𑁧𑁩. 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑁬𑁪𑁨. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑁋 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁 [𑀘𑀢𑀼𑀢𑁆𑀣𑀺𑀁 (𑀲𑀻.)]. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀲𑀻. 𑀲𑁆𑀬𑀸.)] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

𑁧. 𑀫𑁂𑀢𑁆𑀢𑀸

𑁬𑁪𑁩. 𑀓𑀣𑀜𑁆𑀘 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀁 𑀧𑀺𑀬𑀁 𑀫𑀦𑀸𑀧𑀁 𑀤𑀺𑀲𑁆𑀯𑀸 𑀫𑁂𑀢𑁆𑀢𑀸𑀬𑁂𑀬𑁆𑀬, 𑀏𑀯𑀫𑁂𑀯 𑀲𑀩𑁆𑀩𑁂 𑀲𑀢𑁆𑀢𑁂 𑀫𑁂𑀢𑁆𑀢𑀸𑀬 𑀨𑀭𑀢𑀺.

𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀬𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’.

𑀢𑀢𑁆𑀣 𑀓𑀢𑀫𑀁 𑀘𑀺𑀢𑁆𑀢𑀁? 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀺𑀢𑁆𑀢𑀁’’. 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀸𑀬 𑀫𑁂𑀢𑁆𑀢𑀸𑀬 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺.

𑁬𑁪𑁪. ‘‘𑀏𑀓𑀁 𑀤𑀺𑀲’’𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀤𑀺𑀲𑀁 𑀉𑀢𑁆𑀢𑀭𑀁 𑀯𑀸 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀯𑀸 𑀤𑀺𑀲𑀁 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀢𑀺𑀭𑀺𑀬𑀁 𑀯𑀸 𑀯𑀺𑀤𑀺𑀲𑀁 𑀯𑀸.

𑁬𑁪𑁫. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁪𑁬. ‘‘𑀯𑀺𑀳𑀭𑀢𑀻’’𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁬𑁪𑁭. ‘‘𑀢𑀣𑀸 𑀤𑀼𑀢𑀺𑀬’’𑀦𑁆𑀢𑀺 𑀬𑀣𑁂𑀯 𑀏𑀓𑀁 𑀤𑀺𑀲𑀁 𑀢𑀣𑀸 𑀤𑀼𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀢𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀘𑀢𑀼𑀢𑁆𑀣𑀁 𑀤𑀺𑀲𑀁 𑀢𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄 𑀢𑀣𑀸 𑀢𑀺𑀭𑀺𑀬𑀁 𑀢𑀣𑀸 𑀯𑀺𑀤𑀺𑀲𑀁.

𑁬𑁪𑁮. ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁. 𑀧𑀭𑀺𑀬𑀸𑀤𑀸𑀬𑀯𑀘𑀦𑀫𑁂𑀢𑀁 𑁋 ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺.

𑁬𑁪𑁯. ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀬𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’.

𑀢𑀢𑁆𑀣 𑀓𑀢𑀫𑀁 𑀘𑀺𑀢𑁆𑀢𑀁? 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀺𑀢𑁆𑀢𑀁’’. 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀸𑀬 𑀫𑁂𑀢𑁆𑀢𑀸𑀬 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺.

𑁬𑁫𑁦. ‘‘𑀯𑀺𑀧𑀼𑀮𑁂𑀦𑀸’’𑀢𑀺 𑀬𑀁 𑀯𑀺𑀧𑀼𑀮𑀁 𑀢𑀁 𑀫𑀳𑀕𑁆𑀕𑀢𑀁, 𑀬𑀁 𑀫𑀳𑀕𑁆𑀕𑀢𑀁 𑀢𑀁 𑀅𑀧𑁆𑀧𑀫𑀸𑀡𑀁, 𑀬𑀁 𑀅𑀧𑁆𑀧𑀫𑀸𑀡𑀁 𑀲𑁄 𑀅𑀯𑁂𑀭𑁄, 𑀬𑁄 𑀅𑀯𑁂𑀭𑁄 𑀲𑁄 𑀅𑀩𑁆𑀬𑀸𑀧𑀚𑁆𑀚𑁄 [𑀅𑀩𑁆𑀬𑀸𑀧𑀚𑁆𑀛𑁄 (𑀲𑀻. 𑀲𑁆𑀬𑀸.)].

