𑁧𑁭. 𑀲𑀢𑁆𑀢𑀭𑀲𑀫𑀯𑀕𑁆𑀕𑁄

(𑁧𑁭𑁫) 𑁧𑁦. 𑀦 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀲𑁆𑀲𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸

𑁭𑁯𑁯. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀪𑀕𑀯𑀸 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄, 𑀤𑁆𑀯𑀺𑀧𑀤𑀸𑀦𑀁 𑀲𑁂𑀝𑁆𑀞𑁄, 𑀤𑁆𑀯𑀺𑀧𑀤𑀸𑀦𑀁 𑀧𑀫𑁄𑀓𑁆𑀔𑁄, 𑀤𑁆𑀯𑀺𑀧𑀤𑀸𑀦𑀁 𑀉𑀢𑁆𑀢𑀫𑁄, 𑀤𑁆𑀯𑀺𑀧𑀤𑀸𑀦𑀁 𑀧𑀯𑀭𑁄 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀲𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀪𑀕𑀯𑀸 𑀤𑁆𑀯𑀺𑀧𑀤𑀸𑀦𑀁 𑀅𑀕𑁆𑀕𑁄, 𑀤𑁆𑀯𑀺𑀧𑀤𑀸𑀦𑀁 𑀲𑁂𑀝𑁆𑀞𑁄, 𑀤𑁆𑀯𑀺𑀧𑀤𑀸𑀦𑀁 𑀧𑀫𑁄𑀓𑁆𑀔𑁄, 𑀤𑁆𑀯𑀺𑀧𑀤𑀸𑀦𑀁 𑀉𑀢𑁆𑀢𑀫𑁄, 𑀤𑁆𑀯𑀺𑀧𑀤𑀸𑀦𑀁 𑀧𑀯𑀭𑁄 𑀅𑀲𑀫𑁄 𑀅𑀲𑀫𑀲𑀫𑁄 𑀅𑀧𑁆𑀧𑀝𑀺𑀲𑀫𑁄 𑀅𑀧𑁆𑀧𑀝𑀺𑀪𑀸𑀕𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀩𑀼𑀤𑁆𑀥𑁂𑀦 𑀲𑀫𑀲𑀫𑁄 𑁋 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬𑀸𑀢𑀺? 𑀦𑀢𑁆𑀣𑀺. 𑀳𑀜𑁆𑀘𑀺 𑀦𑀢𑁆𑀣𑀺 𑀓𑁄𑀘𑀺 𑀩𑀼𑀤𑁆𑀥𑁂𑀦 𑀲𑀫𑀲𑀫𑁄 𑁋 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀦𑀬𑀺𑀫𑀲𑁆𑀫𑀺𑀁 𑀯𑀸 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦,

𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄 𑀘 𑀲𑀫𑁄 𑀘 𑀯𑀺𑀚𑁆𑀚𑀢𑀺;

𑀬𑀫𑀸𑀳𑀼𑀦𑁂𑀬𑁆𑀬𑀸𑀦𑀁 𑀅𑀕𑁆𑀕𑀢𑀁 𑀕𑀢𑁄,

𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀧𑁆𑀨𑀮𑁂𑀲𑀺𑀦’’𑀦𑁆𑀢𑀺 [𑀯𑀺. 𑀯. 𑁧𑁦𑁪𑁭].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.