𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁭𑁭) 𑁧. 𑀫𑀦𑀼𑀲𑁆𑀲𑀮𑁄𑀓𑀓𑀣𑀸

𑁮𑁦𑁨. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀩𑀼𑀤𑁆𑀥𑀯𑀼𑀢𑁆𑀣𑀸𑀦𑀺 𑀘𑁂𑀢𑀺𑀬𑀸𑀦𑀺 𑀆𑀭𑀸𑀫𑀯𑀺𑀳𑀸𑀭𑀕𑀸𑀫𑀦𑀺𑀕𑀫𑀦𑀕𑀭𑀸𑀦𑀺 𑀭𑀝𑁆𑀞𑀸𑀦𑀺 𑀚𑀦𑀧𑀤𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀩𑀼𑀤𑁆𑀥𑀯𑀼𑀢𑁆𑀣𑀸𑀦𑀺 𑀘𑁂𑀢𑀺𑀬𑀸𑀦𑀺 𑀆𑀭𑀸𑀫𑀯𑀺𑀳𑀸𑀭𑀕𑀸𑀫𑀦𑀺𑀕𑀫𑀦𑀕𑀭𑀸𑀦𑀺 𑀭𑀝𑁆𑀞𑀸𑀦𑀺 𑀚𑀦𑀧𑀤𑀸𑀦𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻’’𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀮𑀼𑀫𑁆𑀩𑀺𑀦𑀺𑀬𑀸 𑀚𑀸𑀢𑁄, 𑀩𑁄𑀥𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀩𑀸𑀭𑀸𑀡𑀲𑀺𑀬𑀁 𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁, 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀆𑀬𑀼𑀲𑀗𑁆𑀔𑀸𑀭𑁄 𑀑𑀲𑁆𑀲𑀝𑁆𑀞𑁄, 𑀓𑀼𑀲𑀺𑀦𑀸𑀭𑀸𑀬𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀪𑀕𑀯𑀸 𑀮𑀼𑀫𑁆𑀩𑀺𑀦𑀺𑀬𑀸 𑀚𑀸𑀢𑁄…𑀧𑁂… 𑀓𑀼𑀲𑀺𑀦𑀸𑀭𑀸𑀬𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻’’𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀸𑀫𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂’’𑀢𑀺 [𑀤𑀻. 𑀦𑀺. 𑁨.𑁯𑁧]; ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀸𑀫𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 [𑀅. 𑀦𑀺. 𑁪.𑁨𑁧]; ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀯𑁂𑀴𑀼𑀯𑀦𑁂 𑀓𑀴𑀦𑁆𑀤𑀓𑀦𑀺𑀯𑀸𑀧𑁂’’𑀢𑀺 [𑀤𑀻. 𑀦𑀺. 𑁨.𑁧𑁮𑁦]; ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀸𑀫𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺; ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬’’𑀦𑁆𑀢𑀺 [𑀤𑀻. 𑀦𑀺. 𑁩.𑁧𑁧]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻𑀢𑀺.

𑁮𑁦𑁩. 𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀮𑁄𑀓𑁂 𑀚𑀸𑀢𑁄, 𑀮𑁄𑀓𑁂 𑀲𑀁𑀯𑀟𑁆𑀠𑁄, 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀺 𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦𑀸𑀢𑀺 [𑀅. 𑀦𑀺. 𑁪.𑁩𑁬]? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀪𑀕𑀯𑀸 𑀮𑁄𑀓𑁂 𑀚𑀸𑀢𑁄, 𑀮𑁄𑀓𑁂 𑀲𑀁𑀯𑀟𑁆𑀠𑁄, 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀺 𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀻’’𑀢𑀺.

