𑁧. 𑀲𑀜𑁆𑀜𑀸𑀧𑀭𑀺𑀪𑀸𑀲𑀸𑀦𑀺𑀤𑁆𑀤𑁂𑀲-𑀧𑀞𑀫𑀧𑀭𑀺𑀘𑁆𑀙𑁂𑀤

𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫

𑁧. 𑀦𑀫’𑀢𑁆𑀣𑀼 𑀚𑀦 𑀲𑀦𑁆𑀢𑀸𑀦, 𑀢𑀫 𑀲𑀦𑁆𑀢𑀸𑀦 𑀪𑁂𑀤𑀺𑀦𑁄;

𑀥𑀫𑁆𑀫𑀼’𑀚𑁆𑀚𑀮𑀦𑁆𑀢 𑀭𑀼𑀘𑀺𑀦𑁄, 𑀫𑀼𑀦𑀺𑀦𑁆𑀤𑁄’𑀤𑀸𑀢 𑀭𑁄𑀘𑀺𑀦𑁄.

𑀦𑀺𑀫𑀺𑀢𑁆𑀢

𑁨. 𑀧𑀺𑀗𑁆𑀕𑀮𑀸’𑀘𑀭𑀺𑀬𑀸𑀤𑀻𑀳𑀺, 𑀙𑀦𑁆𑀤𑀁 𑀬 𑀫𑀼𑀤𑀺𑀢𑀁 𑀧𑀼𑀭𑀸;

𑀲𑀼𑀤𑁆𑀥𑀫𑀸𑀕𑀥𑀺𑀓𑀸𑀦𑀁 𑀢𑀁, 𑀦 𑀲𑀸𑀥𑁂𑀢𑀺 𑀬𑀣𑀺𑀘𑁆𑀙𑀺𑀢𑀁 [𑀬’𑀤𑀺𑀘𑁆𑀙𑀺𑀢𑀁 𑀬𑀢𑀺’𑀘𑁆𑀙𑀺𑀢𑀁 (𑀓.)].

𑀕𑀦𑁆𑀣𑀧𑀭𑀺𑀫𑀸𑀡

𑁩. 𑀢𑀢𑁄 𑀫𑀸𑀕𑀥𑀪𑀸𑀲𑀸𑀬, 𑀫𑀢𑁆𑀢𑀸,𑀯𑀡𑁆𑀡,𑀯𑀺𑀪𑁂𑀤𑀦𑀁;

𑀮𑀓𑁆𑀔𑁆𑀬 𑀮𑀓𑁆𑀔𑀡 𑀲𑀁𑀬𑀼𑀢𑁆𑀢𑀁, 𑀧𑀲𑀦𑁆𑀦’𑀢𑁆𑀣,𑀧𑀤,𑀓𑁆𑀓𑀫𑀁.

𑀅𑀪𑀺𑀥𑀸𑀦𑀸𑀤𑀺

𑁪. 𑀇𑀤𑀁 𑀯𑀼𑀢𑁆𑀢𑁄𑀤𑀬𑀁 𑀦𑀸𑀫, 𑀮𑁄𑀓𑀺𑀬’𑀘𑁆𑀙𑀦𑁆𑀤𑀦𑀺𑀲𑁆𑀲𑀺𑀢𑀁;

𑀆𑀭𑀪𑀺𑀲𑁆𑀲’𑀫𑀳𑀁 𑀤𑀸𑀦𑀺, 𑀢𑁂𑀲𑀁 𑀲𑀼𑀔𑀯𑀺𑀩𑀼𑀤𑁆𑀥𑀺𑀬𑀸.

𑀕𑀡𑀲𑀗𑁆𑀓𑁂𑀢𑀲𑀜𑁆𑀜𑀸

𑁫. 𑀲𑀩𑁆𑀩𑀕𑁆𑀮𑀸 𑀫𑁆𑀦𑀸,’𑀤𑀺𑀕𑀮𑀳𑀽, 𑀪𑁆𑀬𑀸’,𑀫𑀚𑁆𑀛’𑀦𑁆𑀢 𑀕𑀭𑀽 𑀚𑀲𑀸;

𑀫𑀚𑁆𑀛’𑀦𑁆𑀢𑀮𑀸 𑀭,𑀢𑁂’𑀢𑁂’𑀝𑁆𑀞, 𑀕𑀡𑀸 𑀕𑁄 𑀕𑀭𑀼,𑀮𑁄 𑀮𑀳𑀼.