𑁬𑁫𑁧. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁫𑁨. ‘‘𑀯𑀺𑀳𑀭𑀢𑀻’’𑀢𑀺…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁨. 𑀓𑀭𑀼𑀡𑀸

𑁬𑁫𑁩. 𑀓𑀣𑀜𑁆𑀘 𑀪𑀺𑀓𑁆𑀔𑀼 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀁 𑀤𑀼𑀕𑁆𑀕𑀢𑀁 𑀤𑀼𑀭𑀽𑀧𑁂𑀢𑀁 𑀤𑀺𑀲𑁆𑀯𑀸 𑀓𑀭𑀼𑀡𑀸𑀬𑁂𑀬𑁆𑀬, 𑀏𑀯𑀫𑁂𑀯 𑀲𑀩𑁆𑀩𑁂 𑀲𑀢𑁆𑀢𑁂 𑀓𑀭𑀼𑀡𑀸𑀬 𑀨𑀭𑀢𑀺.

𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸? 𑀬𑀸 𑀲𑀢𑁆𑀢𑁂𑀲𑀼 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’.

𑀢𑀢𑁆𑀣 𑀓𑀢𑀫𑀁 𑀘𑀺𑀢𑁆𑀢𑀁? 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀺𑀢𑁆𑀢𑀁’’. 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀸𑀬 𑀓𑀭𑀼𑀡𑀸𑀬 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺.

𑁬𑁫𑁪. ‘‘𑀏𑀓𑀁 𑀤𑀺𑀲’’𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀤𑀺𑀲𑀁 𑀉𑀢𑁆𑀢𑀭𑀁 𑀯𑀸 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀯𑀸 𑀤𑀺𑀲𑀁 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀢𑀺𑀭𑀺𑀬𑀁 𑀯𑀸 𑀯𑀺𑀤𑀺𑀲𑀁 𑀯𑀸.

𑁬𑁫𑁫. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁫𑁬. ‘‘𑀯𑀺𑀳𑀭𑀢𑀻’’𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁬𑁫𑁭. ‘‘𑀢𑀣𑀸 𑀤𑀼𑀢𑀺𑀬’’𑀦𑁆𑀢𑀺 𑀬𑀣𑁂𑀯 𑀏𑀓𑀁 𑀤𑀺𑀲𑀁 𑀢𑀣𑀸 𑀤𑀼𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀢𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀘𑀢𑀼𑀢𑁆𑀣𑀁 𑀤𑀺𑀲𑀁 𑀢𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄 𑀢𑀣𑀸 𑀢𑀺𑀭𑀺𑀬𑀁 𑀢𑀣𑀸 𑀯𑀺𑀤𑀺𑀲𑀁.

𑁬𑁫𑁮. ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁. 𑀧𑀭𑀺𑀬𑀸𑀤𑀸𑀬𑀯𑀘𑀦𑀫𑁂𑀢𑀁 𑁋 ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺.

𑁬𑁫𑁯. ‘‘𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸? 𑀬𑀸 𑀲𑀢𑁆𑀢𑁂𑀲𑀼 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’.

𑁬𑁬𑁦. ‘‘𑀯𑀺𑀧𑀼𑀮𑁂𑀦𑀸’’𑀢𑀺 𑀬𑀁 𑀯𑀺𑀧𑀼𑀮𑀁 𑀢𑀁 𑀫𑀳𑀕𑁆𑀕𑀢𑀁, 𑀬𑀁 𑀫𑀳𑀕𑁆𑀕𑀢𑀁 𑀢𑀁 𑀅𑀧𑁆𑀧𑀫𑀸𑀡𑀁, 𑀬𑀁 𑀅𑀧𑁆𑀧𑀫𑀸𑀡𑀁 𑀲𑁄 𑀅𑀯𑁂𑀭𑁄, 𑀬𑁄 𑀅𑀯𑁂𑀭𑁄 𑀲𑁄 𑀅𑀩𑁆𑀬𑀸𑀧𑀚𑁆𑀚𑁄.