𑀫𑀦𑀼𑀲𑁆𑀲𑀮𑁄𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁭𑁮) 𑁨. 𑀥𑀫𑁆𑀫𑀤𑁂𑀲𑀦𑀸𑀓𑀣𑀸

𑁮𑁦𑁪. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺? 𑀆𑀫𑀦𑁆𑀢𑀸. 𑀓𑁂𑀦 𑀤𑁂𑀲𑀺𑀢𑁄𑀢𑀺? 𑀅𑀪𑀺𑀦𑀺𑀫𑁆𑀫𑀺𑀢𑁂𑀦 𑀤𑁂𑀲𑀺𑀢𑁄𑀢𑀺. 𑀅𑀪𑀺𑀦𑀺𑀫𑁆𑀫𑀺𑀢𑁄 𑀚𑀺𑀦𑁄 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀥𑀫𑁆𑀫𑀲𑁆𑀲𑀸𑀫𑀻 𑀥𑀫𑁆𑀫𑀧𑁆𑀧𑀝𑀺𑀲𑀭𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺? 𑀆𑀫𑀦𑁆𑀢𑀸. 𑀓𑁂𑀦 𑀤𑁂𑀲𑀺𑀢𑁄𑀢𑀺? 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀤𑁂𑀲𑀺𑀢𑁄𑀢𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀚𑀺𑀦𑁄 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀥𑀫𑁆𑀫𑀲𑁆𑀲𑀸𑀫𑀻 𑀥𑀫𑁆𑀫𑀧𑁆𑀧𑀝𑀺𑀲𑀭𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁦𑁫. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀁𑀔𑀺𑀢𑁆𑀢𑁂𑀦𑀧𑀺 𑀔𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁; 𑀯𑀺𑀢𑁆𑀣𑀸𑀭𑁂𑀦𑀧𑀺 𑀔𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁; 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦𑀧𑀺 𑀔𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁; 𑀅𑀜𑁆𑀜𑀸𑀢𑀸𑀭𑁄 𑀘 𑀤𑀼𑀮𑁆𑀮𑀪𑀸’’𑀢𑀺 [𑀅. 𑀦𑀺. 𑁩.𑁩𑁩 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑁂]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺.

𑁮𑁦𑁬. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘‘𑀅𑀪𑀺𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀦𑁄 𑀅𑀦𑀪𑀺𑀜𑁆𑀜𑀸𑀬; 𑀲𑀦𑀺𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀦𑁄 𑀅𑀦𑀺𑀤𑀸𑀦𑀁; 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀁; 𑀢𑀲𑁆𑀲 [𑀬𑀜𑁆𑀘𑀲𑁆𑀲 (𑀲𑀻. 𑀧𑀻. 𑀓.)] 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀥𑀫𑁆𑀫𑀁 𑀤𑁂𑀲𑀬𑀢𑁄 𑀦𑁄 𑀅𑀦𑀪𑀺𑀜𑁆𑀜𑀸𑀬, 𑀲𑀦𑀺𑀤𑀸𑀦𑀁 𑀥𑀫𑁆𑀫𑀁 𑀤𑁂𑀲𑀬𑀢𑁄 𑀦𑁄 𑀅𑀦𑀺𑀤𑀸𑀦𑀁, 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑀬𑀢𑁄 𑀦𑁄 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀡𑀻𑀬𑁄 𑀑𑀯𑀸𑀤𑁄 𑀓𑀭𑀡𑀻𑀬𑀸 𑀅𑀦𑀼𑀲𑀸𑀲𑀦𑀻; 𑀅𑀮𑀜𑁆𑀘 𑀧𑀦 𑀯𑁄, 𑀪𑀺𑀓𑁆𑀔𑀯𑁂, 𑀢𑀼𑀝𑁆𑀞𑀺𑀬𑀸 𑀅𑀮𑀁 𑀅𑀢𑁆𑀢𑀫𑀦𑀢𑀸𑀬 𑀅𑀮𑀁 𑀲𑁄𑀫𑀦𑀲𑁆𑀲𑀸𑀬 𑁋 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣𑀸’’𑀢𑀺 [𑀅. 𑀦𑀺. 𑁩.𑁧𑁨𑁬]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺.

