𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁮𑁬) 𑁧. 𑀓𑀺𑀮𑁂𑀲𑀚𑀳𑀦𑀓𑀣𑀸

𑁮𑁨𑁮. 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀺𑀭𑀼𑀤𑁆𑀥𑀁 𑀦𑀺𑀭𑁄𑀥𑁂𑀢𑀺, 𑀯𑀺𑀕𑀢𑀁 𑀯𑀺𑀕𑀫𑁂𑀢𑀺, 𑀔𑀻𑀡𑀁 𑀔𑁂𑀧𑁂𑀢𑀺, 𑀅𑀢𑁆𑀣𑀗𑁆𑀕𑀢𑀁 𑀅𑀢𑁆𑀣𑀗𑁆𑀕𑀫𑁂𑀢𑀺, 𑀅𑀩𑁆𑀪𑀢𑁆𑀣𑀗𑁆𑀕𑀢𑀁 𑀅𑀩𑁆𑀪𑀢𑁆𑀣𑀗𑁆𑀕𑀫𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺. 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑀻𑀢𑀁 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑀻𑀢𑀁 𑀦𑀢𑁆𑀣𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺.

𑁮𑁨𑁯. 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀚𑀸𑀢𑀁 𑀅𑀚𑀦𑁂𑀢𑀺, 𑀅𑀲𑀜𑁆𑀚𑀸𑀢𑀁 𑀅𑀲𑀜𑁆𑀚𑀦𑁂𑀢𑀺, 𑀅𑀦𑀺𑀩𑁆𑀩𑀢𑁆𑀢𑀁 𑀅𑀦𑀺𑀩𑁆𑀩𑀢𑁆𑀢𑁂𑀢𑀺, 𑀅𑀧𑀸𑀢𑀼𑀪𑀽𑀢𑀁 𑀅𑀧𑀸𑀢𑀼𑀪𑀸𑀯𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀦𑀸𑀕𑀢𑀁 𑀅𑀚𑀸𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀦𑀸𑀕𑀢𑀁 𑀅𑀚𑀸𑀢𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺. 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀦𑀸𑀕𑀢𑀁 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀦𑀸𑀕𑀢𑀁 𑀦𑀢𑁆𑀣𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺.

𑁮𑁩𑁦. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀢𑁆𑀢𑁄 𑀭𑀸𑀕𑀁 𑀚𑀳𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀁 𑀚𑀳𑀢𑀺, 𑀫𑀽𑀴𑁆𑀳𑁄 𑀫𑁄𑀳𑀁 𑀚𑀳𑀢𑀺, 𑀓𑀺𑀮𑀺𑀝𑁆𑀞𑁄 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀸𑀕𑁂𑀦 𑀭𑀸𑀕𑀁 𑀚𑀳𑀢𑀺, 𑀤𑁄𑀲𑁂𑀦 𑀤𑁄𑀲𑀁 𑀚𑀳𑀢𑀺, 𑀫𑁄𑀳𑁂𑀦 𑀫𑁄𑀳𑀁 𑀚𑀳𑀢𑀺, 𑀓𑀺𑀮𑁂𑀲𑁂𑀳𑀺 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀭𑀸𑀕𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄, 𑀫𑀕𑁆𑀕𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀭𑀸𑀕𑁄 𑀅𑀓𑀼𑀲𑀮𑁄, 𑀫𑀕𑁆𑀕𑁄 𑀓𑀼𑀲𑀮𑁄𑀢𑀺? 𑀆𑀫𑀦𑁆𑀢𑀸. 𑀓𑀼𑀲𑀮𑀸𑀓𑀼𑀲𑀮𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀳𑀻𑀦𑀧𑀡𑀻𑀢𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀼𑀲𑀮𑀸𑀓𑀼𑀲𑀮𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀳𑀻𑀦𑀧𑀡𑀻𑀢𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀸𑀦𑀺! 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀦𑀪𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀣𑀯𑀻 𑀘 𑁋 𑀇𑀤𑀁 𑀧𑀞𑀫𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀁…𑀧𑁂… 𑀢𑀲𑁆𑀫𑀸 𑀲𑀢𑀁 𑀥𑀫𑁆𑀫𑁄 𑀅𑀲𑀩𑁆𑀪𑀺 𑀆𑀭𑀓𑀸’’𑀢𑀺. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀼𑀲𑀮𑀸𑀓𑀼𑀲𑀮𑀸…𑀧𑁂… 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺.

𑁮𑁩𑁧. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀺, 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀚𑀳𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑁂𑀦 𑀳𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀺, 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀚𑀳𑀢𑀻𑀢𑀺.

𑀓𑀺𑀮𑁂𑀲𑀚𑀳𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁮𑁭) 𑁨. 𑀲𑀼𑀜𑁆𑀜𑀢𑀸𑀓𑀣𑀸

𑁮𑁩𑁨. 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀆𑀫𑀦𑁆𑀢𑀸. 𑀅𑀦𑀺𑀫𑀺𑀢𑁆𑀢𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀆𑀫𑀦𑁆𑀢𑀸. 𑀅𑀧𑁆𑀧𑀡𑀺𑀳𑀺𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀦𑀺𑀫𑀺𑀢𑁆𑀢𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀼𑀜𑁆𑀜𑀢𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀧𑁆𑀧𑀡𑀺𑀳𑀺𑀢𑁄 𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺? 𑀆𑀫𑀦𑁆𑀢𑀸. 𑀲𑀼𑀜𑁆𑀜𑀢𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀦 𑀅𑀦𑀺𑀘𑁆𑀘𑁄 𑀦 𑀲𑀗𑁆𑀔𑀢𑁄 𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀦 𑀔𑀬𑀥𑀫𑁆𑀫𑁄 𑀦 𑀯𑀬𑀥𑀫𑁆𑀫𑁄 𑀦 𑀯𑀺𑀭𑀸𑀕𑀥𑀫𑁆𑀫𑁄 𑀦 𑀦𑀺𑀭𑁄𑀥𑀥𑀫𑁆𑀫𑁄 𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀅𑀦𑀺𑀘𑁆𑀘𑁄…𑀧𑁂… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺.

𑁮𑁩𑁩. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸…𑀧𑁂… 𑀲𑀜𑁆𑀜𑀸𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺? 𑀆𑀫𑀦𑁆𑀢𑀸. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀲𑀼𑀜𑁆𑀜𑀢𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁩𑁪. 𑀦 𑀯𑀢𑁆𑀢𑀩𑁆𑀩𑀁 𑁋 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀼𑀜𑁆𑀜𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺 [𑀫. 𑀦𑀺. 𑁩.𑁬𑁯 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑁂]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺.

𑀲𑀼𑀜𑁆𑀜𑀢𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁮𑁮) 𑁩 𑀲𑀸𑀫𑀜𑁆𑀜𑀨𑀮𑀓𑀣𑀸

𑁮𑁩𑁫. 𑀲𑀸𑀫𑀜𑁆𑀜𑀨𑀮𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀧𑀭𑀸𑀬𑀡𑀁 𑀅𑀘𑁆𑀘𑀼𑀢𑀁 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀸𑀫𑀜𑁆𑀜𑀨𑀮𑀁 𑀅𑀲𑀗𑁆𑀔𑀢𑀁, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁩𑁬. 𑀲𑀸𑀫𑀜𑁆𑀜𑀨𑀮𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀸𑀫𑀜𑁆𑀜𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀲𑀸𑀫𑀜𑁆𑀜𑀁 𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀸𑀫𑀜𑁆𑀜𑀨𑀮𑀁 𑀲𑀗𑁆𑀔𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀗𑁆𑀔𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀓𑀤𑀸𑀕𑀸𑀫𑀺𑀨𑀮𑀁…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀁…𑀧𑁂… 𑀅𑀭𑀳𑀢𑁆𑀢𑀨𑀮𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀲𑀗𑁆𑀔𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀗𑁆𑀔𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀭𑀳𑀢𑁆𑀢𑀨𑀮𑀁 𑀲𑀗𑁆𑀔𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀅𑀲𑀗𑁆𑀔𑀢𑀁, 𑀲𑀓𑀤𑀸𑀕𑀸𑀫𑀺𑀨𑀮𑀁…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀁 …𑀧𑁂… 𑀅𑀭𑀳𑀢𑁆𑀢𑀨𑀮𑀁 𑀅𑀲𑀗𑁆𑀔𑀢𑀁, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀜𑁆𑀘 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀜𑁆𑀘 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀧𑀜𑁆𑀘 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀸𑀫𑀜𑁆𑀜𑀨𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁮𑁯) 𑁪. 𑀧𑀢𑁆𑀢𑀺𑀓𑀣𑀸