𑁬𑁬𑁧. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁬𑁨. ‘‘𑀯𑀺𑀳𑀭𑀢𑀻’’𑀢𑀺…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁩. 𑀫𑀼𑀤𑀺𑀢𑀸

𑁬𑁬𑁩. 𑀓𑀣𑀜𑁆𑀘 𑀪𑀺𑀓𑁆𑀔𑀼 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀁 𑀧𑀺𑀬𑀁 𑀫𑀦𑀸𑀧𑀁 𑀤𑀺𑀲𑁆𑀯𑀸 𑀫𑀼𑀤𑀺𑀢𑁄 𑀅𑀲𑁆𑀲, 𑀏𑀯𑀫𑁂𑀯 𑀲𑀩𑁆𑀩𑁂 𑀲𑀢𑁆𑀢𑁂 𑀫𑀼𑀤𑀺𑀢𑀸𑀬 𑀨𑀭𑀢𑀺.

𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸? 𑀬𑀸 𑀲𑀢𑁆𑀢𑁂𑀲𑀼 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’.

𑀢𑀢𑁆𑀣 𑀓𑀢𑀫𑀁 𑀘𑀺𑀢𑁆𑀢𑀁? 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀺𑀢𑁆𑀢𑀁’’. 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀸𑀬 𑀫𑀼𑀤𑀺𑀢𑀸𑀬 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺.

𑁬𑁬𑁪. ‘‘𑀏𑀓𑀁 𑀤𑀺𑀲’’𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀤𑀺𑀲𑀁 𑀉𑀢𑁆𑀢𑀭𑀁 𑀯𑀸 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀯𑀸 𑀤𑀺𑀲𑀁 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀢𑀺𑀭𑀺𑀬𑀁 𑀯𑀸 𑀯𑀺𑀤𑀺𑀲𑀁 𑀯𑀸.

𑁬𑁬𑁫. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁬𑁬. ‘‘𑀯𑀺𑀳𑀭𑀢𑀻’’𑀢𑀺…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁬𑁬𑁭. ‘‘𑀢𑀣𑀸 𑀤𑀼𑀢𑀺𑀬’’𑀦𑁆𑀢𑀺 𑀬𑀣𑁂𑀯 𑀏𑀓𑀁 𑀤𑀺𑀲𑀁 𑀢𑀣𑀸 𑀤𑀼𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀢𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀘𑀢𑀼𑀢𑁆𑀣𑀁 𑀤𑀺𑀲𑀁 𑀢𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄 𑀢𑀣𑀸 𑀢𑀺𑀭𑀺𑀬𑀁 𑀢𑀣𑀸 𑀯𑀺𑀤𑀺𑀲𑀁.

𑁬𑁬𑁮. ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁. 𑀧𑀭𑀺𑀬𑀸𑀤𑀸𑀬𑀯𑀘𑀦𑀫𑁂𑀢𑀁 𑁋 ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺.

𑁬𑁬𑁯. ‘‘𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸? 𑀬𑀸 𑀲𑀢𑁆𑀢𑁂𑀲𑀼 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’.

𑁬𑁭𑁦. ‘‘𑀯𑀺𑀧𑀼𑀮𑁂𑀦𑀸’’𑀢𑀺 𑀬𑀁 𑀯𑀺𑀧𑀼𑀮𑀁 𑀢𑀁 𑀫𑀳𑀕𑁆𑀕𑀢𑀁, 𑀬𑀁 𑀫𑀳𑀕𑁆𑀕𑀢𑀁 𑀢𑀁 𑀅𑀧𑁆𑀧𑀫𑀸𑀡𑀁, 𑀬𑀁 𑀅𑀧𑁆𑀧𑀫𑀸𑀡𑀁 𑀲𑁄 𑀅𑀯𑁂𑀭𑁄, 𑀬𑁄 𑀅𑀯𑁂𑀭𑁄 𑀲𑁄 𑀅𑀩𑁆𑀬𑀸𑀧𑀚𑁆𑀚𑁄.

𑁬𑁭𑁧. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁭𑁨. ‘‘𑀯𑀺𑀳𑀭𑀢𑀻’’𑀢𑀺 …𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁪. 𑀉𑀧𑁂𑀓𑁆𑀔𑀸

𑁬𑁭𑁩. 𑀓𑀣𑀜𑁆𑀘 𑀪𑀺𑀓𑁆𑀔𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺? 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀏𑀓𑀁 𑀧𑀼𑀕𑁆𑀕𑀮𑀁 𑀦𑁂𑀯 𑀫𑀦𑀸𑀧𑀁 𑀦 𑀅𑀫𑀦𑀸𑀧𑀁 𑀤𑀺𑀲𑁆𑀯𑀸 𑀉𑀧𑁂𑀓𑁆𑀔𑀓𑁄 𑀅𑀲𑁆𑀲, 𑀏𑀯𑀫𑁂𑀯 𑀲𑀩𑁆𑀩𑁂 𑀲𑀢𑁆𑀢𑁂 𑀉𑀧𑁂𑀓𑁆𑀔𑀸𑀬 𑀨𑀭𑀢𑀺.

𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀬𑀸 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀬𑀦𑀸 𑀉𑀧𑁂𑀓𑁆𑀔𑀸𑀬𑀺𑀢𑀢𑁆𑀢𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸’’.

𑀢𑀢𑁆𑀣 𑀓𑀢𑀫𑀁 𑀘𑀺𑀢𑁆𑀢𑀁? 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀺𑀢𑁆𑀢𑀁’’. 𑀇𑀤𑀁 𑀘𑀺𑀢𑁆𑀢𑀁 𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀲𑀳𑀕𑀢𑀁 𑀳𑁄𑀢𑀺 𑀲𑀳𑀚𑀸𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺.

𑁬𑁭𑁪. ‘‘𑀏𑀓𑀁 𑀤𑀺𑀲’’𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀁 𑀯𑀸 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀤𑀺𑀲𑀁 𑀉𑀢𑁆𑀢𑀭𑀁 𑀯𑀸 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀯𑀸 𑀤𑀺𑀲𑀁 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀢𑀺𑀭𑀺𑀬𑀁 𑀯𑀸 𑀯𑀺𑀤𑀺𑀲𑀁 𑀯𑀸.

𑁬𑁭𑁫. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁭𑁬. ‘‘𑀯𑀺𑀳𑀭𑀢𑀻’’𑀢𑀺…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑁬𑁭𑁭. ‘‘𑀢𑀣𑀸 𑀤𑀼𑀢𑀺𑀬’’𑀦𑁆𑀢𑀺 𑀬𑀣𑁂𑀯 𑀏𑀓𑀁 𑀤𑀺𑀲𑀁 𑀢𑀣𑀸 𑀤𑀼𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀢𑀢𑀺𑀬𑀁 𑀤𑀺𑀲𑀁 𑀢𑀣𑀸 𑀘𑀢𑀼𑀢𑁆𑀣𑀁 𑀤𑀺𑀲𑀁 𑀢𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄 𑀢𑀣𑀸 𑀢𑀺𑀭𑀺𑀬𑀁 𑀢𑀣𑀸 𑀯𑀺𑀤𑀺𑀲𑀁.

𑁬𑁭𑁮. ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁. 𑀧𑀭𑀺𑀬𑀸𑀤𑀸𑀬𑀯𑀘𑀦𑀫𑁂𑀢𑀁 𑁋 ‘‘𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓’’𑀦𑁆𑀢𑀺.

𑁬𑁭𑁯. ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺, 𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀬𑀸 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀬𑀦𑀸 𑀉𑀧𑁂𑀓𑁆𑀔𑀸𑀬𑀺𑀢𑀢𑁆𑀢𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸’’.