𑀥𑀫𑁆𑀫𑀤𑁂𑀲𑀦𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁭𑁯) 𑁩. 𑀓𑀭𑀼𑀡𑀸𑀓𑀣𑀸

𑁮𑁦𑁭. 𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀫𑁂𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀫𑀼𑀤𑀺𑀢𑀸…𑀧𑁂… 𑀉𑀧𑁂𑀓𑁆𑀔𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀫𑁂𑀢𑁆𑀢𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀫𑀼𑀤𑀺𑀢𑀸…𑀧𑁂… 𑀉𑀧𑁂𑀓𑁆𑀔𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺? 𑀆𑀫𑀦𑁆𑀢𑀸. 𑀪𑀕𑀯𑀸 𑀅𑀓𑀸𑀭𑀼𑀡𑀺𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀪𑀕𑀯𑀸 𑀓𑀸𑀭𑀼𑀡𑀺𑀓𑁄 𑀮𑁄𑀓𑀳𑀺𑀢𑁄 𑀮𑁄𑀓𑀸𑀦𑀼𑀓𑀫𑁆𑀧𑀓𑁄 𑀮𑁄𑀓𑀢𑁆𑀣𑀘𑀭𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀪𑀕𑀯𑀸 𑀓𑀸𑀭𑀼𑀡𑀺𑀓𑁄 𑀮𑁄𑀓𑀳𑀺𑀢𑁄 𑀮𑁄𑀓𑀸𑀦𑀼𑀓𑀫𑁆𑀧𑀓𑁄 𑀮𑁄𑀓𑀢𑁆𑀣𑀘𑀭𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸’’𑀢𑀺…𑀧𑁂….

𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀪𑀕𑀯𑀸 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸’’𑀢𑀺.

𑁮𑁦𑁮. 𑀅𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺? 𑀆𑀫𑀦𑁆𑀢𑀸. 𑀪𑀕𑀯𑀸 𑀲𑀭𑀸𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸𑀢𑀺.

𑀓𑀭𑀼𑀡𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁮𑁦) 𑁪. 𑀕𑀦𑁆𑀥𑀚𑀸𑀢𑀺𑀓𑀣𑀸

𑁮𑁦𑁯. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂 𑀕𑀦𑁆𑀥𑀚𑀸𑀢𑁂 𑀅𑀥𑀺𑀕𑁆𑀕𑀡𑁆𑀳𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀪𑀕𑀯𑀸 𑀕𑀦𑁆𑀥𑀪𑁄𑀚𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀪𑀕𑀯𑀸 𑀑𑀤𑀦𑀓𑀼𑀫𑁆𑀫𑀸𑀲𑀁 𑀪𑀼𑀜𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀪𑀕𑀯𑀸 𑀑𑀤𑀦𑀓𑀼𑀫𑁆𑀫𑀸𑀲𑀁 𑀪𑀼𑀜𑁆𑀚𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂 𑀕𑀦𑁆𑀥𑀚𑀸𑀢𑁂 𑀅𑀥𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺.

𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂 𑀕𑀦𑁆𑀥𑀚𑀸𑀢𑁂 𑀅𑀥𑀺𑀕𑁆𑀕𑀡𑁆𑀳𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀦𑁆𑀳𑀸𑀬𑀦𑁆𑀢𑀺 𑀯𑀺𑀮𑀺𑀫𑁆𑀧𑀦𑁆𑀢𑀺 𑀉𑀘𑁆𑀙𑀸𑀤𑁂𑀦𑁆𑀢𑀺 [𑀉𑀘𑁆𑀘𑀸𑀭𑁂𑀦𑁆𑀢𑀺 (𑀲𑀻. 𑀧𑀻. 𑀓.)] 𑀧𑁂𑀴𑀸𑀬 𑀧𑀝𑀺𑀲𑀸𑀫𑁂𑀦𑁆𑀢𑀺 𑀓𑀭𑀡𑁆𑀟𑀸𑀬 𑀦𑀺𑀓𑁆𑀔𑀺𑀧𑀦𑁆𑀢𑀺 𑀆𑀧𑀡𑁂 𑀧𑀲𑀸𑀭𑁂𑀦𑁆𑀢𑀺, 𑀢𑁂𑀦 𑀘 𑀕𑀦𑁆𑀥𑁂𑀦 𑀕𑀦𑁆𑀥𑀓𑀭𑀡𑀻𑀬𑀁 𑀓𑀭𑁄𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀕𑀦𑁆𑀥𑀚𑀸𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁮𑁧) 𑁫. 𑀏𑀓𑀫𑀕𑁆𑀕𑀓𑀣𑀸

𑁮𑁧𑁦. 𑀏𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀘𑀢𑀼𑀦𑁆𑀦𑀁 𑀨𑀲𑁆𑀲𑀸𑀦𑀁…𑀧𑁂… 𑀘𑀢𑀼𑀦𑁆𑀦𑀁 𑀲𑀜𑁆𑀜𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀏𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀓𑀤𑀸𑀕𑀸𑀫𑀺…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀢𑀫𑁂𑀦 𑀫𑀕𑁆𑀕𑁂𑀦𑀸𑀢𑀺? 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀯𑀺𑀘𑀺𑀓𑀺𑀘𑁆𑀙𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀚𑀳𑀢𑀻’’𑀢𑀺.

𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀁 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀁 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀁 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀪𑀸𑀯𑀁 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀁 𑀑𑀴𑀸𑀭𑀺𑀓𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀻’’𑀢𑀺.

𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀁 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀁 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀅𑀦𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀅𑀦𑀸𑀕𑀸𑀫𑀺𑀨𑀮𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀡𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀁 𑀅𑀡𑀼𑀲𑀳𑀕𑀢𑀁 𑀩𑁆𑀬𑀸𑀧𑀸𑀤𑀁 𑀚𑀳𑀢𑀻’’𑀢𑀺.

𑁮𑁧𑁧. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀏𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺? 𑀆𑀫𑀦𑁆𑀢𑀸. 𑀪𑀕𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀪𑀸𑀯𑀺𑀢𑁄𑀢𑀺? 𑀆𑀫𑀦𑁆𑀢𑀸. 𑀪𑀕𑀯𑀸 𑀲𑁄𑀢𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀪𑀕𑀯𑀢𑀸 𑀲𑀓𑀤𑀸𑀕𑀸𑀫𑀺…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀪𑀸𑀯𑀺𑀢𑁄𑀢𑀺? 𑀆𑀫𑀦𑁆𑀢𑀸. 𑀪𑀕𑀯𑀸 𑀅𑀦𑀸𑀕𑀸𑀫𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁧𑁨. 𑀪𑀕𑀯𑀸 𑀏𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺, 𑀲𑀸𑀯𑀓𑀸 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑀸𑀯𑀓𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀤𑀺𑀝𑁆𑀞𑀁 𑀤𑀓𑁆𑀔𑀦𑁆𑀢𑀺 𑀅𑀦𑀥𑀺𑀕𑀢𑀁 𑀅𑀥𑀺𑀕𑀘𑁆𑀙𑀦𑁆𑀢𑀺 𑀅𑀲𑀘𑁆𑀙𑀺𑀓𑀢𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀏𑀓𑀫𑀕𑁆𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁮𑁨) 𑁬. 𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸

𑁮𑁧𑁩. 𑀛𑀸𑀦𑀸 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀧𑀞𑀫𑀸 𑀛𑀸𑀦𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀛𑀸𑀦𑀸 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀸 𑀛𑀸𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀞𑀫𑀸 𑀛𑀸𑀦𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀲𑀸𑀯 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀞𑀫𑀸 𑀛𑀸𑀦𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀺, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀬𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀲𑀸𑀯 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻’’𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀁 𑀛𑀸𑀦𑀁 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀅𑀧𑁆𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀤𑀼𑀢𑀺𑀬𑀁 𑀛𑀸𑀦𑀁 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀤𑀼𑀢𑀺𑀬𑀁 𑀛𑀸𑀦𑀁 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀞𑀫𑀸 𑀛𑀸𑀦𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻’’𑀢𑀺…𑀧𑁂….