𑀕𑀡𑀦𑀺𑀬𑀫

𑁬. 𑀪,𑀚,𑀲𑀸 𑀲𑀩𑁆𑀩𑀕,𑀮𑀳𑀽, 𑀧𑀜𑁆𑀘𑀺’𑀫𑁂 𑀲𑀡𑁆𑀞𑀺𑀢𑀸 𑀕𑀡𑀸;

𑀅𑀭𑀺𑀬𑀸𑀤𑀺𑀫𑁆𑀳𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀕𑀡𑁄 𑀇𑀥 𑀘𑀢𑀼’𑀓𑁆𑀓𑀮𑁄.

𑀕𑀭𑀼,𑀮𑀳𑀼𑀲𑀭𑀽𑀧

𑁭. 𑀲𑀁𑀬𑁄𑀕𑀸’𑀤𑀺 𑀘, 𑀤𑀻𑀖𑁄 𑀘, 𑀦𑀺𑀕𑁆𑀕𑀳𑀻𑀢𑀧𑀭𑁄 𑀘, 𑀬𑁄;

𑀕𑀭𑀼, 𑀯𑀗𑁆𑀓𑁄, 𑀧𑀸𑀤𑀦𑁆𑀢𑁄,𑀯𑀸, 𑀭𑀲𑁆𑀲𑁄’𑀜𑁆𑀜𑁄 𑀫𑀢𑁆𑀢𑀺𑀓𑁄 𑀮𑀼’𑀚𑀼.

𑁮. 𑀧𑀭𑁂 𑀧𑀸𑀤𑀸𑀤𑀺𑀲𑀁𑀬𑁄𑀕𑁂, 𑀬𑁄 𑀧𑀼𑀩𑁆𑀩𑁄 𑀕𑀭𑀼𑀓’𑀓𑁆𑀔𑀭𑁄;

𑀮𑀳𑀼 𑀲 𑀓𑁆𑀯𑀘𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀢𑀤𑀼𑀤𑀸𑀳𑀭𑀡𑀁 𑀬𑀣𑀸.

𑁯. 𑀤𑀲𑁆𑀲𑀦𑀭𑀲𑀸’𑀦𑀼𑀪𑀸𑀯𑀦𑁂, 𑀦𑀺𑀩𑀤𑁆𑀥𑀕𑁂𑀥𑀸 𑀚𑀺𑀦𑀲𑁆𑀲’𑀬𑀁 𑀚𑀦𑀢𑀸;

𑀯𑀺𑀫𑁆𑀳𑀬𑀚𑀦𑀦𑀻 𑀲𑀜𑁆𑀜𑀢, 𑀓𑁆𑀭𑀺𑀬𑀸 𑀦𑀼 𑀓𑀁 𑀦𑀸’𑀦𑀼𑀭𑀜𑁆𑀚𑀬𑀢𑀺.

𑁧𑁦. 𑀯𑀺𑀜𑁆𑀜𑁂𑀬𑁆𑀬𑀸 𑀮𑁄𑀓𑀢𑁄 𑀲𑀜𑁆𑀜𑀸, 𑀲𑀫𑀼𑀤𑁆𑀤𑁄,𑀲𑀼,𑀭𑀲𑀸𑀤𑀺𑀦𑀁;

𑀧𑀸𑀤𑁄𑀜𑁂𑀬𑁆𑀬𑁄 𑀘𑀢𑀼𑀢𑁆𑀣𑀁’𑀲𑁄, 𑀧𑀤𑀘𑁆𑀙𑁂𑀤𑁄 𑀬𑀢𑀻 𑀪𑀯𑁂.

