𑁪. 𑀉𑀧𑁂𑀓𑁆𑀔𑀸

𑁬𑁭𑁩. 𑀓𑀣𑀜𑁆𑀘 𑀪𑀺𑀓𑁆𑀔𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀁 𑀦𑁂𑀯 𑀫𑀦𑀸𑀧𑀁 𑀦 𑀅𑀫𑀦𑀸𑀧𑀁 𑀤𑀺𑀲𑁆𑀯𑀸 𑀉𑀧𑁂𑀓𑁆𑀔𑀓𑁄 𑀅𑀲𑁆𑀲, 𑀏𑀯𑀫𑁂𑀯 𑀲𑀩𑁆𑀩𑁂 𑀲𑀢𑁆𑀢𑁂 𑀉𑀧𑁂𑀓𑁆𑀔𑀸𑀬 𑀨𑀭𑀢𑀺.

𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀬𑀸 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀬𑀦𑀸 𑀉𑀧𑁂𑀓𑁆𑀔𑀸𑀬𑀺𑀢𑀢𑁆𑀢𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸’’.

𑀢𑀢𑁆𑀣 𑀓𑀢𑀫𑀁 𑀘𑀺𑀢𑁆𑀢𑀁? 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀺𑀢𑁆𑀢𑀁’’. 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺.

𑁬𑁭𑁪. ‘‘𑀏𑀓𑀁 𑀤𑀺𑀲’’𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀤𑀺𑀲𑀁 𑀉𑀢𑁆𑀢𑀭𑀁 𑀯𑀸 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀯𑀸 𑀤𑀺𑀲𑀁 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀢𑀺𑀭𑀺𑀬𑀁 𑀯𑀸 𑀯𑀺𑀤𑀺𑀲𑀁 𑀯𑀸.

𑁬𑁭𑁫. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁭𑁬. ‘‘𑀯𑀺𑀳𑀭𑀢𑀻’’𑀢𑀺…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁬𑁭𑁭. ‘‘𑀢𑀣𑀸 𑀤𑀼𑀢𑀺𑀬’’𑀦𑁆𑀢𑀺 𑀬𑀣𑁂𑀯 𑀏𑀓𑀁 𑀤𑀺𑀲𑀁 𑀢𑀣𑀸 𑀤𑀼𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀢𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀘𑀢𑀼𑀢𑁆𑀣𑀁 𑀤𑀺𑀲𑀁 𑀢𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄 𑀢𑀣𑀸 𑀢𑀺𑀭𑀺𑀬𑀁 𑀢𑀣𑀸 𑀯𑀺𑀤𑀺𑀲𑀁.

𑁬𑁭𑁮. ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁. 𑀧𑀭𑀺𑀬𑀸𑀤𑀸𑀬𑀯𑀘𑀦𑀫𑁂𑀢𑀁 𑁋 ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺.

𑁬𑁭𑁯. ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺, 𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀬𑀸 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀬𑀦𑀸 𑀉𑀧𑁂𑀓𑁆𑀔𑀸𑀬𑀺𑀢𑀢𑁆𑀢𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸’’.

𑀢𑀢𑁆𑀣 𑀓𑀢𑀫𑀁 𑀘𑀺𑀢𑁆𑀢𑀁? 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀺𑀢𑁆𑀢𑀁’’. 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺.

𑁬𑁮𑁦. ‘‘𑀯𑀺𑀧𑀼𑀮𑁂𑀦𑀸’’𑀢𑀺 𑀬𑀁 𑀯𑀺𑀧𑀼𑀮𑀁 𑀢𑀁 𑀫𑀳𑀕𑁆𑀕𑀢𑀁, 𑀬𑀁 𑀫𑀳𑀕𑁆𑀕𑀢𑀁 𑀢𑀁 𑀅𑀧𑁆𑀧𑀫𑀸𑀡𑀁, 𑀬𑀁 𑀅𑀧𑁆𑀧𑀫𑀸𑀡𑀁 𑀲𑁄 𑀅𑀯𑁂𑀭𑁄, 𑀬𑁄 𑀅𑀯𑁂𑀭𑁄 𑀲𑁄 𑀅𑀩𑁆𑀬𑀸𑀧𑀚𑁆𑀚𑁄.

𑁬𑁮𑁧. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁮𑁨. ‘‘𑀯𑀺𑀳𑀭𑀢𑀻’’𑀢𑀺…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁.