𑁧𑁧. 𑀕𑀢𑀺𑀅𑀦𑀼𑀬𑁄𑀕𑁄

𑁬𑁯. 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑁄 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂….

𑁭𑁦. 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁧. 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑁄 𑀘 𑀅𑀜𑁆𑀜𑁄 𑀘 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁨. 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑁂𑀯 𑀲𑁄 𑀲𑀦𑁆𑀥𑀸𑀯𑀢𑀺, 𑀦 𑀅𑀜𑁆𑀜𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁩. 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑁄 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺, 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺, 𑀲𑁄 𑀘 𑀅𑀜𑁆𑀜𑁄 𑀘 𑀲𑀦𑁆𑀥𑀸𑀯𑀢𑀺, 𑀦𑁂𑀯 𑀲𑁄 𑀲𑀦𑁆𑀥𑀸𑀯𑀢𑀺 𑀦 𑀅𑀜𑁆𑀜𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁪. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀁, 𑀲𑀦𑁆𑀥𑀸𑀯𑀺𑀢𑁆𑀯𑀸𑀦 𑀧𑀼𑀕𑁆𑀕𑀮𑁄;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀸’’𑀢𑀺 [𑀲𑀁. 𑀦𑀺. 𑁨.𑁧𑁩𑁩; 𑀇𑀢𑀺𑀯𑀼. 𑁨𑁪 𑀇𑀢𑀺𑀯𑀼𑀢𑁆𑀢𑀓𑁂𑀧𑀺].

𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺.

𑁭𑁫. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀦𑀫𑀢𑀕𑁆𑀕𑁄𑀬𑀁 [𑀅𑀦𑀫𑀢𑀕𑁆𑀕𑀸𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄. 𑀧𑀼𑀩𑁆𑀩𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 [𑀲𑀁. 𑀦𑀺. 𑁨.𑁧𑁨𑁪]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑁂𑀦 𑀳𑀺 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺.

𑁭𑁬. 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁭. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀤𑁂𑀯𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀫𑀦𑀼𑀲𑁆𑀲𑁄 𑀲𑁄 𑀤𑁂𑀯𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁭𑁮. 𑀲𑁆𑀯𑁂𑀯 𑀫𑀦𑀼𑀲𑁆𑀲𑁄 𑀲𑁄 𑀤𑁂𑀯𑁄𑀢𑀺? 𑀆𑀫𑀦𑁆𑀢𑀸. 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀤𑁂𑀯𑁄 𑀳𑁄𑀢𑀺, 𑀤𑁂𑀯𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑁄 𑀳𑁄𑀢𑀺, 𑀫𑀦𑀼𑀲𑁆𑀲𑀪𑀽𑀢𑁄 𑀅𑀜𑁆𑀜𑁄, 𑀤𑁂𑀯𑁄 𑀅𑀜𑁆𑀜𑁄, 𑀫𑀦𑀼𑀲𑁆𑀲𑀪𑀽𑀢𑁄 𑀲𑁆𑀯𑁂𑀯𑀸𑀬𑀁 𑀲𑀦𑁆𑀥𑀸𑀯𑀢𑀻𑀢𑀺 𑀫𑀺𑀘𑁆𑀙𑀸…𑀧𑁂….

𑀲𑀘𑁂 𑀳𑀺 𑀲𑀦𑁆𑀥𑀸𑀯𑀢𑀺 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀇𑀢𑁄 𑀘𑀼𑀢𑁄 𑀧𑀭𑀁 𑀮𑁄𑀓𑀁 𑀅𑀦𑀜𑁆𑀜𑁄, 𑀳𑁂𑀯𑀁 𑀫𑀭𑀡𑀁 𑀦 𑀳𑁂𑀳𑀺𑀢𑀺, 𑀧𑀸𑀡𑀸𑀢𑀺𑀧𑀸𑀢𑁄𑀧𑀺 𑀦𑀼𑀧𑀮𑀩𑁆𑀪𑀢𑀺. 𑀓𑀫𑁆𑀫𑀁 𑀅𑀢𑁆𑀣𑀺, 𑀓𑀫𑁆𑀫𑀯𑀺𑀧𑀸𑀓𑁄 𑀅𑀢𑁆𑀣𑀺, 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀅𑀢𑁆𑀣𑀺, 𑀓𑀼𑀲𑀮𑀸𑀓𑀼𑀲𑀮𑁂 𑀯𑀺𑀧𑀘𑁆𑀘𑀫𑀸𑀦𑁂 𑀲𑁆𑀯𑁂𑀯𑀸𑀬𑀁 𑀲𑀦𑁆𑀥𑀸𑀯𑀢𑀻𑀢𑀺 𑀫𑀺𑀘𑁆𑀙𑀸.