𑁬𑁮𑁦. ‘‘𑀯𑀺𑀧𑀼𑀮𑁂𑀦𑀸’’𑀢𑀺 𑀬𑀁 𑀯𑀺𑀧𑀼𑀮𑀁 𑀢𑀁 𑀫𑀳𑀕𑁆𑀕𑀢𑀁, 𑀬𑀁 𑀫𑀳𑀕𑁆𑀕𑀢𑀁 𑀢𑀁 𑀅𑀧𑁆𑀧𑀫𑀸𑀡𑀁, 𑀬𑀁 𑀅𑀧𑁆𑀧𑀫𑀸𑀡𑀁 𑀲𑁄 𑀅𑀯𑁂𑀭𑁄, 𑀬𑁄 𑀅𑀯𑁂𑀭𑁄 𑀲𑁄 𑀅𑀩𑁆𑀬𑀸𑀧𑀚𑁆𑀚𑁄.

𑁬𑁮𑁧. ‘‘𑀨𑀭𑀺𑀢𑁆𑀯𑀸’’𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁮𑁨. ‘‘𑀯𑀺𑀳𑀭𑀢𑀻’’𑀢𑀺…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀯𑀺𑀳𑀭𑀢𑀻’’𑀢𑀺.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁

𑁬𑁮𑁩. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑁋 𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸.

𑁬𑁮𑁪. 𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁮𑁫. 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁮𑁬. 𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁮𑁭. 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁮𑁮. 𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀢𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁮𑁯. 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀢𑀓𑁆𑀓𑀁 𑀯𑀺𑀘𑀸𑀭𑀫𑀢𑁆𑀢𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁯𑁦. 𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀬𑀦𑀸 𑀉𑀧𑁂𑀓𑁆𑀔𑀸𑀬𑀺𑀢𑀢𑁆𑀢𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁯𑁧. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑁋 𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸.

𑁬𑁯𑁨. 𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁯𑁩. 𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀓𑀭𑀼𑀡𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀭𑀼𑀡𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀓𑀭𑀼𑀡𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁯𑁪. 𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑀼𑀤𑀺𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀤𑀺𑀢𑀸 𑀫𑀼𑀤𑀺𑀢𑀸𑀬𑀦𑀸 𑀫𑀼𑀤𑀺𑀢𑀸𑀬𑀺𑀢𑀢𑁆𑀢𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀼𑀤𑀺𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑀼𑀤𑀺𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁯𑁫. 𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀬𑀦𑀸 𑀉𑀧𑁂𑀓𑁆𑀔𑀸𑀬𑀺𑀢𑀢𑁆𑀢𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁯𑁬. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑁋 𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸.

𑁬𑁯𑁭. 𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀢𑀢𑁆𑀣 𑀓𑀢𑀫𑀸 𑀫𑁂𑀢𑁆𑀢𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑁂𑀢𑁆𑀢𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁬𑁯𑁮. 𑀢𑀢𑁆𑀣 𑀓𑀢𑀫𑀸 𑀓𑀭𑀼𑀡𑀸…𑀧𑁂… 𑀢𑀢𑁆𑀣 𑀓𑀢𑀫𑀸 𑀫𑀼𑀤𑀺𑀢𑀸…𑀧𑁂… 𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀬𑀦𑀸 𑀉𑀧𑁂𑀓𑁆𑀔𑀸𑀬𑀺𑀢𑀢𑁆𑀢𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀁

𑁬𑁯𑁯. 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑁋 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁, 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

𑁭𑁦𑁦. 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀓𑀢𑀺 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸…𑀧𑁂… 𑀓𑀢𑀺 𑀲𑀭𑀡𑀸, 𑀓𑀢𑀺 𑀅𑀭𑀡𑀸?

