(𑁩𑁦) 𑁧𑁦. 𑀲𑀁𑀯𑀭𑀓𑀣𑀸

𑁩𑁭𑁯. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀅𑀲𑀁𑀯𑀭𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀢𑁆𑀣𑀺 𑀤𑁂𑀯𑁂𑀲𑀼 𑀅𑀲𑀁𑀯𑀭𑁄𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮𑀁, 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀅𑀲𑀁𑀯𑀭𑁄, 𑀬𑀫𑁆𑀳𑀸 𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁. 𑀳𑀜𑁆𑀘𑀺 𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮𑀁, 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀤𑁂𑀯𑁂𑀲𑀼 𑀅𑀲𑀁𑀯𑀭𑁄, 𑀬𑀫𑁆𑀳𑀸 𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮’’𑀦𑁆𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 𑁋 ‘‘𑀯𑀢𑁆𑀢𑀩𑁆𑀩𑁂 𑀔𑁄 𑁋 ‘𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮𑀁, 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄,’ 𑀦𑁄 𑀘 𑀯𑀢𑁆𑀢𑀩𑁆𑀩𑁂 𑁋 ‘𑀅𑀢𑁆𑀣𑀺 𑀤𑁂𑀯𑁂𑀲𑀼 𑀅𑀲𑀁𑀯𑀭𑁄, 𑀬𑀫𑁆𑀳𑀸 𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮’’’𑀦𑁆𑀢𑀺 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑁆𑀣𑀺 𑀤𑁂𑀯𑁂𑀲𑀼 𑀅𑀲𑀁𑀯𑀭𑁄, 𑀬𑀫𑁆𑀳𑀸 𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮’’𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮𑀁, 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 𑁋 ‘‘𑀯𑀢𑁆𑀢𑀩𑁆𑀩𑁂 𑀔𑁄 ‘𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮𑀁, 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄,’ 𑀦𑁄 𑀘 𑀯𑀢𑁆𑀢𑀩𑁆𑀩𑁂 𑁋 ‘𑀅𑀢𑁆𑀣𑀺 𑀤𑁂𑀯𑁂𑀲𑀼 𑀅𑀲𑀁𑀯𑀭𑁄, 𑀬𑀫𑁆𑀳𑀸 𑀅𑀲𑀁𑀯𑀭𑀸 𑀲𑀁𑀯𑀭𑁄 𑀲𑀻𑀮’’’𑀦𑁆𑀢𑀺 𑀫𑀺𑀘𑁆𑀙𑀸.

𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀲𑀁𑀯𑀭𑁄, 𑀅𑀢𑁆𑀣𑀺 𑀢𑀢𑁆𑀣 𑀅𑀲𑀁𑀯𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄, 𑀅𑀢𑁆𑀣𑀺 𑀢𑀢𑁆𑀣 𑀅𑀲𑀁𑀯𑀭𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄, 𑀦𑀢𑁆𑀣𑀺 𑀢𑀢𑁆𑀣 𑀅𑀲𑀁𑀯𑀭𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀲𑀁𑀯𑀭𑁄, 𑀦𑀢𑁆𑀣𑀺 𑀢𑀢𑁆𑀣 𑀅𑀲𑀁𑀯𑀭𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁮𑁦. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀢𑁆𑀣𑀺 𑀤𑁂𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑁄𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀢𑁆𑀣𑀺 𑀤𑁂𑀯𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀅𑀢𑁆𑀣𑀺 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀅𑀢𑁆𑀣𑀺 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀤𑁂𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀦𑀢𑁆𑀣𑀺 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀦𑀢𑁆𑀣𑀺 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺, 𑀦𑀢𑁆𑀣𑀺 𑀢𑀢𑁆𑀣 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺, 𑀦𑀢𑁆𑀣𑀺 𑀢𑀢𑁆𑀣 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀤𑁂𑀯𑀸 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀦𑁄 𑀫𑀼𑀲𑀸𑀯𑀸𑀤𑀺𑀦𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀺𑀦𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀢𑁂𑀦 𑀳𑀺 𑀅𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄𑀢𑀺.

𑀲𑀁𑀯𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.