(𑁨𑁫. 𑀓) 𑀅𑀭𑀢𑀺

𑁯𑁨𑁬. 𑀢𑀢𑁆𑀣 𑀓𑀢𑀫𑀸 𑀅𑀭𑀢𑀺? 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀅𑀭𑀢𑀺𑀢𑀸 𑀅𑀦𑀪𑀺𑀭𑀢𑀺 𑀅𑀦𑀪𑀺𑀭𑀫𑀡𑀸 𑀉𑀓𑁆𑀓𑀡𑁆𑀞𑀺𑀢𑀸 𑀧𑀭𑀺𑀢𑀲𑁆𑀲𑀺𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀭𑀢𑀺’’.

(𑀔) 𑀯𑀺𑀳𑁂𑀲𑀸

𑀢𑀢𑁆𑀣 𑀓𑀢𑀫𑀸 𑀯𑀺𑀳𑁂𑀲𑀸? 𑀇𑀥𑁂𑀓𑀘𑁆𑀘𑁄 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀲𑀢𑁆𑀢𑁂 𑀯𑀺𑀳𑁂𑀞𑁂𑀢𑀺, 𑀬𑀸 𑀏𑀯𑀭𑀽𑀧𑀸 𑀳𑁂𑀞𑀦𑀸 𑀯𑀺𑀳𑁂𑀞𑀦𑀸 𑀳𑀺𑀁𑀲𑀦𑀸 𑀯𑀺𑀳𑀺𑀁𑀲𑀦𑀸 𑀭𑁄𑀲𑀦𑀸 𑀯𑀺𑀭𑁄𑀲𑀦𑀸 𑀧𑀭𑀽𑀧𑀖𑀸𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀯𑀺𑀳𑁂𑀲𑀸’’.

(𑀕) 𑀅𑀥𑀫𑁆𑀫𑀘𑀭𑀺𑀬𑀸

𑀢𑀢𑁆𑀣 𑀓𑀢𑀫𑀸 𑀅𑀥𑀫𑁆𑀫𑀘𑀭𑀺𑀬𑀸? 𑀓𑀸𑀬𑁂𑀦 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸, 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸, 𑀫𑀦𑀲𑀸 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀥𑀫𑁆𑀫𑀘𑀭𑀺𑀬𑀸’’.