𑀅𑀳𑁂𑀢𑀼𑀓𑀓𑀺𑀭𑀺𑀬𑀸𑀅𑀩𑁆𑀬𑀸𑀓𑀢𑀁

𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼

𑁫𑁬𑁬. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀯𑀺𑀘𑀸𑀭𑁄 𑀳𑁄𑀢𑀺, 𑀉𑀧𑁂𑀓𑁆𑀔𑀸 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀆𑀳𑀸𑀭𑀸 𑀳𑁄𑀦𑁆𑀢𑀺, 𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀏𑀓𑀸 𑀫𑀦𑁄𑀥𑀸𑀢𑀼 𑀳𑁄𑀢𑀺, 𑀏𑀓𑀁 𑀥𑀫𑁆𑀫𑀸𑀬𑀢𑀦𑀁 𑀳𑁄𑀢𑀺, 𑀏𑀓𑀸 𑀥𑀫𑁆𑀫𑀥𑀸𑀢𑀼 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑁫𑁬𑁭. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀓𑀺𑀭𑀺𑀬𑀸 𑀫𑀦𑁄𑀥𑀸𑀢𑀼.

𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀸

𑁫𑁬𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀯𑀺𑀘𑀸𑀭𑁄 𑀳𑁄𑀢𑀺, 𑀧𑀻𑀢𑀺 𑀳𑁄𑀢𑀺, 𑀲𑀼𑀔𑀁 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁬𑁯. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀨𑀼𑀲𑀦𑀸 𑀲𑀁𑀨𑀼𑀲𑀦𑀸 𑀲𑀁𑀨𑀼𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂….

𑁫𑁭𑁦. 𑀓𑀢𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺.

𑁫𑁭𑁧. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀓𑁆𑀓𑀫𑁄 𑀧𑀭𑀓𑁆𑀓𑀫𑁄 𑀉𑀬𑁆𑀬𑀸𑀫𑁄 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄 𑀉𑀲𑁆𑀲𑁄𑀴𑁆𑀳𑀻 𑀣𑀸𑀫𑁄 𑀥𑀺𑀢𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀩𑀮𑀁 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺.

𑁫𑁭𑁨. 𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺? 𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁 𑁋 𑀇𑀤𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺…𑀧𑁂… 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀆𑀳𑀸𑀭𑀸 𑀳𑁄𑀦𑁆𑀢𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑁄𑀢𑀺, 𑀏𑀓𑀁 𑀥𑀫𑁆𑀫𑀸𑀬𑀢𑀦𑀁 𑀳𑁄𑀢𑀺, 𑀏𑀓𑀸 𑀥𑀫𑁆𑀫𑀥𑀸𑀢𑀼 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑁫𑁭𑁩. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀓𑀺𑀭𑀺𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸.

𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀉𑀧𑁂𑀓𑁆𑀔𑀸𑀲𑀳𑀕𑀢𑀸

𑁫𑁭𑁪. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀯𑀺𑀘𑀸𑀭𑁄 𑀳𑁄𑀢𑀺, 𑀉𑀧𑁂𑀓𑁆𑀔𑀸 𑀳𑁄𑀢𑀺, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀳𑁄𑀢𑀺, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁄𑀦𑁆𑀢𑀺, 𑀢𑀬𑁄 𑀆𑀳𑀸𑀭𑀸 𑀳𑁄𑀦𑁆𑀢𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀏𑀓𑁄 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑁄𑀢𑀺, 𑀏𑀓𑀁 𑀥𑀫𑁆𑀫𑀸𑀬𑀢𑀦𑀁 𑀳𑁄𑀢𑀺, 𑀏𑀓𑀸 𑀥𑀫𑁆𑀫𑀥𑀸𑀢𑀼 𑀳𑁄𑀢𑀺; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂….

𑁫𑁭𑁫. 𑀓𑀢𑀫𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺? 𑀨𑀲𑁆𑀲𑁄 𑀘𑁂𑀢𑀦𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁; 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁 𑁋 𑀅𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀓𑀺𑀭𑀺𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀸.

𑀅𑀳𑁂𑀢𑀼𑀓𑀸 𑀓𑀺𑀭𑀺𑀬𑀸 𑀅𑀩𑁆𑀬𑀸𑀓𑀢𑀸.

𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸

𑁫𑁭𑁬. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀲𑀗𑁆𑀔𑀸𑀭𑁂𑀦 𑀭𑀽𑀧𑀸𑀭𑀫𑁆𑀫𑀡𑀸 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀸 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺 …𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂… 𑀅𑀮𑁄𑀪𑁄 𑀅𑀩𑁆𑀬𑀸𑀓𑀢𑀫𑀽𑀮𑀁…𑀧𑁂… 𑀅𑀤𑁄𑀲𑁄 𑀅𑀩𑁆𑀬𑀸𑀓𑀢𑀫𑀽𑀮𑀁…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀲𑀳𑁂𑀢𑀼𑀓𑀸 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸.

𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸

𑁫𑁭𑁭. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁭𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁…𑀧𑁂… 𑀧𑀞𑀫𑀁 𑀛𑀸𑀦𑀁…𑀧𑁂… 𑀧𑀜𑁆𑀘𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸.

𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸

𑁫𑁭𑁯. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁮𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁮𑁧. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁫𑁮𑁨. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀓𑀺𑀭𑀺𑀬𑀁 𑀦𑁂𑀯 𑀓𑀼𑀲𑀮𑀁 𑀦𑀸𑀓𑀼𑀲𑀮𑀁 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸…𑀧𑁂… 𑀅𑀮𑁄𑀪𑁄 𑀅𑀩𑁆𑀬𑀸𑀓𑀢𑀫𑀽𑀮𑀁…𑀧𑁂… 𑀅𑀤𑁄𑀲𑁄 𑀅𑀩𑁆𑀬𑀸𑀓𑀢𑀫𑀽𑀮𑀁…𑀧𑁂… 𑀅𑀫𑁄𑀳𑁄 𑀅𑀩𑁆𑀬𑀸𑀓𑀢𑀫𑀽𑀮𑀁…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸.

𑀓𑀺𑀭𑀺𑀬𑀸 𑀅𑀩𑁆𑀬𑀸𑀓𑀢𑀸.

𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.