(𑁧𑁨𑁬) 𑁧. 𑀓𑀧𑁆𑀧𑀝𑁆𑀞𑀓𑀣𑀸

𑁬𑁫𑁪. 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀓𑀧𑁆𑀧𑁄 𑀘 𑀲𑀡𑁆𑀞𑀸𑀢𑀺 𑀩𑀼𑀤𑁆𑀥𑁄 𑀘 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂…. 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀓𑀧𑁆𑀧𑁄 𑀘 𑀲𑀡𑁆𑀞𑀸𑀢𑀺 𑀲𑀗𑁆𑀖𑁄 𑀘 𑀪𑀺𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀓𑀧𑁆𑀧𑁄 𑀘 𑀲𑀡𑁆𑀞𑀸𑀢𑀺 𑀓𑀧𑁆𑀧𑀝𑁆𑀞𑁄 𑀘 𑀓𑀧𑁆𑀧𑀝𑁆𑀞𑀺𑀬𑀁 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀓𑀧𑁆𑀧𑁄 𑀘 𑀲𑀡𑁆𑀞𑀸𑀢𑀺 𑀓𑀧𑁆𑀧𑀝𑁆𑀞𑁄 𑀘 𑀧𑀼𑀕𑁆𑀕𑀮𑁄 𑀓𑀸𑀮𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁫𑁫. 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀁 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀸𑀕𑀢𑀁 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑁂 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬… 𑀢𑀬𑁄 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬… 𑀘𑀢𑁆𑀢𑀸𑀭𑁄 𑀓𑀧𑁆𑀧𑁂 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁫𑁬. 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑁂 𑀟𑀬𑁆𑀳𑀦𑁆𑀢𑁂 𑀓𑀢𑁆𑀣 𑀕𑀘𑁆𑀙𑀢𑀻𑀢𑀺? 𑀅𑀜𑁆𑀜𑀁 𑀮𑁄𑀓𑀥𑀸𑀢𑀼𑀁 𑀕𑀘𑁆𑀙𑀢𑀻𑀢𑀺. 𑀫𑀢𑁄 𑀕𑀘𑁆𑀙𑀢𑀺, 𑀯𑁂𑀳𑀸𑀲𑀁 𑀕𑀘𑁆𑀙𑀢𑀻𑀢𑀺? 𑀫𑀢𑁄 𑀕𑀘𑁆𑀙𑀢𑀻𑀢𑀺. 𑀓𑀧𑁆𑀧𑀝𑁆𑀞𑀺𑀬𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀯𑁂𑀧𑀓𑁆𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… [𑀯𑁂𑀳𑀸𑀲𑀁 𑀕𑀘𑁆𑀙𑀢𑀻𑀢𑀺 (?) 𑀅𑀬𑀁 𑀳𑀺 𑀧𑀭𑀯𑀸𑀤𑀺𑀲𑁆𑀲 𑀧𑀝𑀺𑀜𑁆𑀜𑀸𑀬𑁂𑀯, 𑀓𑀣𑀸. 𑁬𑁨𑁧-𑁬𑁨𑁩 𑀦𑀯𑀫𑀧𑀦𑁆𑀢𑀺𑀬𑀁 𑀯𑀺𑀬] 𑀯𑁂𑀳𑀸𑀲𑀁 𑀕𑀘𑁆𑀙𑀢𑀻𑀢𑀺? 𑀆𑀫𑀦𑁆𑀢𑀸 [𑀯𑁂𑀳𑀸𑀲𑀁 𑀕𑀘𑁆𑀙𑀢𑀻𑀢𑀺 (?) 𑀅𑀬𑀁 𑀳𑀺 𑀧𑀭𑀯𑀸𑀤𑀺𑀲𑁆𑀲 𑀧𑀝𑀺𑀜𑁆𑀜𑀸𑀬𑁂𑀯, 𑀓𑀣𑀸. 𑁬𑁨𑁧-𑁬𑁨𑁩 𑀦𑀯𑀫𑀧𑀦𑁆𑀢𑀺𑀬𑀁 𑀯𑀺𑀬]. 𑀓𑀧𑁆𑀧𑀝𑁆𑀞𑁄 𑀇𑀤𑁆𑀥𑀺𑀫𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀧𑁆𑀧𑀝𑁆𑀞𑁄 𑀇𑀤𑁆𑀥𑀺𑀫𑀸𑀢𑀺? 𑀆𑀫𑀦𑁆𑀢𑀸. 𑀓𑀧𑁆𑀧𑀝𑁆𑀞𑁂𑀦 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀪𑀸𑀯𑀺𑀢𑁄 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑁄 𑀪𑀸𑀯𑀺𑀢𑁄 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑁄 𑀪𑀸𑀯𑀺𑀢𑁄 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄 𑀪𑀸𑀯𑀺𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁫𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄 𑀲𑀗𑁆𑀖𑀪𑁂𑀤𑀓𑁄;

𑀯𑀕𑁆𑀕𑀭𑀢𑁄 𑀅𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀧𑀥𑀁𑀲𑀢𑀺;

𑀲𑀗𑁆𑀖𑀁 𑀲𑀫𑀕𑁆𑀕𑀁 𑀪𑁂𑀢𑁆𑀯𑀸𑀦 [𑀪𑀺𑀦𑁆𑀤𑀺𑀢𑁆𑀯𑀸 (𑀲𑀻. 𑀓.)], 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺 [𑀘𑀽𑀴𑀯. 𑁩𑁫𑁪; 𑀅. 𑀦𑀺. 𑁧𑁦.𑁩𑁯; 𑀇𑀢𑀺𑀯𑀼. 𑁧𑁮].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀓𑀧𑁆𑀧𑀝𑁆𑀞𑁄 𑀓𑀧𑁆𑀧𑀁 𑀢𑀺𑀝𑁆𑀞𑁂𑀬𑁆𑀬𑀸𑀢𑀺.

𑀓𑀧𑁆𑀧𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.