𑀧𑀞𑀫𑀸 𑀛𑀸𑀦𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀧𑀞𑀫𑀁 𑀛𑀸𑀦𑀁 𑀓𑀸𑀫𑁂 𑀆𑀤𑀻𑀦𑀯𑀢𑁄 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀁 𑀛𑀸𑀦𑀁 𑀓𑀸𑀫𑁂 𑀆𑀤𑀻𑀦𑀯𑀢𑁄 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀞𑀫𑀁 𑀛𑀸𑀦𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀞𑀫𑀸 𑀛𑀸𑀦𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀜𑁆𑀜𑁂𑀯 𑀧𑀞𑀫𑀁 𑀛𑀸𑀦𑀁 𑀢𑀁 𑀤𑀼𑀢𑀺𑀬𑀁 𑀛𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁧𑁪. 𑀤𑀼𑀢𑀺𑀬𑀸 𑀛𑀸𑀦𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀲𑀸𑀯 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑀼𑀢𑀺𑀬𑀸 𑀛𑀸𑀦𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀺, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀬𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀲𑀸𑀯 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻’’𑀢𑀺? 𑀆𑀫𑀦𑁆𑀢𑀸. 𑀢𑀢𑀺𑀬𑀁 𑀛𑀸𑀦𑀁 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀅𑀧𑁆𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀦𑀦𑀼 𑀢𑀢𑀺𑀬𑀁 𑀛𑀸𑀦𑀁 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀢𑀺𑀬𑀁 𑀛𑀸𑀦𑀁 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀤𑀼𑀢𑀺𑀬𑀸 𑀛𑀸𑀦𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻’’𑀢𑀺.

𑀤𑀼𑀢𑀺𑀬𑀸 𑀛𑀸𑀦𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀁 𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀆𑀤𑀻𑀦𑀯𑀢𑁄 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀢𑀺𑀬𑀁 𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀆𑀤𑀻𑀦𑀯𑀢𑁄 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑀼𑀢𑀺𑀬𑀁 𑀛𑀸𑀦𑀁 𑀲𑀧𑁆𑀧𑀻𑀢𑀺𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀢𑀢𑀺𑀬𑀁 𑀛𑀸𑀦𑀁 𑀲𑀧𑁆𑀧𑀻𑀢𑀺𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑀼𑀢𑀺𑀬𑀸 𑀛𑀸𑀦𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀜𑁆𑀜𑁂𑀯 𑀤𑀼𑀢𑀺𑀬𑀁 𑀛𑀸𑀦𑀁 𑀢𑀁 𑀢𑀢𑀺𑀬𑀁 𑀛𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁧𑁫. 𑀢𑀢𑀺𑀬𑀸 𑀛𑀸𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀬𑀸 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀲𑀸𑀯 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀢𑀢𑀺𑀬𑀸 𑀛𑀸𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀗𑁆𑀓𑀫𑀢𑀺, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀬𑀸 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀲𑀸𑀯 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻’’𑀢𑀺? 𑀆𑀫𑀦𑁆𑀢𑀸. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀅𑀧𑁆𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀢𑀢𑀺𑀬𑀸 𑀛𑀸𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻’’𑀢𑀺.

𑀢𑀢𑀺𑀬𑀸 𑀛𑀸𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀢𑀺𑀬𑀁 𑀛𑀸𑀦𑀁 𑀧𑀻𑀢𑀺𑀁 𑀆𑀤𑀻𑀦𑀯𑀢𑁄 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀧𑀻𑀢𑀺𑀁 𑀆𑀤𑀻𑀦𑀯𑀢𑁄 𑀫𑀦𑀲𑀺𑀓𑀭𑁄𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀢𑀢𑀺𑀬𑀁 𑀛𑀸𑀦𑀁 𑀲𑀼𑀔𑀲𑀳𑀕𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀼𑀔𑀲𑀳𑀕𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑀢𑀺𑀬𑀸 𑀛𑀸𑀦𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀜𑁆𑀜𑁂𑀯 𑀢𑀢𑀺𑀬𑀁 𑀛𑀸𑀦𑀁 𑀢𑀁 𑀘𑀢𑀼𑀢𑁆𑀣𑀁 𑀛𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁧𑁬. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀛𑀸𑀦𑀸 𑀛𑀸𑀦𑀁 𑀲𑀗𑁆𑀓𑀫𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 [𑀅. 𑀦𑀺. 𑁨.𑁧𑁩; 𑁪.𑁧𑁬𑁩]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀛𑀸𑀦𑀸 𑀛𑀸𑀦𑀁 𑀲𑀗𑁆𑀓𑀫𑀢𑀻𑀢𑀺.

