𑁩. 𑀢𑀢𑀺𑀬𑀯𑀕𑁆𑀕𑁄

(𑁩𑁧) 𑁧𑁧. 𑀅𑀲𑀜𑁆𑀜𑀓𑀣𑀸

𑁩𑁮𑁧. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀺 𑀲𑀜𑁆𑀜𑀸𑀲𑀢𑁆𑀢𑀸𑀯𑀸𑀲𑁄 𑀲𑀜𑁆𑀜𑀸𑀲𑀁𑀲𑀸𑀭𑁄 𑀲𑀜𑁆𑀜𑀸𑀬𑁄𑀦𑀺 𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀅𑀲𑀜𑁆𑀜𑀪𑀯𑁄 𑀅𑀲𑀜𑁆𑀜𑀕𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁄 𑀅𑀲𑀜𑁆𑀜𑀲𑀁𑀲𑀸𑀭𑁄 𑀅𑀲𑀜𑁆𑀜𑀬𑁄𑀦𑀺 𑀅𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀲𑀜𑁆𑀜𑀪𑀯𑁄 𑀅𑀲𑀜𑁆𑀜𑀕𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁄 𑀅𑀲𑀜𑁆𑀜𑀲𑀁𑀲𑀸𑀭𑁄 𑀅𑀲𑀜𑁆𑀜𑀬𑁄𑀦𑀺 𑀅𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺.

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦𑀦𑀼 𑀏𑀓𑀯𑁄𑀓𑀸𑀭𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀏𑀓𑀯𑁄𑀓𑀸𑀭𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺.

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀢𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀓𑀭𑀡𑀻𑀬𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁮𑁨. 𑀫𑀦𑀼𑀲𑁆𑀲𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀺 𑀲𑀜𑁆𑀜𑀸𑀲𑀢𑁆𑀢𑀸𑀯𑀸𑀲𑁄 𑀲𑀜𑁆𑀜𑀸𑀲𑀁𑀲𑀸𑀭𑁄 𑀲𑀜𑁆𑀜𑀸𑀬𑁄𑀦𑀺 𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀦𑀼𑀲𑁆𑀲𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀫𑀦𑀼𑀲𑁆𑀲𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀢𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀓𑀭𑀡𑀻𑀬𑀁 𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀢𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀓𑀭𑀡𑀻𑀬𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀅𑀲𑀜𑁆𑀜𑀪𑀯𑁄 𑀅𑀲𑀜𑁆𑀜𑀕𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀯𑀸𑀲𑁄 𑀅𑀲𑀜𑁆𑀜𑀲𑀁𑀲𑀸𑀭𑁄 𑀅𑀲𑀜𑁆𑀜𑀬𑁄𑀦𑀺 𑀅𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀫𑀦𑀼𑀲𑁆𑀲𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀅𑀲𑀜𑁆𑀜𑀪𑀯𑁄 𑀅𑀲𑀜𑁆𑀜𑀕𑀢𑀺…𑀧𑁂… 𑀅𑀲𑀜𑁆𑀜𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀏𑀓𑀯𑁄𑀓𑀸𑀭𑀪𑀯𑁄 𑀕𑀢𑀺 𑀲𑀢𑁆𑀢𑀸𑀯𑀸𑀲𑁄 𑀲𑀁𑀲𑀸𑀭𑁄 𑀬𑁄𑀦𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀆𑀫𑀦𑁆𑀢𑀸. 𑀫𑀦𑀼𑀲𑁆𑀲𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀲𑁄 𑀘 𑀏𑀓𑀯𑁄𑀓𑀸𑀭𑀪𑀯𑁄 𑀕𑀢𑀺…𑀧𑁂… 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀦 𑀘 𑀢𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀓𑀭𑀡𑀻𑀬𑀁 𑀓𑀭𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀫𑀦𑀼𑀲𑁆𑀲𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀺, 𑀦 𑀘 𑀢𑀸𑀬 𑀲𑀜𑁆𑀜𑀸𑀬 𑀲𑀜𑁆𑀜𑀸𑀓𑀭𑀡𑀻𑀬𑀁 𑀓𑀭𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁮𑁩. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀜𑁆𑀜𑀲𑀢𑁆𑀢𑀸 𑀦𑀸𑀫 𑀤𑁂𑀯𑀸; 𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀻’’𑀢𑀺 [𑀤𑀻. 𑀦𑀺. 𑁧.𑁬𑁮]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺.