𑁮𑁩𑁭. 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀧𑀭𑀸𑀬𑀡𑀁 𑀅𑀘𑁆𑀘𑀼𑀢𑀁 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁩𑁮. 𑀘𑀻𑀯𑀭𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁…𑀧𑁂… 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀘𑀻𑀯𑀭𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀺𑀡𑁆𑀟𑀧𑀸𑀢𑀲𑁆𑀲…𑀧𑁂… 𑀲𑁂𑀦𑀸𑀲𑀦𑀲𑁆𑀲…𑀧𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁…𑀧𑁂… 𑀅𑀘𑁆𑀘𑀼𑀢𑀁 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀘𑀻𑀯𑀭𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸…𑀧𑁂… 𑀧𑀺𑀡𑁆𑀟𑀧𑀸𑀢𑀲𑁆𑀲…𑀧𑁂… 𑀲𑁂𑀦𑀸𑀲𑀦𑀲𑁆𑀲…𑀧𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀧𑀜𑁆𑀘 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀜𑁆𑀘 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀧𑀜𑁆𑀘 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁩𑁯. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸 (𑀏𑀯𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁) 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲… 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲… 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑁆𑀲… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲… 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲… 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲… 𑀲𑀓𑀤𑀸𑀕𑀸𑀫𑀺𑀨𑀮𑀲𑁆𑀲… 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲… 𑀅𑀦𑀸𑀕𑀸𑀫𑀺𑀨𑀮𑀲𑁆𑀲… 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲… 𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁…𑀧𑁂… 𑀅𑀘𑁆𑀘𑀼𑀢𑀁 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸… 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸… 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸… 𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸… 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀯 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀯 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀦𑀯 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁪𑁦. 𑀦 𑀯𑀢𑁆𑀢𑀩𑁆𑀩𑀁 𑁋 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀧𑀢𑁆𑀢𑀺 𑀭𑀽𑀧𑀁 … 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸𑀢𑀺.

𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁯𑁦) 𑁫. 𑀢𑀣𑀢𑀸𑀓𑀣𑀸

𑁮𑁪𑁧. 𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀣𑀢𑀸 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁…𑀧𑁂… 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀣𑀢𑀸 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁪𑁨. 𑀭𑀽𑀧𑀲𑁆𑀲 𑀭𑀽𑀧𑀢𑀸, 𑀦𑀦𑀼 𑀭𑀽𑀧𑀢𑀸 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁…𑀧𑁂… 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀽𑀧𑀲𑁆𑀲 𑀭𑀽𑀧𑀢𑀸, 𑀦𑀦𑀼 𑀭𑀽𑀧𑀢𑀸 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑁂 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀯𑁂𑀤𑀦𑀸𑀬 𑀯𑁂𑀤𑀦𑀢𑀸, 𑀦𑀦𑀼 𑀯𑁂𑀤𑀦𑀢𑀸…𑀧𑁂… 𑀲𑀜𑁆𑀜𑀸𑀬 𑀲𑀜𑁆𑀜𑀢𑀸, 𑀦𑀦𑀼 𑀲𑀜𑁆𑀜𑀢𑀸…𑀧𑁂… 𑀲𑀗𑁆𑀔𑀸𑀭𑀸𑀦𑀁 𑀲𑀗𑁆𑀔𑀸𑀭𑀢𑀸, 𑀦𑀦𑀼 𑀲𑀗𑁆𑀔𑀸𑀭𑀢𑀸…𑀧𑁂… 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀜𑁆𑀜𑀸𑀡𑀢𑀸, 𑀦𑀦𑀼 𑀯𑀺𑀜𑁆𑀜𑀸𑀡𑀢𑀸 𑀅𑀲𑀗𑁆𑀔𑀢𑀸𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀁…𑀧𑁂… 𑀅𑀫𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂….