𑁭𑁯. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀬𑀓𑁆𑀔𑁄 𑀳𑁄𑀢𑀺, 𑀧𑁂𑀢𑁄 𑀳𑁄𑀢𑀺, 𑀦𑁂𑀭𑀬𑀺𑀓𑁄 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀳𑁄𑀢𑀺, 𑀑𑀝𑁆𑀞𑁄 𑀳𑁄𑀢𑀺, 𑀕𑁄𑀡𑁄 𑀳𑁄𑀢𑀺, 𑀕𑀤𑁆𑀭𑀪𑁄 𑀳𑁄𑀢𑀺, 𑀲𑀽𑀓𑀭𑁄 𑀳𑁄𑀢𑀺, 𑀫𑀳𑀺𑀁𑀲𑁄 [𑀫𑀳𑀺𑀲𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀫𑀦𑀼𑀲𑁆𑀲𑁄 𑀲𑁄 𑀫𑀳𑀺𑀁𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁦. 𑀲𑁆𑀯𑁂𑀯 𑀫𑀦𑀼𑀲𑁆𑀲𑁄 𑀲𑁄 𑀫𑀳𑀺𑀁𑀲𑁄𑀢𑀺? 𑀆𑀫𑀦𑁆𑀢𑀸. 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸 𑀫𑀳𑀺𑀁𑀲𑁄 𑀳𑁄𑀢𑀺, 𑀫𑀳𑀺𑀁𑀲𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑁄 𑀳𑁄𑀢𑀺, 𑀫𑀦𑀼𑀲𑁆𑀲𑀪𑀽𑀢𑁄 𑀅𑀜𑁆𑀜𑁄, 𑀫𑀳𑀺𑀁𑀲𑁄 𑀅𑀜𑁆𑀜𑁄, 𑀫𑀦𑀼𑀲𑁆𑀲𑀪𑀽𑀢𑁄 𑀲𑁆𑀯𑁂𑀯𑀸𑀬𑀁 𑀲𑀦𑁆𑀥𑀸𑀯𑀢𑀻𑀢𑀺 𑀫𑀺𑀘𑁆𑀙𑀸…𑀧𑁂….

𑀲𑀘𑁂 𑀳𑀺 𑀲𑀦𑁆𑀥𑀸𑀯𑀢𑀺 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀇𑀢𑁄 𑀘𑀼𑀢𑁄 𑀧𑀭𑀁 𑀮𑁄𑀓𑀁 𑀅𑀦𑀜𑁆𑀜𑁄, 𑀳𑁂𑀯𑀁 𑀫𑀭𑀡𑀁 𑀦 𑀳𑁂𑀳𑀺𑀢𑀺, 𑀧𑀸𑀡𑀸𑀢𑀺𑀧𑀸𑀢𑁄𑀧𑀺 𑀦𑀼𑀧𑀮𑀩𑁆𑀪𑀢𑀺. 𑀓𑀫𑁆𑀫𑀁 𑀅𑀢𑁆𑀣𑀺, 𑀓𑀫𑁆𑀫𑀯𑀺𑀧𑀸𑀓𑁄 𑀅𑀢𑁆𑀣𑀺, 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀅𑀢𑁆𑀣𑀺, 𑀓𑀼𑀲𑀮𑀸𑀓𑀼𑀲𑀮𑁂 𑀯𑀺𑀧𑀘𑁆𑀘𑀫𑀸𑀦𑁂 𑀲𑁆𑀯𑁂𑀯𑀸𑀬𑀁 𑀲𑀦𑁆𑀥𑀸𑀯𑀢𑀻𑀢𑀺 𑀫𑀺𑀘𑁆𑀙𑀸.

