𑀟𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺.

(𑁧𑁫) 𑀘𑀢𑀲𑁆𑀲𑁄 𑀤𑀺𑀝𑁆𑀞𑀺𑀬𑁄

𑀢𑀢𑁆𑀣 𑀓𑀢𑀫𑀸 𑀘𑀢𑀲𑁆𑀲𑁄 𑀤𑀺𑀝𑁆𑀞𑀺𑀬𑁄? ‘‘𑀲𑀬𑀗𑁆𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘‘𑀧𑀭𑀗𑁆𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘‘𑀲𑀬𑀗𑁆𑀓𑀢𑀜𑁆𑀘 𑀧𑀭𑀗𑁆𑀓𑀢𑀜𑁆𑀘 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘‘𑀅𑀲𑀬𑀗𑁆𑀓𑀸𑀭𑀁 𑀅𑀧𑀭𑀗𑁆𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑁋 𑀇𑀫𑀸 𑀘𑀢𑀲𑁆𑀲𑁄 𑀤𑀺𑀝𑁆𑀞𑀺𑀬𑁄.

𑀘𑀢𑀼𑀓𑁆𑀓𑀁.