𑁫. 𑀧𑀜𑁆𑀘𑀫𑀯𑀕𑁆𑀕𑁄

(𑁫𑁧) 𑁯. 𑀧𑀝𑀼𑀧𑁆𑀧𑀦𑁆𑀦𑀓𑀣𑀸

𑁪𑁪𑁧. 𑀧𑀝𑀼𑀧𑁆𑀧𑀦𑁆𑀦𑁂 [𑀧𑀘𑁆𑀘𑀼𑀧𑁆𑀧𑀦𑁆𑀦𑁂 (𑀲𑀻. 𑀲𑁆𑀬𑀸.)] 𑀜𑀸𑀡𑀁 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀜𑀸𑀡𑁂𑀦 𑀢𑀁 𑀜𑀸𑀡𑀁 𑀚𑀸𑀦𑀸𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑁂𑀦 𑀜𑀸𑀡𑁂𑀦 𑀢𑀁 𑀜𑀸𑀡𑀁 𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀜𑀸𑀡𑁂𑀦 𑀢𑀁 𑀜𑀸𑀡𑀁 ‘‘𑀜𑀸𑀡’’𑀦𑁆𑀢𑀺 𑀚𑀸𑀦𑀸𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑁂𑀦 𑀜𑀸𑀡𑁂𑀦 𑀢𑀁 𑀜𑀸𑀡𑀁 ‘‘𑀜𑀸𑀡’’𑀦𑁆𑀢𑀺 𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀁 𑀜𑀸𑀡𑀁 𑀢𑀲𑁆𑀲 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀢𑀁 𑀜𑀸𑀡𑀁 𑀢𑀲𑁆𑀲 𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀨𑀲𑁆𑀲𑁂𑀦 𑀢𑀁 𑀨𑀲𑁆𑀲𑀁 𑀨𑀼𑀲𑀢𑀺, 𑀢𑀸𑀬 𑀯𑁂𑀤𑀦𑀸𑀬 𑀢𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀢𑀁 𑀲𑀜𑁆𑀜𑀁 𑀲𑀜𑁆𑀚𑀸𑀦𑀸𑀢𑀺, 𑀢𑀸𑀬 𑀘𑁂𑀢𑀦𑀸𑀬 𑀢𑀁 𑀘𑁂𑀢𑀦𑀁 𑀘𑁂𑀢𑁂𑀢𑀺, 𑀢𑁂𑀦 𑀘𑀺𑀢𑁆𑀢𑁂𑀦 𑀢𑀁 𑀘𑀺𑀢𑁆𑀢𑀁 𑀘𑀺𑀦𑁆𑀢𑁂𑀢𑀺, 𑀢𑁂𑀦 𑀯𑀺𑀢𑀓𑁆𑀓𑁂𑀦 𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀢𑁂𑀦 𑀯𑀺𑀘𑀸𑀭𑁂𑀦 𑀢𑀁 𑀯𑀺𑀘𑀸𑀭𑀁 𑀯𑀺𑀘𑀸𑀭𑁂𑀢𑀺, 𑀢𑀸𑀬 𑀧𑀻𑀢𑀺𑀬𑀸 𑀢𑀁 𑀧𑀻𑀢𑀺𑀁 𑀧𑀺𑀬𑀸𑀬𑀢𑀺, 𑀢𑀸𑀬 𑀲𑀢𑀺𑀬𑀸 𑀢𑀁 𑀲𑀢𑀺𑀁 𑀲𑀭𑀢𑀺, 𑀢𑀸𑀬 𑀧𑀜𑁆𑀜𑀸𑀬 𑀢𑀁 𑀧𑀜𑁆𑀜𑀁 𑀧𑀚𑀸𑀦𑀸𑀢𑀺, 𑀢𑁂𑀦 𑀔𑀕𑁆𑀕𑁂𑀦 𑀢𑀁 𑀔𑀕𑁆𑀕𑀁 𑀙𑀺𑀦𑁆𑀤𑀢𑀺, 𑀢𑁂𑀦 𑀨𑀭𑀲𑀼𑀦𑀸 𑀢𑀁 𑀨𑀭𑀲𑀼𑀁 𑀢𑀘𑁆𑀙𑀢𑀺, 𑀢𑀸𑀬 𑀓𑀼𑀥𑀸𑀭𑀺𑀬𑀸 𑀢𑀁 𑀓𑀼𑀥𑀸𑀭𑀺𑀁 𑀢𑀘𑁆𑀙𑀢𑀺, 𑀢𑀸𑀬 𑀯𑀸𑀲𑀺𑀬𑀸 𑀢𑀁 𑀯𑀸𑀲𑀺𑀁 𑀢𑀘𑁆𑀙𑀢𑀺, 𑀢𑀸𑀬 𑀲𑀽𑀘𑀺𑀬𑀸 𑀢𑀁 𑀲𑀽𑀘𑀺𑀁 𑀲𑀺𑀩𑁆𑀩𑁂𑀢𑀺, 𑀢𑁂𑀦 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀧𑀭𑀸𑀫𑀲𑀢𑀺, 𑀢𑁂𑀦 𑀦𑀸𑀲𑀺𑀓𑀕𑁆𑀕𑁂𑀦 𑀢𑀁 𑀦𑀸𑀲𑀺𑀓𑀕𑁆𑀕𑀁 𑀧𑀭𑀸𑀫𑀲𑀢𑀺, 𑀢𑁂𑀦 𑀫𑀢𑁆𑀣𑀓𑁂𑀦 𑀢𑀁 𑀫𑀢𑁆𑀣𑀓𑀁 𑀧𑀭𑀸𑀫𑀲𑀢𑀺, 𑀢𑁂𑀦 𑀕𑀽𑀣𑁂𑀦 𑀢𑀁 𑀕𑀽𑀣𑀁 𑀥𑁄𑀯𑀢𑀺, 𑀢𑁂𑀦 𑀫𑀼𑀢𑁆𑀢𑁂𑀦 𑀢𑀁 𑀫𑀼𑀢𑁆𑀢𑀁 𑀥𑁄𑀯𑀢𑀺, 𑀢𑁂𑀦 𑀔𑁂𑀴𑁂𑀦 𑀢𑀁 𑀔𑁂𑀴𑀁 𑀥𑁄𑀯𑀢𑀺, 𑀢𑁂𑀦 𑀧𑀼𑀩𑁆𑀩𑁂𑀦 𑀢𑀁 𑀧𑀼𑀩𑁆𑀩𑀁 𑀥𑁄𑀯𑀢𑀺, 𑀢𑁂𑀦 𑀮𑁄𑀳𑀺𑀢𑁂𑀦 𑀢𑀁 𑀮𑁄𑀳𑀺𑀢𑀁 𑀥𑁄𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂….

𑁪𑁪𑁨. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀝𑀼𑀧𑁆𑀧𑀦𑁆𑀦𑁂 𑀜𑀸𑀡𑀁 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑁂 𑀢𑀫𑁆𑀧𑀺 𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀁 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑁂 𑀢𑀫𑁆𑀧𑀺 𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀤𑀺𑀝𑁆𑀞𑀁 𑀳𑁄𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀧𑀝𑀼𑀧𑁆𑀧𑀦𑁆𑀦𑁂 𑀜𑀸𑀡𑀁 𑀅𑀢𑁆𑀣𑀻’’𑀢𑀺.

𑀧𑀝𑀼𑀧𑁆𑀧𑀦𑁆𑀦𑀜𑀸𑀡𑀓𑀣𑀸 [𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀣𑀸 (𑀲𑀻.)] 𑀦𑀺𑀝𑁆𑀞𑀺𑀢𑀸.