𑁮𑁧. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀢𑁆𑀣𑀺 𑀓𑁄𑀘𑀺 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀔𑀢𑁆𑀢𑀺𑀬𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁨. 𑀅𑀢𑁆𑀣𑀺 𑀓𑁄𑀘𑀺 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀯𑁂𑀲𑁆𑀲𑁄 𑀳𑁄𑀢𑀺, 𑀲𑀼𑀤𑁆𑀤𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀔𑀢𑁆𑀢𑀺𑀬𑁄 𑀲𑁄 𑀲𑀼𑀤𑁆𑀤𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁩. 𑀅𑀢𑁆𑀣𑀺 𑀓𑁄𑀘𑀺 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀯𑁂𑀲𑁆𑀲𑁄 𑀳𑁄𑀢𑀺, 𑀲𑀼𑀤𑁆𑀤𑁄 𑀳𑁄𑀢𑀺, 𑀔𑀢𑁆𑀢𑀺𑀬𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀩𑁆𑀭𑀸𑀳𑁆𑀫𑀡𑁄 𑀲𑁄 𑀔𑀢𑁆𑀢𑀺𑀬𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁪. 𑀅𑀢𑁆𑀣𑀺 𑀓𑁄𑀘𑀺 𑀯𑁂𑀲𑁆𑀲𑁄 𑀳𑀼𑀢𑁆𑀯𑀸 𑀲𑀼𑀤𑁆𑀤𑁄 𑀳𑁄𑀢𑀺, 𑀔𑀢𑁆𑀢𑀺𑀬𑁄 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀯𑁂𑀲𑁆𑀲𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁫. 𑀅𑀢𑁆𑀣𑀺 𑀓𑁄𑀘𑀺 𑀲𑀼𑀤𑁆𑀤𑁄 𑀳𑀼𑀢𑁆𑀯𑀸 𑀔𑀢𑁆𑀢𑀺𑀬𑁄 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀯𑁂𑀲𑁆𑀲𑁄 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁆𑀯𑁂𑀯 𑀲𑀼𑀤𑁆𑀤𑁄 𑀲𑁄 𑀯𑁂𑀲𑁆𑀲𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁬. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀳𑀢𑁆𑀣𑀘𑁆𑀙𑀺𑀦𑁆𑀦𑁄𑀯 𑀳𑁄𑀢𑀺, 𑀧𑀸𑀤𑀘𑁆𑀙𑀺𑀦𑁆𑀦𑁄 𑀧𑀸𑀤𑀘𑁆𑀙𑀺𑀦𑁆𑀦𑁄𑀯 𑀳𑁄𑀢𑀺, 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄𑀯 𑀳𑁄𑀢𑀺, 𑀓𑀡𑁆𑀡𑀘𑁆𑀙𑀺𑀦𑁆𑀦𑁄… 𑀦𑀸𑀲𑀘𑁆𑀙𑀺𑀦𑁆𑀦𑁄… 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑁄… 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑁄… 𑀅𑀴𑀘𑁆𑀙𑀺𑀦𑁆𑀦𑁄… 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄… 𑀓𑀼𑀡𑀺𑀳𑀢𑁆𑀣𑀓𑁄… 𑀨𑀡𑀳𑀢𑁆𑀣𑀓𑁄… 𑀓𑀼𑀝𑁆𑀞𑀺𑀬𑁄… 𑀕𑀡𑁆𑀟𑀺𑀬𑁄… 𑀓𑀺𑀮𑀸𑀲𑀺𑀬𑁄… 𑀲𑁄𑀲𑀺𑀬𑁄… 𑀅𑀧𑀫𑀸𑀭𑀺𑀬𑁄… 𑀑𑀝𑁆𑀞𑁄… 𑀕𑁄𑀡𑁄… 𑀕𑀤𑁆𑀭𑀪𑁄… 𑀲𑀽𑀓𑀭𑁄… 𑀫𑀳𑀺𑀁𑀲𑁄 𑀫𑀳𑀺𑀁𑀲𑁄𑀯 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁭. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀲𑁄𑀢𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑀮𑁄𑀓𑀸 𑀘𑀼𑀢𑁄 𑀤𑁂𑀯𑀮𑁄𑀓𑀁 𑀉𑀧𑀧𑀦𑁆𑀦𑁄 𑀢𑀢𑁆𑀣𑀧𑀺 𑀲𑁄𑀢𑀸𑀧𑀦𑁆𑀦𑁄𑀯 𑀳𑁄𑀢𑀻𑀢𑀺? 𑀆𑀫𑀦𑁆𑀢𑀸.