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺? 𑀓𑀺𑀜𑁆𑀘𑀺 [𑀓𑀜𑁆𑀘𑀺 (𑀲𑁆𑀬𑀸.)] 𑀓𑀸𑀮𑁂 𑀅𑀢𑁆𑀣𑀺, 𑀓𑀺𑀜𑁆𑀘𑀺 𑀓𑀸𑀮𑁂 𑀦𑀢𑁆𑀣𑀻𑀢𑀺. 𑀓𑀺𑀜𑁆𑀘𑀺 𑀓𑀸𑀮𑁂 𑀲𑀜𑁆𑀜𑀲𑀢𑁆𑀢𑀸 𑀓𑀺𑀜𑁆𑀘𑀺 𑀓𑀸𑀮𑁂 𑀅𑀲𑀜𑁆𑀜𑀲𑀢𑁆𑀢𑀸, 𑀓𑀺𑀜𑁆𑀘𑀺 𑀓𑀸𑀮𑁂 𑀲𑀜𑁆𑀜𑀪𑀯𑁄 𑀓𑀺𑀜𑁆𑀘𑀺 𑀓𑀸𑀮𑁂 𑀅𑀲𑀜𑁆𑀜𑀪𑀯𑁄, 𑀓𑀺𑀜𑁆𑀘𑀺 𑀓𑀸𑀮𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀓𑀺𑀜𑁆𑀘𑀺 𑀓𑀸𑀮𑁂 𑀏𑀓𑀯𑁄𑀓𑀸𑀭𑀪𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀲𑀜𑁆𑀜𑀸 𑀓𑀺𑀜𑁆𑀘𑀺 𑀓𑀸𑀮𑁂 𑀅𑀢𑁆𑀣𑀺, 𑀓𑀺𑀜𑁆𑀘𑀺 𑀓𑀸𑀮𑁂 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀓𑀁 𑀓𑀸𑀮𑀁 𑀅𑀢𑁆𑀣𑀺, 𑀓𑀁 𑀓𑀸𑀮𑀁 𑀦𑀢𑁆𑀣𑀻𑀢𑀺? 𑀘𑀼𑀢𑀺𑀓𑀸𑀮𑁂 𑀉𑀧𑀧𑀢𑁆𑀢𑀺𑀓𑀸𑀮𑁂 𑀅𑀢𑁆𑀣𑀺, 𑀞𑀺𑀢𑀺𑀓𑀸𑀮𑁂 𑀦𑀢𑁆𑀣𑀻𑀢𑀺. 𑀘𑀼𑀢𑀺𑀓𑀸𑀮𑁂 𑀉𑀧𑀧𑀢𑁆𑀢𑀺𑀓𑀸𑀮𑁂 𑀲𑀜𑁆𑀜𑀲𑀢𑁆𑀢𑀸, 𑀞𑀺𑀢𑀺𑀓𑀸𑀮𑁂 𑀅𑀲𑀜𑁆𑀜𑀲𑀢𑁆𑀢𑀸; 𑀘𑀼𑀢𑀺𑀓𑀸𑀮𑁂 𑀉𑀧𑀧𑀢𑁆𑀢𑀺𑀓𑀸𑀮𑁂 𑀲𑀜𑁆𑀜𑀪𑀯𑁄, 𑀞𑀺𑀢𑀺𑀓𑀸𑀮𑁂 𑀅𑀲𑀜𑁆𑀜𑀪𑀯𑁄; 𑀘𑀼𑀢𑀺𑀓𑀸𑀮𑁂 𑀉𑀧𑀧𑀢𑁆𑀢𑀺𑀓𑀸𑀮𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁄, 𑀞𑀺𑀢𑀺𑀓𑀸𑀮𑁂 𑀏𑀓𑀯𑁄𑀓𑀸𑀭𑀪𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀲𑀜𑁆𑀜𑀓𑀣𑀸 𑀦𑀺𑀝𑁆𑀞𑀺𑀢𑀸.