𑀛𑀸𑀦𑀲𑀗𑁆𑀓𑀦𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁮𑁩) 𑁭. 𑀛𑀸𑀦𑀦𑁆𑀢𑀭𑀺𑀓𑀓𑀣𑀸

𑁮𑁧𑁭. 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀨𑀲𑁆𑀲𑀦𑁆𑀢𑀭𑀺𑀓𑀸…𑀧𑁂… 𑀅𑀢𑁆𑀣𑀺 𑀲𑀜𑁆𑀜𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸’’𑀢𑀺.

𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸’’𑀢𑀺.

𑁮𑁧𑁮. 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀦𑁆𑀢𑀭𑁂 𑀦𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁧𑁯. 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀦 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀦 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀦 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀦 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁨𑁦. 𑀤𑁆𑀯𑀺𑀦𑁆𑀦𑀁 𑀛𑀸𑀦𑀸𑀦𑀁 𑀧𑀝𑀼𑀧𑁆𑀧𑀦𑁆𑀦𑀸𑀦𑀫𑀦𑁆𑀢𑀭𑁂 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀯𑀺𑀢𑀓𑁆𑀓𑁂 𑀯𑀺𑀘𑀸𑀭𑀫𑀢𑁆𑀢𑁂 𑀲𑀫𑀸𑀥𑀺𑀫𑁆𑀳𑀺 𑀯𑀢𑁆𑀢𑀫𑀸𑀦𑁂 𑀧𑀞𑀫𑀁 𑀛𑀸𑀦𑀁 𑀦𑀺𑀭𑀼𑀤𑁆𑀥𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀧𑀝𑀼𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀯𑀺𑀢𑀓𑁆𑀓𑁂 𑀯𑀺𑀘𑀸𑀭𑀫𑀢𑁆𑀢𑁂 𑀲𑀫𑀸𑀥𑀺𑀫𑁆𑀳𑀺 𑀯𑀢𑁆𑀢𑀫𑀸𑀦𑁂 𑀧𑀞𑀫𑀁 𑀛𑀸𑀦𑀁 𑀦𑀺𑀭𑀼𑀤𑁆𑀥𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀧𑀝𑀼𑀧𑁆𑀧𑀦𑁆𑀦𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀤𑁆𑀯𑀺𑀦𑁆𑀦𑀁 𑀛𑀸𑀦𑀸𑀦𑀁 𑀧𑀝𑀼𑀧𑁆𑀧𑀦𑁆𑀦𑀸𑀦𑀫𑀦𑁆𑀢𑀭𑁂 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺.

𑁮𑁨𑁧. 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀦 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀧𑀞𑀫𑀁 𑀛𑀸𑀦𑀁…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺.

𑁮𑁨𑁨. 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀢𑀬𑁄 𑀲𑀫𑀸𑀥𑀻 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀻𑀢𑀺 [𑀤𑀻. 𑀦𑀺. 𑁩.𑁩𑁦𑁫, 𑁩𑁫𑁩]? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀢𑀬𑁄 𑀲𑀫𑀸𑀥𑀻 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀲𑀯𑀺𑀢𑀓𑁆𑀓𑁄…𑀧𑁂… 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺 𑀛𑀸𑀦𑀦𑁆𑀢𑀭𑀺𑀓𑀸’’𑀢𑀺.