𑀳𑀜𑁆𑀘𑀺 𑀲𑁄𑀢𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑀮𑁄𑀓𑀸 𑀘𑀼𑀢𑁄 𑀤𑁂𑀯𑀮𑁄𑀓𑀁 𑀉𑀧𑀧𑀦𑁆𑀦𑁄 𑀢𑀢𑁆𑀣𑀧𑀺 𑀲𑁄𑀢𑀸𑀧𑀦𑁆𑀦𑁄𑀯 𑀳𑁄𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓’’𑀦𑁆𑀢𑀺.

𑁮𑁮. 𑀲𑁄𑀢𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑀮𑁄𑀓𑀸 𑀘𑀼𑀢𑁄 𑀤𑁂𑀯𑀮𑁄𑀓𑀁 𑀉𑀧𑀧𑀦𑁆𑀦𑁄 𑀢𑀢𑁆𑀣𑀧𑀺 𑀲𑁄𑀢𑀸𑀧𑀦𑁆𑀦𑁄𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀢𑁂𑀦 𑀘 𑀓𑀸𑀭𑀡𑁂𑀦 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑀮𑁄𑀓𑀸 𑀘𑀼𑀢𑁄 𑀤𑁂𑀯𑀮𑁄𑀓𑀁 𑀉𑀧𑀧𑀦𑁆𑀦𑁄 𑀢𑀢𑁆𑀣𑀧𑀺 𑀫𑀦𑀼𑀲𑁆𑀲𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁮𑁯. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀦𑀜𑁆𑀜𑁄 𑀅𑀯𑀺𑀕𑀢𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁯𑁦. 𑀅𑀦𑀜𑁆𑀜𑁄 𑀅𑀯𑀺𑀕𑀢𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀳𑀢𑁆𑀣𑀘𑁆𑀙𑀺𑀦𑁆𑀦𑁄𑀯 𑀳𑁄𑀢𑀺, 𑀧𑀸𑀤𑀘𑁆𑀙𑀺𑀦𑁆𑀦𑁄 𑀧𑀸𑀤𑀘𑁆𑀙𑀺𑀦𑁆𑀦𑁄𑀯 𑀳𑁄𑀢𑀺, 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄𑀯 𑀳𑁄𑀢𑀺, 𑀓𑀡𑁆𑀡𑀘𑁆𑀙𑀺𑀦𑁆𑀦𑁄… 𑀦𑀸𑀲𑀘𑁆𑀙𑀺𑀦𑁆𑀦𑁄… 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑁄… 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑁄… 𑀅𑀴𑀘𑁆𑀙𑀺𑀦𑁆𑀦𑁄… 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄… 𑀓𑀼𑀡𑀺𑀳𑀢𑁆𑀣𑀓𑁄… 𑀨𑀡𑀳𑀢𑁆𑀣𑀓𑁄… 𑀓𑀼𑀝𑁆𑀞𑀺𑀬𑁄… 𑀕𑀡𑁆𑀟𑀺𑀬𑁄… 𑀓𑀺𑀮𑀸𑀲𑀺𑀬𑁄… 𑀲𑁄𑀲𑀺𑀬𑁄… 𑀅𑀧𑀫𑀸𑀭𑀺𑀬𑁄… 𑀑𑀝𑁆𑀞𑁄… 𑀕𑁄𑀡𑁄… 𑀕𑀤𑁆𑀭𑀪𑁄… 𑀲𑀽𑀓𑀭𑁄… 𑀫𑀳𑀺𑀁𑀲𑁄 𑀫𑀳𑀺𑀁𑀲𑁄𑀯 𑀳𑁄𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁯𑁧. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀭𑀽𑀧𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀭𑀽𑀧𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀯𑁂𑀤𑀦𑁄…𑀧𑁂… 𑀲𑀲𑀜𑁆𑀜𑁄…𑀧𑁂… 𑀲𑀲𑀗𑁆𑀔𑀸𑀭𑁄…𑀧𑁂… 𑀲𑀯𑀺𑀜𑁆𑀜𑀸𑀡𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀯𑀺𑀜𑁆𑀜𑀸𑀡𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁯𑁨. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀭𑀽𑀧𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀭𑀽𑀧𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀯𑁂𑀤𑀦𑁄…𑀧𑁂… 𑀅𑀲𑀜𑁆𑀜𑁄…𑀧𑁂… 𑀅𑀲𑀗𑁆𑀔𑀸𑀭𑁄…𑀧𑁂… 𑀅𑀯𑀺𑀜𑁆𑀜𑀸𑀡𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀯𑀺𑀜𑁆𑀜𑀸𑀡𑁄 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁯𑁩. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀁 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀽𑀧𑀁 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀯𑁂𑀤𑀦𑀸 …𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁯𑁪. 𑀲𑁆𑀯𑁂𑀯 𑀧𑀼𑀕𑁆𑀕𑀮𑁄 𑀲𑀦𑁆𑀥𑀸𑀯𑀢𑀺 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀧𑀭𑀲𑁆𑀫𑀸 𑀮𑁄𑀓𑀸 𑀇𑀫𑀁 𑀮𑁄𑀓𑀦𑁆𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀁 𑀦 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀭𑀽𑀧𑀁 𑀦 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀯𑁂𑀤𑀦𑀸 …𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀦 𑀲𑀦𑁆𑀥𑀸𑀯𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀦 𑀲𑀦𑁆𑀥𑀸𑀯𑀢𑀻𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. (𑀲𑀁𑀔𑀺𑀢𑁆𑀢𑀁).