𑀭𑀽𑀧𑀲𑁆𑀲 𑀭𑀽𑀧𑀢𑀸, 𑀦𑀦𑀼 𑀭𑀽𑀧𑀢𑀸…𑀧𑁂… 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀜𑁆𑀜𑀸𑀡𑀢𑀸, 𑀦𑀦𑀼 𑀯𑀺𑀜𑁆𑀜𑀸𑀡𑀢𑀸 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀙 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀙 𑀅𑀲𑀗𑁆𑀔𑀢𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀙 𑀢𑀸𑀡𑀸𑀦𑀺…𑀧𑁂… 𑀅𑀦𑁆𑀢𑀭𑀺𑀓𑀸 𑀯𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁪𑁩. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀣𑀢𑀸 𑀅𑀲𑀗𑁆𑀔𑀢𑀸’’𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀣𑀢𑀸 𑀭𑀽𑀧𑀁… 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀢𑁂𑀦 𑀳𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀣𑀢𑀸 𑀅𑀲𑀗𑁆𑀔𑀢𑀸𑀢𑀺.

𑀢𑀣𑀢𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁯𑁧) 𑁬. 𑀓𑀼𑀲𑀮𑀓𑀣𑀸

𑁮𑁪𑁪. 𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸𑀢𑀺? 𑀆𑀫𑀦𑁆𑀢𑀸. 𑀲𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀅𑀦𑀸𑀭𑀫𑁆𑀫𑀡𑀸, 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀦𑀸𑀭𑀫𑁆𑀫𑀡𑀸, 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸’’𑀢𑀺.

𑁮𑁪𑁫. 𑀅𑀮𑁄𑀪𑁄 𑀓𑀼𑀲𑀮𑁄 𑀲𑀸𑀭𑀫𑁆𑀫𑀡𑁄, 𑀅𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸 𑀲𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀅𑀤𑁄𑀲𑁄 𑀓𑀼𑀲𑀮𑁄…𑀧𑁂… 𑀅𑀫𑁄𑀳𑁄 𑀓𑀼𑀲𑀮𑁄…𑀧𑁂… 𑀲𑀤𑁆𑀥𑀸… 𑀯𑀻𑀭𑀺𑀬𑀁… 𑀲𑀢𑀺… 𑀲𑀫𑀸𑀥𑀺…𑀧𑁂… 𑀧𑀜𑁆𑀜𑀸 𑀓𑀼𑀲𑀮𑀸 𑀲𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸 𑀲𑀸𑀭𑀫𑁆𑀫𑀡𑀸, 𑀅𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸 𑀅𑀦𑀸𑀭𑀫𑁆𑀫𑀡𑀸, 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀅𑀮𑁄𑀪𑁄 𑀓𑀼𑀲𑀮𑁄 𑀅𑀦𑀸𑀭𑀫𑁆𑀫𑀡𑁄, 𑀦𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸 𑀅𑀦𑀸𑀭𑀫𑁆𑀫𑀡𑀸, 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀅𑀤𑁄𑀲𑁄 𑀓𑀼𑀲𑀮𑁄…𑀧𑁂… 𑀅𑀫𑁄𑀳𑁄 𑀓𑀼𑀲𑀮𑁄…𑀧𑁂… 𑀲𑀤𑁆𑀥𑀸… 𑀯𑀻𑀭𑀺𑀬𑀁… 𑀲𑀢𑀺… 𑀲𑀫𑀸𑀥𑀺…𑀧𑁂… 𑀧𑀜𑁆𑀜𑀸 𑀓𑀼𑀲𑀮𑀸 𑀅𑀦𑀸𑀭𑀫𑁆𑀫𑀡𑀸, 𑀦𑀢𑁆𑀣𑀺 𑀢𑀸𑀬 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁪𑁬. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀯𑀚𑁆𑀚𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦𑀺𑀩𑁆𑀩𑀸𑀦𑀥𑀸𑀢𑀼 𑀅𑀦𑀯𑀚𑁆𑀚𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸’’𑀢𑀺.

𑀓𑀼𑀲𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁯𑁨) 𑁭. 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸

𑁮𑁪𑁭. 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸𑀢𑀺? 𑀆𑀫𑀦𑁆𑀢𑀸. 𑀫𑀸𑀢𑀼𑀖𑀸𑀢𑀓𑁄 𑀅𑀘𑁆𑀘𑀦𑁆𑀢𑀦𑀺𑀬𑀢𑁄, 𑀧𑀺𑀢𑀼𑀖𑀸𑀢𑀓𑁄…𑀧𑁂… 𑀅𑀭𑀳𑀦𑁆𑀢𑀖𑀸𑀢𑀓𑁄…𑀧𑁂… 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑁄 …𑀧𑁂… 𑀲𑀗𑁆𑀖𑀪𑁂𑀤𑀓𑁄 𑀅𑀘𑁆𑀘𑀦𑁆𑀢𑀦𑀺𑀬𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁪𑁮. 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸𑀢𑀺? 𑀆𑀫𑀦𑁆𑀢𑀸. 𑀅𑀘𑁆𑀘𑀦𑁆𑀢𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀘𑁆𑀘𑀦𑁆𑀢𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸’’𑀢𑀺.

