𑁧𑁦. 𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄

𑁬𑁧. 𑀭𑀽𑀧𑀥𑀸𑀢𑀼𑀬𑀸 𑀭𑀽𑀧𑀻 𑀧𑀼𑀕𑁆𑀕𑀮𑁄𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀻 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁨. 𑀭𑀽𑀧𑀥𑀸𑀢𑀼𑀬𑀸 𑀭𑀽𑀧𑀺𑀦𑁄 𑀲𑀢𑁆𑀢𑀸𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀺𑀦𑁄 𑀲𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁩. 𑀅𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀻 𑀧𑀼𑀕𑁆𑀕𑀮𑁄𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀻 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁪. 𑀅𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀺𑀦𑁄 𑀲𑀢𑁆𑀢𑀸𑀢𑀺? 𑀆𑀫𑀦𑁆𑀢𑀸. 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀺𑀦𑁄 𑀲𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁫. 𑀭𑀽𑀧𑀥𑀸𑀢𑀼𑀬𑀸 𑀭𑀽𑀧𑀻 𑀧𑀼𑀕𑁆𑀕𑀮𑁄 𑀅𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀻 𑀧𑀼𑀕𑁆𑀕𑀮𑁄, 𑀅𑀢𑁆𑀣𑀺 𑀘 𑀓𑁄𑀘𑀺 𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑁄 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀻 𑀧𑀼𑀕𑁆𑀕𑀮𑁄 𑀉𑀧𑀘𑁆𑀙𑀺𑀦𑁆𑀦𑁄, 𑀅𑀭𑀽𑀧𑀻 𑀧𑀼𑀕𑁆𑀕𑀮𑁄 𑀚𑀸𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁬. 𑀭𑀽𑀧𑀥𑀸𑀢𑀼𑀬𑀸 𑀭𑀽𑀧𑀺𑀦𑁄 𑀲𑀢𑁆𑀢𑀸 𑀅𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀺𑀦𑁄 𑀲𑀢𑁆𑀢𑀸, 𑀅𑀢𑁆𑀣𑀺 𑀘 𑀓𑁄𑀘𑀺 𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑁄 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀻 𑀲𑀢𑁆𑀢𑁄 𑀉𑀧𑀘𑁆𑀙𑀺𑀦𑁆𑀦𑁄, 𑀅𑀭𑀽𑀧𑀻 𑀲𑀢𑁆𑀢𑁄 𑀚𑀸𑀢𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁬𑁭. 𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂𑀢𑀺? 𑀆𑀫𑀦𑁆𑀢𑀸. 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀚𑀻𑀯𑁄𑀢𑀺 𑀯𑀸, 𑀚𑀻𑀯𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸, 𑀧𑀼𑀕𑁆𑀕𑀮𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑁄 𑀓𑀸𑀬𑁄, 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀚𑀻𑀯𑀁, 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁. 𑀳𑀜𑁆𑀘𑀺 𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀚𑀻𑀯𑁄𑀢𑀺 𑀯𑀸, 𑀚𑀻𑀯𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸, 𑀧𑀼𑀕𑁆𑀕𑀮𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄; 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 𑁋 ‘‘𑀯𑀢𑁆𑀢𑀩𑁆𑀩𑁂 𑀔𑁄 𑁋 ‘𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀚𑀻𑀯𑁄𑀢𑀺 𑀯𑀸, 𑀚𑀻𑀯𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸, 𑀧𑀼𑀕𑁆𑀕𑀮𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄,’ 𑀦𑁄 𑀘 𑀯𑀢𑁆𑀢𑀩𑁆𑀩𑁂 𑁋 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’’𑀦𑁆𑀢𑀺 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀚𑀻𑀯𑁄𑀢𑀺 𑀯𑀸, 𑀚𑀻𑀯𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸, 𑀧𑀼𑀕𑁆𑀕𑀮𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 𑁋 ‘‘𑀯𑀢𑁆𑀢𑀩𑁆𑀩𑁂 𑀔𑁄 𑁋 ‘𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀚𑀻𑀯𑁄𑀢𑀺 𑀯𑀸, 𑀚𑀻𑀯𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸, 𑀧𑀼𑀕𑁆𑀕𑀮𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄’, 𑀦𑁄 𑀘 𑀯𑀢𑁆𑀢𑀩𑁆𑀩𑁂 𑁋 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’’𑀦𑁆𑀢𑀺 𑀫𑀺𑀘𑁆𑀙𑀸…𑀧𑁂….

𑁬𑁮. 𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂𑀢𑀺? 𑀆𑀫𑀦𑁆𑀢𑀸. 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.

𑀆𑀚𑀸𑀦𑀸𑀳𑀺 𑀧𑀝𑀺𑀓𑀫𑁆𑀫𑀁. 𑀳𑀜𑁆𑀘𑀺 𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄,’’ 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 𑁋 ‘‘𑀯𑀢𑁆𑀢𑀩𑁆𑀩𑁂 𑀔𑁄 𑁋 ‘𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄,’ 𑀦𑁄 𑀘 𑀯𑀢𑁆𑀢𑀩𑁆𑀩𑁂 𑁋 ‘𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄’’’𑀢𑀺 𑀫𑀺𑀘𑁆𑀙𑀸.

𑀦𑁄 𑀘𑁂 𑀧𑀦 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄’’𑀢𑀺, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄’’’𑀢𑀺. 𑀬𑀁 𑀢𑀢𑁆𑀣 𑀯𑀤𑁂𑀲𑀺 𑁋 ‘‘𑀯𑀢𑁆𑀢𑀩𑁆𑀩𑁂 𑀔𑁄 𑁋 ‘𑀓𑀸𑀬𑁄𑀢𑀺 𑀯𑀸 𑀲𑀭𑀻𑀭𑀦𑁆𑀢𑀺 𑀯𑀸, 𑀲𑀭𑀻𑀭𑀦𑁆𑀢𑀺 𑀯𑀸 𑀓𑀸𑀬𑁄𑀢𑀺 𑀯𑀸, 𑀓𑀸𑀬𑀁 𑀅𑀧𑁆𑀧𑀺𑀬𑀁 𑀓𑀭𑀺𑀢𑁆𑀯𑀸 𑀏𑀲𑁂𑀲𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂, 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄,’ 𑀦𑁄 𑀘 𑀯𑀢𑁆𑀢𑀩𑁆𑀩𑁂 𑁋 ‘𑀅𑀜𑁆𑀜𑁄 𑀓𑀸𑀬𑁄 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄’’’𑀢𑀺 𑀫𑀺𑀘𑁆𑀙𑀸. (𑀲𑀁𑀔𑀺𑀢𑁆𑀢𑀁)

𑀧𑀜𑁆𑀜𑀢𑁆𑀢𑀸𑀦𑀼𑀬𑁄𑀕𑁄.