(𑁭𑁦) 𑁮. 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺𑀓𑀣𑀸

𑁪𑁯𑁫. 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀲𑀼𑀔𑀯𑁂𑀤𑀦𑀺𑀬𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁, 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀨𑀲𑁆𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀸𑀭𑀫𑁆𑀫𑀡𑀁; 𑀅𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄 𑀘𑁂𑀢𑀦𑀸 𑀧𑀢𑁆𑀣𑀦𑀸 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀦 𑀲𑀼𑀔𑀯𑁂𑀤𑀦𑀺𑀬𑀁 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑀁…𑀧𑁂… 𑀅𑀦𑀸𑀭𑀫𑁆𑀫𑀡𑀁; 𑀦𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀦 𑀲𑀼𑀔𑀯𑁂𑀤𑀦𑀺𑀬𑀁 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑀁…𑀧𑁂… 𑀅𑀦𑀸𑀭𑀫𑁆𑀫𑀡𑀁; 𑀦𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸 …𑀧𑁂… 𑀧𑀡𑀺𑀥𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄’’𑀢𑀺.

𑀨𑀲𑁆𑀲𑁄 𑀯𑀺𑀧𑀸𑀓𑁄, 𑀨𑀲𑁆𑀲𑁄 𑀲𑀼𑀔𑀯𑁂𑀤𑀦𑀺𑀬𑁄 𑀤𑀼𑀓𑁆𑀔𑀯𑁂𑀤𑀦𑀺𑀬𑁄…𑀧𑁂… 𑀲𑀸𑀭𑀫𑁆𑀫𑀡𑁄; 𑀅𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄, 𑀚𑀭𑀸𑀫𑀭𑀡𑀁 𑀲𑀼𑀔𑀯𑁂𑀤𑀦𑀺𑀬𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀁…𑀧𑁂… 𑀲𑀸𑀭𑀫𑁆𑀫𑀡𑀁; 𑀅𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄, 𑀚𑀭𑀸𑀫𑀭𑀡𑀁 𑀦 𑀲𑀼𑀔𑀯𑁂𑀤𑀦𑀺𑀬𑀁 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑀁…𑀧𑁂… 𑀅𑀦𑀸𑀭𑀫𑁆𑀫𑀡𑀁; 𑀦𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀆𑀫𑀦𑁆𑀢𑀸. 𑀨𑀲𑁆𑀲𑁄 𑀯𑀺𑀧𑀸𑀓𑁄, 𑀨𑀲𑁆𑀲𑁄 𑀦 𑀲𑀼𑀔𑀯𑁂𑀤𑀦𑀺𑀬𑁄 𑀦 𑀤𑀼𑀓𑁆𑀔𑀯𑁂𑀤𑀦𑀺𑀬𑁄…𑀧𑁂… 𑀅𑀦𑀸𑀭𑀫𑁆𑀫𑀡𑁄; 𑀦𑀢𑁆𑀣𑀺 𑀢𑀲𑁆𑀲 𑀆𑀯𑀝𑁆𑀝𑀦𑀸…𑀧𑁂… 𑀧𑀡𑀺𑀥𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁯𑁬. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄’’𑀢𑀺? 𑀆𑀫𑀦𑁆𑀢𑀸. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄’’𑀢𑀺? 𑀆𑀫𑀦𑁆𑀢𑀸. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀼𑀲𑀮𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄𑀢𑀺? 𑀆𑀫𑀦𑁆𑀢𑀸. 𑀓𑀼𑀲𑀮𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀓𑀼𑀲𑀮𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄’’𑀢𑀺? 𑀆𑀫𑀦𑁆𑀢𑀸. 𑀓𑀼𑀲𑀮𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀚𑀭𑀸𑀫𑀭𑀡𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄’’𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁯𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑁆𑀣𑀺 𑀤𑀼𑀩𑁆𑀩𑀡𑁆𑀡𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑁆𑀣𑀺 𑀤𑀼𑀩𑁆𑀩𑀡𑁆𑀡𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄’’𑀢𑀺.

𑀚𑀭𑀸𑀫𑀭𑀡𑀁 𑀯𑀺𑀧𑀸𑀓𑁄𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.