𑀅𑀘𑁆𑀘𑀦𑁆𑀢𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀧𑀳𑀻𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀳𑀻𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 …𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀢𑀫𑁂𑀦 𑀫𑀕𑁆𑀕𑁂𑀦𑀸𑀢𑀺? 𑀅𑀓𑀼𑀲𑀮𑁂𑀦 𑀫𑀕𑁆𑀕𑁂𑀦𑀸𑀢𑀺. 𑀅𑀓𑀼𑀲𑀮𑁄 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄 𑀔𑀬𑀕𑀸𑀫𑀻 𑀩𑁄𑀥𑀕𑀸𑀫𑀻 𑀅𑀦𑀸𑀲𑀯𑁄…𑀧𑁂… 𑀅𑀲𑀁𑀓𑀺𑀮𑁂𑀲𑀺𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀅𑀓𑀼𑀲𑀮𑁄 𑀫𑀕𑁆𑀕𑁄 𑀅𑀦𑀺𑀬𑁆𑀬𑀸𑀦𑀺𑀓𑁄…𑀧𑁂… 𑀲𑀁𑀓𑀺𑀮𑁂𑀲𑀺𑀓𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀓𑀼𑀲𑀮𑁄 𑀫𑀕𑁆𑀕𑁄 𑀅𑀦𑀺𑀬𑁆𑀬𑀸𑀦𑀺𑀓𑁄…𑀧𑁂… 𑀲𑀁𑀓𑀺𑀮𑁂𑀲𑀺𑀓𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀘𑁆𑀘𑀦𑁆𑀢𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀅𑀓𑀼𑀲𑀮𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀸’’𑀢𑀺.

𑁮𑁪𑁯. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸’’𑀢𑀺.

𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀧𑀳𑀻𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀳𑀻𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀢𑀫𑁂𑀦 𑀫𑀕𑁆𑀕𑁂𑀦𑀸𑀢𑀺? 𑀅𑀓𑀼𑀲𑀮𑁂𑀦 𑀫𑀕𑁆𑀕𑁂𑀦. 𑀅𑀓𑀼𑀲𑀮𑁄 𑀫𑀕𑁆𑀕𑁄…𑀧𑁂… 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀅𑀓𑀼𑀲𑀮𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀸’’𑀢𑀺.

𑁮𑁫𑁦. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸’’𑀢𑀺.

𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀧𑀳𑀻𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀧𑀳𑀻𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀢𑀫𑁂𑀦 𑀫𑀕𑁆𑀕𑁂𑀦𑀸𑀢𑀺? 𑀅𑀓𑀼𑀲𑀮𑁂𑀦 𑀫𑀕𑁆𑀕𑁂𑀦𑀸𑀢𑀺. 𑀅𑀓𑀼𑀲𑀮𑁄 𑀫𑀕𑁆𑀕𑁄…𑀧𑁂… 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀦𑀺𑀬𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺 𑀅𑀓𑀼𑀲𑀮𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀸’’𑀢𑀺.

𑁮𑁫𑁧. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑁄 [𑀏𑀯𑀁 𑀔𑁄 𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑁄 (𑀅. 𑀦𑀺. 𑁭.𑁧𑁫)] 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀻’’𑀢𑀺 [𑀅. 𑀦𑀺. 𑁭.𑁧𑁫]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸𑀢𑀺.

