(𑁭𑁫) 𑁩. 𑀓𑀸𑀫𑀕𑀼𑀡𑀓𑀣𑀸

𑁫𑁧𑁦. 𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀙𑀦𑁆𑀤𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀙𑀦𑁆𑀤𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽’’𑀢𑀺. 𑀦𑀦𑀼 𑀅𑀢𑁆𑀣𑀺 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀭𑀸𑀕𑁄 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀙𑀦𑁆𑀤𑁄 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀙𑀦𑁆𑀤𑀭𑀸𑀕𑁄 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀭𑀸𑀕𑁄 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀧𑀻𑀢𑀺 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀲𑁄𑀫𑀦𑀲𑁆𑀲𑀁 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀢𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽’’𑀢𑀺.

𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽𑀢𑀺? 𑀆𑀫𑀦𑁆𑀢𑀸. 𑀫𑀦𑀼𑀲𑁆𑀲𑀸𑀦𑀁 𑀘𑀓𑁆𑀔𑀼 𑀦 𑀓𑀸𑀫𑀥𑀸𑀢𑀽𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀫𑀦𑀼𑀲𑁆𑀲𑀸𑀦𑀁 𑀲𑁄𑀢𑀁…𑀧𑁂… 𑀫𑀦𑀼𑀲𑁆𑀲𑀸𑀦𑀁 𑀖𑀸𑀦𑀁…𑀧𑁂… 𑀫𑀦𑀼𑀲𑁆𑀲𑀸𑀦𑀁 𑀚𑀺𑀯𑁆𑀳𑀸…𑀧𑁂… 𑀫𑀦𑀼𑀲𑁆𑀲𑀸𑀦𑀁 𑀓𑀸𑀬𑁄…𑀧𑁂… 𑀫𑀦𑀼𑀲𑁆𑀲𑀸𑀦𑀁 𑀫𑀦𑁄 𑀦 𑀓𑀸𑀫𑀥𑀸𑀢𑀽𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀦𑀼𑀲𑁆𑀲𑀸𑀦𑀁 𑀫𑀦𑁄 𑀦 𑀓𑀸𑀫𑀥𑀸𑀢𑀽𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀧𑀜𑁆𑀘 𑀓𑀸𑀫𑀕𑀼𑀡𑀸 𑀮𑁄𑀓𑁂, 𑀫𑀦𑁄𑀘𑁆𑀙𑀝𑁆𑀞𑀸 𑀧𑀯𑁂𑀤𑀺𑀢𑀸;

𑀏𑀢𑁆𑀣 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀏𑀯𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 [𑀲𑀼. 𑀦𑀺. 𑁧𑁭𑁩; 𑀲𑀁. 𑀦𑀺. 𑁧.𑁩𑁦].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀫𑀦𑀼𑀲𑁆𑀲𑀸𑀦𑀁 𑀫𑀦𑁄 𑀦 𑀓𑀸𑀫𑀥𑀸𑀢𑀽’’𑀢𑀺.

𑁫𑁧𑁧. 𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀕𑀼𑀡𑀸 𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑀸𑀫𑀕𑀼𑀡𑀽𑀧𑀕𑀁 𑀓𑀫𑁆𑀫𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑀸𑀫𑀕𑀼𑀡𑀽𑀧𑀕𑀸 𑀲𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀸𑀫𑀕𑀼𑀡𑁂 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀸𑀫𑀕𑀼𑀡𑁂 𑀅𑀢𑁆𑀣𑀺 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀸𑀫𑀕𑀼𑀡𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀸𑀫𑀕𑀼𑀡𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀸𑀯𑀓𑀬𑀼𑀕𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀸𑀫𑀥𑀸𑀢𑀼 𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀕𑀼𑀡𑀸 𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑀸𑀫𑀥𑀸𑀢𑀽𑀧𑀕𑀁 𑀓𑀫𑁆𑀫𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑀸𑀫𑀕𑀼𑀡𑀽𑀧𑀕𑀁 𑀓𑀫𑁆𑀫𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑁆𑀣𑀺 𑀓𑀸𑀫𑀥𑀸𑀢𑀽𑀧𑀕𑀸 𑀲𑀢𑁆𑀢𑀸𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑀸𑀫𑀕𑀼𑀡𑀽𑀧𑀕𑀸 𑀲𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀸𑀫𑀥𑀸𑀢𑀼𑀬𑀸 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀕𑀼𑀡𑁂 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂… 𑀓𑀸𑀫𑀥𑀸𑀢𑀼𑀬𑀸 𑀅𑀢𑁆𑀣𑀺 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀕𑀼𑀡𑁂 𑀅𑀢𑁆𑀣𑀺 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀸𑀫𑀥𑀸𑀢𑀼 𑀧𑀜𑁆𑀘𑀯𑁄𑀓𑀸𑀭𑀪𑀯𑁄𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀕𑀼𑀡𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀸𑀫𑀥𑀸𑀢𑀼𑀬𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀘𑁆𑀘𑁂𑀓𑀲𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀸𑀯𑀓𑀬𑀼𑀕𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀕𑀼𑀡𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀸𑀯𑀓𑀬𑀼𑀕𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁫𑁧𑁨. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸! 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀜𑁆𑀘𑁂𑀯 𑀓𑀸𑀫𑀕𑀼𑀡𑀸 𑀓𑀸𑀫𑀥𑀸𑀢𑀽𑀢𑀺.

𑀓𑀸𑀫𑀕𑀼𑀡𑀓𑀣𑀸 𑀦𑀺𑀝𑁆𑀞𑀺𑀢𑀸.