(𑁧𑁭𑁪) 𑁯. 𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸

𑁭𑁯𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀬𑀼𑀕𑀸 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀬𑀼𑀕𑀸 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑁭𑁯𑁮. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀗𑁆𑀖𑁂, 𑀕𑁄𑀢𑀫𑀺, 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺 [𑀫. 𑀦𑀺. 𑁩.𑁩𑁭𑁬]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀓𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺.

‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 [𑀲𑀁. 𑀦𑀺. 𑁧.𑁨𑁬𑁨; 𑀯𑀺. 𑀯. 𑁬𑁪𑁨, 𑁭𑁫𑁧].

‘‘𑀏𑀲𑁄 𑀳𑀺 𑀲𑀗𑁆𑀖𑁄 𑀯𑀺𑀧𑀼𑀮𑁄 𑀫𑀳𑀕𑁆𑀕𑀢𑁄,

𑀏𑀲𑀧𑁆𑀧𑀫𑁂𑀬𑁆𑀬𑁄 𑀉𑀤𑀥𑀻𑀯 𑀲𑀸𑀕𑀭𑁄;

𑀏𑀢𑁂 𑀳𑀺 𑀲𑁂𑀝𑁆𑀞𑀸 𑀦𑀭𑀯𑀻𑀭𑀲𑀸𑀯𑀓𑀸 [𑀦𑀭𑀲𑀻𑀳𑀲𑀸𑀯𑀓𑀸 (𑀓.)],

𑀧𑀪𑀗𑁆𑀓𑀭𑀸 𑀥𑀫𑁆𑀫𑀫𑀼𑀤𑀻𑀭𑀬𑀦𑁆𑀢𑀺.

‘‘𑀢𑁂𑀲𑀁 𑀲𑀼𑀤𑀺𑀦𑁆𑀦𑀁 𑀲𑀼𑀳𑀼𑀢𑀁 𑀲𑀼𑀬𑀺𑀝𑁆𑀞𑀁,

𑀬𑁂 𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲 𑀤𑀤𑀦𑁆𑀢𑀺 𑀤𑀸𑀦𑀁;

𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀧𑀢𑀺𑀝𑁆𑀞𑀺𑀢𑀸,

𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 𑀯𑀡𑁆𑀡𑀺𑀢𑀸.

‘‘𑀏𑀢𑀸𑀤𑀺𑀲𑀁 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸,

𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 [𑀯𑀺𑀳𑀭𑀦𑁆𑀢𑀺 (𑀲𑀻. 𑀓.)] 𑀮𑁄𑀓𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁,

𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦’’𑀦𑁆𑀢𑀺 [𑀯𑀺. 𑀯. 𑁬𑁪𑁫, 𑁭𑁫𑁪].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.