𑁧𑁧. 𑀲𑀫,𑀫𑀟𑁆𑀠𑀲𑀫𑀁, 𑀯𑀼𑀢𑁆𑀢𑀁, 𑀯𑀺𑀲𑀫𑀁 𑀘𑀸’𑀧𑀭𑀁 𑀢𑀺𑀥𑀸;

𑀲𑀫𑀸 𑀮𑀓𑁆𑀔𑀡𑀢𑁄 𑀧𑀸𑀤𑀸, 𑀘𑀢𑁆𑀢𑀸𑀭𑁄 𑀬𑀲𑁆𑀲 𑀢𑀁 𑀲𑀫𑀁.

𑁧𑁨. 𑀬𑀲𑁆𑀲’𑀦𑁆𑀢𑀺𑀫𑁂𑀦 𑀤𑀼𑀢𑀺𑀬𑁄, 𑀢𑀢𑀺𑀬𑁂𑀦𑀸’𑀤𑀺𑀫𑁄 𑀲𑀫𑁄;

𑀢’𑀤𑀟𑁆𑀠𑀲𑀫, 𑀫𑀜𑁆𑀜𑀁 𑀢𑀼, 𑀪𑀺𑀦𑁆𑀦 𑀮𑀓𑁆𑀔𑀡 𑀧𑀸𑀤𑀺𑀓𑀁.

𑁧𑁩. 𑀧𑀸𑀤’𑀫𑁂𑀓𑀓𑁆𑀔𑀭𑀸’𑀭𑀩𑁆𑀪, 𑀬𑀸𑀯 𑀙𑀩𑁆𑀩𑀻𑀲𑀢’𑀓𑁆𑀔𑀭𑀸;

𑀪𑀯𑁂 𑀧𑀸𑀤𑁂𑀳𑀺 𑀢𑀁 𑀙𑀦𑁆𑀤𑀁, 𑀦𑀸𑀦𑀸𑀦𑀸𑀫𑁄’𑀤𑀺𑀢𑀁 𑀢𑀢𑁄.

𑁧𑁪. 𑀤𑀡𑁆𑀟𑀓𑀸 𑀘𑀡𑁆𑀟𑀯𑀼𑀝𑁆𑀞𑁆𑀬𑀸’𑀤𑀺, 𑀧𑀸𑀤𑁂𑀳𑀺 𑀙𑀳𑀺, 𑀢𑀻𑀳𑀺 𑀢𑀼;

‘𑀕𑀸𑀣𑀸’𑀢𑀺 𑀘 𑀧𑀭𑀢𑁆𑀣𑁂’𑀯𑀁, 𑀙𑀦𑁆𑀤𑁄 𑀲𑀜𑁆𑀜𑀸 𑀧𑀓𑀸𑀲𑀺𑀢𑀸.

𑁧𑁫. 𑀅𑀦𑀦𑁆𑀢𑀭𑁄’𑀤𑀺𑀢𑀁 𑀘’𑀜𑁆𑀜, 𑀫𑁂𑀢𑀁 𑀲𑀸𑀫𑀜𑁆𑀜 𑀦𑀸𑀫𑀢𑁄;

‘𑀕𑀸𑀣𑀸’𑀇𑀘𑁆𑀘𑁂𑀯 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀼𑀦𑀺𑀦𑁆𑀤𑀯𑀘𑀦𑁂 𑀧𑀦.

𑁧𑁬. 𑀯𑀺𑀲𑁂𑀲𑀦𑀸𑀫𑀢𑁄 𑀓𑀺𑀜𑁆𑀘𑀺, 𑀕𑀳𑁂𑀢𑁆𑀯𑀸 𑀲𑀩𑁆𑀩𑀣𑁄’𑀘𑀺𑀢𑀁;

𑀤𑀲𑁆𑀲𑀬𑀺𑀲𑁆𑀲𑀸𑀫’𑀳𑀁 𑀢𑁂’𑀢𑁆𑀣, 𑀦𑀸𑀫𑀸𑀦𑀸’𑀯𑀺 𑀪𑀯𑀺𑀲𑁆𑀲𑀭𑁂.

𑀇𑀢𑀺 𑀯𑀼𑀢𑁆𑀢𑁄𑀤𑀬𑁂 𑀙𑀦𑁆𑀤𑀲𑀺 𑀲𑀜𑁆𑀜𑀸𑀧𑀭𑀺𑀪𑀸𑀲𑀸 𑀦𑀺𑀤𑁆𑀤𑁂𑀲𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.