𑁭. 𑀲𑀢𑁆𑀢𑀫𑀯𑀕𑁆𑀕𑁄

(𑁬𑁮) 𑁬. 𑀇𑀢𑁄𑀤𑀺𑀦𑁆𑀦𑀓𑀣𑀸

𑁪𑁮𑁮. 𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀇𑀢𑁄 𑀘𑀻𑀯𑀭𑀁 𑀤𑁂𑀦𑁆𑀢𑀺 𑀢𑀁 𑀘𑀻𑀯𑀭𑀁 𑀢𑀢𑁆𑀣 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀇𑀢𑁄 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺, 𑀇𑀢𑁄 𑀲𑁂𑀦𑀸𑀲𑀦𑀁 𑀤𑁂𑀦𑁆𑀢𑀺, 𑀇𑀢𑁄 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀤𑁂𑀦𑁆𑀢𑀺, 𑀇𑀢𑁄 𑀔𑀸𑀤𑀦𑀻𑀬𑀁 𑀤𑁂𑀦𑁆𑀢𑀺, 𑀇𑀢𑁄 𑀪𑁄𑀚𑀦𑀻𑀬𑀁 𑀤𑁂𑀦𑁆𑀢𑀺, 𑀇𑀢𑁄 𑀧𑀸𑀦𑀻𑀬𑀁 𑀤𑁂𑀦𑁆𑀢𑀺; 𑀢𑀁 𑀧𑀸𑀦𑀻𑀬𑀁 𑀢𑀢𑁆𑀣 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄 𑀧𑀭𑀓𑀢𑀁 𑀲𑀼𑀔𑀤𑀼𑀓𑁆𑀔𑀁 𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁪𑁮𑁯. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀧𑁂𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀤𑀸𑀦𑀁 𑀤𑁂𑀦𑁆𑀢𑀁 𑀅𑀦𑀼𑀫𑁄𑀤𑁂𑀦𑁆𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑀺, 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀲𑁄𑀫𑀦𑀲𑁆𑀲𑀁 𑀧𑀝𑀺𑀮𑀪𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀧𑁂𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀤𑀸𑀦𑀁 𑀤𑁂𑀦𑁆𑀢𑀁 𑀅𑀦𑀼𑀫𑁄𑀤𑁂𑀦𑁆𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑀺, 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀲𑁄𑀫𑀦𑀲𑁆𑀲𑀁 𑀧𑀝𑀺𑀮𑀪𑀦𑁆𑀢𑀺; 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻’’𑀢𑀺.

𑁪𑁯𑁦. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀉𑀦𑁆𑀦𑀫𑁂 𑀉𑀤𑀓𑀁 𑀯𑀼𑀝𑁆𑀞𑀁, 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀢𑀺;

𑀏𑀯𑀫𑁂𑀯 𑀇𑀢𑁄 𑀤𑀺𑀦𑁆𑀦𑀁, 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀺.

‘‘𑀬𑀣𑀸 𑀯𑀸𑀭𑀺𑀯𑀳𑀸 𑀧𑀽𑀭𑀸, 𑀧𑀭𑀺𑀧𑀽𑀭𑁂𑀦𑁆𑀢𑀺 𑀲𑀸𑀕𑀭𑀁;

𑀏𑀯𑀫𑁂𑀯 𑀇𑀢𑁄 𑀤𑀺𑀦𑁆𑀦𑀁, 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀺.

‘‘𑀦 𑀳𑀺 𑀢𑀢𑁆𑀣 𑀓𑀲𑀻 𑀅𑀢𑁆𑀣𑀺, 𑀕𑁄𑀭𑀓𑁆𑀔𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀯𑀡𑀺𑀚𑁆𑀚𑀸 𑀢𑀸𑀤𑀺𑀲𑀻 𑀦𑀢𑁆𑀣𑀺, 𑀳𑀺𑀭𑀜𑁆𑀜𑁂𑀦 𑀓𑀬𑀸𑀓𑀬𑀁 [𑀓𑀬𑀓𑁆𑀓𑀬𑀁 (𑀲𑀻. 𑀧𑀻.)];

𑀇𑀢𑁄 𑀤𑀺𑀦𑁆𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀧𑁂𑀢𑀸 𑀓𑀸𑀮𑀗𑁆𑀓𑀢𑀸 𑀢𑀳𑀺’’𑀦𑁆𑀢𑀺 [𑀔𑀼. 𑀧𑀸. 𑁭.𑁬; 𑀧𑁂. 𑀯. 𑁧𑁯].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻𑀢𑀺.

𑁪𑁯𑁧. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑀸𑀦𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀓𑀼𑀮𑁂 𑀚𑀸𑀬𑀫𑀸𑀦𑀁! 𑀓𑀢𑀫𑀸𑀦𑀺 𑀧𑀜𑁆𑀘? 𑀪𑀝𑁄 𑀯𑀸 𑀦𑁄 𑀪𑀭𑀺𑀲𑁆𑀲𑀢𑀺, 𑀓𑀺𑀘𑁆𑀘𑀁 𑀯𑀸 𑀦𑁄 𑀓𑀭𑀺𑀲𑁆𑀲𑀢𑀺, 𑀓𑀼𑀮𑀯𑀁𑀲𑁄 𑀘𑀺𑀭𑀁 𑀞𑀲𑁆𑀲𑀢𑀺, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀺, 𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁 𑀓𑀸𑀮𑀗𑁆𑀓𑀢𑀸𑀦𑀁 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀞𑀸𑀦𑀸𑀦𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀓𑀼𑀮𑁂 𑀚𑀸𑀬𑀫𑀸𑀦’’𑀦𑁆𑀢𑀺.

‘‘𑀧𑀜𑁆𑀘 𑀞𑀸𑀦𑀸𑀦𑀺 𑀲𑀫𑁆𑀧𑀲𑁆𑀲𑀁, 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀪𑀝𑁄 𑀯𑀸 𑀦𑁄 𑀪𑀭𑀺𑀲𑁆𑀲𑀢𑀺, 𑀓𑀺𑀘𑁆𑀘𑀁 𑀯𑀸 𑀦𑁄 𑀓𑀭𑀺𑀲𑁆𑀲𑀢𑀺.

‘‘𑀓𑀼𑀮𑀯𑀁𑀲𑁄 𑀘𑀺𑀭𑀁 𑀢𑀺𑀝𑁆𑀞𑁂, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀢𑀺;

𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁, 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀢𑀺.

‘‘𑀞𑀸𑀦𑀸𑀦𑁂𑀢𑀸𑀦𑀺 𑀲𑀫𑁆𑀧𑀲𑁆𑀲𑀁, 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑀲𑁆𑀫𑀸 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸, 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺𑀦𑁄.

‘‘𑀪𑀭𑀦𑁆𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀁;

𑀓𑀭𑁄𑀦𑁆𑀢𑀺 𑀢𑁂𑀲𑀁 𑀓𑀺𑀘𑁆𑀘𑀸𑀦𑀺, 𑀬𑀣𑀸 𑀢𑀁 𑀧𑀼𑀩𑁆𑀩𑀓𑀸𑀭𑀺𑀦𑀁.

‘‘𑀑𑀯𑀸𑀤𑀓𑀸𑀭𑀻 𑀪𑀝𑀧𑁄𑀲𑀻, 𑀓𑀼𑀮𑀯𑀁𑀲𑀁 𑀅𑀳𑀸𑀧𑀬𑀁;

𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀧𑀼𑀢𑁆𑀢𑁄 𑀳𑁄𑀢𑀺 𑀧𑀲𑀁𑀲𑀺𑀬𑁄’’𑀢𑀺 [𑀅. 𑀦𑀺. 𑁫.𑁩𑁧].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀇𑀢𑁄 𑀤𑀺𑀦𑁆𑀦𑁂𑀦 𑀢𑀢𑁆𑀣 𑀬𑀸𑀧𑁂𑀦𑁆𑀢𑀻𑀢𑀺.

𑀇𑀢𑁄 𑀤𑀺𑀦𑁆𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.