𑀛𑀸𑀦𑀦𑁆𑀢𑀭𑀺𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁮𑁪) 𑁮. 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺𑀓𑀣𑀸

𑁮𑁨𑁩. 𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑀫𑀸𑀧𑀦𑁆𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀲𑁄𑀢𑁂𑀦…𑀧𑁂… 𑀖𑀸𑀦𑁂𑀦…𑀧𑁂… 𑀚𑀺𑀯𑁆𑀳𑀸𑀬…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀲𑀫𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀦𑀦𑀼 𑀲𑀫𑀸𑀥𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀫𑀸𑀥𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺.

𑀲𑀫𑀸𑀥𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲, 𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀫𑀸𑀥𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲, 𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺. 𑀲𑀫𑀸𑀥𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀲𑁆𑀲, 𑀲𑁄𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁…𑀧𑁂… 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁨𑁪. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺.

𑁮𑁨𑁫. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺, 𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀓𑀡𑁆𑀝𑀓𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀅𑀢𑁆𑀣𑀺 𑀢𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺, 𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀧𑀻𑀢𑀺 𑀓𑀡𑁆𑀝𑀓𑁄…𑀧𑁂… 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀓𑀡𑁆𑀝𑀓𑁄 … 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸 𑀓𑀡𑁆𑀝𑀓𑁄… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀓𑀡𑁆𑀝𑀓𑁄… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸 𑀓𑀡𑁆𑀝𑀓𑁄… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀓𑀡𑁆𑀝𑀓𑁄… 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀓𑀡𑁆𑀝𑀓𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀅𑀢𑁆𑀣𑀺 𑀢𑀲𑁆𑀲 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄

(𑁧𑁮𑁫) 𑁯. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺𑀓𑀣𑀸

𑁮𑁨𑁬. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑁂𑀦 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀽𑀧𑁂𑀦 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑁂𑀦 𑀭𑀽𑀧𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀽𑀧𑁂𑀦 𑀭𑀽𑀧𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀘𑀓𑁆𑀔𑀼𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀦𑀢𑁆𑀣𑀺 𑀘𑀓𑁆𑀔𑀼𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑀢𑁆𑀣𑀺 𑀘𑀓𑁆𑀔𑀼𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻’’𑀢𑀺.

𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀻𑀢𑀺…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀻𑀢𑀺…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀻𑀢𑀺…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑁂𑀦 𑀭𑀽𑀧𑀁 𑀨𑀼𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀭𑀽𑀧𑁂𑀦 𑀭𑀽𑀧𑀁 𑀨𑀼𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑁂𑀦 𑀭𑀽𑀧𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀽𑀧𑁂𑀦 𑀭𑀽𑀧𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑀸𑀬𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀦𑀢𑁆𑀣𑀺 𑀓𑀸𑀬𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑀢𑁆𑀣𑀺 𑀓𑀸𑀬𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀻’’𑀢𑀺…𑀧𑁂….

𑁮𑁨𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻’’𑀢𑀺…𑀧𑁂… ‘‘𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀻’’𑀢𑀺 [𑀫. 𑀦𑀺. 𑁧.𑁩𑁪𑁯; 𑀅. 𑀦𑀺. 𑁪.𑁩𑁭 (𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸)]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀻𑀢𑀺.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀸𑀭𑀲𑀫𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑀼𑀤𑁆𑀥𑁄 𑀪𑀕𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀅𑀝𑁆𑀞𑀸𑀲𑀺, 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑀢𑁆𑀣𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀓𑀭𑀼𑀡𑀸, 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂 𑀕𑀦𑁆𑀥𑀚𑀸𑀢𑁂 𑀅𑀥𑀺𑀕𑁆𑀕𑀡𑁆𑀳𑀸𑀢𑀺, 𑀏𑀓𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺, 𑀛𑀸𑀦𑀸 𑀛𑀸𑀦𑀁 𑀲𑀗𑁆𑀓𑀫𑀢𑀺, 𑀅𑀢𑁆𑀣𑀺 𑀛𑀸𑀦𑀦𑁆𑀢𑀭𑀺𑀓𑀸, 𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺.