(𑁯) 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸

𑁯𑁧𑁭. 𑀢𑀢𑁆𑀣 𑀓𑀢𑀫𑀸 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸? 𑀓𑀸𑀫𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸, 𑀅𑀭𑀽𑀧𑀢𑀡𑁆𑀳𑀸.

(𑀓) 𑀢𑀢𑁆𑀣 𑀓𑀢𑀫𑀸 𑀓𑀸𑀫𑀢𑀡𑁆𑀳𑀸? 𑀓𑀸𑀫𑀥𑀸𑀢𑀼𑀧𑀝𑀺𑀲𑀁𑀬𑀼𑀢𑁆𑀢𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀸𑀫𑀢𑀡𑁆𑀳𑀸’’.

(𑀔) 𑀢𑀢𑁆𑀣 𑀓𑀢𑀫𑀸 𑀭𑀽𑀧𑀢𑀡𑁆𑀳𑀸? 𑀭𑀽𑀧𑀥𑀸𑀢𑀼𑀧𑀝𑀺𑀲𑀁𑀬𑀼𑀢𑁆𑀢𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀭𑀽𑀧𑀢𑀡𑁆𑀳𑀸’’.

(𑀕) 𑀢𑀢𑁆𑀣 𑀓𑀢𑀫𑀸 𑀅𑀭𑀽𑀧𑀢𑀡𑁆𑀳𑀸? 𑀅𑀭𑀽𑀧𑀥𑀸𑀢𑀼𑀧𑀝𑀺𑀲𑀁𑀬𑀼𑀢𑁆𑀢𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀭𑀽𑀧𑀢𑀡𑁆𑀳𑀸’’. 𑀇𑀫𑀸 𑀢𑀺𑀲𑁆𑀲𑁄 𑀢𑀡𑁆𑀳𑀸.