(𑁭𑁩) 𑁧. 𑀙𑀕𑀢𑀺𑀓𑀣𑀸

𑁫𑁦𑁩. 𑀙 𑀕𑀢𑀺𑀬𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀧𑀜𑁆𑀘 𑀕𑀢𑀺𑀬𑁄 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀦𑀺𑀭𑀬𑁄, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄, 𑀫𑀦𑀼𑀲𑁆𑀲𑀸, 𑀤𑁂𑀯𑀸𑀢𑀺 [𑀫. 𑀦𑀺. 𑁧.𑁧𑁫𑁩]? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀧𑀜𑁆𑀘 𑀕𑀢𑀺𑀬𑁄 𑀯𑀼𑀢𑁆𑀢𑀸 𑀪𑀕𑀯𑀢𑀸 𑁋 𑀦𑀺𑀭𑀬𑁄, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄, 𑀫𑀦𑀼𑀲𑁆𑀲𑀸, 𑀤𑁂𑀯𑀸; 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀙 𑀕𑀢𑀺𑀬𑁄’’𑀢𑀺.

𑀙 𑀕𑀢𑀺𑀬𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀓𑀸𑀮𑀓𑀜𑁆𑀘𑀺𑀓𑀸 [𑀓𑀸𑀮𑀓𑀜𑁆𑀚𑀺𑀓𑀸 (𑀲𑀻. 𑀲𑁆𑀬𑀸. 𑀓𑀁.), 𑀓𑀸𑀴𑀓𑀜𑁆𑀚𑀓𑀸 (𑀧𑀻.)] 𑀲𑀼𑀭𑀸 𑀧𑁂𑀢𑀸𑀦𑀁 𑀲𑀫𑀸𑀦𑀯𑀡𑁆𑀡𑀸 𑀲𑀫𑀸𑀦𑀪𑁄𑀕𑀸 𑀲𑀫𑀸𑀦𑀸𑀳𑀸𑀭𑀸 𑀲𑀫𑀸𑀦𑀸𑀬𑀼𑀓𑀸 𑀧𑁂𑀢𑁂𑀳𑀺 𑀲𑀳 𑀆𑀯𑀸𑀳𑀯𑀺𑀯𑀸𑀳𑀁 𑀕𑀘𑁆𑀙𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀓𑀸𑀮𑀓𑀜𑁆𑀘𑀺𑀓𑀸 𑀅𑀲𑀼𑀭𑀸 𑀧𑁂𑀢𑀸𑀦𑀁 𑀲𑀫𑀸𑀦𑀯𑀡𑁆𑀡𑀸 𑀲𑀫𑀸𑀦𑀪𑁄𑀕𑀸 𑀲𑀫𑀸𑀦𑀸𑀳𑀸𑀭𑀸 𑀲𑀫𑀸𑀦𑀸𑀬𑀼𑀓𑀸 𑀧𑁂𑀢𑁂𑀳𑀺 𑀲𑀳 𑀆𑀯𑀸𑀳𑀯𑀺𑀯𑀸𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀙 𑀕𑀢𑀺𑀬𑁄’’𑀢𑀺.

𑀙 𑀕𑀢𑀺𑀬𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑁂𑀧𑀘𑀺𑀢𑁆𑀢𑀺𑀧𑀭𑀺𑀲𑀸 𑀤𑁂𑀯𑀸𑀦𑀁 𑀲𑀫𑀸𑀦𑀯𑀡𑁆𑀡𑀸 𑀲𑀫𑀸𑀦𑀪𑁄𑀕𑀸 𑀲𑀫𑀸𑀦𑀸𑀳𑀸𑀭𑀸 𑀲𑀫𑀸𑀦𑀸𑀬𑀼𑀓𑀸 𑀤𑁂𑀯𑁂𑀳𑀺 𑀲𑀳 𑀆𑀯𑀸𑀳𑀯𑀺𑀯𑀸𑀳𑀁 𑀕𑀘𑁆𑀙𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀯𑁂𑀧𑀘𑀺𑀢𑁆𑀢𑀺𑀧𑀭𑀺𑀲𑀸 𑀤𑁂𑀯𑀸𑀦𑀁 𑀲𑀫𑀸𑀦𑀯𑀡𑁆𑀡𑀸 𑀲𑀫𑀸𑀦𑀪𑁄𑀕𑀸 𑀲𑀫𑀸𑀦𑀸𑀳𑀸𑀭𑀸 𑀲𑀫𑀸𑀦𑀸𑀬𑀼𑀓𑀸 𑀤𑁂𑀯𑁂𑀳𑀺 𑀲𑀳 𑀆𑀯𑀸𑀳𑀯𑀺𑀯𑀸𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀙 𑀕𑀢𑀺𑀬𑁄’’𑀢𑀺.

𑀙 𑀕𑀢𑀺𑀬𑁄𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑁂𑀧𑀘𑀺𑀢𑁆𑀢𑀺𑀧𑀭𑀺𑀲𑀸 𑀧𑀼𑀩𑁆𑀩𑀤𑁂𑀯𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀯𑁂𑀧𑀘𑀺𑀢𑁆𑀢𑀺𑀧𑀭𑀺𑀲𑀸 𑀧𑀼𑀩𑁆𑀩𑀤𑁂𑀯𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀙 𑀕𑀢𑀺𑀬𑁄’’𑀢𑀺.

𑁫𑁦𑁪. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀙 𑀕𑀢𑀺𑀬𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀅𑀲𑀼𑀭𑀓𑀸𑀬𑁄𑀢𑀺, 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀅𑀲𑀼𑀭𑀓𑀸𑀬𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀙 𑀕𑀢𑀺𑀬𑁄’’𑀢𑀺.

𑀙𑀕𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.