𑁮𑁫𑁨. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑁄 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀻’’𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀻’’𑀢𑀺 [𑀅. 𑀦𑀺. 𑁭.𑁧𑁫]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀓𑀸𑀮𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑁄 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀻’’𑀢𑀺 𑁋 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀭𑀢𑀺, 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀻’’𑀢𑀺 [𑀅. 𑀦𑀺. 𑁭.𑁧𑁫]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀓𑀸𑀮𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄

(𑁧𑁯𑁩) 𑁮. 𑀇𑀦𑁆𑀤𑁆𑀭𑀺𑀬𑀓𑀣𑀸

𑁮𑁫𑁩. 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀮𑁄𑀓𑀺𑀬𑀸 𑀧𑀜𑁆𑀜𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀯𑀻𑀭𑀺𑀬𑀁…𑀧𑁂… 𑀲𑀢𑀺…𑀧𑁂… 𑀲𑀫𑀸𑀥𑀺…𑀧𑁂… 𑀧𑀜𑁆𑀜𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀮𑁄𑀓𑀺𑀬𑁄 𑀫𑀦𑁄, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑁄 𑀫𑀦𑁄, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀧𑀜𑁆𑀜𑀸, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀮𑁄𑀓𑀺𑀬𑀁 𑀲𑁄𑀫𑀦𑀲𑁆𑀲𑀁, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀁, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀁, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀧𑀜𑁆𑀜𑀸, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁫𑁪. 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑁄 𑀫𑀦𑁄, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀧𑀜𑁆𑀜𑀸, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑁄 𑀫𑀦𑁄, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀲𑁄𑀫𑀦𑀲𑁆𑀲𑀁, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺… 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀁, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀧𑀜𑁆𑀜𑀸, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑁄 𑀫𑀦𑁄, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀁, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁫𑁫. 𑀅𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀸 𑀲𑀤𑁆𑀥𑀸, 𑀅𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀁 𑀯𑀻𑀭𑀺𑀬𑀁…𑀧𑁂… 𑀅𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀸 𑀧𑀜𑁆𑀜𑀸, 𑀅𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀧𑀜𑁆𑀜𑀸, 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀮𑁄𑀓𑀺𑀬𑀸 𑀲𑀤𑁆𑀥𑀸, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀸 𑀲𑀤𑁆𑀥𑀸, 𑀦𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀁 𑀯𑀻𑀭𑀺𑀬𑀁…𑀧𑁂… 𑀅𑀢𑁆𑀣𑀺 𑀮𑁄𑀓𑀺𑀬𑀸 𑀧𑀜𑁆𑀜𑀸, 𑀦𑀢𑁆𑀣𑀺 𑀮𑁄𑀓𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀸 𑀧𑀜𑁆𑀜𑀸, 𑀦𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁫𑁬. 𑀦𑀢𑁆𑀣𑀺 𑀮𑁄𑀓𑀺𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂, 𑀲𑁆𑀯𑀸𑀓𑀸𑀭𑁂, 𑀲𑀼𑀯𑀺𑀜𑁆𑀜𑀸𑀧𑀬𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂’’𑀢𑀺 [𑀫. 𑀦𑀺. 𑁧.𑁨𑁮𑁩 𑀢𑀢𑁆𑀣 ‘‘𑀤𑁆𑀯𑀸𑀓𑀸𑀭𑁂 𑀤𑀼𑀯𑀺𑀜𑁆𑀜𑀸𑀧𑀬𑁂’’ 𑀇𑀘𑁆𑀘𑀸𑀤𑀻𑀦𑀺𑀧𑀺 𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀢𑁆𑀣𑀺 𑀮𑁄𑀓𑀺𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺.

𑀇𑀦𑁆𑀤𑁆𑀭𑀺𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀯𑀻𑀲𑀢𑀺𑀫𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀢𑀻𑀢𑁂 𑀓𑀺𑀮𑁂𑀲𑁂 𑀚𑀳𑀢𑀺 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀚𑀳𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀚𑀳𑀢𑀺, 𑀲𑀼𑀜𑁆𑀜𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸, 𑀲𑀸𑀫𑀜𑁆𑀜𑀨𑀮𑀁 𑀅𑀲𑀗𑁆𑀔𑀢𑀁, 𑀧𑀢𑁆𑀢𑀺 𑀅𑀲𑀗𑁆𑀔𑀢𑀸, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀣𑀢𑀸 𑀅𑀲𑀗𑁆𑀔𑀢𑀸, 𑀦𑀺𑀩𑁆𑀩𑀸𑀦𑀥𑀸𑀢𑀼 𑀓𑀼𑀲𑀮𑀸, 𑀅𑀢𑁆𑀣𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀬𑀸𑀫𑀢𑀸, 𑀦𑀢𑁆𑀣𑀺 𑀮𑁄𑀓𑀺𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺.