𑁭. 𑀲𑀢𑁆𑀢𑀫𑀯𑀕𑁆𑀕𑁄

(𑁬𑁭) 𑁫. 𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸

𑁪𑁮𑁩. 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺? 𑀆𑀫𑀦𑁆𑀢𑀸. 𑀧𑀭𑀺𑀪𑁄𑀕𑀫𑀬𑁄 𑀨𑀲𑁆𑀲𑁄 𑀯𑀟𑁆𑀠𑀢𑀺, 𑀯𑁂𑀤𑀦𑀸 𑀯𑀟𑁆𑀠𑀢𑀺, 𑀲𑀜𑁆𑀜𑀸 𑀯𑀟𑁆𑀠𑀢𑀺, 𑀘𑁂𑀢𑀦𑀸 𑀯𑀟𑁆𑀠𑀢𑀺, 𑀘𑀺𑀢𑁆𑀢𑀁 𑀯𑀟𑁆𑀠𑀢𑀺, 𑀲𑀤𑁆𑀥𑀸 𑀯𑀟𑁆𑀠𑀢𑀺, 𑀯𑀻𑀭𑀺𑀬𑀁 𑀯𑀟𑁆𑀠𑀢𑀺, 𑀲𑀢𑀺 𑀯𑀟𑁆𑀠𑀢𑀺, 𑀲𑀫𑀸𑀥𑀺 𑀯𑀟𑁆𑀠𑀢𑀺, 𑀧𑀜𑁆𑀜𑀸 𑀯𑀟𑁆𑀠𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺? 𑀆𑀫𑀦𑁆𑀢𑀸. 𑀮𑀢𑀸 𑀯𑀺𑀬 𑀯𑀟𑁆𑀠𑀢𑀺, 𑀫𑀸𑀮𑀼𑀯𑀸 𑀯𑀺𑀬 𑀯𑀟𑁆𑀠𑀢𑀺, 𑀭𑀼𑀓𑁆𑀔𑁄 𑀯𑀺𑀬 𑀯𑀟𑁆𑀠𑀢𑀺, 𑀢𑀺𑀡𑀁 𑀯𑀺𑀬 𑀯𑀟𑁆𑀠𑀢𑀺, 𑀫𑀼𑀜𑁆𑀚𑀧𑀼𑀜𑁆𑀚𑁄 𑀯𑀺𑀬 𑀯𑀟𑁆𑀠𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁮𑁪. 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀸𑀬𑀓𑁄 𑀤𑀸𑀦𑀁 𑀤𑀢𑁆𑀯𑀸 𑀦 𑀲𑀫𑀦𑁆𑀦𑀸𑀳𑀭𑀢𑀺, 𑀳𑁄𑀢𑀺 𑀧𑀼𑀜𑁆𑀜𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀦𑀸𑀯𑀝𑁆𑀝𑁂𑀦𑁆𑀢𑀲𑁆𑀲 [𑀅𑀦𑀸𑀯𑀝𑁆𑀝𑀦𑁆𑀢𑀲𑁆𑀲 (𑀲𑀻. 𑀧𑀻. 𑀓.), 𑀅𑀦𑀸𑀯𑀚𑁆𑀛𑀦𑁆𑀢𑀲𑁆𑀲 (𑀲𑁆𑀬𑀸.)] 𑀳𑁄𑀢𑀺… 𑀅𑀦𑀸𑀪𑁄𑀕𑀲𑁆𑀲 𑀳𑁄𑀢𑀺… 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲 𑀳𑁄𑀢𑀺… 𑀅𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺… 𑀅𑀘𑁂𑀢𑀬𑀦𑁆𑀢𑀲𑁆𑀲 𑀳𑁄𑀢𑀺… 𑀅𑀧𑀢𑁆𑀣𑀬𑀦𑁆𑀢𑀲𑁆𑀲 𑀳𑁄𑀢𑀺… 𑀅𑀧𑁆𑀧𑀡𑀺𑀤𑀳𑀦𑁆𑀢𑀲𑁆𑀲 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀳𑁄𑀢𑀺… 𑀆𑀪𑁄𑀕𑀲𑁆𑀲 𑀳𑁄𑀢𑀺… 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲 𑀳𑁄𑀢𑀺… 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺… 𑀘𑁂𑀢𑀬𑀦𑁆𑀢𑀲𑁆𑀲 𑀳𑁄𑀢𑀺… 𑀧𑀢𑁆𑀣𑀬𑀦𑁆𑀢𑀲𑁆𑀲 𑀳𑁄𑀢𑀺… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀆𑀯𑀝𑁆𑀝𑁂𑀦𑁆𑀢𑀲𑁆𑀲 𑀳𑁄𑀢𑀺… 𑀆𑀪𑁄𑀕𑀲𑁆𑀲 𑀳𑁄𑀢𑀺… 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲 𑀳𑁄𑀢𑀺… 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺… 𑀘𑁂𑀢𑀬𑀦𑁆𑀢𑀲𑁆𑀲 𑀳𑁄𑀢𑀺… 𑀧𑀢𑁆𑀣𑀬𑀦𑁆𑀢𑀲𑁆𑀲 𑀳𑁄𑀢𑀺… 𑀧𑀡𑀺𑀤𑀳𑀦𑁆𑀢𑀲𑁆𑀲 𑀳𑁄𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻’’𑀢𑀺.

𑁪𑁮𑁫. 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀸𑀬𑀓𑁄 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀳𑁄𑀢𑀺 𑀧𑀼𑀜𑁆𑀜𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁…𑀧𑁂… 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁…𑀧𑁂… 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀓𑀼𑀲𑀮𑀸𑀓𑀼𑀲𑀮𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀳𑀻𑀦𑀧𑀡𑀻𑀢𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀓𑀼𑀲𑀮𑀸𑀓𑀼𑀲𑀮𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀳𑀻𑀦𑀧𑀡𑀻𑀢𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀸𑀦𑀺! 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀦𑀪𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀣𑀯𑀻 𑀘 𑁋 𑀇𑀤𑀁 𑀧𑀞𑀫𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀁. 𑀑𑀭𑀺𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀻𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀸𑀭𑀺𑀫𑀜𑁆𑀘 𑀢𑀻𑀭𑀁 𑁋 𑀇𑀤𑀁 𑀤𑀼𑀢𑀺𑀬𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀁. 𑀬𑀢𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀭𑁄𑀘𑀦𑁄 𑀅𑀩𑁆𑀪𑀼𑀤𑁂𑀢𑀺 𑀬𑀢𑁆𑀣 𑀘 𑀅𑀢𑁆𑀣𑀫𑁂𑀢𑀺 𑁋 𑀇𑀤𑀁 𑀢𑀢𑀺𑀬𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀁. 𑀲𑀢𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀅𑀲𑀢𑀜𑁆𑀘 𑀥𑀫𑁆𑀫𑁄 𑁋 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀸𑀦𑀻𑀢𑀺.

‘‘𑀦𑀪𑀜𑁆𑀘 𑀤𑀽𑀭𑁂 𑀧𑀣𑀯𑀻 𑀘 𑀤𑀽𑀭𑁂,

𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀢𑀤𑀸𑀳𑀼 𑀤𑀽𑀭𑁂;

𑀬𑀢𑁄 𑀘 𑀯𑁂𑀭𑁄𑀘𑀦𑁄 𑀅𑀩𑁆𑀪𑀼𑀤𑁂𑀢𑀺,

𑀧𑀪𑀗𑁆𑀓𑀭𑁄 𑀬𑀢𑁆𑀣 𑀘 𑀅𑀢𑁆𑀣𑀫𑁂𑀢𑀺.

‘‘𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺,

𑀲𑀢𑀜𑁆𑀘 𑀥𑀫𑁆𑀫𑀁 𑀅𑀲𑀢𑀜𑁆𑀘 𑀥𑀫𑁆𑀫𑀁;

𑀅𑀩𑁆𑀬𑀸𑀬𑀺𑀓𑁄 𑀳𑁄𑀢𑀺 𑀲𑀢𑀁 𑀲𑀫𑀸𑀕𑀫𑁄,

𑀬𑀸𑀯𑀫𑁆𑀧𑀺 𑀢𑀺𑀝𑁆𑀞𑁂𑀬𑁆𑀬 𑀢𑀣𑁂𑀯 𑀳𑁄𑀢𑀺.

‘‘𑀔𑀺𑀧𑁆𑀧𑀜𑁆𑀳𑀺 𑀯𑁂𑀢𑀺 [𑀔𑀺𑀧𑁆𑀧𑀁𑀳𑀯𑁂𑀢𑀺 (𑀩𑀳𑀽𑀲𑀼)] 𑀅𑀲𑀢𑀁 𑀲𑀫𑀸𑀕𑀫𑁄;

𑀢𑀲𑁆𑀫𑀸 𑀲𑀢𑀁 𑀥𑀫𑁆𑀫𑁄 𑀅𑀲𑀩𑁆𑀪𑀺 𑀆𑀭𑀓𑀸’’𑀢𑀺 [𑀅. 𑀦𑀺. 𑁪.𑁪𑁭].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀳𑀻𑀦𑀧𑀡𑀻𑀢𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺.

𑁪𑁮𑁬. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀆𑀭𑀸𑀫𑀭𑁄𑀧𑀸 𑀯𑀦𑀭𑁄𑀧𑀸, 𑀬𑁂 𑀚𑀦𑀸 𑀲𑁂𑀢𑀼𑀓𑀸𑀭𑀓𑀸;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀬𑁂 𑀤𑀤𑀦𑁆𑀢𑀺 𑀉𑀧𑀲𑁆𑀲𑀬𑀁.

‘‘𑀢𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺;

𑀥𑀫𑁆𑀫𑀝𑁆𑀞𑀸 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀢𑁂 𑀚𑀦𑀸 𑀲𑀕𑁆𑀕𑀕𑀸𑀫𑀺𑀦𑁄’’𑀢𑀺 [𑀲𑀁. 𑀦𑀺. 𑁧.𑁪𑁭].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺.

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸 𑀲𑁄𑀯𑀕𑁆𑀕𑀺𑀓𑀸 𑀲𑀼𑀔𑀯𑀺𑀧𑀸𑀓𑀸 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺! 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀅𑀧𑁆𑀧𑀫𑀸𑀡𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀧𑁆𑀧𑀫𑀸𑀡𑁄 𑀢𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺. 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄…𑀧𑁂… 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄…𑀧𑁂… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀅𑀧𑁆𑀧𑀫𑀸𑀡𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀧𑁆𑀧𑀫𑀸𑀡𑁄 𑀢𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸 𑀲𑁄𑀯𑀕𑁆𑀕𑀺𑀓𑀸 𑀲𑀼𑀔𑀯𑀺𑀧𑀸𑀓𑀸 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 [𑀅. 𑀦𑀺. 𑁪.𑁫𑁧]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺.

𑁪𑁮𑁭. 𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀸𑀬𑀓𑁄 𑀤𑀸𑀦𑀁 𑀤𑁂𑀢𑀺, 𑀧𑀝𑀺𑀕𑁆𑀕𑀸𑀳𑀓𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀢𑀺 𑀙𑀟𑁆𑀟𑁂𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀳𑁄𑀢𑀺 𑀧𑀼𑀜𑁆𑀜𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀤𑀸𑀬𑀓𑁄 𑀤𑀸𑀦𑀁 𑀤𑁂𑀢𑀺, 𑀧𑀝𑀺𑀕𑁆𑀕𑀸𑀳𑀓𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀢𑀺 𑀙𑀟𑁆𑀟𑁂𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀳𑁄𑀢𑀺 𑀧𑀼𑀜𑁆𑀜𑀁; 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻’’𑀢𑀺.

𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻𑀢𑀺? 𑀆𑀫𑀦𑁆𑀢𑀸. 𑀤𑀸𑀬𑀓𑁄 𑀤𑀸𑀦𑀁 𑀤𑁂𑀢𑀺, 𑀧𑀝𑀺𑀕𑁆𑀕𑀸𑀳𑀓𑁂 𑀧𑀝𑀺𑀕𑁆𑀕𑀳𑀺𑀢𑁂 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀺, 𑀘𑁄𑀭𑀸 𑀯𑀸 𑀳𑀭𑀦𑁆𑀢𑀺, 𑀅𑀕𑁆𑀕𑀺 𑀯𑀸 𑀤𑀳𑀢𑀺, 𑀉𑀤𑀓𑀁 𑀯𑀸 𑀯𑀳𑀢𑀺, 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺, 𑀳𑁄𑀢𑀺 𑀧𑀼𑀜𑁆𑀜𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀤𑀸𑀬𑀓𑁄 𑀤𑀸𑀦𑀁 𑀤𑁂𑀢𑀺, 𑀧𑀝𑀺𑀕𑁆𑀕𑀸𑀳𑀓𑁂 𑀧𑀝𑀺𑀕𑁆𑀕𑀳𑀺𑀢𑁂 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀺, 𑀘𑁄𑀭𑀸 𑀯𑀸 𑀳𑀭𑀦𑁆𑀢𑀺, 𑀅𑀕𑁆𑀕𑀺 𑀯𑀸 𑀤𑀳𑀢𑀺, 𑀉𑀤𑀓𑀁 𑀯𑀸 𑀯𑀳𑀢𑀺, 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺, 𑀳𑁄𑀢𑀺 𑀧𑀼𑀜𑁆𑀜𑀁; 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀭𑀺𑀪𑁄𑀕𑀫𑀬𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀻’’𑀢𑀺.

𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸 𑀦𑀺𑀝𑁆𑀞𑀺𑀢𑀸.