𑀔𑀦𑁆𑀥𑁂𑀲𑀼 𑀪𑀺𑀚𑁆𑀚𑀫𑀸𑀦𑁂𑀲𑀼, 𑀲𑁄 𑀘𑁂 𑀪𑀺𑀚𑁆𑀚𑀢𑀺 𑀧𑀼𑀕𑁆𑀕𑀮𑁄;

𑀉𑀘𑁆𑀙𑁂𑀤𑀸 𑀪𑀯𑀢𑀺 𑀤𑀺𑀝𑁆𑀞𑀺, 𑀬𑀸 𑀩𑀼𑀤𑁆𑀥𑁂𑀦 𑀯𑀺𑀯𑀚𑁆𑀚𑀺𑀢𑀸.

𑀔𑀦𑁆𑀥𑁂𑀲𑀼 𑀪𑀺𑀚𑁆𑀚𑀫𑀸𑀦𑁂𑀲𑀼, 𑀦𑁄 𑀘𑁂 𑀪𑀺𑀚𑁆𑀚𑀢𑀺 𑀧𑀼𑀕𑁆𑀕𑀮𑁄;

𑀧𑀼𑀕𑁆𑀕𑀮𑁄 𑀲𑀲𑁆𑀲𑀢𑁄 𑀳𑁄𑀢𑀺, 𑀦𑀺𑀩𑁆𑀩𑀸𑀦𑁂𑀦 𑀲𑀫𑀲𑀫𑁄𑀢𑀺.

𑀕𑀢𑀺𑀅𑀦𑀼𑀬𑁄𑀕𑁄.