(𑁭𑁮) 𑁬. 𑀅𑀭𑀽𑀧𑀥𑀸𑀢𑀼𑀓𑀣𑀸

𑁫𑁧𑁭. 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀥𑀸𑀢𑀽𑀢𑀺? 𑀆𑀫𑀦𑁆𑀢𑀸. 𑀯𑁂𑀤𑀦𑀸 𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀯𑁂𑀤𑀦𑀽𑀧𑀕𑀁 𑀓𑀫𑁆𑀫𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀯𑁂𑀤𑀦𑀽𑀧𑀕𑀸 𑀲𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸𑀬 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸𑀬 𑀅𑀢𑁆𑀣𑀺 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑁂𑀤𑀦𑀸 𑀘𑀢𑀼𑀯𑁄𑀓𑀸𑀭𑀪𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀽𑀧𑀥𑀸𑀢𑀼 𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀯𑁂𑀤𑀦𑀸 𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀅𑀭𑀽𑀧𑀥𑀸𑀢𑀽𑀧𑀕𑀁 𑀓𑀫𑁆𑀫𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀯𑁂𑀤𑀦𑀽𑀧𑀕𑀁 𑀓𑀫𑁆𑀫𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀅𑀭𑀽𑀧𑀥𑀸𑀢𑀽𑀧𑀕𑀸 𑀲𑀢𑁆𑀢𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀯𑁂𑀤𑀦𑀽𑀧𑀕𑀸 𑀲𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀽𑀧𑀥𑀸𑀢𑀼𑀬𑀸 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀯𑁂𑀤𑀦𑀸𑀬 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀽𑀧𑀥𑀸𑀢𑀼𑀬𑀸 𑀅𑀢𑁆𑀣𑀺 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀯𑁂𑀤𑀦𑀸𑀬 𑀅𑀢𑁆𑀣𑀺 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀽𑀧𑀥𑀸𑀢𑀼 𑀘𑀢𑀼𑀯𑁄𑀓𑀸𑀭𑀪𑀯𑁄𑀢𑀺? 𑀆𑀫𑀦𑁆𑀢𑀸. 𑀯𑁂𑀤𑀦𑀸 𑀘𑀢𑀼𑀯𑁄𑀓𑀸𑀭𑀪𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁫𑁧𑁮. 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀥𑀸𑀢𑀼, 𑀓𑀸𑀫𑀥𑀸𑀢𑀼𑀬𑀸 𑀅𑀢𑁆𑀣𑀺 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀸𑀯 𑀓𑀸𑀫𑀥𑀸𑀢𑀼, 𑀲𑀸 𑀅𑀭𑀽𑀧𑀥𑀸𑀢𑀽𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀸𑀯 𑀓𑀸𑀫𑀥𑀸𑀢𑀼, 𑀲𑀸 𑀅𑀭𑀽𑀧𑀥𑀸𑀢𑀽𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀪𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑁆𑀯𑀻𑀳𑀺 𑀪𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀓𑀸𑀫𑀪𑀯𑁂𑀦 𑀘 𑀅𑀭𑀽𑀧𑀪𑀯𑁂𑀦 𑀘𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀭𑀽𑀧𑀺𑀦𑁄 𑀥𑀫𑁆𑀫𑀸 𑀭𑀽𑀧𑀥𑀸𑀢𑀼, 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀥𑀸𑀢𑀼, 𑀓𑀸𑀫𑀥𑀸𑀢𑀼𑀬𑀸 𑀅𑀢𑁆𑀣𑀺 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀸𑀯 𑀓𑀸𑀫𑀥𑀸𑀢𑀼, 𑀲𑀸 𑀭𑀽𑀧𑀥𑀸𑀢𑀼, 𑀲𑀸 𑀅𑀭𑀽𑀧𑀥𑀸𑀢𑀽𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀸𑀯 𑀓𑀸𑀫𑀥𑀸𑀢𑀼, 𑀲𑀸 𑀭𑀽𑀧𑀥𑀸𑀢𑀼, 𑀲𑀸 𑀅𑀭𑀽𑀧𑀥𑀸𑀢𑀽𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀪𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀢𑀻𑀳𑀺 𑀪𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀓𑀸𑀫𑀪𑀯𑁂𑀦 𑀘 𑀭𑀽𑀧𑀪𑀯𑁂𑀦 𑀘 𑀅𑀭𑀽𑀧𑀪𑀯𑁂𑀦 𑀘𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀭𑀽𑀧𑀥𑀸𑀢𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.