𑁧. 𑀢𑀺𑀓𑀁

𑁭𑁦𑁧. 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀉𑀧𑁂𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸. 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸; 𑀉𑀧𑁂𑀓𑁆𑀔𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀲𑀺𑀬𑀸 𑀲𑀼𑀔𑀲𑀳𑀕𑀢𑀸, 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀧𑀻𑀢𑀺𑀲𑀳𑀕𑀢𑀸𑀢𑀺; 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸. 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀲𑀺𑀬𑀸 𑀆𑀘𑀬𑀕𑀸𑀫𑀺𑀦𑁄, 𑀲𑀺𑀬𑀸 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑁄, 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸, 𑀫𑀳𑀕𑁆𑀕𑀢𑀸, 𑀦 𑀯𑀢𑁆𑀢𑀩𑁆𑀩𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺𑀧𑀺, 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸𑀢𑀺𑀧𑀺, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸𑀢𑀺𑀧𑀺. 𑀫𑀚𑁆𑀛𑀺𑀫𑀸, 𑀅𑀦𑀺𑀬𑀢𑀸, 𑀦 𑀯𑀢𑁆𑀢𑀩𑁆𑀩𑀸 𑀫𑀕𑁆𑀕𑀸𑀭𑀫𑁆𑀫𑀡𑀸𑀢𑀺𑀧𑀺, 𑀫𑀕𑁆𑀕𑀳𑁂𑀢𑀼𑀓𑀸𑀢𑀺𑀧𑀺, 𑀫𑀕𑁆𑀕𑀸𑀥𑀺𑀧𑀢𑀺𑀦𑁄𑀢𑀺𑀧𑀺. 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀉𑀧𑁆𑀧𑀸𑀤𑀺𑀦𑁄. 𑀲𑀺𑀬𑀸 𑀅𑀢𑀻𑀢𑀸, 𑀲𑀺𑀬𑀸 𑀅𑀦𑀸𑀕𑀢𑀸, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀦 𑀯𑀢𑁆𑀢𑀩𑁆𑀩𑀸 𑀅𑀢𑀻𑀢𑀸𑀭𑀫𑁆𑀫𑀡𑀸𑀢𑀺𑀧𑀺, 𑀅𑀦𑀸𑀕𑀢𑀸𑀭𑀫𑁆𑀫𑀡𑀸𑀢𑀺𑀧𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺𑀧𑀺. 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸, 𑀲𑀺𑀬𑀸 𑀩𑀳𑀺𑀤𑁆𑀥𑀸, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸.

𑁨. 𑀤𑀼𑀓𑀁

𑁭𑁦𑁨. 𑀫𑁂𑀢𑁆𑀢𑀸 𑀳𑁂𑀢𑀼, 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦 𑀳𑁂𑀢𑀽, 𑀲𑀳𑁂𑀢𑀼𑀓𑀸, 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸. 𑀫𑁂𑀢𑁆𑀢𑀸 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀸 𑀘; 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦 𑀯𑀢𑁆𑀢𑀩𑁆𑀩𑀸 𑀳𑁂𑀢𑀽 𑀘𑁂𑀯 𑀲𑀳𑁂𑀢𑀼𑀓𑀸 𑀘𑀸𑀢𑀺, 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽. 𑀫𑁂𑀢𑁆𑀢𑀸 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘; 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦 𑀯𑀢𑁆𑀢𑀩𑁆𑀩𑀸 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺, 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦 𑀘 𑀳𑁂𑀢𑀽. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦 𑀳𑁂𑀢𑀽 𑀲𑀳𑁂𑀢𑀼𑀓𑀸; 𑀫𑁂𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀸 𑀦 𑀳𑁂𑀢𑀼 𑀲𑀳𑁂𑀢𑀼𑀓𑀸𑀢𑀺𑀧𑀺, 𑀦 𑀳𑁂𑀢𑀼 𑀅𑀳𑁂𑀢𑀼𑀓𑀸𑀢𑀺𑀧𑀺.

𑀲𑀧𑁆𑀧𑀘𑁆𑀘𑀬𑀸, 𑀲𑀗𑁆𑀔𑀢𑀸, 𑀅𑀦𑀺𑀤𑀲𑁆𑀲𑀦𑀸, 𑀅𑀧𑁆𑀧𑀝𑀺𑀖𑀸, 𑀅𑀭𑀽𑀧𑀸, 𑀮𑁄𑀓𑀺𑀬𑀸, 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸, 𑀦𑁄 𑀆𑀲𑀯𑀸, 𑀲𑀸𑀲𑀯𑀸, 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸, 𑀦 𑀯𑀢𑁆𑀢𑀩𑁆𑀩𑀸 𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘𑀸𑀢𑀺, 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸, 𑀦 𑀯𑀢𑁆𑀢𑀩𑁆𑀩𑀸 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺𑀧𑀺, 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸𑀢𑀺𑀧𑀺. 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸.

𑀦𑁄 𑀲𑀁𑀬𑁄𑀚𑀦𑀸…𑀧𑁂… 𑀦𑁄 𑀕𑀦𑁆𑀣𑀸…𑀧𑁂… 𑀦𑁄 𑀑𑀖𑀸…𑀧𑁂… 𑀦𑁄 𑀬𑁄𑀕𑀸…𑀧𑁂… 𑀦𑁄 𑀦𑀻𑀯𑀭𑀡𑀸…𑀧𑁂… 𑀦𑁄 𑀧𑀭𑀸𑀫𑀸𑀲𑀸 …𑀧𑁂… 𑀲𑀸𑀭𑀫𑁆𑀫𑀡𑀸, 𑀦𑁄 𑀘𑀺𑀢𑁆𑀢𑀸, 𑀘𑁂𑀢𑀲𑀺𑀓𑀸, 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀘𑀺𑀢𑁆𑀢𑀲𑀁𑀲𑀝𑁆𑀞𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀘𑀺𑀢𑁆𑀢𑀲𑀳𑀪𑀼𑀦𑁄, 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄, 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸, 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄, 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄, 𑀩𑀸𑀳𑀺𑀭𑀸, 𑀦𑁄 𑀉𑀧𑀸𑀤𑀸, 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀸.

𑀦𑁄 𑀉𑀧𑀸𑀤𑀸𑀦𑀸…𑀧𑁂… 𑀦𑁄 𑀓𑀺𑀮𑁂𑀲𑀸…𑀧𑁂… 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀺𑀬𑀸 𑀲𑀯𑀺𑀢𑀓𑁆𑀓𑀸, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀸; 𑀉𑀧𑁂𑀓𑁆𑀔𑀸 𑀅𑀯𑀺𑀢𑀓𑁆𑀓𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀺𑀬𑀸 𑀲𑀯𑀺𑀘𑀸𑀭𑀸, 𑀲𑀺𑀬𑀸 𑀅𑀯𑀺𑀘𑀸𑀭𑀸; 𑀉𑀧𑁂𑀓𑁆𑀔𑀸 𑀅𑀯𑀺𑀘𑀸𑀭𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀺𑀬𑀸 𑀲𑀧𑁆𑀧𑀻𑀢𑀺𑀓𑀸, 𑀲𑀺𑀬𑀸 𑀅𑀧𑁆𑀧𑀻𑀢𑀺𑀓𑀸; 𑀉𑀧𑁂𑀓𑁆𑀔𑀸 𑀅𑀧𑁆𑀧𑀻𑀢𑀺𑀓𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀲𑀺𑀬𑀸 𑀦 𑀧𑀻𑀢𑀺𑀲𑀳𑀕𑀢𑀸; 𑀉𑀧𑁂𑀓𑁆𑀔𑀸 𑀦 𑀧𑀻𑀢𑀺𑀲𑀳𑀕𑀢𑀸. 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀲𑀼𑀔𑀲𑀳𑀕𑀢𑀸, 𑀉𑀧𑁂𑀓𑁆𑀔𑀸 𑀦 𑀲𑀼𑀔𑀲𑀳𑀕𑀢𑀸. 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀢𑀺𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀦 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀦 𑀅𑀭𑀽𑀧𑀸𑀯𑀘𑀭𑀸, 𑀧𑀭𑀺𑀬𑀸𑀧𑀦𑁆𑀦𑀸, 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀅𑀦𑀺𑀬𑀢𑀸, 𑀲𑀉𑀢𑁆𑀢𑀭𑀸, 𑀅𑀭𑀡𑀸𑀢𑀺.

𑀧𑀜𑁆𑀳𑀸𑀧𑀼𑀘𑁆𑀙𑀓𑀁.

𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄 𑀦𑀺𑀝𑁆𑀞𑀺𑀢𑁄.